Presidenti ukrainas, Volodymyr Zelensky, ka deklaruar se “takimi i parë trepalësh” mes Ukrainës, Rusisë dhe Shteteve të Bashkuara pritet të mbahet nesër, duke shënuar një zhvillim të rëndësishëm diplomatik në përpjekjet për dialog lidhur me luftën në Ukrainë.

Duke iu përgjigjur një pyetjeje gjatë Forumit Ekonomik Botëror në Davos, presidenti ukrainas tha se, sipas informacioneve që ai ka në dispozicion, takimi i parë mes tre palëve do të zhvillohet nesër dhe do të vazhdojë edhe ditën pasuese.

Ai theksoi se ky format trepalësh përfaqëson një hap të ri në komunikimin ndërkombëtar lidhur me konfliktin, megjithëse ende nuk janë bërë publike detaje konkrete mbi agjendën e bisedimeve.

Sipas Zelenskyt, takimi do të mbahet në Emiratet e Bashkuara Arabe. Megjithatë, ai la të kuptohet se iniciativa për këtë takim ka ardhur papritur nga Uashingtoni dhe se pala ukrainase nuk ka qenë plotësisht e përfshirë paraprakisht në përgatitjen e tij.

“Shpresoj që Emiratet ta dinë për këtë. Po. Ndonjëherë kemi surpriza të tilla nga pala jonë amerikane”, tha me një ton ironik, lideri ukrainas duke sugjeruar se koordinimi diplomatik nuk ka qenë i plotë.

Ndryshe, një takim i drejtpërdrejtë trepalësh mes Ukrainës, Rusisë dhe SHBA-së do të përbënte një moment të rrallë dhe potencialisht vendimtar në përpjekjet për të ulur tensionet dhe për të eksploruar mundësi për zgjidhje politike të konfliktit që ka tronditur Evropën dhe rendin ndërkombëtar.

Sinjali – aty ku e vërteta flet para lajmit!

/GazetaSinjali/

The post Zelensky deklaron se nesër do të mbahet “takimi i parë trepalësh” mes Ukrainës, Rusisë dhe SHBA-së appeared first on Sinjali.

Rodri është një figurë kryesore për Manchester Cityn dhe ekipin kombëtar spanjoll, e që kontrata e tij është e vlefshme deri në vitin 2027, megjithëse City i ka paraqitur tashmë një propozim për ta zgjatur atë deri në vitin 2029.

Për momentin, ai nuk ka nënshkruar ende dhe këtu hyn në lojë Real Madridi.

Rodri ka qenë në radarin e klubit mbretëror për një kohë të gjatë. Hierarkia e Real Madridit po kërkon një mesfushor mbrojtës për sezonin e ardhshëm dhe Rodri është në listë, jo një i kohëve të fundit, por një i hershëm.

Emri i tij është lidhur me një transferim te Real Madrid për disa kohë, megjithëse klubi duket se e ka përjashtuar atë pas dëmtimit të tij të rëndë.

Megjithatë, nuk është kështu. Sipas mediave spanjolle, Real Madridi nuk e ka humbur nga sytë mesfushorin e kombëtares La Roja.

Ata po e monitorojnë nga afër gjendjen e tij fizike pas dëmtimit që e mbajti jashtë fushave për një vit dhe po e vëzhgojnë nga afër në rast se një transferim bëhet i mundur këtë verë.

Objektivi kryesor i Real Madridit mbetet mesfushori i PSG-së, Vitinha, por klubi është i vetëdijshëm se sa e vështirë do të jetë ta largojnë portugezin nga Parisi. Nëse kjo rezulton e pamundur, Rodri shfaqet si një alternativë.

Klubi gjithashtu e di se nuk do të jetë e lehtë të marrë Rodrin nga City, por, si pjesa më e madhe e Evropës, ata po presin të shohin se çfarë do të ndodhë me të ardhmen e Pep Guardiolës.

Nëse trajneri katalunas largohet, mund të pasojë një largim i mundshëm, dhe Rodri mund të përfundojë te Real Madrid. 

Sinjali – aty ku e vërteta flet para lajmit!

/GazetaSinjali/

The post Real Madridi vazhdon të monitorojë yllin e Manchester Cityt appeared first on Sinjali.

Presidentja e Republikës së Kosovës, Vjosa Osmani, ka firmosur sot në Davos Kartën e Bordit të Paqes, duke i siguruar Kosovës statusin e anëtarit themelues, të barabartë dhe me të drejta të plota në këtë organizatë ndërkombëtare, përkrah Shteteve të Bashkuara të Amerikës.

Përmes një postim në Facebook, Osmani ka theksuar rëndësinë e rolit udhëheqës të SHBA-së në garantimin e paqes globale, duke e cilësuar këtë hap si moment historik për Kosovën.

“Kur Amerika udhëheq, paqja është gjithmonë më e sigurt”, ka shkruar Osmani.

Ajo ka bërë të ditur se anëtarësimi në organizata ndërkombëtare të paqes të udhëhequra nga aleati strategjik i Kosovës forcon sovranitetin dhe pozitën ndërkombëtare të vendit.

“Anëtarësimi në organizata ndërkombëtare të paqes e që udhëhiqen nga aleati ynë strategjik, fuqizon sovranitetin tonë, pozicionin tonë ndërkombëtar, si dhe është në interesin më të lartë të Republikës së Kosovës”, ka theksuar presidentja.

Sipas Osmanit, marrëveshja do t’i dërgohet Kuvendit të Kosovës për ratifikim, në përputhje me Kushtetutën, për të marrë miratimin përfundimtar të përfaqësuesve të popullit.

“Kjo marrëveshje historike do t’i dërgohet Kuvendit të Kosovës për ratifikim, në përputhje me kushtetutën e Kosovës”, ka shtuar ajo.

Presidentja e Kosovës ka falënderuar gjithashtu Presidentin e Shteteve të Bashkuara për ftesën dhe lidershipin e tij në këtë proces.

“Faleminderit Presidentit Trump për lidershipin e tij dhe për ftesën që ta përfaqësoj Republikën e Kosovës në këtë moment historik”, ka shkruar Osmani.

Në përmbyllje, ajo ka ritheksuar angazhimin e Kosovës për paqen.

“Kosova do të jetë në shërbim të paqes, sot e përherë”, ka përfunduar presidentja.

Sinjali – aty ku e vërteta flet para lajmit!

/GazetaSinjali/

The post Osmani: Kosova nënshkruan Kartën e Bordit të Paqes, marrëveshja do të dërgohet në Kuvend për ratifikim appeared first on Sinjali.

Presidentja e Republikës së Kosovës, Vjosa Osmani, ka theksuar rëndësinë e marrëdhënieve të ngushta dhe strategjike mes Kosovës dhe Shtetetve të Bashkuara të Amerikës.

Ajo ka postuar në rrjetin social Facebook, një fotografi me presidentin amerikan, Donald Trump.

Në përshkrim, ajo shkruan se “Sepse aleanca me Amerikën është rruga e vetme”.

Kosova është në mesin e mbi 30 vendeve që kanë pranuar të jenë pjesë e  Bordit të Paqes për Gazën.

Sinjali – aty ku e vërteta flet para lajmit!

/GazetaSinjali/

The post Osmani: Sepse aleanca me Amerikën është rruga e vetme appeared first on Sinjali.

Policia e Tiranës ka finalizuar operacionin policor të koduar “Netëork”, duke goditur tre raste të ushtrimit të prostitucionit në apartamente me qira, të ndodhura në rrugët “Ibrahim Rugova”, “Hoxha Tahsim” dhe “Myslym Shyri”. Si rezultat i këtij operacioni, u arrestuan 3 shtetase kolumbiane dhe 1 shtetas spanjoll, ndërsa 2 shtetase shqiptare u proceduan penalisht.

Sipas policisë, shtetaset kolumbiane M. L., 21 vjeçe, V. Y., 25 vjeçe dhe L. D., 35 vjeçe dyshohet se ushtronin prostitucion në një apartament të marrë me qira në rrugën “Ibrahim Rugova”. Ndërkohë, në pranga u vu edhe shtetasi spanjoll J. D., 26 vjeç, i cili dyshohet se shfrytëzonte këto shtetase për këtë veprimtari kriminale, shkruan A2 CNN.

Gjithashtu, materialet u referuan në Prokurori dhe nisi procedimi penal për shtetaset shqiptare V. O., 34 vjeçe dhe S. Sh., 24 vjeçe, të cilat ushtronin prostitucion në dy apartamente të tjera, përkatësisht në rrugët “Hoxha Tahsim” dhe “Myslym Shyri”.

Gjatë operacionit u sekuestruan shuma parash të dyshuara të përfituara nga prostitucioni, si dhe disa aparate celularë. Policia bën me dije se, në drejtimin e Prokurorisë, vijojnë hetimet për identifikimin e personave të tjerë të përfshirë në këtë veprimtari kriminale.

Sinjali – aty ku e vërteta flet para lajmit!

/GazetaSinjali/

The post Operacioni në Tiranë: Arrestohen 3 kolumbiane për prostitucion, 2 shqiptare nën hetim appeared first on Sinjali.

Dy banorët e Big Brother VIP Kosova, Dolce dhe Limit, kanë folur së fundmi për festën e mbrëmshme të organizuar brenda shtëpisë nga “Vëllai i Madh”.

Gjatë bisedës, Limi theksoi se atmosfera e festës e kishte kapur plotësisht, duke pranuar se në një moment nuk dinte më si të ndalej.

“Kur u ndeza, nuk dija të fikesha”, tha ai, duke iu referuar energjisë dhe gjendjes së krijuar gjatë party-t.

Nga ana tjetër, Dolce u shpreh se ishte kurioze të dinte se si ishte perceptuar sjellja e tyre nga banorët e tjerë të shtëpisë.

View this post on Instagram

A post shared by Big Brother VIP Kosova (@bigbrothervipkosova)

“Jam kurioze të di se çfarë thoshin të tjerët”, u shpreh ajo, duke lënë të kuptohet se reagimet e publikut dhe të banorëve janë të rëndësishme për të.

Biseda mes dyshes vjen pas festës që ka sjellë shumë diskutime dhe dinamika brenda shtëpisë, ndërsa marrëdhënia mes Dolces dhe Limit vazhdon të mbetet në qendër të vëmendjes në Big Brother VIP Kosova.

View this post on Instagram

A post shared by Big Brother VIP Kosova (@bigbrothervipkosova)

Sinjali – aty ku e vërteta flet para lajmit!

/GazetaSinjali/

The post “Kur u ndeza, nuk dija si të fikesha”, Dolce dhe Limi flasin pas festës së mbrëmshme appeared first on Sinjali.

Jean-Philippe Mateta ka vendosur të largohet nga Crystal Palace, por e ardhmja e tij do të mbetet në Premier League, pavarësisht interesimit të Juventusit.

Sulmuesi francez ka marrë dy oferta konkrete dhe atraktive nga klube të Premier League, duke përfshirë Aston Villa dhe Chelsea, dhe pritet të bëjë zgjedhjen e tij në ditët në vijim.

Ky vendim vjen pas një periudhe të pasigurt në Crystal Palace, ku pas largimit të kapitenit Marc Guehi, gjithashtu trajneri Oliver Glasner ka konfirmuar largimin e tij nga klubi.

Këto zhvillime kanë ndikuar drejtpërdrejt te Mateta, i cili është i zhgënjyer me menaxhimin e klubit dhe veprimet në tregun e transferimeve, duke besuar se premtimet e dhëna nuk janë përmbushur.

Interesimi i Juventusit ishte konkret, por kërkesa e Crystal Palace prej rreth 40 milionë eurosh u konsiderua shumë e lartë nga klubi italian, i cili përfundimisht u tërhoq nga gara.

Aktualisht, Aston Villa shihet si opsioni më i afërt për transferimin e Matetës, pasi palët kanë arritur një marrëveshje për pagën, kohëzgjatjen e kontratës dhe kushtet personale.

Megjithatë, situata mbetet e hapur, pasi në garë është futur edhe Chelsea, i cili pritet të paraqesë një ofertë konkurruese.

“Blutë” njihen për aftësinë e tyre për të investuar shuma të mëdha në merkato, edhe pse këto lëvizje shpesh kanë sjellë dilema në të kaluarën. Vendimi final i Matetës pritet në ditët në vijim, ndërsa gara mes dy klubeve angleze mbetet e hapur.

Sinjali – aty ku e vërteta flet para lajmit!

/GazetaSinjali/

The post Mateta vendos të largohet nga Crystal Palace, do të zgjedhë njërën mes dy skuadrave angleze appeared first on Sinjali.

Policia e Kosovës ka arrestuar Argjent Rama 31-vjeçari i dyshuar në lidhje me rastin e “Vrasjes së mbetur në tentativë” dhe “Mbajtjes në pronësi, kontroll ose posedim të paautorizuar të armëve”, që ka ndodhur më 21 dhjetor 2025 në Ferizaj.

Rasti ka ndodhur rreth orës 23:50 në rrugën “Wesley Clark”, ku si pasojë e një sulmi, një person ka mbetur i plagosur. Policia njofton se më 21 janar 2026, rreth orës 11:15, i dyshuari A.R., 31 vjeç, ka kontaktuar Qendrën e Komunikimit Rajonal të Policisë në Ferizaj dhe ka shprehur vullnetin për vetëdorëzim.

“Pas kësaj, hetuesit rajonalë përgjegjës për rastin, në bashkëpunim me një njësi patrulluese, kanë shkuar në adresën e të dyshuarit, ku edhe është realizuar arrestimi i tij. I dyshuari është intervistuar në prani të avokatit mbrojtës dhe për të gjitha veprimet hetimore të policisë është njoftuar prokurori i rastit, i cili ka nxjerrë aktvendim për ndalimin e të dyshuarit për 48 orë”, thuhet në njoftimin e policisë.

Në lidhje me këtë rast Sinjali kishte raportuar ekskluzivisht.

Ekskluzive | Gjendet arma e përdorur në tentim-vrasjen në Ferizaj, bastiset shtëpia e të dyshuarit (EMRI)

Ekskluzive | Tentim vrasje në Ferizaj – viktima qëllohet me armë zjarri nga afërsia, autori në arrati

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Vetëdorëzohet në polici i dyshuari për “Vrasje të mbetur në tentativë” në Ferizaj appeared first on Sinjali.

Trump tani e kthen vëmendjen te lufta në Ukrainë, duke thënë se NATO-ja do të ndihmojë për ta ndalur atë.

“Duhet ta ndalojnë atë luftë, sepse po vdesin shumë njerëz, po vdesin pa nevojë”, thotë ai, duke shtuar se presidenti rus Vladimir Putini dhe ai ukrainas Volodymyr Zelensky duan të arrijnë marrëveshje.

Trump thotë se SHBA-ja do t’i ndihmojë Evropën dhe NATO-n në këtë drejtim dhe se e vetmja gjë që ai po kërkon është “një copë akulli”, duke iu referuar Grenlandës.

Ai e quan këtë kërkesë të vogël krahasuar me atë që SHBA-ja i ka dhënë NATO-s, shkruan REL.

Ai thotë se SHBA do të jetë 100% përkrah NATO-s, por nuk është i sigurt nëse aleatët do t’ia kthejnë favorin.

Sinjali – aty ku e vërteta flet para lajmit!

/GazetaSinjali/

The post Trump thotë se SHBA do të jetë 100% përkrah NATO-s, por s’e di nëse aleatët do t’ia “kthejnë favorin appeared first on Sinjali.

Kryeministri në detyrë i Kosovës, Albin Kurti, ka zhvilluar një takim me Kryeministrin e Luksemburgut, Luc Frieden, gjatë Forumit Ekonomik Botëror në Davos.

Sipas njoftimit të Zyrës së Kryeministrit, Kurti ka shprehur mirënjohjen për mbështetje të pandërprerë që Luksemburgu ka ofruar për Kosovën në të gjitha fazat e procesit të shtetndërtimit.

“Në vijim, theksoi progresin demokratik dhe ekonomik të vendit dhe synimet e Kosovës për anëtarësim në Bashkimin Evropian, Këshillin e Evropës dhe NATO, gjersa falënderoi Luksemburgun për mbështetjen ndaj Kosovës në këto procese.

U bisedua edhe mbi fuqizimin e marrëdhënieve bilaterale, thellimin e bashkëpunimit përfshirë në arsim dhe investime dhe rritjes së lidhjeve kulturore mes shteteve dhe popujve tanë”, përfundon njoftimi.

Sinjali – aty ku e vërteta flet para lajmit!

/GazetaSinjali/

The post Kurti takon kryeministrin e Luksemburgut në Davos, i përmend synimin për anëtarësim në BE, KiE dhe NATO appeared first on Sinjali.

Kryeministri në detyrë Albin Kurti, ka folur për qeverisjen e tij të deritanishme dhe planet ekonomike, politike e gjeo-strategjike në udhëheqjen e ardhshme, në një bisedë bashkë me Rory Setwart OBE në `Shtëpinë e Kosovës` në kuadër të Forumit në Davos.

Rritja e kualitetit të shërbimeve, transparenca e proceseve e llogaridhënia qenë pretimet e Kurtit nga Davosi, teksa tha se ekziston një rezistencë e madhe te njerëzit që të mos kthehen te një sistem korruptiv politik.

“Ne duhet të udhëheqim duke qenë shembull, asnjë por asnjë nga kabineti qeveritar nuk mund të kenë as imagjinatën më të vogël të punojnë në mënyrë korruptive. Kosova është shtet i monitoruar edhe nga ndërkombëtarët edhe nga sistemi ynë. Unë besoj që llogaridhënia do të jetë në nivel”, tha ai.  

Kryeministri në detyrë deklaroi se politika e tyre të udhëheqjes u shtrinë kryesisht mbi politikat sociale, investimet kapitale e investimet ekonomike.

Kurti gjithashtu foli për bllokadën politike disa mujore në Kosovë, që çoi edhe në zgjedhjet e parakohshme parlamentare dhe solli rezultatin prej 51% të votave për LVV-në, shkruan RTK.

Kurti foli edhe për planet destabilizuese të Serbisë e Rusisë për Kosovën, duke specifikuar luftën hibride ruse gjatë fushatës së fundit zgjedhore. Ai tha se përgjigja më e mirë ndaj çdo sulmi shtetëror e hibrid është të paturit njerëzit më profesionistë në Agjencinë e Inteligjencës, në mënyrë që reagimi të jetë në nivel.

Sinjali – aty ku e vërteta flet para lajmit!

/GazetaSinjali/

The post Nga Davosi, Kurti: Ne duhet të udhëheqim duke qenë shembull appeared first on Sinjali.

Vinicius po përgatitet për një verë që mund të shënojë një pikë kthesë të rëndësishme në karrierën e tij te Real Madridi.

Pas viteve të një marrëdhënieje të ngushtë me klubin, situata duket se është prishur, duke krijuar një skenar që aktualisht shihet si shumë i vështirë për t’u rikthyer.

Lidhja e brazilianit me tifozët e Real Madridit ka arritur në pikën më të ulët.

Sjelljet e tij dhe disa episode të fundit kanë shkaktuar një largim të dukshëm nga ‘Bernabeu’, ndërsa performanca e tij ka qenë e papërputhshme me pritshmëritë.

Në të njëjtën kohë, negociatat për rinovimin e kontratës janë bllokuar, duke e lënë klubin përballë një vendimi kritik: të shesë tani apo të rrezikojë të humbasë një nga lojtarët më të vlefshëm pa kompensim.Klubet e mëdha ndërkombëtare kanë shfaqur interes për situatën e tij, duke përfshirë Chelsean dhe Bayern Munich, ndërsa skuadrat nga Arabia Saudite janë të gatshme të ofrojnë shuma të jashtëzakonshme.

Megjithatë, favoriti kryesor mbetet Manchester City, i cili raportohet se ka dorëzuar një ofertë prej rreth 150 milionë eurosh, një shifër që konsiderohet e përshtatshme për të siguruar një nga sulmuesit më të rrezikshëm në botë.

Nga ana e Real Madridit, shuma dhe konteksti i kontratës e bëjnë të vështirë refuzimin e ofertës.

Një shitje e tillë jo vetëm që sjell përfitime financiare, por gjithashtu hap mundësinë për të ristrukturuar skuadrën dhe për të përforcuar pozicione të tjera kyçe.

Largimi i brazilianit, megjithëse i dhimbshëm nga perspektiva emocionale, mund të ofrojë një fillim të ri për projektin sportiv të klubit.

Për momentin, duket se e ardhmja e Vinicius është larg ‘Santiago Bernabeu’.

Përveç tensionit me tifozët dhe bllokimit të rinovimit, presioni i tregut dhe oferta e Manchester Cityt sugjerojnë se Real Madridi do të pranojë transferimin.

Kjo do të shënojë fundin e një kapitulli të rëndësishëm dhe fillimin e një aventure të re për sulmuesin në Ligën Premier.

Sinjali – aty ku e vërteta flet para lajmit!

/GazetaSinjali/

The post Man City bën një ofertë milionëshe për yllin e Real Madridit appeared first on Sinjali.

Policia e Shtetit e Reggio Emilia-s ka ekzekutuar një urdhër paraburgimi paraprak të lëshuar nga Gjykata e Bolonjas, me kërkesë të Drejtorisë së Antimafias, ndaj nëntë personave, tetë me origjinë shqiptare dhe një shtetas italian. Ata dyshohen për veprën penale të pjesëmarrjes në organizatë kriminale me qëllim trafikimin e lëndëve narkotike.

Operacioni u realizua nga policia italiane e cila aktivizoi kanalet e Interpolit për shpërndarjen ndërkombëtare të urdhër-arresteve, në bashkëpunim me Zyrën e Ekspertit të Sigurisë në Shqipëri.

Arrestimet dhe kontrollet po zhvillohen në disa provinca italiane, përfshirë Reggio Emilia, Bergamo, Brescia dhe Savona, si dhe në Francë, Spanjë dhe Shqipëri, falë bashkëpunimit operacional me autoritetet policore të huaja, në veçanti me Departamentin e Policisë Kriminale të Shqipërisë.

Operacioni, i koduar me emrin “STURL ONE”, përbën vazhdimësinë e hetimeve të mëparshme të njohura si TREXIT 2019 dhe BLACK MAMBA, të cilat kishin çuar, në janar 2021 dhe shtator 2022, në ekzekutimin e gjithsej 35 masave kufizuese.

Hetimi TREXIT 2019 kishte zbuluar ekzistencën e tre organizatave kriminale aktive në provincën e Reggio Emilia-s. Njëra prej tyre, e përbërë nga shtetas me origjinë nga Magrebi dhe e njohur si “grupi Rubiera”, ishte e përfshirë në shitjen me pakicë të kokainës. Dy grupet e tjera përbëheshin nga shtetas shqiptarë, të cilët furnizonin në mënyrë të vazhdueshme sasi të mëdha kokaine për grupin e Afrikës së Veriut.

Një nga këto organizata drejtohej nga një shtetas shqiptar me banim në Itali, i cili udhëtonte shpesh jashtë vendit dhe në Shqipëri, duke vepruar që nga viti 2018 si ndërmjetës kryesor për furnizimin me kokainë në rajonin Emilia-Romagna.

Hetimet kanë treguar se organizata kriminale ishte e strukturuar në disa nivele, me disponueshmëri të lartë personeli, mjetesh dhe burimesh financiare. Ajo ishte e aftë të importonte dhe shpërndante sasi të mëdha kokaine, marijuane dhe kanabisi nga Amerika e Jugut, Evropa Veriore dhe Spanja, duke i fshehur lëndët narkotike në kamionë të ngarkuar me produkte bujqësore dhe më pas duke i shpërndarë në të gjithë Italinë përmes një rrjeti korrierësh.

Për komunikim të fshehtë, anëtarët e organizatës përdornin platformën e koduar SKYECC, të instaluar në telefona të specializuar me kosto shumë të lartë. Gjatë operacioneve të mëparshme, Policia sekuestroi disa prej këtyre pajisjeve. Platforma SKYECC ishte dekriptuar nga autoritetet franceze në fund të vitit 2020, çka lejoi aksesin në komunikimet e anëtarëve të rrjetit kriminal.

Në vitin 2022, Drejtoria Antimafia e Distriktit të Bolonjës hapi një procedim të ri penal me qëllim identifikimin e drejtuesve kryesorë të organizatës. Nëpërmjet një Urdhri Hetimor Evropian, u analizuan bisedat e koduara dhe u kryen hetime teknike të avancuara ndaj të dyshuarve të pranishëm në Itali.

Këto hetime mundësuan dokumentimin e një numri të madh veprash penale dhe vërtetimin e rolit të qëndrueshëm dhe funksional të secilit anëtar brenda organizatës, duke çuar në formulimin e 44 akuzave penale.

Vetëm gjatë gjashtë muajve monitorim, organizata kishte arritur të lëvizte dhe shpërndante mbi 200 kilogramë kokainë dhe rreth 1,000 kilogramë hashash dhe marijuanë, duke gjeneruar miliona euro fitime. Të dyshuarit, të bindur për sigurinë e komunikimeve të tyre, diskutonin hapur negociatat, mënyrat e shpërndarjes dhe madje komentojnë edhe sekuestrimet e kryera nga Policia.

Falë punës së detajuar hetimore, Policia e Shtetit arriti të identifikojë përdoruesit e PIN-eve SKYECC dhe t’i lidhë ata me identitetet reale, duke ndërtuar një bazë të fortë provash, e cila u pranua plotësisht nga Autoriteti Gjyqësor.

Në total, 15 persona janë nën hetim. Përveç nëntë arrestimeve, u kryen kontrolle të shumta në të gjithë territorin italian, me pjesëmarrjen e rreth 50 efektivëve të Policisë së Shtetit, shkruan Euronews.al.

Gjatë një kontrolli të veçantë në provincën e Brescias, një shtetas maroken u arrestua në flagrancë pasi iu gjetën mbi 2 kg marijuanë, 1 kg hashash dhe 5,800 euro cash, të dyshuara si të ardhura nga aktiviteti i paligjshëm.

Sinjali – aty ku e vërteta flet para lajmit!

/GazetaSinjali/

The post Policia italiane godet organizatën e trafikut ndërkombëtar të drogës, ndalohen 8 shqiptarë appeared first on Sinjali.

Pamje të tmerrshme janë publikuar kur rrota e përparme e një aeroplani të United Airlines u këput plotësisht ndërsa ulej ashpër në një aeroport në Orlando, Florida.

Fluturimi 2323 i United Airlines kishte përjetuar një “problem mekanik” gjatë uljes në Aeroportin Ndërkombëtar të Orlandos të dielën, rreth orës 12:35, pasi kishte nisur nga Aeroporti Ndërkombëtar i Çikagos, O’Hare, sipas një deklarate të linjës ajrore për Fox 35.

Pamjet dramatike treguan Airbus A321neo, i cili po zbriste me ingranazhin e uljes që dukej i funksionuar, por në momentin e uljes ai dëmtohet. Ky avion transportonte 200 pasagjerë dhe 6 anëtarë të ekuipazhit.

Duket të jetë një ulje rutinë derisa rrotat e pasme prekën, duke përplasur pjesën e përparme të aeroplanit mbi rrotat nën hundën e tij.

Pas kamerës, një çift që shikonte uljen mund të dëgjohet duke reaguar ndërsa aeroplani u ul ashpër, një burrë dëgjohet të thotë: ‘O Zot i madh’.

Aeroplani u lëkund përpara se një rrotë të shihej duke u rrëshqitur në anën e djathtë të fluturakes.

United Airlines i tha People se incidenti u shkaktua nga një ‘problem mekanik gjatë uljes’.

Për fat të mirë, askush nuk u lëndua; megjithatë, Administrata Federale e Aviacionit (FAA) i tha medias se “aeroplani u çaktivizua pasi bëri një ulje të fortë”.

Pasagjerët u detyruan të transportoheshin me autobus nga aeroplani i çaktivizuar në terminal. FAA i konfirmoi People se po hetojnë incidentin. 

Sinjali – aty ku e vërteta flet para lajmit!

/GazetaSinjali/

The post Pamje tronditëse: Rrota e përparme e aeroplanit këputet gjatë uljes në Orlando appeared first on Sinjali.

Gjykata Supreme e Kosovës ka theksuar se përgjegjësia për implementimin e vendimit lidhur me lajmërimin e pensionistëve i takon institucioneve përkatëse.

Në një shpjegim për opinionin, një ditë pas njoftimit të Ministrisë së Financave se disa kategori pensionistësh duhet të paraqiten për të konfirmuar se janë ende gjallë, Supremja ka sqaruar se ka përmbushur plotësisht detyrat e saj përmes aktgjykimit P.A.nr.16/2025.

“Me këtë aktgjykim, Gjykata Supreme ka shpallur të paligjshëm dhe ka shfuqizuar: nenin 4 paragraf 2 të Udhëzimit Administrativ nr. 05/2015 (MPMS), si dhe nenin 5 paragrafët 1, 2, 3 dhe 4 të këtij Udhëzimi, që kanë të bëjnë me procedurat e lajmërimit, suspendimit nga pagesa dhe kthimit të mjeteve në rastet e keqpërdorimit të pensioneve. Pas nxjerrjes së aktgjykimit vendimi u është dorëzuar palëve në procedurë, dhe është publikuar në Gazetën Zyrtare të Republikës së Kosovës, duke marrë kështu efekt të plotë juridik. Gjykata Supreme thekson se e ka kryer plotësisht pjesën e saj të përgjegjësisë, ndërsa përgjegjësia për zbatimin e këtij aktgjykimi bie mbi institucionet ekzekutive dhe jo mbi gjykatat. Gjykata Supreme nuk ka kompetencë ligjore për të monitoruar apo mbikëqyrur zbatimin e vendimeve gjyqësore nga institucionet e tjera. Vendimet gjyqësore janë të detyrueshme për zbatim, dhe çdo mosrespektim i tyre përbën shkelje të parimit të sundimit të ligjit. Aktgjykimi dhe njoftimi përkatës janë publikuar edhe në ueb-faqen zyrtare të Gjykatës Supreme”, thuhet nga Gjykata Supreme.

Ministria e Financave, Punës dhe Transfereve ka bërë të ditur se disa kategori të pensionistëve nuk kanë më nevojë për paraqitje të rregullt para zyrave të pensioneve.

Këto kategori janë përfituesit e pensioneve: kontributive,parciale kontributive, dhe familjare.

Sinjali – aty ku e vërteta flet para lajmit!

/GazetaSinjali/

The post Supremja: Institucionet përgjegjëse për zbatimin e vendimit për pensionistët appeared first on Sinjali.

Sekretari i Përgjithshëm i OKB-së, Antonio Guterres, ka anuluar planet e tij për të marrë pjesë në takimin e Davosit në Zvicër.

Atje, Guterresh ishte paraparë të mbante një fjalim të veçantë, tha të martën një zëdhënës i OKB-së.

“Sekretari i Përgjithshëm, për fat të keq, është detyruar të anulojë pjesëmarrjen e tij në Takimin Vjetor të Forumit Ekonomik Botëror në Davos. Ishte planifikuar për nesër, por ai ka një ftohje të keqe”, tha zëdhënësi i OKB-së, Rolando Gomez, në përgjigje të pyetjes së një gazetari.

Sinjali – aty ku e vërteta flet para lajmit!

/GazetaSinjali/

The post Shefi i OKB-së anulon udhëtimin për në Davos appeared first on Sinjali.

Skandali lidhur me votat e kandidatëve për deputetë ka çuar në një rinumërim të plotë.

Komisioni Qendror i Zgjedhjeve u detyra të marrë këtë vendim për të siguruar një verifikim të plotë të të gjitha votave në vendvotimet e rregullta.

Nuk ka pasur mospërputhje të rëndësishme te top 5-shet e secilës parti.

Deri tani janë numëruar mbi 700 vendvotime në kuadër të vendimit të parë të KQZ-së, duke vazhduar me verifikimin e plotë në 2 mijë e 557 vendvotime.

Te Lëvizja Vetëvendosje, Albin Kurti ka humbur 176 vota, ndërsa Glauk Konjufca, Hekuran Murati, Albulena Haxhiu dhe Donika Gërvalla kanë fituar shtesa të votave nga 22 deri në 130.

Te  Partia Demokratike e Kosovës pati plus vota në kandidatët më të votuar.

I pari i partisë, Bedri Hamza, deri më tash ka 51 vota më shumë, ndërsa Arian Tahiri, Përparim Gruda, Uran Ismaili e Sala Jashari kanë qindra vota shtesë.

Ndryshime ka edhe te Lidhja Demokratike e Kosovës, ku Lumir Abdixhiku ka minus 12 vota, më pak ka edhe Avdullah Hoti, ndërsa Hykmete Bajrami, Ukë Rugova dhe Doarsa Kica – Xhelili, kanë më shumë vota nga rinumërimi.

Edhe te partia e Ramush Haradinajt ka pak lëvizje.

Kreu i AAK-së deri tani ka 1 votë më shumë, ndërsa Daut Haradinaj, Besnik Tahiri, Time Kadrijaj kanë dhjetëra më shumë, veç Bekë Berishës që aktualisht ka dy më pak.

The post Rinumërimi i votave: Kurti e Abdixhiku humbin vota, Hamzës e Haradinajt i’u shtohen votat appeared first on Sinjali.

Presidentja e Komisionit Evropian, Ursula von der Leyen, ka kritikuar kërcënimin e Donald Trump, për të vendosur tarifa mbi tetë shtete evropiane që kundërshtuan përpjekjet e tij për të blerë Grenlandën.

“Siguria në Arktik mund të arrihet vetëm së bashku dhe kjo është arsyeja pse tarifat shtesë të propozuara janë një gabim”, tha presidentja e Komisionit të BE-së në Forumin Ekonomik Botëror në Davos.

Ata po minonin një marrëveshje të mëparshme tarifore, sugjeroi ajo, duke thënë: “Kur miqtë shtrëngojnë duart, kjo duhet të nënkuptojë diçka”.

Von der Leyen gjithashtu përshkroi se cila do të ishte strategjia e Komisionit të saj për t’u marrë me çështjen:

Solidaritet i plotë me Grenlandën dhe Danimarkën në mbështetje të sovranitetit të territorit.

“Një rritje masive e investimeve evropiane në Grenlandë” për të mbështetur infrastrukturën dhe biznesin lokal.

Investime në sigurinë e Arktikut me SHBA-në dhe partnerë të tjerë si Mbretëria e Bashkuar, Kanadaja, Norvegjia dhe Islanda;

Një strategji e re sigurie e BE-së, duke përfshirë një përmirësim të strategjisë së sigurisë në Arktik.

Sinjali – aty ku e vërteta flet para lajmit!

/GazetaSinjali/

The post Von der Leyen kundërshton kërcënimin e Trump për tarifa ndaj vendeve evropiane për Grenlandën appeared first on Sinjali.

Kenan Yildiz, talenti i ri turk i Juventusit, po tregon një formë mbresëlënëse këtë sezon dhe ka tërhequr vëmendjen e disa prej klubeve më të mëdha evropiane.

Në vetëm 20 vjeç, sulmuesi ka kaluar fazën e premisë dhe tani është një lojtar kyç për skuadrën e tij.

Me një performancë të qëndrueshme dhe një ndikim të drejtpërdrejtë në lojën sulmuese, Yildiz po forcon pozitat e tij si një nga talentet më të shquara të brezit të tij.

Gjatë këtij sezoni, ai ka shënuar tetë gola dhe ka dhënë po aq asistime në të gjitha kompeticionet, duke treguar jo vetëm statistika të shkëlqyera, por edhe një nivel të lartë të maturisë dhe sigurisë, veçanërisht në ndeshje me presion të madh.

Lëvizjet e tij mes linjave, aftësia në një kundër një dhe mençuria taktike e bëjnë një lojtar të veçantë në Torino.

Stafi dhe shokët e skuadrës e shohin Yildiz si një pjesë thelbësore të projektit të Juventusit për të ardhmen.

Performanca e tij ka aktivizuar tregun e transferimeve, dhe shumë klube të mëdha evropiane po monitorojnë situatën.

Çmimi i tij pritet të jetë mbi 100 milionë euro, një shifër që reflekton talentin, ndikimin dhe potencialin e madh që ka, Juventusi nuk është e detyruar të shesë, por një ofertë e tillë mund ta shtyjë drejt negociatave serioze.

Barcelona është ndër klubet që e ndjek me kujdes Yildiz, duke e parë si një lojtar ideal për stilin e tyre të lojës.

Përtej sfidës financiare, katalanasit shpresojnë të përdorin projektin sportiv si argument për ta bindur sulmuesin.

Sezoni i ardhshëm pritet të jetë vendimtar për Kenan Yildiz, ndërsa tregu i transferimeve është në lëvizje rreth tij.

Juventusi synon ta mbajë, ndërsa klubet e mëdha evropiane po përgatiten për një ofertë të mundshme.

Projekti i Barcelonës mund të jetë elementi që do ta tërheqë turkun drejt ‘Camp Nou’, duke e bërë një nga protagonistët kryesorë të afatit kalimtar të verës. 

Sinjali – aty ku e vërteta flet para lajmit!

/GazetaSinjali/

The post Barcelona “ndjek” me vëmendje sulmuesin e Juventusit appeared first on Sinjali.

Dy njësitë e Korporatës Energjetike të Kosovës, B2 dhe A3, pritet të rikthehen në funksion gjatë mbrëmjes, ka njoftuar ministrja në detyrë e Ekonomisë, Artane Rizvanolli.

Ajo e bëri këtë të ditur pas një takimi me menaxhmentin e KEK-ut, ndërsa theksoi se tri njësi të tjera, B1, A4 dhe A5, janë tashmë në operim.

Ekipet teknike po punojnë pa ndërprerje me tri ndërrime, 24 orë në ditë, për të rikthyer sa më shpejt në funksion edhe njësitë B2 dhe A3.

“Nga KEK-u presim që gjatë kësaj periudhe të ftohtë kur kërkesa është e lartë, të punojë me 5 blloqe. Ndonëse kjo është sfiduese, TC Kosova A ka operuar me të tri njësitë njëkohësisht për 22 ditë që nga 19 dhjetori deri më sot, për çfarë i jemi falënderues secilit punëtor e menaxher, që janë shtylla e sistemit tonë elektroenergjetik. Për krahasim, për 25 vitet e kaluara KEK ka punuar me 5 njësi vetëm 55 ditë në total. Nga menaxhmenti dhe nga çdo punonjës i KEK-ut pres angazhim dhe përgjegjësi maksimale për t’i sjellë të gjitha njësitë në operim dhe për t’i mbajtur në operim gjatë këtyre muajve të ftohtë”, ka shkruar ajo.

Ndërsa të hënën ka publikuar një video ku shihen punëtorët e KEK-ut duke punuar dhe ka bërë thirrje për kursim të energjisë.

KOSTT ka paralajmëruar reduktime të energjisë elektrike gjatë ditës për shkak të kërkesës së madhe me furnizim me energji elektrike.

Ndërsa nga KESCO  kanë thënë se në mungesë të prodhimit vendor dhe mundësive të kufizuara të importit situata është vështirësuar.

Sinjali – aty ku e vërteta flet para lajmit!

/GazetaSinjali/

The post Njësitë B2 dhe A3 pritet të rikthen në operim gjatë mbrëmjes appeared first on Sinjali.