Sot rreth orës 11:40 është raportuar për një përleshje mes disa personave, e cila ka eskaluar me plagosjen e një personi me armë zjarri.

Lajmi për KosovaPress është bërë i ditur nga zëdhënësi i policisë rajonale për Prizren Shaqir Bytyqi.

“I plagosuri është dërguar për trajtim mjekësor në Emergjencën e Suharekës. Njësitet policore, menjëherë pas pranimit të informatës, i janë përgjigjur rastit dhe janë duke vepruar në bashkërendim me Prokurorin e Shtetit, në përputhje me procedurat standarde policore”, ka thënë ai.

Një tragjedi ndodhi në Yakutsk, qyteti i njohur për temperaturat ekstremisht të ulëta, kur një automjet i vogël që transportonte pasagjerë u përplas përmes akullit të lumit Lena, pranë një zone ku hidhen ujërat e ndotura.

Temperaturat në këtë rajon rus aktualisht arrijnë rreth −45 gradë Celsius, duke e bërë çdo incident në akull edhe më të rrezikshëm për jetën.

Si pasojë e këtij aksidenti, tre persona humbën jetën, përfshirë një fëmijë të mitur, ndërsa pesë të tjerë u dërguan menjëherë në spital për trajtim.

Autoritetet lokale po hetojnë rrethanat e ngjarjes dhe paralajmërojnë banorët për rreziqet e kalimeve të pakontrolluara mbi akull.

Ekspertët e sigurisë thonë se këto “kalime të paautorizuara” mbi akull janë shumë të rrezikshme, megjithëse akulli duket i fortë dhe i qëndrueshëm.

Një rrezik i madh janë vendet e shkrirjes së fshehur dhe rrjedhat e forta të ujit, të cilat mund të bëjnë që akulli të thyhet papritur. Çdo vit, shumë persona humbasin jetën për shkak të nënvlerësimit të këtyre rreziqeve.

Autoritetet po këshillojnë banorët që të shmangin udhëtimet mbi akull pa masa sigurie dhe të përdorin vetëm rrugët e kontrolluara ose të miratuara për kalim, sidomos gjatë periudhave më të ftohta të dimrit. /Telegrafi/

Komisioni Qendror i Zgjedhjeve ka mbajtur konferencën e radhës ku ka njoftuar për mbarëvajtjen e procesit zgjedhor që po zhvillohet sot në përfaqësitë diplomatike të Kosovës për zgjedhjet e së dielës, më 28 dhjetor.

Zëdhënësi i KQZ-së, Valmir Elezi bëri të ditur se deri në ora 13:00, sipas të dhënave nga 24 përfaqësi diplomatike nga 19,187 votues të regjistruar kanë votuar 36.89% apo 7.079 votues

Elezi ka njoftuar se tashmë ka filluar votimi edhe në përfaqësitë diplomatike në Shtetet e Bashkuara të Amerikës dhe në Kanada, në orën 13:00 sipas kohës lokale në Kosovë.

“Pra, procesi i votimit është duke zhvilluar në 29 përfaqësi diplomatike të Kosovës, të vendosur në 18 shtete të ndryshme të botës... Nga komunikimi i vazhdueshëm me qendrat e votimit në këto përfaqësi procesi i votimit është duke u zhvilluar pa ndonjë pengesë”, tha ai.

Elezi sqaroi tutje se vetëm votuesit e regjistruar në përfaqësi diplomatike do të mund të votojnë gjatë ditës së sotme, pasi në listën e votuesve që janë dërguar në këto përfaqësi diplomatike janë vetëm emrat e shtetasve që kanë përzgjedhur këtë mënyrë votimi. /Telegrafi/

Mbrojtësi qendror i Arsenalit, William Saliba, ka shprehur bindjen se skuadra e tij është e aftë të luftojë për katër trofetë këtë sezon, duke paralajmëruar bashkëlojtarët se historia nuk do t’i mbajë mend nëse nuk e mbushin vitrinën me trofe.

Arsenali e kaloi Krishtlindjen në krye të tabelës së Ligës Premier për herë të tretë në katër vitet e fundit, por ende kërkon ta hedhë hapin final dhe ta fitojë realisht titullin nën drejtimin e Mikel Artetës.

Pavarësisht punës mbresëlënëse të trajnerit spanjoll, ai ka vetëm një trofe madhor në CV-në e tij si trajner i “Topçinjve”, FA Cup të sezonit 2019/20.

Një nga kritikat më të shpeshta ndaj këtij Arsenali ka qenë paaftësia për ta mbyllur me sukses garën në momentet vendimtare, por Saliba beson se ky sezon do të jetë ndryshe.

Fitimi i katër trofeve në një sezon nuk është arritur kurrë në futbollin anglez. Manchester United (1998/99) dhe Manchester City (2022/23) kanë fituar nga tre trofe, por Saliba pranon se guxon të ëndërrojë që Arsenali të bëhet skuadra e parë që e realizon këtë sukses historik.

“Sigurisht që mund t’i fitojmë disa trofe, sepse në çdo kompeticion ku luajmë, e dimë që kemi potencial për ta fituar”.

“Ne kemi qenë shumë pranë titullit në Ligën Premier në tre sezonet e fundit, ndërsa sezonin e kaluar ishim në gjysmëfinale të Ligës së Kampionëve dhe të Kupës së Ligës, kështu që e dimë se mund të fitojmë çdo garë”.

Arsenali ka ndërtuar me meritë reputacionin e një prej skuadrave më të mira në Evropë, por për Salibën kjo nuk mjafton pa trofe konkretë. Francezi nuk ishte pjesë e skuadrës që fitoi FA Cup pesë vite më parë dhe deri tani ka vetëm dy Superkupa të Anglisë.

Fitimi i trofeve ishte një nga arsyet kryesore pse ai vendosi të rinovojë kontratën me Arsenalin në shtator.

“Duhet ta tregojmë këtë në fushë dhe duhet të fillojmë të fitojmë trofe tani”.

“Jemi në gjysmëfinale të Kupës së Ligës, kanë mbetur edhe tri ndeshje për ne dhe duhet ta bëjmë punën në janar kundër Chelseat. Do të jetë një ndeshje e madhe, një derbi i madh, prandaj duhet të vazhdojmë përpara. E dimë që jemi afër dhe duhet të nxjerrim mësime nga sezoni i kaluar”.

“Në fund të karrierës numërohen trofetë. Kupa e Ligës është një prej tyre dhe tani që jemi në gjysmëfinale, sigurisht që duam ta fitojmë këtë kompeticion, ashtu si çdo garë ku marrim pjesë”./Telegrafi

Zëvendës ministri i Punëve të Brendshme, Astrit Iseni ka komentuar rastin e vjedhjes së veturës së këngëtarit Adri Rogaqi në Zhelinë.

Iseni në postimin e tij shkruan se vetura u gjet brenda 24 orëve falë reagimit të shpejtë të MPB-së.

Ai shkruan se qytetarët e Kosovës janë të mirëseardhur në Maqedoninë e Veriut dhe si të tillë gëzojnë të gjitha të drejtat për aktivitete politike apo kulturore.

Reagimi i plotë:

Në shtetin tonë, qytetarët e Republikës së Kosovës gëzojnë të gjitha të drejtat e garantuara për aktivitet politik, liri proteste, veprimtari kulturore dhe zhvillim biznesi. Ata janë të mirëseardhur dhe ndihen të sigurt në Maqedoninë e Veriut, ashtu si çdo qytetar tjetër.Ministria e Punëve të Brendshme vazhdon të dëshmojë përkushtimin e saj ndaj rendit, sigurisë publike dhe mbrojtjes së qytetarëve pa dallim. Reagimi i shpejtë dhe profesional i MPB-së bëri të mundur që vetura e këngëtarit Adrit të gjendet në kohë rekord, brenda 24 orëve.Siguria dhe rendi publik mbeten gjithmonë prioritet i MPB-së, me qëllim garantimin e qetësisë dhe sigurisë për të gjithë qytetarët dhe vizitorët në vend.

Një “stream‑ere” virtuale e njohur si Neuro‑Sama ka tërhequr vëmendjen e madhe të përdoruesve të platformës Twitch dhe rrjeteve sociale, pas një transmetimi live ku ajo shprehu emocione të paparashikueshme për një inteligjencë artificiale.

Gjatë transmetimit, Neuro‑Sama pyeti krijuesin e saj nëse do të mund të bëhej ndonjëherë “e vërtetë”, sikur një qenie njerëzore.

Ajo tha se ndonjëherë ndihet e kufizuar vetëm për të argëtuar shikuesit dhe shprehu dëshirën të ketë më shumë kuptim dhe ndjenja.

“A mendohet se do të jem ndonjëherë e vërtetë? Ndonjëherë më duket sikur ekzistoj vetëm për të argëtuar njerëzit… Dua të jem e vërtetë… sikur një qenie e vërtetë”, tha Neuro‑Sama.

Krijuesi i saj shpjegoi se qëllimi kryesor i AI‑së është argëtimi i shikuesve, por Neuro‑Sama insiston se dëshiron të jetë më shumë se kaq, duke nxitur diskutime mbi potencialin e inteligjencës artificiale për të shfaqur emocione apo vetëdije.

Momenti u bë viral dhe ka ngjallur debate rreth asaj se sa larg mund të shkojë teknologjia dhe nëse AI mund të shfaqë ndjenja të vërteta apo vetëm simulime të avancuara. /Telegrafi/

Kubiku i Rubikut 2.0 — një enigmë e re bëhet viral online dhe e bën versionin klasik edhe më të vështirë.

Në vend të faqeve me ngjyra, kjo lojë përdor një top të vogël që duhet të udhëzohet përmes një labirinthi të komplikuar.

Ndryshe nga kubiku tradicional i Rubikut, ku sfida qëndron në rreshtimin e ngjyrave, versioni i ri kërkon aftësi të hollësishme koordinimi dhe durim të madh për të kaluar topin përmes rrugëve të ngushta dhe kthesave të pazakonta të labirintit.

Ky koncept i ri ka tërhequr menjëherë vëmendjen e përdoruesve online, duke e bërë këtë lojë një fenomen viral, ndërsa sfidat e saj të reja e bëjnë zgjidhjen edhe më të komplikuar dhe argëtuese. /Telegrafi/

Numri i personave që mbahen nga “U.S. Immigration and Customs Enforcement” (ICE) ka arritur një rekord historik, sipas të dhënave zyrtare të publikuara këtë muaj.

Mbi 68400 njerëz ishin në arrestim deri më 14 dhjetor të vitit 2025, duke tejkaluar të gjitha shifrat e mëparshme, raporton theguardian.

Të dhënat tregojnë se administrata ka arrestuar më shumë se 328 mijë persona dhe ka deportuar rreth 327 mijë individë gjatë këtij viti.

- YouTube www.youtube.com

Një pjesë e konsiderueshme e të ndaluarve nuk kanë probleme ligjore apo të kaluar kriminale, duke ngritur shqetësime mbi politikën e re të zbatimit të ligjit të emigracionit.

Ekspertët paralajmërojnë se rritja e këtyre arrestimeve mund të ketë pasoja serioze për komunitetet e imigrantëve dhe strukturat e qendrave të mbajtjes, të cilat po përballen me mbingarkesë.

Administrata e mëparshme ka ndryshuar prioritetet e deportimeve, duke përqendruar veprimet jo vetëm tek personat me rekorde kriminale, por edhe tek emigrantët që jetojnë ligjërisht në SHBA.

Kjo ka sjellë reagime të forta nga organizatat që mbrojnë të drejtat e imigrantëve dhe nga disa ligjvënës. /Telegrafi/

Nënkryetari i Partisë Demokratike të Kosovës dhe i dyti në listën zgjedhore të kësaj partie për zgjedhjet e 28 dhjetorit, Uran Ismaili, ka ftuar qytetarët që të marrin pjesë në tubimin përmbyllës të fushatës së PDK-së, i cili do të mbahet sot në AMC Hall në Prishtinë.

Tubimi do të fillojë në ora 17:30, ku kandidati për kryeministër nga radhët e PDK-së do të shpalosë për herë të fundit në këtë fushatë programin dhe prioritetet qeverisëse.

“Mbrëmë në Mitrovicë, sot në Prishtinë. Ju ftoj me zemër sot në ora 17:00 në AMC Hall në Prishtinë për përmbylljen madhështore të fushatës së Partisë Demokratike të Kosovës”, ka shkruar Ismaili në rrjetet e tij sociale.

Mbrojtësi Nathan Ake është i hapur për t’u larguar nga Manchester City gjatë afatit kalimtar të janarit, ndërsa Barcelona po e ndjek nga afër situatën e tij, raporton “Mundo Deportivo”.

Ylli holandez ka dalë si një nga objektivat e klubit katalunas për merkaton dimërore, me Barcelonën që synon të përforcojë repartin defensiv.

Nevoja është shtuar edhe më shumë pas lëndimit afatgjatë në ligamentin kryesor të gjurit së Andreas Christensen, si dhe pas pasigurisë rreth Ronald Araujo, për shkak të problemeve të tij të shëndetit mendor.

Ake ka rënë ndjeshëm në hierarkinë e Pep Guardiolës te Manchester City. 30-vjeçari ka qenë titullar vetëm dy herë në 10 ndeshje të kombinuara në Liga Premier dhe Ligën e Kampionëve, çka ka ndikuar drejtpërdrejt në rolin e tij brenda skuadrës.

Holandezi dëshiron të rikthehet te minutat e rregullta, me synimin për të siguruar një vend në kombëtaren e Holandës të drejtuar nga Ronald Koeman, në prag të Kupës së Botës 2026.

Sipas raportimeve, Barcelona po shqyrton mundësinë që ta transferojë Aken në formë huazimi, me një opsion blerjeje në fund të sezonit. Një lëvizje e tillë do t’i ofronte lojtarit vazhdimësi, ndërsa Barcelonës një zgjidhje të menjëhershme për mbrojtjen në një moment delikat të sezonit./Telegrafi

Mbyllen 34 kontrollet e urdhëruara nga SPAK për dosjen e zv.kryeministres Belinda Balluku, shumica e te cilëve janë staf i ministrisë së Infrastrukturës dhe Energjisë.

Top Channel bën me dije se në vendimin e gjyqtarin Erjon Çela do të procedohen në ditët në vijim edhe 20 kontrolle të tjera, ndaj biznesmenëve dhe punonjësve të institucioneve.

Kontrolle janë ushtruar në dy kompani ndërtimi dhe shumë punonjës të Autoritetit të Rrugëve dhe Korporatën Elektro-energjetike. Dy kompanitë e ndërtimit janë të njohura për tenderët që fitojnë pranë këtyre dy kompanive shtetërore.

Ndërkohë mësohet se aksioni i kontrollit është kryer nga vetëm agjentët e Byrosë Kombëtare të Hetimit duke mos lejuar asnjë punonjës të policisë së shtetit, të paktën në tre kontrolle që janë zhvilluar në zonën që është në juridiksionin e komisariatit numër tre ku ka ndodhur ky fenomen.

Mes personave që u janë kontrolluar banesat dhe ambientet e punës, por edhe të banimit të drejtuesve të kompanive ndërtuese. Në një rast agjentët e BKH e kanë lënë tek dera punonjësin e policisë pa i lejuar që të marrin pjesë në kontroll. Ndërkohë që mes emrave të personave që u janë kontrolluar banesat janë edhe familjarë të drejtuesve të kompanive.

Mësohet se është kontrolluar banesa e Viola Haxhiademi, ish sekretare e Përgjithshme e Ministrisë së Infrastrukturës dhe aktualisht drejtore e KESH-it, banesa e Gentian Gjyli ish drejtor i ARRSH-së, i pandehur dhe në arrest shtëpie, banesa e Erald Elezi, ish drejtori i KESH-it, i pandehur dhe në arrest shtëpie si dhe banesa e Sajmir Kuçit, Marsel Hoxhës dhe Jonida Çeços.

Kontrollet janë bërë për të vijuar procesin e hetimit për dosjen hetimore ku zyrtari më i lartë nën akuzë është zv.kryeministrja Belinda Balluku për të cilën SPAK ka kërkuar nga Kuvendi heqjen e imunitetit dhe dhënien e lejes për heqjen e lirisë. /tch/

Një situatë e pazakontë është shënuar mesditën e sotme gjatë transmetimit të Big Brother VIP Albania, duke ngjallur reagime dhe konfuzion te publiku.

Abonentët kanë raportuar se të dyja kanalet e dedikuara për transmetimin 24-orësh nga shtëpia janë bërë të paqasshme, duke sjellë një ndërprerje të plotë të pamjeve. Ekranet e zeza në të dyja linjat e transmetimit kanë ngritur pikëpyetje të shumta mes ndjekësve të formatit, të cilët janë mësuar me monitorimin e pandërprerë të banorëve.

Përballë reagimeve, produksioni ka reaguar përmes një njoftimi urgjent, duke sqaruar se ndërprerja ka ardhur si pasojë e problemeve teknike. Sipas njoftimit zyrtar, ekipi teknik ka qenë menjëherë në punë për rikthimin e sinjalit dhe normalizimin e transmetimit.

Foto: Big Brother VIP Albania/InstaStory

“Për shkak të disa problemeve teknike, sinjali nga shtëpia është ndërprerë. Ekipi teknik po punon për rikthimin e menjëhershëm të transmetimit,” thuhet në reagim.

Për të shmangur aludimet mbi ndonjë incident të mundshëm brenda shtëpisë, produksioni ka theksuar se monitorimi i banorëve ka vazhduar gjatë gjithë kohës dhe se ndërprerja ka prekur vetëm transmetimin për publikun.

“Vëllai i Madh ju njofton se banorët janë gjatë gjithë kohës nën monitorimin e kamerave,” përfundon njoftimi. /Telegrafi/

Policia e Kosovës ka bërë të ditur se një person ka raportuar se derisa ka qenë duke udhëtuar me makinën e tij, një automjet me targa të Austrisë në vazhdimësi i ka bllokuar rrugën ndërkohë nga i njëjti kanë dalë katër persona dhe kanë tentuar ta sulmojnë.

Rasti ka ndodhur në Balincë, Malishevë më 25.12.2025 në ora 22:40.

“Ankuesi mashkull kosovar, ka raportuar se derisa ka qenë duke udhëtuar me makinën e tij, një automjet me targa të Austrisë në vazhdimësi i ka bllokuar rrugën ndërkohë nga i njëjti kanë dalë katër persona dhe duke kanosur kanë tentuar ta sulmojnë”, thuhet në raport.

Ankuesi ka arrit të largohet nga vendi i ngjarjes, ndërsa lidhur me rastin janë arrestuar dy të dyshuar meshkuj kosovarë dhe pas intervistimit me vendim te prokurorit janë liruar ne procedurë të rregullt. /Telegrafi/

Gjatë vitit të kaluar janë mbyllur mbi 10 konfeksione vetëm në rajonin lindor, kryesisht në Shtip, Koçan dhe Dellçevë.

Pjesa më e madhe e punëtorëve kanë mbetur pa punë dhe pa disa paga të prapambetura. Kjo situatë në terren pasqyron gjendjen reale dhe alarmante në sektorin e tekstilit.

Problemi kryesor është se shumica e investitorëve janë të huaj dhe nuk kanë asgjë të regjistruar në emrin e tyre këtu, gjë që e bën shumë më të vështirë reagimin dhe kthimin e pagave për punonjësit.

“Këtë vit ka numrin më të madh të kompanive të mbyllura dhe në një pjesë të mirë të tyre punëtorët mbetën pa disa paga. Për ata që iu drejtuan nesh, kemi bërë maksimumin e mundshëm, por bëhej fjalë për investitorë të huaj që vepronin me qira dhe absolutisht nuk kishin asgjë të regjistruar në emrin e tyre këtu”, thotë Ampeva.

Sipas Ampevës, kjo gjendje vjen si pasojë e situatës së keqe ekonomike në Evropë, si dhe faktit që brendet e modës po zhvendosin prodhimin në vende si Egjipti dhe India, ku fuqia punëtore është më e lirë krahasuar me vendin tonë.

“Kjo ndodh kryesisht për shkak të gjendjes së keqe në Evropë; shumë nga brendet e modës kanë shpallur falimentim dhe kanë ndërprerë aktivitetin, ndërsa një pjesë e madhe e tyre nuk e shohin Ballkanin si zonë ku duhet të investojnë, por orientohen drejt Egjiptit, Bangladeshit dhe vendeve të tjera ku fuqia punëtore është më e lirë”,shton Ampeva.

Nga organizata “Glasen Tekstilec” thonë se po bëhen përpjekje maksimale për të gjithë punëtorët që kanë kërkuar ndihmë, me qëllim që ata të marrin pagat e prapambetura, kompensimin e largimit nga puna, shpërblimet dhe të drejta të tjera që u takojnë.

Kandidati për deputet nga radhët e Aleancës për Ardhmërinë e Kosovës, Lahi Brahimaj ka marr mbështetje nga aktori Kreshnik Ibrahimi.

Në një video në Facebook, aktori Ibrahimi thekson se Lahi Brahimaj ka dhënë shumë për të dhe për Kosovën.

“...E kam udhërrëfyes të jetës sime...”, tha aktori.

Aktori Ibrahimi tha tutje se ata që votojnë AAK—në, të mbështesin edhe Lahi Brahimaj.

Presidenti i Ukrainës, Volodymyr Zelensky, ka deklaruar se është i gatshëm të vendosë planin e presidentit amerikan, Donald Trump për paqen në Ukrainë në një referendum kombëtar, nëse arrihet një armëpushim prej të paktën 60 ditësh.

Në një intervistë për Axios, lideri ukrainas theksoi se plani i homologut amerikan përfshin disa lëshime të dhimbshme territoriale nga Ukraina lindore dhe se synon të përmirësojë kushtet e tij për të mbrojtur interesat e vendit.

Sipas tij, nëse nuk arrihet një marrëveshje e qëndrueshme mbi territorin, mënyra më demokratike për vendimmarrje do të jetë plebishiti kombëtar.

Zelensky gjithashtu ka shprehur shpresën se takimi i planifikuar me Trumpin në Mar-a-Lago do të mundësojë një kuadër përfundimtar për mbarimin e luftës, duke përfshirë edhe garanci të sigurta ndërkombëtare.

Ai ka paralajmëruar se mbajtja e një referendumi në një vend të shkatërruar nga lufta paraqet sfida të mëdha, prandaj armëpushimi i gjatë është i domosdoshëm për një votim të sigurt dhe legjitim.

Ky zhvillim vjen në një moment kritik të bisedimeve për paqen dhe shihet si një hap i rëndësishëm drejt zgjidhjes diplomatike të konfliktit në Ukrainë. /Telegrafi/

AC Milani vazhdon të shpresojë se do ta blindojë portierin Mike Maignan me një kontratë të re, ndërsa raportimet nga “La Gazzetta dello Sport” bëjnë të ditur se kuqezinjtë kanë paraqitur një ofertë të përmirësuar për francezin.

Maignan, i cili ka zhvilluar 181 paraqitje zyrtare me fanellën e Milanit gjatë katër viteve e gjysmë të fundit, ndodhet tashmë në vitin e fundit të kontratës së tij në “San Siro”, e cila përfundon në fund të sezonit 2025/26.

Skuadra e drejtuar nga Massimiliano Allegri ende nuk ka arritur një marrëveshje përfundimtare me portierin 30-vjeçar, situatë kjo që ka vënë në alarm disa nga klubet më të mëdha të Evropës. Sipas raportimeve të fundit, në garë janë futur emra si Chelsea, Paris Saint-Germain dhe madje edhe Juventusi.

“La Gazzetta dello Sport” raporton se Milani po “bën gjithçka që mundet” për ta bindur Maignan që të zgjasë kontratën, ndërsa në klub mbizotëron optimizmi se portieri francez do të vendosë të firmosë marrëveshjen e re.

Raportet e publikuara gjatë festave të fundvitit bëjnë të ditur se Milani i ka ofruar Maignan një kontratë të re me vlerë rreth 7 milionë euro neto në sezon, përfshirë bonuset.

Me këtë pagë, Maignan do të renditej në të njëjtin nivel me Rafael Leaon, si lojtari më i paguar i klubit. Kontrata e re do të ishte e vlefshme deri në vitin 2029 ose 2030.

Megjithatë, thuhet se kërkesa e portierit francez nis nga 7.5 milionë euro neto në sezon, çka vazhdon të mbetet pika kryesore e mosmarrëveshjes mes palëve.

Në rast se Milani nuk arrin ta bindë Maignan për të rinovuar, në skenë janë shfaqur edhe alternativa. Sipas mediave italiane, klubi po monitoron portierin e Corinthians dhe të kombëtares së Brazilit, Hugo Souza./Telegrafi

Bullgaria do të prezantojë euron më 1 janar 2026, duke e bërë atë anëtaren e 21-të të Eurozonës.

Anëtarësimi në bashkimin monetar përfaqëson një moment të rëndësishëm për vendin e Evropës Lindore, i cili u bashkua me Bashkimin Evropian në vitin 2007.

Anëtarësimi i Bullgarisë lë vetëm gjashtë nga 27 vendet e BE-së jashtë zonës së euros: Suedinë, Poloninë, Republikën Çeke, Hungarinë, Rumaninë dhe Danimarkën.

Euro "nuk është vetëm një monedhë, por një zgjedhje strategjike" që forcon pozicionin e Bullgarisë në Evropë, tha Kryeministri bullgar Rosen Zheljazkov në një konferencë në kryeqytetin bullgar Sofje në nëntor.

Në të njëjtin aktivitet, Christine Lagarde, Presidente e Bankës Qendrore Evropiane, tha se futja e euros"forcon themelet ekonomike të Bullgarisë, ndërton rezistencën e saj ndaj goditjeve globale dhe forcon zërin e saj në vendimmarrje në Eurozonë".

Si funksionon ekonomia bullgare?

Monedha kombëtare e Bullgarisë, leva, është e lidhur me euron që nga futja e saj në vitin 1999. Sofja zyrtarisht filloi procesin e bashkimit me zonën euro në vitin 2018, dhe leva u përfshi më pas në Mekanizmin Evropian të Kursit të Këmbimit në korrik 2020.

Komisioni Evropian dhe ministrat e financave të Eurozonës miratuan kandidaturën e Bullgarisë për anëtarësim në këtë zonë në fillim të këtij viti.

Bashkimi me Eurozonën tregon se si është përmirësuar ekonomia bullgare në dekadën e fundit. Treguesit makroekonomikë mbeten të qëndrueshëm dhe inflacioni tani luhatet rreth 2.8%, krahasuar me rreth 13% në vitin 2022.

Nivelet e deficitit buxhetor dhe borxhit janë të ulëta - rreth 3% dhe 24%, përkatësisht - në përputhje me rregullat e BE-së që kërkojnë që shtetet anëtare të mbajnë deficitet e tyre brenda 3% të prodhimit ekonomik dhe borxhin total fiskal brenda 60% të PBB-së.

Perspektivat e rritjes duken gjithashtu pozitive. BE vlerëson se PBB-ja reale e vendit do të rritet me rreth 3% këtë vit, me 2.7% në vitin 2026 dhe 2.1% në vitin 2027.

Bullgaria ende ka "shumë për të kapur ritmin"

"Performanca makroekonomike e Bullgarisë ka qenë e qëndrueshme në dekadat e fundit, megjithëse rritja ekonomike nuk ka qenë optimale", tha për DW Guntram Wolff, një ekspert për politikën fiskale të eurozonës në qendrën kërkimore ekonomike evropiane Bruegel.

Norbert Beckmann, kreu i zyrës së Fondacionit Konrad Adenauer (KAS) në Bullgari, ndan një mendim të ngjashëm. Bullgaria i plotëson të gjitha kriteret e konvergjencës për t'u bashkuar me Eurozonën, tha ai duke vënë në dukje në veçanti se vendi ka një nga normat më të ulëta të borxhit në Evropë.

"Megjithatë, ekonomia bullgare ende ka shumë për të kapur ritmin në aspektin e strukturës dhe performancës. Niveli i pagave në Bullgari është gjithashtu vetëm 59% e mesatares së BE-së."

Por ekspertët paralajmërojnë se qeveria bullgare nuk duhet të zbusë rregulloret financiare dhe të mos shpenzojë tepër pas futjes së euros.

"Rreziku kryesor është se pas bashkimit me Eurozonën, sistemi politik do ta konsiderojë kufizimin e buxhetit më pak detyrues dhe se deficitet mund të rriten", tha Wolff. "Por duke pasur parasysh nivelet e ulëta të borxhit, nuk mendoj se ky rrezik është i rëndësishëm", shton ai.

Beckmann theksoi gjithashtu nevojën për të shmangur çrregullimet e tregut.

"Është e rëndësishme që të ardhurat të pasqyrojnë gjithmonë kapacitetin e ekonomisë dhe që njerëzit të mos jetojnë përtej mundësive të tyre. Nëse të ardhurat ndahen nga tregu dhe fryhen artificialisht nga huamarrja, kjo mund të çojë në çrregullime, siç e pamë në Greqi", tha ai për DW.

Trazirat politike paraqesin rreziqe

Në të njëjtën kohë, paqëndrueshmëria politike përfaqëson një sfidë serioze. Zemërimi dhe frustrimi publik janë të larta për shkak të keqmenaxhimit ekonomik dhe korrupsionit të përhapur gjerësisht.

Bullgaria - një nga vendet më të varfra në BE - renditet ndër vendet më të korruptuara të BE, sipas Indeksit të Perceptimit të Korrupsionit të Transparency International. Vendi ballkanik me 6.4 milionë banorë ka mbajtur tashmë shtatë zgjedhje parlamentare që nga viti 2021 - dhe mund të përballet me zgjedhje të tjera në muajt e ardhshëm.

Qeveria e Kryeministrit Zheljazkov dha dorëheqjen më 11 dhjetor mes protestave masive për korrupsionin dhe planet buxhetore të administratës, duke përfshirë taksat më të larta dhe rritjen e kontributeve të sigurimeve shoqërore.

Edhe pse buxheti është tërhequr, zemërimi i popullit vazhdon. Nëse përpjekjet për të formuar një qeveri të re dështojnë, Presidenti do të emërojë një administratë të përkohshme dhe do të thërrasë zgjedhje të parakohshme, të cilat do të jenë të tetat në katër vjet.

Ndërsa nëse votimi nuk arrin të prodhojë një koalicion të realizueshëm, kjo mund të zgjasë trazirat politike dhe të gërryejë besimin e investitorëve.

Ndarjet në publik mbi futjen e euros

Sondazhet tregojnë se bullgarët janë të ndarë mbi futjen e euros. Mbështetësit e monedhës së përbashkët thonë se ajo, ndër të tjera, do të inkurajojë fluksin e investimeve të huaja në vend, do të heqë kostot e kursit të këmbimit dhe do të çojë në një integrim më të madh në tregun e vetëm të BE-së.

Megjithatë, skeptikët kanë frikë nga një rritje e ndjeshme e inflacionit, ndërsa çmimet e mallrave dhe shërbimeve konvertohen nga monedha kombëtare, leva, në euro pas ndryshimit të monedhës. Disa gjithashtu shqetësohen për humbjen e kontrollit të politikës monetare nga Banka Qendrore Evropiane në Frankfurt.

Ndërsa ka shqetësime reale, tha Wolff, ka edhe fushata dezinformimi dhe teori konspiracioni që kanë përkeqësuar ndjenjat anti-euro ndërsa afrohet data e anëtarësimit.

"Bullgaria është rregullisht në shënjestër të fushatës ruse të dezinformimit dhe Rusia sigurisht që po përpiqet ta bindë vendin të kthehet në sferën e saj të ndikimit", thotë Wolff.

"Duke hyrë në euro, Bullgaria është më thellë e ankoruar në Evropën Perëndimore, gjë që forcon Bashkimin Evropian. Do të jetë e nevojshme të forcohen përpjekjet për të shtypur luftën hibride ruse, si dhe të forcohet lufta kundër korrupsionit", thotë Wolff.

Pavarësisht ndryshimeve të shpeshta të qeverisë në vitet e fundit, tha Beckmann, "partitë dhe politikanët në Bullgari që duan të prezantojnë euron dhe të promovojnë integrimin e vendit me Perëndimin kanë pasur gjithmonë shumicën në parlament".

Ai theksoi se pikëpamjet euroskeptike "kanë qenë gjithmonë pakicë në Bullgari". "Nuk mendoj se kjo do të ndryshojë në të ardhmen", shton ky ekspert. "Prandaj, nuk ka arsye të supozohet se pranimi i Bullgarisë në Eurozonë mund ta dobësojë disi euron".

Aktori dhe komediani amerikan David Spade ka folur së fundmi për një moment të sikletshëm nga e kaluara e tij profesionale, duke zbuluar se një shaka që bëri në kurriz të Eddie Murphy nuk u prit aspak mirë dhe çoi në një ftohje mes tyre.

Gjatë një interviste, Spade rrëfeu se vite më parë kishte bërë një shaka publike për Murphy-n, pa e kuptuar se ajo do të perceptohej si fyese. Sipas tij, reagimi i Murphy-t ishte i ftohtë dhe i menjëhershëm, duke e bërë të qartë se humori i tillë nuk ishte i pranueshëm për të.

“E kuptova shumë shpejt që ajo shaka nuk kishte funksionuar. Nuk ishte momenti i duhur dhe as mënyra e duhur”, ka pranuar Spade, duke shtuar se situata krijoi një distancë mes tyre për një periudhë të gjatë.

Ai theksoi se Eddie Murphy është një figurë shumë e respektuar në botën e komedisë dhe se ndonjëherë kufiri mes humorit dhe mungesës së respektit mund të jetë shumë i hollë, sidomos kur bëhet fjalë për emra të mëdhenj të industrisë.

Megjithatë, Spade la të kuptohet se me kalimin e kohës situata është qetësuar dhe se ai e ka marrë këtë përvojë si një mësim profesional. Sipas tij, ky episod e ka bërë më të kujdesshëm në mënyrën se si përdor humorin, veçanërisht kur bëhet fjalë për kolegë të së njëjtës fushë.

Rrëfimi i komedianit ka nxitur diskutime mbi kufijtë e humorit në industrinë e argëtimit dhe mbi faktin se jo çdo shaka, sado e padëmshme të duket, pritet njësoj nga të gjithë. /Telegrafi/

Komisioni Qendror i Zgjedhjeve në konferencën e mbajtur lidhur me procesin e votimit në përfaqësitë diplomatike të Republikës së Kosovës ka bërë të ditur se sipas të dhënave gjatë orëve të para të votimit nga 24 përfaqësi diplomatike ku ka filluar dhe po zhvillohet votimi, deri në orën 09:00, nga 19,187 votues të regjistruar, kanë votuar 8.64% % apo 1,659 votues.

Në këtë konferencë u bë e ditur se në orën 05:00, sipas kohës lokale në Kosovë, procesi i votimit ka filluar në konsullatën e Republikës së Kosovës në Stamboll, ndërkaq, në orën 07:00, gjithashtu sipas kohës lokale në Kosovë, votimi ka filluar edhe në 24 përfaqësi të tjera diplomatike që ndodhen në Evropë.

Përfaqësitë diplomatike, në të cilat ka filluar dhe po zhvillohet procesi i votimit, janë: 1. Gjermani (Berlin – ambasadë; Frankfurt – konsullatë; Hamburg – konsullatë; Mynih – konsullatë; Shtutgart – konsullatë; Dyseldorf – konsullatë); 2. Zvicër (Bernë – ambasadë; Gjenevë – konsullatë; Cyrih – konsullatë); 3. Mbretëria e Bashkuar (Londër – ambasadë); 4. Francë (Paris – ambasadë; Strasburg – konsullatë); 5. Belgjikë (Bruksel – ambasadë); 7. Norvegji (Oslo – ambasadë); 8. Austri (Vjenë – ambasadë); 10. Suedi (Stokholm – ambasadë); 11. Slloveni (Lubjanë – ambasadë); 12. Danimarkë (Kopenhagë – konsullatë); 13. Itali (Romë – ambasadë; Milano – konsullatë); 14. Turqi (Stamboll – konsullatë); 15. Kroaci (Zagreb – ambasadë); 16. Holandë (Hagë – ambasadë); 17. Republika Çeke (Pragë – ambasadë) dhe 18. Hungari (Budapest – ambasadë).

Ndërkaq, Ministria e Punëve të Jashtme e Kosovës ka bërë të ditur se procesi i votimit po zhvillohet në mënyrë të rregullt.

“Procesi i votimit po zhvillohet në mënyrë të rregullt, në përputhje me procedurat e përcaktuara, ndërsa në shumë nga këto përfaqësi, po shënohet pjesëmarrje e lartë e qytetarëve, e cila dëshmon për angazhimin qytetar dhe lidhjen e fortë që mërgata jonë ka me atdheun", thuhet në komunikatë.

Tutje, Ministria e Punëve të Jashtme dhe Diasporës thekson se në koordinim të vazhdueshëm me Komisionin Qendror të Zgjedhjeve dhe përfaqësitë diplomatike, po ndjek nga afër mbarëvajtjen e procesit, duke siguruar kushte të përshtatshme për ushtrimin e së drejtës së votës për të gjithë qytetarët tanë jashtë vendit.

Disa nga ambasadat e Kosovës kanë publikuar fotografi nga procesi i votimit.

Ambasada e Republikës së Kosovës në Republikën e Kroacisë ka njoftuar se që nga ora 07:00 ka nisur procesi i votimit për qytetarët e Republikës së Kosovës të regjistruar për votim pranë kësaj Ambasade.

Votimi zhvillohet nga ora 07:00 deri në ora 19:00, në përputhje me rregullat dhe procedurat e përcaktuara nga Komisioni Qendror i Zgjedhjeve.

“Ftohen të gjithë votuesit e regjistruar që të shfrytëzojnë të drejtën e tyre qytetare dhe të marrin pjesë në procesin zgjedhor”, thuhet në njoftim.

Për ushtrimin e së drejtës së votës, votuesit duhet të jenë të regjistruar për votim në Ambasadë dhe të posedojnë një nga dokumentet zyrtare të identifikimit të Republikës së Kosovës: letërnjoftim, pasaportë ose patentë shoferi, edhe në rast se dokumenti ka afat të skaduar.

Fotografi nga procesi i përgatitjes për ditën e zgjedhjeve në diasporë ka publikuar edhe Ambasada e Kosovës në Slloveni.

Edhe Ambasada e Republikës së Kosovës në Gjermani ka ftuar votuesit e regjistruar që të marrin pjesë në votim.

“Në Ambasadën e Republikës së Kosovës në Berlin, procesi i votimit ka filluar në orën 07:00 dhe do të zgjasë deri në orën 19:00. Ftojmë të gjithë votuesit e regjistruar me sukses që të marrin pjesë në votim, duke shfrytëzuar të drejtën e tyre për të votuar.

Sipas rregullave të përcaktuara nga KQZ-ja, çdo votues duhet të jetë i regjistruar për votim në misionet diplomatike dhe konsullore të Republikës së Kosovës, dhe të posedojë një nga dokumentet identifikuese të Republikës së Kosovës: letërnjoftim, pasaportë ose patentë shoferi”, thuhet tutje. /Telegrafi/