Burimet publike janë të kufizuara. Angazhimi ynë, si Ministri dhe si Qeveri, që nga viti në vit të orientojmë mjete gjithnjë e më të mëdha drejt shkencës dhe kërkimit, tregon vendosmërinë për të ndërtuar një shoqëri të bazuar në dije, inovacion dhe zhvillim të qëndrueshëm, tha ministrja e Arsimit dhe Shkencës, Vesna Janevska, në Fakultetin Juridik “Justiniani i Parë” në Shkup, ku u prezantuan rezultatet paraprake të hulumtimit “Zgjidhje inovative shkencore për uljen e pabarazisë sociale dhe ekonomisë gri në Maqedoni përmes rregullativës tatimore”.

Hulumtimi po realizohet nga ekipi i Fakultetit Juridik, me mbështetje financiare nga Ministria e Arsimit dhe Shkencës, për stimulimin e projekteve kërkimore-shkencore.

Nga MASH thonë se Maqedonia nuk mund të vazhdojë me praktikën e investimeve të vogla në shkencë. Shtetet e rajonit po i intensifikojnë investimet në zhvillimin shkencor-teknologjik dhe vend, nëse dëshiron të mbetet relevant edhe në skenën shkencore ndërkombëtare, është e domosdoshme të bëjë hap përpara drejt rritjes sistematike dhe domethënëse të mjeteve për kërkime, krijimit të infrastrukturës bashkëkohore dhe nxitjes së kapacitetit inovativ.

Ministrja Janevska theksoi se vitin e ardhshëm, 2026, do të kemi 773 milionë denarë për shkencën, që është rritje e vazhdueshme, nga 380 milionë denarë në vitin 2024 dhe 680 milionë denarë në vitin 2025.

“Po ndërmarrim aktivitete të shumta të orientuara drejt përforcimit të kapaciteteve kërkimore-shkencore të shtetit. Njëra prej tyre është mundësia për përfshirjen e shkencëtarëve dhe studiuesve maqedonas në rrjetet evropiane të kërkimit, për çka kemi nënshkruar marrëveshje me Qendrën e Përbashkët Kërkimore të Komisionit Evropian. Me qasjen në burimet elitare, dije dhe projekte të përbashkëta me partnerë evropianë, shkencëtarët tanë fitojnë mobilitet, ndërsa shteti perspektivë zhvillimore”, theksoi Janevska.

Ministrja gjithashtu vuri në dukje rritjen e pagave të profesorëve universitarë për 14% dhe sigurimin e qasjes falas në bazat shkencore Web of Science dhe Scopus. Po përgatiten gjithashtu dy zgjidhje të reja ligjore, për arsimin e lartë dhe për veprimtarinë kërkimore-shkencore, të cilat, së bashku me reformën e Agjencisë për Cilësi në Arsimin e Lartë dhe hapjen e parkut të parë shtetëror shkencor-teknologjik, do të mundësojnë përmirësim të ndjeshëm të kushteve për kërkime shkencore.

Rasti i dhunës mes të miturve që ndodhi javën e kaluar në Komunën e Sarajit vazhdon të trajtohet nga institucionet kompetente, ndërsa hetimet për zbardhjen e plotë të ngjarjes janë ende në proces.

Nga shkolla fillore “Dituria” bëjnë të ditur se siguria në këtë shkollë ka nivelin e duhur megjithatë rastet e dhunës mes të miturve tregojnë se bashkëpunimi i vazhdueshëm mes prindërve, mësimdhënësve dhe nxënësve është thelbësor për parandalimin e situatave të tilla.

“Mendoj që çdo incident duhet trajtuar me seriozitet dhe përgjegjësi, pa paragjykime. Shkolla ka siguri të lartë, kemi rregulla të qarta sigurie në bashkëpunim me drejtoreshën. Edhe pse rasti ka ndodhur jashtë oborrit të shkollës dhuna asesi nuk arsyetohet por jemi në monitorim maksimal të ngjarjes. Fatkeqësisht, bashkëpunimi me prindërit është pak i dobët. Trekëndëshi prind-nxënës-arsimtar është shumë i rëndësishëm. Nëse kemi bashkëpunim të vazhdueshëm nuk besoj që arrijmë deri te këto probleme”, tha Meral Ademi, mësimdhënëse.

Edhe nxënësit shprehin shqetësim për rastin dhe theksojnë se konfliktet duhet të zgjidhen përmes dialogut dhe jo përmes dhunës, duke vënë në pah rëndësinë e komunikimit me prindërit, mësimdhënësit dhe shërbimet profesionale të shkollës.

“Ne besojmë në zgjidhjen e problemeve se problemet nuk duhet të zgjidhen me dhunë por me bisedë. Ne jemi shumë të rinj që të bëjmë gjëra të tilla, duhet të koncentrohemi në mësim”, u shpreh një nxënës.

“Ne gjithmonë kemi mësuar që respekt dhe bashkëpunim të kemi mes veti. Sidomos mësuesit na kanë folur për këto tema dhe besoj se të gjithë duhet të kemi bashkëpunim mes vete”, theksoi një nxënës.

“Çfarëdo lloj problemi të kemi duhet të shkojmë tek pedagogu apo psikologu që t’ia themi dhe ta zgjidhim më mirë”, tha një nxënës.

Pak ditë më parë në shkollën fillore Dituria në Saraj 6 nxënës të moshës deri 15 vjeçare rrahën brutalisht 2 nxënës të tjerë. Për 5 prej nxënësve dhunues vazhdon procedura hetimore dhe masat e kujdesit, ndërsa njëri prej tyre meqë është më i ri se 14 vjeç do të vijojë të ndiqet në procedurë të ndarë./Alsat/

Teksti shkollor Gjeografia për klasën e shtatë me mësim në gjuhën shqipe ku u shtrembëruan fakte për Republikën e Kosovës do të korrigjohet, mirëpo në formën online.

Gjithashtu, nga Ministria e Arsimit thanë për "Alsat" se në tekstet e shtypura një korrigjim i tillë pritet të ndodhë në botimin e teksteve të radhës.

Zëvendësministri i Arsimit, Lulzim Aliu në reagimin me shkrim thekson se fëmijët meritojnë libra të saktë, profesionalë dhe të përditësuara sipas standardeve bashkëkohore duke shtuare që korrigjimet e nevojshme të bëhen pa vonesë.

“Në të njëjtën kohë, respektoj faktin, se hartimi, vlerësimi dhe miratimi i teksteve shkollore, është kompetencë profesionale e komisioneve dhe ekipeve të ekspertëve që janë angazhuar nga MASH për këtë qëllim. Nga informacionet që kam duket se bëhet fjalë për një gabim teknik (në përkthim) në procesin e përpilimit apo botimit të përmbajtjes. Për këtë arsye, kam kërkuar nga institucionet përgjegjëse, që të verifikojnë menjëherë situatën, të evidentojnë gabimin dhe të ndërmarrin korrigjimet e nevojshme pa vonesë”, tha Lulzim Aliu, zv. ministër i Arsimit.

Pas reagimeve për pasaktësi në tekstin e Gjeografisë, mësuesi Gani Ameti kërkon më shumë kujdes dhe përgjegjësi në përpilimin dhe përkthimin e tyre. Ameti u bën thirrje mësimdhënësve që të mos mjaftohen me atë që shkruhet në libër, por të korrigjojnë çdo pasaktësi për të mos i lënë fëmijët me informacione të shtrembëruara.

“Nuk është dashur të përmendet “Metohia” por Dukgjini, në këtë rast unë e shpjegoj Dukagjin ajo çka është e jona duhet ta themi ashtu siç është, sa nevojë të merremi me atë se a duhet ta pyes dikë ose jo kur është diçka që është fakt. Ne arsimtarët duhet të jemi pak të kujdesshëm në këto raste, të shpjegojmë atë që është realitet mos ta marrin fëmijët atë që është në libër dhe ti mbetet kujtim ajo se është “Metohi” apo “Gazivoda” e kështu me radhë. Mendoj se duhet të kemi qasje pak më të sinqertë për këto problematika”, u shpreh Gani Ameti, mësues i Gjeografisë.

Në tekstin e Gjeografisë për klasën VII, botuar nga “Trimaks” dhe miratuar nga Komisioni Kombëtar për Libra Mësimorë, janë vërejtur pasaktësi që, sipas mësimdhënësve, shtrembërojnë informacionin për Republikën e Kosovës. Në njësinë mësimore thuhet se Kosova “gjendet në jugperëndim të Serbisë”, formulim që kritikët e vlerësojnë si të njëanshëm dhe jo në përputhje me mënyrën se si përshkruhen shtetet e tjera të rajonit. Debate ka shkaktuar edhe përdorimi i termit “Metohia” në vend të “Rrafshit të Dukagjinit”, si dhe emërtimi “Mitrovica e Kosovës”dhe “Gazivoda” në vend të Mitrovica dhe Liqeni i Ujmanit, që mësimdhënësit i konsiderojnë terma të papërshtatshëm dhe të huazuar nga narrativet serbe./Alsat/

Në tekstin shkollor të Gjeografisë për klasën e VII-të, botuar nga shtëpia botuese “Trimaks”, Shkup dhe miratuar me vendim zyrtar nga Komisioni Kombëtar për Libra Mësimore më 5 gusht 2025, janë identifikuar një sërë pasaktësish dhe formulimesh të cilat, sipas mësimdhënësve dhe prindërve, shkaktojnë shtrembërime historike dhe nxisin interpretime të gabuara për Republikën e Kosovës.

Libri, i përgatitur nga autori Bllagoja Markoski, me recensentë Dragan Kollçakovski, Nikolla V. Dimitrov dhe Nevenka Stoeva, i përkthyer në gjuhën shqipe nga Roland Poloska dhe i lekturuar nga Farketa Dibra Zeqiri është futur në përdorim gjatë vitit shkollor 2025. Megjithatë, pavarësisht procesit të recensimit dhe aprovimit, njësia mësimore për Kosovën ka nxitur reagime për shkak të disa përmbajtjeve të konsideruara të papërshtatshme.

Kritikat fillojnë me mënyrën se si teksti e përcakton pozitën gjeografike të Kosovës, duke theksuar se “gjendet në jugperëndim të Serbisë”, një formulim që nuk përdoret për asnjë shtet tjetër në libër. Mësimdhënësit vlerësojnë se një qasje e tillë i jep Serbisë rolin e pikë-referencës për Kosovën, duke anashkaluar faktin se Maqedonia e Veriut e njeh Kosovën si shtet të pavarur dhe se praktika shkencore kërkon përshkrimin e pozitës brenda Gadishullit Ballkanik, njësoj si për vendet e tjera.

Polemikat thellohen edhe më shumë me përdorimin e termit “Metohia” për zonën e Rrafshit të Dukagjinit. Për mësimdhënësit, futja e tij në një libër mësimor në gjuhën shqipe përbën devijim të rëndë nga standardet shkencore dhe rrezikon të ngulë te nxënësit një perspektivë të huaj dhe të njëanshme për territorin e Kosovës.

Reagime ka shkaktuar edhe përdorimi i formulimit “Mitrovica e Kosovës”, që nuk përputhet me emërtimin zyrtar të qytetit. Sipas kritikëve, ky lloj terminologjie reflekton qasje të terminologjisë serbe “Kosovska Mitrovica” dhe nuk duhet të jetë pjesë e një teksti shkollor të aprovuar institucionalisht.

Duke qenë se libri ka kaluar nëpër duart e recensentëve universitarë dhe është miratuar nga organi më i lartë shtetëror për libra mësimorë, shumë prindër dhe profesionistë të arsimit kërkojnë përgjegjësi për këto gabime të lejuara. Ata shtrojnë pyetjen se si një tekst me elemente kaq të ndjeshme politike ka marrë aprovimin përfundimtar, duke rrezikuar që nxënësit të marrin njohuri të shtrembëruara për historinë dhe realitetin politik të Kosovës.

Ekspertët e arsimit kërkojnë rishikim urgjent të njësisë mësimore, korrigjim të terminologjisë dhe harmonizim me standardet shkencore dhe me politikat shtetërore të Maqedonisë së Veriut, në mënyrë që brezat e rinj të mos ekspozohen ndaj interpretimeve të gabuara të një teme kaq të rëndësishme historike dhe gjeopolitike.

Për të sqaruar këto çështje, Alsat dërgoi pyetje në Ministrinë e Arsimit megjithatë, deri në këto momente nuk morëm asnjë përgjigje.

Ndryshe, termi “Metohi” (në serbisht Metohija) vjen nga fjala greke “metohion”, që do të thotë pronë manastiri ose tokë e shenjtë e në pronësi të kishave dhe manastireve.

Me kalimin e kohës, Serbia e përdori termin “Metohija” si emërtim gjeografik-politik, duke e lidhur atë me pretendimet historike dhe territoriale ndaj Kosovës.

Në kontekst shkollor në Maqedoninë e Veriut, përdorimi i këtij termi cenon neutralitetin akademik dhe krijon shtrembërime të realitetit gjeopolitik, sidomos kur vendi e njeh Kosovën si shtet të pavarur. Prandaj, përdorimi i “Metohi” në një libër shkollor është i pasaktë, joprofesional dhe i papranueshëm nga këndvështrimi i standardeve edukative dhe të politikës së jashtme të vendit. /Alsat/

Ministria e Arsimit dhe Shkencës (MASH) ka publikuar rezultatet e Konkursit për dhënien e 900 bursave për mbështetje sociale për nxënësit e shkollave të mesme publike dhe të Konkursit për dhënien e 1,570 bursave për nxënësit e regjistruar në programet duale (arsim profesional me praktikë të zgjeruar), për vitin shkollor 2025/2026.

MASH në njoftim thotë se se të gjithë aplikantët do të marrin vendimin përmes portalit elektronik e-uslugi.mon.gov.mk në seksionin “Aplikimet e mia”, në kolonën “Dokument vendimi”. Ministria thekson se aplikantët që nuk janë të kënaqur nuk duhet të dorëzojnë ankesë apo padi para se të marrin vendimin. Pas marrjes së vendimit, për aplikantët e mitur, ankesa duhet të dorëzohet nga prindi ose kujdestari.

“Pas marrjes së vendimit, ankesat dorëzohen pranë Komisionit Shtetëror për Vendimmarrje në Procedurat Administrative, Marrëdhënie Pune dhe Mbikëqyrje Inspektuese në Shkallë të Dytë, brenda 15 ditëve nga marrja e vendimit. Zyrat e Komisionit ndodhen në Bulevardi “Goce Dellçev” nr. 18, kati 11, ndërtesa e RTVM-së“, njofton MASH.

Nxënësit e shkollave të mesme që do të përfitojnë bursën nuk duhet të dorëzojnë kontrata të printuara dhe të nënshkruara; të drejtat dhe detyrimet e tyre lidhur me përdorimin e bursës janë të përcaktuara në vendim.

"Shkenca në Maqedoni po bëhet gjithnjë e më e dukshme jo vetëm si temë diskutimi, por edhe si fushë veprimi. Këtë e vërteton edhe raporti i fundit i Komisionit Evropian mbi përparimin e vendit në fushën e shkencës, dhe përbën rezultat të politikave kombëtare efektive dhe të buxhetit dukshëm të rritur për mbështetjen e veprimtarisë kërkimore-shkencore. Nga 380 milionë denarë në vitin 2024, buxheti u rrit në 680 milionë denarë në vitin 2025, ndërsa për vitin e ardhshëm 2026 është paraparë buxhet rekord prej 1,37 miliardë denarësh për shkencën", thonë nga Ministria e Arsimit dhe Shkencës.

Gjithashtu thonë se Ministria e Arsimit dhe Shkencës këtë vit kalendarik, përmes tre thirrjeve për shpërndarjen e mjeteve, ka stimuluar realizimin e projekteve shkencore dhe kërkimore në universitetet publike, fakultetet dhe institucionet shkencore, në ASHAM dhe komunitetin e biznesit, të cilat janë në përputhje me qëllimet e Strategjisë për Specializim Inteligjent të Maqedonisë. Projektet po realizohen me sukses.

“Shkenca është shtylla e zhvillimit shoqëror, dhe për këtë arsye në vitin 2026 buxheti për shkencën do të arrijë 1,37 miliardë denarë, me të cilët do të vazhdojë financimi i projekteve kërkimore-shkencore, për zhvillimin e resurseve laboratorike, pjesëmarrjen në konferenca shkencore ndërkombëtare dhe organizimin e atyre vendore, botimin e punimeve shkencore në revista me faktor impakti, ndarja e bursave për shkencëtarë të rinj, bursave për ciklin e dytë dhe të tretë të studimeve në vend, si dhe organizimi i qëndrimeve shkencore dhe studimore jashtë vendit".

"Veçanërisht gëzon rritja e interesit te të rinjtë për të u marrë me shkencë dhe inovacione, e cila reflektohet në shfrytëzimin e masave që MASh i vë në dispozicion, kështu që, së bashku me institucionet e tjera kompetente qeveritare, vazhdojmë t’i mbështesim ata në realizimin e ambicieve personale", thonë nga MASH.

Politikat zhvillimore marrin vazhdimësi, sepse çdo investim në shkencë shpërblehet dhe se për mjete dhe punë në këtë sektor nuk duhet kursyer. Urime 10 Nëntori – Dita Botërore e Shkencës!”, thonë në MASH.

Ministria e Arsimit dhe Shkencës (MASH) dhe Byroja për Zhvillimin e Arsimit organizojnë debat publik për listën e re të propozuar të librave letrarë për arsimin fillor dhe ftojnë të gjitha palët e interesuara – mësuesit, shërbimet profesionale dhe faktorët e tjerë në arsim – “të përfshihen aktivisht në përcaktimin e një liste bashkëkohore, gjithëpërfshirëse dhe cilësore të librave, që do t’u përgjigjet nevojave reale të nxënësve dhe procesit mësimor".

MASH në faqen e saj zyrtare ka publikuar listën e propozuar të librave, duke theksuar se nevoja për përditësim të kësaj liste vjen “nga synimi për përputhje të vazhdueshme të përmbajtjeve mësimore me qëllimet bashkëkohore arsimore, karakteristikat zhvillimore të nxënësve dhe kontekstin e tyre social e emocional".

"Lista e propozuar është përgatitur mbi bazën e listës që zbatohej në mësim nga viti shkollor 2019/2020. Disa tituj janë hequr për shkak të lexueshmërisë së ulët, mospërshtatshmërisë me moshën apo përmbajtjen. Për shkak të ndryshimeve në programet mësimore dhe lidhjeve ndërdisiplinore në mësim, disa vepra janë zhvendosur në klasa të tjera ose kanë marrë status të ri – nga të detyrueshme janë bërë zgjedhore dhe anasjelltas. Në propozim janë përfshirë vepra që trajtojnë tema bashkëkohore dhe të rëndësishme, si: identiteti dhe vetëbesimi, miqësitë dhe marrëdhëniet ndërnjerëzore, jeta shkollore dhe bullizmi, sfidat emocionale dhe psikologjike, shumëllojshmëria kulturore, përfshirja e fëmijëve me nevoja të veçanta arsimore", thuhet në njoftimin e Ministrisë së Arsimit dhe Shkencës.

Qëllimi është që nxënësit të lexojnë përmbajtje që janë të afërta me realitetin e tyre, por, shton MASH, “edhe mjaftueshëm të thelluara për analizë dhe interpretim simbolik, që nxisin të menduarin kritik, diskutimin dhe zhvillimin personal.”

Lista e propozuar e librave për lexim është e hapur për sugjerime për të gjitha klasat nga e dyta deri në të nëntën. Parashihet gjithashtu mundësia e përfshirjes së një vepre nga letërsitë kombëtare të të gjitha gjuhëve mësimore, me kusht që çdo vepër të përkthehet në të gjitha gjuhët zyrtare të mësimdhënies në Maqedoninë e Veriut.

Në njoftimin e MASH është publikuar edhe formulari për propozimin e një libri, i cili duhet të dërgohet më së voni deri në fund të këtij muaji (30 nëntor) në adresën elektronike të Byrosë për Zhvillimin e Arsimit: bro.macedonia@bro.gov.mk.

Nën organizimin e Analitika Tink Tenk, sot në Shkup u mbajt punëtori rajonale me temën „Përforcimi i bashkëpunimit ndërmjet medieve, ekspertëve dhe institucioneve për politika më të mira të kontrollit të duhanit dhe mbrojtje të shëndetit publik në Ballkanin Perëndimor“.

Në diskutim mori pjesë edhe ministrja e Arsimit dhe Shkencës, Prof. Dr. Vesna Janevska, e cila theksoi se arsimi është mekanizmi më i mirë për rritjen e ndërgjegjësimit tek të rinjtë për zakonet e shëndetshme dhe kujdesin ndaj shëndetit personal.

"Sistemi ynë edukativo-arsimor është strukturuar në mënyrë që njohuritë shëndetësore tëpërfaqësohen në të gjitha klasat në lëndët e rregullta, veçanërisht në "Shkencat natyrore", dhe nga ky vit shkollor kemi futur një lëndë të re zgjedhore në klasën e 7-të "Mësoj për shëndetin tim“ dhe me mbështetjen e Organizatës Botërore të Shëndetësisë përgatitëm udhëzues për mësimdhënësit për mënyrën e mësimdhënies së materies, e cila përfshin edhe aspekte të dedikuara pasojave shëndetësore nga përdorimi i duhanit dhe cigareve elektronike“, theksoi Janevska.

Duke folur për masat që po zbatohen në nivel kombëtar si pjesë e politikave parandaluese, ministrja theksoi se këtë vit, me ndryshimet ligjore, shkollat fillore dhe të mesme janë të detyruara, krahas programeve për mbrojtje nga dhuna, abuzimi dhe neglizhimi i nxënësve, parandalimin e diskriminimit, delikuencës së të miturve dhe të ngjashme, të zbatojnë edhe programe për parandalimin e abuzimit me alkoolin dhe duhanin, abuzimit me droga dhe substanca të tjera psikotrope.

Në vitin e ri shkollor, MASH-i dhe BZHA së bashku me Zyrën e Kombeve të Bashkuara për Drogën dhe Krimin dhe Federatën Ndërkombëtare të Lions Club, do të trajnojnë 50 bashkëpunëtorë profesionalë dhe 150 mësimdhënës në 50 shkolla fillore për të realizuar programin parandalues "Aftësi për Adoleshencën“. Bëhet fjalë për program i strukturuar, i cili bazohet në prova, për parandalimin e përdorimit të cigareve, drogës dhe alkoolit, dhe i cili deri më tani është zbatuar me sukses në 105 vende në mbarë botën“, shtoi ministrja.

Ajo theksoi se gjithmonë ka hapësirë për avancimin e edukimit shëndetësor në shkolla dhe se institucionet po punojnë në atë drejtim.

"Arsimi është materie e gjallë dhe përshtatet me kohën dhe trendet. Kam pritshmëri që pikërisht nga kjo punëtori, përvojat dhe praktikat e ndryshme të ndara do të na ndihmojnë të gjithëve që t’i avancojmë politikat kombëtare", u shpreh Janevska.

Sukseset e të rinjve tanë gjithmonë ngjallin emocione të fuqishme dhe inkurajojnë besimin se kemi duar të sigurta ku mund ta lëmë Maqedoninë dhe të besojmë në një të ardhme më të mirë. Prandaj, e rritëm mbështetjen ndaj të talentuarve, në mënyrë që ata të ndiejnë kujdes të mjaftueshëm nga shteti, të qëndrojnë këtu dhe të kontribuojnë në zhvillimin e tij.

Kështu deklaroi ministrja e Arsimit dhe Shkencës, Vesna Janevska, në konferencën e organizuar nga Instituti i Kimisë pranë Fakultetit të Shkencave Matematiko-Natyrore në Shkup, ku u prezantuan sukseset e nxënësve dhe mentorëve të tyre të arritur në olimpiadat ndërkombëtare shkencore në fushën e kimisë gjatë këtij viti kalendarik.

“I ndjek pjesëmarrjet e të gjithë të rinjve tanë në garat ndërkombëtare, dhe e udhëhequr nga sukseset tuaja dhe të gjeneratave para jush, ndjeva detyrë të angazhohem. Ndërsa Qeveria më dha mbështetje dhe së bashku e zgjidhëm sfidën që zvarritej nga e kaluara dhe që e vënë në pikëpyetje pjesëmarrjen e përfaqësuesve maqedonas në gara të mëdha ndërkombëtare për nxënës. Nga ky vit, Ministria e Arsimit dhe Shkencës mbulon plotësisht shpenzimet për udhëtim dhe regjistrim të nxënësve dhe mentorëve të cilët do të kualifikohen në olimpiadat ose garat ndërkombëtare shkencore. Krijuam zgjidhje sistematike dhe askush më nuk do të ketë sfida financiare për të udhëtuar dhe për të përfaqësuar vendin e vet“, tha Janevska.

Në Olimpiadën Ndërkombëtare të Kimisë që u mbajt këtë vit në Dubai, nxënësit nga Maqedonia fituan nga një medalje të argjendtë dhe të bronztë, si dhe një mirënjohje , ndërsa në olimpiadën ndërkombëtare “Mendeleev” në Belo Horizonte të Brazilit fituan dy medalje të bronzta.

“Këta fëmijë janë pjesë e atij brezi që ne besojmë se mund të sjellin kohë më të mira. Sepse e vlerësojnë diturinë, për t’u avancuar vazhdimisht, ata e dinë se shkenca është shtyllë e prosperitetit”, tha Janevska.

Sukseset e të rinjve tanë gjithmonë ngjallin emocione të fuqishme dhe inkurajojnë besimin se kemi duar të sigurta ku mund ta lëmë Maqedoninë dhe të besojmë në një të ardhme më të mirë. Prandaj, e rritëm mbështetjen ndaj të talentuarve, në mënyrë që ata të ndiejnë kujdes të mjaftueshëm nga shteti, të qëndrojnë këtu dhe të kontribuojnë në zhvillimin e tij.

Këtë e theksoi ministrja e Arsimit dhe Shkencës, Vesna Janevska, në konferencën e organizuar nga Instituti i Kimisë pranë Fakultetit të Shkencave Matematiko-Natyrore në Shkup, ku u prezantuan sukseset e nxënësve maqedonas dhe mentorëve të tyre të arritur në olimpiadat ndërkombëtare shkencore në fushën e kimisë gjatë këtij viti kalendarik.

“I ndjek pjesëmarrjet e të gjithë të rinjve tanë në garat ndërkombëtare, dhe e udhëhequr nga sukseset tuaja dhe të gjeneratave para jush, ndjeva detyrë të angazhohem. Ndërsa Qeveria më dha mbështetje dhe së bashku e zgjidhëm sfidën që zvarritej nga e kaluara dhe që e vënë në pikëpyetje pjesëmarrjen e përfaqësuesve maqedonas në gara të mëdha ndërkombëtare për nxënës. Nga ky vit, Ministria e Arsimit dhe Shkencës mbulon plotësisht shpenzimet për udhëtim dhe regjistrim të nxënësve dhe mentorëve të cilët do të kualifikohen në olimpiadat ose garat ndërkombëtare shkencore. Krijuam zgjidhje sistematike dhe askush më nuk do të ketë sfida financiare për të udhëtuar dhe për të përfaqësuar vendin e vet“, tha Janevska.

Në Olimpiadën Ndërkombëtare të Kimisë që u mbajt këtë vit në Dubai, nxënësit maqedonas fituan ngs një medalje të argjendtë dhe të bronztë, si dhe një mirënjohje , ndërsa në olimpiadën ndërkombëtare “Mendeleev” në Belo Horizonte të Brazilit fituan dy medalje të bronztë.

“Këta fëmijë janë pjesë e atij brezi që ne besojmë se mund të sjellin kohë më të mira. Sepse e vlerësojnë diturinë, për t’u avnasuar vazhdimisht, ata e dinë se shkenca është shtyllë e pros-periteti”, tha Janevska.

I ashtuquajturi fakultet për biznes dhe ekonomi është mbyllur pasi nuk i ka plotësor kushtet, tha ministrja e Arsimit dhe Shkencës, Vesna Janevska.

Janevska tha se shkolla e lartë kishte humbur edhe hapësirat ku zhvillonte aktivitete, pas çka Agjencioni për Kualitet në Arsim të Lartë ka konstatuar që kjo shkollë e lartë është jofunksionale.

“Siç e dini, kemi mbyllur 14 universitete private, kjo është shkolla e parë e lartë private që nuk do të punojë më. Dhe unë shpresoj që universitetet private, sepse një pjesë prej tyre kur panë se po kontrollojmë dhe se po i mbyllim, edhe vetë vendosën që të mbyllen. Unë shpresoj që edhe një pjesë e institucioneve për arsim të lartë që me të vërtetë nuk i plotësojnë kushtet, që vetë të hyjnë në proces të mbylljes, nëse jo, ne do t’i mbyllim”, theksoi Janevska.

Paqja, respekti, miqësia dhe bashkëpunimi janë të nevojshme që bota të ecë përpara. Këto janë në fakt vlerat që duhet t’u mësojmë të rinjve si brenda komuniteteve familjare ashtu edhe brenda institucioneve arsimore. Ideja e programit RYCO është e kompletuar me atë që po them, ajo mbështet përpjekjet e ndërtimit të gjeneratave të cilët do të duan të jenë të bashkuar dhe me qëllim identik – për ta transformuar rajonin në një vend më të mirë, më të lumtur dhe më të prosperuar për të jetuar.

Këtë e theksoi sekretarja shtetërore në Ministrinë e Arsimit dhe Shkencës, Elena Ivanovska, në promovimin e sotëm të 23 shkollave të reja të mesme nga Maqedonia që do të ndërtojnë partneritete me shkollat e tjera në rajon përmes programit rajonal për shkëmbimin e shkollave të mesme nga Ballkani Perëndimor i cili zbatohet nga RYCO – Zyra Rajonale e Bashkëpunimit Rinor.

“Urime juve si organizatë dhe urime shkollave. Ju, udhëheqësit e shkollave dhe kuadri mësimor duhet të jeni krenarë që po ndërtoni breza të cilët i shohin sfidat dhe dallimet si mundësi për bashkim. Dhe këto gjenerata një ditë do të jenë pararojë e ndryshimeve që të gjithë duam t’i shohim, për të parë një Ballkan Perëndimor të bashkuar dhe të prosperuar, një rajon të lirë nga paragjykimet dhe një vend plot tolerancë, mirëkuptim dhe harmoni”, tha Ivanovska.

Programi Super Shkolla i RYCO-s është zbatuar që nga viti 2021 dhe promovon mësimin ndërkulturor, dialogun dhe partneritetet midis nxënësve të shkollave të mesme nga rajoni. Mbështetet nga Bashkimi Evropian dhe disa ambasada, Ministria e Arsimit dhe Shkencës dhe Shoqëria Gjermane për Bashkëpunim Ndërkombëtar – GIZ. Deri më tani janë krijuar rreth 100 partneritete mes shkollave përmes këtij programi.

Për shkollat në të cilat mungojnë librat për shkak se nuk i kanë paraqitur tirazhet e nevojshme në kohë, MASH do t’ua sigurojë ato në formate PDF që do të vendosen në ueb faqen e Shërbimit pedagogjik.

Ministrja e Arsimit dhe Shkencës Vesna Janevska deklaroi sot se MASH e ka kërkuar këtë nga shtëpitë botuese, ato i dorëzojnë librat në formate PDF dhe Ministria, tha, tashmë po i ngarkon librat në formate PDF në ueb faqen e internetit të Shërbimit pedagogjik. Dhe këtë herë, ajo theksoi se janë dorëzuar aq libra sa kanë paraqitur vetë shkollat.

“Libra ka, gjithçka që shkollat kërkuan, gjithçka është dorëzuar. Ministrisë nuk i intereson nëse shtyp një milion apo një milion e dyqind mijë libra sepse kemi një marrëveshje kornizë për shtypje. Pra, ajo që është kërkuar është dorëzuar. E përsëris edhe një herë – çdo libër që është kërkuar nga Ministria është siguruar. Prandaj, nuk pranoj që mund të thuhet se nuk ka libra. Nëse janë në gjendje më të mirë apo më të keqe, kjo varet nga komisioni që i ka pranuar, nga drejtorët, dhe tani e tutje besoj se kjo çështje duhet të mbyllet dhe se nuk do të kemi probleme të tilla në të ardhmen, tha Janevska sot, duke u përgjigjur pyetjeve gazetareske gjatë një vizite në shkollën “Shën Naumi i Ohrit”.

Siç tha, janë vendosur rregulla të qarta, ekziston një ligj i qartë dhe preciz që funksionon, udhëzime dhe një rregullore pune që “do të duhet të respektohet deri në detajet e fundit duke filluar nga viti i ardhshëm”.

Shpërndarja e librave është përfunduar, mbeten, tha, dy libra për vitin e parë të gjimnazit – njëri është i diskutueshëm dhe tjetri është në procedurë.

“Ato do të shpërndahen kur kjo do të zgjidhet. Të gjitha lbirat tjera janë shpërndarë”, shtoi Janevska.

Maqedonia e Veriut dhe Turqia do të nënshkruajnë protokoll për bashkëpunim në fushën e shkencës, teknologjisë dhe inovacionit, u bë e ditur nga Ministria e Arsimit dhe Shkencës e Maqedonisë së Veriut, transmeton Anadolu.

Ministria tha se përcaktimi i përmbajtjes së dokumentit është në fazën përfundimtare dhe u diskutua në takimin e sotëm midis ministres së Arsimit dhe Shkencës, Vesna Janevska dhe ambasadorit turk në Shkup Fatih Ulusoy.

“Të dyja palët shprehën gatishmërinë e tyre për të përfunduar procesin deri në fund të vitit ndërsa nënshkrimi i protokollit do të forcojë marrëdhëniet midis dy vendeve dhe do të sigurojë bashkëpunim më të madh midis institucioneve arsimore dhe shkencore, shkëmbim të stafit mësimdhënës dhe shkencor, nxënësve dhe studentëve”, thuhet në njoftim.

Gjatë takimit, ministrja Janevska prezantoi konceptin për themelimin e parkut të parë teknologjik në Shkup ndërsa pala turke shprehu gatishmërinë e saj për të mbështetur realizimin e kësaj ideje përmes përfaqësuesve të komunitetit të biznesit turk në vend, theksohet më tej.

Sipas njoftimit, Janevska dhe Ulusoy diskutuan gjithashtu mbi përmirësimin e mësimdhënies në gjuhën turke në Maqedoninë e Veriut, të cilën e ndjekin mbi 8.000 nxënës, përmes më shumë trajnimeve për stafin mësimdhënës dhe investimeve në mjete dhe pajisje shtesë mësimore.

Ministria e Arsimit dhe Shkencës thekson se të gjithë nxënësit do të kenë tekste shkollore në fillim të vitit të ri shkollor edhe atë për të gjitha lëndët, sipas planeve mësimore në klasat përkatëse. Nga MASH thonë se “për të dytin vit radhazi, shtypja dhe shpërndarja e teksteve shkollore realizohet me kohë, dhe çdo shkollë do ta marrë tirazhin që e ka kërkuar përmes aplikacionit të veçantë elektronik të Ministrisë së Arsimit dhe Shkencës”.

“Janë siguruar edhe tekste shkollore për gjuhët e huaja, për herë të parë pas shtatë vitesh gjatë të cilave mungonin, ndërsa mësimdhënësit dhe nxënësit janë detyruar të gjejnë vetë literaturë. Tekste të reja shkollore me përmbajtje të avancuar janë gjithashtu në dispozicion për klasën e shtatë të arsimit fillor dhe për vitin e parë në arsimin e mesëm gjimnaz, ku fillon zbatimi i programeve të reja mësimore. Mbi 100 tituj të rinj do të jenë të disponueshëm edhe për nxënësit e shkollave të mesme profesionale”.

“Përgatitja, botimi dhe shpërndarja e teksteve shkollore ishte sfidë e madhe në të kaluarën. Kjo çështje është zgjidhur në mënyrë sistematike, me Ligjin e ri për Tekstet Shkollore, në përpilimin e të cilit kanë marrë pjesë të gjithë palët e përfshira – përfshirë edhe autorët, recensentët, por edhe të gjitha shtëpitë botuese në vend”, thonë nga MASH.

Në fund thonë se të gjitha institucionet kompetente, organet dhe trupat që marrin pjesë në procedurën për sigurimin e teksteve shkollore i kanë përmbushur detyrimet e tyre në mënyrë të përpiktë dhe me kohë, për të cilën Ministria e Arsimit dhe Shkencës shpreh mirënjohje dhe bën thirrje që veprimi i përbashkët për të siguruar vazhdimin e arsimimin më të mirë edhe më tej.

The post MASH: Tekste shkollore për të gjithë nxënësit në fillim të vitit të ri shkollor appeared first on Telegrafi.

Qeveria ka miratuar metodologji të re për llogaritjen dhe ndarjen e mjeteve financiare me të cilat komunat organizojnë arsimin fillor dhe të mesëm, zbatimi i së cilës fillon më 1 janar të vitit 2026. Metodologjia është zhvilluar nga Ministria e Arsimit dhe Shkencës me mbështetjen e UNICEF-it, Bankës Botërore, Ambasadës Zvicerane, shoqatës ZMAI, ZELS dhe qeverive lokale, ndërsa pritshmëria është që ndryshimi të stimulojë proces edukativo-
arsimor me cilësi më të mirë .

Sot në konferencë për shtyp në MASH, ministrja e Arsimit dhe Shkencës Vesna Janevska tha se ndryshimi i formulave për llogaritjen e bllok -granteve ishte i nevojshëm, sepse ato ekzistuese nuk sigurojnë efikasitet në financim. Aktualisht, sa 90% e mjeteve të cilat i marrin komunat përdoren për të paguar pagat dhe shpenzimet e përgjithshme të shkollave, që është dukshëm mbi mesataren e BE-së prej 70% .Bllok -grantet po rriten, por kryesisht vetëm për të mbuluar rritjen e pagave, dhe jo për zhvillimin e shkollave dhe përmirësimin e cilësisë së mësimdhënies.

Janevska shpjegoi se formula e re për financimin e arsimit fillor ka dy komponentë – bazë dhe variabël.

Komponenti bazë do të mbulojë shpenzimin e standardizuar për nxënës, të cilën e kemi përcaktuar të jetë 112,747 denarë në vit. Këtu përfshihen pagat dhe kontributet e punonjësve, zhvillimi i tyre profesional dhe shpenzimet e përgjithshme të shkollës. Ky komponent merr parasysh nivelin e zhvillimit të shkollave, i cili llogaritet me koeficient që varion nga 0.75 deri në 2.55. ”

“Kështuqë , shkollat më të zhvilluara do të marrin një shumë më të vogël, dhe shkollat më pak të zhvilluara, në përputhje me normën e përcaktuar për hapsirat dhe pajisjet, do të marrin një shumë më të madhe, për të përshpejtuar zhvillimin e tyre.

Komponenti variabël është për shpenzimet e transportit të nxënësve, mbështetja për nxënësit me nevoja të veçanta arsimore, për nxënësit që vijojnë mësimin në gjuhën turke, boshnjake dhe serbe dhe për nxënësit që vijojnë mësimin në shkollat rajonale”, tha Ministrja.

The post MASH-Maqedoni: Metodologjia e re për financimin e arsimit fillor dhe të mesëm do të stimulojë procesin edukativo-arsimor me cilësi më të mirë appeared first on Telegrafi.

Ministrja e Arsimit dhe Shkencës, Vesna Janevska deklaroi se prej 1 shtatorit do të ketë libra.

“Të gjithë të jenë të qetë dhe nuk është ky viti i parë që do të ketë libra. Edhe vitin e kaluar me përpjekje të fuqishme arritëm të sigurojmë libra shkollorë për nxënësit. Disa libra tashmë janë dërguar nëpër shkolla. Gjithsesi, mësimdhënësit janë në pushim kolektiv deri më datën 15 dhe më pas do të vazhdojë në mënyrë më intensive distribuimi i librave. Në këtë moment ende ka disa procedura të caktuara të cilat po përfundohen. Por, edhe ato do të kryhen dhe libra do të ketë”, deklaroi Janevska në “Kanal5”.

Rreth çështjes për librin e historisë dhe atë nëse do të merren parasysh rekomandimet e Komisionit historik, ajo u përgjigj se, siç tha, “do të përmenden të gjitha personalitetet e rëndësishme historike të cilt duhet të përmenden”.

Lidhur me librat e dëmtuar nga viti i kalaur, Janevska sqaroi se shkollat duhet t’i paraqesin në Ministri, e cila do të dërgojë ekzemplarë të rinj sipsa numrit të paraqitur.

“Librat e vjetër të cilët duhet të zëvendësohen shkollat i paraqesin në Ministrinë e Arsimit dhe Shkencës. Cilin numër të librave për secilën lëndë individualisht do të paraqesin, aq numër do të dërgojmë. Po, ndodhë që disa shkolla të bëjnë lëshime, atje duhet të ketë komision për pranim të librave të vjetër i cili duhet t’i shqyrtojë, të shohë nëse janë të dëmtuar apo jo. Ligji thotë se librat e dëmtuar prindërit duhet t’i paguajnë në 70 për qind. Shkollat, posaçërisht disa komuna, nuk dëshirojnë t’ua kërkojnë ato mjete prindërve dhe paraqesin numër më të vogël të librave të dëmtuar”, sqaroi ajo, duke shtuar se këtë vit u është potencuar se është e domsodoshme t’i paraqesin të gjithë librat e dëmtuar dhe do të marrin aq libra sa kanë kërkuar

The post Janevska: Prindërit dhe nxënësit të jenë të qetë, do të ketë libra në shtator appeared first on Telegrafi.

Nota mesatare e suksesit nga dy provimet e maturës shtetërore të jashtme në qershor është 3.69, përcjell Telegrafi Maqedoni.

Ministrja e Arsimit dhe Shkencës, Vesna Janevska dhe Drejtoresha e Qendrës Shtetërore të Provimeve, Daniela Jovçevska-Mihajlovska shpallën rezultatet e periudhës së provimeve të qershorit në një konferencë për shtyp, në të cilën u regjistruan 15.004 maturantë nga të gjitha llojet e arsimit (shkollë e mesme, profesionale, artistike) dhe të gjitha gjuhët e mësimdhënies. Rreth 3 përqind nuk erdhën në provime.

Janevska shprehu kënaqësinë që shkalla e suksesit është më e lartë se vitin e kaluar kur nota mesatare ishte 3.26 dhe për shkak se nuk kishte numër të madh të riprovimeve. Siç tha ajo, 172 u përpoqën të kopjonin dhe ta “tejkalonin” sistemin.

Gjuha amtare dhe letërsia (maqedonisht, shqip, turqisht dhe serbisht), e cila është e detyrueshme për të gjithë maturantët, u dha më 31 maj, dhe provimi i dytë, i cili është opsional për nxënësit, ishte më 11 qershor.

Maturantët e shkollave të mese që nuk e kanë kaluar provimin shtetëror në qershor, do të japin porovim në afatin e gushtit më 12 gusht është provimi në gjuhën amtare (maqedonisht, shqip, turqisht, serbisht) dhe letërsi, dhe më 14 gusht është provimi opsional i jashtëm (matematikë, anglisht, frëngjisht, gjermanisht, rusisht, italisht, filozofi, estetikë).

Provimi shtetëror i shkollës së mesme në sistemin tonë arsimor është zbatuar që nga viti 2007, në sesionet e provimeve të qershorit dhe gushtit. Nuk u organizua vetëm një herë, në fund të vitit shkollor 2019/2020 për shkak të pandemisë së Covid-19./Telegrafi/

The post Publikohen rezultatet e maturës shtetërore në Maqedoni, nota mesatare është 3.69 appeared first on Telegrafi.

Komisioni për Arsim, Shkencë dhe Sport në Kuvendin e RMV-së sot dha mbështetje për propozim-ligjin për institucionet e arsimit të mesëm të bashkësive fetare, të paraqitur nga deputetët nga pushteti dhe e dërgoi për procedurë të mëtejshme parlamentare. Për këtë ligj u paraqitën 22 amendamente – 10 nga deputetët nga pushteti dhe 12 nga deputeti i Frontit Evropian Sali Murat. Në komision u pranuan 11 amendamente.

Qëllimi i këtij ligji, siç theksohet në shpjegimin e propozuesve, është të sigurohet interesi më i mirë i nxënësve të regjistruar në Shkollën Teologjike – Shkup dhe Shkollën e Mesme Teologjike “Isa Beg” – Shkup, duke krijuar një mundësi ligjore për të dhënë maturën shtetërore në përputhje me Ligjin për Arsimin e Mesëm dhe Konceptin për provimin e maturës shtetëtore, provimin e maturës shkollore dhe provimin përfundimtar. Kjo, siç theksohet në ligj, mundëson vazhdimin e pandërprerë të arsimit të tyre në universitetet në Republikën e Maqedonisë së Veriut.

Pas refuzimit të amendamentit të parë të paraqitur nga deputeti Murati, ai theksoi se formulimi aktual i ligjit krijon trajtim diskriminues që favorizon vetëm dy bashkësi fetare, ndërsa përjashton Kishën Katolike, Kishën Ungjillore Metodiste dhe bashkësinë hebraike dhe bashkësi e grupe të tjera fetare. Ai theksoi se në formën e tij aktuale, asnjë gjyqtar kushtetues nuk do ta pranojë këtë ligj.

“Këtu nuk janë të barabartë si në Nenin 19 ose amendamentin 7, ato janë kategori kushtetuese. Një rregullim i tillë selektiv përfaqëson një zbatim klasik të diskriminimit në baza fetare, pavarësisht se sa janë. Ne jemi për përmirësimin e zgjidhjes ligjore, në mënyrë që të ketë një ekuilibër midis lirive fetare dhe të mos ketë ndërhyrje të institucioneve shtetërore në pavarësinë e bashkësive fetare. Këtu do të vijmë menjëherë te problemet nga aspekti kushtetues-juridik”, tha Murati.

Ministrja e Arsimit dhe Shkencës Vesna Janevska theksoi se amendamentet e paraqitura nga deputeti Murati po bëhen të panevojshme, sepse, siç tha ajo, ndryshimet e propozuara nga deputetët nga pushteti zgjidhin të gjitha problemet që ai i renditi në amendamentet e tij.

“Për dymbëdhjetë vjet ka pasur përpjekje për të miratuar këtë ligj, dhe vitin e kaluar ju miratuat një ligj që Gjykata Kushtetuese e rrëzoi. Pse nuk reaguat me amendamente të tilla kur ishit në pushtet? Në vend të kësaj, lejuat të miratohej një ligj që Gjykata Kushtetuese e quajti jokushtetues. Po ju them vetëm se me amendamentin e parë të pranuar nga deputetët nga pushteti, nuk ka më nevojë për amendamentin tuaj sepse pikërisht siç thoni, është bërë një korrigjim në ligj. Kushtet e kushtetutës janë përmbushur, siç shkruani në amendamentin tuaj. E njëjta gjë ndodh në të gjitha amendamentet pasuese. Dy shkollat po fshihen dhe zëvendësohen me shkolla fetare. Pa një marrëveshje me bashkësitë fetare në vend, keni vendosur të miratoni një ligj jokushtetues”, tha Janevska.

Deputeti i Aleancës për Shqiptarët nga krahu i Arben Taravarit, Halil Snopçe, theksoi se vetë fakti që propozim-ligji propozua me mangësi në draftin e parë tregon se nuk është planifikuar mirë.

“Drafti i parë i këtij propozim-ligji që kaloi në Kuvend, për të cilin votuam dhe unë votova dhe do të mbështes çdo ligj. Unë nuk jam ekspert kushtetues, por po komentoj mbi atë që ju komentuat. Vetë fakti që u propozua me mangësi në draftin e parë tregon se nuk ishte planifikuar mirë. Kolegia ime Ivanka Vasilevska dhe kolegë të tjerë duhet të kishin ndërhyrë dhe ju po thoni se kushtet kushtetuese tani janë përmbushur. Pra, ato nuk u përmbushën në draftin e parë. Si mund të propozoni një ligj të tillë që është jokushtetues? Kam frikë se është një bllof nga ana juaj. Mos po bëni bllof? Pati një draft që ra në Gjykatën Kushtetuese. Dhe ky është shqetësimi. Shqetësimi është të mos bllofojmë tani siç bëjmë shpesh dhe të bie në Gjykatën Kushtetuese. Unë nuk jam ekspert dhe natyrisht dua fuqimisht të besoj se tani do të korrigjohet me këto ndërhyrje. Duhet të kemi kujdes të mos bllofojmë. Ata prindër dhe fëmijë nuk meritojnë të hyjnë përsëri në golgotë. Vetë fakti që tani me miratimin e këtyre amendamenteve, ato do të jenë një kategori kushtetuese, nuk do të ketë më pengesa me Kushtetutën. Pse lejuam që propozimi i parë të jetë i gabuar?”, tha Snopçe.

Ministrja Janevska iu përgjigj Snopçes. Ajo theksoi se dhoma ligjdhënëse është ajo duhet të sqarojë dhe rregullojë gjërat.

“Nuk thashë që është jokushtetuese dhe se Qeveria nuk është joserioze kur propozon diçka. Por kjo është arsyeja pse ekziston ligjdhënëse për të sqaruar gjërat dhe për të rregulluar gjërat. Kjo është puna juaj. Ju falënderova të gjithëve që keni investuar përpjekje, sepse as unë nuk jam eksperte, për atë që keni përmirësuar tekstin e ligjit, theksoi Janevska.

The post Propozim-ligji për institucionet e arsimit të mesëm të bashkësive fetare e kaloi filtrin e komisionit appeared first on Telegrafi.

“Kurrikula për klasën e shtatë të arsimit fillor është ndryshuar dhe lënda e Historisë është rikthyer”, tha sonte nga Velesi ministrja e Arsimit dhe Shkencës, Vesna Janevska.

“Kurrikula e re ka rikthyer lëndën e Historisë, e cila ishte hequr nga qeveria e mëparshme. Libri shkollor është në proces të shtypjes”, tha ajo.

Ajo gjithashtu përsëriti se pas një ndërprerjeje gjashtëvjeçare, nxënësit do të kenë përsëri tekste shkollore në gjuhë të huaja – anglisht, gjermanisht, frëngjisht dhe italisht.

Në një konferencë për shtyp të mbajtur disa ditë më parë, ajo tregoi kopjet e para të teksteve shkollore në anglisht për klasat nga e para deri në të nëntën dhe tekstet shkollore në gjermanisht, duke shtuar se një vendim do të merret deri të premten për frëngjishten, italishten dhe të gjitha gjuhët e tjera.

Ministrja informoi gjithashtu se kurrikula për vitin e parë të arsimit të mesëm është ndryshuar.

Ajo njoftoi gjithashtu se janë hapur gjashtë lektorate të reja në të gjithë botën ku studiohet dhe popullarizohet gjuha dhe letërsia maqedonase.

Sipas saj, Ministria e Arsimit dhe Shkencës, për herë të parë, po legalizon klasat e dyfishta në arsimin e mesëm që kanë mësim praktik.

Kujtojmë se në fillim të vitit 2021, aktuale ishte tema për konceptin e ri të arsimit fillor, me të cilin parashiheshin disa ndryshime për nxënësit nga klasa e parë deri në të nëntën.

The post Janveska: Programi mësimor për klasën e shtatë është ndryshuar, lënda e Historisë po rikthehet appeared first on Telegrafi.