Udhëheqësit evropianë janë duke zhvilluar një takim në Bruksel për të diskutuar mbi të ardhmen e marrëdhënieve transatlantike.

Mbajtja e samitit u konfirmua edhe pasi presidenti amerikan më 21 janar hoqi dorë nga vendosja e tarifave, pasi në Davos të Zvicrës u arrit një pajtim për kornizën e marrëveshjes për Groenlandën gjatë një takimi me sekretarin e Përgjithshëm të NATO-s, Mark Rutte.

Bashkimi Evropian në samit kishte planifikuar fillimisht të diskutojë për një përgjigje të përbashkët ndaj kërcënimeve amerikane për tarifa. Pritet që udhëheqësit evropianë të bisedojnë edhe për strategjinë e përgjigjes ndaj kërcënimeve të mundshme në të ardhmen nga presidenti Trump.

Presidenti i Këshillit Evropian, Antonio Costa, në ftesën drejtuar shefave të shteteve dhe qeverive të BE-së, theksoi se dëshiron një diskutim mbi sfidat në marrëdhëniet transatlantike, pasojat e tyre për Bashkimin Evropian, si dhe koordinimin e hapave të ardhshëm.

Parlamenti Evropian më 21 janar pezulloi procesin e ratifikimit të marrëveshjes tregtare me Shtetet e Bashkuara të Amerikës, në dritë të tensioneve lidhur me Groenlandën.

Udhëheqësit e BE-së do të diskutojnë për Groenlandën dhe raportet tregtare me SHBA-në.

BE-ja synon që marrëdhëniet tregtare të jenë të qëndrueshme, të parashikueshme dhe të sigurta, por nëse kjo nuk ndodh, atëherë dëshiron të ketë në dispozicion kundërmasa të shpejta.

Sipas diplomatëve evropianë, blloku evropian dëshiron të përcaktojë qartë sa i fortë, i qëndrueshëm dhe i parashikueshëm është aktualisht partneriteti transatlantik tregtar dhe aleanca ushtarake.

Fokusi i diskutimit pa dyshim do të jetë Groenlanda, dhe pritet që udhëheqësit të marrin më shumë informacione nga Danimarka.

Kryeministrja e vendit pas konfirmimit të arritjes së pajtimit për kornizën e marrëveshjes tha se shteti i saj është i gatshëm të bisedojë për sigurinë në Arktik, por insiston në respektimin e integritetit territorial.

Bordi për Paqe në agjendën e takimit të liderëve evropianë

Bashkimi Evropian aktualisht heziton të marrë pjesë zyrtarisht në Bordin e ri për Paqe, duke pritur sqarime shtesë nga pala amerikane, por edhe duke analizuar nëse pjesëmarrja në këtë trup lejohet nga kushtetutat e disa shteteve anëtare.

Komisioni Evropian fillimisht përshëndeti idenë e këtij Bordi, por BE do të përpiqet të marrë një qëndrim të përbashkët edhe për këtë çështje. Për disa vende evropiane problematike është fakti që Trump ka ftuar në Bord edhe presidentët e Rusisë dhe Bjellorusisë, Vladimir Putin, dhe Aleksandar Lukashenko.

Megjithatë, unanmiteti për këtë çështje nuk është më i mundur, pasi në këtë Bord janë bashkuar Bullgaria dhe Hungaria./REL

Në mbyllje të seancës së parë paraprake në ngarkim të ish presidentit Ilir Meta, ka reaguar edhe avokati i tij.

Përmes një video-postimi në Facebook, Kujtim Cakrani ka denoncuar një incident që ka ndodhur në sallën e gjyqit.

Sipas tij, një nga prokurorët ka kërcënuar avokatin Gylsen Zhllima, dhe për këtë është kërkuar nxjerrja jashtë e prokurorit dhe të merrej masa.

Reagimi i plotë:

LEXO EDHE: Seanca paraprake në GJKKO/ Ish-presidenti: Prokurorët kuptuan dallimin mes METE-s dhe Metës

SPAK lexoi vetëm një pjesë të parashtrimeve të saj të kërkesës për kalimin në gjykim të dosjes ndaj Ilir Metës dhe Monika Kryemadhit teksa seanca e sotme paraprake në GJKKO u shoqërua me debate të forta.

Ndërsa, pas përfundimit të seancës ka reaguar edhe presidenti i Partisë së Lirisë, Ilir Meta.

Sipas tij, arritja më e madhe është se prokurorët pas 8 vitesh hetime kuptuan më në fund dallimin midis METE- (Ministria e Ekonomisë, Tregtisë dhe Energjitikës) dhe Metës sepse vazhdimisht i referoheshin METE-s si Meta.

Reagimi i plotë: 

𝐒𝐞𝐚𝐧𝐜𝐚 𝐩𝐚𝐫𝐚𝐩𝐫𝐚𝐤𝐞 𝐟𝐢𝐥𝐥𝐨𝐢. 𝐏𝐫𝐨𝐤𝐮𝐫𝐨𝐫ët 𝐦ë në 𝐟𝐮𝐧𝐝 𝐤𝐮𝐩𝐭𝐮𝐚𝐧 𝐝𝐚𝐥𝐥𝐢𝐦𝐢𝐧 𝐦𝐞𝐬 𝐌𝐄𝐓𝐄-𝐬 (𝐌𝐢𝐧𝐢𝐬𝐭𝐫𝐢𝐚 𝐞 𝐄𝐤𝐨𝐧𝐨𝐦𝐢𝐬ë, 𝐓𝐫𝐞𝐠𝐭𝐢𝐬ë 𝐝𝐡𝐞 𝐄𝐧𝐞𝐫𝐠𝐣𝐢𝐭𝐢𝐤ë𝐬) 𝐝𝐡𝐞 𝐌𝐞𝐭ës

I ftoj të gjitha mediat të jenë korrekte dhe të mos shpërndajnë dizinformacione, sikur gjoja seanca paraprake ndaj Ilir Metës është shtyrë për javën tjetër.

JO!

Më në fund seanca paraprake u zhvillua edhe pse mungonte një nga të bashkëpandehurit dhe avokatët e tij.

Ishte insistimi im që kjo seancë më në fund të fillonte dhe e falenderoj gjyqtaren e seancës paraprake që e mori këtë vendim.

Për 4 orë kemi dëgjuar prokurorët që lexonin akuzat e tyre për CEZ-DIA, që ishin siç ju a kanë shpërndarë më 21 tetor 2024.

U detyruam të ndërhynim disa herë, jo për t’i ndërprerë prokurorët, por për t’i ndihmuar të mos gënjejnë para gjykatës.

Afera e CEZ-DIA, ku shteti shqiptar ka fitim se ka humbur rreth 1.1 milion euro por ka fituar mbi 4 milion euro.

Arritja më e madhe është se prokurorët pas 8 vitesh hetime kuptuan më në fund dallimin midis METE- (Ministria e Ekonomisë, Tregtisë dhe Energjitikës) dhe Metës sepse vazhdimisht i referoheshin METE-s si Meta

Kishte dhe plot arritje të tjera, por këto mund t’i sqarojnë avokatët.

Kështu që SEANCA NUK U SHTY, SEANCA FILLOI.

Edhe prokurorët e kuptuan që METE nuk është Meta.

Seanca tjetër u la pas një jave edhe pse kërkova të bëheshin dy seanca në një javë.

Ilir Meta, as i është shmangur drejtësisë, as nuk bëj lojra për shtyrje seancash.

Në fund të gjithë kësaj farse kriminale të diktuar nga “Palloshi i gjatë” do të dalë, jo vetëm që METE nuk është Meta, por që ILIR META ËSHTË E VËRTETA.

Sidoqoftë dua t’i falenderoj prokurorët e SPAK që u kanë dhënë leje gazetarëve për të më intervistuar dhe e ftoj Ministrin e Drejtësisë të mos bëhet më pengesë sepse jo vetëm Navalny dhe Khodorkovsky kanë dhënë intervista në burgjet e Rusisë, por edhe në Shqipëri, jo vetëm politikanë të paraburgosur dhe të burgosur, por edhe të dënuar me burgim të përjetshëm kanë dhënë intervista televizive sepse çdo qytetar, sidomos çdo politikan, ka jo vetëm të drejta por edhe detyrë t’i përgjigjet çdo gazetari dhe media në interes të opinionit publik dhe të llogaridhënies.

Nga Kapitali.al –

Banka Raiffeisen në Tiranë fshehu paratë e Bankers Petroleum përmes një manovre tinëzare me qëllim që qeveria dhe kreditorët e tjerë privatë të mos mblidhnin dot detyrimet e papaguara të kompanisë kineze.

Skandali i rëndë, i cili tashmë është edhe pjesë e dosjes së SPAK, bën bashkëpunëtore edhe një nga bankat më të mëdha në vend, në skemën kriminale të ngritur në këmbë nga drejtuesit kinezë të Bankers Petroleum për të zhdukur paratë e naftës shqiptare duke lënë pas malin me borxhe.

Për shkak të borxheve të mëdha, Bankers Petroleum praktikisht nuk mund të përdorte dot asnjë llogari për të bërë pagesa në Shqipëri, pasi paratë do të sekuestroheshin menjëherë si nga tatimet apo dhe nga subjektet e tjera, ndaj të cilave Bankers ka detyrime të papaguara.

Por teksa shteti dhe përmbaruesit xhironin më kot me vendimet e gjykatave dhe urdhrat e ekzekutimit në duar, Bankers dhe Raiffeisen ngritën një skemë të sofistikuar për të fshehur paratë e kompanisë kineze. Gjithçka u bë përmes një overdrafti që Raiffeisen hapi për kompaninë Bankers.

Bankers përdorte overdraftin e Raiffeisen për të kryer pagesat në Shqipëri dhe pasi harxhonte një sasi të caktuar parash nga ky overdraft i zëvendësonte ato duke transferuar para nga llogaria e saj në Vienë, por gjithmonë duke u kujdesur që overdrafti të mos kalonte asnjëherë në shifër pozitive.

Dhe limiti i overdraftit ishte 9 milionë dollarë, çka i lejonte bankers të bënte pagesa lirshëm pa patur frikën se mos do të sekuestroheshin nga Tatimet apo kreditorët e tjerë.

Për shkak se overdrafti është praktikisht borxh, legjislacioni në fuqi nuk lejon bllokimin apo ekzekutimin e tij. Kjo pasi paratë, konsiderohen të bankës dhe jo të subjektit që i është çelur overdrafti.

Por skema djallëzore u zbulua nga prej përmbaruesve të shumtë që kërkonin më kot të ekzekutonin para nga Bankers për llogari të kreditorëve. Altin Latifi iu drejtua me shkresë zyrtare bankës Raiffeisen duke e vënë në dijeni se ajo që po bënte ishte e paligjshme dhe praktikisht një vepër penale.

“Ju jeni në dijeni që Bankers Petroleum kohët e fundit ka humbur gjyqe abritrazhi lidhur me detyrimet ndaj shtetit, që ky i fundit nuk po i ekzekuton dot për shkak të ndihmës pa kufij që po i jepni Ju,” i shkruan përmbaruesi Bankës Raiffeisen duke i rikujtuar se kjo ishte shkelje e qartë e nenit 320 të kodit penal dhe përbënte vepër penale, e cila dënohet me burg.

Në fund ai e ka paralajmëruar Raiffeisenin se nëse nuk do të ndalte transaksionet e paligjshme, do të njoftonte të gjitha organet ligjzbatuese.

Përfshirja e bankave në skema, të cilat dëmtojnë interesin publik për shkak të pazareve korruptive, që bëjnë drejtuesit e tyre, është një nga skandalet më të rënda financiare. Kjo është arsyeja se pse shtetet rregullojnë fort me ligje sistemin bankar.

Manovra e Raiffeisen me Bankers me oevrdratin ka vazhduar për një kohë të gjatë, edhe pasi u zbulua. Vetëm pak kohë më parë, banka e mbylli overdraftin pasi shpërtheu dhe çështja e gjobës së famshme 120 milionë euro të doganave.

Këtë të enjte, Presidenti i SHBA, Donald Trump mbajti fjalimin e tij në Forumin Ekonomik në Davos, në mbledhjen themeluese të Bordit të Paqes, duke e vlerësuar maksimalisht këtë inisiativë që sipas tij është një nga mekanizmat dhe instrumentet më të rëndësishme të cilat janë krijuar.

Ai nuk i ka kursyer batutat, kur tha se liderët e ftuar për të qenë pjesë e këtij grupit i pëlqen të gjithë, megjithatë janë 2 ose 3 prej tyre që nuk i duron fare.

“Thuajse çdo vend dëshiron që të jetë pjesë e këtij grupi. Kam dërguar ftesa dhe liderit e këtyre shteteve janë në Davos. Janë disa që i pëlqej disa jo, por në këtë grup i pëlqej të gjithë përveç 2-3 që nuk i duroj dot”, tha ndër të tjera Trump.

Real Madrid, Barcelona, Bayern Munich, Paris Saint-Germain dhe gjashtë ekipe të Premier League janë 10 klubet me të ardhurat më të larta gjatë sezonit të kaluar.

Sipas raportit të përvitshëm të Deloitte’s Football Money League, këto skuadra kanë arkëtuar 12,4 miliardë euro së bashku, ose 11% më shumë se një sezon më parë.

Real Madrid është i vetmi që ka kaluar kufirin e 1 miliardëshit, ndërsa Barcelona i është afruar me 975 milionë euro.

Rreth 70 milionë euro erdhën vetëm nga shitja e suvenireve nga stadiumi i vjetër Camp Nou. Të ardhurat nga aktivitetet tregtare përbëjnë 43% të shumës për këto ekipe, ose 5,3 miliardë euro.

Në dhjetëshen e parë, vetëm Manchester City ka më pak të ardhura se një sezon më parë, por kjo shumë është e papërfillshme, pasi përkon me 1%.

Sot shënohet zyrtarisht fillimi i fazës më kritike dhe emocionuese për Kombëtaren Shqiptare të Futbollit.

Me sytë nga Botërori, udhëheqësit e kuqezinjtëve zbresin në terren për të nisur përgatitjet intensive për përballjen e parë dramatike të fazës “play-off”.

Ndeshja e 26 marsit në Varshavë ndaj Poloninë nuk është thjesht një sfidë radhe, por porta e parë drejt një arritjeje që do të thyente çdo rekord të mëparshëm të futbollit tonë kombëtar, duke na dërguar për herë të parë në elitën e futbollit botëror.

Stafi teknik në inspektim tredimensional mes Varshavës, Valencias dhe Stokholmit

Puna e Federatës dhe stafit teknik ka nisur shumë përpara grumbullimit të lojtarëve. Një grup specialistësh të afërt me trajnerin janë nisur tashmë drejt Polonisë për të piketuar çdo detaj logjistik, duke filluar nga cilësia e fushave stërvitore e deri te privatësia e hoteleve. Ky operacion nuk ndalet me kaq, pasi stafi do të vizitojë menjëherë më pas Valencian për të parë mundësitë e akomodimit në rast të një përballjeje me Ukrainën, si dhe Stokholmin, për të qenë gati në çdo skenar që na dërgon drejt finales së play-off-it kundër Suedisë, duke mos lënë asgjë në dorë të rastësisë.

Rikthimi i madh i Ernest Muçit dhe shifrat e tij premtuese

Lajmi që po qarkullon me forcë në korridoret e grumbullimit në Tiranë është rikthimi i mundshëm i Ernest Muçit pas një mungese që zgjaste prej muajsh. Sulmuesi po e detyron stafin teknik t’i besojë sërish falë një forme spektakolare në kampionatin turk, ku ka regjistruar gola vendimtarë dhe një rritje të dukshme në volum loje. Muçi vjen si një “forcë e re” pas një mungese prej më shumë se 6 muajsh në listën zyrtare, duke sjellë me vete aftësinë për të shënuar nga distanca dhe për të krijuar epërsi numerike, elemente që do të jenë jetike përballë mbrojtjes fizike polake.

Mesazhi i qartë i trajnerit dhe mobilizimi i grupit

Në prag të këtij grumbullimi, trajneri është shprehur i bindur se skuadra ka arritur pjekurinë e duhur për të përballuar presione të tilla. Ai ka theksuar se këto katër ditë në Tiranë do të shërbejnë për të saktësuar detajet taktike që bëjnë diferencën në ndeshje teke “jetë a vdekje”. Strategu kuqezi e cilëson Poloninë si një kundërshtar që kërkon disiplinë të hekurt, ndërsa ka lënë të kuptohet se shpirti i sakrificës që karakterizoi ekipin në rrugëtimin evropian duhet të jetë sërish në fushë.

Analiza e kundërshtarit të parë dhe makthi i quajtur Poloni

Polonia mbetet një nga “kockat më të forta” për Shqipërinë, me një histori përballjesh që anon ndjeshëm nga ana e tyre. Në 15 takime të luajtura përgjatë historisë, kuqezinjtë kanë arritur të triumfojnë vetëm në 2 raste, ndërsa kanë pësuar 10 humbje dhe kanë marrë 3 barazime. Megjithatë, fitorja jonë e fundit 2-0 në eliminatoret e kaluara ka ndryshuar mentalitetin e grupit, duke treguar se diferencat teknike tashmë janë minimizuar dhe Varshava nuk është më një territor i pamposhtshëm, pavarësisht forcës goditëse të polakëve në shtëpinë e tyre.

Rruga drejt finales dhe hija e Ukrainës apo Suedisë

Nëse Shqipëria kalon pengesën polake, rrugëtimi vështirësohet akoma më shumë. Me Ukrainën, statistikat tona janë historikisht negative, duke kërkuar ende fitoren e parë zyrtare pas disa tentativave ku kemi qenë shumë pranë por kemi pësuar në fund. Nga ana tjetër, Suedia përfaqëson një shkollë tjetër futbolli, me të cilën kemi pasur përballje më të balancuara por gjithmonë sfiduese në aspektin fizik. Logjistika e parakohshme në Valencia dhe Stokholm tregon se Shqipëria nuk po shkon në këtë play-off thjesht si pjesëmarrëse, por si një pretendente që ka studiuar çdo skenar të mundshëm.

Më pak se katër ditët e zjarrit në Tiranë, përpara fluturimit vendimtar

Koha është armiku më i madh në këtë grumbullim, pasi lojtarët do të kenë në dispozicion vetëm 96 orë për t’u shkrirë me idetë taktike përpara nisjes për në Poloni. Ky afat i shkurtër kohor kërkon një përqendrim maksimal dhe një gjendje optimale fizike nga të gjithë lojtarët e ftuar. Gjithçka është projektuar që brenda kësaj jave, skuadra të rigjejë atë magji që e bëri krenar kombin, me shpresën e madhe se ky mars, do të mbetet i shkruar me shkronja ari në historinë e sportit shqiptar si muaji i kthesës së madhe drejt majave të botës.

Shtetet e Bashkuara synojnë të vazhdojnë përpjekjet për të siguruar akses dhe kontroll mbi Groenlandën, duke përmendur arsye sigurie kombëtare, tha zëvendëspresidenti i SHBA-së J.D. Vance, duke e lidhur drejtpërdrejt çështjen me mbrojtjen nga raketat dhe rëndësinë strategjike të Arktikut.

Vance tha se Uashingtoni “do të vazhdojë të përpiqet të sigurojë kontroll mbi këtë masë tokësore”, duke iu referuar Groenlandës, gjatë fjalimit të tij mbi negociatat për aksesin e SHBA-së në ishull.

Deklarata e Vance erdhi në përgjigje të pyetjes së një gazetari se si e kupton ai kornizën e një marrëveshjeje të ardhshme që do të prekë Groenlandën.

Edhe pse nuk iu përgjigj drejtpërdrejt detajeve të një marrëveshjeje të mundshme , zëvendëspresidenti amerikan këmbënguli në rëndësinë strategjike dhe mbrojtëse të rajonit për sigurinë kombëtare amerikane.

“Do të na duhet kontrolli i Arktikut për të qenë në gjendje të rrëzojmë një raketë. I gjithë sistemi ynë i mbrojtjes nga raketat varet nga kjo siguri e Arktikut”, tha Vance, duke theksuar se vendndodhja gjeografike e Groenlandës konsiderohet kritike për zbulimin në kohë dhe reagimin ndaj kërcënimeve me raketa.

Duke iu referuar kornizës së negociatave, Vance vuri në dukje se “negociatat me NATO-n po përparojnë mirë”, pa dhënë, megjithatë, detaje të mëtejshme mbi përmbajtjen ose kohën e bisedimeve.

Raporti sugjeron që çështja e Groenlandës po diskutohet gjithashtu në kontekstin e bashkëpunimit më të gjerë transatlantik dhe planifikimit të mbrojtjes kolektive.

Avokatët e ish-presidentit brazilian Jair Bolsonaro kanë gjetur një mënyrë për të tentuar uljen e dënimit të tij prej 27 vitesh burg, të dhënë vitin e kaluar për komplotimin e një grushti shteti përmes leximit të librave, një mekanizëm i parashikuar nga ligji brazilian.

Sipas këtij ligji, të burgosurit mund të përfitojnë ulje dënimi prej katër ditësh për çdo libër të lexuar, me kusht që ta vërtetojnë leximin përmes raporteve me shkrim.

Një gjyqtar i Gjykatës Supreme autorizoi Bolsonaron të marrë pjesë në këtë skemë, pas kërkesës së ekipit të tij ligjor.

Megjithatë, iniciativa ka ngjallur reagime, pasi Bolsonaro nuk është njohur kurrë si lexues i rregullt dhe ka pranuar më herët se nuk kishte lexuar libra prej vitesh.

Lista e miratuar e leximit përfshin vepra mbi demokracinë, të drejtat e indigjenëve, racizmin, mjedisin dhe krimet e diktaturës ushtarake të viteve 1964–1985, një regjim që ish-presidenti e ka mbështetur publikisht.

Mes titujve janë, libri ilustrues “Demokracia”, i Philip Bunting, si dhe vepra klasike si “Lufta dhe Paqja” dhe “Don Kishoti”.

Bolsonaro ndodhet aktualisht në një burg të sigurisë së lartë.

Për të përfituar nga ulja e dënimit, ai duhet të dëshmojë se ka lexuar realisht librat e përfshirë në program.

Autoriteti Kombëtar i Ushqimit ka njoftuar tërheqjen nga tregu të formulës së qumështit të foshnjeve “NAN 1 OPTIPRO” 800 g.

Në njoftimin e AKU-së bëhet e ditur se ky vendim u mor pas zbulimit të pranisë së bakterit cereulide në këtë produkt në subjektin prodhues në Holandë.

“Referuar njoftimit të subjektit importues në Shqipëri, mbi tërheqjen nga tregu të lotit të formulës për foshnjë “NAN 1 OPTIPRO” 800g, njoftim ky i bërë nga kompania prodhuese Nestle si masë parandaluese pas zbulimit të pranisë së bakterit cereulide në këtë produkt në subjektin prodhues në Holandë, bëjmë me dije: Të dhëna përkatëse të produktit NAN 1 OPTIPRO 800 g, L 51230346AE, 30/05/2027”, njofton AKU.

Pas kryerjes së kontrolleve dhe ndjekjes së gjurmueshmërisë AKU ka bllokuar të gjithë sasinë në gjendje të produktit dhe atë të kthyer nga tregu me destinacion asgjësimin e tij ose kthimin në vendin e origjinës.

Gjithashtu, AKU informon se nga verifikimet në terren është konstatuar se është kryer afishimi i njoftimit për konsumatorin në supermarketet ku është tregtuar ky produkt.

Një 20-vjeçar shqiptar humbi tragjikisht jetën në mëngjesin e sotëm, 22 janar, në një aksident në Itali.

Sipas mediave italiane, ngjarja ndodhi në komunën e Revellos, në provincën e Cuneos.

I riu shqiptar udhëtonte me një makinë Audi, kur u përplas “kokë më kokë” me një kamion. 20-vjeçari me inicialet K.G., i cili jetonte në Saluzzo, gjeti vdekjen e menjëhershme.

Për nxjerrjen e tij nga makina u desh ndërhyrja e forcave zjarrfikëse.

Ndërkohë vijojnë hetimet për zbardhjen e plotë të rrethanave të aksidentit.

Kryeministri i Çekisë, Andrej Babis, është bërë viral në mediat sociale pasi njoftoi se kishte blerë një glob të shtrenjtë për 617 euro, vetëm për të parë se ku ndodhet Groenlanda.

Përveç kësaj, ai postoi një video në Facebook ku e krahasoi globin me hartat “e sheshta” që ai pretendon se shtrembërojnë realitetin gjeografik.

“Në këtë glob të bukur mund të shohim madhësinë reale të Groenlandës krahasuar me SHBA-në dhe Evropën. Dhe Rusia është afër, dhe nëse do të kishte një konflikt, Zoti na ruajt, raketa nuk do të duhej të shkonte larg”, shtoi ai.

Kjo deklaratë nxiti reagime të shumta në mediat sociale, ku përdoruesit e tallën Babisin për çmimin e globit, i cili ishte dhjetë herë më i lartë se çmimi i zakonshëm për objekte të tilla në Çeki. Një karikaturë në internet përshkruante situatën si një mashtrim, ku Babis u akuzua se kishte blerë globin një pensionisti naiv për një çmim të lartë.

Babis, 71 vjeç, u rikthye në pushtet në dhjetor, duke udhëhequr një qeveri koalicioni me partinë e tij ANO, Zërin e Shoferëve të krahut të djathtë dhe SPD-në e ekstremit të djathtë.

Zv.kryeministrja Belinda Balluku reagon pas kalimit në Parlament të projektligjit për aderimin e Shqipërisë në “Bordin e Paqes”.

Sipas Ballukut, ky votim vjen në një moment dinamik për gjeopolitikën, kur tensionet dhe kërcënimet kanë vënë në dyshim stabilitetin politik e social ndërkombëtarisht.

Numri dy i qeverisë shton se, Parlamenti Shqiptar shprehu vendosmërinë e përhershme për të qenë një aleat i vendosur dhe i palëkundur i Shteteve të Bashkuara të Amerikës

“Edi Rama do të përfaqësojë Shqipërinë në Bordin e Paqes, pas ftesës së Presidentit Trump, në një moment dinamik për gjeopolitikën, kur tensionet dhe kërcënimet kanë vënë në dyshim stabilitetin politik e social ndërkombëtarisht.

Qeveria Shqiptare pozicionohet qartë në anën e paqes, rendit dhe vlerave që garantojnë stabilitet dhe siguri.

Edhe një herë, Parlamenti Shqiptar shprehu vendosmërinë e përhershme për të qenë një aleat i vendosur dhe i palëkundur i Shteteve të Bashkuara të Amerikës”, shkruan Balluku.

Parlamenti ka votuar këtë të enjte, me 110 vota pro projektligjin për aderimin e Shqipërisë në “Bordin e Paqes”, ku socialistë e demokratë u bashkuan, pavarësisht debateve dhe tensioneve që shoqëruan seancën plenare.

Sjellim ndërmend se Këshilli i Ministrave e miratoi të mërkurën projektligjin për aderimin e Shqipërisë në “Bordin e Paqes”.

Presidenti amerikan Donald Trump njoftoi më herët këtë muaj planet për krijimin e një “Bordi për Paqen” (Board of Peace) për të mbikëqyrur zbatimin e një plani 20-pikësh për Gazën, një iniciativë që synon të çojë drejt paqes mes izraelitëve dhe palestinezëve. Por nuk do ndalet vetëm në këtë konflikt.

“Bordi i Paqes” u themelua zyrtarisht sot në Davos.

LEXO EDHE: Firmosi krah Trump pjesëmarrjen në “Bordin e Paqes”/ Osmani: Kur Amerika udhëheq, paqja është gjithmonë më e sigurt

“Kush beson vërtet te një marrëveshje dhe te arkitekti i saj, Presidenti Trump, nuk braktis votimin. Edi Rama e bëri. Ai nuk e votoi marrëveshjen”.

Kështu e nis reagimin e tij në rrjetet sociale kreu i Grupit Parlamentar të PD-së, Gazment Bardhi, pak orë pasi Parlamenti miratoi aderimin e Shqipërisë në “Bordin e Paqes”.

Sipas Bardhit, Rama jo vetëm që nuk e sheh dot me sy Donald Trump, por i duhej vetëm skena politike për të mbuluar dështimin e tij spektakolar me mungesën në Davos.

Reagimi i plotë: 

Kush beson vërtet te një marrëveshje dhe te arkitekti i saj, Presidenti Trump, nuk braktis votimin. Edi Rama e bëri. Ai nuk e votoi marrëveshjen!

Iku nga seanca pa asnjë arsye shtetërore. Sepse Edi Rama jo vetëm që nuk e sheh dot me sy Donald Trump, por i duhej vetëm skena politike për të mbuluar dështimin e tij spektakolar me mungesën në Davos.

Rama e përdori marrëveshjen e Bordit të Paqes si skenë të urrejtjes politike kundër opozitës dhe si moment për të goditur dhe për tu dukur i fortë kundër SPAK-ut. U rreshtua si avokat i Erion Veliajt, Belinda Ballukut dhe Ergys Agasit, por jo si një shtetar i përgjegjshëm.

Ne ia dogjëm skemën perverse antiopozitë Edi Ramës. Ne e votuam me besim marrëveshjen dhe partneritetin me Presidentin e SHBA-së. Ai u zhduk nga Parlamenti pa votuar.

Vullneti i vërtetë politik matet me votë, jo me fjalime patetike!

Montel McKenzie ka bërë zyrtare lidhjen e tij me Alisha Lehmann, e njohur gjerësisht si “futbollistja më seksi në botë”.

Ish-ylli i emisionit të ITV2, 28 vjeç, ka ndarë një dedikim emocionues për partneren e tij me rastin e ditëlindjes së 27-të të bukuroshes zvicerane, duke e konfirmuar kështu romancën e tyre në rrjetet sociale.

Postimi i McKenzie ka tërhequr menjëherë vëmendjen e fansave, të cilët kanë reaguar masivisht ndaj lidhjes së re mes yllit televiziv dhe futbollistes së njohur. Komentet kanë qenë të shumta, me ndjekës që shprehin surprizë, mbështetje dhe kuriozitet për çiftin e ri.

Alisha Lehmann është një nga figurat më të ndjekura në futbollin e femrave, ndërsa McKenzie, përveç famës televizive, është gjithashtu futbollist gjysmë-profesionist. Romanca e tyre duket se ka ndezur rrjetin dhe pritet të jetë një nga historitë më të komentuara të momentit në botën e showbiz-it dhe sportit.

233 është numri i pasurive të konfiskuara të atyre shtetasve që kanë kryer vepra penale të trafikimit, korrupsionit apo krimit të organizuar, pasuri këto të cilat janë aktualisht në zotërim të Agjencisë së Administrimit të Pasurive të Sekuestruara dhe Konfiskuara (AAPSK).

Vitin e kaluar ka pasur një numër më të ulët pasurish të konfiskuara se në 2024.

Gjithashtu, ndryshe nga viti 2024 ku shumica e pasurive ishin konfiskuar në Tiranë, duket se 2025 e ka ndryshuar hartën e konfiskimeve.

Sipas katalogut të publikuar nga AAPSK, Lezha rezulton të ketë shënuar një rekord prej 56 pronash që i kanë kaluar shtetit pas konfiskimit me vendim gjykate.

Ndërkohë, në vend të dytë renditet Durrësi me 40 pasuri të konfiskuara, Tirana me 33, Vlora me 30 (vetëm qyteti pa rrethinat, pra jo qarku i plotë) dhe Berati me 18.

Nga viti në vit, pasuritë e konfiskuara janë të shumëllojshme, duke nisur që nga ndërtesa, apartamente, godina banimi, truall, toka arë, dyqane veshjesh, biznese të tipit bar-kafe, garazhe, bilardo, fast food, pastiçeri dhe shumë të tjera.

Agjencia e Administrimit të Pasurive të Sekuestruara dhe Konfiskuara merr në dorëzim nga Policia e Shtetit dhe administron pasuritë e sekuestruara dhe të konfiskuara nga grupet e krimit apo persona të tjerë.

Këto pasuri të cilat kalojnë në duart e shtetit, mund të nxirren nga ky i fundit në shitje përmes ankandeve ose të jepen me qira.

Po ashtu, një numër i konsiderueshëm pasurish jepet për dëmshpërblimin financiar të viktimave të veprave penale të krimit të organizuar dhe trafikimit të qenieve njerëzore, mund t’i kalojnë institucioneve shtetërore për përdorim si zyra ose të jepen për ripërdorim social.

Nga ana tjetër, vlerat monetare të konfiskuara mund të depozitohen në llogari bankare ose të investohen në bono thesari, shkruan “Scan”.

Rrugë të shkatërruara, makina të mbuluara nga balta dhe mbeturinat, si dhe banesa të përmbytura.

Kjo është panorama që lanë pas përmbytjet që përfshinë disa zona në Athinë.

Banorët u panë duke gërmuar për të nxjerrë automjetet e bllokuara dhe duke pastruar shtëpitë nga gurët, balta dhe uji.

“Erdhi si një lumë. Uji ishte rreth gjysmë metri i lartë dhe me vete solli mbeturina. I gjithë mali u shemb poshtë”, tha një banor.

Autoritetet lokale thanë se, pavarësisht masave mbrojtëse, uji shkaktoi shembje të rrugëve dhe dëme të mëdha materiale.

Sipas autoriteteve, në Glyfada do të shpallet gjendje emergjence dhe banorët janë thirrur të raportojnë dëmet për të kërkuar dëmshpërblim.

Bilanci është tragjik: një grua humbi jetën pasi u godit nga një makinë e marrë nga rrjedha e ujit, ndërsa një tjetër person u përmbyt nga dallgët në Peloponez.

Vetëm në 24 orët e fundit janë regjistruar mbi 900 thirrje për ndihmë në Athinë.
Shkollat janë mbyllur dhe linjat detare janë pezulluar për shkak të kushteve të rënda atmosferike.

Barcelona merr lajme të mira dhe të këqija nga gjendja fizike e Pedrit.

Testet mjekësore të kryera nga mesfushori përjashtuan këputjen e muskulit në bicepsin femoral të këmbës së djathtë, diçka që e ul ndjeshëm parashikimin për kohën e rikuperimit të tij.

Por nga ana tjetër, lajmi i keq është se Pedri do të qëndrojë jashtë fushave të lojës për një muaj.

Në momentin e dëmtimit, te Barcelona u shfaq frika për një dëmtim më të rëndë, por alarmizmi me kalimin e orëve ra dhe në fund dëmtimi ishte më i lehtë nga sa u mendua në mometin e parë.

Barcelona në fund doli me komunikatë për shtyp ku konfirmon se Pedri do të qëndrojë për 1 muaj jashtë fushave të lojës.

Kjo do të thotë se mesfushori 23 vjeçar do të humbasë 6 ndeshje; 4 në La Liga ndaj Oviedos, Elches, Mallorca dhe Gironës, 1 në Champions League, atë me Copenhagen dhe 1 në Kupën e Mbretit me Albaceten.

Ernest Muçi do të transferohet zyrtarisht te Trabzonspor.

Lajmin e ka bërë të ditur presidenti i skuadrës turke, Ertuğrul Doğan, i cili ka konfirmuar për mediat turke se klubi i tij do të blejë kartonin nga skuadra e Beșiktaș.

Performancat e shkëlqyera të sulmuesit të Kombëtares kanë bindur trajnerin Fatih Tekke dhe drejtuesit që të investojnë 10 milionë euro për të. “Lojtari na pëlqen shumë dhe do të paguajmë këstin e parë 2 milionë në muajin maj”, ka thënë mes të tjerash presidenti.

Por e ardhmja mund ta gjejë larg kampionatit turk sulmuesin kuqezi, pasi për të ka pasur oferta të shumta dhe Trabzonspor mund ta sakrifikojë për të shlyer të gjitha borxhet.

Muçi ka shënuar 10 gola në 18 ndeshjet e luajtura këtë sezon.

LEXO EDHE: VIDEO/ “Njeriu i minutave të fundit”, Muçi në historinë e Trabzonspor: 10 gola në kampionat dhe kupë

Vrasja e biznesmenit dhe politikanit lokal Ardian Nikulaj, i ekzekutuar me shtatë plumba në prill 2023 në Shëngjin, ishte pjesë e një zinxhiri të gjatë hakmarrjeje që, sipas gazetës britanike “The Sun”, nuk ka përfunduar ende.

Media shkruan se atentati brutal, i kryer nga një vrasës i maskuar si shpërndarës picash, lidhet me një hasmëri 30-vjeçare mes dy familjeve nga veriu i Shqipërisë, konflikt që ka marrë tetë jetë ndër vite.

“The Sun” raporton se për eliminimin e Ardian Nikulajt ishte vendosur një shpërblim prej 1.7 milionë paundësh, shumë që bëri që për herë të parë të rekrutohej një skuadër e huaj vrasësish nga Britania, pasi askush në Shqipëri nuk pranoi ta merrte kontratën.

Sipas hetimeve, atentati u planifikua me kujdes, me vëzhgim të vazhdueshëm të lëvizjeve të viktimës dhe përfshirjen e disa shtetasve britanikë, ndërsa ekzekutori u arratis jashtë vendit menjëherë pas krimit.

Familja e Ardian Nikulajt shpreh frikën se hakmarrja mund të vazhdojë, pasi vëllai i tij, Arben Nikulaj, është paralajmëruar se mbetet ende në shënjestër të armiqve.

E veja e viktimës, Rudina Nikulaj, i ka bërë thirrje autoriteteve britanike të lejojnë ekstradimin e të dyshuarve, duke theksuar se drejtësia është e vetmja mënyrë për t’i dhënë fund ciklit të përgjakshëm të hakmarrjes.

“Vrasjet duhet të ndalen – ka pasur mjaft. Ne kërkojmë drejtësi për Ardianin dhe i lutemi Britanisë së Madhe të bëjë gjënë e duhur dhe t’i dërgojë këta persona këtu për t’u përballur me drejtësinë. Por gjakderdhja duhet të marrë fund. Shumë fëmijë kanë mbetur pa baba”.

Si nisi hasmëria

Hasmëria nisi në vitin 1997, kur vëllai i Ardianit, Pëllumb Nikulaj, punonte si roje sigurie në një pikë karburanti dhe u përplas me familjen Lekstakaj.

Një i ri ishte larguar pa paguar pasi kishte mbushur makinën me karburant, ndaj Pëllumbi shkoi të fliste me të atin për të kërkuar pagesën. Disa orë më vonë, një grup prej shtatë personash, të armatosur me automatik, mbërriti në pikën e karburantit dhe vrau Pëllumb Nikulajn dhe pronarin e biznesit.

Gjatë dy viteve pasuese, pati edhe tre vrasje të tjera: dy anëtarë të familjes Lekstakaj dhe një person i armatosur nga e njëjta familje, pasi ai kishte ngritur pritë ndaj xhaxhait të Pëllumbit, Nikoll Nikulaj.

Vrasja

Pas kësaj, hasmëria mbeti e heshtur për 24 vjet, derisa shpërtheu sërish në një ditë me diell në prill të vitit 2023, në resortin bregdetar të Shëngjinit. Në orën 13:23, biznesmeni dhe politikani lokal Ardian Nikulaj, 51 vjeç, u ul në një tavolinë në barin buzë detit që zotëronte, pranë hotelit Coral, të cilin e drejtonte bashkë me vëllain e tij Arbenin.

Pak sekonda pasi mori një telefonatë në celular, ai ngriti kokën dhe pa një person që dukej si korrier me motor duke hyrë në lokal. Teksa personi, i maskuar me një maskë kirurgjikale, iu afrua tavolinës së Ardianit, futi dorën në xhepin e djathtë të pantallonave dhe nxori një armë zjarri.

Duke iu afruar gjithnjë e më shumë me çdo të shtënë, ai qëlloi shtatë herë, duke e goditur biznesmenin e pambrojtur, i cili u shemb i pajetë mbi karrige. Vrasësi doli me vrap nga lokali dhe hipi në motorin që e kishte lënë të ndezur aty pranë. Më pas u drejtua nga jugu, kaloi kufirin grek dhe, sipas policisë, u arratis drejt Marokut për t’u fshehur.

Të akuzuarit

Policia beson se pamjet e kamerave tregojnë Ruben Saraiva, shtetas portugez që kishte jetuar për vite me radhë në Britani, duke u larguar nga vendi i krimit me motor. Hetuesit arritën të sigurojnë ekstradimin e Saraivës pasi e gjurmuan në Marok, dhe ai tashmë do të përballet me gjyq në Shqipëri për vrasje.

Një tjetër i dyshuar është britaniku Harry Simpson, 34 vjeç, një trafikant droge i dënuar më parë nga jugu i Londrës.

I dyshuari si organizator i atentatit është Edmond Haxhia, 40 vjeç, britaniko-shqiptar nga Birminghami, kushëri i vëllezërve të familjes që ndodhen në hasmëri me familjen e Ardian Nikulajt.

Pamjet e kamerave tregojnë gjithashtu Harriet Bridgeman dhe Steven Hunt duke u regjistruar në hotelin e Ardianit. Ata akuzohen se kanë qenë pjesë e vëzhgimit të lëvizjeve të viktimës para vrasjes.