Militantët braktisin Sali Berishën. Ky ishte mesazhi kryesor, që u përcoll sot në “Foltoren” e thirrur para godinës së Kryeministrisë nga kryetari i PD, në bulevardin “Dëshmorët e Kombit”.

Kjo është foltorja e shtatë që kryetari i PD organizon para Kryeministrisë. Analisti Frrok Çupi i ftuar në “Tirana Live” u shpreh se nga ky tubim nuk ka asgjë të re, përveçse tregon të vërtetën e hidhur se opozita që shohin sot qytetarët shqiptarë nuk të çon askund.

Sipas Çupit, dëshira kryesore e Sali Berishë është të krijojë rrëmujë pasi i mungon jeta sociale.

“E njëjta gjë. “U martua Asani, mori atë që kishte”. Një dasmë ka më shumë njerëz sesa kaq. Foltorja para Kryeministrisë po mbahet, sepse Berisha nuk ka jetë sociale. Kjo është një opozitë që nuk të çon askund. Të çon në bulevard dhe shikojmë 20 apo 30 vetë. Opozita e degraduar, sepse Berisha nuk bën politikë. Bën deklarata dhe sulme çdo ditë, por askush nuk i thotë asgjë. Dëshira e tij është të krijojë rrëmujë kur nuk duhet. Pritet që opozitës t’i ketë avulluar kauza që ka ngritur me fantazmat”, tha ai.

Ai theksoi se drejtësia duhet të japë verdiktin e saj për “krimin shtetëror” të 21 janarit dhe për shpërthimin vdekjeprurës të Gërdecit, ku ish-kryeministri Sali Berisha dhe bashkëpunëtorët e tij politikë janë të implikuar dhe po hetohen nga SPAK.

“Saliu po pret 21 janarin, Luli 21 janarin, tjetri Gërdecin dhe njerëzit po presin që të shpaguhen krimet kundër personit, kundër njeriut. Opozita nuk ka tezë dhe as filozofi”, tha mes tjerash analisti Frrok Çupi./abcnews/

Gazetari Enver Robelli ka kritikuar qasjen e kryeministrit Albin Kurti ndaj çështjeve madhore të Kosovës, duke e akuzuar për populizëm, manipulim me patriotizëm dhe mungesë sinqeriteti politik, veçanërisht në raport me asociacionin e komunave me shumicë serbe.

I ftuar në emisionin “Off the Record” nga Andrea Danglli në A2 CNN, Robelli tha se Kosova ka marrë obligime ndërkombëtare që herët a vonë duhet t’i zbatojë, duke theksuar se marrëveshjet e nënshkruara në Bruksel dhe Ohër nuk mund të mohohen sipas interesit elektoral.

“Në thelb, me marrëveshjen e Ohrit, asociacioni është pranuar. Prandaj, kjo çështje kërkon konsensus kombëtar: ose e bëjmë dhe e paguajmë çmimin, ose nuk e bëjmë dhe paguajmë një çmim edhe më të lartë”, tha Robelli.

Sipas Robellit, politika kosovare po mbetet peng i frikës për humbje votash, ndërsa qytetarëve nuk u thuhet e vërteta për çmimin politik që duhet paguar. Ai shtoi se çështja e Asociacionit po përdoret për polarizim të shoqërisë dhe jo për zgjidhje reale.

Gazetari kritikoi gjithashtu fokusimin e tepruar te veriu, duke theksuar se problemet e Kosovës nuk zgjidhen “me ngritje muskujsh”, por me dialog dhe përfshirje të pakicës serbe si qytetarë të barabartë.

“Pallavrat për Kosovën heroike dhe lojërat me patriotizëm nuk i zgjidhin problemet reale.”

Robelli theksoi se Kosova po përballet me kriza serioze në arsim, energji dhe zhvillim ekonomik, ndërsa populizmi politik po e largon vëmendjen nga këto sfida thelbësore.

Greqia, Izraeli dhe Qiproja do të kryejnë stërvitje të përbashkëta ajrore dhe detare në Mesdheun lindor në vitin 2026, duke thelluar bashkëpunimin e tyre në mbrojtje, kanë thënë të hënën zyrtarë ushtarakë grekë.

Të tri vendet e Mesdheut lindor janë afruar më shumë gjatë dekadës së fundit përmes stërvitjeve të përbashkëta ushtarake, prokurimit të mbrojtjes dhe bashkëpunimit në energji, zhvillime të vëzhguara nga afër nga rivali rajonal Turqia.

Shtabi i përgjithshëm i forcave të armatosura të Greqisë (GEETHA) ka thënë se zyrtarë të lartë ushtarakë nga të tri vendet nënshkruan një plan të përbashkët veprimi për bashkëpunimin në mbrojtje javën e kaluar në Qipro.

Marrëveshja vjen pas një takimi në Jerusalem midis kryeministrit grek, Kyriakos Mitsotakis, presidentit qipriot, Nikos Christodoulides dhe kryeministrit izraelit, Benjamin Netanyahu, në të cilin ata nënshkruan një marrëveshje për të forcuar bashkëpunimin e sigurisë detare dhe për të avancuar projektet e ndërlidhjes në energji, raportojnë mediat ndërkombëtare.

Ministri i Mbrojtjes dhe deputeti i Vlorës Pirro Vengu ka qenë i pranishëm në zonën ku edhe po punohet për riparimin e defektit që shkaktoi mungesën e ujit të pijshëm në Vlorë.

Autoritetet po punojnë për normalizimin e situatës, ndërsa ministri Vengu tha se me materialet që kanë mbërritur nga Turqia pritet edhe të vendoset në funksion të plotë furnizimi me ujë.

“Përpjekja është gjithështetërore, me në krye Agjencinë Kombëtare të Ujësjellës Kanalizimeve, një skuadër nga mbarë vendi, 13 inxhinierë që kanë bërë të gjithë verifikimin e dëmeve dhe që në orët e para ka nisur puna për parandalimin e dëmeve të mëtejshme. Nuk është momenti për të thënë më tepër tani, puna vazhdon. Jemi shpresë plotë që me mjetet që kanë ardhur nga Turqia të vendoset në funksion të plotë. Ka nisur furnizimi me ujë në disa lagje të qytetit, nuk do reshtim deri sa të kthehet në normalitet të plotë, por edhe që të mos kemi situata të tilla në të ardhmen”, tha ai.

Diplomati Roland Bimo thotë se Shqipëria dhe Kosova duhet të bashkëpunojnë më ngushtë me njëra-tjetrën, duke lënë mënjanë dasitë e udhëheqësve të vendeve respektive, sidomos kur bëhet fjalë për çështjet e sigurisë.

Sipas tij, edhe pse Në Kosovë siguria garantohet nga KFOR dhe SHBA, situata mund të ndryshojë.

“Pa le se çfarë po ndodh në NATO, pa le se si po shkërmoqet NATO, që është një problem më vete të cilin duhet ta atakojmë që sot që të mos ndodhemi mbas pesë-gjashtë vjetësh kur NATO të mos ekzistojë, të mos të ngelemi pa çati, pa tavan mbi kokë. Domethënë të jemi në gjendje që të orientohemi se si do garantohet siguria në atë vend kur të mos ekzistojë NATO”, tha Bimo në “Off the Record” në A2 CNN.

“Kjo që po them unë, të mos ekzistojë NATO, nuk është nuk është shpikja ime. Po të shikosh se çfarë thotë zoti Trump për NATO-n, e çfarë thonë nga Amerika për NATO-n, është një çështje që europianët do duhet të mbrojnë Europën. Pra ka shumë të ngjarë që brenda katër-pesë vitesh, siguria në Europë do të jetë e një karakteri më kontinental”.

“Nuk po mundohem të them se çfarë duhet bërë, por po mundohem të potencoj domosdoshmërinë e një dialogu, një debati për këto probleme që duhet bërë bashkë Kosovë-Shqipëri. Dhe ne nuk e kemi fare luksin për kapriçot e njërit apo tjetrit, qoftë ky me emrin Albin Kurti, apo qoftë ky me emrin Edi Rama, që populli shqiptar të mos ketë një ë një bashkëpunim. Populli shqiptar ka shumë nevojë që liderat e tij të mblidhen herë pas here dhe ne t’i shikojmë se si bisedojmë me njëri-tjetrin, se si shkëmbejnë mendime me njëri-tjetrin dhe si shkëmbejnë informacion. Është tjetër gjë të kemi amerikanët ndërmjetës dhe të kemi europianët ndërmjetës për çështjet tona dhe tjetër gjë kur bashkëpunojmë me njëri-tjetrin”, shtoi Bimo.

Shoqata e pasurive të paluajtshme “Narea” i ka bërë kërkesë këtë të hënë presidentit Bajram Begaj Të dekretojë ligjin për rivlerësimin e pronave.

Grupet e interesit shprehin shqetësim se në këtë mënyrë po pengohet botimi në fletoren zyrtare, hyrja në fuqi nga 1 janari 2026 dhe nxjerrja e akteve nënligjore, duke krijuar pasiguri dhe tension në tregun e pasurive të paluajtshme.

“Ka 1 vit e gjysmë që është dërguar propozimi. Narea pavarësisht se ka shprehur në mënyrë konstante rezerva për masën e tatimit 5% për banesat, pavarësisht se ka ngritur pikëpyetje mbi zbatueshmërinë e amortizimit 1%/vit vjetërsi, beson shumë se një vonesë e mëtejshme e dekretimit të këtij ligji do të sjellë efekte shumë më negative” thuhet në kërkesën e shoqatës.

Presidenti i Partisë së Lirisë, Ilir Meta, nga qelia, ka përshëndetur zgjedhjet e mbajtura në Kosovë më 28 dhjetor, duke i cilësuar si triumf i votës së lirë dhe një shembull frymëzues i funksionimit të demokracisë në rritje.

“Shumë pozitiv zhbllokimi i mbështetjes europiane dhe shumë premtuese njohjet e fundit ndërkombëtare të Kosovës.

Gjithashtu, shumë i qartë qëndrimi i SHBA kundër ndryshimit të kufijve në Ballkan”, shkruan Meta.

Postimi i plotë

Zgjedhjet në Kosovë ishin një triumf i votës së lirë dhe një shembull frymëzues i funksionimit të demokracisë në rritje.

Kosova dëshmoi edhe njëherë se organizimi i zgjedhjeve të lira, të ndershme dhe të barabarta është plotësisht i mundur, kur funksionojnë institucionet e pavarura dhe ndarja e pushteteve.

Shumë pozitiv zhbllokimi i mbështetjes europiane dhe shumë premtuese njohjet e fundit ndërkombëtare të Kosovës.

Gjithashtu, shumë i qartë qëndrimi i SHBA kundër ndryshimit të kufijve në Ballkan.

Urime vëllazërore qytetarëve të Kosovës dhe klasës politike, që konfirmuan progresin e pandalshëm demokratik dhe funksionimin e plotë të shtetit!

Urime Kryeministrit, Albin Kurti për suksesin në zgjedhjet parlamentare dhe besimplotë se e gjithë klasa politike do të bashkëpunojë për arritjen sa më parë të objektivave madhore që e afrojnë Kosovën me BE dhe e bëjnë anëtare të NATO-s.

Anëtari i Këshillit Kombëtar të Partisë Demokratike, Ilir Alimehmeti, ka komentuar zhvillimet politike në vend gjatë një interviste në emisionin “Studio24”, duke theksuar se situata aktuale kërkon reagim të fortë nga qytetarët dhe opozita.

Sipas Alimehmetit, korrupsioni, kriminaliteti dhe largimi masiv i shqiptarëve nga vendi janë probleme serioze që e bëjnë të patolerueshme vijimin e kësaj qeverisjeje. Ai u shpreh se në këto kushte qytetarët përballen me një zgjedhje të qartë: ose krimi, ose shteti ligjor.

“Rruga e duhur është rotacioni absolut, largimi i kësaj qeverie të mpleksur me krimin, në mënyrë që shqiptarët të vendosin vetë për shtetin e tyre dhe të krijohen kushtet që ata të rikthehen në vend,” deklaroi Alimehmeti.

Ai konfirmoi gjithashtu se do të jetë pjesë e protestave të vazhdueshme të Partisë Demokratike, duke theksuar se opozita është në të drejtën e saj të kërkojë pastrimin e qeverisë dhe të shtetit. Sipas tij, qytetarët kanë të drejtën legjitime të zgjedhin një alternativë më të mirë përballë qeverisë aktuale.

Kryetari i Grupit Parlamentar të Partisë Socialiste dhe Drejtues Politik i PS për Diasporën, Taulant Balla, ka ironizuar protestën e opozitës të mbajtur sot, duke përdorur batutën e radhës me “krushqit”, një shprehje që ai e ka përdorur edhe më herët pas protestave të opozitës gjatë të hënave.

Përmes një postimi në rrjetet sociale, Balla shkruan mbi një foto që tregon pjesëmarrje minimale: “Sot krushqit nuk erdhën fare, vetëm hyzmeqarët ishin. Edhe unë mendova mos ta nxjerr sot e lënë vetëm, por me kërkesë të publikut duhet transparencë.”

Kujtojmë se ciklin e komenteve ironike me “krushq” Balla e nisi në protestën e parë të zhvilluar nga opozita më 17 nëntor para Kryeministrisë, ku kreu i grupit më të madh parlamentar iu referua batutës së aktorit Besnik Çinari:

“Kaq në Shkodër i çojmë krushq në dasmë!”

Nga Baton Haxhiu

Ka raste kur dorëheqja nuk është ikje nga përgjegjësia, por pranimi i saj i vonuar.

Rasti i Bedri Hamzës dhe Lumir Abdixhikut është pikërisht ky.

Arsyeja pse duhet ta lënë drejtimin e partive të tyre nuk lidhet me humbjen e zgjedhjeve, por me atë që nuk bënë kur patën mundësinë të ndryshonin rrjedhën politike të vendit.

Kjo do të sqarohet deri në fund të këtij teksti, sepse dështimi i tyre nuk është episodik. Është strukturor.

Ka dështime politike që nuk shpërthejnë.

Nuk bëjnë zhurmë.

Nuk prodhojnë krizë të menjëhershme.

Ato thjesht e lënë vendin pa alternativë.

Ky është dështimi më i rrezikshëm i mundshëm.

Dhe pikërisht ky ndodhi në shkurt.

Jo sepse Kurti ishte i pathyeshëm.

Por sepse dy liderë opozitarë, në momentin kur historia u la çelësat në dorë, zgjodhën të mos e hapin derën.

Në shkurt, opozita nuk ishte pa numra.

Ishte pa guxim.

Ishte pa vizion shtetëror.

Ishte e kapur nga kalkulimi i vogël partiak dhe frika se qeverisja i konsumon më shpejt sesa opozita sterile.

Kjo është pika ku gabuan Bedriu dhe Lumiri. Dhe gabuan njësoj.

Të dy e dinin se mund të ndërtohej qeveria.

Të dy e dinin se Kurti nuk kishte shumicë funksionale.

Të dy e dinin se vendi kishte nevojë për stabilitet institucional.

Por të dy u tërhoqën. Jo për shkak të parimeve, por për shkak të fyerjeve të ndërsjella, nervit personal dhe frikës për të marrë barrën e pushtetit.

Duke mos krijuar qeveri, ata i dhuruan Kurtit luksin më të madh në politikë: të qeverisë pa mandat të plotë, por me pushtet të plotë.

Pa kontratë të qartë me Parlamentin.

Pa kundërpeshë reale.

Pa përgjegjësi për kompromis.

Kjo është arsyeja pse zgjedhjet kaluan kështu siç kaluan. Jo sepse Kurti ishte i fortë. Por sepse opozita u bë bashkëfajtore në prodhimin e kësaj force artificiale.

Dy liderë, një sjellje, një dështim.

Të dy folën për ndryshim, por ikën nga momenti kur ndryshimi kërkonte përgjegjësi.

Të dy folën për stabilitet, por zgjodhën destabilitetin e qëllimshëm për interesa afatshkurtra.

Të dy u sollën si opozitë edhe kur kishin shansin të bëheshin qeveri.

Atëherë nuk pranuan koalicion sepse pati fyerje.

Sepse nuk e duruan njëri-tjetrin.

Sepse e ngatërruan krenarinë personale me interesin shtetëror.

Sot, heshtja mbi atë periudhë është problemi më i madh. Sepse askush nuk po shpjegon si amnistohet sot ajo që u shpall e pamundur dje.

Nëse bashkëpunimi ishte i pamoralshëm në shkurt, pse do të ishte i pranueshëm tani.

Nëse koalicioni ishte tradhti atëherë, pse sot do të ishte zgjidhje.

Këtu humbin të dyja partitë.

PDK humbi shansin të dëshmojë se di të qeverisë përtej hijes së së kaluarës dhe të rikthehet si forcë stabiliteti shtetëror.

LDK humbi shansin të tregojë se nuk është vetëm parti e moralit të deklaruar, por edhe e vendimmarrjes së vështirë kur shteti ka nevojë për përgjegjësi.

Të dyja fituan vetëm një gjë: komoditetin e opozitës.

Dhe kjo është fitore që e paguan vendi.

Kur zgjedhjet zhvillohen në një klimë ku opozita është e pafuqishme, por pushteti edhe më i pakontestueshëm, problemi nuk është vetëm i njërës palë.

Është problem i sistemit politik dhe i një shoqërie që mësohet me idenë se rezultati dihet përpara se të hapen kutitë.

Mungesa e opozitës funksionale nuk e forcon pushtetin. E kalb atë.

Zgjedhjet pa garë reale e shndërrojnë votën në ritual.

Qetësia morale përballë kësaj gjendjeje e bën krizën kulturore dhe etike, jo vetëm politike.

Këto nuk ishin thjesht zgjedhje të fituara keq nga opozita.

Ishin zgjedhje që treguan se sa lehtë rrëshqet demokracia në një normalitet pa alternativë.

Për këtë arsye, përgjegjësia politike nuk mund të shmanget me heshtje.

Bedriu dhe Lumiri duhet të japin dorëheqje.

Jo sepse partitë e tyre janë të dobëta.

Por sepse dështuan në momentin kur duhej të ishin liderë shteti, jo figura opozitare.

Dorëheqja nuk do ta përmirësojë menjëherë gjendjen. Por do ta ndalë kalbëzimin moral.

Sepse kur liderët dështojnë në momentin historik dhe sillen sikur asgjë nuk ka ndodhur, problemi nuk është më zgjedhor. Është krizë përgjegjësie.

Dhe kjo krizë nuk zgjidhet me harresë. Zgjidhet vetëm me akt politik.

Autoritetet shëndetësore në Shtetet e Bashkuara kanë lëshuar një paralajmërim urgjent pasi mijëra pasagjerë mund të jenë ekspozuar ndaj fruthit, sëmundjes më ngjitëse në botë, në aeroportin ndërkombëtar Neëark Liberty në New Jersey. Sipas Departamentit të Shëndetësisë të New Jersey-t (NJDOH), një person i infektuar, jo rezident i këtij shteti, ka udhëtuar nëpër terminalet B dhe C më 19 dhjetor, mes orës 07:00 dhe 19:00, gjatë kulmit të udhëtimeve festive.

Zyrtarët paralajmërojnë se vendndodhja e saktë e personit nuk dihet, ndërsa po kryhet gjurmimi i kontakteve. Personat e ekspozuar mund të shfaqin simptoma deri më 2 janar 2026. Fruthi shfaqet me temperaturë të lartë, kollë, rrjedhje hundësh, sy të skuqur dhe skuqje të lëkurës, ndërsa mund të shkaktojë ndërlikime të rënda, si pneumonia dhe encefaliti.

Sipas CDC-së, në SHBA janë regjistruar mbi 2000 raste fruthi gjatë vitit 2025 dhe tre viktima, duke e bërë këtë shpërthimin më të madh që nga viti 1992. Ekspertët fajësojnë rënien e normave të vaksinimit, duke theksuar se vaksina MMR mbetet mjeti më efektiv për parandalimin e sëmundjes. Autoritetet u bëjnë thirrje qytetarëve të vaksinohen dhe të kontaktojnë mjekun para çdo vizite shëndetësore në rast dyshimi për ekspozim.

Ka nisur puna për rregullimin e tubit kryesor me diametër 1000 milimetra që shërbente për furnizimin me ujë të pijshëmn të Vlorës, i cili ishte çarë, duke lënë prej 4 ditësh pa ujë banorët e qytetit.  Pjesa është gjetur ne Stamboll dhe rreth orës 15:00 u nis me avion për në Rinas. 

Prej katër ditësh banorët e qytetit të Vlorës po përballen me mungesë të ujit, situatë që solli protesta të vazhdueshme. 

“Tubin e çau një fadromë që po punonte për ndërtimin e një pallati”. Pavarësisht pretendimeve të qytetarëve, kreu i AKUK, Faluers Shoshi dhe Kryetarja e Bashkisë Brunilda Mersini e mohojnë në mënyrë kategorike. 

Zyrtarët thonë se defekti i rëndë në linjën kryesore të transmetimit që furnizon depot e qytetit ka ardhur si pasojë e amortizimit të tubit kryesor me gjerësi një metër dhe shkarjes e dherave për shkak të shirave. 

“Një shkarje e dheut dhe depërtimi i ujit kanë shkaktuar defektin. Tubi aktual është plastik dhe ky material nuk përdoret më për këtë diametër. Sot, për tuba 1000 milimetra përdoren gize ose çelik. Kjo është ndërhyrja e tretë riparuese”, tha Shoshi. 

Po sipas tyre, vonesa në riparimin e defektit lidhet me kompleksitetin teknik të ndërhyrjes, presionin e lartë të ujit që ka shkaktuar dështimin e disa provave riparuese. 

Mungesa në tregun vendas e pjesëve specifike, të cilat janë prodhuar në Turqi jepet si një tjetër arsye, se përse problemi nuk mori një zgjidhje në kohë 

“Pajisja specifike për këtë lloj tubacioni nuk gjendet në Shqipëri. Ajo është porositur nga Turqia dhe pritet të mbërrijë brenda ditës së sotme, çka do të na mundësojë të kryejmë ndërhyrjen përfundimtare dhe të rikthejmë furnizimin me ujë ne mesnate”, tha Mersini. 

Për rastin, Prokuroria e Vlorës bën me dije se nuk ka nisur hetim, pasi deri në këto momente nuk i është referuar asnjë material nga policia. Ndërsa Prefektja e Vlorës mblodhi shtabin e emergjencave vetëm pas protestës masive të banorëve. 

Komisioni Qendror Zgjedhor po vazhdon me numërimin e votave për kandidatët për deputetë të Kuvendit të Kosovës.

Ndërsa, numërimi i votave të kandidatëve për deputetë ka shkuar mbi 10 për qind, kurse rezultatet preliminare për dhjetë kandidatët më të votuar të  Vetëvendosjes deri në orën 18:25 janë këto:  Albin Kurti me 37,026 vota, Glauk Konjufca me 28,972 vota, Hekuran Murati me 15,143 vota, Albulena Haxhiu me 14,823 vota, Donika  Gërvalla me 13,016 vota, Xhelal Sveçla me 11,922 vota, Hajrulla Çeku me me 10,682 vota, Avni Dehari me 9,709 vota, Mimoza Kusari me 9,050 vota dhe  Ejup Maqedonci me 8,493 vota.

Pas procesimit të rezulateve preliminare në platformën e KQZ-së, LVV ka fituar 49.30% të votave.

Në bazë të këtyre rezultateve, LVV siguron 56 mandate(pa votat e diasporës dhe ato me kusht)./REL

Kryeministri izraelit Benjamin Netanyahu ndodhet në Mar-a-Lago ku edhe është pritur nga presidenti amerikan Donald Trump.

Gjithashtu kanë mbërritur edhe delegacionet izraelite dhe ato amerikane ku pritet të ketë diskutime mes tyre.

Trump duke iu përgjigjur fillimisht disa pyetjeve të gazetarëve, tha se në fokus do të jetë edhe rindërtimi i Gazës. Gjithashtu Trump paralajmëroi se nëse Irani përpiqet të armatoset, atëherë SHBA nuk mund të qëndrojë e heshtur.

“Kam dëgjuar se Irani po përpiqet të ndërtohet përsëri, dhe nëse po do të na duhet t’i rrëzojmë, do t’i rrëzojmë, do t’i shkatërrojmë plotësisht. Por shpresojmë që kjo të mos ndodhë. Kam dëgjuar që Irani dëshiron të bëjë një marrëveshje. Nëse ata duan të bëjnë një marrëveshje, kjo është shumë më e zgjuar”, tha ai.

Ndërsa Netanyahu ka vlerësuar mbështetjen e Trump, ndërsa është shprehur se “Izraeli kurrë nuk ka pasur një mik si Presidenti Trump.

Një kontroll i Administratës Tatimore në tregtimin e produkteve blegtorale ka zbuluar 4,041 ton mish të padeklaruar dhe 9.3 milionë euro të ardhura të fshehura, duke kallëzuar penalisht në Prokurorinë e Tiranës një subjekt të madh tregtar si dhe duke ngritur shqetësime serioze për evazionin fiskal dhe sigurinë ushqimore në vend. 

Verifikimet janë kryer nga Drejtoria e Tatimpaguesve të Mëdhenj në Administratën Tatimore, e cila ka zbuluar shkelje serioze të legjislacionit tatimor në fuqi dhe një shembull të qartë të evazionit fiskal. 

Nga kontrolli u identifikuan mospërputhje midis inventarit fizik dhe atij të deklaruar në sasi ndërkohë që vlera totale e dëmit të konstatuar arrin në rreth 6.4 milionë euro. Rasti është përcjellë Hetimit Tatimor, i cili e ka referuar për ndjekje penale pranë Prokurorisë së Tiranës 

Administrata Tatimore tha se ka një vullnet të palëkundur përballë shkelësve të ligjit, qofshin këta tatimpagues të mëdhenj. 

Aksioni, sipas saj, synon jo vetëm luftën kundër evazionit fiskal, por edhe garantimin e sigurisë ushqimore për konsumatorët dhe rritjen e formalizimit në tregun e produkteve blegtorale. 

Tatimet njoftuan se kontrollet do të vijojnë në mënyrë të pandërprerë, duke synuar rritjen e transparencës dhe respektimin e rregullave nga të gjithë subjektet që operojnë në këtë sekor. 

Një ortek ka vrarë tre persona dhe ka plagosur një tjetër, në Pirenejtë Aragoneze në Spanjën verilindore, tha Garda Civile Spanjolle. 

Kërkimi filloi pasi një grua njoftoi autoritetet rreth orës 13:00, pasi pa ortekun dhe vuri re katër personat duke bërë ski, tha Garda Civile Spanjolle për AFP. 

Ekipet e shpëtimit, me ndihmën e një helikopteri, u vendosën më pas në këtë zonë rreth majës Tablato, në Pireneje. 

Ekipet e shpëtimit gjetën tre trupa dhe një grua në gjendje hipotermie u shpëtua, thanë burime në rajonin e Aragonës. 

Presidenti i rajonit, Jorge Athcon, tha në një postim në X se ishte “i tronditur nga lajmi i aksidentit tragjik në majën Tablato” dhe tha se do të shkonte në zonë. 

Vetëm dy ditë na ndajnë nga nata e ndërrimit të viteve, dhe astrologia Meri Shehu paralajmëron se 2026 do të jetë një kapitull plot ngjyra, emocione dhe… edhe erotizëm! E ftuar në emisionin “Rudina” në Tv Klan, zbuloi se vitin e ri do ta përjetojmë me sfida dhe triumfe të ndryshme, në varësi të shenjës sonë të horoskopit. Disa do të kenë pasuri, dashuri dhe mundësi të jashtëzakonshme, ndërsa të tjerët do të duhet të punojnë më shumë për të stabilizuar jetën e tyre personale dhe ekonomike.

Nga Demët që do të ballafaqohen me sfida familjare, tek Luani që do të jetë protagonist absolut i vitit, Shehu ka renditur shenjat nga më pak të fatit deri tek fituesi i madh i 2026-ës. Kush do të përjetojë ndryshime të mëdha, kush do të përjetojë rikthime nga e kaluara, dhe kush do të shijojë verën më të nxehtë të jetës së tij? Një gjë është e sigurt, 2026 nuk do të kalojë pa lëvizje, pasion dhe surpriza të paparashikueshme.

11. Bricjapët: Janë në këtë pozicion, pasi me Jupiterin në Luan nga qershori dhe tutje do të merren kryesisht me çështje ekonomike, do të zgjidhin shumë disfavore, paratë që u kanë të tjerët, do të merren shumë me borxhet dhe detyrimet; kjo tendencë i fut pak në ankth. Në prill, Urani që futet në Binjak prek jetën e tyre të përditshme; zakonisht Bricjapët janë njerëz të organizuar, por Urani i nxjerr nga kontrolli dhe shumë Bricjapë do e shikojnë veten në paqëndrueshmëri në punën e përditshme. Pra, shumë Bricjapë do të duan që të ndryshojnë punën, ose nuk do të kenë një punë të qëndrueshme. Në fund të fundit, edhe ata që e mendojnë se e kanë të qëndrueshme, Urani do të sjellë jo stabilitet. Megjithatë, një periudhë e mirë në punë dhe në familje do të jetë qershori dhe korriku. Duke qenë se Saturni futet në Dash në kuadrat me Bricjapët, do të thotë që do të ketë trysni në jetën familjare, me kredi bankare, ose me shërbimin që do të duhet t’u bëjnë njerëzve të familjes.

10. Virgjëresha: Vitin 2026 e kanë në fakt një vit stacion, sepse parapërgatiten për vitin më të bukur të tyre, që do të jetë 2027. Nuk mund të them që më e mira do të ndodhë apo do të duket në 2026 për ta, kështu që do të merren shumë me çështje që kanë të bëjnë me ndjenjat, punët dhe me gjëra që nuk i kanë realizuar, ose do të përgatisin një plan shumë të rëndësishëm; prandaj do të jenë pak në opozitë. Futja e Uranit në Binjak do të thotë që shumë Virgjëreshë që kanë një punë me shtetin, ose një punë në shtet, ky pozicion do të jetë i lëvizshëm. Këto punë nuk do të jenë shumë të stabilizuara dhe nuk do t’u japin shumë avantazhe të mira. Saturni në Dash nga muaji shkurt do t’u japë një tentativë, ku duhet që ta menaxhojnë më mirë anën ekonomike. Do të merren shumë me detyrimet ekonomike.

9. Peshqit: Duke qenë se janë një nga shenjat e ujit, janë favorizuar shumë nga Jupiteri në Gaforre. Janë shenja që janë favorizuar shumë në dashuri. Dashuria do të luajë rolin e tyre kryesor. Çlirohen edhe nga Saturni përfundimisht, por i fut në një rregull dhe detyrime shumë të mëdha ekonomike; prandaj duhet që ta shikojnë me kujdes gjithë periudhën e muajve të parë. Rregullohen ekonomikisht nga fundi i muajit qershor, korrik dhe gusht; këtu Peshqit duhet të bëjnë lëvizjet e tyre më të fuqishme në mënyrë që të kenë stabilitet. Gjithashtu kemi dy eklipse të mëdha, një në pranverë dhe një në vjeshtë, sa i takon shenjës së Peshqve, të cilët do të ndryshojnë jetën në marrëdhënie me të tjerët, sidomos në çift. Shumë Peshq do të vendosin për një marrëdhënie të qëndrueshme, ose ata që kanë pasur problem në marrëdhëniet e tyre mund të kenë ndarje këtë vit.

8. Peshorja: Nga 2025-2026 janë një nga shenjat që do të marrin një triumf në karrierë, ose karriera e tyre do të jetë ajo që do të lëvizë më shumë. Duhet të vazhdojnë Peshoret me tendencën për të kapur një punë, ose të arrijnë një karrierë deri në qershor. Megjithatë, Saturni u del në opozitë, u del në shtëpinë e shtatë, që do të thotë se shumë Peshore që nuk kanë vendosur të martohen, do të martohen. Do të futen në një marrëdhënie të qëndrueshme. Por ato Peshore që kanë pasur një problematikë në marrëdhëniet në çift mund të kenë edhe ndarje. Kujdes Peshoret që kanë problematika; nga mesi i shkurtit dhe në vazhdim do të futen në një situatë më konfliktuale në marrëdhëniet në çift. Gjithsesi, një ëndërr e bukur fillon dhe realizohet; bëhen pak artistë. Kështu që shumë Peshore që do kenë talente duan të bëjnë art; ky do të jetë viti më i bukur. Periudha më e mirë është qershor-korrik-gusht për të dalë në finalen e tyre më të mirë, ose në projektin e tyre më të bukur. Kujdes duhet të kenë në çështjet ekonomike në tetor deri në fund të nëntorit. Mund të jetë fatale për Peshoret.

7. Shigjetari: Për momentin do të merren shumë me çështjet ekonomike dhe duket sikur nuk kanë atë vëmendjen për jetën e tyre personale, por më në fund iu vjen momenti që të lidhen, pasi Shigjetarët janë shenjë shumë e lirë, shumë e pavarur. Që nga mesi i shkurtit dhe për dy vite me radhë nuk do të ketë Shigjetar që do të tentojë të lëvizë pa një program, pa një seriozitet. Shigjetarët nga mesi i shkurtit e tutje do të futen në një lidhje të qëndrueshme; kjo është e dukshme nga Saturni në Dash dhe nga Neptuni në Dash. Por, duke u futur edhe Jupiteri në Luan si një nga shenjat e zjarrit, do të jetë shumë i favorizuar në jetën erotike, në lojëra, argëtime, në blerje, apo edhe në fejesa. Pretendohet një verë shumë e mirë për Shigjetarët, por do të ketë pak pabesira në ekonomi, ose në tradhti të ndryshme që do të hasin në periudhën tetor-nëntor.

6. Binjakët: Kanë një ndryshim shumë të madh në jetën e tyre personale. Në prill futet Urani në shenjën e tyre; kjo do të thotë që Urani është një planet që shkon me Binjakët, por është shumë më i lirë se sa Binjakët. Futen në një periudhë shumë të lirë, shumë të pavarur dhe shumë ndryshe. Kështu që kanë nevojë për hapësirën e vet, sepse do të jenë totalisht në një botë që kërkojnë hapësira të ndryshme, eksplorime. Verën do ta kenë shumë të këndshme me Jupiterin në Luan, ku do të marrin një përgjigje të bukur për ëndrrat dhe fantazitë e tyre. Ndërkohë, Jupiteri në Luan do t’u ndryshojë mënyrën e komunikimit, udhëtimet, kontaktet dhe punën. Do i shikojmë Binjakët në një pozicion krejt të ri. Saturni në Dash i vë Binjakët në një plan të mirë strategjik për sa i përket çështjeve sociale dhe njohjeve të qëndrueshme, bashkëpunimeve, por pse jo edhe të fejesave apo martesave.

5. Ujori: Kanë Plutonin në shenjën e tyre. Ujorët do të jenë ai person që do të japë mendimin dhe verdiktin kryesor. Do të jenë në qendër të vëmendjes në bashkëpunimet, në jetën personale dhe në hapësira të reja. Urani në Binjak u jep njohje të papara, art, lëvizje, kontakte me jashtë dhe është një nga lidhjet më të mira për të vendosur, qoftë për lidhje më të qëndrueshme, qoftë për bashkëpunime shumë të rëndësishme. Deri në qershor do të merren me punën dhe me përditshmërinë, ku do të kenë lajme shumë të mira në maj. Madje, do të futen edhe në një sferë shumë të mirë ekonomike. Që nga janari shumë Ujorë do të shikojnë një çlirim në aspektet e tyre ekonomike.

4. Dashi: Do të jenë protagonistët e vitit 2026. Në fund të janarit, Neptuni, planeti i ëndrrës dhe i fantazisë, futet në Dash dhe do të çlirohet energjia shumë fuqishëm. Edhe Saturni, që futet në Dash, i vë në një projekt, në një strategji dhe në një rregull, por edhe në një kushtëzim. Do të themi që Dashët janë protagonistë si shenja e zjarrit, por do të themi që shumë Dashë ose do të martohen, ose në ato lidhje që i kanë të lodhura do t’u jepet një fund. Marrin vendime të mëdha, prandaj do të jenë shumë protagonistë. Për të mos thënë që edhe Jupiteri futet në Luan, futet në shenjën e dashurisë për ta. Vera për Dashët do të jetë shumë e mirë; duhet të kenë kujdes në tetor-nëntor në çështjet ekonomike, pasi atje do të pësojnë disfata shumë të mëdha. Duhet të kenë kujdes vetëm me punën dhe shëndetin.

3. Akrepi: Si shenjë uji ka qenë e privilegjuar përgjatë vitit 2025 dhe do të vazhdojë që të jetë e privilegjuar edhe në gjashtëmujorin e parë të 2026. Duhet të marrin seriozisht çështjen e një pune, ose duhet që të gjejnë një punë stabile, ose një punë që ata do t’i përkushtohen jashtë mase. Prandaj shumë Akrepë që nuk kanë gjetur një punë, do ta gjejnë; gjithashtu edhe një partneritet të qëndrueshëm. Jupiteri në Luan në qershor futet në vitrinë të shenjës së tyre, pra futet në karrierën më të rëndësishme dhe më të ndritshme. Në qershor-korrik-gusht mund të gjejnë një punë shumë të mirë dhe përmes kësaj të bëjnë një hap shumë të madh drejt karrierës.

2. Gaforrja: Deri në qershor të 2026-ës, Jupiteri do të jetë në shenjën e Gaforreve dhe atje do të rregullohen gjërat. Ajo që prish disi balancat është futja e Saturnit në Dash, që është në kuadrat me Gaforren dhe sjell më shumë përgjegjësi. Nuk përjashtohet fakti që në qershor, korrik dhe gusht të zënë një punë shumë të rëndësishme dhe me shumë lekë. Jupiteri në Luan futet në shenjën ekonomike për ta dhe shumë Gaforre do të rrisin bazën e tyre ekonomike përmes një pune dhe një karriere. Mund të ndodhë që ata që nuk e shfrytëzojnë mirë këtë gjë, të kenë kriza të fuqishme në karrierë. Tentojnë që të shkojnë lart sa i takon karrierës, vetëm se duhet të kenë kujdes Uranin në Dem.

1. Luani: Viti është i tyre! Do të kenë aleancë me Saturnin në Dash, që futet në shkurt, dhe Uranin në Binjak që futet në prill, gjithashtu edhe dy eklipse të fuqishme në gisht, i cili në fushën e marrëdhënieve dhe të bashkëpunimeve, si dhe në jetën personale do t’u sjellë ndryshime të mëdha. Qershori dhe tutje flet për këta, dhe të gjithë këta muaj përpara do të përgatisin një projekt të rëndësishëm të tyre personal që realizohet me sukses në periudhën qershor-korrik-gusht dhe do të marrë një hov. Kujdes duhet të kenë deri në fund të janarit, sepse është akoma Neptuni dhe Saturni në Peshk, që ka kushtëzuar në çështjet ekonomike, që do t’i kapërcejnë me kujdes. Megjithatë, është viti i tyre; jep shumë energji, erotizëm dhe ndryshime të mëdha në jetën personale dhe aleatë të rëndësishëm. Pra, ky vit do të cilësohet si viti i ndryshimit të artit.

Kthimi i pasurive të konfiskuara nga krimi në mundësi reale për një të ardhme më të sigurt për viktimat e dhunës dhe trafikimit mbetet një nga prioritetet kryesore të qeverisë së Edi Ramës dhe Agjencisë së Administrimit të Pasurive të Sekuestruara dhe Konfiskuara, AAPSK. 

Në vazhdën e kësaj nisme, Ministrja e Punëve të Brendshme, Albana Koçiu dhe Administratorja e AAPSK-së, Risena Xhaja vizituan sot një objekt i përfituar nga veprimtari kriminale, i cili funksionon si strehë e sigurt për viktimat e dhunës dhe trafikimit të qenieve njerëzore. 

Duke përcjellë pamjet e kësaj vizite në Facebook, Rama tha se nëpërmjet nismave të tilla qeveria ka ndihmuar rreth 300 viktima të dhunës dhe trafikimit. 

“Kthimi i pasurive të konfiskuara nga krimi në mundësi për të ardhmen e viktimave të dhunës dhe trafikimit mbetet një prioritet i yni. Ministrja e Punëve të Brendshme Albana Koçiu, së bashku me ekipin e Agjencisë së Administrimit të Pasurive të Sekuestruara dhe të Konfiskuara, vizituan një nga shembujt më domethënës të kësaj nisme: një objekt i përfituar nga veprimtari kriminale, i cili sot shërben si një strehë e sigurt për viktimat. Deri në vitin 2025, kemi realizuar mbi 15 projekte të kësaj natyre, kemi mbështetur më shumë se 20 institucione dhe kemi ndihmuar drejtpërdrejt rreth 300 viktima të dhunës dhe trafikimit” shkruan Rama në Facebook. 

Gjatë kësaj vizite, Ministrja Koçiu u shpreh se këto pasuri përfaqësojnë një mundësi reale për t’u kthyer në shërbime sociale dhe publike në dobi të komunitetit. 

Ajo theksoi se vila dykatëshe, i krijon mundësi shoqatës “Të Ndryshëm, të Barabartë” të ofrojë shërbime për gra dhe fëmijë viktima të dhunës në familje apo trafikimit. 

Ministrja nënvizoi se institucionet do të vijojnë punën për të rikthyer çdo pasuri të përfituar në mënyrë të paligjshme në shërbim të komunitetit, duke ndjekur të gjitha procedurat ligjore.  

Sipas administatores së AAPSK-së, vënia në përdorim social e pasurive të konfiskuara është “një nga mënyrat më domethënëse për t’i rikthyer shoqërisë vlerën e aseteve të përfituara nga veprimtaria kriminale”. 

“Përmes projekteve si  kjo strehë e organizatës “të ndryshëm, të barabartë”, këto pasuri nuk mbeten thjesht në administrim financiar, por shndërrohen në hapësira reale mbështetjeje, integrimi dhe dinjiteti për grupet në nevojë. Bashkëpunimet me organizatat e shoqërisë civile, partnerët ndërkombëtarë dhe institucionet vendase janë shumë të rëndësishme për ta kthyer këtë vizion në rezultate konkrete për komunitetin dhe të zgjerimin e modeleve të tilla,” tha Xhaja. 

Në këtë kontekst, Xhaja theksoi se një nga objektivat kryesorë për vitin 2026 do të jetë rritja e numrit të projekteve të tilla. 

Gjykata Kushtetuese rrëzoi sot pretendimet e kreut të grupit parlamentar të Partisë Demokratike, Gazment Bardhi, se vendimi për rikthimin në detyrë të zëvendëskryeministres dhe ministres së Infrastrukturës dhe Energjisë, Belinda Balluku, u imponua nga kryeministri Edi Rama. 

 Reagimi i Gazment Bardhit: 

I vetmi shpjegim me vlerë për publikun që duhet të japë Gjykata Kushtetuese është ky: cilat qenë arsyet dhe motivet që e çuan t’i nënshtrohej presionit të Kryeministrit në çështjen Balluku, duke treguar papërgjegjshmëri dhe mungesë të theksuar integriteti. Sqarimi i kësaj rrethane do ta çlironte Gjykatën Kushtetuese nga pengmarrja politike dhe do t’i zvogëlonte hendekun e mosbesimit tek kjo gjykatë. 

Po ashtu, do të bënin mirë që të shkruanin po kaq gjatë sa sqarimi për publikun, edhe argumentet kushtetuese për pezullimin e një vendimi gjyqësor penal, me efekt individual, me kërkesë të një institucioni kushtetues, siç është Kryeministri! 

Deri më sot, s’kanë dhënë asnjë argument kushtetues, përveç idiotësisë kushtetuese se lufta e sistemit të drejtësisë ndaj korrupsionit cënon interesat shtetërore më shumë se vetë korrupsioni qeveritar në një aferë 1.1 miliard euro. 

Njësoj e domosdoshme për besueshmërinë e Gjykatës Kushtetuese mbetet sqarimi  për dy standardet e ndjekura: se pse 1/5 e deputetëve nuk legjitimohen për të kërkuar interpretim për masat ndaj një deputeti, ndërsa Kryeministri legjitimohet për të kërkuar interpretim për masat ndaj një ministri. 

Kur t’i kenë sqaruar këto, mund të bëjnë edhe një deklaratë përgënjeshtruese ndaj vetes dhe presionit të jashtëzakonshëm që Kryeministri po ushtron për  këtë çështje! 

Dhe, pasi t’i kenë bërë të gjitha këto, ne të tjerët, s’do të kemi nevojë të dalim dhe t’u themi shqiptarëve një të vërtetë të madhe: që, përmes pengmarrjes së disa anëtarëve të Gjykatës Kushtetuese, Edi Rama po tenton të pengojë drejtësinë dhe të marrë në mbrojtje korrupsionin qeveritar. 

Trupi i nënës dhe i njërit prej fëmijëve u gjetën të dielën, ndërsa trupi i fëmijës së dytë ende nuk është nxjerrë për shkak të paqëndrueshmërisë së strukturës së shtëpisë.

Sipas mediave, babai i fëmijëve, arriti të shpëtonte duke thyer një dritare të banjës. Ai u përpoq disa herë të futej sërish në shtëpi për të shpëtuar familjen, duke u përballur me flakë dhe tym të dendur, por u detyrua të tërhiqej nga fqinjët dhe më pas u dërgua në spital për trajtim.

Autoritetet bëjnë të ditur se zjarri dyshohet të ketë nisur në katin përdhes. Përhapja e flakëve shkaktoi shembjen e çatisë, tavaneve dhe shkallëve, duke e bërë ndërtesën jashtëzakonisht të rrezikshme për ndërhyrje.

Zëvendësdrejtori i shërbimit zjarrfikës, tha se ekipet u përballën me kushte jashtëzakonisht të vështira dhe punuan pa pushim për të hyrë në banesë dhe për të shpëtuar banorët.