Analistët kanë deklaruar se programet sociale dhe ofensiva politike e Kurtit sollën fitoren e madhe të Vetëvendosjes.

Analisti Sadri Ramabaja ka deklaruar në emisionin Debat Plus se fitorja e Lëvizjes Vetëvendosje në zgjedhje erdhi si rezultat i fokusimit të saj në tri grupe kyçe të qytetarëve.

Sipas Ramabajës, këto grupe janë pensionistët, lehonat dhe fëmijët, të cilët janë përfshirë për herë të parë në mënyrë të strukturuar në politikat qeveritare gjatë mandatit Kurti II.

“Tri grupe që i ka prekur fuqishëm dhe i ka trajtuar në mënyrën relativisht më të mirë të mundshme sipas programit socialdemokrat janë: grupi i pensionistëve; pastaj një numër i madh, mbi 200 mijë, i lehonave; dhe shtesat për fëmijë, që janë për herë të parë në Qeverinë Kurti II,” ka thënë Ramabaja, duke shtuar se qeveritë e mëhershme nuk ishin përkushtuar mjaftueshëm ndaj këtyre kategorive.

Ndërkohë, analisti Ylli Hoxha ka theksuar se fitorja e Vetëvendosjes në zgjedhjet e 28 dhjetorit është rezultat i punës së vazhdueshme dhe ofensivës politike të liderit të kësaj partie, Albin Kurti.

Sipas Hoxhës, Kurti ka punuar për këtë rezultat që nga 9 shkurti e deri në ditën e zgjedhjeve, pa asnjë ndërprerje.

“Kurti ka qenë aktori politik që ka treguar zell për të luftuar për pozicionin e vet. Prej 9 shkurtit e deri dje kurrë nuk u nal, gjithmonë ka pasur ofensivë politike. Asnjë javë nuk ka kaluar pa veprim,” ka deklaruar ai.

Në anën tjetër, analisti Astrit Gashi ka folur për ndëshkimin elektoral të opozitës, duke e lidhur atë me qasjen e saj ndaj Lëvizjes Vetëvendosje.

Gashi ka hedhur poshtë pretendimet se opozita, në veçanti Lidhja Demokratike e Kosovës, ka qenë e butë ndaj Vetëvendosjes.

“Në rastin e LDK-së kjo është krejtësisht e pasaktë,” ka deklaruar ai, duke shtuar se ndëshkimi i kësaj partie ka ardhur pikërisht për shkak të qëndrimit të saj opozitar ndaj Vetëvendosjes.

Sipas Gashit, votuesi i LDK-së e ka ndëshkuar partinë e vet për shkak të mosbashkëpunimit me Vetëvendosjen, duke e reflektuar këtë pakënaqësi përmes votës.

Derisa analisti Visar Ymeri ka kritikuar partitë opozitare, duke thënë se opozita nuk bëhet vetëm vitin e fundit, por duhet të jetë aktive gjatë gjithë mandatit.

“Opozitarizmi nuk bëhet vetëm vitin e fundit ose pak para zgjedhjeve. Ti badihava bën opozitarizëm para zgjedhjeve nëse nuk ke bërë gjatë tërë kohës,” ka thënë ai, duke e krahasuar me periudhën kur Vetëvendosje ishte në opozitë.

Ai ka shtuar se sa i përket ligjeve që opozita i ka dërguar në Gjykatë, kjo është formë e opozitarizmit të duhur, por sipas tij “nuk është i dukshëm”.

“Unë mendoj që një prej të metave që kanë, e kanë pasur – tash besoj që e ndryshojnë – partitë opozitare, nuk kanë qenë domosdoshmërisht vendimet dhe qëndrimet që i kanë mbajtur, por ka qenë mungesa e interesimit të tyre të duhur për t’i paraqitur ato në publik dhe për t’i bërë të besueshme për publikun,” ka thënë Ymeri./Telegrafi/

- YouTube youtu.be

Eurodeputeti austriak Andreas Schieder ka uruar kreun e VV-së Albin Kurtin dhe Lëvizjen Vetëvendosje për fitoren në zgjedhjet e 28 dhjetorit.

“Ka ardhur koha për një qeveri të qëndrueshme që të udhëheqë përpara integrimin evropian të Kosovës dhe reformat e nevojshme në vend”, ka shkruar ai në X.

Komisioni Qendror i Zgjedhjeve (KQZ) njofton se në Qendrat Komunale të Numërimit (QKN) po vazhdon numërimi i votave të kandidatëve për deputetë dhe verifikimi i rezultateve të subjekteve politike nga formularët e vendvotimeve.

Aktualisht është përpunuar mbi 20% e votave.

Sipas të dhënave të deritanishme, 10 kandidat nga Lëvizjen Vetëvendosje kanë krijuar një diferencë me të të tjerët.

Renditja e kandidatëve më të votuar të Vetëvendosjes (deri tani):

1. Albin Kurti – 69,000 vota
2. Glauk Konjufca – 53,856 vota
3. Hekuran Murati – 28,124 vota
4. Albulena Haxhiu – 27,752 vota
5. Donika Gërvalla-Schwarz – 24,175 vota
6. Xhelal Sveçla – 21,940 vota
7. Hajrulla Çeko – 20,252 vota
8. Avni Dehari – 17,942 vota
9. Mimoza Kusari-Lila – 16,807 vota
10. Ejup Maqedonci – 15,606 vota

Mbipopullimi i banesave mbetet një nga problemet sociale më serioze në Shqipëri.

Raporti i funditi i Eurostat ka nxjerr në pah se 57.1% e shqiptarëve jetojnë në banesa të mbipopulluara, duke e renditur vendin tonë të dytin në Europë, pas Malit të Zi për vështirësitë e mëdha në kushtet e banimit dhe në nivelin e jetesës.

Sipas përkufizimit zyrtar, një banesë konsiderohet e mbipopulluar kur nuk plotëson numrin minimal të dhomave të nevojshme për përbërjen familjare. Ky minimum përfshin: një dhomë për familjen, një dhomë për çdo çift, një dhomë për çdo person të vetëm mbi 18 vjeç apo një dhomë për çdo dy fëmijë të së njëjtës gjini nga 12 deri në 17 vjeç.

Fenomeni i mbipopullimit të banesave nuk është i kufizuar vetëm në Shqipëri. Në nivel evropian, të dhënat tregojnë se në vitin 2024 rreth 16.9% e popullsisë së Bashkimit Europian jetonte në banesa të mbipopulluara.

Raporti citon se situata mbetet shqetësuese në disa vende të BE-së. Më shumë se 30% e popullsisë në pesë shtete anëtare jeton në kushte mbipopullimi.

Ekspertët paralajmërojnë se mbipopullimi i banesave ka pasoja të drejtpërdrejta në shëndetin, mirëqenien dhe zhvillimin social të individëve, veçanërisht të fëmijëve, duke e bërë këtë një problem serioz social dhe ekonomik që kërkon vëmendje të shtuar institucionale.

Ndërsa po afrohet nata e ndërrimit të viteve, qytetarët e Durrësit po përballen me një rritje të ndjeshme të çmimeve të produkteve ushqimore, që po e bën gjithnjë e më të vështirë përgatitjen e tryezës së festave.

Perimet, frutat dhe mishi po shiten me çmime të larta, të papërballueshme për shumë familje, veçanërisht për pensionistët, të cilët thonë se të ardhurat mujore nuk mjaftojnë as për shpenzimet bazë.

“Nuk ka ku të shkojë më shumë. Kastraveci 180–200 lekë, janë rritur për Krishtlindje. Më keq se kaq nuk bëhet. Një pension kemi. Mishi do të na mungojë, nuk kemi mundësi.”

“Çmimet janë shumë të shtrenjta, nuk janë të përballueshme me pensionet që marrim ne. Me mundësitë që kemi, do mundohemi ta përballojmë, por çmimet janë shumë keq.”

“Çmimet janë jashtëzakonisht keq, më të shtrenjta se në Itali. Tani janë edhe më keq. Gjeli i detit është traditë, por ne tani nuk e blejmë dot. Nuk kemi lekë.”

“Për pensionistët nuk janë të përballueshme. Kështu do ta shtyjmë. Gjelin e detit as që bëhet fjalë ta blej, çmimi është në stratosferë. 9 mijë lekë kilogrami, nuk e përballojmë dot.”

“Për ne pensionistët janë shumë të shtrenjta. Gjelin e detit nuk e blejmë dot, se nuk kemi. Unë jam pa pension, me pensionin e burrit nuk e përballojmë dot, kështu që marrim ndonjë gjë të thjeshtë.”

Kështu janë shprehur qytetarët, që për shumë familje festat e fundvitit nuk maten më me bollëk në tryezë, por me përpjekjen për t’ia dalë deri në fund të muajit. Rritja e çmimeve po e zbeh festën, duke e kthyer Vitin e Ri për pensionistët dhe shtresat në nevojë në një sfidë më shumë sesa në një gëzim.

Ish-deputeti i Lidhjes Demokratike të Kosovës (LDK), Agim Veliu, ka reaguar pas rezultatit zgjedhor të partisë, duke kërkuar përgjegjësi politike dhe reflektim të thellë brenda saj.

Në një reagim publik, Veliu ka theksuar se humbjet e njëpasnjëshme të LDK-së nuk janë rastësi, por “verdikt i qartë politik”, duke shtuar se mungesa e reflektimit pas tyre nuk përbën më thjesht gabim, por refuzim të përgjegjësisë.

Sipas tij, një parti që synon besimin e qytetarëve nuk mund të sillet sikur humbjet nuk kanë autor, ndërsa mbyllja ndaj kritikës, mungesa e analizës dhe kapja e vendimmarrjes kanë dëmtuar rëndë LDK-në dhe e kanë larguar nga misioni i saj.

Veliu ka kërkuar publikisht dhe pa ekuivoke: llogaridhënie politike për humbjet zgjedhore, transparencë të plotë mbi proceset e vendimmarrjes brenda partisë, dhe hapjen e menjëhershme të një procesi demokratik të brendshëm, me garë reale në të gjitha nivelet.

“Askush nuk është mbi partinë. Askush nuk ka mandat të përhershëm nga humbja”, ka shkruar ai, duke paralajmëruar se pa reflektim dhe ndryshim, drejtimi aktual i LDK-së nuk mund të mbrohet dhe nuk i shërben të ardhmes së partisë./Telegrafi/

Mediat botërore kanë raportuar të hënën gjerë e gjatë për rezultatin zgjedhor të dalë pas zgjedhjeve, të cilat u mbajtën më 28 dhjetor.

“The Guardian” ka shkruar se kryetari i Lëvizjes Vetëvendosje, Albin Kurti, ka shënuar një fitore bindëse në zgjedhjet e parakohshme, duke i dhënë fund bllokadës politike në Kosovë.

Në artikull thuhet se fitorja në zgjedhjet e së dielës forcon mandatin e Kurtit për të çuar përpara reformat e brendshme, përfshirë zgjerimin e skemave të mirëqenies sociale dhe rritjen e pagave për punëtorët e sektorit publik.

“Megjithatë, ai përballet me sfida të mëdha, përfshirë tensionet me Serbinë, si dhe me sistemet shëndetësore dhe arsimore që mbesin prapa krahasuar me vendet fqinje të Ballkanit. Me pothuajse të gjitha votat e numëruara, Lëvizja Vetëvendosje e udhëhequr nga Kurti ka marrë mbi 49 për qind të votave, sipas rezultateve zyrtare, që nënkupton se atij i nevojiten vetëm disa partnerë të vegjël koalicioni për të formuar shumicën parlamentare”, ka shkruar “The Guardian”.

Jehona në mediat gjermane e zgjedhjeve në Kosovë

Deutsche Welle ka shkruar se partia në pushtet Vetëvendosje, e udhëhequr nga kryeministri Kurti, ka fituar gati 50 për qind të votave, pas bllokadës disamujore prej zgjedhjeve të shkurtit.

Al Jazeera ka raportuar se Kurti ka fituar gjysmën e votave të zgjedhjeve të së dielës, duke hapur rrugën për të formuar qeverinë e re pas bllokadës disamujore.

E “Politico” ka shkruar se Kurti ka deklaruar se synon të formojë shpejt një qeveri të re, pasi rezultatet paraprake treguan se partia e tij është në rrugë të mbarë për të fituar bindshëm zgjedhjet e parakohshme parlamentare të mbajtura të dielën.

“Lëvizja Vetëvendosje, parti e majtë në pushtet, ka fituar rreth 49 për qind të votave në një proces zgjedhor që u konsiderua jetik për t’i dhënë fund krizës politike njëvjeçare dhe për të ringjallur shpresat e bllokuara të vendit për anëtarësim në Bashkimin Evropian”, thuhet në artikull.

BBC në një artikull që i kushtohet rezultatit zgjedhor ka shkruar se partia nacionaliste shqiptare Vetëvendosje ka shënuar fitore bindëse në zgjedhjet parlamentare në Kosovë, sipas rezultateve paraprake.

“Me 90 për qind të votave të numëruara, kjo parti – emri i së cilës do të thotë “vetëvendosje” – ka marrë 50.8 për qind të votave, duke ia siguruar një mandat të tretë në pushtet liderit të saj Albin Kurti”, thuhet në artikull. “Dy partitë kryesore opozitare, Partia Demokratike e Kosovës (PDK), e qendrës së djathtë, dhe Lidhja Demokratike e Kosovës (LDK) kanë marrë përkatësisht 20.98 për qind dhe 13.89 për qind të votave. Vetëvendosje kishte fituar edhe zgjedhjet e mbajtura në shkurt, por pa arritur të sigurojë shumicën parlamentare. Që nga ajo kohë Kosova ka qenë pa një qeveri funksionale”.

E në artikullin e Euronews thuhet se partia e majtë Vetëvendosje ka shënuar një fitore bindëse në zgjedhjet parlamentare, pas një bllokade politike 10-mujore që kishte pamundësuar formimin e qeverisë pas zgjedhjeve të mbajtura në shkurt.

“Partia e kryeministrit të Kosovës, Albin Kurti, ka dalë fituese bindëse në zgjedhjet e parakohshme parlamentare të mbajtura të dielën, tregojnë rezultatet paraprake, duke e pozicionuar atë për një mandat tjetër qeverisës. Sipas Komisionit Qendror të Zgjedhjeve, pas numërimit të pothuajse të gjitha fletëvotimeve, Lëvizja Vetëvendosje (LVV) ka fituar rreth 50 për qind të votave, dukshëm përpara dy partive të qendrës së djathtë, Partisë Demokratike të Kosovës (PDK) me 21 për qind dhe Lidhjes Demokratike të Kosovës (LDK) me afro 14 për qind të votave”, thuhet në artikull.

Kryeministri në detyrë dhe kryetari i Lëvizjes Vetëvendosje, Albin Kurti ka thënë se e ardhmja e Kosovës është e orientuar fuqishëm drejt Bashkimit Evropian.

Një ditë pas zgjedhjeve përmes platformës X, ka falënderuar të gjithë ata që ushtruan të drejtën e tyre për të votuar, si dhe të gjithë ata që kontribuuan që procesi zgjedhor të ishte i lirë, i drejtë dhe të zhvillohej pa incidente.

“Jemi mirënjohës për mbështetjen ndërkombëtare gjatë gjithë këtij procesi, nga Bashkimi Evropian, vendet individuale dhe organizatat ndërkombëtare, të cilat vazhdojnë të mbështesin përparimin demokratik të Kosovës”, tha ai.

“Dje, qytetarët e Kosovës na dhanë edhe një herë një mandat të fuqishëm. Është gjithmonë nder të fitosh besimin e popullit, veçanërisht kur ai vjen pas përfundimit të mandatit të parë të plotë në historinë e vendit. Dëshirojmë të falënderojmë të gjithë ata që ushtruan të drejtën e tyre për të votuar, si dhe të gjithë ata që kontribuuan që procesi zgjedhor të ishte i lirë, i drejtë dhe të zhvillohej pa incidente. Jemi mirënjohës për mbështetjen ndërkombëtare gjatë gjithë këtij procesi, nga Bashkimi Evropian, vendet individuale dhe organizatat ndërkombëtare, të cilat vazhdojnë të mbështesin përparimin demokratik të Kosovës. Një falënderim i veçantë për partitë tona motra dhe për lëvizjen më të gjerë progresive, teksa angazhohemi për ndërtimin e shoqërive ku dinjiteti dhe mirëqenia e njerëzve janë në qendër. E ardhmja e Kosovës është e begatë dhe e orientuar fuqishëm drejt Bashkimit Evropian”, ka shkruar ai në X.

AAK-ja ka marrë afro 6% të votave të rregullta, pa përfshirë ato të personave me aftësi të kufizuara, votat me kusht dhe ato me postë.

Kur janë numëruar rreth 10 përqind e votave të kandidatëve për deputetë, ndër më të votuarit e AAK-së janë:

Ramush Haradinaj, 4,109 vota.

Daut Haradinaj, 2,614 vota.

Besnik Tahiri, 2,497 vota.

Bekë Berisha, 1,773 vota.

Burim Ramadani, 1,651 vota.

Time Kadrijaj, 1,636 vota.

Agim Çeku, 1,570 vota.

Arber Tolaj, 1,415 vota.

Lahi Brahimaj 1,030 vota.

Arton Demhasaj, 762 vota.

Komisioni Qendror i Zgjedhjeve ka filluar qysh nga ora 12:00 numërimin e votave për kandidatë për deputetë.

Kur janë numëruar mbi 8 për qind e votave, në listën e PDK-së befason Arian Tahiri i cili po radhitet i dyti pas Bedri Hamzës, me plot 6235 vota, derisa i pari i PDK-së ka 12,584 vota.

Përparim Gruda, 5,907 vota.

Uran Ismaili, 4,361 vota.

Sala Jashari, 4,269 vota.

Vlora Çitaku, 3,506 vota.

Arben Mustafa, 3,280 vota.

Enver Hoxhaj, 2,865 vota.

Rrahman Rama, 2,339 vota.

Ganimete Musliu 2,296.

Eman Rrahmani, 2,273 vota.

Ministri në detyrë i Financave, Hekuran Murati, ka njoftuar se është ekzekutuar pagesa e shtesës së njëhershme prej 100 eurosh për kategori të ndryshme përfituesish.

Sipas Muratit, transferimi është realizuar sot, ashtu siç kishte paralajmëruar kryeministri Albin Kurti javën e kaluar. Shtesa prej 100 eurosh përfshin fëmijët e moshës 0–16 vjeç, si dhe përfituesit e pensioneve bazike dhe kontributive, kategoritë e dala nga lufta, personat me aftësi të kufizuara dhe përfitues të skemave të tjera sociale, sipas kritereve të përcaktuara me vendim qeveritar.

Ai theksoi se, varësisht nga banka ku përfituesit kanë llogaritë e tyre, mjetet financiare do të reflektohen në orët në vijim.

Në fund të njoftimit, Murati ka uruar qytetarët me rastin e ndërrimit të viteve, duke përcjellë mesazhin: “Gëzuar Vitin e Ri!”.

Hysni Ymeri është personi, i cili humbi jetën si pasojë e një shpërthimi të ndodhur në zonën e Perashit në Shkodër.

Shkaqet e ngjarjes mbeten ende të paqarta.

Burime zyrtare nga OSHEE bëjnë me dije se, sipas verifikimeve paraprake, shpërthimi nuk dyshohet të ketë ardhur nga energjia elektrike, duke argumentuar se fuqia e shpërthimit ka qenë shumë e madhe, ndërkohë që në vendin ku ndodhi eksplozioni ndodhej një panel me mates elektrik me tension deri në 400 volt që teorikisht dhe teknikisht sipas OSHEE është e pamundur që të sjellin atë shpërthim aq të fuqishëm.

Ndërkohë, grupi i antiterrorit, i cili erdhi nga Tirana ka kryer kqyrjen e vendngjarjes dhe nuk ka konstatuar me sy të lirë mbetje të lëndëve eksplozive, por ka mbledhur materialet të cilat do t’i nënshtrohen analizave laboratorike. Analiza kimike është ajo që do ta përcaktojë nëse ka patur apo jo tritol.

Nga ana tjetër ekspertiza mjeko ligjore në spitalin e Shkodrës pas kqyrjes së trupit të viktimës e ka përcaktuar humbjen e jetës të 67-vjeçarit për shkak të energjisë elektrike.

Sipas këtij raporti, viktima ka të dëmtuar dorën e djathtë nga kontakti me korrentin si dhe ka dëmtime në koka nga djegia ndërsa në trup është i padëmtuar. Fakti që ka dorën e djathtë të nxirë nga energjia elektrike dhe jo të majtën e cila ishte në anën e panelit elektrik kur tentoi të ngjitej në pallat, ka bindur grupin mjeko ligjor që ta përcaktojnë vdekjen nga kontakti me korrentin duke shtuar edhe djegien nga flakët në kokë.

Djali i viktimës, Alban Ymeri deklaroi për policinë se nuk kanë probleme me askënd dhe se nuk kanë patur kërcënime.

Gjithsesi hetimet po vijojnë për të përcaktuar shkakun e saktë të shpërthimit, ndërsa autoritetet nuk përjashtojnë asnjë pistë deri në përfundimin e ekspertizës së plotë. Analiza kimike do të jetë ajo që do vulosë nëse kemi të bëjmë me një ngjarje aksidentale apo kriminale.

Por kush është viktima Hysni Ymeri?

67-vjeçari është vëllai i një personi të dënuar me burg për një vrasje të ndodhur shumë vite më parë në Shkodër.

Në fillim vitet ’90 në Kiras është vrarë Shefqet Çekorja nga vëllai i viktimës që humbi jetën sot.Pas asaj ngjarje autori është arrestuar nga policia e cila e zbardhi atë vrasje dhe është dënuar nga gjykata.

Ndërkohë disa vite më pas sipas burimeve dy familjet kanë shtrirë dorën e pajtimit.

Shefqet Çekorja është vëllai i Ismet Çekores që u vra në shtatorin e vitit 2022 në afërsi të banesës pas disa deklaratsve që bëri disa ditë përpara asaj ngjarje.

Djali i Hysni Ymerit i cili jeton jashtë Shqipërisë ka ardhur me 25 dhjetor për shkak se nëna e tij vuan nga kanceri dhe mjekët nuk i kanë dhënë shumë kohë për jetën nënës. Edhe sot përpara ngjarjes, ai ndodhej në spital me nënën.

67 vjeçari pasi ka pirë një kafe si çdo ditë me shokët e lagjes është çuar nga lokali për të shkuar në shtëpi dhe më pas në spital tek bashkëshortja por sapo është futur brenda hyrjes së pallatit në katin e parë ndodhi shpërthimi i fuqishëm. Hysni Ymeri deri në spital ka shkuar gjallë ndërsa për pak minuta ndërroi jetë si shkak i plagëve të rënda në kokë.

Disa vite më parë djali i xhaxhait i Hysni Ymerit vrau bashkëshorten e tij dhe më pas qëlloi edhe vetveten.

Ndërkohë një kushëri tjetër, shtetasi Dritan Ymeri vrau në 2017 shtetasin Ilir Aliaj, mjek në profesion në Shkodër pas një konflikti pronësie. Autori arriti t’i shpëtojë policisë dhe dyshohet se ndodhet jashtë Shqipërisë prej asaj kohe.

Policia po pret vendimin final të antiterrorit nëse ka patur apo jo shpërthim me tritol për t’i dhënë më pas orientimin e duhur hetimeve dhe për ta ndarë nëse është kriminale apo aksidentale.

Mediat gjermane i kushtojnë vëmendje zgjedhjeve në Kosovë dhe fitores së Lëvizjes Vetëvendosje të Albin Kurtit, duke theksuar, se rriten shpresat për fundin e bllokadës disamujore politike në Kosovë.

Në një analizë të portalit gjerman, "tagesschau" me titullin "Kurti triumfon qartë" theksohet se partia e Albin Kurtit fiton para së gjithash falë të ardhurve nga diaspora. "Vërtet pati një rritje çuditërisht të madhe të votave për partinë e Kurtit: ajo arriti 42 përqind në zgjedhjet parlamentare në shkurt dhe tani qëndron në rreth 50 përqind. Kjo do të thotë që kriza qeveritare, e cila ka zgjatur për më shumë se dhjetë muaj, mund të jetë duke marrë fund. Me këtë rezultat, Kurti nuk varet më nga PDK-ja, LDK-ja dhe AAK-ja, tre partitë kryesore opozitare nga spektri liberal deri te ai i qendrës së djathtë." Por Kurti nuk qeveris dot i vetëm, por ka nevojë për votat e pakicave", thekson tagesschau.

Revista e njohur gjermane "Der Spiegel" shkruan se në Kosovë duket se tani mund të marrë fund bllokada politike. Në Prishtinë po festohet, shkruan "Der Spiegel", dhe kryeministri Kurti e ka zgjeruar mazhorancën duket marrë 56 nga 120 deputetë. "Kurti po përpiqet të zvogëlojë ndikimin serb në Kosovë, gjë që pritet me miratim nga shumë shqiptarë të Kosovës, por në të njëjtën kohë përkeqëson tensionet me Beogradin."

"Süddeutsche Zeitung" në artikullin "Nacionalisti Kurti fiton zgjedhjet në Kosovë" shkruhet se kryeministri reformist i majtë siguroi shumicën dhe me ndihmën e minoriteteve mund të krijojë qeverinë. Gazeta gjermane thekson, se "nëse formimi i një qeverie do të jetë i pamundur përsëri, kriza politike do të përshkallëzohet në një pikë kritike. Parlamenti duhet të zgjedhë një president të ri në prill dhe të ratifikojë marrëveshjet e kredisë me BE-në dhe Bankën Botërore me një vlerë totale prej një miliard eurosh, të cilat skadojnë në muajt në vijim. Partitë opozitare refuzojnë një koalicion me Kurtin, duke kritikuar marrëdhëniet e tij me aleatët perëndimorë dhe qasjen e tij ndaj pakicës serbe në veri të vendit.

Edhe "Frankfurter Rundschau" i kushton vëmendje zgjedhjeve në Kosovë. "Sipas disa komentuesve, rezultati i fortë i VV-së mund të shpjegohet, pjesërisht, nga potenciali i saj për mobilizimin e elektoratit. Edhe data e zgjedhjeve ka të ngjarë të ketë luajtur një rol: midis Krishtlindjeve dhe Vitit të Ri, shumë kosovarë që jetojnë jashtë vendit vizitojnë atdheun e tyre, përfshirë njerëz nga Gjermania. VV është veçanërisht popullore në mesin e këtij grupi votuesish.

"Frankfurter Allgemeine Zeitung" shkruan, se siç pritej kryeministri Kurti i fitoi zgjedhjet në Kosovë. Por habi shkaktoi forcimi i rezultatit. Po merr fund bllokada politike në vendin e vogël ballkanik, pyet FAZ? "Ndërsa kritikët e akuzojnë VV-në për mungesë gatishmërie për kompromis, Kurti theksoi natën e zgjedhjeve se donte të bashkëpunonte më ngushtë me opozitën në të ardhmen, pasi disa vendime në parlament kërkonin një shumicë prej dy të tretash." Me këtë shtohet shpresa, se vendi do të dalë nga situata e patit politik, shkruan "Frankfurter Allgemeine Zeitung"./Deutsche Welle

Kryetari i Lëvizjes Vetëvendosje, Albin Kurti, ka dalë në sheshin e Prishtinës për të festuar fitoren e LVV-së në zgjedhjet e 18 dhjetorit, duke e cilësuar atë si një fitore historike.

Para mbështetësve të shumtë, Kurti ka falënderuar qytetarët për përkrahjen, angazhimin dhe kontributin e dhënë në fitoren e partisë së tij, duke theksuar se kjo fitore nuk i takon vetëm LVV-së, por të gjithë qytetarëve të Kosovës.

“Kjo fitore është e të gjithë juve,” ka deklaruar Kurti, duke u zotuar se të gjitha zotimet elektorale do të përmbushen një nga një.

Ai ka theksuar se në këto zgjedhje ka fituar populli dhe Republika, ndërsa suksesin e ka atribuar vizionit dhe programit të LVV-së, si dhe punës së bërë gjatë mandatit të kaluar.

“Kësaj radhe ka fituar populli dhe Republika. Ajo që e bëri të mundur fitoren është vizioni dhe programi ynë, punët e mbara dhe të kryera në këtë pesëvjeçar dhe zotimet e reja që do t’i përmbushim të gjitha,” ka thënë Kurti.

Kurti ka kujtuar edhe fitoren e 9 shkurtit, duke theksuar dallimin mes dy proceseve zgjedhore. Sipas tij, kësaj here fitorja është edhe më përfshirëse dhe përfaqësuese.

“Më 9 shkurt fitoi VV-ja bashkë me partnerët, kësaj radhe fitoi populli dhe Republika,” është shprehur ai.

Në fund të fjalimit, Kurti ka theksuar se LVV nuk do të lëshojë pe në realizimin e vizionit të saj qeverisës.

“Nuk lëshojmë pe, jo për inat të dikujt, por për shkak se gjithë juve ju duam fort,” ka deklaruar Kurti, ndërsa ka shtuar se “sonte të gjithë kremtojmë numrin që është fitimtar”.

Festa në rrugën “Garibaldi” u shoqërua me brohoritje dhe atmosferë festive nga simpatizantët e LVV-së.

Rreth 99 për qind e votave nga zgjedhjet e jashtëzakonshme parlamentare në Kosovë tashmë janë numëruar, ndërsa renditja e partive politike ka mbetur e njëjtë si në zgjedhjet e fundit, por diferencat mes tyre kanë ndryshuar ndjeshëm.

Sipas të dhënave preliminare, Lëvizja Vetëvendosje (LVV) ka shënuar rritje të madhe, duke u rritur për mbi 7 për qind krahasuar me zgjedhjet e shkurtit 2025.

Zgjedhjet e shkurtit

Nga 42.3 për qind sa kishte në shkurt, LVV tani ka arritur në 49.47 për qind në zgjedhjet e dhjetorit 2025.

Partia Demokratike e Kosovës (PDK) ka regjistruar një ngritje të lehtë, duke kaluar nga 20.95 për qind në 21.08 për qind, duke ruajtur pozitën e dytë.

Ndërkohë, Lidhja Demokratike e Kosovës (LDK) ka pësuar rënie të dukshme, prej gati 5 për qind, duke zbritur nga 18.27 për qind në 13.63 për qind.

Zgjedhjet e dhjetorit

Rënie ka shënuar edhe Aleanca për Ardhmërinë e Kosovës (AAK), e cila nga 7.06 për qind në zgjedhjet e fundit parlamentare ka rënë në 5.70 për qind.

Sa i përket subjekteve nga komuniteti serb, Lista Serbe ka pasur një rritje të lehtë, duke kaluar nga 4.26 për qind në 4.45 për qind.

Kryetari i Lëvizjes Vetëvendosje (LVV), Albin Kurti, ka dalë në konferencë për shtyp pas fitores së LVV-së në zgjedhjet e fundit parlamentare, duke e cilësuar rezultatin si historik dhe duke ftuar partitë opozitare për bashkëpunim në Kuvendin e Kosovës.

Kurti ka deklaruar se kjo është fitorja më e madhe në historinë e vendit, duke theksuar se rezultatet preliminare tregojnë se ajo mund të tejkalojë edhe fitoren e zgjedhjeve të 14 shkurtit.

“Më 28 dhjetor 2025 fitoi populli i Kosovës dhe Republika. Kjo është fitorja më e madhe në historinë e vendit. Rezultati na tregon qartë se duhet të ecim përpara pa vonesa, të krijojmë institucionet sa më shpejt dhe të vazhdojmë punën e mirë dhe projektet e metejshme”, ka deklaruar Kurti.

Ai ka bërë thirrje për bashkëpunim ndërpartiak, veçanërisht për miratimin e ligjeve të rëndësishme dhe ligjeve ndërkombëtare, duke theksuar rolin e Kuvendit në funksionimin institucional të vendit.

"Ftoj partitë opozitare për bashkëpunim në Kuvend për marrëveshjet ndërkombëtare, ligjet e mira që do t’i procedojmë dhe për interesin publik të qytetarëve”, tha Kurti.

Kurti ka ftuar partitë opozitare që të kontribuojnë në Kuvendin e Kosovës për kalimin e ligjeve kyçe, duke theksuar se proceset e rëndësishme shtetërore kërkojnë dialog dhe përgjegjësi të përbashkët.

Kryetari i Lidhjes Demokratike të Kosovës (LDK), Lumir Abdixhiku, ka deklaruar se merr përgjegjësinë për rezultatin e dobët të arritur në zgjedhjet e fundit parlamentare.

Abdixhiku ka deklaruar se rezultati zgjedhor nuk ka qenë i pritshëm, duke theksuar se situata kërkon reflektim të thellë brenda partisë.

“Ne duhet të respektojmë verdiktin e popullit. Nuk kam arritur ta çoj LDK-në aty ku kam besuar se duhet të jetë. Kam ndërtuar ekip me njerëzit më të mirë dhe kemi bërë program, por ky është verdikti i qytetarëve dhe para këtij verdikti përulemi të gjithë".

Ai ka shtuar se mban përgjegjësi të plotë për rezultatin e zgjedhjeve dhe se do t’i thërrasë organet e LDK-së për të diskutuar hapat e mëtejmë.

“Duke marrë përgjegjësinë, ditëve në vijim do ta thërras Kuvendin e LDK-së dhe para tij do t’i shpalosim e shqyrtojmë të gjitha çështjet dhe përgjegjësit që mbaj si kryetar".

“Rezultati i LDK-së nuk është ai që e kemi pritur dhe dëshiruar. Është moment reflektimi. Kur qytetarët flasin, ne duhet të dëgjojmë. Demokracia funksionon kur udhëheqësit mbajnë përgjegjësi, edhe kur kanë humbje të tilla”, ka thënë Abdixhiku”, ka deklaruar Abdixhiku.

Ai po ashtu ka bërë të ditur se çështja e dorëheqjes së tij do të diskutohet edhe në Kuvendin e Përgjithshëm të LDK-së.

“Në Kuvendin e Përgjithshëm edhe dorëheqja do të vihet në diskutim”, ka theksuar Abdixhiku./Telegrafi/

Lëvizja Vetëvendosje (LVV) ka dalë parti e parë në zgjedhjet e jashtëzakonshme parlamentare edhe në pjesën dërrmuese të komunave me shumicë shqiptare në Kosovë, sipas të dhënave preliminare.

LVV nuk ka arritur të renditet e para vetëm në Skenderaj, Drenas, komuna ku kryeson PDK, dhe Deçan ku AAK ka dalë e para, ndërsa në të gjitha komunat e tjera shqiptare ka siguruar epërsinë ndaj partive rivale.

LDK ka humbur në të gjitha komunat.

Si parti e parë, LVV ka dalë në komunat: Prishtinë, Prizren, Pejë, Ferizaj, Gjilan, Gjakovë, Mitrovicë, Podujevë, Vushtrri, Fushë Kosovë, Suharekë, Rahovec, Lipjan, Klinë, Malishevë, Shtime, Istog, Dragash, Obiliq, Viti, Kaçanik, Kamenicë, Hani i Elezit dhe Junik.

Ndërkohë, Lista Serbe ka dalë parti e parë në të gjitha komunat me shumicë serbe, duke ruajtur dominimin tradicional në këto zona.

Në komunën e Mamushës, sipas rezultateve preliminare, kryeson KDTP.

Këto rezultate dëshmojnë një mbështetje të gjerë për LVV-në në nivel vendi, ndërsa pritet që rezultatet përfundimtare të certifikohen nga Komisioni Qendror i Zgjedhjeve pas përmbylljes së të gjitha procedurave ligjore./Telegrafi/

Koalicioni i organizatave joqeveritare Demokracia në Veprim (DnV) ka publikuar sonte rezultatet preliminare nga vëzhgimi i zgjedhjeve të jashtëzakonshme parlamentare të mbajtura më 28 dhjetor 2024 dhe 9 shkurt 2025, duke paraqitur përqindjet e subjekteve politike sipas numërimit paralel.

Sipas të dhënave të DnV-së, renditja e subjekteve politike është si vijon:

• LVV: 47.91%
• PDK: 21.08%
• LDK: 13.36%
• AAK: 5.62%
• SL: 5.5%
• NISMA: 1.88%

Demokracia në Veprim ka sqaruar se këto janë rezultate preliminare, të cilat nuk përfshijnë votat nga diaspora dhe votat me kusht. Po ashtu, është theksuar se pragu zgjedhor prej 5% aplikohet për subjektet politike që garojnë për vendet jo të rezervuara në Kuvend.

Sipas DnV-së, në këtë proces zgjedhor kanë pasur të drejtë vote 1,999,204 qytetarë, ndërsa rezultatet përfundimtare pritet të konfirmohen nga Komisioni Qendror i Zgjedhjeve pas përfundimit të të gjitha procedurave ligjore.

DnV ka vlerësuar procesin zgjedhor si përgjithësisht të qetë dhe ka bërë thirrje që institucionet përkatëse të përmbyllin me transparencë fazat e mbetura të numërimit dhe certifikimit të rezultateve./Telegrafi/

Arben Gashi kërkon reflektim në LDK pas rezultateve të zgjedhjeve të jashtëzakonshme

Kandidati për deputet nga LDK-ja, Arben Gashi, ka kërkuar reflektim për rezultatin jo të favorshëm të partisë së tij në zgjedhjet e jashtëzakonshme.

“Kur votuesit flasin, rezultati nuk mund të injorohet. Kërkohet reflektim dhe veprim i përgjegjshëm”, ka shkruar Gashi.

Rezultatet e deri tani të numëruara tregojnë se:

LVV prin me rreth 49% të votave.

PDK ka rreth 20%.

LDK ka rreth 14%.

Deri tani janë numëruar mbi 41% e votave./Telegrafi/