Gjashtë persona u plagosën me thikë, teksa dy prej tyre ndodhen në gjendje kritike, gjatë një demonstrate të komunitetit kurd në qytetin e Antwerpit në Belgjikë, mbrëmjen e së enjtes.

Ngjarja ndodhi pranë sheshit ‘Opera’, ku rreth 50 protestues ishin mbledhur për të kërkuar mbrojtje për kurdët që jetojnë në verilindje të Sirisë. Sipas policisë, protesta kishte qenë fillimisht paqësore.

Demonstrata nisi rreth orës 18:00 (me orën lokale) dhe po i afrohej fundit, kur situata u përshkallëzua rreth orës 19:20. Katër nga të plagosurit u gjetën pranë sheshit Opera, ndërsa dy të tjerë u lokalizuan në zona të afërta, përkatësisht në Rooseveltplaats dhe në rrugën Sint-Elisabethstraat. Të gjashtë personat kishin plagë të shkaktuara nga thika.

Pamjet e shpërndara në rrjetet sociale tregojnë momentin kur oficerët e policisë neutralizojnë një të dyshuar, ndërsa në vendngjarje shihen flamuj kurdë dhe të PKK-së. Zëdhënësi i Policisë së Zonës së Antwerp-it, Wouter Bruyns, bëri të ditur për median belge ‘De Morgen’ se dy persona janë arrestuar. Sipas hetimeve fillestare, të dyshuarit ishin përzier mes protestuesve gjatë tubimit.

Forcat e policisë ndodhen tashmë në vendngjarje për të monitoruar demonstratën dhe arritën të ofrojnë ndihmën e parë menjëherë pas incidentit, deri në mbërritjen e ambulancave. Autoritetet nuk kanë dhënë ende informacion mbi identitetin apo motivet e mundshme të të dyshuarve.

“Një hetim i plotë po zhvillohet në vendngjarje, përfshirë analiza forenzike. Policia po u kërkon me këmbëngulje kalimtarëve të largohen nga zona”, deklaroi Bruyns, duke shtuar se për momentin nuk mund të ndahen detaje të tjera.

Organizatorët e protestës thanë se tubimi kishte qenë paqësor deri në momentin kur shpërtheu dhuna. Orhan Kilic, zëdhënës i organizatës kurde NavBel, e cilësoi sulmin si të motivuar politikisht. “Kjo lidhet drejtpërdrejt me çështjen kurde dhe me sulmet xhihadiste ndaj kurdëve në Siri. Është qartësisht e motivuar politikisht”, tha Kilic për DeMorgen. “Prej kohësh shohim organizata dhe individë me frymëzim islamik që na sulmojnë verbalisht, dhe tani duket se kjo ka kaluar edhe në dhunë fizike”.

Ndërkohë, tensionet në verilindje të Sirisë janë rritur ndjeshëm muajt e fundit. Forcat Demokratike Siriane (SDF), të udhëhequra nga kurdët dhe aleate kryesore të SHBA-së në luftën kundër ISIS-it, po përballen me sulme të intensifikuara nga forcat e qeverisë siriane. SDF kontrollon territore të rëndësishme dhe të pasura me naftë, gjë që e bën rajonin strategjik dhe konfliktin edhe më të ndërlikuar.

Autoritetet belge kanë deklaruar se hetimet do të vazhdojnë për të zbardhur plotësisht rrethanat e ngjarjes dhe për të përcaktuar nëse sulmi ka qenë i organizuar apo i lidhur me tensionet politike dhe etnike ndërkombëtare.

Sinjali – aty ku e vërteta flet para lajmit!

/GazetaSinjali/

The post Degjeneron protesta pro-kurde në Belgjikë, gjashtë të plagosur appeared first on Sinjali.

Bashkimi Evropian ka dhënë kontributin e parë financiar prej 10 milionë eurosh për të mbështetur Tribunalin Special, i cili po krijohet për të hetuar dhe gjykuar krimet e agresionit të Rusisë kundër Ukrainës.

Ky tribunal po ngrihet nën kujdesin e Këshillit të Evropës.

Përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas, e njoftoi financimin mbrëmjen e sotme gjatë ceremonisë së nënshkrimit të marrëveshjes me Këshillin e Evropës.

“BE-ja ka dhënë 10 milionë euro të parat për një Tribunal të ri Special për të ndjekur penalisht udhëheqësit rusë për rolin e tyre në luftën e Moskës kundër Ukrainës. Udhëheqësit e Rusisë janë përgjegjës për këtë luftë dhe ata duhet të mbajnë përgjegjësi. Nuk mund të ketë pandëshkueshmëri,” tha Kallas.

Ky njoftim vjen pas kritikave të presidentit ukrainas, Volodymyr Zelensky, gjatë Forumit Ekonomik Botëror në Davos, ku ai qortoi partnerët ndërkombëtarë për ritmin e ngadaltë në drejtimin e drejtësisë ndaj Vladimir Putin dhe për dënimin e krimeve të luftës ruse kundër Ukrainës.

Tribunali Special u krijua përmes një marrëveshjeje të nënshkruar në qershor 2025 mes Ukrainës dhe Këshillit të Evropës në Strasburg. Ai synon të sigurojë që udhëheqësit rusë të mbajnë përgjegjësi për agresionin dhe krimet e kryera gjatë luftës.

Sinjali – aty ku e vërteta flet para lajmit!

/GazetaSinjali/

The post Bashkimi Evropian jep 10 milionë euro për Tribunalin Special për krimet ruse në Ukrainë appeared first on Sinjali.

Një aksident i rëndë ka ndodhur ditën e sotme në Itali, ku ka humbur jetën një 20-vjeçar shqiptar.

Viktima është identifikuar si Klaudio Gjoka, ndërsa sipas mediave italiane, shkak u bë një përplasje midis një kamioni dhe një veture tip “Audi” që po drejtohej nga i riu shqiptar, raporton Tch.

Zjarrfikësit e Saluzzos, të cilëve iu desh të nxirrnin djalin, karabinierët dhe shërbimet e urgjencës shëndetësore ishin në vendngjarje, informon media italiane.

Sinjali – aty ku e vërteta flet para lajmit!

/GazetaSinjali/

The post Aksident mes një kamioni dhe një veture në Itali, vdes 20-vjeçari shqiptar appeared first on Sinjali.

Të enjten, Shtëpia e Bardhë ka vazhduar gjuhën e ashpër ndaj ish-hetuesit të posaçëm dhe ish-kryeprokurorit të Dhomave të Specializuara, Jack Smith.

Në një lëvizje të pazakontë, zyra e presidentit publikoi në llogarinë zyrtare në Facebook një fotografi të Smithit pa ngjyra, shoqëruar vetëm me një fjalë të shkruar me të kuqe: “I ÇMENDUR”,

Jack Smith, i cili ka ndjekur pa sukses penalisht ish-presidentin Donald Trump, u shpreh të enjten para një paneli të Dhomës së Përfaqësuesve se Shtëpia e Bardhë “po kërkonte mënyra për të qëndruar në pushtet” pas humbjes në zgjedhjet presidenciale të vitit 2020.

Sinjali – aty ku e vërteta flet para lajmit!

/GazetaSinjali/

The post Shtëpia e Bardhë e quan “të çmendur” ish-kryeprokurorin e Speciales, Jack Smith appeared first on Sinjali.

Presidenti rus, Vladimir Putin, filloi të enjten vonë një takim me tre emisarët amerikanë për të diskutuar një plan rreth përfundimit të luftës në Ukrainë, tha Kremlini.

Amerikanët Steve Witkoff dhe Jared Kushner ishin të shoqëruar edhe nga Josh Gruenbaum, i emëruar rishtazi nga presidenti Donald Trump si këshilltar i lartë në Bordin e Paqes, i cili e ka për detyrë ndaljen e konflikteve ndërkombëtare, raporton agjencia e lajmeve “Reuters”.

Putini u përshëndet me emisarët amerikanë pak para mesnatës në Moskë, pasi Trumpi tha se një marrëveshje ishte “afër në masë të arsyeshme” dhe emisari Witkoff tha se bisedimet kanë arritur deri te një pikë e fundit.

Disa minuta pas fillimit të këtyre bisedimeve, Rusia tha se kishte kryer një patrullim të aeroplanëve bombardues strategjikë – diçka që e bën rregullisht si shfaqje e fuqisë.

Kremlini tha se Putini, njësoj si në takime të mëparshme me palën amerikane, u shoqërua nga ndihmësi i tij për politikë të jashtme, Yuri Ushakov, dhe emisari i posaçëm, Kirill Dmitriev.

Të mërkurën, presidenti amerikan tha se homologët e tij nga Rusia e Ukraina, Putini e Volodymyr Zelensky, do të ishin “budallenj”, nëse dështojnë që të bashkohen e të arrijnë një marrëveshje./

Sinjali – aty ku e vërteta flet para lajmit!

/GazetaSinjali/

The post Putini në Moskë i pret në takim tre emisarët amerikanë, pritet të bisedojnë rreth Ukrainës appeared first on Sinjali.

Presidenti i Francës, Emmanuel Macron, ka deklaruar se uniteti i Evropës ka funksionuar kundër kërcënimeve të presidentit të SHBA-së, Donald Trump, raporton “The Guardian”.

Ai ka theksuar se takimi i liderëve evropianë i të enjtes, në mbështetje të Danimarkës, demonstron fuqinë e bashkimit të kontinentit.

“Kur Evropa është e bashkuar, e fortë dhe reagon shpejt, gjërat kthehen në normalitet dhe qetësi”, tha Macron.

Megjithatë, ai ka shtuar se Evropa duhet të qëndrojë “vigjilente” dhe të veprojë në “mënyrë të bashkuar”, duke theksuar se BE-ja ka “instrumente në dispozicion” në rast të kërcënimeve.

Ai gjithashtu ka bërë të ditur se Franca është e hapur të marrë pjesë në më shumë misione të NATO-s, përfshirë edhe në Arktik.

Këto komente vijnë pas kërcënimeve të presidentit Trump ndaj tetë shteteve evropiane, përfshirë Francën, lidhur me çështjen e Grenlandës. Ai kishte paralajmëruar vendosjen e tarifave prej 10% nga 1 shkurti dhe rritjen e tyre në 25% nga 1 qershori ndaj Danimarkës, Norvegjisë, Suedisë, Francës, Gjermanisë, Mbretërisë së Bashkuar, Holandës dhe Finlandës. Megjithatë, të mërkurën Trump hoqi dorë nga këto tarifa.

Në këtë kontekst, shefja e politikës së jashtme të Bashkimit Evropian, Kaja Kallas, ka deklaruar se marrëdhëniet transatlantike kanë marrë goditje të rëndë javën e fundit, por ka nënvizuar se Evropa nuk është e gatshme të heqë dorë nga dekada partneritet me SHBA-në. Ajo ka folur gjatë takimit joformal të liderëve të BE-së të mbajtur në Bruksel.

Sinjali – aty ku e vërteta flet para lajmit!

/GazetaSinjali/

The post Macron: Uniteti i Evropës funksionoi kundër kërcënimeve të Trump appeared first on Sinjali.

Një incident shqetësues është raportuar sot në Lipjan, ku një nxënës është kapur me një shufër metalike brenda ambientit shkollor.

Burime policore bëjnë të ditur se rasti ka ndodhur më 22.01.2026, rreth orës 08:30, në rrugën “Avdi Kelmendi”, kur Drejtori i SHMP “Adem Gllavica” ka njoftuar Policinë se te nxënësi E.B., rreth 15-vjeçar, gjatë kontrollit nga kujdestari i tij, është gjetur një shufër metali.

Në vendin e ngjarjes kanë dalë njësitë patrulluese, ndërsa i dyshuari është intervistuar në prani të prindit (babait).

Sipas informatave, mjeti i dyshuar është konfiskuar nga Policia, ndërkohë që është njoftuar edhe Prokurori i Shtetit dhe rasti është iniciuar si “Armëmbajtje pa leje”.

Hetimet lidhur me rastin janë duke vazhduar.

Sinjali – aty ku e vërteta flet para lajmit!

/GazetaSinjali/

The post Shqetësuese: Nxënësi kapet me shufër metali në shkollën “Adem Gllavica” në Lipjan, Policia konfiskon mjetin appeared first on Sinjali.

Daniel Serwer, profesor në John Hopkins University ka pasur fjalë të ashpra për Bordin e Paqes të inicuar nga Donald Trump, dhe aderimin e Kosovës në të që u materializua sot me nënshkrimin e Presidentes së Kosovës, Vjosa Osmanit.

Serwer nuk i përshkruan vlerë kësaj iniciative të Donald Trump, për të cilin pati kualifikime të rënda, por tha se e kupton dëshirën e Kosovës “për të blerë kredite” nga presidenti amerikan.

“Bordi i Paqes do të jetë thjeshtë mundësi për të qëndruar në një dhomë ndërsa Trump flet për një orë. Ndoshta as kaq. Kosova s’mund të përballojë 1 miliardë dollarë…”, tha ai për AP.

Sinjali – aty ku e vërteta flet para lajmit!

/GazetaSinjali/

The post Serwer dyshues i madh për Bordin e Paqes: E kuptoj dëshirën e Kosovës që të blejë kredite nga Trump appeared first on Sinjali.

Sviatlana Tsikhanouskaya, opozitarja bjelloruse që vepron nga jashtë vendit, e ka marrë Kosovën si shembull të lirisë dhe prosperitetit.

Ajo ka bërë të ditur se ka takuar presidenten e Kosovës, Vjosa Osmani, gjatë qëndrimit në Davos të Zvicrës, ku po mbahet Forumi Ekonomik Botëror.

Në një postim në Twitter, Tsikhanouskaya ka vlerësuar rrugëtimin e Kosovës dhe mbështetjen e saj për popullin bjellorus.

“Rrugëtimi i jashtëzakonshëm i Kosovës tregon se si guximi, qëndrueshmëria dhe solidariteti ndërkombëtar mund të çojnë drejt lirisë dhe prosperitetit. Ne e vlerësojmë mbështetjen e vazhdueshme të Kosovës për popullin e Bjellorusisë”, ka shkruar ajo.

Tsikhanouskaya është figura kryesore e opozitës bjelloruse dhe udhëheqësja simbolike e rezistencës kundër regjimit të Aleksandër Lukashenkos. Ajo u bë e njohur gjatë zgjedhjeve presidenciale të vitit 2020, pasi bashkëshorti i saj, Siarhei Tsikhanouski, u arrestua dhe iu ndalua kandidimi.

Sipas vëzhguesve ndërkombëtarë, zgjedhjet e asaj kohe u manipuluan në favor të Lukashenkos, çka u pasua me protesta të mëdha në mbarë Bjellorusinë. Pas zhvillimeve, Tsikhanouskaya u detyrua të largohej nga vendi dhe që atëherë vepron si opozitare në arenën ndërkombëtare.

Ndryshe, Bjellorusia nuk e njeh shtetin e Kosovës.

Sinjali – aty ku e vërteta flet para lajmit!

/GazetaSinjali/

The post Opozitarja bjelloruse merr Kosovën si shembull të lirisë dhe prosperitetit: Rrugëtim i jashtëzakonshëm appeared first on Sinjali.

Drejtori i Programave Shëndetësore dhe Komunitare në Shoqatën Mjekësore të Kthimit (Return Medical Association), Ahmed Muhanna, paralajmëroi se vazhdimi i rrethimit mjekësor të imponuar ndaj Rripit të Gazës po sjell një katastrofë humanitare mes mungesës së rëndë dhe nevojës në rritje të ilaçeve esenciale dhe furnizimeve mjekësore në spitale dhe qendra shëndetësore.

Në një deklaratë për mediat Muhanna tha se Shoqata e Kthimit vazhdon punën me kapacitet të plotë dhe menaxhim efektiv për të ruajtur vazhdimësinë e ofrimit të shërbimeve shëndetësore për qytetarët, pavarësisht sfidave në rritje që po përballet sektori shëndetësor.

Ai shpjegoi se shoqata kohët e fundit po vuan nga një mungesë e rëndë e shumë ilaçeve, materialeve harxhuese dhe furnizimeve mjekësore, duke theksuar se nëse politikat që pengojnë hyrjen e sasive të mjaftueshme të këtyre furnizimeve vazhdojnë në ditët në vijim, kjo mund të çojë në ndalim të pjesshëm të disa ndërhyrjeve mjekësore dhe operacioneve kirurgjikale.

Sipas tij, shoqata ende nuk është detyruar të ndalojë shërbimet shëndetësore, përveç një rasti kur puna u reduktua për shkak të mbarimit të furnizimeve me naftë, gjë që u njoftua qartë në media në atë kohë.

Sinjali – aty ku e vërteta flet para lajmit!

/GazetaSinjali/

The post Shoqata Mjekësore “Return Medical Association”: Nëse vazhdon kështu situata në Gazë, atëherë na pret katastrofa appeared first on Sinjali.

Në një moment të çuditshëm gjatë fitores 1-0 të Aston Villa ndaj Fenerbahce në Europa League, trajneri Unai Emery u kap duke shtyrë Youri Tielemans pas zëvendësimit të tij në minutën e 89-të.

Belgu kishte përqafuar shkurtimisht pasuesin e tij George Hemmings dhe tentoi të vendoste dorën mbi belin e trajnerit, por Emery, i irrituar, reagoi duke bërtitur dhe duke e shtyrë lojtarin drejt stolit. Incidenti nuk eskaloi, dhe Tielemans nuk u kthye për të reaguar fizikisht ndaj trajnerit.

Shkaqet e zemërimit të Emery mbeten të paqarta, me disa teori që lidhen me kartonin e verdhë të lojtarit ose mënyrën se si ai u largua nga fusha.

Pavarësisht tensionit në stol, Villa arriti të ruajë fitoren falë golit të Jadon Sancho në minutën e 25-të dhe tani është në 16-të më të mirët e Europa League, me 18 pikë dhe vetëm një humbje këtë sezon në Europë.

Ky episod u shpërnda masivisht në rrjetet sociale, ku tifozët shprehën habinë e tyre për sjelljen e trajnerit.

Aston Villa duket të jetë një nga favoritët për të fituar finalen e Europa League në maj, pavarësisht tensioneve në stol.

Unai emery has gone absolutely mental at tielemans wtf #AVFC pic.twitter.com/66GV5NW6Wr

— Matty H (@MH_HCAFC) January 22, 2026

Sinjali – aty ku e vërteta flet para lajmit!

/GazetaSinjali/

The post Trajneri Unai Emery kapet duke shtyrë lojtarin e tij pas zëvendësimit appeared first on Sinjali.

Franca thotë se ka sekuestruar një cisternë nafte në Mesdhe që dyshohet se është pjesë e “flotës hije” të Rusisë, e cila përdoret për t’i anashkaluar sanksionet, raporton “BBC”.

Presidenti francez Emmanuel Macron tha se cisterna, e quajtur Grinch, ishte “subjekt i sanksioneve ndërkombëtare dhe dyshohej se po lundronte me flamur të rremë”.

Marina franceze, me ndihmën e aleatëve përfshirë Mbretërinë e Bashkuar, hipi në bord të anijes të enjten në mëngjes midis Spanjës dhe Marokut. Autoritetet detare franceze thanë se një kontroll i anijes kishte “konfirmuar dyshimet për parregullsi të flamurit”. 

Ambasada ruse në Paris tha se nuk ishte informuar për sekuestrimin.

E ashtuquajtura “flotë hije” e Moskës është një rrjet i fshehtë cisternash që përdoren për t’i shmangur sanksionet perëndimore ndaj eksporteve ruse të naftës, duke transportuar naftën me anije të vjetra me pronësi ose sigurim të paqartë.

Grinch po udhëtonte nga porti arktik i Murmanskut në veriun e Rusisë kur u ndalua, thanë autoritetet franceze. Anija po mbante flamurin e Komoreve, sipas faqeve të ndjekjes së anijeve marinetraffic dhe vesselfinder. Duke njoftuar sekuestrimin në X, Macron tha: “Ne jemi të vendosur të respektojmë ligjin ndërkombëtar dhe të sigurojmë zbatimin efektiv të sanksioneve.

“Veprimtaritë e ‘flotës hije’ kontribuojnë në financimin e luftës së agresionit kundër Ukrainës,” tha ai, duke shtuar se anija ishte “devijuar”.

Sekretari britanik i Mbrojtjes, John Healy, tha se Marina e Mbretërisë së Bashkuar kishte ofruar mbështetje për “gjurmim dhe monitorim”, me HMS Dagger që monitoronte cisternën përmes Ngushticës së Gjibraltarit.

“Së bashku me aleatët tanë, po forcojmë reagimin tonë ndaj anijeve hije për të bllokuar fondet që ushqejnë pushtimin e paligjshëm të Putinit ndaj Ukrainës.”

Mbretëria e Bashkuar ka vendosur sanksione ndaj 544 anijeve të flotës hije ruse.

Presidenti ukrainas Volodymyr Zelensky e përshëndeti veprimin, duke thënë se ishte “pikërisht lloji i vendosmërisë që nevojitet për të siguruar që nafta ruse të mos financojë më luftën e Rusisë”.

“Anijet duhet të ndalohen. Dhe a nuk do të ishte e drejtë të konfiskohej dhe të shitej nafta që transportojnë këto cisterna?” – shkroi ai në X.

Sinjali – aty ku e vërteta flet para lajmit!

/GazetaSinjali/

The post Franca sekuestron një cisternë nafte të dyshuar si pjesë e “flotës hije” ruse në Mesdhe appeared first on Sinjali.

Një tren udhëtarësh u përplas me një vinç në Spanjën juglindore të enjten, thanë shërbimet e emergjencës, në aksidentin e katërt hekurudhor në vend në më pak se një javë.

Katër persona pësuan lëndime të lehta në aksidentin pranë qytetit portual të Cartagenës në rajonin e Murcias, shtuan autoritetet.

“Treni nuk është përmbysur ose dalë nga shinat”, tha një zëdhënës i shërbimeve të emergjencës së Murcias. Ata shtuan se telefonatat e para në lidhje me aksidentin erdhën menjëherë pas mesditës.

Spanja është ende e tronditur nga përplasja e trenave me shpejtësi të lartë të së dielës në rajonin jugor të Andaluzisë, ku humbën jetën të paktën 43 persona.

Dy ditë pas kësaj, një tren udhëtarësh doli nga shinat pasi një mur mbrojtës ra në shina për shkak të shiut të rrëmbyeshëm pranë qytetit të Barcelonës, duke vrarë shoferin dhe duke plagosur rëndë katër pasagjerë.

Sindikata kryesore e makinistëve të trenave bëri thirrje për një grevë mbarëkombëtare për shkak të standardeve të sigurisë pas kësaj dhe një përplasjeje të dytë në rajonin verilindor të Katalonjës po atë ditë, të martën.

Të enjten, operatori hekurudhor spanjoll Adif tha se trafiku në linjën në Murcia u ndërpre nga ajo që e përshkroi si “ndërhyrje në matësin e infrastrukturës nga një vinç që nuk i përkiste operacionit hekurudhor”.

Sinjali – aty ku e vërteta flet para lajmit!

/GazetaSinjali/

The post Treni përplaset me vinçin në aksidentin e katërt hekurudhor në Spanjë brenda një jave appeared first on Sinjali.

Kryeministri i Grenlandës, Jens-Frederik Nielsen, ka thënë se vendi i tij e zgjedh “Grenlandën që e njohim sot”.

Duke folur në një konferencë për gazetarë, ai thotë se “si pjesë e Mbretërisë së Danimarkës, ne i kemi zhvilluar shoqërinë tonë, demokracinë dhe vendin tonë… nën kornizën e Mbretërisë së Danimarkës dhe aleancës së NATO-s”, raporton televizioni BBC.

“Ne e kemi fituar vetëdrejtimin, të drejtën tonë për vetëvendosje brenda kornizës. Kjo duhet të vazhdojë” – shtoi ai.

Duke iu referuar protestave të fundjavës, kur mijëra njerëz protestuan në kryeqytetin e ishullit, Nuuk, Nielseni tha se ato nuk ishin “kundër Shteteve të Bashkuara”.

“Nuk ishte protestë kundër miqësisë sonë të vjetër ose bashkëpunimit të ngushtë. Ishte kundër mosrepsektimit të sundimit ndërkombëtar të ligjit, demorkacisë dhe të drejtës sonë për vetëvendosje” – tha më tej kryeministri i Grenlandës.

“Ne kemi kërkuar dhe do të vazhdojmë të kërkojmë dialog me respekt përmes diplomacisë dhe kanaleve normale” – shtoi ai.

Kur u pyet nga një reporter i televizionit amerikan, CNN, nëse Grenlanda është e sigurt për të mos rënë në pronësinë e Shteteve të Bashkuara, kryeministri tha se askush tjetër përpos Grenlandës e Danimarkës nuk kanë mandate për të bërë marrëveshje për ishullin.

“Ne jemi të gatshëm që të bashkëpunojmë më shumë në ekonomi, por për këtë gjë duhet të flasim me respekt të ndërsjellë” – deklaroi Nielseni.

Sinjali – aty ku e vërteta flet para lajmit!

/GazetaSinjali/

The post Kryeministri Nielsen thotë se Grenlanda e zgjedh “Grenlandën që e njohim sot” appeared first on Sinjali.

Elon Musk sugjeroi se emri i Bordit të Trump duhej të ishte “piece” (copë) në vend të “peace” (paqe). “Dëgjova për formimin e Samitit të Paqes dhe mendova: është ‘piece’ apo… një copë e vogël Groenlande, një copë e vogël Venezuele”, tha ai.

Miliarderi i teknologjisë Elon Musk, i cili u bashkua me CEO-n e BlackRock, Larry Fink, në një panel në Forumin Ekonomik Botëror në Davos, ironizoi “Bordin e Paqes” të Presidentit amerikan Donald Trump.

“Gjithçka që duam është paqe”, shtoi ai, duke shkaktuar të qeshura nga audienca. I kryesuar nga Trump, bordi ishte menduar fillimisht si një grup i vogël liderësh botërorë që do të mbikëqyrnin planin e armëpushimit në Gaza. Por ambiciet e administratës Trump janë zgjeruar, me ftesa për dhjetëra shtete dhe me sinjale se bordi mund të marrë rol më të gjerë si ndërmjetës i konflikteve.

Musk ka qenë gjithashtu aleat i Trump dhe komentet e tij vijnë në një kohë kur marrëdhënia me liderin republikan është në përmirësim, pas një viti të trazuar me përplasje publike dhe pajtim të mëvonshëm.

Gjatë diskutimit në panel, Musk parashikoi se robotët do të transformojnë shoqërinë dhe do të ndihmojnë njerëzimin duke reduktuar nevojën për punë njerëzore, një ide që ai e ka përmendur edhe më parë.

“Do të ketë një bollëk të madh mallrash dhe shërbimesh”, tha ai. “Do të ketë më shumë robotë sesa njerëz.”

Ai shtoi se “çdokush në Tokë” do të dëshirojë një robot për t’u kujdesur për prindërit e moshuar ose fëmijët. Musk tha se Tesla do të fillojë shitjen e robotëve për publikun deri në fund të vitit të ardhshëm.

Shfaqja e tij vjen ndërkohë që Grok, inteligjenca artificiale e zhvilluar nga startup-i i tij xAI, është përfshirë në një polemikë lidhur me gjenerimin e imazheve me përmbajtje seksuale eksplicite.

Prania e Musk në Davos ishte veçanërisht e spikatur pasi ai e ka kritikuar publikisht mbledhjen vjetore si të papërgjegjshme dhe të shkëputur nga njerëzit e zakonshëm.

Musk ka tallur vazhdimisht Davos-in në platformën e tij sociale X, duke e quajtur “të mërzitshëm” dhe duke thënë se Forumi Ekonomik Botëror është “një qeveri botërore e pa zgjedhur, që njerëzit kurrë nuk e kërkuan dhe nuk e duan”.

Sinjali – aty ku e vërteta flet para lajmit!

/GazetaSinjali/

The post “Paqe apo një copë Groenlandë?”, Musk ironizon bordin e ri të Gazës të Trump appeared first on Sinjali.

Kryenegociatori i Kosovës, Besnik Bislimi, tha se është arritur pajtim me Serbinë për funksionalizimin e komisionit të përbashkët për zbatimin e marrëveshjes për personat e zhdukur gjatë luftës në Kosovë.

Pas rundit të ri të dialogut në Bruksel, Bislimi deklaroi se tani mbetet që përfaqësuesit e delegacioneve të Kosovës dhe Serbisë të takohen “në javët në vijim dhe të përcaktojnë prioritetet e para për punën e komisionit të përbashkët”.

Marrëveshja u arrit pas disa orësh bisedimesh që ndërmjetësi evropian në dialog, Peter Sorensen, zhvilloi veç e veç me Bislimin dhe kryenegociatorin e Serbisë, Petar Petkoviq.

Në fund të këtyre takimeve, në orët e mbrëmjes u mbajt një takim i përbashkët, në të cilin marrëveshja u formalizua.

Rundi i ri i dialogut u zhvillua pas vizitës së Sorensenit në Prishtinë dhe Beograd javën e kaluar.

Për çështjen e personave të zhdukur, kryeministri i Kosovës, Albin Kurti dhe presidenti i Serbisë, Aleksandar Vuçiq, më 2023 u pajtuan për Deklaratën e përbashkët për personat e zhdukur.

Palët u pajtuan për zbatimin e plotë të deklaratës së përbashkët për personat e zhdukur gjatë një takimi trepalësh mes kryenegociatorëve në dhjetor 2024 në Bruksel.

Takimi i parë ishte paraparë të mbahej në janar, por pala serbe nuk pranoi të merrte pjesë për shkak të veprimeve për mbylljen e zyrave që mbështeten nga Serbia në Kosovë.

Takimi i sotëm është i pari në kuadër të dialogut për normalizimin e marrëdhënieve ndërmjet Serbisë dhe Kosovës këtë vit.

Gjatë vizitës së tij në Prishtinë më 14 janar, Sorensen tha lidhur me dialogun se “kam shpresa se viti 2026 do të na japë atë që viti 2025 nuk na e dha”.

“Çfarë do të bëjmë ne është të sigurohemi që palët të ulen dhe të bisedojnë. Duhet ta gjejmë një mënyrë që kjo të ndodhë”, theksoi Sorensen në Prishtinë.

Ai tha se do të punojë për të gjetur një mënyrë që dy vendet fqinje të zhvillojnë bisedime të nivelit të lartë, në përpjekje për t’i normalizuar marrëdhëniet, njofton rel.

Kosova dhe Serbia nuk kanë zhvilluar takim të nivelit të lartë që nga viti 2023, pas rritjes së tensioneve mes tyre për shkak të një sulmi nga një grup serbësh të armatosur ndaj Policisë së Kosovës në veriun e banuar me shumicë serbe në shtator të atij viti.

Kurti – i cili pritet të jenë në krye të qeverisë së vendit edhe për një mandat të tretë katërvjeçar – e ka kushtëzuar vazhdimin e dialogut me dorëzimin e të dyshuarit për sulmin në Banjskë të Zveçanit që la një rreshter të vrarë, Millan Radoiçiq.

Radoiçiq ishte nënkryetar i Listës Serbe, partisë më të madhe të serbëve të Kosovës kur ndodhi sulmi dhe e mori përgjegjësinë për të. Beogradi nuk ka pranuar t’ia dorëzojë Kosovës atë, dhe thuhet se ai endet i lirë në Serbi.

Edhe Serbia ka kushtet e veta në dialog, siç e ritheksoi edhe Petkoviq pas takimit me Sorensenin më 16 janar në Beograd.

Kryenegociatori serb tha se përparimi në dialogun e ndërmjetësuar nga blloku varet nga gatishmëria e Kosovës për ta themeluar një asociacion të komunave me shumë serbe.

Kosova dhe Serbia veçse arritën marrëveshje për rrugën drejt normalizimit, e njohur si Marrëveshja e Ohrit, më 2023, por nuk janë duke e zbatuar atë.

Ndër pikat e marrëveshjes është edhe themelimi i Asociacionit të komunave me shumicë serbe në Kosovë, por Prishtina nuk ka ndërmarrë hapa për ta përmbushur këtë kërkesë.

Sinjali – aty ku e vërteta flet para lajmit!

/GazetaSinjali/

The post Bislimi: Është arritur pajtim me Serbinë për komisionin për personat e zhdukur appeared first on Sinjali.

Udhëheqësit e shteteve anëtare të Bashkimit Evropian (BE) mblidhen mbrëmjen e 22 janarit në Bruksel për një samit urgjent, i thirrur pas kërcënimeve të presidentit amerikan, Donald Trump, për vendosjen e tarifave ndaj disa shteteve të kontinentit evropian.

Mbajtja e samitit u konfirmua edhe pasi presidenti amerikan më 21 janar hoqi dorë nga vendosja e tarifave, pasi në Davos të Zvicrës u arrit një pajtim për kornizën e marrëveshjes për Grenlandën gjatë një takimi me sekretarin e Përgjithshëm të NATO-s, Mark Rutte.

Bashkimi Evropian në samit kishte planifikuar fillimisht të diskutojë për një përgjigje të përbashkët ndaj kërcënimeve amerikane për tarifa. Pritet që udhëheqësit evropianë të bisedojnë edhe për strategjinë e përgjigjes ndaj kërcënimeve të mundshme në të ardhmen nga presidenti Trump.

Presidenti i Këshillit Evropian, Antonio Costa, në ftesën drejtuar shefave të shteteve dhe qeverive të BE-së, theksoi se dëshiron një diskutim mbi sfidat në marrëdhëniet transatlantike, pasojat e tyre për Bashkimin Evropian, si dhe koordinimin e hapave të ardhshëm.

Parlamenti Evropian më 21 janar pezulloi procesin e ratifikimit të marrëveshjes tregtare me Shtetet e Bashkuara të Amerikës, në dritë të tensioneve lidhur me Grenlandën.

Udhëheqësit e BE-së do të diskutojnë për Grenlandën dhe raportet tregtare me SHBA-në.

BE-ja synon që marrëdhëniet tregtare të jenë të qëndrueshme, të parashikueshme dhe të sigurta, por nëse kjo nuk ndodh, atëherë dëshiron të ketë në dispozicion kundërmasa të shpejta.

Sipas diplomatëve evropianë, blloku evropian dëshiron të përcaktojë qartë sa i fortë, i qëndrueshëm dhe i parashikueshëm është aktualisht partneriteti transatlantik tregtar dhe aleanca ushtarake.

Fokusi i diskutimit pa dyshim do të jetë Grenlanda, dhe pritet që udhëheqësit të marrin më shumë informacione nga Danimarka.

Kryeministrja e vendit pas konfirmimit të arritjes së pajtimit për kornizën e marrëveshjes tha se shteti i saj është i gatshëm të bisedojë për sigurinë në Arktik, por insiston në respektimin e integritetit territorial.

Bordi për Paqe në agjendën e takimit të liderëve evropianë

Bashkimi Evropian aktualisht heziton të marrë pjesë zyrtarisht në Bordin e ri për Paqe, duke pritur sqarime shtesë nga pala amerikane, por edhe duke analizuar nëse pjesëmarrja në këtë trup lejohet nga kushtetutat e disa shteteve anëtare.

Komisioni Evropian fillimisht përshëndeti idenë e këtij Bordi, por BE do të përpiqet të marrë një qëndrim të përbashkët edhe për këtë çështje. Për disa vende evropiane problematike është fakti që Trump ka ftuar në Bord edhe presidentët e Rusisë dhe Bjellorusisë, Vladimir Putin, dhe Aleksandar Lukashenko.

Megjithatë, unanmiteti për këtë çështje nuk është më i mundur, pasi në këtë Bord janë bashkuar Bullgaria dhe Hungaria.

Sinjali – aty ku e vërteta flet para lajmit!

/GazetaSinjali/

The post BE-ja diskuton për Grenlandën dhe raportet tregtare me SHBA-në appeared first on Sinjali.

Në rrjetet sociale po qarkullon një video e banorit të Big Brother VIP Albania 5, Keijsit, ku ai dëgjohet duke sharë Stelinën, me të cilën kishte një histori dashurie.

Në video, ai fillon me ironi: “Bravo Stelina, bravo” dhe më pas vazhdon me fjalë ofenduese.

Duket se banorja Ina ia kujton se ndodhen në një reality show dhe e paralajmëron të zgjedhë fjalët. Por Keijsi përgjigjet pa hezitim: “Më lër rehat se nuk më plas që ka kamera.”

Nga pamjet shihet se ai ka qenë në nervoz e sipër, pa menduar për pasojat e fjalëve të tij.

Fansat e spektaklit pyeten tashmë: a do të ketë një zarf të zi për këtë sjellje si ndëshkim? Kjo mbetet për t’u parë në episodet e ardhshme.

@bbviprrumpalle Nxirreni jasht kte krn #bigbrothervipalbania #bigbrothervipkosova #fyp #albania #viral ♬ original sound – BBVipRrumpalle

Sinjali – aty ku e vërteta flet para lajmit!

/GazetaSinjali/

The post “S’më plas që ka kamera” – Keijsi dëgjohet duke sharë në Big Brother VIP Albania appeared first on Sinjali.

Presidenti i Turqisë, Recep Tayyip Erdogan, i tha homologut të tij iranian, Masoud Pezeshkian, në një telefonatë të enjten se Turqia ishte kundër çdo ndërhyrjeje të huaj në Iran dhe se vlerësonte paqen dhe stabilitetin e fqinjëve të saj, njoftoi Presidenca Turke në X.

Në një deklaratë, presidenca tha se udhëheqësi turk kishte diskutuar zhvillimet e fundit në Iran dhe kishte theksuar se zgjidhja e problemeve pa përshkallëzim të mëtejshëm ishte gjithashtu në interes të Turqisë.

Irani po përballet me disa nga protestat më të mëdha antiqeveritare në historinë e tij, të cilat kanë shkaktuar një shtypje të gjerë. Udhëheqësi Suprem iranian, Ali Khamenei, tha të shtunën se numri i të vrarëve arrinte në “disa mijëra”, duke e pranuar publikisht për herë të parë shkallën e viktimave dhe fajësuar Shtetet e Bashkuara.

Demonstratat dhe grevat, të nxitura fillimisht nga ankesat ekonomike, u shndërruan në një lëvizje masive kundër udhëheqjes klerike që sundon Iranin që nga revolucioni i vitit 1979. Njerëzit dolën në rrugë për protesta masive që filluan më 8 janar.

Të mërkurën, ministri i jashtëm i Iranit lëshoi paralajmërimin më të drejtpërdrejtë ndaj Uashingtonit, duke deklaruar se Republika Islamike do të “kundërpërgjigjet me gjithçka që ka nëse na sulmojnë përsëri”.

Në numrin e parë zyrtar nga autoritetet iraniane, një deklaratë nga Fondacioni për Veteranët dhe Martirët, e cituar nga televizioni shtetëror, raportoi të mërkurën se gjithsej 3,117 persona u vranë gjatë protestave.

Sinjali – aty ku e vërteta flet para lajmit!

/GazetaSinjali/

The post Erdogan thotë se Turqia kundërshton çdo ndërhyrje të huaj në Iran appeared first on Sinjali.

Presidenti ukrainas, Volodymyr Zelensky, tha se i ka kërkuar udhëheqësit amerikan, Donald Trump, që t’i japë më shumë raketa Patriot dhe sisteme të tjera të mbrojtjes ajrore gjatë takimit të tyre në Davos të Zvicrës më 22 janar, teksa të dërguarit amerikanë po përgatiten për bisedime të tjera në Moskë me presidentin rus, Vladimir Putin.

Zelensky gjithashtu e përmendi mundësinë e bisedimeve trepalëshe mes ekipeve ruse, ukrainase dhe amerikane në Emiratet e Bashkuara Arabe më 23-24 janar.

Trump dhe Zelensky u takuan për më shumë se një orë në Forumin Ekonomik Botëror në Davos, në bisedime që Trump i përshkroi si pozitive.

“Takimi me presidentin Zelensky ishte i mirë. Do të shohim se çfarë rezultati do të dalë”, tha Trump, gjatë një prononcimi të shkurtër për gazetarë, duke shtuar se mesazhi i tij për Putinin është: “Lufta duhet të përfundojë”.

Pak pas këtyre deklaratave të Trumpit, Zelensky mbajti një fjalim, që u pasua nga një sesion i shkurtër i pyetjeve, kur ai tha se mesazhi i tij kryesor është se Ukraina ka nevojë për mbrojtje shtesë kundër sulmeve ruse me dronë dhe raketa, që kanë lënë deri në 1 milion njerëz pa ngrohje dhe energji elektrike në kohën kur temperaturat janë nën zero.

“Fjalët e mia të fundit… për presidentin Trump [ishin]: Mos harroni mbrojtjen ajrore, mos harroni Patriotët”, tha Zelensky. “Kjo është shumë e rëndësishme për ne gjatë këtij dimri”.

Zelensky ka bërë këso thirrjesh shpesh, dhe ai filloi dhe përfundoi fjalimin e tij duke folur për një situatë, ku krizat shoqërohen me deklarata të forta, por pa veprime vendimtare.

“Çdo forum si ky e dëshmon këtë. Vetëm vitin e kaluar këtu në Davos, përfundova fjalimin tim me fjalët: ‘Evropa duhet të dijë si të mbrohet’. Ka kaluar një vit dhe asgjë nuk ka ndryshuar”, njofton rel.

Kjo, tha Zelensky, vlen edhe për Iranin, ku “ka pasur kaq shumë fjalë… por ato u fundosën në gjak”, dhe tha se kjo vlen edhe për përpjekjet për të krijuar një gjykatë ndërkombëtare për krimet e agresionit rus në Ukrainë. Këto përpjekje kanë ngecur.

Duke kritikuar “mungesën e vullnetit politik” në Evropë, ai gjithashtu bëri një krahasim me mënyrën se si forcat detare amerikane kapnin tankerë të flotës në hije, ndërsa “nafta ruse transportohet përgjatë brigjeve evropiane” pa u penguar.

Zelensky përfundoi duke thënë: “Le t’i japin fund kësaj”, dhe se bisedimet për paqe me Rusinë tani po hyjnë në “kilometrin e fundit”.

Kjo fazë përfundimtare nis me delegacionin amerikan, të udhëhequr nga i dërguari i posaçëm, Steve Witkoff, dhe dhëndri i Trumpit, Jared Kusher, që nisen më vonë gjatë së enjtes drejt Moskës për bisedime me Putinin.

Më herët, vetë Witkoff bëri deklarata optimiste gjatë një takimi të zhvilluar në mëngjes, duke thënë se “ne jemi në fund tani. Në të vërtetë jam optimist”.

“Mendoj se e kemi arritur te një çështje, dhe kemi diskutuar aspekte të kësaj çështjeje dhe kjo do të thotë se është e zgjidhshme. Pra, nëse të dyja palët duan ta zgjidhin këtë, do ta zgjidhim”, tha Witkoff.

Në Moskë, zëdhënësi i Kremlinit, Dmitry Peskov, refuzoi të komentonte optimizmin e Witkoffit, duke theksuar vetëm se “diskutimi do të vazhdojë mbi çështjen e zgjidhjes ukrainase dhe tema të tjera të ndërlidhura”.

Kremlini tha se bisedimet do të zhvilloheshin në mbrëmje, ndërsa Witkoff tha se delegacioni amerikan nuk do të qëndronte gjatë natës në Moskë, por do të fluturonte drejt Emirateve të Bashkuara Arabe,

Megjithatë, nuk kishte ende nuk ka deklarata nga zyrtarët rusë ose amerikanë për bisedimet trepalëshe që përmendi Zelensky.

Sinjali – aty ku e vërteta flet para lajmit!

/GazetaSinjali/

The post Zelensky i bën thirrje Trumpit për më shumë sisteme të mbrojtjes ajrore appeared first on Sinjali.