Një rast i tentativës së ngritjes së një plantacioni me drogë në Vaun e Dejës u godit sot nga Policia e Shkodrës (15 gusht).

Dy të rinj përfunduan në pranga, ndërsa në mjetin e tyre furgon u gjetën të paktën 2500 kubikë kanabisi gati për mbjellje.

Burime zyrtare bënë me dije se pasi morën informacione në rrugë operative, u vunë në ndjekje të mjetit, nga Hajmeli deri në Vaun e Dejës.

Gjatë kontrollit, policia gjeti kuti kartoni me 2500 fidanë kanabisi, kurse operacioni u kodua ”Kutitë”.

“Shërbimet e Forcës së Posaçme “Shqiponja” konstatuan në afërsi të fshatit Hajmel, një automjet (furgon) me ngarkesë të dyshimtë. Automjeti u ndoq deri në Vaun e Dejës, ku u ndalua për kontrolle. Nga kontrollet u gjetën në të, disa kuti kartoni me kubikë me 2500 fidanë të dyshuar narkotikë Cannabis Sativa. Në përfundim të veprimeve procedurale për rastin, të kryera në kuadër të operacionit të koduar “Kutitë”, u arrestuan në flagrancë shtetasit që transportonin me furgon, kubikët, me qëllim kultivimin, S. L., 23 vjeç, banues në Shkodër, dhe N. P., 29 vjeç, banues në fshatin Mali i Jushit”, tha policia vendore.

Materialet procedurale iu referuan Prokurorisë, për veprime të mëtejshme.

Njoftimi i Policisë Shkodër:

“Finalizohet operacioni i koduar “Kutitë”. Goditet që në fazë fillestare, një tentativë për të kultivuar bimë narkotike.

Sekuestrohen 2500 fidanë të dyshuar narkotikë Cannabis Sativa, të mbjellë në kubikë, si dhe 1 furgon.

Vihen në pranga 2 shtetasit që transportuan kubikët, nga fshati Hajmel në Vaun e Dejës, me një furgon që u ndoq gjatë lëvizjes, nga shërbimet e Policisë.

Si rezultat i patrullimeve, punës informative dhe asaj operacionale, për evidentimin dhe goditjen e paligjshmërive, shërbimet e Forcës së Posaçme “Shqiponja” konstatuan në afërsi të fshatit Hajmel, një automjet (furgon) me ngarkesë të dyshimtë. Automjeti u ndoq deri në Vaun e Dejës, ku u ndalua për kontrolle.

Nga kontrollet u gjetën në të, disa kuti kartoni me kubikë me 2500 fidanë të dyshuar narkotikë Cannabis Sativa.

Në përfundim të veprimeve procedurale për rastin, të kryera në kuadër të operacionit të koduar “Kutitë”, u arrestuan në flagrancë shtetasit që transportonin me furgon, kubikët, me qëllim kultivimin, S. L., 23 vjeç, banues në Shkodër, dhe N. P., 29 vjeç, banues në fshatin Mali i Jushit.

Materialet procedurale iu referuan Prokurorisë, për veprime të mëtejshme”.

Islanda ka liruar Angjelin Sterkajn, i cili në vitin 2023 u dënua nga Gjykata e Lartë e Islandës me 16 vjet burgim për vrasjen e Armando Beqirajt, jashtë shtëpisë së tij në Reykjavík në vitin 2021.

Stërkaj (foto kryesore) tashmë ka përfituar lirimin me kusht dhe është dëbuar nga vendi, sikurse i është vendosur edhe ndalim rikthimi në Islandë dhe në zonën Schengen.

Lajmi është konfirmuar nga drejtoresha e burgjeve, Ragna Bjarnadóttir, raporton ‘Visir’. Dëbimi i Sterkaj bazohet në një ndryshim të fundit të përkohshëm të ligjit, të miratuar nga ministri i Drejtësisë, i cili lejon që të burgosurve të huaj, për të cilët është vendosur dëbimi nga vendi, t’u jepet lirimi me kusht pasi të kenë vuajtur një të tretën e dënimit.

Ragna thotë se nuk mund të komentojë raste individuale, por shpjegon se rregulli i përgjithshëm është që, kur përdoret kjo mundësi e përkohshme, të burgosurit shoqërohen deri në vendin e tyre të origjinës nga njësia e kthimit dhe eskortës së Policisë Kombëtare, pasi Shërbimi i Burgjeve ka marrë vendimin për lirimin me kusht dhe Drejtoria e Emigracionit ka marrë vendimin për dëbimin dhe ndalimin e rikthimit.

Në shkeljet më të rënda, Drejtoria e Emigracionit ka të drejtë t’u vendosë personave ndalim të përhershëm të rikthimit në të gjithë zonën Schengen. Angjelini është nga Shqipëria, e cila nuk është pjesë e zonës Schengen. Sa i përket vendimit të Shërbimit të Burgjeve për lirimin me kusht, ajo thotë se vlejnë rregullat e përgjithshme për lirimin me kusht dhe vendimi merret pas një vlerësimi të përgjithshëm. Në këtë vlerësim përfshihen shumë faktorë, për shembull sjellja gjatë vuajtjes së dënimit dhe vlerësimi i rrezikshmërisë.

Angjelini u dënua me 16 vite burg me vendimin e Gjykatës së Lartë më 21 qershor 2023. Nga ky dënim u zbrit periudha e paraburgimit të pandërprerë, duke filluar nga 17 shkurti 2021. Angjelin Sterkaj u dënua atëherë me 16 vite burg nga Gjykata e Lartë për vrasjen e Armando Beqirajt para shtëpisë së tij në shkurt 2021. Tre bashkëpunëtorë të tij u dënuan me nga tre deri në dhjetë vite burg. Kështu, ai qëndroi 855 ditë në paraburgim dhe ka vuajtur 1.149 ditë në burg.

Kjo bën gjithsej 2.004 ditë, ose 5 vite, 5 muaj dhe 28 ditë, pas hekurave për vrasjen e Beqirajt. Një e treta e një dënimi prej 16 vitesh është 1.947 ditë. Përveç Angjelinit, edhe katër bashkëpunëtorë të tij morën dënime nga Gjykata e Lartë. Claudia Carvalho u dënua me tre vite burg, Murat Selivrada me katër vite dhe Shpetim Qerimi mori një dënim prej dhjetë vitesh. Në Gjykatën e Apelit ata ishin shpallur fajtorë për bashkëpunim në vrasje me Angjelinin dhe ishin dënuar me nga 14 vite burg.

Në vitin 2021, përpara se emri i Angjelinit të raportohej nga mediat, u raportua se vrasësi i Armandos kërkohej nga autoritetet shqiptare për grabitje të armatosur dhe kishte qenë i tillë prej vitesh. Në vitin 2015, autoritetet shqiptare kishin kërkuar ekstradimin e një shqiptari për të vuajtur një dënim bazuar në një dënim penal që ai mori në Shqipëri për grabitje. Megjithatë, kërkesa e tyre u refuzua në vitin 2017, pasi nuk përmbushte kërkesat e Ligjit për Ekstradimin dhe Ndihmën Tjetër në Çështjet Penale dhe marrëveshjeve ndërkombëtare në të cilat Islanda është palë.

Ragna thotë, në terma të përgjithshëm, se procedura që lidhet me lirimin me kusht dhe dëbimin në bazë të autorizimit të lirimit emergjent nuk kishte lidhje fare me ekstradimin. Kështu, procesi nuk është i rëndësishëm nëse i burgosuri në fjalë kërkohet në vendin e tij të origjinës apo ka dënime të pazgjidhura penale atje. Angjelini ishte ende i kërkuar në Shqipëri në vitin 2021, por Vísi nuk është në dijeni të statutit të kufizimeve në atë vend. Prandaj, nuk është e qartë nëse ai do të jetë në gjendje të arratiset lirisht pas deportimit.

Për vrasjen, Sterkaj ka thënë se e kreu për arsye personale pasi ishte kërcënuar nga Beqiri dhe se asnjë person tjetër nuk ka qenë i përfshirë në ngjarje. Përveç dënimit me burg, gjykata vendosi që Angjelin Sterkaj duhet t’u paguante gruas së Beqirit dhe prindërve të tij dëmshpërblim.

Armando Beqiri u ekzekutua me pistoletë me silenciator më 13 shkurt në derë të shtëpisë, rreth orës 23:57, sapo ishte kthyer në shtëpi dhe kishte parkuar makinën. Beqiri jetonte prej vitesh në Islandë dhe ishte pronar i një kompanie sigurie fizike, që në shumë pak kohë kishte arritur një sukses të mënjëhershëm. 33-vjeçari nga Tepelena la pas gruan e tij shtatzënë dhe një djalë të vogël, të cilët ishin në shtëpi kur ai u qëllua.

Angjelin Sterkaj ishte fshehur në një garazh dhe kur Armando doli nga garazhi pranë shtëpisë së tij, pasi parkoi makinën, u qëllua 9 herë në trup dhe kokë me një pistoletë Sig Sauer të kalibrit 22. Në Shqipëri, Sterkaj ishte shpallur në kërkim për vjedhje e dhunë.

Me një tavolinë pune të mbushur me shkresa, dosje dhe dokumente, kreu i Partisë Demokratike, Sali Berisha, bëri daljen e fundjavës në komunikimin me ndjekësit në rrjetet sociale, nga ku akuzoi qeverinë për situatën e zjarreve dhe iu përgjigj pyetjeve të qytetarëve.

Ai ka akuzuar qeverinë dhe kryeministrin Edi Rama për korrupsion, arbitraritet dhe indiferencë ndaj situatës së krijuar nga zjarret në vend.

Berisha e cilësoi javën e fundit si një periudhë të dominuar nga protestat qytetare dhe zjarret që prekën disa zona të vendit, duke kritikuar qeverinë për mënyrën e menaxhimit të situatës, ndërsa e cilësoi serioze mungesën e investimeve për zjarrfikësit dhe mjerim gjendjen e tyre.

“Java ishte një javë tejet e nxehtë, e dominuar nga protesta në mbarë vendin, në Tiranë dhe në një seri qarqesh të Shqipërisë kundër korrupsionit, arbitraritetit të kreut të Meduzës, Edi Rama dhe organizatës së tij kriminale. Java ishte javë e zjarreve, e dhjetëra e dhjetëra zjarreve të shumta, të cilat kërcënuan jo në një, por në disa zona të banuara të vendit banesa dhe jetën e qytetarëve. Përballë këtyre zjarreve, narkoqeveria vazhdonte vakancat. Edi Rama dhe ministrat e tij rreziteshin në diell, duke luajtur kumbar dhe në indiferencë të plotë të kësaj që ndodh. Prej mbi 2 javësh, me dhjetëra e qindra punonjës heroikë të zjarrfikësve dhe të tjerë janë përballur me guxim me zjarret në katër anët e vendit. Asnjë qindarkë shtesë gjer sot nuk kanë marrë, përveç mashtrimeve të Edi Ramës. Pamjet e ushqimit të tyre janë mjerim. Është një injorim, një mosmirënjohje e thellë, e turpshme për sakrificën dhe djersën që derdhin, rrezikun me të cilin përballen këta burra, por edhe qytetarët”, tha ai.

Më tej, kreu i PD-së u ndal te protestat qytetare, duke i cilësuar ato si “uragani i lirisë”. Sipas tij, “përpjekjet e qeverisë për t’i ndalur apo përçarë protestuesit kanë dështuar”.

“Protesta rinore qytetare, uragani i lirisë vazhdon i pamposhtur. Ka dështuar me turp e gjithë përpjekja e Edi Ramës për ta përçarë, të gjitha format e përdorura për kërcënim, miklim, etj., ndaj tyre. Ajo protestë është sot zëri i Shqipërisë në Evropë dhe në botë. Pavarësisht nga indiferenca kriminale që qeveria dhe Edi Rama dëshmojnë ndaj saj. Pavarësisht nga metodat e terrorizmit politik dhe psikologjik që përdoren ndaj protestuesve, asgjë nuk do ndalë uraganin e lirisë pa triumfuar. Vjeshta është vjeshta e shqiptarëve, është vjeshta e lirisë, është vjeshta në të cilën qytetarët marrin në dorë fatin e tyre”, u shpreh kreu i selisë blu.

Në fund ai bëri ftesë për demokratët që t’i bashkoheshin protestës:

“Ndaj dhe ftoj çdo demokrate e demokrat të marrë pjesë në protestë, të mbështesë protestën me pjesëmarrjen e tij ose të saj, si një kontribut historik për vendin, si një kontribut historik për të ardhmen e Shqipërisë”.

Barcelona ka bërë ofertën e tretë zyrtare për Rodri Hernández, duke tentuar të bindë Manchester Cityn të lërë të lirë mesfushorin spanjoll.

Sipas gazetarit Ben Jacobs, oferta e re e klubit katalanas i kalon 60 milionë paund, që korrespondojnë me rreth 70 milionë euro. Kjo shifër mund të jetë e mjaftueshme për të bindur Manchester Cityn të pranojë transferimin.

Klubi anglez kishte refuzuar ofertën e parë të Barcelonës, prej 45 milionë eurosh plus bonuse, ndërsa edhe propozimi i dytë, i cili me realizimin e bonuseve mund të arrinte rreth 65 milionë euro, nuk ishte pranuar.

Manchester City gjatë ditëve të fundit ka bërë të ditur se do të ishte i gatshëm të diskutonte largimin e Rodrit për një shumë mes 70 dhe 80 milionë eurosh. Në këtë situatë, oferta e tretë e Barcelonës mund të jetë shumë pranë shifrës që anglezët kërkojnë.

Një faktor i rëndësishëm në negociata është edhe dëshira e vetë futbollistit. Rodri i ka dhënë tashmë “po”-në e tij Barcelonës dhe Manchester City është në dijeni të vendimit të mesfushorit.

Rodri u shfaq të premten në qendrën stërvitore të Manchester Cityt, ndërsa trajneri Enzo Maresca konfirmoi se lojtari është në gjendje të mirë pas një ndërhyrjeje të vogël në shpinë.

“E pashë Rodrin tani në ndërtesë, e përqafova fort. Duket mirë, ndaj do të shohim se çfarë do të ndodhë”, deklaroi Maresca pas seancës stërvitore.

Mesfushori spanjoll ndodhet aktualisht në fazën e rikuperimit dhe nuk dihet nëse do të jetë pjesë e skuadrës për finalen e Community Shield ndaj Arsenalit, që luhet të dielën.

Ndërkohë, Manchester City po përpiqet të përfitojë maksimalisht nga situata dhe të sigurojë shumën e dëshiruar për një nga lojtarët më të rëndësishëm të skuadrës. Klubi anglez po mendon ta përdorë një pjesë të parave nga shitja e Rodrit për të tentuar transferimin e Enzo Fernández nga Chelsea.

Chelsea kërkon rreth 140 milionë euro për mesfushorin argjentinas. Në të njëjtën kohë, largimi i Reijnders drejt Al Qadsiah për rreth 60 milionë euro pritet të finalizohet së shpejti, duke i dhënë Manchester Cityt më shumë hapësirë financiare për të ndërhyrë në merkato.

Tashmë topi është në fushën e Manchester Cityt. Barcelona ka bërë ofertën e tretë dhe është afruar ndjeshëm me kërkesën e anglezëve, ndërsa Rodri e ka bërë të qartë se dëshiron të transferohet në “Camp Nou”.

Saga e mesfushorit spanjoll mund të hyjë kështu në fazën vendimtare gjatë ditëve të ardhshme.

Policia italiane kapi pas një ndjekjeje si në filma pas arratisë dy trafikantë të dyshuar droge shqiptarë.

Ditët e fundit, oficerët në San Mauro Mare njoftuan se kishin vënë re një makinë, një ‘Peugeot 208’ të zi, të përfshirë në një operacion trafiku droge.

Dy personat që udhëtonin me makinë ikën midis San Mauro Mare dhe Bellaria, përgjatë rrugëve të ngarkuara. Pak para se të ndalohej, pasagjeri në automjet kishte hedhur një pako të zezë nga dritarja.

Oficerët e gjetën atë pak më vonë, megjithëse përmbajtja e saj përfundoi në kanalizim.

Dy trafikantët shqiptarë të drogës, të moshës 25 dhe 26 vjeç, kanë dënime të mëparshme për trafik droge. Pas hetimit, dy kriminelët u denoncuan gjithashtu tek autoritetet gjyqësore për shkelje të rregulloreve të armëve dhe për posedim të dy shkopinjve të mprehtë.

Shoferi i makinës, një 25-vjeçar, u akuzua për drejtim të rrezikshëm të mjetit dhe mosrespektim të urdhrave të policisë për të ndaluar. Ai u akuzua për shkelje të kodit të trafikut dhe iu hoq leja e drejtimit, informon media italiane.

Për më tepër, Peugeot 208 i zi u sekuestrua për konfiskim. Leja e qëndrimit e 25-vjeçarit iu refuzua dhe do të fillojnë procedurat e dëbimit.

Të paktën 38 persona kanë vdekur deri tani pas tërmetit të fuqishëm dhe katastrofik me magnitudë 7.7 ballë të shkallës Rihter, që goditi sot (15 gusht) Indonezinë lindore, e cila ndodhet në Unazën e Zjarrit të Paqësorit, një nga zonat më sizmikisht aktive në botë.

“Vdekja e 38 personave është konfirmuar, dy të tjerë u plagosën rëndë, 11 pësuan lëndime të lehta dhe rreth 2,000 njerëz kanë lënë shtëpitë e tyre me iniciativën e tyre”, tha kreu i agjencisë kombëtare të menaxhimit të fatkeqësive BNPB.

Sipas Shërbimit Gjeologjik të SHBA-së, tërmeti goditi në orën 05:58 të mëngjesit sipas kohës lokale, me një thellësi fokale prej 10 kilometrash.

TERREMOTO 7,7 DEVASTA O LESTE DA INDONÉSIA

Ao menos 20 mortos, 6 feridos e dezenas ainda sob escombros. Tsunami foi alertado. 2 mil pessoas fugiram de suas casas.

A Indonésia acordou com um dos tremores mais violentos dos últimos anos e o pior pode ainda não ter passado.… pic.twitter.com/4AgsH8QaSR

— Scarpa360 (@scarpa360) August 15, 2026

Epiqendra e tij ishte e vendosur në zonën detare pranë ishullit Flores, rreth 68 kilometra në veri-veriperëndim të qytetit Ende, në provincën East Nusa Tenggara.

Dridhja kryesore u pasua nga disa lëkundje të forta pasuese.

Viktimat përfshijnë tetë persona që u nxorën nga një rrëshqitje dheu në fshatin Reok, Manggarai. Kërkimet po vazhdojnë për dy banorë të tjerë, të cilët besohet se janë varrosur nën ton baltë.

A powerful 7.7-magnitude earthquake has struck Indonesia’s Flores Island, killing at least 20 people and collapsing buildings.
Rescuers are searching the rubble as strong aftershocks continue across the region.#Indonesia #Flores #Earthquake #BreakingNews #WorldNews pic.twitter.com/BZZHwJn7JA

— QUAN2UM (@Quan2um_) August 15, 2026

Tërmeti u ndje në të gjithë Nusa Tenggarën Lindore, Nusa Tenggarën Perëndimore dhe pjesë të Sulawesi Jugor, me banorët në disa zona që raportojnë se dridhja zgjati rreth një minutë.

Tërmeti i fortë shkaktoi dëme të rënda dhe shembje ndërtesash në disa zona të ishullit Flores.

Siç raportojnë agjencitë ndërkombëtare, ndërprerjet e energjisë elektrike dhe problemet me telekomunikacionin po e bëjnë të vështirë për ekipet e shpëtimit të kryejnë punën e tyre dhe të regjistrojnë plotësisht dëmet.

Fluksi i lartë në hyrje-dalje në pikat e kalimit me Greqinë, ka sjellë edhe reagimin e Policisë së Shtetit, duke organizuar një takim ditën e sotme (15 gusht) për masa të përbashkëta me homologët e Policisë së Greqisë.

Drejtuesit e Kufirit të të dy vendeve morën pjesë në këtë takim dhe vendosën piketat për organizim më të mirë dhe masa me qëllim shmangien e radhëve.

“Me qëllim koordinimin sa më të mirë të masave për përballimin e fluksit në hyrje-dalje në pikat e kalimit kufitar me Greqinë, Drejtori i Departamentit për Kufirin dhe Migracionin, drejtues i Parë Saimir Muçaj, së bashku me drejtorin Vendor për Kufirin dhe Migracionin Gjirokastër dhe Shefin e Stacionit të Policisë Kufitare Kakavijë, zhvilluan një takim me homologët e Policisë greke, në ambientet e Qendrës së Përbashkët të Kontaktit për Bashkëpunimin Policor dhe Doganor në Kakavijë”, bëri me dije policia.

Në takim morën pjesë drejtuesit e Pikës së Kalimit Kufitar Kakavijë dhe të Drejtorisë së Kufirit Janinë si dhe online, për shkak të një angazhimi emergjent për kufirin në një zonë të Greqisë, Kolonel Andreas Karageorgos, drejtor i Drejtorisë së Mbrojtjes së Kufirit në Policinë greke.

“Në fokus të takimit ishte menaxhimi i fluksit në pikat e kalimit kufitar, si dhe forcimi i bashkëpunimit në luftën kundër krimeve kufitare. Të dy Drejtorët u angazhuan për intensifikimin e masave të përbashkëta në të gjitha pikat e kalimit, me qëllim eliminimin e radhëve të gjata”, njoftoi Policia e Shtetit.

Më tej theksohet se:

“Në përfundim të takimit, Drejtori i Departamentit për Kufirin dhe Migracionin, Drejtues i Parë Saimir Muçaj, siguroi të gjithë qytetarët që përdorin pikat e kalimit kufitar për angazhimin maksimal të shërbimeve të Policisë Kufitare dhe koordinimin e veprimeve me homologët grekë, me qëllim krijimin e lehtësirave ligjore dhe eliminimin e radhëve të gjata në hyrje-dalje në këto pika kalimi”.

Autoriteti Rrugor Shqiptar (ARRSH) njoftoi se sot (15 gusht) qarkullimi në aksin Tiranë-Durrës do të vijojë normalisht, pas përfundimit të punimeve të planifikuara për mbikalimin e ri në Kashar.

“Përfundojnë përpara afatit punimet për montimin e trarëve metalikë të mbikalimit të ri në Kashar!

Falë angazhimit me mjete dhe punëtorë të shtuar punimet për montimin e trarëve metalikë të mbikalimit të ri në Kashar kanë përfunduar përpara parashikimit, duke mundësuar vijimin normal të qarkullimit në aksin Tiranë–Durrës.

Sot, qarkullimi në aksin Tiranë–Durrës do të vijojë normalisht”, njofton ARRSH.

Ferran Torres do të vazhdojë karrierën e tij te Paris Saint-Germain, pasi kampionët evropianë njoftuan marrëveshjen me Barcelonën në mesditën e 15 gushtit.

Të dy klubet ranë dakord për një tarifë prej afër 50 milionë eurosh (sipas raportimeve nga Spanja dhe Franca), ndërsa golashënuesi i “artë” i Rojës në finalen e Kupës së Botës nënshkroi një kontratë pesëvjeçare, deri në vitin 2031.

Ferran mori numrin “9” te parisienët, ndërsa tashmë kishte zhvilluar seancën e parë stërvitore, nën udhëzimet e Luis Enriques.

Sigurisht, katalanasit nuk munguan ta falënderonin për kontributin e tij dhe t’i uronin “fat të mbarë” në karrierën e tij.

Një sherr në fis për pak sa nuk ka përfunduar në tragjedi në zonën e Dibrës.

Policia vendore njoftoi se parandaloi përshkallëzimin e situatës dhe krimin, teksa u përdor edhe armë zjarri e të shtëna në ajër nga një prej të dyshuarve që u shpall në kërkim.

Rezulton se fillimisht janë përleshur kunatat mes tyre dhe më pas djali i të dhunuarës ka përdorur një pistoletë duke qëlluar në ajër dhe kërcënuar xhaxhanë e tij.

Policia tha se ka bërë një arrestim, shpalli në kërkim autorin kryesor dhe procedoi 3 persona të tjerë, mes tyre dy kunatat

“Dhunoi kunatën e tij dhe gjatë konfliktit, djali i saj qëlloi në ajër me armë zjarri, me qëllim kanosjen e xhaxhait të tij, falë ndërhyrjes në kohë të Policisë, parandalohet përshkallëzimi i mëtejshëm i konfliktit. Ndalohet 34-vjeçari që dhunoi kunatën, shpallet në kërkim 19-vjeçari që qëlloi me armë zjarri në ajër, si dhe procedohen në gjendje të lirë 3 të tjerë”, tha policia vendore.

Teksa më tej sqaron se:

“Menjëherë pas njoftimit për një konflikt në një familje në fshatin Majtarë, shërbimet e Komisariatit të Policisë Dibër organizuan punën dhe shkuan në vendngjarje, për të sqaruar rrethanat dhe përfshirjen në konflikt”.

Për krimin u kryen edhe veprimet hetimore paraprake.

“Si rezultat i ndërhyrjes në kohë dhe veprimeve policore, u parandalua përshkallëzimi i mëtejshëm i konfliktit dhe u vu në pranga shtetasi D. E., 34 vjeç, pasi dyshohet se ka dhunuar kunatën e tij, shtetasen F. E., 40 vjeçe. Ndërkohë, u shpall në kërkim djali i 40-vjeçares, shtetasi F. E., 19 vjeç, i cili dyshohet se ka qëlluar në ajër me armë zjarri, me qëllim kanosjen e shtetasit D. E., xhaxhait të tij. Vijon puna për kapjen e tij dhe kontrollet për gjetjen dhe sekuestrimin e armës së zjarrit të përdorur gjatë konfliktit. Gjithashtu, filloi procedimi penal në gjendje të lirë për shtetaset F. E., 40 vjeçe, dhe A. E., 25 vjeçe, pasi kanë dhunuar njëra-tjetrën, si dhe për shtetasin E. E., 38 vjeç, pasi dyshohet se ka tentuar të fshehë provat në vendngjarje”, sqaron policia e Dibrës mes të tjerash.

Njoftimi i Policisë Dibër:

“Dhunoi kunatën e tij dhe gjatë konfliktit, djali i saj qëlloi në ajër me armë zjarri, me qëllim kanosjen e xhaxhait të tij, falë ndërhyrjes në kohë të Policisë, parandalohet përshkallëzimi i mëtejshëm i konfliktit.

Ndalohet 34-vjeçari që dhunoi kunatën, shpallet në kërkim 19-vjeçari që qëlloi me armë zjarri në ajër, si dhe procedohen në gjendje të lirë 3 të tjerë.

Menjëherë pas njoftimit për një konflikt në një familje në fshatin Majtarë, shërbimet e Komisariatit të Policisë Dibër organizuan punën dhe shkuan në vendngjarje, për të sqaruar rrethanat dhe përfshirjen në konflikt.

Si rezultat i ndërhyrjes në kohë dhe veprimeve policore, u parandalua përshkallëzimi i mëtejshëm i konfliktit dhe u vu në pranga shtetasi D. E., 34 vjeç, pasi dyshohet se ka dhunuar kunatën e tij, shtetasen F. E., 40 vjeçe.

Ndërkohë, u shpall në kërkim djali i 40-vjeçares, shtetasi F. E., 19 vjeç, i cili dyshohet se ka qëlluar në ajër me armë zjarri, me qëllim kanosjen e shtetasit D. E., xhaxhait të tij. Vijon puna për kapjen e tij dhe kontrollet për gjetjen dhe sekuestrimin e armës së zjarrit të përdorur gjatë konfliktit.

Gjithashtu, filloi procedimi penal në gjendje të lirë për shtetaset F. E., 40 vjeçe, dhe A. E., 25 vjeçe, pasi kanë dhunuar njëra-tjetrën, si dhe për shtetasin E. E., 38 vjeç, pasi dyshohet se ka tentuar të fshehë provat në vendngjarje.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme”.

Një rast i trafikut të armëve nga Kosova në Shqipëri është goditur sot (15 gusht) nga Policia e Shtetit.

Policia e Durrësit njoftoi ka finalizuar operacionin e koduar “Hallkat”, në kuadër të një hetimi për trafikimin e armëve të zjarrit nga Kosova drejt Shqipërisë, me qëllim shitjen e tyre te grupe kriminale.

Gjatë operacionit janë sekuestruar 3 pistoleta, 34 fishekë luftarakë, një automjet dhe një armë e ftohtë.

Në pranga ka rënë në flagrancë një 34-vjeçar, banues në Kukës, i cili dyshohet se transportonte armët me automjet. Bashkë me të është arrestuar edhe një 39-vjeçare, banuese në Prizren, e dyshuar për moskallëzim të krimit.

Sipas policisë, gjatë kontrollit të automjetit në Maminas u gjetën tre pistoleta dhe municion, të cilat dyshohet se ishin trafikuar nga Kosova.

“Në vijim të kontrolleve, në banesë u gjet edhe një armë e ftohtë, e llojit dorezë hekuri. I arrestuari përballet me akuzat për “Trafikimi i armëve dhe i municionit” dhe “Prodhimi, mbajtja, blerja apo shitja pa leje e armëve të ftohta”, ndërsa 39-vjeçarja akuzohet për “Moskallëzimi i krimit”. Hetimet vijojnë për identifikimin e personave të tjerë që mund të jenë të përfshirë në trafikimin e armëve”, njofton policia vendore.

Materialet procedurale i janë referuar Prokurorisë për veprime të mëtejshme.

Njoftimi i Policisë së Durrësit:

“Finalizohet operacioni i koduar “Hallkat”, kundër trafikimit të armëve të zjarrit, nga Kosova, me qëllim shitjen grupeve kriminale. Sekuestrohen 3 pistoleta, dhjetëra fishekë luftarak, 1 automjet dhe 1 armë e ftohtë. Arrestohet në Maminas, shtetasi që transportonte armët e zjarrit, me automjet. Në pranga edhe pasagjerja, banuese në Kosovë, për moskallëzim të krimit.

Si rezultat i punës hetimore dhe operative, me qëllim parandalimin e ngjarjeve kriminale, nëpërmjet konstatimit dhe goditjes së rasteve të trafikimit të armëve të zjarrit, në Shqipëri, me qëllim shitjen grupeve kriminale në qytete të ndryshme, specialistët e Seksionit për Hetimin e Narkotikëve në bashkëpunim me Forcën e Posaçme Operacionale të DVP Durrës, finalizuan operacionin e koduar “Hallkat”.

Në kuadër të operacionit u arrestuan në flagrancë shtetasi M. B., 34 vjeç, banues në Kukës, për veprat penale “Trafikimi i armëve dhe i municionit” dhe “Prodhimi, mbajtja, blerja apo shitja pa leje e armëve të ftohta”, si dhe shtetasja D. N., 39 vjeçe, banuese në Prizren, për veprën penale “Moskallëzimi i krimit”. Gjatë kontrollit në automjetin me të cilin ata lëviznin në Maminas, u gjetën 3 armë zjarri (pistoleta) dhe 34 fishekë, që dyshohet se janë trafikuar nga Kosova. Më tej, gjatë kontrollit në banesën e 33-vjeçarit, u gjet 1 armë e ftohtë (dorezë hekuri).

Hetimi vijon për të identifikuar dhe nxjerrë përpara përgjegjësisë penale, shtetas të tjerë që mund të jenë përfshirë në këtë rast. Materialet procedurale iu referuan Prokurorisë, për veprime të mëtejshme”.

Radhë të gjata automjetesh dhe udhëtarësh janë krijuar këtë fundjavë edhe në pikën kufitare të Qafë Botës, në jug të vendit.

Pjesa më e madhe e tyre janë emigrantë që kthehen nga Greqia në Shqipëri për pushimet e verës.

Ngarkesa është vënë re në të dyja anët e pikës së kalimit kufitar, ku qytetarët presin për përfundimin e procedurave të kontrollit.

Në 24 orët e fundit, në Qafë Botë kanë hyrë dhe kanë dalë rreth 10 mijë shtetas shqiptarë dhe të huaj. Sipas të dhënave nga pika kufitare, fluksi është më i madh në hyrje drejt Shqipërisë.

Nga pala shqiptare janë në funksion katër sportele, ndërsa pala greke operon me dy sportele.

Fluksi i lartë lidhet me lëvizjet e turistëve dhe pushuesve gjatë sezonit veror, si dhe me qytetarët që udhëtojnë drejt Greqisë apo kthehen në Shqipëri.

Autoritetet kufitare vijojnë punën për menaxhimin e situatës dhe për përshpejtimin e procedurave, me qëllim reduktimin e kohës së pritjes për udhëtarët.

“Gjithmonë kam dashur të jem nënë”, ishin fjalët e para të pensionistes 62-vjeçare Mabel Frias, e cila të mërkurën, më 12 gusht, lindi fëmijën e saj të parë në spitalin “San Felipe” në qytetin e San Nicolas, i cili i përket provincës së Buenos Aires.

Davidi i vogël, i cili lindi me prerje cezariane, peshon 2.75 kilogramë dhe shëndeti i tij është në gjendje të shkëlqyer, sipas deklaratave të nënës së tij për mediat argjentinase.

Megjithatë, menjëherë pas lindjes së tij, David u vendos për disa orë në Njësinë e Kujdesit Intensiv Neonatal të spitalit.

Pas lindjes së fëmijës së saj të parë, Mabel deklaroi se kishte qenë në menopauzë për shumë vite dhe shtatzënia e shumëpritur për të njëjtën u arrit përmes fertilizimit in vitro dhe me vezë donatore .

“Meqenëse nuk kam më vezë në moshën time, gjithçka u bë përmes dhurimit”, tha nëna për gazetën lokale Diario El Norte. Ajo shtoi e prekur: “Gjithmonë kam dashur të bëhem nënë. Nuk u dorëzova kurrë. Jam një grua me besim të madh. U luta, i kushtova gjithë energjinë time dhe ndjeva në zemër se do të bëhesha nënë. Derisa një ditë mora vendimin dhe e bëra”.

Nëna 62-vjeçare, megjithëse dha disa intervista pas lindjes, nuk zbuloi nëse mori edhe një dhurim sperme.

Mjekja obstetër Romina Ruffini, e cila e monitoroi 62-vjeçaren gjatë gjithë shtatzënisë së saj, theksoi se megjithëse shtatzënia ishte me rrezik të lartë për shkak të moshës së gruas, ajo përparoi pa probleme dhe pa ndërlikime.

“Mos u dorëzo”

62-vjeçarja, pas lindjes së djalit të saj, shprehu mirënjohjen për mbështetjen mjekësore që mori nga mjeku obstetër dhe njëkohësisht donte t’u dërgonte një mesazh grave që janë në menopauzë, por duan të bëhen nëna.

“Mos u dorëzoni. Menopauza nuk është më pengesë këto ditë. Shkenca ka bërë shumë përparim. Kam marrë kujdes të shkëlqyer”, tha Mabel Frias.

Mediat argjentinase, të cilat e kanë mbuluar gjerësisht rastin e Mabel Frias, raportojnë se, megjithëse nuk ka të dhëna zyrtare në vend për gruan më të vjetër që bëhet nënë në Argjentinë,  botimet mjekësore dhe gazetareske nuk përmendin asnjë rast tjetër të një gruaje që lind në moshën 62 vjeç ose më të vjetër në vend.

Megjithatë, ka pasur disa raste të grave që bëhen nëna në një moshë më të madhe me ndihmën e riprodhimit të asistuar në të gjithë botën. Në vitin 2005, rumunja Adriana Iliescu, një profesoreshë universiteti në pension, lindi një fëmijë në moshën 66 vjeç.

Vitin pasardhës, spanjollja Maria del Carmen Bousada de Lara lindi djem binjakë disa ditë para ditëlindjes së saj të 67-të. Në vitin 2015, mësuesja e gjermanishtes Annegret Raunig lindi katërnjakë – tre djem dhe një vajzë – në moshën 65 vjeç.

Epidemia e Ebolës në Republikën Demokratike të Kongos vijon të përhapet, me mbi 2 mijë viktima dhe më shumë se 4,500 raste të konfirmuara që nga shpërthimi aktual.

Zyrtari kryesor humanitar i OKB-së, Tom Fletcher, ka bërë thirrje për rritjen e menjëhershme të ndihmës ndërkombëtare, duke paralajmëruar se reagimi ndaj epidemisë po përballet me mungesë të burimeve dhe kapaciteteve shëndetësore.

Sipas të dhënave më të fundit të autoriteteve kongoleze, 2,128 persona kanë humbur jetën nga 4,556 raste të konfirmuara në laborator, vetëm rreth tre muaj pas shpalljes së epidemisë. Fletcher tha se situata kërkon mobilizim më të madh ndërkombëtar dhe njoftoi se OKB-ja ka vënë në dispozicion 30.5 milionë dollarë shtesë nga Fondi Qendror i Rezervës për Reagim ndaj Emergjencave (CERF).

Kjo shumë i shtohet 24 milionë dollarëve të akorduara më herët për Republikën Demokratike të Kongos dhe katër vendet fqinje.

Sipas Organizatës Botërore të Shëndetësisë, nga 518 milionë dollarët e nevojshëm për planin e përbashkët të përgatitjes dhe reagimit ndaj epidemisë, deri tani janë siguruar vetëm 264 milionë dollarë. Epidemia aktuale lidhet me variantin Bundibugyo të virusit Ebola.

Aktualisht nuk ka vaksinë apo trajtim të miratuar specifik për këtë variant, ndërsa studimet klinike vijojnë.

Kongoja ka përjetuar disa shpërthime të Ebolës ndër vite. Epidemia e viteve 2018–2020 ishte më vdekjeprurësja në vend, me rreth 2,300 viktima nga 3,500 raste të regjistruara. Në total, Ebola ka shkaktuar të paktën 15 mijë viktima në Afrikë gjatë pesë dekadave të fundit.

Cristiano Ronaldo dhe Georgina Rodriguez u martuan në rezidencën e tyre multimilionëshe në prani të vetëm katër të ftuarve dhe fëmijëve të tyre.

Sipas ‘Daily Mail’, ceremonia u pa nga motra e Georginës, Ivana, miku i Cristianos prej kohësh, Miguel Paisao, dhe një çift nga Spanja, José Rodríguez Sangil dhe gruaja e tij Monica Gonzalez Martinez.

Sipas të njëjtit botim, çifti, i cili u martua saktësisht një vit pasi shpalli fejesën, ka vendosur t’i mbajë të ndara pasuritë e tyre para martesës.

Marrëveshja paramartesore  për të përcaktuar statusin e pasurive të tyre thuhet se është nënshkruar te një noter në Lisbonë më 10 gusht, një ditë para ceremonisë.

Një kopje e certifikatës së martesës e marrë nga gazeta portugeze Jornal de Notícias thotë se ceremonia u zhvillua në rezidencën e Cristianos në zonën Quinta da Marina.

Certifikata e martesës shënonte emrin e plotë dhe moshën e Cristianos, 41 vjeç, si dhe vendin e lindjes dhe emrat e prindërve të tij, përfshirë babain e tij të ndjerë, José Dinis.

I njëjti informacion u rendit edhe për 32-vjeçaren Georgina, e cila lindi në kryeqytetin argjentinas, Buenos Aires, dhe u referua me emrin e saj të plotë Georgina Luisa Rodríguez Hernández. Të dyja do t’i mbajnë emrat e tyre para dasmës.

Certifikata e martesës u regjistrua nën numrin 1,493, por duket se është regjistruar në Zyrën e Regjistrimit të Portos dhe jo në Cascais, bashkinë ku u zhvillua dasma.

Bota nuk gjen qetësi nga lëkundjet sizmike që po godasin anembanë rruzullit me një fuqi aspak të zakontë pothuajse në të njëjtën kohë.

Një tërmet me magnitudë 5.0 ka goditur gjatë natës edhe zonën e Granadës, në jug të Spanjës.

Epiqendra e tërmetit u regjistrua pranë Alhendín, në rajonin e Andaluzisë. Sipas Institutit Gjeografik Kombëtar të Spanjës (IGN), magnituda e tërmetit fillimisht ishte vlerësuar 4.8, por më pas u rishikua në 5.0.

Autoritetet thanë se ka pasur të paktën 4 tërmete njëri pas tjetrit, por me shkallë force në zbritje dhe pa viktima.

Lëkundja kishte një thellësi prej vetëm 2 kilometrash dhe shkaktoi dëme materiale në disa zona. Shërbimet e emergjencës raportuan shkëputje të pjesëve të kornizave, dëmtime në fasada dhe çati ndërtesash, veçanërisht në Armilla.

Banorë të shumtë raportuan gjithashtu rënien e objekteve brenda banesave.

Pavarësisht dëmeve, deri tani nuk raportohet për viktima apo persona të lënduar. Tërmeti u ndje në të gjithë provincën e Granadës, por edhe në provincat e Jaén, Almería, Málaga dhe Córdoba.

Vetëm gjashtë minuta pas lëkundjes kryesore u regjistrua një tjetër tërmet me magnitudë 2.6, me epiqendër në Gojar.

Zona ishte goditur edhe gjatë ditës së premte nga tre tërmete të tjera me intensitet më të ulët, ndërsa autoritetet vijojnë monitorimin e situatës dhe vlerësimin e dëmeve të shkaktuara nga lëkundja e fuqishme.

Në 10 gusht Kili u godit nga një tërmet me forcë 7,4 ballë, me mbi 270 viktima deri tani, mijëra të plagosur dhe ndërtesa të shembura. Sot u godit edhe Indonezia nga një tërmet 7,7 ballë dhe deri tani numërohen dhjetëra të vdekur dhe qindra të plagosur, teksa pati një alarm edhe për tsunami.

Gjithashtu dje Greqia në Thesproti u godit nga një tërmet 3,8 ballë, pa dëme materiale.

Atletiko Madrid njoftoi zyrtarisht nënshkrimin e Kuti Romeros sot në mëngjes (15 gusht). Qendërmbrojtësi argjentinas bëhet nënshkrimi i katërt i Rojiblancos për sezonin e ardhshëm, duke qenë objektivi kryesor i Diego Simeones për të forcuar mbrojtjen e tyre.

Skuadra e Metropolitano pagoi afër 40 milionë euro për mbrojtësin argjentinas (33 milionë euro fikse dhe 7 milionë euro bonuse), i cili u dha lamtumirën tifozëve të klubit londinez dje.

Verën e kaluar, Kuti u bë një objektiv për Atletikon. Megjithatë, kërkesat financiare të Totenhemit e bënë të pamundur marrëveshjen. Një vit më vonë, siç ndodhi me Hançkon në vitin 2025, qendërmbrojtësi argjentinas mbërrin në Metropolitano me qëllimin për t’u bërë një lojtar kyç për Simeonen.

Trajneri argjentinas kështu shton një lojtar të kalibrit të lartë në skuadër, një që do t’u lejojë Rojiblancos të rifitojnë qëndrueshmërinë e tyre mbrojtëse.

Ministria e Mbrojtjes informon se situata e zjarreve në Krujë paraqitet e normalizuar në të gjitha zonat e shfaqura si problematike gjatë ditëve të fundit.

Në lagjen Abaze, ku zjarri u shfaq fillimisht të shtunën e kaluar dhe më pas u përhap në rrethinat e qytetit, vatrat janë izoluar plotësisht. Gjatë pasdites së djeshme, mjetet zjarrfikëse dhe helikopterët ndërhynë për shuarjen e zjarrit, ndërsa sot situata paraqitet e qetë.

Një vatër zjarri u evidentua edhe në Zidoll, pranë fshatit Halilaj. Ajo ishte aktive gjatë pasdites së djeshme, por u shua gjatë natës falë ndërhyrjes së mjeteve zjarrfikëse.

Ndërkohë, në Bojë, pranë kurorës së pishave, vijojnë të jenë aktive dy vatra të vogla. Forcat ushtarake dhe strukturat e emergjencave civile po punojnë për mbajtjen e tyre nën kontroll. Sipas informacioneve, të dyja vatrat janë drejt izolimit të plotë.

Gjatë javës së fundit, në disa zona të Krujës janë shfaqur vatra zjarri, duke krijuar situata shqetësuese për banorët dhe strukturat e emergjencave.

Falë ndërhyrjes së zjarrfikësve, forcave ushtarake, emergjencave civile dhe strukturave të tjera të angazhuara, situata është mbajtur nën kontroll dhe rreziku për përhapjen e flakëve është minimizuar.

Bregdeti shqiptar mbetet përsëri më i preferuari për pushimet e verës dhe të fundjavave nga qytetarët e Kosovës.

Edhe mëngjesi i kësaj të shtune nisi me fluks të lartë qytetarësh dhe mjetesh në pikën kufitare të Morinit në Kukës.

Gjatë gjithë kohës është punuar me procedurën e thjeshtuar të kalimit të kufirit për automjetet me targa të Shqipërisë dhe Kosovës. Megjithatë, herë pas here, fluksi i lartë i mjeteve ka krijuar kolona të gjata, deri në thellësi të territorit të Kosovës.

Një pjesë e qytetarëve të Kosovës, pasi kanë kaluar pushimet, po kthehen përmes portit të Durrësit dhe pikave të kalimit kufitar në Morinë dhe Han të Hotit, drejt shteteve ku jetojnë e punojnë.

Ndërsa të tjerë po udhëtojnë drejt qyteteve bregdetare të Shqipërisë për të kaluar fundjavën apo ditët e mbetura të kësaj vere.

Fluksi i lartë i mjeteve dhe qytetarëve të Kosovës në pikat kufitare me Shqipërinë është ndjerë pothuajse çdo ditë të javës, por më të ngarkuara mbeten ditët e fundjavës, me një mesatare ditore që i kalon 35 mijë shtetas në hyrje dhe pothuajse të njëjtin numër në dalje nga territori i Shqipërisë.

Të paktën 5 persona kanë humbur jetën në një seri vrasjesh të regjistruara dje në Michigan të SHBA-ve, në dinamikë dhe motive që po hetohen nga autoritetet.

I dyshuari kryesor, 39-vjeçari Chad Hickman, raportohet se u gjet gjithashtu i vdekur në automjetin e tij, pasi i dha fund jetës me armë zjarri.

Ngjarja nisi pak para mesditës, kur policia u njoftua për të shtëna me armë në një banesë. Kur mbërritën në vendngjarje, efektivët gjetën tre persona të pajetë dhe një tjetër në gjendje kritike.

I plagosuri u dërgua në spital, ndërsa Hickman ishte larguar. Gjatë operacionit për gjetjen e tij, policia zbuloi një viktimë të katërt në një banesë tjetër. Pak më vonë, automjeti i 39-vjeçarit u gjet në një zonë të pyllëzuar pranë një liqeni.

Brenda tij u gjetën Hickman dhe një tjetër person, të dy të vdekur.

Sipas të dhënave të gjykatës, Hickman ishte në proces divorci. Ai kishte precedentë penalë dhe në vitin 2024 ishte dënuar me më shumë se një vit burg, pasi ishte deklaruar fajtor për dy kundërvajtje.

Në të kaluarën, ai ishte akuzuar gjithashtu për kontribut në sulmin ndaj një të mituri dhe abuzim të shkallës së katërt me fëmijë, për një incident të vitit 2010.

Autoritetet vijojnë hetimet për të përcaktuar rrethanat e plota të ngjarjes dhe motivin e vrasjeve.