Analisti dhe shkrimtari Preç Zogaj ka bërë një skaner të aksionit të opozitës për kërkimin e një qeverie teknike, duke e krahasuar situatën aktuale me dështimet e së shkuarës.
I ftuar në emisionin “Trialog” të gazetares Alba Alishani në RTSH, Zogaj u shpreh se ndryshe nga viti 2017 kur kjo kërkesë ishte thjesht një “ëndërr në diell”, sot ekziston një kontekst i ri politik i krijuar nga drejtësia.
“Sot nuk mund të them se është ëndërr në diell, pasi ka disa çështje të ndjeshme që lidhen me hetime penale. Kudo që po fut dorën SPAK ka nxjerrë zyrtarë që kanë shkelur ligjin,” tha Zogaj.
Megjithatë, ai theksoi se për momentin, këtë skenar “nuk e besojnë as sot, përveç militantëve”.
Sipas analistit, rruga e vetme që opozita të imponojë një qeveri teknike nuk është përmes thyerjes së dyerve apo aksioneve të izoluara partiake, por përmes masivitetit popullor.
“Nëse dalin 100 mijë a më shumë njerëz, pra populli zbret në rrugë përtej opozitës, duhet parë nëse ka pjesëmarrje masive që i pakëson ajrin qeverisë,” argumentoi Zogaj.
Në mbyllje, Zogaj paralajmëroi se SHBA dhe BE nuk do të japin dritën jeshile për rëzimin e qeverisë nëse nuk shohin një alternativë të sigurt që garanton vazhdimësinë e reformës në drejtësi dhe orientimin euro-atlantik.
Nga Santiago e Kilit deri në rrugët e Berlinit, bota është bërë dëshmitare e një mobilizimi masiv në mbështetje të protestave anti-qeveritare në Iran. Imazhet e siguruara nga Associated Press (AP) tregojnë një diasporë të vendosur për ndryshim.
Analisti Ergys Mërtiri, i ftuar në emisionin “Tema e Ditës” në RTSH 1 HD ,me gazetarin Arbër Hitaj, analizoi situatën politike aktuale dhe protestën e thirrur nga opozita më 24 janar, duke dhënë një panoramë kritike mbi gjendjen e opozitës dhe raportin e saj me qytetarët.
Mërtiri u shpreh se opozita nuk ka më asnjë instrument të ri për të ofruar, pasi i ka provuar dhe shpenzuar të gjitha rrugët e mundshme.
“Opozita nuk ka çfarë të sjellë asgjë të re me këto protesta. Ajo i ka provuar dhe shpenzuar të gjitha rrugët, të gjitha mjetet. Ka provuar dhe shpenzuar vetveten dhe nuk ka çfarë jep më”, tha ai.
Sipas sociologut, opozita gjendet përballë dy rrugëve, ose të përmbysë pushtetin, ose të vigjilojë në situatën aktuale.
“Ka dy gjëra që mund të bëjë një opozitë. Ose ajo të përmbysë, ose të vigjilojë në këtë situatë. Sepse të gjitha mjetet që ajo përdor çalojnë tek thelbi i saj, që ka të bëjë me mungesën e fuqisë për të mbledhur njerëz rreth vetes. Këtë nuk mund ta bëjë askush, përveç vetë opozitës që duhet të korrigjojë veten”, u shpreh Mërtiri.
Ai shtoi se kryeministri Rama nuk mund të rrëzohet nga kjo opozitë, pasi qytetarët nuk besojnë tek ajo.
“Rama nuk përmbyset nga kjo opozitë sepse njerëzit nuk shkojnë dhe ta mbështesin këtë opozitë, sepse ata nuk besojnë tek ajo. Sot kemi një opozitë që ka qenë e korruptuar kur ka qenë në pushtet dhe nuk është reformuar duke hequr të korruptuarit e saj, duke sjellë fytyra të reja që njerëzit t’i mbështesin dhe t’i ndjekin. Në këto kushte, çfarëdo që ajo të bëjë, për aq kohë sa nuk ndryshon, nuk mund ta përmbysë dot Ramën. Të gjitha premtimet apo sulmet janë thjesht instrumente verbale, përmes të cilave ajo maskon pafuqinë e vet për të tërhequr qytetarët”, tha ai.
Mërtiri theksoi se opozita shpesh fajëson qytetarët që nuk reagojnë, akuzon qeverinë për frikë dhe panik, apo sulmon gazetarët dhe analistët që kritikojnë opozitën.
Por sipas tij, “thelbi i problemit është vetë opozita, sepse është e pabesueshme dhe e ka lënë politikën në këto kushte ku opozita nuk ngrihet dot dhe qeveria nuk bie dot”.
I pyetur nga gazetari Hitaj për skenarët që mund të përdorë opozita, si greva e urisë apo forma të tjera radikale, Mërtiri u shpreh se edhe këto nuk do të sillnin rezultat.
“Është e pamundur edhe nëse do bëhet grevë urie. Patjetër që mund të motivohen disa njerëz më shumë, sepse brenda vetë opozitës ka zëra që thonë se kjo është opozitë e shitur dhe kjo do bëjë të mundur shuarjen e disa prej këtyre zërave, sepse do mendojnë se nuk qenka e vërtetë marrëveshja që ata kanë dhe po sakrifikojnë. Por edhe sikur të bëhet greva e urisë, nuk mund të largohet qeveria se qëndrojnë disa njerëz pa ngrënë. Qeveria largohet kur i pamundësohet funksionimi i saj”, tha ai.
Sa i takon idesë së një qeverie teknike, Mërtiri u shpreh se opozita ka vetëm një rrugë: të bllokojë funksionimin e qeverisë.
“Opozita duhet të bllokojë qeverinë dhe kjo të detyrohet ta shikojë si rrugëzgjidhje për të dalë nga kriza. A e bën dot Sali Berisha dhe opozita këtë, që të bllokojë vendin, që njerëzit mos të shkojnë në punë, që qytetarët të qëndrojnë në shesh dhe mos të largohen nga bulevardi derisa të largohet qeveria duke paralizuar shtetin? Unë mendoj që nuk e bën dot kjo opozitë që të bllokojë Ramën për mos të ushtruar detyrën”, u shpreh ai.
Në fund, Mërtiri solli një vlerësim të fortë për gjendjen aktuale të opozitës., duke thënë se “Me 200 veta aty në shesh, kur as për ditë nuk e bëjnë dot 200 veta, tregon që është koha që duhet të ikë Berisha, më pas të ikë Rama”.
Ai tha se pa një reformim të brendshëm, opozita nuk ka mundësi të ndryshojë ekuilibrat politikë në vend.
Banka Botërore parashikon se ekonomia e Shqipërisë do të rritet me 3.5 për qind këtë vit. E njëjta ecuri pritet edhe për 2027-n. Parashikimi ka mbetur si njëjtë si në raportin e mëhershëm, atë të vjeshtës.
“Një shifër pre 3.5 për qind, në kushtet aktuale të zhvillimit kombëtar, rajonal dhe më gjerë, në rrafsh ndërkombëtar mbetet një shifër relativisht e mirë për t’u vlerësuar nga ana e zhvillimit, pavarësisht se mbetet larg asaj që do të sillte zhvillim të mirëfilltë ekonomik.”
Institucioni më i lartë monetar në botë vlerëson se në Rajon do të jetë Kosova vendi që pritet të udhëheqë rritjen ekonomike me 3.8 për qind. Me Shqipërinë e pozicionuar e dyta, lista vazhdon me Serbinë që parashikohet të ketë një rritje ekonomike në nivelin 3 për qind. Bosnje-Hercegovina dhe Mali i Zi janë dy shtet që pritet të kenë rritjen më të ulët ekonomike.
“Në nivel global shihet qartë një lloj ngërçi, një stopim i ritmit të rritjes ekonomike. Pas goditjeve të njëpasnjëshme të viteve të fundit, ekonomia botërore po rritet, por me ritme të ulëta dhe pa energjinë e nevojshme për të gjeneruar zhvillim të gjerë.”
Banka Botërore pret se rritja ekonomike botërore këtë vit do të jetë në nivelin 2.7për qind. Nëse parashikimet do të rezultojnë të sakta norma mesatare e rritjes ekonomike të kësaj së kësaj dekade do të jetë më e ulëta që nga vitet 1960. Zgjerimi i prodhimit të Brendshëm Bruto në këtë masë është i pamjaftueshëm për të ulur varfërinë ekstreme dhe për të krijuar vende pune aty ku nevojiten më shumë – vlerëson Banka Botërore.
“Që rritja ekonomike të përkthehet realisht në më shumë mirëqenie për qytetarët, ajo duhet të jetë të paktën në nivelin 5.5 deri në 6 për qind. Vetëm në këto kushte mund të flasim për ulje të varfërisë, rritje të të ardhurave dhe krijim të qëndrueshëm të vendeve të punës.”
“Ndërsa pothuajse të gjitha ekonomitë e avancuara do të jenë më të pasura sesa para pandemisë, një në katër vende në zhvillim dhe më shumë se një e treta e ekonomive me të ardhura të ulëta do të jenë më të varfra sesa ishin pesë vite më parë.” – vlerëson Banka Botërore.
Ish-deputeti i Partisë Demokratike, Ervin Salianji, deklaroi se brenda PD-së nuk ka pasur asnjë ndryshim thelbësor që nga viti 2013, as në mënyrën e funksionimit, as në përzgjedhjen e lidershipit dhe as në gjuhën politike. I ftuar në A2CNN, Salianji tha se, në vitin 2026, shumica e figurave që garojnë dhe drejtojnë PD-në janë të njëjtët emra që kanë qenë aktivë edhe në vitin 2013.
Sipas tij, mungesa e rinovimit real dhe gabimet strategjike, veçanërisht pas humbjes së zgjedhjeve të vitit 2021, kanë prodhuar një krizë të thellë besimi te elektorati opozitar. Salianji pranoi se edhe ai vetë mban përgjegjësi për faktin që nuk u kërkua largimi i Lulzim Bashës menjëherë pas humbjes, duke e cilësuar këtë si “katastrofë politike” që i hapi rrugë mandatit të tretë dhe më pas të katërt të Edi Ramës.
Ai theksoi se Partia Demokratike sot vuan nga paqartësia strategjike, mungesa e shpresës dhe një opozitë formale, pa protesta reale dhe pa mobilizim qytetar. Sipas Salianjit, PD po sillet sikur humbjet elektorale nuk kanë ndodhur, ndërsa retorika për “zgjedhje të vjedhura” është konsumuar pa asnjë veprim konkret.
Ish-deputeti bëri të ditur se ka nisur turin e takimeve në qarqe për të dëgjuar demokratët dhe për të identifikuar problematikat reale të partisë. Ai paralajmëroi se në përfundim të këtij procesi do të dalë publikisht me një platformë konkrete reformimi, që synon ta kthejë PD-në në një forcë fituese, me rregulla të qarta për karrierën politike, gjuhë të re dhe lidhje reale me shoqërinë.
Rruga e Thethit është aktualisht e hapur për qarkullimin e mjeteve, pas një mbylljeje të përkohshme për shkak të rrezikut nga ortekët.
Autoriteti Rrugor Shqiptar, bën me dije se ky aks është tashmë i kalueshëm për automjetet.
ARRSH njoftoi sot se pas reshjeve të dendura të borës, në një segment me gjatësi rreth 550 metra, ishte prezent rreziku i ortekëve nga lartësitë e shpateve. Ky rrezik shtohet gjatë orëve të mesditës me diell, kur fillon procesi i shkrirjes së borës.
Për këtë arsye, gjatë ditëve me mot të kthjellët dhe për arsye sigurie, ARRSH thekson se do të ketë mbyllje provizore të qarkullimit deri në orët kur temperaturat ulen dhe bora ngrin sërish.
Sipas ARRSH-së, qarkullimi gjatë intervaleve me rrezik do të realizohet me asistencën e punonjësve të kompanisë së mirëmbajtjes, e cila është e pranishme në terren në çdo moment.
Strukturat përgjegjëse, vijojnë monitorimin e vazhdueshëm të situatës dhe do të informojnë qytetarët për çdo zhvillim të mëtejshëm.
Kryetari aktual i LDK-së, Lumir Abdixhiku, ka deklaruar se ka ofruar dorëheqjen e tij, duke thënë se ky është “hapi më moral që një kryetar mund ta marrë”. Ai bëri të ditur se pas një diskutimi prej 5 orë e gjysmë me anëtarë dhe struktura të partisë, është arritur një qëndrim i përbashkët, që sipas tij pasqyron vullnetin e “shumicës dërmuese”, raporton KosovaPress.
Abdixhiku tha se nuk i shmanget përgjegjësisë dhe reflektimit, duke theksuar se vendimi tashmë nuk është më i tij, por i LDK-së.
“Kam marrë hapin më moral që një kryetar mund ta marrë: kam ofruar dorëheqjen time. Kam hapur rrugën për secilin që ka pretendime. Jeni të lirë të garoni; në Kuvend e keni mundësinë. Tani vendimi nuk është më i imi, është i LDK-së”, shkruan Abdixhiku.
Ai njoftoi se është thirrur Kuvendi i LDK-së, ku pritet të zhvillohet debat dhe të merren vendime “hapur”, duke shtuar se do ta respektojë çdo vendim që del nga Kuvendi.
“Dua ta them qartë; nuk jam i lidhur pas pozitës. Jam i lidhur pas shtëpisë. Dhe shtëpia ruhet me rregull, me dinjitet dhe me besim në anëtarësinë e saj dhe në secilën kërkesë të tyre. Më shumë se dorëheqja nuk ka çfarë të ofrojë një politikan. Eliminimet politike mund të jenë legjitime si aspiratë, por edhe për to vendos anëtarësia si tërësi, jo ne individualisht”, deklaroi Abdixhiku.
Pak më parë, Hykmete Bajrami deklaron se ka ofruar dorëheqje të parevokueshme nga pozita e nënkryetares së LDK-së, mbi parimin se kush merr rezultate të rënda zgjedhore për LDK-në duhet marrë përgjegjësi dhe t’i hapë rrugë zgjedhjeve të brendshme, raporton KosovaPress.
Ajo po ashtu ka bërë të ditur se dje në mbledhjen e Kryesisë së LDK-së ka kërkuar dhe dorëheqje të parevokushme dhe për Lumir Abdixhikun nga pozita e kryetarit të LDK-së, siç shprehet ajo “si standard i vendosur vetë nga LDK-ja”.
Në emisionin “Trialog” të moderuar nga Alba Alishani, deputeti i Partisë Demokratike, Gjin Gjoni, ka shpjeguar arsyet pse opozita ka intensifikuar kërkesën për një qeveri teknike.
Ai theksoi se janë tre faktorë kryesorë që e kanë shtyrë PD-në drejt këtij qëndrimi.
Sipas tij, Raporti i fundit i OSBE/ODIHR është më i rëndi që nga zgjedhjet e vitit 2001.
“Aty janë faktuar të gjitha shkeljet dhe thuhet hapur se zgjedhjet ishin të parregullta. Ndryshe nga raportet e mëparshme, të cilat gjithmonë evidentonin një përmirësim krahasuar me zgjedhjet e kaluara, ky raport ka qenë i ashpër. Raporti i fundit thotë se parti dhe shteti janë një, blerja e votave ka qenë masive, dhe lidhjet e krimit me politikën janë të dukshme.”
Gjoni theksoi se një tjetër shtysë e fortë për kërkesën e opozitës për qeveri teknike lidhet me presionin ndërkombëtar, veçanërisht nga Shtetet e Bashkuara të Amerikës.
Ai veçoi qëndrimin e Departamentit Amerikan të Shtetit (DASH), i cili sipas tij ka intensifikuar tonin e kritikave dhe angazhimin kundër korrupsionit dhe krimit të organizuar.
“Me ardhjen e administratës Trump është intensifikuar lufta kundër krimit dhe korrupsionit. Deklaratat e DASH kanë qenë të qarta: shqiptarët duhet të luftojnë krimin e organizuar dhe të forcojnë bashkëpunimin me institucionet e drejtësisë,” u shpreh Gjoni.
Më tej ai shtoi se marrëdhëniet mes PD-së dhe SHBA-së janë përmirësuar ndjeshëm, pasi deputetët demokratë janë në kontakt të vazhdueshëm me faktorët ndërkombëtarë.
Si faktor të tretë përsë duhet të ketë qeveri teknike, Gjoni u shpreh se është reagimi popullor ndaj korrupsionit.
“Populli po reagon për shkak të nivelit të lartë të korrupsionit. Ky është një presion i brendshëm që nuk mund të injorohet,” u shpreh ai, duke nënvizuar se pakënaqësia e shoqërisë është bërë një shtysë e fortë për kërkesën e opozitës.
I pyetur për statusin “Non Grata” të kryetarit të PD-së, Sali Berisha, Gjoni tha se kjo nuk ka sjellë pengesa në aktivitetin e tij politik.
“Pavarësisht kësaj, Berisha merr pjesë në të gjitha forumet ndërkombëtare, në Parlamentin Europian, dhe nuk ka asnjë pengesë. Pengesa e vetme është vetëm vajtja e tij në SHBA,” theksoi deputeti.
Pas arratisjes së Altin Ndocit mesditën e djeshme, shumë persona që konsiderohen me rrezikshmëri të lartë po transferohen nga Drejtoria e Burgjeve drejt burgut të Fierit.
Mësohet se burgu i Durrësit nuk është burg me siguri të lartë, ndaj është parë e arsyshme që personat me rrezikshmëri të lartë të mos qëndrojnë më aty.
Bëhet fjalë vetëm për transferimin e personave me rrezikshmëri të lartë dhe jo atyre zyrtarëve të arrestuar.
Altin Ndoci u arratis ditën e djeshme nga spitali i burgut, ku kishte shkuar të mjekohej pas ankesave për dhimbje në veshka.
Ndërkohë kur po kalojnë 24 orë nga arratisja dhe Ndoci ende nuk është kapur, pavarësisht kontrolleve të shumta dhe postoblloqeve të ngritura.
Tetë persona u vunë në pranga në lidhje me arrestimin e Ndocit, kontetisht:
Ministri i Punëve të Brendshme, Drejtësisë dhe Paqes, Diosdado Cabello, njoftoi këtë të martë sekuestrimin e një ngarkese masive prej 6.850 kilogramësh drogë.
“Me këtë rezultat, shteti venezuelas arrin shifrën e 7.148 kilogramëve të sekuestruar, vetëm gjatë 13 ditëve të para të muajit janar”, u shpreh ai.
Mediat e huaja shkruajnë se gjatë fjalës së tij, Cabello sqaroi se ngarkesa kryesore përbëhej nga 238 thasë, të cilët përmbanin gjithsej 14.280 pako. Cabello theksoi se operacioni përfundoi me sekuestrimin e 6.850 kilogramëve substanca të paligjshme. Sipas ndarjes së ngarkesës, ajo përbëhej nga 14.199 pako marijuanë (6.758 kg) dhe 81 pako kokainë (91 kg).
“Është një goditje shumë e fortë ndaj narrativës që thotë se Venezuela lehtëson trafikun. Nga këtu nuk do të kalojë as kokainë, as marijuanë, asnjë lloj droge që shteti mund ta ndalojë në rrugën e saj”, deklaroi Cabello, duke nënvizuar se çdo sekuestrim përfaqëson heqjen e një këmbë nga tryezae strukturës logjistike kriminale.
Operacionet në Zulia
Cabello bëri të ditur se edhe në shtetin Zulia janë zhvilluar operacione, shumica e të cilave të lidhura me sekuestrime droge. Procedura e parë që përmendi ishte arrestimi i tre personave që posedonin 75 pako marijuanë, me peshë totale 39 kilogramë të së njëjtës substancë.
Operacioni i dytë përfshiu arrestimin e tre personave të tjerë që kishin 50 pako dhe 50 kilogramë marijuanë në shtetin Zulia. Ai sqaroi se të përfshirët në të dy rastet janë të lidhur me mafien shqiptare që operon nga Ekuadori dhe se ai, si ministër, po zhvillon një luftë reale kundër narkotrafikut. Cabello shpjegoi se, duke bllokuar rrugët detare dhe ajrore, mafiet detyrohen të përdorin rrugë tokësore, ku janë më të ekspozuara ndaj mbikëqyrjes shtetërore.
Rezultatet e dobëta në zgjedhjet në Kosovë, Bajrami ofron dorëheqje dhe kërkon largimin e Abdixhikut nga kreu i LDK-së
Nënkryetarja e Lidhjes Demokratike të Kosovës, Hykmete Bajrami, konfirmoi se ka ofruar dorëheqje të parevokueshme nga ky post gjatë mbledhjes partiake të mbajtur një ditë më parë, si dhe ka kërkuar po të njëjtën nga kreu i partisë, Lumir Abdixhiku, për shkak të rezultatit zgjedhor.
Bajrami tha se kush merr “rezultate të rënda zgjedhore për LDK-në”, duhet të marrë përgjegjësi dhe t’i hapë rrugë zgjedhjeve të rbenddshme partiake.
“Pas rezultateve të 28 dhjetorit, lidershipi dhe organet e partisë kanë humbur legjitimitetin prandaj duhet zgjedhje të brendshme. Zgjedhjet e brendshme në LDK janë të domosdoshme dhe nga situata ku gjendemi nuk na shpëton asnjë proces tjetër”, shkroi Bajrami.
Abdixhiku, menjëherë pas publikimit të rezultateve preliminare më 28 dhjetor, tha se merr përgjegjësinë për rezultatin zgjedhor, duke paralajmëruar edhe dorëheqjen nga drejtimi i partisë.
LDK-ja ka shënuar rezultat të dobët në zgjedhjet e parakohshme parlamentare të 28 dhjetorit, dhe krahasuar me zgjedhjet e rregullta të mbajtura më 9 shkurt të vitit të kaluar.
Në zgjedhjet e 9 shkurtit, LDK-ja kishte marrë 171.357 vota, ndërsa në zgjedhjet e dhjetorit, sipas rezultateve preliminare, ajo ka fituar 126.102 vota, duke u renditur si fuqia e tretë politike në Kosovë.
Bajrami në zgjedhjet e fundit ishte e dyta në listën e LDK-së, pas kryetarit Abdixhiku, i cili e udhëheq këtë parti që nga viti 2021. Po ashtu, ajo është gruaja më e votuar për deputete në LDK.
Zgjedhjet e 28 dhjetorit i ka fituar Lëvizja Vetëvendosje e Albin Kurtit me mbi 51 për qind të votave, ndërkaq subjekti i dytë ka dalë Partia Demokratike e Kosovës./ REL
Mbretëria e Bashkuar po tërheq personelin ushtarak nga një bazë amerikane në Katar, sipas Sky News.
Kjo vjen pasi Donald Trump u tha protestuesve në Iran se “ndihma është duke ardhur” dhe premtoi “veprime shumë të forta” nëse qeveria në Teheran vazhdon me ekzekutimet e planifikuara.
Irani ka thënë vazhdimisht se do të hakmerret kundër vendeve ushtarake amerikane në rajon nëse Amerika sulmon – shih postimin tonë në orën 8.44.
SHBA-të kanë filluar gjithashtu tërheqjen e një pjese të stafit nga Baza Ajrore Al Udeid e drejtuar nga SHBA-të në Katar, baza më e madhe amerikane në rajon.
Një zëdhënës i Ministrisë së Mbrojtjes tha: “Ne nuk komentojmë mbi detajet e vendosjes së bazave dhe vendosjeve për shkak të sigurisë operacionale.”
“Mbretëria e Bashkuar gjithmonë vendos masa paraprake për të siguruar sigurinë dhe mbrojtjen e personelit tonë, duke përfshirë, kur është e nevojshme, tërheqjen e personelit.”
Nuk ishte menjëherë e qartë nëse i gjithë personeli britanik po tërhiqej nga baza në Katar.
Debati apo diskutimi më shumë i teorisë së trashëgimisë familjare të drejtimit të PD nga Sali Berisha qarkullon prej kohësh.
Qarkullim, i cili nuk ka ardhur nga fantazi të tepruar apo të ekzagjeruar. Argita apo Shkëlzeni nuk kanë pasur ndonjëherë role drejtuese në PD, por influence e tyre ka qenë determinante. Qoftë në pushtet, qoftë në opozitë. Mohimi i këtij realiteti edhe nëse bëhet nuk besohet po merret si një etiketë hipokrite.
Pasi fakt është se influence e fëmijëve të Sali Berishësn ë pushtetin politik nuk ka qenë thjeshte lobim. Ka qenë një kapje reale e vendimarrjes apo kondicionim i saj, qoftë kur Berisha ishte Kryeministër qoftë më pas.
Dje, në një takim me simpatizantë të tij, Sali Berisha tha se nuk do ta trashëgojë drejtimin e Partisë Demokratike tek fëmijët e tij. Doktori e nxori këtë frazë nga goja, a thua se ishte një verdikt “sacro santo”. Një frazë natyrisht e përgatitur si spin për të marrë një feedback të rëndësishëm, a thua se kemi të bëjmë me zhvillim politik.
Ndërkohë që thjeshte përmendja e këtij fakti nga Berisha përbën një skandal politik të nivelit të lartë. Pasi, edhe pse është njeriu me pushtetin absolut në PD, doktori nuk ka asnjë të drejtë tradhëgimie të postit të tij, edhe pse në fuqinë absolute që ka, edhe mund të ja lejojë vetes.
Por ky ekzagjerim nuk do të bëjë gjë tjetë veçse të rrudhë besimin dhe simpatinë në radhët e elektoratit të “së djathtës” edhe kështu mjaft i vogël. i gjendur në një stanjacion statistikor ku shifra 70% e JO-së nuk luan prej disa vitesh tshmë, Sali Berisha bëri një lëvizje për të bërë “lajm”. Me shpresën që të ngjallë apo të ndezë një shkarpë në mjedisin kënetor të opozitës.
Në një logjikë normale, vetëm përmendja e një mundësie trahëgimie duhet të jetë blasfemi. Dhe jo më kot Sali Berisha nuk i ka dhënë rëndësi këtre zileve që bien prej kohësh.
Pasi, si një politikan me përvojë dhe inteligjent e di se kjo është një çështje “kurth”. Ku nëse bie, i krijon vetes problem jo të vogël që mund të mbetet si një gjyle e lidhur në këmbë për kohë të gjatë.
Por këtë herë Berisha e lëshoi këtë tollumbace, ngaqë gjylja në realitet i është lidhur në këmbë prej kohësh. Ekzaktësisht prej 21 majit 2021, kur qeveria e Shteteve të Bashkuara të Amerikës e shpalli atë Non grata, së bashku me bashkëshorten dhe dy fëmijët e tij.
Në këtë situatë të rëndë, ku më rëndë se kaq nuk ka në realitet, batareja e mufkave nuk bën ërshtypje fare. Jo vetëm në auditoret abstrakte të teatrove foltorike, pore dhe në mjedisin publik mediatic shqiptar. Ku zërat më të kuotuara janë ata që parashikojnë kataklizmat e darkës, së bashku me paroditë e tokës së sheshtë dhe frustrimet gjeopolitike.
Nuk do të mungojë ka shumë gjasa, seritë e “analizave” që Berisha me mohimin e tragjëgimisë i ka çuar sinjal Amerikës, apo po bën gati pasardhësin e tij politik për inat të Saljanit. Por kjo është enigma e 2026 e ka shumë gjasa që të shtyhen panelet deri në pushimet e verës. Pastaj shohim e bëjmë…
Shtetet e Bashkuara pezulluan shqyrtimin e vizave për emigrantët nga 75 shtete, përfshirë nga Shqipëria, Kosova, Mali i Zi dhe Bosnjë e Hercegovina.
“Departamenti i Shtetit do të pauzojë shqyrtimin e vizave për emigrantë nga 75 shtete, migrantët nga të cilët marrin ndihma sociale nga populli amerikan në nivele të papranueshme. Kjo ndalesë do të jetë në fuqi deri kur SHBA-ja të sigurohet që migrantët e rinj nuk do të përfitojnë nga populli amerikan”, shkroi Departamenti amerikan i Shtetit në X.
Disa dite me pare Presidenti i SHBA-së, Donald Trump, ka publikuar në rrjetin e tij social, Truth Social, një tabelë ku tregon renditjen e familjeve që mbahen me ndihmë sociale në SHBA.
Në listë spikasin dhe shqiptarët, ku 41.3% e familjeve shqiptare në SHBA marrin ndihmë sociale.
Ndërkohë zëdhënësi i Departamentit amerikan të Shtetit, Tommy Pigott deklaroi:
“Administrata e presidentit amerikan, Donald Trump po i jep fund abuzimit të sistemit të migrimit të Amerikës nga ata që synojnë të pasurohen nga populli amerikan”.
Administrata e Trumpit ka ndërmarrë veprime për të luftuar migrimin e paligjshëm dhe Departamenti për Punë të Brendshme tha muajin e kaluar se administrata amerikane ka dëbuar më shumë se 605.000 persona dhe 2.5 milionë të tjerë janë larguar vullnetarisht.
Vendimi i fundit nuk prek vizat turistike, biznesore apo vizat tjera, përfshirë edhe për tifozët e futbollit që duan të qëndrojnë në SHBA për të parë nga afër Kupën e Botës që zhvillohet këtë vit, edhe pse administrata Trump ka thënë se do të verifikojë të gjithë aplikuesit e vizave.
Të martën, i paraburgosuri Altin Ndoci, arriti të arratiset nga spitali i qytetit të Durrësit. Kjo ngjarje shkaktoi reagime të shumta, ndërsa autoritete ligjzbatuese vendosën të shkarkojnë të gjithë zinxhirin, i cili duhet të garantonte sigurinë për transportimin në kushte të rrepta sigurie
I ftuar në emisionin “Tirana Live”, eksperti i sigurisë Fatjon Softa u shpreh se arratisja nuk ishte aspak rastësore, por e mirëllogaritur dhe e organizuar.
Sipas tij, Ndoci është fizikisht i fuqishëm dhe vështirë se mund të ndalohej nga efektivët në kushtet në të cilat ndodhej.
Eksperti ngriti pikëpyetje edhe mbi faktin pse është përdorur një autoambulancë për transportin e tij drejt spitalit dhe pse nuk është njoftuar Policia e Shtetit për masa shtesë sigurie.
Ai theksoi se protokollet janë strikte dhe parashikojnë minimumi tre punonjës shoqërues, të pajisur me mjete mbrojtëse, sidomos kur bëhet fjalë për persona të akuzuar për vepra të rënda penale si vrasja dhe përfshirja në grup të strukturuar kriminal.
“Nëse punonjësit e sigurimit, duhet të ketë radio dhe jepet sinjali, autori u arratis, shihet drejtimi i mundur, salla operative njofton pikat e patrullës, në mënyrë të tillë që një automjet me këtë targë të bllokohet.
Pse ishte një autoambulancë. Nuk mund të shkojnë me autoambulancë, e dyta, pse nuk është njoftuar Policia e Shtetit për masa shtesë. Pa pranga ai mund të ishte ikur që në atë moment.
Nuk është neglizhencë, sepse protokollet e sigurisë janë strikte. Minimumi absolut janë tre persona dhe në kushte të përforcuar, personi përcaktohet mbi bazën e akuzave penale, që akuzohet për vrasje dhe grup të strukturuar kriminal. Grupi shoqërues duhet të ishte me antiplumb”, tha ai.
Ai theksoi se liria e Ndocit mund të përbëjë rrezik për ato dëshmitarë, të cilët janë në proces kundër tij.
“Më shumë forca kanë vajtur për të hequr plastmasat e Adriatik Lapajt, sesa tek ky person, me rrezikshmëri të lartë. Nuk mund t’i hiqeshin prangat autorit. Ai person mund të ketë dhe dëshmitarë në çështjen e tij. Si mund të ndihen dëshmitarët që janë në proces kundër tij”, tha ai.
Bizneset mikro, të vogla dhe të mesme, që përbëjnë mbi 90 për qind të sipërmarrjeve në vend, pritet të kenë më shumë mundësi financimi.
Këshilli Mbikëqyrës i Bankës së Shqipërisë ka miratuar programin e ri për mbështetjen e këtij segmenti, me synimin për të lehtësuar aksesin në kredi dhe për të nxitur investimet.
Programi synon të krijojë kushte më të favorshme për kreditim, në një kohë kur shumë sipërmarrës të vegjël hasin vështirësi për shkak të kolateralit, informalitetit dhe kostove të larta të huamarrjes.
“Do të ndikojë pozitivisht jo vetëm që këto biznese të rrisin pagën minimale, por ndoshta të rrisin mbi pagën minimale me qëllim që të mos jenë në kuadrin e krizës së gjetjes së punonjësve”, u shpreh Romina Radonshiqi, eksperte e ekonomisë.
Sipas Bankës së Shqipërisë, fokusi është drejt sektorëve që krijojnë vlerë të shtuar dhe punësim, veçanërisht prodhimi dhe shërbimet. Megjithatë, ekspertët theksojnë se efekti i vërtetë do të varet nga mënyra se si bankat do ta përkthejnë këtë program në produkte konkrete kredie.
“Kushtet kryesore janë të kenë marzhe të larta fitimi, apo të jenë të besueshëm me qëllim që banka tregtare këtu të ketë mundësi të menaxhojë riskun. Duhet të jetë fokus bujqësia, prodhimi, pasi këto do të krijojnë një ekonomi të qëndrueshme”, sqaron ekspertja e ekonomisë.
Sipas të dhënave zyrtare të Bankës së Shqipërisë, bankat kanë dhënë 30.6 miliardë lekë kredi për mikrobizneset gjatë nëntorit, duke shënuar një rritje të lehtë krahasuar me tetorin 2025, kur volumi i kredisë ishte 30.4 miliardë lekë.
Dyshime për manipulime me vota, veçanërisht brenda subjekteve politike, dhe ankesa nga kandidatët për deputetë ka pasur në vazhdimësi ndër vite në Kosovë.
Tani, një vendim i Komisionit Qendror të Zgjedhjeve (KQZ) për t’i rinumëruar votat në një të tretën e vendvotimeve për zgjedhjet e parakohshme parlamentare të 28 dhjetorit ka ngritur shqetësime edhe për integritetin e procesit më të fundit zgjedhor.
Për më tepër, rinumërimi rrezikon ta vonojë edhe më shumë themelimin e institucioneve të reja të Kosovës, dhe mund të sjellë ndryshime në përbërjen e Kuvendit prej 120 vendesh, paralajmërojnë vëzhguesit.
Çka ndodhi dhe si erdhi deri këtu?
KQZ-ja, e cila mbikëqyr procesin zgjedhor në vend, e filloi rinumërimin më 13 janar në 914 vendvotime nga 2.557 sa ishin në zgjedhjet e dhjetorit, pasi vërejti mospërputhje në votat për kandidatët për deputetë.
“Rezulton se votat e kandidatëve, të numëruara në Qendrat Komunale të Numërimit, nuk pasqyrojnë numrin e votave të kandidatëve të evidentuara në fletëvotime”, tha KQZ-ja.
Rinumërim të plotë, sipas saj, do të ketë në 10 komuna të Kosovës, ndërkaq në 28 komunat tjera do të ketë rinumërim vetëm në 10 për qind të vendvotimeve, gjatë dy javëve në vijim.
KQZ-ja i hetoi 33 vendvotime të ndryshme në gjithë vendin, duke i shikuar xhirimet e kamerave të vendosura në tavolinat e numërimit në qendrat komunale të numërimit.
“Vendimi i Komisionit Qendror të Zgjedhjeve për rinumërimin e votave ka për qëllim garantimin e saktësisë dhe integritetit të procesit zgjedhor”, thotë për Radion Evropa e Lirë (REL) zëdhënësi i KQZ-së, Valmir Elezi.
Eugen Cakolli, nga Instituti Demokratik i Kosovës, thotë për REL-in se hetimi i KQZ-së ka shpërfaqur “mangësi serioze te votat e kandidatëve, përkatësisht manipulimet që duket se kanë ndodhur nga komisionarë të caktuar në qendrat komunale të numërimit”.
Derisa KQZ-ja në këtë fazë i cilëson këto shpërputhje vetëm si lëshime, Cakolli thotë se kjo nuk mund të sqarohet “si gabim njerëzor, por është shenjë e një manipulimi të qartë që duket se ka ndodhur”.
Sipas tij, ka kandidatë që u janë gjetur dhjetëra apo madje mijëra vota dallim nga rezultati i njoftuar dhe ai në fletëvotime në një vendvotim të vetëm, pas verifikimit që ka bërë komisioni zgjedhor.
“Ta zëmë, në një vendvotim në Prizren, meqë Prizreni ka rreth 700 vota dallim pas verifikimit nga KQZ-ja, ka kandidat të cilit del se në qendrën komunale të numërimit i janë shtuar 107 vota më shumë se sa i ka pasur në të vërtetë”, thekson Cakolli.
Organizata joqeveritare Çohu ngriti shqetësime për gjetjen e mangësive të tilla, duke thënë se kjo nuk është e pazakontë në Kosovë.
Si bëhet numërimi i votave dhe si rrodhën lëshimet?
KQZ-ja i emëron grupet e numërimit në bazë të nominimeve të partive politike, sipas Ligjit për zgjedhjet.
Në rastet kur subjekti politik nuk nominon anëtarë për numërim apo nominon pamjaftueshëm, apo kur numëruesit e subjekteve politike nuk paraqiten në vendin e numërimit, KQZ-ja emëron numërues nga stafi i saj.
Në qendrat komunale të numërimit vendosen tavolina, në të cilat, tani me ligjin e ri nga viti 2023, përveç grupeve të numërimit, vendoset edhe një kamerë sipër për ta xhiruar çdo fletëvotim që kalon nëpër dorën e numëruesit, e cila shfaq fletëvotimin në një ekran aty pranë. Ai ekran shërben për t’ua mundësuar vëzhguesve ta shohin dhe ta verifikojnë çdo fletëvotim.
Po ashtu, numëruesi flet me zë të lartë, në mënyrë që zyrtari tjetër përgjegjës t’i fusë votat në një sistem elektronik. Përveç personit që e lexon fletëvotimin, një i dytë e merr atë dhe e verifikon.
Cakolli nënvizon se, pavarësisht ndryshimeve të reja, “nuk ka kontrolle të hollësishme” të fletëvotimeve.
“Vëzhguesit, qoftë nga partitë politike, shoqëria civile apo mediat, kanë pamje vetëm në ekranin në fjalë, por jo edhe në fletëvotimin origjinal, ndonëse ka kamerë sipër saj”, thekson ai.
Sipas tij, në këto zgjedhje ka pasur “vëzhgim minimal”, pasi procesi u zhvillua në një kohë festash të fundvitit.
Pothuajse çdo proces zgjedhor ndër vite është përcjellë me parregullsi të tilla në Kosovë, dhe Çohu tha se kjo ndodh për shkak të pandëshkueshmërisë ndaj njerëzve që kanë “manipuluar me vullnetin e qytetarëve”.
Së voni, Çohu ka publikuar një hulumtim që tregon se mbi 90 për qind e rasteve për manipulimet zgjedhore përfundojnë me dënime me kusht ose me gjoba.
Sipas Cakollit, keqpërdorimet me votat e kandidatëve janë një prej fenomeneve që e kanë karakterizuar pothuajse secilin proces zgjedhor në Kosovë, dhe ndryshimet me ligjin e ri nuk kanë sjellë përmirësime.
“Tani, thjesht mundësohet që manipulimet e mundshme të ndodhin edhe më lehtë, sepse në vend se të kemi 2.500 njësi ku numërohen votat, që do të thotë se mundësia për korruptimin e ndonjë komisionari është shumë më e vogël sepse ka shumë më shumë në lojë, tani në 38 qendra mjafton që me një grup të vogël të njerëzve që punojnë nëpër këto qendra, të manipulohet rezultati zgjedhor për votat e kandidatëve”, thotë ai.
Ai shton se zgjidhja është përmes teknologjisë, pra skanimit të fletëvotimeve, të cilat pastaj, përmes një sistemi automatik, do ta paraqisnin rezultatin, duke shmangur numërimin dhe verifikimin manual.
Cilat mund të jenë pasojat?
Rinumërimi mund të sjellë ndryshime në përbërjen e re të Kuvendit, pasi shumë kandidatë që siguruan si të fundit vende në organin ligjvënës, kanë dallim shumë të vogël votash me ata që mbetën jashtë Kuvendit, sipas Cakollit.
Gjithashtu, rinumërimi, i cili pritet të zgjasë deri në dy javë, mund ta vonojë edhe më shumë themelimin e institucioneve të reja, në një kohë kur vendi nuk ka kohë për të humbur.
Kuvendi i ri duhet të nxitojë për të kaluar marrëveshje ndërkombëtare financiare për vendin, si dhe ta zgjedhë presidentin para se Vjosa Osmanit t’i mbarojë mandati në prill.
Cakolli e vlerëson si hap të mirë vendimin e KQZ-së për rinumërimin e 36 për qind të vendvotimeve, por e konsideron të pamjaftueshëm.
“Në radhë të parë, parcializimi i vendimmarrjes për rinumërim, nuk arsyetohet në asnjë variant. Pse janë zgjedhur vetëm 10 për qind, nëse ka indikacione që ka pasur gabime të tilla edhe në komunat e tjera?”, pyet ai.
Cakolli shton se KQZ-ja duhet të bëjë rinumërim të plotë, për të garantuar se zgjedhjet kishin integritet, dhe për t’i shmangur vonesat e mëtejshme.
Elezi e përsëriti për REL-in mesazhin e kryetarit të KQZ-së, Kreshnik Radoniçi, se nëse pas rinumërimit vërehen manipulime të mundshme me votat e kandidatëve brenda subjekteve politike, komisioni do t’i çojë në organet kompetente anëtarët e ekipeve të numërimit.
Cakolli thekson se autoritetet është dashur t’i fillojnë hetimet ndaj të gjithë komisionarëve të përfshirë në dyshimet për manipulim.
“Prokuroria duhet që sa më parë e pa vonesa t’i fillojë hetimet, në mënyrë që shkelësit dhe keqpërdoruesit e mundshëm ta marrin dënimin e merituar, në mënyrë që kjo të shërbejë si masë parandaluese”, shton ai.
Çohu, ndërkohë, kërkoi nga institucionet e drejtësisë të hapin menjëherë hetim të pavarur dhe të plotë për çdo element të mundshëm të manipulimit apo mosrespektimit të vullnetit të qytetarëve.
“Çdo dyshim për manipulim të vullnetit qytetar duhet të trajtohet me seriozitet maksimal dhe pa vonesa”, tha organizata./Marrë nga REL
Prindërit që presin të marrin mbrapsht para nga shteti për shpenzimet e shkollimit të fëmijëve, duhet të bëjnë kujdes. Administrata Tatimore ka sqaruar se pa dokumente justifikuese, nuk do të ketë asnjë rimbursim.
Në udhëzimin e fundit për Deklaratën Individuale Vjetore të të Ardhurave (DIVA 2025), theksohet se kushti kryesor për t’u njohur shpenzimet arsimore është disponimi i faturave tatimore ose kontratave me institucionet arsimore.
“Në mungesë të dokumentacionit justifikues, shpenzimet arsimore nuk njihen për rimbursim,” thuhet shprehimisht në njoftim.
Kjo do të thotë se pagesat për kurse, kopshte apo shkolla private të bëra pa faturë, nuk do të llogariten për zbritje nga taksat.
Afati dhe kushtet
Afati për dorëzimin e deklaratës është 31 mars 2026. Për herë të parë, këtë vit përfitojnë kompensim për ushqim dhe arsim edhe prindërit me të ardhura të mesme e të ulëta (nën 1.2 milionë lekë në vit), por vetëm nëse deklarata e tyre rezulton me mbipagesë tatimore dhe kanë çdo letër në rregull.
Kush përfiton?
Të drejtën për rimbursim e kanë prindërit ose kujdestarët ligjorë që:
Kanë të ardhura vjetore të tatueshme deri në 1.2 milionë lekë;
Kanë fëmijë në ngarkim nën 18 vjeç;
Deklarata e tyre rezulton me mbipagesë tatimi.
Sa para ulen nga taksat?
Shteti njeh dy zëra kryesorë për zbritje nga baza tatimore:
48,000 lekë zbritje për çdo fëmijë në ngarkim.
Deri në 100,000 lekë zbritje për shpenzimet e faktuara arsimore.
Hapat për të aplikuar
Procesi kryhet online përmes sistemit e-Filing.
Hyni në llogarinë tuaj dhe plotësoni DIVA 2025.
Nëse deklarata del me tepricë kreditore, shkoni te moduli “Çështjet e mia”.
Hapni një kërkesë të re dhe ngarkoni dokumentet:
Të dhënat e llogarisë bankare;
Çertifikatën familjare;
Kontratat me shkollat/kurset dhe faturat e pagesave.
Nëse konstatoni gabime pas dorëzimit, keni ende mundësi të bëni korrigjime brenda afateve ligjore.
Kush është i detyruar të deklarojë?
Përveç atyre që duan rimbursim, DIVA është e detyrueshme për:
Individët me të ardhura mbi 1.2 milionë lekë bruto në vit.
Të dypunësuarit (qoftë edhe për një muaj të vetëm).
Ata që fitojnë mbi 50 mijë lekë nga qiratë, Airbnb, Booking, YouTube, etj., dhe nuk kanë paguar tatim në burim.
Gjykata e Posaçme e Apelit për Korrupsionin dhe Krimin e Organizuar i ka drejtuar një ankimim Gjykates Kushtetuese, që të vendos një rregull tjetër sa i përket cështjeve me me shumë se një të pandehur.
Konkretisht, kërkohet të ndërhyet në nenin 265 të Kodit të Procedurës Penale që lidhet me pezullimin e të afateve të paraburgimit.
Ndodhin raste kur të pandehur të ndryshëm, ai apo avokati i tij, nuk paraqiten në seanca dhe kështu bëhen pengesë për zhvillimin e gjykimit brenda afateve.
Shtyrja e paraburigmit mund ti interesojë njërit prej të pandehurve, si një mundësi për të llogaritur më pak vite burgim, nëse dënohet më pas me vendim të formës së prerë. Por një i pandehur tjetër i së njëjtës cështje , mund të dojë që gjykimi të përfundojë sa më shpejtë, gjë që nuk e arrin nëse ndodhin shtyrjet.
Në rastet e disa stë pandehurve të një dosjeje, efektet e paraburigmit shtrihen tek te gjithë bashkë të pandehurit, pavaresisht se vetëm njëri prej tyre është bërë shkak për moszhvillimin e procesit gjyqsor.
Kjo thotë Gjykata e Posaçme është shkelje e Kushtetuës dhe Konventës Europiane për të Drejtat e Njeriut dhe kërkon që shapllet si e papajtuehsme, në pjesën që nuk parashikon shtrirjen e personalizuar të efekteve juridike të pezullimit të afateve të paraburgimit tek bashkëtëpandehurit.
Neni 265 i Kodit të Procedurës penale, që përmend Apeli i Posacëm në ankimim, nuk percakton që vendimi për pezullim të zbatohet vetëm ndaj te pandehurit që ka sjelle zvarritjen, por i perfshin te gjithe te pandehurit njetrajtesisht ne pezullim.
Ajo që kërkon gjykata e apelit është që nëse neë një gjykim me disa bashke të pandehur, njëri prej tyre bëhet pengesë për zhvillimin e procesit dhe gjykata merr vendim për pezullimin e afateve të paraburgimit, vendimi të ketë efekt vetëm për personin që behet pengesë dhe jo për të gjithë të pandehurit.
Ditën e sotme Departamenti Amerikan i Shtetit shpalli vendimin për pezullimin e vizave të emirgantëve për 75 vende, ku mes tyre përfshihej edhe Shqipëria dhe Kosova.
Ndërkohë që Ambasada Amerikane në vendin tonë, përmes një postimi në rrjet sociale sqaron se cilët qytetarë shqiptarë mund të vijojnë të udhëtojnë në drejtim të SHBA-ve dhe cilat kategori janë të ndaluara.
Siaps njopftimit të ambasadës shqiptarët që disponojnë vizë amerikane lejohet të udhëtopjnë drejt SHBA-ve vetrëm nëse kanë për qëllin turizmin, pushimet,. Blerjet, takime biznesi apo vizite te miqtë e të afërmit.
Ndërkohë nuk lejohet udhëtimet drejt SHBA me qëllim lindjen e fëmijës, studimet, apo me qëllim punën.
Postimi i plotë i Ambasadës së SHBA:
Është përgjegjësia juaj ta përdorni vizën tuaj në mënyrë korrekte.
Disa aktivitete që LEJOHEN me vizë vizitori B1/B2:
Turizëm
Pushime
Blerje
Vizitë me miq ose të afërm
Takime me bashkëpunëtorë biznesi
Pjesëmarrje në një konventë ose konferencë
Aktivitete që NUK LEJOHEN me një vizë vizitori B1/B2:
Turizëm lindjeje (udhëtim me qëllim kryesor lindjen në Shtetet e Bashkuara për të marrë shtetësinë amerikane për fëmijën)
Punë që rezulton në pagesë nga një punëdhënës ose biznes amerikan
Studimi për një diplomë ose kredite akademike
Performanca të paguara
#securingusborders
Kujtojmë që vendimi i DASH për pezullimin e vizave për emigrantët hyn në fuqi në 21 Janar.
Login
