SARAJEVË, 29 korrik /ATSH/ Autoritetet në Bosnjë dhe Hercegovinë kanë nisur hetimet për një akt vandalizmi në shenjtëroren e Medjugorjes, një nga qendrat më të njohura të pelegrinazhit katolik në botë.

Sipas autoriteteve dhe mediave ndërkombëtare, statuja e Zojës së Medjugorjes është lyer me bojë të zezë, ndërsa altarit të jashtëm pranë kishës së Shën Jakobit i është vënë zjarri me lëndë djegëse. Flakët janë shuar shpejt dhe nuk janë përhapur në kishë, por kanë shkaktuar dëme materiale në altar.

Pamjet e kamerave të sigurisë tregojnë një person duke hedhur lëndë djegëse përpara se t’i vinte flakën altarit. Në vendngjarje u gjetën gjithashtu mbishkrime fyese dhe një banderolë në gjuhën polake, ku vegimtarët e Medjugorjes cilësoheshin si “mashtrues”.

Sipas mediave italiane, policia ka arrestuar një shtetas polak 31-vjeçar, i dyshuar si autor i sulmit, ndërsa hetimet për motivet e ngjarjes vijojnë.

Shenjtërorja e Medjugorjes, e cila tërheq çdo vit qindra mijëra pelegrinë nga e gjithë bota, mbetet e hapur për besimtarët dhe aktivitetet fetare po zhvillohen normalisht.

The post Vandalizohet statuja e Zojës së Medjugorjes, i vihet flaka edhe altarit të jashtëm appeared first on Agjencia Telegrafike Shqiptare.

HIMARË, 26 korrik /ATSH/ Edicioni i gjashtë i Porto Palermo Festival u çel me aktivitetin ndërgjegjësues “Preserving our Sea 4”, duke vendosur në qendër të vëmendjes mbrojtjen e mjedisit dhe pastrimin e bregdetit.

Nisma, e organizuar nga artisti Olen Çezari, gjeti mbështetjen e Bashkisë Himarë, e cila e konsideron mbrojtjen e mjedisit një nga objektivat e saj themelorë.

Aktivitetit të pastrimit iu bashkua edhe kryetari i Bashkisë Himarë, Vangjel Tavo, i cili u bëri thirrje qytetarëve dhe vizitorëve të kontribuojnë në ruajtjen e pastërtisë së bregdetit.

“I bëj thirrje çdo qytetari, vizitori dhe kalimtari që ta mbajë pastër bregdetin dhe detin, sepse është pasuria më e çmuar që ne kemi”, u shpreh Tavo.

Porto Palermo Festival do të vijojë deri më 16 gusht, duke sjellë në Himarë dhjetëra artistë dhe mijëra artdashës, të cilët, krahas koncerteve, do të kenë mundësi të shijojnë edhe peizazhin dhe pasuritë natyrore të bregdetit shqiptar.

The post Porto Palermo Festival nis me mesazhin për mbrojtjen e detit dhe mjedisit appeared first on Agjencia Telegrafike Shqiptare.

Vlorë, 26 korrik /ATSH/ Një zjarr i përmasave të mëdha ka përfshirë pasditen e së dielës Pyllin e Sodës në Vlorë, duke krijuar një re të dendur tymi që ka mbuluar një pjesë të mirë të qytetit. Vatra e zjarrit është shfaqur në pyllin me pisha pranë vijës hekurudhore, në zonën e Zvërnecit. 

Menjëherë pas marrjes së njoftimit, në vendngjarje janë angazhuar forcat e Policisë dhe shërbimet zjarrfikëse, të cilat po punojnë për izolimin dhe shuarjen e flakëve. Sipas të dhënave paraprake, ndërhyrja është vështirësuar nga bimësia e dendur, temperaturat e larta dhe era, të cilat favorizojnë përhapjen e zjarrit. 

Sipas burimeve nga shërbimi zjarrfikës, në territorin e bashkisë Vlorë janë aktive pesë vatra zjarri njëkohësisht, çka ka vështirësuar shpërndarjen e forcave në terren. Përveç Pyllit të Sodës, ndërhyrje po kryhen edhe në Dukat, pranë tunelit të Llogarasë, në zonën e Parkut të Mallrave dhe në Triport. 

Deri në këto momente nuk ka të dhëna zyrtare për sipërfaqen e përfshirë nga flakët apo për shkaqet e zjarrit, ndërsa autoritetet vijojnë operacionin për vënien e situatës nën kontroll. 

The post Zjarr në Pyllin e Sodës, vijon operacioni për vënien nën kontroll të flakëve appeared first on Agjencia Telegrafike Shqiptare.

TIRANË, 26 kotrik, ATSH/ Regjisori fitues i çmimit Oscar, Christopher Nolan, ka zbuluar se lidhja me qenin e tij ndryshoi mënyrën si e pa historinë e “The Odyssey” duke e shtyrë të sjellë në ekran një nga epet më të mëdha të letërsisë botërore.

Në një intervistë për BBC Radio, Nolan rrëfeu se nuk ishte rritur me qen, por pasi adoptoi qenin e tij, kuptoi thellësinë e marrëdhënies mes njeriut dhe kafshës.

“Nuk u rrita me një qen. Më pas mora një dhe ai ta ndryshon jetën. Kur arrita te historia e Argosit, më shkatërroi emocionalisht. Ishte sinqerisht një nga arsyet kryesore që e kuptova se duhej ta realizoja këtë film,” tha ai.

Për t’i dhënë sa më shumë autenticitet ekranizimit, ekipi i filmit zgjodhi që Argosi të interpretohej nga një Portuguese Podengo, një racë e lashtë qensh gjuetie me origjinë në Gadishullin Iberik. Konsiderohet një nga racat më të vjetra në botë dhe u përzgjodh pikërisht për ngjashmërinë me qentë e epokës së Homerit.
Argosi, qeni besnik i Odisesë në poemën e Homerit, njihet si simbol i përkushtimit të pakushtëzuar. Ai pret për vite të tëra kthimin e të zotit dhe e njeh menjëherë sapo Odisea rikthehet në Itakë pas 20 vitesh.

The post Christopher Nolan: Qeni më frymëzoi të realizoj “The Odyssey” appeared first on Agjencia Telegrafike Shqiptare.

Berlin, 26 korrik /ATSH/ Një person humbi jetën dhe të paktën 16 të tjerë mbetën të plagosur, disa prej tyre në gjendje kritike, pasi një furgon u përplas me turmën gjatë festimeve të paradës së komunitetit LGBTQ+, Christopher Street Day (CSD), në Berlin. 

Sipas policisë gjermane, incidenti ndodhi pranë parkut Tiergarten, afër itinerarit të paradës, një nga aktivitetet më të mëdha të këtij lloji në Evropë. Pas ngjarjes, autoritetet ndërprenë menjëherë paradën dhe koncertin e planifikuar, ndërsa u bënë thirrje pjesëmarrësve të largoheshin nga zona. 

Policia njoftoi se drejtuesi i automjetit u largua nga vendngjarja dhe vijojnë kërkimet për kapjen e tij. Hetimet janë në vazhdim për të përcaktuar motivin e ngjarjes dhe nëse bëhet fjalë për një sulm të qëllimshëm. 

Kryebashkiaku i Berlinit, Kai Wegner, e dënoi incidentin, duke e cilësuar atë si një sulm ndaj një shoqërie të lirë dhe tolerante, ndërsa shprehu solidaritetin me viktimat dhe familjet e tyre. 

The post Një i vdekur dhe 16 të plagosur pasi një furgon u përplas me turmën në Paradën e Krenarisë në Berlin appeared first on Agjencia Telegrafike Shqiptare.

TIRANË, 22 korrik /ATSH/ – Ikona e muzikës italiane, Zucchero, elektrizoi mbrëmjen e djeshme Pallatin e Kongreseve, duke sjellë një koncert që u shndërrua në një festë të vërtetë të blues-it, rock-ut dhe soul-it. Me zërin e tij karakteristik dhe energjinë që e ka shoqëruar prej dekadash në skenat botërore, artisti bëri që publiku ta shoqëronte pothuajse çdo këngë me duartrokitje.

Salla ishte e mbushur plot, ndërsa artisti legjendar interpretoi disa prej hiteve më të dashura të karrierës së tij, mes tyre “Senza una donna”, “Baila (Sexy Thing)”, “Diamante”, “Il Volo” dhe “Diavolo in me”, të kënduara në kor nga publiku.

I shoqëruar nga një bandë muzikantësh të nivelit të lartë dhe një seksion frymorësh që i dha koncertit energji fantastike, Zucchero krijoi atmosferën karakteristike që e ka bërë një nga emrat më të rëndësishëm të blues, rock dhe soul në Evropë. Gjatë mbrëmjes ai alternoi momentet intime me shpërthime ritmike, duke mbajtur publikun në këmbë për pjesën më të madhe të koncertit.

Zucchero falënderoi publikun shqiptar për mikpritjen dhe atmosferën e krijuar gjatë gjithë mbrëmjes. Artisti u shpreh i emocionuar nga pritja e ngrohtë në Tiranë, ndërsa u përshëndet me duartrokitje të gjata dhe ovacione nga të pranishmit.

Koncerti në Tiranë u zhvillua në kuadër të turneut “Overdose D’Amore Gold – World Tour 2026”, duke sjellë për herë të parë në kryeqytet një nga artistët më të suksesshëm italianë të dekadave të fundit.

Me mbi 60 milionë albume të shitura në mbarë botën dhe bashkëpunime me emra si Eric Clapton, Sting, Bono, Andrea Bocelli, Brian May dhe Luciano Pavarotti, Zucchero mbetet një nga ambasadorët më të njohur të muzikës italiane në skenën ndërkombëtare.

The post Zucchero sjell magjinë e blues, rock dhe soul në Tiranë appeared first on Agjencia Telegrafike Shqiptare.

TIRANË, 21 korrik, ATSH/ Përveç golit që i dha Spanjës titullin e kampiones së botës, Ferran Torres njihet edhe për angazhimin e tij në mbrojtje të kafshëve, veçanërisht të qenve endacakë.

Sulmuesi i Barcelonës është ambasador i organizatës Wild at Heart Foundation që prej vitit 2021, duke mbështetur fushatat për shpëtimin dhe adoptimin e qenve të braktisur. Organizata vlerëson se në botë ka rreth 600 milionë qen endacakë, ndaj synon të rrisë ndërgjegjësimin për këtë problem global.

Dashuria e Torres për qentë lidhet me fëmijërinë e tij. Pas humbjes së qenit të parë, Rex, ai bëri tatuazh emrin e tij, ndërsa motra e tij zgjodhi të bënte tatuazh portretin e qenit, si një kujtim të përhershëm.

Sot, futbollisti jeton me disa qen të adoptuar, mes tyre Minnie, Lluna dhe Milo, duke promovuar vazhdimisht adoptimin në vend të blerjes së kafshëve. Përmes platformës së tij publike, Ferran Torres vazhdon të përdorë famën jo vetëm për sukseset në futboll, por edhe për të mbështetur kauzën e mbrojtjes së kafshëve të braktisura.

The post Heroi i finales, Ferran Torres, edhe zë i mbrojtjes së kafshëve endacake appeared first on Agjencia Telegrafike Shqiptare.

TIRANË, 20 korrik, ATSH/ Botërori 2026 për Argjentinën përfundoi në mënyrën më të hidhur, jo vetëm me humbjen 1-0 ndaj Spanjës në finalen e zhvilluar në Nju Xhersi, por edhe me skena të shëmtuara pas vërshëllimës së fundit.

Teksa futbollistët rezervë të Spanjës hynë në fushë për të festuar fitimin e titullit botëror, situata degradoi në një përplasje mes lojtarëve të të dyja skuadrave. Në qendër të incidentit ishte mesfushori argjentinas Leandro Paredes, i cili u pa duke kapur për fyti mbrojtësin spanjoll Eric García dhe duke e shtyrë, ndërsa në përleshje u përfshi edhe Gavi. 

Trajneri i Argjentinës, Lionel Scaloni, ndërhyri për të qetësuar lojtarët dhe për të shmangur përshkallëzimin e konfliktit, ndërsa gjyqtari ndëshkoi Paredes me karton të kuq pas ndeshjes. FIFA pritet të shqyrtojë incidentin dhe nuk përjashtohet mundësia e sanksioneve të mëtejshme disiplinore. 

Përleshja la në hije suksesin e Spanjës, e cila falë golit të Ferran Torres në kohën shtesë fitoi 1-0 dhe u shpall kampione e botës për herë të dytë në histori. 

The post Argjentina e mbyll Botërorin mes kaosit, sherr pas humbjes ndaj Spanjës në finale appeared first on Agjencia Telegrafike Shqiptare.

BRITANI, 19 korrik, ATSH/ Filmi i shumëpritur The Odyssey i Christopher Nolan po rikthen në qendër të vëmendjes jo vetëm epikën e Homerit, por edhe mesazhet e saj të përjetshme. Sipas një analize të publikuar nga The Independent, “Odisea” mbetet një nga veprat më aktuale për të kuptuar sfidat e jetës moderne, duke ofruar mësime mbi qëndrueshmërinë, identitetin dhe aftësinë për të kapërcyer vështirësitë. 

Psikologia klinike dhe studiuesja e letërsisë klasike, Dr. Sam Akbar, autore e librit The Odyssey Mindset, argumenton se udhëtimi i Odiseut është shumë më tepër sesa një aventurë mitologjike. Sipas saj, ai përfaqëson një rrugëtim të zbulimit të vetes dhe të përballjes me humbjen, traumën, dështimin dhe shpresën, përvoja që mbeten universale edhe sot. 

Akbar thekson se “Odisea” trajton tema psikologjike shumë kohë përpara se të ekzistonin konceptet moderne të traumës, qëndrueshmërisë apo identitetit. Ajo e përshkruan poemën si një pasqyrë të natyrës njerëzore, ku gërshetohen gëzimi, dashuria, zemërimi, pikëllimi, suksesi dhe dështimi. 

Sipas autores, edhe pse Odiseu është një personazh moralisht kompleks dhe jo gjithmonë heroik, pikërisht kjo e bën atë të afërt me njeriun e zakonshëm. Mësimi kryesor nuk është përsosmëria, por këmbëngulja dhe aftësia për të vazhduar rrugën drejt “Itakës”, pavarësisht pengesave. Ajo e quan këtë qasje “mentaliteti i Odisesë”, një kombinim i optimizmit realist, durimit dhe vendosmërisë përballë vështirësive.

Interesi për veprën e Homerit është rritur ndjeshëm pas  premierës së filmit të Nolan, ndërsa libri i Akbar propozon shtatë mësime praktike të frymëzuara nga udhëtimi i Odiseut për t’u përballur me sfidat e jetës bashkëkohore. 

The post “The Odyssey” si udhërrëfyes për jetën moderne: Psikologia britanike flet për “mentalitetin e Odisesë” appeared first on Agjencia Telegrafike Shqiptare.

MIAMI, 18 korrik, ATSH/ Trajneri i Francës, Didier Deschamps, ka bërë një deklaratë të drejtpërdrejtë në prag të ndeshjes për vendin e tretë në Kupën e Botës 2026 kundër Anglisë, duke pranuar se asnjëra skuadër nuk e dëshiron këtë përballje.

“Kam detyrimin ta drejtoj këtë ndeshje. Nuk është një miqësore, por një ndeshje për vendin e tretë. Lojtarët, stafi dhe unë kemi përgjegjësinë ta përmbushim këtë objektiv të fundit. Është më pak e rëndësishme se finalja. Anglia nuk dëshiron ta luajë këtë ndeshje dhe as ne. Por ja ku jemi,” u shpreh Deschamps.

Franca dhe Anglia do të përballen në Miami për vendin e tretë, pasi të dyja u eliminuan në gjysmëfinale. Deklarata e teknikut francez pasqyron zhgënjimin që shpesh shoqëron këtë sfidë, e cila zhvillohet mes dy skuadrave që kishin synuar finalen e Botërorit.

The post Deschamps: “As Anglia nuk do të luajë, as ne” – Franca e sheh si të panevojshme ndeshjen për vendin e tretë appeared first on Agjencia Telegrafike Shqiptare.

TIRANË, 18 korrik /ATSH/ Shqipëria është bërë pjesë e kolonës zanore të një prej filmave më të shumëpritur të vitit, “The Odyssey” të regjisorit Christopher Nolan.

Filmi “The Odyssey”, i cili pati premierën botërore këtë javë dhe ka nisur shfaqjen në kinematë në mbarë botën, është adaptimi më i ri i regjisorit Christopher Nolan i poemës epike të Homerit. Me Matt Damon në rolin e Odiseut dhe një kastë të yjeve të Hollivudit, filmi është xhiruar tërësisht me kamera IMAX 70 mm dhe konsiderohet një nga produksionet më ambicioze të Nolan deri më sot.
Në një intervistë të botuar nga Vulture/New York Magazine, kompozitori fitues i tre çmimeve Oscar, Ludwig Göransson, zbulon se gjatë kërkimeve për krijimin e muzikës së filmit udhëtoi në jug të Shqipërisë për të regjistruar iso-polifoninë shqiptare, një traditë shekullore e mbrojtur nga UNESCO, si edhe tingujt e fyellit të barinjve shqiptarë. 

“Shkova në jug të Shqipërisë dhe kalova një javë duke regjistruar një stil të lashtë këndimi të quajtur iso-polifoni, të cilin nuk e kisha dëgjuar kurrë më parë në një film”, citohet të ketë thënë Göransson. Ai shton se në Shqipëri u regjistruan edhe tingujt e fyellit që barinjtë shqiptarë e përdorin prej mijëra vitesh, ndërsa ekipi duhej të përfundonte regjistrimet para orës 18:00, pasi barinjtë zgjoheshin në orën 04:00 për t’u kujdesur për tufat. 

Dëshmi për këto regjistrime ka dhënë edhe muzikanti shqiptar Vendim Kapaj, i cili në një postim publik në rrjetet sociale shkruan se më 1 korrik 2025 punoi për rreth pesë orë me Ludwig Göransson dhe ekipin e tij, duke interpretuar me fyell dhe culë dyjare, ndërsa pjesë e regjistrimeve ishte edhe kënga labe.

Sipas Göransson, Christopher Nolan nuk dëshironte një kolonë zanore tradicionale orkestrale për filmin, por një univers tingujsh që të dukej sikur vinte nga vetë Epoka e Bronzit. Për këtë arsye, krahas instrumenteve të lashta si aulos, lira dhe instrumenteve prej bronzi, kompozitori kërkoi edhe tradita muzikore autentike nga vende të ndryshme të Mesdheut. 

Përfshirja e iso-polifonisë shqiptare dhe e instrumenteve tradicionale në një produksion hollivudian të kësaj përmase përbën një vlerësim të rëndësishëm për trashëgiminë kulturore shqiptare dhe e sjell atë përpara një audience globale.

The post Tingujt e Shqipërisë në kolonën zanore të filmit epik “The Odyssey” appeared first on Agjencia Telegrafike Shqiptare.

TIRANË, 15 korrik, ATSH/ Në prag të gjysmëfinales së Kupës së Botës mes Anglisë dhe Argjentinës, një parashikim i pazakontë ka tërhequr vëmendjen e mediave britanike. Sipas astrologëve kinezë, viti 2026 mund të jetë i destinuar për triumfin e Anglisë, falë një përputhjeje të rrallë astrologjike që ndodh vetëm një herë në 60 vjet.  

Sipas interpretimit të tyre, viti 2026 është Viti i Kalit të Zjarrtë (Fire Horse) në kalendarin kinez – i njëjti cikël astrologjik që ishte në fuqi në vitin 1966, kur Anglia fitoi për herë të parë dhe të vetme Kupën e Botës, duke mposhtur Gjermaninë Perëndimore në finalen historike të Wembley-t.

Mediumja dhe astrologia Chloe Smith e cilëson këtë përputhje si një “shenjë jashtëzakonisht të rrallë”, duke argumentuar se rikthimi i të njëjtit cikël mund të simbolizojë mbylljen e një rrethi historik dhe mundësinë që “futbolli të kthehet në shtëpi”, siç këndojnë prej vitesh tifozët anglezë.  

Parashikimi vjen në një moment kur Anglia përgatitet për një nga sfidat më të vështira të turneut, përballë kampiones në fuqi, Argjentinës. Në rast fitoreje, “Tre Luanët” do të luanin finalen ndaj Spanjës, e cila siguroi një vend në aktin e fundit pas fitores ndaj Francës.  

Ndërkohë, atmosfera para gjysmëfinales është e mbushur me simbolika dhe supersticione. Argjentina pritet të zbresë në fushë me fanellën e saj “fatlume”, me të cilën ka regjistruar disa fitore të rëndësishme ndaj Anglisë, ndërsa trajneri Thomas Tuchel shpreson të rikuperojë mesfushorin Declan Rice, i cili ka kaluar një gjendje gripale. Kapiteni Harry Kane, nga ana tjetër, e ka cilësuar përballjen me Lionel Messin si një moment të veçantë, por ka theksuar se fokusi i skuadrës mbetet te fitorja ndaj Argjentinës dhe jo te përballja individuale me yllin argjentinas.  

Megjithatë, edhe pse histori të tilla ushqejnë imagjinatën e tifozëve, astrologjia nuk ka bazë shkencore për të parashikuar rezultatet sportive. Në fund, fituesi do të vendoset në fushë, nga paraqitja e skuadrave dhe jo nga pozicioni i yjeve.  

The post Astrologët kinezë: Një shenjë e rrallë mund ta çojë Anglinë drejt triumfit në Botërorin 2026 appeared first on Agjencia Telegrafike Shqiptare.

TIRANË, 12 korrik, ATSH/ Një natë që do të mbetet gjatë në kujtesën e publikut shqiptar dhe të fansave të muzikës moderne. Tirana përjetoi një moment historik me koncertin e parë të Kanye West në Shqipëri, një ngjarje që shënoi jo vetëm debutimin e artistit në vend, por edhe një etapë të re për skenën e eventeve ndërkombëtare në kryeqytetin shqiptar.

Mijëra spektatorë mbushën hapësirën e koncertit, ndërsa fansa nga Shqipëria, Kosova, rajoni, dhe vende të tjera si Greqia, Italia, Bullgaria, Spanja etj., udhëtuan drejt Tiranës për të ndjekur nga afër performancën e një prej artistëve më me ndikim të muzikës bashkëkohore.

Që në orët e para të mbrëmjes, atmosfera u karakterizua nga entuziazmi, dhe pritshmëritë e larta për një spektakël të pazakontë.

Me një repertor që përfshiu disa prej hiteve më të njohura të karrierës së tij, Kanye West dhuroi një performancë që u shoqërua me efekte vizuale, ndriçim spektakolar dhe një energji që mbajti publikun të angazhuar gjatë gjithë mbrëmjes. Çdo këngë u shoqërua nga mijëra zëra që këndonin duke krijuar një atmosferë fantastike.

Koncerti u kthye shpejt në një nga temat më të komentuara në rrjetet sociale, ku foto dhe video nga mbrëmja u shpërndanë gjerësisht, duke tërhequr vëmendjen edhe të medieve ndërkombëtare. Për shumë pjesëmarrës, kjo ishte më shumë se një performancë muzikore; ishte një ngjarje që tregoi se Tirana është tashmë e aftë të presë artistë të kalibrit botëror dhe evente me ndikim global.

Përtej aspektit artistik, organizimi i koncertit solli një fluks të madh vizitorësh, duke gjallëruar sektorin e turizmit, hotelerisë, gastronomisë dhe shërbimeve në kryeqytet. Bizneset lokale përfituan nga prania e mijëra vizitorëve, ndërsa qyteti u promovua si një destinacion i rëndësishëm për organizimin e aktiviteteve të mëdha kulturore dhe argëtuese.

Koncerti i Kanye West konsiderohet tashmë një nga ngjarjet më të mëdha muzikore të zhvilluara ndonjëherë në Shqipëri dhe një moment që e vendosi Tiranën në qendër të hartës ndërkombëtare të muzikës live. Për ata që ishin të pranishëm, ishte një natë e paharrueshme; për ata që e ndoqën nga larg, një dëshmi se kryeqyteti shqiptar mund të jetë fare mirë skenë e spektakleve të përmasave globale.

The post Tirana hyn në hartën e koncerteve globale me Kanye West appeared first on Agjencia Telegrafike Shqiptare.

SHKODËR, 12 korrik /ATSH/ Administrata e Zonave të Mbrojtura Shkodër u ka bërë thirrje guidave turistike dhe operatorëve që zhvillojnë ture në Rezervatin Natyror të Menaxhuar (RMN) Liqeni i Shkodrës të tregojnë kujdes të veçantë gjatë lëvizjes me mjete lundruese në zonat e mbuluara me zambakë uji.

Sipas apelit, këto habitate përbëjnë zona të rëndësishme folezimi dhe strehimi për shumë lloje shpendësh, mes tyre edhe dallëndyshja faqebardhë e detit.

Autoritetet theksojnë se hyrja e vazhdueshme me mjete lundruese në këto zona shkakton shqetësim gjatë periudhës së folëzimit, duke rrezikuar braktisjen e foleve, dëmtimin e vezëve dhe uljen e suksesit riprodhues të kësaj specieje, e cila ka një rol të rëndësishëm në biodiversitetin e Liqenit të Shkodrës.

Në kuadër të mbrojtjes së vlerave natyrore të rezervatit, guidat dhe operatorët turistikë ftohen të shmangin hyrjen në zonat me zambakë ku evidentohen koloni folezimi, të respektojnë distancat e sigurisë nga habitatet e shpendëve, të informojnë turistët mbi rëndësinë e mbrojtjes së faunës së egër dhe të kontribuojnë në promovimin e turizmit të përgjegjshëm dhe të qëndrueshëm.

Administrata e Zonave të Mbrojtura Shkodër (AdZM) thekson se ruajtja e biodiversitetit është një përgjegjësi e përbashkët, ndërsa bashkëpunimi i operatorëve turistikë është thelbësor për të garantuar që liqeni i Shkodrës të mbetet një strehë e sigurt për shpendët dhe një destinacion natyror i veçantë për brezat e ardhshëm.

The post AdZM Shkodër apel operatorëve turistikë: Shmangni lëvizjen në zonat e folezimit të shpendëve appeared first on Agjencia Telegrafike Shqiptare.

ROMË, 11 korrik /ATSH/ Italia po intensifikon përpjekjet diplomatike për ta mbajtur zgjerimin e Bashkimit Evropian me vendet e Ballkanit Perëndimor në krye të axhendës evropiane.

Në samitin e zhvilluar në Romë, ku morën pjesë përfaqësues të lartë të Italisë, Bashkimit Evropian dhe vendeve të rajonit, u theksua se integrimi i Ballkanit Perëndimor nuk është më vetëm një objektiv politik, por një domosdoshmëri strategjike për sigurinë dhe stabilitetin e Evropës.

Sipas një analize të publikuar nga e përditshmja italiane Il Sole 24 Ore, Roma po ushtron presion që procesi i anëtarësimit të mos pengohet nga burokracitë apo tensionet politike, duke argumentuar se zhvillimet e fundit gjeopolitike, të ndikuara nga lufta në Ukrainë dhe sfidat e reja të sigurisë në kontinent, e bëjnë zgjerimin e BE-së më urgjent se kurrë.

Në këtë kontekst, Shqipëria dhe Mali i Zi vlerësohen si vendet që kanë shënuar përparimin më të madh në negociatat e anëtarësimit, ndërsa Serbia, Bosnjë-Hercegovina, Maqedonia e Veriut dhe Kosova vijojnë të përballen me sfida politike dhe institucionale që ndikojnë në ecurinë e procesit të integrimit evropian.

Ndërkohë, një zyrtare e Bashkimit Evropian bëri të ditur se më 14 korrik, në kuadër të mbledhjes së Këshillit për Çështjet e Përgjithshme, do të zhvillohen disa Konferenca Ndërqeveritare me vendet kandidate për anëtarësim në BE. Sipas saj, presidenca irlandeze synon të organizojë konferenca me Ukrainën, Malin e Zi, Moldavinë dhe Shqipërinë.

Për Ukrainën dhe Moldavinë pritet të hapet një grup i ri kapitujsh negociues (cluster), ndërsa për Malin e Zi dhe Shqipërinë objektivi është mbyllja e disa kapitujve të negociatave, duke shënuar një tjetër hap përpara në procesin e anëtarësimit.

Sa i përket Serbisë, zyrtarja evropiane sqaroi se në diskutimet e zhvilluara në Komitetin e Përfaqësuesve të Përhershëm të vendeve anëtare (Coreper) nuk u arrit konsensus për hapjen e tre kapitujve në shqyrtim. Për këtë arsye, aktualisht nuk është planifikuar një Konferencë Ndërqeveritare me Serbinë, ndërsa diskutimet pritet të vijojnë në javët e ardhshme.

The post Italia: Integrimi i Ballkanit Perëndimor është prioritet strategjik për Bashkimin Evropian appeared first on Agjencia Telegrafike Shqiptare.

TIRANË, 9 korrik, ATSH/ Filmi më i ri i studios A24, “The Invite”, me regji dhe interpretim të Olivia Wilde, sjell një histori që nis me një darkë të zakonshme mes fqinjësh, e cila shndërrohet gradualisht në një përballje të tensionuar me dëshirat, xhelozinë dhe të vërtetat e fshehura të marrëdhënieve. Në kast bëjnë pjesë edhe Seth Rogen, Penélope Cruz dhe Edward Norton.  

Filmi shmang sensacionet dhe ndërton një rrëfim ku dialogët janë elementi kryesor i veprimit. Çdo bisedë, heshtje apo vështrim ndryshon dinamikën mes personazheve, duke e kthyer mbrëmjen në një analizë të mprehtë të martesës, intimitetit dhe mënyrës se si njerëzit i justifikojnë zgjedhjet e tyre në emër të dashurisë.  

Kritika ka vlerësuar interpretimet e katër protagonistëve, veçanërisht harmoninë mes Wilde dhe Rogen, ndërsa filmi është cilësuar si një komedi-dramë inteligjente që ndërthur humorin me reflektimin psikologjik mbi marrëdhëniet moderne.  

I bazuar në filmin spanjoll The People Upstairs, “The Invite” është një nga prodhimet më të komentuara të verës.

The post “The Invite”, një reflektim i mprehtë mbi dashurinë, xhelozinë dhe martesën appeared first on Agjencia Telegrafike Shqiptare.

POGRADEC, 9 korrik /ATSH/ Galeria e Arteve në Qendrën Multifunksionale të Pogradecit do të mirëpresë më 18 korrik, në orën 19:00, ekspozitën personale “Qyteti i Dehur”, të piktorit të njohur pogradecar Anastas Kostandini (Taso) ku do të prezantohet një cikël prej 50 punimesh në pastel.

Ekspozita sjell një udhëtim në jetën e përditshme të qytetit, duke e parë atë përmes nostalgjisë, humorit dhe atmosferës së ngrohtë të traditës pogradecare. Punimet janë frymëzuar nga realiteti që po ndryshon, por edhe nga dëshira për të ruajtur gjallë kujtesën kolektive dhe dashurinë për vendlindjen.

Sipas konceptit të ekspozitës, atelieja e artistit  e ngritur në një mjedis familjar të dikurshëm, shndërrohet në hapësirën ku kujtimet e fëmijërisë, ritualet e jetës së përditshme dhe traditat lokale bëhen burim frymëzimi artistik.

I ndikuar edhe nga universi letrar i Mitrush Kutelit, autori sjell në këtë cikël pastelesh skena që pasqyrojnë gëzimin, festën dhe njerëzoren e një mënyre jetese që, sipas tij, po zbehet me kalimin e kohës.

Ekspozita “Qyteti i Dehur” do të qëndrojë e hapur për publikun nga 18 korriku deri më 1 gusht, çdo ditë nga ora 11:00–13:00 dhe 18:00–20:30, në Galerinë e Arteve të Qendrës Multifunksionale në Pogradec.

The post “Qyteti i Dehur”, ekspozita personale e piktorit Taso çel dyert në Pogradec appeared first on Agjencia Telegrafike Shqiptare.

TIRANË, 7 korrik, ATSH/ Agjencia e Administrimit të Pasurive të Sekuestruara dhe të Konfiskuara (AAPSK) financoi blerjen e 23 motoçikletave të reja për Forcën e Posaçme “Shqiponja” dhe Policinë Rrugore, duke kontribuar në forcimin e kapaciteteve operacionale të Policisë së Shtetit dhe rritjen e sigurisë publike.

Gjatë ceremonisë së dorëzimit, Kryeadministratorja e AAPSK-së, Risena Xhaja, u shpreh se ky investim është realizuar me fondet e krijuara nga administrimi i pasurive të konfiskuara, duke dëshmuar se asetet e përfituara nga veprimtaria kriminale rikthehen në shërbim të shtetit dhe qytetarëve.

Sipas saj, përdorimi i këtyre fondeve për mbështetjen e institucioneve ligjzbatuese është një shembull konkret i shndërrimit të pasurive të konfiskuara në një vlerë të dobishme për interesin publik.

AAPSK bëri të ditur se do të vijojë të mbështesë institucionet ligjzbatuese dhe ripërdorimin social të pasurive të konfiskuara, me synimin që këto asete të kontribuojnë në forcimin e sigurisë, drejtësisë dhe mirëqenies së qytetarëve.

The post AAPSK financon 23 motoçikleta të reja për Policinë e Shtetit appeared first on Agjencia Telegrafike Shqiptare.

MEKSIKE, 6 korrik, ATSH/ Anglia zhvilloi paraqitjen e saj më të mirë në Kupën e Botës 2026, duke triumfuar 3-2 ndaj Meksikës në stadiumin legjendar Azteca dhe duke siguruar një vend në çerekfinale, ku do të përballet me Norvegjinë.

Takimi nisi me një vonesë prej një ore për shkak të stuhive të forta, ndërsa skuadra e drejtuar nga Thomas Tuchel tregoi qetësi dhe karakter në një atmosferë elektrizuese.

Jude Bellingham ishte protagonisti i pjesës së parë, duke realizuar dy gola brenda vetëm 98 sekondave dhe duke i dhënë Anglisë një epërsi të rëndësishme. Portieri Jordan Pickford bëri disa pritje vendimtare, por nuk mundi të ndalte goditjen e Julian Quinones, i cili ngushtoi shifrat për Meksikën pak para pushimit.

Në fillim të pjesës së dytë, Anglia mbeti me 10 lojtarë pas kartonit të kuq të Jarell Quansah për një ndërhyrje të rrezikshme ndaj Jesus Gallardo, duke i dhënë hov vendasve.

Megjithatë, anglezët rikthyen diferencën prej dy golash kur Harry Kane u tregua i saktë nga pika e penalltisë, pasi Anthony Gordon u pengua nga portieri Raul Rangel.

Meksika nuk u dorëzua dhe fitoi një tjetër penallti pas një ndërhyrjeje të Kane ndaj Brian Gutierrez. Raul Jimenez shënoi për 3-2, duke i dhënë emocione minutave të fundit.

Nën presionin e madh të publikut vendas, Tuchel forcoi mbrojtjen me aktivizimin e Dan Burn dhe Djed Spence, ndërsa Anglia rezistoi gjatë 11 minutave shtesë për të vulosur një fitore të madhe.

Në çerekfinale, Anglia do të përballet me Norvegjinë, që eliminoi Brazilin falë dy golave të Erling Haaland.

The post Anglia kalon Meksikën në një sfidë dramatike, siguron çerekfinalen appeared first on Agjencia Telegrafike Shqiptare.

Nju Xhërsi, 6 korrik, ATSH/ Norvegjia vazhdon të shkruajë historinë në Kupën e Botës 2026. Skuadra skandinave eliminoi Brazilin me rezultatin 2-1 në fazën e 1/16-ave, falë një dopiete vendimtare të Erling Haaland, duke siguruar një vend në çerekfinale dhe duke shkaktuar një nga surprizat më të mëdha të turneut.  

Për Brazilin e drejtuar nga Carlo Ancelotti, disfata ka një domethënie edhe më të veçantë. Ajo zgjati një statistikë unike në futbollin botëror: Norvegjia mbetet e vetmja kombëtare që Brazili nuk ka mundur asnjëherë në historinë e përballjeve mes tyre. Në pesë ndeshje të zhvilluara ndër vite, bilanci është tashmë tre fitore për norvegjezët dhe dy barazime.  

Pas një ndeshjeje të ekuilibruar për pjesën më të madhe të kohës, Haaland shpërtheu në minutat e fundit, duke shënuar fillimisht me kokë dhe më pas duke vulosur suksesin me një finalizim të saktë. Brazili arriti vetëm të ngushtonte diferencën me një penallti të Neymar në kohën shtesë, por ishte tepër vonë për të shmangur eliminimin.  

Norvegjia do të vazhdojë rrugëtimin në çerekfinale, ndërsa Brazili largohet para kohe nga Botërori, me “mallkimin norvegjez” që vazhdon të mbetet i pathyeshëm.  

The post Haaland “rrëzon” Brazilin, Norvegjia kualifikohet në çerekfinalet e Botërorit appeared first on Agjencia Telegrafike Shqiptare.