Një banesë private katërkatëshe është përfshirë nga flakët gjatë natës në zonën e Ujit të Ftohtë në Vlorë. Zjarri ka rënë në katin e dytë, në kuzhinë.

Ngjarja është regjistruar rreth orës 01:30. Sipas dyshimeve të para, mësohet se shkak i zjarrit ka qenë një shkëndijë elektrike.

Në vendngjarje kanë mbërritur menjëherë forcat zjarrfikëse, të cilat kanë bërë të mundur shuarjen e flakëve.

Fatmirësisht nuk ka pasur persona të lënduar, por vetëm dëme materiale të shkaktuara në dy dhoma të banesës.

Tentoi të vidhte një furgon në Vlorë , arrestohet në flagrancë 23-vjeçari nga Kosova.

Gjatë kontrollit fizik iu gjet një armë e ftohtë (thikë), e cila u sekuestrua në cilësinë e provës materiale.

Si rezultat i reagimit të shpejtë dhe punës së pandërprerë për parandalimin dhe zbardhjen e rasteve të vjedhjes, si dhe për kapjen e autorëve të tyre, specialistët e Seksionit për Hetimin e Krimeve në Komisariatin e Policisë Vlorë bënë të mundur arrestimin në flagrancë të shtetasit G. P., 23 vjeç, banues në Pejë, Kosovë.

Ky shtetas u kap më datë 10.03.2026 , rreth orëve të para të mengjesit, në lagjen “24 Maji”, në momentin që po tentonte të vidhte një automjet tip furgon. Ndërhyrja e menjëhershme e shërbimeve të Policisë bëri të mundur kapjen e tij në flagrancë dhe parandalimin e vjedhjes.

Gjatë kontrollit personal, shërbimet e Policisë i gjetën dhe sekuestruan në cilësinë e provës materiale një mjet prerës (thikë).

Nga veprimet hetimore të kryera rezulton se i njëjti shtetas dyshohet të jetë autor edhe i një vjedhjeje tjetër, të ndodhur më datë 06.03.2026, ku është marrë një shumë parash në një lokal në lagjen “10 Korriku”, në qytetin e Vlorës.

Policia vijon punën për dokumentimin e plotë të kësaj ngjarjeje dhe për verifikimin e përfshirjes së këtij shtetasi edhe në raste të tjera vjedhjeje.

Materialet procedurale iu referuan Prokurorisë Vlorë për veprat penale “Vjedhja” dhe “Mbajtja pa leje e armëve të ftohta”.

VLORË- Një e moshuar 85-vjeçare është shpëtuar nga punonjësit e zjarrfikëses pasi ndodhej e vetme në banesën e saj dhe nuk mund të lëvizte.

E moshuara ishte rrëzuar në banesë dhe kërkonte ndihmë, por nuk ishte në gjendje të ngrihej apo të hapte derën e jashtme.

Për shkak të derës së blinduar dhe pamundësisë së 85-vjeçares për ta hapur atë, punonjësit e zjarrfikëses u detyruan të ndërhyjnë nga tarraca e pallatit. Ata zbritën në ballkonin e banesës ku jetonte e moshuara dhe më pas arritën të hapnin derën për të hyrë brenda.

Pas ndërhyrjes, zjarrfikësit i dhanë ndihmën e parë dhe e transportuan 85-vjeçaren në ambientet e Spitalit Rajonal të Vlorës ./abcnews.al/

VLORË- Detaje të reja nga aksioni në Vlorë me urdhër të SPAK. ABC News mëson se është zbardhur vrasja e Gentian Qarrit.

Autoritetet kanë lëshuar disa urdhër-arreste në lidhje me këtë ngjarje.

Urdhër arresti është lëshuar për Inez Hajrullën dhe Ervis Matodashajn, të cilët nuk janë gjetur ende.

Gjithashtu, është lëshuar urdhër arresti për Flodian Plakun, i njohur ndryshe si “Pole Qorri”, për të cilin është vendosur edhe një masë e re sigurie për trafik droge.

Urdhër arresti është lëshuar edhe për një person të arrestuar më herët në Janinë të Greqisë, si dhe për dy persona të arrestuar më parë në Itali.

Në mesin e personave për të cilët është lëshuar urdhër arresti është edhe një ish-efektiv policie.

Sipas hetimeve, në dosje përfshihen gjithashtu edhe disa episode të trafikut të lëndëve narkotike./abcnews.al/

VLORË- Një aksion i befasishëm i forcave speciale është zhvilluar në zonën e Ujit të Ftohtë në Vlorë. Aksioni është zhvilluar me urdhër të SPAK.

Operacioni është realizuar nga efektivët e RENEA-s, dhe FNSH të cilët kanë ndërhyrë në terren në kuadër të një kontrolli të gjerë sigurie.

Sipas informacioneve paraprake, në aksion janë angazhuar rreth 40 efektivë të forcave speciale dhe rreth 10 mjete, përfshirë edhe mjete të blinduara.

Operacioni është monitoruar edhe nga ajri përmes përdorimit të një droni, i cili ka kontrolluar zonën për të ndihmuar në koordinimin e veprimeve në terren.

Deri më tani nuk ka një njoftim zyrtar për objektivin e operacionit apo nëse ka persona të shoqëruar, ndërsa pritet që Policia e Shtetit të japë më shumë detaje në vijim për aksionin e zhvilluar në këtë zonë./abcnews.al/

Një turiste e huaj ka rënë pre e një grabitjeje në zonën e Lungomares në Vlorë.

Sipas informacioneve paraprake nga policia, një person i cili tashmë është identifikuar i ka marrë me forcë varësen e floririt nga qafa turistes dhe më pas është larguar me vrap nga vendngjarja.

Menjëherë pas njoftimit, shërbimet e Policisë kanë mbërritur në zonë dhe kanë nisur kontrollin e territorit për kapjen e autorit.

Ndërkohë, po punohet për arrestimin e të riut dhe dokumentimin e plotë të ngjarjes.

VLORË- Policia e Vlorës ka arrestuar një 21-vjeçar, i cili lëvizte me pistoletë në brez në rrugët e qytetit.

Ai u ndalua në lagjen “28 nëntori” dhe gjatë kontrollit fizik iu gjet në brez, një armë zjarri (pistoletë), e cila u sekuestrua në cilësinë e provës materiale.

I riu u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”./abcnews.al

Një person ka rënë në prangat e policisë pasi ka vjedhur gjatë natës një motomjet, në qytetin e Vlorës.  Policia sekuestroi, në cilësinë e provës materiale, motomjetin e vjedhur.

Materialet procedurale iu referuan Prokurorisë për veprime të mëtejshme, për veprën penale “Vjedhja”.

VLORË– Një aksident ka ndodhur në rrugën Transballkanike në Vlorë.

Një automjet ka përplasur një person, i cili po lëvizte me biçikletë.

I lënduari është dërguar me urgjencë në Spitalin e Vlorës për të marrë ndihmën mjekësore të nevojshme.

Sipas informacioneve të para, i lënduari është në gjendje të rëndë shëndetësore pasi ka marrë plagë në kokë.

Ndërkohë, policia ka shoqëruar drejtuesin e automjetit për veprime të mëtejshme procedurale./abcnews.al

Me nisjen e muajit të shenjtë të Ramazanit, Myftiu i Vlorë Ardit Hoxhllaku ka përcjellë një mesazh urimi dhe reflektimi për të gjithë besimtarët vlonjatë dhe shqiptarë.

Hoxhllaku ka theksuar rëndësinë e këtij muaji të bekuar, duke e cilësuar atë si një periudhë të lehtësimit shpirtëror, begatisë dhe afrimit me Zotin. Sipas tij, Ramazani është muaji i solidaritetit me njëri-tjetrin, i sakrificës, përkushtimit dhe ndihmës ndaj atyre që kanë më shumë nevojë.

Ai ka ftuar besimtarët që ta shfrytëzojnë këtë muaj për reflektim, përmirësim personal dhe forcim të lidhjeve familjare e shoqërore.

Myftiu ka konfirmuar gjithashtu se gjatë këtij muaji, Xhamia e Plumbit do të qëndrojë e hapur për besimtarët për faljet e mbrëmjes. Megjithatë, ai ka theksuar se rikonstruksioni i saj është tashmë një domosdoshmëri.

Xhamia vijon të qëndrojë e mbyllur pas përmbytjeve të tetorit 2024, çka ka krijuar vështirësi për zhvillimin normal të aktiviteteve fetare , ndërsa do te hapet vetëm gjate muajit te ramazanit

Ndërkohë, një mesazh për muajin e Ramazanit ka përcjellë edhe imami i xhamisë, Hajredin Dizdari, i cili ka uruar besimtarët për një agjërim të pranuar, paqe, shëndet dhe harmoni në familjet e tyre.

Besimtarët myslimanë nisin kështu muajin e madhërishëm të Ramazanit prej datës 19 shkurt, duke hyrë në një periudhë të rëndësishme adhurimi, reflektimi dhe përkushtimi shpirtëror.

Një stallë me gjedhë është përfshirë nga flakët në fshatin Armenë të Selenicë, duke shkaktuar dëme të konsiderueshme materiale.

Stalla ishte në pronësi të Bardhosh Haxhirajt, ndërsa nga zjarri janë djegur 22 lopë dhe viça, duke i shkaktuar fermerit një humbje të rëndë ekonomike.

Sipas hetimeve paraprake, dyshohet se zjarri ka rënë si pasojë e një shkëndije elektrike, e cila ka përfshirë fillimisht ambientin e brendshëm të stallës dhe më pas është përhapur me shpejtësi.

Autoritetet po vijojnë verifikimet për të dokumentuar plotësisht rrethanat e ngjarjes./abcnews.al

Policia e Vlorës ka parandaluar një ngjarje të mundshme kriminale.

Mësohet se më datë 08.02.2026, policia e Vlorës ka ushtruar kontrolle të imtësishme në aksin rrugor dhe në territorin e fshatit Babicë e Madhe për dy automjete.

Si rezultat i kontrolleve, shërbimet e Policisë kanë konstatuar të fshehura në një sipërfaqe ullishteje, në fshatin Babicë e Madhe, dy automjete të dyshuara të vjedhura, konkretisht:

-një automjet tip “Nissan”, me targa të huaja;

-një automjet tip “Audi Q5”, me targa të huaja; si dhe 3 bidona me lëndë djegëse (benzinë).

Nga veprimet e para hetimore rezulton këto automjete do të përdoreshin për kryerjen e një ngjarjeje të rëndë kriminale.

Automjetet dhe provat e tjera të sekuestruara po i nënshtrohen ekzaminimeve shkencore.

Grupi i posaçëm hetimor i DVP Vlorë, nën drejtimin e Prokurorisë, vijon punën për sqarimin e plotë të rrethanave si dhe për identifikimin dhe dokumentimin e autorësisë.

VLORË- Një aksident është regjistruar pak momente më parë në zonën e Lungomares në Vlorë, ku një motor elektrik është përplasur me një automjet.

Si pasojë e përplasjes, drejtuesi i motorit elektrik ka mbetur i plagosur dhe është transportuar menjëherë me ambulancë drejt Spitalit Rajonal të Vlorës për ndihmë mjekësore.

Në vendngjarje kanë mbërritur shërbimet e policisë, të cilat po punojnë për zbardhjen e rrethanave të aksidentit./abcnews.al

Në banesën e shtetasit 68 vjeç, në pjesën e ballkonit ka rënë zjarr pasi ka plasur një bombol gazi. Ngjarja ka ndodhur në lagjen “Uji i Ftohtë”, në Vlorë.

Me ndërhyrjen e zjarrfikësve, zjarri u fik. Nga verifikimet e para nuk ka persona të lënduar, vetëm dëme materiale.

Grupi hetimor, nën drejtimin e Prokurorisë, po vijon punën për sqarimin e rrethanave, përcaktimin e shkakut të rënies së zjarrit, si dhe për dokumentimin e plotë të rastit.

Një automjet është përfshirë nga flakët mbrëmjen e sotme në zonën e Ujit të Ftohtë, pranë vendit të njohur si “Te Rrapi”.

Sipas informacioneve paraprake, zjarri ka shpërthyer papritur, ndërsa flakët kanë shkrumbuar një pjesë të madhe të mjetit.

Ende nuk dihen shkaqet e ngjarjes, teksa dyshimet e para janë për një shkëndijë elektrike në automjet, ndërsa fatmirësisht nuk raportohet për persona të lënduar.

Autoritetet pritet të zbardhin rrethanat e plota të incidentit./abcnews.al

Një sherr ka ndodhur mes dy personave në Vlorë. Sipas policisë gjatë një konflikti që ka nisur për motive të dobëta, 41-vjeçari ka goditur me grushte dhe sende të forta një shtetas 48-vjeç.

48-vjeçari, pas plagëve të marra, po merr trajtim mjekim në Spitalin e Traumës.

Ndërkohë autori 41-vjeçar është arrestuar nga policia.

Materialet procedurale iu referuan Prokurorisë së Vlorës dhe të Sarandës, për veprime të mëtejshme.

Tregtonin në Vlorë, mallra që dyshohet se i kontrabandonin nga Italia, vihet në pranga 53-vjeçari, procedohet penalisht djali i tij. 53-vjeçari u kap në flagrancë duke transportuar medikamente mjekësore të dyshuara të kontrabanduara nga Italia.

Vijojnë hetimet për dokumentimin e veprimtarisë kriminale të këtyre shtetasve dhe identifikimin e shtetasve të tjerë që mund të jenë të përfshirë.

Materialet procedurale iu referuan Prokurorisë së Vlorës, për veprime të mëtejshme.

Një aksident ka ndodhur në Vlorë. Një kamionçinë ka dalë nga rruga duke goditur barrierat dhe më pas ka rënë nga lartësia duke përfunduar në afërsi të bregut.

Si pasoje është dëmtuar rëndë drejtuesi i mjetit. Efektivë të policisë kanë ndërhyrë menjëherë për t’i ardhur në ndihmë të lënduarit, i cili është dërguar me urgjence drejt spitalit rajonal të qytetit të Vlorës.

/abcnews.al/

TIRANË– Kryeministri i vendit Edi Rama në podkastin e përjavshëm “Falasim” iu dha përgjigje akuzave për zhvendosjen e zyrës së Kadastrës së Vlorës, në Tiranë.

Sipas Ramës, zhvendosja e zyrës në kryeqytet nuk cenon shërbimin ndaj qytetarëve.

Ai u shpreh se synimi i qeverisë është që institucioni i Kadastrës të jetë tërësisht e digjitalizuar, ku qytetarët do mund të aplikojnë online pa pasur nevojë të ënden zyrave të tjera, siç ka ndodhur deri tani.

Më tej, Rama u shpreh se rasti i zhvendosjes së Kadastrës nuk do jetë i vetëm, por paralajmëroi se të njëjtin fat do kenë edhe disa drejtori të tjera.

“Dy fjalë për zhvendosjen e zyrës së Kadastrës së Vlorës në Tiranë. Dhe janë dy fjalë që duhen thënë, sepse edhe një herë tjetër u ngatërrua qëllimisht ose më falni idiotësisht, adresa fizike e zyrës me shërbimin për qytetarët.

Agjencia Shtetërore e Kadastrës, ka kaluar prej kohësh nga një model shërbimi primitiv me sportele, radha, ecejake, zvarritje etj, etj, në një model shërbimesh online, ende i pambyllur plotësisht në të gjithë ciklin e vet, por gjithsesi përmes platformës, e-Albania, ky model mundëson që shumica e procedurave kadastrale, nuk kanë nevojë për paraqitjen fizikisht në një sportel të qytetarit. Kartela pasurie, vërtetime, regjistrime aktesh, kontratash, rivlerësime, të gjithë aplikohen dhe ndiqen online nga kudo, ku ndodhet qytetari, edhe nga Amerika.

Tani, gjithë kjo zhurmë dhe ky tension që u ndje në atë lëvizje, lidhet, jo vetëm me një perceptim të gabuar apo edhe informim të mangët, por edhe me një mendësi, e cila duhet përmbysur dhe duhet përmbysur, duke pasur parasysh që e nesërmja e afërt, jo e largët e Kadastrës, është një shërbim si plot shërbime të tjera, pa sportele, pa godina fizike të shpërndara në territor, por me akses në çdo shërbim, si një e drejtë themelore dhe një e drejtë që merret përmes celularit, që merret përmes kompjuterit më të afërt dhe që nuk ka asnjë lidhje me vendodhjen e zyrës.

Ky, nuk është i pari si veprim për zhvendosjen e një drejtorie vendore në qendër dhe nuk është as i fundit. Të tjera drejtori do të zhvendosen dhe ndërkohë, ajo që po punojmë për ditë pa pushim është që të sigurojmë mbylljen e ciklit, pra, jo më aplikim online dhe pastaj marrje mbrapsht të shërbimit me postë, por aplikim online dhe marrja e shërbimit menjëherë po aty online.”, tha Rama.

Një 85 vjecar është gjetur i vdekur orët e para të mëngjesit në banesën e tij në Vlorë. Ngjarja është shënuar rreth orës 02:50, në fshatin Lapardha.

Nga veprimet e para hetimore dyshohet se ka humbur jetën si pasojë e asfiksisë nga tymi, i shkaktuar nga një zjarr aksidental i rënë në banesën e tij.

Njoftimi i policisë:

Sot, rreth orës 02:50, në fshatin Lapardha, Selenicë, është gjetur në banesë nga familjarët, i pajetë shtetasi K. A., 85 vjeç. Nga veprimet e para hetimore dyshohet se ka humbur jetën si pasojë e asfiksisë nga tymi, i shkaktuar nga një zjarr aksidental i rënë në banesën e tij.