Një fotografi e re e publikuar nga dosjet e Jeffrey Epstein ka rikthyer në vëmendje lidhjet e tij me disa nga figurat më të njohura. Fotoja tregon një darkë të vitit 2015, ku në të njëjtën tavolinë shihen themeluesi i Facebook, Mark Zuckerberg, shefi i SpaceX dhe Tesla, Elon Musk, si dhe bashkëthemeluesi i PayPal, Peter Thiel. Vetë Epstein, më vonë, u mburr se kjo mbledhje kishte qenë “e çmendur”.

Fotografia është publikuar si pjesë e dokumenteve të bëra publike nga Departamenti i Drejtësisë i Shteteve të Bashkuara. Sipas mediave britanike, imazhi ishte dërguar me email nga Epstein dret vetvetes më 3 gusht 2015, vetëm një ditë pasi ai kishte marrë pjesë në këtë darkë luksoze me titanët e teknologjisë. Po ashtu, Epstein kishte edhe një kopje të fotografisë të vendosur në kornizë në apartamentin e tij në Manhattan, çka tregon rëndësinë që ai i jepte këtij takimi.

Nga emailet e përfshira në dosje rezulton se darka ishte zhvilluar më 2 gusht 2015. Disa javë më vonë, në një email të datës 20 gusht 2015 drejtuar miliarderit Tom Pritzker, Epstein e përshkroi këtë takim si “të çmendur”. Ky përshkrim është rikthyer tani në qendër të vëmendjes, teksa rritet shqyrtimi publik mbi marrëdhëniet që financieri i diskredituar kishte me figura shumë të fuqishme nga bota e biznesit dhe teknologjisë.

Pas publikimit të këtyre dokumenteve, personat që përmenden në dosje kanë filluar të minimizojnë çdo lidhje me Epstein. Kjo ndodh ndërsa Departamenti i Drejtësisë ka bërë publikimin e më shumë se tre milionë dokumenteve që lidhen me rrjetin shoqëror dhe aktivitetet e tij, duke hedhur dritë mbi kontaktet e shumta që ai kishte me politikanë, biznesmenë dhe figura publike.

Megjithatë, është e rëndësishme të theksohet se shfaqja në fotografi apo dokumente nuk përbën provë të ndonjë shkeljeje apo përfshirjeje në veprimtari të paligjshme. Rasti i Elon Musk është një nga më të përfolurit, pasi emri i tij shfaqet disa herë në dosje, përfshirë edhe shkëmbime të mëparshme email-esh që sugjerojnë një marrëdhënie miqësore mes tij dhe Epstein disa vite para darkës së vitit 2015.

Pavarësisht këtyre zbulimeve, Musk, sot njeriu më i pasur në botë, ka mohuar vazhdimisht të ketë qenë i afërt me Epstein. Në një intervistë për Vanity Fair, ai deklaroi se nuk e njihte aq mire financiarin e ndjerë.

“Nuk më kujtohet ta kem prezantuar Epstein me askënd, sepse nuk e njoh aq mirë sa ta bëja këtë. Epstein është padyshim një njeri i çuditshëm dhe Zuckerberg nuk është një mik i imi”. Gjithashtu, më 31 janar, Musk reagoi edhe në platformën X, duke hedhur poshtë pretendimet se kishte marrë pjesë në tubime apo festa të Epstein. Ai shkroi se nuk ka qenë kurrë në asnjë festë të Epstein dhe se ka kërkuar vazhdimisht që ata që kanë kryer krime në bashkëpunim me të, të ndiqen penalisht.

Publikimi i kësaj fotografie dhe dokumenteve shoqëruese ka rihapur debatin mbi mënyrën sesi Jeffrey Epstein arriti të krijojë dhe ruajë lidhje me njerëz jashtëzakonisht të fuqishëm, edhe pas dënimeve dhe skandaleve që shoqëruan emrin e tij. Ndërkohë, opinioni publik vazhdon të kërkojë transparencë dhe sqarime më të plota mbi këto marrëdhënie, pa paragjykuar, por duke kërkuar përgjegjësi aty ku ka fakte.

Kreu i Partisë Demokratike Sali Berisha ka reaguar pas ngjarjes së sotme në Vlorë, ku u dhunua avokati i ish-presidentit Ilir Meta, Kujtim Cakrani.

Kryedemokrati shprehu se ngjarja ishte një “akt kriminal shtetëror të shëmtuar”, dhe theksoi se Cakrani është goditur pa asnjë shkak, por vetëm për shkak të detyrës së tij.

Postimi i plotë i Sali Berishës:

Dhunimi i Avokatit Kujtim Cakrani, një akt kriminal shtetëror i shëmtuar.

Të dashur miq, sot avokati i mirënjohur Kujtim Cakrani që sot është dhe avokati i ish-Presidentit dhe kryetarit të Partisë së Lirisë, Ilir Meta goditet shtazërisht pa asnjë shkak, por vetëm e vetëm për shkak të detyrës dhe shtrohet në spital me fraktura në kokë.

Partia Demokratike i uron shërim të shpejtë dhe të plotë Avokatit Kujtim Cakrani, dënon me forcën më të madhe këtë akt shtazor si një krim të shëmtuar të parapregatitur shtetëror të frymëzuar dhe sponsorizuar nga Edi Rama dhe organizata e tij kriminale dhe ju rikujton atyre se përgjegjësia direkte është e tyre dhe se drejtësia vonon por nuk harron.

Autoritetet franceze kanë arrestuar pesë persona pasi një gjyqtare dhe nëna e saj u rrëmbyen dhe u mbajtën peng për rreth 30 orë në një rast shpërblimi për kriptomonedha.

Katër burra dhe një grua u morën në paraburgim, tre gjatë natës dhe dy këtë mëngjes, tha prokurori i Lionit, Thierry Dran.

Arrestimet pasuan gjetjen e gjyqtares 35-vjeçare dhe nënës së saj 67-vjeçare në një garazh në rajonin juglindor të Drôme të premten në mëngjes. Të dyja u gjetën të plagosura.

Një burim pranë çështjes tha se dy nga të arrestuarit u gjetën duke u përpjekur të hipnin në një autobus që shkonte për në Spanjë. Autoritetet po vazhdonin hetimin e tyre për të dyshuar të tjerë të mundshëm, ndërsa një burim i dytë tha se gruaja që po mbahej është partnerja e njërit prej katër burrave.

Rrëmbimi shkaktoi një operacion masiv policor që përfshinte 160 oficerë pasi partnerja e gjyqtares mori një mesazh dhe një foto nga rrëmbyesit që kërkonin një shpërblim në kriptomonedha. Prokurori tha se sulmuesit kërcënuan se do t’i gjymtonin viktimat nëse shpërblimi nuk paguhej menjëherë.

Përfundimisht, dy gratë arritën të liroheshin dhe të kërkonin ndihmë duke trokitur në derën e garazhit. Një fqinj që dëgjoi zhurmën ndërhyri dhe hapi derën. Ato u shpëtuan të premten në mëngjes, pa u paguar asnjë shpërblim.

Zyrtarë të lartë të mbrojtjes izraelite i kanë paralajmëruar Shtetet e Bashkuara se programi iranian i raketave balistike përbën një kërcënim ekzistencial për Izraelin dhe se vendi është i gatshëm të veprojë i vetëm nëse e sheh të nevojshme.

Sipas burimeve të sigurisë të cituara nga Jerusalem Post, mesazhi i është përcjellë Uashingtonit gjatë javëve të fundit përmes disa kontakteve të nivelit të lartë. Në këto bisedime, pala izraelite ka paraqitur edhe skenarë operacionalë për goditjen e kapaciteteve dhe infrastrukturës së prodhimit të raketave të Iranit.

“U kemi thënë amerikanëve se do të godasim vetëm nëse Irani kalon vijën e kuqe që kemi vendosur për raketat balistike,” tha një burim i mbrojtjes, duke shtuar se Izraeli nuk mendon se ky prag është kaluar ende, por se zhvillimet brenda Iranit po monitorohen vazhdimisht.

Zyrtarët theksuan se Izraeli rezervon lirinë e plotë të veprimit dhe se nuk do të lejojë që Irani të rindërtojë sisteme strategjike armësh në një shkallë që rrezikon ekzistencën e vendit.

Një zyrtar i mbrojtjes e përshkroi momentin aktual si një “mundësi historike” për t’i dhënë një goditje të fortë infrastrukturës raketore iraniane dhe për të neutralizuar kërcënime aktive ndaj Izraelit dhe vendeve fqinje.

Gjatë bisedimeve të fundit, Izraeli ka paraqitur gjithashtu plane për të goditur objekte të tjera të lidhura me programin e raketave balistike të Iranit. Paralelisht, brenda qarqeve izraelite ka shqetësim se Donald Trump mund të zgjedhë një model goditjesh të kufizuara, të ngjashëm me operacionet amerikane kundër Houthi-ve në Jemen.

Sipas këtyre zyrtarëve, një qasje e tillë do të linte të paprekura kapacitetet kryesore të Iranit. “Frika është se ai mund të godasë disa objektiva, të shpallë sukses dhe të largohet, duke e lënë Izraelin të përballet me pasojat,” tha një tjetër burim ushtarak.

Në këtë kontekst, pritet që komandanti i ardhshëm i forcave ajrore izraelite, gjeneral brigade Omer Tishler, të shoqërojë kryeministrin Benjamin Netanyahu gjatë vizitës së tij të ardhshme në SHBA. Tishler do të përfaqësojë Shefin e Shtabit të Forcave të Armatosura izraelite, Eyal Zamir, në një kohë kur posti i atasheut ushtarak në Uashington është bosh.

11 persona plagosën si pasojë e bombardimeve ruse në distriktin Korabelnyi të Khersonit, njoftoi administrata ushtarake rajonale e qytetit në Telegram.

Sulmi ndodhi rreth orës 23:10, kur forcat ruse përdorën sisteme të shumëfishta lëshimi raketash. Dy nga gratë, 86 dhe 44 vjeç, u dërguan në spital, të tjerët morën kujdes mjekësor në vendngjarje.

Sipas raportimeve, në sulmet e mëtejshme ruse u plagosën edhe nëntë persona të tjerë në Kherson.

Forcat ruse sulmuan Ukrainën gjatë natës me 101 dronë, përfshirë rreth 70 dronë Shaheed, nga të cilët mbrojtja ajrore ukrainase rrëzoi ose çaktivizoi 69. Gjatë sulmeve u regjistruan 32 goditje në 13 vende të ndryshme, ndërsa mbeturinat e dronëve shkaktuan dëme të vogla edhe në zona të tjera.

Në qytetin e Odesës, forcat ruse goditën një strukturë industriale dhe dëmtuan dritaret e një ndërtese fetare, sipas guvernatorit rajonal Serhiy Lysak. Ai theksoi se dëmet në objektet industriale dhe banesat përreth ishin “minimale” dhe shërbimet publike po vepronin për t’i rikuperuar.

Gjithashtu është raportuar se gjatë sulmeve është goditur edhe rrjeti elektrik i Kievit, duke e lënë qytetin dy orë pa drita.

Policia e Vlorës ka dalë me një njoftim zyrtar në lidhje me dhunimin e Avokatit Kujtim Cakrani, duke zbardhur të tjera detaje nga ngjarja e ndodhur në një pikë karburanti të qytetit bregdetar.

Sipas “bluve” dyshohet se konflikti ka nisur në lidhje me mënyrën si ishte pozicionuar makina në karburant, ku pretendohej se kishte bllokuar mjete të tjera. Mandej konflikti verbal është përshkallëzuar, ku dy të rinjtë e kanë goditur avokatin fizikisht, duke i shkaktuar plagë në trup.

Policia thotë se ka identifikuar automjetin me të cilin janë larguar dy agresorët.

Më herët në një prononcim mediat avokati i ish-Presidentit Ilir Meta tha se është provokuar dhe është goditur nga pas, duke marrë dëmtime në kokë.

Sipas Cakranit ngjarja nuk lidhet me konflikte të mëparshme.

Në njoftimin e Policisë së Vlorës bëhet me dije: “Rreth orës 13:30, në rrugën Tranballkanike, pranë një karburanti, gjatë kohës që do furnizonte automjetin me karburant, shtetasi K.C., 55 vjeç, me profesion avokat, është përfshirë në një konflikt me dy persona ende të paidentifikuar.  Konflikti, që paraprakisht dyshohet se ka të bëjë me pozicionimin e automjetit në pikën e furnizimit dhe bllokimin e mjeteve të tjera, është përshkallëzuar, dhe dy personat ende të paidentifikuar e kanë goditur fizikisht shtetasin K.C., i cili po merr ndihmë mjekësore në spital. Nga veprimet e para hetimore është bërë e mundur identifikimi i automjetit me të cilin janë larguar dy shtetasit”.

Grupi hetimor, nën drejtimin e Prokurorisë, po punon për zbardhjen e plotë të rrethanave të ngjarjes, si dhe për identifikimin dhe kapjen e autorëve.

Avokati Kujtim Cakrani ka treguar për mediat momentet kur sipas tij u dhunua nga dy të rinj, pranë një pike karburanti në Vlorë. Cakrani rrëfen se dy personat, të cilët nuk i njeh, fillimisht e provokuan dhe më pas e goditën nga pas me një mjet prerës. Avokati i ish-Presidentit Ilir Meta bën me dije se ka marrë dëmtime në kokë, si pasojë e dhunës.

“Më kanë dhunuar dy të rinj që nuk i njihja dhe s’e kamë idenë përse, sepse më provokuan dhe më pas më goditën. Kaq është. Nuk mund të them më shumë, sepse nuk e di çfarë ka ndodhur. Ndodhi para një ore e pak në hyrje të qytetit. Po hyja në një pikë karburanti, kaluan aty, pasi më provokuan, dolën nga makina, dikush erdhi nga pas më goditi me mjet prerës, nuk e di me çfarë. Ndodhi në mënyrë të menjëhershme”, shprehet ai.

I pyetur nëse i njeh autorët, avokati i ish-Presidentit Ilir Meta shprehet: “Jo nuk i njihja. Ishin dy djem të rinj, mosha 25-30 diçka e tillë”.

“Kam 4-5 dëmtime në pjesën e pasme të kokës. Isha i papërgatitur sepse nuk është se kam konflikt me njeri. S’jam mirë, kam dhimbje koke”, shprehet ai nga shtrati i spitalit.

Presidenti i Ukrainës, Volodymyr Zelensky, ka deklaruar se Shtetet e Bashkuara u kanë vendosur Ukrainës dhe Rusisë një afat të ri për arritjen e një marrëveshjeje paqeje, duke propozuar që lufta të përfundojë deri në muajin qershor. Ai u tha gazetarëve se të dyja palët janë ftuar të marrin pjesë në një raund të ri bisedimesh javën e ardhshme.

Sipas Zelenskyt, administrata e presidentit amerikan Donald Trump “me shumë gjasë do të ushtrojë presion” mbi Ukrainën dhe Rusinë për t’i dhënë fund luftës deri në fillim të verës. “Ata thonë se duan që gjithçka të përfundojë deri në qershor,” tha ai. “Do të bëjnë gjithçka për ta mbyllur luftën dhe duan një kalendar të qartë për të gjitha ngjarjet.”

Zelensky shtoi se, nëse afati i ri i qershorit nuk respektohet, Uashingtoni ka gjasa të rrisë presionin ndaj të dyja palëve për të arritur një marrëveshje.

Para se të merrte detyrën, Donald Trump kishte premtuar se do ta “përfundonte luftën brenda 24 orësh”. Më vonë, i dërguari i tij special për Ukrainën, Keith Kellogg, sugjeroi se një marrëveshje mund të arrihej brenda 100 ditëve nga inaugurimi i Trumpit.

Pasi kjo nuk ndodhi, presidenti amerikan vendosi një afat të ri për arritjen e një marrëveshjeje në gusht të vitit të kaluar, i cili gjithashtu kaloi pa ndonjë përparim. Në dhjetor, Trump deklaroi se një draft-marrëveshje për përfundimin e luftës ishte pothuajse “95% gati”.

Këtë javë u zhvilluan në Abu Dhabi dy ditë bisedimesh paqeje të ndërmjetësuara nga SHBA-ja, por ato nuk sollën një përparim të dukshëm. Megjithatë, Kyrylo Budanov, kreu i zyrës presidenciale të Ukrainës, i cilësoi negociatat trepalëshe si “vërtet konstruktive”.

Zelenskyy tha të shtunën se administrata Trump po propozon që raundi i ardhshëm i bisedimeve trepalëshe të mbahet në SHBA, me shumë gjasë në Miami, brenda një jave. “Ne e kemi konfirmuar pjesëmarrjen tonë,” u shpreh ai.

Ai la të kuptohet se afati i ri i qershorit mund të lidhet me fushatën e zgjedhjeve afatmesme në SHBA. “Zgjedhjet [afatmesme] janë padyshim më të rëndësishme për ta [amerikanët]. Të mos jemi naivë,” tha Zelensky.

Në përfundim, ai theksoi: Nëse rusët janë vërtet të gatshëm ta përfundojnë luftën, atëherë është thelbësore të vendoset një afat.

41-vjeçarja kërkonte me çdo kushte të vendoste rekord, duke u bërë skiatorja më e vjetër alpine e cila fiton një medalje Olimpike. Kjo edhe pse 9 ditë më parë ajo pësoi një këputje ligamenti në gjurin e majtë. Mirëpo dëshira e madhe i ka kushtuar shtrenjtë pasi amerikania pësoi një dëmtim të frikshëm. Gjatë garës ajo fluturoi në ajër dhe u përplas keq në dëborë.

Ngjarja shkaktoi panik tek publiku, ndërsa gjatë transmetimit u dëgjuan britmat e dhimbjes. Mënjehrë personali mjekësor u afruar pranë saj dhe bëri të mundur transportimin në spital me helikopter.

Dokumente të reja të publikuara javën e kaluar në kuadër të dosjeve të Jeffrey Epstein zbulojnë se Princi Andrew kishte ftuar financierin amerikan, të akuzuar për krime seksuale, së bashku me një modele ruse për një darkë private në Buckingham Palace gjatë një vizite 4-ditore të Epstein në Londër.

Emailet e publikuara si pjesë e dosjeve të Epstein javën e kaluar zbulojnë se si financuesi pedofil punësoi një grua 26-vjeçare të quajtur Vera për të marrë pjesë në një darkë dhe e çoi atë në Pallat për një takim privat.

Ajo përshkruhet si “magjepsëse” dhe një “mike e shkëlqyer” në dokumentet e paraqitura. Qëndrimi i Epstein në Londër ndodhi dy muaj para se Andrew t’ia kthente nderin dhe të vizitonte pedofilin në Nju Jork . Zbulimi vjen pasi javën e kaluar u pretendua se Andrew ishte shënjestër e Rusisë duke përdorur kontaktet seksuale të Epstein për ta tërhequr atë.

Gruaja u shfaq për herë të parë në dosje kur u ftua në një darkë të Presidentit të atëhershëm të Afrikës së Jugut, Jacob Zuma, në Ritz London në vitin 2010. Më 4 mars, Mark Lloyd, një mik i Epsteinit i cili e ndihmoi të organizonte takime të profilit të lartë, i dërgoi një mesazh Verës duke i thënë: “Jeffrey më sugjeroi të të ftoja, pasi me siguri do t’i shtoje pak shkëlqim të vërtetë.”

Ajo u përgjigj, duke i thënë Lloyd se ndihej “e nderuar”, duke shtuar: “Unë jam nga Rusia dhe kam jetuar në Londër për dy vitet e fundit.” “Unë jam një modele, e përfaqësuar nga agjencia e modeleve Select.” Ajo vazhdoi të tregonte se kishte qenë modele për gjashtë vitet e fundit dhe kishte jetuar në Paris , Nju Jork, Barcelonë dhe Japoni.

Më vonë atë vit, Epstein i shkroi Andrew-t për ta prezantuar me të njëjtën grua. Andrew e pyeti se kush ishte ajo, dhe Epstein u përgjigj: “Një shoqe e shkëlqyer e imja. Shumë e bukur. Ajo është ish-gruaja ime e ardhshme.”

Orë më vonë, Andrew iu ankua Epsteinit: “Asnjë përgjigje nga ish-i yt i ardhshëm. I dërgova email këtë mëngjes, por dyshoj se kishte shkuar në emailin e saj të padëshiruar.” Epstein bëri shaka: “Pse? Po u dërgon mesazhe të padëshiruara rusëve të bukur.”

Pastaj ai i dha Andrew-t të dhënat e saj dhe tha se ajo “po priste telefonatën e tij”.

Tre muaj më vonë, në shtator 2010, njeriu i turpëruar i parave Epstein i dërgoi një email Andrew-t për t’i thënë se do ta takonte “nesër në mbrëmje për darkë”.

Andrew u përgjigj: “Shkëlqyeshëm! Ku dëshiron të shkosh — privatisht në BP apo në një dhomë private apo në një restorant?”

Epstein i dërgoi dikujt një email atë ditë për t’u mburrur: “Nesër do të ha darkë në Pallatin e Buckinghamit . Do të bashkohesh?”

Andrew i tha të nesërmen: “Sapo po largohem nga Skocia. Duhet të jem aty nga ora 18:00. Mund të darkojmë në Pallatin e Buckinghamit dhe të kemi shumë privatësi.”

Epstein u përgjigj: “psh, të lutem”.

Kur Andrew e pyeti se në çfarë ore do të mbërrinte dhe sa veta do të vinin, Epstein tha: “Dua kohë private me ty, megjithatë, jam këtu me Sarah Sue dhe Vera, nëse duhet t’i sjell.”

Andrew u përgjigj: “Po. Ka shumë hapësirë ​​këtu për të biseduar! Sillini”.

Epstein vazhdoi atë mbrëmje me: “Shtoni edhe një. [emri i redaktuar] Rumanisht shumë e lezetshme.”

Andrew u përgjigj: “S’ka problem.”

Detajet e takimit të Pallatit nuk janë përfshirë në email-e dhe nuk dihet nëse ai është zhvilluar. Por të nesërmen, Epstein i shkroi Andrew-t: “Shumë argëtim, më shumë më vonë.”

Andrew u përgjigj: “Po, të lutem!” Dhjetë minuta më vonë, Epstein i dërgoi një mesazh Andrew-t: “Anabell vjen në orën 5… a do të takohemi më herët, më vonë, kam disa ide, ngadalë, ngadalë.” Vera u pagua nga Epstein për ta vizituar atë në Londër dhe Paris.

Ai i kërkoi asaj: “Sillni miq rusë.”

Ajo i shkroi atij në një shkëmbim: “Jam mirë. Do të xhiroj një lajm për një nga kanalet televizive në Krasnoyarsk, nga jam.”

Më 10 mars 2010, Epstein i kishte kërkuar Lord Mandelsonit t’i bënte Verës një turne VIP në Parlament , duke shkruar: “Vera mund t’i kërkonte njërit prej bashkëpunëtorëve të tu ta nxirrte përreth.” Tre ditë më vonë ai i dërgoi një mesazh Mandelsonit me numrin e saj të telefonit. Më 29 shtator, ditën që Epstein u largua nga Londra, ai i shkroi përsëri Andrew-t për ta pyetur nëse ishte i lirë.

Andrew u përgjigj: “Mjerisht nuk mundem. Do të ha drekë me Princin Saudit dhe pastaj do të shkoj në firmën sekrete të inteligjencës. Do të jem i lirë nga ora 16:00 para se G [Ghislaine] të vijë tek unë në orën 17:00. A”.

Mbrëmë u pretendua se stafi i pallatit e përshkroi Andrew-n si “të paqëndrueshëm”, por Mbreti mendon se ai ende duhet të kujdeset për vëllain e tij. Madhëria e Tij beson se mund ta “përmbajë” Andrew-n duke e mbështetur financiarisht dhe duke e mbajtur në pasurinë Sandringham, thanë burime të brendshme. Një burim nga pallati tha: “Mbreti mendon se nuk ka zgjidhje tjetër përveçse të sigurojë jetesën për vëllain e tij, i cili do të financohet privatisht nga një pronë private.”

“Sa herë që është përpjekur të mbajë veten me mjete të pavarura, kjo i ka shkaktuar probleme më të mëdha.” “Shpresa është që e përmban atë.”/ The Sun

Avokati Kujtim Cakrani, i njohur edhe si përfaqësues ligjor i ish-Presidentit Ilir Meta, është dhunuar këtë të diel në qytetin e Vlorës.

Mësohet se ai është sulmuar nga disa persona në një pikë karburanti. Sipas informacioneve, konflikti ka ndodhur në momentin kur Cakrani ndodhej brenda automjetit të tij.

Rrethanat e plota të ngjarjes mbeten ende të paqarta, ndërsa autoritetet po punojnë për zbardhjen e saj.

Menjëherë pas incidentit, avokati është transportuar në spital, ku ka marrë ndihmë mjekësore për disa plagë të pësuara gjatë përplasjes.

Dyshohet se konflikti mund të ketë lidhje me çështje të mëparshme profesionale të Cakranit, por ky është një element që pritet të konfirmohet nga hetimet. Autoritetet nuk kanë dhënë ende një reagim zyrtar mbi ngjarjen.

Një 27-vjeçar nga Kosova i identifikuar si Dugagjin Berisha ka përfunduar në prangat e Policisë së Tiranës, që ka goditur një tjetër rast të trafikimit të armëve nga Kosova në drejtim të Shqipërisë.

Në kuadër të operacionit “Barriera” u sekuestruan 12 armë zjarri dhe municion luftarak, që dyshohet se do të shiteshin në Fresk.

Mësohet se një pistoletë shitej me çmime që arrinin nga 700 deri në 1000 euro copa.

“Specialistët për Hetimin e Krimeve të Komisariatit të Policisë Nr. 4, në bashkëpunim me Forcën Operacionale të DVP Tiranë, në drejtimin e Prokurorisë së Tiranës, në kuadër të fokusit për parandalimin dhe goditjen e trafikimit të armëve të zjarrit dhe bazuar në informacionet e grumbulluara, si rezultat i hetimeve të kryera me metoda proaktive, disa javore, kanë finalizuar operacioni i koduar “Barriera”.  Në kuadër të këtij operacioni u bë arrestimi në flagrancë i shtetasit D. B., 27 vjeç, banues në Kosovë”, thuhet në njoftim.

“Gjatë operacionit në dalje të Unazës së Madhe, pranë mbikalimit të Tufinës, shërbimet e Policisë kanë  lokalizuar mjetin e dyshuar dhe kanë ndërhyrë duke e ndaluar atë. Gjatë kontrollit të automjetit tip “Volswagen” me drejtues 27-vjeçarin, konkretisht nën kofanon e tij janë gjetur dhe sekuestruar 10 armë zjarri pistoleta Glock me municion luftarak. Po në kuadër të këtij procedimi janë sekuestruar dhe dy pistoleta të tjera glock, gjithsej 12 pistoleta. Nga hetimet ka rezultuar se 27-vjeçari do i shiste armët në zonën e Freskut” , vijon njoftimi.

Materialet procedurale iu referuan Prokurorisë, për veprime të mëtejshme.

Kryeministri Edi Rama komentoi këtë të diel në podcastin “Flasim” vendimin e Gjykatës Kushtetuese për zv/kryeministren Belinda Balluku, duke u shprehur se beteja do të vazhdojë.

Kësaj deklarata iu përgjigj lideri i PD-së, Sali Berisha, i cili tha se Rama nuk do e zbatojë vendimin e GJK-së për Ballukun dhe bëri edhe njëherë thirrje për protestën e tretë kombëtare të martën e 10 shkurtit.

Deklarata e plotë e Berishës:

Të dashur qytetare dhe qytetarë, sot në monologun të dielës, Edi Rama në panik dhe i fantaksur, o zotua para jush në mënyrën më të papërgjegjshme se ai nuk do të përfillë vendimin e Gjykatës Kushtetuese, mbasi sipas tij, nuk ka ndodhur kurrë që një ministër të pezullohet nga gjykatat.

Ky është një mashtrim i madh sa vetë Edi Rama. Në rajon, në Europë dhe në botë, gjykatat kanë pezulluar jo vetëm ministra, por edhe kryeministra.

Por në këtë vendim të Gjykatës Kushtetuese, ai nuk sheh një goditje për Lubi Ballukun, por sheh potencialin dhe mundësin e pezullimit të tij si kryehajduti i kombit nga gjykatat, mbasi siç e dini, Lubia i ka bërë të qartë atij, se do të të marrë me vete.

Sot në monologun e tij, ai kërcënoi dhe Europën, i tha se, alternativë e vetme për Shqipërinë në Europë, jemi ne hajdutët e mëdhenj, ne që asgjësojmë shtetin ligjor dhe nuk njohim ligj e as Kushtetutë.

Mirëpo nesër sipas mediave, ai është thirrur pikërisht për ti komunikuar vendimin që është marrë në rast se ky, pengon sistemin e drejtësisë dhe veprimtarinë e tij.

Dhe ky vendim, do të jetë mesa duket vendimi më i paprecedentë që është marrë ndonjëherë në BE, sepse është absolutisht i paprecedentë qëndrimi dhe vendimi i Edi Ramës, për të asgjësuar shtetin ligjor me një grusht shteti, brenda shtetit.

Në këtë kontekst, të dashur qytetarë dhe qytetare, ditën e martë, secili prej jush proteston, shpreh revoltën në kryengritjen paqësore të opozitës, jo vetëm për vete, por për fëmijët e tij, për Shqipërinë, dhe si asnjëherë tjetër, për të ardhmen evropiane të këtij vendi.

Ndaj dhe ju ftoj të marrim fatet në dorë të Shqipërisë, ti qëndrojmë ligjeve dhe kushtetutës së vendit, si rruga e vetme e integrimit të Shqipërisë në BE, si rruga e vetme për rivendosjen e shtetit ligjor, ligjit dhe kushtetutës në Shqipëri.

Një burrë nga Ohio akuzohet se ka kërcënuar me jetë zv.Presidentin e SHBA-ve JD Vance, njoftoi Departamenti amerikan i Drejtësisë.

I dyshuari, i identifikuar si Shannon Mathre, u arrestua nga agjentët e Shërbimit Sekret të SHBA. Ai i bëri kërcënimet përpara vizitës së planifikuar të zëvendëspresidentit në shtetin e tij Ohio.

Sipas padisë, ai tha se do të gjurmonte vendndodhjen e Vance dhe do të përdorte një pushkë M14 për ta vrarë atë.

Zv.Prokurori i Përgjithshëm Todd Blanche tha se arrestimi çoi gjithashtu në zbulimin se Mathre kishte në posedim materiale abuzimi seksual me fëmijë.

Nëse dënohet, Mathre përballet me deri në pesë vjet burg për akuzën e kërcënimit. Akuza për abuzim seksual me fëmijë mbart një dënim të mundshëm deri në 20 vjet.

Një shtetas rus, i dyshuar për të shtënat ndaj zyrtarit të lartë të inteligjencës ushtarake ruse Vladimir Alekseyev në Moskë, është arrestuar në Dubai dhe dorëzuar te autoritetet ruse, njofton shërbimi i sigurisë FSB.

Burime mediatike ruse bëjnë të ditur se i dyshuari, rreth të 60-ave, ishte arratisur në Emiratet e Bashkuara Arabe. Një bashkëpunëtor i dyshuar u arrestua në Moskë, ndërsa një tjetër u largua drejt Ukrainës, shkruan The Guardian.

Vladimir Alekseyev, zëvendësdrejtori i shërbimit rus të inteligjencës ushtarake GRU, u qëllua në një apartament në Moskë të premten dhe u dërgua në spital. Ai është nën sanksione perëndimore për rolin e dyshuar në sulme kibernetike.

Ministri i Jashtëm rus, Sergei Lavrov, e ka akuzuar Ukrainën për organizimin e sulmit. Deri më tani, autoritetet në Kievi nuk kanë komentuar lidhur me këtë rast.

Këtej Atlantikut, po bien ‘koka’ për shkak të zbulimeve mbi Jeffrey Epstein. Në Norvegji, një diplomat i njohur është pezulluar dhe është hapur një hetim policor ndaj një ish-kryeministri.

Në Mbretërinë e Bashkuar, ish-ambasadori në SHBA është shkarkuar; të martën ai dha dorëheqjen edhe nga Dhoma e Lordëve. Policia po shqyrton raportimet se ai ka ndarë me Epstein informacione të ndjeshme për tregun.

Andrew Mountbatten-Windsor, i njohur më parë si Princi Andrew, u zhvesh nga titujt mbretërorë dhe rezidenca e tij. Një organizatë bamirësie e themeluar nga ish-bashkëshortja e tij, Sarah Ferguson, ish-Dukesha e Jorkut, do të mbyllet për një kohë të pacaktuar pas publikimit të email-eve ku ajo e quante Epstein ‘një legjendë’ dhe ‘vëllai që gjithmonë kam dëshiruar të kisha’.

Por ndërsa klasa politike evropiane po përpiqet të pastrojë rrëmujën e saj dhe të përballet me turpin lidhur me lidhjet me të dënuarin për krime seksuale, pa dashje po nxjerr në pah diçka tjetër, mungesën krahasuese të llogaridhënies në SHBA.

Asnjë politikan i rëndësishëm nuk ka rënë. Pasojat kanë qenë të kufizuara. Rrethi është mbyllur për të mbrojtur figurat më të spikatura politike, emrat e të cilëve janë përmendur në dokumentet ligjore të publikuara.

Në Mbretërinë e Bashkuar, ish-ambasadori në SHBA Peter Mandelson, i cili ka thënë se gaboi kur i besoi Epstein pas dënimit të tij dhe kur vazhdoi shoqërinë me të, është kthyer në një barrë për kryeministrin britanik Keir Starmer. Edhe pse Starmer nuk e ka takuar kurrë Epstein, disa po kërkojnë dorëheqjen e tij për emërimin e Mandelsonit. Kryeministri kërkoi falje publikisht të enjten ndaj viktimave të Epstein.

‘Më vjen keq,’ tha Starmer. ‘Më vjen keq për atë që ju është bërë, më vjen keq që kaq shumë njerëz me pushtet ju zhgënjyen, më vjen keq që i besova gënjeshtrave të Mandelsonit dhe e emërova, dhe më vjen keq që edhe tani jeni të detyruar ta shihni këtë histori të shpaloset sërish në publik.’

Në SHBA historia është ndryshe. Partia Republikane e Donald Trumpit në masë të madhe ka shmangur vështrimin ose është rreshtuar në mbrojtje të presidentit, pavarësisht lidhjeve të dokumentuara të tij me Epstein dhe akuzave të tjera të paverifikuara që dolën javën e kaluar.

Trump ka mohuar çdo shkelje në lidhje me akuzat për Epstein, dhe nuk ka prova që ai ka marrë pjesë në operacionin e trafikimit të Epstein. Presidenti gjithashtu ka pohuar se ai dhe Epstein u ndanë vite më parë.

Sekretari i Tregtisë, Howard Lutnick, mbetet i paprekur në postin e tij në kabinet. Lutnick tha në një podcast vitin e kaluar se ishte aq i neveritur nga fqinji i tij Epstein në vitin 2005 sa u zotua të mos ishte më kurrë në të njëjtën dhomë me të. Por kur Departamenti i Drejtësisë publikoi më shumë se tre milionë faqe materiale lidhur me financierin e ndjerë amerikan të premten e kaluar, dolën email-e që sugjeronin një marrëdhënie më të afërt dhe se Lutnick e kishte takuar Epstein disa vite më vonë në një udhëtim në ishullin e tij në Karaibe. Një zëdhënës tha se sekretari i Tregtisë ‘ka pasur ndërveprime të kufizuara me zotin Epstein në prani të bashkëshortes së tij dhe nuk është akuzuar kurrë për shkelje.’ Deri tani nuk ka shenja se kjo ka ndikuar në pozicionin e tij në kabinetin e Trumpit.

Po ashtu, Goldman Sachs dhe drejtori i saj ekzekutiv David Solomon kanë qëndruar krah për krah me këshilltaren e përgjithshme të kompanisë, Kathryn Ruemmler, e cila prej muajsh është përballur me tituj të ashpër për lidhjet e saj me Epstein, përfshirë dhurata si një çantë Hermes me vlerë 9,400 dollarë dhe një trajtim spa në hotelin Four Seasons në Uashington. Solomon i tha Wall Street Journal disa javë më parë se Ruemmler, ish-këshilltare e Shtëpisë së Bardhë për Barack Obamën, ‘respektohet dhe admirohet gjerësisht në kompani.’

Ruemmler ka thënë se pendohet që ‘e kam njohur ndonjëherë dhe kam një ndjeshmëri të madhe për viktimat e krimeve të Epstein.’

Edhe Dr. Peter Attia, autor dhe studiues i njohur për jetëgjatësinë, kontribuues në CBS News, vazhdon detyrën pavarësisht paraqitjes së tij në shumë email-e me Epstein, ku diskutonin për anatominë femërore dhe për faktin se jeta e Epstein ishte ‘kaq e shfrenuar’. Në një email që publikoi në X, Attia kërkoi falje dhe tha se nuk ishte i përfshirë në asnjë aktivitet kriminal, se ndërveprimet e tij me Epstein nuk kishin lidhje me abuzimet apo shfrytëzimin seksual dhe se ai nuk kishte qenë kurrë në avionin apo ishullin e tij, as në festa seksuale.

Disa e shohin reagimin relativisht të kufizuar, në një arenë publike ku dikur mjaftonte tradhtia bashkëshortore apo edhe konsumimi i marihuanës për të shkatërruar një karrierë, si reflektim të standardeve të zbehura në epokën Trump, ku sjelljet e diskutueshme të vetë presidentit dhe polarizimi ekstrem kanë çuar në tolerancë më të madhe ndaj erës së skandalit. Ata përmendin emërimet në kabinet të ish-përfaqësuesit Matt Gaetz nga Florida dhe sekretarit të Mbrojtjes Pete Hegseth, të cilët dikur do të kishin qenë të paimagjinueshëm për shkak të akuzave për përfshirje në krime seksuale, të cilat të dy i kanë mohuar.

‘Një pjesë e kësaj lidhet me kaosin e përgjithshëm në këtë anë të oqeanit, ku ka një rrjedhë të pandërprerë skandalesh që burojnë nga 1600 Pennsylvania Avenue dhe Trump ka vendosur një ton sfidues të refuzimit për të pranuar dhe ndier turp,’ tha Norm Eisen, ish-ambasador amerikan në Çeki dhe kritik i njohur i Trumpit. ‘Ata që duhet të ndiejnë turp po mbyllen brenda.’

Është e vërtetë që disa figura amerikane të lidhura me Epstein janë detyruar të tërhiqen nga jeta publike. Mes tyre janë ish-sekretari i Thesarit Larry Summers, i cili tha se është ‘thellësisht i turpëruar për veprimet e mia dhe e kuptoj dhimbjen që kanë shkaktuar’, si dhe Brad Karp, kryetar i firmës ligjore Paul Weiss, i cili dha dorëheqjen duke thënë se është në interesin më të mirë të firmës. David Ross, ish-drejtor i Muzeut Whitney të Artit Amerikan, dha dorëheqjen këtë javë nga posti i tij në një shkollë arti në Manhattan dhe tha se ndiente turp që kishte rënë pre e gënjeshtrave të Epstein. Por për shumë nga elitat më të njohura që kanë qenë në kontakt me të dënuarin e ndjerë, përfshirë ish-këshilltarin e Trumpit Steve Bannon dhe miliarderin e teknologjisë Elon Musk, pasoja e vetme ka qenë dëmtimi i reputacionit.

‘Ajo që ka rëndësi nuk është publikimi i një pjese të dosjeve të Epstein, por ndjekja penale e atyre që kanë kryer krime të tmerrshme me Epstein,’ shkroi Musk në X. ‘Kur të ketë të paktën një arrestim, do të jetë bërë pak drejtësi. Në të kundërt, e gjithë kjo është performative. Asgjë tjetër veçse shpërqendrim.’

Bannon ka folur pak publikisht për marrëdhënien e tyre, por më parë ka kërkuar një hetim të pavarur mbi dosjet.

Bannon, një vizitor i shpeshtë në shtëpinë e Epstein në Nju Jork, po planifikonte një dokumentar për të rehabilituar imazhin e tij dhe madje po shkëmbente mesazhe për planifikimin e dokumentarit me Epstein ditën kur ai u arrestua në vitin 2019. Megjithatë, ka pak shenja të dukshme që skandali e ka prekur atë: Bannon vazhdon emisionin e tij ‘War Room’ në Rumble dhe komentet e tij politike mbulohen gjerësisht nga media.

Kjo qasje është në përputhje me stilin e Trumpit për të mos lëshuar asnjë centimetër.

‘Ne si amerikanë duhet të shikojmë veten në pasqyrë. Pse nuk po kemi të njëjtin reagim [si Evropa]?’ tha Rufus Gifford, ish-ambasador i emëruar nga Obama në Danimarkë. ‘Pa dyshim që mënyra si ka vepruar Trump ka filtruar në shoqërinë më të gjerë. Por mendoj se pyetja që duhet të bëjmë është nëse kjo ekzistonte edhe para Trumpit, dhe Trump është thjesht simptomë e një problemi më të madh.’/ Politico

Vokalisti dhe kantautori i grupit të njohur “3 Doors Down”, Brad Arnold ka ndërruar jetë në moshën 47-vjeçare pas një beteje me kancerin. Lajmi i hidhur u bë me dije nga grupi i rrokut përmes një postimi në platformën “X”.

“Ai do të na mungojë shumë dhe do të kujtohet përgjithmonë”, tha grupi muzikor përmes një deklarate.

Grupi është më i njohur për hitet e viteve 2000 si “Kryptonite”, “Here Without You”, dhe “When I’m Gone dhe Loser”.

Në maj të vitit 2025, Arnold njoftoi se ishte diagnostikuar me karcinomë e qelizave renale, një formë e kancerit të veshkave, që i kishte shkaktuar metastaza në mushkri.

Kryeministrja italiane Giorgia Meloni ka reaguar ashpër kundër incidenteve të shkaktuara dje në demonstratën e Milanos kundër Lojërave Olimpike. Kryetarja e qeverisë italiane i konsideroi protestuesit si “armiq të Italisë”.

“Armiqtë e Italisë po demonstrojnë kundër Lojërave Olimpike, duke bërë që imazhet të përfundojnë në televizionet e mbarë botën. Të tjerë prenë kabllot hekurudhore për të parandaluar nisjen e trenave. Edhe njëherë solidarizohem me policinë, qytetin e Milanos dhe të gjithë ata që shohin se puna e tyre u shkatërrua nga këto banda kriminelësh“, shkruan Meloni në rrjetet sociale.

Duke komentuar vendimin e Kushtetueses për Belinda Ballukun, kryeministri Edi Rama tha sot se me këtë brutalitet të rilegjitimuar vetë Presidenti mund të pezullohet nga një prokuror.

“Kështu që, ne do ta vazhdojmë këtë betejë, ku na thirri me pahir çartja antidemokratike e pezullimit të një anëtari qeverie dhe ku fatkeqësisht na mban akoma sot pafuqia e Gjykatës Kushtetuese për të marrë një vendim sa të thjeshtë, – është vendim shumë i thjeshtë se mjafton të marrësh shembull çdo vend të botës që do apo të gjithë vendet e botës bashkë dhe nuk do të gjesh dot një gjë të ngjashme, – por një vendim po aq dhe të nevojshëm për të mos e lënë Shqipërinë vendin e vetëm në planet, ku sot aktualisht me këtë brutalitet të rilegjitimuar nga kjo mosvendimmarrje vetë Presidenti i Republikës mund të pezullohet nga i pari prokuror që gdhihet me këtë ide në kokë”, tha Rama.

Kreu i qeverisë theksoi se lufta për drejtësi dhe për shtet ligjor demokratik, për Shqipërinë europiane në Bashkimin Europian, ka vetëm një garant, ende sot për sot, mua dhe këtë shumicë qeverisëse.

Kryeministri Edi Rama ka komentuar vendimin e Gjykatës Kushtetuese për lënien në fuqi të vendimit të GJKKO-së për pezullimin nga detyra të zv/kryeministren Belinda Balluku.

“Shënimi i fundit i ditës, por jo për nga rëndësia, është ai që lidhet me Gjykatën Kushtetuese, e cila nuk e ka gjetur dot forcën për të mos e lejuar rimarrjen peng të qeverisë së Shqipërisë me një mjet të paparë dhe të padëgjuar në botën demokratike, siç është pezullimi i një anëtari qeverie nga një prokuror dhe një gjykatës  në një seancë paraprake, pra pa filluar akoma gjyqi.

Kështu, Shqipëria bëhet për herë të dytë, në dy muaj, shembulli i parë i një budallallëku botëror sepse Gjykata Kushtetuese u mbyt me lugën e ujit të turbullt të tyre që Servantes në librin e tij të famshëm Don Kishoti i Mançës i quan arsyet e Mosarsyes. 

Por fakti është që mosvendimmarrja e Gjykatës Kushtetuese e kthen në fuqi pezullimin e ministers, e cila, që të jemi shumë të qartë, pavarësisht se qartësia është një luks dhe një luks i rrallë që mund ta kërkosh, por vështirë ta gjesh në turbullirën e 700 tenxhereve politike e mediatike, nuk akuzohet për korrupsion, as nga vetë prokurori që shpiku pezullimin e anëtarit të qeverisë me vendim të një seance të mbyllur të përgatitjes së një gjyqi. 

Sidoqoftë, zhbërja e kësaj shpikjeje 100% “Made in Albania” e drejtësisë së re dhe e drejtësisë ende të papjekur shqiptare, e cila nuk ka lidhje me rastin dhe çështjen konkrete po me një parim të panegociueshëm të demokracisë mbetet një domosdoshmëri për të rigarantuar pavarësinë ekzekutive  të parlamentit nga pushteti gjyqësor.

Kështu që, ne do ta vazhdojmë këtë betejë, ku na thirri me pahir çartja antidemokratike e pezullimit të një anëtari qeverie dhe ku fatkeqësisht na mban akoma sot pafuqia e Gjykatës Kushtetuese për të marrë një vendim sa të thjeshtë, – është vendim shumë i thjeshtë se mjafton të marrësh shembull çdo vend të botës që do apo të gjithë vendet e botës bashkë dhe nuk do të gjesh dot një gjë të ngjashme, – por një vendim po aq dhe të nevojshëm për të mos e lënë Shqipërinë vendin e vetëm në planet, ku sot aktualisht me këtë brutalitet të rilegjitimuar nga kjo mosvendimmarrje vetë Presidenti i Republikës mund të pezullohet nga i pari prokuror që gdhihet me këtë ide në kokë. 

Në ndërkohë, kam dhe diçka tjetër.

Kujtdo që ka vënë buzën në gaz apo ka nxjerrë gjuhën jashtë pas mosvendimit të Kushtetueses dhe e bën hosana dhe fërkon duart me kuturisjet e modës së re të arresteve pa gjyq, të cilat arritën një kulm të ri këtë javë me 30 e kusur fletë-arresti të prera nga një prokuror në Durrës, i cili në fakt nuk paraburgosi vetëm veten e vet, – se të gjitha çfarë kishte rreth e rrotull për një çështje që nuk përmbush asnjë kusht, zero, hiç nga ato që Këshilli i Europës dhe drejtësia demokratike përcakton si kushte të domosdoshme për arrestin, – i futi në një thes, – u them një gjë, – kush beson se përpjekja e natyrshme për shtetin ligjor e të gjithëve bashkë, e jona, qeveri, parlament, drejtësi, me të gjitha të përpjetat dhe të tatëpjetat e saj, arritjet dhe lajthitjet e drejtësisë së re, do të prodhojë ndonjëherë kosto për këtë shumicë qeverisëse, të cilat do ta kthejnë në punë mullirin e prishur të opozitave, gabon ditë dhe natë sepse nuk kupton atë që e kupton shumë qartë populli shqiptar, njeriu i zakonshëm i Shqipërisë. Lufta për drejtësi, për shtet ligjor demokratik, për Shqipërinë europiane në Bashkimin Europian, ka vetëm një garant, ende sot për sot, mua dhe këtë shumicë qeverisëse.

Kaq e thjeshtë është!”, tha Rama.