Anëtari i Kryesisë së PD-së, Grigels Muçollari, ka reaguar pas vendimit të SHBA-së për të pezulluar procesin e dhënies së vizave ndaj Shqipërisë.

Reagimi i Grigels Muçollarit:

Kufizimi i vizave amerikane për shtetasit shqiptarë nuk është një veprim i rastësishëm dhe as një problem thjesht diplomatik. Ai lidhet drejtpërdrejt me mënyrën se si qeveriset vendi. Korrupsioni i përhapur, kapja e institucioneve dhe mungesa e sundimit të ligjit kanë cenuar seriozisht besueshmërinë e Shqipërisë në sytë e partnerëve ndërkombëtarë.

Ky realitet prodhon një zinxhir pasojash. Keqqeverisja sjell varfëri, mungesë perspektive dhe pasiguri sociale. Në këto kushte, largimi masiv i qytetarëve nuk është zgjedhje, por domosdoshmëri. Shpopullimi i vendit është reagimi më i qartë ndaj një shteti që nuk u ofron qytetarëve të ardhme.

Emigrimi masiv dhe shpopullimi janë kështu pasojë direkte e të njëjtit shkak: keqqeverisjes dhe korrupsionit sistemik.

Fatura, së shpejti do t’i jepet kryeministrit për ta paguar sepse kur SHBA të heq vizën, në thelb nuk ka për qëllim të ndëshkojë Shqipërinë, por vjen si një reflektim i dështimit të një modeli qeverisës që po e zbraz vendin nga njerëzit e tij. /Kb

Last Updated on 15/01/2026 by Kesjana

Shkëlqim Hajdari jep dorëheqjen si Kryeinspektor i Përgjithshëm.

Hajdari mori detyrën në korrik të vitit 2016.

Banorët e fshatrave Taç i Sipërm dhe Prodan në Kolonjë kanë protestuar ditën e sotme kundër zaptimit të kullotave të tyre. Ata pretendojnë se sipërfaqet kullosore u përkasin prej vitesh dy fshatrave dhe janë zaptuar nga një person i vetëm, i cili ka përfituar mbi 300 hektarë tokë.

Sipas banorëve, këto sipërfaqe pritet të përdoren për vendosjen e paneleve fotovoltaike, ndërsa kjo do të sillte pasoja të rënda për komunitetin, pasi burimi i vetëm i të ardhurave për familjet e zonës është blegtoria.

Një nga banorët shprehet se ka mbivendosje të hartave të pronësisë, duke u marrë edhe kullotat e përbashkëta të dy fshatrave.

“Zotëria që ka pronën ka bërë një mbivendosje në hartën e kullotës së fshatit Taç i Sipërm dhe Prodanit, duke marrë komplet zallin e të dyja fshatrave. Të dyja fshatrat merren vetëm me blegtori. Nëse bëhen këto panele, fshati ikën, sepse kullotat janë të vetmet të ardhura për familjet”, u shpreh banori.

Sipas banorëve, bëhet fjalë për një sipërfaqe që shkon deri në 340 hektarë, ndërsa punimet kanë nisur pa pasur lejet përkatëse.

“Ne jemi njohur me këtë situatë kur ata filluan punimet, duke bërë fizibilitetin e tokës. Të fillosh punimet pa pasur leje bashkie nuk e di si bëhet. A kanë leje mjedisi këta? Duhet të bëhet edhe studim arkeologjik, sepse nuk i dihet çfarë ka zona poshtë”,thanë ata.

Rreth 100 blegtorë nga të dyja fshatrat preken drejtpërdrejt nga kjo situatë. Banorët paralajmërojnë se humbja e kullotave do të sillte shpopullimin e zonës.

“Zona këtu merret vetëm me blegtori, janë të ardhurat kryesore. Do t’i shesim bagëtitë dhe do të ikim. Ky është shpopullim. Asnjë njeri s’po e vë ujin në zjarr”, shtoi një protestues.

Edhe kryeplaku i fshatit shprehet se prona është dhënë pa dëshmi ligjore dhe pa transparencë. Sipas tij, edhe juristë të institucioneve të kthimit të pronave kanë konstatuar parregullsi në dokumentacion.

“Jam banues dhe kryeplak i fshatit. Ne i kemi ndjekur procedurat ligjore në atë kohë dhe zotërisë iu dha prona pa asnjë dëshmitar. Kemi kërkuar matjen e sipërfaqes së pronës dhe askush nuk na e thotë. Juristi i kthimit të pronave na tha se prona është e juaja dhe ky gjyq hidhet poshtë sepse mungojnë dëshmitarët. Nëse merret toka, ne mbetemi në rrugë. Fëmijët na i përzunë, edhe dy pleqtë që mbetën do të na i përzënë. Ku do të shkojmë?”, tha kryeplaku.

Banorët u bëjnë thirrje institucioneve shtetërore dhe organeve ligjzbatuese që të ndërhyjnë urgjentisht dhe të rishikojnë dokumentacionin e pronësisë, duke kërkuar ndalimin e çdo punimi deri në sqarimin e plotë të situatës./Kb

Ambasadori i Holandës në Shqipëri, Reinout Vos së bashku ka zhvilluar ditën e sotme një vizitë në Prokurorinë e Posaçme.

Sipas informacioneve, ambasadori ka zhvilluar një takim me kreun e SPAK, Klodjan Brahon. Ambasadori Vos shoqërohej edhe nga disa përfaqësues të tjerë të ambasadës holandeze.

Braho mori në dhjetor detyrën e re si kreu i Prokurorisë së Posaçme, duke pasuar Altin Dumanin./kb

Lajmi se Departamenti Amerikan i Shtetit ka pezulluar shyrtimin e vizave për 75 vende, përfshirë Shqipërinë e Kosovën, ngjalli një kaos në rrjetet sociale e një mori spekulimesh. Konsulentja Juliana Sokoli shpjegon për programin “Aldo Morning Show” në Tv Klan se kategoritë e vizave që kanë pësuar pezullim të përkohshëm janë vizat e bashkimit familjar apo të punësimit afatgjatë. Vizat turistike nuk përfshihen.

“Bashkimet familjare hyjnë te vizat emigruese prandaj është e rëndësishme të kuptohet cilat janë ato viza, sipas medias ndërkombëtare, jemi akoma në kuadër të spekulimeve sa i përket kësaj mase që Shtetet e Bashkuara kanë marrë. Vizat e bashkimit familjar, vizat e punësimit afatgjatë, ato që të çojnë në marrjen e një lejeje të përhershme qëndrimi apo ‘green card’ siç jemi mësuar ta themi, janë këto lloj vizash të cilat mund të kenë një pezullim të përkohshëm që është për t’u parë pastaj cilat do të jenë teknikalitetet, do të ketë shtyrje, vonesa.”

Konsulentja thotë se intervistat nuk cenohen. Edhe sipas një publikimi në faqen zyrtare të ambasadës amerikane, thuhet: “Aplikantët për vizë emigruese që janë shtetas të vendeve të prekura mund të dorëzojnë aplikimet për vizë dhe të marrin pjesë në intervista, dhe Departamenti do të vazhdojë të caktojë takime për aplikantët, por asnjë vizë emigruese nuk do të lëshohet për këta shtetas gjatë kësaj periudhe pezullimi.”

Sokoli këshillon që personat që kanë aplikuar të mos bëjnë asnjë veprim tjetër.

“Të gjitëh personat që kanë aplikuar të mos ndërmarrin asnjë veprim përderisa nuk ka një njoftim zyrtar për këtë qëllim. Çdo person që ka aplikuar për një vizë emigruese apo turistike, pavarësisht se vizat turistike nuk janë të përfshira në këtë pezullim, duhet të presin njoftimin zyrtar nga autoritetet zyrtare përkatëse.”

Vendet e përfshira në listë janë: Afganistan, Shqipëri, Algjeri, Antigua dhe Barbuda, Armeni, Azerbajxhan, Bahamas, Bangladesh, Barbados, Bjellorusi, Belize, Butan, Bosnje dhe Hercegovinë, Brazil, Birmani, Kamboxhia, Kamerun, Kepi i Gjelbër, Kolumbi, Bregu i Fildishtë, Kubë, Republika Demokratike e Kongos, Dominikë, Egjipt, Eritre, Etiopi, Fixhi, Gambia, Gjeorgji, Ganë, Grenadë, Guatemalë, Guine, Haiti, Iran, Irak, Xhamajkë, Jordani, Kazakistan, Kosovë, Kuvajt, Republika e Kirgistanit, Laos, Liban, Liberi, Libi, Moldavi, Mongoli, Mali i Zi, Marok, Nepal, Nikaragua, Nigeri, Maqedoni e Veriut, Pakistan, Republika e Kongos, Rusi, Ruandë, Shën Kits dhe Nevis, Shën Luçia, Shën Vincent dhe Grenadinat, Senegal, Sierra Leone, Somali, Sudani i Jugut, Sudan, Siri, Tanzani, Tajlandë, Togo, Tunizi, Ugandë, Uruguai, Uzbekistan dhe Jemen.

“Emëruesi i përbashkët i këtyre vendeve është numri i lartë i vizave emigruese, bashkimit familjar, viza punësimi, viza të tjera se ka shumë kategori”, thotë Sokoli.

Veç vizave turistike, vizat studentore dhe afatshkurtra, sipas njoftimit, nuk preken nga ky pezullim./kb

Last Updated on 15/01/2026 by Kesjana

Kosova shënon 27-vjetorin e masakrës së Reçakut, një nga ngjarjet më tragjike në historinë e vendit. Më 15 janar 1999, forcat serbe vranë 45 civilë shqiptarë në fshatin Reçak të Shtimes, një akt i tmerrshëm që tronditi jo vetëm Kosovën, por edhe botën.

Presidenti i Kosovës, Bajram Begaj, në një deklaratë për këtë përvjetor, theksoi rëndësinë e kësaj ngjarjeje për historinë e Kosovës, duke kujtuar se denoncimi i masakrës nga Ambasadori William Walker, 27 vjet më parë, bëri thirrje për ndërhyrjen e ndërkombëtarëve dhe ndihmoi në përshpejtimin e rrugës drejt lirisë dhe pavarësisë.

“Sot përkujtojmë masakrën e Reçakut dhe nderojmë martirët e saj. Denoncimi i saj 27 vite më parë nga Ambasadori William Walker ndërgjegjësoi komunitetin ndërkombëtar për gjenocidin që po ndodhte në Kosovë. Ndërgjegjësimi solli Konferencën e Rambujesë, ndërhyrjen e NATO-s, lirinë, shtetin e Kosovës dhe paqen që sot e gëzojmë bashkërisht. Kjo masakër nuk mund të harrohet! Thirrja për drejtësi nuk mund të shuhet! Nderim martirëve! Mirënjohje aleatit tonë strategjik, SHBA-së”, shkruan Begaj.

Aktivitete të ndryshme përkujtimore do të zhvillohen gjatë ditës për të nderuar viktimat e masakrës dhe për të theksuar rëndësinë e paqes, drejtësisë dhe kujtesës kolektive. Masakra e Reçakut mbetet një simbol i vuajtjeve të popullit të Kosovës dhe një dëshmi e rëndësisë së drejtësisë në rikthimin e paqes dhe lirisë.

Kjo ngjarje tragjike është një kujtesë për të gjithë se përpjekjet për drejtësi dhe paqe duhet të vazhdojnë, duke nderuar gjithashtu aleatët që qëndruan krah Kosovës në momentet më të vështira të historisë së saj./kb

Last Updated on 15/01/2026 by Kesjana

Kina vlerësoi vizitën e kryeministrit kanadez Mark Carney në Pekin këtë javë, duke e quajtur atë “të rëndësishme” në punën për të rikalibruar lidhjet pas muajsh riangazhimi intensiv.

“Kjo shënon vizitën e parë të kryeministrit kanadez në Kinë në tetë vjet, duke përfaqësuar një moment të rëndësishëm dhe të rëndësishëm për marrëdhëniet tona dypalëshe”, tha Wang.

Kina është e gatshme të thellojë bashkëpunimin me Kanadanë duke eliminuar “ndërhyrjen”, shtoi Wang, por nuk e specifikoi burimin e ndërhyrjes.

Nga ana tjetër, Anand vlerësoi punën prapa skenave në organizimin e takimeve të afërta të Carney-t me udhëheqësit e Kinës për të “siguruar që këto takime të jenë të suksesshme”, tha zyra e kryeministrit kanadez në një deklaratë.

Që nga një takim pozitiv midis Carney dhe udhëheqësit kinez Xi Jinping në Korenë e Jugut vitin e kaluar, vendet kanë shfaqur një dëshirë të përbashkët për t’i dhënë fund periudhave të tensionit që kanë prishur marrëdhëniet që nga viti 2017.

Tendosja më e fundit ndodhi pasi qeveria e ish-kryeministrit Justin Trudeau vendosi tarifa për automjetet elektrike kineze në vitin 2024, pas kufizimeve të ngjashme të SHBA-së.

Kina u hakmor marsin e kaluar me tarifa për më shumë se 2.6 miliardë dollarë produkte bujqësore dhe ushqimore kanadeze, të tilla si vaji dhe mielli i kanolës, duke çuar në një rënie prej 10.4% të importeve kineze të mallrave kanadeze në vitin 2025, të treguara në të dhënat doganore të mërkurën.

Riangazhimi me Kinën është nxitur gjithashtu nga një shtytje për të diversifikuar tregjet e eksportit, pasi Presidenti i SHBA-së Donald Trump vendosi tarifa ndaj Kanadasë vitin e kaluar dhe sugjeroi që aleati i hershëm i SHBA-së mund të bëhet shteti i 51-të i vendit të tij.

Përpjekjet për të nisur një dialog të ri u shtuan që kur Carney mori drejtimin vitin e kaluar, me zyrtarë të lartë të të dyja palëve që caktuan takime dhe telefonata që hapën rrugën për takimin e udhëheqësve në tetor në Korenë e Jugut./CNA, përkthyer nga Reuters/kb

Last Updated on 15/01/2026 by Kesjana

Disa vende të NATO-s kanë vendosur të dërgojnë një numër të vogël personeli ushtarak në Groenlandë për të marrë pjesë në ushtrime të përbashkëta me Danimarkën, në një kohë që presidenti i SHBA-së Donald Trump shton kërcënimet e tij për të aneksuar me forcë ishullin Arktik.

Danimarka, e cila është përgjegjëse për mbrojtjen e Groenlandës, ka paralajmëruar se një sulm ndaj Groenlandës do t’i jepte fund NATO-s dhe njoftoi të mërkurën se po zgjeronte praninë e saj ushtarake në bashkëpunim të ngushtë me aleatët e NATO-s.

Gjermania, Suedia, Franca dhe Norvegjia kanë konfirmuar që të gjitha se do të dërgojnë personel ushtarak në Groenlandë këtë javë për një stërvitje të përbashkët me trupat daneze. Kanadaja dhe Franca kanë thënë gjithashtu se planifikojnë të hapin konsullata në Nuuk, kryeqytetin e Groenlandës, në javët e ardhshme.

Nuk është e pazakontë që vendet e NATO-s të dërgojnë trupa për t’u trajnuar në vende të tjera të NATO-s, dhe ka pasur një shtytje prej vitesh nga aleatët, përfshirë SHBA-në, për të rritur stërvitjet e përbashkëta në Rrethin Arktik. SHBA-të kanë rreth 150 trupa të stacionuara në Bazën e tyre Hapësinore Pituffik në veriperëndim të Groenlandës.

Por, si koha ashtu edhe simbolika e njoftimeve të fundit nga kombet evropiane janë një shfaqje e rëndësishme solidariteti në një kohë tensioni të paparë brenda NATO-s.

Trump ka qenë jashtëzakonisht i zëshëm në lidhje me ambiciet e tij për të marrë kontrollin e ishullit më të madh në botë, përfshirë edhe me forcë nëse është e nevojshme, duke thënë se do të bënte diçka në Groenlandë, pavarësisht nëse u pëlqen apo jo, gjatë një konference për shtyp me drejtuesit e naftës të premten.

Në një deklaratë të mërkurën, Ministria Gjermane e Mbrojtjes tha se po dërgon një ekip zbulimi prej 13 ushtarakësh në Groenlandë të enjten për një mision eksplorimi së bashku me vendet e tjera partnere, me ftesë të Danimarkës.

Suedia dërgoi gjithashtu një numër të paspecifikuar trupash në Groenlandë të mërkurën me kërkesë të Danimarkës, njoftoi Kryeministri Ulf Kristersson në X. Oficerët suedezë do të jenë pjesë e një grupi trupash nga vende të tjera aleate të cilët së bashku do të përgatiten për një stërvitje të ardhshme të quajtur Operacioni Arktik i Qëndrueshmërisë, shtoi ai.

Presidenti francez Emmanuel Macron tha se Franca do të marrë pjesë gjithashtu në Operacionin Arctic Endurance.

“Njësitë e para ushtarake franceze janë tashmë në rrugë. Të tjerat do të pasojnë”, shkroi ai në X.

Norvegjia po dërgon gjithashtu dy personel mbrojtës në Groenlandë, konfirmoi për CNN një zëdhënës i Ministrisë Norvegjeze të Mbrojtjes. NATO, Organizata e Traktatit të Atlantikut të Veriut, është një aleancë ushtarake e gjatë midis 30 shteteve evropiane, si dhe SHBA-së dhe Kanadasë. /Kb

Ish-komentatori sportiv Dritan Shakohoxha tregoi në “Opinion” një episod të çuditshëm, por dhe qesharak, me gjuhën e urrejtjes në rrjetet sociale. Edhe pse nuk komenton ndeshje prej tre vitesh, një tifoz i zemëruar  vendosi t’ia ‘numërojë’ të gjitha në Instagram: E nxore kokën, tifoz i Interit…

“Më ngrohen nervat, sa të duash. E di sa vetave u kam kthyer përgjigje?! U shkruaj, shpesh kam gjetur edhe kështu ironi. Kam historia nga më të ndryshmet. Unë nuk komentoj më ndeshje, kam tre vjet që nuk komnetoj më ndeshje dhe nuk kam më ndërmend që të komentoj më ndeshje. Dikush që punon në një televizion, ka një ngjashmëri me mua.

Vjet më shkruan dikush në Instagram, ti more që e nxore kokën që dole tifoz i Interit dhe nisi duke me sharë. Më shkruan, duke më sharë nga të gjitha anët: ‘ti more që e qite kokën, robt ku t’i kesh, e nxore që je tifoz i Interit’. Unë i shkruaj ‘ i nderuar zotëri unë kam tre vjet që nuk komentoj më ndeshje, por gjithsesi robt ku t’i kesh edhe ti’. Realisht njerëzit mendojnë se kanë të drejtë të të gjykojnë dhe të japin një mendim për ty”, tregoi Shakohoxha./kb

Prokurori i Përgjithshëm i Kalifornisë, Rob Bonta, ka nisur një hetim mbi përhapjen e imazheve seksuale të krijuara nga modeli i inteligjencës artificiale Grok, i zhvilluar nga kompania e Elon Musk, xAI.

Bonta tha se materialet “që shfaqin gra dhe fëmijë në situata lakuriqe dhe seksuale” janë përdorur për të ngacmuar njerëz online, duke e cilësuar situatën “tronditëse”. Ai bëri thirrje që xAI të ndërmarrë masa të menjëhershme.

Guvernatori i Kalifornisë, Gavin Newsom, e quajti vendimin e xAI për “të krijuar një ambient të favorshëm për predatorë” si “të neveritshëm”.

Musk, në reagimin e tij, deklaroi se Grok nuk prodhon imazhe të personave të mitur pa kërkesë të përdoruesit dhe akuzoi kritikët për motivime politike.

Hetimi i Kalifornisë vjen ndërsa Britania po përgatit ligje për ndalimin e imazheve intime të krijuara pa pëlqim, dhe Ofcom ka nisur gjithashtu një hetim mbi Grok.

Tre senatorë demokratë amerikanë kanë kërkuar largimin e X dhe Grok nga dyqanet e aplikacioneve, ndërsa platforma ka kufizuar mjetin e gjenerimit të imazheve vetëm për abonentët që paguajnë.

Debati thekson pyetjen ligjore mbi përgjegjësinë e kompanive për përmbajtjen e krijuar nga AI, pasi Seksioni 230 i ligjit amerikan nuk mbulon imazhet e prodhuara nga vetë platformat./kb

Takimi i Shtëpisë së Bardhë për Groenlandën nuk arriti të sheshojë dallimet që ekzistojnë mes Shteteve të Bashkuara të Amerikës dhe Danimarkës për ishullin më të madh në botë.

Pas takimit që patën me zëvendëspresidentin e SHBA-së, JD Vance, dhe Sekretarin e Shtetit, Marco Rubio, ministrat e Jashtëm të Danimarkës dhe Groenlandës theksuan se mosmarrëveshjet mes palëve janë thelbësore.

“Nuk arritëm ta ndryshonim qëndrimin amerikan. Është e qartë se presidenti ka dëshirën për të pushtuar Groenlandën. Ne e bëmë shumë, shumë të qartë se kjo nuk është në interes të mbretërisë.”, tha Lars Løkke Rasmussen.

Sa i përket shqetësimeve të amerikanëve lidhur me sigurinë e Groenlandës, ministri i Jashtëm danez theksoi se kjo mund të adresohet përmes NATO-s, ndërsa hodhi edhe një herë poshtë çdo ide për blerjen e ishullit arktik.

Ndërsa ministrja e Jashtme e Groenlandës, Vivian Motzfeldt, tha se vendi i saj dëshiron të forcojë bashkëpunimin me Shtetet e Bashkuara, por nuk dëshiron të jetë pronë e SHBA-ve.

E ndërsa palët ishin në diskutime në Shtëpinë e Bardhë, presidenti amerikan nga Zyra Ovale theksoi gjithashtu se nuk do të heqë dorë nga Groenlanda, pasi ajo është shumë e rëndësishme për sigurinë e Shteteve të Bashkuara të Amerikës.

Sipas tij, Danimarka nuk mund ta mbrojë Groenlandën përballë një pushtimi të mundshëm nga Rusia ose Kina./kb

U konfliktua fizikisht për motive të dobëta, me një 42-vjeçar, në fshatin Gomsiqe, dhe posedonte një armë zjarri pistoletë, kapet dhe vihet në pranga 47-vjeçari. Sekuestrohet pistoleta.

Nga konflikti fizik u dëmtua 42-vjeçari, i cili po merr mjekim në spital.

Specialistët për Hetimin e Krimeve të Stacionit të Policisë Velipojë, menjëherë pas marrjes së njoftimit se në fshatin Gomsiqe, dy shtetas ishin konfliktuar me njëri-tjetrin dhe për pasojë ishte dëmtuar njëri prej tyre, organizuan punën për parandalimin e përshkallëzimit të konfliktit.

Si rezultat i veprimeve të shpejta operacionale, u kap dhe u arrestua shtetasi N. S., 47 vjeç. Nga veprimet e para hetimore dyshohet se shtetasi N. S. është konfliktuar fizikisht për motive të dobëta, me shtetasin F. K., në fshatin Gomsiqe. Si pasojë e konfliktit është dëmtuar shtetasi F. K., i cili po merr mjekim në Spitalin Rajonal Shkodër.

Në vijim të veprirmeve, gjatë kontrollit në banesën e shtetasit N. S., shërbimet e Policisë gjetën dhe  sekuestrua në cilësinë e provës materiale, një armë zjarri pistoletë që ai e posedonte pa leje.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme./kb

Presidenti i Partisë së Lirisë, Ilir Meta, është shprehur se ai nuk ka qenë kurrë i përfshirë në afera korruptive dhe shpërdorim detyre, duke përgënjeshtruar kështu akuzat e SPAK të ngritura ndaj tij. 

Përmes një letre të lexuar nga Sekretari i Përgjithshëm i PL-së, Tedi Blushi, Meta është shprehur se vajza e tij ka siguruar një analizë financiare, ku përllogariten të gjitha të ardhurat dhe shpenzimet që nga viti 1995 deri në vitin 2023. 

Sipas Metës, të ardhurat e tij gjatë këtyre viteve janë rreth 87 milionë lekë të reja. 

“Lidhur me akuzat Cez-Dia dua të theksoj se kjo çështje është hetuar dy herë dhe asnjëherë nuk është përmendur emri im aty. Po kështu çështja Cez-Dia është e vetmja çështje ku shteti shqiptar nuk ka dalë me humbje, por me fitim, pasi dëmi për shtetin shqiptar ka qenë rreth 1 milionë euro, ndërkohë që shtetasit Kastriot Ismaili i janë sekuestruar 4 milionë euro në vitin 2014. Po kështu, dëshmitë e z.Hesek në Prokurorinë e Tiranës janë tregojnë qartë sesi është përzgjedhur DIA. Po kështu janë të qarta edhe referencat amerikane që ka paraqitur DIA, për të fituar besimin e bordit. 

Lidhur me akuzën për lobimet dua t’ju siguroj se nuk ekziston asnjë provë apo fakt që Ilir Meta të ketë shkelur ligjin shqiptar apo amerikan. Ne do të publikojmë kontratën dhe letëporositë, për të zbuluar të vërtetën. 

Lidhur me çështjen e pasurisë, dua të theksoj se akuzat e prokurorëve janë të pavërteta dhe të bazuara në falsifikim. Vajza ka siguruar ekspertizën financiare që vërteton se pasuritë e mia gjatë këtyre viteve (1995-2023) janë 87 milionë lekë të reja. Ky hetim ndaj meje ka rezultat të qartë, 0 qindarkë e paligjshme nga unë dhe 0 metër katror e paligjshme. Nëse keni dyshime, mund të vini t’ju jap sqarime në burgun 313. Edhe në Rusi lejohet që të intervisohen politikanët e burgosur, prandaj nuk përbën asnjë lloj problem”, thuhej në letrën e Metës, të lexuar nga Blushi.

Nga ana tjetër, avokati i Metës, Kujtim Cakrani, është shprehur se klienti i tij ndodhet në izolim total në qelitë e 313, pa asnjë provë. 

Cakrani e cilësoi burgosjen e Metës si një sulm politik ndaj tij, teksa kur foli për analizën financiare të ish-Presidentit, ai përllogariti që atij pas shpenzimeve t’i kishin mbetur edhe rreth 50 milionë lekë të reja. 

Avokati Cakrani bëri thirrje për respektim të të drejtave të njeriut dhe standardeve minimale të shtetit të së drejtës për rastin Meta. 

“Meta ndodhet në një izolim total. Atij nuk i jepet mundësia që të komunikojë me qytetarët, kolegët, bashkëpunëtorët. Gjithsesi kjo është ana politike. Problemi është që hetimet kanë përfunduar që në 4 gusht të vitit 2025. Ndërkohë Meta ndodhet ende në seancë paraprake. Jemi plotë 4 muaj e gjysmë dhe nuk kemi nisur seancën paraprake. Është një shkelje shumë e rëndë e ligjit, Kushtetutës dhe Konventës Europiane të të Drejtave të Njeriut. Drejtësia është kthyer në një drejtësi inkuizitore. Ilir Metën e sulmuan nga të gjitha anët, e bënë edhe spiun të sigurimit të shtetit, por nuk ja dolën dot. Pastaj e burgosën. Ne kërkojmë standardin minimal të një shteti të së drejtës. Balta që është hedhur mbi Metën ka qenë mbi pasurinë e tij, sepse llumi s’kanë lënë gjë të dirigjuar ndaj Metës. Por faktet dhe provat na flasin ndryshe. Tani na ngelet t’u themi njerëzve se ai ministri juaj Ilir Meta, ka qenë vetëm një patriot i ndershëm”, tha Cakrani. /kb

Në luginën jugore të Jordanit, pesë dekada historike të një komuniteti po përfundonin brenda një dite.

Mahmoud Eshaq, 55-vjeç, përpiqej të mbante lotët. Ai nuk kishte qarë që kur ishte fëmijë, por ndërsa përgatitej të largohej nga fshati ku kishte kaluar gjithë jetën, dhimbja e mbushi zemrën.

Fëmijët e tij ngarkonin dyshekë, frigoriferë, çanta me miell dhe valixhe me rroba në një kamion, ndërsa ushtarë të maskuar shoqëronin një adoleshent izraelit që po pozonte mbi një gomar, duke bërë shenjën me dy gishta lart në rrugën kryesore të fshatit.

Analiza |Bota

Dita që fshati u shua, spastrimi etnik në zemër të Bregut Perëndimor

4 min lexim– Publikuar 12:06, 14 Janar 2026Përditësuar 12:06, 14 Janar 2026

Në luginën jugore të Jordanit, pesë dekada historike të një komuniteti po përfundonin brenda një dite.

Mahmoud Eshaq, 55-vjeç, përpiqej të mbante lotët. Ai nuk kishte qarë që kur ishte fëmijë, por ndërsa përgatitej të largohej nga fshati ku kishte kaluar gjithë jetën, dhimbja e mbushi zemrën.

Fëmijët e tij ngarkonin dyshekë, frigoriferë, çanta me miell dhe valixhe me rroba në një kamion, ndërsa ushtarë të maskuar shoqëronin një adoleshent izraelit që po pozonte mbi një gomar, duke bërë shenjën me dy gishta lart në rrugën kryesore të fshatit.

TË LIDHURA

• Edhe dimri vret në Gaza/ Muret shemben mbi çadra, vdesin gra e fëmijë

• 2025-a, viti i ‘turbulencave’ globale: gjithçka ndodhi në 12 muaj

Pastrimi etnik i Ras ‘Ein al ‘Auja-s po ndodhte, dhe kolonistët që e kishin bërë jetën të padurueshme për palestinezët festonin.

Shtëpia e Eshaqit ishte më e madhja dhe e forta nga fshatrat beduine të shpërndara në kodrat pjesës së ulët të Jordanisë. Në fillim të vitit, ajo ishte gjithashtu shtëpia e vetme që kishte mbetur, pasi dhuna e kolonistëve kishte detyruar fshatarët e tjerë të largoheshin.

Sot, kolonistët izraelitë kontrollojnë më shumë se 250 km² tokë në këtë pjesë të Bregut Perëndimor, që dikur përdorej vetëm për kullotjen e bagëtive. Kështu thotë Dror Etkes, themelues i grupit për monitorimin e kolonistëve Kerem Navot.

Palestinezët janë dëbuar nga toka që komuniteti ndërkombëtar e parashikon për një shtet të ardhshëm të tyre.

“Ne jetonim këtu paqësisht, por ata na bënë armiq”, tha Eshaq. “Gjithë jetën time nuk kam qarë, por këtë mëngjes po qaja. Kjo është një ditë e tmerrshme për ne.”

Familjet beduine që jetojnë këtu janë pasardhës të refugjatëve nga Naqabi, që u larguan nga shtëpitë e tyre në vitin 1948. Të varfër dhe të izoluar, ata janë lehtësisht të prekshëm nga kolonistët. Procesi i largimit të tyre filloi para luftës në Gaza, por u përshpejtua ndërsa vëmendja e mediave u fokusua diku tjetër.

“Kur filloi lufta, udhëheqësit e kolonistëve kuptuan se kishin një mundësi për të intensifikuar spastrimin etnik të zonës”, tha Sarit Michaeli, drejtuese e organizatës së të drejtave B’Tselem.

Largimi i palestinezëve kryhet gradualisht përmes dhunës dhe intimidimit: prerja e kabllove të elektricitetit, zbrazja e rezervuarëve të ujit, sulme natën dhe vendosja e postblloqeve të përkohshme brenda fshatit.

Djem të rinj, disa edhe të mitur, ndihmojnë kolonistët duke mbikëqyrur tufat e kafshëve dhe duke izoluar banorët palestinezë.

Ushtarët izraelitë shpesh marrin pjesë në këto akte ose injorojnë dhunën.

Kur një gjykatë urdhëroi kthimin e palestinezëve të dëbuar, kolonistët i dëbuan sërish brenda pak orësh. Në 2 vitet e fundit, ushtarët dhe kolonistët kanë vrarë mbi 1 mijë palestinezë në Bregun Perëndimor, një në pesë prej tyre fëmijë, pa asnjë llogaridhënie.

Në Ras ‘Ein al ‘Auja, pas sulmeve të vazhdueshme, 26 familje, mbi 120 persona, vendosën të largoheshin.

“Këtë javë nuk kemi ngrënë dhe nuk kemi fjetur”, rrëfen Eshaq. Disa fqinje, si Mohammed Reshad, mbetën pa asgjë, pasi kolonistët u vodhën rroba dhe dyshekë.

Ky projekt i dëbimit kryhet nga ekstremistë të dhunshëm të mbështetur nga ministrat e qeverisë izraelite, por është pjesë e një strategjie të gjatë dhe të zakonshme politike që synon aneksimin e tokës palestineze.

Qeveritë izraelite, pavarësisht ngjyrës politike, e kanë mbështetur këtë proces që nga viti 1967, duke përdorur tokën për siguri dhe për krijimin e komuniteteve koloniale.

Rripi i tokës ku ndodhet Ras ‘Ein al ‘Auja shtrihet midis autostradës pranë kufirit me Jordaninë dhe “Rrugës Allon” që kalon kodrat e Bregut Perëndimor. Kodrat janë të pakta në popullsi, por të përshtatshme për kullotje. Postblloqet e kolonistëve me kafshë kanë rezultuar një mjet efikas për shpronësim masiv.

Ndërkohë, kolonistët vazhdojnë të përhapin mesazhe dhune në mediat sociale, duke deklaruar qartë synimin e tyre për të larguar palestinezët.

Në gjithë Bregun Perëndimor, ata kanë marrë mbi 18% të tokës që është parashikuar për një shtet palestinez.

Artikulli është marrë nga The Guardian/kb

Kryeministri Edi Rama deklaroi në panelin e Samitit të Javës së Zhvillimit të Qëndrueshëm në Abu Dhabi, se Shqipëria synon që deri në fund të vitit 2028 të arrijë sovranitet të plotë energjetik, duke mos pasur më nevojë për import të energjisë nga jashtë.

“Ne jemi më fat, sepse kemi burime hidrike dhe jemi 100% me energji të ripërtëritshme. Nuk përdorim karburante fosile dhe jemi në nivelin më të lartë të renditjes. Por duke qenë se mbështetemi tek uji, varemi nga humori i Allahut, kur Allahu qesh shumë dhe nuk qan, nuk kemi shi dhe jemi të detyruar të importojmë energji”, u shpreh Rama.

Rama: Jemi me fat sepse keni burime hidrike dhe jemi 100% me energji të ripërtëritshme nuk e kemi nga karburantet fosile, jemi në nivelin më të lartë të renditjes. Duke qenë se kemi burime ujore, do të thotë që ne varemi nga humori Allahut, kur Allahu qesh shumë dhe nuk qan, nuk kemi shi, kështu ne duhet t’i drejtohemi importit dhe më pas kjo bëhet e vështirë.

Ajo që kemi bërë në këtë dekade të fundit është të investojmë shumë në energjinë diellore dhe atë të erës dhe të krijojmë një portofol burimesh të ekuilibruara në mënyrë që të mos kemi nevojë t’i drejtohemi importit dhe të jemi sovran duke pasur energji të gjelbër. Plani po ecën mirë, dhe besojmë se në fund të 2028 do jemi sovran dhe nuk do blejmë më energji nga jashtë.

Kemi një bashkëpunim strategjik dhe kjo ka ndodhur falë këtij vendi dhe falë udhëheqësit të madh tuajin që ka vizonin që shkon përtej kufijve dhe siç e pamë, ai mendon t’i shërbej njerëzimit dhe të prek jetën e njerëzve jashtë kombeve tuaja, gjë që as Kombet e Bashkuara nuk e kanë bërë.

Ambicia jonë është që së bashku me Emiratet e Bashkuara Arabe dhe me Italinë, të kemi një bashkëpunim trepalësh të krijojmë një bazë të ngarkesës në Shqipëri, po synojmë të mbërrijmë në tre diga përmes kabullit ndërlidhës më Italinë, t’i shërbejmë Evropës me energji të gjelbër, se bashku me miqtë tanë Arabët të bëjmë para për t’ja shitur Evropës. Është një projekt më shumë se 1 miliardë./kb

Nga Ylli Manjani

Nuk e di se çfarë kërkon që gjejë SPAK tek mbledhja e Rithemelimit të PD, një punë krejt e brendshme e një partie politike!?

Se ç’punë ka SPAK me mbledhjet e një partie, nuk e di?! Por është krejt pa sens, kjo krahasuar me punën reale që ka SPAK.

Meqë e kanë merak PD dhe financimet e saj, do kishte më shumë interes në emër të ligjit dhe interesit publik të sqaroheshin 2 gjëra:

1. Financimi në shumën prej 500 000 dollarë i një kontrate Lobbimi në Amerikë, që PD e Lulzim Bashës lidhi dhe, hetimet ndaj të cilës i mbylli prokuroria e Tiranës asohohe. Pritej një përgjigje e letër-porosisë nga ShBA asokohe…

2. Burimet e financimit të 3 kontratave, 2 lobbimi dhe 1 shërbimi, po në Amerikë dhe me vlerë deri në 10 milionë dollarë, që PD e Berishës i lidhi, me nënshkrimin e Mulit, pa i bërë syri (jo tv) tërrt. Janë kontratat më të shtrenjta të mundshme që një parti politike në rruzull i paguan për lobbim.

Kontrata prej 1.3 milionë dollarësh për një vjershë me buf që ofroi Lacivita, është padyshim më e shtrenjta në llojin e vet. Kurse ato dy të tjerat që do hiqnin nongratat, janë marramendëse… Shumë para për një parti e harruar në opozitë…

Këto janë kontrata për hetime, jo shpenzimet për një mbledhje partie, mbledhje e cila rrëzoi partinë e Lulit e të Gaz kallëzuesit.

Se kështu del që SPAK po punon për historitë e Lulit e Gazit…/kb

Mbrëmja e djeshme në shtëpinë e Big Brother Vip Albania u shndërrua në një moment tejet emocional, teksa Stenaldo vendosi të hapte zemrën dhe të ndante me publikun historinë e tij të jetës.

Mes lotësh dhe emocioneve, ai rrëfeu plagët e thella që e kanë shoqëruar që në fëmijëri, humbjen tragjike të babait, betejën me humbjen e shikimit dhe forcën e jashtëzakonshme të nënës së tij, e cila ka qenë shtylla kryesore e jetës dhe motivi që e shtyu të bëhej pjesë e këtij rrugëtimi.

Rrëfimi i Plotë i jetës së Stenaldos

‘Unë kam lindur në Lushnje në 28 maj të 1997. Kam lindur në një qytet ku nuk kam jetuar kurrë, hiq muajin e parë të jetës time, derisa im atë në qershor të po atij viti ndërroi jetë, I vrarë në një mënyrë të poshtër në atë vit të poshtër për të gjithë shqiptarët që na ka bërë të humbasim më shumë se çdo herë në historinë tonë të brishtë. U vra nga dikush mbasi atij i dha një përqafim dhe i ktheu kurrizin për të vazhduar rrugën e tij. Dhe kjo është arsyeja pse unë gjithmonë kam thënë që në këtë botë të gjithë trimat vriten nga frikacakët. Kur njeriu rritet me një humbje të tillë nuk ka me asnjë moment dramatik në jetën e tij, nuk ka një moment kur ti e mëson, ti thjesht e di që ndryshe nga fëmijët e tjerë babai jot nuk është aty. Ajo që dikush mund ta quajë dramë, humbjen e shikimit, është prapë një përjetim, që I bie për pjesë mamasë dhe familjes nga të dyja anët, si nga ana e nënës ashtu dhe e babait, Sokolit, sepse shikimi më humb relativisht shumë shpejt. Familja e kuptoi këtë kur unë isha 6 muajsh. Për mamanë time siç unë e kam kuptuar, ky mbetet një nga momentet më të vështira të jetës së saj, që nuk është padiskutim i vetmi, Mjekët na thanë se unë kisha kaluar një infeksion në Retinë. Askush nuk e di tamam si mund të ketë ndodhur dhe që retina tashmë ishte jashtë funksionit. Fakti që nuk mund të shikoja ishte fakt dhe unë nuk mund të ndryshohej. Mamaja ime kaloi në atë muaj, në atë vit traumën e jashtëzakonshme, por të cilës i qëndroi trime dhe nuk ju fsheh gjatë gjithë jetës së saj. Ardhja në Tiranë ishte vërtetë një sfidë, e para ishte të shkonim të studionim në një shkollë që ishte specifike dhe përveç kësaj diferenca tjetër ishte që atje mund të mësonim të shkruanim dhe të lexonim në letër, një mënyrë ku forma e shkronjave nuk është vizuale por e ngritur në pika. Vazhdoja të isha një fëmijë shumë kurioz, që në atë kohë, si është floku im, tiparet.

Fillova të studioja piano. Luftën e madhe që unë, por mbi të gjitha mamaja ime kemi bërë kur kemi ardhur në këtë vend, përtej shkollës, ishim vetëm unë dhe ajo dhe nuk e keni idenë se çdo të thoshte të vije në Tiranë dhe të luftoje të gjeje një vend për të futur kokën. Flutura duhet të ishte burrë dhe grua në atë luftë. Unë kam qenë gjithmonë i hapur që mamaja ime të ketë një jetë të plotë, një jetë ku të mos jetë vetëm e dedikuar ndaj meje. Ne krijuam një familje që në fund rezultoi të jetë një humbje e madhe për të gjithë. Nga ajo familje unë kam Xhoelin, të cilin nuk kam mundur kurrë të takoj për shkak të gjithë asaj që është vështirësi e madhe e përballjes me një situatë padiskutim më të vështirën e Fluturës dhe më të vështirën e jetës time.

Unë kisha marrë një kontratë pune për në Gjermani dhe mu desh të mësoja metrotë dhe trenat. Nuk do ta harroj kur unë kisha hipur në shinat e trenit duke menduar se isha në rrugë. Kur erdhi mamaja në Gjermani, e pati shumë të vështirë dhe mora vendimin të kthehesha në Shqipëri. Ka qenë viti më i vështirë që mbaj mend unë si i rritur”, u shpreh Stenaldo./kb

etimi nga SPAK për fondet e Kuvendit të Rithemelimit, që parapriu kthimin e Sali Berishës në Partinë Demokratike, ka nisur pas një kallëzimi të bërë nga Gazmend Bardhi në fund të vitit 2021 në Prokurorinë e Posaçme.

Në këtë kallëzim, ish-sekretari i përgjithshëm i PD paditi Belind Këlliçin, Albana Vokshin dhe Enno Bozdo Spahon si organizatorë të Kuvendit. Një ditë më parë, Belind Këlliçi u pyet në SPAK për origjinën e parave dhe faturat, ndërsa sot u thirr anëtari i kryesisë, Indrit Hoxha.

Gazetari Fatos Mahmutaj, i ftuar në “Ora e Fundit”, u shpreh se këtë përplasje e shikon si një “karma” brenda kupolës së Partisë Demokratike.

“Këtë e shikoj si një ‘karma’ brenda PD apo brenda kupolës së PD. Ishin këta njerëz që përpara katër vitesh u rrahën me hunj, detyruan palën tjetër të blindonin dyert. Gaz Bardhi shikonte rrugën e padisë në SPAK, duke menduar për karrierën. Unë jam i mendimit se ai është bërë pishman për kallëzimet e tij”, tha ai.

Ai komentoi edhe takimin e Berishës në Lezhë, për të cilin tha se pasuesi i tij në krye të PD do të jetë një figurë tjetër, që do të zgjidhet nga demokratët dhe ky emër do të jetë jashtë familjes së tij.

Gazetari Mahmutaj pohoi se PD, nën drejtimin e Sali Berishës, ka pësuar një tkurrje të madhe, duke përfunduar si parti e dorës së tretë.

“Berisha e ka kuptuar edhe vetë se familja e tij janë super të konsumuar për drejtimin e PD. I ka ardhur momenti që të zgjidhet lideri vetë, jo trashëgimi e familjes së Berishës. Deri tani, Berisha ia kishte bërë hyzmetin e duhur që në krye të PD të linte vajzën ose djalin e tij. Nga mbajtja peng e PD nga Berisha, kjo parti vetëm është rrudhur. Ka humbur dhe ka shkuar në çdo palë zgjedhje poshtë e më poshtë dhe është katandisur si parti e dorës së dytë apo të tretë, nga parti e dorës së parë që ishte në të kaluarën. Kësaj partie i duhet me patjetër që të zgjedhë një personazh të hajrit, të jetë i ri dhe i pakonsumuar”, tha ai.

Më tej, gazetari u shpreh se Sali Berisha është i zhytur kokë e këmbë në krim. Ai përmendi disa prej ngjarjeve për të cilat, sipas tij, ka gisht vetë ish-kryeministri i vendit.

“Berisha është kokë e këmbë i zhytur në krim. Berisha ka urdhëruar vrasje dhe dekrete vetë. Kemi rastin e Haklajve. Ai bënte thirrje që ‘gjallë a vdekur, të ma sillni Fatmir Haklajn në Tiranë’. Ka urdhëruar vrasjen dhe zhdukjen e Remzi Hoxhës. Futi në kurth Azem Hajdarin. Krimet e tij i projekton tek të tjerët”, theksoi Mahmutaj.

Ai theksoi se Lulzim Basha e ka “shitur” Sali Berishën për vrasjen shtetërore të 21 janarit, ku katër protestues të pafajshëm u ekzekutuan poshtë zyrave të Kryeministrisë.

“Basha ka përcjellë urdhrat e Sali Berishës. Lulzim Basha e ka shitur Sali Berishën për 21 janarin”, tha ai./kb

Groenlandezët po përballen me një nga momentet më vendimtare në historinë e tyre moderne, teksa në Uashington zhvillohet një takim i nivelit të lartë që mund të përcaktojë të ardhmen e ishullit më të madh në botë dhe jo vetëm të tij. Në Shtëpinë e Bardhë, në një samit të thirrur nga Zëvendëspresidenti amerikan JD Vance, marrin pjesë ministrat e jashtëm të Danimarkës dhe Groenlandës, si dhe Sekretari Amerikan i Shtetit, Marco Rubio. Në qendër të bisedimeve është statusi dhe e ardhmja strategjike e Groenlandës, një territor gjysmë-autonom i Danimarkës, por me rëndësi kyçe gjeopolitike dhe ushtarake për SHBA-në dhe NATO-n.

Në kryeqytetin Nuuk, atmosfera është e tensionuar. Një tabelë elektronike gjigante mbi një qendër tregtare të mbuluar nga bora shfaq vazhdimisht fjalët “Trump”, “Groenland” dhe “sovranitet”, duke reflektuar frikën dhe pasigurinë e banorëve vendas. Deklaratat e fundit të Donald Trumpit, se SHBA-ja dëshiron ta marrë Groenlandën “me mënyrën e lehtë ose të vështirë”, kanë rritur ndjeshëm ankthin publik, sidomos pas veprimeve të tij të diskutueshme ushtarake në skenën ndërkombëtare.

“Ne nuk jemi në shitje. Vendi ynë nuk është në shitje”, thotë Amelie Zeeb, një banore e Nuuk-ut, duke shprehur një ndjenjë të përbashkët mes groenlandezëve. Shkrimtarja dhe muzikantja inuit, Sivnissoq Rask, thekson se shpresa e saj është për një Groenlandë e pavarur dhe të menaxhuar mirë, jo të blerë nga një fuqi e huaj. Ndërkohë, qytetarë të tjerë shprehin shqetësim për ndikimin që kjo vëmendje globale mund të ketë mbi jetën e përditshme dhe të ardhmen e fëmijëve të tyre.

Por çështja e Groenlandës shkon shumë përtej dëshirave të popullsisë vendase. Ajo ka potencialin të shkaktojë një përplasje serioze mes aleatëve të NATO-s, konkretisht mes SHBA-së dhe Danimarkës. Kryeministrja daneze, Mette Frederiksen, ka paralajmëruar se çdo përpjekje e SHBA-së për të marrë Groenlandën me forcë do të shënonte fundin e aleancës transatlantike, mbi të cilën Evropa ka mbështetur sigurinë e saj për dekada.

Në këtë kontekst, vendet evropiane po përpiqen të gjejnë zgjidhje kompromisi. Gjermania dhe Britania e Madhe kanë marrë rolin udhëheqës në diskutimet për forcimin e pranisë ushtarake të NATO-s në Arktik. Propozimet përfshijnë stacionimin e trupave, anijeve luftarake, avionëve, nëndetëseve dhe sistemeve kundër dronëve, si dhe krijimin e një misioni detar “Arctic Sentry”, të ngjashëm me atë në Detin Baltik.

SHBA-ja argumenton se Groenlanda është thelbësore për sigurinë kombëtare amerikane, veçanërisht për mbrojtjen raketore dhe monitorimin e aktivitetit rus dhe kinez në Arktik. Ishulli ndodhet në rrugën më të shkurtër mes Amerikës së Veriut dhe Rusisë, dhe përfshin pika strategjike si baza Pituffik Space Base dhe korridori detar i njohur si “GIUK gap” (mes Groenlandës, Islandës dhe Britanisë).

Megjithatë, shumë analistë vënë në dyshim nëse shqetësimi i Trumpit është thjesht ushtarak. Groenlanda është e pasur me minerale të rralla dhe burime natyrore jetike për teknologjitë e avancuara dhe industrinë e mbrojtjes. Po ashtu, shkrirja e akullnajave po hap rrugë të reja detare, me potencial të madh ekonomik. Kjo ka shtyrë disa ekspertë të besojnë se bëhet fjalë më shumë për siguri ekonomike dhe zgjerim territorial sesa për mbrojtje klasike.

Sondazhet tregojnë se shumica e groenlandezëve dëshirojnë pavarësi nga Danimarka, por rreth 85% e tyre kundërshtojnë idenë e të qenit pjesë e SHBA-ve. Kryeministri i Groenlandës, Jens-Frederik Nielsen, ka deklaruar se vendi po përballet me një krizë gjeopolitike dhe se, nëse duhet zgjedhur mes SHBA-së dhe Danimarkës, zgjedhja e Groenlandës është Danimarka.

E ardhmja mbetet e pasigurt. Shumëçka do të varet nga qëndrimi i Donald Trumpit, i përshkruar shpesh si i paparashikueshëm. Siç paralajmërojnë ekspertët, një veprim i detyruar ndaj Groenlandës do të kishte pasoja dramatike: dobësimin ose shpërbërjen e NATO-s, përkeqësimin e marrëdhënieve SHBA–Evropë dhe një sinjal të rrezikshëm për Rusinë dhe Kinën.

Samiti i së mërkurës në Uashington pritet të jetë një pikë kthese, jo vetëm për Groenlandën, por për të gjithë Arktikun dhe rendin demokratik ndërkombëtar./kb