Lihet në fuqi vendimi për shtetasin Robert Myftari, për trafik droge dhe grup i strukturuar kriminal.

Gjykata e Posaçme e Apelit lë në fuqi dënimin e R.M. për trafik narkotikësh dhe grup kriminal

Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtari kryesues Dhimitër Lara dhe anëtaret Daniela Shirka dhe Tereza Merkaj, shpalli sot, më 22 janar 2026, vendimin mbi çështjen penale nr. 13/78, akti i datës 24.12.2025, lidhur me ankimin e të pandehurit R.M. ndaj vendimit nr. 64 të Gjykatës së Posaçme të Shkallës së Parë, datë 17.10.2025. Gjykata vendosi:

1. Deklarimin fajtor të të pandehurit R.M. për veprën penale “Trafikimi i narkotikëve”, në bashkëpunim dhe në kuadër të grupit të strukturuar kriminal, mbetur në tentativë, sipas nenit 183/a1 dhe neneve 22, 23, 27, 28/4 të Kodit Penal, dhe për këtë e dënoi me 10 (dhjetë) vjet burgim.
2. Deklarimin fajtor të të pandehurit për veprën penale “Grupi i strukturuar kriminal”, sipas nenit 333/a/2 të Kodit Penal, dhe për këtë e dënoi me 2 (dy) vjet burgim.
3. Në aplikim të nenit 55 të Kodit Penal, dënimi i tij për të gjitha veprat penale do të jetë një i vetëm, në masën 10 (dhjetë) vjet burgim.
4. Vuajtja e dënimit do të fillojë nga dita e arrestimit të të pandehurit për këtë procedim.
5. Sipas Ligjit nr. 81/2020, për të drejtat dhe trajtimin e të dënuarve me burgim dhe të paraburgosurve, R.M. do të vuajë dënimin në burgun e sigurisë së lartë.
6. Gjykata urdhëroi konfiskimin e mjetit lundrues (gomone) me emrin “” dhe regjistrin “”, në pronësi të R.M., i sekuestruar në nëntor 2015, pasi ishte përdorur për transportimin e rreth 800 kg lëndë narkotike. Mjeti do të kalojë në favor të shtetit.
7. Shpenzimet gjyqësore i ngarkohen të pandehurit R.M.
8. Kundër këtij vendimi lejohet ankim në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga dita e njoftimit të vendimit.

Në përfundim, Gjykata e Posaçme e Apelit për Korrupsionin dhe Krimin e Organizuar vendosi:

• Lënien në fuqi të vendimit nr. 64, datë 17.10.2025, të Gjykatës së Posaçme të Shkallës së Parë për Korrupsionin dhe Krimin e Organizuar.

Ministrja Elisa Spiropali në seancën në Kuvend ka prezantuar marrëveshjen për Bordin e Paqes, duke theksuar se Bordi i Paqes është një mekanizëm për ndërtimin  e paqes për një botë që ndryshon shumë shpejt.

Gjithashtu Spiropali tha se Shqipëria tregon se është gati për vendimmarrje dhe se partneriteti me SHBA është i rëndësishëm.

“Sot po ju ftoj të votoni për seriozitetin e Shqipërisë si aleate; që po, nën drejtimin e Edi Ramës është ngritur në lartësinë e paimagjinueshme si asnjëherë më parë”, tha ajo.

Më tej Spiropali sqaroi se përfshirja e Shqipërisë në Bordin e Paqes nuk sjell angazhime të fshehta dhe se është një përgjegjësi.

“Për vite me radhë në këtë sallë është thënë se Shqipëria nuk pyetet se Shqipëria nuk dëgjohet. Por ftesa që kemi sot përpara tregon krejt të kundërtën. Është ndërtuar një besim me punë e ndershmëri. Sot Shqipëria ka marrëdhënie të besueshme jo vetëm me partnerët tanë në Europë e SHBA, por edhe në Lindjen e Mesme, ne Izrael e Botën Arabe. Sot Shqipëria ftohet si anëtare themeluese dhe çfarë mund të bëjë më shumë një kryeministër për vendin e tij se sa të bëjë Shqipërinë të shihet e dëgjohet aty ku dikur nuk ekzistonte. Kryeministri i Shqipërisë e ka pasur Kosovën gjithmonë me vete”, tha ajo.

Kryeministri Edi Rama, i pranishëm në seancën plenare, iu përgjigj deputetëve demokratë se përse nuk mori pjesë në forumin e Ekonomisë në Davos.

“Jeni shqetësuar që nuk mora pjesë në Davos. Mes ftesës së babait dhe vajzës, zgjodha vajzën. Dhe natyrisht vajzën e zgjodha me lejen e babait. E dyta, duke qenë se z. Mediu lidh Amerikën me rrugën e shpresës të hidhte poshtë pretendimin e Britanisë dhe të mbante amanetin e Amerikës, por s’ka asnjë problem. Rrini i qetë, analizat i kanë bërë ata që i kanë ftuar” – tha Rama.

Mbretëria e Bashkuar nuk do të nënshkruajë traktatin e quajtur “Bordi i Paqes” të Presidentit amerikan Donald Trump, për shkak të shqetësimeve lidhur me përfshirjen e Rusisë, deklaroi sekretarja britanike e Jashtme, Yvette Cooper.

Duke folur për BBC nga Forumi Ekonomik Botëror në Davos, Zvicër, Cooper tha se Britania mbështet planin 20-pikësh të Trump për Gazën dhe se vendi i saj dëshiron të luajë një rol në fazën e dytë të procesit të paqes për rajonin.

Megjithatë, kur u pyet nëse Britania do të bëhej pjesë e “Board of Peace”, Cooper tha:

“Ka shumë punë për t’u bërë. Ne nuk do të jemi nënshkrues sot, sepse bëhet fjalë për një traktat ligjor që ngre çështje më të gjera, dhe gjithashtu kemi shqetësime për përfshirjen e Putinit, që flet për paqe, ndërkohë që nuk kemi parë ende ndonjë shenjë se ai është i përkushtuar ndaj paqes në Ukrainë”.

Është miratuar me 13 vota pro projektligji për Bordin e Paqes për Gazën, në Komisionin e Jashtëm të Kuvendit.

Burime bëjnë me dije se nuk ka pasur asnjë votë kundër dhe asnjë votë abstenim gjatë votimit të këtij projektligji.

Po ashtu mësohet se miratimi i këtij projektligji u bë sipas variantit të propozuar nga Këshilli i Ministrave.

TIRANË- Presidenti i Republikës, Bajram Begaj, ka autorizuar kryeministrin e vendit Edi Ramën për nënshkrimin e marrëveshjes për Bordin e Paqes, një iniciativë kjo e ndërmarrë nga presidenti i SHBA, Donald Trump.

Në autorizimin e Kreut të Shtetit thuhet se këto kompetenca nuk mund të delegohen tek asnjë autoritet apo organ tjetër publik.

“Kompetencat, të drejtat dhe detyrimet për lëshimin e plotfuqisë, si dhe të përfaqësimit të Republikës së Shqipërisë, sipas këtij autorizimi, nuk mund të delegohen tek asnjë autoritet apo organ tjetër publik. Ushtrimi i tyre nga autoritetet e përcaktuara në këtë autorizim është i detyrueshëm sipas ligjit”, thuhet mes rreshtash.

AUTORIZIM PËR LËSHIMIN E PLOTFUQISË PËR NËNSHKRIM MARRËVESHJEJE: 

Në mbështetje të nenit 92, shkronja “ë” të Kushtetutës së Republikës së Shqipërisë, nenit 5, pika 2, si dhe nenit 6, pika 1 dhe 3, të ligjit nr. 43/2016, “Për marrëveshjet ndërkombëtare në Republikën e Shqipërisë”, i ndryshuar, autorizoj SH.T.Z. Edi Rama, Kryeministër i Republikës së Shqipërisë, për nënshkrimin e “Marrëveshjes së pranimit të Republikës së Shqipërisë, përfaqësuar nga Kryeministri z. Edi Rama, në Kartën e Bordit të Pages”, miratuar në parim me vendimin nr. 45, datë 21.1.2026 të Këshillit të Ministrave.

Kompetencat, të drejtat dhe detyrimet për lëshimin e plotfuqisë, si dhe të përfaqësimit të Republikës së Shqipërisë, sipas këtij autorizimi, nuk mund të delegohen tek asnjë autoritet apo organ tjetër publik. Ushtrimi i tyre nga autoritetet e përcaktuara në këtë autorizim është i detyrueshëm sipas ligjit.

Ceremonia e nënshkrimit të “Bordit të Paqes”, iniciativë e re e presidentit amerikan Donald Trump, u zhvillua me pjesëmarrjen e përfaqësuesve nga më pak se 20 vende dhe pa praninë e asnjë aleati tradicional të Europës Perëndimore.

Ngjarja, e mbajtur në Davos, u dominua nga vende të Lindjes së Mesme dhe Amerikës së Jugut. Në mesin e liderëve të pranishëm ishin përfaqësues nga Arabia Saudite, Katari, Emiratet e Bashkuara Arabe, Argjentina dhe Paraguai.

Gjatë fjalës së tij, Trump falënderoi të ftuarit, duke i cilësuar si “liderë shumë popullorë, në shumicën e rasteve, dhe në disa raste jo aq popullorë”.

Vendet pjesëmarrëse ishin: Bahrein, Maroku, Argjentina, Armenia, Azerbajxhani, Bullgaria, Hungaria, Indonezia, Jordania, Kazakistani, Kosova, Pakistani, Paraguai, Katari, Arabia Saudite, Turqia, Emiratet e Bashkuara Arabe, Uzbekistani, Mongolia.

Kosova u përfaqësua nga presidentja Vjosa Osmani, e cila hodhi firmën e saj krah Presidentit Trump.

Trump iu është përgjigjur kritikëve të Bordit të Paqes, teksa tha se ai ka potencialin të jetë “një nga organet më të rëndësishme të krijuara ndonjëherë”, duke shtuar se është i nderuar që është kryetar.

Po ecën shumë mirë… pothuajse çdo vend dëshiron të jetë pjesë e saj“, thotë ai.

Trump thotë se sapo të formohet Bordi i Paqes, “ne mund të bëjmë pothuajse çfarë të duam”, po duke bashkëpunuar me Organizatën e Kombeve të Bashkuara.

Pavarësisht kritikave të tij të përsëritura ndaj organit ndërkombëtar, ai thotë se OKB ka “potencial të jashtëzakonshëm”.

Trump tha se kombinimi i përpjekjeve të Bordit të Paqes dhe OKB-së është “diçka shumë unike për botën” dhe “hapi i parë drejt një dite më të ndritshme për Lindjen e Mesme”.

Myzyri është marrë i pandehur për shkelje të barazisë në tendera si kreu i Komisionit të Prokurorimeve Publike.

Çështja për të cilën po hetohet Myzyri lidhet me procedurat e prokurimit për mirëmbajtjen e urës së Fanit dhe të lotit Shpal, Ura e Repsit, me një fond limit prej 219 milionë lekë.

Ky tender është zhvilluar sipas SPAK në 2020 dhe siç dyshohet Komisioni i Prokurimit Publik nuk i ka marrë në konsideratë ankesat.

Gjatë shqyrtimit të procedurës së mësipërme në kundërshtim me ligjin, deklaron SPAK, është favorizuar bashkimi i operatorëve që nga hetimet del se kanë paraqitur dokumente të falsifikuara.

Në Forumin Ekonomik të Davosit kanë filluar të hidhen firmat për themelimin e Bordit të Paqes për Gazën.

I pari që firmosi ishte presidenti amerikan, Donald Trump. Ndërkaq, e pranishme ishte edhe presidentja e Kosovës, Vjosa Osmani, e cila hodhi firmën e saj.

Grupi Parlamentar i Partisë Demokratike ka depozituar në Kuvend amendamente për projektligjin “Për ratifikimin e marrëveshjes së pranimit të Republikës së Shqipërisë në Kartën e Bordit të Paqes”.

Në kërkesën drejtuar Komisionit për Punët e Jashtme dhe Kuvendit, deputeti Gazment Bardhi thekson se ndryshimet synojnë garantimin e kushtetutshmërisë së projektligjit, duke argumentuar se Shqipëria në marrëveshjet ndërkombëtare duhet të përfaqësohet nga institucione dhe jo nga individë të përmendur me emër.

PD propozon riformulimin e titullit dhe të nenit 1 të projektligjit, si dhe shtimin e një neni të ri, ku parashikohet që Shqipëria të përfaqësohet në Bordin e Paqes nga Presidenti i Republikës ose, me autorizimin e tij, nga Kryeministri, në përputhje me Kushtetutën dhe legjislacionin në fuqi.

Sot shënohet një vit që kur presidenti amerikan Donald Trump urdhëroi tërheqjen e Shteteve të Bashkuara  te Amerikës nga Organizata Botërore e Shëndetësisë (OBSH), vetëm disa orë pas marrjes së detyrës.

Sipas marrëveshjes mes SHBA-së dhe agjencisë së OKB-së me seli në Gjenevë, tërheqja hyn zyrtarisht në fuqi sot, pasi u përmbush periudha e detyrueshme njëvjeçare e njoftimit.

Teorikisht, një nga kushtet e parashikuara në marrëveshje për t’u tërhequr nuk është përmbushur, pasi SHBA nuk i ka paguar plotësisht kontributet financiare siç ishte rënë dakord.

Megjithatë, OBSH-ja nuk ka mjete për të kërkuar pagesën apo për të refuzuar tërheqjen.

“Shpresoj që SHBA ta rishqyrtojë vendimin dhe të rikthehet në OBSH,” tha në Gjenevë drejtori i përgjithshëm Tedros Adhanom Ghebreyesus, duke shtuar se nga ky hap humbasin të gjithë.

“Tërheqja është humbje për SHBA-në dhe gjithashtu humbje për pjesën tjetër të botës,” tha Tedros, duke theksuar se çështja nuk ka të bëjë me paratë, por me bashkëpunimin dhe solidaritet.

Pakënaqësia e Trumpit me OBSH-në daton që nga pandemia e koronavirusit.

Ai u përpoq ta nxirrte SHBA-në nga organizata gjatë mandatit të tij të parë. Por, pasardhësi i tij, Joe Biden, u bë president para se të përfundonte afati njëvjeçar dhe e anuloi urdhrin e Trumpit.

Trump e akuzon OBSH-në për keqpërdorim fondesh dhe për menaxhim të dobët të pandemisë.

Këtë të enjte është parashikuar seanca në Gjykatën Kushtetuese për çështjen e zv.kryeministres Belinda Balluku.

Kryeministri kërkon zgjidhjen e mosmarrëveshjes me gjykatën e posaçme dhe SPAK, ndërsa Prokuroria e Posaçme është në pritje të shqyrtimit të kërkesës së tyre të depozituar në Kuvend për autorizim për arrestimin e zv.kryeministres.

Në gjykatë sapo kanë mbërritur dy prokurorët e çështjes.

GJKKO përmes një reagimi zyrtar ka njoftuar nuk do të dërgojë përfaqësues me argumentin se “nuk mund të legjitimohet si palë në gjykimin kushtetues me kërkues Kryeministrin e Republikës së Shqipërisë”.

“Ju informojmë se GJKKO nuk do të marrë pjesë në këtë seancë plenare pasi vlerëson se nuk mund të legjitimohet si palë në gjykimin kushtetues me kërkues Kryeministrin e Republikës së Shqipërisë.

Në një shtet demokratik të së drejtës, të bazuar në parimin e sundimit të ligjit dhe të ndarjes së pushteteve, një gjykatë nuk mund të thirret dhe as të legjitimohet si palë në një gjykim kushtetues për të bërë parashtrime apo për të mbrojtur një vendim të dhënë prej saj. Pjesëmarrja e GJKKO-së si palë e interesuar në Gjykatën Kushtetuese do të cenonte parimin e ndarjes së pushteteve dhe pavarësinë e brendshme të pushtetit gjyqësor”-thuhet në njoftim.

Një 43-vjeçar u vu në pranga nga policia në Durrës, pasi drejtonte automjetin në gjendje të dehur dhe tentoi të korruptojë punonjësit e policisë duke u ofruar para, me qëllim shmangien e testit të alkoolit.

Nga kryerja e testit të alkoolit rezultoi se ky shtetas drejtonte automjetin në gjendje të dehur, në masën 0.92 mg/l.

43-vjeçari akuzohet për veprat penale “Korrupsioni aktiv i personave që ushtrojnë funksione publike” dhe “Drejtimi i automjetit në mënyrë të parregullt”.

Njoftimi i policisë

Policia Rrugore e Durrësit godet një tjetër rast të tentativës për të korruptuar punonjësit e Policisë Rrugore.

Drejtonte automjetin në gjendje të dehur dhe për të shmangur testin e alkoolit, u ofroi para punonjësve të Policisë, vihet në pranga 43-vjeçari.

Shërbimet e Sektorit të Policisë Rrugore në DVP Durrës, gjatë monitorimeve të qarkullimit për identifikimin dhe ndëshkimin e shkelësve të Kodit Rrugor, në rrugën “Vllazërimi”, kanë ndaluar automjetin me drejtues shtetasin Xh. S.

Drejtuesi i automjetit, në momentin e ndalimit, ka tentuar të korruptojë punonjësit e Policisë, duke u ofruar para, me qëllim shmangien e testit të alkoolit.

Nga kryerja e testit të alkoolit rezultoi se ky shtetas drejtonte automjetin në gjendje të dehur, në masën 0.92 mg/l.

Në përfundim të veprimeve të kryera, u bë arrestimi në flagrancë i shtetasit Xh. S., 43 vjeç, banues në Durrës, për veprat penale “Korrupsioni aktiv i personave që ushtrojnë funksione publike” dhe “Drejtimi i automjetit në mënyrë të parregullt”.

Materialet hetimore iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

“Ne kemi një këshill paqeje, dhe ai është Kombet e Bashkuara”, tha politikani i CDU-së gjatë një vizite në kryeqytetin kenian, Nairobi. Në të njëjtën kohë, ai pranoi se Kombet e Bashkuara duhet të reformohen dhe të bëhen më efektive – ashtu siç Trump ka kërkuar vazhdimisht.

Sipas ministrit, qeveria gjermane ka ende disa pyetje në lidhje me këtë Këshillin e Paqes. “Këto mbeten pa përgjigje deri më sot. Por ne do t’i diskutojmë ato në një dialog konstruktiv.” Ndërkohë, Gjermania demonstron “çdo ditë përmes veprimeve të saj praktike se sistemi i OKB-së është sistemi ynë i paqeruajtjes, një sistem që meriton mbështetjen tonë të plotë”.

Paraardhësja e Wadephul, Annalena Baerbock, shprehu një pikëpamje të ngjashme. Presidentja aktuale e Asamblesë së Përgjithshme të OKB-së i tha Agjencisë Gjermane të Shtypit se Këshilli i Sigurimit i OKB-së i kishte dhënë “Këshillit të Paqes” një mandat ligjërisht të detyrueshëm sipas ligjit ndërkombëtar me një detyrë të përcaktuar qartë: Organi duhet të veprojë në një bazë kalimtare në konfliktin midis Izraelit dhe Hamasit në Rripin e Gazës. Grupi militant islamist Hamas, i cili shkaktoi luftën në territorin palestinez me sulmin e tij të madh ndaj Izraelit në tetor 2023, klasifikohet si një organizatë terroriste nga shumë shtete.

Baerbock e hedh poshtë idenë që “Këshillit të Paqes” t’i besohen detyra globale, siç synon tani Trump. Ajo argumenton se Kombet e Bashkuara ekzistojnë tashmë si një organizatë ndërkombëtare, detyra dhe qëllimi i së cilës është ruajtja e paqes botërore dhe sigurisë ndërkombëtare. Sipas politikanes së Partisë së Gjelbër, të gjitha shtetet anëtare, pavarësisht nga madhësia, forca ekonomike apo ushtarake e tyre, kanë një vend dhe një votë në Kartën e OKB-së e kjo për “arsye shumë të mirë”.

“Nëse disa shtete tani përpiqen të zbatojnë ligjin e më të fortit, kjo aleancë ndërrajonale – pavarësisht të gjitha dallimeve të tjera – duhet të mbrohet qartë dhe me vendosmëri për t’u vetëmbrojtur dhe për të mbrojtur rendin ndërkombëtar të bazuar në rregulla”, theksoi Baerbock.

Sipas Shtëpisë së Bardhë, Trump do të bëjë një njoftim në lidhje me “Këshillin e Paqes” këtë të enjte në Forumin Ekonomik Botëror në Davos të Zvicrës. Raportet e medias tregojnë se ai do të nënshkruajë më pas të ashtuquajturën kartë, rregulloren e saj. Drafti është dërguar në afërsisht 60 vende, përfshirë Rusinë dhe Kinën./DW/

Kuvendi mblidhet në seancë plenare për shqyrtimin dhe miratimin e projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”. Në urdhrin për thirrjen e seancës nga kryetari i Kuvendit Niko Peleshi thuhet se marrëveshja kërkon shumicë absolute votash për miratim. Seanca do të nisë me fjalën e nismëtarit, më pas do shprehet komisioni përgjegjës për Europën dhe Punët e Jashtme ndërsa parashikohen diskutime dhe votimi.

Duke qenë se pjesëmarrja e Republikës së Shqipërisë në Bordin e Paqes konsiderohet zhvillim me rëndësi të veçantë për politikën e jashtme dhe diplomacinë e vendit, kërkesa për miratimin e këtij projektligji me procedurë të përshpejtuar bëhet në përputhje me parashikimin e nenit 83, pika 2, të Kushtetutës. Projektligji synon ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes. Këshilli i Ministrave ka miratuar, në parim marrëveshjen më 21 janar.

Marrëveshja synon krijimin e Bordit të Paqes si një organizatë ndërkombëtare, me personalitet ligjor ndërkombëtar, me qëllim promovimin e stabilitetit, rivendosjen e një qeverisjeje të besueshme e të ligjshme, si dhe sigurimin e paqes së qëndrueshme në zonat e prekura ose të kërcënuara nga konflikti. Bordi i Paqes do të ndërmarrë funksione të tilla të ndërtimit të paqes në përputhje me të drejtën ndërkombëtare dhe në përputhje me këtë Kartë, duke përfshirë zhvillimin dhe përhapjen e praktikave më të mira të mundshme për t’u zbatuar nga të gjitha shtetet dhe komunitetet që kërkojnë paqe.

Seanca plenare u kërkua pasditen e sotme nga grupi parlamentar i Partisë Socialiste përmes një shkrese zyrtare, për ratifikimin me procedurë të përshpejtuar të marrëveshjes për pranimin e Shqipërisë në Bordin e Paqes.

Qeveria dhe SPAK do të përballen sot në Gjykatën Kushtetuese për rastin e zv.kryeministres Belinda Balluku. Seanca në Kushtetuese me relator Sandër Becin. Edhe pse në Gjykatën Kushtetuese do të shqyrtohet çështja për pezullimin e Ballukut, ajo nuk është palë dhe nuk do të jetë e pranishme. Kjo sepse Edi Rama i ka vënë firmën e tij kësaj çështjeje.

Përfaqësuesit e tij do të jenë përballë SPAK dhe GJKKO, sepse kryeministri mendon se një prokuror dhe një gjykatës nuk mund të pezullojnë një ministër. Sipas tij kjo kompetencë ndahet mes kryeministrit, Kuvendit dhe Presidentit, ndaj edhe këto dy institucione janë thirrur sot si palë të interesuara.

SPAK do të përfaqesohet në Kushtetuese nga dy prokuroret e çështjes, Dritan Prençi dhe Dorina Bejko. Presidenti i Republikës do të përfaqësohet nga Ilir Rusmali këshilltar, Hemioni Braho shef kabineti dhe Eriola Shia Drejtore e përgjithshme, ndërsa Kuvendi nga drejtoresha juridike, Mimoza Arbi.

Kryeministri Rama argumenton se sipas kushtetutës, edhe një ministër gëzon imunitetin e deputetit, dhe siç këtij të fundit asnjë gjykatë nuk mund t’i pezullojë ushtrimin e mandatit, kjo nuk mund t’i ndodhë as ministrit. Ndaj Rama kërkon të zgjidhet konflikti duke i interpretuar ky nen Kushtetues.

Në përfundim, dy janë rrugët e daljes, ose gjykata vendos se SPAK dhe GJKKO kishin të drejtë dhe do të pezullojnë sërish Ballukun, ose i japin të drejtë Ramës dhe pezullimi hiqet përfundimisht.

Gjykata e Shkallës së Parë e Rrethit Gjyqësor Durrës ka shpallur të pafajshëm Hazbi Likën, Drejtor i Drejtorisë Rajonale të Arsimit Parauniversitar Durrës, me vendim të dhënë më 21 janar 2026.

Vendimi i gjykatës rrëzon plotësisht akuzat ndaj tij, duke konfirmuar se nuk ekziston asnjë përgjegjësi penale në ngarkim të Likës.

Më 2 korrik 2025, ai ishte pezulluar përkohësisht nga detyra me kërkesë të Prokurorisë pranë Gjykatës së Rrethit Gjyqësor Durrës dhe me vendim penal të kësaj gjykate. Pas shqyrtimit të çështjes dhe vijimit të procedurave ligjore, Lika u rikthye në detyrë më 22 tetor 2025.

Vendimi i sotëm përbën një përfundim të qartë dhe përfundimtar në shkallën e parë, duke rivendosur plotësisht figurën ligjore dhe profesionale të drejtuesit të arsimit në qarkun Durrës.

FIER ,  Një ngjarje e rëndë ka ndodhur pasditen e sotme në lagjen “15 Tetori” në Fier, ku një burrë rreth 55-vjeç, me profesion mësues i gjuhës angleze, ka rrezikuar jetën pas rënies nga kati i tretë të pallatit ku banonte.

Sipas informacioneve paraprake, 55-vjeçari ndodhej në banesën e tij së bashku me bashkëshorten, kur për rrethana ende të paqarta ka rënë jashtë ndërtesës, duke mbetur i varur dhe në gjendje tejet të rrezikshme. Situata ka shkaktuar panik te banorët e zonës.

Në vendngjarje kanë mbërritur dy automjete zjarrfikëse, të cilat kanë mundësuar shpëtimin e tij, ndërsa forcat e policisë kanë siguruar perimetrin dhe kanë ndjekur procedurat hetimore.

I lënduari është transportuar me urgjencë në Urgjencën Kirurgjikale të Spitalit të Përgjithshëm të Fierit, ku aktualisht ndodhet jashtë rrezikut për jetën dhe po merr kujdesin e nevojshëm mjekësor. Forcat e policisë ndodhen edhe në ambientet e spitalit për të vijuar hetimet.

Burime bëjnë me dije se 55-vjeçari është baba i dy djemve që jetojnë në Tiranë. Shkaqet dhe rrethanat e ngjarjes mbeten ende nën hetim nga autoritetet.

Policia njofton:
“Rreth orës 17:50, në lagjen “Apollonia”, Fier, shtetasi A. D., 55 vjeç, dyshohet se është vetëhedhur nga kati i tretë i pallatit ku banonte. Aktualisht ndodhet në spital për ndihmë mjekësore, jashtë rrezikut për jetën. Grupi hetimor vijon të jetë në vendngjarje dhe po punon për sqarimin e rrethanave të rastit.”