Një avion privat luksoz në pronësi të biznesmenit amerikan Gil Dezer, mik i afërt dhe donator i familjes Trump, është përdorur nga autoritetet amerikane të emigracionit (ICE) për deportimin e palestinezëve nga SHBA drejt Izraelit dhe më pas në Bregun Perëndimor, zbulon investigimi i “The Guardian”.

Sipas raportimit, avioni tip Gulfstream ka kryer të paktën dy fluturime sekrete nga Arizona drejt Tel Avivit, duke transportuar burra palestinezë të arrestuar nga ICE.

Pas mbërritjes në Izrael, ata janë shoqëruar nga forcat e sigurisë dhe janë lënë në pika kontrolli në Bregun Perëndimor.

Një prej të deportuarve, 24-vjeçari Maher Awad, i cili kishte jetuar pothuajse gjithë jetën në SHBA dhe kishte familje atje, tha se ata u lanë “si kafshë në anë të rrugës”, të veshur me rroba burgu dhe pa asnjë ndihmë.

I gjithë operacioni konsiderohet politikisht i ndjeshëm dhe sinjalizon një ndryshim të qartë të politikës së deportimeve nën administratën Trump. Sipas organizatave të të drejtave të njeriut, përdorimi i avionëve privatë dhe mungesa e transparencës ngre shqetësime serioze për shkelje të të drejtave dhe mungesë llogaridhënieje.

Autoritetet amerikane dhe izraelite kanë refuzuar të komentojnë detajet e operacionit, ndërsa Departamenti i Sigurisë Kombëtare deklaroi shkurt se “çdo emigrant pa të drejtë qëndrimi do të largohet nga vendi”.

Rreth 12.8 milionë punëtorë në 22 vende të Bashkimit Europian paguhen me pagën minimale ose më pak, sipas një vlerësimi të Euronews bazuar në të dhënat e Eurostat.

Si rezultat, miliona persona po i ndjekin me kujdes njoftimet për pagën minimale për të parë nëse do të marrin një rritje të denjë në vitin e ri.

Megjithatë, rreth një e treta e përfituesve të pagës minimale nuk panë asnjë rritje në janar 2026 krahasuar me korrikun 2025. Në katër vende, nuk ka pasur fare rritje gjatë vitit të fundit.

Pra, në janar 2026, cilat vende europiane kanë pagat minimale më të larta? Sa vlejnë këto paga në terma të fuqisë blerëse? Dhe si ndryshojnë renditjet kur krahasohen shumat nominale në euro me fuqinë reale blerëse?

Mes vendeve të BE-së

Mes vendeve anëtare të BE-së, paga minimale mujore bruto varion nga 620 euro në Bullgari deri në 2,704 euro në Luksemburg. Kur përfshihen edhe vendet kandidate, Ukraina është një përjashtim ekstrem me vetëm 173 euro, e ndjekur nga Moldavia me 319 euro.

Pesë vende kanë paga minimale mbi 2,000 euro. Përveç Luksemburgut, këto janë Irlanda (2,391 euro), Gjermania (2,343 euro), Holanda (2,295 euro) dhe Belgjika (2,112 euro).

Poshtë këtij grupi kryesues, Franca qëndron në 1,823 euro, ndërsa Spanja bie në 1,381 euro, duke theksuar se sa shumë ndryshojnë nivelet edhe mes vendeve fqinje.

Eurostat i grupon pagat minimale në tre kategori: mbi 1,500 euro, mes 1,000 dhe 1,500 euro, dhe nën 1,000 euro.

Spanja, Sllovenia, Lituania, Polonia, Qiproja, Portugalia, Kroacia dhe Greqia bien në këtë grup të mesëm. Diferencat mes tyre janë relativisht të vogla.

Nën 1,000 euro në gjysmën e vendeve europiane

Mes 29 vendeve, 22 anëtare të BE-së dhe shtatë kandidate. paga minimale është nën 1,000 euro në 15 vende. Të gjitha vendet kandidate të BE-së bëjnë pjesë në këtë grup më të ulët. Në të përfshihen edhe disa vende të Europës Lindore.

Për shembull, paga minimale është 924 euro në Çeki, 838 euro në Hungari, 795 euro në Rumani, 654 euro në Turqi dhe 517 euro në Shqipëri. Tre vende kandidate kanë paga minimale më të larta se Bullgaria.

Fuqia blerëse ngushton renditjet

Kur krahasohen pagat minimale mes vendeve, standardet e fuqisë blerëse (PPS) kanë rëndësi, sepse kostoja e jetesës ndryshon shumë. Pasi bëhet përshtatja për fuqinë blerëse, hendeku mes vendeve ngushtohet ndjeshëm krahasuar me termat nominalë.

PPS ofron një krahasim më të drejtë duke përdorur një monedhë artificiale që pasqyron atë që njerëzit mund të blejnë realisht në çdo vend, duke barazuar fuqinë reale blerëse krahasuar me vlerat strikte në euro.

Një PPS është një njësi monetare artificiale që, në teori, blen të njëjtën shportë mallrash dhe shërbimesh në çdo vend.

Me këtë në mendje, mes 22 vendeve të BE-së, paga minimale varion nga 886 PPS në Estoni deri në 2,157 PPS në Gjermani.

Edhe pse renditjet ndryshojnë pak, nëntë vendet kryesuese mbeten të njëjta si në euro ashtu edhe në terma PPS.

Me përjashtim të Shqipërisë, vendet kandidate të BE-së performojnë më mirë në terma PPS, me fuqi blerëse më të lartë se disa vende anëtare të BE-së.

Shqipëria ka 708 njësi PPS dhe renditet e fundit në listë, duke zbritur dy vende në renditje, shumë poshtë vendeve të tjera të rajonit si Maqedonia e Veriut (1,069 PPS), Serbia (1,105 PPS) dhe Mali i Zi (1,058 PPS), çka tregon se edhe pasi merret parasysh kostoja e jetesës, paga minimale në Shqipëri mbetet me fuqinë reale më të ulët blerëse në Europë.

Mes 27 vendeve ku janë të disponueshme si të dhënat në euro ashtu edhe ato në PPS, Rumania është fituesja më e madhe: renditja e saj ngjitet nga vendi i 20-të në vendin e 12-të.

Maqedonia e Veriut gjithashtu përmirësohet, duke kaluar nga vendi i 26-të në terma euro në vendin e 20-të në terma PPS.

Serbia ngjitet nga vendi i 22-të në të 17-tin, ndërsa Turqia ngjitet me tre vende.

Në të kundërt, Çekia dhe Estonia janë humbëset më të mëdha, secila duke rënë tetë vende. Çekia zbret nga vendi i 16-të në të 24-tin, ndërsa Estonia nga vendi i 18-të në të 26-tin.

Nuk ka pagë minimale të përcaktuar me ligj në Itali, Austri dhe në tre vende nordike: Suedi, Danimarkë dhe Finlandë.

Ku nuk ndryshuan pagat minimale?

Mes vendeve të BE-së, paga minimale mbeti e pandryshuar në Belgjikë, Estoni, Greqi, Spanjë, Luksemburg dhe Slloveni mes korrikut 2025 dhe janarit 2026.

Bullgaria, Hungaria, Lituania dhe Sllovakia shënuan rritjet më të mëdha, secila me më shumë se 11% gjatë kësaj periudhe.

Ajo mbeti e njëjtë edhe në Estoni, Spanjë dhe Slloveni mes janarit 2025 dhe janarit 2026. Në Rumani, paga minimale në monedhën kombëtare mbeti e pandryshuar, por ra lehtë në terma euro në të dyja periudhat.

Arsyet pas diferencave

Ekspertët e Institutit Europian të Sindikatave (ETUI) vërejnë se produktiviteti më i lartë është baza për paga dhe rroga më të larta në mënyrë të qëndrueshme. Ekonomitë me aktivitet industrial ose financiar më të fortë priren të jenë më produktive.

Industria e teknologjisë së lartë zakonisht tregon gjithashtu produktivitet më të lartë. Një faktor tjetër kyç është fuqia më e madhe negociuese e punëtorëve. / Euronews

Deputeti Shpëtim Idrizi dhe biznesmeni Klodian Allajbeu dyshohet se qëndrojnë pas një kompanie fantazmë në Angli, duke qarkulluar qindra mijëra euro me burim të errët, me qëllim për t’i shpëtuar veprimit të autoriteteve ligjzbatuese shqiptare.

Shpëtim Idrizi dhe Klod Allajbeu, i pari me kompani ndërtimi në emrin e të birit, pasuri të dyshimtë dhe prona, ndërsa i dyti përfitues i tenderave dhe koncensioneve me vlerë mbi 150 milionë euro në shëndetësi, rezulton se kanë lëvizur dhe qarkulluar flukse parash në offshore të Anglisë.

Në 1 shkurt 2017, djali i Shpëtim Idrizit, Denion Idrizi do t’i bashkohej kompanisë K & D Commerce Limited me bazë në Londër. Disa muaj më pas, në gusht 15 gusht 2017, në kompani do të caktohet si drejtor (director) Klodian Allajbeu, i cili po hetohet nga SPAK nën dyshimet për pastrim parash, korrupsion dhe manipulim të procedurave tenderuese.

Vetëm disa ditë më parë një skuadër e BKH ushtroi kontrolle në kompaninë Evita të Allajbeut, me fije të errëta nga Berati, në Tiranë, Holandë deri në Londër.

LEXO EDHE: SPAK dhe BKH zbarkojnë te Klodian Allajbeu, kontrolle te “Evita”

Sipas dokumenteve të siguruara nga regjistri anglez, Allajbeu ka qenë aksioner që prej 30 shtatorit 2016 në kompaninë K & D Commerce Limited, përmes të cilës ka dyshime se qarkullon paratë e përfituara në shëndetësi për shërbime fiktive (sipas KLSH).

Ndërkaq, në 13 shtator 2017, Denion Idrizi do të jepte dorëheqjen nga kompania, ndërsa Klodian Allajbeu, i cili qëndron pas koncensionit 84 milionë euro të hemodializës, është edhe sot e kësaj dite aksioner në kompaninë K & D Commerce Limited.

Kompania nuk ka punonjës, por ka qarkulluar miliona euro. Vetëm në vitin që u largua Idrizi, kompania kishte të ardhura mbi 400 mijë paund ose rreth 600 milionë lekë. Duke analizuar të dhënat nga deklarimi i pasurisë nga Shpëtim Idrizi për vitin 2017 te Inspektorati i Lartë i Deklarimit dhe Kontrollit të Pasurive dhe Konfliktit të Interesave (ILDKPKI), rezulton se Denion Idrizi, person i lidhur dhe subjekt deklarimi, nuk ka deklaruar asgjë për vitin 2017, fakt i cili ngre dyshime serioze për fshehje të pasurisë.

Ortakëria në biznes mes Shpëtim Idrizit (kamufluar përmes të birit) dhe biznesmenit të spitaleve Klod Allajbeu nuk është episodike. Një vit pas ‘bashkëpunimit’ në Londër, (në vitin 2018) të dy së bashku, Denion Idrizi dhe Klodian Allajbeu do të themelonin kompaninë e ndërtimit “Solid Construction”, e cilën më vonë do t’i kalonte plotësisht Denion Idrizit.

Në janar 2025, Shpëtim Idrizi, përmes të birit, ka hapur edhe një restorant tek Kalaja e Tiranës, me kompaninë 2D FOOD FACTORY shpk. Ish doganieri që mbron Çështjen Çame, gjithnjë përmes të birit, kontrollon edhe kompaninë PARKNGO shpk, themeluar në 2017, përmes të cilës menaxhon disa parkingje në Kashar të Tiranës. Kompania nuk figuron në deklarimin e pasurisë në vitin 2017 dhe as të ardhura prej saj.

Deputeti Shpëtim Idrizi, përmes të birit, qëndron kompanive të ndërtimit DLSOL shpk, Geland shpk dhe CONINVEST shpk, në këtë të fundit në ortakëri me biznesmenin e ndërtimit Arjan Çukajn, përfitues lejesh për kulla edhe gjatë kohës kur Çukaj ishte anëtar i Këshillit Bashkiak të Tiranës.

Përveç kompanisë “Coninvest Sh.pk” me Shpëtim Idrizin, Arjan Çukaj është pronar i 10 firmave të tjera, ku eksperte bilancesh ka Enkela Idrizin, gruan e Shpëtimit, ndërsa si n/kontraktor, përdor firmën tjetër “Dlsol Sh.p.k” të djalit Denion Idrizi.

Në vitin 2021, kreu i PDIU ka deklaruar pasurinë e plotë. Idrizi deklaron dy apartamente në Tiranë dhe Durrës, si dhe 25 % të ish ndërmarrjes së përpunimit të drurit me sipërfaqe 1.6 mijë m2. Idrizi deklaron se ka blerë edhe një makinë në vitin 2008 me vlerë 55 mijë euro.

Në vitin 2022, Idrizi deklaron se ka shitur një apartament 82 m2 me vlerë 59 mijë euro. Në vitin 2023, Idrizi deklaron se ka shitur një tjetër apartament 125 m2 me vlerë 145 mijë USD. Po në vitin 2023, bashkëshortja e Idrizit, Enkela Idrizi, e cila punon në Bankën e Shqipërisë, deklaron të ardhura nga shitja e tre pasurive të paluajtshme, 145 mijë euro, 52 mijë euro dhe 195 mijë euro.

Shuma 195 mijë euro, deklaruar si e ardhur nga shitja e aseteve, duket tejet e dyshimtë dhe nuk përkon me ndonjë pasuri të deklaruar në deklaratën e pasurisë fillestare në vitin 2021. Shuma 195 mijë euro dyshohet se buron nga shitja e një pasurie të padeklaruar në ILDKPKI. /Prapaskena

Presidenti i Serbisë, Aleksandar Vuçiç, ka akuzuar drejtpërdrejt disa vende të rajonit dhe organizata ndërkombëtare, përfshirë USAID dhe National Endowment for Democracy (NED), se kanë mbështetur dhe nxitur protestat kundër qeverisë së tij.

Sipas Vuçiç, protestat në Serbi nuk janë vetëm shprehje e pakënaqësisë qytetare, por kanë pasur mbështetje të koordinuar nga jashtë, përfshirë shërbime sekrete rajonale dhe aktorë ndërkombëtarë.

Ai përmendi konkretisht Kroacinë, duke e akuzuar për ndikim përmes mediave dhe për mbrojtje të personave të dyshuar për krime të rënda, ndërsa shtoi se aktivitete të ngjashme kanë pasur edhe Prishtina, Tirana dhe qendra të tjera rajonale.

“USAID, NED dhe organizata të tjera ishin gjithashtu të përfshira”, tha Vuçiç, duke pretenduar se disa protestues kanë marrë trajnime dhe mbështetje financiare nga këto struktura për të organizuar protesta kundër qeverisë.

Vuçiç pranoi ekzistencën e problemeve të brendshme dhe pakënaqësive qytetare në Serbi, por theksoi se, sipas tij, këto po shfrytëzohen nga faktorë të jashtëm për të destabilizuar vendin.

Gazetari i kronikës Artan Hoxha ka publikuar pamjet e sulmit me armë me kallashnikov të ndodhur pak ditë më parë në fshatin Rrilë të Lezhës.

“Të frikshme përmasat e sulmit me Kallashnikovë në fshatin Rrilë të Lezhës.

Fuqia e zjarrit ndaj berberanës së Sokol Dacit, i plagosur rëndë, duket si një sulm kartelesh në Amerikën Latine.

Vetëm Zoti, duket se u tregua i mëshirshëm, pasi bëri të mundur të shpëtohen nga vdekja e sigurtë, jetët e personave që ndodheshin brenda berberanës dhe jashtë saj, në një hapsirë prej 10 metrash katrorë.

Në pamje, momenti kur dy autorë të armatosur me Kallashnikovë, të dyshuar si pjestarë të fisit Ndokaj, hapin zjarr mbi berberanën e Sokol Dacit, brenda së cilës ndodheshin dy pjestarë të fisit Nikulaj dhe një efektiv policie mik i tyre.

Në shkëmbimin e zjarrit dyshohet se janë përfshirë të paktën 4 persona, dy me pistoleta nga brenda lokalit dhe dy me Kallashnikovë nga jashtë lokalit”, shkruan Hoxha në postimin e tij në Facebook.

Atentati u regjistrua mbrëmjen e 2 shkurtit në fshatin Rrilë, Njësia Administrative Shënkoll, në Lezhë, ku një person mbeti i plagosur pas të shtënave me armë zjarri, gjatë një sulmi ndaj një berberhaneje.

Lidhur me ngjarjen, policia e Lezhës shpalli në kërkim 4 persona, tre të rinj nga fisi Ndoka dhe Merando Nikulajn që dyshohet se ishte shënjestra e atentatit dhe ndodhej brenda në berberhane, i shoqëruar nga polici me iniciale B.K. i cili u ndalua me urdhër të prokurorisë për veprën penale të “shpërdorimit të detyrës”.

Merando Nikulaj ka qenë bashkë me policin me iniciale B.K. duke darkuar dhe pasi kanë përfunduar darkën kanë shkuar në Rrilë për t’u qethur. Dyshohet se autorët të cilët kanë qenë me dy automjete, një “Audi” dhe “Passat” i kanë vëzhguar dhe kanë ndjekur lëvizjet e tyre deri kur kanë mbërritur në berberhane dhe më pas ka ndaluar duke zbrituar nga makinat. Dy kanë qëlluar me armë zjarri.

Ndërkohë ka pasur edhe shkëmbim zjarri, polici në berberhane është kundërpërgjigjur. Brenda në berberhane është gjetur një çantë krahu me një krehër brenda, por ishin hequr kartat e identitetit. Ka dyshime për një armë të dytë të përdorur nga personat që ndodheshin brenda në berberhane.

Shkaqet e ngjarjes dyshohet një konflikt midis të rinjve të fisit Nikulaj dhe Ndoka të ndodhur në 9 mars 2025 në Shëngjin. Ngjarja e cila asokohe nuk u hetua siç duhet nga policia dhe zyrtarisht deklaroi se ishte aksident me motor dhe makinë.

Huaja e re e dhënë nga sektori bankar gjatë dhjetorit të vitit që lamë pas arriti në rreth 62.3 miliardë lekë, ose 640 milionë euro, niveli më i lartë mujor i regjistruar jo vetëm gjatë vitit 2025, por edhe në një shtrirje më të gjerë kohore ndër vite.

Krahasuar me dhjetorin e vitit 2024, huaja e re rezulton rreth 30% më e lartë.

E ndarë në kategori, kredia për bizneset arriti pranë 510 milionë euro, me rritje vjetore rreth 32%.

Edhe kreditimi për individët ka shfaqur një ecuri pozitive. Gjatë dhjetorit, huaja e re për këtë segment u ngjit në rreth 130 milionë euro, çka tregon se kërkesa për kredi konsumatore dhe financim familjar mbetet e fortë, veçanërisht në fundvit.

Një peshë të veçantë në kreditimin e individëve vijon të ketë financimi për blerje banese. Vetëm gjatë dhjetorit, huaja e re për këtë qëllim arriti rreth 57 milionë euro.

Në total, gjatë gjithë vitit 2025, bankat kanë dhënë rreth 660 milionë euro kredi për blerje banese për individët.

Ndërkohë, në total përgjatë gjithë vitit 2025, sektori bankar ka disbursuar rreth 4.5 miliardë euro, nga të cilat 3.1 mld për bizneset.

Krahasuar me vitin 2024, kur huaja e re ishte 3.8 miliardë euro, rritja vjetore për vitin 2025 llogaritet pranë 15%.

Miliona dokumente që lidhen me Jeffrey Epstein, të publikuara të premten e kaluar nga Departamenti Amerikan i Drejtësisë, zbulojnë se në vitin 2015 është zhvilluar një korrespondencë elektronike mes Epstein dhe miliarderit Bill Gates lidhur me një “simulim pandemie”.

Një email me subjekt “Përgatitja për Pandemitë”, i datës 20 mars 2015, iu dërgua Epsteinit nga një person, emri i të cilit është fshirë nga dokumentet e publikuara. Mesazhi përmbante një draft-axhendë për një takim përgatitor mbi pandemitë, si dhe sugjerime për përfshirjen e Organizatës Botërore të Shëndetësisë (OBSH) dhe Komitetit Ndërkombëtar të Kryqit të Kuq (KNKK).

Sipas citimeve të medias koreane Chosun Biz, autori i emailit i shkruante Epsteinit:
“Siç u kërkua, po bashkëngjit një draft axhendë për një takim përgatitor mbi pandeminë”, duke shtuar se duhej diskutuar “mënyra e përfshirjes zyrtare të OBSH-së dhe KNKK-së”.

Gazeta ruse Izvestia raportoi të martën se dokumentet e Epstein përmbajnë diskutime mes tij dhe Bill Gates lidhur me modelimin e pandemive dhe projekte biomjekësore, çka ka nxitur spekulime se personi i paidentifikuar në emailin e vitit 2015 mund të ketë qenë vetë Gates.

Sipas raportit, emaili në fjalë i ishte dërguar fillimisht Bill Gates në vitin 2017 nga një person tjetër dhe më pas ishte përcjellë te Epstein. Në të diskutoheshin koncepte për simulimin e skenarëve të shpërthimeve të sëmundjeve në shkallë të gjerë, kërkimi në neuroteknologji dhe përhapja globale e infeksioneve.

Këto diskutime mbi skenarët e pandemive u zhvilluan disa vite përpara shfaqjes së COVID-19.

Në tetor 2019, Fondacioni Bill & Melinda Gates sponsorizoi një simulim global pandemie të quajtur “Eventi 201”, i organizuar në bashkëpunim me Qendrën Johns Hopkins për Sigurinë Shëndetësore dhe Forumin Ekonomik Botëror. Qëllimi i simulimit ishte testimi i gatishmërisë globale për një shpërthim të imagjinuar viral.

Megjithatë, Fondacioni Gates ka theksuar se “Eventi 201” ishte vetëm një ushtrim teorik dhe nuk përbënte planifikim apo parashikim të një pandemie reale.

Fondacioni Gates ka kontribuar prej vitesh në projekte të ndryshme qeveritare, veçanërisht në fushën e barnave dhe vaksinave, duke financuar edhe kërkime përmes Agjencisë Rregullatore të Barnave dhe Produkteve të Kujdesit Shëndetësor.

Jeffrey Epstein, një pedofil i dënuar që vdiq në një burg amerikan në vitin 2019, ka pretenduar gjithashtu se Bill Gates i kishte kërkuar antibiotikë për t’ia dhënë fshehurazi gruas së tij të atëhershme, Melinda Gates.

Në një email tjetër, Epstein i shkruante ish-ambasadorit britanik në SHBA, Peter Mandelson, se po “kalonte shumë mirë” me Gates gjatë një vizite në Seattle.

Rreth 3 milionë faqe dokumentesh, të publikuara gjatë administratës së ish-presidentit Donald Trump, përmbajnë gjithashtu fotografi të reja të Epstein me Gates. Bill Gates nuk ka komentuar mbi këto pretendime.

Në një intervistë të vitit 2021 për CNN me Anderson Cooper, Gates e quajti marrëdhënien e tij me Epstein “një gabim të madh”, duke minimizuar kontaktet mes tyre dhe duke deklaruar se kishte darkuar disa herë me të me shpresën për të siguruar donacione për fondacionin e tij.

Lidhja e Gates me Epstein, e cila nisi rreth vitit 2011 pas dënimit të Epstein për shfrytëzim seksual të një të miture  raportohet se ka qenë një nga arsyet që çoi Melinda French Gates drejt kërkesës për divorc.

Në një email të vitit 2013, i mbushur me gabime drejtshkrimore, Epstein shkruante se kishte vendosur të tërhiqej nga roli i tij në Fondacionin Gates dhe BG3, një organizatë kërkimore e themeluar nga Gates, pasi veprimet e tij kishin qenë “në qendër të një mosmarrëveshjeje shumë serioze martesore mes Melindës dhe Billit”.

Ai pretendonte gjithashtu se Gates i kishte kërkuar të merrte pjesë në veprime që “varionin nga të papërshtatshmet deri te imoralet dhe të paligjshmet”.

“Foltorja” e Partisë Demokratike është ndalur sot në njësinë nr.7 në Tiranë.

Gjatë fjalës së tij, kreu i PD-së, Sali Berisha u shpreh se, këto takime vijnë në një moment të vështirë për Shqipërinë dhe të mundishme për opozitën.

Sipas tij,

Berisha: Ne zhvillojmë këtë takim, këtë bisedë në një moment kritik, vërtet kritik për vendin.

Kritik sepse në këto vite të opozitës tonë të vështirë, të mundimshme, të opozitës në kushtet e një shtypje reale, ka ndodhur që me mekanizmin e shndërrimit të krimit në votë dhe votës në krim, të mashtrimit në votë dhe votës në mashtrim, të vjedhjes dhe plaçkitjes tuaj në votë, dhe votës në vjedhje dhe plaçkitje, sot kemi ardhur në një kohë të papërsëritshme, e cila, duhet të themi haptas, nuk ka ekzistuar që nga viti 90 gjer në ditën e sotme.

Sot, pasi shndërroi zgjedhjet në farsë elektorale, tani mandatet e marra me këto, në këtë farsë, përdoren si mburojë e krimit, përdoren si mburojë e plaçkitjeve, përdoren si mekanizëm, përdoren si faktor për të kryer një grusht shteti më të keq, jua them unë këtu, shumë më të keq se ai që bëri Ramiz Alia në shkurt të vitit ’91.

Po, më të keq. Më të rrezikshëm.

Tani, një njeri i cili duke përdorur të gjithë fuqinë ekzekutive, fuqinë e pushtetit të tij, duke shkelur çdo ligj dhe normë, i ka shndërruar zgjedhjet në farsë elektorale, dhe jo në 2026-ën, jo. I ka shndërruar zgjedhjet në farsë elektorale nga 2017 dhe këtej.

Ju, ne kemi fituar në 2021-shin. Jua them me bindjen më absolute. Por ai i rrëmbeu zgjedhjet. Si i rrëmbeu zgjedhjet? Po sepse shpërndau në zonën e Durrësit, Krujës, Kurbinit, Lezhës, Tiranës, Kavajës, 130 milionë euro. Me thesar, me fatura thesari. Kujt? Jua shpërndau atyre të dëmtuarve nga tërmeti, por i shpërndan krejtësisht me hartë elektorale në mënyrë që të blinte votat. Dhe dikush merrte 5.000, dikush merrte 10.000, dikush merrte 20.000 dhe me radhë, dhe i mori, ai mori votat. Ai mori votat.

Zgjedhjet ishte, s’do të merremi, por në një akt, jua them këtu, ishte në tradhti e vërtetë të atij që kishim kryetar, që nuk e mbrojti. Nuk e mbrojti votën. Miq, pa asnjë justifikim. Por kam shkruajtur me datën 27 prill një artikull ku them, vota vdiq pa hyrë në kuti. Dhe i them atij, zotërinj, tani detyra jonë është të mbrojmë votën. Të mbledhim çdo provë, çdo fakt, çdo dokument dhe t’i faktojmë shqiptarëve dhe botës se zgjedhjet ishin farsë. Sepse ishin farsë.

Sepse kurrë, kurrë nuk do të pranoja të njollosja një proces zgjedhor të drejtë. Por nuk mund të pranoj kurrë një proces zgjedhor që është farsë.

Kujtojmë se, më 10 shkurt, Partia Demokratike dhe aleatët e saj zhvillojnë protestën e rradhës kombëtare në Tiranë ndaj dhe Berisha përfitoi nga ky takim për ti bërë thirrje të gjithë qytetarëve ti bashkohen asaj.

Pas publikimit të lajmeve në disa media, sipas të cilave, aksioni i policisë për ndalimin e përkohshëm të qarkullimit të monopatinave dështoi dhe u shua gradualisht.

Sipas tyre, sot çdo qytetar mund të lëvizë sërish me monopatinë elektrike pa asnjë kufizim dhe pa u ndalur nga policia

Lidhur me këtë ka reaguar ministrja e brendshme Albana Koçiu, sipas së cilës: “Udhëzimi për ndalimin e qarkullimit me monopatina mbetet në fuqi. Nuk ka asnjë vendim për heqjen e masës së ndalimit të përkohshëm”.

Reagim i Ministres Albana Koçiu, në rrjetet sociale:

“E PAVËRTETË!

Udhëzimi për ndalimin e qarkullimit me monopatina mbetet në fuqi. Nuk ka asnjë vendim për heqjen e masës së ndalimit të përkohshëm. Policia e Shtetit vijon angazhimin e përditshëm në terren për garantimin e zbatimit të plotë të këtij udhëzimi, në përputhje me njoftimet zyrtare të bëra më herët.

Shpreh mirënjohje për qytetarët për bashkëpunimin dhe mirëkuptimin në respektimin e kësaj mase, e cila synon mbrojtjen e sigurisë dhe jetës, në veçanti të të rinjve.

Të dhënat e Policisë së Shtetit dhe të shërbimeve të traumës konfirmojnë një rënie të ndjeshme të numrit të aksidenteve gjatë periudhës së zbatimit të saj.

Ministria e Punëve të Brendshme, në bashkëpunim me institucionet përgjegjëse, po vijon vlerësimin e situatës për të përcaktuar vendimmarrjen më të drejtë, duke vendosur në qendër të çdo hapi sigurinë dhe jetën e çdo qytetari”.

Kryetari i Grupit Parlamentar të PD Gazment Bardhi, Kryetari i Partisë Republikane Fatmir Mediu, Kryetarja e Komisionit të të Drejtave të Njeriut Jorida Tabaku dhe deputetja Albana Vokshi, gjatë vizitës së tyre në Washington, janë takuar edhe me kongresmenin Michael R. Turner, i cili ka drejtuar për një kohë të gjatë Komitetit e Inteligjencës në Kongres.

Deputetët e opozitës kanë theksuar nevojën e forcimit të partneritetit mes Shqiprisë dhe Shteteve të Bashkuara të Amerikës, ndërsa sipas tyre e ka jetike që të përkushtohet në prioritetin e Presidentit Donald Trump për luftë pa kompromis ndaj krimit të organizuar, karteleve të drogës dhe bashkëpunëtorëve të tyre.

Deputetët e opozitës ndanë me kongresmenim Turner shqetësimin në raport me këtë prioritet strategjik dhe pasojat që ka bashkëqeverisja me krimin e organizuar në Shqipëri, në aleancën strategjike me SHBA.

LEXO EDHE: Takimi në Kongresin Amerikan, Xhixho: Lufta ndaj krimit të organizuar, test i partneritetit Shqipëri-SHBA

Presidenti i Trabzonspor, Ertugrul Dogan ka zbuluar disa detaje të reja sa i përket pagesave.

Rreth 8 milionë euro nuk do të paguhen menjëherë, por kësti i parë do të kalojë në arkën e Beshiktashit në muajin korrik. Gjithçka pasi trajneri Fatih Teke të bindë drejtuesit me raportin e tij.

“Kur Trabzonspor dëshiron të përdorë opsionin për Muçin, mund ta përfshijë lojtarin në skuadër duke paguar këstin e parë të parashikuar në kontratë, prej 1.5-2 milionë euro, në fund të muajit korrik”, u shpreh fillimisht presidenti i Trabzonsporit.

“Nëse trajneri ynë kërkon që opsioni të përdoret në fund të sezonit, gjë që nga pamja e jashtme duket se do të ndodhë… procesi do të ecë plotësisht në përputhje me vlerësimin teknik”, vijoi Dogan.

Do të jetë pagesa e parë në fundin e muajit korrik, që do t’i hapë rrugë kalimit përfundimtar. Dhe duket se Trabzonspori nuk po nxitohen.

LEXO EDHE: VIDEO/ Super-gol dhe asist, tjetër mbrëmje magjike për Ernest Muçin

Deputetja e Partisë së Lirisë, Erisa Xhixho vijon takimet në Shtetet e Bashkuara.

Së fundmi, ajo është takuar me kongresmenin Robert Aderholt, ku u diskutua mbi forcimin e mëtejshëm të partneritetit strategjik mes Shqipërisë dhe Shteteve të Bashkuara të Amerikës.

Gjatë takimit, Xhixho theksoi shqetësimin e saj për ndikimin e karteleve të drogës dhe krimit të organizuar në Shqipëri, duke vënë në pah rëndësinë e përkushtimit të SHBA-së për ta vendosur luftën kundër tyre në krye të axhendës së sigurisë.

Ajo gjithashtu ngriti çështjen e përdorimit të drejtësisë nga qeveria si një mjet për të goditur kundërshtarët politikë.

Deputetja nënvizoi më tej se, Shqipëria, si vend anëtar i NATO-s dhe kandidat për Bashkimin Europian, duhet të përqendrohet në reforma reale që forcojnë sigurinë, demokracinë dhe qeverisjen e mirë.

Postimi i plotë i Xhixhos:

Në Kongresin Amerikan, u takova me kongresmenin Robert Aderholt, me të cilin diskutuam mbi forcimin e mëtejshëm të partneritetit strategjik mes Shqipërisë dhe Shteteve të Bashkuara të Amerikës.

Gjatë bisedës, shpreha shqetësimin për ndikimin e karteleve të drogës dhe krimit të organizuar në Shqipëri, si edhe theksova rëndësinë që ka përkushtimi i SHBA-së për ta vendosur luftën kundër tyre në krye të axhendës së sigurisë. Po ashtu, ngrita shqetësimin për përdorimin e drejtësisë nga qeveria si mjet për të luftuar kundërshtarët politikë.

Shqipëria, si vend anëtar i NATO-s dhe vend kandidat për Bashkimin Europian, duhet të fokusohet në reforma reale që forcojnë sigurinë, demokracinë dhe qeverisjen e mirë. Partneriteti strategjik me SHBA-në mbetet kyç dhe duhet të forcohet mbi bazën e prioriteteve të përbashkëta.

Uashingtoni dhe Moska po punojnë për një marrëveshje për të vazhduar traktatin e ri START për reduktimin e armëve bërthamore, raportoi Axios të enjten, duke cituar tre burime të njohura me çështjen. Marrëveshja për kontrollin strategjik të armëve skadoi zyrtarisht më 5 shkurt.

I nënshkruar në vitin 2010, traktati vendosi kufizime në numrin e kokave bërthamore strategjike dhe lëshuesve që mund të vendosen dhe krijon mekanizma monitorimi për arsenalet ruse dhe amerikane.

Fillimisht ishte caktuar të skadonte në vitin 2021, por në atë kohë u zgjat për pesë vjet.

Sipas Axios, dhëndri i Presidentit Donald Trump, Jared Kushner, dhe i dërguari i posaçëm Steve Witkoff diskutuan çështjen me delegacionin rus në kuadër të bisedimeve të paqes në Ukrainë në Abu Dhabi.

“Ne ramë dakord me Rusinë të vepronim me mirëbesim dhe të fillonim një diskutim rreth mënyrave se si mund të përditësohej”, tha një zyrtar amerikan për median.

Një burim tjetër pohoi se palët kishin rënë dakord të respektonin kushtet e traktatit për të paktën gjashtë muaj, ndërsa bisedimet për një marrëveshje të re të mundshme do të vazhdonin.

Më herët të enjten, zëdhënësi i Kremlinit, Dmitry Peskov, tha se Moska sugjeroi që të respektoheshin dispozitat e traktatit për një vit tjetër, por iniciativa e saj “mbeti pa përgjigje”.

Rusia do të “ruajë qasjen e saj të përgjegjshme dhe të vëmendshme në fushën e stabilitetit strategjik dhe armëve bërthamore”, por gjithmonë do të “udhëhiqet kryesisht nga interesat e saj kombëtare”, tha ai.

OKB-ja e quajti gjithashtu skadimin e traktatit “një moment të rëndë për paqen dhe sigurinë ndërkombëtare”. Sekretari i Përgjithshëm Antonio Guterres paralajmëroi se “rreziku i përdorimit të një arme bërthamore është më i larti në dekada”, ndërsa i kërkoi Moskës dhe Uashingtonit të negociojnë një kornizë pasuese.

Presidenti rus Vladimir Putin i kishte propozuar më parë homologut të tij amerikan Donald Trump një zgjatje njëvjeçare të traktatit, por presidenti amerikan tha se donte një marrëveshje “më të mirë” që përfshinte edhe Kinën.

Gjykata e Posaçme ka dënuar 3 prej të akuzuarve të grupit prej 6 personash, që dyshohet se merrnin ryshfet kundrejt premtimeve se mund të ushtronin ndikim të funksionarët e drejtësisë për të ndryshuar masat e sigurisë.

Përpos ish-shefit të Krimeve në Tiranë, Erjon Danit, SPAK dërgoi për gjykim në 28 tetor 2025 Sokol Mashën, Musa Gjikolën, Emiljano (Millan) Roçin, Klodjan Muçën dhe Vilson Roçin.

Erjon Dani

Ndërkohë ditën e sotme, GJKKO ka dënuar tre prej të pandehurve të cilët janë Musa Gjikola, Erjon Dani dhe Vilson Roçi.

Gjikola u shpall fajtor për veprën penale “ushtrimi i ndikimit të paligjshëm ndaj personave që ushtrojnë funksione publike” dhe u dënua me 1 vit e 6 muaj burg, nga të cilat, për shkak të gjykimit të shkurtuar do të vuajë vetëm 1 vit.

Erion Dani u shpall fajtor për të njëjtën vepër penale si Gjikola në 2 episode dhe u dënua me 3 vite burg, nga të cilat për shkak të gjykimit të shkurtuar do të vuajë vetëm 2 vite.

Ndërkohë edhe Vilson Roçi është shpallur fajtor për veprën penale “ushtrimi i ndikimit të paligjshëm ndaj personave që ushtrojnë funksione publike” dhe u dënua me 1 vit e 6 muaj burg, nga të cilat, për shkak të gjykimit të shkurtuar do të vuajë vetëm 1 vit.

Po ashtu GJKKO bën të ditur se llogaritja e dënimit për këta të pandehur fillon nga momenti i arrestimit të tyre më datë 11.07.2025.

Njoftimi i GJKKO:

1. Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Gjykimin e çështjes penale me nr. 177/1 procedimi të vitit 2025, ndaj të pandehurve Musa Gjikola, Erjon Dani dhe Vilson Roçi”.
2. Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Rudina Palloj, Atalanta Zeqiraj dhe Flojera Davidhi, me vendimin nr. 9, datë 05.02.2026 vendosi:
3. Deklarimin fajtor të të pandehurit Musa Gjikola për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”, në bashkëpunim (për episodin 1), parashikuar nga neni 245/1, pg. 1 dhe 25 i Kodit Penal (sipas formulimit të dispozitës para ndryshimeve me ligjin nr. 43/2021) dhe dënimin e tij me 1 (një) vit e 6 (gjashtë) muaj burgim.
4. Në aplikim të nenit 406/1 të Kodit të Procedurës Penale të pandehurit Musa Gjikola i ulet 1/3 (një e treta) e dënimit, duke u dënuar përfundimisht me 1 (një) vit burgim.
5. Llogaritja e dënimit për të pandehurin Musa Gjikola fillon nga momenti i arrestimit të tij më datë 11.07.2025, dhe dënimi me burgim do të vuhet në një burg të sigurisë së zakonshme.
6. Deklarimin fajtor të të pandehurit Erjon Dani për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”, (për episodin 1), parashikuar nga neni 245/1, pg. 2 i Kodit Penal (sipas formulimit të dispozitës para ndryshimeve me ligjin nr. 43/2021) dhe dënimin e tij me 2 (dy) vite burgim.
7. Deklarimin fajtor të të pandehurit Erjon Dani për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”, (për episodin 2), parashikuar nga neni 245/1, pg. 2 i Kodit Penal (sipas formulimit të dispozitës para ndryshimeve me ligjin nr. 43/2021) dhe dënimin e tij me 2 (dy) vite burgim.
8. Deklarimin e pafajshëm të të pandehurit Erjon Dani, akuzuar për kryerjen e veprës penale “Shpërdorimi i detyrës”, parashikuar nga neni 248 i Kodit Penal, pasi në referim të nenit 388, pika 1, shkronja b) të Kodit të Procedurës Penale, pasi fakti objekt akuze nuk përbën vepër penale.
9. Në zbatim të nenit 55 të Kodit Penal, në bashkim të dënimeve, i pandehuri Erjon Dani dënohet me një dënim të vetëm prej 3 (tre) vite burgim.
10. Në aplikim të nenit 406/1 të Kodit të Procedurës Penale të pandehurit Erjon Dani i ulet 1/3 (një e treta) e dënimit, duke u dënuar përfundimisht me 2 (dy) vite burgim.
11. Llogaritja e dënimit për të pandehurin Erjon Dani fillon nga momenti i arrestimit të tij më datë 11.07.2025 dhe dënimi me burgim do të vuhet në një burg të sigurisë së zakonshme.
12. Deklarimin fajtor të të pandehurit Vilson Roçi për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”, në bashkëpunim (për episodin 2), parashikuar nga neni 245/1, pg. 1 dhe 25 i Kodit Penal (sipas formulimit të dispozitës para ndryshimeve me ligjin nr. 43/2021) dhe dënimin e tij me 1 (një) vit e 6 (gjashtë) muaj burgim.
13. Deklarimin fajtor të të pandehurit Vilson Roçi për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”, në bashkëpunim (për episodin 3), parashikuar nga neni 245/1, pg. 1 dhe 25 i Kodit Penal (sipas formulimit të dispozitës para ndryshimeve me ligjin nr. 43/2021) dhe dënimin e tij me 1 (një) vit e 6 (gjashtë) muaj burgim.
14. Në zbatim të nenit 55 të Kodit Penal, në bashkim të dënimeve, i pandehuri Vilson Roçi dënohet me një dënim të vetëm prej 1 (një) vit e 6 (gjashtë) muaj burgim.
15. Në aplikim të nenit 406/1 të Kodit të Procedurës Penale të pandehurit Vilson Roçi i ulet 1/3 (një e treta) e dënimit, duke u dënuar përfundimisht me 1 (një) vit burgim.
16. Llogaritja e dënimit për të pandehurin Vilson Roçi fillon nga momenti i arrestimit të tij më datë 11.07.2025, dhe dënimi me burgim do të vuhet në një burg të sigurisë së zakonshme.
17. Shpenzimet procedurale të bëra gjatë hetimeve paraprake, sipas procesverbalit për evidentimin e shpenzimeve të hetimit, dhe ato gjyqësore, sipas procesverbalit përkatës për evidentimin e shpenzimeve gjyqësore, në referim të neneve 393/1 dhe 285/1 të K.Pr.Penale, i ngarkohen të pandehurve të cilët deklarohen fajtorë me këtë vendim, në mënyrë solidare.
18. Ngarkohet Prokuroria e Posaçme kundër Korrupsionit dhe Krimit të Organizuar për zbatimin e këtij vendimi.
19. Kundër këtij vendimi mund të bëhet ankim në Gjykatën e Apelit kundër Korrupsionit dhe Krimit të Organizuar, brenda 15 (pesëmbëdhjetë) ditëve, duke filluar ky afat nga e nesërmja e njoftimit të vendimit të arsyetuar.

Tiranë, më datë 05.02.2026

Drejtori i Përgjithshëm i Policisë së Shtetit, Drejtues Madhor Ilir Proda, vlerësoi me Certifikatë për Shërbime të Dalluara, për arritjet, sfidat dhe përkushtimin në detyrë, Komisare Enkela Deraj, Shefe e Seksionit të Burimeve Njerëzore dhe Trajnimeve në Njësinë për Kufirin dhe Migracionin “Delta Forcë” Vlorë.

Enkela, me një karrierë të gjatë në Polici që prej vitit 2005, e sprovuar me sfida e vështirësi në disa fusha të shërbimit në Polici, është kthyer në një shembull të mirë dhe frymëzues për të gjitha gratë dhe vajzat në Policinë e Shtetit.

Pjesë e Shoqatës së Grave në Policinë Shqiptare, ajo kontribuon në mënyrë të vazhdueshme për mbështetjen dhe inkurajimin e kolegeve!

Bankers Petroleum Albania, kompani e cila ndodhet aktualisht nën hetim për shmangie tatimore dhe evazion, i ka kushtuar shtetit shqiptar miliona euro humbje nga mospagesa e taksave, por gjithashtu edhe shpenzime masive për arbitrazhet dhe gjyqet e hapura ndër vite.

Raporti i Kontrollit të Lartë i Shtetit ka nxjerrë në pah një seri pasojash të rënda financiare dhe institucionale që lidhen me mënyrën se si është ndjekur nga Avokatura e Shtetit dhe institucionet përgjegjëse çështja e arbitrazhit ndërkombëtar për vendburimin e Patos-Marinzës, si dhe disa procese të tjera të humbura nga shteti shqiptar.

Sipas auditimit, Gjykata Ndërkombëtare e Arbitrazhit, më 7 qershor 2024, ka dhënë vendimin për çështjen ICC Case 21349/GR, të iniciuar që në vitin 2015, mes kompanisë “Bankers” dhe institucioneve shqiptare, përfshirë Ministrinë e Infrastrukturës dhe Energjisë dhe Agjencinë Kombëtare të Burimeve Natyrore. Vendimi ka sqaruar kriteret për rikuperimin e kostove hidrokarbure dhe ka konstatuar se mbi 200 milionë dollarë të deklaruar nga operatori si të rikuperueshme nuk plotësonin kushtet ligjore.

Tribunali ka urdhëruar kompaninë të korrigjojë deklaratat financiare për vitet 2012–2017 dhe të reflektojë ndryshimet në raportimet tremujore pas vendimit. Këto rregullime, sipas auditimit, pritet të kenë ndikim të drejtpërdrejtë në përllogaritjen e tatimit mbi fitimin dhe në auditimet e mëvonshme të AKBN-së për vitet 2018 e në vijim.

Në të njëjtin vendim, arbitrazhi ka detyruar palën shqiptare të paguajë shpenzimet procedurale në vlerën 5.76 milionë dollarë. Një kërkesë për korrigjim dhe interpretim, e paraqitur në Zvicër në korrik 2024, u rrëzua në nëntor të po atij viti, duke konfirmuar përfundimisht detyrimin financiar të shtetit shqiptar, ndërsa Bankers u detyrua të paguajë një pjesë të kostove ligjore ndaj Albpetrol.

Statusi aktual tregon se vetëm në shkurt 2025 AKBN ka paraqitur kërkesë në Gjykatën e Apelit të Juridiksionit të Përgjithshëm në Tiranë për njohjen dhe ekzekutimin e vendimit, duke reflektuar, sipas KLSH-së, vonesa të pajustifikuara institucionale.

Raporti evidenton gjithashtu barrën e rëndë financiare që kjo çështje i ka sjellë buxhetit të shtetit. Deri më tani, shpenzimet përfshijnë rreth 224 mijë dollarë, mbi 2.69 milionë euro dhe mbi 3.6 mijë paund britanikë, të lidhura me tarifa gjyqësore, përfaqësim ligjor, ekspertiza, përkthime dhe logjistikë procedurale.

Në pasqyrat financiare të AKBN-së për vitin 2023 rezulton i kontabilizuar një vendim arbitrazhi ndërkombëtar, i cili lidhet me të njëjtën çështje. Megjithatë, auditimi konstaton se një detyrim prej mbi 1.16 milionë dollarësh, i vendosur nga një vendim i ndërmjetëm i vitit 2018, nuk është likuiduar dhe as planifikuar për shlyerje deri në fund të vitit 2023, në kundërshtim me rregullat e menaxhimit financiar.

Përveç rastit të Patos-Marinzës, KLSH ka analizuar edhe çështje të tjera të humbura nga Republika e Shqipërisë. Vetëm një prej tyre, ICC Case 22676/GR me paditëse kompaninë GBC, është njohur nga Gjykata e Apelit në vitin 2021. Në këtë rast, MIE dhe AKBN janë detyruar të paguajnë mbi 12.5 milionë dollarë dëmshpërblim, si dhe shuma shtesë për kostot dhe interesat.

Sipas raportit, edhe për këtë vendim nuk janë marrë masa konkrete për njohjen dhe planifikimin buxhetor të detyrimit deri në prill 2025, duke ekspozuar shtetin ndaj riskut të rritjes së interesave. Vetëm për periudhën 2020–2024, interesat e përllogaritura arrijnë në mbi 60 mijë euro, një kosto shtesë për financat publike.

Në përfundim, Kontrolli i Lartë i Shtetit rekomandon që Ministria e Turizmit dhe Mjedisit, Ministria e Infrastrukturës dhe Energjisë, AKBN dhe Avokatura e Shtetit të bashkërendojnë veprimet për ndjekjen e procedurave ligjore, njohjen e plotë të detyrimeve në pasqyrat financiare dhe ekzekutimin e vendimeve të arbitrazhit.

Sipas audituesve, mungesa e koordinimit, vonesat dhe mosplanifikimi buxhetor kanë krijuar një risk të vazhdueshëm për buxhetin e shtetit dhe kanë dëmtuar besueshmërinë institucionale të Shqipërisë në arbitrazhet ndërkombëtare.

Pasi 6 anëtarët e Këshillit të Lartë Gjyqësor, KLGJ, rrëzuan një javë më parë kërkesën e 4 kolegëve për fillimin e procedurës së verifikimit të statusit të gjyqtares Irena Gjoka, një prej anëtarëve të këtij këshilli ka depozituar të martën, më 3 shkurt, ankesë pranë Inspektorit të Lartë të Drejtësisë, ILD.

Nëpërmjet një përgjigjeje me shkrim që ILD i ka dërguar Birn të enjten, më 5 shkurt, u bë me dije se dy ditë më parë i ishte përcjellë ankesa e një anëtari të KLGJ-së me objekt fillimin e hetimit për shkelje disiplinore ndaj gjyqtares së Gjykatës së Posaçme të Shkallës së Parë, Irena Gjoka.

Po ashtu, ILD bëri me dije se do të shqyrtojë ankesën e mbërritur për Gjokën.

Pas një hetimi administrativ që zgjati rreth 20 muaj, Prokuroria e Përgjithshme deklaroi më 20 janar se kishte përfunduar verifikimin e thelluar për pastërtinë e figurës së gjyqtares së Gjykatës së Posaçme, Irena Gjoka, të kërkuar nga ana e KLGJ-së, por rezultatin e verifikimit e mbajti të fshehtë.

Nga ana tjetër, Prokuroria e Posaçme, SPAK, ka regjistruar procedim penal pas një kallëzimi të depozituar nga Adriana Kalaja ndaj gjyqtares Irena Gjoka, për fshehjen nga formulari i vetëdeklarimit të pastërtisë së figurës të një dënimi penal të dhënë nga drejtësia greke për falsifikimin e një pasaporte dhe një vize në mesin e viteve 2000. Sipas SPAK-ut, procedimi është regjistruar për veprën penale të parashikuar nga neni 190 i Kodit Penal, “falsifikimi i vulave, i stampave ose i formularëve”, por ende nuk është regjistruar ndonjë emër si person nën hetim.

Gjyqtarja Gjoka e ka kaluar më herët procesin e vetingut, pasi KPK nuk gjeti probleme që do të çonin në shkarkimin e saj. Komisioneri Publik fillimisht e ankimoi vendimin në Kolegjin e Posaçëm të Apelimit, por gjatë procesit u tërhoq nga ankimi, prej nga mbeti në fuqi vendimi i konfirmimit.

Akuzat ndaj Gjokës u bënë publike pasi ajo firmosi masat e sigurisë ndaj ish-kryeministrit Sali Berisha në lidhje me dosjen “Partizani”. Berisha dhe mbështetësit e tij e kanë akuzuar vazhdimisht Gjokën, duke pretenduar se ajo është në konflikt interesi dhe se ka fshehur të kaluarën e saj, përfshi dënimin penal në Greqi.