Jeffrey Epstein kishte të paktën dhjetë bashkëpunëtorë. Këtë e ka konfirmuar FBI, në një shkëmbim email-esh të brendshme të vitit 2019, gjatë mandatit të parë presidencial të Donald Trump.

Problemi është se emrat e shtatë prej këtyre të dyshuarve kanë mbetur sekret dhe nuk dihet nëse ndonjëherë janë marrë në pyetje, akuzuar, gjykuar apo ndjekur penalisht.

Vëmendjen mbi këtë detaj të nxehtë e ka tërhequr kongresmeni Ro Khanna, bashkautor i ligjit Epstein Files Transparency Act, i cili detyroi administratën Trump të publikonte dosjet. Presidenti amerikan reagoi ashpër në rrjetin e tij Truth: “Një tjetër gjueti shtrigash. Demokratët kanë punuar me Epstein-in, jo republikanët. Publikoni emrat, turpërojini”.

Në një email dërguar gazetës italiane “La Repubblica“, Khanna denoncoi: “Ky publikim ishte një bombë. Dosjet përfshijnë një email ku përmenden ‘10 bashkëpunëtorë’, edhe pse Kash Patel kishte dëshmuar se nuk kishte informacione të besueshme që tregonin se Epstein trafikonte gra me ndonjë tjetër përveç vetes”. Patel është aktualisht drejtor i FBI-së, të cilin Khanna e akuzon se ka gënjyer.

Email-i i përmendur nga kongresmeni demokrat mban datën 9 korrik 2019, ora 11:15, dhe vjen nga njësia e FBI-së “Cachtu” e ngarkuar me ndjekjen e krimeve kundër fëmijëve dhe trafikut të qenieve njerëzore.

Në të ngrihej kjo pyetje për eprorët: “Kërkojmë një përditësim mbi 10 bashkëkonspiratorët deri sot. Mund të na thoni sa prej tyre i keni lokalizuar, marrë në pyetje dhe thirrur me mandat përpara jurisë së madhe? Mendoj se totali është 5 në Nju Jork, 1 në Karolinën e Veriut, 1 në Boston dhe 3 në Florida”.

Rreth një orë më vonë, në 12:21, një agjent i cili prezantohet si Sean përgjigjet: “Nga 10 bashkëpunëtorët, 3 janë lokalizuar në Florida dhe thirrur me mandate; 1 në Boston, 1 në Nju Jork dhe 1 në Connecticut. 4 nga 10 nuk janë gjetur por po i kërkojmë, një është një biznesmen i pasur nga Ohio; 3 të mbeturit janë jashtë kapacitetit tonë. Ekipi ynë fluturon sonte ose nesër në mëngjes në disa zona të Floridës për të marrë në pyetje rreth 25 viktima”. Një email tjetër zbulon tre nga dhjetë emrat: ish-e dashura e Epstein, Ghislaine Maxwell; agjenti i modeleve Jean-Luc Brunel; dhe CEO-ja i Victoria’s Secret, Les Wexner. Shtatë të tjerët janë censuruar.

Sipas kongresmenit Khanna, ky është një zhvillim kyç për të paktën tre arsye. E para, të njihen emrat e bashkëpunëtorëve dhe sidomos nëse ndonjëherë janë marrë në pyetje apo ndjekur penalisht, për të vërtetuar nëse kishin kryer krime ose zotëronin informacione të tjera të rëndësishme. Këtë e kërkojnë viktimat. E dyta, nëse email-et e brendshme të FBI-së nuk kanë pasur ndonjë vazhdim, të kuptohet pse. Kjo do të ishte thelbësore edhe në dritën e asaj që kishte ndodhur më parë në rastin Epstein. Në vitin 2007, prokurorja Ann Marie Villafaña kishte kryer hetimet dhe shkruar një dokument prej 83 faqesh me 60 akuza. Epstein kishte pranuar një marrëveshje, e miratuar nga prokurori Alexander Acosta, i cili më vonë u bë sekretar i Punës në administratën e parë Trump. Në vitin 2018, Miami Herald kishte publikuar një seri investigative që denonconte marrëveshjen dhe Epstein u akuzua sërish në Nju Jork. A ishte dhënë mbrojtje edhe për bashkëpunëtorët e panjohur? Arsyeja e tretë është të vërtetohet nëse Patel ka gënjyer dhe pse.

“Amerikanët meritojnë të vërtetën. Refuzimi i Departamentit të Drejtësisë për të zbatuar ligjin që kanë miratuar në Kongres dhe për të publikuar të gjitha dosjet është një pengesë ndaj drejtësisë. Duhet të publikojnë edhe pyetjet e FBI-së ndaj dëshmitarëve që përmendin burra të tjerë, në mënyrë që publiku të dijë kush ishte i përfshirë. Departamenti shpenzon më shumë kohë duke mbrojtur rrethin e Epstein-it sesa të mbijetuarit”, thotë tani Khanna. Ai shtoi: “Kjo është arsyeja pse unë dhe kongresmeni Massie po përgatisim një kallëzim për shpërdorim ndaj Kongresit kundër sekretares Bondi. Të mbijetuarit dhe publiku kërkojnë transparencë dhe drejtësi”.

Një 44-vjeçar, i identifikuar si Medi Sina, ka rënë në prangat e Policisë së Matit, pasi dyshohet se ka ndërtuar një objekt pa leje pranë monumentit të kulturës “Ura e Vashës”.

“Specialistët për Hetimin e Krimeve të Komisariatit të Policisë Mat arrestuan në flagrancë shtetasin M. S., 44 vjeç, banues në fshatin Fshat, Klos, pasi dyshohet për kryerjen e veprave penale ‘Shkatërrimi i veprave kulturore’ dhe ‘Ndërtimi i paligjshëm’, duke ndërtuar një objekt pa u pajisur me lejen përkatëse, si dhe duke kryer ndërhyrje dhe punime të paligjshme në monumentin e kulturës ‘Ura e Vashës’”, njofton policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme procedurale.

Gjatë natës, forcat ruse nisën një sulm masiv ndaj Ukrainës, duke shkaktuar alarme kundërajrore mbi territorin e saj.

Në përgjigje, Komanda Operacionale e Forcave të Armatosura Polake ngriti në ajër avionë luftarakë polakë dhe vuri në gatishmëri sistemet e mbrojtjes ajrore dhe radarëve, duke deklaruar se masat ishin të natyrës parandaluese dhe shërbenin për të mbrojtur hapësirën ajrore polake.

“Në lidhje me aktivitetin e aviacionit me rreze të gjatë veprimi të Federatës Ruse, i cili kreu sulme në territorin e Ukrainës, ka filluar operacioni i aviacionit ushtarak në hapësirën ajrore polake”, informoi në një komunikatë Komanda Operacionale e Forcave të Armatosura.

Për shkak të operacioneve ushtarake, aeroportet në Rzeszow dhe Lublin u mbyllën përkohësisht në orët e para të së shtunës, por trafiku ajror në të dy aeroportet tani ka rinisur.

Pas orës 8:00 të mëngjesit, Komanda njoftoi se operacionet e avionëve polakë dhe të aleatëve kishin përfunduar dhe se nuk kishte pasur shkelje të hapësirës ajrore polake.

Nga LUXEMBURGER WORT

Në Luksemburg, Aldo Iamandi (Gjini) u bë i njohur pas të shtënave me armë zjarri më 24 nëntor 2020 në Remich.

Vendi e futi atë në listën e kriminelëve më të kërkuar të Evropës. Përfundimisht, hetuesit luksemburgas e lokalizuan dhe e arrestuan në Bruksel.

Në procesin gjyqësor që pasoi, në fund të vitit 2023, prokuroria kërkoi një dënim me 12 vjet burg për tentativë vrasjeje. Megjithatë, Dhoma e 12-të Penale e dënoi vetëm me 30 muaj burg, për posedim të paligjshëm armësh dhe plagosje.

Ai nuk bëri ankim, ndaj vendimi është i formës së prerë. Në Shqipëri, megjithatë, e pret një dënim shumë më i rëndë.

Edhe disa muaj pas ngjarjes, në Remich janë ende të dukshme gjurmët e tentativës së dyshuar për vrasje. Aldo Iamandi ishte ndier i provokuar sepse një i panjohur i ishte afruar shoqërueses së tij femër dhe kishte hapur zjarr.

Tani ai ndodhet në qendër të një çështjeje kriminale që prej javës së kaluar ka shkaktuar bujë të madhe. Rasti konfirmon atë që në procesin gjyqësor në Luksemburg mbeti e pathënë, por e nënkuptuar: Aldo I. konsiderohet figurë kyçe e dyshuar e krimit të organizuar shqiptar. Zbulime të reja nga Shqipëria hedhin gjithashtu dritë tjetër mbi ngjarjet në Remich.

Dhunë për një arsye të parëndësishme

Mbrëmjen e 24 nëntorit 2020, Aldo ndodhej në një bar shisha në Remich. Rreth orës 22:30 shpërthen një konflikt me një bashkëkombës, i cili dëshiron t’i ftojë për një gotë tre shoqërueset e Aldos dhe e prek njërën prej tyre në krah. Rrjedha e saktë e ngjarjes mbetet e paqartë. Sipas gjithçkaje, kundërshtari tenton ta sulmojë Aldon bashkë me disa shokë të tij, të cilët thuhet se ishin të armatosur me shkopinj.

Aldo shkon te makina e tij, merr një armë zjarri, e ndjek personin dhe e qëllon katër herë me një pistoletë të kalibrit të madh. Një plumb i tipit .45 ACP i përshkon këmbën e majtë viktimës, një tjetër ngec në shollën e këpucës së tij. Vrimat e plumbave në muret e shtëpive pranë urës Europabrücke në Remich janë ende të dukshme sot. Gjyqtarët nuk konstatuan një qëllim të qartë për vrasje – edhe sepse Aldo I. ndaloi pas katër të shtënave, megjithëse kishte mundësi të vazhdonte të qëllonte viktimën nga pas.

8 muaj më vonë, në korrik 2021, Aldo përfshihet në një tjetër incident me armë zjarri në Tiranë. Deri atëherë, ai kishte arritur t’i shmangej plotësisht ndjekjes penale nga Luksemburgu. Tashmë, edhe autoritetet shqiptare e shpallin në kërkim. Fakt i ndjeshëm: viktima e sulmit në Tiranë thuhet se ishte shoku më i ngushtë i pronarit të lokalit në Remich.

Aldo nën presion

Dëshmitarët tregojnë se Aldo ishte dukshëm nervoz mbrëmjen e incidentit në Remich. Ai shikonte vazhdimisht drejt derës së hyrjes dhe mbante nën vëzhgim dritaret e lokalit. Mediat shqiptare sugjerojnë një arsye të mundshme për këtë tension: grupi kriminal, pjesë e të cilit ishte ai, kishte humbur një ditë më parë një ngarkesë prej 475 kilogramësh kokainë.

Mëngjesin para të shtënave në Remich, dogana holandeze njoftoi zbulimin e 475 kilogramëve kokainë në portin e Vlissingenit. Droga ishte fshehur në një kontejner me banane nga Ekuadori dhe u zbulua më 23 nëntor 2020 gjatë një kontrolli të rastësishëm. Vlera e saj në treg vlerësohej rreth 23 milionë euro.

Zbulime të reja nga deshifrimi i rrjetit të komunikimit të koduar SkyECC e rëndojnë ndjeshëm grupin. Shërbimi u hakua në vitin 2021 në kuadër të një bashkëpunimi ndërkombëtar policor. Hetues nga Belgjika, Franca dhe Holanda, me mbështetjen e Europol-it, patën qasje në komunikimet e përdoruesve dhe kjo çoi në bastisje dhe arrestime masive.

Restoranti në Luksemburg

Sipas hetimeve, grupi kriminal – ku bënte pjesë edhe Aldo – qëndron pas kontrabandës së drogës drejt Vlissingenit. Është e sigurt se ai ndodhej në Luksemburg që prej të paktën 21 nëntorit 2020. Sipas deklarimeve të tij, ai ishte në kërkim të një lokali për të hapur një restorant.

Të dhënat e SkyECC përbëjnë bazën edhe për hetimet e reja në Shqipëri. Në biseda, drejtuesit e bandës shkëmbenin foto të ngarkesave të drogës dhe artikuj mediatikë për kapjen e drogës në portin holandez.

Më 10 dhjetor 2025, Prokuroria e Posaçme shqiptare kundër Korrupsionit dhe Krimit të Organizuar (SPAK) ndërhyri. Nga 14 urdhër-arreste, u ekzekutuan 10, kryesisht në zonën e Fushë-Krujës. U sekuestruan shuma të mëdha parash, mallra luksi, automjete dhe armë.

Djali i ish deputetit si bos mafioz

Veçanërisht tronditëse: si udhëheqës i klanit mafioz shqiptar akuzohet Rexhep R., djali i një ish-deputeti. Edhe babai i tij, Rrahman Raja, u detyrua të japë dorëheqjen në vitin 2023 pas një akti të dhunshëm të lidhur me krimin e organizuar.

Çështja përbëhet nga tre komplekse hetimore. Grupi dyshohet se ka kontrabanduar të paktën 2,4 tonë kokainë dhe marihuanë drejt vendeve të BE-së. Në qendër të raportimeve shqiptare qëndron veçanërisht një transport droge i dështuar më 26 janar 2021.

Në kufirin mes Shqipërisë dhe Turqisë, atë ditë u sekuestruan 236 kilogramë marihuanë në një kamion. Droga ishte fshehur në tavanin e mjetit dhe nuk u zbulua në kontrollin e parë me skaner. Vetëm gjatë një kontrolli të dytë nga policia turke u zbulua ngarkesa.

Konflikti zbulon strukturat

Protokollet e SkyECC, të publikuara pjesërisht në mediat shqiptare, tregojnë panikun brenda udhëheqjes së klanit pasi humbet kontakti me shoferin. Grupi vëzhgon kamionin në territorin e policisë turke dhe spekulon për tradhti të mundshme.

Pas kësaj shpërthen një krizë e brendshme për dëmshpërblimin e humbjes. Në fund, personi përgjegjës për organizimin e transportit detyrohet t’i kompensojë drejtuesit e tjerë brenda një dite – me çmimin final të shitjes.

Fyerja “bir k…” është e përhapur në biseda. Trafiku i drogës ndjek një skemë strikte, dhe konfliktet e brendshme i lejojnë SPAK-ut të rindërtojë me detaje strukturën e organizatës.

Aldo dhe frika nga gjurmët e gishtërinjve

Aldo shfaq shqetësim të madh se gjurmët e gishtërinjve të tij mund të gjendeshin mbi drogë. Sipas bisedave të cituara nga SPAK, ai kishte shënuar personalisht paketat për marrësit në Turqi. Në grup ekzistonte frika se bashkëpunëtorët nuk i kishin pastruar siç duhet. Më pas vjen qetësimi: paketat ishin spërkatur me spraj.

Me nofkën “Bjondi”, Aldo konsiderohet bashkëpunëtor i ngushtë i kreut të dyshuar të bandës. Hetuesit shqiptarë lidhin nëntë persona me llogari konkrete SkyECC. Emrat e të dyshuarve janë publikuar gjerësisht në media. SPAK flet për prova dërrmuese, por vlen parimi i pafajësisë deri në një vendim përfundimtar.

Më 3 dhjetor, një javë para valës së arrestimeve, u arrestua Besard P., i dyshuar si bashkëpunëtor i Aldo I. në të shtënat në Tiranë. Ai hetohet për tentativë vrasjeje. Aldo I. ndodhet tashmë në paraburgim për të njëjtin rast. 35-vjeçari u informua për akuzat e reja ndërsa ndodhej në qelinë e tij.

Real Madrid ka identifikuar tashmë një plan specifik në rast se Vinicius Junior vendos të mos e rinovojë kontratën e tij, shkruan “Cadena Ser“.

Largimi i mundshëm i brazilianit, që po monitorohet nga afër nga “los blancos”, do ta bënte klubin të kërkonte një tarifë që tejkalon 100 milionë euro për transferimin e tij.

Real Madrid synon ta riinvestojë menjëherë këtë shumë në tregun e transferimeve, duke u përqendruar te Vitinha.

Mesfushori portugez nga Paris Saint-Germain konsiderohet kandidati ideal për të forcuar mesfushën dhe thuhet se është një përparësi kryesore për drejtuesit e klubit spanjoll.

Megjithatë, marrëveshja nuk pritet të jetë e thjeshtë. PSG e sheh Vitinha si një element kyç të projektit të saj dhe nuk ka ndërmend ta lërë të shkojë.

Për këtë arsye, aktualisht nuk ka negociata, por thashethemet konfirmojnë se Real Madrid tashmë po shqyrton opsionet e ardhshme të merkatos.

Kryetari i Partisë Demokratike, Sali Berisha, përmes një postimi në rrjetet sociale, shprehet se, dosja “AKSHI”, tregon  se shteti është kthyer në kopsht privat të pushtetit.

Sipas Berishës, këtu nuk kemi të bëjmë me startup ose mrekulli ekonomike teksa shton se, fitimi nga kjo aferë ka qenë 22 milionë here.

“1.000 € bëhen 234 milionë € në 4 muaj.

22 milionë herë fitim.

Jo startup. Jo mrekulli ekonomike.

Dosja AKSHI tregon se shteti është kthyer në kopsht privat të pushtetit”, shkruan Berisha.

LEXO EDHE: Reagimi nga Washingtoni/ DASH ‘merr nën vëzhgim’ AKSHI-n, kullat në Tiranë dhe…

Këtë të shtunë, më 27 dhjetor, ka nisur procesi i votimit për zgjedhjet e parakohshme për Kuvendin e Kosovës në përfaqësitë diplomatike të vendit jashtë territorit.

Zëdhënësi i KQZ-së, Valmir Elezi, në një konferencën për mediat, ka treguar se në 25 përfaqësi diplomatike ku edhe ka filluar procesi i votimit, dhe se deri në orën 09:00 nga 19 mijë e 187 votues, kanë votuar 1 mijë e 659 prej tyre.

“Sipas të dhënave gjatë këtyre orëve të para të votimit që janë nga 25 përfaqësi diplomatike ku ka filluar procesi i votimit deri në ora 09:00 nga 19 mijë e 187 votues të regjistruar kanë votuar 8.64 për qind, apo një mijë e 659 prej tyre”, tregoi Elezi.

Ai ka treguar edhe se në përgjithësi janë 29 përfaqësi diplomatike.

“Numri i përgjithshëm i shtetaseve të Kosovës për të votuar në 29 përfaqësi diplomatike të Kosovës është 19 mijë e 187 votues. Vetëm votuesit e regjistruar në përfaqësi diplomatike  do të mund të votojnë gjatë ditës së sotme pasi në listën votuese që janë dërguar në këto përfaqësi janë vetëm emrat e shtetase që kanë zgjedhur këtë mënyrë të votimit”, tregoi ai.

Elezi ka treguar edhe kur dhe si nisi votimi në përfaqësi diplomatike.

“Procesi i votimit në ora 05:00 sipas kohës lokale në Kosovë ka filluar në konsullatën e Republikës së Kosovës në Stamboll. Ndërsa në ora 07:00 po ashtu sipas kohës lokale në Kosovë votimi ka filluar edhe në 24 përfaqësi diplomatike që ndodhen në Evropë”, deklaroi Elezi.

PërveçTurqisë, votimi do të mbahet edhe në 15 shtete evropiane, ku janë të regjistruar gjithsej 17 mijë e 761 votues. Në mesin e këtyre shteteve janë Gjermania, Zvicra, Mbretëria e Bashkuar, Franca, Belgjika, Norvegjia, Austria, Suedia, Sllovenia, Danimarka, Italia, Kroacia, Holanda, Republika Çeke dhe Hungaria.

Procesi do të përmbyllet në kontinentin amerikan, ku të drejtën e votës e kanë 1 mijë e 310 votues të regjistruar në Shtetet e Bashkuara të Amerikës dhe Kanada. Për këtë qëllim janë hapur përfaqësitë diplomatike në Uashington, Nju Jork, Otavë dhe Toronto.

Në të njëjtën kohë me përfundimin e votimit në përfaqësi diplomatike, do të mbyllet edhe procesi i votimit përmes postës, i cili ka nisur më 16 dhjetor. Rreth 57 mijë e 899 votues kanë qenë të regjistruar për këtë formë votimi dhe kanë pasur afat 12 ditë për dërgimin e fletëvotimeve. Të gjitha votat e mbledhura, si nga votimi fizik ashtu edhe nga ai postar, do të dërgohen në Kosovë për t’u numëruar.

Zgjedhjet e parakohshme parlamentare në Kosovë mbahen ditën e nesërme, 28 dhjetor, dhe janë të dytat që zhvillohen brenda këtij viti.

New Yorku është goditur nga stuhia e fuqishme dimërore “Devin” ndërsa parashikohen reshjet më të mëdha të dëborës.

Stuhia e fuqishme e dëborës pas Krishtlindjes po përfshin mbarë verilindjen e ShBA-së, duke sjellë kaos në transport.

Udhëtimet ajrore po marrin një goditje të madhe, ku mbi 1,500 fluturime u anuluan deri të premten.

Guvernatorja e New York-ut, Kathy Hochul, shpalli gjendjen e jashtëzakonshme përpara stuhisë.

Shërbimi Kombëtar i Motit lëshoi ​​paralajmërime për stuhinë e cila pritet “të shkaktojë kushte të rrezikshme udhëtimi”.

Në disa zona do të bjerë deri në 20 cm dëborë.

LEXO EDHE: Mot i tërbuar në Kaliforni: Stuhitë dhe përmbytjet shkaktojnë tre viktima

Demokrati Ervin Salianji do të ndalë sot foltoren e tij të takimeve në Shkodër.

Ishte vetë ish-deputeti që njoftoi përmes një njoftimi në rrjetet sociale takimin me demokratë, në orën 18:00.

Por vetëm dy orë më pas, kryetari i PD-së, Sali Berisha njoftoi një takim në Korçë, po në të njëjtin orar me takimin që do të mbajë Salianji.

Rastësi kjo përplasje oraresh apo strategji e Berishës për të sfumuar takimin e Salianjit?

Kujtojmë se, pak ditë më parë, në një komunikim me mediat, kreu i PD do të shprehej se, “Salianji sot është një njeri që ka kaluar linjat e kuqe”.

Ndërsa gjatë protestës kombëtare të Opozitës para Kryeministrisë, Salianji do të deklaronte: “Mua nuk më përjashton dot asnjë njeri sot nga partia, është për të përjashtuar Ramën. Kam ardhur me mbështet të PD, unë jam në PD dhe do të jem në PD”.

Ernest Muçi po kalon një moment shumë të mirë në karrierë, me futbollistin e Kombëtares që me fanellën e Trabzonspor po shënon vazhdimisht.

Saktësisht në 5 ndeshje ka gjetur rrugën e rrjetës 7 herë, duke u bërë një lider te skuadra turne.

Tashmë është fakt që Trabzonspor kërkon ë blejë nga Beshiktash kartonin e Muçit, gjë e cila pritet t’u kushtojë arkave të tyre 8.5 milionë euro.

Një operacion jo shumë i lehtë për t’u konkretizuar, kështu drejtuesit kanë nisur të ndërtojnë një tjetër plan nëse “pista Muçi” mund të dështojë.

Në radarin e tyre ka rënë futbollisti i Polonisë dhe bëhet fjalë për Kacper Kozłowski.

22-vjeçari aktualisht është pjesë e Gaziantep dhe fakti që luan në Turqi bën që te Trabzonspor ta kenë në konsideratë sulmuesin polak, i cili në 18 ndeshje ka shënuar 3 gola dhe ka dhuruar edhe 1 asist.

Drejtori i Përgjithshëm i Policisë së Shtetit, Ilir Proda, i ka akorduar “Certifikatë për Shërbime të Dalluara” inspektorit Marsel Bicja, i cili ndërhyri me fikse zjarri për të shuar flakët që përfshinë një person në protestën e Opozitës para Kryeministrisë më 22 dhjetor, pas shpërthimit të një molotovi të hedhur.

“Në shenjë vlerësimi dhe mirënjohjeje për aktin e humanizmit dhe profesionalizmit të treguar gjatë ushtrimit të detyrës, ku me ndërhyrje të menjëhershme dhe vendimtare shpëtoi jetën e një qytetari, duke vënë në plan të parë mbrojtjen e jetës njerëzore, si një nga vlerat më të larta dhe misioni kryesor i Policisë së Shtetit”, është motivacioni i certifikatës së dhënë inspektorit.

Certifikata iu dorëzua nga vetë Proda gjatë festës së fundvitit të Drejtorisë Vendore të Policisë Tiranë.

“Ju falënderoj për veprimin tuaj, pasi ky veprim dëshmoi edhe një herë humanizmin dhe vendosmërinë e Policisë së Shtetit për të mbrojtur jetën e qytetarëve. Vijoni me përkushtim të përmbushni me nder këtë mision, sa të vështirë, po aq edhe fisnik”, tha Proda.

Inspektor Marsel Bicja, gjatë fjalës së tij, shprehu mirënjohje për certifikatën dhe theksoi se veproi pa u menduar dy herë, pasi mbrojtja e jetës së qytetarëve është parësore për të dhe kolegët e tij.

Shqipëria vijon të ngjitet në hartën botërore të turizmit, duke u renditur në krye të destinacioneve më të preferuara për pushime.

Media prestigjioze britanike “Which?”, një nga autoritetet më të besueshme për udhëtime dhe shërbime turistike, e ka përfshirë Shqipërinë mes tureve më të dashura nga pushuesit ndërkombëtarë.

Pas një sondazhi me mijëra udhëtarë, “Which?” vlerësoi pothuajse 100 kompani turistike dhe zgjodhi më të mirat për eksperienca të ndryshme udhëtimi. Mes tyre, spikat edhe turi në Shqipëri, i ofruar nga kompania britanike” One Traveller”, e specializuar në udhëtime solo për udhëtarë në moshë.

Në artikull thuhet se Shqipëria është shumë më tepër sesa një destinacion ekonomik buzë Mesdheut. Turi përfshin fshatra të mbrojtura nga UNESCO me arkitekturë osmane, peizazhe mbresëlënëse përgjatë Rivierës Shqiptare, lundrim me anije në mini-gadishuj, vizita në kala historike si dhe degustim verërash, në një vend që njihet si një nga djepet më të hershme të vreshtarisë në botë.

Një ndalesë e veçantë i kushtohet edhe zonës së Liqenit të Prespës, në kufirin mes Shqipërisë dhe Maqedonisë së Veriut, një destinacion ende i paprekur masivisht, por me vlera të jashtëzakonshme natyrore dhe kulturore.

“One Traveller” vlerësohet maksimalisht nga anëtarët e “Which?” për shërbimin ndaj klientit dhe guidat turistike, duke ofruar udhëtime pa kosto shtesë për dhoma teke dhe asistencë 24 orë gjatë gjithë turit.

Sipas të dhënave, paketa turistike në Shqipëri nis nga 2 mijë e 190 paund për person, përfshin fluturimet, akomodimin, shumicën e vakteve, ekskursionet.

Nëse planifikoni të vizitoni Shqipërinë, “One Traveller” rekomandon muajt maj, qershor, shtator dhe tetor.

Shqipëria ndiqet në këtë listë nga Austria, Japonia apo Anglia Veriore. Një tjetër dëshmi se vendi ynë po shndërrohet në një destinacion elitar për turizmin kulturor dhe natyror, duke tërhequr gjithnjë e më shumë vëmendjen e mediave dhe udhëtarëve ndërkombëtarë.

Pamjet filmike tregojnë Seymour-in dhe fëmijët duke udhëtuar drejt një fluturimi vajtje për në Amsterdam, me destinacion përfundimtar Kroacinë. Disa ditë më vonë, ajo i ka lënë një mesazh zanor njërit prej baballarëve, duke thënë se ndodhej në Francë dhe synonte të kërkonte vendbanim të përhershëm atje.

Hetuesit thanë se në banesën e saj është gjetur një fletore me shënime ku përshkruheshin plane për të copëtuar dokumentet dhe për të hedhur telefonat para udhëtimit, si dhe diskutime për marrjen e pasaportave për fëmijët.

“Nuk dua gjë tjetër veç t’i gjej fëmijët”

Kendall Seymour, babai i tre prej fëmijëve, tha për mediat lokale se pamjet e aeroportit janë “shkatërruese”. Ai shpreson që urdhri i arrestit të shndërrohet në urdhër federal dhe më pas ndërkombëtar.

“Shpresa ime është të marr një telefonatë që ajo është gjetur, dhe të mund të fluturoj menjëherë për t’i marrë fëmijët,” u shpreh ai.

Kendall tha se i ka parë fëmijët për herë të fundit më 24–25 nëntor, kur i ka dërguar në shkollë përpara se të nisnin ditët e kujdestarisë me nënën. Dyshimet u shtuan kur edukatorja telefonoi për të pyetur pse fëmijët nuk ishin paraqitur në çerdhe.

Ai shtoi se bindjet fetare dhe frika e “fundit të botës” kanë qenë një tronditje për të, duke theksuar se nuk kishte parë shenja të tilla gjatë martesës apo pas divorcit.

Autoritetet të shqetësuara për gjendjen e saj mendore

Sipas dokumenteve të akuzës, dëshmitarë kanë treguar se Seymour më parë ka përjetuar kriza emocionale dhe halucinacione. Për këtë arsye, është kërkuar një urdhër arresti pa mundësi lirimi me kusht.

Më 10 dhjetor, policia lëshoi një njoftim për zhdukjen e fëmijëve dhe e listoi Seymour si person që i ka marrë në shkelje të ligjit. Gjashtë ditë më vonë u ngritën zyrtarisht akuzat për ndërhyrje në kujdestari dhe largim të fëmijëve nga shteti.

Çfarë pritet të ndodhë nëse gjendet?

Avokati i së drejtës familjare, Marco Brown, tha për ABC4 se Seymour mund të përballet me pasoja të rënda ligjore, por nëse provohet se ka probleme me shëndetin mendor, dënimi me burg mund të shmanget.

Sipas tij, në rast se fëmijët kthehen në SHBA, marrëveshja e kujdestarisë mund të rishikohet dhe pasaportat e fëmijëve të mbahen nga autoritetet.

Autoritetet amerikane po bashkëpunojnë me FBI-në dhe agjencitë ndërkombëtare të zbatimit të ligjit për gjetjen e Seymour dhe fëmijëve.

Prokuroria pranë Gjykatës së Shkallës së Parë të Juridiksionit të Përgjithshëm Sarandë ka përfunduar hetimet dhe dërgon në gjyq pesë shtetas, midis të cilëve dhe kryeinspektorin dhe inspektorin e Inspektorati Vendor i Mbrojtjes së Territorit (IVMT), Sarandë për veprat penale ‘Shpërdorim detyre’ dhe ‘Ndërtim i Paligjshëm’, parashikuar nga nenet 248 dhe 199/a/4 të Kodit Penal.

Nga hetimet mbi procedimin penal nr.416 të vitit 2023 rezultoi se në zonën e Ksamilit në vendin e quajtur “Kanali i Vivarit”, është ndërtuar në zonë të mbrojtur në një sipërfaqe të madhe pa leje ndërtimi nga Agjencia e Zhvillimit të Territorit si dhe pa kontratë me Agjencinë Kombëtare të Bregdetit..

Kanali i Vivarit bën pjesë në Parkun Kombëtar “Butrint” dhe ka statusin Monument Natyre (MN) sipas Vendimit nr.303, datë 10.5.2019 “Për miratimin e listës së rishikuar, të monumenteve të natyrës shqiptare” (të përditësuar), ndryshuar me VKM nr 187 datë 25.03.2021 “Rishikim”

Nga ana e punonjësve të IVMT Bashkia nuk është mbajtur procedura ligjore në lidhje me konstatimin e plotë të punimeve dhe marrjen e masës administrative ‘dënim me gjobë’.

Sa më sipër u dërguan në gjyq shtetasit:

• R.P, për veprat penale “Ndërtimi i paligjshëm”, parashikuar nga neni 199/a/4 i Kodit Penal dhe “Pushtimi i tokës” parashikuar nga neni 200 i K.Penal. “Shpërdorimi i tokës” parashikuar nga neni 199 dhe “Dëmtimi i habitateve në zonat e mbrojtura mjedisore” parashikuar nga neni 202/b i K.Penal;
• Personin Juridik “Laguna Invest”, për veprën penale “Ndërtimi i Paligjshëm” parashikuar nga neni 199/a/4 i K.Penal, “Pushtimi i tokës” parashikuar nga neni 200 i K.Penal;
• Shtetasit E.Z, B.K, V.X, me detyrë inspektor të IVMT, Bashkia Sarandë në kohën e kryerjes së veprës penale, të akuzuar për veprën penale “Shpërdorimi i detyrës” parashikuar nga neni 248 i K.Penal; dhe
• Shtetasin A.M, me detyrë Kryeinspektor të IVMT Bashkia Sarandë, në kohën e kryerjes së veprës penale, akuzuar për veprën penale “Shpërdorimi i detyrës” parashikuar nga neni 248 i K.Penal.

Ashtu si dy vitet e kaluara, ylli i Liverpool, Mohamed Salah postoi një foto me një pemë Krishtlindjesh për t’u uruar të gjithëve festat e fundvitit, por bashkëbesimtarët e tij edhe këtë herë nuk e pritën mirë.

Ai është në Marok për ndeshjet e Egjiptit në Kupën e Kombeve të Afrikës, por në Angli familja e tij po relaksohet dhe po shijon sezonin festiv, gjë që ka shkaktuar sulme online kundër yllit të Liverpool-it.

Salah postoi një foto të fëmijëve të tij nën pemën e Krishtlindjeve në rrjetet sociale dhe shkroi “Gëzuar Krishtlindjet”.

Por ndjekësit e tij myslimanë nuk e pritën shumë mirë.

Në fakt, ai mori një mori komentesh që shprehnin zhgënjimin e tyre, duke e kritikuar Salah për zgjedhjen e këtij postimi, me shumë që e përshkruanin këtë akt si “të trishtueshëm” për një “përfaqësues të Islamit”.

Disa nga komentet më karakteristike ishin: ”Mo Salah, të doja si tifoz edhe pse mbështes Manchester Cityn. Të shihja si modelin tim. Edhe pse nuk luajte kurrë për Manchester Cityn, më frymëzove. Por pas kësaj, nuk mund të të shoh më si model. Ma theve zemrën.”

“Ti je mysliman…duhet ta respektosh fenë dhe kulturën tënde… çfarë po u tregon miliona njerëzve?”

“Vëlla, ki frikë Zotin për të mirën tënde. Ti je mysliman dhe miliona të ndjekin dhe të duan, shumica prej tyre myslimanë dhe të rinj. Dhe ata do ta shohin atë që po bën si diçka normale dhe të parëndësishme, ndërsa është një mëkat i madh, një bidat dhe diçka që nuk i përket myslimanëve.”

Kosova shkon në zgjedhje më 28 dhjetor pas një bllokimi politik që ka zgjatur muaj të tërë, pasi votimi i shkurtit nuk solli një shumicë të qartë.

Sipas raporteve të AFP, Albin Kurti dhe partia e tij Vetëvendosje (VV) mbeten favoritë, por një qeveri stabile duket e vështirë të formohet.

“Zgjedhjet e 28 dhjetorit nuk do të sjellin shumë qartësi,” thotë ekonomisti Mehmet Gjata për AFP, duke parashikuar se VV do të dalë sërish e para. Analistja politike Fatime Hajdari konfirmon: “Shanset janë të larta që VV të marrë më shumë vota, por pjesa tjetër mbetet e paqartë.”

Kurti, figura karizmatike e Vetëvendosjes

Albin Kurti, dikur i quajtur “Che Guevara i Kosovës” për aktivitetin e tij radikal si student dhe më vonë për statusin si i burgosur politik, arriti në pushtet në 2021 me një fitore historike që i dha VV më shumë se 50% të votave.

Kombinimi i nacionalizmit me agjendën e reformave e ka bërë popullor në një vend ku sovraniteti është ende sfiduar nga Serbia.

Megjithatë, Gjata paralajmëron: “Mendoj se kriza aktuale do të përsëritet, sepse VV nuk do të marrë më shumë se 50% të votave. Nuk do të kemi një fitues të qartë.” Partitë kryesore opozitare refuzojnë të hyjnë në një koalicion me Kurti, duke garantuar një parlament të fragmentuar.

Politika ndaj serbëve dhe tensionet në veri

Një nga prioritetet e VV ka qenë reduktimi i ndikimit serb në veri të Kosovës, një politikë që ka fituar mbështetje lokale, por ka shkaktuar tensione me Beogradin dhe kritika ndërkombëtare.

Siç raporton AFP, përpjekjet e qeverisë për të reduktuar strukturat serbe të mbetura pas tërheqjes së forcave serbe në 1999 kanë shkaktuar dënime nga Bashkimi Evropian dhe akuza nga Washingtoni për rritje të “paqëndrueshmërisë”.

Sidoqoftë, për qytetarët e Kosovës, largimi i ndikimit serb shihet si një sukses i madh. “Zgjerimi i sovranitetit atje perceptohet nga qytetarët si një fitore e madhe,” tha Hajdari për AFP.

Një vit i “dëmeve kolosale”

Kriza parlamentare ka bllokuar ratifikimin e marrëveshjeve kyçe ndërkombëtare dhe ka vendosur në rrezik qindra miliona euro ndihma. Dy zgjedhje kombëtare dhe një vendore kanë kushtuar rreth 30 milionë euro këtë vit, ndërsa mbi një duzinë institucione mbeten pa drejtues.

“Ligjvënësit e ndarë kanë vendosur Kosovën në një gjendje anarkie,” tha Gjata për AFP, ndërsa Hajdari shtoi: “Kjo është arsyeja pse Kosova ka nevojë për një qeveri të qëndrueshme dhe funksionale, që të fokusohet te zhvillimi dhe mirëqenia e qytetarëve.”

Zgjedhjet e dhjetorit do të jenë një test i ri për stabilitetin e një prej vendeve më të reja të Ballkanit, ku rezultatet e tyre mund të përcaktojnë drejtimin politik për muajt e ardhshëm.

Ndryshe nga herët e tjera, këtë vit në Premier League për “Boxing Day”, pati vetëm një ndeshje, Manchester United – Newcastle, e cila është mbyllur 1-0 për “Djajtë e Kuq”.

Pavarësisht mungesave të rëndësishme për shkak dëmtimesh, por edhe për shkak të Kupës së Kombeve të Afrikës, pjesa e parë u dominua totalisht nga “Djajtë e Kuq”.

Rezultati u zhbllokua në minutën e 24-të, ku Patrick Dorgu shënoi me një goditje fluturimthi, pas një topi të nisur nga rivënia anësore.

Goli i parë për danezin me fanellën e United. Pjesa e parë është mbyllur 1-0 për Manchester United.

Në minutën e 62-të, “Qymyrxhinjtë” pretenduan për një penallti, për prekje me dorë të topit nga Lisandro Martinez. Ndërhyn VAR, s’ka penallti, loja rifillon normalisht.

Në minutat në vijim të dyja ekipet patën mundësitë e tyre.

Newcastle pati një rast të mirë me Antony Gordon, ndërsa Manchester United me Diogo Dalot, por portugezi gaboi në finalizim. Rezultati mbeti i pandryshuar deri në fund.

Me këtë fitore, Manchester United ngjitet në vendin e 5-të me 29 pikë, Newcastle mbetet në vendin e 11-të me 23 pikë.

Nga Federico Fubini – Corriere della Sera

Vladimir Putin shpesh e krahason agresionin ndaj Ukrainës me “Luftën e Madhe Patriotike” kundër Rajhut të Tretë. Por ndoshta as ai nuk i ka menduar deri në fund pasojat.

Pas 20 ditësh, lufta ndaj Ukrainës e nisur më 24 shkurt 2022 do të ketë zgjatur për Rusinë më shumë se Lufta e Dytë Botërore.

Atëherë “Ushtria e Kuqe”, në 1 mijë e 418 ditë, e zmbrapsi dhe e vuri në ikje Wehrmacht-in, pastaj vazhdoi deri sa pushtoi Evropën qendrore-lindore. 80 vite më vonë, ushtria e Moskës është e bllokuar në disa dhjetëra kilometra katrorë të Donbasit kundër forcave pesë herë më të vogla dhe nuk arrin të konsolidojë kontrollin mbi qendra të vogla të shkatërruara si Pokrovsk dhe Kupiansk.

Konflikti tashmë ka zgjatur aq shumë, sa po formëson mbi vete strukturat e ekonomisë dhe shoqërisë ruse. Lindin përfitime të reja për disa, ndërsa të tjerë dorëzohen në akte të vetëdëmtimit që kujtojnë precedentë fatalë në historinë sovjetike.

Në janar 1969, një student 20-vjeçar nga Praga, Jan Palach, i vuri flakën vetes në sheshin Shën Venceslau si akt denoncimi ndaj pushtimit të Ushtrisë së Kuqe disa muaj më parë.

55 vite më vonë, Vladimir Arsenyev, një sipërmarrës rus aktiv në kompleksin ushtarako-industrial, u lye me benzinë dhe u vetëflijua në Sheshin e Kuq përballë Kremlinit në të njëjtën mënyrë.

Ndërkohë, ka nga ata që nxjerrin zanate të reja nga lufta: për shembull një turmë ndërmjetësish që pasurohen duke i siguruar ushtrisë vullnetarë të gatshëm të firmosin kontrata për të luftuar në Ukrainë.

Rasti i Vladimir Arsenyev e bën atë një përjashtim vetëm për tentativën, të dështuar, për t’i marrë jetën vetes. Jo për kushtet që e çuan në atë akt: sot dhjetëra sipërmarrës rusë të industrisë së luftës janë në burg ose në gjyq për mosarritjen e ritmit të çmendur të dorëzimit të materialit ushtarak të imponuar nga qeveria.

Në rastin e Arsenyev, një shkencëtar 75-vjeçar, kontrata e Ministrisë së Mbrojtjes parashikonte prodhimin e pajisjeve të komunikimit të integruara në helmetat e ekuipazheve të tankeve.

Kompania që ai drejton, Instituti Qendror i Kërkimeve Shkencore Volna, duhej të dhjetëfishonte prodhimin nga pesë mijë në pesëdhjetë mijë copë në vit për të furnizuar një filial të gjigantit të industrisë ushtarake Rostec. Ky filial mban të njëjtin emër me “shoqatën industriale të kërkimit”, Luch (që përkthehet “rreze drite, rreze lazeri”), e cila para rënies së Murit të Berlinit mblidhte informacione për llogari të KGB-së në Gjermaninë Lindore. Kjo përputhje emrash nuk duket rastësi dhe thotë diçka për strukturën e pushtetit rus që sot udhëheq agresionin ndaj Ukrainës.

Drejtori aktual ekzekutiv i Rostec-it, Sergey Chemezov, punoi për Luch-in e KGB-së në Republikën Demokratike Gjermane në vitet ’80. Ishte atëherë që Chemezov njohu kolegun dhe bashkëmoshatarin e tij Vladimir Putin, dhe ky që nga ajo kohë e ka dashur gjithmonë pranë në detyrat më delikate: në administratën presidenciale të Boris Yeltsin në vitet ’90, pastaj në krye të aparatit ushtarako-industrial kur Putini konsolidoi pushtetin e tij në Kremlin në shekullin e ri.

Pikërisht me njerëz të tillë që u përplas sipërmarrësi dhe shkencëtari Arsenyev me porosinë e tij për radiotransmetuesit e tankeve.

Historia e tij është rindërtuar, për herë të parë, në një shërbim të Reuters. Dorëzimet e Volna për Luch-in, të nisura në vitin 2022, filluan të pësonin vonesa për shkak të disa problemeve të ekonomisë ruse në këto vite lufte.

Me miliona njerëz të përfshirë në përpjekjen luftarake dhe në industrinë ushtarako-industriale, të paktën 650 mijë burra të arratisur jashtë vendit, plus mbi një milion të vrarë e të plagosur në Ukrainë, në ekonominë e formësuar nga Putini mungesa e fuqisë punëtore është tashmë kronike.

Ekonomistët e pavarur Alexander Koryandr dhe Alexandra Prokopenko vlerësojnë se sot kërkesa për punë (përfshirë punësimin aktual) është më e lartë se oferta me disa qindra mijëra njësi.

Për më tepër, sanksionet ngadalësojnë dhe e bëjnë më të shtrenjtë furnizimin me komponentë. Kjo kontribuon në recesionin e rreth tre të katërtave të sektorëve industrialë, sidomos në prodhimet civile, ndërsa edhe prodhimi i armëve, municioneve dhe produkteve metalike të gatshme ngec.

Të gjitha këto probleme rënduan edhe mbi ndërmarrjen e Arsenyev, por pushteti në Rusi nuk pranon justifikime. Dmitry Medvedev, që përfaqëson Putinin në një organ koordinues mes ushtrisë dhe kompanive të quajtur “Këshilli ushtarako-industrial”, në mars 2023 u lexoi sipërmarrësve një telegram të Josif Stalinit që datonte nga Lufta e Dytë Botërore: prodhuesit që do t’u dorëzonin me vonesë armë ushtrisë, pohonte diktatori atëherë, do të “shtrydheshin si kriminelë”.

Që nga 2017, vonesa në dorëzimet ushtarake “për kërkim të fitimit personal” në Rusi është krim i dënueshëm me 10 vjet burg; por nga 2023 refuzimi për të firmosur një kontratë furnizimi për ushtrinë ose vonesat në dorëzime janë të ndjekshme penalisht edhe pa “kërkim të fitimit personal” nga i akuzuari. Këto mekanizma ndëshkues u vunë në lëvizje kundër Arsenyev.

Rostec rishikoi kontratat me kompaninë e tij, duke ulur pagesat dhe duke e çuar Volna-n në prag të falimentimit. Atëherë Arsenyev i vuri flakën vetes disa hapa larg mauzoleumit të Vladimir Leninit, në Sheshin e Kuq.

Dhe rasti i tij nuk është i izoluar. Sipas Reuters, sot në Rusi të paktën 34 sipërmarrës dhe menaxherë të zinxhirit ushtarako-industrial janë në burg: të dënuar ose nën gjyq për “dëmtim” kontratash, porosish dhe dorëzimesh ushtarake që nga fillimi i luftës totale ndaj Ukrainës në 2022.

Ndërkohë, ka nga ata që në luftë kanë gjetur burime të reja fitimi. Faqja ruse e gazetarisë së pavarur Vazhnye Istorii (“Histori të rëndësishme”) raporton për një zanat të ri të lindur në këto vite: ndërmjetësi ose rekrutuesi i burrave për ushtrinë, që për çdo “vullnetar” të ri të destinuar për thertoren e Ukrainës mund të fitojë deri në ekuivalentin e 6 mijë e 100 eurove (ose edhe më shumë në rastet e shpeshta të mashtrimeve ndaj rekrutëve).

Modeli i rekrutimit për luftën synon të shmangë mobilizimet, nga të cilat Putini ka frikë për shkak të papëlqyeshmërisë së tyre. Ushtarët formalisht janë gjithmonë vullnetarë që firmosin një kontratë me ushtrinë, me një bonus hyrës që në disa rajone mund të arrijë deri në 36 mijë e 500 euro dhe një pagë mujore deri në 2 mijë e 200 euro.

Në rastin e rekrutëve të rajonit të Moskës, në disa raste parashikohet edhe fshirja e borxheve personale deri në dhjetë milionë rubla (107 mijë euro). Shumat që mund të ndahen janë pra të konsiderueshme dhe ushqejnë një ekonomi të tërë rreth firmosjes së kontratave.

Faqet ruse të shpalljeve si Avito janë plot me oferta për pozicione si “rekrutues për Operacionin ushtarak special” të publikuara nga agjenci të specializuara. Këta rekrutues mund të punojnë personalisht ose thjesht online, duke u përpjekur të kapin në rrjetet sociale kandidatë të mundshëm për luftën me premtime shpesh të rreme. Reklamohen vende pune si “kuzhinier” ose “shofer kamioni” apo si punonjës i një kompanie furnizimi të ushtrisë në prapavijë. Oferta është gjithmonë mbi bazën e kontratave vjetore, duke lënë të kuptohet se pas dymbëdhjetë muajsh vullnetarët mund të kthehen në shtëpi. Natyrisht, kjo është krejtësisht e rreme.

Pothuajse kurrë agjencitë dhe ndërmjetësit nuk shpjegojnë se kthimi në shtëpi nuk është i parashikuar: pas vitit të parë rinovimi i kontratave është automatik, pa mundësi dorëheqjeje, ndërsa komandanti i njësisë ku caktohesh ka pushtet absolut të dërgojë “kuzhinierët” ose “shoferët e kamionëve” në vijën e parë (siç ndodh rregullisht). Ndërkohë, ndërmjetësit marrin pjesë të bonuseve që u jepen rekrutëve në momentin e firmosjes.

Ata vetë pastaj ndajnë shpërblimin me agjencinë që i ka rekrutuar për të shfrytëzuar rrjetin në kërkim të viktimave.

Dhe meqë Rusia duhet të zëvendësojë çdo muaj rreth 30 mijë të vrarë dhe të plagosur në luftë, tashmë kanë rënë të gjitha barrierat: ndërmjetësit kanë të drejtë të shtyjnë edhe alkoolistët, të varurit nga droga, persona të prekur nga viruse si HIV, hepatiti ose sifilisi të firmosin kontratat.

Shpesh dërgojnë në ushtri burra të sëmurë mbi pesëdhjetë vjeç, të paaftë të ecin njëqind metra me çantën e ushtrisë.

Pas samitit të Anchorage mes Putinit dhe Donald Trump dhe me shkrirjen e marrëdhënieve ruso-amerikane, tani ndërmjetësit përdorin shpesh edhe një argument tjetër: i ftojnë rekrutët e mundshëm të nxitojnë të firmosin dhe të marrin bonusin, sepse një marrëveshje do të ishte “afër” dhe mund të mos ketë më raste të tjera. Ata u lënë të kuptohet se rekrutët mund të dërgohen në shtëpi para se të mbërrijnë në front, sepse, thonë, ditët e betejës po shkojnë drejt fundit. Pak rëndësi ka që ushtria e Putinit është e bllokuar mes rrënojave të Donbasit tashmë për më shumë kohë sesa iu desh Stalinit për të krijuar një perandori në Evropë.

Kujtojmë se Shpat Kasapi ndërrojë jetë me datë 26 nëntor, ku ishte në Itali së bashku me familjen për kurim të djalit të tij.