Koreja e Veriut lëshoi ​​të paktën dy raketa balistike në Detin Lindor ose Detin e Japonisë. Autoritetet thanë se ky ishte testi i parë i armëve të vitit, një ditë pasi ushtria amerikane kapi presidentin e Venezuelës.

“Ushtria jonë njoftoi lëshimin e një rakete balistike në Detin Lindor nga periferia e Phenianit”, tha Ministria e Mbrojtjes e Koresë së Jugut.

Nga ana e tij ministri japonez tha se zhvillimi i armëve bërthmaore kërcënon paqen dhe stabilitetin e vendit.
“Zhvillimi i armëve bërthamore dhe raketave balistike nga Koreja e Veriut kërcënon paqen dhe stabilitetin e vendit tonë dhe të bashkësisë ndërkombëtare dhe është absolutisht i patolerueshëm”, tha ministri japonez i Mbrojtjes, Shinjiro Koizumi./K.M

Lista e pritjes për transplantim organesh në Maqedoninë e Veriut dominohet nga pacientët që kanë nevojë për veshka. Pjesa më e madhe e rreth 1.600 pacientëve në dializë presin transplantim të veshkës nga një dhurues i vdekur; disa prej tyre prej dekadash, ndërsa disa të tjerë vdesin duke pritur. Në vitin 2025, familjet e tre dhuruesve janë pajtuar t’i dhurojnë organet.
Brankica Razmoska nga fshati veriperëndimor i Maqedonisë së Veriut, Vevçani, është 32 vjeçe dhe jeta e saj varet nga aparati i dializës.

Asaj iu shfaq sëmundja kur ishte tetë vjeçare. Në moshën 16-vjeçare veshkat i dështuan plotësisht dhe ajo u fut në dializë si pasojë. Për fat të mirë, nëna e saj ishte dhuruese e afërt dhe ia dhuroi një veshkë. Për fat të keq, pas dhjetë vjetësh, ajo veshkë dështoi dhe që nga viti 2019 ajo është sërish në dializë, nga katër orë, tri herë në javë.

“Derisa të rinjtë e tjerë planifikojnë të ardhmen, ne planifikojmë terapitë. Dhe, kjo është shumë e vështirë”, thotë ajo për Shërbimin e Ballkanit të Radios Evropa e Lirë (REL), teksa pret transplantimin e veshkës.

Asaj nuk i jeton më babai, ndërsa nuk ka vëllezër apo motra, prandaj nuk ka dhurues tjetër të afërt përveç nënës, e cila tashmë i ka dhuruar një veshkë. Për këtë arsye, transplantimi i ardhshëm është i mundur vetëm nga një dhurues kadaverik (një njeri që dhuron organet pasi të ketë vdekur).

“Shpresoj shumë, çdo ditë shpresoj që një ditë të më thërrasin dhe të më ftojnë për transplantim. Lutja ime është se me dhurimin e organeve ju nuk humbni asgjë, ju dhuroni jetë. Nëse dikush humb një njeri, ai njeri mund të vazhdojë të jetojë në një njeri tjetër, dhe të ndihmojë shumë”, thotë Razmoska.

Në Maqedoninë e Veriut janë rreth 1.600 pacientë në dializë dhe 23 qendra dialize. Shumica e tyre presin transplantim kadaverik, sepse nuk kanë dhurues të afërm.

Në listën e pritjes për organe janë rreth 200 pacientë. Prej tyre, 165 presin veshka, rreth 30 kanë nevojë për zemër, ndërsa të tjerët për mëlçi ose kocka.

Disa pacientë presin me dekada, ndërsa një pjesë e tyre kurrë nuk arrijnë të marrin organ, thotë Dushko Gjorgjiev, kryetar i shoqatës së pacientëve me sëmundje të veshkave, “Nefron”.

“Kemi vite kur nuk kryhen fare transplantime kadaverike, kemi vite kur ky numër rritet disi, por në thelb është shumë i vogël për të përmbushur nevojat e pacientëve”, thotë Gjorgjiev.

Rregullorja në vend është ajo e “pëlqimit të supozuar” për dhurimin e organeve. Pra, secili është dhurues, përveç nëse gjatë jetës është deklaruar ndryshe. Megjithatë, pas vdekjes së trurit, familja ka fjalën e fundit nëse do t’i dhurojë apo jo organet.

Jeta pas transplantimit

Për dallimin mes jetës në dializë dhe jetës me veshkë të transplantuar dëshmon Tanja Pavlovska nga Shkupi, e cila tashmë 18 vjet jeton me një veshkë nga dhurues i gjallë: tezja e saj.

Edhe pse disa anëtarë të familjes kanë bërë analiza, vetëm tezja ka rezultuar dhuruese e përputhshme.

“Dializa është një moment i rëndë fizikisht dhe psiqikisht. Pas transplantimit, jeta m’u kthye në normalitet: kam më shumë energji, shëndet më të mirë, më shumë aktivitet, më shumë kohë për familjen, miqtë, shkoj në punë normalisht, u ktheva në rrjedhën e zakonshme të jetës”, thotë Pavlovska.

Ajo konsideron se ndërgjegjësimi për dhurimin e organeve është i pamjaftueshëm dhe se frika dhe dezinformatat i largojnë njerëzit nga ky akt human.

“Mendoj se duhet të flitet më shumë për këtë temë, të zgjohet ndërgjegjja te secili prej nesh. Supozoj se problemi më i madh është frika e njerëzve se çfarë mund të ndodhë. Tezja ime ndihet shkëlqyeshëm, nuk ka asnjë pasojë dhe shpresoj që të mos ketë as në të ardhmen”, tha Pavlovska për REL-in.

Tre të ndjerë dhurues organesh në vitin 2025

Në vitin 2025 ishin 13 dhurues potencialë organesh, njerëz që kanë humbur jetën. Disa prej tyre janë përjashtuar për arsye mjekësore. Familjet e tre dhuruesve janë pajtuar t’i dhurojnë organet e tyre. Janë kryer dy transplantime të mëlçisë, gjashtë transplantime të veshkave, dhjetë transplantime kockash dhe tri transplantime të indeve muskulo-skeletore.

Po në vitin 2025 janë kryer edhe pesë transplantime të veshkës nga dhurues të gjallë, si dhe ka filluar një program i ri transplantimi me nëntë transplante të kornesë (brirëzës), sipas të dhënave nga Ministria e Shëndetësisë.

Në vitet 2024 dhe 2023 ishin nga dy dhurues të vdekur dhe edhe gjashtë dhurues të gjallë organesh. Transplantimi kadaverik mbetet sfidë, sepse kur familjet refuzojnë t’i dhurojnë organet e të afërmit të tyre, kjo i zemëron edhe mjekët.

“Kur ne si ekip koordinues i kryejmë të gjitha testet, diagnostikojmë vdekjen e trurit, vlerësojmë organet, konkludojmë se kemi një dhurues potencial që mund t’u japë jetë disa pacientëve dhe përballemi me refuzim nga familja, atëherë jemi vërtet të pafuqishëm. Ne jemi të detyruar ligjërisht ta respektojmë vullnetin e familjes, e cila ka të drejtë të japë ose të mos japë pëlqim”, thotë Biljana Kuzmanovska, koordinatore kombëtare për transplantim.

E kundërta ndodh kur mjekët marrin pëlqimin.

“Këto janë momente shumë emocionale, si për ne ashtu edhe për familjet. Ne jemi përballë një vullkani mirësie. Kur sheh përpara teje njerëz që humbasin dikë më të dashur në jetë dhe prapë pajtohen të dhurojnë një pjesë të trupit të të dashurit të tyre që të jetojë në trupin e njerëzve që nuk do t’i njohin kurrë… kjo vërtet të ndryshon. Edhe mua më ndryshon”, thotë Kuzmanovska.

Mjekët janë krenarë që te pacientët nuk ka pasur komplikime pas transplantimeve.

Për vitin 2026, ekipi i transplantimit po përgatitet të fusë një metodë tjetër: transplantimin e mëlçisë nga dhurues i gjallë. Aspekti ligjor është përgatitur, ndërsa nëse do të kryhet një transplantim i tillë në Maqedoninë e Veriut do të varet edhe nga ekzistenca e dhuruesve.

Mbi 500 transplantime të veshkave në Maqedoninë e Veriut

Maqedonia e Veriut po i afrohet 50-vjetorit të transplantimit të parë të veshkës, të kryer në vitin 1977 – një sukses mjekësor që, sipas shoqatës “Nefron”, tregon se vendi ka kohë që është në hap me sistemet moderne shëndetësore.

Megjithatë, ata vlerësojnë se numri i transplantimeve, rreth 510, nuk është i mjaftueshëm.

“Kemi vende në rajon, si Kroacia, që për një vit e gjysmë kryejnë aq transplantime sa ne kemi kryer për 50 vjet. Në botë tashmë ka edhe ritransplantime. Te ne kjo nuk ndodh sepse kemi shumë pak organe dhe shumë pacientë në pritje. Numri real i njerëzve që presin organe është më i madh se ai në listë, sepse në mungesë të transplantimit kadaverik pacientët nuk i kryejnë analizat dhe tipizimet e nevojshme, duke e ditur paraprakisht se në të ardhmen e afërt nuk mund të marrin organ, ndërsa analizat kërkojnë kohë dhe para”, thotë Gjorgjiev.

Sipas tij, është e domosdoshme një fushatë e vazhdueshme gjatë gjithë vitit për ngritjen e ndërgjegjësimit për dhurimin e organeve, si dhe zgjerimi ose ndërtimi i një Qendre të re të Transplantimit, e cila nuk funksionon që nga pandemia kur shërbente si qendër për COVID-19.

Koordinatorja kombëtare Kuzmanovska njofton se Qendra po rinovohet dhe do të ketë pesë bokse dhe një pjesë për dializë. Gjithashtu, tani e tutje pacientët me vdekje të trurit do të mund të identifikohen edhe nga njësia e kujdesit intensiv në SPQ “8 Shtatori”, ndryshe nga më parë kur kjo bëhej vetëm në Klinikën e Anestezisë, Reanimacionit dhe Mjekimit Intensiv (KARIL).

Po ashtu, po përgatiten ndryshime në ligjin për transplantim, me të cilat do të lejohet që dhurues të gjallë organesh të jenë edhe kushërinjtë e parë. Deri tani kjo ishte e kufizuar te nëna, babai, vëllai, motra, gjyshja, gjyshi, daja, xhaxhai, tezja, fëmijët dhe nipërit dhe mbesat./K.M

Klubi i Lushnjës ka vendosur të ndryshojë trajnerin pas rezultateve zhgënjyese të javëve të fundit, duke ndërprerë bashkëpunimin me trajnerin Ditmar Bicaj disa ditë më parë.

Largimi i tij la bosh pankinën e skuadrës lagunare, ndërsa drejtuesit nisën menjëherë konsultimet për gjetjen e pasuesit. Pas një mbledhjeje të zhvilluar nga strukturat drejtuese, u vendos që drejtimi i ekipit t’i besohej një emri të njohur për kampionatet e Kategorisë së Parë dhe të Dytë.

Bledi Kadiu është zgjedhur për të marrë drejtimin e Lushnjës, duke nisur kështu një aventurë të re në pankinën e skuadrës. Trajneri ka dalë nga akademia e Dinamos, ku ka drejtuar ekipin U21 për 18 ndeshje, duke fituar përvojë në menaxhimin e lojtarëve të rinj. Pas kësaj eksperience, ai mori drejtimin e skuadrës së Luzi 2008, të cilën e udhëhoqi për 10 takime, përpara se të largohej nga detyra.

Pas një periudhe pa ekip, Kadiu u rikthye sërish te Luzi 2008 me besimin e presidentit Albert Lusha. Në këtë rikthim, ai drejtoi skuadrën në katër ndeshje kampionati, por bashkëpunimi u ndërpre sërish pas një sërë akuzash dhe mosmarrëveshjesh. Tashmë, trajneri do të fokusohet te sfida e re me Lushnjën, në një moment delikat të sezonit.

Skuadra lagunare aktualisht renditet në vendin e 10-të në Kategorinë e Parë, me 16 pikë të grumbulluara. Pozicioni në renditje e vendos ekipin në një situatë të ndërlikuar, duke e bërë objektivin e mbijetesës prioritetin kryesor për pjesën e mbetur të kampionatit.

Drejtuesit shpresojnë që ndryshimi në pankinë të sjellë stabilitet dhe rezultate pozitive në javët në vijim./K.M

Një mëngjes i organizuar mirë ndikon drejtpërdrejt në energjinë dhe fokusin gjatë gjithë ditës. Ekspertët e lifestyle sugjerojnë zgjimin në të njëjtën orë, shmangien e telefonit në minutat e para dhe nisjen e ditës me një gotë ujë.

Sipas studimeve, planifikimi i detyrave që në mëngjes ndihmon në uljen e stresit dhe rritjen e efikasitetit. Edhe 10 minuta aktivitet fizik ose meditimi mund të bëjnë një ndryshim të ndjeshëm në gjendjen mendore./KM

Një ngjarje e rëndë është shënuar mbrëmjen e djeshme në Klos të Matit. 66-vjeçari Xhemal Zhuku, teksa ka tentuar të kalojë lumin Mat, është marrë nga rrjedha e fortë e ujit.

Trupi i pajetë i tij është gjetur disa kilometra më larg, pa shenja jete, në orët e para të mëngjesit të sotëm. Në kërkime morën pjesë shërbimet e Policisë, familjarët dhe banorë të zonës.

Grupi hetimor ndodhet në vendngjarje dhe po punon për zbardhjen e plotë të rrethanave të kësaj ngjarjeje tragjike./K.M

Pasi u betua mbi Kuran gjatë ceremonisë së inaugurimit, kryebashkiaku i Nju Jorkut Zohran Mamdani ka shfuqizuar një sërë masash të nxjerra nga paraardhësi i tij Eric Adams kundër antisemitizmit. Mes tyre është edhe urdhëresa për miratimin e përkufizimit të termit nga International Holocaust Remembrance Alliance (IHRA), i cili barazon disa forma kritike ndaj Izraelit – si kundërshtimi i karakterit etnikisht hebre të shtetit – me antisemitizmin. Por kjo nuk është e gjitha. Kryebashkiaku i parë mysliman i “Mollës së Madhe” ka shfuqizuar gjithashtu masën që u ndalonte punonjësve dhe agjencive bashkiake të bojkotonin nga Izraeli. Po ashtu, është hequr edhe vendimi që i jepte policisë së Nju Jorkut detyrën për të rregulluar aktivitetet protestuese pranë vendeve të kultit, pas manifestimeve para një sinagoge në Upper East Side, të cilat kishin ngjallur akuza për antisemitizëm.

Operacioni sekret për kapjen e presidentit të Venezuelës, Nicolas Maduro, i quajtur “Maduro Out”, ka nisur që në verën e kaluar, kur Donald Trump autorizoi CIA-n të kryente “aksione të fshehta” në territorin venezuelian. Qëllimi ishte i qartë: Të ndiqeshin lëvizjet e liderit, të studioheshin bazat e tij të mbështetjes dhe rrjeti i sigurisë që e mbronte.

Agjentët amerikanë vepruan në heshtje, duke kombinuar metodat klasike të infiltrimit me teknologjinë më të avancuar, përfshirë përdorimin e dronëve. Paralelisht, sipas burimeve amerikane, shërbimet sekrete të SHBA-ve kërkuan edhe mbështetje brenda aparatit ushtarak venezuelian, pasi konsiderohet e vështirë që një operacion i tillë të realizohej pa ndihmë të brendshme, në një shtet të mbushur me kontrolle ekstreme sigurie.

Në të njëjtën kohë, Sekretari amerikan i Shtetit, Marco Rubio, po zhvillonte negociata të fshehta me figura të regjimit të Karakasit. Vetë Rubio konfirmoi se i kishte ofruar “më shumë se një herë” Maduro-s një “rrugëdalje”, por pa dhënë detaje se çfarë nënkuptonte kjo ofertë. Një nga pikat e paqarta mbetet nëse SHBA-të ishin gati t’i garantonin atij një largim pa gjyq nga Shtetet e Bashkuara.

Pasi negociatat dështuan, ekipi politik i administratës Trump, i përbërë nga Rubio, sekretari i Mbrojtjes Pete Hegseth dhe këshilltari për Sigurinë Kombëtare, Stephen Miller – në bashkëpunim me gjeneralët amerikanë të drejtuar nga shefi i shtabit Dan Caine, planifikoi ndërhyrjen ushtarake. Trump e miratoi planin katër ditë pas Krishtlindjeve, por për shkak të motit të keq u vendos të pritej momenti i duhur.

Ora e operacionit u aktivizua në orën 22:46 të së premtes, 2 janar, sipas orës së Uashingtonit. Në aksion u përfshinë forca të marinës, aviacionit dhe veçanërisht njësitë speciale kundër terrorizmit, Delta Force. Më shumë se 150 avionë luftarakë u ngritën nga rreth 20 baza, si nga toka ashtu edhe nga aeroplanmbajtëset. Në operacion u përdorën avionë F-35, bombardues B-1, dronë dhe helikopterë luftarakë.

Gjatë natës, avionët bombarduan disa objektiva strategjikë në Karakas dhe rrethinat e tij, përfshirë portin La Guaira, aeroportin Higuerote dhe bazën ushtarake La Carlota. Objektivi kryesor ishte kompleksi ushtarak Fuerte Tiuna, ku Maduro ndodhej me bashkëshorten e tij, Cilia Flores.

Pasi u neutralizua mbrojtja ajrore, helikopterët Apache transportuan njësitë Delta Force drejt kompleksit. Në orën 02:01 të mëngjesit, sipas orës lokale të Karakasit, forcat speciale hynë në perimetër, ndërprenë energjinë elektrike dhe depërtuan në ndërtesë. Sipas Trump, përplasjet ishin të ashpra, por deri tani nuk ka informacion të qartë për viktima nga pala venezueliane.

Maduro dhe bashkëshortja e tij ndodheshin në katin përdhes. Brenda 46 sekondash, forcat speciale hynë në dhomën e gjumit. Maduro tentoi të largohej drejt një dhome të blinduar, por u ndal pas disa hapash. Ai u arrestua dhe iu vendosën prangat. Agjentë të FBI-së i komunikuan atij urdhrin e arrestit të lëshuar nga gjykatat e Nju Jorkut. Sipas Rubio-s, ky nuk ishte “një akt lufte”, por zbatim i një vendimi gjyqësor amerikan.

Faza më delikate ishte largimi nga territori venezuelian. Maduro dhe bashkëshortja u transportuan me helikopter drejt një aeroplanmbajtëseje amerikane që ndodhej në ujërat pranë bregdetit. Në orën 04:29, helikopterët u ulën në kuvertën e anijes luftarake amerikane “Iwo Jima”.

Pas përfundimit të operacionit, Donald Trump publikoi një foto të Maduro-s të prangosur, i veshur me tuta gri dhe me syze të mëdha dielli, duke e krahasuar simbolikisht me një figurë të mundur historike.

/KM

Në një operacion të gjerë të drejtësisë kundër kriminalitetit trans-kombëtar, një gjykatë kineze ka dënuar me vdekje 11 anëtarë të një familjeje kriminale që drejtuan një rrjet masiv të skanimeve dhe krimeve të lidhura me to në Mianmar, njoftojnë mediat ndërkombëtare. Gjykata në qytetin verior të Wenzhou vendosi gjithashtu dënime të tjera të rënda, duke përfshirë burgim të përjetshëm dhe 5 dënime me vdekje të pezulluara për dy vjet, si dhe dënime burgimi nga 5 deri në 24 vjet për 39 anëtarët e familjes së akuzuar. Gjyqtarët i gjetën fajtorë për një seri krimesh që përfshijnë mashtrime dixhitale, trafik droge, prostitucion të organizuar dhe vrasje, me të ardhura të paligjshme që tejkalojnë 10 miliardë juan (rreth 1,4 miliardë $) nga viti 2015 e në vazhdim. 

Operacionet kriminale të kësaj familjeje, e njohur si Familja Ming, zhvilloheshin kryesisht në rajonin e Kokangut në shtetin Shan të Mianmarit, në kufi me Kinën. Ato përfshinin qendra të mëdha mashtrimi (të quajtura “kompensione”), kazino të paligjshme dhe punësim të detyruar të viktimave – shpesh të mashtruara me oferta pune të rreme – të cilët detyroheshin të kryenin skanime telefonike, mashtrime romantike dhe investimesh për viktima në mbarë botën. 

Hetimet zbuluan se punonjësit në këto komplekse kriminale shpesh ishin trajtuar me dhunë dhe u kërcënoheshin me dëmtime ose vdekje nëse përpiqeshin të largoheshin, ndërsa disa u vranë gjatë përpjekjeve të arratisjes. Një nga vendet më famëkeqe ishte kompleksi “Crouching Tiger Villa”, ku mijëra persona ishin detyruar të punonin në skanime online dhe ku ka pasur raporte për abuzime brutale dhe vdekje. 

Ky veprim ligjor është pjesë e një **fushate më të madhe të Kinës për të zhdukur rrjetet kriminale të skanimeve që operojnë në juglindje të Azisë, duke përfshirë bashkëpunimin me autoritetet e Mianmarit, Tajlandës dhe vende të tjera në rajon për të arrestuar, ekstraduar dhe dënuar anëtarë të grupeve kriminale dhe për të shpëtuar viktima të trafikimit. Që nga 2023, mijëra persona të dyshuar u kthyen në Kinë ose u arrestuan në kuadër të kësaj beteje kundër mashtrimeve trans-kombëtare. 

Ky rast nënvizon angazhimin e Pekinit për të trajtuar mashtrimet masive dhe krimet e organizuara që ndikojnë në qytetarët e saj dhe në sistemet financiare globale, ndërsa autoritetet paralajmërojnë se rrjetet kriminale mund të vazhdojnë të adaptohen dhe zhvendosen në vende me zbatim më të dobët të ligjit./K.M

Last Updated on 04/01/2026 by Klara

Irani vijon të jetë i përfshirë nga kaosi dhe trazira. Protestat kanë përfshirë vendin, të cilat janë shoqëruar me përplasje të forta mes protestuesve dhe forcave të sigurisë.

Prej rreth 7 ditësh qytetarët vijojnë të protestojnë  duke paralizuar të paktën 30 qytete. Grupet e të drejtave të njeriut njoftuan se të paktën katër persona u vranë të shtunën gjatë protestave në Iranin perëndimor.

Numri i viktimave që në nisjeve të protestave ka arritur në 12 përfshirë edhe anëtarë të forcave të sigurisë.

Protestat masive, të nxitura fillimisht nga kostoja e jetesës, filluan më 28 dhjetor në Teheran, ku tregtarët mbyllën dyqanet e tyre në shenjë proteste kundër rënies ekonomike./K.M

Studime të fundit shkencore tregojnë se gjumi cilësor ndihmon trurin të përpunojë informacionin dhe të përmirësojë kujtesën. Mungesa e gjumit, sipas shkencëtarëve, lidhet me rritjen e rrezikut për probleme neurologjike.

Hulumtimet theksojnë se 7–8 orë gjumë në natë janë thelbësore për funksionimin optimal të trurit. Ruajtja e një orari të qëndrueshëm gjumi ndihmon në përmirësimin e shëndetit mendor dhe emocional./KM

Kina i ka bërë sërish thirrje SHBA-së që të lirojë presidentin venezuelian Nicolás Maduro dhe gruan e tij, të cilët janë në paraburgim në SHBA pasi arrestuan nga forcat amerikane nga kryeqyteti venezuelian, Karakas.

“Kina i bën thirrje SHBA-së të sigurojë sigurinë personale të Presidentit Maduro dhe gruas së tij, të lirojë menjëherë Presidentin Maduro dhe gruan e tij, të ndërpresë përpjekjet për të përmbysur regjimin venezuelian dhe të zgjidhë çështjen përmes dialogut dhe negociatave”, thuhet në një deklaratë nga Ministria e Jashtme e Pekinit.

Më herët, Pekini ngriti shqetësimin dhe dënoi fuqimisht “përdorimin e hapur të forcës nga SHBA-të kundër një shteti sovran”./K.M

Këtë të diel, një dollar amerikan do të blihet me 81.2 lekë dhe shitet me 82.7 lekë.

Euro blihet me 95.6 lekë dhe do të shitet me 97.1 lekë.

Franga zvicerane blihet me 102.4 lekë dhe shitet me 103.9 lekë.

Paundi britanik blihet me 109 lekë dhe shitet me 111 lekë.

Dollari kanadez këmbehet me 59 lekë në blerje dhe me 60.5 lekë në shitje.

Për kursin e monedhave të tjera shihni tabelën e mëposhtme./K.M

Bllokadat që karakterizuan gjithë 2025-tën e pamundësuan edhe miratimin e projektligjit për buxhetin e këtij viti.
Aktualisht, vendi funksionon me 1/12 e buxhetit të vitit të shkuar, por kjo zgjatë vetëm të dy muajt e parë, e nisur nga marsi, gjithçka është në rrezik.

Pagesa që nuk mund të kryhen e rrjedhimisht nuk do të paguhen punëtorët e sektorit publik e nuk do të mund të jepen shërbime. Në tentativën e fundit për formimin e qeverisë të dalë nga zgjedhjet e 9 shkurtit, pati edhe një përpjekje për miratimin e projektligjit që e hartoi qeveria në detyrë.

Por, një qeveri në detyrë, si ajo e Albin Kurtit që zgjati mandatin për pesë vjet, nuk kishte kompetencë të dërgonte një projektligj për miratim, te një kuvend i zgjedhur së fundmi. Megjithatë, zgjedhjet e 28 dhjetorit të fundvitit 2025 dhanë një fitues të qartë, Lëvizjen Vetëvendosje me rreth 50% të votave. Kjo nënkupton që lehtësisht, kjo parti, konstituon Kuvendin e formon qeverinë.

Me 56 ulëset që ka siguruar nga rezultatet preliminare, e ka të lehtë edhe miratimin e buxhetit për këtë vit. Por, për këtë do të duhet që Komisioni Qendror i Zgjedhjeve të certifikojë rezultatet e zgjedhjeve të parakohshme parlamentare shumë më shpejt, që pastaj të thirret seanca për konstituim të Kuvendit e formim të qeverisë./K.M

Nga Namir Lapardhaja

Kur në vitin 2021 Sali Berisha u shpall ‘non grata’ nga Departamenti Amerikan i Shtetit për korrupsion madhor, minimin e demokracisë dhe shantazhimin e drejtësisë, reagimi i tij dhe i rrethit politik përreth ishte i parashikueshëm dhe i dyfishtë. Së pari, u ngrit flamuri i sovranitetit: “ne jemi vend sovran”, dhe, së dyti, u përsërit si refren në media e sheshe ideja se “nuk është Amerika ajo që të sjell në pushtet, por vota”.

kaluan, administratat në SHBA u ndërruan, por një gjë mbeti e pandryshuar: non grata e Berishës. As lobimet e kushtueshme, as qindra mijëra dollarë të paguara për të zhbërë vendimin, nuk sollën asnjë rezultat, sepse Amerika nuk ndryshoi qëndrim.

Ndërkohë, ndryshoi Berisha dhe njerëzit rreth tij. Ata që dje betoheshin për sovranitet, sot përshëndesin rrëmbimin gjatë natës të diktatorit grotesk të Venezuelës, Nicolás Maduro, dhe ushqejnë shpresa banale për “zbarkime marinsash” edhe mbi Surrel. Sovraniteti, mesa duket, vlen vetëm kur u u intereson.

Këtu qëndron edhe thelbi i kontradiktës dhe absurditetit të tyre, sepse kur një superfuqi ndërhyn brutalisht në sovranitetin territorial të një vendi tjetër, duke shkelur ligje dhe konventa ndërkombëtare, kjo nuk përbën më problem për vetëshpallurit sovranistë, mjafton që ngjarja t’i ushqejë fantazitë e tyre surrealiste politike.

Pikërisht, për këtë arsye, këto qëndrime nuk janë as preokupuese, as të besueshme, sepse nuk ka koherencë politike aty ku nuk ka parime. Çdo zhvillim në arenën ndërkombëtare shitet si “fitore”, duke i gënjyer dhe duke u tallur me ata që u venë nga pas.

Mjafton të krahasosh akuzat e SHBA-ve ndaj Maduros me arsyetimin e shpalljes non grata të Berishës, pavarësisht se bëhet fjalë për realitete të ndryshme dhe kontekste të largëta, dhe e sheh se logjika është e njëjtë: mbrojtja e interesit amerikan në rajon, qoftë në Amerikën Latine, qoftë në Ballkan. Në këtë prizëm, ai që ngjan më shumë me Maduron nuk është Rama, por Berisha.

Dallimi është se Berisha nuk përbënte rrezik të ngjashëm, kështu që u mjaftuan vetëm ta nxirrnin nga loja politike, ta izolonin dhe ta linin në një opozitë të përjetshme, përmes dizenjimit non grata. Dhe këtë e bënë pa tanke, pa marinsa, pa spektakël, por vetëm me një vulë politike që, deri më sot, ka rezultuar e pakthyeshme./K.M

Një incident i rrezikshëm ka ndodhur mbrëmjen e kësaj të shtune në rrugën Elbasan–Tiranë, ku një automjet u përfshi nga zjarri pranë zonës së Tunelit të Krrabës.

Flakët kanë përfshirë shpejt mjetin, duke alarmuar drejtuesit e tjerë që ndodheshin në qarkullim, ndërsa drejtuesi i automjetit ka mundur të largohet menjëherë pa pësuar dëmtime. Nuk raportohet për të lënduar.

Forcat e Policisë dhe shërbimi zjarrfikës kanë mbërritur në kohë në vendngjarje, duke vënë situatën nën kontroll dhe duke garantuar vijimësinë e qarkullimit rrugor.

Lëngu i portokallit, i konsideruar prej vitesh si problematik për shkak të përmbajtjes së lartë të sheqerit, po rivlerësohet nga studimet shkencore. Hulumtimet tregojnë se, pavarësisht rritjes së shpejtë të sheqerit në gjak krahasuar me frutin e plotë, konsumimi i moderuar i lëngut të portokallit 100% mund të sjellë përfitime shëndetësore.

Kryebashkiaku i Nju Jorkut, Zohran Mamdani, ka reaguar ashpër ndaj operacionit të SHBA-së në Karakas, ku u arrestua presidenti venezuelian Nicolas Maduro dhe bashkëshortja e tij, të cilët pritet të transferohen në Nju Jork për t’u përballur me akuza penale.

Në një reagim publik, Mamdani e cilësoi operacionin si një shkelje të rëndë të ligjit ndërkombëtar dhe federal. “Një sulm i njëanshëm ndaj një kombi sovran është një akt lufte,” shkroi ai, duke theksuar se veprime të tilla përbëjnë precedent të rrezikshëm.

Në deklaratën e tij të plotë, kryebashkiaku u shpreh se ishte informuar për arrestimin dhe ndalimin e planifikuar të Maduros në paraburgim federal në Nju Jork, ndërsa paralajmëroi se ndjekja e hapur e ndryshimit të regjimit ka pasoja jo vetëm për vendet e huaja, por edhe për qytetarët amerikanë.

Sipas Mamdanit, situata prek drejtpërdrejt edhe dhjetëra mijëra venezuelianë që jetojnë në Nju Jork. Ai theksoi se siguria e komunitetit venezuelian dhe e të gjithë njujorkezëve mbetet prioritet për administratën e tij, e cila do të vijojë të monitorojë zhvillimet dhe të japë udhëzime sipas nevojës./K.M

Në zonat e ulëta dhe bregdetare priten temperatura të ulëta deri mesatare, me vranësira të shpeshta dhe reshje shiu herë pas here.

Në zonat malore temperaturat zakonisht zbresin nën zero, ndërsa reshjet shfaqen kryesisht në formë dëbore. Era mund të jetë mesatare, herë pas here e fortë në bregdet, ndërsa mjegulla është e mundshme në lugina dhe zona të brendshme.

Dashi

Do jeni mendje hapur gjate kësaj dite dhe do pranoni te provoni emocione te reja ne çift. Gjithçka pritet te shkoje me se miri. Edhe beqaret do jene me fat dhe do e gjejnë personin e tyre te ëndrrave. Shume gjera kane për te ndryshuar për ta. Për financat do jete dite goxha e qëndrueshme. Nuk do keni asgjë për çfarë te shqetësoheni dhe do kryeni edhe investime.

Demi

Dite mjaft e qëndrueshme dhe e bukur kjo e sotmja për ata qe janë ne një lidhje. Do bëni lëshime ndaj partnerit dhe gjithçka do ju ece për mrekulli. Beqaret nga ana tjetër nuk do realizojnë takimet e ëndrrave kështu qe do mbeten vetëm. Financat do i mbani gjithë kohës te mira. Organizimi dhe maturia qe keni janë pikat me te forta.

Binjaket

Dashuria do jete mbi gjithçka gjate kësaj dite. Ne krahët e partnerit do ndiheni si mbi re. Shfrytëzojeni çdo sekonde duke u dashuruar me pasion. Beqaret nuk do i shfrytëzojnë dot te gjitha mundësitë qe do iu jepen për takime dhe do mbeten vetëm. Financat nuk do jene te shkëlqyera, por gjithsesi nuk do kenë as probleme te mëdha.

Gaforrja

Marrëdhënia ne çift pritet te jete disi me e mire gjate kësaj dite. Te gjitha dëshirat do ju plotësohen një e nga një dhe do ndiheni te bekuar. Beqaret do preferojnë vetëm aventura kalimtare jo lidhje serioze dhe afatgjata. Ne planin financiar fati do jete ne anën tuaj. Do kryeni shpenzimet e nevojshme dhe gjendja do vazhdoje te mbetet e mire.

Luani

Do jeni me te qarte sot ne jetën tuaj ne çift dhe do flisni hapur me partnerin. Çdo brenge apo pakënaqësi do ja shprehni si ta ndjeni. Beqaret nuk duhet te ëndërrojnë me shume sesa duhet sepse realiteti mund t’i zhgënjejë pa mase. Për sa iu përket financave, do i menaxhoni me kujdes ato para qe keni dhe nuk do hidhni asnjë hap te gabuar.

Virgjeresha

Partneri do ju lere shume pas dore gjate kësaj dite juve qe jeni ne një lidhje dhe shpeshherë do ndiheni aq keq saqë do kërkoni ndarjen. Beqaret do kalojnë çaste te këndshme me disa persona dhe do mendojnë shume shpejt ta fillojnë një lidhje. Financat nuk do jene ne gjendjen e duhur për te kryer investime apo transaksionet e menduara.

Peshorja

Ata qe janë ne një lidhje do e forcojnë edhe me shume bashkëpunimin ne çift dhe do e kenë me te lehte te diskutojnë për çfarëdo lloj çështjeje. Beqareve do ju ndodhe çdo gjë si me magji. Personat qe do takojnë do ju përputhen ne çdo pike. Problemet financiare do i zgjidhni me shpejt nga sa kishit menduar dhe do jeni te qete kur te shpenzoni.

Akrepi

Dite shume e këndshme kjo e sotmja për ata qe janë ne një lidhje. Shume gjera te bukura kane për te ndodhur dhe do ju bëjnë te ndiheni mjaft mire. Beqaret nuk do jene ne humorin e duhur për te kërkuar shpirtin e tyre binjak. Financat do jene goxha delikate, prandaj gabimi me i vogël mund t’iu sjelle goxha probleme. Mos bëni çmenduri.

Shigjetari

Jeta ne çift do jete gjate gjithë kohës e mbrojtur nga yjet gjate kësaj dite. Gjithçka do ju realizohet ashtu si ju e kishit menduar. Beqaret nga ana tjetër do kalojnë çaste te këndshme me disa persona interesante te cilët do iu bëjnë edhe propozime. Financat serish do kenë probleme edhe pse kohet e fundit jeni munduar te ruani ekuilibrin.

Bricjapi

Shume nga dëshirat tuaja me te zjarrta te dashurisë do ju plotësohen sot. Partneri do ju gjendet pranë ne çdo moment dhe do ua plotësojë dëshirat. Beqaret do duhet te presin edhe pak kohe për te ndryshuar statusin qe kane. Sot mundësitë nuk do jene te mira. Ekuilibri financiar do jete goxha i trazuar. Mos kryeni gjera te pamenduara.

Ujori

Duhet t’i shprehni me shume ndjenjat gjate kësaj dite juve qe jeni ne një lidhje sepse përndryshe partneri do mendoje se nuk e dashuroni me. Beqaret me ne fund do fillojnë një histori dashurie serioze dhe afatgjate. Me financat nuk duhet kurrsesi te bëni çmenduri. Shpenzoni aq sa ua mban xhepi ne mënyrë qe te mos vuani për buke me pas.

Peshqit

Çiftet do kalojnë një dite goxha te vështirë. Do kenë plot angazhime dhe nuk do dine çfarë te bëjnë me pare. E mira është qe te mos nxitohen për asgjë. Beqaret do jene te shpërqendruar dhe nuk do e kenë mendjen tek krijimi i një lidhjeje. Financat do mbeten te paqëndrueshme. Nuk do arrini dot t’i vini fre vetes dhe do shpenzoni pa fund./K.M