Familja e Lionel Messit po përjeton një nga momentet më të dhimbshme, pas ndarjes nga jeta të Jorge Messit, babait të yllit argjentinas.

Lajmi i hidhur është bërë i ditur ditën e sotëm, ndërsa detaje të reja kanë dalë në dritë rreth betejës së gjatë të Jorge Messit me një sëmundje të rëndë.

Sipas raportimeve të mediave argjentinase, Jorge Messi u përball me probleme serioze shëndetësore gjatë dhe pas Botërorit, ndërsa gjendja e tij vijoi të mbetej e rëndë për një periudhë të gjatë.

Situata ishte aq e vështirë, sa Lionel Messi në një moment gjatë turneut kishte menduar edhe të largohej nga grumbullimi i kombëtares për t’u kthyer në Argjentinë dhe për të qëndruar pranë të atit.

“Në një moment gjatë turneut, Messi madje mendoi të largohej nga ekipi për të shkuar e për të parë babain e tij, Jorge”, raporton gazeta argjentinase Diario Olé.

Pas finales kundër Spanjës, Messi udhëtoi me urgjencë drejt Rosarios për të kaluar kohë me babain. Sipas raportimeve, ylli argjentinas nuk kishte mundur ta takonte Jorge për rreth dy muaj.

Edhe emocionet e forta të Messit gjatë Botërorit tashmë marrin një tjetër kuptim. Lotët e tij pas golit të parë ndaj Algjerisë u interpretuan si një moment emocional, ndërsa në prapaskenë ai po përballej me shqetësimin për gjendjen shëndetësore të të atit.

Jorge Messi kaloi një periudhë në spital dhe më pas vijoi të qëndronte në shtëpinë e tij në Rosario, ku u shoqërua vazhdimisht nga bashkëshortja, Celia. Edhe ajo nuk udhëtoi gjatë kësaj periudhe, duke qëndruar pranë tij.

Fëmijët e tjerë të çiftit, Rodrigo, Matías dhe María Sol, shkonin dhe vinin vazhdimisht për t’i qëndruar pranë Jorge Messit. Ndërkohë, Lionel komunikonte shpesh me familjarët e tij për të marrë informacion mbi gjendjen e babait.

Gjendja e Jorge Messit pati momente ku dukej se po përmirësohej, por në muajt në vijim mbeti e rëndë, duke e kthyer këtë në një betejë të gjatë dhe të dhimbshme për të gjithë familjen.

Jorge Messi ishte një figurë shumë e rëndësishme në jetën dhe karrierën e Lionel Messit. Edhe pse nuk kërkonte të ishte në qendër të vëmendjes dhe përgjithësisht preferonte të qëndronte larg skenës mediatike, ai ishte një nga njerëzit më të afërt me djalin e tij gjatë gjithë rrugëtimit të tij në futboll.

Ai do të kujtohet jo vetëm si babai i një prej futbollistëve më të mëdhenj të historisë, por edhe si një njeri i thjeshtë dhe familjar, që i qëndroi pranë fëmijëve të tij në çdo hap të jetës./ad

 

Fluturimi me avion mund të jetë mënyra më e shpejtë për të udhëtuar në botë, por për shumë pasagjerë eksperienca mbetet e lidhur me pritjet e gjata, hapësirat e kufizuara dhe mungesën e rehatisë, veçanërisht në fluturimet me distanca të gjata. Megjithatë, kompanitë e aviacionit po punojnë për një vizion të ri të udhëtimit ajror, ku teknologjia dhe dizajni pritet të transformojnë mënyrën se si kalojmë kohën në ajër.

Sipas Euronews Travel, disa nga konceptet më të reja të prezantuara në industrinë e aviacionit tregojnë se kabinat e së ardhmes mund të përfshijnë hapësira më personale, argëtim më të avancuar dhe nivele komoditeti që deri tani janë parë vetëm në hotele luksoze.

Një prej risive më të diskutuara është koncepti “Origin”, i zhvilluar nga RAVE Aerospace dhe Safran Seats, i prezantuar në panairin ndërkombëtar Aircraft Interiors Expo në Hamburg. Ky koncept parashikon një ulëse premium të pajisur me ekran mikro-LED në formë U-je, që krijon një eksperiencë më zhytëse për pasagjerin. Përveç argëtimit, dizajni përfshin ndriçim të personalizueshëm, kontroll të klimës personale dhe elementë që synojnë përmirësimin e gjumit dhe mirëqenies gjatë fluturimeve të gjata.

Një tjetër ide që po tërheq vëmendjen është ridizenjimi i klasës ekonomike përmes përdorimit të hapësirës vertikale. Startup-i spanjoll Chaise Longue ka propozuar sedilje në dy nivele, të cilat synojnë të ofrojnë më shumë hapësirë për këmbët dhe privatësi pa rritur ndjeshëm numrin e vendeve në avion.

Sipas krijuesve të këtij koncepti, qëllimi është që pasagjerët e klasës ekonomike të kenë një eksperiencë më afër asaj të ekonomisë premium, duke shmangur ndjesinë e ngjeshjes që karakterizon shumë fluturime moderne.

Ndërkohë, linjat ajrore luksoze po shkojnë edhe më tej. Emirates po shqyrton mundësinë e krijimit të suitave të klasit të parë me ambiente private të pajisura edhe me banjo personale, duke synuar një standard të ri në udhëtimet premium.

Këto ide tregojnë një ndryshim të madh në industrinë e aviacionit: fokusi nuk është më vetëm te transporti nga një destinacion në tjetrin, por te krijimi i një eksperience të plotë gjatë gjithë udhëtimit.

Megjithatë, ekspertët theksojnë se shumë prej këtyre teknologjive do të kërkojnë kohë për t’u zbatuar gjerësisht, pasi linjat ajrore duhet të balancojnë inovacionin me kostot, sigurinë dhe efikasitetin operacional.

E ardhmja e fluturimit mund të mos jetë vetëm më e shpejtë, por edhe shumë më komode, më personale dhe më afër një eksperience luksoze në ajër./ad

Rrjetet sociale kanë ndryshuar mënyrën se si njerëzit marrin këshilla për bukurinë dhe kujdesin personal. Sot, TikTok është kthyer në një nga burimet më të mëdha të informacionit për produktet e skincare, ku miliona përdorues ndjekin rutina të reja, përbërës “magjikë” dhe rezultate spektakolare të paraqitura në videot “para dhe pas”.

Nga trendi i famshëm i “glass skin”, që premton një lëkurë jashtëzakonisht të pastër dhe me shkëlqim, te përdorimi i përbërësve si retinoli, acidi hialuronik apo acidi salicilik, shumë prej këtyre këshillave kanë fituar popullaritet të madh. Por dermatologët paralajmërojnë se jo çdo trend viral ka të njëjtën mbështetje shkencore.

Sipas ekspertëve të dermatologjisë, disa praktika të promovuara në TikTok kanë një bazë të fortë shkencore. Përdorimi i përditshëm i kremit kundër diellit SPF, hidratimi i rregullt dhe përbërësit aktivë si retinoidet janë ndër metodat më të studiuara për mbrojtjen e lëkurës, trajtimin e shenjave të plakjes dhe përmirësimin e strukturës së saj.

Megjithatë, problemi qëndron te mënyra se si këto këshilla paraqiten në rrjetet sociale. Shpesh, videot virale krijojnë përshtypjen se një produkt mund të sjellë rezultate të menjëhershme, ndërsa në realitet shumë trajtime kërkojnë javë ose muaj përdorim të vazhdueshëm për të dhënë efekt.

Ekspertët theksojnë se rezultatet “para dhe pas” në TikTok mund të ndikohen nga ndriçimi, filtrat, këndi i fotografimit apo përdorimi i disa produkteve njëkohësisht. Kjo mund të krijojë pritshmëri jo reale dhe t’i bëjë përdoruesit të investojnë në rutina të ndërlikuara që nuk janë domosdoshmërisht të nevojshme.

Një nga shqetësimet kryesore të dermatologëve është edhe përdorimi i tepërt i produkteve aktive. Kombinimi i disa përbërësve të fuqishëm, si retinoli, acidet eksfoliuese dhe vitamina C në të njëjtën rutinë, mund të shkaktojë irritim, skuqje dhe dëmtim të barrierës mbrojtëse të lëkurës.

Sipas Akademisë Amerikane të Dermatologjisë (American Academy of Dermatology), një rutinë efektive për kujdesin e lëkurës nuk ka nevojë të përfshijë dhjetëra produkte. Dermatologët rekomandojnë zakonisht një bazë të thjeshtë: pastrim të butë, hidratim dhe mbrojtje nga dielli, ndërsa produktet shtesë duhet të zgjidhen sipas nevojave individuale të lëkurës.

Një tjetër faktor që ndikon në përhapjen e këtyre trendeve është marketingu i industrisë së bukurisë. Shumë produkte bëhen virale pasi promovohen nga influencues me miliona ndjekës, por jo gjithmonë këto rekomandime bazohen në prova klinike. Në disa raste, një video që duket si këshillë personale mund të jetë pjesë e një fushate marketingu.

Ekspertët kujtojnë se lëkura nuk funksionon njësoj për të gjithë. Një produkt që sjell rezultate te një person mund të mos ketë të njëjtin efekt te një tjetër, pasi ndikojnë faktorë si mosha, tipi i lëkurës, gjenetika dhe gjendja shëndetësore.

Në një kohë kur TikTok vazhdon të krijojë çdo ditë trende të reja bukurie, sfida kryesore për konsumatorët mbetet të dallojnë mes këshillave të mbështetura në shkencë dhe produkteve që thjesht shfrytëzojnë fuqinë e viralitetit.

Sepse, sipas dermatologëve, sekreti i një lëkure të shëndetshme nuk qëndron te produkti më i famshëm në internet, por te një rutinë e qëndrueshme dhe e përshtatur sipas nevojave reale të lëkurës./ad

Shtetet e Bashkuara kanë bërë “njëfarë përparimi” në bisedimet me Iranin, deklaroi në një intervistë për Fox News zëvendëspresidenti amerikan JD Vance.

Vance tha se pala iraniane dëshiron që situata të përfundojë, por sipas tij, ende mbetet e paqartë nëse autoritetet iraniane janë të gatshme të ndërmarrin ndryshimet që kërkon Uashingtoni.

“Ata duan që kjo gjë të marrë fund. Pyetja është nëse janë në gjendje të japin gjërat që janë të nevojshme që ne të ndihemi sikur kemi marrë atë që na nevojitet nga ky angazhim”, tha Vance, duke shtuar se gjatë ditëve të fundit është bërë njëfarë progresi.

Sipas zëvendëspresidentit amerikan, një nga çështjet kryesore në bisedimet aktuale është garantimi i rrjedhës së naftës dhe gazit përmes Ngushticës së Hormuzit.

“Po flasim me iranianët. Sigurisht, po përpiqemi të maksimizojmë sasinë e naftës dhe gazit që po del nga Ngushtica e Hormuzit. Kjo është gjëja në të cilën jemi më të përqendruar tani”, u shpreh ai.

Vance theksoi gjithashtu se SHBA-ja po vlerëson nëse Irani është i gatshëm të bëjë ndryshime afatgjata që do të mundësonin një marrëdhënie më të mirë mes dy vendeve.

Ai tha se gjatë javës së fundit Irani dhe vendet e Gjirit, veçanërisht Omani, kanë zhvilluar diskutime për garantimin e lundrimit të sigurt përmes Ngushticës së Hormuzit.

Vance nënvizoi nevojën për krijimin e një skeme të sigurt të trafikut detar për anijet që kalojnë nëpër ngushticë, duke përmendur edhe dyshimet për vendosjen e minave detare në këtë zonë./ad

FIFA ka dalë publikisht në mbështetje të presidentit Gianni Infantino, pas kritikave të forta ndaj një propozimi për t’u shitur investitorëve privatë 20% e aksioneve në një strukturë të re komerciale të lidhur me aktivitetet e organizatës.

Pas një takimi në Rabat, FIFA deklaroi se do të marrë masa për të mbrojtur integritetin dhe reputacionin e institucionit, ndërsa sekretari i përgjithshëm Mattias Grafstrom dhe anëtarët e bordit rikonfirmuan mbështetjen e tyre të plotë për Infantinon.

Megjithatë, organizata pranoi se kishte gabuar në mënyrën se si ishte menaxhuar propozimi i “FIFA Forward Enterprise”, duke theksuar se Këshilli i FIFA-s dhe federatat anëtare duhej të ishin përfshirë më shumë në proces.

FIFA konfirmoi gjithashtu se propozimi është tashmë i tërhequr dhe nuk do të vijojë më tej./ad

Vera dhe temperaturat e larta mund të kthehen në një sfidë serioze për personat me probleme kardiovaskulare, por edhe për individë të shëndetshëm që ekspozohen ndaj vapës, dehidratimit dhe aktivitetit fizik intensiv në oraret e papërshtatshme.

Në emisionin “Diagnozë”, autorja dhe moderatorja Freskida Miloti zhvilloi një bisedë me Dr. Arsida Gjapin, mjeke kardiologe me eksperiencë profesionale në Shqipëri dhe Gjermani, e specializuar në mjekësinë e brendshme, kardiologji dhe kujdes intensiv.

Sipas kardiologes, temperaturat e larta shkaktojnë një sërë ndryshimesh në organizëm. Enët e gjakut zgjerohen për të ndihmuar trupin të largojë nxehtësinë, ndërsa djersitja çon në humbje të lëngjeve. Si pasojë, zemra mund të detyrohet të punojë më shumë për të ruajtur furnizimin me gjak të organeve.

“Gjatë rritjeve të temperaturave, enët e gjakut hapen, ulet tensioni, dehidratohemi dhe zemra detyrohet të rrahë më shpejt”, shpjegoi Dr. Gjapi.

Kush është më i rrezikuar?

Vëmendje e veçantë, sipas saj, duhet t’u kushtohet personave mbi 65 vjeç, pacientëve me hipertension, insuficiencë kardiake, sëmundje kronike të veshkave, diabet, sëmundje koronare apo atyre që kanë kaluar më parë infarkt të miokardit.

Por temperaturat e larta nuk prekin vetëm pacientët e diagnostikuar me sëmundje të zemrës. Edhe personat e rinj mund të përballen me probleme nëse ekspozohen ndaj kushteve ekstreme ose e teprojnë me aktivitetin fizik.

Aktiviteti fizik në verë: kur kthehet në rrezik?

Aktiviteti fizik mbetet i rëndësishëm për shëndetin e zemrës, por gjatë ditëve të nxehta duhet zgjedhur me kujdes koha dhe intensiteti i ushtrimeve.

Dr. Gjapi solli në emision edhe një rast nga përvoja e saj në urgjencë, ku një 25-vjeçar u paraqit me shenja që ngjanin me një infarkt miokardi, pas aktivitetit fizik intensiv të kryer në një orar me temperatura të larta.

Sipas saj, ecja, noti dhe çiklizmi mund të jenë zgjedhje të mira, por aktiviteti duhet përshtatur me temperaturën, gjendjen shëndetësore dhe nivelin e përgatitjes fizike.

Për ditët e nxehta, ajo rekomandoi shmangien e aktivitetit fizik në orët e pikut të temperaturave dhe zgjedhjen e orëve më të freskëta të ditës./ad

Analiza të fundit të bëra nga agjencitë amerikane të inteligjencës sugjerojnë se presidenti rus Vladimir Putin mund të përpiqet të testojë NATO-n duke kryer një sulm të kufizuar ndaj një vendi anëtar në vitet e ardhshme.

Tre burime në dijeni të çështjes kanë deklaruar se analizat e shërbimeve amerikane vënë në dukje skenarë të ndryshëm për përshkallëzimin që mund të vijë nga Rusia, të cilët variojnë nga sulmet kibernetike tek një inkursion në shkallë të ulët përmes të cilit të sfidojë unitetin e NATO-s dhe zotimin e vendeve anëtare për zbatimin e Nenit 5, që thotë se sulmi ndaj një vendi anëtar është një sulm ndaj gjithë organizatës.

Megjithatë, vijojnë burimet, kreu i Kremlinit nuk ka në plan të kalojë cakun për të shkaktuar një reagim të përgjithshëm të Aleancës.

Edhe pse nuk dihet me saktësi se kur mund ta ndërmarrë Putin një hap të tillë, burimet shtojnë se objektiva të tij mund të jenë vendet baltike ose Polonia – raporton “Wall Street Journal”, që citon burimet në fjalë.

Zyrtarët amerikanë dhe ata të NATO-s besojnë se Putin mund të zgjedhë ta zbatojë këtë skenar nëse nuk do të jetë në gjendje të shpëtojë reputacionin e tij nga një dështim eventual i luftës në Ukrainë.

Martin O’Donnell, një ish-zëdhënës i NATO-s, refuzoi të bënte komente mbi analizat që mbahen të klasifikuara, por tha se Aleanca po e ndjek situatën me vëmendje dhe po përgatitet për një sërë opsionesh.“NATO po mbikëqyr situatën dhe ne jemi gati të zmbrapsim dhe të mbrojmë për sa kohë nevojitet, gjë të cilën vazhdojmë ta tregojmë”, deklaroi O’Donnell./ad

Last Updated on 08/08/2026 by Anisa

Ministri i Brendshëm, Besfort Lamallari, tha se është arrestuari personi që ndezi zjarrin në Krujë këtë të shtunë, duke shkaktuar një situatë emergjence civile në zonë.

“Policia e Shtetit e ka arrestuar tashmë zjarrvënësin dhe ai do të përballet me pasojat e rënda ligjore për këtë vepër penale”, shkruan ministri Lamallari.

Në reagimin e tij, ministri thekson se autori do të përballet me pasojat ligjore për veprën penale, ndërsa strukturat policore vijojnë të jenë të angazhuara në terren për garantimin e sigurisë së banorëve. “Vijojmë të ndjekim nga afër betejën e vështirë me zjarrin në Krujë, që fatkeqësisht edhe kësaj radhe është shkaktuar nga dora e njeriut”, shprehet Lamallari.

Sipas ministrit, pas kërkesës së pushtetit vendor, Policia e Shtetit ka marrë masa për evakuimin e pjesshëm të banorëve që ndodhen në afërsi të vatrës së zjarrit, si masë parandaluese për garantimin e jetës dhe sigurisë së tyre.

“Çdo forcë është në terren dhe çdo mjet është në dispozicion deri në neutralizimin e plotë të rrezikut”, deklaron ministri i Brendshëm.

Operacioni në Krujë po zhvillohet në kushte të vështira për shkak të terrenit, me angazhimin e forcave tokësore dhe mbështetjen nga ajri. Strukturat zjarrfikëse dhe ato të emergjencave vijojnë punën për izolimin e vatrave dhe parandalimin e përhapjes së flakëve drejt zonave të banuara.

Të paktën tre persona, mes tyre një fëmijë, janë vrarë dhe tre të tjerë janë plagosur në sulmet ruse gjatë natës pranë Kievit, sipas autoriteteve ukrainase.

Raketat balistike goditën zonat në lindje të kryeqytetit ukrainas, duke shkaktuar viktima dhe dëme materiale. Kreu i administratës ushtarake rajonale, Timur, tha se tre persona të tjerë mbetën të plagosur nga sulmet.

Sulmi i fundit vjen vetëm disa ditë pasi 21 persona u vranë në një tjetër valë sulmesh ruse, ndërsa Ukraina përballet me mungesë të raketave interceptuese të përdorura për mbrojtjen e hapësirës ajrore.

Presidenti ukrainas Volodymyr Zelensky përsëriti të shtunën kërkesën për më shumë sisteme mbrojtëse Patriot të prodhuara në Shtetet e Bashkuara. Ai tha se furnizimet që po merr Ukraina nuk janë të mjaftueshme për të përballuar intensifikimin e sulmeve ruse.

Thirrja e Zelensky-t vjen disa ditë pasi presidenti amerikan Donald Trump duket se është tërhequr nga një premtim për t’i dhënë Ukrainës një licencë për prodhimin e sistemeve mbrojtëse. Megjithatë, Zelensky iu referua sërish të shtunën një marrëveshjeje me SHBA-në për këtë licencë.

Që prej ardhjes në detyrë të Trumpit, ndihma e drejtpërdrejtë ushtarake amerikane për Ukrainën është reduktuar. Në vend të saj, aleatët evropianë kanë blerë pajisje dhe furnizime amerikane, përfshirë raketa Patriot, për t’ia dorëzuar më pas Ukrainës.

“Ukraina nuk ka dhe as nuk do të ketë ndonjëherë fondet që ka Rusia, të cilat po i përdor për të financuar luftën”, tha Zelensky./ad

Todd Blanche, ish-avokati personal i Presidentit amerikan Donald Trump, është konfirmuar me një diferencë të ngushtë nga Senati si Prokuror i Përgjithshëm i Shteteve të Bashkuara, duke marrë drejtimin e postit më të lartë të zbatimit të ligjit në vend.

Blanche u konfirmua me 50 vota pro dhe 49 kundër. Dy senatore republikane, Susan Collins dhe Lisa Murkowski, iu bashkuan demokratëve duke votuar kundër emërimit të tij.

Vota vendimtare u dha nga senatori republikan Bill Cassidy, votimi i të cilit ishte veçanërisht i ndjekur për shkak të marrëdhënieve të tensionuara që ai ka pasur me Trump në të kaluarën.

Emërimi i Blanche ishte shoqëruar me debate dhe kundërshtime edhe brenda radhëve republikane. Disa senatorë ngritën shqetësime për mënyrën se si ai trajtoi publikimin e dokumenteve që lidhen me Jeffrey Epstein, si dhe për rolin e tij në krijimin e një fondi prej 1.8 miliardë dollarësh të lidhur me Trumpin.

Fondi ishte parashikuar të ofronte kompensim për individë që pretendonin se ishin përndjekur nga qeveria. Kritikët, mes tyre Murkowski, shprehën shqetësimin se fondet mund të përfundonin te persona të ndjekur penalisht për pjesëmarrjen në sulmin ndaj Kapitolit më 6 janar 2021.

Gjatë seancave të konfirmimit, Blanche u zotua se do ta tërhiqte fondin pas reagimeve të senatorëve republikanë. Megjithatë, mbetet e paqartë nëse ky angazhim është ligjërisht i detyrueshëm dhe nëse një skemë e ngjashme mund të rikthehet më vonë në një formë tjetër.

Murkowski tha se nuk kishte besim te Blanche për të “kontrolluar impulset më të këqija të kësaj administrate”, ndërsa theksoi shqetësimet e saj për politizimin e Departamentit të Drejtësisë.

Senatorja Susan Collins ngriti gjithashtu pikëpyetje për rolin e Blanche në zgjidhjen e një padie prej 10 miliardë dollarësh të Trump kundër Shërbimit të të Ardhurave të Brendshme (IRS). Megjithatë, ajo tha se në fund i besonte Blanche-s për t’i dhënë presidentit këshilla të sinqerta ligjore.

Senatori Bill Cassidy, përpara se të hidhte votën vendimtare, tha se Blanche ishte opsioni më i mirë që presidenti kishte paraqitur për këtë post.

“Ky nuk është një referendum për Presidentin Trump, është një vendim në lidhje me z. Blanche”, tha Cassidy, duke shtuar se, duke marrë parasysh të gjitha rrethanat, do të votonte pro konfirmimit të tij.

Cassidy ka pasur më parë përplasje me Trump. Gjatë procesit të dytë të shkarkimit të presidentit në vitin 2021, ai votoi për dënimin e Trumpit për rolin e tij në trazirat e 6 janarit në Kapitol.

Demokratët e kundërshtuan ashpër emërimin. Udhëheqësi demokrat i Senatit, Chuck Schumer, e akuzoi Blanche-n se kishte ndihmuar në avancimin e interesave të Trumpit dhe paralajmëroi se konfirmimi i tij mund të thellonte politizimin e Departamentit të Drejtësisë.

Në krahun tjetër, republikanët e përshëndetën konfirmimin. Senatori Chuck Grassley, kryetar i Komitetit Gjyqësor të Senatit, tha se Blanche kishte treguar “durim, dhembshuri dhe këmbëngulje të jashtëzakonshme” gjatë procesit të emërimit dhe se nuk kishte dyshim për kualifikimet e tij.

Blanche kishte shërbyer si zëvendësprokuror i përgjithshëm përpara se të merrte drejtimin e përkohshëm të Departamentit të Drejtësisë në prill, pas largimit të Pam Bondit.

Ai ka qenë gjithashtu avokati kryesor i Trump në çështjen penale të vitit 2024 lidhur me pagesën e parave për heshtje.

Ditëve super të nxehta të verës duket se po u vjen fundi. Meteorologia Tanja Porja, tha në Ditarin e Fundjavës në A2 CNN se i nxehti ekstrem mund të zgjasë dhe dy tre ditë, me temperatura të ngjashme. “Sigurisht që presim rënien të vlerave termike, por kjo është vala e nxehtësisë më intensive dhe presim që ky të jetë dhe kulmi i kësaj vere. Më pas, të gjitha tendencat janë të temperaturave në rënie, si në vlerat e mëngjesit ashtu edhe në të mesditës për ditët vijuese”, tha ajo.

“Fatkeqësisht rënia do të jetë shumë e lehtë dhe shumë graduale dhe presim që pas mesjavës tjetër ta kemi më të ndjeshme rënien e temperaturave. Pas datës 12-13 gusht presim ta ndjejmë rënien e vlerave termike ku termometri të zbres në 36 apo 37 dhe më pas në pjesën e dytë të gushtit normalisht presim një tjetër tablo termike”.

Kjo verë ka qenë jashtëzakonisht shumë e nxehtë vlerat maksimale në territor kanë qenë shumë të larta, tha Porja. “Po ta shohësh grafikun, që nga fillimi i qershorit deri në fund janë temperatura 35°C dhe mbi 35°C”.

Sipas meteorologes, për shkak të temperaturave të, kjo verë mund të jetë edhe më e nxehta në historinë e matjeve. “Në historinë matjeve, është vera 2023, vera e cila theu rekorde në të gjitha kontinentet. Sigurisht që pati temperatura ekstremisht të larta në të gjithë Europën dhe në Shqipëri. Nuk mund ta themi që 2026 do të jetë vera më e nxehtë. Do presim të mbarojë vera. Pra deri më 31 gusht. Por një gjë ju siguroj, që ky vit ka sinjale që të jetë viti më i nxehtë në historinë e matjeve”, tha Porja. /ad

Last Updated on 08/08/2026 by Anisa

Zjarri që ka përfshirë zonën e Abazës në Krujë vijon të mbajë në gatishmëri të lartë strukturat e emergjencave, ndërsa për shuarjen e flakëve po ndërhyhet nga toka dhe ajri.

Ministri i Mbrojtjes, Ermal Nufi, ka bërë me dije se ndodhet në terren bashkë me kolegun Besfort Lamallari, drejtuesin e AKMC-së dhe Drejtorin e Përgjithshëm të Zjarrfikësve, duke ndjekur nga afër situatën.

Sipas Nufit, zjarri është shkaktuar nga dora e njeriut, ndërsa prej pasdites operacioni është përforcuar me mbështetje ajrore.

“Që prej pasdites, po punohet intensivisht me mbështetje nga ajri me 3 helikopterë të Forcës Ajrore, bashkë me forcat operacionale të strukturave vendore”, deklaroi ministri.

Në terren janë angazhuar efektivë të MZSH-së nga Kruja, Kamza, Tirana dhe Vora, të cilët po punojnë për izolimin e vatrës dhe mbrojtjen e banesave të rrezikuara.

Ministri ka shprehur mirënjohje për pilotët e Forcës Ajrore dhe efektivët zjarrfikës për punën e tyre pa ndërprerje.

“Për shkak të terrenit të thepisur dhe vështirësisë së ndërhyrjes nga toka, operacioni po zhvillohet në mënyrë të koordinuar nga toka dhe ajri, me synim vënien sa më shpejt nën kontroll të zjarrit”, u shpreh Nufi./ad

Mediat shtetërore iraniane kanë publikuar një video të papublikuar më parë të liderit suprem të Iranit, Mojtaba Khamenei, ndërsa mungesa e tij në publik ka shtuar spekulimet për gjendjen e tij shëndetësore.

Pamjet, të cilat nuk kanë një datë të përcaktuar, tregojnë Khamenein teksa zhvillon një mësim fetar përpara një grupi njerëzish. Sipas raportimeve, videoja mund të jetë regjistruar përpara nisjes së luftës, ndërsa mediat që e publikuan nuk kanë dhënë detaje se kur janë xhiruar pamjet.

Kjo është videoja e parë e publikuar që nga emërimi i Mojtaba Khameneit në postin e liderit suprem në mars, pas vrasjes së babait të tij, Ali Khamenei, në fillim të luftës së Iranit.

Që prej marrjes së detyrës, Mojtaba Khamenei nuk është shfaqur publikisht dhe komunikimet e tij janë transmetuar përmes mediave shtetërore iraniane.

Publikimi i pamjeve të pa-datuara ka ngritur pikëpyetje të reja mbi vendndodhjen dhe gjendjen shëndetësore të liderit iranian. Media gjysmëzyrtare Mehr, e konsideruar pranë udhëheqjes iraniane, ishte ndër platformat që publikuan videon, ndërsa pamjet nuk janë shpërndarë gjerësisht nga mediat e tjera iraniane.

Më herët është raportuar se Mojtaba Khamenei kishte pësuar një frakturë në këmbë dhe dëmtime të lehta në fytyrë gjatë ditës së parë të fushatës së bombardimeve amerikane dhe izraelite.

Në pamjet e publikuara së fundmi nuk dallohen shenja të dukshme të këtyre dëmtimeve. Megjithatë, mungesa e një date për videon e bën të pamundur përcaktimin se kur janë regjistruar saktësisht pamjet./ad

Omani e dënoi sulmin e fundit ndaj një anijeje në Ngushticën e Hormuzit – që dyshohet se është kryer nga Irani – teksa tha se bisedimet me Teheranin për arritjen e një marrëveshjeje për një rrugë të re përmes kësaj ngushtice janë “pozitive” dhe “konstruktive”.

Ministria e Jashtme e Omanit, më 8 gusht, “dënon sulmet e përsëritura ndaj anijeve që kalojnë përmes Ngushticës së Hormuzit, të cilat përbëjnë shkelje të së drejtës ndërkombëtare dhe të sovranitetit mbi ujërat territoriale, si dhe kërcënojnë sigurinë e lundrimit detar dhe sigurinë e stabilitetin e rajonit”.

Në një postim në X, ajo shtoi se “negociatat lidhur me lundrimin në Ngushticën e Hormuzit po zhvillohen në një atmosferë pozitive dhe konstruktive”.

Ministria e Jashtme e Omanit theksoi po ashtu “rëndësinë e shmangies së çdo veprimi që mund të ndikojë në këto negociata dhe në përparimin e arritur, duke marrë parasysh interesat e të gjitha palëve”.

Emiratet e Bashkuara Arabe thanë se Irani ka shënjestruar një anije cisternë që i përket kompanisë shtetërore të naftës, teksa ajo po kalonte nëpër ngushticë më 8 gusht.

Ministria e Jashtme e Emirateve të Bashkuara Arabe e dënoi atë që e cilësoi si “sulm armiqësor iranian që shënjestroi një cisternë”, duke shtuar se një raketë shkaktoi dëme, por nuk ka viktima.

Nga Ylli Manjani

Në fakt, Erjon Bani nuk ka bërë ndonjë shpikje me rregulloren e re. Ka shkruar në letër, pak a shumë, atë që ndodh sot e gjithë ditën në GJKKO.

Gazetarët nuk lejohen të filmojnë brenda sallës së gjyqit dhe as të komunikojnë me jashtë gjatë seancës. Janë vendosur në të njëjtin regjim me dëgjuesit e thjeshtë, të cilët, duhet thënë, janë shumë të paktë në numër.

Pra, rregullorja rregullon mënyrën se si është sot gjykimi. Por nuk i përgjigjet pyetjes themelore: a janë vërtet gjyqet të hapura për publikun?

Sepse ka disa gjëra për të cilat kjo rregullore nuk thotë asgjë. Besoj se ka detyrë e as mundësi ta thotë.

Së pari, nuk thotë asgjë për gjyqet e mbyllura në dhomën e këshillimit, ku mund të merret një vendim për lirinë, pasurinë apo privatësinë e një njeriu pa u pyetur ai, ndonjëherë, as edhe një herë të vetme. Aty nuk kemi thjesht një problem me praninë e gazetarëve. Kemi një problem me vetë konceptin e procesit të hapur dhe kontradiktor.

Së dyti, nuk thotë asgjë për kafazet e blinduara, të përdorura në mënyrë të pakuptimtë dhe, në jo pak raste, në një formë që prek dinjitetin e të pandehurit dhe e vështirëson faktikisht komunikimin e tij me mbrojtjen. Debat i pazgjidhur ky sot e gjithë ditën.

Së treti, nuk thotë asgjë për rastet kur vendimmarrja gjyqësore duket sikur i nënshtrohet organizimit të Policisë së Burgjeve dhe jo autoritetit të gjyqtarit, i cili duhet të jetë zot në sallën e gjyqit. Siguria është e domosdoshme, por ajo nuk mund të kthehet në administrim të drejtësisë nga struktura që kanë detyrë vetëm ta garantojnë atë.

Së katërti, nuk zgjidh problemin e së drejtës së publikut për t’u informuar besnikërisht për atë që thuhet në sallën e gjyqit nga të dyja palët. Publiku ka të drejtë të dëgjojë jo vetëm versionin e akuzës, që shpesh serviret si lajm i spin-uar, por edhe versionin e mbrojtjes.

Së pesti, nuk merret me një fenomen edhe më shqetësues: nxjerrjen e materialeve hetimore dhe gjyqësore jashtë kontekstit penal, për t’i përdorur më pas për të ndërtuar një gjyq popullor jashtë sallës së gjyqit.

Kjo është paradoksale.

Rregullorja thjesht shkruan në letër atë që sot ndodh, nën arsyen e sigurisë në sallën e gjyqit.

Por siguria në sallat e GJKKO-së është, në përgjithësi, shumë e mirë. Dhe nuk është se kemi parë ndonjë epidemi incidentesh që të justifikojë mbylljen e procesit ndaj publikut.

Problemi real ka qenë dhe mbetet tjetër:

Si t’i bëjmë të mundur publikut të informohet për të vërtetën e asaj që ndodh në gjykatë?

Këtu rregullorja hesht.

Dhe nuk mund të thotë më shumë, sepse këtë problem nuk e zgjidh një rregullore administrative.

Mund ta zgjidhë teknologjia.

Për shembull, vendosja e kamerave zyrtare në sallat e gjyqit, me transmetim të kontrolluar në internet, do të ishte një ndryshim shumë më i madh se kjo rregullore. Do të zgjidhte njëkohësisht dy probleme: sigurinë dhe transparencën.

Do të kishte më pak nevojë për praninë fizike të dhjetëra njerëzve në sallë dhe, në të njëjtën kohë, shumë më tepër mundësi që publiku të ndiqte drejtpërdrejt atë që ndodh.

Sepse principi i gjyqit të hapur nuk bazohet te nevoja e publikut për të parë fotografi të fundshpinave dëshmitarëve VIP, as tek video VIP-eshave që ngjajnë si në pasarela
mode para gjykatës, as nga pamje të kapura fshehurazi nga gazetarët në përpjekje për të bërë një lajm.

Gjyqi i hapur bazohet te nevoja e publikut për të njohur të vërtetën e njerëzve që vendosen ligjërisht nën betim dhe për të dëgjuar atë që pretendohet e kundërshtohet në sallën e gjyqit.

Jo të vërtetat e sugjeruara fshehtas për persona nën hetim.

E drejta penale është pjesë e së drejtës publike. Për këtë arsye ajo kërkon, minimalisht, vëmendjen e interesit publik. Edhe palët në procesin penal ushtrojnë funksionet e tyre në një mjedis që gjithmonë është publik.

Prandaj, sa më shumë që procesi largohet nga vëmendja e publikut, aq më shumë rrezikon të marrë pamjen e një çështjeje private. Nuk mund të ngjajë drejtësia penale si e drejtë cubash.

Natyrisht, ka raste të veçanta ku kufizimi i publicitetit është i domosdoshëm. Dëshmia e një të mituri, çështjet me natyrë intime apo rrethana të tjera të ngjajshme që mund të kërkojnë mbrojtje të veçantë.

Por këto janë përjashtime.

Baza e gjykimit në sallën e gjyqit është hapja ndaj interesit publik.

Ndërsa ajo që po ndodh sot është paksa groteske: gazetarët nuk mund të filmojnë atë që ndodh në sallën e gjyqit, por përpiqen të gjejnë një fotografi të bërë fshehurazi, një video të shkrepur në korridor, një pamje të një dëshmitari apo të një të pandehuri jashtë sallës.

Kjo nuk është informim.

Dhe aq më pak është gjyq i hapur.

Rregullorja Bani, pra, nuk i hap gjyqet. Ajo thjesht rihap debatin për gjyqet e pahapura dhe, bashkë me të, edhe debatin për gjyqet popullore që zhvillohen jashtë sallës së gjyqit.

Këtë nuk mund ta zgjidhë Erjon Bani. Nuk mund ta zgjidhë as KLGJ-ja.

Këtë duhet ta zgjidhë Parlamenti i Republikës me një ligj të ri.

Një ligj që, para së gjithash, të vendosë qartë parimin e hapjes së gjykimit në sallën e gjyqit, duke përcaktuar edhe mënyrën moderne të informimit të publikut për atë që ndodh aty.

Sepse drejtësia nuk mund të katandiset në një portal, në një podcast apo në një faqe pa identitet në rrjetet sociale, ku publiku merr copëza të procesit nga burime që askush nuk i kontrollon.

Gjykata duhet të jetë burimi i parë, i drejtpërdrejtë dhe i besueshëm i asaj që ndodh në gjykatë.

Përndryshe, kemi gjithçka tjetër: lajme, versione, rrjedhje, video, komente, gjyqe popullore.

Vetëm gjyqin e hapur nuk e kemi.

Forcat e RENEA-s kanë nisur kontrollet në varrezat e qytetit të Korçës, për kapjen e autorit të dyshuar të vrasjes së 20-vjeçarit Joan Zhuko.

Sipas informacioneve paraprake, Kristjan Sterjo, i dyshuari për vrasjen, është parë në këtë zonë pas ngjarjes. Për këtë arsye, forcat speciale kanë përqendruar kërkimet në varrezat e qytetit.

Kontrollet u zhvilluan edhe pranë banesës së Kristjan Sterjos, por nuk kanë mundur ta gjejnë./ad

Kozeta Shagla banore e pallatit ku u vra dhe 20-vjeçari Joan Zhuko në Korçë, ka rrëfyer momentet e para pas të shtënave.

Shagla tregon se ndodhej në banesë së bashku me nënën e saj kur dëgjoi një zhurmë të fortë dhe doli nga banesa për të parë se çfarë kishte ndodhur. Ajo tregon se sapo doli ishte momenti kur pa dhe viktimën të shtrirë përtokë.

“Unë isha brenda në shtëpi. Dëgjova një zhurmë të madhe, sikur plasi diçka. I thashë mamit se do të dilja të shikoja çfarë po bëhej, mos kishte rënë ndonjë njeri nga shkallët që ta ndihmoja. Ngjitem unë me vrap dhe shikoj një njeri të shtrirë poshtë në tokë, barkas. Nuk e mblidhja dot veten fare.

Pashë djalin të shtrirë poshtë, rreth dy metra, dhe po i rridhte gjak nga koka. Nuk e harroj atë skenë”.

Ajo thekson se nuk e njihte viktimën dhe se 20-vjeçari nuk ishte banor i pallatit.

“Nuk e njohim fare. S’është i pallatit, nuk është i pallatit tonë. Nuk e njihja fare. Nuk e di as ku banonte. Është tmerr. Një tronditje e madhe. Është tmerr i Zotit. Ne këtu na luajnë fëmijët çdo ditë. Nuk e kuptoj çfarë po bëhet. Unë nuk e preka me dorë. Nuk e preka me dorë. Por atë skenë nuk e harroj”, u shpreh ajo.

Sipas saj, policia mbërriti fillimisht në vendngjarje, ndërsa më pas mbërritën edhe ekipet mjekësore./ad

Gjendja shëndetësore e ish-presidentit amerikan Joe Biden është rënduar. Djali i tij, Hunter Biden, ka deklaruar se kanceri i prostatës është përhapur më tej dhe se 83-vjeçari po përjeton dhimbje të forta dhe lodhje.

Në një intervistë për emisionin “Newsnight” të BBC-së, Hunter Biden foli hapur për betejën e babait të tij me sëmundjen, duke e cilësuar situatën si tepër të vështirë për familjen.

Joe Biden u diagnostikua në maj të vitit 2025 me një formë agresive të kancerit të prostatës, i cili në momentin e diagnostikimit ishte përhapur në kocka. Sipas Hunter Biden, sëmundja tashmë është përhapur edhe më tej.

“Është vërtet e vështirë. Është shumë e trishtueshme ta shohësh”, tha Hunter, duke shtuar se pavarësisht gjendjes së rënduar, babai i tij vazhdon të jetë qendra e familjes.

Hunter Biden foli gjithashtu për faljen presidenciale që mori nga Joe Biden në dhjetor 2024, si dhe për betejën e tij me varësinë nga alkooli dhe kokaina.

Ai tha se nuk ka ndërmend të hyjë në politikë, por dëshiron të përdorë përvojën e tij për të folur më shumë rreth varësisë dhe procesit të rikuperimit./ad

Ekonomia shqiptare po hyn në vitin 2026 me disa tregues pozitivë, të reflektuar në rritjen e të ardhurave për frymë, pagave dhe punësimit. Sipas të dhënave të prezantuara, të ardhurat për frymë parashikohet të arrijnë në 12,200 deri në fund të vitit 2026, nga 11,355 euro në vitin 2025, me një rritje prej 845 eurosh. Nga ana tjetër, Ministri Petrit Malaj u shpreh se objektivi është që deri në vitin 2029 niveli i të ardhurave për frymë të arrijë në 15 mijë euro.

Një tjetër tregues i rëndësishëm është inflacioni i cili u raportua në 2.7%, ndër normat më të ulëta në Ballkanin Perëndimor, çka ndihmon në ruajtjen e fuqisë blerëse të familjeve, veçanërisht nëse shoqërohet me rritje të qëndrueshme të pagave.

Në tregun e punës, papunësia ka vijuar të bjerë në 8.4% dhe është në nivelin më të ulët të raportuar deri tani. Paralelisht, paga mesatare është rritur, me një ritëm më të dukshëm në sektorin publik, por edhe në atë privat.

Të dhënat tregojnë gjithashtu një zhvendosje të punësimit drejt niveleve më të larta të pagave, çka lidhet edhe me formalizimin e tregut të punës.

Në tërësi, kombinimi i rritjes së pagave, rënies së papunësisë dhe inflacionit të moderuar krijon një tablo më pozitive për fuqinë blerëse. Megjithatë, ndikimi real në standardin e jetesës varet nga sa e qëndrueshme do të jetë kjo rritje dhe nëse përfitimet shpërndahen në mënyrë të njëtrajtshme në ekonomi./ad

Modeli “8:00 me 5:00” vazhdon të jetë norma për pjesën më të madhe të tregut të punës në Shqipëri. Por, në sektorët ku rëndësi ka rezultati, prania fizike po humbet disi peshë. Të jesh në zyrë nuk do të thotë gjithmonë se ke qenë produktiv. Ekspertët e menaxhimit të burimeve njerëzore shprehen se për shumë profesione, orari dhe prania mbeten të domosdoshme, por për disa punë intelektuale, matësi po ndryshon. Cilësia, ndikimi dhe përmbushja e objektivave po marrin peshë më të lartë se numri i orëve në tavolinë. Kjo nuk do të thotë se puna fleksibël funksionon pa rregulla. Sipas tyre, ajo kërkon procese të qarta, objektiva të matshëm dhe përgjegjësi. Në finale, zyra nuk po zhduket, thjesht po përdoret ndryshe.Kultura e punës po ndahet gjithnjë e më qartë mes dy anëve. Njëra vazhdon ta masë punonjësin me orën e hyrjes dhe të daljes, tjetra kërkon të dijë se çfarë ka bërë ai gjatë ditës.

Teknologjia, puna hibride dhe kërkesa për fleksibilitet po e dobësojnë modelin “8:00 me 5:00”, por nuk po e zëvendësojnë atë në mënyrë të njëtrajtshme. Në profesionet ku prania fizike është pjesë e shërbimit, koha mbetet matësi më praktik.

Në punët intelektuale, ajo po humbet gradualisht peshë përballë rezultateve, cilësisë dhe ndikimit.

Tregu i punës po përpiqet të funksionojë me dy sisteme njëkohësisht: me një kuadër ligjor të ndërtuar mbi orët dhe me modele menaxhimi që shpërblejnë gjithnjë e më shumë produktivitetin.

Pikërisht në këtë hendek merr kuptim edhe vendimi nr. 00-2022-4578 (582), datë 22 dhjetor 2022, i Gjykatës së Lartë, që herë pas here lakohet në rrethin e ekspertëve për standardin që vendos.

Ai vuri në dyshim një listë-prezencë të krijuar në mënyrë të njëanshme nga punëdhënësi. Çështja nuk është vetëm nëse punonjësi ishte në zyrë, por nëse prania e tij mund të provohet në mënyrë të besueshme dhe, më gjerë, nëse prania është ende matësi më i mirë i punës.

“Vendimi i gjykatës nuk e kundërshton rëndësinë e orëve të punës, ai vë në diskutim besueshmërinë e një dokumenti të prodhuar në mënyrë të njëanshme”, thotë Erald Pashaj, Drejtor Ekzekutiv në EPPC Albania & Kosovo, një nga kompanitë më të mëdha për burimet njerëzore në vend.

Sipas tij, lista duhet të regjistrojë hyrjen dhe daljen e punonjësit fizikisht ose përmes një sistemi elektronik të besueshëm. Kur punëdhënësi prodhon vetë dokumentin dhe paraqet vetëm versionin e tij, fuqia e provës dobësohet.

Vendimi nuk e shpall fundin e listë-prezencës. Por ai e kthen atë në simbol të një debati që po bëhet gjithnjë e më i rëndësishëm: a duhet puna të vazhdojë të matet kryesisht me orë, apo ekonomia po kalon drejt një kulture ku më shumë rëndësi kanë objektivat, cilësia dhe produktiviteti?

Ora si monedha e punës, situata në Shqipëri

Modeli “8:00 me 5:00” nuk është vetëm një zakon organizativ. Ai është produkt i një historie të gjatë ekonomike dhe juridike. Para industrializimit, një fermer, zejtar apo tregtar zakonisht paguhej për produktin që dorëzonte.

Revolucioni Industrial e ndryshoi këtë marrëdhënie, punëtori nisi t’i shiste pronarit një pjesë të ditës së tij.

“Me industrializimin, punëdhënësi nisi të blinte kohën e punëmarrësit”, thotë z. Pashaj. Ai shton se në fillimet e këtij modeli, dita e punës mund të zgjaste 12 ose 16 orë. Me kalimin e kohës u vendosën kufij ligjorë, ditët e pushimit dhe pagesat shtesë, por parimi mbeti i njëjtë: njësia bazë e marrëdhënies ishte ora.

Edhe sot, Kodi i Punës në Shqipëri ndërtohet mbi këtë logjikë. Ai përcakton javën 40-orëshe, pagesën për orët shtesë, punën gjatë natës dhe kompensimet për punën në ditët e pushimit. Për një pjesë të madhe të ekonomisë, kjo është ende mënyra më e kuptueshme dhe më praktike e matjes.

Një shitës nuk mund të ofrojë shërbim në një dyqan të mbyllur. Një kamerier, hidraulik, kuzhinier apo punonjës sporteli prodhon vlerë duke qenë fizikisht në dispozicion. Në këto profesione, koha dhe rezultati janë të lidhura ngushtë.

Sa më gjatë të jetë hapur një dyqan, aq më shumë mundësi ka për shitje. Sa më gjatë të funksionojë një sportel, aq më shumë qytetarë mund të shërbehen.

Të paktën kështu argumenton z. Pashaj, i cili shton se Shqipëria mbetet një ekonomi ku pjesa më e madhe e punës nuk zhvillohet në financë të avancuar, kërkim shkencor apo industri inovative. Për rrjedhojë, në një pjesë të konsiderueshme të sektorit privat dhe të administratës, produktiviteti vazhdon të lidhet me orët e punës.

Nga ana tjetër, Hergert Hoxha, Menaxher i Burimeve Njerëzore në Deloitte Albania, e sheh kufirin e këtij modeli pikërisht te natyra e punës. Sipas tij, pandemia tregoi se në shumë profesione, rezultatet mund të arrihen edhe pa qenë fizikisht në zyrë gjatë gjithë ditës, edhe pse jo çdo industri apo rol mund të funksionojë me të njëjtin nivel fleksibiliteti.

Lista e prezencës, në këtë kuptim, nuk është domosdoshmërisht një relike e epokës industriale. Ajo mbetet instrument kontrolli dhe menaxhimi për role ku prania është pjesë e shërbimit. Problemi nis kur përdoret si matësi i vetëm edhe për punë ku prania nuk tregon pothuajse asgjë për cilësinë e rezultatit.

Prania nuk është performancë, si po evoluon qasja

Një gazetar mund të qëndrojë tetë orë në redaksi dhe të mos shkruajë një artikull të vlefshëm. Një programues mund të zgjidhë një problem kompleks brenda dy orësh. Një konsulent mund të punojë jashtë zyrës dhe të dorëzojë një projekt më të mirë sesa një koleg që ka qenë i pranishëm gjatë gjithë ditës.

Pikërisht në këto profesione, lidhja mes kohës së kaluar në zyrë dhe produktivitetit bëhet më e dobët. Rritja e punës intelektuale dhe përhapja e teknologjisë po i shtyjnë kompanitë të kërkojnë matës të tjerë.

Deloitte Albania është një shembull i kësaj qasjeje. Kompania kaloi me shpejtësi në punë online gjatë pandemisë, e ndihmuar nga investimet e mëparshme në teknologji dhe procese digjitale.

Më pas përdori modelin Deloitte Flex, i cili ndërthur punën nga distanca me praninë në zyrë.

“Performanca nuk matet me numrin e orëve të kaluara në zyrë, por me rezultatet, cilësinë e punës, bashkëpunimin dhe ndikimin që secili profesionist krijon”, thotë z. Hoxha. Sipas tij, fleksibiliteti u lejon punonjësve të organizojnë më mirë kohën, ndërsa kompania synon ekipe më të motivuara, produktive dhe të angazhuara.

Por kalimi nga ora te rezultati nuk e eliminon kontrollin. Ai vetëm e zhvendos atë. Në vend të listë-prezencës, organizata duhet të ketë objektiva të qarta, pritshmëri të mirëpërcaktuara, afate dhe mekanizma të vazhdueshëm monitorimi.

Z. Hoxha shpjegon se në Deloitte Albania, performanca vlerësohet sipas rezultateve dhe ndikimit në projekt dhe në ekip. Objektivat janë të qarta, pritshmëritë janë të mirëpërcaktuara dhe progresi monitorohet përmes sistemeve dhe platformave digjitale që mundësojnë bashkëpunimin në distancë.

Kjo e bën modelin e ri më pak të dukshëm, por jo më pak kërkues. Një drejtues mund të shohë menjëherë nëse një punonjës është ulur në tavolinë. Është shumë më e vështirë të përcaktojë nëse analiza e tij ishte e thellë, nëse këshilla për klientin ishte e dobishme apo nëse një projekt u përfundua me cilësinë e duhur.

Edhe objektivat kanë kufizimet e tyre. Sasia është relativisht e lehtë për t’u matur: numri i faturave, raporteve, artikujve apo aplikimeve të përpunuara. Cilësia është më e debatueshme. Një punonjës mund të dorëzojë shumë produkte, por jo domosdoshmërisht produkte të mira.

“Nuk ekziston një sistem që garanton objektivitet 100 për qind”, thotë z. Pashaj. Sipas tij, synimi duhet të jetë zvogëlimi i subjektivitetit përmes objektivave të matshëm dhe treguesve të krahasueshëm.

Besimi nuk e zëvendëson llogaridhënien

Debati për punën fleksibël shpesh paraqitet si përplasje mes dy kulturave: punëdhënësve që kërkojnë kontroll dhe punonjësve që kërkojnë besim. Në praktikë, asnjëra nuk është e mjaftueshme më vete.

“Nuk ka organizatë që menaxhohet vetëm me besim”, thotë z. Pashaj, duke shtuar se organizatat kanë nevojë për procese, kërkesa dhe pritshmëri të qarta, veçanërisht kur kontakti i përditshëm mes punonjësit dhe drejtuesit zvogëlohet.

Z. Hoxha, nga ana tjetër, thekson se organizatat duhet të investojnë në procese, teknologji dhe aftësi menaxheriale që ndërtojnë besim, ndërsa punonjësit duhet të demonstrojnë autonomi, disiplinë dhe përgjegjësi. “Besimi nuk zëvendëson llogaridhënien, ai e forcon atë”, thotë z. Hoxha.

Modeli i Deloitte Albania është 3+2: tri ditë punë në distancë dhe dy ditë në zyrë. Z. Hoxha shpjegon se ditët e pranisë fizike përdoren kryesisht për aktivitete ku kontakti i drejtpërdrejtë sjell më shumë vlerë, si brainstorming-u, mentorimi, trajnimi dhe bashkëpunimi mes ekipeve.

Kjo tregon se zyra nuk po zhduket. Ajo po ndryshon funksion. Në modelin tradicional, zyra ishte vendi ku zhvillohej puna. Në modelin hibrid, ajo bëhet gjithnjë e më shumë vendi ku ndërtohen marrëdhëniet, kultura dhe njohuritë që është e vështirë të transmetohen përmes një ekrani.

Z. Hoxha thotë se prania fizike mbetet e rëndësishme për ndërtimin e marrëdhënieve, zhvillimin profesional, shkëmbimin spontan të ideve dhe forcimin e ndjenjës së përkatësisë. Për këtë arsye, ai e konsideron modelin hibrid si zgjidhjen më të balancuar mes fleksibilitetit dhe kulturës organizative.

Edhe z. Pashaj vendos një kufi të qartë: jo çdo rol mund të shkëputet nga prania fizike. Një shitës, faturist apo punonjës shërbimi prodhon rezultat pikërisht duke qenë në dispozicion. Për shumë profesione, koha e pranisë dhe rezultati ekonomik mbeten të lidhura drejtpërdrejt.

Prandaj, pyetja nuk është nëse modeli “8:00 me 5:00” do të zbehet. Ka më shumë gjasa që tregu i punës të ndahet. Për disa punonjës, ora do të vazhdojë të jetë produkti që shesin. Për të tjerë, ajo do të jetë vetëm një nga disa treguesit e kontributit.

Vendimi i Gjykatës së Lartë nuk e zgjidh këtë debat. Ai vetëm kujton se edhe kur puna matet me kohë, matja duhet të jetë e besueshme. Një tabelë e plotësuar nga njëra palë nuk mjafton domosdoshmërisht për të provuar se tjetra nuk ka punuar. Epoka e listë-prezencës mund të mos ketë përfunduar.

Por koha kur prania në zyrë merrej automatikisht si provë e produktivitetit duket se po merr fund./monitor-ad