Presidenti francez Emmanuel Macron njoftoi se Franca do t’i dërgojë Kievit raketa të reja interceptuese pas një sulmi të madh rus në një qendër tregtare në Krivyi Rih në Ukrainën qendrore.

Autoritetet ukrainase thanë se Rusia nisi dy valë sulmesh me dronë në qytet të premten, duke vrarë të paktën 16 persona dhe duke plagosur 130 të tjerë, përfshirë 23 fëmijë.

Sulmi në qytetin e lindjes së Presidentit ukrainas Volodymyr Zelensky ka shkaktuar dënim nga figura të rëndësishme në të gjithë Evropën, me Kaja Kallas, diplomaten më të lartë të BE-së, e cila e quajti atë “terror me qëllim”.

Macron tha se kishte folur me Zelenskyn pas “sulmit të dyfishtë” gjatë ditës në Kryvyi Rih dhe se ai kishte shprehur “tmerrin” dhe “shqetësimin e thellë” për incidentin.

“Është thelbësore t’i sigurohen Ukrainës të gjitha mjetet e nevojshme për të mbrojtur hapësirën e saj ajrore dhe për të penguar këtë agresion”, deklaroi ai, duke shtuar se e kishte informuar Zelenskyn për “mbështetjen në rritje të Parisit, përfshirë vendosjen e raketave interceptuese”.

“Ne gjithashtu duhet të vazhdojmë të rrisim presionin mbi Rusinë për sa kohë që ajo zgjedh të refuzojë të ndalojë luftimet dhe të bëjë paqe”, shtoi ai.

Zelensky njoftoi se dyshja kishin folur për gati dy orë, për nevojat e mbrojtjes ajrore të Ukrainës, financimin dhe komunikimet me Uashingtonin, ndër të tjera.

“Ne ramë dakord të përshpejtojmë dorëzimin e pajisjeve dhe raketave më të fundit franceze. Faleminderit që konfirmuat gatishmërinë tuaj për të dhënë licenca për prodhimin e raketave”, tha ai.

The post Macron i del në krah Zelenskyt, Franca do t’i dërgojë Ukrainës raketa të reja interceptuese pas sulmit rus appeared first on Euronews Albania.

Një seri letrash personale të asistentes së Donald Trumpit, Natalie Harp, drejtuar presidentit amerikan kanë shkaktuar debate në Shtëpinë e Bardhë, për shkak të tonit tepër intim dhe emocional që përdoret në korrespondencë.

Në letrat e saj, Harp i drejtohet Trumpit me shprehje si “Për mua, vetëm ti ke rëndësi” dhe “Nuk duhet të flasim gjithmonë për punën!”, ndërsa në një tjetër letër i shkruan se dëshiron të jetë pranë tij dhe të bisedojnë “për gjithçka dhe për asgjë”.

Në një prej mesazheve, ajo i kërkon presidentit që ta kritikojë kur gabon.

“Të lutem, kur të gaboj, a do të ma thuash? Ke të drejtë të më qortosh ashpër, nëse është e nevojshme, kur e meritoj, sepse askush nuk më njeh ose nuk më intereson më shumë se ti”, shkruan Harp.
Letrat janë shkruar gjatë ose menjëherë pas udhëtimit të Trumpit në pronat e tij në Aberdeen dhe Turnberry në Skoci dhe Doonbeg në Irlandë, në maj të vitit 2023.

Korrespondenca u publikua në formë të plotë nga “Daily Beast”. Disa prej citimeve ishin bërë më herët publike nga komentatori Michael Wolff, i cili i kishte përfshirë në një libër mbi rizgjedhjen e Trumpit.
Harp është një prej ndihmëseve më të afërta të presidentit dhe ka fituar një rol të rëndësishëm në rrethin e tij. Ajo është përgjegjëse për printimin e materialeve që Trump lexon dhe gjithashtu shkruan një pjesë të postimeve të tij në rrjetin social “Truth Social”.

Publikimi i letrave ka rikthyer vëmendjen te ndikimi që Harp ushtron në rrethin e presidentit. Sipas Wolff, dokumentet iu dorëzuan nga burime brenda fushatës së Trumpit, të cilat ishin të shqetësuara për afërsinë e saj me presidentin.

“Nuk është një marrëdhënie që duhet të ekzistojë në një kontekst profesional”, është shprehur Wolff në podkastin e tij.

Zëdhënësi i Shtëpisë së Bardhë, Davis Ingle, e ka mbrojtur Harpin, duke e cilësuar atë si një prej ndihmëseve më besnike dhe më të përkushtuara të Trumpit. Ai i ka cilësuar raportimet kritike ndaj presidentit dhe administratës së tij si pjesë të “lajmeve të rreme”.

Debati u përshkallëzua pasi senatori demokrat Jon Ossoff bëri një koment të pahijshëm duke iu referuar asaj që ai e përshkroi si “udhëtimi me Natalie”. Shtëpia e Bardhë reagoi duke e sulmuar ashpër senatorin demokrat dhe duke e cilësuar atë si “të rrezikshëm”.

Roli i Harpit në Shtëpinë e Bardhë ka qenë në qendër të polemikave edhe më parë. Ajo ka pasur për një periudhë të gjatë probleme me marrjen e miratimit nga shërbimet sekrete për të kaluarën e saj, një procedurë e rëndësishme për personat që kanë akses në materiale të lidhura me sigurinë kombëtare.

Megjithatë, shqetësimi kryesor brenda Shtëpisë së Bardhë lidhet me ndikimin e saj te presidenti. Sipas raportimeve, Harp ka mundësi të vendosë se cilat materiale i paraqiten Trumpit dhe cilat jo, duke i dhënë asaj një rol të rëndësishëm në përcaktimin e informacionit që arrin te presidenti.
Ndërkohë, publikimi i letrave nuk ka sjellë deri tani prova për një marrëdhënie romantike mes Trumpit dhe Harpit. Krahasimet me skandalin e Bill Clintonit dhe Monica Lewinskyt janë hedhur poshtë si të pabazuara në mungesë të provave të tjera.

Në mes të kësaj polemike, Melania Trump është shfaqur publikisht pranë bashkëshortit të saj. Ajo u pa duke i mbajtur dorën Trumpit gjatë një aktiviteti në Shtëpinë e Bardhë, ku mori pjesë në prezantimin e një nisme bamirësie me një donacion prej 2 milionë dollarësh.

“Dëgjova se ju mungova. Ja ku jam. Ja ku jam! Mirë se vini në Shtëpinë e Bardhë”, tha Melania Trump gjatë aktivitetit.

The post “Për mua, vetëm ti ke rëndësi”, letrat intime të asistentes së Trumpit ndezin polemika në Shtëpinë e Bardhë appeared first on Euronews Albania.

Vatikani do të ndërtojë një termocentral me energji të rinovueshme me vlerë rreth 100 milionë euro që mund të furnizojë me energji Selinë e Shenjtë brenda dy viteve nëpërmjet një sistemi që kombinon energjinë diellore dhe bujqësinë.

Burime thanë për Reuters se ferma agrovoltaike pritet të ketë një kapacitet prej 80 deri në 90 megavatësh, duke e bërë atë një nga instalimet më të mëdha të tilla në Itali.

Në termocentrale të tilla, panelet diellore janë montuar disa metra mbi tokë në mënyrë që të korrat të mund të rriten poshtë tyre, me hijen që ndihmon në uljen e avullimit dhe mbrojtjen e bimëve nga moti ekstrem.

Një komision i përbashkët italiano-vatikan u takua më parë këtë muaj për të nisur projektin në pronën Santa Maria di Galeria, në pronësi të Vatikanit, në periferinë veriperëndimore të Romës. Burimet thanë për Reuters se termocentrali mund të përfundojë brenda 18 deri në 24 muajve.

Qyteti i Vatikanit, selia e Kishës Katolike globale dhe shtëpia e Bazilikës së Shën Pjetrit, është vendi më i vogël në botë, me 108 hektarë toke, dhe strehon më pak se 900 banorë.

Projekti pritet të furnizojë me energji stacionin e transmetimit të Radio Vatikanit dhe energjia mund të përdoret gjithashtu nga pronat e lidhura me Selinë e Shenjtë, përfshirë spitalin Bambino Gesù të Romës. Energjia elektrike e tepërt do t’i vihet në dispozicion Italisë.

Projekti ishte një përparësi për të ndjerin Papa Françeskun, papa i parë që pranoi konsensusin shkencor mbi ndryshimet klimatike, dhe është miratuar nga Papa Leoni XIV.

The post Vatikani investon 100 milionë euro për energji të gjelbër appeared first on Euronews Albania.

Një gjykatë federale e Shteteve të Bashkuara ka rrëzuar vendimin e qeverisë amerikane për bllokimin e vizave për shtetasit nga 75 vende, një masë që synonte të kufizonte vendosjen e tyre në SHBA për një kohë të pacaktuar. Vendimi, i marrë nga gjyqtarja Jeannette A. Vargas në Distriktin Jugor të Nju Jorkut, përfaqëson një goditje të rëndësishme ndaj politikave të imigracionit të administratës së Presidentit Donald Trump.

Politika, e cila kishte hyrë në fuqi në janar dhe pezullonte përpunimin e vizave për afërsisht 40% të vendeve të botës—përfshirë Shqipërinë, Kosovën dhe Maqedoninë e Veriut—bazohej në pretendimin e administratës se migrantët mund të ktheheshin në një “barrë ekonomike për amerikanët”.

Në atë kohë, Departamenti i Shtetit argumentoi se masa ishte e domosdoshme:

“Për të siguruar që emigrantët nga vendet me rrezik të lartë të mos përdorin në mënyrë të paligjshme ndihmën sociale në Shtetet e Bashkuara ose të mos bëhen barrë publike.”

Megjithatë, në vendimin e saj, gjyqtarja Vargas hodhi poshtë këtë arsyetim, duke e cilësuar masën bllokuese si: “Në kundërshtim me ligjin.”

Sipas vendimit të gjykatës, Sekretari i Shtetit, Marco Rubio, kishte tejkaluar “autoritetin e tij statutor dhe rregullator” gjatë lëshimit të këtij udhëzimi. Gjykata konstatoi se ndalimi shkel Seksionin 1152(a)(1)(A) të Aktit të Imigracionit dhe Kombësisë të vitit 1965, i cili ndalon në mënyrë të qartë diskriminimin bazuar në kombësi gjatë procesit të lëshimit të vizave.

Gjyqtarja theksoi se zyrtarët konsullorë ishin udhëzuar gabimisht të refuzonin aplikimet bazuar ekskluzivisht në vendin e origjinës, edhe në rastet kur kualifikimet individuale të aplikantëve ishin të përshtatshme.

Me këtë vendim, gjykata ka shfuqizuar dhe anuluar çdo refuzim vize të bazuar vetëm në këtë politikë dhe ka urdhëruar Departamentin e Shtetit të rikthejë vlerësimin e ligjshëm, rast pas rasti, për të gjitha aplikimet. Masa përbën një pengesë ligjore për qeverinë, e cila megjithatë ruan të drejtën për ta apeluar vendimin, në një kohë kur Shtëpia e Bardhë ka ndërmarrë një sërë veprimesh për përshpejtimin e deportimeve dhe uljen e kalimeve kufitare.

Lista e plotë e 75 shteteve të prekura nga pezullimi i vizave

(Lista e mëposhtme përfshin vendet për të cilat Departamenti i Shtetit kishte pezulluar lëshimin e vizave imigruese, vendim tashmë i rrëzuar dhe i urdhëruar për rishqyrtim nga Gjykata Federale e Nju Jorkut):

A – B: Afganistan, Shqipëri, Algjeri, Antigua dhe Barbuda, Armeni, Azerbajxhan, Bahamas, Bangladesh, Barbados, Bjellorusi, Belize, Butan, Bosnje dhe Hercegovinë, Brazil, Burma.

K – E: Kamboxhia, Kamerun, Kepi i Gjelbër, Kolumbi, Bregu i Fildishtë, Kubë, Republika Demokratike e Kongos, Dominikë, Egjipt, Eritrea, Etiopi.

F – L: Fixhi, Gambia, Gjeorgji, Gana, Grenada, Guatemala, Guinea, Haiti, Iran, Irak, Xhamajka, Jordani, Kazakistan, Kosovë, Kuvajt, Kirgistan, Laos, Liban, Liberi, Libi.

M – R: Maqedonia e Veriut, Moldavi, Mongoli, Mali i Zi, Marok, Nepal, Nikaragua, Nigeri, Pakistan, Republika e Kongos, Rusi, Ruanda.

S – Z: Shën Kits dhe Nevis, Shën Luçia, Shën Vincenti dhe Grenadinet, Senegal, Sierra Leone, Somali, Sudani i Jugut, Sudan, Siri, Tanzani, Tajlandë, Togo, Tunizi, Ugandë, Uruguai, Uzbekistan, Jemen.

The post Gjykata amerikane rrëzon bllokimin e vizave për 75 shtete, mes tyre Shqipëria appeared first on Euronews Albania.

Ministri i Jashtëm i Ukrainës ka pritur sot homologun e tij gjerman dhe tha se vizita e tij vjen në një “moment të rëndësishëm”.

Andrii Sybiha tha se e informoi Johann Wadephul mbi situatën në fushën e betejës dhe pasojat e sulmeve të fundit të Rusisë.

“Ne diskutuam përpjekjet e vazhdueshme për paqe dhe hapat e nevojshëm për të çuar përpara një paqe të drejtë dhe të qëndrueshme të mbështetur nga garanci të besueshme sigurie”, tha ai. 

“Ndërsa diplomacia vazhdon, Rusia vazhdon terrorin e saj me raketa dhe dronë. Ky realitet duhet të formësojë vendimet tona.”

The post Ukraina dhe Gjermania diskutojnë prodhimin dhe investimet e përbashkëta në mbrojtje appeared first on Euronews Albania.

Ushtria iraniane ka njoftuar një ndryshim të rëndësishëm në doktrinën e saj ushtarake, duke kaluar gradualisht nga një qasje mbrojtëse në një strategji më sulmuese, pas mësimeve të nxjerra nga konfliktet e fundit.

Gjeneral brigade Mohammad Akraminia, zëdhënës i ushtrisë iraniane, deklaroi për agjencinë shtetërore IRNA se ky ndryshim është zhvilluar gjatë asaj që ai i cilësoi si luftërat 12-ditore dhe 40-ditore.

Sipas tij, ndryshimi është reflektuar në reagime më të shpejta dhe më të gjera ndaj sulmeve, si dhe në përdorimin e operacioneve parandaluese.

Akraminia bëri gjithashtu një deklaratë të fortë lidhur me një ndërhyrje të mundshme tokësore amerikane në Iran. Ai tha se ushtria ka hartuar një plan që parashikon shpërblime për vrasjen ose kapjen e trupave amerikane që do të hynin në territorin iranian.

Sipas planit, pjesëtarët e forcave të armatosura apo civilët që posedojnë ligjërisht armë gjuetie do të përfitonin 5 miliardë tomanë, rreth 26 mijë dollarë, për vrasjen ose kapjen e një ushtari amerikan. Shpërblimi, sipas tij, do të dyfishohej në 10 miliardë tomanë, rreth 53 mijë dollarë, nëse veprimi do të kryhej nga një grua.

Zëdhënësi iranian shtoi se ushtria do të blinte gjithashtu armën e përdorur për dyfishin e vlerës së saj dhe do ta ekspozonte në një muze ushtarak së bashku me emrin e pronarit. Personit do t’i sigurohej edhe një armë e ngjashme zëvendësuese.

Akraminia pretendoi më tej se ndikimi i Shteteve të Bashkuara në Lindjen e Mesme ka pësuar rënie të ndjeshme. Ai iu referua një mekanizmi të ri mbrojtjeje dhe sigurie të krijuar, sipas tij, nga Arabia Saudite, Turqia dhe Pakistani, pa pjesëmarrjen e Washingtonit.

Sipas zyrtarit iranian, pavarësisht se sa efektiv do të jetë ky mekanizëm në të ardhmen, krijimi i tij tregon atë që ai e konsideron si dobësim të pozitës amerikane në rajon.

The post Irani ndryshon doktrinën ushtarake: Nga mbrojtëse në sulmuese, shpërblime për kapjen e trupave amerikane appeared first on Euronews Albania.

Kryeministri në detyrë i Kosovës, Albin Kurti, tha se institucionet e vendit janë në komunikim të vazhdueshëm me KFOR-in për hapjen e plotë të urës kryesore mbi lumin Ibër dhe “marrjen tërësisht nën kontroll” të saj nga Policia e Kosovës.

“Jemi në komunikim të përditshëm, qoftë Kryeministria, qoftë Ministria e Punëve të Brendshme, në mënyrë që gjithçka të shkojë në mënyrë të qetë dhe paqësore”, tha Kurti, gjatë një konference për media më 22 gusht, kur u pyet se kur pritet të hapet ura kryesore në Mitrovicë.

Ai tha se pasditen e së shtunës do të ketë një takim me komandantin e KFOR-it, Ozgan Ulutash, teksa e cilësoi si “absurde” që ura të vazhdojë të jetë e mbyllur.

“Duhet të përkujtojmë që pas ndërtimit të urave të reja është bërë absurde që ajo urë të mbahet e mbyllur dhe fakti që qytetarët kanë qarkulluar lirshëm nëpër këto urat e reja dhe nuk ka shtim as të incidenteve as të tensioneve, tregon që qarkullimi i njerëzve dhe mallrave, liria gjithnjë më e madhe e lëvizjes është e dobishme jo vetëm për ekonominë, por edhe për paqen dhe sigurinë”, theksoi Kurti.

Ura kryesore mbi Ibër është e hapur për këmbësorë, por jo edhe për qarkullimin e automjeteve.

Që nga përfundimi i luftës, misioni paqeruajtës i NATO-s në Kosovë, KFOR, e ka mbajtur nën mbikëqyrje urën, e cila ndër vite ka qenë pikë e përplasjeve ndëretnike.

Megjithatë, së voni KFOR-i ka njoftuar për nisjen e tërheqjes graduale nga ura, pas përmirësimit të situatës së sigurisë, gjë që ka zemëruar Serbinë.

Komentet e Kurtit vijnë pasi një zyrtar i NATO-s i tha më 20 gusht Radios Evropa e Lirë se çdo vendim për rihapjen e mundshme e kësaj ure për qarkullimin e veturave, duhet të “adresojë nevojat e të gjitha komuniteteve lokale”.

“KFOR-i po ashtu vazhdon të ofrojë mbështetjen e nevojshme të sigurisë në mënyrë që përpjekjet diplomatike të Bashkimit Evropian të mund të lëvizin përpara”, tha zyrtari i NATO-s.

Serbia ka kundërshtuar planet e KFOR-it për reduktimin e pranisë mbi këtë urë. Presidenti serb, Aleksandar Vuçiq, i është drejtuar me një letër shefit të NATO-s, Mark Rutte, duke i kërkuar që ky proces të ndalet.

“Sapo i dërgova një letër sekretarit të përgjithshëm të NATO-s, Mark Rutte, dhe kërkova që KFOR-i, në përputhje me Rezolutën 1244 të OKB-së, të ndalë terrorin ndaj serbëve, përndjekjen dhe arrestimet e tyre, rrënimin e shtëpive, si dhe hapjen e urës mbi Ibër”, shkroi Vuçiq në Instagram më 20 gusht.

Sipas Vuçiqit, tërheqja e KFOR-it nga ura në këtë moment do të “krijonte kushte për një përballje përfundimtare me popullsinë serbe” në veri të Kosovës.

Por, ministri në detyrë i Mbrojtjes, Ejup Maqedonci, tha e përpjekjet e Serbisë për ta paraqitur optimin e pranisë së KFOR-it si “kërcënim për komunitetin serb” apo si dëshmi se situata në Kosovë është e paqëndrueshme, “nuk përputhen me realitetin në terren”.

Ai e akuzoi Serbinë se po përpiqet të zhvendos vëmendjen lidhur me gjetjen e varrezave masive në veriun e Kosovës, zbulimin e armatimit afër lokacioneve ku u gjetën mbetje mortore dhe veprimeve të Kosovës kundër rrjeteve të dyshuara të inteligjencës së Serbisë dhe aktiviteteve subersive kundër Kosovës.

“Ky është një proces [procesi i optimizimit të KFOR-it] i bazuar në vlerësime profesionale të situatës në terren dhe nuk paraqet zvogëlim të sigurisë për asnjë qytetar apo komunitet në Kosovë”, tha Maqedonci.

Tërheqja graduale e trupave të NATO-s nga ura është pjesë e procesit të optimizimit të pozicionimit të KFOR-it, i cili po zhvillohet me transparencë të plotë, tha zyrtari i aleancës, duke shtuar se ky proces mund të zhbëhet, varësisht nga situata e sigurisë.

“KFOR-i do të ketë prani të dukshme në Mitrovicë të Veriut dhe të Jugut si dhe në veriun e Kosovës dhe vazhdon të kontribuojë që të ketë mjedis të sigurt për të gjithë”, tha zyrtari i NATO-s në një përgjigje për REL-in.

Qeveria e Kosovës kishte paralajmëruar në korrik të vitit 2024 hapjen e urës kryesore mbi Ibër edhe për qarkullimin e automjeteve, një nismë që shkaktoi tensione dhe reagime nga bashkësia ndërkombëtare.

Ndërkohë, ekzekutivi kosovar ka ndërtuar edhe dy ura të tjera pranë urës kryesore – një për këmbësorë dhe një për automjete – me synimin për të lidhur Mitrovicën e Veriut me Mitrovicën e Jugut.

Ura kryesore mbi lumin Ibër konsiderohet një nga pikat më të ndjeshme në aspektin e sigurisë në veri të Kosovës./REL

The post Kurti paralajmëron hapjen e urës së Ibrit: Është absurde të mbahet e mbyllur appeared first on Euronews Albania.

NASA tregon përmasat e valës së të nxehtit që ka përfshirë Evropën gjatë muajve të fundit.

Pamjet, të përpunuara nga të dhënat satelitore, paraqesin temperaturat maksimale të regjistruara në kontinent nga 1 maji deri më 19 gusht, duke treguar qartë shtrirjen dhe intensitetin e të nxehtit.

Sipas NASA-s, Evropa Perëndimore është përballur me pesë valë të të nxehtit deri në mesin e gushtit, ndërsa në disa vende temperaturat kanë kaluar 40 gradë Celsius.

Nxehtësia ekstreme ka thyer rekorde temperaturash dhe, në shumë raste, ka zgjatur për ditë ose edhe javë të tëra. Temperaturat e larta gjatë natës kanë shtuar më tej rrezikun për shëndetin e njerëzve.

Pasojat janë ndjerë në disa vende të Evropës, me rritje të shtrimeve në spitale dhe vdekjeve, ndërsa temperaturat ekstreme kanë ndikuar edhe në infrastrukturë, bujqësi, transport dhe furnizimin me ujë e energji.

Raportet paraprake sugjerojnë se vala e të nxehtit mund të jetë lidhur me rreth 10 mijë vdekje të shtuara, kryesisht në Mbretërinë e Bashkuar, Francë, Gjermani dhe Belgjikë.

Ekspertët paralajmërojnë se, për shkak të ndryshimeve klimatike, valët ekstreme të të nxehtit pritet të bëhen më të shpeshta dhe më intensive, veçanërisht në Evropën Jugore.

NASA, përmes këtyre pamjeve, tregon në mënyrë vizuale se si temperaturat ekstreme kanë prekur kontinentin gjatë kësaj vere.

The post NASA: 5 valë të nxehtit ekstrem, rreth 10 mijë vdekje në Europë nga temperaturat rekord appeared first on Euronews Albania.

Një vendim i fundit i drejtësisë britanike mund të ndryshojë mënyrën se si autoritetet e Mbretërisë së Bashkuar trajtojnë rastet e shqiptarëve të identifikuar si viktima të trafikimit. Gjykata ka paralajmëruar se kthimi i disa prej tyre në Shqipëri mund t’i ekspozojë ndaj rrezikut të dhunës, ri-trafikimit dhe shfrytëzimit nga rrjetet kriminale.

Shqiptarët janë ndër kombësitë më të prekura nga dëbimet në Britani gjatë viteve të fundit. Në të njëjtën kohë, të dhënat tregojnë një rritje të fortë të numrit të meshkujve shqiptarë të identifikuar si viktima trafikimi.

Në vitin 2022, rreth 4,017 meshkuj shqiptarë iu referuan shërbimeve britanike për dyshime mbi trafikimin, krahas 502 femrave. Një vit më vonë, u regjistruan 3,463 meshkuj dhe 588 femra.

Ndryshimi i profilit të viktimave është një nga elementet që ka marrë vëmendje në këtë çështje. Në të kaluarën, viktimat shqiptare ishin kryesisht gra të trafikuara për shfrytëzim seksual. Sot, një pjesë e konsiderueshme e rasteve lidhet me djem dhe të rinj që detyrohen të punojnë në trafikun e drogës apo në kultivimin e kanabisit.

Rasti që mbërriti në gjykatë

Çështja u ngrit nga një 21-vjeçar shqiptar, i cili ishte trafikuar që në moshën 16-vjeçare. I riu kishte udhëtuar drejt Belgjikës me të atin, ku përfundoi nën kontrollin e një grupi kriminal shqiptar. Më pas, ai iu shit një tjetër rrjeti, i cili e çoi në Britani dhe e detyroi të punonte në kultivimin e kanabisit.

Pas arratisjes, i riu u njoh zyrtarisht nga autoritetet britanike si viktimë e trafikimit.

Rasti i tij ka shtyrë gjykatën të vendosë udhëzime të reja mbi mënyrën se si duhet vlerësuar situata në Shqipëri përpara se Home Office të marrë vendime për kthimin e viktimave meshkuj.

Shqetësimi kryesor: ri-trafikimi

Në vlerësimin e saj, gjykata ka evidentuar disa probleme që mund ta bëjnë kthimin e viktimave veçanërisht të rrezikshëm. Mes tyre përmendet mungesa e strehimoreve të posaçme për burrat e rritur që kanë qenë viktima të trafikimit.

Gjykata ka ngritur gjithashtu shqetësimin se personat e trafikuar mund të bien sërish në duart e rrjeteve kriminale pas kthimit në Shqipëri. Edhe pse vendi ka bërë përparim në luftën kundër korrupsionit, gjykata vlerëson se ky fenomen mbetet i përhapur.

Për disa prej viktimave, kërcënimi nuk përfundon me arratisjen nga trafikantët. Organizatat që trajtojnë këto raste kanë raportuar përdorimin e dhunës fizike, kërcënimeve dhe shantazhit për të ruajtur kontrollin mbi të rinjtë.

Në rastet e të miturve, trafikantët thuhet se kanë përdorur edhe video të abuzimit seksual si mjet kërcënimi, duke paralajmëruar publikimin e tyre në rrjetet sociale. Në raste të tjera, viktimave u janë treguar video ose materiale që lidhen me familjarët e tyre në Shqipëri, për t’u bërë të qartë se trafikantët dinë ku ndodhen dhe kush janë të afërmit e tyre.

Raportohen gjithashtu raste të dhunës së rëndë fizike ndaj të miturve dhe të rinjve, përfshirë dëmtime serioze dhe thyerje kockash.

Vendimi i gjykatës nuk nënkupton ndalimin automatik të deportimeve, por vendos një standard të ri vlerësimi për rastet e viktimave meshkuj të trafikimit. Për Home Office, çdo vendim për kthimin e tyre duhet të marrë parasysh jo vetëm statusin e viktimës, por edhe rrezikun konkret që mund ta presë atë pas kthimit në Shqipëri.

The post Vendimi i gjykatës britanike mund të frenojë deportimin e viktimave shqiptare të trafikimit appeared first on Euronews Albania.

Kryeministri Edi Rama ka reaguar pas mbërritjes në Vlorë të delegacionit të Global Sumud Flotilla, i cili kishte deklaruar se do të “shpëtonte” Sazanin.

Rama ka shpërndarë videon e drejtoreshës së Agjencisë Kombëtare të Turizmit, Jola Hysaj, e cila deklaroi se delegacionit iu ofrua mundësia të vizitonte ishullin e Sazanit dhe të merrte informacion zyrtar, por anëtarët e tij refuzuan.

“Ehhhhh… këta revolucionarët e rrenave i ikin të vërtetës si djalli temianit, po ndërkohë çoroditën dynjanë me marrëzitë e tyre.Gjithësesi, një kompliment Agjencisë Kombëtare të Turizmit dhe Ministrisë së Kulturës e Turizmit për “pritën” e bukur që u bënë çlirimtarëve të Sazanit”, shkroi Rama.

Më tej, kryeministri vlerësoi Agjencinë Kombëtare të Turizmit dhe Ministrinë e Kulturës e Turizmit për “pritën” që iu bë delegacionit.

The post Rama reagon pas mbërritjes së Global Sumud Flotilla: Këta revolucionarët e rrenave, çoroditën dynjanë appeared first on Euronews Albania.

Presidenti rus Vladimir Putin thotë se Kievi ndodhet në një situatë të vështirë ndaj edhe sipas tij po kryejnë sulme barbare.

“Sa më e vështirë bëhet situata për armikun, aq më barbare bëhen sulmet e regjimit të Kievit”, tha Vladimir Putin . Këto sulme demonstrojnë thelbin banderit (pasues i udhëheqësit ultranacionalist ukrainas Stepan Bandera), neo-nazist dhe rusofob të forcës kundër së cilës po luftojmë. I gjithë komuniteti civil qëndron me burrat tanë në uniformë”, tha Putin.

The post Putin: Kievi është në një situatë të vështirë dhe për këtë arsye po kryen sulme barbare appeared first on Euronews Albania.

Ministri për Europën dhe Punët e Jashtme, Ferit Hoxha, priti sot në Tiranë, drejtuesit e institucioneve dhe të zgjedhurit shqiptarë në Luginën e Preshevës, Deputetin Shaip Kamberi, Kryetaren e Komunës së Preshevës, Ardita Sinani, Kryetarin e Komunës së Bujanocit, Arbër Pajaziti dhe Kryetarin e Këshillit Kombëtar Shqiptar, Enkel Rexhepi.

Ministri thekson se gjatë takimit u zhvillua një bisedë e drejtpërdrejtë, vëllazërore dhe përmbajtësore, për çështjet që na bashkojnë dhe që kërkojnë bashkërendim të vazhdueshëm: mbrojtjen e të drejtave të shqiptarëve, ruajtjen e identitetit dhe forcimin e përfaqësimit të tyre me fuqi reale në jetën politike dhe institucionale të Serbisë, si dhe adresimin e nevojave konkrete të qytetarëve të Luginës.

“Përfaqësimi real dhe i denjë, ruajtja dhe forcimi i identitetit kombëtar, arsimimi, zhvillimi ekonomik dhe mundësitë për të rinjtë nuk janë çështje episodike. Ato kërkojnë vëmendje të vazhdueshme, bashkërendim dhe veprim konkret”, deklaroi ministri i Jashtëm.

Të drejtat e shqiptarëve, sipas Ministrit, mbeten një nga përparësitë e qëndrueshme të aksionit tonë diplomatik. Hoxha nënvizoi se Shqipëria do të vijojë të jetë pranë shqiptarëve të Luginës së Preshevës, me angazhim dhe dialog.

Postimi i plotë i ministrit:

Në përfundim të një vere të shkurtër, pata kënaqësinë të zhvilloj sot një takim pune me drejtuesit e institucioneve dhe të zgjedhurit shqiptarë në Luginën e Preshevës:

Deputetin në parlamentin e Serbisë, Shaip Kamberi; Kryetarin e Këshillit Kombëtar Shqiptar në Serbi, Enkel Rexhepi; Kryetarin e Komunës së Bujanocit, Arbër Pajaziti si dhe Kryetaren e Komunës së Preshevës, Ardita Sinani, duke filluar kështu sezonin e ri me një nga përparësitë e qëndrueshme të aksionit tonë diplomatik.

Një bisedë e lirë, e drejtpërdrejtë, por mbi të gjitha vëllazërore dhe përmbajtësore, për çështjet që na bashkojnë dhe që kërkojnë bashkërendim të vazhdueshëm: mbrojtjen e të drejtave të shqiptarëve, ruajtjen e identitetit dhe forcimin e përfaqësimit të tyre me fuqi reale në jetën politike dhe institucionale të Serbisë, si dhe adresimin e nevojave konkrete të qytetarëve të Luginës.

Përfaqësimi real dhe i denjë, ruajtja dhe forcimi i identitetit kombëtar, arsimimi, zhvillimi ekonomik dhe mundësitë për të rinjtë nuk janë çështje episodike. Ato kërkojnë vëmendje të vazhdueshme, bashkërendim dhe veprim konkret. Shqipëria do të vijojë të jetë pranë shqiptarëve të Luginës së Preshevës, me angazhim, dialog dhe mbështetje konkrete.

Puna vazhdon.

The post Hoxha takon drejtuesit e institucioneve dhe të zgjedhurit shqiptarë në Luginën e Preshevës appeared first on Euronews Albania.

100 ish-diplomatë të lartë akuzojnë Izraelin për ndjekje të spastrimit etnik dhe i bëjnë thirrje Britanisë dhe Francës të vendosin kufizime tregtare, të ndalojnë bashkëpunimin ushtarak dhe të mbrojnë mundësinë e një shteti palestinez të pavarur. 

Më shumë se 100 ish-diplomatë britanikë dhe francezë kanë bërë një apel të përbashkët të jashtëzakonshëm për veprime vendimtare kundër Izraelit, duke paralajmëruar se Palestina po fshihet ndërsa qeveritë perëndimore vazhdojnë të mbështeten në dënime që kanë pak pasoja domethënëse.

Ndërhyrja bashkon 52 ish-diplomatë francezë dhe 50 ish-ambasadorë britanikë, përfshirë figura të larta që kanë shërbyer në të gjithë Lindjen e Mesme dhe kanë përfaqësuar vendet e tyre në Kombet e Bashkuara. Drejtuar Presidentit francez Emmanuel Macron dhe Kryeministrit britanik Andy Burnham, letra kërkon kufizime tregtare, ndalim të transferimeve të armëve dhe bashkëpunimit ushtarak, si dhe sanksione ndaj kompanive dhe individëve të përfshirë në vendbanimet izraelite në tokat palestineze të okupuara.

Nënshkruesit akuzojnë qeverinë izraelite për shkatërrimin e qëllimshëm të themeleve politike dhe territoriale të një shteti palestinez. Ata argumentojnë se njohja e Palestinës nga Britania dhe Franca në vitin 2025 do të bëhet një gjest diplomatik bosh nëse nuk ndiqet nga masa që mund të ndryshojnë politikën izraelite.

Një sfidë për Britaninë dhe Francën

Mediat franceze shkruajnë se letra përfaqëson një ndërhyrje jashtëzakonisht të drejtpërdrejtë nga ish-anëtarë të dy institucioneve diplomatike që zakonisht lidhen me gjuhë të kujdesshme dhe bindje private.

Ndër nënshkruesit britanikë janë Jeremy Greenstock dhe Emyr Jones Parry, të dy ish-ambasadorë britanikë në Kombet e Bashkuara, dhe Edward Chaplin, ish-drejtor i çështjeve të Lindjes së Mesme në Ministrinë e Jashtme. Nënshkruesit francezë përfshijnë Patrice Paoli, një ish-drejtor për Lindjen e Mesme në ministrinë e jashtme franceze, dhe Stanislas de Laboulaye, i cili më parë ka shërbyer si konsull i përgjithshëm i Francës në Jerusalem.

Shumë nga diplomatët kanë mbajtur pozicione të larta në vende qendrore të konflikteve dhe marrëdhënieve diplomatike të rajonit, përfshirë Egjiptin, Iranin, Bahreinin, Izraelin, Sirinë, Turqinë, Kuvajtin, Arabinë Saudite dhe Katarin.

The post “Palestina po fshihet”! Mbi 100 ish-diplomatë britanikë e francezë kërkojnë sanksione ndaj Izraelit appeared first on Euronews Albania.

Lionel Messi i Inter Miami është gjobitur për goditjen me shuplakë që i dha lojtarit të Philadelphia Union, Quinn Sullivan, gjatë takimit, i cili u mbyll në barazim 2-2 të të mërkurën.

Messi goditi Sullivanin në pjesën e pasme të kokës në minutat e fundit të këtij dueli dhe më pas u shfajsua duke pohuar se gjesti i tij ishte pasojë e një bërryli që kishte marrë prej rivalit pak momente më parë.

MLS konfirmoi sot se Messi ishte gjobitur, por nuk zbuloi shumën.

The post MLS gjobit Messi-n për shuplakën që i dha Sullivan, shifra nuk bëhet zyrtare appeared first on Euronews Albania.

Një zjarr i madh ka përfshirë pyllin me pisha në zonën e Pishporos, në territorin e Njësisë Administrative Novoselë, në Vlorë.

Flakët janë përhapur në sipërfaqen e pyllëzuar, duke rrezikuar masivin me pisha. Ende nuk dihen përmasat e sakta të zonës së përfshirë nga zjarri, ndërsa nuk ka ende informacion të konfirmuar nëse banesat apo zona të banuara pranë vatrës janë në rrezik.

Forcat zjarrfikëse pritet të ndërhyjnë në terren për të vënë nën kontroll flakët dhe për të parandaluar përhapjen e mëtejshme të zjarrit.

Situata vijon të monitorohet, ndërsa pritet ndërhyrja e shërbimeve të emergjencës për izolimin e vatrës së zjarrit.

The post Zjarr i madh në pyllin me pisha në Pishporo, flakët rrezikojnë masivin pyjor appeared first on Euronews Albania.

Prokuroria e Qarkut në Split ka ngritur aktakuzë për spiunazh ndaj një ish-piloti ushtarak të Forcave Ajrore të Kroacisë dhe partneres së tij, një shtetase serbe nga Kosova.

Të dy ishin arrestuar në gusht të vitit të kaluar nën dyshimin për spiunazh, ndërsa me ngritjen e aktakuzës hetimet ndaj tyre kanë përfunduar dhe çështja kalon në fazën tjetër të procedurës penale.

Sipas Prokurorisë kroate, piloti J.I., gjatë kohës sa shërbente në Forcat e Armatosura të Kroacisë, dyshohet se nga shkurti deri në dhjetor të vitit 2022 i ka dhënë vazhdimisht partneres së tij, A.M., informacione të klasifikuara që i kishte siguruar ose në të cilat kishte qasje për shkak të detyrës.

Prokuroria pretendon se ai ishte në dijeni se partnerja po i mblidhte informacionet për një shtet të huaj. Ajo akuzohet se më pas të dhënat e siguruara ua ka përcjellë disa adresave jashtë Kroacisë.

Një pjesë e rëndësishme e dyshimeve lidhet me Kosovën dhe periudhën kur piloti kroat kishte shërbyer në kuadër të KFOR-it.

Ai dyshohet se partneres së tij i kishte dhënë informacione për lëvizjet e trupave të KFOR-it, situatën e sigurisë dhe zhvillimet në veri të Kosovës. Sipas raportimeve të mediave kroate, këto informacione më pas dyshohet se i janë përcjellë Listës Serbe.

Në mesin e të dhënave të zbuluara dyshohet se kishte edhe informacione për lëvizjet e serbëve në veri të Kosovës nga fundi i vitit 2022, periudhë e karakterizuar nga tensione të shtuara në atë pjesë të vendit.

Prokuroria në Split i ka kërkuar Gjykatës vazhdimin e masave ndaj të akuzuarës për shkak të rrezikut të arratisjes.

Ish-piloti, ndërkaq, ishte liruar nga paraburgimi në fund të tetorit të vitit të kaluar, me masa paraprake dhe ndalim kontakti me njërin prej dëshmitarëve. Pas nisjes së rastit ndaj tij, ai ishte larguar edhe nga shërbimi ushtarak.

The post Arrestimi për spiunazh – Prokuroria ngre akuzë për ish-pilotin kroat: I jepte informacione të dashurës së tij serbe nga Kosova appeared first on Euronews Albania.

Një rast i dyshuar i trafikimit ndërkombëtar të kanabisit nga Kanadaja drejt Shqipërisë është goditur në Durrës, në kuadër të operacionit policor të koduar “Anchor”.

Policia ka sekuestruar rreth 80 kilogramë kanabis të llojit “Gelato”, me përmbajtje të lartë THC, ndërsa vlera e lëndës narkotike në treg përllogaritet në rreth 1 milion euro. Në kuadër të operacionit janë arrestuar tre persona dhe dy të tjerë janë shpallur në kërkim.

Operacioni u zhvillua nga strukturat e Drejtorisë Vendore të Policisë Durrës, në bashkëpunim me Prokurorinë, Policinë Kufitare, Forcën e Posaçme Operacionale dhe strukturat doganore.

Sipas Policisë, pas një hetimi të thelluar dhe përdorimit të metodave speciale të hetimit, në Portin e Durrësit u sekuestruan 127 pako me kanabis të llojit “Gelato”, me peshë totale rreth 80 kilogramë.

Hetimet kanë zbuluar dyshime se droga sigurohej në Ontario të Kanadasë dhe transportohej drejt Shqipërisë e fshehur në një hapësirë të modifikuar të një automjeti të porositur për blerje në Kanada.

Pas mbërritjes në Shqipëri, sipas hetuesve, lënda narkotike dyshohet se do të shpërndahej në territorin shqiptar dhe më tej në Kosovë.

Gjatë operacionit u sekuestruan gjithashtu tre automjete, pesë telefona celularë dhe rreth 11 mijë euro cash.

Në pranga kanë përfunduar tre shtetas kosovarë: T. D., 32 vjeç, L. G., 26 vjeç dhe B. J., 40 vjeç. Ata dyshohen për veprën penale “Trafikimi i narkotikëve”.

Ndërkohë, janë shpallur në kërkim H. C., lindur dhe banues në Kukës, dhe G. O., lindur në Kosovë dhe banues në Ontario të Kanadasë. Edhe ndaj tyre rëndon dyshimi për përfshirje në trafikimin e lëndëve narkotike.

Nga hetimet paraprake dyshohet se personat e përfshirë kishin role të ndryshme në sigurimin, fshehjen, transportimin dhe shpërndarjen e lëndës narkotike.

Policia dhe Prokuroria vijojnë hetimet për lokalizimin dhe arrestimin e personave të shpallur në kërkim, si dhe për dokumentimin e plotë të aktivitetit të dyshuar kriminal dhe rolit të secilit prej të përfshirëve.

The post Trafik kanabisi nga Kanadaja, sekuestrohen 80 kg “Gelato” me vlerë rreth 1 milion euro (VIDEO) appeared first on Euronews Albania.

Një 40-vjeçar është arrestuar në flagrancë në Tiranë, pasi u kap duke qarkulluar me automjet dhe me një armë zjarri pa leje.

Arrestimi i shtetasit me inicialet G. K. u krye në zonën e Liqenit të Thatë, gjatë një kontrolli të befasishëm të zhvilluar nga shërbimet e Sektorit Operacional, në bashkëpunim me Forcën e Posaçme “Shqiponja” dhe shërbimet e Komisariatit të Policisë Nr. 1.

Gjatë kontrollit fizik, policia i gjeti 40-vjeçarit një armë zjarri pistoletë, si dhe një krehër me municion luftarak. Arma dhe municioni u sekuestruan në cilësinë e provës materiale.

Në përfundim të veprimeve procedurale, G. K. u arrestua për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Materialet procedurale i janë referuar Prokurorisë për veprime të mëtejshme.

The post Qarkullonte i armatosur me pistoletë, arrestohet 40-vjeçari në Tiranë appeared first on Euronews Albania.

Një vatër zjarri është evidentuar në zonën e Kagjinasit, në Ersekë, duke përfshirë edhe një sipërfaqe toke.

Sipas të dhënave paraprake, zjarri dyshohet se ka nisur në varrezat e fshatit dhe më pas është përhapur në zonën përreth.

Pas marrjes së njoftimit, drejt vendngjarjes janë nisur menjëherë dy mjete zjarrfikëse. Ekipet po punojnë për izolimin dhe shuarjen e flakëve, me qëllim parandalimin e përhapjes së mëtejshme të zjarrit.

Ende nuk dihen shkaqet e rënies së zjarrit, ndërsa situata vijon të monitorohet nga shërbimet në terren.

The post Zjarr në Kagjinas të Ersekës, dy mjete zjarrfikëse në terren appeared first on Euronews Albania.

Disa persona humbën jetën në përplasjen e mëngjesit të sotëm midis një automjeti policie dhe një automjeti pasagjerësh në autostradën A66 pranë Middlesbrough, tha Policia e Cleveland.

Aksidenti shkaktoi një reagim të shpejtë të policisë; autostrada A66 u mbyll në të dyja drejtimet dhe shoferët u këshilluan të përdorin rrugë alternative, raporton Sky News.

Shërbimi lokal i emergjencave njoftoi se në aksidentin e rëndë u përfshinë tre automjete dhe se disa persona humbën jetën në vend, por numri i saktë i të vdekurve nuk është konfirmuar ende.

“Këtë mëngjes në orën 3:39, një automjet policie dhe një Volkswagen Passat u përplasën në rrugën A66 në South Bank. Fatkeqësisht, pati disa viktima në përplasje. Një numër i madh automjetesh të shërbimeve të emergjencës janë në vendngjarje dhe rruga do të mbetet e mbyllur për njëfarë kohe. Po punojmë për të identifikuar viktimat dhe për të kontaktuar familjet e tyre”, tha zëdhënësi i policisë.

Një zëdhënës i shërbimeve lokale të emergjencës tha se 14 ekipe emergjence u dërguan në vendngjarje.

The post Disa të vdekur nga përplasja mes një automjeti policie dhe një automjeti pasagjerësh në Angli appeared first on Euronews Albania.