Ngjyra e butë e livandës ose lejla është duke u shndërruar në trendin më të madh të garderobës për sezonin pranverë/verë 2026. E frymëzuar nga lule livandos, kjo nuancë delikate e purpurt do të pushtojë të gjitha veshjet tona këtë sezon.
Ndërsa ngjyrat rikthehen fuqishëm këtë vit, ato marrin nuanca më të buta dhe verore, dhe mesa duket ngjyra e livandës është zgjedhja ideale. Kjo ngjyrë mund të kombinohet me nuanca më të forta për një pamje më të guximshme ose të vishen në një veshje monokromatik elegant.
Pasarelat e pranverë/verës 2026 kanë treguar qartë se ngjyra lejla është ylli i sezonit. Në Dior, koleksioni i parë i grave nga Jonathan Anderson solli mules florale në nuanca vjollce. Stella McCartney zgjodhi një fustan të gjatë strapless me taka, ndërsa Burberry eksperimentoi duke kombinuar nuanca të ndryshme lejlaje me një fustan të shkurtër./mxh
Manchester United po jeton një krizë të vazhdueshme që nuk duket se ka fund. Nuk e fiton titullin e Premier League që nga viti 2013 dhe që nga ai moment shumë trajnerë të mëdhenj kanë kaluar në Old Trafford me objektiv ngritjen e skuadrës, por asnjë nuk ia ka dalë mbanë.
I fundit që dështoi në këtë mision ishte pikërisht Ruben Amorim që u shkarkua nga drejtuesit e Manchester City ditën e hënë pas një pjese të parë të sezonit shumë larg pritshmërive të një skuadre ‘Big Six’.
Amorim u transferua në Manchester në nëntor të 2024 me etiketën e trajnerit zbulim falë etapës së suksesshme të tij në Lisbonë me Sportingun. Por që në momentin e parë u pa që gjërat nuk do të ishin shumë të lehta për të si në Portugali dhe në fund bordi drejtues i Manchester United nuk patën rrugë tjetër vecse të largonin portugezin në mesin e sezonit 2025-2026.
Shkarkimi i Amorim nuk është vetëm një problem sportiv për Manchester United që duhet të gjejë pasuesin e tij. Sipas asaj që publikojnë disa media britanike, kostoja e shkarkimit të 41 vjeçarit është 32 milionë euro në total. Nga këto 11 milionë do t’i jepen Sportingut të Lisbonës si kompensim, 9 milionë si paga në kontratë dhe 11.5 milionë shuma totale e pagës për kohën e mbetur në kontratë
Një rast i ngjashëm ky me atë të Jose Mourinho që kur u shkarkua nga Fenerbahçe përfitoi një dëmshpërblim deri në 11 milionë euro nga klubi turk. Tani, pas largimit të Amorim, Manchester United po eksploron merkaton e trajnerëve për të gjetur kandidatin e duhur. Darren Fletcher do të jetë trajner i përkohshëm, por drejtuesit e Manchester United duket se kanë avancuar në bisedimet me Ole Gunnar Solskjaer, një njohje e vjetër në Old Trafford./mxh
Kuba ka bërë publike sot emrat e 32 ushtarakëve të saj që u vranë gjatë operacionit amerikan në Karakas për arrestimin e presidentit venezuelian Nicolas Maduro, pak pasi ushtria e Venezuelës njoftoi vdekjen e 23 ushtarakëve të saj gjatë të njëjtës ndërhyrje.
Havana, aleate e ngushtë e Karakasit, kishte konfirmuar më herët humbjen e 32 anëtarëve të shërbimeve të sigurisë kubane dhe sot publikoi në median zyrtare emrat dhe gradat e tyre. Sipas të dhënave të publikuara nga portali shtetëror Cubadebate, 21 prej viktimave ishin pjesë e Ministrisë së Brendshme të Kubës, përfshirë tre oficerë të lartë (dy kolonelë dhe një nënkolonel), ndërsa 11 të tjerë i përkisnin Forcave të Armatosura Revolucionare, kryesisht ushtarë.
Sipas autoriteteve kubane, viktima më e moshuar ishte 67 vjeç, ndërsa më i riu 26 vjeç.
Nga ana tjetër, autoritetet e Venezuelës nuk kanë publikuar ende një bilanc zyrtar të plotë të viktimave. Megjithatë, ushtria venezueliane njoftoi përmes Instagramit vdekjen e 23 ushtarakëve, mes tyre pesë admiralë, 16 nënoficerë të gradave të ndryshme dhe dy ushtarë.
Ministri i Mbrojtjes i Venezuelës, Vladimir Padrino, deklaroi se truprojat e presidentit Maduro u vranë “me gjakftohtësi” nga trupat amerikane, të cilat, sipas tij, bombarduan Karakasin dhe tre shtete të tjera për të lehtësuar operacionin e arrestimit të Maduro-s dhe bashkëshortes së tij, Cilia Flores.
Sipas Sekretarit amerikan të Mbrojtjes, Pete Hegseth, operacioni u zhvillua brenda pak orësh, me rreth 200 ushtarë dhe 150 avionë. Objektiv kryesor i sulmeve ishte kompleksi ushtarak Fuerte Tiuna, më i madhi në Venezuelë, ku ndodhen Ministria e Mbrojtjes dhe Akademia Ushtarake. Kompleksi përfshin gjithashtu zona të banuara, ku jetojnë mijëra familje ushtarakësh.
Shpërthime të tjera u raportuan pranë kompleksit aeronautik La Carlota, një aeroport ushtarak dhe civil për fluturime private, në lindje të Karakasit./mxh
Ish-presidenti i burgosur i Brazilit, Jair Bolsonaro, është transportuar sot në spital për kryerjen e ekzaminimeve mjekësore, pasi është rrëzuar dhe ka goditur kokën, bëri të ditur bashkëshortja e tij, Michelle Bolsonaro, përmes një postimi në rrjetet sociale.
“Po shkojmë në spital. Dashuria ime do t’i nënshtrohet ekzaminimeve”, shkroi ajo në Instagram, duke u bërë thirrje njëkohësisht mbështetësve që të luten për shëndetin e tij.
Sipas Michelle Bolsonaro, ish-presidenti 70-vjeçar nuk ndodhet në gjendje të mirë shëndetësore. Ajo shpjegoi se gjatë natës ai ka pësuar një krizë teksa flinte, është rrëzuar dhe ka goditur kokën në një mobilje. Ndihma mjekësore, sipas saj, është dhënë me vonesë, pasi dhoma ku ai mbahej ishte e mbyllur dhe incidenti u vu re vetëm në momentin e mbërritjes së saj për vizitën e planifikuar.
Michelle Bolsonaro tha se është në kontakt të vazhdueshëm me mjekët dhe pret sqarime mbi mënyrën se si janë ofruar ndihmat e para pas incidentit./mxh
Como ka fituar 3-0 ndaj Pisa-s në transfertë, në ndeshjen e luajtur në “Arena Garibaldi”. Ky rezultat e çon në tetë ndeshje radhazi pa fitore Pisa-n, me katër humbje rresht në shtëpi pa shënuar gol.
Pjesa e parë u mbyll pa gola, me pak raste të pastra për të dyja skuadrat. Goli i avantazhit për Comon u shënua në minutën e 67-të nga Maximo Perrone, me një goditje nga distanca.
Më pas, Tasos Douvikas realizoi golin e dytë pas një aksioni të shpejtë. Pisa humbi mundësinë për të rihapur ndeshjen, pasi Nzola gaboi një penallti.
Në shtesë, Douvikas shënoi edhe nga pika e bardhë për 3-0. Me këtë fitore, Como ngjitet përkohësisht në vendin e pestë, ndërsa Pisa mbetet në fund të renditjes.
Kjo fitore e ngjit Comon në vendin e katërt me 33 pikë të grumbulluara, po aq sa Juventusi./MXH
Netflix ka hequr nga platforma e saj në Vietnam një serial kinez pas kundërshtimeve të autoriteteve të Hanoi-t lidhur me një episod që përfshinte një hartë me pretendime territoriale të diskutueshme në Detin e Kinës Jugore.
Seriali romantik 27-episodësh Shine on Me shfaq hartën e njohur si “nine-dash line”, të cilën Vietnam e ka dënuar si “jo të saktë” dhe “shkelje të sovranitetit kombëtar”. Kina përdor këtë vijë në hartat e saj për të shënuar pretendimet territoriale në këtë det, të cilat kundërshtohen nga Vietnam dhe disa vende të tjera të rajonit.
Ministria e Kulturës e Vietnamit kërkoi heqjen e serialit më 3 janar dhe i dha Netflix 24 orë për të zbatuar urdhrin. Kontrolli i BBC-së të martën tregoi se seriali nuk mund të shihej më në platformën e Netflix në Vietnam. Harta e diskutueshme shfaqet disa herë në episodin 25, gjatë një lecture mbi potencialin solar të Kinës, ku një hartë me “nine-dash line” është projeksionuar në ekranin e një auditore.
Shine on Me ka qenë shumë i popullarizuar brenda Kinës dhe në territore të tjera, duke u renditur ndër Top 10 shfaqjet më të ndjekura në Singapor, Tajvan dhe Vietnam para se të hiqej.
Megjithëse Pekini nuk ka komentuar zyrtarisht për heqjen e serialit, gazeta shtetërore Global Times u shpreh se Hanoi duhet të “ndajë shkëmbimet kulturore nga çështja e Detit të Kinës Jugore”.
Në vitet e fundit, Kina ka forcuar pretendimet e saj mbi disa ishuj dhe ujërat përreth në Detin e Kinës Jugore, duke përfshirë zinxhirin e ishujve Paracel dhe Spratly. Ndërkohë, Vietnam kundërshton këto pretendime dhe pretendon se ka administruar këto ishuj që nga shekulli XVII.
Kjo nuk është hera e parë që Vietnam kërkon heqjen e përmbajtjeve që shfaqin “nine-dash line”./mxh
Muaji janar shënon një periudhë kërkuese, që vë në provë durimin, sjell vonesa dhe i detyron tre shenja të zodiakut të përballen me vendime të vështira, por të domosdoshme.
Janari i vitit 2026 nis me seriozitet, kërkesa të larta dhe ndjesinë se asgjë nuk vjen pa përpjekje. Energjia dominuese e Bricjapit vendos tonin e një muaji që kërkon pjekuri, disiplinë dhe prioritete të qarta, duke lënë shumë pak hapësirë për impulsivitet apo teprime emocionale. Çdo gjë që nuk është ndërtuar mbi baza të forta vihet në provë, ndërsa çështjet e lëna pezull kërkojnë zgjidhje të menjëhershme.
Për disa shenja, kjo atmosferë përkthehet në presion, bllokime dhe lodhje të brendshme. Janari sjell vonesa, vendime të rënda dhe situata që nuk mund të shtyhen më, duke i detyruar shumëkënd të përballet me përgjegjësi, marrëdhënie ose zgjedhje që deri tani i kishte shmangur. Nuk është një muaj që premton zgjidhje të lehta, por një periudhë që hedh themelet për ndryshime të thella përmes sfidave.
Tre shenjat që vihen më shumë në provë në janar
Dashi
Dashi hyn në muajin e parë të vitit me ndjesinë se po shtypet nga të gjitha anët. Energjia përqendrohet fort te karriera, imazhi publik dhe marrëdhëniet me figura autoriteti, duke krijuar përshtypjen se asgjë nuk ecën me ritmin që ai dëshiron. Si shenjë veprimi dhe iniciative, Dashi e ka të vështirë të pranojë vonesat, por janari i vitit 2026 kërkon durim, strategji dhe respekt për hierarkitë. Kjo përplasje sjell nervozizëm, konflikte me eprorë dhe ndjesinë se përpjekjet nuk shpërblehen menjëherë. Ndikimet e Marsit rrisin impulsivitetin, duke bërë që gabime të vogla të kenë pasoja më të mëdha se zakonisht. Zgjidhja për Dashin është të ngadalësojë me vetëdije, të vëzhgojë ekuilibrat e pushtetit rreth tij dhe të shmangë vendimet e nxituara.
Binjakët
Për Binjakët, vështirësitë e janarit nuk shfaqen domosdoshmërisht si pengesa të drejtpërdrejta, por si lodhje mendore dhe konfuzion. Lëvizjet planetare aktivizojnë çështje që lidhen me financa të përbashkëta, borxhe, detyrime ose lidhje emocionale të paqarta. Binjakët mund të ndihen të përfshirë në problemet e të tjerëve ose të ngarkuar me përgjegjësi pa kufij të qartë. Merkuri, planeti sundues i tyre, ndodhet në një pozicion më “të rëndë”, duke vështirësuar komunikimin, me keqkuptime, fjalë të paqarta dhe ndryshime të shpeshta planesh. Ky muaj kërkon kujdes të veçantë në kontrata dhe marrëveshje financiare, pasi ajo që duket e thjeshtë mund të fshehë angazhime afatgjata. Qetësimi i mendjes, reduktimi i informacionit të tepërt dhe përqendrimi në një çështje në të njëjtën kohë janë çelësi për ta kaluar këtë periudhë.
Peshorja
Peshorja përballet kryesisht me sfida emocionale. Janari i vitit 2026 ndriçon themelet e jetës së saj: familjen, marrëdhëniet e ngushta dhe ndjenjën e sigurisë. Energjia e Bricjapit i bën bisedat më të ftohta dhe kërkuese, ndërsa mbështetja që pret nga të tjerët mund të mos vijë në masën e dëshiruar. Në përpjekje për të ruajtur harmoninë, Peshorja shpesh jep më shumë sesa mund të përballojë, duke u lodhur emocionalisht. Venusi, planeti sundues i saj, ndodhet nën presion, duke e bërë kënaqësinë, romantikën dhe lehtësinë të duken përkohësisht të paarritshme. Mësimi kryesor i këtij muaji është vendosja e kufijve dhe ndershmëria me veten./mxh
Arben Musliu, nga Fushë-Kosova, e përdor kartelën e tij bankare vetëm një herë në muaj: kur tërheq pagën mujore.
Të gjitha pagesat, qoftë për shërbime komunale apo për blerje në dyqane, 48-vjeçari i realizon me para të gatshme, pa marrë parasysh vlerën.
Madje, para tre vjetësh, ai pagoi 5 mijë euro para të gatshme për ta ndërruar veturën e tij me një më të re.
“Nuk i besoj tërheqjes së shpeshtë të parave nga bankomatët. Paratë në kuletë i menaxhoj më lehtë. Edhe kursimet i mbaj në shtëpi, jo në bankë. Nuk kam ndonjë arsye konkrete, por thjesht nuk besoj… nuk besoj”, thotë ai për Radion Evropa e Lirë (REL).
Ndryshe nga Arbeni, Besarta, 23-vjeçare, pohon se të gjitha blerjet dhe pagesat e shërbimeve i kryen në formë elektronike.
“Bëhem nervoz kur nuk ka POS [aparate për kryerje të pagesës me kartelë]në dyqane, sepse nuk mbaj para në kuletë”, shprehet ajo për REL-in, duke shtuar se me këtë problem përballet kryesisht në biznese më të vogla, që shpeshherë nuk lëshojnë as kuponë fiskalë.
Shumë qytetarë dhe biznese vazhdojnë t’i përdorin paratë e gatshme më shumë, pasi që paranë fizike e shohin si “më të sigurt”, thonë ekspertë të ekonomisë. Por, sipas tyre, të rinjtë bëjnë përjashtim.
Sipas Bankës Botërore, vetëm 76 për qind e të rriturve në Ballkanin Perëndimor kanë një llogari transaksionesh, në krahasim me 99 për qind të të rriturve në Eurozonë.
Por, këto pagesa me para të gatshme nuk regjistrohen dhe nuk monitorohen nga autoritetet fiskale, pasi nuk lënë gjurmë elektronike, thotë profesori i ekonomisë në Universitetin e Prishtinës, Mejdi Bektashi.
Sipas tij, kjo formë e pagesave jashtë kanaleve bankare i shkakton humbje buxhetit të shtetit përmes shmangies nga Tatimi mbi Vlerën e Shtuar (TVSH), tatimi mbi paga dhe tatimi mbi fitimin, dhe lehtëson shitjen e produkteve pa kupon fiskal.
Bektashi merr si shembull rastin kur një person paguan 5 mijë euro me para të gatshme, duke theksuar se në këtë rast shteti humb 900 euro, sa i bie të jetë 18-përqindëshi i TVSH-së.
“Heqja e parasë së gatshme, përveç që ndikon fuqishëm në eliminimin apo zvogëlimin në minimum të ekonomisë joformale, ndikon edhe në zvogëlimin e fenomeneve të dëmshme, siç janë korrupsioni, ryshfeti dhe shumë fenomene të tjera”, thekson Bektashi për Radion Evropa e Lirë.
Nëse shteti do të arrinte t’i mblidhte të gjitha tatimet, Bektashi konsideron se buxheti i vitit 2026 do të arrinte në rreth pesë miliardë euro, sepse do t’i shtoheshin rreth një miliard euro më shumë nga TVSH-ja dhe tatimet tjera.
Dhe, kjo shumë do të mund të përdorej për investime kapitale.
Qeveria në detyrë e Kosovës e ka miratuar buxhetin për vitin 2026, që kap shifrën e rreth katër miliardë eurosh.
Në një raport të Bankës Botërore thuhet se nëse një vend shënon rritje për 10 për qind të pagesave digjitale, ekonomia joformale e atij vendi ulet për rreth 2 për qind si rrjedhojë.
Edhe Banka Qendrore e Kosovës (BQK) vlerëson se ekonomia joformale ndikon drejtpërdrejt në rritjen e përdorimit të parasë së gatshme, pasi që bizneset informale preferojnë transaksione të pagjurmueshme për t’i shmangur detyrimet fiskale.
“Të dhënat e vitit të kaluar tregojnë se vërehet një tendencë pozitive e rritjes së transaksioneve përmes kanaleve digjitale. Megjithatë, sfidë mbetet mungesa e besimit dhe edukimit financiar”, thuhet në një përgjigje nga BQK-ja për REL-in.
Për këtë arsye, BQK-ja thotë se synon forcimin e sigurisë dhe besimit në sistemet e pagesave, si dhe zgjerimin e përdorimit të pagesave digjitale.
Ekonomia joformale, mbi 30 për qind e PBB-së
Instituti Riinvest në vazhdimësi përcjell nivelin e informalitetit përmes anketimit të bizneseve. Në raportin “Zhvillimet ekonomike: Kërcënimet nga kriza institucionale”, publikuar në nëntor të vitit të kaluar, thuhet se informaliteti në Kosovë sillet nga 30 deri në 35 për qind të Prodhimit të Brendshëm Bruto (PBB).
PBB-ja për vitin 2025 ishte mbi 11 miliardë euro.
Administrata Tatimore e Kosovës (ATK) nuk është përgjigjur në pyetjen e REL-it se sa është vlera e ekonomisë joligjore.
Por, drejtori i përgjithshëm i ATK-së, Mentor Hyseni, tha më 22 dhjetor, gjatë një konference vjetore, se ky institucion ka mbledhur mbi një miliard euro më 2025, duke shënuar rritje prej 11 për qind krahasuar me vitin e kaluar. Rreth 49 për qind ishin të hyra nga TVSH-ja.
Profesori Bektashi shprehet se autoritet kompetente duhet të angazhohen që përdorimi i parasë digjitale të rritet në të gjithë sektorët, pasi është thelbësor për modernizimin e ekonomisë dhe uljen e ekonomisë joformale.
Labinot Haxhiu, udhëheqës i Bankingut Digjital në bankën TEB, përmend rëndësinë e adoptimit të shërbimeve financiare nga brezat e rinj, për të cilët bankingu duhet të jetë po aq i lehtë sa rrjetet sociale, dhe po aq i menjëhershëm sa aplikacionet e mesazheve.
“Të rinjtë në Kosovë jetojnë online. Për ta, bankingu nuk lidhet me sportele dhe pritje në radhë, por me përvoja digjitale intuitive, të qasshme dhe të personalizuara”, ka shkruar ai në revistën financiare “Bankieri i Kosovës 2025-2026”, publikuar nga Shoqata e Bankave të Kosovës.
Në Kosovë operojnë dhjetë banka komerciale. Numri i kartelave debit në vitin 2024 kishte arritur në 1.4 milion, kurse i kartelave të kreditit në rreth 195 mijë.
Në nivel vendi janë 635 bankomatë [aparate bankare për tërheqje të parave], dhe 20.913 terminale POS, ku qytetarët mund të bëjnë pagesa me kartelë në dyqane.
Paraja e gatshme vazhdon të jetë e përhapur edhe në rajon, ndonëse përdorimi i saj është në rënie. Serbia kryeson në Ballkanin Perëndimor për sa i përket adoptimit të pagesave pa para fizike.
Ndërkaq, Shqipëria synon që deri në fund të vitit 2030 t’i bëjë të gjitha transaksionet financiare në formë digjitale.
Atje, tashmë ka filluar një nismë kombëtare që synon të rrisë përdorimin e pagesave digjitale nga qytetarët dhe bizneset, duke ndërtuar një infrastrukturë moderne, të sigurt dhe funksionale./MXH
Policia e Shtetit në Durrës dhe zona të tjera të vendit ka qenë në terren me përkushtim dhe sakrificë, në ndihmë të qytetarëve të rrezikuar nga moti i keq dhe përmbytjet. Drejtori i Përgjithshëm, Ilir Proda, ka shprehur mirënjohje për angazhimin dhe humanizmin e efektivëve, si dhe për falënderimet e shumta të qytetarëve.
Njoftimi i Policisë:
Përkushtim, sakrificë, mirënjohje dhe respekt nga qytetarët
Shërbimet e Policisë në Durrës, e në shumë zona të vendit, me përkushtim, sakrificë dhe profesionalizëm, në ndihmë të përdoruesve të rrugës dhe të banorëve në rrezik nga përmbytjet.
Drejtori i Përgjithshëm i Policisë së Shtetit, Ilir Proda, shpreh mirënjohje për punonjësit e Policisë, të cilët përgjatë gjithë ditës së sotme dhe vijojnë ende, kanë treguar përgjegjshmëri, angazhim, sakrificë dhe humanizëm në shërbim të qytetarëve, duke u ardhur në ndihmë si pasojë e motit shumë të keq, si dhe falënderon qytetarët që kanë dërguar në adresat e Policisë dhjetëra mesazhe falënderimi dhe video nga puna e punonjësve të Policisë në terren.
Meraku në një takim të parë njohjeje është shumë i madh, kryesisht kur bëhet fjalë për gratë. Ato shpesh përgatisin një listë të gjatë për mënyrën e sjelljes, veshjen, zgjedhjen e ushqimit, apo se si do të takohen në momentin e largimit.
Kjo sepse gratë dhe vajzat janë më emocionale dhe ekspresive. Por nuk do të thotë se burrat janë më pak detajistë. Madje, mos gaboni të bëni këto pesë gjëra në takimin tuaj të para, sepse ata nuk do ua tolerojnë.
Vonesa
Po, vajza, djemtë e kuptojnë nevojën tuaj për të ardhur me vonesë, sepse në fund të fundit ju dëshironi të shkoni me të gjithë sharmin tuaj, ndërkohë që ai është duke ju pritur të hyni nga momenti në moment. Por dijeni se kjo nuk është ajo që ata pëlqejnë.
Vrazhdësia
Të sjellurit në mënyrë të vrazhdë me personat që ju rrethojnë në atë moment nuk ju bën aspak të dukeni tërheqëse. Edhe nëse diçka me porosinë tuaj nuk është ashtu siç e keni kërkuar, mos u sillni keq me ata që ju shërbejnë.
Mos flisni shumë dhe dëgjoni mjaftueshëm
Në daljet tuaja, nëse flisni më shumë se sa duhet dhe dëgjoni shumë pak, ky është një tjetër element që burrat nuk pëlqejnë dhe e bëni që të largohet që në takimin e parë.
Ad
Nëse ju flisni pak dhe dëgjoni më tepër, kjo konsiderohet një shenjë respekti nga parteri që keni përballë. Mos dërgoni mesazhe
Vërtetë në atë moment ka diçka më të rëndësishme se njohja e personit me të cilin keni dalë në takim?
Nëse nuk jeni një mjek/e, atëherë do të ishte mirë ta fiknit telefonin dhe të përqëndroheni në qëllimin tuaj, në të kundërt duket se ju mungon vëmendja dhe dëshira për të vazhduar njohjen.
Mos aktroni
Shumë burra ankohen për sjelljet e grave në takimin e parë, sepse të aktruarit duke u dukur si indiferente, deri tek ftohtësia e plotë që ato të fitojnë vëmendjen e partnerit, do të çojë në rezultat të kundërt. Në fund të fundit është e kuptueshme se qoftë burrë apo grua, secili ka nevojë për vemendjen e personit përballë./mxh
Një 14-vjeçar është shpallur në kërkim nga policia, pasi familja e tij bëri kallëzim në komisariatin e Hasit për zhdukjen e tij.
Sipas policisë, i mituri ka marrë pa leje automjetin e babait të tij dhe është larguar nga banesa. Policia vijon me kontrollet për gjetjen e 14-vjeçarit.
Njoftimi i policisë:
Më datë 05.01.2026, në Komisariatin e Policisë Has, kanë bërë kallëzim familjarët e një shtetasi të mitur, 14 vjeç, banues në Has, se i mituri ka marrë pa leje automjetin e babait të tij dhe është larguar nga banesa.
U bë shpallja në kërkim e 14-vjeçarit, ndërkohë shërbimet e Policisë po vijojnë kontrollet për gjetjen e tij.
Materialet proceduriale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës./mxh
Ikona e kinematografisë hungareze, Bela Tarr, ka ndërruar jetë në moshën 70-vjeçare, pas një sëmundjeje të gjatë dhe të rëndë, njoftoi me pikëllim Shoqata e Artistëve të Filmit në Hungari.
Tarr, i lindur në vitin 1955 në Pecs, nisi karrierën e tij si regjisor amator në moshën 16-vjeçare. Më vonë punoi në studion Balazs Bela, një qendër e rëndësishme për prodhimin e filmave eksperimentalë, ku realizoi edhe filmin e tij të parë të metrazhit të gjatë, The Family Nest, në vitin 1977, duke eksploruar çështje shoqërore.
Gjatë karrierës së tij, Tarr krijoi disa filma të shquar, si Damnation (1988) dhe The Prefab People (1982), të cilët portretizojnë dobësinë njerëzore dhe përkeqësimin social. Stili i tij unik kinematografik, i njohur për skenat e zgjatura pa ndërprerje dhe pasqyrimin e ashpër të dëshpërimit ekzistencial, u njoh ndërkombëtarisht me eposin e gjatë të vitit 1994, Sátántangó, një kryevepër shtatë orë e gjysmë që shpesh konsiderohet si një nga filmat më të mëdhenj të shekullit të 20-të.
Filmat e tij të tjerë të vlerësuar përfshijnë Werckmeister Harmonies (2000) dhe The Turin Horse (2011), ky i fundit që fitoi Çmimin e Jurisë në Festivalin Ndërkombëtar të Filmit në Berlin dhe shërbeu si filmi i fundit i Tarr.
Bela Tarr do të mbetet një nga regjisorët më ndikues të kinemasë moderne, i njohur për vizionin e tij të thellë artistik dhe për ndikimin e tij të qëndrueshëm në kinemanë botërore./mxh
Protesta e tregtarëve në Iran vijoi edhe të martën, më 6 janar, ndërsa pamje të filmuara nga dëshmitarë okularë tregojnë përleshje mes protestuesve dhe forcave të sigurisë në Pazarin e Madh të Teheranit. Në video shihen protestues që hedhin bombola gazi, ndërsa policia ndërhyn për shpërndarjen e turmës.
Reuters konfirmoi vendndodhjen e pamjeve duke i krahasuar ndërtesat dhe konfigurimin e rrugëve me imazhe satelitore dhe arkivore të zonës.
Sipas grupeve për të drejtat e njeriut, të paktën 25 persona kanë humbur jetën në Iran gjatë nëntë ditëve të para të protestave, të cilat nisën në pazar si reagim ndaj rënies së fortë të monedhës kombëtare dhe rritjes së ndjeshme të inflacionit.
Të martën, shefi i policisë iraniane deklaroi se autoritetet do të “merren me të fundit nga këta trazues”, duke sinjalizuar një qëndrim më të ashpër ndaj demonstratave.
Ndërkohë, autoritetet iraniane po ndjekin një qasje të dyfishtë ndaj krizës: nga njëra anë, pranojnë se protestat për gjendjen ekonomike janë të ligjshme dhe premtojnë dialog; nga ana tjetër, në disa raste kanë përdorur gaz lotsjellës për të shpërndarë protestat, të cilat janë shoqëruar me përplasje të dhunshme në rrugë./mxh
Kryeministri i Polonisë, Donald Tusk, deklaroi se Danimarka mund të llogarisë në solidaritetin evropian lidhur me Groenlandën, duke theksuar se vendet anëtare të NATO-s nuk duhet të kërcënojnë apo sulmojnë njëra-tjetrën.
Në prag të udhëtimit të tij drejt Parisit për takimin e ashtuquajtur “Koalicioni i të Vullnetshmëve” për Ukrainën, Tusk iu referua komenteve të fundit të presidentit amerikan Donald Trump, i cili ka shprehur dëshirën që Shtetet e Bashkuara të marrin kontrollin e ishullit arktik të Groenlandës.
“Asnjë anëtar i Aleancës së Atlantikut të Veriut nuk duhet të sulmojë apo të kërcënojë një tjetër anëtar të NATO-s,” u shpreh Tusk, duke shtuar se solidariteti evropian dhe respektimi i integritetit territorial të shteteve evropiane janë parime themelore.
Kryeministri polak theksoi se synimi i Varshavës është të mbështesë Danimarkën, pa cenuar marrëdhëniet e forta transatlantike. Sipas tij, lidhjet mes Evropës dhe Shteteve të Bashkuara mbeten baza e NATO-s dhe e sigurisë kolektive.
Donald Tusk bëri të ditur gjithashtu se takimi i Parisit synon forcimin dhe bashkërendimin e qëndrimeve evropiane dhe amerikane në lidhje me Ukrainën. Ndërkohë, aleatët e Kievit u mblodhën në kryeqytetin francez për të finalizuar garancitë e sigurisë për Ukrainën, në rast të një armëpushimi me Rusinë.
Presidenti amerikan Donald Trump ka deklaruar në mënyrë të përsëritur se SHBA-të kanë nevojë për Groenlandën “për arsye mbrojtjeje”, një qëndrim që ka nxitur reagime dhe shqetësime në Evropë./mxh
Autoritetet zvicerane kanë pranuar dështime serioze në kontrollet e sigurisë pas zjarrit tragjik në një bar në Crans-Montana, i cili shpërtheu gjatë festimeve të Vitit të Ri.
Ngjarja e rëndë la gjithashtu 116 të plagosur, ndërsa më shumë se dy të tretat vijojnë të trajtohen në spital.
Sipas zyrtarëve, lokali “Le Constellation” nuk ishte inspektuar që prej vitit 2019. Kryebashkiaku i Crans-Montana-s, Nicolas Feraud, kërkoi ndjesë publike në një konferencë për shtyp, duke deklaruar se bashkia “nuk kishte asnjë sinjal” se kontrollet periodike nuk ishin kryer. Ai njoftoi gjithashtu ndalimin e menjëhershëm të përdorimit e fishekzjarreve brenda ambienteve të mbyllura, të cilët dyshohet se shkaktuan zjarrin.
“Inspektime periodike nuk u kryen midis viteve 2020 dhe 2025. Këshilli Bashkiak u vu në dijeni të kësaj situate pasi shqyrtoi dokumentet e paraqitura në zyrën e prokurorit publik fundjavën e kaluar. Na vjen shumë keq për këtë. Gjykata do të përcaktojë ndikimin e kësaj mbikëqyrjeje në zinxhirin e ngjarjeve që çuan në tragjedi. Ne do të marrim përsipër të gjithë përgjegjësinë që përcaktojnë gjykatat,” deklaroi kryebashkiaku i Crans Montana.
Kryebashkiaku bëri të ditur se është mbyllur edhe një tjetër lokal i menaxhuar nga të njëjtët drejtues të “Le Constellation”.
Feraud shtoi se raporti i zjarrit i vitit 2019 nuk evidentonte probleme sigurie, se materiali izolues i përdorur në lokal ishte konsideruar i pranueshëm në atë kohë dhe se, për shkak të madhësisë së ambientit, nuk kërkohej instalimi i alarmit të zjarrit. Megjithatë, ai pranoi se sipas rregullave lokale, kontrollet e sigurisë në bare duhet të kryhen çdo vit.
“Ne kemi vendosur të ngarkojmë një firmë të specializuar të jashtme për të kryer një inspektim të 128 ndërtesave tona publike në bashki sa më shpejt të jetë e mundur. Si pjesë e këtij mandati, bashkia do të kërkojë gjithashtu një inspektim të materialeve (ndërtimore dhe izoluese), edhe pse ligji nuk e kërkon këtë. Përndryshe, inspektimi nuk do të arrijë objektivin e tij, që është rritja e sigurisë,” deklaroi kryebashkiaku i Crans Montana.
Autoritetet konfirmuan se të gjitha viktimat janë identifikuar.
Procesi i identifikimit u vështirësua për shkak të plagëve të rënda nga djegiet, duke detyruar autoritetet t’u kërkojnë familjarëve mostra ADN-je. Ndërkohë, policia zvicerane bëri të ditur se dhjetëra persona vijojnë të jenë të shtruar në spital, ndërsa hetimet për shkaqet dhe përgjegjësitë e tragjedisë vazhdojnë./mxh
Prej ditës së premte, rrjetet sociale janë mbushur me aludime për një sherr fizik mes Butrint Imerit dhe Finemit. Në qendër të këtyre zërave u përfshi edhe menaxheri, Denis Avdiu, për të cilin u spekulua se mund të ishte lënduar gjatë situatës. Sipas raportimeve ai dhe Butrinti kishin përfunduar në spital.
Denisi ka reaguar indirekt në rrjetet sociale duke ndarë një video ku shfaqet në makinë pa shenja të dukshme në fytyrë.
Ky reagim megjithëse i tërthortë po lexohet nga ndjekësit si një “përgjigje” ndaj thashethemeve që kanë qarkulluar intensivisht për rreth 24 orë. Ndërkohë, palët e përfolura nuk kanë bërë ende një reagim publik apo sqarim zyrtar./mxh
Timothée Chalamet shfrytëzoi fitoren e çmimit ”Aktori më i Mirë” në Critics Choice Awards 2026 për të falenderuar publikisht partneren e tij prej vitesh, Kylie Jenner, duke mbajtur një nga fjalimet më të përfolura të mbrëmjes.
Pasi falenderoi të nominuarit e tjerë, ekipin e tij dhe regjisorin e filmit, Josh Safdie, Chalamet e përqendroi vëmendjen te Jenner, e cila ndodhej në sallë.
“Dhe së fundmi, dua të falenderoj partneren time prej tre vitesh. Faleminderit për bazën që kemi ndërtuar së bashku,” tha Chalamet nga skena. “Nuk do t’ia dilja pa ty. Faleminderit nga zemra.”
Kamerat kaluan menjëherë te Kylie Jenner, e cila iu përgjigj duke thënë “Të dua”, duke nxitur duartrokitje në sallë dhe reagime të menjëhershme në rrjetet sociale. Ky moment u konsiderua një nga shfaqjet më publike të çiftit që nga paraqitjet e tyre në evente të mëdha të industrisë.
Dukshëm i emocionuar, Chalamet pranoi në fillim të fjalimit se momenti e kishte prekur më shumë nga sa priste. “Jam më nervoz sesa mendoja,” tha ai, përpara se të theksonte punën krijuese pas filmit. Ai veçoi bashkëskenaristin dhe regjisorin Josh Safdie për mënyrën se si ndërtoi historinë.
“Ti krijove një histori për një njeri me mangësi, por me një ëndërr të kuptueshme, pa i dhënë leksione publikut se çfarë është e drejtë apo e gabuar,” u shpreh Chalamet. “Mendoj se duhet të tregojmë më shumë histori të tilla.” Aktori u nderua për rolin e tij në filmin “Marty Supreme”, ku interpreton Marty Mauser, një lojtar profesionist pingpongu që ndjek me këmbëngulje një ëndërr ambicioze.
Kategoria “Aktori më i Mirë” ishte ndër më konkurrueset e mbrëmjes, ku Chalamet la pas emra të mëdhenj si Leonardo DiCaprio (One Battle After Another), Joel Edgerton (Train Dreams), Ethan Hawke (Blue Moon), Michael B. Jordan (Sinners) dhe Wagner Moura (The Secret Agent)./mxh
Operacioni amerikan “Vendosmëria Absolute”, që çoi në kapjen e presidentit venezuelian Nicolás Maduro, nuk u mbështet vetëm te forca ushtarake dhe inteligjenca, por edhe te negociata të fshehta në majat e pushtetit në Karakas.
Pikërisht këtu përqendrohen dyshimet më të forta: te roli i mundshëm i zëvendëspresidentes Delcy Rodríguez.
Sipas burimeve amerikane dhe spekulimeve që qarkullojnë në qarqe diplomatike, CIA kishte vendosur kontakte të drejtpërdrejta me figura kyçe të regjimit, duke siguruar bashkëpunim nga brenda. Emri i Delcy Rodríguez del vazhdimisht si hallka kryesore që mund të ketë hapur rrugën për rrëzimin e Maduros, në emër të pragmatizmit politik dhe kontrollit të dëmeve.
Media amerikane kanë raportuar më herët se Rodríguez kishte tentuar të ndërtonte ura besimi me Uashingtonin, përmes ndërmjetësimit të Katarit, duke u paraqitur si një interlocutore e besueshme për të ardhmen e Venezuelës. Sipas “New York Times”, administrata Trump ishte impresionuar nga mënyra se si ajo kishte menaxhuar sektorin e naftës dhe e shihte si një alternativë të mundshme për tranzicionin e pushtetit.
Në këtë kontekst, interpretimi më i përhapur është se Delcy Rodríguez mund t’i ketë ofruar SHBA-së atë që kërkonte më shumë: Maduron si “trofe” politik, në këmbim të hapjes së rrugës për marrëveshje të reja energjetike dhe mbijetesës së një pjese të elitës në pushtet.
Ndërkohë, operacioni në terren u zhvillua me lehtësi të pazakontë. Pavarësisht rrethimeve të shumta të sigurisë rreth Maduros, bastisja e Delta Force u krye pothuajse pa rezistencë, duke forcuar dyshimet se struktura e komandës ishte paralizuar qëllimisht nga brenda.
Edhe pse asnjë provë zyrtare nuk e konfirmon publikisht këtë skenar, fakti që Maduro u kap kaq shpejt dhe pa një reagim real nga aparati i tij i sigurisë ka ngritur një pyetje që po dominon diskutimin politik në Venezuelë: a u rrëzua Maduro nga armiku i jashtëm apo u sakrifikua nga njerëzit më të afërt të tij?/mxh
Të 116 personat e plagosur nga zjarri masiv që përfshiu resortin e skive në Zvicër janë identifikuar nga autoritetet. 40 persona, të moshave nga 14 deri në 39 vjeç, humbën jetën nga zjarri në Crans-Montana natën e ndërrimit të viteve.
Ndërsa viktimat ishin identifikuar më herët, kishte nisur edhe puna për të përcaktuar se kush janë të plagosurit, disa prej të cilëve mbeten në gjendje kritike.
Policia zvicerane konfirmoi të hënën se 83 persona mbetën në spital, ndërsa të plagosurit ishin të paktën nga 12 kombësi të ndryshme. Shumica e të plagosurve pësuan djegie të rënda, të cilat në disa raste nënkuptonin se ata nuk mund të identifikoheshin.
Nga hetimet e deritanishme është zbuluar se fishekzjarret në shishet e shampanjës që mbahen shumë afër tavanit janë shkaku i mundshëm i flakëve.
Shumë nga të vdekurit dhe të zhdukurit janë adoleshentë. Çifti francez që zotëron barin, të identifikuar nga mediat si Jacques dhe Jessica Moretti, dyshohen për vrasje nga pakujdesia, lëndime trupore nga pakujdesia dhe zjarrvënie nga pakujdesia./mxh
Jennifer Lopez ka treguar se partneri i saj i ardhshëm duhet ta pranojë ashtu siç është dhe ta respektojë plotësisht.
Gjatë interpretimit të hitit të saj, “If You Had My Love”, Jennifer Lopez u ndal për të reflektuar mbi kuptimin e tekstit të këngës më shumë se dy dekada më vonë.
“Kur e këndova për herë të parë, isha shumë e re,” u tha ajo fansave, sipas një videoje të shpërndarë në rrjetet sociale nga koncerti.
“Dhe e këndoja me shumë shpresë, por e kam kënduar edhe gjatë viteve, kur kam qenë e trishtuar, e kam kënduar edhe kur kam qenë e lumtur. Por sot, e dini si e këndoj? E këndoj me forcë, sepse e vërteta është kjo: Nëse doje dashurinë time, do të duhej ta fitoje,” tha ajo, ndërsa publiku shpërtheu në duartrokitje.
Më tej, këngëtarja vazhdon me listën, e cila pas disa martesave të dështuara dhe divorcit më të fundit me Ben Affleck, është bërë goxha e gjatë.
“Do të duhej të më trajtoje siç duhet. Do të duhej të më respektoje. Do të duhej të më pranoje për gjithçka që jam. Do të duhej të më doje, nëse doje dashurinë time.”
Ajo e e di mirë se dashuria është “një gjë e ndërlikuar”.
“Nuk mund të kesh dashuri pa thyerje zemre,” u shpreh ajo. “Nuk mundesh. Kjo është ajo që ti merr përsipër.”
Pasi përfundoi monologun e gjatë mbi dashurinë, nuk hezitoi të bënte shaka edhe me divorcin nga Ben Affleck.
Gjatë mbylljes, pas shumë ndarjesh, ajo tha se ishte në rregull, madje pas çdo eksperience vazhdonte të mësonte e të rritej./mxh
Login
