Policia Kufitare ka ndëshkuar me 500 mijë lekë të rinj drejtuesin e një mjeti lundrues Jet Ski, i cili shkeli perimetrin e sigurisë në plazhin e Ksamilit, duke rrezikuar pushuesit.

Shkelja u konstatua gjatë patrullimeve në zonën e quajtur “Bar Bistro”, ku mjeti kishte hyrë brenda hapësirës së rezervuar për larësit.

Në përfundim të veprimeve administrative, Jet Ski u bllokua, ndërsa drejtuesi i tij, shtetasi P. S., u gjobit.

Policia e Shtetit apelon për respektimin e rregullave të lundrimit, duke paralajmëruar se kontrollet përgjatë vijës bregdetare do të vijojnë me intensitet.

The post Ksamil, hyn me Jet Ski në zonën e pushuesve, gjobitet me 5 mln lekë appeared first on Euronews Albania.

Ministri i Jashtëm i Serbisë ka reaguar ndaj deklaratës së ambasadorit shqiptar Ferit Hoxha për lumin Ibër. Ministri Maro Gjuriç akuzon Tiranën se po përpiqet të largojë vëmendjen nga, sipas tij, shkeljet e të drejtave të serbëve në Kosovë. Në reagimin e tij ai deklaroi: “Lumi Ibër nuk kalon nëpër Shqipëri dhe Shqipëria nuk është shtet breglumor në pellgun e tij. Prandaj, Shqipëria nuk ka asnjë bazë territoriale apo hidrologjike për të pretenduar një rol në mënyrën se si Serbia menaxhon burimet ujore brenda territorit të saj, në përputhje me Kushtetutën, ligjet dhe detyrimet e saj ndërkombëtare.”

Kryediplomati serb shtoi gjithashtu se: “Serbia është një shtet sovran dhe do të vendosë vetë se si do t’i menaxhojë burimet e saj natyrore. Shqipëria nuk do t’i marrë këto vendime dhe as askush tjetër jashtë Serbisë.”

Ai theksoi se Beogradi do të vazhdojë të mbrojë, sipas tij, të drejtat e popullit serb, integritetin territorial dhe interesat kombëtare. Reagimi vjen pas deklaratës së ministrit Hoxha i cili shprehur shetësimin për deklaratat e presidentit Alekander Vuçiç i cili tha se po shqyrtonte mundësinë për të ndyshuar rrjedhen e lumit Ibrër, i cili furnizon Kosovën.

Hoxha theksoi se ndryshimi i rrjedhës së një lumi që është pjesë e një sistemi ujor ndërkufitar nuk mund të trajtohet si një çështje thjesht e brendshme e një shteti. Sipas Hoxhës, çdo ndërhyrje që mund të ndikojë në territorin, mjedisin, sigurinë dhe furnizimin me ujë të një vendi tjetër duhet të bëhet në përputhje me të drejtën ndërkombëtare dhe përmes konsultimeve me palën e prekur.

Hoxha i është referuar edhe detyrimeve ndërkombëtare të Serbisë, duke theksuar se Beogradi është palë e Konventës së UNECE-së për Mbrojtjen dhe Përdorimin e Ujërave Ndërkufitare dhe Liqeneve Ndërkombëtare që prej vitit 2010.

“E drejta ndërkombëtare e ujërave është e qartë në këtë drejtim. Parimet e përdorimit të drejtë dhe të arsyeshëm të ujërave ndërkufitare, detyrimi për të parandaluar, kontrolluar dhe reduktuar dëmet ndërkufitare, si dhe detyrimi për bashkëpunim, shkëmbim informacioni dhe konsultim për masat që mund të kenë pasoja ndërkufitare, janë pjesë e standardeve të konsoliduara të së drejtës ndërkombëtare. Serbia është palë e Konventës së #UNECE-së për Mbrojtjen dhe Përdorimin e Ujërave Ndërkufitare dhe Liqeneve Ndërkombëtare që prej vitit 2010 dhe ka pranuar edhe mekanizmat e saj për zgjidhjen e mosmarrëveshjeve”, tha më herët ministri Hoxha.

Ai tha se Shqipëria pret që Serbia të respektojë plotësisht detyrimet e saj ndërkombëtare dhe parimet e fqinjësisë së mirë. “Çdo projekt ose masë që mund të ndikojë në rrjedhën, sasinë apo cilësinë e ujërave që prekin Kosovën duhet të trajtohet me transparencë, mbi bazën e të dhënave shkencore, me vlerësim të plotë të ndikimit ndërkufitar dhe përmes konsultimit me palën e prekur. Uji nuk mund të përdoret si instrument presioni politik dhe as si mjet për të ndëshkuar një vend apo një popullsi tjetër. Shqipëria mbështet fuqimisht të drejtën e Kosovës për siguri, zhvillim të qëndrueshëm dhe mbrojtjen e burimeve të saj ujore. Ne besojmë fort dhe presim qe çështje të tilla të trajtohen përmes #dialogut, bashkëpunimit dhe standardeve evropiane, jo përmes kërcënimeve apo ndërhyrjeve e veprimeve të njëanshme”, thuhet në reagimin e ministrit Hoxha.

Dekarata e plotë ministrit Serb: Kam marrë me vëmendje deklaratën e ministrit Ferit Hoxha lidhur me lumin Ibër.

Ajo që po shohim është një përpjekje e qartë për të ndryshuar temën dhe për të larguar vëmendjen nga shkeljet e vazhdueshme të të drejtave themelore të popullit serb në Kosovë për të cilat Ministria e Evropës dhe Punëve të Jashtme e Shqipërisë mbetet dukshëm në heshtje.

Kur shqetësimi shprehet vazhdimisht vetëm në një drejtim, ndërsa të drejtat dhe siguria e një komuniteti të tërë etnik shpërfillen, bëhet gjithnjë e më e vështirë që kjo qasje selektive të konsiderohet politikisht ose etnikisht neutrale.

Lumi Ibër nuk kalon nëpër Shqipëri dhe Shqipëria nuk është shtet breglumor në pellgun e tij. Prandaj, Shqipëria nuk ka asnjë bazë territoriale apo hidrologjike për të pretenduar një rol në mënyrën se si Serbia menaxhon burimet ujore brenda territorit të saj, në përputhje me Kushtetutën, ligjet dhe detyrimet e saj ndërkombëtare.

Vendimi i Tiranës për t’u përfshirë në këtë çështje, ndërkohë që shpërfill presionin sistematik ndaj popullsisë serbe dhe sulmet ndaj pronës serbe, ngre në mënyrë të pashmangshme pikëpyetje mbi motivet politike që qëndrojnë pas këtij ndërhyrjeje. Ai rikthen gjithashtu shqetësime legjitime për koncepte të njohura rajonale që synojnë ta trajtojnë territorin dhe burimet serbe si pjesë të një hapësire më të gjerë politike shqiptare.

Dua të jem gjithashtu i qartë: nuk ka vend për një “Shqipëri të Madhe” apo për ndonjë projekt tjetër të bazuar në zgjerimin etnik dhe ndryshimin e kufijve në të ardhmen evropiane të rajonit tonë. Ajo për të cilën kemi nevojë nuk është krijimi i shteteve të reja ose më të mëdha kombëtare, por një rajon ku kufijtë humbasin gradualisht fuqinë e tyre për të na ndarë, i hapur për njerëzit, tregtinë, bashkëpunimin dhe mirëqenien e përbashkët, duke respektuar plotësisht sovranitetin dhe integritetin territorial të çdo shteti.

Serbia është një shtet sovran dhe do të vendosë vetë se si do t’i menaxhojë burimet e saj natyrore. Shqipëria nuk do t’i marrë këto vendime dhe as askush tjetër jashtë Serbisë.

Ne do të vazhdojmë të mbrojmë të drejtat e popullit tonë, integritetin e territorit tonë dhe interesat tona legjitime kombëtare. Përpjekjet për të larguar vëmendjen nga situata në terren ose për të pretenduar një rol në çështje që nuk bëjnë pjesë në juridiksionin e Shqipërisë nuk do të kenë sukses.

Veçmas, kemi vënë re edhe interesimin e fundit të Shqipërisë për mënyrën se si Serbia zhvillon politikën e saj të jashtme, përfshirë edhe me kë takohemi dhe përse, i shoqëruar me një dozë të panevojshme përçmimi. Ky interes është prekës, por diplomacia përmes megafonit nuk i shërben asnjërit prej vendeve tona.

Do të ishte më e mençur të ulej retorika dhe të riktheheshim në të vetmen rrugë që mund të ndërtojë një të ardhme më të mirë për rajonin tonë: marrëdhënie të mira fqinjësore të bazuara në respekt të ndërsjellë, barazi sovrane dhe bashkëpunim të sinqertë.

The post Serbia reagon ndaj Tiranës: Mos ndërhyni për lumin Ibër. Nuk ka vend për “Shqipërinë e Madhe” appeared first on Euronews Albania.

Presidenti amerikan, Donald Trump do të nënshkruajë një urdhër ekzekutiv të hënën duke bërë thirrje për më shumë fleksibilitet dhe kërkime mbi vaksinat. Kështu njoftoi sekretarja e shtypit e Shtëpisë së Bardhë, Karoline Leavitt në një postim në X.

Urdhri do të kërkojë më pak vaksinime tek fëmijët, duke e ndarë vaksinën kundër fruthit, shytave dhe rubeolës tek fëmijët në tre doza dhe duke i dhënë dozat në vizita të ndara mjekësore, raportoi Axios.

“Vaksina e kombinuar MMR duhet të administrohet në tre doza të ndara për një sëmundje të vetme, sapo produkte të tilla të jenë të disponueshme në vend dhe, në masën maksimale të mundshme, të gjitha imunizimet e fëmijërisë duhet të administrohen në vizita të ndara mjekësore”, raportoi media, duke cituar urdhrin.

The post Shtëpia e Bardhë: Trump do të nënshkruajë një urdhër që kërkon më shumë fleksibilitet ndaj vaksinave appeared first on Euronews Albania.

Një projekt i veçantë mjedisor po zbatohet në Brazil, ku flokët e njeriut po përdoren për të krijuar barriera që ndihmojnë në pastrimin e ujërave të ndotura nga nafta dhe substanca të tjera të dëmshme.

Testet e para janë zhvilluar në Enseada de Bom Jesus, në brigjet e Gjirit të Guanabarës, në Rio de Zhaneiro. Zona është zgjedhur për shkak të nivelit të lartë të ndotjes dhe trafikut të vazhdueshëm detar.

Gjiri prej vitesh përballet me derdhje nafte, dhe mbetje të ndryshme që dëmtojnë ekosistemin dhe ndikojnë drejtpërdrejt edhe tek komuniteti i peshkatarëve.

Flokët e mbledhur nga parukeritë vendosen në struktura cilindrike, të cilat në ujë krijojnë një lloj barriere thithëse. Ato fiksohen në barrierat lundruese që përdoren për të mbajtur mbetjet dhe mund të qëndrojnë në det deri në katër muaj. Gjatë kësaj kohe, flokët ndihmojnë në kapjen dhe thithjen e naftës, dhe substancave të tjera ndotëse që qëndrojnë në sipërfaqen e ujit.

Përveç flokëve të njeriut, edhe qimet e kafshëve mund të përdoren për thithjen e naftës dhe filtrimin e ujërave të ndotura.

Peshkatarët e zonës thonë se ndotja nga nafta është një problem serioz për aktivitetin e tyre. Sipas tyre, njollat e naftës shfaqen shpesh në sipërfaqen e ujit dhe ndikojnë edhe në pjesët më të thella, duke larguar peshqit dhe duke vështirësuar peshkimin.

Organizatorët shpresojnë që përdorimi i barrierave me flokë të ndihmojë në uljen e ndotjes dhe në rikthimin gradual të ekosistemit të Gjirit të Guanabarës. Nisma shihet gjithashtu si një mënyrë për t’i dhënë një përdorim të ri një materiali që zakonisht përfundon në mbeturina, duke e kthyer atë në një mjet për mbrojtjen e detit.

The post Flokët e njeriut kthehen në barriera për pastrimin e detit nga nafta appeared first on Euronews Albania.

Banorët të shumtë në Orikum janë mbledhur këtë të hënë para Qendrës Administrative. Ata janë mbledhur pasditen e sotme në protestë. Protestuesit kërkojnë që Orikumi të rikthehet Bashki, duke kundërshtuar statusin aktual administrativ.

Partia Socialiste dorëzoi më 30 korrik nismën ligjore për reformën e re territoriale, e cila parashikon një riorganizim të thellë të pushtetit vendor dhe uljen e numrit të bashkive nga 61 në 46.

Sipas projektligjit, 28 bashki do të konsolidohen në 13 bashki të reja. Bashkitë që propozohet të shkrihen janë: Fushë-Arrëz, Klos, Rrogozhinë, Dimal, Poliçan, Patos, Divjakë, Selenicë, Maliq, Këlcyrë, Memaliaj, Libohovë, Cërrik, Belsh dhe Përrenjas.

The post Nis protesta në Orikum, banorët kërkojnë rikthimin e Bashkisë (VIDEO) appeared first on Euronews Albania.

Protesta e aktivistëve dhe qytetarëve në Tiranë hyri këtë të hënë në ditën e saj të 72-të ndërsa si çdo pasdite, pas orës 19:00, ata u mblodhën fillimisht në sheshin “Skënderbej”, ku vijuan me thirrjet “Ju erdhi fundi”, “Shqipëri e re”, “Rama jep dorëheqjen”, etj.

Pas grumbullimit në sheshin “Skënderbej”, protestuesit u nisën në marshim drejt Bulevardit “Dëshmorët e Kombit”, ku u ndalën përpara godinës së Kryeministrisë ku po vijojnë me thirrjet kundër qeverisë dhe me fjalime.

Kërkesa kryesore e protestuesve mbetet dorëheqja e Kryeministrit Edi Rama dhe e qeverisë aktuale. Si çdo protestë tjetër, pas fjalimeve protestuesit pritet të marshojnë në rrugët e Tiranës.

The post Dita e 72-të e protestës, qytetarët mblidhen para Kryeministrisë appeared first on Euronews Albania.

Autoriteti Rrugor Shqiptar, ARRSH ka dalë me një reagim në “Facebook” lidhur me mungesën e një hyrje-daljeje në zonën e Papërit, përgjatë Autostradës së re Elbasan-Rrogozhinë. ARRSH në njoftim bën me dije se projekti parashikon ndërtimin e një nyjeje në Papër, e cila do të mundësojë lidhjen e zonës së Papërit, Cërrikut dhe territoreve përreth me autostradën.

Ndër të tjera, ARRSH sqaron se ndërtimi i kësaj nyjeje nuk është përfshirë në kontratat të cilat janë aktualisht në proces zbatimi. Sipas njoftimit, ajo është planifikuar të realizohet në një fazë të mëtejshme.

“Në lidhje me informacionet e publikuara së fundmi mbi mungesën e një hyrje-daljeje në zonën e Papërit, përgjatë Autostradës së re Elbasan–Rrogozhinë, Autoriteti Rrugor Shqiptar sqaron se projekti i kësaj vepre infrastrukturore parashikon ndërtimin e një nyjeje në Papër, e cila do të mundësojë lidhjen e zonës së Papërit, Cërrikut dhe territoreve përreth me autostradën.

Sqarojmë se ndërtimi i kësaj nyjeje nuk është përfshirë në kontratat aktualisht në proces zbatimi. Ndërtimi i saj është planifikuar të realizohet në një fazë të mëtejshme, në përputhje me planifikimin dhe vijimësinë e projektit.

Autoriteti Rrugor Shqiptar mbetet i angazhuar për informimin e vazhdueshëm dhe transparent të publikut mbi ecurinë e projekteve infrastrukturore dhe vlerëson rëndësinë e informimit të saktë dhe të verifikuar për çështje me interes publik.

Për çdo informacion të mëtejshëm lidhur me projektin dhe ecurinë e punimeve, Autoriteti Rrugor Shqiptar mbetet në dispozicion. Faleminderit për mirëkuptimin”, njofton ARRSH.

The post Autostrada Elbasan-Rrogozhinë, ARRSH: Do të ketë një nyjeje në Papër. Realizohet në një fazë të mëtejshme appeared first on Euronews Albania.

Të hënën do të fillojë gjyqi i një ish-lideri bande për vrasjen dekada më parë të reperit Tupac Shakur, një nga vrasjet e pazgjidhura më të profilit të lartë në SHBA.

Procedurat, të cilat fillojnë në Las Vegas të hënën dhe pritet të zgjasin një muaj ku pritet të sqarohet se kush qëlloi me armë duke vrarë muzikantin më 7 shtator 1996, ndërsa ai ishte në qytet për të parë një ndeshje boksi të Mike Tyson.

Prokurorët synojnë të tregojnë se Duane “Keffe D” Davis, ish-lideri i South Side Compton Crips, urdhëroi vrasjen dhe siguroi armën e përdorur për të vrarë Shakurin. Davis, 63 vjeç, përballet me burgim të përjetshëm pa kusht nëse dënohet.

Vrasja e Shakur, i njohur edhe si 2Pac, ka nxitur debate të pafundme midis fansave të muzikës se kush e bëri dhe pse. Reperi, i cili vdiq në moshën 25 vjeç, ishte një figurë kyçe në një rivalitet hip-hop që vinte përballë bregun lindor me atë perëndimor.

I njohur për hite të tilla si California Love dhe All Eyez on Me, Shakur u rrit në Harlem dhe Baltimore, por shpejt u bë mishërimi i një djali të keq nga Kalifornia kur nënshkroi kontratë me Death Row Records me seli në Los Angeles.

Gjyqi do të rishikojë betejën midis Death Row, të themeluar nga Marion “Suge” Knight, dhe Bad Boy Records, labelit të bregut lindor të krijuar nga Sean “Diddy” Combs dhe me Christopher “the Notorious BIG” Wallace, i cili u vra në mars të vitit 1997.

Prokurorët thonë se Death Row Records mbrohej nga Mob Piru, një bandë e Los Angeles që ishte pjesë e aleancës më të gjerë Bloods. Knight ishte i lidhur me grupin. Bad Boy Records kishte punësuar grupin rival South Side Compton Crips, të udhëhequr nga Davis, si truproja.

Pas ndeshjes me Tyson në kazinonë MGM Grand, Knight dhe Shakur sulmuan nipin e Davis, anëtarin e Crips, Orlando “Baby Lane” Anderson, në shenjë hakmarrjeje për një sulm të dyshuar ndaj një punonjësi të të dënuarve me vdekje. Prokuroria thotë se Davis kishte dalë për hakmarrje.

Më vonë atë natë, një Cadillac i bardhë që mbante Davisin, Andersonin dhe të tjerë ndaloi pranë makinës së Shakurit në Las Vegas. U qëlluan të shtëna nga Cadillac dhe Shakur u plagos për vdekje.

Hetimi u vonua për dekada për shkak të mungesës së provave, por çështja e pazgjidhur u ‘ringjall’ me botimin në vitin 2019 të kujtimeve të Davis. Në atë libër, Davis tregoi se ishte në sediljen e përparme të Cadillac dhe se u dha një pistoletë atyre në sediljen e pasme.

Por ai nuk thotë se kush hapi zjarr ndaj Shakur. Që atëherë, Davis është tërhequr dhe ka deklaruar se nuk është fajtor .

“Jam i pafajshëm. Nuk kam vrarë askënd. Nuk kam vrarë kurrë askënd”, tha Davis në një intervistë nga burgu me ABC News në mars të vitit të kaluar.

The post 30 vite nga vrasja e Tupac Shakur, fillon gjyqi ndaj një ish-lideri bande appeared first on Euronews Albania.

Detaje të reja dalin në dritë nga hetimet për vrasjen e Joan Zykos në Korçë, ngjarje për të cilën është arrestuar në flagrancë Kristjan Sterjo, i dyshuar për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.

Në dëshminë e dhënë përpara hetuesve, Sterjo ka rrëfyer versionin e tij për mënyrën se si është zhvilluar ngjarja. Sipas deklarimit të tij, konflikti me Joan Zykon kishte nisur rreth dy javë më parë, pas një debati verbal mes tyre.

Sterjo ka deklaruar se ditën e ngjarjes ka qenë pranë lokaleve përballë kinemasë, kur ka parë automjetin Mercedes-Benz C-Class që, sipas tij, përdorej ose ishte në pronësi të Joan Zykos.

Sipas dëshmisë, pasi automjeti ka ndaluar, Sterjo është afruar pranë drejtuesit. Ai pretendon se Zykos ka pasur një thikë me vete dhe është përpjekur ta godasë, ndërsa më pas ka zbritur nga automjeti. Në këtë moment, sipas deklarimit të Sterjos, ka pasur përplasje fizike mes tyre dhe disa persona kanë ndërhyrë për t’i ndarë.

Pas largimit nga vendi, Sterjo ka deklaruar se është kthyer në banesën e tij, ku ka marrë një armë zjarri që, sipas tij, e kishte mbajtur të fshehur më parë.

Më pas, sipas dëshmisë së tij, ai është nisur në drejtim të zonës ku banonte Zykos dhe e ka parë pranë një lokali përballë marketit “EUROMARKET”, në lagjen nr. 14.

Sipas deklarimit, Sterjo është afruar drejt Zykos pasi ka marrë armën nga një thes. Zykos është larguar me vrap dhe Sterjo e ka ndjekur deri në një pallat. Aty, sipas dëshmisë së tij, ka qëlluar me armë në drejtim të Zykos.

Pas të shtënës, Sterjo deklaron se nuk e ka parë nëse Zykos ishte plagosur apo çfarë i kishte ndodhur. Më pas është larguar nga zona dhe, sipas tij, e ka fshehur armën në disa shkurre pranë “Fushës së Drurëve”.

Pas kthimit në banesë, ai është ndërruar dhe rrobat që kishte veshur i ka futur në lavatriçe. Më pas ka qëndruar për një periudhë në një banesë të pabanuar pranë shtëpisë së tij.

Në vijim të veprimeve hetimore, policia ka bërë arrestimin në flagrancë të Kristjan Sterjos më 9 gusht, rreth orës 00:30.

Gjatë kontrollit personal, sipas dokumentit hetimor, atij i janë sekuestruar një telefon i markës Xiaomi dhe një karikues. Gjithashtu, janë administruar mostra për ekzaminime kriminalistike, si dhe veshjet që Sterjo kishte në momentin e ngjarjes.

Vrasja e 20-vjeçarit në Korçë, nesër ceremonia mortore. Mesazhi i ndjerë i nënës

The post Vrasja e Joan Zykos në Korçë, Kristjan Sterjo rrëfen dinamikën e ngjarjes: E ndoqa dhe qëllova me armë appeared first on Euronews Albania.

E ngarkuara me punë në Ambasadën amerikane në Prishtinë, Anu Prattipati këtë të hënë ka pritur në Kosovë senatoren amerikane, Joni Ernst.

Ambasada amerikane në Prishtinë ka ndarë detaje nga takimi i tyre përmes një postimi në “X”. Ernst mësohet se ka zhvilluar takimin me Prattipati në Ambasadën e SHBA-së në Prishtinë. Ajo gjithashtu vizitoi Manastirin e Graçanicës.

“E Ngarkuara me Punë Anu Prattipati ka kënaqësinë të mirëpresë senatoren amerikane Joni Ernst në Kosovë. Senatori Ernst mori pjesë në takime në Ambasadën e SHBA-së në Prishtina këtë pasdite dhe vizitoi Manastirin e Graçanicës, një vend i Trashëgimisë Botërore të UNESCO-s”, thuhet në njoftim.

Chargé d’affaires AnuPrattipati is pleased to welcome U.S. Senator Joni Ernst to Kosovo. Senator Ernst participated in meetings at U.S. Embassy Pristina this afternoon and visited the Gracanica Monastery, a UNESCO World Heritage site. pic.twitter.com/D8mpSvHfiZ

— U.S. Embassy Pristina (@USEmbPristina) August 10, 2026

The post Anu Prattipati pret senatoren amerikane Ernst, vizitojnë Manastirin e Graçanicës appeared first on Euronews Albania.

Drejtori i Përgjithshëm i Policisë së Shtetit, Skënder Hita këtë të hënë ka marrë vendimin dhe ka pezulluar nga detyra gjithë zinxhirin komandues të Komisariatit të Policisë Himarë. Ky pezullim ka ardhur lidhur me ndërtimin pa leje të ndërtuar në Qeparo, Himarë teksa ata kanë qenë në detyrë gjatë kësaj periudhe.

Sipas njoftimit të policisë rezulton se ndërtimi i objektit kishte filluar në dhjetor 2025 dhe nga ana e Komisariatit të Policisë Himarë nuk janë marrë masa për parandalimin e ndërtimit dhe vënien përpara përgjegjësisë ligjore të personit që po kryente ndërtimin. Më tej bëhet me dije se u pezulluan dy nënkomisarë, një komisar dhe një inspektor.

“Policia e Shtetit/ Drejtori i Përgjithshëm i Policisë së Shtetit, Drejtues Madhor Skënder Hita, pezullon nga detyra gjithë zinxhirin komandues të Komisariatit të Policisë Himarë, që kanë qenë në detyrë gjatë periudhës kur është ndërtuar një objekt 5-katësh pa leje në Qeparo, Himarë

Në vijim të masave të marra për evidentimin dhe goditjen e ndërtimeve pa leje, si dhe vënien përpara përgjegjësisë të personave përgjegjës, Drejtoria e Standardeve Profesionale në Drejtorinë e Përgjithshme të Policisë së Shtetit, me urdhër të Drejtorit të Përgjithshëm të Policisë së Shtetit, ka bërë pezullimin e menjëhershëm nga detyra të katër punonjësve të Policisë, konkretisht:

• Nënkomisar F. M., ish-Shef i Komisariatit të Policisë Himarë, aktualisht Shef i Seksionit për Trafiqet e Paligjshme në DVP Vlorë;
• Komisar E. P., ish-Shef i Seksionit dhe Specialist në Seksionin për Hetimin e Krimeve në Volum, në Komisariatin e Policisë Himarë, aktualisht Shef i Seksionit dhe Specialist në Seksionin për Hetimin e Krimeve në Volum, në Komisariatin e Policisë Divjakë;
• Nënkomisar K. P., ish-Specialist për Hetimin e Krimit, Zona Policore nr. 1, aktualisht Specialist për Hetimin e Krimit në Komisariatin e Policisë Vlorë;
• Inspektor R. Ç., me detyrë Ndihmës/Specialist SPZ, Zona Policore nr. 1, në Komisariatin e Policisë Himarë, zonë në të cilën u konstatua ndërtimi pa leje.

Pezullimi i menjëhershëm i tyre dhe nisja e hetimit disiplinor u bë pasi, në vendin e quajtur “Sugë”, Qeparo, Himarë, u konstatua se shtetasi L. B., banues në Laç, kishte ndërtuar një objekt me një kat nëntokë dhe katër kate mbi tokë, pa lejen e organeve kompetente.

Ky shtetas u arrestua ditën e djeshme nga Komisariati i Policisë Himarë, ndërsa u shpallën në kërkim 3 punonjës të IMT-së Himarë, konkretisht kryeinspektori dhe 2 inspektorë, për veprën penale “Shpërdorimi i detyrës”.

Nga verifikimet paraprake rezulton se ndërtimi i objektit kishte filluar në dhjetor 2025 dhe nga ana e Komisariatit të Policisë Himarë nuk janë marrë masa për parandalimin e ndërtimit dhe vënien përpara përgjegjësisë ligjore të shtetasit që po kryente ndërtimin.

Policia e Shtetit është e vendosur të ndëshkojë dhe largojë nga radhët e saj, cilindo punonjës policie që nuk zbaton ligjin, nuk përmbush detyrën, abuzon me të dhe cenon besimin e qytetarëve”, njofton policia.

Ndërtonte pa leje një objekt 5-katësh në Himarë, arrestohet 39-vjeçari, në kërkim 3 punonjës të IMT

The post Ndërtimi pa leje në Qeparo, Hita pezullon zinxhirin komandues të Policisë së Himarës appeared first on Euronews Albania.

Një shqiptar në New Jersey është bërë protagonist i një akti heroik, duke ndihmuar në shpëtimin e një 50-vjeçari që rrezikonte të mbytej në ujërat e oqeanit.

Në një intervistë ekskluzive për Euronews Albania, me gazetarin Xhensil Shkëmbi, Xhemo Lanica rrëfen momentet e vështira të ndërhyrjes dhe mënyrën se si, së bashku me disa shpëtimtarë të plazhit, arritën ta nxirrnin në breg personin që ishte në rrezik.

Lanica, me origjinë nga Ulqini dhe prej shtatë vitesh emigrant në Shtetet e Bashkuara të Amerikës, tregon se nuk u mendua dy herë kur pa se jeta e personit ishte në rrezik.

I rritur pranë detit, ai thotë se eksperienca e tij e ndihmoi të përballej me situatën, edhe pse rrymat e forta të oqeanit dhe pesha e personit e bënë ndërhyrjen veçanërisht të vështirë.

Pas pak çastesh, Lanica-s iu bashkuan edhe disa shpëtimtarë që punojnë në plazh. Pas rreth 15 minutash përpjekje dhe koordinimi, 50-vjeçari u nxor në breg.

“Për të vërtetë falënderoj Zotin që isha aty dhe që të mund t’i jap një dorë për ta ndihmuar. Në raste të tilla nuk ke pse të mendosh dy herë kur jeta e një personi tjetër është në rrezik”, tregon Lanica për Euronews Albania.

Pas shpëtimit, shqiptari pati mundësi të komunikonte edhe me 50-vjeçarin, i cili e falënderoi dhe i tha se për të ishte një “shans i dytë në jetë”.

Lanica thekson se në këtë ngjarje nuk ishte vetëm ai që kontribuoi. Sipas tij, të gjithë personat e pranishëm ndihmuan në mënyrën e tyre, nga ata që jepnin instruksione deri te personat që tërhiqnin litarin.

“Humanizmi nuk ka kufi, nuk ka fe dhe nuk ka nacionalitet”, shprehet ai.

Për Lanica-n, kjo ngjarje është edhe një moment që tregon anën tjetër të komunitetit shqiptar në Shtetet e Bashkuara, larg stereotipeve dhe lajmeve negative.

“Sot kemi doktorë, avokatë, njerëz me shkollim të lartë dhe po përfaqësohemi shumë mirë. Unë jam vërtet krenar për të gjithë shqiptarët dhe bashkëatdhetarët e mi”, thotë ai.

The post Shqiptari shpëton 50-vjeçarin nga mbytja në New Jersey: Humanizmi nuk ka kufi (VIDEO) appeared first on Euronews Albania.

Forcat e Armatosura kanë zhvilluar një takim teksa kanë analizuar punën e 6-mujorit të parë të këtij viti. Ministri i Mbrojtjes, Ermal Nufi theksoi se Forcat e Armatosura të Republikës së Shqipërisë kanë realizuar me sukses objektivat kryesore të gjashtëmujorit të parë të këtij viti.

Në këtë takim ishte i pranishëm edhe Shefi i Shtabit të Përgjithshëm të FA, gjenerallejtënant Arben Kingji, komandantët dhe drejtorë të strukturave të Forcave të Armatosura.

Krahas ruajtjes së sigurisë dhe gatishmërisë operacionale, analiza evidentoi progres në rekrutim, stërvitje, operacione, modernizim, infrastrukturë dhe administrimin e burimeve.

Ndërkohë, riorganizimi i strukturave ka përmirësuar efektivitetin e komandimit dhe përdorimin e burimeve, ndërsa bashkëpunimi me NATO-n, Shtetet e Bashkuara të Amerikës dhe partnerët rajonalë ka forcuar përgatitjen dhe ndërveprueshmërinë e forcave.

Progres është shënuar edhe në modernizimin e kapaciteteve ushtarake, përmes pajisjes me sisteme të reja dhe zhvillimit të projekteve strategjike, ndërsa si prioritet për periudhën në vijim u përcaktua integrimi i plotë operacional i këtyre kapaciteteve, përmes përgatitjes së personelit, stërvitjes dhe zhvillimit të infrastrukturës, me synim rritjen e aftësive operacionale dhe forcimin e kontributit të Shqipërisë në mbrojtjen kolektive.

The post Progres në rekrutim, stërvitje dhe operacione! Forcat e Armatosura analizojnë punën e 6-mujorit të parë appeared first on Euronews Albania.

Bashkia e Vlorës, në bashkëpunim me IMT-në dhe Policinë Bashkiake, ka ndërmarrë këtë të hënë një aksion për prishjen e ndërtimeve dhe shtesave pa leje në zonën e ish-Gjykatës së Vjetër, ku pritet të zbatohet projekti për restaurimin e zonës dhe ndërtimin e tregut të ri.

Gjatë ndërhyrjes së sotme janë prishur dhjetëra ndërtime pa leje, shtesa dhe kioska që përdoreshin si objekte shërbimi dhe dyqane. Sipas projektit, këto ndërtime kishin zënë hapësirat publike dhe kishin mbuluar pamjen e ndërtesave historike të zonës, duke penguar vlerësimin dhe restaurimin e tyre.

Aksioni do të vijojë edhe në ditët në vazhdim, deri në lirimin e plotë të hapësirës, për t’i hapur rrugë zbatimit të projektit të restaurimit dhe ndërtimit të tregut të ri.

The post Ndërtimi i tregut të ri në Vlorë, prishen ndërtimet dhe shtesat pa leje në zonën e ish-Gjykatës së Vjetër (VIDEO) appeared first on Euronews Albania.

Policë të armatosur zunë pozicione në hyrjet e Gjykatës Speciale Penale në Dublin, ndërsa avioni që transportonte Daniel Kinahan iu afrua qytetit. Në shkallët e ndërtesës, gazetarë nga mediat irlandeze dhe ndërkombëtare ndoqën fluturimin në internet.

Qeveria irlandeze kishte dërguar avionin e saj në Dubai. Zakonisht përdoret për ministrat e transportit, por u nis nga Emiratet e Bashkuara Arabe (EBA) me një të dyshuar si bos krimi në bord.

Dyert e gjykatës u hapën rreth gjysmë ore pasi avioni u ul në një aeroport ushtarak 14 km larg. Ndërsa gazetarët kalonin nëpër kontrollet e sigurisë, dëgjuam zhurmën e sirenave jashtë – duke treguar mbërritjen e të akuzuarit.

Salla e gjyqit u mbush plot gjatë 45 minutave në vijim – ndërsa detektivë, prokurorë dhe disa anëtarë të publikut zunë vendet së bashku me median, shkruan BBC.

Që nga momenti që Kinahan hyri në bankën e të akuzuarve, derisa u nxor jashtë 13 minuta më vonë, pothuajse të gjithë po shikonin nga ai – dhe procedurat shoqëroheshin me shtypje të vazhdueshme nga bankat e shtypit.

Hetimet komplekse ndërkombëtare dhe diplomacia kishin çuar në këtë moment. Kinahan u akuzua për një vepër të vetme penale – drejtimin e aktiviteteve të një organizate kriminale midis tetorit 2015 dhe prillit 2017.

Ai nuk kishte nevojë të deklarohej fajtor në këtë fazë të procesit gjyqësor. Por avokatët e tij i kanë thënë më parë BBC-së se akuzat se ai është një bos i krimit janë të rreme dhe nuk kanë bazë provuese.

Ata thanë gjithashtu se ai nuk kishte precedentë penalë apo dënime. Agjencitë e zbatimit të ligjit në të dyja anët e Atlantikut besojnë se ai është një figurë kryesore në Grupin e Krimit të Organizuar Kinahan.

Banda filloi si një operacion trafiku droge në rrugë në Dublin në vitet 1980. Që atëherë, ajo u bë një lojtare ndërkombëtare në krimin e organizuar. Është lidhur me trafikimin e drogës, pastrimin e parave dhe vrasjen.

Ish-zëvendësdrejtori i Agjencisë Kombëtare të Krimit në Mbretërinë e Bashkuar, Roy McComb, tha se grupi ishte rritur globalisht sepse kishte “ambicien dhe shtysën” për ta bërë këtë.

McComb tha se grupi Kinahan kishte krijuar lidhje me organizata të tjera nga Amerika e Jugut, Evropa Lindore, Pakistani dhe Afganistani, të cilat ishin të përfshira në “shpërndarjen me shumicë” të drogës.

Ai tha se karteli u bë grupi i krimit të organizuar nga i cili shkohej për të lëvizur sasi të mëdha narkotikësh nëpër Evropë. McComb shpjegoi se ata shiheshin si një kërcënim për stabilitetin e dollarit amerikan, sepse po tregtonin me këtë monedhë.

Në vitin 2022, SHBA-të ofruan një shpërblim prej 5 milionë dollarësh për informacion në lidhje me Kinahan, babain e tij Christopher Senior dhe vëllain Christopher Junior.

Organizata kishte tërhequr më parë vëmendjen e medias globale në vitin 2016, si rezultat i një grindjeje të egër me një bandë tjetër irlandeze të njohur si organizata Hutch. Gjatë atij viti, Kinahan u shënjestrua nga persona të armatosur në një hotel në veri të Dublinit.

Një burrë u vra në atë incident. Gjatë muajve të dhunës midis bandave, u vranë 18 persona. Kinahan u largua nga Irlanda menjëherë pas atentatit ndaj tij.

Qeveria irlandeze bëri një përpjekje të madhe diplomatike për të negociuar një traktat ekstradimi me Emiratet e Bashkuara Arabe, i cili u nënshkrua në vitin 2024.

Kinahan është personi i dytë që sillet në Irlandë sipas kushteve të marrëveshjes. I pari ishte Sean McGovern, i cili u përshkrua nga një gjykatës si një “toger i lartë” në grupin Kinahan.

Në qershor, McGovern u dënua me 24 vjet burg pasi u deklarua fajtor për dy akuza për drejtimin e një organizate kriminale.

Ekstradohet nga Dubai në Irlandë një nga kriminelët më të rrezikshëm në botë, përfundon në burg

The post Nga Dubai në një gjykatë të Dublinit, si u kthye në Irlandë shefi i dyshuar i kartelit Daniel Kinahan appeared first on Euronews Albania.

Situata e zjarreve në bashkinë e Krujës mbetet aktive. Terreni i vështirë dhe era e fortë po favorizojnë përhapjen e flakëve, duke mbajtur në gadishmëri strukturat e emergjencave civile, zjarrfikëset dhe Forcat e Armatosura.

Pasditen e sotme është regjistruar një riaktivizim në lagjen Abaze, aty ku vetëm dy ditë më parë nisi vatra që rrezikoi drejtpërdrejt qytetin e Krujës. Në terren ndodhen forca të shumta zjarrfikëse, efektivë ushtarakë dhe banorë vendas që po përpiqen të frenojnë përhapjen e flakëve.

Vatra në fshatin Halil vijon të jetë ende aktive. Operacioni për shuarjen e saj po zhvillohet në dy fronte: nga ajri me ndërhyrjen e helikopterëve të Forcave Ajrore dhe nga toka, ku puna e forcave operacionale vështirësohet ndjeshëm nga terreni i thyer.

Sipas Prefekturës së Durrësit, situata në Krastë po shkon drejt vënies nën kontroll. Gjatë ditës, rreth 50 efektivë të Forcave të Armatosura, së bashku me shërbimet zjarrfikëse, janë angazhuar në dy grupe të ndara për të konsoliduar suksesin e arritur gjatë natës, kur zjarri ishte vënë përkohësisht nën kontroll.

Situata e zjarreve nën kontroll në Mallakastër, Ministria e Mbrojtjes ndan pamjet (VIDEO)

The post Disa vatra zjarri aktive në Krujë, ndërhyrje nga toka dhe ajri appeared first on Euronews Albania.

Poezitë e pavdekshme të Lasgush Poradecit, si “Më zu një mall”, “Malli”, “U patmë nisur”, “Vallja e Yjeve”, “Ku shtrohet vala” dhe “Poradeci”, janë bërë burim frymëzimi për kantautorin pogradecar Xhon Jesku, i cili ka krijuar gjashtë këngë të reja të mbështetura në lirikat e poetit të madh.

Sipas vetë artistit, kjo është një punë e vështirë dhe një përgjegjësi e madhe, pasi kthimi i vargjeve të Lasgushit në tinguj kërkon ndjeshmëri artistike dhe respekt maksimal për veprën e lirikut të madh shqiptar.

Pjesë e koncertit “Valsi i Yjeve” ishte edhe vajza e Lasgush Poradecit, Maria Gusho, e cila e ndoqi koncertin me emocione të forta. Ajo u shpreh e lumtur që Xhon Jesku ka gjetur frymëzim në krijimtarinë e babait të saj dhe ka sjellë një interpretim të ri muzikor të poezive të tij.

Një nga poezitë e përzgjedhura, “Poradeci”, është punuar me synimin që të shndërrohet në himnin e qytetit dhe të bëhet pjesë e aktiviteteve dhe eventeve të ndryshme kulturore të Pogradecit. Kjo nismë synon të afrojë brezat e rinj me trashëgiminë poetike të Lasgush Poradecit dhe ta mbajë të gjallë frymën e tij artistike në jetën kulturore të qytetit.

The post Poezitë e Lasgush Poradecit kthehen në këngë nga kantautori Xhon Jesku appeared first on Euronews Albania.

Një ndër kriminelët më të rrezikshëm në botë, Daniel Kinahan, ka kaluar natën e parë në një burg të Irlandës, pasi u ekstradua nga Dubai.

49-vjeçari, i konsideruar një ndër krerët e grupit kriminal të njohur si Karteli Kinahan, u paraqit në gjykatë për një seancë 13-minutëshe, në fund të së cilës u la në qeli deri më 5 tetor.

Një avion qeveritar irlandez që transportonte Kinahan u ul në Dublin mbrëmjen e së dielës dhe me të zbritur, Kinahan-it iu vunë prangat dhe iu komunikua akuza.

Prej aerodromit, ai u shoqërua nën masa të rrepta sigurie për në selinë e Gjykatës së Drejtësisë Penale të kryeqytetit irlandez.

Salla e gjyqit ishte e tejmbushur me gazetarë, gjyqtarë, prokurorë dhe oficerë policie. Vetë Kinahan nuk kishte përfaqësim ligjor dhe me ironi i tha trupës gjykuese se nuk kishte kohë që të merrej me këtë punë.

Kinahana u arrestua në prill në Emiratet e Bashkuara Arabe. Fillimisht ai e apeloi ekstradimin, por përpjekjet e tij dështuan.

Agjencia Kombëtare e Antikrimit në Mbretërinë e Bashkuar e konsideronte Kartelin Kinahan përgjegjës për trafikimin e tonelatave kokainë dhe armëve të zjarrit nëpër botë, si dhe për një duzinë vrasjesh të kryera në Irlandë për shkak të përplasjes me bandat e tjera.

Por 49-vjeçari nuk kërkohej vetëm nga autoritetet irlandeze. Departamenti amerikan i Thesarit e kishte përshkruar organizatën kriminale të tij si ndër më të rrezikshmet në botë dhe në prill të 2022-shit, administrata amerikane e sanksionoi.

Irlanda ka një marrëveshje dypalëshe ekstradimi me Emiratet e Bashkuara Arabe, që përfshin edhe Dubain. Ajo u nënshkrua në fund të 2024-s dhe hyri në fuqi në maj të 2025-s.

The post Ekstradohet nga Dubai në Irlandë një nga kriminelët më të rrezikshëm në botë, përfundon në burg appeared first on Euronews Albania.

Dy dronë u konstatuan mbi një bazë ushtarake në perëndim të Gjermanisë, vetëm pak ditë pasi një pajisje eksplozive u gjet në aeroportin e Lajpcigut.

Forcat e armatosura gjermane konfirmuan se dronët u vunë re mbrëmjen e së enjtes në bazën Mechernich, në afërsi të qytetit të Bonit, ku ndodhen përbërës të sistemeve amerikane të mbrojtjes “Patriot”.

Një zëdhënës i komandës së përgjithshme deklaroi se policia ushtarake u dërgua në vendin e ngjarjes, përpara se çështja t’i kalonte në dorëzim policisë lokale.

Bëhet fjalë për shembullin më të fundit të dronëve që gjenden në afërsi të bazave apo aeroporteve në vendet evropiane që mbështesin Ukrainën në luftën me Rusinë, mbi të cilën bien edhe dyshimet. Vetë Moska ka mohuar vazhdimisht çdo përfshirje.

Ministri gjerman i Brendshëm, Alexander Dobrindt, tha të dielën për gazetën “Bild” se Gjermania është kthyer në një objektiv të rregullt të sulmeve me qëllim destabilizimin.

“Ne nuk jemi në luftë, por jemi kthyer në objektiv të përditshëm të një lufte hibride”, deklaroi Dobrindt.

Aktualisht, Gjermania po heton se si një dron i ngarkuar me lëndë shpërthyese arriti deri në një pistë të aeroportit të Lajpcigut, që përdoret nga NATO, ushtria gjermane dhe shërben si bazë për avionët e linjës ukrainase “Antonov”.

Ushtria gjermane refuzoi të komentonte se në ç’fazë ndodheshin hetimet mbi çështjen në fjalë.

Një sërë rastesh të ngjashme të verifikuara në hapësirën ajrore evropiane vitin e kaluar alarmuan kontinentin e vjetër, duke detyruar Bashkimin Evropian të diskutojë ngritjen e një sistemi të përbashkët anti-dron.

Disa vende të Unionit kanë fajësuar Rusinë për incidentet në fjalë, me Kremlinin që ka mohuar përgjegjësinë dhe i ka cilësuar akuzat si “absurde”.

The post Dronë të paidentifikuar mbi bazën ushtarake gjermane, Berlini në alarm appeared first on Euronews Albania.

Edhe pse kanë kaluar më shumë se 48 orë nga ndërprerja e seancës së së shtunës, pas incidentit me vezët ndaj Albin Kurtit, ende nuk ka një indikacion se kur do të thirret vazhdimi i seancës konstituive. Kryesuesi Avni Dehari ka akuzuar deputetët e opozitës se nuk duan marrëveshje, ndërsa Kurti u ka bërë sërish thirrje partive parlamentare të ulen në dialog.

Kreu i Vetëvendosjes tha se është në komunikim me LDK-në, në përpjekje për të arritur një marrëveshje politike dhe për të shmangur zgjedhjet e reja. Sipas Kurtit, qytetarët nuk duan një proces të ri zgjedhor, por një zgjidhje politike për ngërçin institucional.

“Jemi në komunikim dhe do të përpiqemi çdo ditë që të arrijmë marrëveshje politike, në mënyrë që të shmangim zgjedhjet e panevojshme e të paarsyeshme, sepse ato vetëm sa do të përsëriten. U bëj thirrje edhe njëherë liderëve të partive të tjera që të diskutojmë e të merremi vesh, sepse qytetarët nuk duan zgjedhje, por zgjidhje, e zgjidhja është marrëveshja politike”, është shprehur Kurti.

Përballë deklaratave se procesi institucional po zhvillohet në kundërshtim me Kushtetutën, ministri i Jashtëm në detyrë, Glauk Konjufca, tha se Vetëvendosje nuk vlerëson se ka shkelje të aktit më të lartë juridik. Ai u bëri thirrje partive opozitare që, nëse kanë pretendime për shkelje, ta dërgojnë çështjen në Gjykatën Kushtetuese.

“Ne nuk mendojmë që është shkelur Kushtetuta, për shkak të këtyre momenteve dhe proceseve prej zgjedhjeve të shkurtit, ka qenë duke u interpretuar. Nuk është dramatike, është pjesë e formësimit të mëtutjeshëm kushtetues të vendit tonë. Kur do të thirret seanca, nuk mund ta caktoj unë”, është shprehur Konjufca.

Deklaratat u bënë pas hapjes së Konferencës së Ambasadorëve në Prishtinë. Në këtë aktivitet, Kurti e cilësoi Serbinë si rrezikun më të madh për sigurinë e Kosovës, ndërsa presidentja në detyrë, Albulena Haxhiu, kritikoi deklaratat e presidentit serb Aleksandar Vuçiq për mundësinë e ndryshimit të rrjedhës së lumit Ibër.

“Një tjetër shqetësim serioz që duhet të adresohet me partnerët tanë janë edhe deklaratat e fundit të Vuçiqit për mundësinë e ndryshimit të rrjedhës së lumit Ibër. Siç e dini, Ibër-Lepenci dhe liqeni i Ujmanit janë pjesë e sistemit jetik për furnizim me ujë, për energjinë, bujqësinë dhe jetën e qindra mijëra qytetarëve të Kosovës. Ndërhyrja e njëanshme në rrjedhat ujore do të kishte pasoja shumë më tej përtej çështjeve teknike. Do të prekte sigurinë ujore, energjetike, mjedisore dhe njerëzore të Kosovës. Diplomatët tanë duhet t’i bëjnë të njohura këto deklarata në vendet ku shërbejnë”, është shprehu Haxhiu.

Në konferencën me ambasadorët e Kosovës nëpër botë, Haxhiu u kërkoi diplomatëve që t’u përcjellin partnerëve ndërkombëtarë edhe shqetësimet e Kosovës për dëshmitë e krimeve të luftës. Ndërkohë, në planin e brendshëm, mbetet ende e paqartë kur do të rifillojë seanca dhe nëse partitë do të arrijnë një marrëveshje për zhbllokimin e institucioneve.

The post Kosova pa datë për vazhdimin e seancës, Kurti: Marrëveshje për të shmangur zgjedhjet appeared first on Euronews Albania.