Ai u shpreh se ky reagim i shkon në favor Mirit dhe se nuk mund të hidhet baltë ndaj askujt.

“Reagimi është në favor të Mirit. Nuk mund të hedhë baltë askush ndaj askujt. Miqtë, të afërmit dhe familjarët, nuk e kemi bërë kurrë që të hedhim baltë ndaj një personi ose familje tjetër. Unë nuk mund të flas në emër të tyre. Miri nuk ka bërë diçka që ne duhet ta mbrojmë. Për shkak të formatit që Big Brother është, për shkak të syve që ky program tërheq, është njësoj si një person i vetëm që bërtet me një milionë persona që bërtasin. Mesazhi do të ishte drejtuar me të drejtë me personat që thonë: ‘Shkëputeni këtë marrëdhënie’. Po aludohet për ndjenja, nuk e besoj. Jo! Duke luajtur po, por ndjenja është diçka e tepërt. Publiku këtu nuk do t’ia dijë. Familja, si në Gjermani, si në Shqipëri, është në mbështetje të Mirit, me atë që ai po bën. Nuk do të doja që të kundërpërgjigjesha ndaj babait të Selin”, u shpreh Landi.

Ai gjithashtu shtoi se si e ka pritur familja e Mirit këtë deklaratë, duke thënë: “Për shkak të komenteve, sado i fortë të jesh, sado i rrahur me vaj e me uthull të jesh, për mua si Land është shumë e pazakontë kjo ndjesi. Ne në mënyrë hermetike e ruajmë familjen jashtë, është e pamundur që të mos preken. Jemi njerëz në radhë të parë dhe kur çështja kalon personale është për t’u habitur.

Ky është Big Brother. Një kompleksitet gjërash. Postimi im është shumë i saktë. Mesazhi është shumë i qartë. Miri nuk mund të kryqëzohet dhe as familja e tij”.

1 042 abonentë kanë mbetur pa energji elektrike në shtatë bashki të Qarkut Elbasan si pasojë e mbizotërimit të motit të keq dhe problemeve të shkaktuara në rrjetin elektrik. 

Sipas të dhënave zyrtare nga Rajoni Elbasan, disa fidra dhe kabina elektrike kanë dalë jashtë funksionit, duke sjellë ndërprerje të furnizimit me energji në zona të ndryshme, kryesisht rurale dhe malore. 

Nga rreth 115 mijë abonentë që administrohen në këtë rajon, aktualisht pa energji rezultojnë 1 042 abonentë. 

Në Bashkinë Librazhd, fidri nr. 4 i Nënstacionit (NST) Librazhd ka mbetur jashtë pune, ndërsa katër kabina janë prekur nga defektet, duke lënë pa energji 113 abonentë në zonat Vilan, Sopot dhe Qafë Dardhë. 

Situata paraqitet më problematike në bashkitë Prrenjas dhe Gramsh. Fidri nr. 3 i Nënstacionit Cërujë ka dalë jashtë funksionit, duke prekur 227 abonentë në zonat Katërlistë, Zgjupt, Kutërqarë, Dushan dhe Prrenjas Fshat. Ndërkohë, fidri nr. 6 i Nënstacionit Gramsh është pjesërisht jashtë pune, çka ka sjellë mungesë të energjisë për 702 abonentë në zonat Skënderbegas, Zenelas, Kullollas, Gribë, Sojnik, Velias, Lenie dhe Grabovë e Sipërme. 

Autoritetet bëjnë me dije se ekipet teknike ndodhen në terren në të gjitha zonat e prekura dhe po punojnë intensivisht për eliminimin e defekteve. Sipas njoftimit zyrtar, rikthimi i energjisë elektrike pritet të realizohet në një kohë sa më të shkurtër, ndërsa situata po monitorohet në mënyrë të vazhdueshme deri në normalizimin e plotë të furnizimit. 

Partia Demokratike pritet të mbajë ditën e nesërme në orën 13:00 një mbledhje të Kryesisë, ku pritet të përcaktohet data e protestës kombëtare të radhës.

Lajmi konfirmohet për News24 nga gazetari Osman Stafa.

Ditën e sotme opozita mbajti një tryezë me aktorë të opozitës dhe përfaqësues të shoqërisë civile, ku u diskutua në lidhje me hapat e ardhshëm të aksionit opozitar.

Bashkia e Durrësit ka njoftuar se qyteti bregdetar pritet që të përballet me erëra të forta gjatë orëve në vijim.

Njoftimi:

Sipas parashikimeve meteorologjike, qyteti ynë pritet të përballet me erëra të forta.
Duke filluar nga ora 16:00 e ditës së sotme, era nga drejtimi jugor do të intensifikohet, duke arritur shpejtësi deri në 25 m/sek, situatë që do të zgjasë deri në orët e para të mëngjesit të së shtunës.
U bëjmë thirrje qytetarëve të shmangin lëvizjet e panevojshme dhe të tregojnë kujdes maksimal. Ju lutemi ndiqni njoftimet zyrtare për sigurinë tuaj dhe të familjarëve.
Strukturat tona do të jenë në gatishmëri të plotë për çdo problematikë që mund të paraqitet.

Një Çmim Nobel nuk mund të “transferohet” apo të ndahet. Këtë e sqaroi nga Oslo Komiteti Norvegjez që cakton fituesin e Çmimit Nobel për Paqen, pas deklaratës së udhëheqëses së opozitës venezueliane, Maria Corina Machado, e cila ishte shprehur e gatshme ta “ndante” ose madje ta “ofronte” çmimin prestigjioz Donald Trumpit.

Deklarata e Machado-s erdhi pas operacionit ushtarak amerikan në Venezuelë, i cili përfundoi me kapjen e Nicolas Maduro-s. “Do të ishte një nder i madh”, kishte komentuar Trump, duke shtuar se shpresonte vetë të nderohej me këtë çmim.

Por Komiteti Nobel e përjashtoi një mundësi të tillë. “Një Çmim Nobel nuk mund të revokohet dhe as të transferohet te një person tjetër”, deklaroi për AFP zëdhënësi i Institutit Nobel, Erik Aasheim. “Pasi shpallen fituesit, vendimi mbetet i pandryshueshëm përgjithmonë”, shtoi ai.

Aasheim sqaroi gjithashtu se fituesi i çmimit është i lirë të vendosë si dëshiron për shpërblimin financiar që shoqëron Nobelin, por jo për titullin dhe statusin e çmimit vetë.

Ky është 40-vjeçari Elkjer Tafciu, autor i grabitjes së supermarketit  në zonën e Yzberishtit në Tiranë. 

Ai u vu në pranga nga policia pasi dje, nën kërcënimin e thikës dhe i maskuar hyri brenda supermarketit, dëmtoi me thikë kasieren dhe arriti të merrte xhiron ditore në kasë, rreth 90 mijë lekë të reja. 

Autori, sipas policisë, rezulton me precedentë të mëparshëm penalë për vjedhje me dhunë. Kasierja mbeti e dëmtuar në dorë gjatë tentativës për ta ndaluar autorin. 

Njoftimi i policisë: 

Identifikohet, kapet dhe vihet në pranga 40-vjeçari që vodhi një shumë parash dje, në një market në Yzberisht, duke kanosur punonjësen, me thikë. 

I arrestuari, me precendent penal për vjedhje me dhunë. 

Shërbimet e Komisariatit të Policisë Nr. 6, në vijim të veprimeve intensive hetimore të kryera për zbardhjen e vjedhjes së kryer dje, në kërcënimin e thikës, në një market në Yzberisht, organizuan dhe finalizuan operacionin policor “Intervent”. 

Si rezultat i operacionit u identifikua, u kap në Rrugën e Qelqit dhe u vu në pranga autori i dyshuar i vjedhjes, shtetasi E. T.(T), 40 vjeç, banues në Tiranë. 

Punonjësja e marketit që u dëmtua në dorë, nga thika që mbante autori, në tentativë për ta ndaluar atë, mori mjekim dhe u largua nga spitali. 

Materialet procedurale do t’i kalojnë Prokurorisë, për veprime të mëtejshme. 

Presidenti i Kolumbisë Gustavo Petro beson se ekziston kërcënimi real për një ndërhyrje ushtarake të shteteve të bashkuara kundër vendit të tij. Në një intervistë për BBC, Petro tha se SHBA po I trajton vendet e tjera si pjesë të perandorisë amerikane dhe rrezikonte të kthehej nga dominuese e botës në të izoluar nga bota.

Ai akuzoi gjithashtu agjentët e migracionit dhe doganave në SHBA, se po vepronin si brigade naziste. Trump ka zgjeruar ndjeshëm operacionet si pjesë e fushatës për të luftuar krimin dhe emigrantët e paligjshëm në vend.

Deklaratat e Petros, vijnë pasi Trump e cilësoi një ide të mirë një ndërhyrje të mundshme ushtarake në Kolumbi, pasi e quajti Petron një njeri të sëmurë që pëlqente të prodhonte kokainë dhe ta dërgonte atë në SHBA.

Kreu i Shtëpisë së Bardhë i ka bërë vazhdimisht thirrje liderit kolumbian të ketë kujdes. Ai dhe Petro zhvilluan një bisedë telefonike mbrëmjen e së mërkurës pas së cilës Trump tha se do të takohej së shpejti me homologun kolumbian në Shtëpinë e Bardhë.

Në një postim në rrjetin social, social Truth, Trump e përshkroi bisedën me Petron si nder të madh. Ndërsa një zyrtar kolumbian pohoi se telefonata kishte reflektuar një kthesë 180 gradë në retorikën e të dyja palëve. Por deklaratat e Petros në intervistën për BBC sugjerojnë se nuk ka ndonjë përmirësim domethënës në marrëdhëniet mes dy vendeve.

Nga Eduard Zaloshnja

Në vitin e largët 1951, Mehmet Shehu bëri një inspektim në Burgun e Burrelit (ishte Ministër i Brendshëm atëherë). Një i burgosur (ish-oficer xhandarmërie) i bëri një lutje të çuditshme Mehmetit – aman priteni pemën e qershisë në oborrin e burgut! I çuditur, Mehmeti pyeti përse duhej prerë pema e pafajshme e qershisë. “Sepse m’u këput qafa duke pritur të çelë qershia” – iu përgjigj ish-oficeri i xhandarmërisë. Dhe më tej, ai e saqroi se “filozofët” e qelive të Burrelit kishin disa vitet që e mbanin me gajret, se sapo të çelte qershia, do të zbarkonin anglo-amerikanët…

Nga viti 1951 deri në vitin 1991, anglo-amerikanët jo vetëm që nuk zbarkuan, por Mehmeti dhe të burgosurit që ai inspektoi në Burgun e Burrelit ndërruan jetë pothuajse të gjithë.

Vijmë në ditët e sotme…

Pas inkursionit të fortë amerikan të Delta Force për mbërthimin e Maduros në vilën e tij të fortifikuar në Venezuelë, shpërthyen parashikimet e “filozofëve” të këtushëm kafenetorë dhe të banaqeve nëpër televizorë: “Ramaduro i ka ditët e numëruara, Delta Force do ta mbërthejë në Surrel”.

Madje, Berisha mblodhi sot në një tavolinë persona të rëndësishëm publikë, për të krijuar një qeveri teknike. Ku nuk mungonin Nard Ndoka, Kujtim Gjuzi, Selami Jenisheri, Kostaq Papa, Ekrem Spahiu, etj.  Sipas parashikimeve të “filozofëve” të këtushëm kafenetorë dhe të banaqeve nëpër televizorë, rënia e “Ramaduros” dhe krijimi i qeverisë teknike është çështje javësh, në mos ditësh.

Nuk pret puna sa të çelë qershia…

Njoftimi:

Prokuroria e Posaçme kundër Korrupsionit dhe Krimit të Organizuar, më datë 08.01.2026, ka paraqitur kërkesën për gjykimin e procedimit penal nr. 196 të vitit 2024, në ngarkim të të pandehurve: Benet Beci, Adela Ruko, Edlira Mitrushi, Jonid Kazani, Yllka Nishku, Premtim Dauti, Rudin Gjoni, të akuzuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim, parashikuar nga nenet 258 dhe 25 të Kodit Penal.

Objekt i këtij hetimi është një procedurë prokurimi e zhvilluar nga Korporata Elektroenergjitike Shqiptare sh.a., me objekt “Zhvillimi Strategjik i Sektorit Energjitik (Projekt Kërkimor)”, me nr. REF-46463-12-18-2019, me fond limit 69,500,000 (gjashtëdhjetë e nëntë milionë e pesëqind mijë) lekë.

Hetimi është nisur kryesisht mbi bazën e referimit të akteve nga hetues të Byrosë Kombëtare të Hetimit (BKH).

Nga aktet e administruara ka rezultuar se, gjatë zhvillimit të kësaj procedure prokurimi, janë evidentuar rrethana fakti për veprën penale të shkeljes së barazisë së pjesëmarrësve në tendera apo ankande publike, në lidhje me veprimet e kundërligjshme të titullarit të autoritetit kontraktor, anëtarëve të njësisë së prokurimit dhe anëtarëve të komisionit të vlerësimit të ofertave. Këto veprime kanë konsistuar në përllogaritjen e fondit limit, hartimin e termave të referencës, përcaktimin e kritereve në dokumentacionin standard të tenderit, si dhe në fazën e vlerësimit të ofertave.

Konkretisht, nga analizimi i provave të siguruara përmes përdorimit të teknikave të posaçme të hetimit, provave materiale të sekuestruara gjatë kontrollit në banesën e personit të marrë si i pandehur në një procedim tjetër, shtetasit Evis Berberi (bashkëshorti i të pandehurës Adela Ruko), si dhe nga kryerja e veprimeve të tjera hetimore në kuadër të këtij hetimi, ka rezultuar se:

I pandehuri Benet Beci, në detyrën e Administratorit të Korporatës Elektroenergjitike Shqiptare sh.a., në cilësinë e titullarit të autoritetit kontraktor, në bashkëpunim me anëtarët e njësisë së prokurimit, të pandehurit Jonid Kazani, Edlira Mitrushi, Yllka Nishku, si dhe me anëtarët e komisionit të vlerësimit të ofertave, të pandehurit Adela Ruko, Rudin Gjoni, Premtim Dauti, kanë paracaktuar dhe krijuar avantazhe dhe privilegje të padrejta për shoqërinë fituese të kësaj procedure prokurimi, “Consulting & Management Albania” sh.p.k.

Në këtë procedurë prokurimi janë evidentuar veprime në kundërshtim me nenet 1, 2, 20, 24 dhe 46 të ligjit nr. 9643, datë 20.11.2006, “Për prokurimin publik”, i ndryshuar, si dhe me nenet 28 dhe 61 të VKM nr. 914, datë 29.12.2014, “Për miratimin e rregullave të prokurimit publik”.

Një 43-vjeçar shqiptar, ka dalë para gjykatës në Venezia, ku është përballur me akuzën e tentativës së vrasjes ndaj bashkëshortes së tij. Gjykata vendosi që ai të vijojë të qëndrojë në burg, për shkak të rrezikshmërisë së veprës. 

Ngjarja ndodhi më 8 Janar në Cavarzere, ku gjatë një konflikti familjar, burri dyshohet se spërkati bashkëshorten me benzinë dhe u përpoq t’i vinte flakën. Ishte pikërisht djali 15 vjeçar i çiftit që ia mori çakmakun nga dora, duke shmangur kështu një tragjedi të madhe.

Para trupit gjykues, i pandehuri deklaroi se konfliktet me bashkëshorten ishin të shpeshta dhe se ajo e qortonte për konsumimin e alkoolit. Ai tentoi ta minimizojë ngjarjen, duke deklaruar se ishte i dehur në momentin e incidentit. 

“Ishte një shaka, isha i dehur” mësohet tu ketë thënë ai forcave të policisë.  

Edhe gjatë seancës, i pandehuri deklaroi se nuk kishte qëllim të kryente një akt ekstrem. Sipas mediave italiane, familjarët kanë shprehur gatishmëri për ta falur dhe për ta pranuar sërish në familje, pas shmangies së tragjedisë./Corriere della Sera 

Turma të mëdha protestuesish marshuan përmes Teheranit dhe qyteteve të tjera iraniane, në atë që duket të jetë një prej shfaqjeve më të mëdha të forcës nga kundërshtarët e regjimit të ajatollahëve në vite. Video të shpërndara në rrjete sociale tregojnë demonstratat në Teheran dhe në qytetin verilindor të Mashhadit, mbrëmjen e së enjtes, ku pati edhe zjarrvënie të disa automjeteve.

Megjithatë, shumica e protestave ishin paqësore, ndërsa autoritetet ndërprenë aksesin në internet dhe linjat telefonike në mbarë vendin, shkruan A2 CNN. Protestuesit dëgjohen teksa kërkojnë të zemëruar rrëzimin e liderit suprem, Ajatollahut Ali Khamenei, dhe rikthimin e Reza Pahlavit, djali në ekzil i ish-shahut, i cili u ka bërë thirrje mbështetësve të dalin në rrugë.

“Rroftë shahu” apo “Kjo është beteja e fundit, Pahlavi rikthehu!” ishin sloganet e manifestuesve. Të tjerë bërtisnin “Vdekje diktatorit” apo “Mos kini frikë, jemi të gjithë së bashku”.

Pahlavi, babai i të cilit u rrëzua nga pushteti gjatë Revolucionit Islamik në vitin 1979 dhe që jeton në Uashington, ka vlerësuar guximin e protestuesve. Ai ka falënderuar presidentin Trump për mbajtjen përgjegjëse të regjimit dhe u ka kërkuar liderëve europianë të bëjnë të njëjtën gjë.

Trazirat, që vijojnë prej 12 ditësh në Iran, janë nxitur nga zemërimi për krizën ekonomike dhe inflacionin, dhe janë përhapur në më shumë se 100 qytete në 31 provinca të Iranit. Agjencia e Lajmeve të Aktivistëve për të Drejtat e Njeriut, me bazë në SHBA, ka bërë të ditur se të paktën 34 protestues, 5 prej të cilëve fëmijë, dhe 8 pjesëtarë të personelit të sigurisë janë vrarë, ndërsa gati 2 300 persona janë arrestuar. Sipas një grupi monitorues për të drejtat humanitare në Iran, me bazë në SHBA, viktimat janë 45, mes të cilëve 8 fëmijë.

Nga Ben Andoni

Ka mbaruar idili i viteve të para të demokracisë për partitë politike, sidomos në Shqipëri, kur deri më atëherë ekzistonte vetëm Partia e Punës dhe simbolika e saj, si subjekt i barabartë me shtetin. Tashmë, përveç dy partive kryesore dhe fare pak të tjerëve që i mbijetuan dhe 11 Majit 2025, dhjetëra të tjerët përbëjnë thjesht statistika për emrat dhe sidomos adresat që në jo pak raste as nuk identifikohen. Në zgjedhjet e fundit të Përgjithshme, u regjistruan plot 53 parti politike, kuptohet se pragun e kaluan më pak formacione se gishtat e një dore, ndaj këtej e tutje ato janë thjesht pjesë e historisë së zgjedhjeve sesa kanë ndryshuar diçka për vendin. Në fakt, e gjithë historia jonë politike e pas viteve ’90 mblidhet rreth 2 partive kryesore PS dhe PD dhe pastaj pak të tjerave, të cilat mezi e kanë kaluar pragun, disa herë falë dhe koalicioneve dhe aleancave të zgjuara. Tashmë, historia e tyre është fashitur. Ajo që i dallon është zgjuarsia që përkthehet shpesh si shkelja e moralit për të maksimalizuar votën në interes të pushtetit. Paradokset dhe çudirat nuk mbarojnë këtu. Nuk harrohet lëvizja e PD-së në zgjedhjet e dikurshme lokale, kur futi në thesin e saj komunistët, bash partia e të persekutuarve që mbahej me kauzën e anti-komunizmit! PS-ja sot është në një sulm për të rekrutuar këdo që ka lidhje me PD-në, ‘të Djathtë’ të tjerë apo Partinë e Lirisë dhe që mund t’i shërbejë. Rekrutimi i shumë emrave opozitarë të rreshtit të dytë e të tretë, në javët e fundit, kanë treguar mënyrën sesi e përfaqësojnë politikanët publikun e tyre. Për hir të së vërtetës, pushteti është qëllim dhe kjo i bën tek PS-ka të mos kenë skrupuj. Dhe, nëse për ta është normalitet për publikun është kthyer në angari dhe konfuzion i plotë mendor. Reformat që nisin mbeten në parlament si kjo e fundit për Reformën Zgjedhore dhe atë Territoriale. Konflikti i stisur kinse nuk shuhet. Veçse, kur shikon më tutje dhe njeh realitetin tonë e kupton rrjetin e tarafeve, korrupsionit dhe emrat që bashkëpunojnë nga të dy anët dhe ndërgjegjësohesh se funksionalizimi i shtetit dhe demokracia janë thjesht slogane në vende si tonat. Tashmë jemi mes të ashtuquajturës paaftësi e politikës për të sendërtuar vizione dhe “krizës së sistemit”. Sot, njerëzit, ngado, po humbin edhe kuptimin e partive dhe nevojën për to. Ish-presidenti i fundit Ramiz Alia u përpoq të bënte një diversion “interesant”, duke i paraqitur asokohe organizatat e masave, siç quheshin, si grupime elektorale. Eksperimenti nuk shkoi. Sot, regjimi partiak kudo në botë po merr goditje të mëdha dhe madje për vetë konceptin e identifikimit të partisë. Studiuesi i njohur i politikës Xhovani Sartori e përcaktonte kështu formacionin politik: “Një parti është një grup politik i identifikuar me një etiketë zyrtare që paraqitet në zgjedhje dhe është e aftë të vendos nëpërmjet zgjedhjeve kandidatët në poste publike”. Përcaktimi i tij ndan kriteret më rigoroze të identifikimit të një formacioni përballë organizimeve të tjera që synojnë të kryejnë veprimtari politike. Por janë lëvizjet politike tashmë që po duken si alternativa. “Vetëvendosja” e tregoi në Kosovë, në Shqipëri të rinjtë po kanalizohen në Lëvizje politike. Tek e fundit nuk është më e pathënë: Partitë politike sot janë përgjithësisht jopopullore dhe nuk besohen prej publikut të gjerë. Rasti i Shqipërisë, ku votojnë më pak se 50% e popullatës nuk ndryshon me Ballkanin, ku shkalla e votimit është e njëjtë dhe madje edhe më e ulët. Një anketë mbi qëndrimet e publikut ndaj demokracisë nga Fondacioni për Inovacion Politik (Fondapol) së bashku me Institutin Ndërkombëtar Republikan (IRI), e cila u publikua në vitin 2021, tregoi se: Partitë politike u dalluan si institucionet më pak të besuara globalisht në botën demokratike, me vetëm 27% të besimit të përgjithshëm kundrejt 73% mosbesim. Partitë ishin shumë më të pabesueshme sesa parlamenti (42 % besim kundrejt 58% mosbesim), qeveria (43 % kundrejt 57 %), media (44 % kundrejt 56%) ose sindikatat (48 % kundrejt 52 %), institucionet e tjera që kishin më shumë mosbesim sesa besim. Politologët shohin me shqetësim se partitë politike: jo vetëm që nuk u besohet si institucione, por anëtarësimi i tyre duket se ka arritur në nivelet më të ulëta historike. Dikur Partia Konservatore e Mbretërisë së Bashkuar mund të krenohej me rreth 1.5 milion anëtarë të partisë në mesin e viteve 1970, kurse tashmë mezi e kalon pragun e dyqind mijë anëtarëve! Në Shqipëri këtë e shikon nga mungesa e identifikimit të bazës tek PD-ja por edhe shuarja e organizatave të dikurshme të PS-së në formë kapilare, ku rrihej mendimi ndryshe dhe përcillej zëri i masave, për t’ia lënë vendin patronazhistëve. Të dyja tashmë janë larg ideologjive bazë, Të Majtë apo të Djathtë.

“Rënia e partive politike është pjesë e një trendi shoqëror afatgjatë (Qendra Martens, 2021)  që lidhet me ndryshime më themelore që kanë ndikuar në shoqëritë evropiane, duke përfshirë rolin në rënie të ideologjive, atomizimin e shoqërive dhe dobësimin e rrjeteve të vjetra shoqërore që përbënin ekosisteme të tëra shoqërore, nga të cilat partitë politike ishin vetëm një aspekt”, shprehen në shkrimin e tyre “Unloved but Indispensable: Political Parties in Europe” (Të padashura por të domosdoshme: Partitë Politike në Evropë), autorët Paul Mccarthy, Thibault Muzergues dhe Patrick Quirk. Studiuesit e mësipërm shikojnë trendin të lidhur me individualizmin e viteve ‘80, element që i ka bërë qytetarët e tyre më pak të vetëdijshëm për përkatësinë e tyre në një familje politike, ose në një klasë të caktuar shoqërore, dhe si rezultat konkludojnë ata: identitetet e tyre politike janë bërë më fluide, duke rezultuar në më pak besnikëri ndaj partive ose platformave dhe më shumë mbështetje për një personalitet të caktuar, argumentojnë ata. Por duket se lufta më e madhe ndaj partive ashtu si edhe për shoqërinë është rritja e fuqisë së internetit dhe mediave sociale në vitet 2000 dhe 2010. Tashmë nuk mund të flitet më për projekte afatgjata të partive politike, që do të thotë respekt të ideologjisë së tyre, përshtatja në interesa globale dhe paraqitja e kandidatëve për të mbrojtur këto interesa dhe ideologji në zgjedhje me qëllim ushtrimin e pushtetit në emër të parimeve ose për të mirën e përgjithshme. Kjo  s’ka rëndësi. Jeta është bërë një Big Brother dhe vetë ekzistenca e partive e parëndësishme për politikën moderne. Ikjet e individëve nga partia në parti nuk janë më tren dhe as çudi.

Ndaj, gjithnjë e më shumë  po flitet për shuarjen e partive politike dhe ide të reja në një epokë të mediave sociale, ku ideja është se tashmë nga centralizimi po kalohet në organizimin e drejtuar të një decentralizimi politik. Dhe rezultati: Indekset e Lirisë dhe Prosperitetit të Këshillit Atlantik shfaqin se liria politike në Evropë ka rënë vazhdimisht, kurse rasti grek me rënien e partive historike; e ndoqi Franca me ndryshimin historik, ku dy partitë që dominuan jetën politike të vendit në vitet 2000 dhe fillim të viteve 2010, respektivisht Partia Socialiste (PS) dhe Republikanët (LR), u eliminuan brenda një vit të vetëm zgjedhor (2017) nga Emmanuel Macron. Në zgjedhjet presidenciale të vitit 2022, pjesa e tyre e përbashkët e votave në raundin e parë ishte pak më shumë se 6 %.

Në thelb, partitë politike duhet të zgjidhnin si duhet elementin e përfaqësimit në një sistem politik të drejtë demokratik. Madje, as një lëvizje nuk e arrin dot, por rasti i Shqipërisë dhe vende rishtare në demokraci ka treguar se ky element nuk funksionon më. Kjo ka sjellë pa fund pasoja negative. Kjo është edhe arsyeja pse sot gjithmonë e më shumë ka çoroditje dhe shqetësim për rolin e partive politike në një sistem demokratik dhe në rastin shqiptar po tregojmë sesi PS dhe PD nuk i përfaqësojnë më fare zgjedhësit e tyre, por thjesht ata që kanë interes tek ato. Xhon Arbuthnot, polimati skocez e thoshte më qartë shekuj më parë, kur nuk mendohej ndonjëherë fuqia e partive politike: “Të gjitha partitë politike vdesin më në fund duke gëlltitur gënjeshtrat e tyre”.  (Homo Albanicus)

Kryeministrja italiane Giorgia Meloni ka hedhur poshtë idenë e një ndërhyrjeje ushtarake amerikane në Groenlandë, duke e cilësuar të papranueshme dhe të padobishme për këdo.

“Nuk besoj në hipotezën që SHBA-të të nisin një aksion ushtarak në Groenlandë, të cilin nuk do ta mbështesja” dhe “që nuk do t’i shërbente askujt”, kështu u shpreh kryeministrja Giorgia Meloni, pavarësisht se Trump ka lënë të kuptojë se po e shqyrton një opsion të tillë.

Sipas saj, hipoteza e një ndërhyrjeje për të marrë kontrollin e Groenlandës është përjashtuar si nga Rubio ashtu edhe nga vetë Donald Trump.

“Unë besoj se administrata Trump, me metodat e saj shumë të ashpra, po vë në dukje rëndësinë strategjike të Groenlandës për interesat dhe sigurinë e saj. Është një zonë ku veprojnë shumë aktorë të huaj dhe mendoj se mesazhi i SHBA-ve është se nuk do të pranojnë ndërhyrje të tepruara nga aktorë të jashtëm.”, shtoi ajo.

Mes të tjerash, Meloni shtoi se shpesh nuk është dakord me Trumpin, duke theksuar se e drejta ndërkombëtare duhet mbrojtur: “Ka shumë gjëra për të cilat nuk jam dakord me Trump, për shembull besoj se e drejta ndërkombëtare duhet mbrojtur gjerësisht. Kur nuk jam dakord, ia them atij, nuk kam vështirësi.”

Kryeministrja italiane nënvizoi se synimi i saj është të forcojë marrëdhëniet me partnerët evropianë dhe atlantikë, duke parë më shumë “dritat sesa hijet” e bashkëpunimit.

“Drejtimet e politikës sonë të jashtme janë Bashkimi Evropian dhe Aleanca Atlantike, siç kujtoi edhe Presidenti Mattarella para disa ditësh. Çfarë do të thotë të mbajmë distancë nga Amerika? Të dalim ndoshta nga NATO, të heqim bazat ushtarake amerikane, të sulmojmë McDonalds? Le të flasim për gjeopolitikë, unë kërkoj dritat më shumë sesa hijet e marrëdhënies së Italisë me partnerët evropianë dhe atlantikë.”, përfundoi Meloni.

Kjo deklaratë e Melonit, vjen pasi Shtëpia e Bardhë ka konfirmuar se presidenti Donald Trump dhe ekipi i tij po shqyrtojnë opsione për të blerë Groenlandën dhe se përdorimi i ushtrisë amerikane është “gjithmonë një opsion”.

Reshjet intensive të shiut dhe dëborës, të shoqëruara me temperatura të ulëta, kanë krijuar problematika të shumta në disa qarqe të vendit, duke ndikuar në qarkullimin rrugor, furnizimin me energji elektrike dhe sigurinë e banorëve, kryesisht në zonat malore dhe pranë lumenjve.

Në njoftimin e bërë nga Ministria e Mbrojtjes thuhet se në qarku Gjirokastër paraqet situatën më problematike. Në bashkinë Gjirokastër ka prezencë dëbore në njësinë administrative Picar, ndërsa lumi Drino i është afruar trupit të rrugës, duke kërkuar ndërhyrje të menjëhershme për forcimin e argjinaturës. Në disa fshatra si Odrie, Lunxhëri dhe Zagori, po punohet për lirimin e akseve të bllokuara dhe të një ure të vogël në aksin Krinë–Tranoshisht–Saraqinishtë. Në bashkinë Dropull, ura e Glinës mbetet problematike, ndërsa po punohet për lirimin e akseve Pogon–Dropull dhe Zagori–Libohovë.

Në qarkun Lezhë, reshjet e dëborës kanë prekur edhe zonat e ulëta, përfshirë qytetin e Lezhës, ku riparimi i argjinaturës së dëmtuar në lumin Drojë është përfunduar. Qarku Vlorë shfaq përmirësim të rënies së prurjeve në lumin Vjosë, ndërsa nënkalimi në fshatin Bishan mbetet i bllokuar, por pa dëmtime banesash, vetëm ujë në oborre.

Në Elbasan dhe Peqin, dëbora dhe ngricat kanë bllokuar disa akse rurale, ndërsa në Dibër, forcat e emergjencës civile po punojnë për lirimin e akseve me prezencë akulli dhe rrëshqitje dherash. Ekipet e OSHEE po punojnë për rikthimin e energjisë elektrike në njësitë administrative Bulqizë, Klos, Dibër dhe Lurë.

Ministria e Mbrojtjes bën me dije se Forcat e Armatosura, Mbrojtja Civile, policia dhe shërbimet bashkiake janë të angazhuara në terren për përballimin e situatës dhe rikthimin e normalitetit. Banorëve të zonave të prekura u bëhet thirrje të shmangin lëvizjet e panevojshme, të respektojnë udhëzimet e autoriteteve dhe të raportojnë çdo emergjencë.

NJOFTIM MBI SITUATEN E KRIJUAR SI PASOJE E MOTIT TE KEQ NE VEND

Reshjet intensive të shiut dhe dëborës, të shoqëruara me temperatura të ulëta kanë krijuar problematika të shumta në disa qarqe të vendit, duke ndikuar në qarkullimin rrugor, furnizimin me energji elektrike dhe sigurinë e banorëve, kryesisht në zonat malore dhe pranë lumenjve.

Qarku Gjirokastër paraqet situatën më problematike.
Në Bashkinë Gjirokastër ka prezencë dëbore në njësinë administrative Picar, ndërsa lumi Drino në aksin Gjirokastër–Tepelenë i është afruar trupit të rrugës, gjë që ka kërkuar ndërhyrje të menjëhershme për forcimin e argjinaturës. Në disa fshatra: Odrie, Lunxhëri dhe Zagori po ndërhyhet në disa akse rrugore të bllokuara dhe në një urë të vogël në aksin Krinë–Tranoshisht–Saraqinishtë.
Në Bashkinë Dropull, ura e Glinës mbetet problematike, ndërsa po punohet për lirimin e akseve: Pogon–Dropull, Zagori-Libohovë të bllokuar nga dëbora.
Puna e forcave në terren po vijon edhe në aksin Përmet–Dogana e Tre Urave është i bllokuar si dhe në njësinë administrative Frashër dhe disa fshatra përreth, ku ka problematika për shkak të reshjeve të dëborës.
Në Bashkinë Memaliaj ka problematika të shkaktuar nga lumi Vjosë në tokat bujqësore, ndërsa në Tepelenë qarkullimi në aksin Tepelenë–Gjirokastër realizohet vetëm me një korsi në zonën “Shkalla e Zezë”.

Qarku Lezhë është përfshirë nga reshje dëbore edhe në zona të ulëta, përfshirë qytetin e Lezhës. Strukturat përgjegjëse janë në gatishmëri për mbajtjen hapur të akseve rrugore. Është përfunduar riparimi i argjinaturës së dëmtuar në lumin Drojë.

Qarku Vlorë paraqet një përmirësim sa i përket rënies së prurjeve në lumin Vjosë. Nënkalimi në fshatin Bishan është i bllokuar, por nuk raportohen banesa të përmbytura, vetëm prezencë uji në oborre.

Qarku Elbasan po përballet me dëborë dhe ngrica në zonat malore të bashkive Elbasan dhe Peqin, ku disa akse rurale janë bllokuar nga dëbora dhe rrëshqitjet e dherave. Mjetet dhe punonjësit janë në terren për normalizimin e situatës.

Qarku Dibër mbetet një nga zonat më të prekura gjithashtu. Forcat e emergjencave civile po punojnë në disa akse me prezencë të akullit apo rrëshqitje dherash. Ekipet e OSHEE po punojnë për rikthimin e energjisë në njësitë administrative Bulqizë, Klos, Dibër dhe Lurë. Disa segmente rrugore janë aktualisht të pakalueshme, por forcat e policisë janë në terren për të orientuar qarkullimin.

Forcat e Armatosura, strukturat e mbrojtjes civile, policia e shtetit, shërbimet bashkiake, nën koordinimin e Agjencisë Kombëtare të Mbrojtjes Civile dhe Ministrisë së Mbrojtjes janë të angazhuara në terren me mjete dhe personel për përballimin e situatës dhe rikthimin e normalitetit.

U bëhet thirrje banorëve të zonave të prekura të shmangin lëvizjet e panevojshme, të respektojnë udhëzimet e autoriteteve dhe të raportojnë çdo emergjencë pranë strukturave përkatëse.

Policia e Tiranës ka finalizuar operacionin policor të koduar “Intervent”, duke arrestuar autorin e dyshuar të një vjedhjeje me dhunë të ndodhur një ditë më parë në një market në zonën e Yzberishtit.

Shërbimet e Komisariatit të Policisë Nr. 6, pas veprimeve intensive hetimore për zbardhjen e ngjarjes, kanë identifikuar dhe kapur në Rrugën e Qelqit shtetasin E. T. (T), 40 vjeç, banues në Tiranë. Ai dyshohet se ka vjedhur një shumë parash nga marketi, duke kanosur me thikë punonjësen e biznesit.

Sipas policisë, i arrestuari rezulton me precedent penal për vjedhje me dhunë. Gjatë ngjarjes, punonjësja e marketit është dëmtuar në dorë nga mjeti prerës, në momentin kur ka tentuar të ndalojë autorin. Ajo ka marrë ndihmë mjekësore dhe më pas është larguar nga spitali, jashtë rrezikut për jetën.

Politologu Ermal Hasimja, i pranishëm në takimin e thirrur nga Sali Berisha me partitë opozitare dhe përfaqësues të shoqërisë civile, u shpreh se problemi kryesor i opozitës në tërësi është mungesa e besueshmërisë së qytetarëve.

Sipas tij, nëse opozita do të kishte besueshmëri te qytetarët, “lufta” e saj kundër qeverisë së Edi Ramës do të ishte më e lehtë.

Kritika shprehu në veçanti edhe për Partinë Demokratike, teksa tha se nuk mund të duket sikur po bashkëpunon me Partinë Socialiste për të ndryshuar Kodin Zgjedhor në kurriz të partive të vogla, dhe më pas t’i ftojë këta të fundit për të bashkëpunuar kundër qeverisë.

“Problemi kryesor që ka sot opozita, jo thjesht PD, është besueshmëria. Nëse në çdo vend evropian normal me demokraci sot, do të mjaftonte jo një opozitë jo e shkëlqyer por thjesht një normale që regjimet e këtij lloji të fshiheshin jo thjesht nga pushteti por edhe nga historia. Nga ana tjetër, besoj se opozita në tërësi s’e ka luksin që të shmangë nga rradhët e veta ose të krijojë konflikte të brendshme, hiq ndonjë rast si puna e marksistëe të Arlind Qorrit dhe Lëvizja Bashkë.

Mendoj që PD dhe të tjerat duhet të mblidheshin dhe të diskutojnë jo me hartime e poezi, problemet i dimë shumë mirë. Çështja është që nëse do të ketë një bashkëpunim, duhet ndërtuar mbi bazën e një diçkaje konkrete, propozimi konkret. Së pari, çështja e zgjedhjeve të lira e të ndershme. Pika e dytë, çështja e mbrojtjes dhe mbështetjes të sistemit të drejtësisë. Këtu PD është me luhatje megjithatë këto kohët e fundit kam konstatuar se ka një qëndrim më pozitiv.

Sot institucionet më të besueshme janë të drejtësisë. Do s’do PD, Shehaj e Lapaj, sot institucionet më të besueshme janë këto, dhe bashkëpunimi me partitë e tjera është çështje domosdoshmërie. Nga 150 mijë votat që kanë marrë partitë e reja të vogla, janë vota që nuk do të shkonin kurrë te e djathta. Sepse janë vota të të majtëve të zhgënjyer. Kjo është edhe një arsye tjetër se pse votat e këtyre partive janë të nevojshme dhe shumë mirë që iu bë ftesa atyre. PD duhet të tregojë edhe një nivel besueshmërie dhe parimor më të lartë.

Nuk ka nevojë që PD ta lejojë veten që të shfaqet bashkëpunuese me PS për ndryshimin e kodit zgjedhor në kurriz të të voglave dhe më pas t’i ftojë këto parti të vogla për të bashkëpunuar. Nëse PD është e sinqertë te bashkëpunimi, është akoma në kohë, le ta vazhdojë këtë një hap më tutje. Le të ndryshojë ndryshimin e Kodit zgjedhor që do të çonte në eliminimin e këtyre partive të vogla. Nëse PD do të mbante një qëndrim të tillë, do t’i shtonte besueshmëri PD.”, tha Hasimja.

Kanë vijuar reshjet e borës në qarkun Dibër, duke shkaktuar probleme kryesisht në zonat e thella malore. Temperaturat që kanë zbritur nën zero gradë kanë krijuar vështirësi në rrugët rurale, ku prezenca e akullit e bën të rrezikshme lëvizjen e mjeteve.

Probleme nga ngricat raportohen edhe në Rrugën e Arbrit, ku në disa segmente ka prezencë të borës dhe akullit. Vështirësi në qarkullim ka në aksin Fushë-Bulqizë, Maqellarë, si dhe në njësinë Xibër, në afërsi të tunelit të Murrizit, ku automjetet lëvizin me kujdes të shtuar.

Situata paraqitet më problematike në njësitë administrative Lurë, Kala e Dodës, Selishtë, Muhurr, Trebisht, Ostren, si dhe në disa fshatra të thella të qarkut Dibër, ku reshjet e borës dhe akulli kanë vështirësuar qarkullimin.

Autoritetet u bëjnë thirrje drejtuesve të mjeteve të tregojnë kujdes të shtuar dhe të përdorin goma dimërore, veçanërisht në zonat problematike.

Reshjet e shumta të shiut dhe prurjet nga kodrat përreth kanë bërë që përroi i fshatit Gur i Kuq të dalë gjatë nga shtrati i tij, për shkak të sasisë së madhe të aluvioneve që ka sjellë situatë e cila vijon prej dy ditësh. Dalja nga shtrati e përroit ka sjellë gjithashtu bllokimin e shkarkuesit në aksin nacional Pogradec–Qafë Thanë.

Prej dy ditësh vijon puna për normalizimin e situatës ndërsa qarkullimi i mjeteve në një segment rreth 100 metra kryhet vetëm me një korsi.

Prej tre ditësh po punohet për hapjen e një korsi emergjente drejt njësisë administrative Dardhas, pasi rruga është shembur dhe kalimi i mjeteve është i pamundur. Të bllokuara mbeten gjithashtu aksi Kakaç–Grunjas, si pasojë e rrëshqitjeve të dheut, si dhe aksi Kalivaç–Dunicë për të njëjtën arsye.

Si pasojë e këtyre bllokimeve, në fshatrat Dunicë dhe Grunjas ditën e sotme nuk është zhvilluar procesi mësimor, pasi mësuesit nuk kanë mundur të mbërrijnë në shkolla për shkak të pamundësisë së kalimit të mjeteve, bën me dije Zyra Arsimore Pogradec.

Edhe në segmentin e Unazës së Pogradecit situata mbetet problematike, shembja e rrugës në një gjatësi prej 50 m vijon të jetë rrezik i shtuar për mjetet dhe lëvizja bëhet vetëm me 1 korsi.

Prurjet e lumenjve janë ulur ndjeshëm për shkak të ndërprerjes së reshjeve ndërsa pasojat e lëna pas duken të rënda si në rrugë ashtu edhe në sipërfaqe bujqësore që janë përfshirë nga ujërat e vrullshëm.

Dalja e ujërave të Vjosës nga shtrati ka shkaktuar përmbytje të mëdha në Fier dhe Mallakastër, duke lënë qindra hektarë tokë bujqësore dhe dhjetëra banesa nën ujë.

Situata më e rëndë është në fshatin Ferras, ku pothuajse gjysma e fshatit është e mbuluar nga uji.

Përmbytja i ka gjetur banorët tërësisht të papërgatitur, sikurse tregojnë për gazetaren e RTSH , Laureta Roshi, banorët shprehet se “na erdhi lumi menjëherë, nuk e prisnim. Zumë dyert, por kaloi mbi 1 metër, kaloi mbi pritën që kishin bërë. Nuk po na shikojnë me sy. Ushqimet e mia janë nën ujë. Kuzhina ka rënë nga lagështira”, rrëfen një banor i zonës, duke treguar dëshpërimin e tij.

Ajo tregon se shumë familje nuk u larguan nga banesat, edhe pse niveli i ujit arriti mbi një metër.

Ata u përpoqën të shpëtonin çfarë të mundnin dhe të mos linin vetëm bagëtitë, të cilat i nxorën në rrugë.

Një tjetër banor shprehet i tronditur: “Uji na hyri në shtëpi, na mori gjithçka. Nuk kemi ku të shkojmë, jemi të detyruar të qëndrojmë këtu”.

Komisionet e verifikimit të dëmeve kanë dalë në terren që në mëngjes për të evidentuar pasojat. Banorët shpresojnë në përfitimin e dëmshpërblimeve, duke pohuar se kjo përmbytje është shumë më e rëndë se ato të mëparshmet.

“Kjo herë është më e madhe se çdo përmbytje tjetër që kemi parë. Uji na ka marrë gjithçka”, thotë një banor i Ferrasit.

Në disa banesa niveli i ujit arrin deri në 40 centimetra, duke e bërë të pamundur hyrjen. Sipas emergjencave civile, në Prefekturën e Fierit janë nën ujë 200 hektarë tokë bujqësore, ndërsa 18 persona janë evakuuar.

Ekipet e emergjencave dhe punonjës të bashkisë pritet të ndërhyjnë me mjete të rënda për pastrimin e kanaleve anës rrugëve të brendshme të fshatit, bllokimi i të cilëve nuk lejon largimin e ujit.

Ndërkohë, niveli i prurjeve në Vjosë ka nisur të bjerë dhe ujërat po tërhiqen gradualisht.

Prokurori Arqile Koça është zgjedhur zëvendësprokuror i Përgjithshëm.

Emërimi e tij në këtë pozicion është bërë nga kryeprokurori, Çela, pas miratimit nga mbledhja e trupës së prokurorëve në Prokurorinë e Përgjithshme.