Ministri i Jashtëm i Serbisë, Marko Gjuric, i është përgjigjur deklaratave të kryeministrit Edi Rama lidhur me lumin Ibër dhe zhvillimet në veri të Kosovës, duke e akuzuar qeverinë e Albin Kurtit për “shkatërrim sistematik” të pronave të serbëve. Në një reagim të gjatë në rrjetin social X, Gjuric e cilëson diskutimin mbi lumin Ibër si një përpjekje për të zhvendosur vëmendjen nga ajo që ai e konsideron si “realitetin konkret” në terren. Ministri i Jashtëm serb argumenton se Shqipëria nuk ka statusin e një shteti breglumor të Ibrit dhe se çështjet që lidhen me këtë rrjedhë ujore duhet të trajtohen nga palët drejtpërdrejt të interesuara. Gjuric rikthen gjithashtu në vëmendje qëndrimin e Beogradit për Kosovën, duke iu referuar Kushtetutës së Serbisë, të drejtës ndërkombëtare dhe Rezolutës 1244 të Këshillit të Sigurimit të OKB-së. Ai kërkon nga Tirana që mbështetja për komunitetin serb në Kosovë të shoqërohet me veprime konkrete. Në fund të reagimit, ministri serb i sugjeron Ramës dhe ministrit shqiptar për Evropën dhe Punët e Jashtme, Ferid Hoxha, që të lënë pas “diplomacinë përmes altoparlantëve” dhe të fokusohen në bashkëpunimin konkret mes shqiptarëve dhe serbëve. #voxnews #media #news @voxnews.al

1663 views

Në territorin e vendit janë raportuar 25 vatra zjarri, pjesa më e madhe e të cilave janë shuar. Aktualisht, pesë vatra vijojnë të jenë aktive, ndërsa një zonë mbahet në monitorim. Në terren janë angazhuar 37 automjete zjarrfikëse dhe 365 forca operacionale. Në mbështetje të tyre kanë vepruar edhe 158 efektivë të Forcave të Armatosura, me 10 mjete dhe katër helikopterë të Forcës Ajrore. Në Mallakastër, zjarret në Riban, Ngraçan, Panahor dhe Çyçen janë shuar plotësisht, ndërsa në Drenie është evidentuar një riaktivizim në thellësi të pyllit. Situata vijon të monitorohet edhe në Krujë, ku forcat operacionale po punojnë në lagjen Abaze dhe në zonën Krastë–Halil. Në Priskë të Madhe në Tiranë po vijojnë përpjekjet për vënien nën kontroll të zjarrit, ndërsa nuk raportohet rrezik për zonat e banuara. Ndërkohë, zjarret në Cikallesh, Vilëz, Kallmet të Vogël dhe Goraj–Budishë janë shuar plotësisht, ndërsa Dajti vijon të mbahet në monitorim. #voxnews #media #news @voxnews.al

1687 views

Për ngjarjen e djeshme të konstatimit të një objekti 5 kate pa leje në Himarë, ka reaguar sot dhe Agjencia e Mbikëqyrjes Policore. AMP ka ndaluar dy punonjës të Policisë së Shtetit, ndërsa dy të tjerë janë shpallur në kërkim për “Shpërdorim të detyrës”. Bëhet fjalë për një hetim që ka vënë nën përgjegjësi penale zinxhirin komandues të strukturave të Policisë në Komisariatin e Himarës, lidhur me mënyrën sesi është lejuar e trajtuar ndërtimi i objektit shumëkatësh pa leje. Sipas AMP-së, pas ndërhyrjes së IKMT-së dhe shembjes së objektit, hetimet janë zgjeruar edhe mbi veprimet dhe mosveprimet e punonjësve të policisë, që kanë pasur dijeni ose përgjegjësi institucionale për situatën. Kështu, në kuadër të hetimeve është ndaluar Emiljano Prenga, aktualisht me detyrë Shef i Krimeve në Volum në Komisariatin e Policisë Divjakë, i cili më herët ka mbajtur të njëjtën detyrë në Komisariatin e Policisë Himarë. Gjithashtu është ndaluar Klodian Petani, me detyrë Specialist i Hetimit të Krimeve në Komisariatin e Policisë Vlorë, i cili më parë ka shërbyer në të njëjtin pozicion në Komisariatin e Policisë Himarë. Në kërkim është shpallur Ferit Merkaj, aktualisht Shef i Seksionit të Trafiqeve në Drejtorinë Vendore të Policisë Vlorë dhe ish-Shef i Komisariatit të Policisë Himarë, ndërsa në kërkim është shpallur edhe Redin Çaushaj, me detyrë SPZ në Komisariatin e Policisë Himarë. Dy prej punonjësve të shpallur fillimisht në kërkim janë paraqitur më pas janë ndaluar, ndërsa dy të tjerët nuk janë gjetur në banesat e tyre dhe nuk janë paraqitur pranë strukturave përkatëse, pavarësisht njoftimeve. #voxnews #media #news @voxnews.al

1511 views

Është një situatë humori të veçantë kjo e jona. Një paradoks që vetëm Shqipëria di ta prodhojë kaq bukur. Ne kemi vite që ikim në Itali. Për punë, për qejf, për halle shëndeti. Ikim atje dhe lëmë lesh në kantieret e ndërtimit, në restorante, në hotele, në bujqësi, në kujdesin për të moshuarit. Madje, kur sëmuremi, shkojmë edhe për të lënë lesh nëpër klinikat e spitaleve italiane. Lëmë lesh si në kuptimin financiar ashtu edhe në kuptimit kimiko-mjekësor. Ndërkohë, italianët kanë filluar të vijnë tek ne për të mbjellë lesh. Dhe jo vetëm italianët. Shqipëria prej vitesh është bërë një lloj supermarketi i turizmit mjekësor. Ne mbjellim flokë, rregullojmë dhëmbë, bëjmë ndërhyrje estetike. Klinikat private janë plot me të huaj që vijnë të marrin shërbime mjekësore më lirë, më shpejt dhe, në jo pak raste, me standard të kënaqshëm. Në rrugët e Tiranës sheh plot italianë me kokë të fashuar postmbjellje. Pra, nga njëra anë kemi një mjekësi që po i shërben gjithnjë e më shumë dynjasë. Nga ana tjetër, shqiptari vazhdon të marrë avionin për të shkuar në Itali, Turqi, Greqi apo Gjermani kur puna bëhet serioze. Këtu fillon paradoksi. Sepse statistikisht nuk mund të thuash se mjekësia shqiptare ka dështuar. Përkundrazi. Nëse të huajt vijnë këtu të mbjellin flokët dhe të rregullojnë dhëmbët, do të thotë se kemi mjekë, klinika, pajisje, investime dhe një treg dhe shërbim që funksionon. Pyetja është tjetër është pse kemi mjekësi për flokët e italianit, por shqiptari shkon në Itali kur i duhet të trajtojë kancerin? Pse dimë të mbjellim flokë, por jo gjithmonë të garantojmë trajtimin e sëmundjeve të rënda dhe jo vetëm? Pse dimë t’i bëjmë një të huaji një buzëqeshje perfekte, ndërsa shqiptari duhet të zgërdhihet jashtë vendit për një trajtim që mund t’i shpëtojë jetën? Sigurisht, kjo nuk është vetëm çështje mjekësh. Është çështje sistemi, investimesh, teknologjie, organizimi, financimi dhe prioritetesh. Nejse, po të heqim pak seriozitetin në mendim, pamja nga jashtë është komike. Ne shkojmë në Itali për të shpëtuar dhëmbët dhe jetën. Italianët vijnë në Shqipëri për të rregulluar dhëmbët dhe flokët. Ne atje lëmë lesh. Ata këtu mbjellin lesh. Bilanci tregëtar jek e jek… Dhe kjo na vendos përballë një pyetjeje që është më shumë se një shaka. Sepse nëse një sistem shëndetësor është aq i mirë sa të tërheqë pacientë të huaj, duhet të jetë në gjendje t’u japë të njëjtën siguri edhe pacientëve të vet. Përndryshe kemi arritur një model të çuditshëm: mjekësi për eksport dhe shëndetësi për import. Flokët i mbjellim këtu. Dhëmbët i rregullojmë këtu. Por kur puna bëhet për jetën, marrim rrugën për në Perëndim. Dhe kështu, pas gjithë kësaj historie, nuk di nëse duhet ta quajmë sukses, dështim, turizëm mjekësor apo paradoks. Shit e lër lesh. Punë leshi dmth… #voxnews #media #news

3025 views

Pauline Roquette - France 24/ Eklipset tregojnë se si ka ndryshuar marrëdhënia e njerëzimit me dijen. Në lashtësi, errësimi i papritur i Diellit shihej si një ogur i keq dhe shkaktonte frikë. Sot, eklipset janë kthyer në një mundësi të rëndësishme për shkencëtarët për të studiuar Diellin, Tokën, kafshët dhe edhe reagimet e njerëzve. Një nga dëshmitë më të hershme të vëzhgimit të një eklipsi është një pllakë balte e zbuluar në qytetin e Ugarit, në Sirinë e sotme, që daton rreth vitit 1223 para Krishtit. Në qytetërimet e lashta, zhdukja e Diellit në mes të ditës shkaktonte habi dhe frikë. Në Kinën e lashtë besohej se një dragua po hante Diellin për shkak të sjelljes së keqe të njerëzve. Banorët u binin daulleve për të trembur dragoin dhe për të rikthyer dritën. Edhe inkasit në Amerikën e Jugut e shihnin eklipsin si shenjë të zemërimit të perëndisë së Diellit. Udhëheqësit përpiqeshin të kuptonin shkakun dhe ta qetësonin atë përmes ritualeve dhe sakrificave. Një eklips diellor i vitit 648 para Krishtit, i parë mbi ishullin grek Paros, frymëzoi edhe poetin Archilochus, i cili e përshkroi errësimin e mesditës si një ngjarje që tregonte se çdo gjë ishte e mundur. Por përtej miteve dhe besimeve, eklipset ndihmuan që njerëzit të kuptonin më mirë lëvizjen e trupave qiellorë. Me kalimin e shekujve, roli shkencor i eklipseve u bë gjithnjë e më i rëndësishëm. Në vitin 1868, gjatë një eklipsi, shkencëtarët zbuluan heliumin në spektrin e Diellit, përpara se ky element të identifikohej në Tokë. Një tjetër moment i rëndësishëm ishte eklipsi i 29 majit 1919. Vëzhgimet e bëra nga Brazili deri në Afrikën Lindore ndihmuan në konfirmimin e teorisë së relativitetit të përgjithshëm të Albert Einstein, duke matur devijimin e dritës së yjeve nga graviteti i Diellit. Sot, edhe pse satelitët e vëzhgojnë Diellin vazhdimisht, eklipset vazhdojnë të jenë të vlefshme për shkencëtarët. Ato krijojnë kushte të rralla që nuk mund të përsëriten lehtësisht me pajisje artificiale. Çfarë studiojnë shkencëtarët gjatë eklipsit? Një nga objektivat kryesore është studimi i koronës diellore, shtresa e jashtme e atmosferës së Diellit. Shkencëtarët përdorin pajisje të quajtura koronografë, të cilat krijojnë një lloj eklipsi artificial duke mbuluar pjesën qendrore të Diellit. Megjithatë, sipas astrofizikanëve, Hëna mbetet shumë më efektive në mbulimin e diskut diellor. Kjo është e rëndësishme sepse aktiviteti i Diellit ndikon në magnetosferën dhe jonosferën e Tokës, si dhe në kushtet që ndikojnë te satelitët, astronautët dhe fluturimet ajrore. Një nga misteret që shkencëtarët po përpiqen të zgjidhin është temperatura shumë e lartë e koronës diellore. Ajo arrin rreth 1.5 milionë Kelvin, ndërsa sipërfaqja e Diellit ka një temperaturë prej rreth 5 800 Kelvin. Studimi i këtyre dukurive mund të ndihmojë gjithashtu në kuptimin më të mirë të yjeve të tjerë dhe të sistemeve ku ndodhen planetet jashtë Sistemit Diellor. #voxnews #media #news

1830 views

Presidenti i SHBA-ve, Donald Trump, ka nënshkruar një urdhër ekzekutiv që parashikon më pak vaksina për fëmijët. Po ashtu rekomandohet që të ndahen në tre doza të veçanta individuale, vaksinat kundër shytave, fruthit dhe rubeolës (MMR). “Dekada më parë, fëmijët merrnin vetëm një pjesë të vogël të vaksinave që kërkohen sot”, tha Trump të hënën. “Në ato kohë, njerëzit ishin shumë më të shëndetshëm dhe, natyrisht, nivelet e larta të autizmit që vërehen sot nuk ekzistonin.” Administrata Trump ka mbështetur prej kohësh lidhjen e pretenduar mes vaksinave dhe autizmit. Megjithatë studime të shumta kanë gjetur se nuk ka asnjë lidhje mes vaksinës MMR dhe autizmit. Duke folur në Zyrën Ovale, Trump tha se administrata e tij “po njeh rekomandimet standarde të arta për vaksinat e fëmijërisë për vetëm 11 vaksinime kryesore kundër sëmundjeve më serioze dhe të rrezikshme”. “Po i zvogëlojmë. Nuk është vetëm se po bëni më pak vaksina, ose injeksione, siç thonë, por po i bëni ato në një seri vizitash te mjeku”, tha Trump. #voxnews #media #news @voxnews.al

1942 views

Ka shkuar në 132 numri i personave që kanë humbur jetën si pasojë e tërmetit me magnitudë 7.4 që goditi Kolumbinë, ndërsa regjistrohen më shumë se 570 të plagosur. Numri i të vdekurve ka gjasa të rritet, pasi dyshohet se ka më shumë të bllokuar nën ndërtesat e shembura, ndërsa vendi ka shpallur gjendje e jashtëzakonshme. Tërmeti me magnitudë 7.4 ballë një nga tërmetet më të mëdha në vite goditi në orën 07:34 në një thellësi prej 103 km në provincën Chocó, tha shërbimi gjeologjik i vendit. Ai u ndje në një zonë të madhe, që shtrihej për qindra milje në të gjithë Kolumbinë perëndimore. Shumë nga vdekjet janë përqendruar në qytetin e Pereira-s, në rajonin e kultivimit të kafesë në Kolumbi, me qytetet përreth dhe rajonin e Valle del Cauca që janë goditur gjithashtu rëndë. Ekipet e ndihmës së shpejtë po nxitojnë për të nxjerrë njerëzit nga rrënojat. Midis strukturave të shembura ishin edhe seksionet pediatrike dhe neonatale të një spitali në Cali. Qeveria ka shpallur një katastrofë kombëtare dhe ka dërguar ushtarë në zonë. Rreth 55 km nga epiqendra e tërmetit, qyteti i Pereirës pësoi disa nga dëmet më të mëdha, ku bashkia që ka regjistruar numrin më të lartë të viktimave. Videot e publikuara nga CNN tregojnë momentet kur disa ndërtesa në qytetin kolumbian të Pereirës u shembën gjatë tërmetit vdekjeprurës me magnitudë 7.4 ballë që goditi kombin e Amerikës së Jugut të hënën. Pesë kryeqytete në të gjithë vendin janë në alarm të kuq, 86 ndërtesa janë shembur dhe shtatë aeroporte kanë pezulluar operacionet, sipas Shoqatës Kolumbiane të Kryeqyteteve. Të paktën 188 persona rezultojnë të zhdukur në Cali, tha kryetari i bashkisë së qytetit. Gjashtëmbëdhjetë persona u evakuuan nga një sistem teleferiku ajror në Pereira pasi qëndruan të bllokuar për gjashtë orë, tha zyra e kryetarit të bashkisë së qytetit. Epiqendra e tërmetit ishte pranë fshatit San José del Palmar, në provincën Chocó, por kryebashkiaku lokal León Fabio Marín Moncada tha se mrekullisht nuk kishte pasur vdekje apo lëndime, pavarësisht se rrugët hyrëse dhe dalëse ishin dëmtuar. Departamenti i Shtetit tha se SHBA-ja po i jep Kolumbisë 15.5 milionë dollarë për strehim, ushqim, mbrojtje dhe vlerësime të tërmeteve. Ambasada në Bogota tha se SHBA-të gjithashtu po “ndihmojnë në mënyrë aktive” turistët amerikanë. Tërmeti goditi të ashtuquajturin bosht kafeje të Kolumbisë, një rajon malor, i gjelbër dhe me rëndësi kulturore që ndihmon në fuqizimin e ekonomisë së Kolumbisë. Zona ishte vendi i një tërmeti tjetër në vitin 1999 që vrau gati 1,200 njerëz. #voxnews #media #news

3798 views

Kryeministri i Shqipërisë, Edi Rama, ka reaguar ndaj deklaratave të ardhura nga Beogradi në lidhje me Kosovën dhe lumin Ibër dhe përfshirjen e Shqipërisë në debat. Në një postim të gjatë në X, Rama thekson se Shqipëria nuk ka asnjë pretendim territorial ndaj Serbisë dhe se mbështetja e Tiranës për Kosovën nuk ka nevojë për narrativën e një “Shqipërie të Madhe”. Sipas kryeministrit, Kosova është një shtet më vete dhe shqiptarët e Kosovës janë qytetarë të Republikës së Kosovës, me institucionet dhe të drejtën e tyre për të përcaktuar të ardhmen. Rama i drejtohet drejtpërdrejt edhe narrativës së Beogradit për statusin e Kosovës, duke deklaruar se “Serbia e humbi Kosovën”, ndërsa shton se përsëritja e të kundërtës nuk e ndryshon realitetin territorial. “Territori i Republikës së Kosovës nuk është territor serb dhe burimet natyrore që ndodhen në të nuk janë burime të Republikës së Serbisë”, shprehet ai. Rama argumenton se lumi Ibër duhet trajtuar si një sistem ujor ndërkufitar. Ai pranon se Serbia është e lirë të menaxhojë burimet që ndodhen brenda juridiksionit të saj, por thekson se pasojat e mundshme për një shtet tjetër nuk mund të ndalen në kufirin shtetëror. “Kjo është pikërisht arsyeja pse ekziston e drejta ndërkombëtare e ujërave”, shkruan Rama, "lumenjtë kanë zakonin e bezdisshëm të ndjekin gjeografinë dhe jo argumentet diplomatike”. Kryeministri shqiptar thotë gjithashtu se të drejtat, siguria, prona, gjuha dhe trashëgimia kulturore e komunitetit serb në Kosovë duhet të mbrohen. Rama thekson se Shqipëria dëshiron marrëdhënie të mira me Serbinë dhe një rajon të integruar në Bashkimin Europian, ku, sipas tij, duhet të përfshihet edhe Serbia. "Por fqinjësia e mirë nuk mund të nënkuptojë që fqinjët e Serbisë të pranojnë versionin e Serbisë për historinë”, shkruan Rama. "Ballkani ka paguar tashmë një çmim shumë të lartë, në gjak dhe në kohë të humbur". #voxnews #media #news

7390 views

Oqeanet e botës kanë shënuar në korrik temperaturat më të larta të regjistruara ndonjëherë, duke dhënë një tjetër sinjal alarmi për ndryshimet klimatike. Sipas shërbimit europian të monitorimit të klimës, Copernicus, temperatura mesatare e sipërfaqes së deteve, jashtë zonave polare, arriti në 20.96 gradë Celsius. Rekordi i mëparshëm për muajin korrik ishte 20.89 gradë, i vendosur në vitin 2023. Një faktor që po e shtyn më tej temperaturën është edhe El Nino, fenomeni natyror në Paqësor, i cili pritet të forcohet gjatë muajve të ardhshëm. I kombinuar me ngrohjen globale të shkaktuar nga aktiviteti njerëzor, ai mund të sjellë temperatura edhe më ekstreme. Edhe Europa po përballet me pasoja të forta. Temperaturat e detit arritën rekorde përgjatë Atlantikut dhe Mesdheut Perëndimor, duke shkaktuar valë të fuqishme të të nxehtit detar. Ndërkohë, Europa Perëndimore përjetoi qershorin dhe korrikun më të nxehtë të regjistruar ndonjëherë, ndërsa thatësira dhe temperaturat e larta favorizuan zjarre masive në Francë, Spanjë, Gjermani dhe vende të tjera. Shkencëtarët paralajmërojnë se ujërat më të ngrohta thithin më pak dioksid karboni, ndërsa ndryshojnë ekosistemet detare dhe prishin zinxhirët ushqimorë. Sipas ekspertëve, moti që dikur konsiderohej ekstrem po shndërrohet gjithnjë e më shumë në “normalitetin e ri” klimatik. #voxnews #media #news @voxnews.al

3220 views

Horoskopi për ditën e sotme 11.08.2026 #voxnews #media #news @voxnews.al

189 views

Një nga fenomenet më spektakolare astronomike të viteve të fundit do të ndodhë të mërkurën, më 12 gusht, kur një eklips total diellor do të jetë i dukshëm nga disa zona të Evropës dhe hemisferës veriore. Hëna do të kalojë drejtpërdrejt midis Tokës dhe Diellit, duke mbuluar plotësisht diskun diellor për vëzhguesit brenda “rrugës së totalitetit”. Eklipsi do të kalojë përmes Rusisë veriore, Groenlandës dhe Islandës, përpara se të përshkojë Atlantikun dhe të mbërrijë në Gadishullin Iberik, me Spanjën në një pozicion veçanërisht të favorshëm. Fenomeni do të jetë i pari eklips total diellor i dukshëm nga Evropa kontinentale që prej vitit 1999. Në Spanjë, rruga e eklipsit do të përshkojë pjesën më të madhe të veriut dhe lindjes së vendit, duke arritur deri në Ishujt Balearik, ndërsa një pjesë e vogël e Portugalisë verilindore do të përfshihet në zonën e totalitetit. Në rajonin e Burgos, faza e plotë do të zgjasë rreth 1 minutë e 44 sekonda, ndërsa i gjithë procesi do të zgjasë afërsisht 1 orë e 47 minuta. Kohëzgjatja maksimale e totalitetit përgjatë gjithë rrugës së eklipsit do të jetë rreth 2 minuta e 18 sekonda. Zona e eklipsit të pjesshëm do të jetë shumë më e gjerë, duke përfshirë pjesën më të madhe të Evropës, Kanadanë, disa zona të veriut të SHBA-së dhe pjesë të Afrikës veriperëndimore. Spanja do të përjetojë një tjetër eklips total edhe më 2 gusht 2027. Ekspertët paralajmërojnë se, pavarësisht spektaklit, vëzhgimi i eklipsit kërkon masa të rrepta sigurie për sytë. Gjatë fazave të pjesshme duhen përdorur vetëm syze speciale të certifikuara për eklipse ose filtra diellorë të sigurt, pasi syzet e zakonshme të diellit nuk ofrojnë mbrojtjen e nevojshme. Syzet mund të hiqen vetëm gjatë fazës së plotë dhe vetëm për aq kohë sa Dielli është i mbuluar tërësisht nga Hëna; sapo të shfaqet përsëri qoftë edhe një pjesë e vogël e diskut diellor, mbrojtja duhet vendosur menjëherë. Për teleskopët, dylbitë dhe kamerat nevojiten gjithashtu filtra diellorë të posaçëm.

6484 views

Presidenti amerikan Donald Trump ka firmosur një urdhër ekzekutiv që synon reduktimin e numrit të vaksinave të rekomanduara për fëmijët në SHBA, duke propozuar gjithashtu që vaksina e kombinuar kundër fruthit, shytave dhe rubeolës (MMR) të ndahet në tre vaksina të veçanta. “Dekada më parë, fëmijët merrnin vetëm një pjesë të vaksinave që kërkohen sot. Në atë kohë njerëzit ishin shumë më të shëndetshëm dhe, sigurisht, nuk ekzistonin nivelet e larta të autizmit që shohim sot”, deklaroi Trump të hënën. Administrata Trump ka ngritur prej kohësh pikëpyetje mbi një lidhje të pretenduar mes vaksinave dhe autizmit. Megjithatë, studime të shumta shkencore nuk kanë gjetur prova që vaksina MMR shkakton autizëm. Duke folur nga Zyra Ovale, Trump tha se administrata e tij nuk do të ndjekë më atë që ai e quajti “standardi i artë” i rekomandimeve ekzistuese për vaksinimin e fëmijëve, duke e kufizuar skemën në 11 vaksina bazë kundër sëmundjeve që konsiderohen më serioze dhe të rrezikshme. “Po i reduktojmë. Nuk bëhet fjalë vetëm për më pak vaksina apo injeksione, siç i quajnë, por për administrimin e tyre në një seri vizitash te mjeku”, deklaroi presidenti amerikan. Vendimi pritet të ndezë një debat të fortë në SHBA mes administratës Trump, institucioneve shëndetësore dhe komunitetit shkencor mbi mënyrën se si duhet të organizohet vaksinimi i fëmijëve.

4807 views

Një moment shprese është regjistruar në Cali të Kolumbisë, pas tërmetit të fuqishëm që goditi vendin. Ekipet e emergjencës kanë arritur të nxjerrin të gjallë nga rrënojat një grua dhe foshnjën e saj të porsalindur. Nëna dhe fëmija ndodheshin brenda një pallati pesëkatësh në lagjen Ciudad Capri, i cili u shemb pas tërmetit me magnitudë 7.4. Ata u transportuan me urgjencë në një qendër shëndetësore pranë zonës së katastrofës dhe, sipas informacioneve të para, gjendja e tyre është e qëndrueshme dhe nuk janë në rrezik për jetën. Shpëtimi i tyre ka rritur shpresat e ekipeve që vijojnë kërkimet mes rrënojave. Shpëtimtari Carlos Ortiz tha se deri tani janë nxjerrë të gjallë shtatë persona, ndërsa operacioni nuk është ndalur. “Gjetja e foshnjës bashkë me nënën e saj na dha shumë shpresë për të vazhduar”, u shpreh Ortiz, duke shtuar se ekipet po kërkojnë edhe një çift të moshuarish dhe nipin e tyre shtatëvjeçar. Sipas tij, nga rrënojat janë konstatuar shenja jete. Sa i përket foshnjës, shpëtimtari tha se ajo është në gjendje të qëndrueshme. I porsalinduri kishte disa prerje të vogla, të shkaktuara gjatë nxjerrjes nga rrënojat, por po merr trajtim nga ekipet mjekësore në terren. Bilanci i dëmeve mbetet i rëndë. Deri tani raportohet për 86 ndërtesa të shembura, ndërsa shtatë aeroporte kanë pezulluar aktivitetin. Në përpjekje për të ndihmuar autoritetet kolumbiane, Shtetet e Bashkuara kanë njoftuar gjithashtu një ndihmë financiare prej 15.5 milionë dollarësh. Në Cali, një prej zonave më të prekura, spitalet kanë kaluar në alarm të kuq, pasi kanë arritur në kapacitet të plotë dhe po përballen me fluksin e të plagosurve.

5039 views

Një qytetare ka denoncuar kostot e larta që i janë kërkuar për një porosi online me vlerë rreth 200 dollarë. Sipas dokumentacionit të saj, vetëm detyrimi doganor arrin në 6,769 lekë, ndërsa më pas shtohen 3,300 lekë për agjencinë doganore, 600 lekë për “rresht” dhe 1,200 lekë për “BIS”, duke e çuar faturën totale në 11,869 lekë. Pra, qytetari porosit një produkt me një çmim të caktuar, por kur ai mbërrin në Shqipëri përballet me një tjetër faturë, me zëra që jo vetëm janë të lartë, por shpesh janë të pakuptueshëm për konsumatorin. Në këtë rast, kritika nuk mund të drejtohet verbërisht ndaj DHL-së, pasi një pjesë e kostove lidhen me detyrimet që vendosen nga sistemi doganor shqiptar, ndërsa një pjesë tjetër janë tarifa për procedurën e zhdoganimit. Pikërisht këtu lind problemi, pse një blerje relativisht modeste duhet të rëndohet me kaq shumë pagesa shtesë? Çfarë përfshin konkretisht shuma prej 6,769 lekësh? Sa prej saj është TVSH, sa është tarifë doganore dhe mbi çfarë baze llogaritet? Po tarifa prej 600 lekësh “për rresht” dhe ajo prej 1,200 lekësh “BIS”, çfarë shërbimi konkret përfaqësojnë? Qytetari nuk duhet të ketë nevojë të bëhet ekspert doganash vetëm për të kuptuar se ku po i shkojnë paratë. Denoncimi: Përshëndetje! Kompania DHL na e vështirëson dhe na shton çdo ditë tarifa të reja për pagesa ekstra. Pasi vjen dërgesa, të mbajnë pending disa ditë vetëm që të paguajmë magazinazh për DHL-në. Ka raste që magazinazhi të shkon 5,000-100,000 lekë të reja 11,000 lekë të reja për një dërgesë që ka vetëm 5 ditë që ka mbërritur. 3,300 lekë të reja për agjencinë doganore për të bërë zhdoganimin. 600 lekë të reja për rresht. Dhe 1,200 lekë të reja për BIS. Këto nuk e di çfarë janë. I kërkova që dërgesa të kthehej mbrapsht. Patjetër, ato janë ilaçe. Nuk i dhanë prioritetin e duhur. Mua mund të më vdesë prindi për ato ilaçe. Jo, nuk është dashur të paguaj asnjë tarifë. Ju falënderoj! Lidhur me këtë rast, mbetet për t’u parë se si do të shpjegohen nga Drejtoria e Përgjithshme e Doganave me drejtues Besmir Bejën dhe DHL me drejtues Qirjako Koçollari tarifat e aplikuara dhe nëse konsumatorët informohen qartë për kostot shtesë që shoqërojnë një porosi online.

2887 views

Vatrat e zjarrit në zonën e Zidonit dhe në lagjen Bojë të Krujës kanë vijuar të jenë aktive edhe gjatë natës. Forcat zjarrfikëse kanë qenë në terren për përballimin e flakëve, ndërsa mëngjesin e sotëm kanë nisur edhe operacionet nga ajri për shuarjen e plotë të zjarrit. Dy helikopterë të ushtrisë vijojnë të hedhin ujë mbi vatrat e zjarrit, ndërsa situata raportohet se po shkon drejt neutralizimit. Puna e forcave në terren vijon për izolimin e vatrave dhe parandalimin e përhapjes së mëtejshme të flakëve. Deri më tani nuk raportohet për persona të lënduar apo dëme në banesa, por dëmet në ekosistem janë të pallogaritshme. Intensiteti i lartë i flakëve, i favorizuar nga era e fortë dhe temperaturat e larta, ka përfshirë sipërfaqe të konsiderueshme me bimësi, duke shkaktuar dëme të mëdha në florën dhe faunën e zonës.

7326 views

Prej disa ditësh, ndotja e detit nga karburanti i anijeve është kthyer në një problem shqetësues në Porto Palermo, një gji mahnitës i vendosur midis fshatrave Himarë dhe Qeparo. Pushuesit kanë raportuar mbetje vajore në ujë, ndërsa disa prej tyre kanë dalë nga deti me njolla të errëta në trup. Situata është veçanërisht problematike pasi bëhet fjalë për një zonë plazhi publik, ku këto ditë ndodhen dhjetëra turistë dhe pushues. Ndotja dyshohet se lidhet me karburantin e derdhur nga mjetet lundruese, ndërsa ende nuk është bërë e qartë origjina e saktë e saj. Pushuesit kërkojnë ndërhyrjen e autoriteteve për të identifikuar burimin e ndotjes dhe për të marrë masa, pasi prania e karburantit në ujë vijon prej ditësh dhe rrezikon të ndikojë si në shëndetin e pushuesve, ashtu edhe në mjedisin detar.

10.6K views

Natën e mirë!

6097 views

Një qytetare i është drejtuar redaksisë sonë pasi mbrëmjen e sotme, rreth orës 22:20, në Tiranë, i është vjedhur çanta me sendet personale dhe rrogën që, sipas saj, e kishte marrë po atë ditë. Brenda çantës ndodhej edhe telefoni i punës, së bashku me kontaktet që i nevojiten për punën. Qytetarja, e cila thotë se është punonjëse në ambientin ku ka ndodhur ngjarja, ka siguruar pamjet e kamerave të sigurisë dhe kërkon publikimin e tyre, me shpresën se personat e shfaqur në pamje mund të identifikohen. Ajo shprehet se publikimi mund të ndihmojë edhe për të parandaluar raste të tjera të ngjashme. Nga pamjet nuk mund të përcaktohet identiteti apo prejardhja e dy djemve. Për këtë arsye, ju lutemi ta shpërndani sa më shumë denoncimin, që pamjet të arrijnë te personat që mund t’i njohin dhe të ndihmojmë zonjën në identifikimin e tyre dhe rikthimin e sendeve të saj.

14.2K views

TIRANË, 11 gusht /ATSH/ Ministria e Mbrojtjes ndau sot pamje nga operacioni i përbashkët nga ajri dhe toka për shuarjen e zjarreve në territorin e Krujës, ku ndërhyrja e dy helikopterëve ka sjellë përmirësim të ndjeshëm të situatës.

Në zonën e Krastës dhe në fshatin Halil, dy helikopterë të Forcës Ajrore kanë ndërhyrë në bashkëpunim me forcat operacionale në terren, duke frenuar përhapjen e flakëve dhe duke ndihmuar në normalizimin e situatës.

Ministria e Mbrojtjes bën të ditur se operacioni vijon për izolimin dhe shuarjen e plotë të vatrave, me prioritet mbrojtjen e banesave, komunitetit dhe mjedisit.

/gj.m/r.e/a.f/

The post Vijon operacioni nga ajri dhe toka për shuarjen e zjarrit në Krastë dhe Halil appeared first on Agjencia Telegrafike Shqiptare.

Treguesit e rentabilitetit të sektorit bankar janë në rënie për të dytin vit radhazi.

Sipas statistikave të paaudituara të raportuara nga Shoqata Shqiptare e Bankave, mbështetur në Standardet Ndërkombëtare të Raportimit Financiare (IFRS), për 6-mujorin 2026 sektori bankar raporti një normë kthimi nga kapitali (mesatarizuar me bazë vjetore) në nivelin 14.03%, nga 16.69% që kishte qenë një vit më parë.

Edhe kthimi nga aktivet u tkurr në 1.39%, nga 1.66% që kishte qenë një vit më parë.

Gjithashtu, fitimi i sektorit në vlerë absolute pësoi rënie në 16.2 miliardë lekë, 8.5% më pak krahasuar me 6-mujorin 2025.

Rënia e përfitueshmërisë së sektorit ka ardhur paralelisht nga ulja e fitimit dhe nga rritja e mëtejshme e kapitalit aksionar. Ulja e normave të interesit dhe presionet e larta në krahun e shpenzimeve vlerësohet po përcaktojnë fitime më të ulëta për bankat tregtare.

Ndërkohë, rritja e ndjeshme e kërkesave për kapital nga Banka e Shqipërisë, pas vitit 2019, ka sjellë rritje të ndjeshme të kapitalit aksionar dhe atij rregullator të sektorit.

Banka me treguesin më të lartë të kthimit nga kapitali për 6-mujorin 2026 ishte Raiffeisen Bank, me 21.75%. megjithatë, kthimi i Raiffeisen pësoi rënie të dukshme nga niveli 26.15% i një viti më parë.

Ndjek Banka Amerikane e Investimeve (ABI Bank), në nivelin 19.15%, por edhe kjo në rënie të fortë prej kthimit prej 33.93% që raportonte në mesin e vitit të kaluar.

Banka më e madhe në vend, Banka Kombëtare Tregtare (BKT) renditet e treta, me një kthim nga kapitali në masën 15.85%. BKT është ndër të paktat banka që e ka përmirësuar lehtë kthimin, në raport me nivelin 15.03% të një viti më parë.

Më tej vijojnë një grup bankash që e raportojnë treguesin e kthimit nga kapitali lehtësisht sipër mesatares së sektorit bankar.

OTP Albania arriti një kthim nga kapitali në masën 14.74% (nga 17.72% një vit më parë), Fibank, në nivelin 14.65% (nga 24.35% një vit më parë) dhe Tirana Bank, në nivelin 14.03% (nga 16.11% një vit më parë).

Bankat e tjera kanë regjistruar kthime poshtë mesatares së sektorit bankar për periudhën.

Union Bank raporton kthim nga kapitali në masën 13.79% (nga 14.6% një vit më parë), Intesa Sanpaolo Bank Albania ka arritur një kthim në masën 9.94%, (nga 13.45% një vit më parë) dhe Credins Bank një kthim në masën 6.92%, (nga 6.97% një vit më parë).

ProCredit Bank Albania dhe Banka e Bashkuar e Shqipërisë e kanë mbyllur 6-mujorin me humbje. ProCredit raportoi një kthim në masën -0.19% (nga 1.5% një vit më parë) dhe Banka e Bashkuar e Shqipërisë -31.7% (nga -3.81% një vit më parë).

Burimi: Shoqata Shqiptare e Bankave

The post Përfitueshmëria e sektorit bankar është në rënie për të dytin vit radhazi appeared first on Revista Monitor.