Polonia do të investojë mbi dy milionë euro për ndërtimin e një sistemi të ri anti-dron përgjatë kufirit të saj lindor. Sistemi i ri përforcues kundër dronëve do të përfundojë së ndërtuari brenda 2 viteve të ardhshme. Investimi vjen pas një serie shkeljesh të hapësirës ajrore së nga dronë që dyshohet se janë rusë. Vetëm në shtator, mbi dhjetë dronë të dyshuar rusë hynë hynë në hapësirën ajrore polake. Disa prej tyre u rrëzuan nga avionë të Polonisë dhe të NATO-s, ndërsa mbetjet shkaktuan dëme të shumta materiale.

Zëvendësministri i Mbrojtjes, Cezary Tomczyk, tha në një intervistë për The Guardian, se projekti do të integrojë teknologji të reja të mbrojtjes ajrore në fortifikimet ekzistuese kufitare të ndërtuara mbi 10 vjet më pare. Ai tha se aftësitë e para të mbrojtjes mund të jenë operative që brenda gjashtë muajsh. Sipas Tomczyk, sistemi do të përfshijë armë automatike, topa, raketa dhe pajisje për bllokimin e dronëve, disa prej të cilave do të përdoren vetëm në kushte ekstreme ose lufte.

Tomczyk bëri të ditur se pjesa më e madhe e financimit do të vijë nga burime evropiane përmes programit SAFE, me mbështetje shtesë nga buxheti shtetëror i Polonisë, duke paralajmëruar se Evropa përballet gjithnjë e më shumë me provokime dhe akte sabotimi.

Një 31-vjeçar në Elbasan ka rënë në prangat e Policisë për “shkelje të rregullave të qarkullimit rrugor”, me pasojë vdekjen.

Përmes një njoftimi, Policia bën të ditur se 31-vjeçari i arrestuar, teksa drejtonte automjetin, ka përplasur ditën e sotme në aksin rrugor “Qafë Thanë–Librazhd” një shtetase 64 vjeçare, këmbësore, e cila si pasojë ka humbur jetën.

Ndërkohë materialet procedurale do t’i referohen Prokurorisë për veprime të mëtejshme.

Njoftimi i Policisë:

DVP Elbasan/Specialistët e Qarkullimit Rrugor arrestuan në flagrancë shtetasin O. B., 31 vjeç, për veprën penale “Shkelja e rregullave të qarkullimit rrugor”, me pasojë vdekjen. Sot, rreth orës 13:30, në aksin rrugor “Qafë Thanë–Librazhd”, automjeti që ai drejtonte ka përplasur shtetasen F. H., 64 vjeçe, këmbësore, e cila si pasojë ka humbur jetën.

Materialet procedurale do t’i referohen Prokurorisë për veprime të mëtejshme.

Kryeministri në detyrë i Kosovës, Albin Kurti i ka bërë thirrje qytetarëve që të dalin dhe të votojnë, dhe mos ta lënë për në moment të fundit.

Me një video-mesazh në rrjetin e tij në Facebook, Kurti është shprehur se sa më e gjerë të jetë pjesëmarrja në zgjedhje, aq më i gjerë do të jetë legjitimiteti i institucioneve të ardhshme të vendit.

“Të dashur qytetarë,

Janë më pak se dy orë e gjysmë nga koha kur do të mbyllën vendvotimet. Sa më e gjerë pjesëmarrja në zgjedhje aq më i madh legjitimiteti i institucioneve të ardhshme të vendit. Sot është dita kur secili prej nesh mund të jemi përcaktues për katër vitet e ardhshme. Prandaj, dilni dhe votoni, ftoni të gjithë miqtë, familjarët të dalin e të votojnë dhe në këtë mënyrë të bëhen pjesë e demokracisë dhe vendimmarrës.

Dil dhe voto. Mos e le pa dalë. Mos e le për moment të fundit”, shkruan Kurti.

New York-u është përfshirë nga stuhia e fuqishme dimërore “Devin”, me reshjet më të mëdha të dëborës që regjistrohen në më shumë se tre vjet.

Udhëtimet ajrore kanë marrë një goditje të madhe, pasi mbi 1,500 fluturime janë anuluar deri të premten.

Guvernatorja e New York-ut, Kathy Hochul, shpalli gjendjen e jashtëzakonshme përpara stuhisë, ndërsa Shërbimi Kombëtar i Motit paralajmëroi për kushte të rrezikshme udhëtimi dhe reshje dëbore deri në 20 cm në disa zona.

Ndërkohë, moti i keq ka goditur edhe Kaliforninë Jugore. Tre ditë reshje të dendura shiu shkaktuan përmbytje dhe rrëshqitje dheu, duke detyruar banorët e vendpushimit malor Wrightwood të largojnë baltën dhe të vlerësojnë dëmet. Numri i të vdekurve nga moti i keq ka arritur në katër.

Shirat e rrëmbyer shoqëroheshin me erëra të forta që rrëzuan pemë dhe linja elektrike, duke përmbytur mbarë rajonin e Los Angelesit. Shtëpitë dhe automjetet në Wrightwood u mbuluan nga balta, ndërsa banorët vazhdojnë pastrimin dhe rikuperimin e dëmeve.

Aktorja legjendare franceze Brigitte Bardot ka ndërruar jetë në moshën 91-vjeçare, sipas një deklarate të fondacionit të saj.

Një simbol i rinisë rebele dhe bukurisë, Brigitte Bardot ndihmoi në hapjen e rrugës për revolucionin seksual në kinema me interpretimet e saj sensuale dhe të çliruara në filma si “Le Mépris” (Contempt) i Jean-Luc Godard-it. Më pas, në gjysmën e dytë të jetës së saj, ajo ndoqi një rrugë jo konvencionale si një mbrojtëse e zjarrtë e të drejtave të kafshëve.

“Fondacioni Brigitte Bardot i bën homazh kujtimit të një gruaje të jashtëzakonshme, e cila dha gjithçka dhe hoqi dorë nga gjithçka për një botë më respektuese ndaj kafshëve,” thuhet në deklaratë. “Trashëgimia e saj jeton përmes veprimeve dhe betejave që Fondacioni vazhdon me të njëjtin pasion dhe të njëjtën besnikëri ndaj idealeve të saj.”

E lindur në vitin 1934 në Paris, Bardot u rrit në një familje të begatë dhe tradicionale katolike, por shkëlqeu mjaftueshëm si balerinë saqë iu lejua të studionte balet, duke fituar një vend në Konservatorin prestigjioz të Parisit. Në të njëjtën kohë ajo gjeti punë si modele, duke u shfaqur në kopertinën e Elle në vitin 1950, ndërsa ishte ende 15 vjeç. Si rezultat i punës së saj si modele, asaj iu ofruan role filmash; në një audicion ajo takoi Vadim-in, me të cilin do të martohej në vitin 1952, pasi mbushi 18 vjeç.

E njohur në Francë thjesht me inicialet B.B., Bardot joshte publikun dhe “skandalizonte” autoritetet me shfaqjen e saj të drejtpërdrejtë të seksualitetit në vitet 1950 dhe ’60. Ajo u bë një fenomen i arkës së biletave në Shtetet e Bashkuara dhe ndihmoi në popullarizimin e filmave të huaj tek amerikanët, në një kohë kur censura në Hollivud ndalonte diskutimet e hapura për seksin, e aq më pak lakuriqësinë.

Duke përshkruar ndikimin e saj, revista Life shkruante në vitin 1961: “Kudo që vajzat ecin, ato vishen, i mbajnë flokët si Bardot dhe dëshirojnë të jenë shpirtra të lirë si ajo.”

Presidenti francez Emmanuel Macron i bëri homazh Bardot-it, duke thënë se ajo “mishëroi një jetë lirie”.

“Filmat e saj, zëri i saj, lavdia e saj verbuese, inicialet e saj, dhimbjet e saj, pasioni i saj bujar për kafshët, fytyra e saj që u bë Marianne (simboli i Republikës Franceze) — Brigitte Bardot mishëroi një jetë lirie,” shkroi Macron në platformën X.

“Ne vajtojmë një legjendë të shekullit,” shtoi ai.

Në Evropë, dhe veçanërisht në Shtetet e Bashkuara, armiqësia ndaj emigrantëvepo rritet. Në të njëjtën kohë, ekonomitë më të pasura të botës janë tepër të interesuara për punëtorë të huaj.  Por migrimi i fuqisë punëtore po bie në nivel global, edhe pse shoqëritë në plakje përballen me mungesë gjithnjë e më të madhe të fuqisë punëtore, sipas një raporti të Organizatës për Bashkëpunim Ekonomik dhe Zhvillim (OECD), që u publikua muajin e kaluar.

Trendi filloi shumë kohë para rizgjedhjes së Donald Trump, i cili gjatë fushatës së tij të suksesshme, sulmoi emigrantët. Sipas OECD-së, një organizatë që monitoron politikat globale ekonomike dhe sociale, migrimi i fuqisë punëtore në 38 vende anëtare ra me më shumë se një të pestën në vitin 2024.

Rënia i atribuohet më pak kërkesës sesa kundërshtimit politik në rritje ndaj imigracionit dhe rregulloreve më të rrepta të vizave në disa vende të industrializuara. Në të njëjtën kohë, migrimi i përkohshëm i fuqisë punëtore, në këto vende ka vazhduar të rritet.

Rënia e shkaktuar nga disa vende
“Pjesa më e madhe e rënies së migrimit të përhershëm të fuqisë punëtore mund t’i atribuohet ndryshimeve të politikave në Mbretërinë e Bashkuar dhe Zelandën e Re”, tha për DW Ana Damas de Matos, një analiste e lartë në OECD.

Në Zelandën e Re, rënia lidhet me përfundimin e një skeme të lejeqëndrimit pas pandemisë, e cila lejoi më shumë se 200,000 migrantë të përkohshëm dhe anëtarët e familjeve të tyre të vendoseshin përgjithmonë në vend. Programi më i madh i qëndrimit në vend skadoi në korrik 2022. Pas Brexit, Mbretëria e Bashkuar reformoi rregulloret e vizave për punonjësit e kujdesit shëndetësor, duke shtrënguar kriteret e pranueshmërisë dhe duke përjashtuar mundësinë e ardhjes së anëtarëve të familjes, gjë që çoi në një rënie të ndjeshme të aplikimeve për vizë.

Sipas OECD-së, sektori i kujdesit shëndetësor është veçanërisht i ndjeshëm ndaj mungesës së fuqisë punëtore për shkak të kufizimeve të tilla. Seeta Sharma, një eksperte e migracionit që ka punuar si këshilltare në Kombet e Bashkuara dhe në qeverinë e Indisë, beson se rregulloret më të rrepta për studentët e huaj në Mbretërinë e Bashkuar janë kundërproduktive.

“Rruga nga universiteti në punë tani është e kufizuar”, i thotë ajo DW. “Kjo do të çojë në një rënie të regjistrimeve. Shtetasit e Indisë, për shembull, nuk do të shpenzojnë më shuma të mëdha për arsim jashtë vendit nëse nuk kanë një rrugë të qartë karriere më pas.”

Raporti i OECD-së tregon se India, me 600.000 emigrantë vitin e kaluar, ishte padyshim vendi kryesor për sa i përket punëtorëve migrantë në vendet e OECD-së. Pas saj vijnë Kina dhe Rumania.

Sektori i teknologjisë vuan nga kufizimet e SHBA-së
Në SHBA, nën administratën e Biden, u vendosën kufizime më të rrepta për të ashtuquajturat viza H-1B. Ky është programi kryesor që u lejon ekspertëve të huaj të punojnë në këtë vend në fusha të tilla si teknologjia, inxhinieria dhe mjekësia. Ndërsa Trump ka rritur koston e vizave për punëdhënësit nga 2.000-5.000 dollarë në deri në 100.000 dollarë. Ai dëshiron të kufizojë mundësitë për qëndrim të përhershëm në të gjithë sektorët.

Në Australi, pragjet e pagave që duhet të përmbushin punëtorët e kualifikuar për të marrë një vizë janë rritur. Edhe në Kanada, rrugët e hyrjes për punëtorët e përkohshëm të huaj janë ndryshuar. Migrimi i lidhur me punën ka rënë ndjeshëm edhe në vendet nordike – vetëm Finlanda, për shembull, ka një rënie prej 36 përqind krahasuar me vitin e kaluar.

Në Gjermani, imigracioni i përhershëm ra me 12 përqind vitin e kaluar, për shkak të rregullave më të rrepta të imigracionit të futura nga ish-kancelari Olaf Scholz. Sipas këtyre rregullave, 586.000 punëtorë të huaj hynë në vend, por numri i njerëzve që hynë me viza pune ishte 32 përqind më i ulët se vitin e kaluar. Këto reforma nga qeveria e Scholz janë zgjeruar më tej nga kabineti aktual të kancelarit Friedrich Merz.

Herbert Briker, profesor i ekonomisë në Universitetin Humboldt të Berlinit, thotë se kjo po shkakton probleme për ekonominë gjermane. “Për shumë vite, Gjermania ka përfituar nga një migrim mesatar vjetor prej 550.000 personash”, tha Briker për DW. “Ne kemi nevojë për migrim për të zëvendësuar punëtorët që shkojnë në pension. Pa të, nuk mund të mbahet një furnizim i qëndrueshëm i punës.”

Kërkesë e lartë për punëtorë migrantë në Evropë
Në të gjithë Bashkimin Evropian, sipas Fondit Monetar Ndërkombëtar, qytetarët nga vendet jashtë BE-së mbushën rreth dy të tretat e vendeve të punës të krijuara midis viteve 2019 dhe 2023. Kjo tregon se sa i varur është bërë Bashkimi dhe Evropa në tërësi nga punëtorët migrantë.

Globalisht, Organizata Ndërkombëtare e Punës (ILO) vlerësoi se kishte 167.7 milion punëtorë migrantë në vitin 2022, që është 4.7 përqind e fuqisë punëtore totale globale. Më shumë se dy të tretat e tyre (114.7 milion) jetonin dhe punonin në vende me të ardhura të larta. Pavarësisht një rënieje në vitin 2024, migrimi global i fuqisë punëtore mbetet mbi nivelet para pandemisë.

Megjithatë, raporti i OECD tregon se si ky migrim mund të ndalet papritur. Arsyeja qëndron në rezistencën politike, të nxitur më shumë nga frika e migrimit të paligjshëm sesa nga kërkesa ekonomike ende rekord e lartë. Agjenda aktuale e Trumpit e ka intensifikuar më tej këtë dinamikë. Që nga marrja e detyrës në janar, ai ka lëshuar një sërë urdhrash ekzekutivë që synojnë të godasin si imigracionin e ligjshëm ashtu edhe atë të paligjshëm. Administrata e tij argumenton se masat janë të nevojshme për të mbrojtur punëtorët amerikanë dhe për të siguruar një sistem të bazuar vetëm në kualifikimet e punës.

Viza të përkohshme në vend të qëndrimit të përhershëm
Ndërsa numri i emigrantëve të përhershëm ra në vitin 2024, migrimi i përkohshëm ose sezonal i punës ka mbetur i njëjtë, sipas OECD-së. Kjo pasqyron një preferencë nga qeveritë për programe afatshkurtra që ato më pas mund t’i zgjerojnë ose kufizojnë sipas dëshirës.

Eksperti i migracionit Sharma e përshkruan atë me keqardhje: “Le t’i sjellim njerëzit kur kemi nevojë për ta dhe të mbyllim derën kur nuk kemi nevojë për ta – nuk duam asnjë prej tyre në vendin tonë përgjithmonë.”

Programet e punës së përkohshme sezonale mbeten të kërkuara në Australi, Evropë dhe Amerikën e Veriut – veçanërisht në bujqësi, sektorin e kujdesit dhe ndërtim. Por programet e migrimit të përkohshëm po përdoren ]gjithnjë e më shumë edhe për teknikët dhe punëtorët e tjerë shumë të kualifikuar, tregon analiza e OECD-së.

Burokracia i mban emigrantët në punë me kualifikim të ulët
Megjithatë, OECD u bën thirrje vendeve të industrializuara jo vetëm të tërheqin më shumë punëtorë emigrantë, por edhe të përqendrohen në integrimin e tyre më të mirë në tregun e punës. Klubi i vendeve të industrializuara përmend kurset e gjuhëve dhe aksesin në shërbimet sociale si parakushte kryesore për këtë, si dhe njohjen e aftësive dhe kualifikimeve në mënyrë që punëtorët e huaj të mund të kontribuojnë plotësisht në vendet pritëse. Ata shpesh punësohen në vende pune shumë më poshtë kualifikimeve dhe aftësive të tyre.

Kjo ndodh kryesisht për shkak të proceseve të ngadalta dhe burokratike për miratimin e diplomave dhe kualifikimeve, vëren profesor Briker, i cili gjithashtu hulumton fenomenet e migracionit në Institutin Gjerman për Kërkime të Punësimit (IAB)./DW

Një stuhi dimërore ka goditur Suedinë, duke marrë dy jetë njerëzish, e duke shkaktuar ndërprerje të udhëtimit dhe balck out-e masive.

Instituti vendas i Meteorologjisë dha alarmin për erëra të forta në pjesë të mëdha të vendit që po bën llogaritë me stuhinë Johannes.

Një burrë rreth të 50-ave vdiq pasi u godit nga një pemë në vendpushimin e skive Kungsberget në jug të vendit, raportuan mediat lokale dhe policia, ndërsa kompania rajonale e shërbimeve, Hemab, tha se një nga punonjësit e saj vdiq pas një aksidenti në një fushë”.

Dhjetëra mijëra shtëpi në Suedi, Norvegji dhe Finlandë kanë mbetur sakaq pa energji elektrike. Ndërprerjet e energjisë kanë prekur mbi 40 mijë shtëpi dhe shumë shërbime hekurudhore u anuluan, raportoi agjencia suedeze e lajmeve TT.

Po kështu, janë pezulluar edhe një sërë fluturimesh dhe shërbimet rrugore në disa rajone të Finlandës, ku 33 mijë banesa janë gjithashtu pa energji elektrike.

Skuadra e Torinos po përjeton moment të vështirë në Serie A. Edhe pse ata të shtunën shënuan të parët ndaj Cagliari me Vlasic, për javën e 17-të në kampionatin italinë, nuk ishin në gjendje të ruanin avantazhin, përkundrazi u përmbysën.

Një humbje që rëndon akoma më tepër situatën. Kritikat nga mediat vendase nuk kanë munguar kundër “Demave”. Mes të “kryqëzuarëve” ishte edhe mesfushori i Kombëtares Kristjan Asllani, i cili mori notën 5 nga “TuttomercatoWeb”.

Ja si e përshkruan media në fjalë performancën e shqiptarit ndaj Cagliarit: “Asnjë pasim vertikal i saktë dhe sidomos i ngathët në rikuperim. Duket shumë larg nga koha kur ishte regjizor premtues në Serie A”. Te Shqipëria, Asllani është i “paprekshëm” nën urdhërat e trajnerit Sylvinho, pavarësisht rritjes së ndjeshme nga Medon Berisha. Prej vitit 2023, 23-vjeçari kuqezi numëron 31 ndeshje që ka zhvilluar me Kombëtaren kuqezi.

Pas çmimeve për ilaçet kundër obezitetit dhe HIV-it vitet e fundit, këtë vit shkenca ndryshoi kurs. Njohja si arritja shkencore e vitit shkoi për tejkalimin global të lëndëve djegëse fosile nga burimet e rinovueshme.

Revista Science ka shpallur si “Breakthrough of the Year 2025” tejkalimin global të energjisë së rinovueshme mbi burimet fosile. Për herë të parë, energjia e gjeneruar nga dielli dhe era ka arritur të mbulojë rritjen e konsumit elektrik global gjatë gjashtë muajve të parë të vitit, duke dhënë më shumë energji sesa qymyri.

Kina udhëheq këtë tranzicion, si prodhuese kryesore e teknologjive kyçe si panelet diellore dhe bateritë. Megjithatë, vendi mbetet një nga emetuesit më të mëdhenj të CO2 në botë, një paradoks i shpjegueshëm me prodhimin e madh industrial dhe popullsinë e saj.

Por sfidat për t’u shkëputur nga karburantet fosile mbeten ende të mëdha si: rezistenca politike në disa vende, si SHBA, vështirësitë e riciklimit të paneleve dhe baterive, si dhe kapaciteti i kufizuar i rrjetit elektrik për të shpërndarë energjinë e prodhuar.

Sipas raportit Beyond Fossil Fuels, vetëm në Evropë rreth 1.700 GË energji e rinovueshme mbeten të bllokuara.

Viti 2025 tregon se një e ardhme energjetike e pastër është e mundur, por për ta arritur plotësisht duhet të investojmë në infrastrukturë, të kapërcejmë rezistencat politike dhe të përmirësojmë riciklimin e materialeve.

Serbia dhe strukturat e saj janë angazhuar maksimalisht për zgjedhjet e përgjithshme të Kosovës. Kreu i Inteligjencës Ushtarake Serbe ka paralajmëruar serbët e Kosovës pak para zgjedhjeve përmes grupeve në Telegram.

Raportohet se në rrjetet sociale dhe grupet që shumë serbë përdorin, është duke u shpërndarë një deklaratë e Zoran Stojkoviç.

Në mesazhin e tij ai thotë se nuk ka vend në shërbim për njerëzit që nuk e kanë në zemër Kosovën dhe “Metohinë”, dhe përmend marrjen e Kosovës nga ushtria serbe. Ekspertët në Kosovë besojnë se përmes këtyre presioneve po tentohet: Të rritet ndjenja nacionaliste te serbët e Kosovës. T’ju bëhet me dije se ata që sulmuan Banjskën janë të përgatitur nga shteti serb.

Të paralajmërohen se në zgjedhje veç Lista Serbe duhet të jetë opsion për ta. Të shënjohen si tradhtarë ata që nuk e bëjnë këtë gjë.

Institucionet e drejtësisë dhe sigurisë në Kosovë kanë intensifikuar përgatitjet për zgjedhjet e parakohshme te përgjithshme.

Zyra e Kryeprokurorit të Shtetit ka bërë të ditur se janë ndërmarrë të gjitha masat e nevojshme për të siguruar një proces zgjedhor të rregullt dhe për të mbrojtur vullnetin e lirë të qytetarëve.

Sipas njoftimit zyrtar, rreth 100 prokurorë të shtetit dhe zyrtarë të sistemit prokurorial do të jenë të angazhuar në të gjithë territorin e vendit gjatë ditës së zgjedhjeve dhe deri në përfundimin e plotë të procesit.

Prania e tyre ka për qëllim reagimin e menjëhershëm dhe trajtimin ligjor të çdo parregullsie apo dyshimi për keqpërdorim të votës. Prokurori i Shtetit ka apeluar për bashkëpunim të gjerë, duke ftuar qytetarët, subjektet politike, institucionet dhe organizatat e ndryshme që të raportojnë çdo rast të mundshëm manipulimi apo shkeljeje të ligjit zgjedhor, pa dallim se nga kush vjen.

Në anën tjetër, Policia e Kosovës ka bërë të ditur se është në zbatim të urdhrit operativ për zgjedhjet e parakohshme për Kuvendin e Republikës së Kosovës, i cili synon garantimin e rendit, sigurisë dhe mbarëvajtjes së procesit zgjedhor. Në këtë kuadër, në ambientet e Drejtorisë së Përgjithshme të Policisë janë zhvilluar dy takime koordinuese.

Takimi i parë u mbajt me drejtuesit rajonalë dhe drejtuesit e departamenteve policore, ndërsa në takimin pasues morën pjesë edhe përfaqësues të organeve të drejtësisë, Komisionit Qendror të Zgjedhjeve, si dhe institucione të tjera relevante, përfshirë ato ndërkombëtare.

Gjatë këtyre takimeve u diskutuan detajet e planifikimit operacional dhe masat e sigurisë, me theks të veçantë te koordinimi ndërinstitucional gjatë gjithë fazave të procesit zgjedhor. Drejtori i Përgjithshëm i Policisë së Kosovës, kolonel Gazmend Hoxha, prezantoi përgatitjet e deritanishme dhe angazhimin policor si gjatë fushatës, ashtu edhe në ditën e votimit.

Ai kërkoi nga strukturat qendrore dhe rajonale mbikëqyrje të shtuar dhe përkushtim maksimal, duke theksuar se policia duhet ta kryejë këtë detyrë me profesionalizëm të lartë, integritet dhe paanshmëri.

Policia e Kosovës ka ritheksuar se, në bashkëpunim me institucionet vendore dhe ndërkombëtare, mbetet e vendosur të zbatojë detyrat dhe përgjegjësitë e saj ligjore në mënyrë transparente dhe profesionale, me synimin për të garantuar ushtrimin e lirë, të sigurt dhe demokratik të së drejtës së votës për të gjithë qytetarët e Kosovës.

Presidentja e Republikës së Kosovës, Vjosa Osmani, ka ushtruar të drejtën e votës në kuadër të zgjedhjeve të jashtëzakonshme, duke e cilësuar procesin zgjedhor si një moment kyç për demokracinë dhe të ardhmen e vendit.

Pas votimit, Osmani shprehu shpresën që dita zgjedhore të zhvillohet në mënyrë të qetë, të rregullt dhe demokratike, me pjesëmarrje sa më të gjerë të qytetarëve. Ajo theksoi se zgjedhjet janë mekanizmi përmes të cilit vendimmarrja rikthehet tek qytetarët.

Presidentja u shpreh se pret që rezultatet e këtyre zgjedhjeve të mundësojnë formimin sa më të shpejtë të një parlamenti dhe qeverie të re, të domosdoshme për përballimin e proceseve të rëndësishme të brendshme dhe ndërkombëtare.

“Uroj që sot Republika jonë të ketë zgjedhje të qeta, të rregullta e demokratike. Uroj që të kemi zgjedhje me pjesëmarrje sa më masive të qytetarëve me të drejtë vote. Zgjedhjet janë një proces i rëndësishëm ku vendimmarrja kthehet tek qytetarët tanë. Shpresoj që në rezultatet e këtyre zgjedhjeve të rezultojnë me krijim sa më të shpejtë të parlamentit dhe zgjedhjes së qeverisë të Kosovës të cilat janë të domosdoshme për procese të rëndësishme dhe të brendshme dhe ndërkombëtare për Republikën tonë. Dua t’i falënderoj të gjitha institucionet që janë angazhuar dhe që angazhohen edhe gjatë ditës së sotme që ky proces zgjedhor të jetë sa i më rregullt nga KQZ-ja tek institucionet tona të sigurisë dhe ato të drejtësisë”, ka thënë Osmani.

Osmani falënderoi gjithashtu KQZ-në, institucionet e sigurisë dhe drejtësisë për angazhimin në garantimin e një procesi zgjedhor të rregullt.

Një zjarr masiv ka rënë dje në lagjen nr15 në Durrës, në parkun e autobusëve në sektorin “Rinia”, pranë “Eco Park”.

Në vijim të informacionit të dhënë ditën e djeshme, ku u dogjën 8 autobusë që ndodheshin jashtë funksionit, Policia bën me dije se referuan materialet në Prokurori si ngjarje aksidentale.

Kjo pasi nga veprimet e para hetimore dyshohet se zjarri është shkaktuar nga një shkëndijë elektrike në baterinë e njërit prej autobusëve.

Në një shkollë në Zhegër të Komunës së Gjilanit ka ndodhur një incident mes të disa qytetarëve që kanë qenë duke votuar.

Prokurori i shtetit ndodhet në vendin e ngjarjes, ndërsa mësohet se një votues ka shkuar me babanë për të ndihmuar dhe sipas po të njëjtave burime ka nisur një përplasje verbale me votues të tjerë me pyetjen “pse po e ndihmon”.

Prokurori do të vendosë nëse do ta iniciojë si rast apo jo. Në vendngjarje ka mbërritur edhe policia, të cilët kanë ndërhyrë në momentin kur ka pasur përplasje.

Situata në Vlorë prej tre ditësh vijon të mbetet e vështirë pasi dëmtimi i rëndë i një tubacioni në rrjetin e ujësjellësit ka lënë qytetin pa ujë për 3 ditë.

Prova e kryer nuk ka dhënë sukses ndaj synohet që të gjendet zgjidhje sot për të kthyer furnizimin me ujë.

Kreu i ujësjellësit Vlorë, Ermal Murati ka theksuar se prova e kryer një dite më parë nuk ka dhënë sukses ndërsa po vijohet të punohet teksa po bëhen përpjekje maksimale qe sot pasdite të ketë furnizim me ujë në qytet. Për institucionet e rëndësisë së veçante janë gjetur zgjidhje alternative

Tubacioni i dëmtuar është me diametër 1 mije mm, shumë i rëndësishëm për qytetin ndërsa është një investim që është kryer në vitin 2009-2010. Prej tre ditësh Vlora vijon të mbetet pa ujë, një situate mjaft problematike ne qytet.

Presidenti ukrainas Volodymyr Zelensky do të takohet sot me homologun e tij amerikan, Donald Trump në Florida për të paraqitur argumentet e Ukrainës dhe për të provuar që presidenti amerikan të nënshkruajë versionin e fundit të një plani paqeje që synon t’i japë fund luftës gati 4-vjeçare me Rusinë.

Presidenti ukrainas, i cili mbërrin në SHBA me propozimet e tij të fundit mbi çështjen e vështirë territoriale, nuk do të ketë “asgjë derisa unë ta miratoj atë”, tha presidenti amerikan për Politico të premten, duke përgatitur skenën.

Megjithatë, Donald Trump tha: “Mendoj se ai do të shkojë mirë me të. Mendoj se ai do të shkojë mirë me Putin”, me të cilin planifikon të takohet “së shpejti”.

Homologu i tij ukrainas shprehu shpresë të shtunën, gjatë një ndalese në Kanada, se takimi do të ishte “shumë konstruktiv” dhe kishte folur më parë me partnerët e tij europianë.

Këta të fundit e siguruan atë për “mbështetjen e tyre të plotë”, sipas kancelarit gjerman Friedrich Merz. Në Kanada, Zelensky siguroi ndihmë financiare prej 2.5 miliardë dollarësh kanadezë nga kryeministri kanadez Mark Carney.

Donald Trump do të presë Volodymyr Zelensky në orën 13:00 në Mar-a-Lago.

Rezidenca private në Palm Beach, ku republikani 79-vjeçar po kalon pushimet, është bërë një lloj shtojce e Shtëpisë së Bardhë. Ai pritet gjithashtu të mirëpresë kryeministrin izraelit Benjamin Netanyahu atje të hënën.

Takimi i mëparshëm midis udhëheqësve amerikanë dhe ukrainas, i mbajtur në tetor, kur Volodymyr Zelenskyy i kërkoi pa sukses bashkëbiseduesit të tij ta furnizonte me raketa Tomahawk, nuk ishte veçanërisht i ngrohtë.

Samiti i Floridës vjen pas prezantimit nga presidenti ukrainas të një versioni të ri të planit amerikan, i cili synon t’i japë fund luftës dhe u modifikua pas bisedimeve me Ukrainën, duke e bezdisur shumë Moskën.

Pas një versioni fillestar që pranoi shumë nga kërkesat e Rusisë, Kremlini beson se me këtë version të fundit, Kievi po kërkon të “shkatërrojë” negociatat.

Në prag të takimit në Florida, Moska dërgoi qindra dronë dhe dhjetëra raketa për të bombarduar Kievin dhe rajonin përreth kryeqytetit ukrainas, duke vrarë dy persona dhe duke lënë më shumë se një milion familje pa energji elektrike.

“Një sulm që tregon përgjigjen e Rusisë ndaj përpjekjeve tona për paqe”, tha Volodymyr Zelensky të shtunën.

Donald Trump nuk e fsheh më acarimin e tij për zgjatjen e negociatave. “Ai është shumë i zhgënjyer me të dyja kampet”, tha zëdhënësja e tij Caroline Leavitt më 11 dhjetor.

Më 19 dhjetor, presidenti amerikan i kishte bërë presion Ukrainës që të “lëvizë”.

A do ta bindë Volodymyr Zelensky atë të dërgojë një mesazh të tillë në Moskë, pasi versioni i tij i fundit duket i papranueshëm për rusët?

Dokumenti me 20 pika propozon një ngrirje të pozicioneve në front pa iu përgjigjur kërkesës ruse për tërheqjen e forcave ukrainase nga afërsisht 20% e rajonit lindor të Donjetskut që ata ende kontrollojnë.

Dhe teksti i ri nuk përfshin më asnjë detyrim ligjor për Ukrainën që të mos bashkohet me NATO-n, një tjetër kërkesë kyçe e Kremlinit.

Përveç fatit të Donbasit, rajonit të Ukrainës lindore të pretenduar nga Moska dhe termocentralit bërthamor Zaporizhia, i cili është i pushtuar nga trupat ruse, të dy udhëheqësit pritet të diskutojnë garancitë e sigurisë që Perëndimi mund të ofrojë si pjesë e një marrëveshjeje paqeje.

“Këto garanci sigurie duhet të vijnë në të njëjtën kohë me fundin e luftës”, këmbënguli dje Zelensky.

Presidenti amerikan kohët e fundit ka lënë të kuptohet se beson që Ukraina ka çdo interes për të ngrirë vijën e frontit sa më shpejt të jetë e mundur përballë asaj që ai e sheh si një përparim të pashmangshëm rus në terren. “Rusia ka avantazhin. Dhe gjithmonë e ka pasur”, tha ai më 8 dhjetor.

“Paqja duhet të ruajë “sovranitetin” dhe “integritetin territorial” të Ukrainës”, theksoi dje Presidentja e Komisionit Europian Ursula von der Leyen pas një bisede telefonike me Volodymyr Zelenskyn.

Në një intervistë me agjencinë e lajmeve Tass të transmetuar herët këtë mëngjes, Ministri i Jashtëm rus Sergei Lavrov tha se “Bashkimi Europian është bërë pengesa kryesore për paqen”.

Në terren, komanda ushtarake ukrainase foli për një “sulm masiv rus me raketahedhës të shumtë” gjatë natës në qytetin e Khersonit, duke thënë se zjarre kishin shpërthyer në infrastrukturë dhe disa zona banimi.

Nga Aurenc Bebja*, Francë – 28 Dhjetor 2025

Revista belge “Touring Club de Belgique” ka botuar, me 15 dhjetor 1933, në faqet n°381-384, letrën e rishkruar 4 shekuj më vonë nga Pjetër Budi për Dukën e Savojës, imagjinuar nga Dr. Stephan Ronart pas vizitës së tij në Shqipëri.

Turizmi në Shqipëri

Nga fundi i shekullit XVI, Imzot Pjetër Budi, ipeshkëv i Vlorës dhe njeri letrash me reputacion të lartë, i shkruante mikut të tij, dukës së Savojës :

« Shqipëria është një vend shumë pjellor, që prodhon gjithçka për të cilën njerëzit kanë nevojë për të jetuar të lumtur. Aty mbizotëron një klimë e butë dhe e shëndetshme, si askund tjetër, ndaj shumica e njerëzve arrijnë një moshë patriarkale. Ky vend është vërtet i mrekullueshëm, duke prodhuar frutat më të larmishme, verëra aromatike të pashoqe, ullinj dhe grurë. Lumenjtë e shumtë dhe liqenet e tij janë të pasura me peshq me shije të shkëlqyer. Me pak fjalë, kudo që të ndodhesh në këtë krahinë të lumtur, qoftë në plazhet ranore të detit apo në male, gjithandej do të besoje se ndodhesh në parajsën tokësore ! »

Po të jetonte sot Imzot Pjetër Budi, ai nuk do ta shprehte ndryshe mendimin e tij, por do t’i shtonte përafërsisht edhe këtë :

« Shqipëria është një vend që nuk rrethohet me një mur kinez formalitetesh të vogla policore apo fiskale ; hyrja në të është e lehtë dhe e përshtatshme. Ajo i trajton vizitorët e saj si mysafirë të çmuar, si miq të përkëdhelur, krenare për mikpritjen e saj të vjetër e të famshme. Ajo ruhet mirë të mos i profanojë bukuritë e natyrës së saj madhështore me tabela reklamash të rreshtuara përgjatë rrugëve, as të pengojë hyrjen e lirë në kështjellat e saj të lashta, në manastiret piktoreske, në kishat e vjetra dhe në xhamitë e saj të hijshme me vendosjen e sporteleve për shitjen e biletave të hyrjes. Shqipëria është një vend që, në një zhvillim të shpejtë, e ka kapërcyer epokën e hekurudhave, por që, në këmbim, ka ndërtuar një sistem të plotë rrugor, i cili mundëson të arrihen me autobus, me një kosto të ulët, edhe cepat më të largët ; ndërsa në mënyrë luksoze, sipas shijes dhe xhepit të secilit, mund të bëhen ekskursione me automjete me qira shumë komode.

Shqipëria, do të shtonte më tej Imzot Budi, mund të përshkohet nga një skaj në tjetrin në siguri të plotë, të eksplorohet në luginat e saj të egra, në pyjet e saj madhështore e të vetmuara, në humnerat e thella, në majat e heshtura, për javë të tëra, më këmbë ose mbi shpinën e atyre kuajve të vegjël malorë me hap të pagabueshëm, pa u mërzitur kurrë, pa reshtur së gjeturi, çdo ditë e çdo orë, surpriza të reja në gjirin e një natyre të pashtershme në pasuri dhe bukuri piktoreske. Livadhet alpine jehojnë nga këngët e barinjve dhe meloditë melankolike të fyellit ; shekujt mezi e kanë ndryshuar atmosferën e fshatrave që nga koha e Virgjilit; zakonet, festat dhe veshjet e malësorëve kanë ruajtur tërheqjen dhe hijeshinë që kishin qysh në mesjetë, madje edhe në epokën klasike.

Gjuetia aty është pasionante ; gjahu — derr i egër, shqiponjë, dre, pelikan, çafkë — është i bollshëm. Alpinist, do të ngjitni maja të paprekura ; piktor, do të zbuloni, me një kënaqësi që përtërihet vazhdimisht, ngjyra dhe motive me një origjinalitet tërheqës ; dashamirës i gjërave të lashta ose të çuditshme, do të gjeni punime druri të gdhendura, qëndisma, monedha, gurë të skalitur, armë dhe sende zbukurimi, që do të pasurojnë koleksionet tuaja. »

Pjetër Budi do të thoshte edhe:

« Shqipëria ju fton ; merrni mëngjesin tuaj të parë në Romë ose në Athinë ; ngjituni në avion dhe drekën do ta gjeni në kryeqytetin tonë, Tiranë. Qëndroni tek ne, sipas dëshirës tuaj, ditë, javë, muaj — nuk do të njihni mërzinë. Do të vizitoni Tiranën, qytetin në lindje me sheshet e saj të mbushura me lule, bulevardet e gjera dhe të pastra, rezidencën e oborrit mbretëror, selinë e misioneve të huaja, qendrën e jetës së shoqërisë dhe intelektuale, që ka ditur të ruajë, megjithatë, në lëvizjen e jetës moderne, në pazarin dhe lagjen e saj të vjetër, hijeshinë plot ngjyra të një epoke tjetër ; Shkodrën, kryeqytetin e Mbretërisë së lashtë Ilire, në këmbë të fortesës së saj Rozafat, që ka parë të luftojnë rreth saj ilirë, romakë, sllavë, venecianë, turq, deri te ushtritë e Luftës së Madhe ; do të admironi piktoreskun me të cilin qyteti lejon rrugicat e ndërlikuara të pazarit të tij të shumëngjyrshëm të lahen në ujërat blu të liqenit të tij. Nga këtu, do të filloni ekskursione në Alpet shqiptare, në Mirditë, rajoni më piktoresk i vendit, ndoshta madje edhe i Europës, atdheu i Mirditorëve, që kanë ruajtur brenda maleve të tyre, me guximin dhe mikpritjen e tyre të njohur, jo vetëm kostumin e pasur kombëtar, por edhe folklorin, zakonet dhe traditat popullore, përveç njërit, që ka shuar përpjekjet e qeverisë : gjakmarrja, dhe kjo padyshim nuk është për t’u vajtuar. Kruja, Albanopolisi i Ptolemeut, fortesa e pathyeshme e Skënderbeut, mbrojtës heroik i krishterimit kundër pushtuesve myslimanë, e ngjitur në muret vertikale të shkëmbit gri, është muzeu i gjallë, pothuajse i pandryshuar, i një Shqipërie mesjetare, që bie në kontrast të veçantë me telefonin dhe makinat e shkrimit të vendosura në bashkinë e saj. Durrësi, Epidamni i Grekëve, Dyrrahu i Romakëve — kudo në vend, do të prekni kujtime klasike — bashkon në mënyrë kurioze molet e tij moderne, portikët, ndërtimet detare, dyqanet dhe magazinat me kështjellat dhe kullat, bastionet, mbetjet e mureve të rrethimit, që Bizantinët, Venecianët dhe Turqit i kanë fortifikuar njëri pas tjetrit.

Doni të vizitoni edhe qytetet e tjera ? Të gjithë ofrojnë magji të ndryshme ; secili ka veçantinë e tij, shenjat karakteristike. Ata janë : Elbasani, i fshehur mes ullinjve me gjethe të shndritshme, të gjelbër-argjendtë, dhe me kopshtet që buzëqeshin, i pasur me shtëpi jashtëzakonisht piktoreske, me dekorime të brendshme të pikturuara dhe të gdhendura hollësisht ; Llixha, me shtatëdhjetë burime sulfurore dhe radioaktive, që po përgatitet të bëhet një stacion balnear me famë botërore ; Berati, qyteti me dritare të panumërta, që ngjitet mbi muret pothuajse vertikale të një gryke gëlqerore, me bukurinë e malësisë së egër, me emrin e pagëzuar “Pulcheriopolis” nga themeluesi i tij Teodosi i Ri ; Korça, qytet tregtar dhe qendër intelektuale, ku do t’ju flasin për Bostonin dhe New York-un, po aq familjarisht sa për Tiranën ose Durrësin ; në fakt, pothuajse çdo familje dërgon djemtë e saj për një qëndrim disa vjeçar. Doni të flas për Pogradecin, për liqenin e Ohrit dhe ujërat e tij të mrekullueshëm, të pastër dhe me nuanca magjike blu ; për folezat e rrugicave të ngushta dhe të pabarabarta, me shtëpi të pikturuara bardh e kaltër, të Gjirokastrës ; për Vlorën, Sarandën, Tepelenën ; për Voskopojën, që jeton mes rrënojave dhe mbetjeve të një qyteti që dikur kishte më shumë se 60.000 banorë, një bibliotekë të rëndësishme dhe një atelier tipografike me famë ; për Pojanin dhe gërmimet e Apolonisë ; për Butrintin, themeluar nga bijtë e Priamit pas shkatërrimit të Trojës, qytet i lulëzuar në kohën e Grekëve dhe Romakëve, dhe të cilin mbetjet e tij, teatri antik, termat, statujat greko-romake, i bëjnë të mahniten jo vetëm arkeologët, por të gjithë ata që dinë të vlerësojnë pastërtinë e linjave klasike.

Doni që t’ju zbuloj edhe pasuritë e tjera artistike dhe natyrore të një vendi kaq afër tuaj dhe kaq të panjohur, të injoruar dhe të neglizhuar ? Jo, nuk do ta bëj, sepse po ju shoh duke marrë tabelën e linjave detare, që ndjekin bregdetet e Dalmacisë dhe Greqisë, që nisen nga portet italiane dhe jugosllave dhe që, të gjitha, ndalojnë në Durrës, Vlorë, Sarandë ; sepse po ju shoh të konsultoni hartat rrugore dhe të studioni rrugët që përshkojnë Shqipërinë duke e lidhur me Greqinë dhe Jugosllavinë, të gjitha të mira, të mirëmbajtura, të gjitha piktoreske ; sepse po ju shoh të hezitoni midis trimotorit të linjës Romë – Tiranë – Selanik dhe hidroplanit Triestë – Durrës !

Konsultohuni, mendoni, zgjidhni. Merrni anijen, avionin ose makinën, por sigurohuni, cilado qoftë zgjedhja juaj, se Shqipëria do t’ju magjepsë, siç ka magjepsur çdo vizitor, kjo Shqipëri kaq e bukur, kaq mikpritëse… dhe kaq pak e njohur ! »

Kështu, me shumë mundësi, do të kishte vazhduar letra e Imzot Pjetër Budit drejtuar dukës së Savojës, nëse do ta kishte rifilluar sot.

Dr. Stephan Ronart

https://www.darsiani.com/la-gazette/dr-stephan-ronart-1933-ja-si-pjeter-budi-do-ta-rishkruante-letren-e-tij-derguar-4-shekuj-me-pare-dukes-se-savojes-per-turizmin-aktual-ne-shqiperi/

Kandidati i Lëvizjes Vetëvendosje për kryeministër të Kosovës, Albin Kurti, votoi në Prishtinë rreth orës 9:40.

“Shpresoj që pjesëmarrja të jetë masive”, tha Kurti para gazetarëve.

Sipas tij, sa më e lartë të jetë pjesëmarrja, aq më e mirë do të jetë cilësia e zgjedhjeve dhe legjitimiteti i institucioneve që do të dalin prej tyre.

“Porsa votova këtu në Fakultetin Ekonomik për legjislaturën e 10-të të Kosovës. Sot është një ditë e bukur dhe e rëndësishme, andaj ftoj qytetarët që ta ushtrojnë të drejtën e tyre për përbërjen e Kuvendit të ardhshëm”, u shpreh Kurti.

Ai gjithashtu shprehu shpresën që institucionet e reja të formohen sa më shpejt.

“Uroj dhe besoj që të punojmë që legjislatura e 10-të ta konstituojë sa më shpejt Kuvendin e ardhshëm dhe njëkohësisht të formojë qeverinë e re”, tha ai.

Kryeministri Edi Rama ka komentuar për herë të parë hetimin e SPAK ndaj AKSHI-t që ka përfshirë dhe drejtuesen Mirlinda Karçanaj teksa foli për raportin e Bankës Botërore lidhur me transformimin digjital të sektorit publik.

Rama tha se Shqipëria sot ka bërë një progres të madh duke u renditur në raportin e fundit në vendin e 14-të krahasuar me vitin 2022 kur ndodhej në vendin e 64 dhe këtë rezultat ai ia atribuon punës së AKSHI-t dhe drejtoreshës Mirlinda Karçanaj, e cila e drejton këtë institucion prej 12 vitesh. Kryeministri u shpreh se akuza për Karçanajn janë të hatashme dhe se vetëm drejtësia do të zbulojë të vërtetën.

“Banka Botërore ka publikuar GovTech Maturity Index 2025, ose e thënë shqip, raportin që njëherë në 2-3 vite vlerëson 197 vende të botës për nivelin e transformimit digjital të sektorit publik. E di që sot AKSHI përballet me një hetim nga SPAKU për përdorimin e fondeve dhe Linda Karçanaj, gruaja që ka udhëhequr jeësimin e vizionit tonë qeverisës, për transformimin historik digjital te qeverisjes se Shqipërisë, me dije, vullnet e përkushtim të përditshëm për 12 vjet me radhë, gjendet nën një mase sigurie me një akuze te hatashme, për te cilën duhet pritur me durim vetëm nga drejtësia, e s’mund të pritet asgjë nga 700 tenxheret e çorbës politike mediatike, që të dalë dalja deri në fund e vërteta e saj cilado qoftë ajo.

Por unë di po ashtu, që falë saj dhe skuadrës së AKSHI-it, ku punojnë pa orar plot vajza e djem të talentuar të botës së re të teknologjisë, Shqipëria ka bërë një kapërcim të madh, krahasuar me vitin 2022 kur ka dalë raporti paraardhës i Bankës Botërore për qeverisjen digjitale. 

Këtë herë, jo vetëm vijojmë të renditemi në Grupin A – i quajtur grupi me Maturitet të Lartë, ku kemi 0.939 pikë nga 1 që është maksimumi, por falë një rritjeje të ndjeshme, krahasuar me raportin paraardhës, ku kishim 0.752, këtë vit kemi kaluar nga vendi i 68-të në vendin e 14-të, mes gjithë atyre vendeve, duke lënë pas pikërisht falë punës e vullnetit për ta vënë teknologjinë e re në shërbim të publikut dhe të zhvillimit të Shqipërisë, vende me emër të madh, si Danimarka, Singapori apo Mbretëria e Bashkuar, e me radhë. 

Ky është një raport objektiv dhe profesional, i cili vlerëson katër fusha kryesore, që mbulojnë sistemet bazë qeveritare, shërbimet publike online, angazhimin digjital të qytetarëve dhe faktorët mundësues institucionale e ligjorë, dhe pa diskutim nuk justifikon absolutisht asnjë shkelje të ligjit që pretendohet se ka ndodhur në aktivitetin e AKSH-it, gjë që mund të na e thotë vetëm procesi gjyqesor, por nga ana tjetër e gjithë zhurma histerike e 700 tenxhereve të çorbës politike mediatike, nuk e zhbën dot rezultatin fantastik të Shqipërisë, në këtë fushë të veprimtarisë së AKSHI-t, që mund ta verifikoni lehtësisht përmes linkut të raportit.”, tha Rama.

Kryetari i Komisionit Qendror të Zgjedhjeve, Kreshnik Radoniqi pasi ka hedhur votën e tij sot në Pejë për zgjedhjet u ka bërë apel qytetarëve që të shfrytëzojnë të drejtën e votës dhe t’i zgjedhin përfaqësuesit e tyre.

Valmir Elezi ka mbajtur konferencë për media për të treguar rreth asaj se si ka nisur procesi i votimit në Zgjedhjet e Jashtëzakonshme Parlamentare.

Ai bëri të ditur se gjithçka ka nisur me kohë në të gjitha qendrat e votimit, ndërsa shifrat e para se sa kanë votuar nga ora 07:00 deri në ora 09:00, do të nisin të shfaqen pas orës 09:00, duke vazhduar më tej me përditësime.

“Materialin zgjedhor është shpërndarë me kohë në të gjitha qendrat e vendvotimit. Procesi i votimit ka nisur me kohë në të gjitha qendra, 2614 vendvotime, prej te cilave 914 janë qendra kryesore, 38 qendra (nga një për çdo komunë) për të mundësuar votimin me kusht”, tha Elezi.