Dua Lipa ka ndarë me ndjekësit disa foto dhe video nga festimet e Krishtlindjeve, duke treguar momente të ndryshme nga atmosfera familjare në shtëpinë e saj.
Këngëtarja shqiptare duket e përqendruar te dashuria dhe qetësia e këtyre ditëve, larg angazhimeve profesionale.

Në disa prej imazheve, ajo shfaqet duke gatuar, në të tjera duke pozuar pranë tryezës festive, si edhe në shoqërinë e familjarëve dhe partnerit të saj.

Dua Lipa ka ndarë gjithashtu momente nga darka e Krishtlindjes, përfshirë pamje të gatimeve, të cilat duket se i ka përgatitur vetë.

Në përshkrimin që shoqëron fotot, këngëtarja shkruan: “Gjithçka ka të bëjë me dashurinë… dhe këtë vit kam shkëlqyer në gatim”, për të shtuar më pas: “GËZUAR FESTAT TË GJITHËVE!! JU DËRGOJ SHUMË DASHURI!!!!!”

Kryetari i Partisë Demokratike, Sali Berisha, ka rrëfyer jetën e tij në 360 gradë, nga rinia dhe familja, politika dhe sfidat, profesioni dhe pasionet.

Në emisionin “Elevate” me Floriana Garo, ish-presidenti dhe kryeministri ndau dekadat e karrierës së tij politike e jo vetëm, duke kombinuar historitë e jetës familjare me atë të braktisjes së profesionit të mjekut për të zgjedhur politikën si një rastësi e madhe dhe që nuk e kishte menduar kurrë më parë.

Berisha duke iu kthyer viteve më përpara në politikë, u shpreh se në 1997 u rrëzua nga pushteti nga rebelimi komunist, njerëz të cilët i mundi, shtoi ai me votë të lirë në vitin 2005. Të njëjtën Berisha beson se ende do ta bëjë me një rikthim të tretë në pushtet, po me votën e lirë.
Duke folur për vitin 2021, kryedemokrati atëherë i zgjedhur deputet, tha se non-grata e SHBA me anë të Blinken ishte një rrufe në qiell të hapur.

Më tej, Berisha tha se pika e kthesës për kthimin e tij ishte kërkesa për moslejimin e tij për t’u futur në parlament.

“Kisha jetuar në diktaturë, një nga mësimet ishte se qëndrimi në kohë të gjatë në karrige nuk është i dobishëm për vendin. Edhe sot e mendoj. Kam dhënë dorëheqjen. Pa ndonjë keqardhje të madhe. mendova se unë përmbusha.”

“Ishte një rrufe në qiell të hapur. Më kishte thënë Rama po censurohesh, se ke dekonspiruar kundër politikës së jashtme SHBA. Vendimi ishte për korrupsion dhe minim të demokracisë. Ishte një fyerje e rëndë dinjitetit tim. Ishte beteja për dinjitetin tim. Kur ata kërkuan të mos hyj në parlament. atë se bënë dot. Kur në tërbim, Yuri Kim bënte çdo gjë që të kontrollonte Lulzim Bashën si kryetar partie. Kjo nuk mund të ndodhte. U vendosëm në një izolim të paprecedent. Nga burokratë të korruptuar europianë dhe botëror. Ne ia dolëm dhe do ia dalim. Është kauzë e drejtë.”

“Për të qenë i suksesshëm duhet të ketë moral dhe empati. Jashtë moralit dhe empatisë e kam të vështirë të mendoj. Mund të kesh sukses por do jesh problem i madh” thekson Berisha.

Nga fëmijëria në Malësinë e Gjakovës, vitet e formimit dhe pasionet e hershme, deri te rrugëtimi si gjimnazist në Tiranë dhe studimet në Mjekësi, Berisha rrëfen momentet që kanë ndikuar në formimin e tij njerëzor dhe profesional. Ai ndalet edhe te njohja me bashkëshorten, krijimi i familjes dhe përjetimi i rolit të babait, një dimension intim, i rrallë për publikun.

Intervista vijon me hyrjen në politikë, sfidat e mëdha të drejtimit të vendit, përjetimet si President dhe Kryeministër, vendimet e vështira, dorëheqjen dhe rikthimin në skenën politike.

“Nuk e kisha menduar ndonjëherë se mund të merresha me politikë. Dhe në atë kohë çdo lloj kundërshtimi mund të vinte me pasoja nga më të paimagjinueshme. Por pasojat më të rënda do i paguanin fëmijët dhe gruaja. Pra çmimi në atë kohë ishte i madh”, rrëfeu ai.

Por çfarë e nxiti Berishën që të ndiqte rrugën e politikës, pasi pranon se kishte informim vetëm për çështjet e Kosovës, për shkak të familjes së tij.

“Na mungonte dinjiteti njerëzor, sepse ne tjetër mendonim dhe tjetër flisnim, ishte imponuar njeriu diktaturë. Ne diskutonim me miqtë gjithçka kundër, por kur shkonim në kolektiv, flisnim të gjithë ndryshe. Im atë për shembull fliste gjithmonë ato që mendonte. Për sa i përket situatës, një nxitje e madhe për mua ishte uria e shqiptarëve. Ishte uria kronika, 75% e shqiptarëve ishin me uri kronike, me sëmundje nga më të ndryshme. Ishte vetëm buka e misrit. Kjo ishte nxitje e madhe për mua, se kaloi në barbari. Në 1988 thanë se po hapeshin dhe i dhanë fshatarëve një qingj e një kec, një për vete e një për kooperativën. Degradim total. Vendimi i përfshirjes në politikë ishte më i vështiri, më i rëndësishmi, sepse më mori shumë kohë. Ramiz Alia në pamje dukej tolerant, por në të vërtetë ishte një marksist-leninist i bindur”, rrëfen kreu i selisë blu.

I pyetur nëse ishte një vendim i vështirë braktisja e profesionit, ai e pranon, por nuk mund të qëndronte i heshtur përballë asaj situate. Berisha ka rrëfyer edhe vizionin e tij të parë politik, që ishte “Shqipëria si Evropa”.

“Kurrë s’e kisha menduar, unë isha mjek dhe isha i lidhur me të, ishte profesion shumë i bukur. Në atë kohë i gjithë formimi im politik ishte çështja kombëtare, Kosova. Ajo që kishte ndikuar familja tek unë, më shumë se çdo gjë tjetër, ishte Kosova. Kosova ishte brenga e tyre e madhe. 70% të bisedave ishin për Kosovën, sepse pas 45 u ndanë më shumë. Ata flisnin për shitje, unë mendoja dhe thoja e bënë rusët ndarjen, por ata thonin jo, ia bëmë vetes. Ata flisnin për gjithçka për të dhe ndaj i gjithë formimi im ishte për Kosovën. Vizioni im i parë për Shqipërinë kur nisa politikën ishte “Shqipëria në Evropë”. Nuk kam menduar se do ishte një udhëtim i shkurtër”, u shpreh ai.

Një tjetër shkak që Berisha zgjodhi politikën ishte edhe indoktrinomi i popullit në atë kohë nga regjimi diktatorial, madje e krahasoi me “akullnajë” dhe “njerëz të hekurosur nga regjimi”.

“Unë shqiptarët në kohën e regjimit i mendoja si njerëz të hekurosur nga regjimi, si akullnajë. Psikologjia kombëtare në atë periudhë më dukej si akullnajë dhe synimi ishte të shkrinim akullin, se ndryshe shkoje në konflikt. Ishte rënia e Enver Hoxhës dhe ata ishin të indoktrinuar, mijëra shqiptarë rrëmbyen armët, ashtu e mendonin ata, u mobilizuan, ishin të indoktrinuar, kalonin orë të tëra me bust në krah, sikur të ishte gjallë. I tillë ishte indoktrinomi i tyre”, tha ai.

Rinia e Berishës, njohja me Lilin, martesa, familja dhe fëmijët

Berisha rrëfeu edhe pasionet e rinisë, lidhjen me Lirinë, martesën, fëmijët dhe qëndrimi larg tyre për shkak të punës. Ai tha se “Lili ishte fati im”, duke e cilësuar më të rëndësishmen e jetës së tij.

“Lili ishte fati im. Një vit e gjysmë, dy pas njohjes u martuam. Nuk kemi bërë dasmë. Jo, nuk kemi bërë, kushtet ishin të atilla. Ishte nga një familje me tradita, edhe prindërit e mi e donin shumë, Ishim të dy mjekë. Ajo ishte më e zënë, se përveç punës kishte edhe shtëpinë. Ajo e kishte me pasion mjekësinë, por unë i sugjerova pediatrinë. U dashurua me profesionin e vetë, e donte shumë, sepse fëmija i pasqyron gjërat më shumë se i rrituri, ndaj ajo është e dashuruar me profesionin e vetë. Me gjithë dëshirën që kisha për ta ndihmuar, nuk e ndihmoja dot. Dhe shikoja vjehrrën time që i kërkonte të birit të njëjta gjëra si kërkesat që kishte ndaj vajzave dhe e shikoja si pozitive këtë gjë”, tha kryedemokrati.

“Me fëmijët isha shumë i lidhur, por nuk kisha shumë kohë. Dhe përpiqesha që ta kompensoja me sa të mundesha. Kemi bërë pushime brenda vendit, kemi shkuar në Tropojë, por vendim im i preferuar për pushime ishte Pogradeci. Kemi shkuar 13 vera radhazi atje me familjen, ku ishim me një familje mikëpritëse pogradecare. Shkoja me fëmijët atje, ishte vendi im i preferuar, jetë e qetë familjare. Fëmijët nuk i kam ndikuar në zgjedhjet e tyre, doja t’u sugjeroja edhe mjekësinë, por nuk i kam ndikuar. Të dy u shkolluan në Tiranë dhe bënë masterat jashtë në degët e tyre. Argitës nuk i dhanë më 1990 të drejtën për Juridik dhe më 1991 kaloi nga Biologjia te Fakulteti Juridik. Edhe Shkëlzeni ndoqi rrugën e drejtësisë gjithashtu, Avokatinë, sepse ishte trend në atë kohë”, rrëfeu ai.

Berisha: Nuk e njihja ekonominë e tregut, rroga si president 16 dollarë

Berisha rrëfeu edhe ditët e para të funksionit të tij si President, kalimi i vështirësive social-ekonomike të vendit nëpërmjet tranzicionit total dhe atij politik, ku qytetarët vuanin varfërinë.

Ai pranon se nuk kishte njohuri për ekonominë e tregut dhe është dashur ndihma e amerikanëve me trajnime, deri në stabilizimin e ekonomisë së brendshme dhe zgjerimit të sipërmarrjes private.

“Rroga ime si president ishte 16 dollarë, e shqiptarëve 4-6 dollarë. Ndërhynë dhe amerikanët që na ndihmuan në atë kohë, sikundër edhe me Entin e Banesave. Kisha edhe këshilltarë. Nuk kisha njohuri për ekonominë e tregut. Erdhën edhe përfaqësues amerikanë, na bënë kurse 2-3 mujor për tregun, se ne nuk kishim në atë kohë. Në atë situatë ishte vendi. Nisëm me stabilizimin e monedhës dhe me të ardhurat kryesore nga ekonomia private, sikurse edhe taksat më të ulëta. Filozofia ekonomike e Reganit më frymëzonte në atë kohë. E para, ishte antikomunist, e shpalli komunizmin si të keqe të madhe, u impresionova prej tij. Nuk ka më keq se të pengosh tjetrin të besojë Zotin. Edhe babanë e kisha shumë besimtar dhe gjithmonë thoshte se ashtu si e kishte bërë Enver Hoxha, as Zoti nuk na ndihmonte dot”, rrëfeu ai.

Një tjetër pjesë e karrierës së tij politike, ishte vizita në Shtëpinë e Bardhë në SHBA për herë të parë.

“Kur shkova për herë të parë në Shtëpinë e Bardhë kisha emocion sigurisht, ishte takimi i parë, por përsëri Kosova dominoi aty. Ku denoncova faktin se plani serb ishte të dëbonin gjysmën e kosovarëve drejt Rrafshit të Dukagjinit dhe u thashë se kjo nuk mund të ndodhte. Kam ruajtur raporte me ish-presidentin Bush, ka ardhur dy herë dhe kam shkuar për vizitë gjithashtu në Huston, Teksas bashkë me Lilin”, tha Berisha.

Njohja me Nënë Terezën dhe bisedat me të

Berisha rrëfeu edhe njohjen me nënë Terezën, kur e pa për herë të parë, takimi dhe bisedat me bamirësen e madhe shqiptare.

“Nënë Terezën e kam njohur kur kam qenë mjek dhe isha i mahnitur prej saj, pasi kisha parë dokumentarin nga një televizion italian se si ajo merrej me njerëzit lebrozë, me të gjithë të sëmurët, i merrte, i mjekonte dhe si mjek më bënte përshtypje të jashtëzakonshme se si ajo gjente forcë aty ku mjekësia nuk hynte dot dhe i kishte braktisur. Dhe e gjeta se ajo forcën e kishte te përqendrimi. Doja ta kuptoja se ku qëndronte forca e saj dhe ajo ishte përqendrimi. Dashuria ishte gjithçka, dashuria dhe Krishti, ishte shkopi magjik i saj, Leva e Arkimedit e saj. E ftuam për drekë me Lilin, gatoi Lili për të, por nuk e hëngri. E mori për të motrën, tha ma paketoni se do ia dërgoj asaj”, rrëfeu kreu i selisë blu.

Berisha tregoi edhe detajin se si nënë Tereza erdhi në Shqipëri dhe vlerësimi i saj me Urdhrin e Nderit.

“Më mori e më tha se do vinte në Tiranë, do uronte për anëtarësimin e Shqipërisë në Këshillin e Evropës. E nderova dhe me urdhrin Nderi i Kombit”, tha Berisha.

Por kush janë momentet me të dashura të Berishës:

“Momentet më të dashura familjare për mua kanë qenë lindja e fëmijëve, martesat e tyre dhe fëmijët e tyre. Këto kanë qenë më të veçantat për mua. Kemi ruajtur një traditë ku çdo fundjavë ne e kalojmë të gjithë bashkë, përveçse kur nuk ndodhemi këtu. Dhe kjo mbetet, e kemi traditë dhe bën diferencë”./MAPO/

“Për shumë arsye, unë mendoj që premtimi i Edi Ramës dhe shumë zyrtarëve të tjerë në Bruksel për mbyllje kapitujsh në vitin 2027 apo anëtarësim në 2030 është flluskë. Nuk ka asnjë shans të realizohet”.

Kështu u shpreh Genc Pollo, nga Partia Demokratike, i ftuar në studion e “ÇdoKënd” nga Merita Haklaj, në A2CNN.

“Do doja të isha i gabuar, por është shumë objektive të thuash që janë flluska dhe janë premtime që keqpërdoren për propagandë. Për të mbyllur kapitullin e sigurisë ushqimore, po themi, duhen investime në laboratorë, gjë që qeveria nuk ka ndërmend t’i bëjë. Ky është një nga problemet me natyrë teknike që Shqipëria duhet t’i zgjidhë. Por, ndërkohë që Shqipëria ishte një demokraci funksionale, me një shtet ligjor imperfekt, por gjithsesi funksional, kthehet në një autokraci ku gjithë pushteti është në një dorë dhe përdoret për të plaçkitur miliona, dhe ku të gjitha të dhënat e shtetasve kontrollohen në një agjenci të vetme që është nën kontrollin e bandave, atëherë duket një luks i jashtëzakonshëm të flasësh për sigurinë ushqimore”, tha Pollo.

“Ne kemi një regres, ndërkohë që zyrtarë të caktuar të Brukselit kanë duartrokitur për progres. Kjo ka shpjegimet e veta në keqkuptimet e tyre, në iluzionin e disa njerëzve që edhe pse gjërat po shkojnë keq sa i përket demokracisë, një gjyqësor i reformuar mund ta ndryshojë shoqërinë”, shtoi Pollo.

Udhëtimet janë kthyer në një pjesë gjithnjë e më të rëndësishme të jetës së qytetarëve shqiptarë, veçanërisht në vitet e fundit, ku vihet re një rritje e ndjeshme e lëvizjeve turistike. Destinacionet variojnë nga vendet e rajonit dhe Europa, deri edhe më gjerë. Por cilat janë shtetet e rajonit ku shqiptarët kanë udhëtuar më shumë dhe cilat destinacione kryesojnë listën e preferencave të tyre?

Sipas të dhënave të Barometrit të Ballkanit, shumica e shqiptarëve që kanë udhëtuar brenda rajonit kanë zgjedhur Kosovën si destinacionin kryesor. Plot 38% e të anketuarve deklarojnë se kanë udhëtuar drejt Kosovës, duke shënuar një rritje prej 11% krahasuar me vitin e shkuar. Ky trend lidhet ngushtë me afërsinë gjeografike, lidhjet familjare, si edhe traditat dhe kulturën e përbashkët mes dy vendeve.

Në vendin e dytë renditet Mali i Zi, ku 20% e të anketuarve shprehen se kanë udhëtuar gjatë këtij viti. Kjo prirje shpjegohet kryesisht me ofertën turistike të vendit, pasi Mali i Zi mbetet një nga destinacionet më të frekuentuara në rajon, veçanërisht gjatë sezonit veror, falë bregdetit dhe infrastrukturës turistike.

Pas këtyre dy vendeve, një pjesë e konsiderueshme e shqiptarëve, rreth 18%, deklarojnë se kanë udhëtuar drejt Maqedonisë së Veriut. Ndërkohë, udhëtimet drejt vendeve të tjera të rajonit mbeten më të kufizuara. Bosnje-Hercegovina dhe Serbia regjistrojnë përqindjet më të ulëta, përkatësisht me 4% dhe 2%.

Megjithatë, një shifër domethënëse është fakti se 52% e të anketuarve deklarojnë se nuk kanë udhëtuar në asnjë nga vendet e rajonit, çka tregon se, pavarësisht rritjes së interesit për udhëtime, një pjesë e madhe e popullsisë ende nuk përfshihet aktivisht në turizmin rajonal. Nga ana tjetë Kosova dhe Maqedonia e Veriut kanë ushëtuar më shumë drejt Shqipërisë përkatësisht 66% dhe 31% e qytetarëve shprehen të kenë zgjedhur Shqipërinë si destinacionin rajonal.

Debatet sa vijnë e ndizen akoma më shumë në shtëpinë më të famshme në Shqipëri.

Një natë përpara Prime-t të tretë, në shtëpinë e Big Brother VIP 5, përveç përplasjeve dhe debateve të ashpra, kanë nisur dhe thumbimet mes banorëve.

Një gjë e tillë ndodhi mes Kristit dhe Mirit të cilët ‘sulmuan’ me provokime njëri-tjetrin në dhomën e gjumit.

Kristi: Këtu është diferenca mes nesh. Ti zgjedh fshehtas, unë zgjedh në prezencën tënde.

Miri: Ty të kam venë te rrethi.

Kristi: Kam për t’i dridhur më shumë duart.

Miri: Të kam vënë te rrethi. Je në rreth. Je në kuadrat. E di pse s’dua të merrem me ty? Se je në nominim. A ke ndonjë flos aty?

Kristi: Çfarë është kjo?

Miri: Fije për dhëmbët.

Kristi: I kam të bëra.

Miri: Ku i ke bërë, se i ke bërë bukur.

Kristi: E di që dhëmbët e mia këtu janë më të famshme se shumë karriera. Njihen më shumë se disa njerëz. Jam i sigurt që janë hapur fan-page me dhëmbët e Kristit.

Miri: Edhe më shumë se mua?

Kristi: Se disa njerëz thashë, nuk specifikova.

Një gjykatë në Moskë ka dënuar me 12 vite burg një ish-diplomat rus, i akuzuar për shitjen e sekreteve shtetërore inteligjencës amerikane gjatë shërbimit të tij diplomatik në Shtetet e Bashkuara.

Shërbimi Federal i Sigurisë së Rusisë (FSB), pasardhësi i KGB-së sovjetike, njoftoi se Arseny Konovalov, i lindur në vitin 1987, u shpall fajtor për tradhti ndaj atdheut.

Sipas autoriteteve ruse, Konovalov, i cili ishte punonjës i Ministrisë së Jashtme, ka transmetuar për një periudhë të gjatë informacione sekrete tek shërbimet e inteligjencës amerikane në këmbim të pagesave financiare.

“Është vërtetuar se A.S. Konovalov, gjatë shërbimit të tij në Shtetet e Bashkuara, ka dorëzuar në mënyrë të qëllimshme informacione të klasifikuara tek përfaqësues të inteligjencës amerikane,” thuhet në deklaratën e FSB-së.

Sipas mediave ruse, Konovalov u arrestua në mars të vitit 2024. Agjencia shtetërore TASS publikoi pamje ku ai shihet i shoqëruar nga forcat e sigurisë gjatë arrestimit.

FSB nuk ka bërë të ditur natyrën e saktë të informacionit të rrjedhur apo se me cilën agjenci amerikane ka bashkëpunuar. Nga ana tjetër, autoritetet amerikane nuk kanë komentuar mbi akuzat.

Sipas gazetës Kommersant, Konovalov ka shërbyer si sekretar i dytë në Konsullatën e Përgjithshme të Rusisë në Houston, nga viti 2014 deri në vitin 2017.

Një qytetar ka hedhur qeset e zeza të mbeturinave jashtë koshave, teksa largësia prej tyre ishte vetëm pak centimetra.

Policia bashkiake e Shkodrës ka reaguar menjëherë duke e kthyer pas qytetarin dhe t’i hedhë mbeturinat në brendësi të koshit.

Më pas qytetari është futur në makinën e policisë dhe shoqëruar në komisariat për veprimet të mëtejshme.

Teksa Viti i Ri po troket, e gjithë vëmendja shkon tek mbrëmja festive. Teksa disa vite më parë për shqiptarët shihej si një darkë ku familja mblidhej në shtëpi dhe festonte ndërrimin e viteve, tashmë gjithmonë e më shumë për të festuar po preferohen restorantet, të cilët ofrojnë paketa të ndryshme festive.

Çmimet varijojnë nga njëra zonë në tjetrën. Nga qytetet e mëdha te zonat turistike, çmimi zakonisht lidhet me atë që përfshihet në paketë, menu fikse, muzikë live, pije pa limit dhe në shumë raste, edhe akomodim e SPA.

Në kryeqytet, ofertat shfaqen kryesisht si menu festive me disa pjata dhe ëmbëlsirë, ku çmimet lëvizin zakonisht nga rreth 8,000- 13.000 lekë për person në lokalet e mesme, ndërsa në vendet më të sofistikuara apo me program të plotë, çmimet rriten ndjeshëm. Në disa raste çmimi ndahet qartë mes vetëm darkë dhe darkë plus paketë festive.

Në juglindje, mbrëmjet gala shfaqen shpesh si menu tradicionale e bollshme, e kombinuar me atmosferë festive. Për Korçën e zonat përreth, çmimet e afishuara shfaqen kryesisht në intervalin 8,500–10,000 lekë për person, shpesh me formulën pije pa limit dhe me tarifa të veçanta për fëmijët. Në Voskopojë, shumë oferta jepen me rezervim dhe çmimi shpesh komunikohet drejtpërdrejt, sidomos kur paketa lidhet me akomodimin.

Në Durrës, tregu dominohet nga paketat e hoteleve dhe resorteve. Këtu dallimi kryesor është nëse merr vetëm darkën gala apo edhe akomodim. Çmimet e afishuara nisin nga rreth 80–100 euro për person për darkën, ndërsa paketat me akomodim shkojnë zakonisht në 125–170 euro për person.

Në Vlorë çmimet e publikuara varijojnë nga rreth 80-100 euro në opsionet standard, ndërsa resortet që shesin paketa me më shumë shërbime, ofrojnë çmime në nivele më të larta, rreth 159–299 euro, sipas gjatësisë së qëndrimit.

Në veri, qasja duket më e balancuar. Në Shkodër mund të gjenden paketa nga 80 euro, rreth 80–95 euro, sidomos kur lidhen me akomodim.

Në thelb, çmimi i Vitit të Ri në restorante nuk lidhet vetëm me menunë, por me paketën e plotë, duke nisur nga ushqimi, pijet e deri tek show, apo akomodimi.

Prokuroria Speciale e Kosovës ka dërguar një letërporosi në Prokurorinë e Posaçme SPAK, për të nisur hetime për verifikimin e pasurive të mundshme në Shqipëri të 89 shteasve Kosovarë. Kjo kërkesë është miratuar nga Gjykata e Posaçme duke I dhënë të drejtën SPAK të kryejë hetime.

SPAK ka kryer hetime për verifikimin e pasurive të mundshme në Shqipëri të 89 të dyshuarve, për krijim të të arrdhurave mbi bazën e aktivitetit kriminal. Prokuroria Speciale e Kosovës sqaron në kërkesën e saj për SPAK se është duke hetuar 31 persona të dyshuar si pjesë e një grupi kriminal të përfshirë në trafik droge dhe pastrim parash.

Ata janë identifikuar për shkak të komunikimeve në aplikacionin SKY ECC, bazuar në të dhënat e marra nga autoritetet belge dhe franceze të drejtësisë.

Referuar hetimit të Prokuroisë Speciale të Kosovës të pandehurit i kanë investuar paratë e trafikut të drogës në pasuri të luajtshme dhe të paluajtshme, si brenda territorit të Republikës së Kosovës, ashtu dhe në vende të tjera përfshirë këtu Shqipërinë.

Për këtë arsye, pala kosovare kërkon të kalohet në filtër jo vetëm pasuritë e tyre, por edhe të 58 personave të tjerë, familjarë apo të afërm në emër të të cilëve mund të jenë regjistruar pasuritë e paligjshme. Në zbatim të kërkesës së Prokurorisë Speciale, SPAK do të gjurmojë jo vetëm pasuritë e paluajtshme të tyre, por edhe nëse kanë hapur llogari bankare në banka të nivelit të dytë në Shqipëri.

“Shqipëria ndodhet në një spirale autoritarizmi kleptokratik nga e cila nuk mund të dalë pa një ndryshim politik të vërtetë”. Kështu u shpreh në Çdo kënd me Merita Haklajn në A2 CNN demokrati Genc Pollo, sipas të cilit, as SPAK-u, as media dhe as faktori ndërkombëtar nuk mund ta shpëtojnë vendin, nëse nuk ka një ndërgjegjësim shoqëror dhe një rotacion pushteti në rrugë kushtetuese.

“12 vitet e fundit janë një trajektore e trishtuar si e Partisë Demokratike në opozitë, po ashtu edhe e Shqipërisë drejt një autokracie kleptokratike dhe pavarësisht se Partia Demokratike në opozitë mund të mos ketë patur, forcën që kishte PS-ja në opozitë para se të vinte pushtet, apo PD-ja në 2004-n. Megjithatë mbetet shpresa e vetme e madhe që në këtë vend mund të ketë një ndryshim pozitiv. Me gjithë 101 kritikat shumë të pabazuara, disa me meritë që i bëjnë asaj pa një ndryshim politik në këtë vend, nuk mund të ketë një përmirësim, ose nuk mund të ketë një shpëtim nga regjimi autoritar kleptorokratik ku fatkeqësisht ndodhemi. Nuk do ta shpëtojë as SPAK-u, gjyqësori i cili mund ndihmojë, nuk do ta shpëtojë vetëm media e lirë, e cila ka një rol të madh po e vetme nuk ka ç’bën. Nuk mund ta shpëtojnë ndërkombëtarët apo pjesa e mirë e tyre të cilët kanë një rol të madh që mund ta luajnë nëse duan. Në qoftë se nuk ka një evoluim, një ndërgjegjësim shoqëror, rindërgjegjësim shoqëror dhe një ndryshim politik, nuk mund të ketë shpëtim”, deklaroi Pollo në A2 CNN.

Pollo vlerësoi veprimet e SPAK-ut për ekspozimin e aferave të korrupsionit, por theksoi se “spakizimi i politikës” është një shpresë e rreme.

“Gjyqësori përmes hetimit i ekspozon dhe merr masa për të larguar njerëzit, natyrisht me rezistencën nga Edi Rama që po shikojmë, por në qoftë se qoftë edhe dënohet një ministër apo një ministër edhe zëvendësohet me një ministër tjetër, madje dhe në rastin ekstrem sikur të largohet kryeministri dhe të zëvendësohet me një kryeministër tjetër, prapë ndryshimi normalizues nuk ndodh. Ndodh zgjatja e agonisë dhe kjo është një sfidë e madhe, është një sfidë e vështirë”, theksoi Pollo.

Sipas tij, sfida kryesore sot nuk është vetëm pushteti, por mpirja e ndërgjegjes shoqërore, mungesa e shpresës dhe emigrimi masiv, fenomene që, siç tha, nuk ekzistonin në këto përmasa në vitin 2005.

Duke folur për ndërkombëtarët, Pollo pranoi rolin historik pozitiv të BE-së dhe SHBA-së në tranzicion, por kritikoi qëndrimet e fundit të Brukselit dhe raste të përfaqësuesve diplomatikë që, sipas tij, kanë mbyllur sytë ndaj skandaleve. “Problemet tona duhet t’i zgjidhim vetë”, theksoi ai.

Lëvizja Vetëvendosje është dënuar me gjashtë mijë euro pasi Paneli Zgjedhor për Ankesa dhe Parashtresa ka konstatuar se kandidatë të saj për deputetë kanë shfrytëzuar institucionet publike për promovim elektoral gjatë fushatës për zgjedhjet e 28 dhjetorit.

Vendimi i PZAP-së u mor bazuar në ankesën e Lidhjes Demokratike të Kosovës.

Në vendim është konstatuar se Arbërie Nagavci, Hysen Durmishi, Arben Vitia, Albulena Haxhiu dhe Hajrulla Çeku kanë shfrytëzuar institucionet publike për fushatë.

“…znj.Nagavci ka përdorur zyrën e saj si ministre në detyrë në Ministrinë e Arsimit, Shkencës dhe Teknologjisë, z. Durmishi ka përdorur pasuri publike, konkretisht urën në Mitrovicë, ndërsa z. Vitia, znj. Haxhiu dhe z. Çeko kanë përdorur Aeroportin Ndërkombëtar të Prishtinës, si dhe në faqen zyrtare të këtij subjekti janë promovuar aktivitete në Qendrën Klinike Universitare të Kosovës”, thuhet në vendim të PZAP-së.

Sipas vendimit, me këto veprime është shkelur Kodi i Mirësjelljes për Subjektet Politike, Mbështetësit e tyre dhe Kandidatët.

VV-ja ka afat 15 ditë për ta paguar gjobën nga dita e plotfuqishmërisë së vendimit, ndaj të cilit kjo parti ka të drejtë të ankohet brenda 48 orëve nga momenti i marrjes së vendimit.

Sekretari i Përgjithshëm i Partisë Demokratike, Flamur Noka, është shprehur se projektligji amerikan “Western Balkans Democracy and Prosperity Act” parashikon krijimin e një nisme të gjerë kundër korrupsionit për vendet e Ballkanit Perëndimor, që sipas tij e synon ndërhyrje direkte në strukturat shtetërore.

Komentet Noka i bëri përmes një postimi në faqen e tij në Facebook, ku tha më tej se SHBA parashikon asistencë teknike direkte për Shqipërinë, me kusht që sipas tij, qeveria shqiptare të rishikojë strategjinë kombëtare kundër korrupsionit dhe të pranojë bashkëpunim të drejtpërdrejtë me programet amerikane.

Ai shtoi gjithashtu se ky ligj thekson qartë se korrupsioni politik duhet luftuar sidomos në gjyqësor, institucionet që administrojnë zgjedhjet dhe prokurimet publike.

Postimi i Nokës:

Projektligji amerikan “Western Balkans Democracy and Prosperity Act” parashikon krijimin e një nisme të gjerë kundër korrupsionit për vendet e Ballkanit Perëndimor, e cila synon ndërhyrje direkte në strukturat shtetërore.

#SHBA parashikon asistencë teknike direkte për Shqipërinë, me kusht që #qeveria #shqiptare të rishikojë strategjinë kombëtare kundër korrupsionit, të pranojë bashkëpunim të drejtpërdrejtë me programet amerikane.

Ligji thekson qartë se korrupsioni politik duhet luftuar sidomos në gjyqësor, institucionet që administrojnë zgjedhjet dhe prokurimet publike.

Babai i Salih Mustafës, ish-drejtues i UÇK është varrosur këtë të premte në Kosovë. Jahja Mustafa ndërroi jetë të enjten ndërsa djalit të tij, Salih Mustafës i është refuzuar kërkesa pjesëmarrje në varrim.

Mungesa e tij në varrimin e të atit ka rënduar edhe më shumë dhimbjen e familjes së tij, miqve dhe bashkëluftëtarëve. Kryetar i OVL- UÇK, Hysni Gucati gjatë fjalës së tij në ceremoninë e varrimit i kritikoi ashpër Dhomat e Specializuara në Hagë për mos dhënien e lejes së Mustafas që të takojë babain e tij.

“Unë e di që Cali mes dhimbjes do ta gjejë edhe forcën. Ne e dimë që kjo gjykatë është shumë e dëmshme për vendin, dhe ishte dashur që kjo gjykatë ta lejoj Calin që të vijë në vizitë humanitarë para 5 ditësh, ne kemi bërë kërkesë dhe mbrojtja e Calit ka bërë kërkesë që ta liroj Calin që të vijë të paktën ta vizitoj babanë sa ishte në spital gjallë dhe ndodhi e kundërta.
Sot nuk e liruan dhe unë kam menduar që të paktën sot do ta lirojnë në varrim, sepse Cali ishte i dënuar me verdikt 15 vite burg padrejtësisht, i dënuar me dëshmitar të rrejshëm dhe të falsifikuar. ….. Prej kësaj qeverie nuk presim asgjë kjo qeveri është për turpin e shqiptarëve që është në pushtet”, tha Gucati.

Mustafa po vuan dënimin me 15 vjet burg nga Dhomat e Specializuara në Hagë. Pas vdekjes së babait të tij, familjarë dhe bashkëluftëtarë kanë reaguar ashpër ndaj moslejimit të vizitës humanitare dhe pjesëmarrjes së tij në varrim, duke e cilësuar këtë si padrejtësi dhe mungesë ndjeshmërie humane.

Mustafa ka qenë komandant i një njësiti brenda Zonës Operative të Llapit të Ushtrisë Çlirimtare të Kosovës. Ai qe dënuar fillimisht në dhjetor të 2022-tës për krime lufte me 26 vjet burgim.
Në dhjetor të 2023-tës, Apeli i Speciales ia ka ulur dënimin në 22 vjet burgim, para se paneli i Gjykatës së Panelit t’ia shqiptonte atij një vit më vonë një dënim të njësuar prej 15 vjetësh burgim, duke e llogaritur kohën e kaluar në paraburgim.

Armando Iberhasaj, i dënuar me katër muaj burg për kultivim të lëndëve narkotike i ka shpëtuar deportimit nga Britania e Madhe në Shqipëri. Ai pretendoi se deportimi i tij do të shkelte të drejtat e tij për të krijuar një familje me partneren e tij.

Gjykatësja e imigracionit vendosi se deportimi do të ishte i ashpër për partneren e tij, e cila nuk ishte me origjinë shqiptare, nuk kishte udhëtuar më parë në Shqipëri dhe nuk e fliste gjuhën.

Gjykatësja tha: Të presësh që partnerja e Iberhasajt të zhvendoset me të në Shqipëri, do të shkaktonte pasoja të pajustifikueshme. Kjo për shkak se ajo nuk ka lidhje me Shqipërinë dhe ajo nuk e ka vizituar kurrë vendin e tij dhe as nuk ka jetuar vetë atje.

Vendimi për të lejuar Iberhasaj të qëndrojë në Mbretërinë e Bashkuar vjen pasi Shabana Mahmood, Sekretarja e Brendshme, propozoi kufizime në përdorimin e dispozitave për të drejtat familjare të Gjykatës Europiane për të Drejtat e Njeriut, duke argumentuar se kriminelët dhe emigrantët e paligjshëm nuk duhet të përfitojnë prej tyre.

Ervin Salianji vijon ta sfidojë Sali Berishën, pavarësisht se ky i fundit u shpreh ai kaloi vijën e kuqe dhe u vetëpërjashtua.

Ditën e shtunë, ish-deputeti do të jetë në Shkodër për t’u takuar me demokratët atje.

Takimi do të zhvillohet në hotel Rozafa, në orën 18:00. Më herët Salianji ka qenë edhe me demokratët në Elbasan dhe Durrës.

Në fund të nëntorit dhe dhjetorit të vitit 1991 tensionet politike ishin në kulm. PD kërkoi daljen nga qeveria e stabilitetit ndërsa në disa rrethe kishin nisur mësymjet ndaj ndërrmarrjeve shtetërore. Ish-kryeministri Ylli Bufi në rrëfimet e tij të botuara në librin “NË FILLIMET E TRANZICIONIT” të botuar nga Uet Press”, tregon debatet në mbledhjet e qeveris, por edhe takimin në zyrën e Presidentit të asaj kohe Ramiz Alia

Dorëheqja e Qeverisë së Stabilitetit

Pas tërheqjes së ministrave të saj prej PD, disa prej ministrave u mblodhën në zyrën time. Të gjithë ishin shumë të revoltuar nga veprimi i Berishës dhe sidomos nga fjalët që ai kishte thënë në konferencën për shtyp.

Ç’duhej bërë tani? E vetmja gjë mbetej që unë të paraqisja te Presidenti i Republikës dorëheqjen në emër të qeverisë. Dikush nga ministrat tha se qeveria duhet t’u shpjegojë shqiptarëve atë që kishte ndodhur. Fillimisht, ishte fjala për një konferencë shtypi nga qeveria, por pastaj u sugjerua të bëhej një mbledhje, ku të merrnin pjesë edhe kryetarët e partive. Në fillim, e kundërshtova këtë propozim, sepse mendoja se gjithçka ishte thënë me kryetarët e partive. U insistua se shqiptarët nuk i dinë të vërtetat e prishjes së qeverisë, prandaj duhet t’ua themi këto. Kështu, u vendos të bëhet ajo mbledhje. Ishte një vendim i nxituar, i marrë në peshën e emocioneve të momentit.

Në mbledhje u ripërsëritën të gjitha argumentet që ishin përdorur edhe në mbledhjen e mëparshme me kryetarët e partive. Mbledhja zgjati rreth 2-3 orë, por, për shkak se transmetimi në televizionin shqiptar nuk ishte online, bobinat e regjistruara shkonin me një vonesë rreth një orë për transmetim. Kështu, transmetimi i mbledhjes vazhdoi edhe pas mesit të natës, një gjë e pazakonshme deri në atë kohë. Ministrat dhe përfaqësuesit e partive ishin ulur jo në vendet e tyre të zakonshme. Mbledhja u zhvillua shumë e tensionuar. Pothuaj të gjithë folën kundër veprimit të Sali Berishës. Më i ashpër ishte sidomos ministri Emin Mysliu, që shprehu hapur parandjenjën e kaosit që do të krijohej në vend pas rënies së qeverisë. Servet Pëllumbi, në emër të Partisë Socialiste, dënoi veprimin e papërgjegjshëm të PD dhe të Sali Berishës, duke thënë:

“Nuk është PS që e shkakton këtë krizë. PS ka mbajtur kurdoherë qëndrime të qarta e tolerante, të argumentuara, gjakftohta, e bindur që në fillim për formulën e qeverisë së stabilitetit dhe vazhdimisht është përpjekur ta mbështesë atë… Përkundrazi kanë qenë disa forca të tjera, të cilat me lloj-lloj epitetesh: kriptokomunistë, enveristë, punistë, merimanga komuniste etj., që nuk ngurruan t’ përdorin edhe në këtë auditor të nderuar, duan të sensibilizojnë opinionin kundër PS.

Të gjitha këto kontradikta vihen re në pozicionin e PD, bile nuk do ta zgjeroja për të gjithë PD, por për deklaratën e zotit Berisha. Nga njëra anë, lavdërohet qeveria dhe ministrat veç e veç, përfshirë edhe ministrat e PS, nga ana tjetër, po në këtë deklaratë, qeveria quhet e dështuar. Këto pozicione kontradiktore shprehin një synim të vetëm: synimin që për këtë krizë ta hedhin fajin mbi PS”.

Në fjalën time në mbledhjen e qeverisë u përpoqa që, me përgjegjësi dhe shqetësim, të shpjegoja situatën tejet të vështirë politike dhe ekonomike dhe pasojat e rënda destabilizuese që do të sillte prishja e qeverisë. Një nga argumentet kryesore që u theksua për vazhdimin e punës së qeverisë ishte dhe sigurimi në vazhdimësi i ushqimit të popullit. E konsiderova detyrë dhe përgjegjësi nga ana ime që në mbledhjen e qeverisë ta paraqisja me saktësi dhe transparencë gjendjen ushqimore. Këtë bënë dhe të gjithë ministrat, me bindjen se prishja e qeverisë në atë situatë shumë të vështirë ishte një veprim me pasoja tepër të rënda. Në këtë kontekst ishte dhe shprehja se qeveria e re do të kishte një rezervë vetëm për 6 ditë bukë. S. Berisha u përpoq që kaosin dhe të gjitha shkatërrimet që ndodhën në disa rrethe të vendit që synonin të destabilizonin vendin t’i lidhte me panikun që kishin shkaktuar fjalët e mia.

Në të gjitha raportet zyrtare të kohës tregohet se ngjarjet shkatërrimtare, që ndodhën në Laç, në FushëArrëz, në Peqin, në Lushnjë, në Pogradec dhe në ndonjë vend tjetër, kanë ndodhur në periudhën e fushatës elektorale për zgjedhjet e 22 marsit. Këto veprime kanë filluar në 3.12.1991 në qytetin e Mamurrasit dhe kanë vazhduar në datat 4,5,6 dhe 7.12.1991 edhe në Thumanë, Laç, Milot dhe në zonat përreth tyre, përfshirë rrethin e Pukës.

Pra, këto veprime kanë filluar pikërisht një ditë para se S.Berisha të deklaronte në konferencën e tij të shtypit në datën 4.12.1991 dorëheqjen e ministrave të PD nga qeveria. Gjithashtu, ngjarjet e Fushë-Arrëzit nuk kanë ndodhur për shkak të fjalëve të mia në mbledhjen e qeverisë, sepse ato kishin filluar për motive të tjera më parë se të mbahej mbledhja e qeverisë.

Kështu, para se të ndodhte ngjarja e Fushë-Arrëzit, në rrethin e Pukës ishin vjedhur dhe shkatëruar mbi 50 magazina dhe dyqane të rrjetit të tregtisë në 29 fshatra të këtij rrethi. Vetë ngjarja e Fushë-Arrëzit ka qenë e organizuar më parë, përderisa qysh para një jave Komiteti Ekzekutiv i rrethit kishte informacion se do të hapnin dhe do të vidhnin pikërisht këto magazina të konfeksioneve në Fushë-Arrëz.

Të nesërmen, më datën 5 dhjetor, paradite, shkova te Presidenti i Republikës për t’i paraqitur atij dorëheqjen. Ai më kërkoi që këtë akt ta bëja pas takimit konsultativ që ai do të bënte përsëri me forcat politike, ku më ftoi të merrja pjesë edhe unë. E pranova propozimin e tij. Në takimin me Presidentin e Republikës, të zhvilluar në datat 5 dhe 6 dhjetor, morën pjesë përfaqësuesit e pesë partive politike pjesëtare të marrëveshjes politike të majit 1991, mbi bazën e së cilës u krijua Qeveria e Stabilitetit. Nga Partia Socialiste mori pjesë Servet Pëllumbi; nga Partia Demokratike, Sali Berisha; nga Partia Republikane, Sabri Godo; nga Partia Socialdemokrate, Skënder Gjinushi dhe nga Partia Agrare, Meno Gjoleka. Mora pjesë edhe unë, ende në detyrën e Kryetarit të Këshillit të Ministrave. Në këtë takim Presidenti i Republikës insistoi që partitë të arrinin në një mendim të përbashkët për krijimin e një qeverie të re, duke pasur parasysh vënien e interesave të larta të vendit mbi interesat partiakë.

Sali Berisha nuk pranoi që PD të ishte pjesë e asnjë lloj formule të qeverisë. Gjinushi dhe Gjoleka ishin më të hapur, ndërsa ra në sy që Godo mbështeste vend e pa vend Berishën për çdo gjë që ai thoshte. Berisha kërkoi që qeveria të formohej nga Partia Socialiste.

Por ky propozim nuk u pranua nga S. Pëllumbi. Kështu, iu hap rrugë formulës së krijimit të një qeverie teknike, e cila do të drejtonte administratën shtetërore deri në zgjedhjet e reja që do të mbaheshin në mars të vitit 1992. Në fund të takimit, Presidenti më kërkoi që qeveria e kryesuar prej meje të vazhdonte kryerjen e detyrave të saj deri në formimin e qeverisë së re. Pas përfundimit të këtij takimi, më 6 dhjetor, shkova në zyrën e Presidentit dhe i paraqita atij zyrtarisht dorëheqjen time dhe të gjithë qeverisë që kryesoja. Në tekstin e dorëheqjes theksoja se dorëheqja e qeverisë ishte e detyruar nga kriza qeveritare, që shkaktoi largimi i ministrave të Partisë Demokratik

Eksperti i ekonomisë Enio Civici ka analizuar rolin e turizmit në ekonominë shqiptare, duke theksuar se gjatë këtij viti ky sektor ka ndikuar drejtpërdrejt në zhvillimin e shërbimeve, ndërtimit dhe punësimit.

I ftuar në emisionin “Sheshi i Dollarit” në ABC News, Civici u ndal te ndikimi pozitiv i turizmit në rritjen ekonomike, ndërsa vuri në dukje se pesha e lartë e këtij sektori në ekonomi lidhet kryesisht me të ardhurat që vijnë nga jashtë dhe jo me prodhimin e brendshëm, duke e bërë të nevojshme një vështrim më të gjerë mbi qëndrueshmërinë afatgjatë të zhvillimit ekonomik.

“Edhe shërbimet, edhe ndërtimi edhe punësimi janë udhëhequr këtë vit vetëm nga një sektor që është turizmi. Sa mirë dhe i fuqishëm është ky sektor në këto momente dhe sa mirë i bën ekonomisë sonë, duke e ndihmuar dhe udhëhequr në rritje, është edhe një alarm i madh për të ardhmen.

Pra sektori që po na ushqen tani është edhe sektori më i paqëndrueshëm në gjithë historinë e ekonomisë botërore, sepse lidhet direkt me ngjarje që nuk kanë të bëjnë me të. Krahas lavdërimit të sektorit të turizmit si lokomotiva e të pestë nënsektorëve më të rëndësishëm, nga ana tjetër duhet të ngremë alarmin dhe të themi që një ekonomi kaq e dobët strukturalisht nuk mund të jetë kaq e varur vetëm nga sektor i cili nuk është i lidhur me prodhimin tonë të brendshëm, lidhet me të ardhurat që vijnë nga jashtë”, tha eksperti.

Kriza energjetike me të cilën po përballet Kosova ditët e fundit ka bërë që anëtarët e Komisionit Qendror të Zgjedhjeve të shfaqin shqetësim lidhur me furnizimin me energji elektrike në ditën e zgjedhjeve.

Në mbledhjen e këtij institucioni, anëtarët e KQZ-së kanë ngritur shqetësime serioze lidhur me rrezikun e mungesës së energjisë elektrike në disa qendra votimi. Sipas tyre, gjithsej 888 qendra votimi mund të përballen me mungesë të energjisë elektrike, prej të cilave 666 vlerësohen me rrezikshmëri të lartë.

Por ushtruesi i detyrës së kryeshefit të sekretariatit të KQZ-së ka thënë se KEDS-i në ditën e zgjedhjeve do të operojë me rreth 1,050 zyrtarë në terren dhe se bashkë me KOSTT-in ekziston një plan veprimi për menaxhimin e situatave të mundshme.

Kompania për Distribuimin e Energjisë Elektrike në Kosovë (KEDS) ka njoftuar se ka finalizuar planin operativ për furnizim të pandërprerë me energji elektrike gjatë zgjedhjeve të jashtëzakonshme parlamentare, të cilat do të mbahen të dielën, më 28 dhjetor, në të gjitha vendvotimet në vend.

Sipas njoftimit, pranë secilit nga 949 vendvotimet do të ketë ekipe në afërsi për intervenim të shpejtë në rast të ndonjë defekti, ndërsa do të funksionojë edhe një komision qendror teknik për monitorim dhe koordinim në kohë reale.

Prokuroria e Shtetit do të angazhojë rreth 100 prokurorë për mbrojtjen e votës.

Prokurori i Shtetit deklaron se ka bërë të gjitha përgatitjet e nevojshme për të garantuar integritetin e procesit zgjedhor.

Të dielën pritet të mbahen zgjedhjet e parakohshme në Kosovë pas rreth një viti bllokadë, ku VV dështoi të formojë qeverinë pas zgjedhjeve të 9 shkurtit.

Sekretari i Përgjithshëm i NATO-s, Mark Rutte, i tha agjencisë së lajmeve DPA se BE-ja do të dëmtonte vetëm veten nëse vendos të ndjekë rrugën e vet në fushën e sigurisë.

Sipas mediave të huaja, Rutte deklaroi të premten se anëtarët europianë të bllokut duhet të përmbushin kërkesat e Uashingtonit dhe të shpenzojnë më shumë për ushtritë e tyre.

Komentet Rutte i bëri teksa po i përgjigjej Manfred Weber, kreut të Partisë Popullore Evropiane (PPE), grupit më të madh në Parlamentin Evropian, i cili bëri thirrje që BE-ja të shndërrohet në një “NATO Evropiane” në fund të nëntorit.

Të premten, ai i kërkoi Brukselit të “veprojë me besim” dhe “të shkruajë strategjinë e vet të sigurisë”.

“Duhet të ndalojmë së formësuari politikën tonë nga dokumentet e Uashingtonit”, tha politikani gjerman. Kur u pyet nëse e ndan të njëjtin mendim, shefi i NATO-s tha se “ka më shumë sesa BE-ja” kur bëhet fjalë për NATO-n.

Meshkujve iu mësohet qysh në fëmijëri se duhet të jenë të fortë, të durojnë dhe të mos thyhen. Është një skript që përsëritet nga familja dhe përforcohet nga media, për t’u përthithur më pas në mënyrë të pavetëdijshme.

I ftuar në episodin e radhës të Apostrof Podcast, Dr. Marsid Sinai – mjek androlog dhe kirurg – shpjegon se kjo ide e “burrit të pathyeshëm” është miti i parë dhe më i dëmshëm që meshkujt bartin nga fëmijëria në burrëri. Miti i dytë, sipas tij ka të bëjë me lidhjen që shumica e meshkujve bëjnë mes përmasave të organit gjenital dhe potencës seksuale – një mit ky i përfocuar nga pornografia dhe krahasimet, që shpesh e kthejnë pasigurinë në shqetësim shnëndetësor edhe kur nuk është aspak një problem shëndetësor.

Miti i tretë, sipas Dr. Sinanit, është ideja se problemet tona janë të dukshme ndaj të tjerëve, kur në të vërtetë shumica e njerëzve janë tepër të zënë me problemet e tyre dhe trupat e tyre për të vërejtur ankthet tona.

Ai shton se shpesh, shumë meshkuj nuk vuajnë domosdoshmërisht sepse trupat e tyre kanë probleme shëndetësore, por për shkak të historive që iu janë treguar dhe besojnë në lidhje me atë se çfarë trupat e tyre duhet të jenë.