Agjencia Kombëtare e Shoqërisë së Informacionit (AKSHI) ka qenë një “minierë ari” për drejtuesit, sekserët apo edhe vetë biznesmenët, duke e kthyer institucionin “pararojë” të qeverisë në një gangrenë të madhe të fondeve publike.

Aksioni i SPAK në muajin dhjetor të vitit 2025, ka qenëi cunguar, pasi goditi një pjesë të personave të përfshirë.

Drejtoresha Mirlinda Karçanaj dhe zëvendësja e saj Hava Delibashi po hetohen me masën e sigurisë arrest shtëpie, ndërkohë që masë sigurie ka edhe zëvendësdrejtori i Policisë së Tiranës, Erion Ismaili, si dhe biznesmenët Ergys Agasi, Ermal Beqiri, Andis Papa, Gëzim Hoxha dhe Rogers Rryta.

A janë vetëm këta emra personat përgjegjës për zhvatjen e parave publike? A ka nonjë grup tjetër kriminal që ka vepruar te AKSHI?!

VoxNews ka siguruar informacione nga disa institucione se dy “pengjet” e dosjes së ASKHI-t, ish-nëndrejtori Daniel Shima dhe biznesmeni Gerond Meçe, po tentojnë me të gjitha mënyrat për të pastruar paratë që zhvatën nga tenderat. Të dy, bashkë ose veç e veç, kanë krijuar një rrjet kompanish, duke xhiruar sa te njëra e te tjetra dhjetëra miliona euro.

Para, gjatë apo pas aksionit të SPAK-ut, Shima dhe Meçe kanë krijuar kompani të reja, kanë bërë transaksione, blenë e shitën prona, morën leje ndërtimi, kanë kryer blerje apo shitje kuotash si dhe akte dhurimi. Ka dyshime të forta se të gjitha këto veprime po bëhen me një qëllim; pastrimin e parave!

Skema e të dyve ka filluar pas sulmeve të hakerave iranianë, teksa qeveria vendosi që të përforcojë sigurinë dixhitale. Tre vitet e fundit, fondet e AKSHI-t janë dyfishuar, duke tenderuar mbi 100 milionë euro në vit.

Përfituesi më i madh i këtyre procedurave ka qenë payshim kompania “Advanced Business Solution”, me pronar Gerond Meçen, teksa Daniel Shima ka qenë nëndrejtor. Sipas të dhënave zyrtare, të hulumtuara nga redaksia jonë, ABS i Meçes ka përfituar vitet e fundit shifrën e frikshme të rreth 40 milionë eurove.

Aktualisht, aksionet e kësaj firme janë ende në emër të 75 vjeçares Shegush Meçe, e lindur në Elbasan dhe banuese në Tiranë. Një lëvizje për t’ia hedhur “fajin” nënës së tij të moshuar, teksa hetimet e Prokurorisë së Posaçme duhet të përqendroheshin te ABS dhe jo te “bijat” e tij. Por, hapja e kompanive apo edhe transaksionet nga njëra kompani në tjetër gjithmonë lënë gjurmë.

Nëse do të shohësh tenderat e AKSHI-t, Meçe konkuronte me ABS-në që ia kaloi nënës. Por, paralelisht, ai hapi edhe një tjetër kompani, të quajtur “Artificial Intelligence Business Solutions”, duke kaluar në këtë firmë dhjetëra miliona euro. Të dhënat që ka siguruar VoxNews flasin se nga ABS te AIBS, gjatë 5 viteve të fundit, kanë kaluar rreth 15 milionë euro.

Në qershor të muajit 2025, disa javë para se të merrej “peng” nga grupi i Beqirit dhe Agasit, Gerond Meçe do të deklaronte bilancin e kompanisë së dytë, AIBS. Ai shkruan në dokumente se ka dalë me një fitim prej 630 mijë eurosh, ndërkohë që ndau një divident në shumën e 1.7 milionë eurove, nga fitimet e mëparshme.

Të dhënat e tatimeve flasin se ajo kompani, megjithëse nuk fitonte tendera, xhironte dhjetëra miliona euro, me pretekste “punë IT-je”. Kalimet e këtyre pagesave nga njëra dorë në tjetrën, dyshohet se janë bërë për të pastruar paratë e tenderave të AKSHI-t, duke u xhiruar më pas në kompani të afërta me Meçen apo edhe me drejtuesit e AKSHI.

Informacionet e lartpërmendura janë nga disa burime dhe dokumente zyrtare. Në to shihet qartë se “pengu”, Gerond Meçe, ka lëvizur miliona euro. Hetimet e mëpasshme të Prokurorisë së Posaçme mund të zbulojnë shumëçka, nëse mes Meçes apo Shimës ka pasur lidhje, nëse ka persona të tjerë të përfshirë dhe ku përfunduan dhjetëra miliona euro, nga taksat e shqiptarëve./ Marrë nga “Voxnews“

Policia e Vlorës ka parandaluar një ngjarje të mundshme kriminale teksa ka sekuestruar dy automjete të vjedhura dhe lëndë djegëse.

“Më datë 08.02.2026, strukturat e hetimit të Drejtorisë Vendore të Policisë Vlorë, bazuar në informacione operative të siguruara më parë, kanë ushtruar kontrolle të imtësishme në aksin rrugor dhe në territorin e fshatit Babicë e Madhe, për dy automjete që dyshohej se do të përdoreshin për kryerjen e një ngjarjeje kriminale”, njofton policia.

Bëhet fjalë për:

-një automjet tip “Nissan”, me targa të huaja;

-një automjet tip “Audi Q5”, me targa të huaja; si dhe 3 bidona me lëndë djegëse (benzinë).

Nga veprimet e para hetimore dyshohet se këto automjete do të përdoreshin për kryerjen e një ngjarjeje të rëndë kriminale.

“Automjetet dhe provat e tjera të sekuestruara po i nënshtrohen ekzaminimeve shkencore.

Grupi i posaçëm hetimor i DVP Vlorë, nën drejtimin e Prokurorisë, vijon punën për sqarimin e plotë të rrethanave si dhe për identifikimin dhe dokumentimin e autorësisë”.

Sfida mes Liverpool dhe Manchester City dhuroi emocione të jashtëzakonshme deri në sekondat e fundit.

“Qytetarët” arritën të përmbysnin avantazhin e “Reds” falë golave të Bernardo Silvës dhe Erling Haaland në fund të takimit.

Megjithatë, heroi i vërtetë i mbrëmjes në “Anfield” ishte portieri italian Gianluigi Donnarumma.

Ai shpëtoi rezultatin në minutën e nëntë shtesë me një pritje të jashtëzakonshme ndaj MacAllister.

Reagimi i tij la të shtangur të gjithë të pranishmit, përfshirë edhe trajnerin Pep Guardiola. Tekniku spanjoll u kap nga kamerat duke imituar lëvizjet e portierit në mënyrë mjaft qesharake dhe është bërë viral në rrjetet sociale.

Manchester City mori tre pikë shumë të rëndësishme në “Anfield Road” duke mos lejuar Arsenalin kryesues të shkëputet më tej.

Biznesmeni Gjergji Fela është arrestuar nga policia ditën e sotme me kërkesë të Prokurorisë Tiranë pasi dyshohet se ka kryer shitje fiktive në vlerën totale 149,875,867 lekë, duke shkaktuar një dëm të përllogaritur ndaj buxhetit të shtetit në vlerën 62,670,861 lekë.

Biznesmeni i ndërtimit dyshohet se, mashtrimin me TVSH e ka kryer nëpërmjet firmës së tij “Dorina Fela”, të cilën e kishte vënë në emër të gruas.

Prokuroria njofton se këto veprime janë realizuar përmes deklarimeve të pavërteta dhe përdorimit të faturave fiktive, me qëllim krijimin e një skemë mashtruese fiskale, që synonte përfitimin e padrejtë të kreditimit të TVSH-së dhe uljen e bazës së tatueshme për Tatimin mbi Fitimin.

Njoftimi i plotë i Prokurorisë Tiranë:

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë u rrestua shtetasi Gj.F., i dyshuar për veprat penale ‘Krijimi i skemave mashtruese lidhur me tatimin mbi vlerën e shtuar (TVSH)’ dhe ‘Fshehje e të ardhurave’ parashikuar nga nenet 144/a dhe 180 të Kodit Penal.

Nga hetimet mbi procedimin penl nr.5787 të vitit 2024, në bashkëpunim të ngushtë me Drejtorin e Hetimit Tatimor, pranë Drejtorisë së Përgjithshme të Tatimeve (DPT) dhe Seksionin e Krimit Ekonomik në Policinë e Shtetit, rezultoi se subjekti tregtar ‘Dorina Fela’, ka kryer shitje të dyshuara fiktive në vlerën totale 149,875,867 lekë, duke shkaktuar një dëm të përllogaritur ndaj buxhetit të shtetit në vlerën 62,670,861 lekë.

Këto veprime janë realizuar përmes deklarimeve të pavërteta dhe përdorimit të faturave fiktive, me qëllim krijimin e një skemë mashtruese fiskale, që synonte përfitimin e padrejtë të kreditimit të TVSH-së dhe uljen e bazës së tatueshme për Tatimin mbi Fitimin, duke dëmtuar interesat financiare të shtetit.

Në kuadër të këtij procedimi penal, u ndalua shtetasi Gj.F., i dyshuar për përfshirje në kryerjen e veprimeve të paligjshme. Nga veprimet e deritanishme, rezultoi se ky shtetas ka pasur rol organizues dhe drejtues në këtë veprimtari, duke përdorur subjektin në emër të bashkëshortes së tij për realizimin e skemës mashtruese.

Hetimet vijojnë në drejtim të identifikimit të personave të tjerë të përfshirë, si dhe për dokumentimin e plotë të skemës mashtruese dhe pasojave financiare të saj.

Deputetët e Partisë së Lirisë  Erisa Xhixho  dhe Tedi Blushi  prezantuan sot në Komisionin e Jashtëm një nismë për sigurinë ushqimore, që synonte domosdoshmërinë e kryerjes së analizave laboratorike për ndotësit ushqimorë.

Sipas deputetes Xhixho, rritja e rasteve të evidentuara me ndotës kimikë dhe biologjikë në produktet ushqimore vendase dhe import, ka krijuar një situatë alarmante që kërkon ndërhyrje urgjente ligjore dhe institucionale.”Siguria ushqimore përbën një nga shtyllat kryesore të mbrojtjes së shëndetit publik dhe të sigurisë kombëtare. Rritja e vazhdueshme e rasteve të evidentuara me ndotës kimikë dhe biologjikë në produktet ushqimore, si në prodhimin vendas ashtu edhe në import, ka krijuar një situatë alarmante që kërkon ndërhyrje urgjente ligjore dhe institucionale. Produktet shqiptare që bllokohen, kthehen ose asgjësohen në vendet ku eksportohen janë vetëm maja e ajsbergut. Ato përfaqësojnë sinjalin alarmues që vjen nga autoritetet e huaja për cilësinë e produkteve që prodhohen në Shqipëri dhe që, për fat të keq, konsumohen çdo ditë nga qytetarët shqiptarë.

Në 2 vitet e fundit janë raportuar dhjetëra raste me produkte të kontaminuara dhe të rrezikshme për shëndetin publik. Ndër rastet më të rëndësishme të evidentuara janë: Refuzimi nga Kroacia i eksportit të specave shqiptarë për shkak të niveleve të larta të pesticideve, Mandarinat e kontaminuara të refuzuara nga Bashkimi Europian që përfunduan në tregun vendas, Konstatimi i luleshtrydheve me pesticide të ndaluara, Evidentimi në tregun shqiptar i peshkut të infektuar me parazitin Anisakis, Konstatimi i mishit të derrit dhe pulës të kontaminuar me salmonelë, Zbulimi i akulloreve me përmbajtje të oksidit të etilenit me rrezik kancerogjen, Bllokimi i pjeshkëve shqiptare nga Kroacia për shkak të niveleve të larta të nikelit, Prania e arsenikut te buka, raportuar në media vetëm pak ditë më parë, Prania e ndotësve biologjikë, kimikë dhe metalikë në zinxhirin ushqimor, përfshirë mykotoksinat në ushqimin për kafshë dhe produktet e bulmetit, përbën një kërcënim serioz për shëndetin e popullsisë dhe kërkon ndërhyrje të menjëhershme rregullatore.“, tha në prezantimin e projektligjit deputetja Xhixho.

Pavarësisht argumenteve të prezantuara në Komision, nism u rrëzua me 8 vota të socialistëve ndërsa mori vetëm 3 vota pro. Këtë votim, në rrjetet sociale Tedi Blushi e quajti votë në favor të ushqimeve pa kontroll.”Siguria ushqimore ndodhet në një alarm kombëtar, por Partia Socialiste votoi sot kundër mbrojtjes së shëndetit të qytetarëve shqiptarë.

Vota kundër projektligjit “Për Sigurinë Ushqimore”, të propozuar nga Grupi Parlamentar i  Partise se Lirise  është në thelb një votë në favor të ushqimeve të kontaminuara dhe të skaduara që hyjnë pa pengesë në vendin tonë, nga mishi me salmonelë i importuar nga Brazili, te mielli i ndotur nga Rusia, qumështi pluhur nga Serbia dhe produktet e skaduara që kanë përmbytur raftet e marketeve dhe përfundojnë çdo ditë në tryezat e familjeve shqiptare.

Kjo është një votë që mbron interesat e importuesve abuzivë dhe jo interesin publik; një votë që lejon helmimin e përditshëm të qytetarëve, duke rrezikuar veçanërisht shëndetin e fëmijëve.Siguria ushqimore nuk është dhe nuk duhet të jetë një lojë politike. Kush voton kundër saj, voton kundër jetës dhe shëndetit publik. Për këtë vendim, Partia Socialiste mban përgjegjësi të plotë politike dhe morale.“, shkruajti Tedi Blushi pas votimit.

RENEA në elitën botërore të forcave speciale në “SWAT Challenge Dubai 2026” me dy ekipe që përfaqësojnë Shqipërinë.

Nga data 7 deri më 11 shkurt, në Dubai po zhvillohet “SWAT Challenge Dubai 2026”, një nga kompeticionet më prestigjioze ndërkombëtare të forcave speciale, ku matin aftësitë njësitë më elitare nga e gjithë bota.

Për të pestin vit radhazi, Policia e Shtetit përfaqësohet në këtë arenë botërore nga Njësia Elite e Forcave Speciale RENEA, e cila këtë vit konkurron me dy ekipe, RENEA “A” dhe RENEA “B”, duke mbajtur lart emrin e Policisë së Shtetit dhe ngjyrat e flamurit kombëtar.

Sot, në ditën e tretë të garave, të dy ekipet RENEA po demonstrojnë nivel të lartë profesionalizmi, përgatitje intensive dhe standarde ndërkombëtare, në një kompeticion ku marrin pjesë rreth 50 shtete me 109 ekipe të forcave speciale botërore.

Një grup grabitësish të maskuar bllokuan autostradën që lidh Leccen me Brindisin në Itali dhe hodhën në erë një mjet të blinduar që transportonte para.

Ngjarja ndodhi mëngjesin e sotëm në autostradën A613.

Grabitësit ndaluan qarkullimin duke përdorur makina të kamufluara si automjete policie, me drita sinjalizuese të rreme, ndërsa vetë ishin veshur si agjentë sigurie të kompanisë që transportonte paratë.

Pamjet e publikuara nga mediat italiane tregojnë momentin kur mjeti i blinduar, ndalon papritmas në mes të rrugës. Në atë moment, autorët lëshojnë eksplozivin dhe largohen me shpejtësi.

Policia nisi një operacion të gjerë kërkimi në zonë. Pak më vonë, një Alfa Romeo, e përdorur gjatë grabitjes, u gjet e braktisur në një rrugë rurale.

Në afërsi të saj u ndalua një burrë i paarmatosur, ndërsa një person i dytë u arrestua më pas teksa tentonte të largohej në këmbë.

Ditën e nesërme, duke nisur nga ora 17:00, Partia Demokratike do të mbajë protestën e rradhës kombëtare.

Përmes një njoftimi për mediat, Policia e Shtetit thotë se, ka ndërmarrë të gjitha masat, në bazë të ligjit “Për tubimet”.

Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore, konkretisht:

• Nga ora 23:45 e ditës së sotme, do të bllokohet lëvizja dhe nuk do të lejohet parkimi i automjeteve deri në përfundim të tubimit, në bulevardin ”Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;
• Nga ora 15:00 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Në varësi të zhvillimit të tubimit, mund të ketë kufizime të qarkullimit të automjeteve edhe në akse të tjera rrugore. Në rast bllokimi, për të ndihmuar qytetarët që do të qarkullojnë në këto akse, Policia e Tiranës ka marrë masa për ta devijuar qarkullimin e automjeteve në rrugë alternative.

Policia e Tiranës apelon për qytetarët që të shmangin lëvizjen me automjete në akset rrugore që do të bllokohen dhe të përdorin rrugë alternative, për të mos penguar lëvizjen e lirë të pjesëmarrësve në tubim.

“Në kuadër të kontrolleve të dedikuara, të bazuara dhe në analizën e riskut, me qëllim parandalimin dhe goditjen e çdo paligjshmërie, shërbimet e Policisë Kufitare të Rinasit kanë evidentuar dhe goditur dy raste të mosdeklarimit të parave në pikën e kalimit kufitar.

Në vijim të veprimeve u procedua penalisht në gjendje të lirë shtetasi shqiptar D. Sh., 37 vjeç, rezident në Mbretërinë e Bashkuar, të cilit, gjatë kontrollit në vijën e dytë, iu gjetën 15,000 paundë, që synonte t’i fuste në territorin e Republikës së Shqipërisë pa i deklaruar, në kundërshtim me legjislacionin në fuqi.

Po ashtu, u procedua penalisht shtetasi A. Z., 32 vjeç, banues në Kamëz, të cilit, gjatë kontrollit në vijën e dytë, iu gjetën 11,370 euro, që synonte t’i nxirrte nga Republika e Shqipërisë pa i deklaruar, në kundërshtim me ligjin.

Kontrollet dhe verifikimet nga Policia Kufitare do të vijojnë në mënyrë të pandërprerë, me qëllim parandalimin e veprimtarive të paligjshme në kufi.

Materialet procedurale iu referuan Prokurorisë së Tiranës, për veprime të mëtejshme”, njofton policia.

Nuk ishte një nismë pa rezultat. Ministrat e jashtëm të Groenlandës dhe Danimarkës deklaruan se bisedimet diplomatike me Shtetet e Bashkuara kanë qenë në masë të madhe konstruktive, por kriza nuk ka marrë fund.

Ata paralajmërojnë se ende nuk ka një zgjidhje përfundimtare lidhur me kërcënimin që, sipas tyre, përbën mania e presidentit amerikan Donald Trump për marrjen nën kontroll të territorit autonom.

“Bisedimet ishin pozitive, por e ardhmja e Groenlandës, mbetet e paqartë. Ende nuk jemi aty ku duam të jemi. Rruga përpara është e gjatë dhe është ende herët për të thënë se ku do të përfundojmë”, u shpreh Vivian Motzfeldt, ministre e jashtme e Groenlandës.

Në të njëjtën linjë u shpreh edhe ministri i Jashtëm danez, Lars Løkke Rasmussen: “Nuk kemi dalë ende nga kjo situatë dhe nuk kemi një zgjidhje përfundimtare. Megjithatë, pozicioni ynë sot është shumë më i mirë krahasuar me disa javë më parë”.

Trump ka vijuar të shprehë publikisht dëshirën që Groenlanda t’i bashkohet SHBA-së, duke e justifikuar këtë me interesa të sigurisë kombëtare.

Megjithëse një traktat i vitit 1951 i lejon ushtrisë amerikane të krijojë dhe operojë baza ushtarake në Groenlandë, Trump ka argumentuar se mbrojtja e territorit mund të garantohet plotësisht vetëm nëse ai është në pronësi të SHBA-së, duke e quajtur këtë një hap “psikologjikisht të rëndësishëm”.

Ai pretendon se Kina dhe Rusia mund të përbëjnë një kërcënim për Groenlandën, veçanërisht me shkrirjen e akullnajave dhe hapjen e rrugëve të reja detare në Arktik, një vlerësim që Danimarka dhe aleatët e saj në NATO e hedhin poshtë.

Si rezultat i tensioneve, u krijua një grup pune i përbashkët mes Danimarkës, Groenlandës dhe SHBA-së, me qëllim zbutjen shqetësimeve amerikane për sigurinë.

Rasmussen konfirmoi se takimet e para tashmë kanë ndodhur dhe se bisedimet do të vazhdojnë.

Një moment i pazakontë është regjistruar gjatë transmetimit pas ndeshjes Juventus–Lazio në platformën DAZN.

Luciano Spalletti, teksa po fliste për temën e penalltive dhe konceptin e kontaktit në futbollin modern, surprizoi të pranishmit me një veprim të papritur gjatë intervistës live.

Gjatë bisedës me gazetaren Federica Zille, Spalletti u ndal te përkufizimi i kontaktit që mund të çojë në akordimin e një penalltie dhe, papritur, iu drejtua asaj me pyetjen: “A mund të të jap një puthje? Edhe ky është kontakt”, përpara se ta puthte lehtë në shpatull.

Gazetarja u shfaq fillimisht e habitur nga situata, por më pas reagoi me buzëqeshje.

Spalletti vijoi më tej, duke shtuar: “Po të përkëdhel? Edhe kjo është kontakt. Duhet të shohim se çfarë lloj kontakti është, apo nëse është një ndikim”, tha ai, duke e shoqëruar deklaratën me gjeste.

Apeli i GJKKO ka konfirmuar dënimin me 1 vit burg për kryebashkiakun e Rrogozhinës Edison Memolla.

Sakaq, nga ky moment bashkia e Rrogozhinës do të ngelet pa kryetar dhe sipas rregullit duhet të shkojë në zgjedhje të parakohshme.

Po ashtu Memollës do t’i ndalohet ushtrimi i funksioneve publike për 5 vite.

Kreu i PD-së, Sali Berisha deklaroi se kryeministri Edi Rama po ndëshkon vendin sa i takon rrugës së tij drejt integrimit në BE.

“Rama po shkon drejt fundit të merituar. Atij i komunikohet se qëndrimi është i pa pajtueshëm me shtetin ligjor dhe standardet europian e sa do të zhbëjë procesin e integrimit dhe kthimin e procesit në kushtet e 1992. Akt që nuk është marrë kurrë në histori ndaj një vendi.. Akt i cili nuk është ndërmarrë kurrë ndaj një vendi. Nuk është ndërmarrë pasi nuk ka ekzistuar dhe nuk ekziston në histori një rast i vlefshëm me Ramën dhe me lubi Ballukun. Ju rikujtoj një moment një prokurore speciale, e cila në dallim nga mashtrimet e Ramës, ka pezulluar jo një po disa ministra. Kur ajo përgatiti dosjen e pezullimit të kryeministrit rumun, ai e mori vesh dhe dha dorëheqjen.

Pezullim ministrash, siç ua kam faktuar këtu me emra dhe mbiemra, e data, kanë ndodhur me dhjetëra raste. Rama po mbron veten e tij dhe po ndëshkon Shqipërinë. Ai kërcënonte Europën se; ne jemi perspektiva europiane. Shqipëria nuk plotëson asnjë kush të procesit të integrimit në BE. Nuk k plotësuar dhe sukseset e Shqipërisë me Edi Ramën janë mashtrime të mëdha. Ajo plotëson kushtin gjeostrategjik. Garantoj partnerët tanë, BE, se PD ka objektivin e saj më madhor, integrimin e Shqipërisë në BE, por në një mënyrë tjetër, në rrugë tjetër. Asnjëherë në mashtrimin dhe lobimet mashtruese. Kurrë nuk kemi ndjekur rrugë tjetër, veç asaj të suksesit.”, tha ai.

Shkëlqim Hajdari ka marrë zyrtarisht detyrën si Prefekti i ri i Tiranës.

Në fjalën e tij të parë në këtë pozicion, Hajdari shprehu se i ka shërbyer shtetit për 35 vite dhe se busulla e tij do jetë vetëm ligji gjatë kohës së tij si Prefekt i Tiranës.

Ai shtoi se ky pozicion mund të jetë edhe i fundit për të ndaj dhe shprehu se dëshiron ta ushtrojë atë me dinjitet.Kjo frymë e ka bërë Tiranën një frymë të hapur për të gjithë ata që erdhën për të ndërtuar jetën këtu, duke e kthyer sot në një metropol. Sot dua të them të hapur, do të jem prefekt i të gjithëve, të çdo kujt që jeton në metropol pa dallime. Kjo sepse Tirana është e fortë vetëm kur banorët janë të bashkuar. Busulla ime do të jetë vetëm ligji. Kam mbi 35 vite që shërbej në shtetin shqiptar, por ky pozicion do të jetë më i dashuri ndoshta edhe i fundit. Pikërisht për këtë arsye dua të ushtroj me dinjitet e të lë gjurmë për mirë”, u shpreh Hajdari.

Inspektori i Lartë i Drejtësisë ka miratuar në Mbledhjen e Përgjithshme të Inspektorëve, më 30 janar 2026, planin e inspektimeve në prokurori e gjykata për vitin 2026.

Inspektimet tematike dhe institucionale do jenë edhe gjatë vitit 2026, instrumenti me të cilin Inspektori i Lartë i Drejtësisë mat eficencën e drejtësisë në vend, ndërsa këtë vit, në mënyrë të dedikuar, do të monitorojë edhe zbatimin e rekomandimeve të lëna nga inspektime të mëparshme.

Në Mbledhjen e Përgjithshme të Inspektorëve u paraqit analiza e të dhënave mbi llojin e pretendimeve të ankuesve, qytetarë apo institucione deri në dhjetor 2025, si dhe pretendimet e ankesave të trajtuara me vendimmarrje gjatë vitit 2025. Sipas të dhënave, pjesën më të madhe e zenë pretendimet për vendimmarrje të padrejta, pretendimet për zvarritje gjykimi, zvarritje të veprimtarisë hetimore dhe vonesa në dorëzimin e vendimeve gjyqësore.

Në Mbledhjen e Përgjithshme të Inspektorëve u evidentua se gjatë vitit 2025, sipas traditës, Inspektori i Lartë i Drejtësisë i ka dërguar kërkesa për tematika inspektimesh për planin e inspektimeve për vitin 2026, institucioneve të drejtësisë, Prokurorit të Përgjithshëm, Këshillit të Lartë Gjyqësor, Këshillit të Lartë të Prokurorisë, Ministrit të Drejtësisë dhe Dhomës Kombëtare të Avokatisë.

Në mbledhje u vlerësua angazhimi i tri institucioneve, që kanë përcjellë propozime për inspektimet tematike ose institucionale, konkretisht Prokurori i Përgjithshëm ka propozuar 2 tematika inspektimesh, Këshilli i Lartë i Prokurorisë, 4 tematika inspektimesh dhe Ministri i Drejtësisë 5 tematika inspektimesh.

Pas diskutimeve mbi të dhënat e ankesave të përcjella, të propozimeve të ardhura nga tri institucionet e drejtësisë, si dhe të prioriteteve të punës së ILD-së, edhe për shtrirje gjithëpërfshirëse gjeografike të inspektimit në gjykata e prokurori, Mbledhja e Përgjithshme e Inspektorëve miratoi gjithsej 9 inspektime për t’u realizuar gjatë vitit 2026, 8 inspektime tematike dhe 1 inspektim institucional. E veçanta këtë vit është miratimi i 2 inspektimeve tematike mbi ndjekjen e rekomandimeve të inspektimeve të mëparshme.

Nga trajtimi i ankesave të qytetarëve dhe institucioneve, kohëzgjatja e proceseve civile gjyqësore, shpallja dhe arsyetimi i vendimeve gjyqësore, respektimi i afateve të paraburgimit, trajtimi i referimeve dhe kallëzimeve penale ndaj punonjësit të policisë së shtetit dhe atij të burgjeve për keqtrajtim, kalendari i inspektimeve për vitin 2026 përmban:

• Inspektimi tematik “Mbi procedurën e shpalljes dhe arsyetimit të vendimeve gjyqësore”, do të kryhet në Gjykatën e Shkallës së Parë të Juridiksionit të Përgjithshëm Korçë për periudhën 01.04.2025-30.06.2025. Ky inspektim, propozim i Ministrit të Drejtësisë do realizohet në periudhën kohore 16.02.2026 – 30.09.2026.
• Inspektimi tematik “Trajtimi i referimeve dhe kallëzimeve penale ndaj punonjësve të policisë së shtetit dhe policisë së burgjeve për torturë, keqtrajtim, veprime arbitrare apo dhunë të çdo lloj forme” do kryhet në të gjitha zyrat e prokurorive në vend për periudhën 01.01.2025 – 31.12.2025. Inspektimi, propozim i Prokurorit të Përgjithshëm, do realizohet në periudhën 16.02.2026 – 02.12.2026.
• Inspektimi tematik “Mbi kohëzgjatjen e proceseve civile gjyqësore të përfunduara me palë kundërshtare”, do të realizohet në Gjykatën e Shkallës së Parë të Juridiksionit të Përgjithshëm Elbasan për periudhën 01.04.2025- 30.06.2025. Inspektimi, propozim i Ministrit të Drejtësisë do kryhet në periudhën kohore 16.02.2026 – 30.10.2026
• Inspektimi tematik “Respektimi i afateve të paraburgimit në kuadër të shuarjes së masave të sigurimit gjatë fazës së hetimit” do të kryhet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë për periudhën 2023-2025. Inspektimi, propozim i Këshillit të Lartë të Prokurorisë do kryhet në periudhën kohore 16.02.2026 – 30.10.2026
• Inspektimi tematik “Ndarja e çështjeve me short, si dhe kontrolli i raporteve të sistemit elektronik”, që do të realizohet për periudhën 01.01.2025-31.12.2025, në Gjykatat e Shkallës së Parë të Juridiksionit të Përgjithshëm Gjirokastër, Lezhë dhe Vlorë. Inspektimi pranë këtyre gjykatave do të kryhet në periudhën02.2026 – 10.12.2026.
• Inspektimi tematik “Mbi praktikën dhe shkaqet e zëvendësimit të prokurorëve” për periudhën 01.01.2025-31.12.2025. Inspektimi do të kryhet në të gjitha zyrat e prokurorive në periudhën 16.02.2026 – 21.12.2026.
• Inspektim institucional “Infrastruktura dhe qarkullimi i dokumentacionit”, do kryhet në Gjykatën e Apelit të Juridiksionit të Përgjithshëm për periudhën 01.04.2025 – 30.06.2025. Inspektimi do realizohet në periudhën 16.02.2026 -30.10.2026

Në mënyrë të posaçme gjatë vitit 2026 janë miratuar dy inspektime për ndjekjen e rekomandimeve të inspektimeve të mëparshme, konkretisht:

• Inspektim vijues tematik mbi ndjekjen e rekomandimeve të inspektimit tematik miratuar me raportin nr. 56/29, datë 29.12.2023 për “Lirimin me kusht” në të gjitha gjykatat dhe prokuroritë për periudhën16.02.2026 – 30.10.2026
• Inspektim vijues tematik mbi ndjekjen e rekomandimeve të inspektimeve tematike miratuar me raportet nr. 608/4, datë 22.04.2024 dhe nr. 2495, datë 09.09.2025 “Mbi caktimin e çështjeve me short në prokurori”, do të kryhet në të gjitha zyrat e prokurorive për periudhën 02.2026 – 31.07.2026. Inspektimi do të kryhet në periudhën 16.02.2026 – 30.09.2026.

Gjykata e Posaçme Kundër Korrupsionit dhe Krimit të Organizuar ka vendosur që të kaloj për gjykim çështjen në ngarkim të Erion Veliajt dhe 29 të tjerëve.

Vendimi, u dha në seancë paraprake nga gjyqtarja Etleva Deda.

Ky vendim vjen një vit pas arrestimit të kryebashkiakut të Tiranës.

Në vijim të informacionit paraprak të dhënë dje, për ngjarjen e ndodhur në rrugën Transballkanike, ku mbeti i dëmtuar shtetasi K. C., me profesion avokat, bëjmë me dije se nga puna intensive e kryer nga specialistët për Hetimin e Krimeve të Komisariatit të Policisë Vlorë, u bë i mundur identifikimi i njërit prej autorëve të dyshuar të kësaj ngjarjeje, shtetasit S. Xh., 40 vjeç, banues në Vlorë, i cili u shpall në kërkim për veprën  penale “Plagosja e rëndë me dashje”, kryer në bashkëpunim.

Vijon puna për lokalizimin dhe kapjen e shtetasit S. Xh. Ndërkohë, në drejtimin e Prokurorisë, vijojnë hetimet për zbardhjen e plotë të rrethanave të ngjarjes, identifikimin e të gjithë shtetasve të përfshirë dhe nxjerrjen e tyre përpara përgjegjësisë penale.

Shtetasi K. C. vijon të jetë në kujdeesin e mjekëve, jashtë rrezikut për jetën

Biznesmeni i njohur Ramë Geci është paraqitur mëngjesin e kësaj të hëne në ambientet e Prokurorisë së Posaçme Antikorrupsion (SPAK). Ai është parë duke hyrë në institucion pak minuta më parë, por ende nuk ka konfirmime zyrtare për arsyen e paraqitjes së tij.

Emri i Gecit është përfolur pak kohë më parë në lidhje me dosjen e zv/kryeministres së pezulluar Belinda Balluku, ku dokumentet tregojnë se ai ka pasur takime me Ballukun, dhe pas këtyre kontakteve, kompania e tij ka rezultuar fituese e një tenderi shtetëror.

Hetimet e SPAK pritet të zbulojnë nëse këto marrëdhënie kanë ndikuar në proceset e prokurimit dhe në dhënien e favoreve për biznesin e Gecit.

Këtë të hënë, 9 shkurt, është mbledhur në Kryesi që prej orës 10:00 grupi parlamentar i Partisë Socialiste.

I pranishëm ishte kreu i qeverisë, Edi Rama, dhe Belinda Balluku, e pezulluar nga detyra si ministre dhe zv.kryeministre, me vendim të GJKKO-së.

“3 konkluzione nga mbledhja e Grupit Parlamentar pas mosvendimit të Gjykatës Kushtetuese dhe rivendosjes së pezullimit të ministres nga :

1. Funksionet e padelegueshme kushtetuese, nga ai i anëtarit të qeverisë tek ai i Presidentit të Republikës dhe jo vetëm, nuk mund të pezullohen kurrësesi nga askush duke u nisur nga një emër përveçëm, sepse pezullimi paralizon funksionin, pra institucionin që ai/ajo drejton.
2. Nisur edhe nga leximi i deklaratës publike të Gjykatës Kushtetuese, ku të gjithë anëtarët e trupës shfaqen unanimë lidhur me problemin, po ndahen tek rrugëzgjidhja, grupi parlamentar socialist do të angazhohet për zgjidhjen përmes ndërhyrjes në legjislacion.
3. E vetmja palë e përmbushur nga rikthimi i pezullimit është SPAK-u, që në kushtet e pezullimit mund të vazhdojë krejt qetësisht hetimin përkatës, ndërkohë që deri në adresimin ligjor të zgjidhjes nuk ka asnjë urgjencë për të trajtuar kërkesën që SPAK-u bëri pas rënies së masës së pezullimit.

Një shtesë nga ana ime:

SPAK-u nuk preket, vetëm mbështetet. Liria dhe e drejta e çdo prokurori për të hetuar çfarëdoqoftë e këdoqoftë nuk preken, vetëm garantohen. Pavarësia kushtetuese e pushtetit legjislativ dhe ekzekutiv, gjithashtu nuk preken. Vetëm garantohen”, është ky postimi i kryeministrit fill pas mbledhjes.

Vlen të theksohet se vetëm 3 ditë më parë, Gjykata Kushtetuese nuk arriti dot të merrte një vendim lidhur me padinë e qeverisë për çështjen e Ballukut.

Ndarja 4 me 4 e gjyqtarëve, bëri që ankimimi të rrëzohej dhe të rikthehej në fuqi masa e “pezullimit nga detyra” për ministren e Infrastrukturës dhe Energjisë.

Teksa e cilësoi “shembull të një budallallëku botëror”, Rama e bëri të qartë se beteja ligjore për këtë rast do të vijojë, duke ritheksuar se “lajthitjet e drejësisë” kanë çuar në shifra alarmante sa i takon masave shtrënguese pa gjyq.

Kjo mbledhje, është e përjavshme, zhvillohet para vizitës së kryeministrit në Bruksel, ku pritet të takojë Antonio Costa-n, Presidentin e Këshillit Europian.