Komuna e Gjilanit ka njoftuar se është shtyrë afati për dorëzimin e aplikacioneve për legalizimin e ndërtimeve pa leje.

Sipas njoftimit nga Drejtoria për Urbanizëm, Planifikim dhe Mbrojtje të Mjedisit, Ministria e Mjedisit, Planifikimit Hapësinor dhe Infrastrukturës, më 16 janar 2026, ka marrë vendim me numër 214/2026 për vazhdimin e afatit të aplikimit për legalizim, për një periudhë prej 12 muajsh nga data e nënshkrimit të vendimit nga ministri në detyrë i MMPHI.

Ushtruesi i detyrës së drejtorit për Urbanizëm, Planifikim dhe Mbrojtje të Mjedisit në Komunën e Gjilanit, Ali Arifi, ka bërë të ditur se ky vendim u jep mundësi shtesë pronarëve të objekteve të ndërtuara pa leje që të kompletojnë dhe dorëzojnë aplikacionet e tyre brenda afatit të ri të përcaktuar.

Me këtë rast, Komuna e Gjilanit u bën thirrje të gjithë pronarëve të objekteve pa leje që ta shfrytëzojnë këtë mundësi dhe të aplikojnë për legalizim brenda afatit të lejuar ligjor.

Informata shtesë lidhur me procedurat e aplikimit mund të gjenden në faqen zyrtare të Komunës së Gjilanit. /Telegrafi/

Komuna e Gjilanit ka njoftuar se edhe gjatë këtij viti do të vazhdojë subvencionimin e qirasë për familjet që nuk kanë banesë apo shtëpi në pronësi dhe gjenden në gjendje të rëndë ekonomike.

Drejtoria e Shëndetësisë dhe e Mirëqenies Sociale ka hapur thirrjen për aplikim, e cila do të jetë e hapur deri më 30 janar 2026. Të drejtë aplikimi kanë vetëm familjet rezidente në Komunën e Gjilanit që plotësojnë kriteret e nevojës ekonomike.

Kryetari i Komunës, Alban Hyseni, tha se subvencionimi i qirasë është njëra prej politikave që vazhdohet edhe në mandatin e dytë.

“Njëra prej politikave të cilat i kemi ndjekur gjatë mandatit të parë, po e vazhdojmë edhe në mandatin e dytë. 163 mijë euro i kemi financuar në mandatin e parë dhe këtë mbështetje po e vazhdojmë edhe gjatë këtij mandati”, deklaroi Hyseni.

Ai shtoi se tash është mundësia për të gjithë ata që kanë nevojë për mbështetje për banim të aplikojnë dhe bëri thirrje që të mos vonohen, duke vënë në dukje se afati i aplikimit po afrohet.

Për më shumë detaje rreth procedurës së aplikimit dhe kriteret e pranueshmërisë, qytetarët mund të vizitojnë faqen zyrtare të Komunës së Gjilanit. /Telegrafi/

Drejtoria e Inspekcionit në Komunën e Gjilanit ka publikuar bilancin vjetor të punës për periudhën janar–dhjetor 2025, duke prezantuar të dhëna të detajuara mbi aktivitetet inspektuese në fushën e ndërtimit, veprimtarive afariste, komunikacionit, mjedisit dhe hapësirave publike.

Në sektorin e ndërtimit, gjatë vitit 2025 janë hartuar gjithsej 308 procesverbale, janë shqiptuar 15 gjoba dhe janë shqyrtuar 36 ankesa nga qytetarët.

Nga Drejtoria theksohet se është rritur ndjeshëm vetëdijesimi i qytetarëve për pajisje me leje ndërtimi, ndërsa ndërtimet e larta janë mbajtur nën kontroll të vazhdueshëm përmes matjeve gjeodezike për çdo etazhitet.

Inspektorët kanë realizuar përcjellje të vazhdueshme të punimeve, gjë që, sipas tyre, ka ndikuar drejtpërdrejt në rritjen e cilësisë së ndërtimit.

Në fushën e veprimtarive afariste, gjatë vitit janë inspektuar 261 biznese, shumica prej tyre biznese të reja. Për këtë periudhë janë hartuar 261 procesverbale, janë realizuar 163 pranime të kushteve minimale teknike për subjekte afariste, si dhe është bërë kontrolli i dokumentacionit të konformitetit të mallrave sipas standardeve evropiane.

Po ashtu, është mbyllur një subjekt afarist dhe janë shqiptuar 10 gjoba mandatore, ndërsa të hyrat nga pranimet teknike kanë arritur vlerën prej 14,600 euro.

Drejtoria ka raportuar edhe për bashkëpunim me Policinë e Kosovës lidhur me organizimin e ahengjeve të maturantëve, ku gjatë inspektimeve janë ndaluar pijet alkoolike për persona nën moshën 18-vjeçare.

Në sektorin e komunikacionit janë hartuar 176 procesverbale, janë iniciuar 35 kundërvajtje dhe janë shqiptuar 10 gjoba. Inspektimet kanë përfshirë linjat komunale të autobusëve, taksitë legale dhe ilegale, si dhe aktivitete vetëdijesuese në shkolla fillore të mesme të ulëta, ku gjatë muajit shtator janë mbajtur ligjërata me temën “Fëmijët miq në trafikun rrugor” në tetë shkolla të zonës urbane të Gjilanit.

Në aspektin e mjedisit, Drejtoria ka monitoruar hapësirat urbane dhe rurale, duke trajtuar kërkesa dhe ankesa të qytetarëve për ndotje, hedhje të mbeturinave dhe pajisje me leje mjedisore komunale. Pas inspektimeve në terren janë lëshuar vendime, gjoba, afate ligjore dhe akte të tjera normative.

Po ashtu, është bërë monitorimi i zbatimit të lejeve mjedisore për subjektet afariste dhe është realizuar bashkëpunim me operatorë publikë për pastrimin e disa lokacioneve në qytet.

Gjatë vitit 2025, Drejtoria e Inspekcionit ka bashkëpunuar ngushtë me Policinë e Kosovës, MMPHI-në, KPMM-në, prokurorinë, ndërmarrjet publike lokale dhe kompani të shërbimeve publike, duke përfshirë “Hidromorava”, NPL “Tregu”, “Eco Higjiena” dhe KEDS-in.

Në kuadër të shqyrtimit të ankesave zyrtare, janë shqiptuar 13 gjoba mandatore, janë hartuar 109 procesverbale dhe janë pranuar 39 kërkesa zyrtare. Sipas Drejtorisë, masat e ndërmarra kanë përfshirë vërejtje verbale, ndërprerje punimesh, dhënie afatesh ligjore dhe shqiptim gjobash.

Drejtoria e Inspekcionit në Gjilan vlerëson se puna gjatë vitit 2025 ka kontribuar në forcimin e zbatimit të ligjit, rritjen e rendit dhe përmirësimin e standardeve në fusha të ndryshme të jetës publike në komunë. /Telegrafi/

Manifestimi mbarëkombëtar “Flaka e Janarit”, që organizohet nën patronatin e kryetarit të Komunës së Gjilanit, Alban Hyseni, dhe përkujdesjen e Drejtorisë për Kulturë, Rini dhe Sport, ka vazhduar aktivitetet e tij me ecjen tradicionale në nderim të të rënëve për liri.

Ecja u organizua nga Shoqëria Bjeshkatare Alpiniste “Gjilani” nga Komuna e Gjilanit dhe Klubi Alpin “Dardanët” nga Komuna e Kamenicës, me mbështetjen e klubeve të tjera bjeshkatare dhe alpine nga trojet shqiptare. Në këtë aktivitet morën pjesë dhjetëra qytetarë dhe përfaqësues të shoqërive bjeshkatare, të cilët përmes ecjes nderuese dhe përkujtuese synuan ruajtjen e kujtesës dhe vlerësimin e sakrificës së heronjve të kombit.

Sipas organizatorëve, kjo ecje ka për qëllim t’u japë brezave të rinj mundësinë të kuptojnë rëndësinë e trashëgimisë, historisë dhe kulturës kombëtare, duke e cilësuar atë si një ecje përkujtimore “prej nga buron liria”.

Aktiviteti nisi me një fotografim të përbashkët te shtatorja e Rexhep Malës dhe Nuhi Berishës në Gjilan, për të vazhduar drejt Kamenicës, ku pjesëmarrësit u bashkuan me grupe të tjera. Më pas, ecja vazhdoi drejt Kapisë në Sfircë, prej nga nisi marshimi deri te Kulla e Nuhi Berishës. Pas kthimit në Kapi, shtegu u vijua drejt Kullës së Rexhep Malës në Hogosht dhe më pas deri te Kulla e Kadri Zekës në Poliçkë, ku edhe u përmbyll ecja tradicionale.

Ky aktivitet u vlerësua si një nderim ndaj sakrificës së Heronjve të Kombit Kadri Zeka, vëllezërve Gërvalla, Rexhep Mala dhe Nuhi Berisha, si dhe të gjithë dëshmorëve që dhanë jetën për lirinë e atdheut.

Organizatorët kanë bërë të ditur se aktivitetet e “Flakës e Janarit” do të vazhdojnë më 24 janar, me organizimin e Tryezës Letrare “Pena e Flakës” nga ora 12:00, ndërsa në mbrëmje do të nis Festivali i Dramës Origjinale Shqipe “Talia e Flakës”, i cili do të mbahet në Teatrin e Qytetit të Gjilanit. /Telegrafi/

Rreth dy milionë shërbime shëndetësore janë ofruar për qytetarët gjatë vitit 2025 nga Qendra Kryesore e Mjekësisë Familjare në Gjilan, qendrat e mjekësisë familjare dhe ambulancat mjekësore familjare në gjithë komunën.

Kryetari i Komunës së Gjilanit Alban Hyseni, tregon për shërbimet shëndetësore të ofruara gjatë vitit 2025 në QKMF “Dr. Nagip Rexhepi” – Gjilan

“Gjatë vitit 2025, Qendra Kryesore e Mjekësisë Familjare “Dr. Nagip Rexhepi” në Gjilan ka ofruar një numër të madh shërbimesh shëndetësore për qytetarët, duke garantuar kujdes të vazhdueshëm, cilësor dhe të barabartë për të gjithë”, tha Hyseni.

I pari i komunës, tregoi se vizita nga mjekët familjarë ishin 239 mijë e 902. Shërbime infermierore në MF ishin 454 mijë e 759. Kujdestari ishin 151 mijë e 82. Urgjenca kishte 12 mijë e 82. Vaksinime ishin 19 mijë e 320. Në Stomatologji u kryen 30 mijë e 376 shërbime.

Derisa nga kujdesi shtëpiak – Patronazha janë kryer 28 mijë e 510 vizita. Mamografi 925. Ultrazëri i gjirit 203 dhe PAP-testi 999.

Kryetari i Gjilanit, tregoi se analiza laboratorike janë kryer 292 mijë e 980. Qendra e Diabetit, kishte 8 mijë e 660 shërbime. Vizita në shtëpi për gra shtatzëna dhe fëmijët 0–3 vjeç ishin 1 mijë e 662. Klasa për nëna ishin 2 mijë e 5.

Derisa tregoi edhe për shërbime të tjera shëndetësore që ishin 4 mijë e 420. Shërbime administrative-mjekësore 466 mijë e 76.

Kryetari Alban Hyseni tregoi se totali i shërbimeve gjatë vitit 2025 ishte 1 milion e 928 mijë e 818.

“QKMF “Dr. Nagip Rexhepi” mbetet e përkushtuar në ofrimin e shërbimeve shëndetësore cilësore dhe në përmirësimin e vazhdueshëm të kujdesit shëndetësor për qytetarët e Gjilanit”, tha Alban Hyseni.

Kryetari, falënderoi stafin shëndetësor për përkushtimin dhe profesionalizmin, si dhe për qytetarët për besimin e treguar. /Telegrafi/

Komuna e Gjilanit ka ftuar qytetarët dhe subjektet afariste që kanë pësuar dëme nga reshjet e shiut të datës 10 janar 2026, të paraqesin kërkesë për vlerësimin e dëmeve të shkaktuara.

Sipas njoftimit zyrtar të komunës, afati për aplikim është nga 15 janari deri më 31 janar 2026, ndërsa kërkesat duhet të dorëzohen në Qendrën për Qytetarë të Komunës së Gjilanit, drejtuar Komisionit për vlerësimin e dëmeve të shkaktuara nga fatkeqësitë natyrore.

“Për vlerësimin e dëmeve është e domosdoshme që pronarët e ekonomive familjare dhe subjektet afariste, të cilët kanë pësuar dëme nga reshjet e shiut të datës 10 janar 2026, të paraqesin kërkesë zyrtare brenda afatit të përcaktuar”, thuhet në njoftimin e Komunës së Gjilanit.

Komuna ka bërë të ditur se aplikuesit duhet të dorëzojnë dokumentacionin e nevojshëm, i cili përfshin: kërkesën drejtuar Komisionit, fotografi të objekteve apo gjësendeve të dëmtuara, adresën e saktë të lokacionit ku ndodhet objekti i dëmtuar, numrin e telefonit të aplikuesit, si dhe kopjen e letërnjoftimit. Për subjektet afariste kërkohet edhe certifikata e regjistrimit në ARBK.

“Të gjithë qytetarët e interesuar ftohen që aplikimet t’i dorëzojnë brenda këtij afati, në mënyrë që komisioni të ketë mundësi të bëjë vlerësimin e plotë dhe korrekt të dëmeve”, thekson Komuna e Gjilanit.

Nga komuna u bëhet thirrje qytetarëve që të respektojnë afatin e aplikimit dhe të sigurohen që dokumentacioni i dorëzuar të jetë i plotë, për të mundësuar trajtimin sa më efikas të kërkesave. /Telegrafi/

Me ndezjen simbolike të flakadanit është hapur zyrtarisht Manifestimi Kulturor Mbarëkombëtar “Flaka e Janarit 2026” në Gjilan, i cili i kushtohet kujtimit dhe nderimit të heronjve, dëshmorëve dhe martirëve të kombit ndër breza.

Hapja e manifestimit u shënua me një defile simbolik të të rinjve në qendër të qytetit, ndërsa ceremonia qendrore dhe ndezja e flakadanit u zhvilluan në platonë e Teatrit të Qytetit.

Në këtë ngjarje morën pjesë përfaqësues institucionalë, si dhe përfaqësues të shoqatave të dala nga lufta.

Programi artistik u pasurua me interpretimet e Orkestrës Frymore “Selman Vokshi”, e cila prezantoi vepra të përzgjedhura nga kompozitorë shqiptarë, duke i dhënë ceremonisë një dimension solemn dhe artistik.

Manifestimi “Flaka e Janarit 2026” do të zgjasë deri më 31 janar dhe do të përfshijë një sërë aktivitetesh në katër shtyllat kulturore: artet pamore, letërsinë, artet skenike dhe muzikën.

Gjatë kësaj periudhe, në Gjilan pritet të mblidhen artistë dhe artdashës nga e gjithë hapësira shqiptare. /Telegrafi/

Kuvendi i Komunës së Gjilanit, në seancën e jashtëzakonshme, ka miratuar buxhetin për vitin 2026 me 33 vota për dhe asnjë kundër.

Shtyllat kryesore të buxhetit i prezantoi kryetari i Komunës, Alban Hyseni, i cili bëri të ditur se buxheti për vitin 2026 arrin shumën prej 41.928.924 euro, apo afër 42 milionë euro.

Gjatë debatit, përkrahje paraprake për buxhetin dhanë Besnik Shala (VV), Nazim Gagica (AAK) dhe Naser Arifi (Guxo), duke parashtruar njëkohësisht edhe disa kërkesa për investime komunitare. Ndërkaq, opozita, përfaqësuar nga Gentrit Murseli (LDK) dhe Riad Rashiti (PDK), shfaqi kritika dhe vërejtje, duke e kushtëzuar votimin me inkorporimin e dhjetëra projekteve komunitare.

Pas takimit me përfaqësuesit e subjekteve politike, kryetari Hyseni bëri të ditur se janë dakorduar që tetë nga 20 kërkesat e LDK-së të përfshihen në buxhet, në vlerë prej 764 mijë euro, si dhe kërkesa e partisë Guxo për rregullimin e parkut në Miresh. Sa i përket kërkesave të PDK-së, me theks të veçantë për varrezat e qytetit, ai tha se janë dakorduar që ato të inkorporohen gjatë bartjes së buxhetit në muajin shkurt, përkatësisht për rritjen e buxhetit për këtë projekt.

Në seancë kontribuuan me kërkesa, kritika dhe rekomandime edhe asamblistët Muhadin Haziri, Sami Ahmeti, Bujar Nevzati, Fitim Guda, Fatos Ramadani, Lirije Kosumi, Burhan Isufi dhe Gresa Avdiu.

Po ashtu, në seancën e sotme dha betimin anëtari më i ri i Kuvendit Komunal, Renan Imam, ndërsa Kuvendi zgjodhi edhe nënkryetarin për Komunitete, Kadir Hysein. /KP/

Pas zgjedhjes së Krenare Latifi Kçikut si kryesuese e Kuvendit të Komunës së Gjilanit, kryetari i komunës, Alban Hyseni, njoftoi mbajtjen e një seance të jashtëzakonshme të premten për miratimin e buxhetit të vitit 2026.

“Krenare Latifi Kçiku është zgjedhur kryesuese e Kuvendit dhe ne sapo kemi nënshkruar ftesën për seancën e jashtëzakonshme, ku do të votohet buxheti i vitit 2026”, tha Hyseni pas votimit.

Kryetari theksoi se propozimi i buxhetit është i njëjti si ai i dorëzuar fundvitin e kaluar, i cili atëherë nuk kishte kaluar në Kuvend. Ai shtoi se, megjithëse numrat e votave janë të mjaftueshëm për miratimin e tij, ekzekutivi është i gatshëm për dialog me subjektet opozitare.

“Ne shprehim gatishmëri të bashkëpunimit me subjektet opozitare dhe i ftojmë që të votojnë buxhetin e komunës,” tha Hyseni, duke theksuar se çdo propozim i rëndësishëm për buxhetin mund të paraqitet deri të premten.

Ai gjithashtu nënvizoi rëndësinë e miratimit të buxhetit: “Çështja e buxhetit është shumë e rëndësishme, ku vitin e kaluar komuna ka vuajtur shumë. Jemi të interesuar që sivjet buxheti të mos mbetet problem, por të bashkojë të gjitha subjektet politike dhe të marrë aprovimin ditën e premte".

Kjo seancë e jashtëzakonshme do të jetë test për bashkëpunimin mes pushtetit dhe opozitës, teksa kryesuesja e Kuvendit, Kçiku, do të luajë një rol kyç në drejtimin e diskutimeve dhe procedurave për miratimin e buxhetit. /Telegrafi/

Drejtoria e Administratës e Komunës së Gjilanit ka mbyllur vitin 2025 me një volum të lartë shërbimesh ndaj qytetarëve, duke përmirësuar infrastrukturën dhe afërsinë e shërbimeve ndaj qytetarëve.

Ushtruese e detyrës së drejtorit, Arbenita Sopi Haziri, tha se gjatë vitit janë ndërmarrë masa për të lehtësuar procedurat administrative, përfshirë miratimin në Kuvendin Komunal të vendimit për largimin e gjobës për regjistrimin e mëvonshëm të lindjeve, në mënyrë që fëmijët e lindur jashtë vendit të regjistrohen pa penalitete.

Po ashtu, në funksion janë rikthyer e-kiosku i dytë për shërbime më të afërta për qytetarët. “Transformuam hapësirat në Qendrën për Shërbim me Qytetarë, vendosëm ashensor në objektin e Administratës dhe sportel për persona me nevoja të veçanta”, tha Sopi Haziri.

Sipas saj, në sektorin e Gjendjes Civile janë ofruar mbi 92 mijë shërbime, ndërsa në Qendrën për Shërbim me Qytetarë janë pranuar mbi 100 mijë kërkesa gjatë vitit.

Drejtoresha po ashtu theksoi se gjatë vitit janë organizuar dëgjime publike për Buxhetimin me Pjesëmarrje, Kornizën Afatmesme Buxhetore dhe Buxhetin 2026, ndërsa në muajt korrik dhe gusht, administrata ka punuar edhe të shtunave me orar të zgjatur për të shërbyer mërgatën.

“Falënderoj stafin e zyrtarëve për bashkëpunimin e shkëlqyeshëm dhe angazhimin e pandalshëm gjatë gjithë vitit, në shërbim të qytetarëve”, përfundoi Arbenita Sopi Haziri. /Telegrafi/

Kryetari i Komunës së Gjilanit, Alban Hyseni, ka pritur në takim ministrin në detyrë të Mjedisit, Planifikimit Hapësinor dhe Infrastrukturës, Hysen Durmishin, me të cilin ka diskutuar për projektet e realizuara dhe ato që janë në proces në këtë komunë.

Pas takimit, Hyseni dhe Durmishi kanë vizituar disa nga projektet infrastrukturore në terren, përfshirë rrugën “Hamdi Kurteshi”, ku po realizohet një investim në vlerë prej 2.4 milionë euro, si dhe segmentet e auto-udhës Bresalc–Banullë, pjesë e autostradës Prishtinë–Gjilan.

Kryetari Hyseni e ka falënderuar ministrin për vizitën dhe mbështetjen e vazhdueshme të ministrisë, duke theksuar se gjatë viteve të fundit janë realizuar dhjetëra projekte në dobi të qytetarëve të Gjilanit. Ai ka shprehur shpresën se kjo mbështetje do të vazhdojë edhe në të ardhmen.

Hyseni ka bërë të ditur se aktualisht Komuna e Gjilanit po funksionon në një objekt tjetër, pasi ndërtesa e vjetër është rrënuar për t’i hapur rrugë realizimit të projektit “Bulevardi i Qytetit”, i cili konsiderohet investimi më i madh kapital ndonjëherë në Gjilan, me vlerë 18 milionë euro.

Gjatë vizitës në rrugën “Hamdi Kurteshi”, kryetari e ka informuar ministrin se kjo zonë më herët kishte qenë në gjendje të rëndë infrastrukturore, ndërsa tani po merr pamje të re me infrastrukturë të plotë përcjellëse.

Sa i përket autostradës Prishtinë–Gjilan, Hyseni ka njoftuar se katër kontrata për katër segmentet e kësaj rruge janë shkëputur, duke shtuar se me nënshkrimin e kontratave të reja pritet të përfundojë ky projekt i rëndësishëm për rajonin.

Nga ana e tij, ministri në detyrë i Infrastrukturës, Hysen Durmishi, tha se vizita në Gjilan kishte për qëllim vlerësimin e projekteve në terren dhe urimin e kryetarit Hyseni për mandatin e tij të dytë. Ai theksoi se gjatë mandatit të kaluar janë ndërtuar dhe rehabilituar dhjetëra rrugë në këtë komunë, duke përmirësuar ndjeshëm qarkullimin dhe infrastrukturën.

Durmishi bëri të ditur se punimet në rrugën “Hamdi Kurteshi” po zhvillohen me intensitet të lartë, ndërsa sa i përket autostradës Prishtinë–Gjilan, ai konfirmoi se janë shkëputur katër kontrata për katër segmentet.

“Sapo të nënshkruhen kontratat e reja, brenda një viti do të përfundojë autostrada e Gjilanit”, tha ministri Durmishi, duke shtuar se në të ardhmen mbështetja për Gjilanin do të rritet me projekte të reja zhvillimore. /Telegrafi/

Në prag të festave të fundvitit, Komuna e Gjilanit ka marrë vendim për ndalimin e përdorimit të mjeteve piroteknike, përkatësisht fishekzjarrëve, në hapësirat publike.

Vendimi është nxjerrë nga kryetari i Komunës së Gjilanit, Alban Hyseni, në bazë të nenit 13 të Ligjit për Vetëqeverisjen Lokale dhe nenit 78 të Statutit të Komunës së Gjilanit, me qëllim të rritjes së sigurisë publike dhe mbrojtjes së shëndetit të qytetarëve.

Sipas urdhëresës, ndalohet përdorimi i fishekzjarrëve në vende të hapura publike, si tregje, rrugë dhe sheshe. Kjo ndalesë do të jetë në fuqi nga data 20 dhjetor 2025 deri më 3 janar 2026.

Përjashtim nga kjo ndalesë bëhet vetëm në natën e ndërrimit të viteve, respektivisht nga ora 23:30 e datës 31 dhjetor 2025 deri në orën 00:30 të datës 1 janar 2026.

Në urdhëresë thuhet se personat që veprojnë në kundërshtim me këtë vendim do të gjobiten me 100 euro. Për zbatimin e masës do të kujdesen Drejtoria e Inspeksionit dhe Policia e Kosovës.

Komuna e Gjilanit u bën thirrje qytetarëve që të respektojnë këtë vendim, duke kontribuar në një festim më të sigurt dhe më të qetë për të gjithë. /Telegrafi/

Kryetari i Komunës së Gjilanit, Alban Hyseni, së bashku me ministrin në detyrë të Punëve të Brendshme, Xhelal Sveçla, kanë vizituar Pikë Kalimin Kufitar Dheu i Bardhë, një nga pikat kryesore të hyrjes në Kosovë, në prag të rritjes së fluksit të mërgimtarëve.

Gjatë vizitës, Hyseni dhe Sveçla u takuan me zyrtarë policorë, nga të cilët u informuan për përgatitjet e ndërmarra për menaxhimin e pritjes dhe qarkullimit të mërgimtarëve që po vijnë në vend për pushimet e fundvitit.

Kryetari i Gjilanit, Alban Hyseni, theksoi se vizita kishte për qëllim të sigurohet që të gjitha institucionet janë të gatshme për përballimin e fluksit të shtuar në këtë pikë kufitare, përcjell Telegrafi. Ai uroi mërgimtarët për ardhjen në atdhe, duke thënë se janë gjithmonë të mirëpritur në shtëpitë e tyre.

Edhe ministri në detyrë i Punëve të Brendshme, Xhelal Sveçla, deklaroi se gjatë vizitës u njoftuan nga afër me masat dhe përgatitjet operative të Policisë së Kosovës për këtë periudhë. Ai shtoi se pati rastin të takojë edhe mërgimtarë që sapo kishin hyrë në Kosovë, duke i uruar mirëseardhje në atdhe.

Institucionet kanë bërë të ditur se do të vazhdojnë koordinimin për të siguruar qarkullim më të lehtë dhe shërbime sa më efikase për qytetarët dhe mërgimtarët në pikat kufitare. /Telegrafi/

Komuna e Gjilanit ka njoftuar se afati për aplikim për vlerësimin e dëmeve të shkaktuara nga reshjet e shiut të datës 18 nëntor 2025 është zgjatur deri më 31 dhjetor 2025.

Lajmin e ka bërë të ditur kryesuesi i Komisionit për vlerësimin e dëmeve nga fatkeqësitë natyrore, Ali Arifi, shkruan Telegrafi.

Sipas njoftimit, zgjatja e afatit bëhet në bazë të interesimit të qytetarëve dhe për t’u mundësuar të gjithëve që të dorëzojnë dokumentacionin e nevojshëm.

Komuna u bën thirrje banorëve të prekur që të aplikojnë brenda afatit të ri, duke theksuar se aplikimet pranohen deri më 31 dhjetor të këtij viti. /Telegrafi/

Presidentja e Kosovës, Vjosa Osmani, qëndroi sot për vizitë zyrtare në Komunën e Gjilanit, ku u prit nga kryetari Alban Hyseni. Gjatë kësaj vizite, ata zhvilluan disa aktivitete dhe takime në institucione, biznese dhe organizata lokale.

Fillimisht, presidentja Osmani dhe kryetari Hyseni vizituan kompaninë “Interplast Trocal”, ku u njohën nga afër me proceset e prodhimit dhe kontributin e këtij biznesi në zhvillimin ekonomik të qytetit.

Kryetari Hyseni tha se bashkëbiseduan për rolin e ndërmarrjeve vendore dhe sfidat e tyre, duke falënderuar presidenten për mbështetjen dhe interesimin e treguar për projektet komunale, përcjell Telegrafi.

Më pas, ata u ndalën në Shkollën e Muzikës dhe të Arteve Pamore, ku ndoqën një performancë nga Kori i grave “Muza”.

Vizita vazhdoi në institucionin parashkollor “Integj”, ku u takuan me fëmijë dhe edukatore, si dhe në klubin e futbollit “Drita”, të cilin presidentja e përgëzoi për sukseset e fundit në arenën vendore dhe garat evropiane.

Presidentja Osmani e vlerësoi vizitën si të mbushur me energji dhe frymëzim, duke uruar kryetarin Hyseni për mandatin e tij të dytë. Ajo tha se diskutuan për projektet që do t’i sjellin Gjilanit më shumë zhvillim dhe mundësi të reja.

“Kemi kaluar çaste të paharrueshme me artistë, fëmijë dhe komunitetin sportiv. Një falënderim i veçantë për qytetin e Gjilanit për pritjen”, theksoi Osmani. /Telegrafi/

Kryetari i komunës, Alban Hyseni së bashku me hoxhën dhe humanistin Halil Kastrati, ka vizituar sot Qendrën e re për të Moshuarit, një projekt i konsideruar si ndër më të rëndësishmit për ofrimin e shërbimeve dhe mbështetjes për gjeneratat e moshuara.

Sipas njoftimit, punimet në qendër janë drejt finalizimit, ndërsa objekti pritet të ofrojë një hapësirë të sigurt dhe të dinjitetshme për të moshuarit që kanë nevojë për kujdes dhe përkrahje institucionale.

Kryetari ka falënderuar Halil Kastratin për mbështetjen e vazhdueshme në realizimin e këtij projekti, duke vlerësuar kontributin e tij në fuqizimin e shërbimeve sociale në komunë. /Telegrafi/

Rruga “Pajazit Ahmeti” në Gjilan po hyn në fazën përfundimtare të renovimit, ku krahas shtresës së re të asfaltit po realizohen edhe punimet në ndriçimin publik dhe ndërtimin e trotuareve të reja.

Kryetari i Komunës së Gjilanit, Alban Hyseni, së bashku me drejtorin e Shërbimeve Publike, Kushtrim Ibrahimi, inspektuan sot zhvillimin e punimeve në këtë aks rrugor.

Hyseni tha se projekti po ecën sipas planit dhe se shumë shpejt rruga do të marrë pamjen e re, duke përmirësuar qarkullimin dhe sigurinë për banorët e kësaj zone.

“Kemi intensifikuar punimet dhe rruga ‘Pajazit Ahmeti’ po asfaltohet. Së shpejti do të jetë plotësisht e përfunduar, me infrastrukturë moderne dhe të denjë për qytetarët e Gjilanit”, tha kryetari Hyseni. /Telegrafi/

Kryetari i Komunës së Gjilanit, Alban Hyseni, ka pritur në një takim zyrtar kryetarin e Komunës së Tetovës, Bilall Kasami, i cili po qëndron për vizitë në Gjilan. Vizita nisi me homazhe në Kodrën e Dëshmorëve, ku të dy kryetarët nderuan sakrificën e të rënëve për liri.

“Vizitën e nisëm me homazhe te Kodra e Dëshmorëve, një moment reflektimi për ata që na lanë amanetin e lirisë dhe të qëndresës”, deklaroi kryetari Hyseni, duke e cilësuar vizitën si një takim miqësor dhe institucional me homologun e tij nga Tetova.

Pas homazheve, Hyseni dhe Kasami, së bashku me kryeministrin e Kosovës, Albin Kurti, ndoqën ndeshjen e Ligës së Konferencës mes Dritës së Gjilanit dhe Shkëndijës së Tetovës, një derbi shqiptar që përfundoi me fitoren e Dritës, përcjell Telegrafi.

“I shkëmbyem me kënaqësi fanellat e dy ekipeve tona, me urimin që në fushë të tregojnë vlerat e larta sportive. Bashkë u pajtuam njëzëri se futbolli na bashkon”, tha Hyseni.

Ai shtoi se fitorja e Dritës është një hap i rëndësishëm drejt kualifikimit, ndërsa vlerësoi edhe Shkëndijën për lojën korrekte.

“Urime djemve për paraqitjen fantastike”, u shpreh kryetari i Gjilanit.

Nga ana tjetër, kryetari i Tetovës, Bilall Kasami, e quajti vizitën në Gjilan të veçantë dhe falënderoi Hysenin për mikpritjen.

“E urova kryetarin Hyseni për rizgjedhjen në krye të Gjilanit. Biseduam për bashkëpunimin mes dy qyteteve tona, duke nënvizuar përkushtimin për thellimin dhe zgjerimin e projekteve të përbashkëta”, deklaroi Kasami.

Ai tha se shkëmbimi i fanellave të Shkëndijës dhe Dritës, si dhe ndjekja e përbashkët e ndeshjes me kryeministrin Kurti, ishin një moment simbolik i miqësisë dhe bashkëpunimit mes dy komunave.

Kasami nënvizoi edhe rëndësinë e homazheve në Memorialin e Dëshmorëve në Gjilan:

“Kujtuam dhe nderuam sakrificën e mijëra shqiptarëve për lirinë dhe pavarësinë e Kosovës. Lavdi”.

Vizita përfundoi në atmosferë sportive e miqësore, duke forcuar lidhjet institucionale dhe kulturore mes Gjilanit dhe Tetovës. /Telegrafi/

Në Komunën e Gjilanit janë përfunduar disa ndërhyrje infrastrukturore që sigurojnë qasje më të lehtë dhe të barabartë për personat me aftësi të kufizuara në hapësirat e administratës komunale.

Para zyrave të Drejtorisë për Administratë dhe Drejtorisë për Shërbime Publike është rregulluar hapësira hyrëse, duke krijuar kushte më të përshtatshme për lëvizje.

Vetëm disa ditë më parë është vënë në funksion edhe ashensori i ri i dedikuar posaçërisht për personat me aftësi të kufizuara, ndërsa janë rinovuar dhe përshtatur tualetet që plotësojnë standardet e nevojshme për këtë kategori qytetarësh. Po ashtu, sporteli i veçantë në Gjendjen Civile tashmë u ofron atyre shërbime më të shpejta dhe pa vonesa, përcjell Telegrafi.

Fadil Ademi, ushtrues detyre i shefit të sektorit të Gjendjes Civile në Drejtorinë e Administratës, tha se përmirësimet e bëra janë të vogla në kosto, por me ndikim të madh për qytetarët.

“Sigurojmë qasje të barabartë dhe të lehtë në hyrje të Drejtorisë së Administratës dhe Shërbimeve Publike, duke krijuar kushte më të mira për të gjithë qytetarët. Vazhdojmë me kryetarin Alban Hysenin”, u shpreh Ademi.

Komuna e Gjilanit ka paralajmëruar se investime të tjera në aksesueshmëri do të vazhdojnë edhe në hapësira të tjera publike. /Telegrafi/

Pas ndërprerjes së shiut, situata është stabilizuar në Komunën e Gjilanit, ku edhe ka rënë niveli i ujit.

Kështu bëhet e ditur në njoftimin për media të kësaj komune.

Derisa të martën si shkak i reshjeve të shiut me intensitet të lartë në Komunën e Gjilanit, në disa zona u shkaktuan probleme në lëvizjen e qytetarëve dhe automjeteve.

Kryetari i Komunës së Gjilanit, Alban Hyseni, tha se gjatë gjithë ditës së martë, ekipet komunale kanë qenë të angazhuara në terren me kapacitet të plotë, duke monitoruar situatën dhe duke ndërhyrë aty ku ka qenë e mundur për të minimizuar dëmet nga reshjet e shiut.

“Si pasojë e reshjeve me intensitet të lartë, disa zona në komunën tonë kanë hasur vështirësi në lëvizjen e qytetarëve dhe automjeteve”, tha Hyseni.

I pari i Gjilanit, i bënë thirrje të gjithë qytetarëve që të lëvizin vetëm kur ka emergjencë dhe të përdorin rrugët e qytetit, duke shmangur rrugët qarkore dhe ato ku ka rritje të nivelit të ujit, përfshirë rrugën Malishevë–Gjilan, Livoç i Poshtëm dhe i Epërm, rrugën “Enver Miftari” dhe zonat pranë lumenjve.

Kryetari u bëri apel qytetarëve të tregojnë kujdes të shtuar dhe për çdo rast emergjent të kontaktojnë qendrën 112.

“Komuna e Gjilanit, mbetet e përkushtuar për të garantuar sigurinë e qytetarëve dhe do të vazhdojë monitorimin e situatës në terren”, tha Hyseni.

Drejtori për Shërbime Publike, Kushtrim Ibrahimi, tha se në shumicën e lokacioneve situata ishte nën kontroll, por ajo ishte ende në kufijtë e rrezikut.

Ndërsa, drejtori për Mbrojtje dhe Shpëtim, Bejtullah Osmani, ka kërkuar nga qytetarët të jenë të kujdesshëm, si shkak i rritjes së nivelit të ujit në disa zona.

Derisa ka kërkuar nga qytetarët që në raste të tilla të evitojnë zonat ku ka rritje të nivelit të ujit rreth lumenjve dhe të shfrytëzojnë rrugët alternative. /Telegrafi/