Medin Memeti është pjesë e një investigimi në Australi, për racizëm ndaj Justin Vidiç.

Lojtari serb është ankuar, ndërsa pretendon se Memeti e ka thirrur “cigan” gjatë ndeshjes së fundit të luajtur më 6 janar.

Melbourne City nuk ka reaguar për akuzat ndaj talentit të tyre shqiptar. Kjo çështje është bërë e madhe në Australi, ndërsa së fundmi është njoftuar se investigimi po kryhet nga federata.

Një situatë që u faktua ishte në vitin 2017, kur portieri Dean Buzanis që luan aktualisht me Brisbane u dënua për pesë ndeshje. Asokohe ishte pjesë e Melbourne dhe e quante Besart Berishën e Melbourne Victory një “cigan”.

Memeti është 18 vjeç dhe bën pjesë tek Australia U-19.

Melbourne City, ku aktivizohet sulmuesi shqiptar, fitoi 1-0 ndaj Brisbane Roar.

Moti i keq ka vijuar edhe sot më 8 janar 2026 duke shkaktuar rritje të niveleve të lumenjve kryesorë.

Lajmi më i keq vjen nga Durrësi ku u shënua edhe viktima e parë. Një 54-vjeçar u gjet i pajetë në një kanal kullimi pasi e mori rrjedha e ujit.

Qyteti bregdetar vijon të jetë në situatë kritike pasi reshjet nuk kanë pushuar. Atje janë evakuuar 400 banorë teksa është urdhëruar edhe evakuimi i banorëve në Sukth dhe Katund të Ri.

Grupi i xhirimit i Fax News ishte në Sukth, nga ku pa nga afër situatën.

Banesa, biznese, automjete dhe toka bujqësore të përmbytura. Kjo ishte ajo çfarë uji kishte lënë pas në këtë zonë, ku dëmet janë të konsiderueshme.

Ndërkohë, Prokuroria e Durrësit ka nisur hetimet pas përmbytjeve masive të dy ditëve të fundit. Drejtuesja e organit të akuzës në qytetin bregdetar ka urdhëruar nisjen e hetimit për këto vepra penale:

•“Shpërdorimi i detyrës”

•“Shkatërrimi i pronës me përmbytje”

•“Shkatërrimi i pronës nga pakujdesia”

LEXO EDHE: Dëmet nga përmbytjet, Prokuroria Durrës nis hetimet! Dyshime për veprën penale “shkatërrimi i pronës”

Siguruesit parashikojnë që nisja e aplikimit të sistemit bonus-malus do të ketë një efekt negativ në nivelin 4.5-5 milionë euro mbi primet e shkruara bruto në sigurimin e detyrueshëm motorik.

LEXO EDHE: Nga 1 Janari/ ‘Bonus-Malus’, shoferët ‘problematikë’ do të paguajnë më shumë për siguracionin e automjetit

Drejtues të kompanive shprehen se, llogaritet që nga 100 drejtues mjetesh që kanë kryer sigurimin e detyrueshëm TPL vitin e kaluar, rreth 4% e tyre kanë shkaktuar dëme. Kjo kategori e drejtuesve do të paguajë një prim sigurimi më të lartë për vitin 2026 (rreth 18% më shumë).

Ndërkohë, pjesa më e madhe e drejtuesve të mjeteve, rreth 96% e tyre do të përfitojnë një bonus ose ulje të çmimit të sigurimit të detyrueshëm motorik me afërsisht 3% për vitin 2026.

Duke qenë se numri i drejtuesve të mjeteve që nuk kanë shkaktuar dëme është shumë më i lartë se ai që kanë shkaktuar dëme, efekti në vlerën totale të primeve që do të arkëtojnë kompanitë këtë vit pritet të jetë negativ. Sipas përllogaritjeve të siguruesve, ky efekt pritet të jetë rreth 4.5-5 milionë euro.

Të dhënat zyrtare të Autoritetit të Mbikëqyrjes Financiare (AMF) tregojnë se për 12 muajt e fundit statistikorë (dhjetor 2024-nëntor 2025) kompanitë e sigurimit e sigurimit kanë lidhur gjithsej afërsisht 747 mijë kontrata sigurimi. Mbi këtë shifër, mund të vlerësohet se rreth 30 mijë drejtues mjetesh do të paguajnë një prim më të lartë gjatë vitit 2026. Pjesa e mbetur, rreth 717 mijë drejtues mjetesh, do të paguajnë një prim sigurimi më të ulët.

Aplikimi i sistemit bonus-malus është i parashikuar në ligjin “Për sigurimin e detyrueshëm në sektorin e transportit”, që ka hyrë në fuqi qysh në vitin 2021. Megjithatë, ligji e parashikon si të drejtë të kompanive të sigurimit, por jo si një detyrim.

Zbatimi i parimit bonus-malus u bë i mundur vetëm pas miratimit të rregullores “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit”. Kjo rregullore hyri në fuqi në fillim të vitit 2025, por pa përfshirë elementin bonus-malus, që ka nisur të aplikohet prej 1 janarit të këtij viti.

Sistemi bonus-malus parashikon që drejtuesit e mjeteve që kanë shkaktuar dëme do të paguajnë një prim sigurimi më të lartë në vitin pasardhës, ndërsa ata që nuk shkaktojnë dëme një prim më të ulët. Për drejtuesit që kanë shkaktuar një dëm të vetëm do të llogaritet një koeficient 1.18 mbi primin bazë, ndërsa për ata që kanë shkaktuar dy ose më shumë dëme do të aplikohet një koeficient 1.39.

Për momentin, sistemi do të bazohet në historikun e dëmeve të një viti më parë. Në rast se një drejtues mjeti që ka shkaktuar dëm në 2025 nuk shkakton përsëri dëme këtë vit, ai do të përfitojë bonusin prej 3% në primin e sigurimit për 2027. /Monitor

Teksa Shqipëria po kalon momente të vështira si pasojë e përmbytjeve masive, ambasada e SHBA në Tiranë, përmes një postimi në rrjetet sociale, apelon tek qytetarët amerikanë që jetojnë dhe ndodhen në vendin tonë.

Ambasada bën thirrje që të tregohet kujdes në zonat e prekura, të cilat sipas saj, po vijnë në përkeqësim.

“Ambasada e Shteteve të Bashkuara në Tiranë vazhdon të monitorojë përmbytjet në të gjithë vendin dhe u bën thirrje të gjithë shtetasve amerikanë të tregojnë kujdes në zonat e rrezikuara nga përmbytjet, të cilat po përkeqësohen. Disa zona në të gjithë vendin janë nën urdhër evakuimi. Përmbytjet mund të ndodhin pa paralajmërim, ndërsa reshjet e shiut mund të shkaktojnë mbylljen e rrugëve për shkak të përmbytjeve ose rrëshqitjeve të dheut.

Shtetasit amerikanë në Shqipëri që kanë nevojë për ndihmë mund të gjejnë më shumë informacion këtu: https://al.usembassy.gov/weather-alert-emergency-message…/”.

Prokuroria e Durrësit ka nisur hetimet pas përmbytjeve masive të dy ditëve të fundit. Drejtuesja e organit të akuzës, Suela Beluli, në qytetin bregdetar ka urdhëruar nisjen e hetimit për këto vepra penale:

•“Shkatërrimi i pronës me përmbytje”

•“Shkatërrimi i pronës nga pakujdesia”

Beluli argumenton se situata e krijuar përgjatë dy ditëve për shkak të reshjeve të vazhdueshme ka krijuar problematika reale të dukshme për qytetarë, për mirëqenien e tyre, por edhe dëme të konsiderueshme.

Më tej thuhet se, “gjendja e krijuar ka penguar zhvillimin e aktiviteteve normale arsimore, shtetërore, shëndetësore si dhe ka krijuar bllokimin e rrugëve urbane dhe interurbane, përmbytjen e banesave dhe vendosjen në rrezik real të jetës së qytetarëve, përmbytjen e institucionit penitenciar duke vendosur në gjendje emergjente të gjithë qarkun në të cilin ushtron juridiksionin territorial dhe lëndor Prokuroria pranë Gjykatës së Shkallës së Parë të Juridiksionit të Përgjithshëm Durrës jep të dhëna të mjaftueshme dhe të arsyeshme se jemi përpara një fakti penal”.

Në këto kushte, me qëllim thellimin në shkaqet që kanë çuar në shkaktimin e këtyre pasojave dhe analizimin në mënyrë ezauruese nëse shkaqet kanë qenë tërësisht natyrore apo kanë ardhur si pakujdesisë apo mospërmbushjes së detyrës nga ana e organeve kompetente shtetërore apo të vetëqeverisjes vendore, merret iniciativa për regjistrimin e këtij procedimi penal.

Ndërkohë, hetimi i mëtejshëm do të japë përfundime të drejta mbi ekzistencën ose jo të përgjegjësisë penale.

Po ashtu përmendet edhe vdekja e punonjësit të Ndërmarrjes Komunale të Plazhit.

“Sipas informacioneve rezulton se ky shtetas ka shkuar në zonë për të verifikuar situatën e krijuar nga reshjet dhe vërshimet e ujit. Nga të dhënat paraprake ka dyshime që ai ka humbur jetën për shkak se është marrë nga rrjedhja e ujit e shkaktuar në vend. Në kushtet kur rrethanat se si ka ndodhur humbja e jetës së këtij shtetasi, bazuar në rrethanat e marra dijeni deri në këto momente personalisht dhe nëpërmjet medias, rezulton se ka dyshime të arsyeshme për ekzistencën e veprës penale “Shpërdorimi i detyrës” parashikuar nga neni 248 i Kodit Penal, të kryer nga personat përgjegjës për mirëmbajtjen, kontrollin dhe menaxhimin e situatës së krijuar për shkak të reshjeve të shiut, në qytetin e Durrësit”, njofton prokuroria.

“Ka dyshime se nga personat e ngarkuar me funksione, të cilat kanë për detyrë menaxhimin e situatës janë kryer veprime ose mosveprime që përbëjnë mospërmbushje të rregullt të detyrës, duke dëmtuar rëndë interesat e shtetasve dhe personave juridikë dhe kanë sjellë edhe pasojat e rënda të evidentueshme dhe të matshme mbi të mirat pasurore si edhe në jetën e një personi i cili ka humbur jetën.

Po kështu, bazuar në dëmet e konsiderueshme të evidentuara deri më tani që janë shkaktuar në infrastrukturën publike si dhe pronën privat, ekzistojnë dyshime të arsyeshme për ekzistencën e veprës penale të “Shkatërrimit të pronës me përmbytje” dhe “Shkatërrimi i pronës nga pakujdesia” të parashikuar nga neni 153 dhe neni 161 i Kodit Penal”, përfundon Prokuroria Durrës.

Moti keq me me erëra të forta dhe reshje të dendura shiu ka goditur Stambollin këtë të enjte.

Kjo gjë ka shkaktuar edhe një situatë të vështirë për avionët që po hasin problematika veçanarëisht  teksa tentojnë të ulen në Aeroportin Ndërkombëtar “Sabiha Gokcen”.

Në të njëjtën kohë, stuhia ka çuar në pezullimin e të gjitha shërbimeve të trageteve bregdetare.

Ministrja e  Energjisë dhe Infrastrukturës, Belinda Balluku, së bashku me Ministrin e Mbrojtjes, Pirro Vengu dhe atë të Bujqësisë, Andis Salla, kanë dalë këtë të enjte në terren për të parë nga afër problematikat e shkaktuara nga moti i keq i këtyre ditëve.

Ata ndodeshin në Novoselë, ku situata paraqitet kritike si pasojë e rritjes së nivelit të ujit nga reshjet e rëna përgjatë orëve të fundit dhe natës së kaluar.

Zëvendëskryeministrja, u shpreh se ka një bashkëpunim të mirë nga kryebashkiakët e bashkive të prekura, por gjithashtu dhe nga të gjithë ata të bashkive të tjera të qarqeve Vlorë dhe Fier.

“Është e rëndësishme që të dyja prefekturat, si e Vlorës ashtu dhe e Fierit, janë të gjithë kryetarët e bashkive të angazhuar në këto momente, jo vetëm në qytetet e prekura, jo vetëm Vlora e Fieri, por të gjithë kryetarët e bashkive të tjerë që janë pjesë e këtyre dy qarqeve. Janë të angazhuar për ngritjen e të gjitha qendrave të akomodimit për evakuuim”, u shpreh ajo.

Balluku shprehet se janë ndërmarrë masat e nevojshme jo vetëm për evakuuimin e banorëve, por gjithashtu dhe shpëtimin e gjësë së gjallë.

“E kemi parë e në periudhën e termetit, që banorët nuk duan të largohen nga pronat e tyre, por jeta është e rëndësishme në këto momente. Sigurisht ne kemi marrë masa, me Ministrin e Bujqësisë, për sa i përket të gjithë angazhimit për mbrojtje dhe shpëtimin edhe të gjësë së gjallë në këto momente”, tha ajo.

Ministrja bën me dije se ditën e premte, 9 janar, në orën 8:30, do të mblidhet Komiteti i Emergjencave Ndërqeveritare, nga ku do të ketë dhe adresim të problematikave, zgjidhjeve, si dhe njoftimin e dëmshpërblimeve nga pasojat e motit të keq. Siç sqaron Balluku, kreu i qeverisë, Edi Rama po harton me Ministrinë e Financave një plan për dëmshpërblime të të gjithë të prekurve.

“Duhet të jeni në dijeni se kryeministri është duke dizejnuar së bashku me Ministrinë e Financave në këto momente një paketë e cila do të garantojë dëmshpërblimin si për pjesën bujqësore ashtu edhe për banesat. Nesër në mëngjes në orën 8:30 do të ketë një mbledhje të Komitetit të Emergjencave Ndërqeveritare, ku do të bëhet dhe një adresim nga ana e kryeministrit jo vetëm për zgjidhjen e situatës, e për gjithë përballimin e kësaj situate, por edhe për dëmshpërblime që janë shumë të rëndësishme për t’u bërë të ditura dhe për të marrë informacion të gjitha familjet apo dhe bizneset e prekura”, tha ajo.

LEXO EDHE: Vendi i përfshirë nga përmbytjet, apeli i Presidentit: Jeta e qytetarëve mbi gjithçka

Presidenti i Republikës, Bajram Begaj, ka reaguar me shqetësim për situatën e rëndë të krijuar nga reshjet intensive dhe përmbytjet që kanë përfshirë vendin.

Përmes një mesazhi drejtuar qytetarëve, Kreu i Shtetit bëri të ditur se është në komunikim të vazhdueshëm me qeverinë, pushtetin vendor dhe forcat e ushtrisë për të monitoruar operacionet në terren.

Begaj u bëri thirrje banorëve të zonave më të rrezikuara që të bashkëpunojnë me autoritetet, duke theksuar se prioriteti absolut në këto momente mbetet shpëtimi i jetëve njerëzore.

“Ftoj qytetarët për mirëkuptim dhe në mënyrë të veçantë banorët e zonave të përmbytura që të ndjekin udhëzimet për një evakuim të shpejtë dhe të sigurt. Në këto momente të vështira, jeta e çdo qytetari është mbi gjithçka,” deklaroi Presidenti.

Aktualisht, të gjitha strukturat e Emergjencave Civile dhe Forcat e Armatosura janë në gatishmëri të lartë për të përballuar pasojat e motit të keq dhe për t’u ardhur në ndihmë familjeve të izoluara.

LEXO EDHE: Përmbytjet/ Balluku në Novoselë: Evakuuimet po vazhdojnë, do të nisë faza e me dëmshpërblimin e dëmeve

Në prononcimin për mediat pas përfundimit të mbledhjes urgjente të Shtabit të Emergjencave Civile, zv/kryeministrja Belinda Balluku, teksa pa nga afër situatën në Novoselë, ka pohuar se janë diskutuar me hollësi të gjitha detajet për planin e masave për situatën e krijuar nga reshjet, veçanërisht në zonat problematike ku ka toka bujqësore, dhe banesa nën ujë.

Më problematike në qark paraqitet situata në bashkinë e Fierit, ndërkohë që edhe në Mallakastër është bërë evakuimi i një familjeje.

Numri dy i qeverisë shtoi se pasi të kalojnë orët kritike do të nisë faza e paspërmbytjes që ka të bëjë me dëmshpërblimin e dëmeve, proces që do të kryhet nga bashkitë në bazë të akteve ligjore për fatkeqësitë natyrore.

Mesditën e sotme, në Yzberisht, një shtetas, ende i paidentifikuar, dyshohet se në kërcënimin e një mjeti prerës, ka vjedhur xhiron ditore të një marketi.

Sipas informacioneve paraprake, autori ka kërcënuar punonjësen e kasës dhe ka arritur të marrë një shumë parash, konkretisht xhiron ditore që ndodhej në arkë, e cila dyshohet të jetë rreth 90 mijë lekë të reja, por shuma e saktë pritet të verifikohet.

Gjatë tentativës për të ndaluar autorin, është dëmtuar lehtë në dorë, nga mjeti prerës, punonjësja e marketit (kasierja), e cila u dërgua në spital, për mjekim.

Pas marrjes së parave, autori është larguar menjëherë nga vendngjarja dhe është zhdukur në zonë.

Grupi hetimor, në drejtimin e Prokurorisë, po punon për identifikimin dhe kapjen e autorit, si dhe për zbardhjen e rrethanave të rastit.

Një pretendente e re ndërkombëtare është shfaqur për Kristjan Asllanin. Nga Spanja vijnë konfirmime për një lëvizje konkrete të Girona.

Klubi katalanas ka kryer një “sondazh eksplorues” për mesfushorin shqiptar, për të cilin Torino (ku ndodhet aktualisht në huazim) do të dëshironte rikthimin e parakohshëm tek Interi.

Sipas asaj që raporton “Marca”, klubi i La Liga-s ka kontaktuar Interin për të kërkuar informacion mbi disponueshmërinë e lojtarit dhe kuptuar hapësirat e mundshme të manovrës për një operacion të mundshëm në këtë merkato janari.

Interesimi i Girona konfirmon vlerësimin që Asllani gëzon në tregun europian dhe hap një skenar të ri për të ardhmen e mesfushorit shqiptar, në një moment delikat të sezonit dhe të merkatos.

Kryetari i Grupit Parlamentar të PD Gazment Bardhi i është drejtuar me një kërkesë zyrtare qeverisë që të shpallë gjendjen e fatkeqësisë natyrore për qarqet Durrës, Lezhë, Elbasan, Shkodër, Gjirokastër, Vlorë dhe Fier, si dhe për të bërë vlerësimin e plotë dhe objektiv në vlerën reale të dëmeve dhe kompensimin e plotë financiar për dëmet ndaj banorëve të prekur.

Gjithashtu, grupi parlamentar i PD i ka kërkuar Kryetarit të Kuvendit që të marrë masat që Këshilli i Ministrave të informojë Kuvendin për situatën e krijuar, rreziqet që paraqiten dhe masat e marra për menaxhimin e situates.

Më poshtë letra e plotë të Kryetari të Grupit Parlamentar të PD, Gazment Bardhi, drejtuar Kuvendit, Këshillit të Ministrave, Ministrisë së Mbrojtjes dhe Agjencisë Kombëtare të Mbrojtjes Civile:

Sipas nenit 4, të ligjit nr. 45/2019, “Çdo person ka të drejtën e mbrojtjes nga fatkeqësitë natyrore dhe fatkeqësitë e tjera. 2. Në rastet e fatkeqësive natyrore dhe të fatkeqësive të tjera, mbrojtja dhe shpëtimi i jetës së njerëzve kanë prioritet mbi çdo aktivitet tjetër të mbrojtjes civile”.

Po kështu, sipas nenit 41 të ligjit nr. 45/2019, shteti shqiptar përgjigjet për dëmet që shkaktohen nga pasojat e një fatkeqësie. Në çdo rast, kur shpallet gjendja e fatkeqësisë natyrore, kompensimi mund të bëhet me vendim të veçantë të Këshillit të Ministrave, me propozim të ministrit, dhe se masa e kompensimit të dëmeve, procedurat, afatet, strukturat shtetërore përgjegjëse për vlerësimin e dëmeve, si dhe pasuritë dhe subjektet që kompensohen miratohen me vendim të Këshillit të Ministrave.

Në këtë kushte, ne deputetët e opozitës në Kuvendin e Shqipërisë vlerësojmë se janë përmbushur kushtet dhe rrethanat sipas ligjit nr. 45/2019 dhe vendimit nr. 158, datë 17.03.2021 të Këshillit të Ministrave “Për miratimin e kritereve dhe procedurave për shpalljen e gjendjes së fatkeqësisë natyrore”, për shpalljen e gjendjes së fatkeqësisë natyrore në zonat e prekura dhe konkretisht në qarqet Durrës, Lezhë, Elbasan, Shkodër, Gjirokastër, Vlorë dhe Fier. Është e pakuptueshme arsyet se përse Këshilli i Ministrave nuk e ka ndërmarrë ende një procedurë të tillë, duke krijuar pasiguri tek qytetarët për përballimin e kësaj fatkeqësie natyrore. Mosshpallja e gjendjes së fatkeqësisë natyrore do të pamundësonte dëmshpërblimin e plotë të banorëve të prekur nga kjo situatë dhe do të ishte një akt i rëndë papërgjegjshmërie institucionale.

Për këtë arsye, në përputhje me shkronjën “b” të nenit 17 të ligjit nr. 45/2019, ku përcaktohet se “Kuvendi ushtron kontroll parlamentar për çështje që kanë lidhje me mbrojtjen civile”, si dhe shkronjës “ç” të nenit 18, nenit 39, pika 1 dhe 41 të ligjit nr. 45/2019, ku specifikohet se: “Këshilli i Ministrave mund të vendosë, për një periudhë jo më të gjatë se 30 ditë, gjendjen e fatkeqësisë natyrore në një pjesë ose në të gjithë territorin e vendit”, kërkojmë:

1. Shpalljen e gjendjes së fatkeqësisë natyrore rajonale, vetëm për qarqet e prekura nga përmbytjet dhe vërshimet e ujit, konkretisht qarqet Durrës, Lezhë, Elbasan, Shkodër, Gjirokastër, Vlorë dhe Fier.
2. Gjendja e emergjencës dhe shpallja e fatkeqësisë natyrore të klasifikohet “për përmbytjet dhe vërshimet e ujit, që vijnë si rezultat i rritjes në nivele kritike të ujit, nga faktorë gjeologjikë, atmosferikë apo njerëzorë, në shtratin e lumenjve, në nivelin e liqeneve apo në batica bregdetare, që kanë mbuluar përkohësisht me ujë sipërfaqe toke në atë nivel që përbëjnë rrezik për njerëzit, banesat dhe infrastrukturën”.
3. Vlerësimin e plotë dhe objektiv në vlerën reale të dëmeve dhe kompensimin e plotë financiar për dëmet ndaj banorëve të prekur, sipas të drejtës që i njeh neni 41 i ligjit nr. 45/2019 “Për mbrojtjen civile”. Masa e dëmshpërblimit të miratohet me vendim të Këshillit të Ministrave pa vonesa dhe të mbulohet nga fondet e Buxhetit të Shtetit.

Përsa më lart, ne deputetët e opozitës kërkojmë nga ministria përgjegjëse për mbrojtjen civile dhe nga Këshilli i Ministrave, zbatimin e menjëhershëm të ligjit nr. 45/2019 dhe vendimit nr. 158/2021 të Këshillit të Ministrave. Mosveprimi në kohë nga ana juaj, do të ishte një papërgjegjshmëri kriminale, me pasoja të rënda për qytetarët shqiptarë.

Gjithashtu, në përputhje me shkronjën “d”, të nenit 18 të ligjit nr. 45/2019, kërkojmë që Kryetari i Kuvendit të Shqipërisë të marrë masat që Kuvendi i Shqipërisë të informohet menjëherë nga Këshilli i Ministrave, nëpërmjet ministrit përgjegjës, për situatën e krijuar, rreziqet që paraqiten dhe masat e marra për menaxhimin e situates.

Ligji i ri “Për ndryshimet klimatike” parashikon masa të reja për uljen e emetimeve nga sektori i transportit, duke vendosur kufizime dhe detyrime specifike për automjetet e reja që hidhen në treg.

Sipas dokumentit të sapo publikuar në Fletoren Zyrtare, automjetet e reja për pasagjerë, automjetet e reja të lehta tregtare dhe automjetet e rënda mund të vendosen në treg vetëm nëse përmbushin kërkesat e performancës për emetimet e dioksidit të karbonit (CO₂), që do të përcaktohen me vendim të Këshillit të Ministrave.

Ligji ngarkon qeverinë, që të miratojë rregulla të detajuara për performancën e shkarkimeve të CO₂ nga automjetet e reja.

Këto rregulla përfshijnë monitorimin dhe raportimin e të dhënave për regjistrimin e automjeteve të reja për pasagjerë, si dhe vlerësimin e reduktimit të emetimeve krahasuar me automjetet e reja të lehta tregtare.

Një tjetër element i rëndësishëm i parashikimit të ri lidhet me transparencën për konsumatorët.

Automjetet e reja për pasagjerë dhe automjetet e reja të lehta tregtare do të mund të shiten ose të jepen me qira vetëm nëse shoqërohen me informacion të qartë për konsumimin e karburantit dhe nivelin e emetimeve të CO₂.

Ligji parashikon gjithashtu masa të posaçme për sigurimin e informacionit mbi konsumin e lëndës djegëse dhe shkarkimet e CO₂ gjatë marketingut të automjeteve të reja, me qëllim ndërgjegjësimin e konsumatorëve dhe orientimin e tregut drejt automjeteve me ndikim më të ulët klimatik.

FIER- Zëvendëskryeministrja dhe njëherazi ministrja e Energjisë dhe Infrastrukturës, Belinda Balluku, ka mbledhur me urgjencë në Prefekturën e Fierit Shtabin e Emergjencave Civile, për të analizuar situatën e përmbytjeve në qarkun Fier.

Gjatë mbledhjes, Balluku theksoi se situata paraqitet problematike veçanërisht në zonën e lumit Vjosë, ku prurjet e larta kanë shkaktuar përmbytje dhe rrezik për zona të banuara dhe tokë bujqësore.

Ministrja kërkoi angazhim maksimal nga të gjitha strukturat vendore dhe institucionet përgjegjëse për menaxhimin e emergjencave, duke theksuar nevojën për prezencë të vazhdueshme në terren dhe ndihmë konkrete për qytetarët e prekur, veçanërisht në Bashkinë Fier.

Po ashtu, Balluku udhëzoi që njësitë vendore që aktualisht nuk paraqesin problematika nga përmbytjet të vihen në dispozicion për të ndihmuar zonat më të prekura, me mjete, forca njerëzore dhe logjistikë, në funksion të përballimit të situatës së krijuar

Përmbytjet e ditëve të fundit kanë prekur rëndë zonën e Torovicës në Lezhë, duke përfshirë rreth 2/3 e sipërfaqes bujqësore prej 2500 hektarësh. Dëmet konsiderohen të mëdha, ndërsa qëndrimi i ujit në sipërfaqe për një kohë të gjatë rrezikon të sjellë humbje të konsiderueshme për fermerët që kanë mbjellë tokat e tyre.

Kjo situatë rrezikon seriozisht sezonin e korrjeve, pasi sipas fermerëve dhe specialistëve, këtë vit mund të mos ketë prodhim gruri, duke sjellë pasoja të rënda ekonomike për banorët e zonës.

Në terren ishte i pranishëm edhe deputeti i Partisë Demokratike në Qarkun e Lezhës, Agron Gjekmarkaj, i cili u takua me banorët dhe ngriti shqetësimin se kjo është një situatë që përsëritet vazhdimisht. Sipas tij, qeveria duhet të marrë përgjegjësi dhe ta vërë situatën nën kontroll, në vend që të fajësojë vetëm faktorët natyrorë pa marrë masa konkrete.

Gjekmarkaj theksoi se është urgjente ndërhyrja në hidrovorin e Balldrenit, i cili aktualisht nuk arrin të kryejë funksionin e tij për shkak të mungesës së investimeve. Sipas tij, investimi i nevojshëm është premtuar prej vitesh, por nuk është realizuar asnjëherë, duke lënë zonën të pambrojtur përballë përmbytjeve të përsëritura.

Policia ka vënë në pranga dy persona. Një 46-vjeçar kreu grabitje në një dyqan dhe banesë në Tiranë, ndërsa një 20-vjeçar, kishte vjedhur dy banesa në Krujë, si dhe ka tentuar të vjedhë kasafortën e një supermarketi.

Dy persona janë vënë në pranga nga policia në kuadër të operacioneve të koduara “Tracking” dhe “Midnight”.

Një 46-vjeçar u vu në pranga në Tiranë, pasi sipas policisë, dyshohet se ka kryer vjedhje në 2 muajit e fundit. 46-vjeçari vodhi pajisje me vlerë 6 mijë euro në një dyqan, si dhe sende me vlerë dhe shuma parash në një banesë.

Ndërkaq, në Krujë u arrestua një 20-vjeçar, pasi dyshohet se gjatë kësaj jave, ka tentuar të vjedhë kasafortën në supermarketin e një qendre tregtare, si dhe se ka vjedhur në 2 banesa.

Njoftimi i policisë

Tiranë

Finalizohen në 24 orë, 2 operacione të tjera për zbardhjen e një sërë vjedhjesh të kryera në territorin e Komisariatit të Policisë Nr. 6 dhe në Krujë.

Lokalizohen, kapen dhe vihen në pranga 2 autorët.

Në vijim të punës hetimore, të kryer menjëherë pas kallëzimeve të qytetarëve, për vjedhje të pronës/pasurisë së tyre, shërbimet në varësi të Drejtorisë Vendore të Policisë Tiranë finalizuan në 24 orë, 2 operacione në këtë fushë. Konkretisht:

-në kuadër të operacionit “Tracking”, shërbimet e Komisariatit të Policisë Nr. 6 vunë në pranga shtetasin E. M., 46 vjeç, pasi dyshohet se ka vjedhur gjatë 2 muajve të fundit, pajisje (me vlerë 6000 euro) në një subjekt, 1 biçikletë, si dhe sende me vlerë dhe shuma parash në një banesë;

-në kuadër të operacionit “Midnight”, specialistët për Hetimin e Krimeve të Komisariatit të Policisë Krujë arrestuan shtetasin M. F., 20 vjeç, pasi dyshohet se gjatë kësaj jave, ka tentuar të vjedhë kasafortën në supermarketin e një qendre tregtare, si dhe se ka vjedhur në 2 banesa.

Punohet për zbardhjen e vjedhjeve të tjera që mund të kenë kryer këta shtetas.

Materialet procedurale iu referuan Prokurorisë së Tiranës, për veprime të mëtejshme.

Situata e krijuar nga reshjet e shiut do të jetë në fokus të mbledhjes së Komitetit të Emergjencave.

Ditën e nesërme në orën 8:30, kjo mbledhje do të drejtohet nga kreu i ekzekutivit Edi Rama në kryeministri.

Do të analizohet situata aktuale dhe çfarë ndërhyrjesh të tjera shtetërore do të duhet të ndërmerren.

Të njëjtat burime pohojnë se do të diskutohet edhe për dëmshpërblimet për të prekurit nga kjo situatë.

NOVOSELË– Ministrja e Infrastrukturës dhe Energjisë, Belinda Balluku, nga Novosela bëri të ditur se po përgatitet një paketë dëmshpërblimi për familjet dhe bizneset e prekura nga situata e krijuar si pasojë e motit të keq.

Balluku u shpreh se, Kryeministri dhe Ministrin e Financave janë duke dizajnuar një paketë, e cila do të garantojë dëmshpërblimin si për sektorin bujqësor, ashtu edhe për banesat e dëmtuara.

Ajo njoftoi se nesër në orën 08:30 do të zhvillohet një mbledhje e Komitetit Ndërqeveritar të Emergjencave, ku do të ketë edhe një adresim nga Kryeministri, jo vetëm për zgjidhjen e situatës, por edhe për procesin e dëmshpërblimit, i cili është thelbësor për familjet dhe bizneset e prekura.

Sa i përket energjisë elektrike, ministrja theksoi se sistemi energjetik ka funksionuar maksimalisht, pavarësisht kushteve shumë të vështira atmosferike. Sipas saj, nuk ka pasur ndërprerje të gjata të energjisë, por vetëm ndërprerje momentale.

Balluku paralajmëroi se në 24 orët e ardhshme priten erëra të fuqishme, duke e cilësuar situatën si sfiduese, ndërsa shtoi se strukturat e emergjencave janë në gatishmëri të plotë.

“Kryeministri është duke dizajnuar së bashku me ministrin e Financave një paketë e cila do të garantojë dëmshpërblimin si për pjesën bujqësore ashtu dhe për banesat.

6

Nesër në 08:30 do ketë një mbledhje të Komitetit të Emergjencave Ndërqeveritar, ku do të bëhet edhe një adresim i kryeministrit jo vetëm për zgjidhen e situatës, por edhe dëmshpërblyet që janë të rëndësishme për familjet dhe bizneset e prekura.

Sistemi energjetik ka parformuar maksimalisht, pavarësisht kushteve atmosferike shumë të vështira. Nuk kemi pasur ndërprerje të gjatë, por kanë qenë momentale. Në 24 orët e ardhshme presim erëra të fuqishme.”, tha ajo

Anuela Ristani falenderoi gjithashtu stafin dhe të gjitha strukturat në terren për menaxhimin e situatës së krijuar nga reshjet e dendura të shiut, duke theksuar rëndësinë e monitorimit të vazhdueshëm të situatës.

Kryetarja e komanduar e Bashkisë së Tiranës, Anuela Ristani, ka inspektuar sot një bllok të ri të transformuar në zonën e Freskut në Tiranë ku janë ndërtuar 12 akse të reja rrugore në një zonë që konsiderohej informale.

Ajo falenderoi gjithashtu stafin dhe të gjitha strukturat në terren për menaxhimin e situatës së krijuar nga reshjet e dendura të shiut, duke theksuar rëndësinë e monitorimit të vazhdueshëm të situatës.

“Dua t’u drejtohem me një falenderim shumë të madh të gjithë atyre që kanë punuar jo vetëm në këto dy ditë që kemi pasur raste të reshjeve. Përpos helmit dhe të gjithë vështirësive njerëzit vazhdojnë të bëjnë punë e tyre siç e kanë parë bërë në këtë bllok ku u kanë dhënë frymëmarrje të gjithë banorëve të kësaj që quhet zona e Freskut, ku shumë njerëzve rruga nuk mund t’u bjerë sepse nuk jetojnë në këtë zonë apo nuk janë pjesë e kësaj pjese të Tiranës në aksin Veri Lindor të saj, por janë në pjesën më fundore ku kontrollojnë nivelin e lumit të Lanës, të Liqenit, apo të kolektorëve”, deklaroi Ristani.

Sipas saj, ajo që mund të kontrollojmë është që Bashkia e Tiranës të bëjë punën e saj dhe secili të bëjë punën e vet.

“Ata nga ne që merren me infrastrukturën të merren me infrastrukturë, ata që janë qytetarë të thjeshtë në të qenit dhe të trajtuarit që qytetit si shtëpinë e tyre, me përgjegjësinë e të trajtuarit si shtëpinë e tyre dhe për këtë dua t’i falenderoj sepse janë shumica e heshtur që nuk bëjnë zhurmë nëpër rrjete, por tregohen të përgjegjshëm me atë që është publike, me mjedisin që është publik, duke e trajtuar në respekt të të gjithë atyre që punojnë dhe të fëmijëve që do të rriten në këtë mjedis”, përfundoi Ristani.