Como regjistroi një fitore të rëndësishme 3-0 ndaj Pisës, në javën e 19-të në Serinë A.

Ndeshja e zhvilluar në “Arena Garibaldi” u zhbllokua në minutën e 68-të nga Perrone me një goditje me të majtën.

Avantazhi u dyfishua në minutën e 76-të nga Douvikas, i cili shënoi pas një kundërsulmi, i asistuar nga Rodriguez. Skuadra e Pisës pati mundësinë të rihapte sfidën me një penallti, por portieri Butez priti gjuajtjen e Nzola-s.

Në minutën e 96-të, Douvikas shënoi golin e tij të dytë personal nga pika e bardhë e penalltisë.

Kjo fitore e ngjit Comon në vendin e katërt me 33 pikë të grumbulluara, po aq sa Juventusi.

Situata problematike e reshjeve të shiut do të vijojë edhe në ditët në vijim.

Sipas Institutit të Gjeoshkencave, reshje intensive shiu priten deri paraditen e së enjtes.

Në qarqet Shkodër, Kukës, Dibër, Lezhë, Durrës, Elbasan, Vlorë dhe Gjirokastër mund të ketë vërshime të shpejta të lumenjve të vegjël malorë dhe rrëshkitje të dherave.

Në zonat urbane, në këto qarqe mund të shfaqen probleme me përmbytje të lokalizuara, në varësi të gjëndjes së kanalizimeve.

Me anë të një njoftimi, Instituti parashikon se sipas llogaritjeve hidrologjike të IGJEO-s, si rezultat i reshjeve me intensitet të lartë të rëna gjatë ditëve të kaluara, të cilat do të vazhdojnë deri ditën e enjte do të ketë rritje të rrezikshme të prurjeve dhe niveleve në lumenjtë Drin-Buna, Liqeni Shkodrës, lumi Mat, Shkumbin dhe Vjosë.

Sipas llogaritjeve hidrologjike, si rezultat i reshjeve me intensitet të lartë do të ketë rritje të rrezikshme të prurjeve dhe niveleve në lumenjtë e vendit, ku më problematikë situata do të paraqitet në lumenjtë Drin-Buna dhe Liqenin e Shkodrës.

Sipas IGJEO, të enjten temperaturat pësojnë ulje të ndjeshme dhe reshjet e shiut do të zëvendësohen me reshje dëbore.

Presidenti amerikan Donald Trump ka deklaruar se SHBA mund të ndërmarrë një tjetër operacion ushtarak në Venezuelë, nëse autoritetet atje reshtin së bashkëpunuari me SHBA-të.

Gjatë një interviste për NBC News, Trump tha se nuk beson që kjo të ndodhë dhe nga ana tjetër nuk hezitoi t’i thurte lavde ushtrisë amerikane për kapjen e Nicolas Maduros.

“Shtetet e Bashkuara e dëshmuan sërish që ne kemi ushtrinë më të fuqishme, më vdekjeprurëse, më të sofistikuar, më frikëndjellëse në planetin Tokë. Askush nuk mundet të na mundë. Askush nuk mund t’ia dilte asaj që bëmë ne. Askush tjetër nuk i ka armët tona” tha ai.

Planet për Venezuelën

Gjatë intervistës, Trump tha se para zgjedhjeve të rradhës në Venezuelë, amerikanët duhet ta rimëkëmbin shëndetin e këtij vendi.

“Në fillim na duhet ta rregullojmë vendin. Smund të ketë zgjedhje për momentin”, shprehet ai.

Sipas Trump, do të jenë një grup zyrtarësh amerikanë që do të përfshihen direkt në mbikqyrjen e punëve të Venezuelës.

Ndonëse  nuk e bëri të qartë mënyrën se si SHBA do ta administrojë Venezuelën, Sekretari i Shtetit Marco Rubio ka lënë të kuptohet që administrimi do të fillojë nga ekonomia dhe eksporti i naftës. E megjithatë, kur u pyet se kush do të jetë në krye të detyrës, Trump u përgjigj: “Unë“!

Sipas NBC, administrata Trump po vlerëson mbështetjen financiare  që duhet tu japë kompanive të naftës  për rindërtimin e infrastrukturën energjetike të vendit pas rënies së Nicolas Maduros.

Teksa numërimi i votave me postë dhe me kusht po vazhdon në Kosovë, sipas rezultateve të deritanishme ka ndryshuar ndarja e vendeve që partitë kanë fituar në zgjedhjet e parakohshme parlamentare të 28 dhjetorit.

Në bazë të votave të numëruara deri në orën 15:30 të 6 janarit, Lëvizja Vetëvendosje pritet të ketë 57 deputetë në legjislaturën e dhjetë të Kuvendit të Kosovës, që ka 120 vende.

Votat me postë dhe ato me kusht duket se ia kanë siguruar edhe një deputet LVV-së të Albin Kurtit, që i fitoi bindshëm zgjedhjet e parakohshme duke marrë mbi 50 për qind të votave.

Partia Demokratike e Kosovës e Bedri Hamzës, pritet të ketë 23 deputetë, aq sa siguroi me votat e rregullta.

Me rezultatet aktuale, Lidhja Demokratike e Kosovës e Lumir Abdixhikut duket se ka humbur një deputet, pasi parashihet që të ketë 14 deputetë, nga 15 sa kishte pas numërimit të votave të rregullta.

Aleanca për Ardhmërinë e Kosovës e Ramush Haradinajt mbetet në numrin e njëjtë të deputetëve, përkatësisht me gjashtë.

Ndërkaq, Lista Serbe, partia e serbëve të Kosovës që është e afërt me Beogradin, pritet të ketë nëntë nga dhjetë vendet e rezervuara për komunitetin serb.

Komisioni Qendror i Zgjedhjeve ka thënë se pret që të shpallë rezultatet përfundimtare më herët seç kishte planifikuar, përkatësisht para 19 janarit.

Pas përfundimit të numërimit të votave me kusht dhe postë, pritet të numërohen edhe ato të personave me nevoja të veçanta.

Në zgjedhjet e 28 dhjetorit morën pjesë rreth 45 për qind të gati 2 milionë qytetarëve me të drejtë vote./REL

Milani dhe portieri Mike Maignan, mund të rinovojnë kontratën mes tyre.

Gjatë kësaj jave pritet një takim mes drejtuesve të klubit dhe agjentit të portierit francez për të zyrtarizuar marrëveshjen e re.

Propozimi i Milanit përfshin një kontratë deri në vitin 2029, me një pagë që arrin në 7 milionë euro në vit së bashku me bonuset.

Kjo shifër e rendit atë si lojtarin më të paguar të skuadrës, krahas sulmuesit Rafael Leao. Ky hap synon të shmangë interesin e klubeve si Juventus, Chelsea dhe Manchester United për shërbimet e tij.

Situata ka ndryshuar ndjeshëm pas një periudhe tensioni në fillim të vitit 2025, kur negociatat ishin ndërprerë. Mbështetja e trajnerit Max Allegri dhe performancat e fundit të portierit kanë ndikuar në rikthimin e vullnetit për bashkëpunim.

Aktualisht, te drejtuesit e Milanit mbizotëron një optimizëm për arritjen e akordit.

Në dy muajt e fundit, nëntor-dhjetor, Ernest Muçi ishte kryefjalë në Turqi, me sulmuesin kuqezi që dhuroi paraqitje fantastike duke ndezur edhe një herë debatin në lidhje me të ardhmen e tij.

Klubi turk dëshiron ta mbajë në skuadër, por në fund të këtij sezoni janë të detyruar të paguajnë 10 milionë euro te Beshiktash për kartonin e tij, shifër të cilën e vlerësojnë të lartë, fakt që e pranoi edhe trajneri i Fatih Teke.

“Jemi në kontakt me disa ekipe, për lojtarët që interesohemi në merkato. Na pëlqen Muçi, por kërkojnë 10 milionë euro, kjo është një shifër e lartë, nuk mund të realizohet blerja e tij në këto kushte”, u shpreh trajneri i Trabzonspor.

Futbollisti i Kombëtares i ka kushtuar 1 milion euro për huazimin dhe deri tani e ka justifikuar këtë shpenzim me formën që ka treguar dhe golat e shënuar.

LEXO EDHE: VIDEO/ Për herë të dytë rradhazi! Goli i Muçit shpallet “Goli i Muajit” në Turqi

Edon Zhegrova shumë shpejt mund të mos jetë futbollisti i vetëm shqiptar te Juventus.

“Tuttosport” zbulon se bardhezinjtë interesohen për portierin e Kosovës, Aro Muric, i cili po shkëlqen në sezonin e tij të parë në Serie A, ku është i huazuar te Sassuolo.

27-vjeçari ka bërë deri tani një sezon fantastik, ku falë perfomancave të tij, ka fituar vëmendjen e Juventusit, por edhe ekipeve të tjera të njohura.

Duke parë pasigurinë e shfaqur vazhdimisht nga Michele Di Gregorio, Juventus ka hedhur sytë nga Aro Muriç. Deri tani nuk flitet për ofertë dhe shifra ekonomike, pasi jemi ende në fazat fillestare.

Kujtojmë se, kartonin e Muriç e kanë anglezët e Ipswich.

Zëdhënësja e Antikorrupsionit në Partinë Demokratike, Genta Vangjeli, ka dalë në një deklaratë për media, ku ka akuzuar qeverinë për shpërdorim masiv të fondeve publike përmes kontratave të klasifikuara të AKSHI-t.

Sipas saj, mungesa e parave për shtresat në nevojë, pensionistët, fermerët dhe sektorin e shëndetësisë lidhet drejtpërdrejt me klientelizmin dhe abuzimet në prokurime, duke kërkuar që SPAK të thellojë hetimet.

Deklarata e zëdhënëses së Antikorrupsionit në PD, Genta Vangjeli:

Nëse sot mungojnë paratë për ndihmën ekonomike, për barnat, për fermerët apo për pensionet, arsyeja është e thjeshtë: paratë e shtetit përfundojnë në duart e pushtetit.

Partia Demokratike ka kryer dhjetëra denoncime të lidhura drejtpërdrejt me AKSHI-n, ku është evidentuar qartë klientelizmi dhe abuzimi sistematik me prokurimet.

Për publikun dhe në vëmendje të SPAK, sot sjellim numrin e lartë të kontratave të klasifikuara që AKSHI ka lidhur me kohëzgjatje mbi 24 apo 36 muaj. Këto kontrata kanë nisur pas marrjes së detyrës si drejtuese e AKSHI-t nga Mirlinda Karçanaj.

Kontratat e klasifikuara, sipas ligjit, përjashtohen nga prokurimi publik vetëm kur kanë ndikim të veçantë në çështjet e mbrojtjes dhe sigurisë kombëtare.

Ndërsa kontratat e klasifikuara të AKSHI-t kanë si objekt shërbime sigurimi, ruajtjeje dhe, në pjesën dërrmuese të tyre, shpenzime për mirëmbajtjen e pajisjeve të zyrave.

Sipas të dhënave zyrtare të Spending data, nga viti 2016 e deri më sot, për 10 vite, shqiptarët kanë paguar plot 104 milionë euro për kontrata të tilla.

Pa asnjë njoftim publik, pa transparencë, pa publikuar të dhëna apo drafte kontratash dhe përmes kontraktimeve të mbyllura pa garë, rezulton se pagesat më të larta për kontrata të klasifikuara nga AKSHI kanë shkuar për:

ABS shpk, me pronar Gerond Meçe (aktualisht  kaluar në emër të nënës së tij), e cila ka përfituar 17 milionë euro, kryesisht për shpenzime mirëmbajtjeje të pajisjeve të zyrave.

FIRST shpk, me pronarë prestanome dhe shtetasin Gëzim Hoxha, ka përfituar 18.5 milionë euro, nga të cilat 3.5 milionë nga AKSHI dhe 15 milionë euro me një pagesë të vetme nga Autoriteti Kombëtar për Çertifikimin Elektronik dhe Sigurinë Kibernetike.

Infosoft Systems, me pronarë Armand Sharra dhe Bledar Dhima-12.6 milionë euro.

TBS 96 shpk, me pronar Artan Xhori-11.8 milionë euro.

AES Communication shpk, me pronar Jani Angjeli-6.7 milionë euro.

Soft Solution shpk, me pronar Ermal Beqiri-5 milionë euro.

IKUBINFO, me pronarë Romeo Sherko dhe Armand Sharra-3.8 milionë euro.

Alisa Albania, me pronarë vëllezërit Dulaku-2.1 milionë euro.

Image Communication Development, me pronar Igli Gjelishti-2 milionë euro.

Intech +, ish-pronar Ilir Beqaj, aktualisht Sokol Sinani-1.6 milionë euro.

Fastech shpk, me pronar Andis Papa-1.2 milionë euro.

Trezhnjeva shpk, me pronar Adem Trezhnjeva-1.2 milionë euro.

Partia Demokratike i kërkon SPAK-ut të finalizojë hetimet për AKSHI-n, duke marrë në konsideratë kontratat e kategorizuara si ‘të klasifikuara’, dhe hetimi të shkojë tek Edi Rama, si eprori i AKSHI-t dhe përgjegjësi kryesor për planifikimin dhe organizimin e këtyre skandaleve që kanë sjellë shpërdorimin e miliona eurove të shqiptarëve.

Shqiptarët kërkojnë drejtësi dhe ajo nuk mund të ekzistojë për sa kohë Edi Rama nuk i dorëzohet drejtësisë.

I ftuar në “Intervista e Ditës” në Fax News me Eliana Hoxhën, eksperti i marrëdhënieve ndërkombëtare dhe pjesë e Departamentit “Brain Gain” në Partinë Demokratike, Nikola Kedhi ka deklaruar se arrestimi i ish-presidentit të Venezuelës Nicolas Maduro nuk kishte të bënte me një akt lufte apo shkelje sovraniteti, por me ekzekutimin e një urdhri arresti ndërkombëtar ndaj atij që ai e quan, lider i kartelit “Los Soles”.

“Maduro nuk ishte një president legjitim i Venezuelës. Nuk janë vajtur forcat “Delta” të arrestojnë presidentin e një vendi tjetër. Kanë arrestuar liderin e kartelit ‘Los Soles’. Kishte një mandate arresti për këtë njeri dhe vajtën e ekzekutuan këtë mandat-arresti. Nuk është një president legjitim sepse ka humbur zgjedhjet, vitin e shkuar në Venezuelë, ku u faktua për të gjithë botën se i fitoi zgjedhjet kandidati i Opozitës së Bashkuar, Edmundo Gonzalez.”, u shpreh Kedhi.

Kedhi u ndal edhe te dokumenti i fundit i Kongresit Amerikan, i cili, ndër të tjera, i ka lënë një afat 90-ditor qeverisë në Shqipëri për të “rishikuar” në sërë sektorë të rëndësishëm të ekonomisë, tek të cilat ka dyshime për lidhje me para të pista dhe korrupsion, siç janë:

1. Teknologjia & AKSHI
2. Ndërtimi & pasuritë e paluajtshme, veçanërisht projektet luksoze.
3. Energjia – kompanitë shtetërore dhe koncesionet.
4. PPP-të, veçanërisht menaxhimi i mbetjeve dhe rrugët.
5. Bankat – për të shkëputur lidhjet me personat që do të sanksionohen.
6. Turizmi strategjik – projektet që kanë përfituar nga favorizimi politik.

“Shqipëria është një vend anëtar i NATO-s. Dhe në një vend anëtar të NATO-s, kemi shkuar përtej korrupsionit. Nuk bëhet më fjalë për korrupsion. Te korrupsioni dikush edhe mbyll sytë, ka prioritete të tjera, e kështu me rradhë. Ndërsa në Shqipëri është tejkaluar kjo gjë dhe është shkuar dhe më tutje, në cënimin e sigurisë kombëtare në Shqipëri dhe në cënimin e interesave amerikane. Përmend këtu rastin e AKSHI-t, rastin “McGonigal”, rasti i zv.kryeministres Balluku. Janë të gjithë këto elementë që kanë cënuar sigurinë kombëtare.

Nga ana tjetër, janë kartelet e drogës, krimi transnacional, korrupsioni në nivelet më të larta, krimi i organizuar, të cilat po ti shkojmë, e ngarkuara me punë e Ambasadës amerikane i përmend në çdo rast që gjen. Edhe në takimet që nuk kanë lidhje me çështjet e sigurisë ajo përmend kartelet e drogës, përmend krimin transnacional këtu, mbrojtjen politike që i bëhet… Me pak fjalë Shqipëria është aty ku ishte Venezuela 6 muaj ose 1 vit përpara ku kishte një presion nga administrata amerikane që, ata të luftonin kartelet e drogës”, tha ndër të tjera Nikola Kedhi.

“Po bëjnë të njëjtin presion edhe në Shqipëri. Duke marrë të gjitha këto bashkë, situata në Shqipëri është shumë delikate. Janë shkelur shumë vija të kuqe sa i përket çështjeve të sigurisë, karteleve… Janë disa raporte të Departamentit të Shtetit“, vijoi më tej eksperti i marrëdhënieve ndërkombëtare.

INTERVISTA E PLOTË:

Reshje të dendura shiu mëngjesin e 6 janarit kanë shkaktuar problematika të shumta në disa qarqe të vendit.

Mes tyre është edhe qarku Lezhë, që është përballur ditën e sotme me një sërë problematikash, kryesisht në lagjen “Besëlidhja” dhe pranë hyrjeve të shkollave, duke vështirësuar qarkullimin e këmbësorëve dhe automjeteve.

Ndërsa orët e fundit, prurjet e shumta të ujit kanë bërë që edhe lumi Drin të dalë nga shtrati në disa zona, duke rrezikuar përkeqësim të situatës.

Autoritetet lokale ndërkohë u kanë bërë thirrje qytetarëve, të shmangin lëvizjet e panevojshme.

LEXO EDHE: VIDEO/ Përmbytje edhe në Divjakë, dëme në toka bujqësore dhe sera

Ambasadori i Bashkimit Europian në Shqipëri, SIlvio Gonzato, është takuar me kreun e SPAK, Klodian Braho.

Përmes një postimi në rrjetet sociale, ambasada e BE në Tiranë deklaron nevojën për vazhdimin e “rezultateve të prekshme në luftën kundër krimit të organizuar dhe korrupsionit”.

Gjithashtu, ambasadori thekson se Bashkimi Evropian mbetet plotësisht i përkushtuar për të mbështetur SPAK-un, si një faktor kyç në integrimin europian të Shqipërisë.

“Takimi i parë me Kryetarin e ri të SPAK-ut, Klodjan Braho. E përgëzova për arritjet e SPAK-ut deri më sot dhe theksova rëndësinë e vazhdimit të rezultateve të prekshme në luftën kundër krimit të organizuar dhe korrupsionit, një element kyç për përparimin e Shqipërisë drejt anëtarësimit në Bashkimin Evropian. Forcimi i kapaciteteve hetimore dhe garantimi i standardeve të larta në hetime dhe ndjekje penale, janë vendimtare për konsolidimin e progresit dhe arritjen e rezultateve të qëndrueshme. Bashkimi Evropian mbetet plotësisht i përkushtuar për të mbështetur SPAK-un dhe sundimin e ligjit në Shqipëri,” Ambasadori i BE-së në Shqipëri, Silvio Gonzato.

LEXO EDHE: Nga Altin Dumani te Vladimir Mara/ Kreu i ri i SPAK firmos strukturën e re, ja rolet që do të kenë prokurorët

Reshjet e shiut shkaktuan përmbytje edhe në territoron e bashkisë Divjakë.

Gjatë paradites se kësaj të marte, uji vërshoi në sipërfaqjet e tokave bujqësore duke përmbytur dhjetëra hektarë tokë në fushë, por edhe në sera.

Sipas badhkisë Divjakë, përmbytjet erdhën si pasojë e mosfunksionimit te kanaleve kulluese, të cilat në disa segmente u bllokuan nga intensiteti i ujërave.

Situata emergjente nxori në terren punonjësit e bashkidë Divjakë të cilët hapën segmentet e bllokuara të kanaleve.

Sipas kreut te bashkisë divjakë, Josif Gorrea, tre hidrovorët po punojnë me kapacitet të plote duke ulur nivelin e ujërsve në zonat e përmbytura.

Momentalisht nuk ka banesa të përmbytura dhe rrugë të bllokuara ndërsa eskavatorët e bashkisë po punojnë për hapjen e kanaleve të bllokuara.

Gjithë puna është përqëndruar në pastrimin e kanaleve nga mbeturinat dhe bimësia e madhe.

Përmbytjet në Divjakë prekën katër fshatra, kryesisht në tokat bujqësore. Ndërkohë janë marrë masat për të garantuar furnizimin me energji elektrike.

Një mjek në Tiranë, është arrestuar këtë të martë, pasi dyshohet të ketë goditur kryeinfermierën e spitalit ku ai punon.

Sipas njoftimit të Policisë, pretendimi për goditjen vjen si pasojë e kundërshtimit nga ana e kryeinfermieres për zbatimin e një protokollit mjekësor.

Bëhet fjalë për mjekun Julian Habibaj, 53 vjeç.

“Specialistët për Hetimin e Krimeve të Komisariatit të Policisë Nr. 3 arrestuan shtetasin J. H., 53 vjeç, me detyrë mjek, pasi dyshohet se ka goditur kryeinfermiren në të njëjtin spital, me pretendimin se e ka kundërshtuar për të zbatuar një protokoll mjekësor“, njofton policia.

Mësohet se ndaj mjekut kishte 11 shkelje disiplinore për veprime të ndryshme brenda stafit, ndërsa kjo është hera e parë që është kallëzuar në polici.

Nje aksident rrugor me pasojë plagosjen e dy personave është regjistruar në hyrjen jugore të qytetit të Lushnjes.

Në ngjarje janë përfshirë një automjet tip “Benz” dhe një mjet tip kamionçinë.

Sipas të dhënave paraprake, aksidenti ka ndodhur si pasojë e mosrespektimit të rregullave të qarkullimit rrugor. Menjëherë pas njoftimit, shërbimet e Policisë kanë mbërritur në vendngjarje, ndërsa ambulancat kanë transportuar në spital dy drejtuesit e mjeteve të përfshira në përplasje.

Burime nga spitali bëjnë me dije se të plagosurit ndodhen jashtë rrezikut për jetën dhe po marrin ndihmën e nevojshme mjekësore.

Prej janari deri në dhjetor të vitit 2026, i gjithë vendi do të përfshihet në fushatën e rivlerësimit të pasurive të paluajtshme.

Ky proces do të bëhet përmes një norme tatimore prej 5%, ndryshe nga sa është aktualisht prej 15% nëse shitet prona.

Kjo është norma më e lartë tatimore e aplikuar ndonjëherë për këtë proces, që prej kur ka ndodhur rivlerësimi i parë, që është e njëjtë si për bizneset dhe për individët.

Si do të funksionojë?

Sipas parashikimeve ligjore, procesi i rivlerësimit mund të ndiqet përmes dy rrugëve.

Individët që planifikojnë ta nxjerrin pronën në treg gjatë periudhës 2026-2028 mund të zgjedhin rivlerësimin mbi bazën e vlerës reale të tregut, duke u mbështetur në një raport vlerësimi profesional, i cili përdoret më pas për aplikim pranë Agjencisë Shtetërore të Kadastrës. Kjo mundëson që prona të rivlerësohet me vlerën maksimale që ofron tregu.

Por, qytetarët mund të aplikojnë për rivlerësim sipas çmimeve të referencës shtetërore, përmes platformës e-Albania, pranë Agjencisë Shtetërore të Kadastrës.

Pas dorëzimit të aplikimit, lëshohet fatura për tatimin mbi diferencën e vlerës së pronës, e cila paguhet në bankë dhe më pas ngarkohet në sistem për përfundimin e procedurës. Në përfundim të procesit, pronari pajiset me kartelën e re të pronës, ku pasqyrohet vlera e përditësuar.

Në kuadër të fushatës së rivlerësimit, pritet që tregu i pasurive të paluajtshme gjatë vitit 2026 të karakterizohet nga një ritëm më i ngadaltë i rritjes së çmimeve, krahasuar me dy vitet e fundit. Parashikohet gjithashtu që oferta e pronave të jetë më e lartë, duke krijuar më shumë alternativa për qytetarët.

Vlerësohet se një numër i konsiderueshëm pronash, përfshirë banesa, do të jenë subjekt i rivlerësimit, ndërsa pjesëmarrja në këtë proces mbetet në vullnetin e individëve.

Fushata e vitit 2026 konsiderohet si një mundësi për të përfituar nga lehtësia fiskale, pasi pas përfundimit të saj pritet rikthimi i normës standarde të tatimit prej 15% për transaksionet e pasurive të paluajtshme.

Ndërkohë, kërkesat për rivlerësim të depozituara pranë Agjencisë Shtetërore të Kadastrës, të cilat nuk janë përpunuar deri më 31 dhjetor 2026, do të konsiderohen të vlefshme në kuadër të kësaj fushate, për sa kohë që pagesa e tatimit kryhet deri më 31 mars 2027.

Ministri i Drejtësisë, Besfort Lamallari ishte sot në Durrës për të parë nga afër situatën e krijuar në IEVP-në e këtij qyteti pas vërshimit të ujit prej reshjeve intensive të orëve të fundit.

Në një prononcim për publikun, ministri është shprehur se ka qenë në monitorim të situatës prej orëve të para të të ditës së sotme dhe janë marrë masat e nevojshme për normalizimin e gjendjes.

“Janë marrë të gjitha masat e nevojshme me stakimin e energjisë elektrike në katin e parë dhe evakuimin në katet më sipër. Në mbështetjen tonë kemi edhe pompat me kapacitet të lartë nga Ministria e Mbrojtjes për të larguar ujin”, tha  Lamallari duke shtuar se po funksionon ndërkohë edhe Komisioni i Emergjencave Civile në Durrës.

Ndërkohë, Drejtori i Përgjithshëm i Burgjeve, Klevis Qose tha se situata është nën ikontroll si dhe po kryhen furnizimet e nevojshme me mjete logjistike.