Një histori njerëzore, e thjeshtë por shumë domethënëse, ka mbërritur në redaksinë e JOQ Albania, ku një punonjës policie kërkon të gjejë personin që i qëndroi pranë në një moment të vështirë. Efektivi tregon se dy ditë më parë, mëngjesin e së shtunës, ka pësuar një aksident me motor në zonën e Casa Italia, ndërsa ndodhej pas kësaj zone. Në ato momente, një i ri, që sipas tij punonte në shërbimin zjarrfikës, i gjendur aty rastësisht, i ka dhënë ndihmën e parë, duke u bërë personi i parë që i erdhi në ndihmë. Në videon e dërguar për JOQ, ai shprehet se nuk ka arritur të marrë asnjë kontakt të tij, pasi më pas është transportuar me ambulancë, dhe tashmë dëshira e vetme është ta gjejë për ta falënderuar personalisht. “Thjesht dua ta takoj për mirënjohje, edhe për të pirë një kafe me të, se është personi i parë që më ka ndihmuar. Jam shumë falënderues ndaj tij,” – shprehet ai. Në mesazhin e tij, polici thekson se kjo është një kërkesë krejtësisht njerëzore, për të shprehur mirënjohjen ndaj dikujt që nuk e njihte, por që nuk hezitoi t’i gjendej pranë në një moment të vështirë. Në një realitet shpesh të mbushur me lajme negative, kjo histori vjen si një kujtesë e thjeshtë se gjestet e mira nuk kalojnë pa u vlerësuar. Nëse personi në fjalë e sheh këtë mesazh, ose nëse dikush ka informacion për të, ftohet të kontaktojë redaksinë, për të bërë të mundur këtë takim mirënjohjeje.
Ministri i Sigurisë Kombëtare i Izraelit ka shkaktuar një valë reagimesh dhe kritikash të ashpra pasi ka festuar 50-vjetorin e lindjes me një tortë të dekoruar me litar ekzekutimi (litar me nyjë). Ky imazh provokues lidhet drejtpërdrejt me përpjekjet e tij të vazhdueshme për të kaluar një ligj që lejon dënimin me vdekje për palestinezët e dënuar për sulme vdekjeprurëse. Sipas kritikëve, lëshimi i këtij imazhi është një referencë e qartë për varjen si metodë të parashikuar në legjislacionin e avancuar gjatë këtij viti. Megjithëse ligji kërkon ende miratimin përfundimtar, ai është dënuar ashpër nga zyrtarë të shumtë dhe organizata joqeveritare, të cilët e shohin këtë akt si një nxitje të mëtejshme të dhunës dhe urrejtjes.
Një video spektakolare që po qarkullon me shpejtësi në rrjetet sociale ka lënë pa fjalë mijëra njerëz, duke shfaqur një fenomen të rrallë natyror të njohur si “retë ylber” (iridescent clouds). Pamjet janë regjistruar mbi qiellin e Indonezisë, ku pas reshjeve të shiut, retë janë shndërruar në një spektakël ngjyrash të ndezura që duken si të pikturuara. Ky fenomen i rrallë ndodh kur rrezet e diellit ndërveprojnë me pika shumë të vogla uji ose kristale akulli të mbetura në ajër pas shiut. Kur retë janë të holla dhe ndodhen pranë Diellit apo Hënës, drita shpërbëhet në ngjyra të ndryshme, duke krijuar ato forma mahnitëse që ngjajnë me një ylber të shpërndarë në qiell. Ekspertët shpjegojnë se për të krijuar këtë efekt, kushtet duhet të jenë shumë specifike: madhësia e pikave të ujit duhet të jetë pothuajse e njëjtë dhe retë duhet të jenë mjaftueshëm të holla që të lejojnë kalimin dhe shpërndarjen e dritës. Videoja është bërë virale brenda pak orësh, me komentues që e cilësojnë si “magji në qiell” dhe “një nga pamjet më të bukura natyrore që kanë parë ndonjëherë”. Ky fenomen, megjithëse i rrallë, është një kujtesë e fuqishme e bukurisë dhe kompleksitetit të natyrës, që shpesh na surprizon me pamje që duken pothuajse jashtë kësaj bote.
Një ngjarje e rëndë ka tronditur qytetin Belo Horizonte në Brazil, ku një avion i vogël u përplas me një ndërtesë banimi, duke shkaktuar një bilanc tragjik me të paktën dy të vdekur. Autoritetet lokale konfirmuan se në momentin e incidentit tragjik, në bordin e mjetit fluturues ndodheshin pesë persona. Sipas raportimeve nga Departamenti i Zjarrfikësve, avioni goditi fillimisht një ndërtesë trekatëshe dhe më pas u rrëzua në hapësirën e parkingut të një kompleksi banimi, duke krijuar skena paniku mes banorëve. Dëshmitë nga vendngjarja hedhin dritë mbi momentet e fundit dramatike përpara përplasjes fatale. Banorët e zonës treguan se aeroplani po fluturonte në një lartësi jashtëzakonisht të ulët dhe se një zhurmë e fortë e motorit u dëgjua pak çaste para goditjes. Mes tmerrit, disa dëshmitarë ngrenë hipotezën se piloti mund të ketë bërë një përpjekje të fundit dëshpëruese për të shmangur një tragjedi edhe më të madhe. Sipas tyre, manovrat e mjetit fluturues linin të kuptohej se po tentohej shmangia e një ndërtese shkolle që ndodhej aty pranë, veprim i cili fatkeqësisht përfundoi me përplasjen e pashmangshme mbi pallatin trekatësh.
Një punonjës policie i është drejtuar redaksisë së JOQ Albania me një denoncim shqetësues, duke hedhur dritë mbi një realitet që, sipas tij, shpesh mbetet i padukshëm për publikun. Mesazhi i tij vjen në një moment të rëndë për opinionin publik, pas tragjedisë në Durrës ku humbën jetën dy fëmijë të mitur. Sipas efektivit, në kushtet aktuale është pothuajse e pamundur që ngjarje të tilla të parandalohen. Ai pretendon se strukturat e policisë përballen me mungesa të theksuara në personel dhe mjete, ndërsa prioritetet operative, sipas tij, shpesh janë të deformuara. “Është e pamundur nga ana jonë t’i parandalojmë këto ngjarje,” – shprehet ai, duke shtuar se patrullat e pakta shpesh orientohen më shumë drejt kontrolleve formale në trafik, si vendosja e gjobave apo dokumentimi me foto dhe video, sesa drejt parandalimit real të rrezikut. Punonjësi i policisë pretendon gjithashtu se në disa raste ekzistojnë kufizime të brendshme për ndalimin e mjeteve, çka, sipas tij, i vendos efektivët në një pozitë të vështirë përballë shkelësve të ligjit. Ai shton se shpesh drejtuesit e mjeteve kundërshtojnë kontrollet, ndërsa disa prej tyre, sipas pretendimit të tij, gëzojnë mbështetje nga persona me ndikim në kupolën drejtuese. “Nëse nuk ke ‘mbështetje’, detyrohesh t’i lësh të vazhdojnë,” – thuhet në mesazhin e tij, ku pretendon edhe për raste transferimesh të shpeshta si pasojë e përplasjeve me persona të lidhur me drejtues të strukturave. Në denoncimin e tij, efektivi përmend edhe mungesën e kushteve logjistike dhe kufizimet për patrullim, duke theksuar se kjo ndikon drejtpërdrejt në aftësinë për të ushtruar kontroll efektiv në terren. Ai përshkruan një situatë ku, sipas tij, policët ndodhen “mes dy zjarreve”: presionit të brendshëm dhe mosrespektimit nga një pjesë e drejtuesve të mjeteve. Ky reagim lidhet drejtpërdrejt me klimën e krijuar pas aksidentit tragjik në Durrës, ku dy fëmijë humbën jetën pasi u përplasën nga një automjet i drejtuar nga një 57-vjeçar, i cili rezultoi në gjendje të dehur. Ngjarja ka nxitur reagime të forta dhe ka rikthyer në vëmendje problematikat e sigurisë rrugore dhe funksionimit të strukturave përgjegjëse. Paralelisht, edhe banorë të zonës ku ndodhi aksidenti kanë denoncuar më herët probleme të vazhdueshme, duke pretenduar se rrugët e lagjes përdoren për gara të paligjshme gjatë natës dhe se kërkesat për ndërhyrje nuk janë marrë në konsideratë. Ngjarje të tilla tragjike rikthejnë gjithmonë të njëjtën pyetje thelbësore: a po funksionon sistemi për të parandaluar, apo vetëm për të reaguar pasi ndodh e keqja? Denoncimi i plotë i punonjësit të policisë: Pershendetje JOQ jam nje punonjes policie dhe marr shkas nga ngjarja e dhimbshme e durresit tju shkruaj. Eshte e pamundur nga ana jone ti parandalojme kto lloj ngjarjesh pasi kemi shume mungesa ne organike dhe ato pak patrulla qe dalin na kerkojne neper kryqezime tu bo foto dhe vidjo duke ndihmuar trafikun dhe duke marre masa gjobash pa fund. Edhe ato pak raste qe ndalojme ndonje mjet per kontroll na kthehen shoferet duke na kerkuar llogari pse i kemi ndaluar dhe s keni arsye pse na ndaloni (nisur dhe nga urdheri i drejtorit per mosndalimin e mjeteve) kur jane ne kundravajtje me ligjin. Ne qe nuk i kemi shpatullat e ngrohta detyrohemi qe ti lem te vazhdojne pasi shumica e tyre jane te lidhur me shefat dhe drejtoret. Eshte e pamundur ti parandalojme pasi nuk kemi mjete, nuk kemi kushte, na i kufizojne levizjet per patrullim dhe kilometrat e bera se u ben presion koncensionari, na kerkojne 24 ore ne trafik ne cfare do lloj strukture qe jemi dhe pervec ksaj jemi midis 2 zjarreve, nga njera ane shefat qe nuk e kane problem fare me te transfaruar nga ana tjeter shoferat e marrosur qe nuk pyesin fare per ne pasi hane e pine me shefat perdit. Edhe nje here iu kerkoj falje ne emer te re gjithe kolegeve familjareve te femijeve te ndjere por qe pa u rregulluar kjo gje mos prisni te parandalohen kto situata.
Salla e Kuvendit, aty ku ligjet shpesh mbulohen nga pluhuri dhe ku siguria e qytetarëve peshohet me vota, sot u përmbyt nga një "ndjeshmëri" e papritur. Seanca plenare nisi me një minutë heshtje dhe me kokë të ulura për dy fëmijët e mitur që humbën jetën në tragjedinë e Durrësit. "Engjëjt u prehshin në paqe," u shpreh zv.kryeparlamentarja Klodjana Spahiu me një zë që kërkonte solemnitetin, ndërsa kolegët e saj rreth e rrotull "nxorrën shamitë" për të fshirë lotët që, çuditërisht, u rrodhën vetëm pasi jeta e dy të miturve u këput në mes. Ky shfaqje emocionale do të ishte prekëse, nëse nuk do të vinte nga i njëjti institucion që ka injoruar me vite alarmet e banorëve për garat e çmendura të makinave dhe rrugët e shndërruara në pista vdekjeje. Është ironike, për të mos thënë cinike, që deputetët gjejnë forcën të qajnë për "engjëjt" në sallën me kondicioner, ndërkohë që jashtë atyre mureve, kërkesat e qytetarëve për ndërhyrje të policisë dhe masa sigurie janë trajtuar si bezdi elektorale. Lotët e derdhur sot në Kuvend kanë shijen e hidhur të lotëve të krokodilit. Ndërsa deputetët fshijnë sytë para kamerave, mbetet fakt se tragjedia ishte një kronikë e paralajmëruar nga banorët, të cilët deklaruan se policia dhe shteti nuk kishin marrë asnjë masë për garat që zhvilloheshin çdo natë në lagjen e viktimave. Nëse vërtet këta ligjvënës do të ndjenin peshën e tragjedisë, lotët do t'i kishin zëvendësuar me llogaridhënie për atë zinxhir dështimesh që i la fëmijët në mëshirën e shpejtësisë vdekjeprurëse. Por në teatrin e politikës shqiptare, është gjithmonë më e lehtë të mbash një minutë heshtje sesa të punosh një minutë për sigurinë; është më komode të lutesh që fëmijët të prehen në paqe, sesa t'u garantosh atyre paqen dhe jetën sa janë ende mbi këtë tokë.
Me dhimbje e lot, janë përcjellë për në banesën e fundit Enea Muçaj, 12 vjeç, dhe Klersi Nikolli, 10 vjeç, viktimat e aksidentit tragjik që tronditi Durrësin. Familjarë, të afërm dhe qytetarë të shumtë kanë marrë pjesë në ceremonitë mortore, duke i dhënë lamtumirën mes pikëllimit të thellë. Me lule dhe kurora në duar, kortezhet funebre janë shoqëruar në heshtje nga qindra njerëz, ndërsa atmosfera ka qenë e rënduar nga dhimbja për humbjen e dy jetëve të mitura. Ceremonitë janë zhvilluar në orare të ndryshme, në një ditë zie për komunitetin. Aksidenti ndodhi të dielën rreth orës 14:10 në lagjen nr.15 të Durrësit, kur tre fëmijë po luanin në trotuar dhe u përplasën nga një automjet. Autori i dyshuar, Nikoll Radaçi, 57 vjeç, është arrestuar nga policia dhe ka pranuar konsumimin e alkoolit, ndërsa familjarët e tij kanë kërkuar ndjesë publike për tragjedinë e rëndë.
Një ngjarje e rëndë është shënuar pasditen e së shtunës në Tiranë, në zonën e Oxhakut, ku një person është gjetur pa shenja jete brenda automjetit të tij. Burime për JOQ ALBANIA bëjnë me dije se viktima është taksisti 47-vjeçar, Uljan Kolgjegja. Dyshohet se ai ka pësuar një atak kardiak teksa ishte në timon, rreth orës 16:00–17:00. Mësohet se pak para ngjarjes, ai kishte qenë në gjendje të mirë shëndetësore dhe vijonte punën normalisht. Ai kishte transportuar një klient drejt Spitalit Pediatrik dhe, gjatë kthimit, pasi kishte ndaluar pranë zonës së Oxhakut, dyshohet se ka pësuar infarkt fatal. Në trupin e viktimës nuk janë konstatuar shenja dhune, çka përforcon pistën e një vdekjeje nga shkaqe natyrale. Lajmi për ndarjen e tij nga jeta ka tronditur të njohurit dhe miqtë të cilët e konsiderojnë Uljanin si një person të respektuar dhe të dashur i cili kohët e fundit e kishte marrë veten dhe punonte rregullisht. Kujtojmë se vite më parë, saktësisht në 2020, Kolgjegja ka qenë protagonist i një incidenti para Kryeministrisë, ku tentoi të vetëdigjej me benzinë pasi i ishte hequr patenta nga policia për shkelje rrugore. Ndërkohë ai ishte bërë i njohur edhe për deklaratat e tij publike dhe lidhjet shoqërore me persona të njohur, mes tyre edhe me Ervis Martinajn, të cilin e konsideronte si idhull. Këtë dashuri dhe respekt që kishte për Vis Martinajn dhe nipin e tij të vrarë, Brilant Martinaj, ai e kishte gdhendur me tatuazhe në trup duke theksuar lidhjen e fortë që kishte me ta.
Policia e Durrësit rezulton se ka “mbyllur sytë” ndaj shkeljeve të përsëritura të shoferit Nikoll Radaçi, i cili një ditë më parë shkaktoi aksidentin tragjik ku humbën jetën dy fëmijë dhe u plagos rëndë një i tretë. Dokumentet zyrtare tregojnë se 57-vjeçari kishte një histori të përsëritur shkeljesh në qarkullim, kryesisht tejkalim shpejtësie dhe parakalim të gabuar. Sipas Kodit Rrugor, në rast përsëritjeje të shkeljes së shpejtësisë brenda dy viteve, masa e pezullimit të lejes së drejtimit duhet të variojë nga 8 deri në 18 muaj. Megjithatë, në vitin 2022, kur ministër i Brendshëm ishte Bledi Çuçi dhe drejtor i Policisë së Durrësit Skënder Hita, i cili sot mban postin e Drejtorit të Përgjithshëm të Policisë së Shtetit, Radaçi është ndëshkuar sërish vetëm me pezullim 1-mujor, një masë që bie ndesh me parashikimet ligjore, duke ngritur pikëpyetje për zbatimin e ligjit nga Policia Rrugore e Durrësit. Ky trajtim i butë ndaj shkeljeve të përsëritura po shihet si një nga hallkat e dobëta të sistemit të kontrollit rrugor, ndërsa pas tragjedisë së rëndë janë pezulluar disa drejtues të lartë të Policisë në Durrës. Ngjarja ka rikthyer në vëmendje debatin për zbatimin selektiv të ligjit dhe pasojat që ai sjell në jetën e qytetarëve.
Një qytetare nga Durrësi ka denoncuar në redaksinë tonë një situatë problematike në zonën e Vollgës, ku sipas saj mungon ndërgjegjësimi dhe kontrolli nga autoritetet përkatëse. Ajo thotë se automjetet parkohen rregullisht mbi trotuare, duke zënë hapësirat e dedikuara për këmbësorët dhe duke vështirësuar lëvizjen e tyre. Sipas qytetares, kjo situatë vijon prej kohësh pa ndërhyrje, ndërsa mungesa e prezencës policore e përkeqëson edhe më tej problemin. Banorët kërkojnë masa konkrete dhe rritje të kontrolleve për të garantuar respektimin e rregullave dhe sigurinë e këmbësorëve në këtë zonë të frekuentuar të qytetit.
Detaje rrëqethëse kanë dalë nga aksidenti tragjik i ndodhur në Durrës, ku dy fëmijë humbën jetën dhe një tjetër mbeti i plagosur rëndë. Ngjarja bëhet edhe më e rëndë për shkak të historisë së dhimbshme familjare të njërit prej viktimave. Vogëlushi që humbi jetën ishte duke jetuar me të afërmit në Durrës, ndërsa prindërit ndodheshin në Itali, pasi babai i tij po përballej me një sëmundje të rëndë si kanceri dhe ishte atje për kurim. Ata kanë marrë lajmin tragjik në një nga momentet më të vështira të jetës së tyre. Mësohet se fëmija u përplas për vdekje pranë ambientit të familjes së tij, ndërsa po luante në zonën përreth banesës. Ndërkohë, viktima tjetër dhe i mituri i plagosur rëndë janë kushërinj të parë, çka e thellon edhe më shumë tragjedinë për familjen. Aksidenti ndodhi në lagjen nr. 15 të Durrësit, ku tre fëmijë të moshës 10-11 vjeç po luanin në trotuar, pranë shtëpive të tyre. Sipas informacioneve paraprake, drejtuesi i mjetit, Nikoll Radaçi, dyshohet se ishte në gjendje të dehur dhe ka humbur kontrollin, duke i përplasur. Si pasojë e goditjes së fortë, dy prej fëmijëve humbën jetën, ndërsa i treti vijon të luftojë për jetën në spital, në gjendje të rëndë. Ngjarja ka tronditur thellë opinionin publik dhe ka sjellë dhimbje të madhe në komunitetin e zonës, ndërsa autoritetet vijojnë hetimet për të zbardhur plotësisht rrethanat e kësaj tragjedie.
Detaje të reja kanë dalë në dritë nga aksidenti i rëndë i ndodhur në lagjen nr. 15 në Durrës, ku humbën jetën dy fëmijë dhe një tjetër mbeti i plagosur rëndë. Autori i ngjarjes është Nikoll Radaçi, i cili sipas informacioneve paraprake ishte në drejtimin e mjetit në momentin e përplasjes fatale. Sipas të dhënave, fëmijët ndodheshin duke luajtur në trotuar pranë banesave të tyre, kur automjeti i drejtuar nga Radaçi ka humbur kontrollin dhe i ka përplasur. Dyshohet se drejtuesi i mjetit ka qenë në gjendje të dehur në momentin e aksidentit, ndërsa i mituri tjetër vijon të jetë në gjendje të rëndë në spital. Banorë të zonës e përshkruajnë Radaçin si një person problematik, duke pretenduar se ai shpesh kryente manovra të rrezikshme me automjet dhe konsumonte alkool. Ndërkohë, policia vijon hetimet për të zbardhur plotësisht rrethanat e kësaj ngjarjeje tragjike që ka tronditur opinionin publik.
Detaje të reja dalin nga ngjarja e rëndë që ndodhi në lagjen “15 Tetori” në Fier, ku një 35-vjeçar mbeti i plagosur me thikë pas një konflikti për pagesën e qirasë. Eldi Gremi, pronar i një lavazhi në këtë zonë, është goditur me thikë nga një person, i cili dyshohet të jetë qiramarrësi i biznesit të tij. Ngjarja ka ndodhur rreth orës 11:40 të së dielës, kur Gremi ka kërkuar pagesën e borxhit të qirasë nga personi që kishte marrë lavazhin me qira. Pas përplasjes verbale, konflikti ka degjeneruar në dhunë dhe qiramarrësi ka goditur pronarin me thikë. Sipas njoftimi zyrtar, policia sqaron se ka identifikuar dhe shpallur në kërkim autorin e dyshuar 25-vjeçarin Albi Kajolli. I plagosuri është paraqitur menjëherë për ndihmë mjekësore në Spitalin Rajonal të Fierit, ku ka marrë trajtim dhe ndodhet jashtë rrezikut për jetën. Ndërkohë, autoritetet kanë nisur hetimet për zbardhjen e plotë të ngjarjes dhe identifikimin e autorit, i cili ka arritur të largohet nga vendi i ngjarjes. Policia e Fierit po punon intensivisht për të arrestuar personin që goditi 35-vjeçarin, ndërkohë që për motive të ngjarjes dyshohet se janë lidhur me problemet për pagesën e qirasë. *Në foto i plagosuri Eldi Gremi, pronari i lavazhit.
Në vitin 2020, një nga tenderët më të çuditshëm dhe më të diskutuar ka kaluar pa shumë vëmendje, ndërsa Shqipëria ishte e kapluar nga pandemia e COVID-19. Pasi kishte përfituar qindra miliona lekë nga tendera të shumtë, Nikolin Jaka, një emër tashmë i njohur në botën e biznesit, merr një tjetër “llokmë” të madhe: rreth 975 milionë lekë të vjetra pa TVSH. Por, për çfarë i merr këto para? Jo për të ndërtuar ndonjë infrastrukturë, por për t’u bërë kuzhinier në Spitalin e Vlorës. Ky tender, i shpallur më 12 mars 2020, kur të gjithë ishin të mbyllur në karantinë, kaloi pa asnjë lloj shqetësimi. Kompania fituese e këtij tenderi ishte “SORI-AL” SH.P.K., e cila drejtohet nga Alma Tafani, ish-bashkëshortja e Nikolin Jakës. Kompania e tij, me seli në Tiranë, ka fituar një kontratë për 4 vjet me një vlerë astronomike vetëm për të përgatitur dhe shpërndarë ushqimin për të sëmurët në spitalin e Vlorës. E çuditshmja është se stafi i mëparshëm i kuzhinierëve të spitalit është pushuar nga puna, duke lënë vend për kuzhinierët e Nikolin Jakës. A mund të ketë ndodhur ky vendim pa ndonjë ndikim të jashtëzakonshëm? Siç duket, kjo histori është vetëm një pjesë e një mozaiku më të gjerë. Kompania "SORI-AL" SH.P.K. ka përfituar dhjetëra milionë euro nga taksat e shqiptarëve gjatë periudhës 2014-2020, duke krijuar dyshime dhe shqetësime për transparencën dhe konkurrencën në proceset e tenderëve. Por, përfundimisht, Nikolin Jaka ka mbushur sërish xhepat, ndërsa populli mbetet i varfër dhe i pafuqishëm. Si gjithmonë, ai që fiton është ai që ka lidhje dhe mundësi, ndërsa të tjerët munden vetëm të shohin.
Një video që po qarkullon në rrjetet sociale ka magjepsur shumë përdorues, duke treguar një cjap që lahet dhe lundron me qetësi në ujërat e kristalta të Lumit të Shalës. Kjo pamje e mrekullueshme ka tërhequr vëmendjen e shumë njerëzve, duke i dhënë një mundësi të jashtëzakonshme për të parë natyrën në një mënyrë krejtësisht të papritur dhe të bukur. Ujërat e pastërta të lumit, të cilat janë të njohura për cilësinë e tyre të lartë, ofrojnë një habitat të përsosur për kafshët e egra. Ky moment i veçantë tregon se si natyra mund të krijojë pamje që nuk janë vetëm interesante, por edhe edukative, duke nxjerrë në pah rëndësinë e mbrojtjes së ekosistemeve të pastra. Lidhja e cjapit me ujërat e lumit të Shalës është një simbol i ekuilibrit të natyrës, që na kujton se si kafshët dhe mjedisi bashkëjetojnë në harmoni. Kjo video është bërë virale, duke zgjuar kuriozitetin dhe admirimin e të gjithëve për bukurinë e paprekur të kësaj zone. Ekspertët e mjedisit theksojnë rëndësinë e ruajtjes së vendeve si Lumi i Shalës, që ofrojnë një mundësi të shkëlqyer për biodiversitetin dhe për të krijuar mundësi të tilla për vizitorët që duan të përjetojnë natyrën në formën e saj më të pastër. Kjo video jo vetëm që është një dëshmi e pasurisë natyrore të Shqipërisë, por gjithashtu inkurajon çdo individ të kontribuojë për ruajtjen e mjedisit dhe natyrës.
Një 35-vjeçar ka mbetur i plagosur me thikë pas një sherri të ndodhur në një lavazh në lagjen “15 Tetori” në Fier. I riu, i identifikuar si Eldi Gremi, është paraqitur për ndihmë mjekësore në Spitalin Rajonal të Fierit rreth orës 11:40 dhe ndodhet jashtë rrezikut për jetën. Sipas informacioneve paraprake të Policisë, i riu dyshohet se është goditur me mjet prerës gjatë një konflikti që ka degraduar në dhunë fizike. Autori i dyshuar ende nuk është identifikuar dhe është larguar nga vendi i ngjarjes menjëherë pas incidentit. Shërbimet e Policisë së Shtetit po vijojnë hetimet për identifikimin dhe kapjen e autorit, si dhe për zbardhjen e plotë të rrethanave të ngjarjes. Autoritetet po punojnë gjithashtu për të kuptuar shkaqet që çuan në përshkallëzimin e konfliktit.
Një aksident tragjik ka ndodhur pak ditë më parë në aksin rrugor Librazhd–Elbasan, ku ka humbur jetën shtetasi kinez Li Jianhong. Sipas informacioneve paraprake, ai ishte një biznesmen i njohur dhe figurë me ndikim në fushën e investimeve dhe sportit në Kinë. Li Jianhong njihej si themelues i resortit të madh të skive “Silkroad Mountain” dhe president i grupit “Xinjiang Grand Scape”. Ai kishte ndërtuar një karrierë të suksesshme në biznes që pas vitit 1993, duke e kthyer kompaninë e tij në një korporatë me vlera qindra milionë dollarëshe, aktive në turizëm, telekomunikacion dhe investime. Përveç aktivitetit në biznes, ai ishte gjithashtu alpinist i njohur ndërkombëtarisht, duke përfunduar sfidën “Explorer’s Grand Slam”, që përfshin ngjitjen e shtatë majave më të larta në çdo kontinent dhe arritjen në të dy polet e Tokës. Autoritetet po vijojnë hetimet për të sqaruar shkaqet e aksidentit.
Një program i ri masteri në Universitetin e Exeter pritet të sjellë për herë të parë në Mbretërinë e Bashkuar një studim të dedikuar tërësisht magjisë dhe shkencave okulte. Ky program vjen në një kohë kur interesi publik për folklorin, praktikat mistike, leximin e tarotit dhe kristalet është në rritje. Sipas njoftimeve akademike, programi nuk synon të mësojë praktika magjie, por të analizojë historinë, zhvillimin dhe ndikimin kulturor të fenomeneve okulte në shoqëri. Studimet do të përfshijnë gjithashtu mënyrën se si këto besime kanë ndikuar në shkencë, kulturë dhe mendimin njerëzor ndër shekuj. University of Exeter thekson se ky kurs është pjesë e qasjes akademike ndërdisiplinore, duke trajtuar okultizmin si fenomen historik dhe social, dhe jo si praktikë e aftësive mbinatyrore.
Zbulime të reja shkencore mbi kometën ndëryjore 3I/Atlas kanë treguar praninë e ujit me përbërje të pazakontë, duke tërhequr vëmendjen e komunitetit shkencor. Sipas studimeve, kjo kometë është formuar në një mjedis shumë më të ftohtë se Sistemi Diellor dhe përmban një lloj uji me karakteristika të ndryshme nga ai që gjendet zakonisht në Tokë. Ndryshe nga uji i zakonshëm në Toka, i cili përbëhet nga një atom oksigjen dhe dy atome hidrogjeni, në kometën Atlas janë zbuluar molekula që përmbajnë edhe deuter, një formë më e rëndë e hidrogjenit me një proton dhe një neutron. Edhe pse ky “ujë i rëndë” ekziston në sasi shumë të vogla në Tokë, në këtë kometë ai është gjetur në përqendrime shumë më të larta, një fenomen i paprecedentë në studimet e deritanishme. Sipas astrofizikantëve, kometa mendohet të jetë formuar rreth 12 miliardë vite më parë, në fazat e hershme të Universi. Këto të dhëna sugjerojnë se kushtet e formimit të sistemeve planetare ndryshojnë ndjeshëm në hapësirë, duke sfiduar idenë se proceset që krijuan Sistemin Diellor janë universale.
Gjatë kontrolleve të zhvilluara në burgun e grave në Pogradec janë konstatuar dhe sekuestruar disa sende të ndaluara, mes të cilave edhe vibratorë. Burime bëjnë me dije se sendet janë gjetur gjatë verifikimeve rutinë të kryera nga administrata e institucionit. Burgu në fshatin Pojskë, pranë Pogradecit, është një strukturë relativisht e re, e hapur në vitin 2024 në kuadër të përpjekjeve për modernizimin e sistemit penitenciar në vend. Në këtë institucion janë transferuar gratë e dënuara dhe të paraburgosura që më parë qëndronin në burgun e “Ali Demit” në Tiranë. Aktualisht, në këtë burg ndodhen më pak se 100 gra. Objekti konsiderohet i sigurisë së zakonshme dhe ofron kushte të përmirësuara, në përputhje me standardet e reja për trajtimin dhe akomodimin e personave të dënuar.
Login
