Agjencia e Mbikëqyrjes Policore (AMP) ekzekutoi sot masat e sigurisë ndaj gjashtë punonjësve të policisë dhe një shtetasi civil, si pjesë e operacionit “Last Bet”, i zhvilluar në rajonet Elbasan dhe Korçë.

Efektivët, duke shfrytëzuar atributet e funksionit, në bashkëpunim me njëri-tjetrin, kanë organizuar dhe favorizuar ushtrimin e llotarive të palejuara / basteve sportive.

Ndërkohë, grupi hetimor, në vijim aktit të ekspertimit teknik të celularëve të sekuestruar, janë evidentuar të ruajtura biseda të zhvilluara në aplikacionin e komunikimit “WhatsApp” midis punonjësit të policisë i identifikuar si E.P., dhe R.T., po ashtu punonjës policie, me përmbajtje të organizimit dhe ushtrimit të lojërave të fatit.

Por cilat janë disa prej bisedave mes policëve, të cilët ishin vetë “klientë” të basteve të paligjshme:

Polici me inicialet E.P.: He mo tiger se te thash me vilu dy skedina po i vuna tjeter kund se me vonove

Polici me inicialet R.T: Iken 200 mij lek

Polici me inicialet E.P.: naj ndeshje te sigurt

Polici me inicialet R.T: Argjentina 2/3plus Mexica 2/plus 70 mij lek… mos na ven skedina fituse o boss ta marrim te qet at %

Polici me inicialet E.P.: Un kam lujt nja dy neshje sot mbrapsh kam kap 4 skedina

Polici me inicialet R.T: Jam 3.7 plus… Nuk du me i prek ma

Polici me inicialet E.P.: Jo mos maj shpresa te shefi tpakten deri nga mesi mujit

Polici me inicialet R.T: Ore po hapja user altinit mor vlla e i ban llogarite nfund muji

Polici me inicialet E.P.: jam te i marr borxh 1 milion

Polici me inicialet R.T: ti je pronari nr1

Polici me inicialet E.P.: ej neser duhet me dorzu leket e llotos

Polici me inicialet R.T: zemra

Polici me inicialet E.P.: kshuqe po erdhe te pijm kafe… Thuj te rrije ai ja japim i 5 mij leksh ma shum a 10 ja jap un

Polici me inicialet R.T: thash se neser duhet me shku me ba dorzimet e lekve

Polici me inicialet E.P.: ok se i them un per kte nuk a problem

Polici me inicialet R.T: por per leket e llotos

Polici me inicialet E.P.: A i ka cu?

Polici me inicialet R.T: Iliri

Polici me inicialet E.P.: po

Polici me inicialet R.T: ke edhe ti 1 mili e 50

Polici me inicialet E.P.: 1 miljon o jet

Polici me inicialet R.T: 50shja esht e ktij muji

Polici me inicialet E.P.: 50 jan te mujit

Polici me inicialet R.T: qe kena hy … e i kam leket po i kam than atij shokut qe ia kam marr kur i qova 2.2 milion

Polici me inicialet E.P.: pasneser duhet me qu leket e llotos

Nga sa më sipër ka dyshime se shtetasit E.P dhe R.T, të dy punonjës policie të Policisë së Shtetit, kanë organizuar dhe ushtruar veprimtarinë e kundërligjshme të lojrave të fatit. E.P. ka bashkëpunuar edhe me shtetasin I.T. në kryerjen e veprës penale.

Teksa nesër do të përkujtohet 15-vjetori i protestës së “21 Janarit” ku mbetën të vrarë 4 qytetarë, kreu i Grupit Parlamentar të PS, Taulant Balla, përmes një postimi në rrjetet sociale, shprehet se shqiptarët dhe familjarët e viktimave kërkojnë ende drejtësi.

“Shqiptarët dhe familjet e të rënëve të 21 Janarit duan drejtësi! Gjykata e Lartë, në dritën e vendimit historik të Gjykatës Europiane për të Drejtat e Njeriut, ka konkluduar me emra të përveçëm:

Asnjëherë nuk është tentuar për të shtrirë hetimet – lidhur me “ngjarjen e 21 janarit” – ku mbeten të vrarë katër demostrues dhe të plagosur dhjetëra të tjerë – nga zjarri i armëve të përdorura nga efektive të Gardës…, përtej nivelit të mirëfilltë ekzekutues të krimit (krimeve) – të sipërcituar (efektivë dhe drejtues të Gardës) – por edhe të paballafaquar minimalisht (në të njëjtën kohë) me indiciet individualizuese – evidentuese të implikimit të nivelit më të lartë drejtues shtetëror – përfshirë Kryeministrin dhe Ministrin e Brendshëm të kohës – përtej atij të mirëfillte ekzekutues – të vëna në dispozicion të organit të procedimit”, shkruan Balla në postimin e tij.

Më 21 janar 2011 humbën jetën Aleks Nika, Ziver Veizi, Hekuran Deda dhe Faik Myrtaj, para kryeministrisë, në protestën e thirrur nga Partia Socialiste.

Hetimi i parë çoi si të pandehur për ngjarjen Ndrea Prendin dhe Agim Llupon, që u dënua nga apeli me 1 dhe 3 vjet burg për “vrasje nga pakujdesia”.

Hetimi për ngjarjen është tashmë në duart e SPAK.

LEXO EDHE: Dëshmia për “21 Janarin”/ Kush është personazhi i rëndësishëm që Meta përmendi para SPAK

Shtëpia është “ndezur” pas nominimit të papritur të Brikenës, për të zëvendësuar Stelinën me Mateon.

Erik, Ina, Keijsi apo Mateo, kush do të largohet mes tyre?

Për herë të parë, rikthehet zinxhiri i shpëtimit… Me një eliminim të dyfishtë dhe hyrje të reja.

Për të zbuluar këto dhe shumë të tjera, ndiqni sot spektaklin e madh në DigitAlb me dy kanalet e dedikuara “Big Brother VIP 1” dhe “Big Brother VIP 2”.

Presidenti i SHBA Donald Trump ka bërë një deklaratë të fortë në një konferencë nga Shtëpia e Bardhë.

Ai e cilësoi Groenlandën, territor “të domosdoshëm për sigurinë kombëtare dhe botërore”, raportojnë mediat amerikane.

Ai tha se “nuk ka kthim prapa” në planin e tij për të përfshirë Groenlandën si pjesë të strategjisë amerikane.

Në të njëjtën kohë, presidenti francez Emmanuel Macron dha një paralajmërim të ashpër gjatë Forumit Ekonomik Botëror në Davos, duke kunderpërpjekur akumulimin e tarifave nga SHBA, dhe paralajmëroi për një “zhvendosje drejt një bote pa rregulla”.

Macron e quajti “thelbësisht të papranueshëm” përshkallëzimin e tarifave nga ana e Shteteve të Bashkuara, duke theksuar rrezikun për përkeqësimin e marrëdhënieve tregtare ndërkombëtare.

LEXO EDHE: “Bordi i Paqes” të enjten në Davos/ Macron kundër, Trump e kërcënon

Tarifat e reja të Trump janë një përgjigje ndaj kundërshtimeve ndërkombëtare për planet e tij lidhur me Groenlandën, dhe mund të thellojnë përçarjen me aleatët tradicionalë të SHBA-së.

Ndërkohë, Parlamenti Evropian ka vendosur të pezullojë miratimin e një marrëveshjeje tregtare me SHBA-në si pasojë e përkeqësimit të debatit mbi Groenlandën dhe politikat e Trump.

LEXO EDHE: Përshkallëzim i marrëdhënieve/ PE pritet të pezullojë marrëveshjen për tarifat me SHBA

Parlamenti Evropian po planifikon të pezullojë miratimin e marrëveshjes për tarifat me Shtetet e Bashkuara, të cilën palët e kishin arritur në muajin korrik, sipas burimeve pranë Komitetit të tij për tregtinë ndërkombëtare, shkruan BBC.

Njoftimi i pezullimit pritet të mbahet nesër në Strasburg.

Ky hap do të shënonte një tjetër përshkallëzim të tensioneve mes SHBA dhe Evropës, ndërkohë që presidenti Donald Trump po intensifikon përpjekjet e tij për të blerë Groenlandën, duke kërcënuar me tarifa të reja gjatë fundjavës.

Ky konfrontim ka tronditur tregjet financiare, duke rikthyer frikën për një luftë tregtare dhe mundësinë e hakmarrjes ndaj SHBA-së për masat e saj tregtare.

Aksionet në të dy anët e Atlantikut ranë të martën, me tregjet evropiane që regjistruan humbje për ditën e dytë radhazi dhe tre indekset kryesorë të bursave amerikane, duke u ulur më shumë se 1% gjatë tregtisë në mëngjes.

Në tregun e valutave, dollari amerikan gjithashtu ra ndjeshëm. Euro u rrit 0.8% kundrejt dollarit në 1.1742 dollarë, ndërsa paundi britanik u rrit 0.2% në 1.346 dollarë.

Kostot e huamarrjes u rritën gjithashtu në mbarë botën, pasi shitja më e madhe e titujve afatgjatë të qeverive në muajt e fundit rriti të ardhurat nga obligacionet 30-vjeçare në tregjet e SHBA-së, MB-së dhe Gjermanisë.

Tensionet tregtare midis SHBA-së dhe Evropës ishin lehtësuar që nga marrëveshja e arritur në fushën e golfit të Trump në Turnberry, Skoci, në korrik.

Marrëveshja kishte vendosur tarifa amerikane për mallrat evropiane në 15%, nga 30%. Në këmbim, Evropa kishte rënë dakord të investonte në SHBA dhe të bëjë ndryshime që priteshin të rrisnin eksportet amerikane.

Marrëveshja ende kërkon miratimin e Parlamentit Evropian për t’u bërë zyrtare.

Por të shtunën, brenda pak orësh nga kërcënimi i Trump për tarifa amerikane mbi Groenlandën, Manfred Weber, një anëtar influent gjerman i Parlamentit Evropian, deklaroi se miratimi nuk është i mundur në këtë fazë.

Bashkimi Evropian kishte vendosur në pritje planet për hakmarrje ndaj tarifave amerikane me një paketë që synonte mallra amerikane me vlerë prej 93 miliardë eurosh, ndërsa të dy palët përfundonin detajet.

Por kjo shtyrje skadon më 6 shkurt, që do të thotë se tarifat evropiane do të hyjnë në fuqi më 7 shkurt, nëse blloku nuk kërkon zgjatje ose nuk miraton marrëveshjen e re.

Duke folur në Forumin Ekonomik Botëror në Davos, Sekretari amerikan i Thesarit, Scott Bessent, përsëriti paralajmërimin e tij ndaj liderëve evropianë për hakmarrjen, duke i këshilluar të kenë një mendje të hapur.

“U them të gjithëve, qetësohuni. Merrni një frymë thellë. Mos u hakmerrni. Presidenti do të jetë këtu nesër dhe do të japë mesazhin e tij”, tha ai.

SHBA-ja më parë kishte shprehur pakënaqësi për progresin evropian drejt miratimit të marrëveshjes, për shkak të mosmarrëveshjeve mbi tarifat e teknologjisë dhe metaleve. SHBA-ja dhe Bashkimi Evropian me 27 vende janë partnerët tregtarë më të mëdhenj të njëri-tjetrit, me më shumë se 1.6 trilionë euro (1.9 trilionë dollarë) mallra dhe shërbime të shkëmbyera në vitin 2024. Kjo përfaqëson thuajse një të tretën e gjithë tregtisë globale. Kur Trump filloi të shpallte tarifat vitin e kaluar, kjo nxiti kërcënime hakmarrjeje nga shumë liderë politikë, përfshirë edhe në Evropë.

Foltorja e demokratëve u ndal këtë të martë në Njësinë 4, Tiranë, ku kreu i PD-së, Sali Berisha, ka mbajtur një bashkëbisedim me simpatizantët e pranishëm.

Berisha u ndal fillimisht te emigrimi i të rinjve në vend, duke u shprehur se “OKB i shikon shqiptarët si një komb në zhdukje”.

“Miq, nga viti 2014 gjer në vitin 2023, vetëm në hapësirën europiane, në Schengen, kanë emigruar 1 milion e 100 mijë shqiptarë. Nga të cilët rreth 700 mijë të rinj. Pra, rriten në Shqipëri, por ëndrrën shqiptare nuk e ndërtojnë dot në Shqipëri. Marrin rrugët e Europës, rrugët e botës për të ndërtuar ëndrrën e tyre. Dhe ne pakësohemi, pakësohemi, pakësohemi. Në çfarë shkalle? Pakësohemi në atë shkallë, saqë të gjithë, nga Organizata e Kombeve të Bashkuara dhe çdo institut tjetër që merret me demografinë, shqiptarët i shikon si një komb në zhdukje. Si një komb që sot kanë lindur atë numër fëmijësh që lindnin 100 vite më parë. Kur ata ishin në regjistra 700 mijë. Shqiptarët nga viti 2018 gjer sot, humbasin, mijëra e mijëra qytetarë ndahen nga jeta më shumë sesa lindin“, tha ai.

Berisha u shpreh gjithashtu se vendi është boshatisur këtë 10-vjeçar të fundit si pasojë e humbjes së shpresës.

Siç tha kreu i PD-së, të paktën 49% e Shqipërisë, është “buzë varfërisë”.

“Në 10 vite, si kurrë dhe si asnjë vend tjetër, jemi plakur 10 vjet. Mosha mesatare jonë është rritur 10 vjet. Në 10 vite, vendi pra u boshatis nga shpresa. Por në qoftë se në 2013-ën ne ishim njerëzit më të paguar, pak merrnim, nuk merrnim shumë, po më të paguar ishim se të gjithë këta që janë përreth nesh, përveç grekëve. Më të paguar se dhe bullgarët dhe rumunët. Sot jemi më të keqpaguarit. Sot 49% e jona është buzë varfërie ose në varfëri“.

“Bordi i Paqes” i Donald Trump pritet të jetë në qendër të vëmendjes edhe në samitin e Davosit në Zvicër.

Presidenti amerikan synon që të enjtën e 22 janarit të nënshkruhet statuti dhe mandati i plotë i strukturës ndërkombëtare.

Në një ftesë thuhet se ceremonia do të mbahet gjate samitit ekonomik, ndërsa në një dokument tjetër theksohet se Trump do të jetë në krye të bordit dhe një pasardhës mund të zgjidhet vetëm nëse presidenti amerikan largohet vullnetarisht.

Ftesa për pjesëmarrje në këtë mekanizëm të madh ndërkombëtar u ka shkuar shumë shteteve, mes tyre edhe Shqiëpria. Megjithatë duket se jo të gjithë janë gati të pranojnë.

LEXO EDHE: Rama i përgjigjet ftesës së Trump për Bordin e Paqes: Privilegj dhe nder të shpreh gatishmërinë time për…

Më herët u raportua në media se Emmanuel Macron kishte kundërshtuar pjesëmarrjen e Francës në Bordin e Paqes.

Mirëpo kur u pyet nga gazetarët, Donald Trump dha një mesazh të qartë për homologun e tij francez.

“Askush nuk e do Macron sepse ai do të largohet nga detyra shumë shpejt, kështu që nuk ka shumë rëndësi. Do të vendos një tarifë prej 200% për verërat dhe shampanjat e tij dhe ai do të bashkohet, por nuk është I detyruar.  Siç e dini, ai do të largohet nga detyra pas disa muajsh”, u shpreh Trump. 

Ftesa e Donald Trump për “Bordin e Paqes” është kundërshtuar edhe nga krerë të tjerë shtetesh, ku ndër të tjera thuhet se kjo nismë shkel kartën e OKB-së.

Trump ka qenë një kritik i vazhdueshëm i Kombeve të Bashkuara dhe së fundmi ka njoftuar tërheqjen e SHBA-së nga 66 organizata dhe traktate ndërkombëtare, gjysma e të cilave lidhen me OKB-në.

Kujtojmë se, anëtarësimi në Bord do të jetë i kufizuar vetëm për shtetet e ftuara nga kryetari, ndërsa Trump do të ketë të drejtën edhe të përjashtojë vende anëtare, përveç rasteve kur dy të tretat e anëtarëve vendosin veto.

Nga ajo çfarë dihet deri tani, Trump ka emëruar si anëtarë të “Bordit të Paqes” Sekretarin e Shtetit Marco Rubio, ish-kryeministrin britanik Tony Blair, negociatorin Steve Witkoff dhe dhëndrin e tij, Jared Kushner.

Ndërkohë, Izraeli ka shprehur kundërshtime ndaj përbërjes së “bordit ekzekutiv për Gazën”, i cili përfshin ministrin e Jashtëm të Turqisë, Hakan Fidan, dhe diplomatin nga Katari, Ali Al-Thawadi.

Kryeministri Edi Rama reagon lidhur me seancën në Gjykatën Kushtetuese ku po shqyrtohet paga e gjyqtarëve.

Përmes një postimi në “X”, kreu i qeverisë shprehet se, po synohet që Shqipëria të jetë i vetmi vend në botë ku gjykatësit paguhen më shumë se kushdo tjetër, duke marrë kompetencat kushtetuese të qeverisë e të parlamentit për politikën e pagave.

Postimi i plotë i Edi Ramës: 

Sot Gjykata Kushtetuese po zhvillon (fatkeqësisht pa transmetim direkt për shkaqe teknike) farsën më të shëmtuar të imagjinueshme, e cila i është imponuar nga dy shoqata gjyqtarësh, të cilët duan të rrisin rrogat e tyre me gjyq, duke thyer piramidën shtetërore të pagave, ndërkohë që janë kategoria më e lartpaguar në Shqipëri, si rezultat i mbështetjes që kjo shumicë qeverisëse i dha për hir të Reformës në Drejtësi pushtetit gjyqësor! 

Tani këta duan që në përjetësi t’u jepet e drejta ta rrisin vetë rrogën sa herë rriten pagat e tjera, pra Shqipëria të jetë përgjithmonë i vetmi vend në botë ku gjykatësit paguhen më shumë se sa çdokush tjetër duke marrë kompetencat kushtetuese të qeverisë e të parlamentit për politikën e pagave – ky është një skandal logjik, moral, ligjor dhe kushtetues, të cilin uroj që Gjykata Kushtetuese të mos e lejojë kurrësesi të kthehet në një turp kombëtar! 

Respekte për SPAK-un që nuk iu bashkua kësaj marrëbabëzie në emër të pavarësisë së gjyqësorit.

Mesditën e sotme, Kuestori i Romës, Roberto Massucci, së bashku me delegacionin që e shoqëronte, zhvilloi një vizitë kortezie në Drejtorinë e Përgjithshme të Policisë së Shtetit, ku u prit nga Drejtori i Përgjithshëm Ilir Proda, dhe drejtues të lartë të Policisë së Shtetit.

Gjatë takimit, Massucci falenderoi Prodën për pritjen, dhe vlerësoi bashkëpunimin shumë të mirë që ekziston mes dy policive.

Nga ana e tij, Drejtori i Përgjithshëm i Policisë së Shtetit siguroi Kuestorin e Romës se Policia e Shtetit është e vendosur të bashkëpunojë ngushtësisht me partnerët italianë dhe ata ndërkombëtarë.

Ai theksoi se bashkëpunimi me Policinë italiane përbën një shembull shumë të mirë, përmes shkëmbimit të informacionit, krijimit të skuadrave të përbashkëta hetimore dhe operacionale, si dhe realizimit të trajnimeve dhe shkëmbimit të eksperiencave.

Gjatë takimit u shkëmbyen gjithashtu eksperienca mbi menaxhimin e situatave të ndryshme, u vlerësua roli dhe mbështetja e ambasadës italiane në Tiranë, si dhe u dakordësua forcimi i mëtejshëm i marrëdhënieve, përfshirë zgjerimin e bashkëpunimit edhe me Kuesturën e Romës.

Autori i vrasjes së kryetarit 50-vjeçar të komunitetit të Lithovouni, në Aitoloakarnania, shtetas shqiptar, pritet të kërkojë falje para autoriteteve nesër, ndërsa hetimet po nxjerrin në dritë të dhëna të reja që hedhin dritë mbi motivin e krimit që ka tronditur zonën.

Sipas emisionit investigativ “Zbulesa”, bashkëshortja e viktimës ka dëshmuar se burri i saj e kishte kërcënuar me vdekje.

Në një deklaratë ajo është shprehur se kishte frikë për jetën e saj dhe për atë të autorit të krimit, me të cilin dyshohet se kishte një lidhje të fshehtë.

“Jam e shokuar. Kostas më ka kërcënuar vazhdimisht kohët e fundit se do të më vriste, edhe mua edhe autorin. Kisha frikë për jetën time dhe për jetën e tij. Më intereson mbi të gjitha shëndeti mendor i fëmijës tim,” ka deklaruar ajo, duke shprehur gjithashtu keqardhje për humbjen e 50-vjeçarit.

Një banor i fshatit, duke folur në emisionin “Të vërteta me Zinën”, pohoi se kishte këshilluar viktimën që në fillim “ta linte situatën dhe të largohej”, duke lënë të kuptohet për tensione të vazhdueshme mes palëve.

Funeral me masa të rrepta sigurie

Funerali i Kostas Alexandris, i vrarë të shtunën më 17 janar, u mbajt të martën në mëngjes në Kishën e Agios Dimitrios në Lithovouni, mes një atmosfere të rëndë emocionale. Të afërm, miq dhe bashkëfshatarë i dhanë lamtumirën e fundit babait të një fëmije të mitur dhe drejtuesit të Bashkësisë Vendore.

Sipas sinidisi.gr, figura më tragjike e ceremonisë ishte djali i tij 13-vjeçar, i cili qëndroi pranë nënës dhe xhaxhait të tij. Dhimbje e madhe u pa edhe te nëna e viktimës. Kurora nderimi u dërguan, mes të tjerëve, nga zëvendësministri i Punës Kostas Karagounis, kryetari i Bashkisë Agrinio Giorgos Papanastasiou, Këshilli Bashkiak i Agrinio-s dhe institucione të tjera lokale.

Detajet e krimit

Sipas të dhënave paraprake, autori 44-vjeçar, emri i të cilit nuk bëhet i ditur, i kishte ngritur pritë viktimës dhe e kishte qëlluar tre herë me armë zjarri, teksa 51-vjeçari po kalonte me automjetin e tij. Nga të shtënat, viktima humbi kontrollin e makinës, e cila përfundoi në një fushë të zonës. Gjatë kontrollit në vendngjarje, policia konstatoi se viktima u gjet me fytyrën poshtë në sediljen e pasagjerit, ndërsa brenda automjetit u gjet edhe një pushkë gjahu, fakt që tregon se ai ishte i armatosur.

Pak orë pas krimit, autori kontaktoi vetë policinë dhe kërkoi të dorëzohej, duke deklaruar: “Ejani të më merrni nga shtëpia, unë e vrava”, ndërsa gjatë arrestimit dorëzoi edhe armën e krimit. Avokati i tij mbrojtës, Christos Tsiboukis, ka deklaruar se “90% e asaj që është dëgjuar dhe shkruar për çështjen është e pabazuar”, por ka pranuar se roli i bashkëshortes së viktimës është kyç në zbardhjen e plotë të ngjarjes. Sipas burimeve hetimore, motivi kryesor dyshohet të ketë qenë rivaliteti romantik.

Frikë nga hakmarrja

Në zonë janë vendosur masa të shtuara sigurie, me prani të forcave policore dhe efektivëve të OPKE-së, të cilët ruajnë shtëpitë e të dy familjeve, për të shmangur çdo akt hakmarrjeje. Autoritetet raportojnë se tensioni mbetet i lartë në fshatrat përreth, ndërsa hetimet vijojnë për të sqaruar plotësisht rrethanat e krimit.

Grupi Parlamentar i Partisë Demokratike i është drejtuar zyrtarisht Prokurorisë së Posaçme duke kërkuar përfundimin pa vonesa të hetimit ndaj gjyqtares së Gjykatës së Posaçme, Irena Gjoka, pas konfirmimit nga Prokuroria e Përgjithshme se ajo rezulton e dënuar në Greqi dhe se këtë fakt e ka fshehur në formularët e vetëdeklarimit.

Sipas opozitës, zvarritja e hetimit po cenon rëndë parimin e barazisë para ligjit, integritetin e sistemit të drejtësisë dhe interesat financiare të shtetit shqiptar.

DEKLARATA E PD:

“Pasi Prokuroria e Përgjithshme konfirmoi sot se gjyqtarja e Gjykatës së Posacme Irena Gjoka rezulton e dënuar në shtetin grek dhe një fakt të tillë e ka fshehur në formularët e vetdeklarimit, Grupi Parlamentar i Partisë Demokratike i ka kërkuar Prokurorisë së Posacme, përfundimin pa vonesa të hetimit të saj për veprën penale të falsifikimit të dokumenteve zyrtare.

Në shkresën e firmosur në emër të opozitës, nga Kryetari i Grupit Parlamentar të Pd, Gazment Bardhi, thesohet se“përmes këtij konfirmimi të autoriteteve përgjegjëse rezulton se gjyqtarja Irena Gjoka, ndodhet në kushtet e papajtueshmërisë me funksionin kushtetues të gjyqtarit, në kuptim të nenit 6/1 të Kushtetutës, ligjit nr. 95/2016 dhe ligjit nr. 96/2016, si dhe ka fallsifikuar aktet, duke kryer një tjetër krim, në mënyrë të përsëritur, për shkak të mosdeklarimit të urdhër dëbimeve dhe vendimit gjyqësor të dënimit. Është e pashpjegueshme sesi ende sot Prokuroria e Posaçme zvarrit hetimin për këtë rast, duke vijuar devijimin nga parimi i barazisë përpara ligjit dhe duke lejuar vijimin e gjendjes së paligjshmërisë në sistemin gjyqësor.”

Deputetët e opozitës në Kuvendin e Shqipërisë, shprehin shqetësimin e thellë, për mosveprimin në kohë të Prokurorisë së Posaçme, që po sjell pasoja të rënda dhe të parikuperueshme në sistemin gjyqësor. “Cenimi i parimit të “gjykatës së caktuar me ligj”, është shkak i mjaftueshëm kushtetues për të cënuar çdo vendimmarrje të saj si gjyqtare në Gjykatën e Posaçme të Shkallës së Parë kundër Korrupsionit dhe Krimin e Organizuar. Kjo ka pasoja të rënda për vetë sistemin e drejtësisë, për vetë punën e Prokurorisë së Posaçme, por mund të shkaktojë edhe pasoja të rënda financiare për shtetin shqiptar. Ky rast cenon edhe besimin e publikut tek sistemi i drejtësisë dhe krijon pasiguri mbi vendimmarrjet e sistemit gjyqësor, duke cenuar integritetin e të gjithë sistemit.”- thuhet në letrën e firmosur nga Gazment Bardhi.

Në përfundim, opozita thekson se “Për këtë arsye, duke respektuar parimin e pavarësisë së sistemit gjyqësor dhe duke shmangur çdo ndërhyrje në çështje konkrete në hetim apo në punën e Prokurorisë së Posaçme, ne deputetët e opozitës në Kuvend, në përputhje me parimin e ndarjes dhe të balancimit të pushteteve, parimit të shtetit ligjor, dhe të përgjegjësisë sonë si deputetë për të mbrojtur interesin e shtetit shqiptar, kushtetutshmërinë dhe ligjshmërisë në sistemin gjyqësor, kërkojmë nga ana e Prokurorisë së Posaçme që të veprojë në kohë, pa vonesa të mëtejshme, me paanësi dhe në përputhje me parimin e barazisë përpara ligjit, për hetimin brenda një afati të arsyeshëm të këtij rast. Çdo vonesë nga ana juaj për përgjegjësinë penale apo nga organet e tjera kushtetuese për përgjegjësinë administrative, shkakon pasoja të rënda për interesin publik, për vetë sistemin e drejtësisë dhe për interesat financiare të shtetit shqiptar”.

LEXO EDHE: Skandal në drejtësi: Gjyqtarja Irena Gjoka nuk deklaroi dënimin në Greqi

Gjykata ka dënouar me 23 vite burg ish-punonjësin e policisë, Tomor Çela, i akuzuar për vrasjen e dy personave në vitin 1997.

Kujtojmë se Çela ka punuar si punonjës policie në Komisariatin e Policisë Nr.4 Tiranë, detyrë nga e cila është liruar më datë 15.06.1997.

Gjatë kohës që ka qenë në detyrë ai ka qenë i pajisur me armën automatik model Kallashnikov të cilin nuk e ka dorëzuar por e ka mbajtur në banesë pa leje.

Ngjarja

Më 27 nëntor të 1997-ës, rreth orës 20:30 në lagjen nr.9, rruga Bajram Curri ka qëlluar me armë zjarri automatike ndaj viktimave Elton Danin e Ledian Hoxhën, duke ju shkaktuar vdekjen e menjëhershme.

Viktimat në momentin e vrasjes kanë qenë duke udhëtuar me një mjet tip autoveture Volvo.

60-vjeçari nga Durrësi u ekstradua nga SHBA në qershor të vitit 2022.

Në kulmin e debateve nëse Radio Televizioni Shqiptar duhet të mbyllet ose jo, Kuvendi i Shqipërisë prezanton projektin për një televizion të vetin, i cili do të prodhojë materiale edhe për RTSH-në.

Me një investim prej 500 mijë eurosh, Byrosë së Kuvendit iu kërkua miratim për krijimin e një redaksie televizive për institucionin.

“Media Room-i është menduar të jetë një qendër e integruar multimediale brenda Kuvendit të Shqipërisë, e konceptuar si një “redaksi televizive” profesionale, që funksionon në mënyrë të përhershme dhe bashkëpunon ngushtë me RTSH-në për transmetimin në kanalin RTSH Kuvend”, thuhet ndër të tjera në relacion.

Për këtë synohet të ngrihet një drejtori e re pranë Shërbimit të Informacionit dhe Dokumentacionit, e cila të ketë rol të trefishtë, sipas dokumentit.

“Informues: të përcjellë në mënyrë transparente punën parlamentare për qytetarët.

Analitik: të shpjegojë proceset legjislative, reformat dhe ndikimet e tyre.

Edukues: të ndihmojë qytetarët të kuptojnë funksionet dhe rolin e Kuvendit”.

Fillimisht parashikohet të nisë puna me strukturë të reduktuar redaksie me staf minimal, prodhim të përmbajtjeve bazike: Transmetime live, kronika, intervista, bashkëpunim i plotë me RTSH-në, për transmetimin dhe arkivim të materialeve.

Ndërkohë 500 mijë eurot do të shpenzohen për studio televizive moderne, prodhim të plotë video/audio për TV Parlamentar, dhe platformë publike televizive të Kuvendit, e integruar me shërbimet e Inteligjencës Artificiale.

Iniciativa premton të ofrojë përmbledhje dhe analiza: kronika ditore dhe javore, përmbledhje tematike mbi çështje ligjvënëse dhe debate, të transmetuara në RTSH Kuvend, online dhe në rrjete sociale.

Gjatë mbledhjes së Grupit Parlamentar të PS-së, kryeministri Edi Rama shfaqi hapur kritika për mënyrën e menaxhimit të Radio Televizionit Shqiptar, duke e quajtur një dështim.

“Kam tentuar të krijojmë kushtet që RTSH të reformohet dhe kemi dështuar me suksesin më të plotë. Se di çfarë do të bëjë drejtuesja e re, por deri tani bilanci i RTSH është dështim i suksesshëm, nga borxhi në borxh dhe nga mospërfillja e publikut në mospërfillje, ne s’kemi televizion publik sot në Shqipëri, kemi një kanal atje, por hera e fundit kur e kam, parë është në vitin 1990 pata përmbysjes së protestave. Që atëherë televizion publik s’kam parë, kam vajtur i ftuar po as veten skam parë dhe janë të vetmet intervista pas të cilave nuk marr asnjë mesazh, se kam shkuar në një përshpirtje atje që duhet përshpirtje publike, më kanë parë i kam parë ata në sallë dhe jashtë studios s’më ka parë njeri. Drejtuesit e RTSH, të gjithë e dinë, nga unë nuk kanë marrë kurrë asnjë mesazh, se unë nuk e shoh dhe kur ndonjëri nga ju më thoni shiko çfarë bën RTSH. Të gjithë drejtorët i kam takuar pasi janë zgjedhur. U kam thënë mbylleni, nxirrni në ekran, televizioni publik i kërkon ndjesë popullit, të gjitha familjeve, në republikën e Shqipërisë dhe jashtë saj, i kërkon ndjesë dhe për të gjithë ata që nuk jetojnë më dhe që kanë qenë të detyruar siç jeni edhe ju të marrin shërbimin më mizerabël publik në glob, ju premtojmë se do reflektojmë dhe do rikthehemi në ekran kur të jemi gati dhe të bëjmë reformë. Si ka mundësi që televizionet e tjera me më pak buxhet shumë më tepër sukses, sepse buxhetin e tyre nuk e kanë të garantuar”, tha Rama.

86% e punimeve në autostradën Tiranë-Durrës kanë përfunduar.

Lajmin e jep vetë kryeministri Edi Rama përmes një postimi në rrjetet sociale.

“Kantieri Tiranë-Durrës. Ecuria e punimeve ka arritur në masën 86%”, shkruan Rama.

Por si kanë ecur punimet në këtë segment të rëndësishëm rrugor?

Kanë përfunduar punimet për shtresën e binderit pothuajse në të gjithë gjatësinë e projektit.

Në nyjen e Laknasit janë kryer punimet e pilotimit.

Në nyjen e Kasharit janë kryer punimet për realizimin e pilotave

Po vijojnë punimet:

– për përfundimin e ndërhyrjeve tek Ura mbi Lanë;
– për ndërtimin e segmentit nga mbikalimi i Kasharit deri tek Ura e Limuthit, ku kanë nisur edhe punimet për zgjerimin e trupit të rrugës.

Punimet po vijojnë sipas grafikut të punimeve, me fokus përmirësimin e infrastrukturës dhe rritjen e sigurisë rrugore, njoftojnë autoritetet.

Kryetari i Bashkisë së Tiranës, Erion Veliaj, ka depozituar sot një kallëzim penal pranë Prokurorisë së Juridiksionit të Përgjithshëm në Tiranë, për veprën penale të “Falsifikimit të dokumenteve”, parashikuar nga neni 186 i Kodit Penal.

Kallëzimi lidhet me një dëftesë njoftimi gjyqësore, e administruar në dosjen e Gjykatës së Posaçme të Apelit për Korrupsionin dhe Krimin e Organizuar, në të cilën figuron një nënshkrim në emër të Erion Veliajt, sikur ai të kishte marrë dijeni personalisht për një vendim gjyqësor.

Sipas kallëzimit penal, ky nënshkrim nuk është firma e tij, ndërsa verifikimet zyrtare tregojnë se vendimi i Apelit nuk ka mbërritur asnjëherë në Institucionin e Ekzekutimit të Vendimeve Penale Durrës, ku Veliaj ndodhet i paraburgosur. Ky fakt është konfirmuar zyrtarisht me shkresë nga vetë I.E.V.P. Durrës.

Në kallëzim thuhet se:

“mungesa absolute e njoftimit real dhe ekzistenca e një dëftese me nënshkrim jo autentik përbëjnë provë të drejtpërdrejtë të falsifikimit të aktit të komunikimit, me qëllim aktivizimin fiktiv të afateve procedurale për ushtrimin e rekursit në Gjykatën e Lartë”.

Sipas Veliajt, ky veprim cenon rëndë të drejtën kushtetuese për ankim, sigurinë juridike dhe parimin e procesit të rregullt ligjor, duke synuar realisht humbjen e së drejtës së rekursit përmes përdorimit të një akti zyrtar të rremë.

Në kallëzim kërkohet:

• regjistrimi i menjëhershëm i procedimit penal,
• ekspertim grafik i nënshkrimit,
• hetimi i zinxhirit të plotë të personave që kanë hartuar, administruar apo përdorur këtë dokument,
• hetimi i çdo vepre tjetër penale që mund të rezultojë gjatë hetimit, përfshirë shpërdorimin e detyrës.

Një kopje e kallëzimit penal i është depozituar gjithashtu Gjykatës së Lartë, si provë se afatet procedurale për ushtrimin e rekursit nuk kanë filluar kurrë ligjërisht, për shkak të mungesës së një njoftimi të vlefshëm.

26-vjeçari Armando Marku, i kërkuar nga Britania e Madhe për vrasje, është dorëzuar në Policinë e Tiranës.

Krimi për te cilin akuzohet është kryer në 2019, në Harlepool, ku viktimë mbeti Hemawand Ali Hussein, ish snajperist kurd.

Për këtë ngjarje, në Bruksel, në muajin dhjetor, është arrestuar edhe shqiptari Sajmir Dodoveci.

Lidhur me vrasjen, që dyshohet se e ka bërë Marku, janë dënuar edhe 4 persona të tjerë.

Eugert Merizaj, 33 vjeç, me 32 vjet burg; Noza Saffari, 42 vjeç, u dënua me 15 vjet burg; Dorian Pirija, 36 vjeç, u dënua me 19 vjet burg si edhe Qazim Marku, 28 vjeç, u dënua me 19 vjet burg.

Sevin Serjani, analist dhe anëtar i Departamentit për Mbrojtjen e Familjes në Partinë Demokratike, ishte i ftuari i gazetares Eliana Hoxha në Fax News për të komentuar aktualitetin politik në vend.

Serjani u ndal te sistemi i drejtësisë, pa anashkaluar edhe çështjen “Gjoka”.

“Duket sikur të gjithë prozhektorët janë te SPAK, te GJKKO dhe gjithçka rrotullohet rreth organeve, që janë edhe të posaçme. Problemi qëndron se, sistemi i drejtësisë është kryekëput i shkëputur nga realiteti ku qytetarët jetojnë. Kriza e madhe e mungesës së sistemit të drejtësisë. Ajo reformë ka krijuar sot, pas më shumë se 10 vjetësh, një kolaps total në të gjitha fazat e gjykatave. Nëse do ta merrnim për nga rëndësia, duke futur këtu edhe SPAK-un, pesha që ka në tërësinë e fokusit juridik, është shumë e vogël. Diku rreth 5%.

Ka disa muaj që edhe SPAK, pavarësisht se ka qenë nën kontrollin e qeverisë, dhe kjo jo e thënë jo klishte, ka ecur hap pas hapi sipas nevojës së Lartmadhërishmit, kryeministrit Edi Rama. Mos harrojmë edhe pyetjen “si ka mundësi Rama godet edhe të vetët?”, po ti referohemi edhe sistemit komunist në Shqipëri, përveç shtresave të deklasuara, kishte goditje edhe brenda sistemit. Dhe këto edhe në rangje të larta. Këto krijonin një formë trysnie dhe ishin një mënyrë unifikimi të pushtetit. Pra, fakti që goditen edhe majtas, nuk ka ndonjë gjë të re”, tha Serjani.

Sa i përket çështjes së gjyqtares të posaçme Irena Gjoka, e cila, pas verifikimit të Prokurorisë së Përgjithshme, rezulton e dënuar në Greqi për “falsifikim vizash”.

Një vendim i gjykatës së Janinës, i marrë korrikun e vitit 2005 për të dënuar gjyqtaren e GJKKO Irena Gjoka, është i vërtetë dhe autentik.

Verifikimi zgjati 2 vite ndërsa tashmë do t’i takojë Këshillit të Lartë Gjyqësor, I cili do të vendosë fatin e magjistrates.

“Irena dhe shumë të tjerë si Irena. Sistemi i drejtësisë është kryekëput produkt i Soros. Shqiptarët janë fokusuar te ndëshkimi dhe jo te dhënia e drejtësisë. Si Irena ka edhe shumë raste të tjera që nuk duhej të ishin në organet drejtuese në sajë të të kalurës së tyre, në sajë të veprave të tyre të mëparshme. Por gjatë procesit të Vettingut këtu u bë gjueti shtrigash”.

INTERVISTA E PLOTË:

Mbushet plot vit nga 20 janari 2025, kur Donald Trump u betua si Presidenti i 47-të i SHBA-ve.

Republikani premtonte “nisjen e epokës së artë” teksa merrte mandatin e dytë në krye të Shtëpisë së Bardhë.

Sot, 365 ditë më vonë, mund të bëhet një bilanc i punës së tij: nga tarifat te luftërat, te politika e brendshme.

Tarifat

Një nga gurët themelorë të politikës ekonomike të administratës së re Trump janë tarifat. Ato u njoftuan për vende të ndryshme, përfshirë ato të BE-së, por u tërhoqën më vonë. Kërcënimet fillestare u pasuan, në shumë raste, nga marrëveshje individuale, si në rastin e Mbretërisë së Bashkuar dhe Bashkimit Evropian, të cilët arritën një marrëveshje me Uashingtonin këtë verë: ekziston një tarifë gjithëpërfshirëse prej 15%, por ajo parashikon një sërë përjashtimesh për lloje të caktuara produktesh, me përqindje që mund të jenë më të larta ose më të ulëta se ai prag. Vende të tjera dhe zona të tjera të botës kanë qenë të detyruara të pranojnë kushte përfundimtare padyshim më të pafavorshme.

Analizat fillestare të efekteve të tarifave

Sipas një analize të kohëve të fundit të CNN, tarifat masive nuk e rritën ndjeshëm koston e jetesës në vitin 2025. Por situata mund të ndryshojë në vitin 2026. Shtetet e Bashkuara mblodhën 187 miliardë dollarë më shumë të ardhura nga tarifat në vitin 2025, krahasuar me vitin 2024, një rritje prej gati 200%. Deri më tani, kostot janë përballuar kryesisht nga kompanitë. Por tani po afron koha kur kompanitë do të fillojnë t’ua kalojnë këto kosto klientëve. “Shumë nga klientët tanë në fakt nuk donin t’i transferonin kostot, por tani janë të detyruar ta bëjnë këtë”, tha Kyle Peacock, kreu i Peacock Tariff Consulting. “Shumë zgjodhën ta bënin këtë menjëherë në fillim të këtij viti, ndërsa të tjerë planifikojnë të presin deri në fund të tremujorit të parë ose të dytë”, shtoi ai. Ekonomistët e Goldman Sachs vlerësuan se tarifat kanë shkaktuar një rritje të inflacionit me gjysmë pike përqindjeje në vitin 2025, afërsisht në përputhje me deklaratën e Kryetarit të Rezervës Federale, Jerome Powell, muajin e kaluar, sipas së cilës, tarifat e Trump ishin përgjegjëse për të gjithë rritjen e inflacionit mbi objektivin vjetor prej 2% të bankës qendrore (i cili e mbylli vitin me 2.7%). Goldman parashikon që inflacioni të rritet me tre të dhjetat e një pike përqindjeje vetëm në gjashtë muajt e parë të këtij viti, sipas një shënimi të publikuar në fund të dhjetorit.

Ecuria e ekonomisë amerikane

Sidoqoftë, viti 2025 përfundoi me një notë pozitive për ekonominë amerikane. PBB-ja e SHBA-së u rrit me 4.3%, nga korriku deri në fund të shtatorit. Sjellja e konsumatorit rezultoi vendimtare, me shpenzimet që u rritën me 3.5%.
Ndërkohë, në fjalimin e tij drejtuar kombit në dhjetor, Trump u premtoi amerikanëve një bum ekonomik, duke fajësuar paraardhësin e tij demokrat Joe Biden për çmimet e larta dhe vështirësitë që amerikanët kanë përballuar vitet e fundit. “Trashëgova një katastrofë”, por tani “Amerika është kthyer”.

Shkurtimet dhe pushimet nga puna në qeverinë federale

Që nga ditët e para të mandatit të tij të dytë, presidenti u përqendrua shumë në strukturën e qeverisë federale dhe agjencive të saj. Shkurtimet masive, çmontimi i agjencive të tëra dhe ristrukturimi radikal i të tjerave, si dhe shkurtimet drastike të fondeve, u zbatuan shpejt. Departamente të ndryshme, stafet dhe fondet e tyre u prekën. Trump emëroi CEO-n e Tesla-s, Elon Musk, për të udhëhequr këto operacione në Departamentin e Efektivitetit të Qeverisë (DOGE), por ai e la rolin e tij pas disa muajsh, jo pa polemika.
Pas shkurtimeve të vitit 2025, qeveria amerikane hyri në vitin 2026 me një fuqi punëtore shumë më të vogël dhe një sërë prioritetesh të rifokusuara që zhvendosën stafin dhe fondet larg çështjeve të tilla si ndihma e huaj, diversiteti, barazia dhe përfshirja, dhe zhvillimi i vaksinave, të konsideruara të papajtueshme me axhendën e re të Trump.

Gaza

Duke parë jashtë vendit, gjatë 12 muajve të tij në Shtëpinë e Bardhë, Trump ka deklaruar vazhdimisht se ka zgjidhur shumë luftëra, aq sa aspiron të fitojë Çmimin Nobel për Paqen. Përpjekjet e presidentit janë përqendruar kryesisht në luftën midis Izraelit dhe Hamasit dhe situatën në Gaza. Trump udhëhoqi marrëveshjen e paqes në Gaza të nënshkruar në Sharm el-Sheikh në tetor. Vetë Trump njoftoi në Knesset, parlamentin izraelit, “një agim historik të një Lindjeje të Mesme të re”. Megjithëse u arrit një marrëveshje, tensionet në Rripin e Gazës, vazhduan edhe pas nënshkrimit. Dhe vetëm kohët e fundit, më 3 janar, Sekretari i Përgjithshëm i Kombeve të Bashkuara Antonio Guterres i bëri thirrje Izraelit të heqë ndalimin e tij për agjencitë humanitare që ofrojnë ndihmë në Gaza, duke thënë se ishte “thellësisht i shqetësuar” për situatën.

Ukraina dhe Rusia

Që nga marrja e detyrës, Trump ka thënë vazhdimisht se do t’i jepte fund menjëherë konfliktit midis Rusisë dhe Ukrainës. Por lufta vazhdon e ashpër edhe sot. Në gusht, një samit u mbajt në Alaska midis Trump dhe Presidentit rus Putin. Të dy udhëheqësit folën për “përparim” dhe “marrëveshje”, por pa hyrë në detaje. Në muajt në vijim, Trump mbajti kontakte si me Moskën ashtu edhe me Kievin, pastaj, në nëntor, presidenti paraqiti një plan me 28 pika për paqe. Negociatat vazhduan, megjithëse manjati deklaroi së fundmi se “nuk ishte i kënaqur me Putinin; ai po vret shumë njerëz”.

Sulmi ndaj Iranit

Në qershor 2025, pas nëntë ditësh bombardimesh izraelite, Trump vendosi të mbështeste hapur shtetin hebre kundër Teheranit me fuqinë maksimale të mundshme ushtarake. Një sulm goditi tre vendndodhje bërthamore në Fordow, Natanz dhe Isfahan. Shefi i Pentagonit, Pete Hegseth, pretendoi se SHBA-të kishin “shkatërruar programin bërthamor të Iranit”. Tensionet me Teheranin vazhduan më pas. Dhe në fillim të vitit 2026, shpërthyen protesta në të gjithë vendin kundër situatës ekonomike dhe qeverisë. Mijëra viktima u rregjistruan. Qeveria bllokoi internetin. Trump, në këtë skenar, përmendi vazhdimisht mundësinë e ndërhyrjes së SHBA-së.

Venezuela

Por përpjekjet e politikës së jashtme të Trump u shtrinë shumë përtej Ukrainës dhe Lindjes së Mesme. Me Operacionin Absolute Resolve, në orën 2 të mëngjesit më 3 janar 2026 (ora 7 e mëngjesit sipas kohës italiane), shpërthime të fuqishme që zgjatën rreth 15 minuta goditën Karakasin, në Venezuelë. Qeveria venezueliane menjëherë “denoncoi agresionin shumë serioz ushtarak” nga Shtetet e Bashkuara. Maduro dhe gruaja e tij u kapën. Të prangosur, në bordin e Iwo Jima, ata më vonë mbërritën në Nju Jork, ku u akuzuan.

Bastisja venezueliane është pjesë e Operacionit më të gjerë “Shtiza Jugore” kundër trafikimit të drogës, të nisur nga SHBA-të në muajt e fundit në Karaibe. Megjithatë, shumë kanë theksuar se interesat amerikane janë më të gjera, siç e ka deklaruar vetë Trump që atëherë: Uashingtoni do të jetë “i përfshirë thellësisht në industrinë e naftës së Venezuelës”, e cila ka disa nga rezervat më të mëdha në planet. Ndërkohë, Trump e ka bërë tashmë të qartë se SHBA-të do ta drejtojnë vendin “për aq kohë sa të munden”, në pritje të një tranzicioni “të sigurt”.

Doktrina Monroe

Duhet theksuar se Trump përmendi Doktrinën Monroe – të shpallur në vitin 1823 nga Presidenti James Monroe – për të justifikuar sulmin ndaj Venezuelës. Manjati ka premtuar të “riafirmojë dhe zbatojë” Doktrinën Monroe “për të rivendosur epërsinë amerikane në Hemisferën Perëndimore dhe për të mbrojtur vendin”, siç thuhet në Strategjinë e tij të re të Sigurisë Kombëtare, e cila bazohet në një qëndrim “Amerika e para”.

Në thelb, pra, mund të thuhet se presidenti amerikan ka vendosur të pohojë ndikimin e SHBA-së në botën perëndimore, dhe veçanërisht në Shtetet e Bashkuara, duke u shtrirë përtej kufijve të SHBA-së, përmes një qëndrimi ekspansionist dhe ndërhyrës.

Kritika dhe paralajmërime për Kubën, Kolumbinë dhe Meksikën

Nuk është për t’u habitur që Venezuela nuk është i vetmi front i politikës së jashtme që Uashingtoni po synon. Vetëm 24 orë pas sulmit në Karakas, Sekretari i Shtetit Marco Rubio njoftoi se Kuba gjithashtu mund të jetë në shënjestër të SHBA-së: “Qeveria kubaneze është një problem i madh. Mendoj se ata janë në telashe të mëdha.”
Jo vetëm kaq. Kolumbia është gjithashtu me interes, e cila, sipas Trump, “qeveriset nga një njeri i sëmurë që i pëlqen të prodhojë kokainë, por jo për shumë gjatë”, sepse një “mision amerikan i ngjashëm” me atë të Venezuelës është i mundur në vend. Pastaj është Meksika e cila “duhet të marrë masa, duhet të bëjmë diçka”, edhe pse presidentja e saj Claudia Sheinbaum është “një person fantastik, i ofroj asaj mundësinë për të dërguar trupa çdo ditë”.

Rasti i Groenlandës

Në mandatin e tij të dytë në Shtëpinë e Bardhë, Trump po e sheh gjithashtu Groenlandën me shumë interes. Pasi u përpoq ta blinte atë në vitin 2019, presidenti tani po flet hapur për aneksimin dhe, në dhjetor 2025, madje ka emëruar një të dërguar special për të ndjekur çështjen. Ky i dërguar është Guvernatori i Luizianës, Jeff Landry.
Në janar 2026, në një intervistë me The Atlantic, manjati përsëriti: “Ne kemi absolutisht nevojë për Groenlandën”. Më pas ai njoftoi tarifa prej 10% për Danimarkën, Norvegjinë, Suedinë, Francën, Gjermaninë, Britaninë e Madhe, Holandën dhe Finlandën duke filluar nga shkurti, duke u rritur në 25% nga qershori, “derisa të arrihet një marrëveshje për blerjen e plotë dhe totale” të ishullit.

Lufta Kundër Imigracionit 
Duke u kthyer te çështjet e brendshme, një tjetër shtyllë e administratës Trump është lufta kundër imigracionit. Tensionet u përshkallëzuan, veçanërisht pasi një agjent i ICE (Kontrolli i Emigracionit dhe Doganave) qëlloi dhe vrau një grua 37-vjeçare amerikane, Renee Nicole Good, në makinën e saj gjatë një bastisjeje anti-emigrant në Minneapolis më 8 janar. Pas vrasjes, mijëra njerëz dolën në rrugë në disa qytete amerikane për të protestuar kundër këtij lloj dhune. Vetë Trump doli në mbrojtje të agjentit. “Ai qëlloi në vetëmbrojtje.” Kryetari i Bashkisë së Minneapolis, Jacob Frey, kritikoi të shtënat, duke e quajtur atë, veprimin e “një oficeri që përdori pushtetin e tij në mënyrë të pamatur, duke rezultuar në vrasjen e një personi”.

Futbollisti kuqezi, kishte dalë në ndihmë të sulmit për të tentuar një gol barazimi, meqë miqtë ishin në udhëheqje në ato minuta, edhe për Bodrumspor kishte gjetur rrjetën Taulant Seferi.

Pas një topi në zonë, Ajeti tentoi që të bënte një gjuajtje me veprim akrobatik. Por në vend që të kapte topin, ai goditi plotësisht në kokë një nga futbollistët kundërshtarë, duke e shtrirë të trullosur në tokë.

Gjyqtari i dha fillimisht kartonin e verdhë Ajetit, por më pas, u ftua nga VAR të shihte pamjet dhe ndryshoi ngjyrën e tij, duke i treguar të kuqin futbollistit të Kombëtares shqiptare.