Pas rreth 10 orësh mbledhje, Gjykata Kushtetuese ka marrë vendimin mbi ankimimin e qeverisë ndaj vendimit të GJKKO, e cila pezulloi Belinda Ballukun nga detyra e zv/kryeministres dhe ministres së Infrastrukturës dhe Energjisë.

Katër anëtarë të Gjykatës Kushtetuese kanë vendosur pro pranimit të padisë së qeverisë, ndërsa katër anëtarët e tjerë kanë vendosur kundër ankimimit të qeverisë, çka le në fuqi pezullimin nga detyra për Ballukun.

Në vendimin e shpallur nga kryetarja e Gjykatës Kushtetuese Fiona Papajorgji rezulton se kërkesa nuk ka marrë korumin e votave pasi do duhej të ishin të paktën 5 gjyqtarë.

Kujtojmë se GJKKO, me kërkesë të SPAK, e pezulloi nga detyra zv/kryeministren Balluku në nëntor 2025.

Pas këtij vendimi, Këshilli i Ministrave e çoi çështjen në Gjykatën Kushtetuese, me argumentin se GJKKO ka shkelur kufirin e një tjetër pushteti, atij ekzekutiv duke marrë kompetencat e tij si kryeministër për pezullimin ose shkarkimin e një anëtari qeverie.

Nga ana tjetër, SPAK i është drejtuar edhe me një kërkesë Kuvendit, ku kërkon heqjen e imunitetit të Ballukut si deputete, dhënien e autorizimit dhe hapjen e rrugës për të dhënë një masë më të ashpër sigurie.

Mazhoranca priste pikërisht këtë vendim të Gjykatës Kushtetuese për të proceduar në Kuvend me çështjen e imunitetit të Ballukut.

Belinda Balluku është marrë e pandehur nha SPAK për shkelje në tenderin e Tunelit të Llogarasë dhe nën hetim për 7 procedura të tjera prokurorimi lidhur me ndërtimin e lotëve të Unazës së Madhe në Tiranë.

Ministri i Turizmit, Kulturës dhe Sporteve të Shqipërisë, Blendi Gonxhja, njoftoi përmes një postimi në rrjetet sociale emërimin e Arbër Minxhozit si Drejtor të Muzeut Kombëtar të Përgjimeve “Shtëpia me Gjethe”.

Sipas ministrit, eksperienca e Minxhozit fokusohet në zhvillimin e projekteve që afrojnë institucionet me publikun përmes komunikimit, edukimit dhe aktivizimit të hapësirave kulturore, me vëmendje të veçantë ndaj të rinjve, pjesëmarrjes qytetare dhe krijimit të modeleve funksionale që ndërtojnë vlera afatgjata.

“Me formim në administrim dhe menaxhim, përvojë të kombinuar në sektorin privat dhe publik, si dhe trajnim ndërkombëtar në lidership dhe qeverisje publike, përfshirë programe ekzekutive pranë Harvard Kennedy School, Arbër Minxhozi sjell një profil drejtuesi që ndërthur mendimin strategjik me një qasje bashkëkohore dhe të ndjeshme ndaj rolit të institucioneve kulturore.

Përvoja e tij profesionale është ndërtuar mbi zhvillimin e projekteve që afrojnë institucionet me publikun, përmes komunikimit, edukimit dhe aktivizimit të hapësirave kulturore, me një vëmendje të veçantë ndaj të rinjve, pjesëmarrjes qytetare dhe krijimit të modeleve funksionale që ndërtojnë vlera afatgjata.

Vizioni i platformës së përzgjedhur mes një procesi transparent për drejtimin e ri të Muzeut Kombëtar të Përgjimeve “Shtëpia me Gjethe” synon ta zhvillojë muzeun si një platformë aktive dijesh dhe përvoje, ku historia kuptohet dhe përjetohet përmes formateve edukative, workshopeve rinore, përdorimit të menduar të teknologjisë inovative dhe përvojave më interaktive për vizitorët, krahas rrjetëzimit e burimeve alternative të mbështetjes.

Qasja e tij synon forcimin e rolit të muzeut në jetën kulturore dhe turistike të qytetit, duke e pozicionuar “Shtëpinë me Gjethe” si një hapësirë ku edukimi, reflektimi historik dhe turizmi kulturor bashkohen në mënyrë natyrale dhe bashkëkohore.

I urojmë suksese Arbërit, duke falënderuar drejtoreshën Etleva Demollari që i le stafetën pas shumë viteve kontributi e drejtimi pozitiv!”, shkruan Gonxhja.

Dy shtetas anglezë nga qyteti i Jork-ut janë dënuar me burgim të përjetshëm për një grabitje grabitjeje të dhunshme që përfundoi me vrasjen e shqiptarit Indrit Mustafaj, 26 vjeç.

Michael Mulvana, 32 vjeç, dhe Jobie Tyers, 28 vjeç, nga Jorku, plagosën rëndë një grua në apartamentin e saj dhe shqiptarin që ndodhej me të.

Ai tentoi që të fshihej në një cep të dhomës, por autorët e goditën me hanxhar duke e lënë të vdekur.

Indrit Mustafaj ishte larguar nga Shqipëria që në moshë të re, pasi babai i tij ishte i sëmurë rëndë dhe i paaftë për punë. Kjo ishte arsyeja që Mustafaj kishte udhëtuar i vetëm drejt Anglisë me synimin për të punuar dhe për të dërguar para për prindërit dhe dy motrat e tij.

Artikulli i Plotë i “The Press”:

Viktima e një vrasjeje me hanxhar në një dhomë gjumi në New York kishte ardhur në Angli për të mbështetur familjen e tij, dëgjoi Gjykata e Kurorës në Leeds.

Babai i Indrit Mustafaj është shumë i sëmurë për të punuar, kështu që kur ishte ende adoleshent, Mustafaj udhëtoi i vetëm nga Shqipëria, vendi i tij i lindjes, për të gjetur punë në Mbretërinë e Bashkuar dhe për t’i dërguar para babait, nënës dhe dy motrave të tij.

Vdekja e tij i lë ata të shkatërruar financiarisht dhe emocionalisht, thanë ata në një deklaratë personale.

“Të gjithë zgjohemi me dhimbje dhe flemë me pyetje. Ndikimi tek ne është i pamatshëm. Ai ishte i sjellshëm, ishte i butë, ai ishte dashuria e jetës sonë,” thanë ata.

Ata thanë se Mustafaj nuk e pa më familjen e tij pasi u largua për në Angli. Iu deshën nëntë vjet për të mbledhur fonde shtesë për të paguar biletën e kthimit në shtëpi dhe ai po planifikonte t’i surprizonte me një vizitë kur u vra një muaj para ditëlindjes së tij të 27-të.

Lajmi për vdekjen e tij e tronditi aq shumë nënën e tij saqë ajo tani jeton në heshtje. Ata shtuan se nuk i urrejnë vrasësit e të dashurve të tyre, por duan drejtësi.

Gjykata e Kurorës së Leedsit dëgjoi se Mustafaj kishte udhëtuar çdo ditë për të paktën një javë nga Bradford në York, ku ndodhej në një dhomë gjumi në Rrugën Vyner pranë Rrugës Haxby.

Në apartament ai merrte telefonata, të cilave gruaja dhe një burrë nga Yorku u përgjigjeshin duke dalë nga apartamenti për t’u shitur drogë njerëzve në rrugë.

Ai gjithmonë kishte me vete një hanxhar, dhe ishte mbi shtratin në apartament kur vrasësit e tij, të armatosur me një levë, hynë me forcë. Ata përdorën armën e tij për ta vrarë, dëgjoi Gjykata e Kurorës së Leeds.

Duke folur pasi Michael Mulvana, 32 vjeç, dhe Jobie Tyers, 35 vjeç, u burgosën për vrasjen e tij, Kryeinspektori Fran Naughton tha se Mustafaj ndoshta e mbante me vete hanxharën e me qëllimin për ta përdorur atë për vetëmbrojtje, në rast të një sulmi si ky.

“Por duke pasur një thikë, potencialisht po e armatos sulmuesin tënd. Si detektivë, për fat të keq shohim njerëz që humbasin jetën në këtë mënyrë dhe gjithashtu shohim ndikimin në jetën e familjeve të tyre kur ata janë larguar. Të dyja këto pasoja janë të tmerrshme dhe tregojnë se sa e rrezikshme mund të jetë posedimi ose mbajtja e një thike,” thanë në gjykatë.

Gjykata Kushtetuese vijon mbledhjen e saj prej orës 11:00 për të shqyrtuar kërkesën e paraqitur nga qeveria lidhur me vendimin e Gjykatës së Posaçme Kundër Korrupsionit dhe Krimit të Organizuar (GJKKO), e cila në muajin nëntor 2025 vendosi pezullimin nga detyra të Belinda Ballukut, në cilësinë e zëvendëskryeministres dhe ministres së Infrastrukturës dhe Energjisë.

Vendimi i GJKKO-së për pezullimin e Ballukut u mor pas kërkesës së SPAK, pasi ajo u mor zyrtarisht e pandehur për dyshime mbi shkelje ligjore në procedurat e tenderimit për ndërtimin e tunelit të Llogarasë.

Kryeministri Edi Rama reagoi menjëherë ndaj këtij vendimi, duke e konsideruar atë si një tejkalim të kompetencave dhe ndërhyrje në pushtetin ekzekutiv.

Pikërisht mbi këtë argument, kreu i qeverisë iu drejtua Gjykatës Kushtetuese, duke kërkuar zgjidhjen e konfliktit institucional të krijuar mes Kryeministrisë dhe Këshillit të Ministrave, nga njëra anë, dhe GJKKO-së, nga ana tjetër, lidhur me të drejtën për pezullimin e një anëtari të kabinetit qeveritar. Seanca dëgjimore ku morën pjesë të gjitha palët u zhvillua më 22 janar.

Ndërkohë, SPAK ka ndërmarrë një tjetër hap procedural, duke i dërguar Kuvendit një kërkesë për heqjen e imunitetit parlamentar të Belinda Ballukut.

Prokuroria e Posaçme synon të marrë autorizimin e nevojshëm për vendosjen e një mase sigurie më të rëndë ndaj saj.

Qeveria ka firmosur vendimin e ndërtimit të centralit gjenerues të energjisë elektrike fotovoltaike dhe veprave ndihmëse, në Sheq-Marinas, Bashkia Fier.

Ndërtues i veprës do të jetë shoqëria “SOLEN ENERGY”, dhe kapaciteti i instaluar I centralit parashikohet të jetë 128megavat. Koha për ndërtimin në vendimin e qeverisë është caktuar brenda 36 muajve dhe vepra do të ketë lejë operimi për 49 vjet nga hyrja në fuqi e vendimit.

Po ashtu në vendimin e qeverisë është përcaktuar që ky prodhues do t’i japë falas, në formë royalty, ministrisë përgjegjëse për energjinë, sasinë e energjisë elektrike, në masën 2% të sasisë vjetore të prodhimit të energjisë elektrike ose konvertimin e saj në vlerë monetare.

VKM

V E N D I M PËR MIRATIMIN E NDËRTIMIT TË CENTRALIT GJENERUES TË ENERGJISË ELEKTRIKE FOTOVOLTAIKE DHE VEPRAVE NDIHMËSE, I CILI NUK ËSHTË OBJEKT KONCESIONI,  ME VENDNDODHJE NË SHEQ-MARINAS, BASHKIA FIER, QARKU FIER, NGA SHOQËRIA “SOLEN ENERGY”, SH.P.K.

Në mbështetje të nenit 100 të Kushtetutës dhe të pikës 1, të nenit 49, të  ligjit nr.43/2015, “Për sektorin e energjisë elektrike”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave

V E N D O S I:

1. Miratimin e ndërtimit të centralit gjenerues të energjisë elektrike fotovoltaike dhe veprave ndihmëse, i cili nuk është objekt koncesioni dhe nuk përfiton nga masat mbështetëse, me vendndodhje në Sheq-Marinas, Bashkia Fier, Qarku Fier, nga shoqëria “SOLEN ENERGY”, sh.p.k., me elementet, si më poshtë vijon:

a) Emri i aplikuesit: Shoqëria “SOLEN ENERGY”, sh.p.k.;

b) NIPT/NUIS: M31413007M;

c) Tipi i centralit: Fotovoltaik;

ç) Kapaciteti i instaluar: 128 MË;

d) Afati i pritshëm i vënies në punë dhe pajisja me leje ndërtimi: Koha për ndërtimin, pajisjen me lejen e ndërtimit dhe vënien në operim të impiantit fotovoltaik do të jetë brenda 36 (tridhjetë e gjashtë) muajve nga hyrja në fuqi e këtij vendimi;

dh) Vendndodhja e burimit gjenerues të energjisë: Në Sheq-Marinas, Bashkia Fier, Qarku Fier;

e) Afati i operimit: 49 (dyzet e nëntë) vjet nga hyrja në fuqi e këtij vendimi;

ë) Koordinatat e tokës dhe pozicioni i projektit, sipas aneksit 1 që i bashkëlidhet këtij vendimi;

f) Ministria e Infrastrukturës dhe Energjisë dhe Agjencia Kombëtare e Burimeve Natyrore kanë të drejtë të ushtrojnë mbikëqyrje të përgjithshme me afate 3-mujore gjatë realizimit, vënies në punë dhe operimit, me synim që të verifikojnë se ecuria e punimeve, cilësia, konformiteti dhe operimi janë në përputhje me programin e përgjithshëm të realizimit e të dokumentacionit të projektit;

g) Shoqëria “SOLEN ENERGY”, sh.p.k., ka detyrimin që:

i. të paraqesë periodikisht (çdo tre muaj), pranë Ministrisë së Infrastrukturës dhe Energjisë dhe Agjencisë Kombëtare të Burimeve Natyrore, informacion mbi ecurinë e ndërtimit të centralit fotovoltaik;

ii. të respektojë kushtet e cituara në lejet, licencat dhe autorizimet paraprake mjedisore, lëshuar nga institucionet përgjegjëse kombëtare;

iii. të dorëzojë sigurimin e kontratës, në masën jo më pak se 5% të vlerës së investimit, përpara nënshkrimit të kontratës ndërmjet shoqërisë “SOLEN ENERGY”, sh.p.k., dhe ministrisë. Në këtë kontratë përcaktohen të drejtat e detyrimet e palëve për realizimin e këtij projekti, penalitetet, në rast mosrealizimi, si dhe çështje të tjera që lidhen me zbatimin e saj;

iv. t’i japë falas, në formë royalty, ministrisë përgjegjëse për energjinë, sasinë e energjisë elektrike, në masën 2% të sasisë vjetore të prodhimit të energjisë elektrike ose konvertimin e saj në vlerë monetare. Në rast konvertimi në vlerë monetare, shuma duhet të derdhet tërësisht në buxhetin e shtetit;

v. të përmbushë kërkesën, sipas rastit, që një pjesë e prodhimit të burimit gjenerues të energjisë t’i shitet furnizuesit publik, sipas legjislacionit në fuqi.

2. Ngarkohen Ministria e Infrastrukturës dhe Energjisë dhe shoqëria “SOLEN ENERGY”, sh.p.k., për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

Surprizat këtë edicion të Big Brother VIP 5 nuk kanë fund, por Prime i kësaj të shtune pritet të sjellë emocione të forta.

Në shtëpinë më të famshme në Shqipëri do të futet edhe një herë tjetër, fituesi i Big Brother VIP 2, Luiz Ejlli.

“Big Brother është i paparashikueshëm. Luizi është akoma më i paparashikueshëm. As nuk përjashtohet dhe as nuk konfirmohet.”, do të deklaronte në një intervistë për Top Channel Kiara Tito, bashkëshortja e Ejllit.

Do të qëndrojë si lojtarët e tjerë apo do të jetë një vizitë e shkurtër?

Për më shumë ndiqni Big Brother Vip, të shtunën ora 21:00.

 

View this post on Instagram

 

A post shared by Top Channel (@topchannelalbania)

Një tentativë grabitjeje është regjistruar mbrëmjen e së premtes pranë një sporteli të Postës Shqiptare në lagjen Vasil Shanto në qytetin e Shkodrës.

Sipas të dhënave paraprake, një person i paidentifikuar është futur brenda ambienteve të filialit të Postës Shqiptare dhe ka tentuar të marrë me forcë një shumë monetare.

Përpjekja ka qenë e pasuksesshme dhe gjatë largimit autori ka thyer xhamin e sportelit.

Forcat policore kanë rrethuar zonën dhe kanë nisur hetimet për identifikimin dhe kapjen e autorit.

Njoftimi i Policisë:

Shkodër / Informacion paraprak

Rreth orës 19:00, në lagjen “Vasil Shanto”, një shtetas ende i paidentifikuar është futur brenda ambienteve të filialit të Postës Shqiptare dhe ka tentuar të marrë me forcë një shumë monetare, por nuk ka mundur ta marrë dhe gjatë largimit ka thyer xhamin e sportelit.

Shërbimet e Policisë kanë shkuar menjëherë në vendin e ngjarjes dhe vijojnë kontrollet në zonë për kapjen e tij.

Grupi hetimor, nën drejtimin e Prokurorisë, po punon për identifikimin e autorit dhe dokumentimin ligjor të rastit.

Nga Klodian Tomorri – Kapitali.al

Në fund të muajit nëntor, Bankers Petroleum nisi, përmes portit të Petroliferas në Vlorë, dy ngarkesat e radhës për eksport të naftës së nxjerrë nga fusha e Patos-Marinzës. Anijet, të cilat kishin në total një sasi prej mbi 200 mijë fuçi nafte, u shitën përmes një kompanie italiane brokerimi të quajtur Mercuria.

Sipas marrëveshjes, vlera e dakortësuar për shitjen e naftës ishte rreth 12 milionë dollarë dhe pagesa do të kryhej në dhjetor. Por paratë as nuk mbërritën në Shqipëri dhe as shkuan në llogarinë e Bankers në Vjenë. Ato u zhdukën në një llogari të fshehtë që nuk dihet se në cilin vend dhe bankë ndodhet.

Skandali plasi kur dikush nga punonjësit e Bankers i kërkoi brokerit italian dokumentat se ku ishin derdhur paratë e eksportit për të kontabilizuar transaksionin sipas ligjit. Përgjigja e Mercurias ishte se paratë u derdhën në një llogari të caktuar nga shefat kinezë të Bankersit në Fier. Këta ishin drejtori i përgjithshem i Bankers Luntao Chen dhe zvdrejtori, Zhang Fuguo.

Veprimtari kriminale

Marrëveshja e koncesionit i lejon kompanisë Bankers Petroleum që të hapë llogari dhe të lëvizë lirisht paratë nga shitja e naftës, kudo jashtë shtetit. Kjo është klauzola që Bankers ka shfrytëzuar për llogarinë e famshme të Vjenës.

Por hapja e një llogari jashtë nuk është pa kushte. Bankers ka detyrimin që të raportojë pranë AKBN-së dhe autoriteteve fiskale të Shqipërisë çdo llogari, në secilën bankë të botës, ku ajo pret pagesat e eksportit të naftës shqiptare. Dhe kjo jo pa qëllim.

Ligji fiskal e detyron kompaninë që të dokumentojë me faturat përkatëse çdo shpenzim apo lëvizje fondesh, që bën nga këto llogari sepse mbi bazën e këtyre dokumentave shteti shteti dokumenton bilancin e kompanisë dhe pjesën e fitimit që i takon të marrë.

Por në rastin e një llogarie sekrete, që nuk e di askush se ku është përveç kinezëve, shteti nuk ka asnjë mundësi të verifikojë se si janë shpenzuar paratë. Përtej kësaj, ky është një veprim i pakontabilizueshëm në bilanc.

Dërgimi i parave në një llogari të fshehtë është praktikisht shkelje e marrëveshjes së koncesionit, pasi kompania nuk sillet më si një koncesionar, që ka vetëm të drejtën e shfrytëzimit të një pasurie publike, por sillet si pronar i saj, që mund të fshehë paratë ku të dojë.

Së dyti, kjo është një veprimtari e kriminale financiare, e cila i nxjerr autoritetet fiskale të Shqipërisë tërësisht jashtë loje dhe me këtë edhe mundësinë e shtetit për të mbrojtur pjesën që i takon të marrë.

Por pjesa më e rëndë gjithë këtë histori është se ky veprim ka ndodhur pikërisht gjatë kohës që kompania ishte nën hetim nga SPAK dhe autoritetet kërkonin të mblidhnin miliarda lekë borxhe, që Bankers ka për të paguar në shtet.

Në fillim të muajit të kaluar, menjëherë pasi GJKKO miratoi zgjatjen edhe me tre muaj të hetimeve ndaj Bankers, SPAK i ka kërkuar kompanisë kineze të vërë në dispozicion lëvizjet e llogarisë në Vjenë dhe çdo dokument justifikues për cdo transaksion të kryer nga kjo llogari.

Nuk dihet nëse SPAK ka rënë në dijeni të 12 milionë eurove të zhdukura nga Bankers në llogarinë sekrete, gjatë muajit dhjetor. Por ky është një informacion që sigurohet shumë lehtësisht. Punonjësit e Bankers e dinë të gjithë. Kapitali e ka të verifikuar tashmë.

LEXO EDHE: Raiffeisen Bank fshehu paratë e Bankers, që shteti të mos mblidhte dot detyrimet

Kryetari i Partisë Demokratike Sali Berisha gjatë ‘Foltores’ me anëtarët e degëve 8 dhe 10 në Tiranë, u shpreh ndër të tjera se, Edi Rama po injoron ultimatumin e Brukselit për zhbërje të procesit të integrimit duke shtuar se 90% e shqiptarëve janë pro integrimit në familjen europiane.

Sipas Berishës, “Edi Rama nuk ka ku shkon më, tani ai absolutisht është, me gjithë ultimatumin që ka marrë, se jemi të gatshëm të ndërmarrim një proces që nuk e kemi ndërmarrë kurrë, të zhbëjmë procesin e integrimit, ai gjithë ditën duke punuar për vendimin që do dalë sonte. Ky është zhvillimi më i fundit dhe unë nuk kishte si ta injoroja këtë vendim”.

Kreu i PD shtoi më tej se, opozita është shpresa e vetme e vendit duke e konsideruar si një thirrje për çdo opozitar.

Pjesë nga fjala e Berishës:

Pra, shikoni se çfarë janë në gjendje të bëjnë këta ndaj nesh. Shikoni se këta nuk njohin asnjë kufi. Harrojnë që 90% e shqiptarëve, ëndrrën më të bukur e shohin në BE dhe nuk e kanë gabim sepse në këtë komunitet është faktuar se njerëzit bëhen më të lirë, njerëzit bëhen më të mëkëmbur, njerëzit bëjnë një jetë më të mirë. Kjo është e vërteta, ndaj dhe e duan me gjithë zemër.

Por, tani që vjen problemi që Edi Rama nuk ka ku shkon më, tani ai absolutisht është, me gjithë ultimatumin që ka marrë, se jemi të gatshëm të ndërmarrim një proces që nuk e kemi ndërmarrë kurrë, të zhbëjmë procesin e integrimit, ai gjithë ditën duke punuar për vendimin që do dalë sonte. Ky është zhvillimi më i fundit dhe unë nuk kishte si ta injoroja këtë vendim. Pra, është një thirrje e madhe për ne, dhe një gjë duhet t’u rikujtoj, në këtë situatë, shpresa e vetme jemi ne. Shpesh me të drejtë thonë: njerëzit nuk kanë shpresë, jo njerëzit janë pa shpresë, si t’ia bëjmë për shpresën. Prisni! U votua. Zgjedhjet nuk i fitoi kurrë Edi Rama. Ua them unë ju. Të mos gabojë njeri të mendojë se ka fituar zgjedhjet. Ka fituar farsën, po. Po farsat opozitat nuk i fitojnë kurrë. Farsat i fitojnë diktaturat.

Të ndalemi në këtë moment. Të japësh 2 miliardë euro, dy ditë para votimit, me të cilën ke falë gjoba dhe kamata për 210 mijë familje, zgjedhje nuk ka, të dashur miq. Të gjithë ata që kanë minimumin e kulturës elektorale, dhe kur them këtu kulturë elektorale, e them në kuptimin ligjor. Sepse secili nga ne duhet ta ketë të qartë, e drejta elektorale është një e drejtë e veçantë, tërësia e të cilës përbën rregullin e zgjedhjeve. Në qoftë se ti, dy ditë para zgjedhjeve, fal 2 miliardë euro për 200 mijë familje, që po t’ua pjesëtosh në pjesë të barabarta i bie 10 mijë euro për familje, ti zgjedhje nuk bën. Kurrkund, edhe në vendet më të lira të botës, zgjedhje nuk ka. Zgjedhje nuk ka, edhe po nuk e bëre këtë. Po në qoftë se, e shndërron administratën në polici elektorale që kërcënon, që shantazhin, zgjedhje nuk ka. Nuk ka zgjedhje në qoftë se përdor të gjitha burimet shtetërore, siç keni parë. Përdor të gjitha automjetet. Përdor të gjithë administratën. Përdor të gjithë buxhetin. Zgjedhje nuk ka, se ai tjetri që është në fushë nuk ka as parkun e qeverisë, as buxhetin që është i juaji dhe jo i qeverisë, nuk ka as armatën e punonjësve të paguar për t’u shërbyer qytetarëve që kthehen kundër tyre në zgjedhje. Jo, kështu që zgjedhje nuk ka.

Zgjedhje nuk ka në qoftë se vrasës, trafikantë që kanë miliarda euro dhe që janë një emër, herë i njohur, herë i panjohur, vërsulen drejt zgjedhësve me hanxharë dhe para, zgjedhje nuk ka.
Dhe çfarë ndodh? Ndodh që ai që zhvillon këtë farsë, në Shqipëri, në Venezuelë, në Bjellorusi dhe kudo, ai nuk ka asnjë orë legjitimitet. Ai nuk ka legjitimitet për të qeverisur një ditë të vetme.

Opozita e atij vendi ka të gjithë të drejtën të përdorë të gjitha mjetet kundër tij. Një qeveri që nuk vjen nga zgjedhje të lira, nuk mund të qeverisë një popull. Dhe ky është rasti konkret.

LEXO EDHE: “Të ngrihemi me të gjithë forcën”/ Berisha: Rama do të na shkëpusë nga BE-ja për karrigen e tij

Gjykata e Durrësit masat e sigurisë për 20 të arrestuarit lidhur me dosjen hetimore të “Kürüm”.

Pa praninë e medias, gjykata ka lënë në burg 8 prej të arrestuarve ndërsa ka zbutur masat e sigurisë për 12 të tjerë.

Urdhërarrestet u lëshuan 1 vit pas kthimit nga Tajlanda të 2800 tonë mbetje të rrezikshme, ndërsa 102 kontejnerë të cilët vijojnë të mbahen në Porto Romano.

Nga hetimet janë zbuluar shkelje të rënda mjedisore, nga ‘Kürüm Internatinoal’, kompania ‘Sokolaj’, ‘Bajrami N’ që blenë mbetjet, por edhe nga Agjencia Kombëtare e Mjedisit dhe Dogana e Durrësit.

Vendimet e Gjykatës:

ARREST NË BURG:

Florian Çimo  – Administrator i kompanisë koncesionare EMS APO – “Menaxhimi i mbetjeve”.

Gazmend Sina – Punonjës i kompanisë koncesionare EMS APO – “Menaxhimi i mbetjeve”.

Mikail Hila – Aksioner i agjencisë doganore “Joti Spedition” – “Kontrabanda nga punonjës që lidhen me veprimtarinë doganore”.

Indrit Likaj – Dega e Doganës Durrës – “Kontrabanda nga punonjës që lidhen me veprimtarinë doganore”.

Edmond Voda – Dega e Doganës Durrës – “Kontrabanda nga punonjës që lidhen me veprimtarinë doganore”.

Shaban Hyseni – Drejtor i departamentit te shitjeve në “Kurum” – “Kontrabanda me mallra të ndaluara ose të kufizuara” dhe “Menaxhimi i mbetjeve”.

Nazif Bajrami – Pronar i kompanisë “Bajrami N” – “Menaxhimi i mbetjeve”.

Andon Prifti – Administrator i kompanisë “Bajrami N” – “”Menaxhimi i mbetjeve”.

ARREST SHTËPIAK

Kejdi Ahmetaj   -Drejtoria e Inspektimit, AKM, ‘shpërdorim detyre’

Rami Bunga – Specialist pranë zyrës së mjedisit në “Kurum” – “Kontrabanda me mallra të ndaluar ose të kufizuara” dhe “Menaxhimi i mbetjeve”.

Shkëlqim Jakupi – Dega e Doganës Durrës – “Kontrabanda nga punonjës që lidhen me veprimtarinë doganore”.

Helidon Lila – Dega e Doganës Durrës – “Kontrabanda nga punonjës që lidhen me veprimtarinë doganore”.

Mirjeta Zotaj – Kontabiliste e kompanisë “Sokolaj” ” – “Falsifikimi i dokumenteve” dhe “Pastrimi i produkteve të veprimtarisë kriminale”.

NDALIM I DALJES JASHTË SHTETIT DHE DETYRIM PARAQITJE:

Iva Musa – Inspektore e Autoritetit Portual Durrës – “Shpërdorimi i detyrës”

Evis Mellonashi – Sektori i lejeve mjedisore, AKM – “Shpërdorimi i detyrës”

B., T,. – Sektori i lejeve mjedisore, AKM

Arta Dollani – Ish- drejtoresha e Përgjithshme e AKM – “Shpërdorimi i detyrës”.

Julian Kapedani – Dega e Doganës Durrës

Kledina Skendo – Sektori i monitorimit të lejeve mjedisore, AKM – “Shpërdorimi i detyrës”.

DETYRIM PARAQITJE:

Marjeta Përlala – Drejtoresha aktuale e AKM – “Shpërdorimi i detyrës”.

Në kërkim vazhdojnë të jenë 2 administratorët e kompanisë “Kurum Internatioanl”, Erdal Demir dhe Yusuf Sezai Kürüm.

Efektivët e policisë nuk mundën të arrestojnë as Gjovana Sokolajn, pronaren e kompanisë “Sokolaj”, e cila eksportoi 2800 tonë mbetjet të rrezikshme të Kurum nga porti i Durrësit.

Në kërkim mbetet edhe bashkëshorti i pronares së kompanisë që eksportoi mbetjet, Doni Sokolaj, me nënshtetësi kroate, kompania tjetër e të cilit “GS Minerals” mundësoi me disa kontrata qiraje depozitimin e mbetjeve në portin e Durrësit.

PERSONAT E SHPALLUR NË KËRKIM

Erdal Demir – Administratori i “Kürüm International” – “Kontrabanda me mallra të ndaluara ose të kufizuara” në 4 raste, “transporti i mbetjeve”, “Menaxhimi i mbetjeve”, “Falsifikimi i dokumentave” ne 2 raste dhe “Pastrimi i produkteve të veprimtarisë kriminale”.

Yusuf Sezai Kurum – Administrator me prokurë i “Kürüm” – “”Menxhimi i mbetjeve”, “Pastrimi i produkteve të veprimtarisë kriminale”

Harun Sarica 42 vjeç – banues në Turqi; Drejtori i prodhimit të çelikut në “Kürüm” – “Menaxhimi i mbetjeve”

Mujo Ilazaj – Drejtori i Transportit në kompaninë “Kürüm” – “Transporti i mbetjeve”.

Arif Shkalla – Drejtues në kompaninë “Kürüm” – “Kontrabanda me mallra të ndaluara ose të kufizuara”, “Menaxhimi i mbetjeve”, “Falsifikimi i dokumentave” dhe “Pastrimi i produkteve të veprimtarisë kriminale”.

Mbarime Koroci – Aksionere e kompanisë “Alliance Resource” – “Menaxhimi i mbetjeve” dhe “Pastrimi i produkteve të veprës penale ose veprimtarisë kriminale”.

Petrit Qosja – Person fizik në tregtinë e mbetjeve – “Menaxhimi i mbetjeve”.

Xhulio Golgota – Inspektor i Autoritetit Portual Durrës – “Shpërdorimi i detyrës”.

Dritan Seferaj – Drejtoria e Inspektim- Kontrollit, AKM – “”Shpërdorimi  i detyrës”.

Doni Sokolaj  – Administrator i kompanisë D.o.o Minerals – “Kontrabanda me mallra të ndaluara ose të kufizuara”, “Falsifikimi i dokumenteve” dhe “Pastrimi i produkteve të veprimtarisë kriminale”.

Gjovana Sokolaj – Pronare e kompanisë “Sokolaj” – “Kontrabanda me mallra të ndaluara ose të kufizuara” në 4 raste, “Falsifikimi i dokumenteve” dhe “Pastrimi i produkteve të veprimtarisë kriminale”.

Olizana Pemati – Ish- administratore e kompanisë “Sokolaj” – “Kontrabanda me mallra të ndaluara ose të kufizuara”, “Pastrimi i produkteve të veprimtarisë kriminale”.

Ingo Hesse – administrator i kompanisë EMS APO – “Menaxhimi i mbetjeve”.

LEXO EDHE: Nga pushimi i punonjësve, mashtrimi me bankat e deri tek mbetjet e rrezikshme/ Të gjitha zullumet e “Kürüm” në Shqipëri

“Foltorja” e Partisë Demokratike ka vijuar mbrëmjen e sotme me degët nr.8 dhe 10 në Tiranë.

Gjatë fjalës së tij, kreu i PD-së Sali Berisha akuzoi kryeministrin Edi Rama se, do të shkëpusë Shqipërinë nga ëndrra e Bashkimit Evropian vetëm për të ruajtur karriken e tij.

“Enver Hoxha ishte një gjakësor, kishte kryer krime monstruoze, dhe ai nuk mundet në asnjë mënyrë të lëshonte karrigen e tij. Kurse sot Edi Rama, jo ndaj perandorisë të së keqes, siç ishte kampi socialist, por ndaj BE, ëndrrës më të bukur evropiane të të gjitha kohërave, do të na shkëpusë. Pse? Për karrigen e tij”.

Pjesë nga fjala e Berishës:

Nuk ka moment më kritik. Nuk ka moment që të mund të tejkalojë se çfarë interesash janë të gatshëm të shkelmojnë këta antishqiptarë, kjo bandë kriminale për pasurimin e vet, për interesat e veta, për lëkurën e vet.
Një popull të tërë!

Fatin e një populli duan ta shkelmojnë duke besuar se nuk ekziston askush në këtë vend, përveç atyre. Por ja që jemi ne dhe vijmë më te betuar se kurrë se nuk do ua falim për asnjë çmim, për asnjë arsye. Ju, burra dhe gra, njerëz të ndershëm, keni 13 vjet që sakrifikoni. Keni 13 vite që trysnoheni, që përçmoheni, që nënvlerësoheni. Keni 13 vite që në vend të një përmirësimi, shihni një përkeqësim të vazhdueshëm të gjendjes tuaj ekonomike, të gjendjes suaj sociale, të shpresës dhe të besimit. Dhe tani në finale marrim një goditje që asnjë njeri nuk mund ta parashikonte.

Pra, ne vijmë në këtë moment kur thirrja e çdo shqiptari, thirrja e këtij vendi është të ngrihemi me të gjithë forcën tonë në të drejtën tonë, për interesin e secilit prej nesh. Për interesin e çdo fëmije, çdo të rrituri, çdo të moshuari. Për interesin e vendit në tërësi.

Duke ardhur tek ju, po rikujtoja një moment, në vitet ’60, paraardhësit e tyre e shkëputën Shqipërinë nga kampi socialist. Pse e shkëputën? Sepse udhëheqësi atëherë sovjetik, tha: kultet duhet t’i heqim, nuk duhet të ketë kulte.
Sigurisht, sistemi sovjetik ishte sistem barbar, mizor, por ky doli me tezën se kulti i Stalinit është kult demoniak dhe kultet nuk duhet të ekzistojnë. Pra, këtu nuk kishte gjë të keqe. Ai donte të çlironte njerëzit nga kultet.
Enver Hoxha u shkëput për karrigen e vet, sepse ishte kulti, sepse ai me kultin mbrohej, mbronte pushtetin. Dhe ne u zhytëm në izolimin më të thellë. Për ne, lufta e klasave ishte një makineri diktatoriale e tmerrshme, por izolimi ishte përsëri një faktor tmerrësisht në favor të diktaturës. Sepse ata që nuk vepruan si ne, kishin një hapësirë lëvizje nga Liqeni i Shkodrës në Kamçatkë. Kurse ne, nga Hani i Hotit në Kakavijë. Pse e jap këtë shembull?

Enver Hoxha ishte një gjakësor, kishte kryer krime monstruoze, dhe ai nuk mundet në asnjë mënyrë të lëshonte karrigen e tij. Kurse sot Edi Rama, jo ndaj perandorisë të së keqes, siç ishte kampi socialist, por ndaj BE, ëndrrës më të bukur evropiane të të gjitha kohërave, do të na shkëpusë. Pse? Për karrigen e tij.

Kujtojmë se, të martën e 10 shkurtit Partia Demokratike dhe aleatët e saj rikthehen në shesh për protestën e rradhës kombëtare.

Elbasani u rikthye te fitorja në kampionat, pasi mposhti Teutën me rezultatin 2-1 me përmbysje, në ndeshjen e javës së 23-të në Superiore.

Pas pjesës së parë të mbyllur pa gola, e dyta ishte një tjetër histori.

Durrsakët kaluan të parët në avantazh, me një supergol të shënuar nga Goncalves në minutën e 69-të.

Reagimi i vendasve ishte i shpejtë. Insa Boye i futur nga stoli, barazoi shifrat në minutën e 74-t, në ndeshjen e tij debutuese.

Për ta bërë edhe më të bukur debutimin, ai shënoi edhe golin e përmbysjes një minutë më vonë.

Këtë avantazh, Elbasani e ruajti deri në fund, për të marrë 3 pikë të rëndësishme. Verdheblutë ngjiten në vendin e dytë me 42 pikë.

Teuta mban vendin e gjashtë me 27 pikë të grumbulluara.

Qeveria i ka propozuar Kuvendit dy emra kandidatë për anëtarë të rinj për Këshillin Mbikëqyrës të Bankës së Shqipërisë.

Vendimi u mor sot në mbledhjen e radhës të këshillit të Ministrave.

Dy emrat e propozuara, që i shtohen listës së kandidatëve janë Jonida Prifti dhe Ervin Metes.

Ndonëse qeveria ka të drejtë të propozojë tre emra, ajo ka propozuar vetëm dy në mbledhjen e sotshme.

Në fund të dhjetorit 2025, përfundoi mandati i gjashtë prej anëtarëve të Këshillit Mbikëqyrës të Bankës së Shqipërisë, duke përfshirë zëvendësguvernatoren e parë, Luljeta Minxhozi dhe anëtarët Ridvan Bode, Suela Popa, Edlira Luçi, Artan Hoxha dhe Violeta Staka.

Zëvendësuesit nuk janë zgjedhur akoma, pasi ashtu siç kishte ndodhur edhe shtatë vjet më parë, dy institucionet që duhet të propozonin kandidaturat për plotësimin e vendeve vakante, Këshilli i Ministrave dhe Kryeministria, i kanë nisur procedurat ligjore me vonesë.

Kuvendi i Shqipërisë i nisi vetëm në fillim të muajit shkurt procedurat e përzgjedhjes së tre kandidatëve që duhet të propozojë për vendet vakante. Këtë javë u zhvilluan seancat dëgjimore me kandidatët, ndërsa vlerësohet se do të duhen minimalisht dy javë para se kandidatët të propozohen për votim në seancë plenare.

Në procedurën e hapur nga Kuvendi, për tre kandidatët që duhet të propozohen nga ky institucion aplikuan 20 kandidatë, nga të cilët 18 u paraqitën në seancën dëgjimore të zhvilluar nga Komisioni përgjegjës.

Gjatë javëve të fundit kanë dështuar dy mbledhje të Këshillit Mbikëqyrës, për shkak të përfundimit të mandatit të gjashtë prej anëtarëve dhe moszëvendësimit në kohë të tyre.

Kushjanë anëtarët e propozuar nga Qeveria?

Ervin Mete ka drejtuar Ministrinë e Financave nga nga shtatori 2023 deri në korrik 2024. Gjatë periudhës kur drejtoi Ministrinë e Financave, vendi shënoi ulje të borxhit publik, forcim të disiplinës fiskale dhe ruajtje të stabilitetit makroekonomik, në një kohë kur ekonomitë europiane përballeshin me presione të forta inflacioniste dhe fiskale. Në të njëjtën periudhë, Shqipëria doli nga lista gri për pastrimin e parave, ndërsa u ndërmorën hapa konkretë për mbylljen e disa kontratave koncesionare, në funksion të uljes së rreziqeve fiskale dhe rritjes së transparencës në financat publike.

Më herët, Mete ka drejtuar Autoritetin e Mbikëqyrjes Financiare, institucion përgjegjës për mbikëqyrjen e tregjeve financiare jobankare. Në këtë rol, ai ka pasur përgjegjësi edhe për zhvillimin dhe mbikëqyrjen e tregjeve të kapitalit, ku bankat janë aktorë kyç.

Për Jonida Priftin ka pak informacion, ndërkohë që ajo është një kërkuese e pavarur. Ajo është diplomuar me diplomë Bachelor (me nderime) në menaxhim biznesi me profil kontabilitet profesional nga Universiteti i Westminster.

Ish-sulmuesi i Anglisë, Alan Shearer ka kritikuar sjelljen e Cristiano Ronaldos, duke e cilësuar atë si të papërshtatshme për nivelin dhe statusin e tij.

Më herët, sulmuesi portugez mungoi në ndeshjen e kampionatit ndaj Al-Riyadh, të cilën skuadra e tij e fitoi 1-0. Po ashtu, u raportua se ai nuk mori pjesë as në stërvitje pas kësaj përballjeje.

Para kësaj, u bë e ditur se Ronaldo është i pakënaqur me mënyrën se si Fondi Sovran i Arabisë Saudite (PIF) po e menaxhon klubin e tij, krahasuar me rivalët, veçanërisht Al-Hilal. Gjithashtu, kishte raportime se portugezi ishte kundër transferimit të Karim Benzemas te Al-Hilal, duke e konsideruar atë si “dëm për konkurrencën”.

Për zhvillimet në Ligën Saudite ka reaguar edhe Shearer, i cili kritikoi Ronaldon që paguhet tepër dhe vendosë të hyjë në “grevë”.

“Jo shumë njerëz fitojnë më shumë se 400 mijë euro në ditë dhe vendosin të hyjnë në grevë. Duhet të jetë bukur të thuash se nuk do të shkosh në punë, pavarësisht parave që fiton”.

“Kur e mendon mirë, kjo duket e çuditshme. Ai është një superyll, por një grevë në atë nivel duket keq”, ka deklaruar ai.

Ndërkohë, Ronaldo ka refuzuar të luajë edhe ndaj Al Ittihad, kurse nuk dihet për sa kohë do ta vazhdojë këtë qëndrim.

Ish deputeti demokrat Dashnor Sula është zyrtarisht Kryeinspektor i Përgjithshëm, një pozicion për të cilin Fax News shkroi javë më parë por u mohuan publikisht nga vetë Sula.

LEXO EDHE: Është propozuar për postin e Kryeinspektorit të Përgjithshëm, reagon Dashnor Sula

“Jam duke ikur për në Itali. Dhe nuk kam marrë ende asnjë detyrë”, thoshte Sula dukemohuar kategorikisht lajmin se do të ishte ai pasuesi i Shkëlqim Hajdarit, i cili gjithashtu sot mori detyrën e Prefektit të Tiranës.

Ndërsa sot, Këshilli i Ministrave, gjatë mbledhjes së saj vendosi edhe dy emërimet e mësipërme.

Dashnor Sula ka qenë deputet i Partisë Demokratike për disa legjislatura dhe njihej për debatet e tij të ashpra me kundërshtarët politikë dhe një zë i fortë kundër vjedhjes dhe korrupsionit në çdo dalje të tij publike.

Madje, gjatë një debati në parlament, kryeministri Edi Rama do e quante edhe “gjel deti Peqini”, një etiketim që merr shkas në traditën e banorëve të Peqinit për të rritur gjela deti.

“Pusho, o “gjel deti”, pusho! Pusho me atë fjalor, sepse nuk je në festën e gjelave të detit të Peqinit! Pusho, o bedel! Pusho! Me cilën gjuhë?! Po ju që në mëngjes çoheni këtu duke ngritur dhe ulur gjithë dynjanë si hajdutë. Si nuk ju vjen turp?! Ngrini dhe ulni dynjanë si hajdutë, ju bedelë! Pusho o “gjel deti”, pusho! O “gjel deti”, pusho, se nuk je këtu në vendin tënd, je gabim këtu, je aksident! Mjerë Shqipëria për ty dhe për ata si ti!”, i drejtohej Rama nga foltorja e Kuvendit Dashnor Sulës në seancën parlamentare të 9 nëntorit 2022.

“Më vjen turp në gjendjen që ka përfunduar ai parlament. Jam totalisht kundra ndaj çdo lloj fyerje dhe arrogance. Dje ishte e njëjta situatë.

Foli z. Alibeaj por nuk ka të drejtë kryeministri të dalë dhe flasë me një fjalor që nuk është i denjë. Unë nuk jam ndierë i ofenduar personalisht, por për institucionin në radhë të parë, për deputetët për parlamentin”, do të shprehej një ditë më pas Sula.

Por në Shqipëri shumë gjëra harrohen dhe jeta vazhdon normalisht.

Suksese z.Dashnor Sula në detyrën e tij të re.