Akademia e Pushtetit Vendor, e cila do të trajnojë të gjithë punonjësit e 61 bashkive të vendit, do të nisë punën brenda një muaji. Në një intervistë për TV Klan, Ministri për Pushtetin Vendor, Ervin Demo, thotë se akademia u krijua në kuadër të integrimit të vendit, por edhe sfidave me të cilat do të përballen bashkitë për thithjen e fondeve që vijnë nga BE.

“Procesi i integrimit do të sjellë standarde të reja të cilat janë të detyruara për t’u implementuar në pushtetin vendor. Rreth 65% e legjislacionit do të prekë autoritetet lokale dhe bashkitë duhet të jenë me patjetër gati për të pasur mundësi të absorvojnë të gjitha kërkesat e reja të cilat do të jenë detyrime ligjore. Kjo do të jetë sfidë e madhe, sepse ne duhet të garantojmë që kemi institucione që ditën e parë që Shqipëria është në BE, të jenë gati për të shfrytëzuar të gjitha mundësitë që vijnë nga integrimi, si financime dhe fonde nga BE. Fondet e kohezionit janë të rëndësishme për bashkitë. Akademia në fillim të vitit 2026 fillon funksionin e saj normal, në muajin janar”, tha Demo.

Krahas integrimit, Akademia e Pushtetit Vendor pritet të ndihmojë stafet e bashkive edhe për çështjen e reformës së re territoriale, e cila tashmë është në diskutim.

“Bashkitë do të kenë një nevojë të jashtëzakonshme, sidomos vitin e parë, për të përthithur reformën territoriale, si nga funksionet, ashtu edhe nga hapësira gjeografike. Ne do të kemi sistemet e menaxhimit financiar ku bashkitë do të përfshihen në vitin 2026, kemi digjitalizimin e shërbimeve vendore që do të fillojë në vitin 2026 “, tha Demo.

Akademia e Pushtetit Vendor bën bashkë të gjithë aktorët vendimmarrës, por i rëndësishëm është fakti që do të jenë vetë bashkitë ato që do të evidentojnë nevojat ku duhet të rrisin performancën.

“Akademia vendore do të fokusohet specifikisht në nevojat që ka vetë bashkia dhe këto mund të ndryshojnë nga njëra bashki te tjetra. Për t’u ardhur në ndihmë bashkive për elemente specifike ku ato e kanë të domosdoshme një lloj përparimi nga pikëpamja e kapaciteteve, për të kapur standarde kombëtare apo për të krijuar mundësi të reja zhvillimi në territor”, tha Demo.

Akademia e Pushtetit Vendor është mbështetur nga të 61 bashkitë e vendit.

“Bashkitë e vendit kanë kaluar buxhetet për vitin 2026, kanë firmosur statutin e akademisë, po ashtu të gjitha qarqet e vendit janë pjesë e saj. Edhe qeveria shqiptare e ka dhënë zotimin e saj që tre vitet e para do e financojë në masën 50%”, tha Demo.

Financimi i akademisë është 50% nga buxheti i shtetit në tre vitet e para, dhe 50% nga buxheti i bashkive. Këto të fundit kanë buxhetuar në total 450 mijë euro për vitin 2026, në bazë të të ardhurave dhe buxhetit të gjithsecilës.

Polonia ka njoftuar një plan ambicioz për të ndërtuar një sistem modern mbrojtjeje kundër dronëve përgjatë kufirit të saj lindor. Ky vendim vjen pas rritjes së kërcënimeve nga Rusia dhe rasteve të fundit kur dronë rusë kanë shkelur hapësirën ajrore polake.

Zëvendësministri i Mbrojtjes, Cezary Tomczyk, deklaroi se brenda gjashtë muajsh do të jenë gati kapacitetet e para, ndërsa sistemi i plotë do të përfundojë brenda dy viteve.

Ky “mur” mbrojtës do të përfshijë:

•Mitraljerë me shumë tyta dhe topa kundërajrorë;

•Sisteme raketore për goditjen e objekteve fluturuese;

•Pajisje elektronike për bllokimin e sinjalit të dronëve (jamming).

Sipas zyrtarit polak, sistemi do të jetë i integruar me mbrojtjen ekzistuese, duke krijuar disa nivele sigurie për të parandaluar provokimet ruse që synojnë “të testojnë” gatishmërinë e NATO-s.

Financimi dhe projekti “Mburoja Lindore”
Projekti do të kushtojë rreth 2 miliardë euro. Pjesa më e madhe e parave do të sigurohet nga fondet evropiane përmes programeve të mbrojtjes, ndërsa pjesa tjetër nga buxheti i shtetit polak.

Përveç mbrojtjes nga dronët, Polonia po vijon punën edhe për “Mburojën Lindore”, një seri fortifikatash tokësore në kufi me Bjellorusinë dhe enklavën ruse të Kaliningradit, për të parandaluar çdo tentativë për pushtim tokësor.

Polonia në “gjendje lufte”
Që nga nisja e luftës në Ukrainë, Polonia ka rritur ndjeshëm shpenzimet për mbrojtjen, duke arritur në 4.7% të Prodhimit të Brendshëm Bruto (PBB), shifra më e lartë në Bashkimin Evropian.

“Për sa kohë që Ukraina mbrohet, Evropa nuk është në rrezik nga një luftë konvencionale, por ne do të përballemi me provokime dhe akte sabotazhi,” u shpreh Tomczyk. Ai shtoi se nëse Perëndimi lejon Rusinë të fitojë në Ukrainë, Kremlini shumë shpejt do t’i kthejë sytë nga pjesa tjetër e Evropës.

Përveç investimeve në armatim, shteti polak po trajnon qindra mijëra qytetarë për aftësi mbijetese dhe ka hapur programe të trajnimit ushtarak vullnetar për popullsinë.

Numri i lartë i lëvizjeve këtë fundvit ka sjellë edhe një rritje të numrit të thirrjeve drejtuar Urgjencës Kombëtare.

Kreu i kësaj urgjence, Skënder Brataj, thotë se gjatë 24 orëve regjistrohen afro 1mijë e 300 thirrje të qytetarëve që kërkojnë ndihmë mjekësore. Afro 60% e tyre i përkasin qarkut të Tiranës.

“Në 24 orët e fundit janë 1251 thirrje, 379 vizita të kryera në banesë dhe 129 konsulta mjekësore. Janë 424 mijë e 427 thirrje nga 1 janari deri më sot, ku 265 mijë prej tyre janë nga Tirana“, tha Brataj.

Problematikat më të shpeshta të regjistruara nga Urgjenca Kombëtare janë viruset në qarkullim, gripi, sëmundjet pulmonare, si dhe ato kronike. Brataj thotë se rritja e numrit të mjeteve për shkak të fluksit të vizitorëve ka sjellë edhe një rritje të lehtë të aksidenteve rrugore.

“Është sezoni tipik, pasi veç shtimit të numrit të qytetarëve që vijnë nga jashtë, edhe vetë sezoni i gripit, i cili është në rritje, bën që numri i thirrjeve të jetë më i lartë. Janë prezente edhe viruset e tjera, por edhe COVID, gjendjet febrile, që nga pulmonitet, aktivizimi i SPOK-ut (Sëmundja Pulmonare Obstruktive Kronike) dhe asma. Këto janë kryesoret, sidomos te personat me patologji shoqëruese. Gjithashtu, lëvizja e njerëzve ka rritur numrin e aksidenteve, ku përfshihen shumë makina dhe persona, pasi gjatë fundjavave ka fluks mjetesh dhe njerëzish. Kemi një rritje të këtyre rasteve së fundmi”, tha Brataj.

Problem mbeten edhe mjetet piroteknike dhe plagosjet e lehta prej tyre, për të cilat Brataj thotë se nga viti në vit ka një ulje të numrit, edhe për shkak të ndalimit të tregtimit të tyre.

“Në Tiranë, fëmijë që punojnë i sheh në rrugët kryesore e lokale. Të vegjlit shesin lule për të fituar para në çdo orë të ditës e në mbrëmje deri vonë”.

Tavolinë më tavolinë, një dorë që zgjatet me një trëndafil të kuq. Është kjo panorama e asaj që ndodh çdo natë. Fëmijët, kryesisht të moshës 5-13 vjeç, synojnë zonat që frekuentohen më shumë nga të rinjtë.

Ligji shqiptar garanton mbrojtje për fëmijët dhe Kodi i Punës ndalon punën te të miturit nën 16 vjeç. Sipas avokatit Redi Ramaj, puna ndër të tjera i ekspozon ata ndaj rrezikut.

“Mund të jenë objekt edhe i veprave penale, i shfrytëzimit dhe i abuzimit mbi ta”, tha ai.

Ndodhur në këtë situatë, ku fenomeni i fëmijëve në rrugë ka ardhur duke u përhapur, sipas juristëve institucionet duhet të përdorin instrumente më të fortë për parandalimin.

“Kemi pasur raste në gjykatë ku prindërit i kanë detyruar të bëjnë këto veprime të paligjshme. Institucionet shtetërore duhet të ndërhyjnë sepse legjislacioni ekziston dhe mundësitë që ata të gjejnë një zgjidhje duke u përkujdesur janë”, tha Ramaj.

Përveç rrezikut, një fëmijë që del në rrugë për të punuar përballet edhe me të tjera pasoja.

“Gjëja e parë që ndikon tek ata është elementi i stresit, frika dhe pasiguria. Por, mbi të gjitha, pasiguria që kanë në familje, përderisa i gjen në mjediset e rrugës. Braktisja e arsimit është një nga problematikat më të mëdha që kanë fëmijët që punojnë“, tha Arjana Muçaj, sociologe.

Në disa raste janë prindërit që i detyrojnë, por arsyet pse një fëmijë gjendet në kushtet e punës janë të ndryshme.

“Janë arsyet ekonomike që ka familja; në shumicën e rasteve janë familje të varfra. Fëmijët kthehen në mbështetje për familjen. Ka prindër që janë problematikë, të alkoolizuar, ku ekziston dhuna, dhe ndonjëherë ky fëmijë e sheh veten më mirë duke ndenjur e shitur në rrugë sesa të jetë pjesë e atij mjedisi”, tha Muçaj.

Sipas sociologes, fëmijët që punojnë janë gjithashtu objekt i bullizmit nga bashkëmoshtarët e tyre, arsye që ndër të tjera i detyron të braktisin edhe shkollën.

Një grup demokratësh ka marshuar në formë proteste në zonën e Surrelit, në periferi të Tiranës, duke kërkuar dorëheqjen e kryeministrit Edi Rama.

Mes demokrtëve ishin edhe deputetët Klevis Balliu, Elda Hoti dhe Besart Xhaferri.

Protesta e demokratëve në zonën e Surrelit, ku ndodhet edhe banesa private e kryeministrit Rama vjen teksa qeveria përballet me një sërë skandalesh.

Mes tyre janë hetimet e SPAK ndaj zv/kryeministres Belinda Balluku për të cilën është kërkuar edhe arrestimi, si edhe skandali i AKSHI-t, strukturë në të cilën është zbuluar një grup që ka vepruar përmes formave kriminale.

Rritet fuqia e pasaportës shqiptare. Sipas të dhënave të indeksit të pasaportave Henley për vitin 2025, pasaporta shqiptare renditet e 46-ta në botë duke u mundësuar qytetarëve të udhëtojnë pa vizë ose procedura të lehtësuara në 122 vende.

Rritjes së fuqisë globale të pasaportës shqiptare, i ka kushtuar një artikull edhe agjencia e udhëtimeve “Taravel and Tour World”.

Për dekada të tëra, pasaporta shqiptare ishte një simbol i izolimit, një dokument që kërkonte male me dokumente dhe javë të tëra pritjeje në ambasada edhe për një udhëtim të thjeshtë fundjave. Por ndërsa viti 2025 po mbaron, historia ka ndryshuar plotësisht , pasi shqiptarët mund të udhëtojnë në 60% të globit.

Sipas artikullit, ky rezultat nuk është vetëm një ngritje e vogël statistikore; është një ndryshim monumental në “lirinë e udhëtimit” të një kombi të tërë. Sot, një qytetar shqiptar mund të marrë pasaportën e tij dhe të fluturojë në 122 destinacione në të gjithë botën me qasje pa viza ose me kërkesa të thjeshtuara hyrjeje.

Ngjitja nga vendi i 75-të në të 46-in pasqyron më shumë sesa thjesht logjistikën e udhëtimit; është një pasqyrim i pozicionit diplomatik në rritje të Shqipërisë dhe integrimit të saj në botën perëndimore.

Katalizatori kryesor për këtë rritje ishte hyrja pa viza në zonën Shengen, e fituar me vështirësi, e cila hapi dyert për pothuajse të gjithë Evropën. Kjo u pasua nga një rrjedhë e vazhdueshme marrëveshjesh dypalëshe me vende në të gjithë Azinë, Amerikën e Jugut dhe Lindjen e Mesme, secila prej të cilave i shtoi një shtresë të re lirie udhëtarit shqiptar.

Sipas artikullit fuqia e pasaportës ka një rëndësi të madhe nuk është thjeshtë një dokument udhëtimit, por është tregues i lirisë ekonomike dhe personale.

Sipas artikullit të “Taravel and Tour World”, ndërsa vendi është drejt një rekordi historik, përpjekjet diplomatike përpjekjet diplomatike janë duke u zhvilluar aktualisht për të zgjeruar më tej aksesin në tregjet kryesore në Amerikë dhe Oqeani. Ndërsa Shqipëria vazhdon rrugën e saj drejt anëtarësimit në Bashkimin Evropian, statusi përfundimtar i “Pasaportës së BE-së” do ta çonte kombin në 10 vendet e para në nivel global, së bashku me fuqi të mëdha si Singapori dhe Japonia.

Për momentin, shqiptarët po festojnë një botë që është më e hapur për ta se kurrë më parë. Nga plazhet e Brazilit deri te rrokaqiejt e Emirateve, pasaporta shqiptare nuk është më një pengesë – është një çelës. këto të dhëna vërtetohen dhe nga INSTAT, ku gjatë periudhës 11 mujore të këtij vitit lëvizjes e shqiptareve jashtë vendit janë rritur me 6.5%.

Sekretari i Përgjithshëm i NATO-s, Mark Rutte, ka kundërshtuar thirrjet që Evropa të shkëputet ushtarakisht nga Shtetet e Bashkuara, duke argumentuar se Uashingtoni mbetet një partner i besueshëm i sigurisë.

“Jam absolutisht i bindur se Shtetet e Bashkuara e mbështesin plotësisht NATO-n. Nuk ka dyshim për këtë”, tha Rutte për Agjencinë Gjermane të Shtypit (dpa) të premten.

Rutte tha se Evropa duhet të marrë përsipër përgjegjësi më të mëdha për sigurinë e saj, duke përfshirë shpenzime më të larta për mbrojtjen, por ai theksoi se kjo duhet të ndodhë bashkë me Shtetet e Bashkuara dhe jo jashtë kuadrit transatlantik.

SHBA-të, tha ai, do të mbeten të angazhuara ushtarakisht në Evropë dhe të përkushtuara ndaj aleancës.

Vërejtjet e Rutte ishin një përgjigje e drejtpërdrejtë ndaj komenteve të fundit nga Manfred Weber, kreu i Partisë Popullore Evropiane, i cili vuri në pikëpyetje nëse Evropa mund të vazhdojë të mbështetet te Uashingtoni mes pasigurisë politike në SHBA. Në një intervistë, Weber argumentoi se Evropa duhet të jetë e përgatitur të veprojë në mënyrë më autonome.

“Nuk mund të presim seriozisht që Trump të sigurojë një zgjidhje paqeje i vetëm me ushtarët amerikanë”, tha Weber.

Shkëmbimi vjen në mes të një debati më të gjerë në Evropë mbi autonominë strategjike, ndërsa BE-ja rrit shpenzimet e mbrojtjes dhe përgatitet për një mjedis gjeopolitik më të paqëndrueshëm.

Ndërsa shumë udhëheqës bien dakord se Evropa duhet të bëjë më shumë ushtarakisht, Rutte ka paralajmëruar kundër interpretimit të përpjekjes si një shkëputje nga NATO.

Ervin Salianji, në takimin me demokratët në Shkodër, bëri një koment edhe për “vetëpërjashtimin” e tij nga Partia Demokratike, duke iu referuar komentit të Flamur Nokës dhe Sali Berishës.

“Shqipëria nuk ndryshon dhe është e pamjaftueshme nëse PD nuk reflekton dhe ndryshon për të rrëzuar Edi Ramën. Shqipëria nuk ndryshon duke rikthyer politika dhe metoda të vjetra, figura të konsumuara dhe mentalitete që i kanë zhgënjyer qytetarët që shumë vite më përpara.

E vjetra ka dështuar. Se ka folur shumë dhe ka vepruar pak. Është mbyllur në interesa të ngushta. Shikoni pak rastin e PD edhe në këtë pak rastin e PD në këtë moment. PD ka një statut dhe nuk ka asnjë shans që të përjashtohet dot askush nga PD.

Për shkak se zyrtarëve të PD, rrogëtarëve dhe përfituesve nuk iu vjen mirë që funkasionon që kanë ta mbajnë me punë por duan ta majnë me marifete dhe qyl shpikin terma që nuk ekzistojnë. Nuk ka vetëpërjashtim, ka vetëpërfshirje, vetëpërballje do tia dalim deri në fund që të ndryshopjmë PD. Politika është shërbim nuk është pronë.

Se anëtarësia e PD dhe qytetarët nuk janë pronë, por aksionerë. Ne jemi këtu jo vetëm për PD por në betejë për shtetin e së drejtës. Shqipëria nuk ka nevojë vetëm për denoncim, por për alternativë. PD në këtë moment ka një përgjegjësi historike. Rotacioni është mënyra e vetme për të ndaluar kapjen e shtetit”, tha Salianji.

Kongresi i Shteteve të Bashkuara ka futus së fundmi në axhendë projektligjin e ri, “Akti për Demokracinë dhe Prosperitetin e Ballkanit Perëndimor”, me qëllim mbështetjen e demokracisë, zhvillimit ekonomik dhe sundimit të ligjit.

Kjo iniciativë sipas kryetarit të Partisë Demokratike, Sali Berisha, është një sirenë që bie direkt për kryeministrin Rama.

“I dëgjoni ju tani sirenat e alarmit që bien nga Uashingtoni për korrupsionin e qeverisë së Edi Ramës dhe lidhjet e saj me drogën dhe krimin”, u shpreh Berisha nga Korça ku vijoi turin e tij të foltoreve.

Ai tha se gjatë këtyre viteve demokratët janë përballur me tentativat për ta përçarë e izoluar dhe për ta lënë vendin pa opozitë.

“Përpjekjet më kriminale për përçarjen e copëtimin e saj në projektet Shqipëria pa opozitë. Izolimin më të thellë, forcën politike më properëndimore në historinë e kombit. Megjithatë ne triumfuam. Jo se kishim fuqi mbinjerëzore. Jo se ishim më të fortë se ata që kërkonin të na fshinin nga faqja e dheut.

Por se mbronim të vërteta të përjetshme, të njeriut, të qytetëruar, të kombit, të qytetit, të familjes, të vendit. Ato të vërteta ne nuk i lëshuam. Ato të vërteta ne nuk i tradhëtuam. Ato të vërteta, me ato të vërteta ne u ngritëm, absolutisht si Feniksi nga hiri, në zenit”.
Berisha përsëriti thirrjen për kryeministrin Rama të japë dorëheqjen, duke premtuar një dënim kapital për të.

“Këtu, nga Korça, i deklaroj Edi Ramës se dënimi yt është pa kthim dhe është kapital. Dënimi yt politik është pa kthim dhe kapital. Jep dorëheqjen! Jep dorëheqjen, se nuk ka forcë në botë që të mban më në pushtet. Tani, ju them unë ju një gjë. Në qoftë se do kishte dënim me vdekje, ja kam thënë dhe njëherë, ajo Lubia që shihni ju, bashkë me Edi Ramën meritonte jo një, po tre dënime të tilla”, deklaroi lideri i opozitës.

Ditën e nesërme do të mbahen zgjedhjet në Kosovë, pasi votimi i shkurtit nuk solli një shumicë të qartë.

Gazetari i Top Channel, Muhamed Veliu, ka arritur të realizojë një intervistë me kandidatin e partisë së PDK-së, Bedri Hamza.
Ai e ka pyetur nëse beson se zgjedhjet e nesërme do t’i japin fund krizës politike në Kosovë.

“Jam i bindur që po, është e domosdoshme. Kosova ka nevojë për institucione, duhet të largojë këtë vakum institucional dhe këtë mungesë të stabilitetit politik, në dobi të Kosovës dhe në dobi të qytetarëve”, u shpreh kandidati i partisë së PDK-së, Bedri Hamza.

I pyetur nga gazetari se si do të dalë nesër PDK-ja, ai është shprehur se do të dalë mirë.

Anëtari i Kryesisë së PD, Ervin Salianji është pritur në mënyrë entuziaste nga demokratët e Shkodrës.

Dhjetëra automjete janë parë në pritje të Salianjit në qytetin bastion të Partisë Demokratike.

Takimi i Shkodrës vjen pas aktiviteteve të ngjashme të organizuara nga Salianji në qytete si Durrësi, Elbasani e Gjirokastra.

Kulla e Turanit në Korçë po përballet me rrezikun e shembjes totale. Kulla, monument i kulturës i kategorisë së parë dhe një nga ndërtimet më të rralla të këtij lloji në juglindje të vendit, e cila përfaqëson vlera historike dhe arkitektonike, sot ndodhet në një gjendje alarmante degradimi.

E ndërtuar në shekullin XVIII si një objekt mbrojtjeje, Kulla e Turanit, rreth 15 metra e lartë, me formë katrore, pa dritare dhe me vetëm një dhomë në çdo kat, është një shembull i rrallë i arkitekturës së fortifikuar.

Prej vitit 2014, kulla ka nisur të degradojë me çarjet në mure, rënia e pjesshme e çatisë ,por dëmtimet strukturore kanë përkeqësuar situatën, duke e kthyer monumentin në një rrezik edhe për banorët e zonës.

Kryeplaku i fshatit Turan, Ilir Skënderasi, shprehet se shqetësimi është ngritur prej vitesh pranë institucioneve përgjegjëse, por pa rezultat konkret.

“Prej vitesh ka nisur degradimi. Fillimisht u hapën muret, më pas ra çatia. Kemi njoftuar njësinë administrative, institucionet e kulturës dhe ministrinë. Sot gjendja është shumë e rëndë. Është monument kulture i shekullit XVIII dhe po shembet dita-ditës. Nëse nuk ndërhyhet, rrezikon të bjerë plotësisht. Ndodhet brenda oborrit të një familjeje dhe përbën rrezik për jetën e banorëve. Është për të ardhur keq, sepse është një monument unik. Turistët vijnë ta shohin, por çfarë do të shohin nesër, rrënoja?”

Ndërsa Drejtoria Rajonale e Monumenteve të Kulturës konfirmon se ekziston një projekt për restaurimin e kullës, por sipas saj mungesa e fondeve ka bërë të pamundur ndërhyrjen duke e lënë në harrë këtë monument të trashëgimisë kulturore.

Ndërsa Shqipëria po bëhet gjithnjë e më tërheqëse si destinacion për turistët e huaj, një tjetër tendencë shikohet tek një pjesë e shqiptarëve që preferojnë të festojnë festat jashtë Shqipërisë. Eksperti Arbër Ndreu flet për destinacionet më të kërkuara.

“Në muajit dhjetor dhe janar, janë Vjena, Praga dhe destinacione të Italisë, ndërsa në destinacionet me autobus kryesisht janë vendet si gjithmonë rreth rajonit tonë siç është Greqia dhe Turqia.”

Ndreu ndalet edhe te kërkesa për destinacionet shqiptare ashtu edhe trendet e reja.

“Përgjithësisht pjesa më madhe e shqiptarëve zgjedhin rajonin tonë për shkak se kemi edhe vende që ofrojnë këto destinacione me borë që është Mali i Zi, kryesisht për destinacionet tona Korça, Voskopoja, Dardha, Thethi, Valbona që mbeten gjithmonë destinacionet më të frekuentuara nga shqiptarët. Ndërsa përjashtë shpesh herë tani ka filluar është futur më tepër disa destinacione në Austri siç është Halltati, dhe Tyroli. Janë destinacione të reja për ne.”

Kërkesa për udhëtim me guida ka ardhur në rritje.

“Por unë i sugjeroj pjesën më të madhe të njerëzve të vijnë me guida për shkak sepse guida mund t’i informojmë mbi çdo gjë, qoftë tek pjesa e atraksioneve ku duhet të shkojnë, qoftë tek pjesa e kohës që ato arrijnë t’ia menaxhojnë pjesën e kohës çdo personi.”

Bujtinat janë kthyer në struktura të preferuara për shqiptarët.

“Tani për shkak të hapjes së madhe të bujtinave edhe një reklamim shumë të madh që ka kryesisht bujtinave në vendet malore që frekuentohen këto kohët sidomos për festat, Korça mbetet, Thethi dhe Valboni janë destinacionet më të frekuentuara sot për sot. Pastaj i shtohet kësaj harte dhe vende të tjera kryesisht bujtina të cilat janë në vendet më të vogla kanë filluar të hapen për shembull në qytetin e Gramshit disa vende të vogla që më përpara nuk kishte atë interesin e madh. Kemi në Bulqizë, kemi në Ersekë, disa vende të vogla them që po investojnë në pjesën e bujtinave edhe unë jua sugjeroj që të filloni edhe të shkoni sepse janë vende shumë të bukura pavarësisht marketimit që ato kanë.”

Buxheti i një udhëtari: 1200-1600 euro në vit për 3-4 udhëtime

Për një udhëtar të rregullt, buxheti vjetor për udhëtime të organizuara jashtë vendit shkon rreth 1200 deri 1mijë e 600 euro për person, duke përfshirë 3-4 udhëtime në vit me kosto mesatare 300-400 euro për një paketë bazë prej 3-4 ditësh që përfshin hotel, mëngjes, transport dhe shërbimin e udhërrëfyesit.

“Por pjesa më e madhe e tarifave që janë kryesisht nga 300 deri në 400€ ky mbetet gjithmonë ai ajo paketa bazë që shpenzohet për udhëtime. Shpeshherë ata udhëtojnë diku te tre herë apo katër herë në vit pjesa më e madhe e tyre kryesisht ndoshta dy herë në periudhën e dimrit dhe dy herë gjatë verës. 300-400€ për person në një udhëtim po por që përfshihet po janë tre netë katër ditë edhe hotelet janë me mëngjes që përfshihet dhe pjesa e guidës edhe transporti i cili të bën të mundur të shkosh gjitha pikat kryesore të një qyteti.“

Trendi kryesor për 2026 për udhëtimet jashtë është diversifikimi drejt destinacioneve me klimë të butë, si Barcelona, përveç vendeve tradicionale dimërore.

Mitingu i PDK-së është mbyllur në Kosovë, aty ku ditën e nesërme do të mbahen sërish zgjedhjet.

Fushata u mbajt në AMC Arena në Prishtinë, ku kishte një numër të konsiderueshëm pjesëmarrësish.

Aty ka pasur brohoritje të vazhdueshme për UÇK-në dhe Hashim Thaçin.

Nga Mero Baze

Ka disa lajme të reja pozitive për vëmendjen amerikane në Ballkan. Përkundër asaj që kishin frikë shumë vetë se administrata Trump do të merrej me konflikte të mëdha dhe mund të injoronte rajone si Ballkani, zhvillimet e fundit tregojnë se ka një vëmendje jo vetëm politike, por dhe një përpjekje për t’i kthyer në bazë ligjore politikat afatgjata të SHBA në Ballkan.

Projektligji i ri (H.R. 5274) kërkon ta ndryshojë qasjen e deritanishme të SHBA për rajonin, mbështetur në urdhra ekzekutivë dhe sinjalizime diplomatike, duke i kthyer elementet kryesore të kësaj qasjeje në ligj. Duke e kthyer në ligj këtë politikë, SHBA i bën ato më të vështira për t’u përmbysur në të ardhmen dhe akoma më të vështira për t’u lobuar me para për heqjen e sanksioneve “non grata”.

Ky projektligj jo vetëm që nuk e ul autoritetin që kanë sanksionet e deritanishme “non grata”, por e sanksionon atë në ligj dhe jo thjesht si status personal. Po ashtu, Kongresi po sinjalizon se regresi demokratik dhe korrupsioni politik në Ballkanin Perëndimor nuk janë më shqetësime episodike, por kërcënime strukturore për interesat e SHBA-së.

Shqipëria shihet si një aktor i rëndësishëm për SHBA në rajon dhe kërkohet që zhvillimi ekonomik, tregu energjetik dhe siguria kibernetike të jenë larg rreziqeve të ndikimit të Rusisë apo Iranit.

Sa i përket vlerësimit të nismave rajonale në Ballkan, projektligji i përmend tre iniciativa si potencialisht të dobishme, por të cilat nuk i bekon automatikisht, por kërkon një vlerësim publik zyrtar për secilën në muajt në vijim.
Ato janë “Open Balkan”, “Procesi i Berlinit” dhe “Growth Plan for the Western Balkans”, një plan ekonomik strategjik i miratuar nga Komisioni Europian më 8 nëntor 2023.

Ky është thelbi i projektligjit për pjesën që i takon Shqipërisë, i cili është depozituar në pritje të debateve dhe konsultimeve.

Gjëja më e rëndësishme këtu është rikthimi i vëmendjes amerikane për rajonin dhe, veçanërisht, roli kyç që i jep Shqipërisë.

Projektligji ka sjellë debate pozitive në Shqipëri, pasi opozita e udhëhequr nga Berisha, i cili është i sanksionuar “non grata”, shpreson që ky projektligj, i cili në fakt është propozuar nga një kongresmen demokrat, mund të jetë lobuar për të “rrethuar” qeverinë Rama në Tiranë.

Në fakt, kështu siç është, projektligji as prodhon sanksione të reja dhe as heq ato të vjetrat, por vetëm përpiqet të sistemojë në një ligj gjithë politikat e SHBA për Ballkanin, me qëllim që ato të mos përmbysen nga lobistë të mirëpaguar për interesa politike.

Pastaj, ata që duan me çdo kusht të justifikojnë paratë që kanë paguar lobistët dhe mund të ëndërrojnë çdo tre muaj që SHBA t’i vrasë lopën komshiut meqë ia ka vrarë të vetën, por projektligji nuk jep garanci për këtë.

Një tërmet i fuqishëm me magnitudë 7.0 goditi bregdetin verilindor të Tajvanit mbrëmjen e së shtunës, rreth orës 23:05 sipas kohës lokale.

Sipas Administratës Qendrore të Motit (CWA), lëkundjet u ndien pothuajse në të gjithë ishullin.

Tërmeti u përjetua me intensitet të lartë në disa qytete kryesore, përfshirë kryeqytetin Taipei, New Taipei, Taichung, Taoyuan dhe Tainan.

Sipas shkallës shtatë-nivelëshe të intensitetit sizmik të Tajvanit, lëkundjet u vlerësuan në nivelin 4 në shumicën e rajoneve, një nivel që shkakton lëkundje të forta të ndërtesave dhe objekteve.

Deri në këto momente, autoritetet lokale nuk kanë raportuar për viktima apo dëme të mëdha materiale. Megjithatë, ekipet e emergjencës mbeten në gatishmëri dhe po monitorojnë situatën, pasi tërmete të kësaj magnitude shpesh shoqërohen me pasgoditje.

Tajvani ndodhet në një zonë me aktivitet të lartë sizmik, e njohur si “Unaza e Zjarrtë” e Paqësorit. Për këtë arsye, infrastruktura dhe popullsia e vendit janë përgjithësisht të përgatitura për përballimin e tërmeteve.

Pavarësisht rritjes së përdorimit të teknologjisë dhe platformave digjitale, bizneset në Ballkanin Perëndimor vazhdojnë të mbeten prapa në shitjen dhe blerjen online. Sipas të dhënave të Balkan Barometer 2025, vetëm 20% e kompanive në nivel rajonal deklarojnë se shesin produkte ose shërbime përmes internetit, ndërsa shumica dërrmuese, 80%, ende nuk janë të përfshira në tregtinë elektronike.

Në këtë panoramë, Shqipëria shfaqet me performancë relativisht më të mirë, pasi 26% e bizneseve raportojnë se operojnë online, një shifër më e lartë se mesatarja e rajonit. Megjithatë, edhe në Shqipëri, 74% e kompanive ende nuk shesin apo blejnë produkte përmes platformave digjitale, çka tregon se potenciali për zhvillim mbetet i pashfrytëzuar.

Krahasuar me vendet e tjera të rajonit, Serbia kryeson listën me 27% të bizneseve aktive në tregtinë online, e ndjekur nga Shqipëria dhe Maqedonia e Veriut me 24%. Në anën tjetër të renditjes qëndrojnë Bosnje dhe Hercegovina me vetëm 11%, Kosova me 13%, si dhe Mali i Zi me 18%, duke reflektuar diferenca të ndjeshme në nivelin e digjitalizimit të ekonomive të rajonit.

Faktorë si mungesa e infrastrukturës digjitale, kostot e larta të investimit, siguria kibernetike dhe niveli i ulët i besimit në pagesat online vazhdojnë të frenojnë zhvillimin e tregtisë elektronike. Ndërkohë, të dhënat e Ballkan Barometer tregojnë se përshpejtimi i digjitalizimit të bizneseve mbetet një element kyç për rritjen e konkurrueshmërisë, zgjerimin e tregjeve dhe integrimin më të shpejtë ekonomik të Ballkanit Perëndimor.

Një aksident ka ndodhur në aksin Qafë Pllocë – Pogradec, pasditen e sotme, ku një mjet ka përplasur një person me biçikletë.

Mësohet se aksidenti ka ndodhur pak momente më parë, ndërsa i dëmtuari është transportuar drejt spitalit ku po merr ndihmën mjekësore.

I plagosuri ka qenë edhe nën efektin e alkoolit, ç’ka mund të ketë sjellë edhe aksidentin.

Policia ndodhet në vendngjarje për zbardhjen e plotë të rrethanave.

Nëse vite më parë keni zgjedhur një adresë të shëmtuar në Gmail, të vështirë për t’u mbajtur mend, ndoshta plot me numra, shpëtimi po afrohet me hapa të mëdhenj. Në Indi, Google po u lejon përdoruesve të Gmail-it, që ta korrigjojnë një gabim të tillë.

Në praktikë, përdoruesit mund t’i bashkëngjisin profilit të parë që kanë në Gmail një profil të dytë, edhe nëse është krejtësisht i ndryshëm në emërtim. Adresa e parë në Gmail vazhdon të funksionojë normalisht. Ajo merr mesazhet dhe bashkëngjitjet si më parë, pa ndërprerje. Por të njëjtat mesazhe dhe bashkëngjitje fillojnë të mbërrijnë edhe në profilin e dytë të lidhur me të parin.

Akses në shërbime

Jo vetëm kaq. Si profili i vjetër, ashtu edhe i riu do të lejojnë hyrjen në shërbimet kryesore të Google-i: si Maps, YouTube, Google Play apo Drive. Siç ndodh në raste të tilla, Google po e prezanton risinë gradualisht, fillimisht për një numër të kufizuar përdoruesish, përpara se ta zgjerojë për të gjithë. Megjithatë, ka disa kufizime.

Një profil i ri mund të krijohet dhe të lidhet me të vjetrin vetëm një herë në vit. Për më tepër, përdoruesi mund ta bëjë këtë operacion vetëm tre herë gjithsej, pastaj jo më. Dhe profili i ri nuk mund të fshihet, nëse pendohemi për zgjedhjen. Nëse vendosim të fshijmë profilin e vjetër për të përdorur vetëm të riun, i vjetri nuk do të vihet në dispozicion për persona të tjerë që duan ta regjistrojnë.

Pavarësisht disa kufizimeve, risia mbetet revolucionare sepse rrëzon një nga shtyllat e strategjisë së Google, e cila bazohej në unikalitetin, pandryshueshmërinë dhe pazëvendësueshmërinë e profilit tonë Gmail. Ndonëse të bombarduar nga telefonatat dhe mesazhet e gazetarëve nga e gjithë bota, Google nuk ka saktësuar se kur kjo risi do të prezantohet në Shtetet e Bashkuara dhe sidomos në Europë.

Kombet e Bashkuara shpresojnë që armëpushimi i rënë dakord sot midis Tajlandës dhe Kamboxhias do të jetë hapi i parë në rivendosjen e besimit dhe promovimin e paqes midis dy vendeve, sipas një deklarate të Komisionerit të Lartë të OKB-së për të Drejtat e Njeriut.

Komisioneri i Lartë, Volker Turk, e përshkroi rifillimin e armëpushimit si një zhvillim pozitiv, duke nënvizuar se ai mund të krijojë kushtet për stabilitet dhe bashkëjetesë paqësore. Në të njëjtën kohë, ai theksoi nevojën për t’u ofruar mbështetje të plotë popullatave të prekura dhe të zhvendosurve, në mënyrë që ata të mund të kthehen të sigurt në shtëpitë e tyre.

Sipas burimeve zyrtare, përleshjet tre-javore në kufirin midis dy vendeve kanë rezultuar në vdekjen e të paktën 47 personave dhe zhvendosjen e më shumë se një milion civilëve.

Në armiqësi u përdorën armë të rënda, të tilla si artileri, tanke, dronë dhe avionë luftarakë.

Marrëveshja e armëpushimit, e nënshkruar nga ministrat e mbrojtjes të Tajlandës dhe Kamboxhias, parashikon, ndër të tjera, ngrirjen e pozicioneve ushtarake, çminimin e zonave kufitare, bashkëpunimin midis autoriteteve policore për të luftuar krimin kibernetik, si dhe lirimin e 18 ushtarëve kamboxhianë nga Bangkoku, me kusht që armëpushimi të respektohet për 72 orë.

Dy vendet e Azisë Juglindore janë përfshirë në një mosmarrëveshje prej dekadash mbi kufirin e tyre prej rreth 800 kilometrash, i cili është hartuar gjatë sundimit kolonial francez. Të dyja palët fajësojnë njëra-tjetrën për përshkallëzimin e përgjakshëm të kohëve të fundit.