Kreu i Partisë “Shqipëria Bëhet”, Adriatik Lapaj, ka mbajtur një fjalim sot para Kryeministrisë, gjatë protestës kundër qeverisë, duke theksuar se kjo shënon ditën e 28-të të qëndresës qytetare kundër hajdutërisë. 

Ai tha se edhe qëndrimi i një qytetari të vetëm përballë padrejtësisë është një rrugë e drejtë, ndërsa akuzoi qeverinë për dështim në përmbushjen e premtimeve kryesore. 

“Sot jemi në ditën e 28 të qëndresës qytetare kundër hajdutërisë. Sot bota është më e lirë, sepse një diktator matanë oqeanit ra dhe një autokrat na ka përballë. Kjo është një përballje me hajdutët, ndaj edhe një sikur të qëndrojë është një rrugë e drejtë. Jemi përballë atij që erdhi në pushtet për të na sjellë ujë, jemi përballë atij që erdhi në pushtet për të vendosur rend dhe ligj, a kemi sot rend dhe ligj? Jemi përballë atij që erdhi në pushtet se do luftonte krimin dhe drogën, a kemi sot krim dhe drogë? Erdhi në pushtet për të luftuar korrupsionin. Jemi sot ne vendi më i korruptuar apo jo? Jemi këtu për të kërkuar dorëheqjen e njeriut më të korruptuar në Evropë” ,tha Lapaj. 

 

“Rendi botëror ka rënë!”. Kështu u shpreh presidenti serb, Aleksandër Vuçiç, pas një mbledhje urgjente të Këshillit të Sigurisë Kombëtare ku diskutoi me tonë kritike për operacionin amerikan për kapjen e mikut të tij në Venezuelë, Nikolas Maduro.

“Pas veprimeve në Venezuelë, është plotësisht e qartë se rendi publik ndërkombëtar dhe Karta e OKB-së nuk zbatohen”, theksoi Presidenti serb, duke shtuar se ligji i forcës dhe ligji i më të fortit po dominojnë botën.

“Pra, ju e shihni që nuk ka parime. Kjo është arsyeja pse ne jemi veçanërisht të shqetësuar për armatimin e mëtejshëm të Prishtinës, në kundërshtim me Kartën e Kombeve të Bashkuara dhe Rezolutën 1244, e cila është pezulluar de facto, por jo de jure, nga fuqitë e mëdha, siç është Turqia. Ato po e armatosin me shpejtësi Prishtinën. Një kërcënim i veçantë për sigurinë e Serbisë është aleanca ose bashkimi i sapokrijuar i Prishtinës, Tiranës dhe Zagrebit, i cili po zhvillohet në një fushë të gjerë që përfshin zhvillimin e përbashkët të sistemeve komplekse luftarake nga automjetet katër me katër deri te armët dhe mjetet më të fuqishme”, tha Vuçiç, duke shtuar se Serbia po e monitoron nga afër këtë dhe po përgatitet për mbrojtje kundër atyre që pretendoi se tani po bëjnë “kërcënime të hapura” ndaj Serbisë.

“Duam t’ju themi se Republika e Serbisë po e ndjek këtë me kujdes dhe ne jo vetëm që po e ndjekim, por po përgatitemi edhe për t’u mbrojtur kundër atyre që, as fshehurazi, por hapur kërcënojnë vendin tonë. Ne besojmë se forca jonë do të jetë një pengesë e mjaftueshme”, theksoi Vuçiç.

Një banesë është përfshirë nga flakët këtë të hënë në fshatin Murras, në bashkinë  e Elbasanit. Menjëherë pas njoftimit, në vendngjarje ka mbërritur shërbimi zjarrfikës, i cili ka ndërhyrë për vënien nën kontroll të zjarrit dhe shmangien e përhapjes së flakëve në banesat përreth. 

Nga zjarri janë shkaktuar dëme të shumta materiale, ndërsa fatmirësisht nuk raportohet për persona të lënduar. Shkaqet e rënies së zjarrit mbeten ende të paqarta, teksa pritet që grupi hetimor të nisë verifikimet për zbardhjen e plotë të rrethanave të ngjarjes. 

Në momentin e rënies së zjarrit, në banesë ndodheshin  tre anëtarë të familjes, të cilët kanë arritur të dalin menjëherë jashtë sapo kanë konstatuar flakët, duke shmangur kështu çdo rrezik për jetën. Sipas të dhënave paraprake, dyshohet se zjarri është shkaktuar nga një pajisje elektroshtëpiake. Autoritetet vijojnë hetimet për të konfirmuar shkaqet e sakta të ngjarjes. 

Një problem serioz me radio-frekuencat po ndikon në të gjithë hapësirën ajrore të Greqisë, ndërsa Shërbimi i Aviacionit Civil ka lëshuar një udhëzim zyrtar për fluturimet. 

Sipas njoftimeve të publikuar nga Shërbimi i Aviacionit Civil, pezullimi i fluturimeve për shkak të problemeve teknike në frekuencat e komunikimit do të vazhdojë “deri në njoftim të mëtejshëm”, raportojnë mediat greke. 

Si rezultat, kapaciteti i fluturimeve është reduktuar ndjeshëm. Ndërsa fillimisht vazhdonin fluturimet që tashmë ishin në ajër, tani janë bërë pothuajse të pamundura nisjet, kryesisht nga aeroporti më i madh i vendit, El. Venizelos, i cili ndikohet më shumë për shkak të volumit të lartë të fluturimeve, veçanërisht në këto ditë të ngarkuara. 

Po ashtu, problemet po ndikojnë edhe në aeroportet rajonale, ndërsa disa fluturime që ishin në ajër po devijohen drejt aeroporteve të tjera. 

Teksa katër personat e arrestuar në Shkodër si autor të dyshuar për vrasjen me tritol të 67-vjeçarit Hysni Ymeri, pritet të dalin të hënën në gjykatë për caktim mase sigurie, “News 24” ka mësuar detaje të reja nga hetimet e kryera deri më tani. 

Njëri prej të arrestuarve, Gerti Bushati dyshohet të jetë paguar 1 mijë euro për të vendosur lëndën plasëse në paketën elektrike të pallatit ku banonte Ymeri, më datë 27 dhjetor, dy ditë para se të bëhej shpërthimi i telekomanduar. 

Shuma e parave është gjetur dhe sekuestruar në banesën e tij. Nuk dihet nëse të riut i ishin premtuar para të tjera ose jo. Burime nga grupi hetimor konfimojnë për News 24 se Bushati u tradhtua nga kamerat e sigurisë teksa është fiksuar duke kaluar në zonë, por edhe gjatë kohës që ka ndërruar rrobat pasi vendosi lëndën plasëse. 

27-vjeçari Bushati shfaqet i veshur me kominoshe të cilat i kishte veshur sipër rrobave të tjera dhe pasi largohet nga zona, heq kominoshet dhe i hedh në anë të lumit. E gjithë skena është fiksuar nga kamerat e sigurisë të një biznesi aty pranë, ndërsa rrobat e përdorura prej tij tashmë janë sekuestruar nga hetuesit. 

Në sajë të hetimeve të kryera, hetuesit zbuluan se ditën e ngjarjes, në lagjen “Manush Alimani”, ndodheshin edhe dy të arrestuarit Ergys Ibrahimi dhe Edison Hasaj. Grupi hetimor ka dyshime të forta se shpërthimi i telekomanduar të jetë bërë nga Ergys Ibrahimi, sapo 67-vjeçari Hysni Ymeri ishte duke u ngjitur për në banesë. 

Fillimisht u dyshua se ngjarja ishte aksidentale për shkak të një defekti në rrjetin elektrik, deklaratë që më pas u kundërshtua nga OSHEE. 

Pas ngjarjes, të dyshuarit u shoqëruan në polici dhe u mbajtën në përgjim ambiental nga policia. Por pa e ditur këtë detaj, të dyshuarit kishin nisur të komunikonin me njëri-tjetrin. 

Të arrestuarit nuk kanë konflikte direkte me viktimën, ndërsa hetuesit nuk kanë ende të qartë se kush është porositësi i vërtetë i krimit, apo edhe motivi i vrasjes së 67-vjeçarit. 

Të arrestuarit do të përballen në hënën në gjykatë për një sërë veprash penale, si “Vrasja me paramendim”, e kryer në bashkëpunim; “Shkatërrimi i pronës me eksploziv”; armëmbajtje pa leje, “Prodhimi dhe shitja e narkotikëve”, e kryer në bashkëpunim; dhe “Prishja e qetësisë publike”. 

 

 

Vetëm pak orë pas ngjarjes, Rodríguez kryesoi mbledhjen e Këshillit Kombëtar të Mbrojtjes, e rrethuar nga ministra dhe zyrtarë të lartë, ku kërkoi “lirimin e menjëhershëm” të çiftit Maduro dhe dënoi ashpër operacionin amerikan, duke e cilësuar shkelje flagrante të sovranitetit dhe së drejtës ndërkombëtare.

“Çfarë i është bërë Venezuelës mund t’i bëhet çdo vendi. Ky përdorim brutal i forcës duhet refuzuar nga populli ynë dhe dënuar nga Amerika Latine,” deklaroi ajo në një fjalim të transmetuar nga televizioni shtetëror VTV.

Figurë kyçe e chavizmit

Delcy Rodríguez, 56 vjeçe, është juriste me arsim nga Universiteti Qendror i Venezuelës dhe një nga figurat më të rëndësishme të chavizmit, lëvizjes politike të themeluar nga Hugo Chávez dhe e drejtuar më pas nga Maduro.

Së bashku me vëllain e saj, Jorge Rodríguez, aktualisht kryetar i Asamblesë Kombëtare, ajo ka mbajtur poste kyçe që prej epokës Chávez. Ka shërbyer si ministre e Informacionit, ministre e Jashtme dhe më pas si presidente e Asamblesë Kushtetuese, e cila forcoi pushtetin e qeverisë pas humbjes së zgjedhjeve parlamentare nga chavistët në vitin 2015.

Në vitin 2018, Maduro e emëroi zv/presidente, post që ajo e mbajti edhe gjatë mandatit të tretë presidencial të nisur në janar 2025, pas zgjedhjeve të kontestuara të vitit 2024. Paralelisht, Rodríguez ka qenë autoriteti kryesor ekonomik i vendit dhe ministre e Naftës.

Analistët e përshkruajnë atë si një figurë me ndikim të madh dhe me “besimin e plotë” të Maduro-s, veçanërisht mbi aparatin shtetëror dhe institucionet e sigurisë.

A do të ketë dialog me SHBA-të?

Presidenti amerikan Donald Trump deklaroi se Sekretari i Shtetit Marco Rubio ka zhvilluar një bisedë me Rodríguez, duke lënë të kuptohet se ajo mund të jetë e hapur për bashkëpunim me Uashingtonin në një fazë të re për Venezuelën.

Megjithatë, analistë dhe vetë qëndrimet e para publike të Rodríguez sugjerojnë të kundërtën. Ajo është konsideruar një nga figurat më të ashpra të sistemit chavist dhe ka refuzuar çdo ide bashkëpunimi me SHBA-të, duke këmbëngulur se Nicolás Maduro mbetet presidenti legjitim i Venezuelës.

“Ka vetëm një president në këtë vend dhe emri i tij është Nicolás Maduro Moros,” deklaroi ajo, duke u shfaqur tashmë si fytyra më e dukshme e pushtetit në Karakas.

Ndërsa e ardhmja politike e Venezuelës mbetet e paqartë, Delcy Rodríguez është sot figura kyçe që mban në dorë drejtimin e vendit, në një nga momentet më të tensionuara të historisë së tij moderne.

 

Në territorin e Qarkut Shkodër, reshjet e dendura të shiut, erërat e forta dhe reshjet e borës kanë shkaktuar disa problematika, të cilat po monitorohen dhe trajtohen nga autoritetet lokale. Në disa zona janë krijuar vështirësi në kalimin e disa akseve rrugore dhe kanë ndikuar në furnizimin me energji elektrike në disa fshatra.

Bashkia Shkodër ka pasur vështirësi në qarkullimin e mjeteve në aksin Prekal-Kir, ku grupet e punës janë në terren për të zgjidhur situatën.

Në Bashkinë Malësi e Madhe, po hasen probleme me furnizimin me energji elektrike në fshatrat Zagorë, Vrakë dhe Kelmend, ndërkohë që ekipet e riparimit po punojnë për të rikthyer shërbimin.

Në aksin Bogë-Theth, për shkak të reshjeve të borës, qarkullimi po kryhet vetëm me goma dimërore ose zinxhirë. Po ashtu, në aksin Tamarë–Vermosh ka prezencë gurësh në disa segmente të rrugës, por borëpastrueset janë në terren dhe po vazhdojnë pastrimin për të siguruar kalimin normal të mjeteve.

Shoferi i një autobusi është arrestuar nga Policia e Tiranës. Sipas policisë, 56-vjeçari duke drejtuar autobusin ka përplasur një këmbësor.

Si pasojë ka humbur jetën 46-vjeçari.

“N. H., 56 vjeç, pasi në afërsi të vendit të quajtur “Ura e Peshkatarit” autobusi që drejtonte ka aksidentuar këmbësorin shtetasin Z. I., 46 vjeç, i cili për pasojë ka humbur jetën”, thuhet në njoftimin e policisë.

Materialet procedurale iu referuan Prokurorisë së Tiranës për veprime të mëtejshme.

Sipas New York Times të paktën 40 persona, përfshirë civilë dhe ushtarë, gjatë operacionit të zhvilluar në Venezuelë. New York Times citon një zyrtar venezuelin. 

Megjithatë sipas prestigjiozes New York Times, zyrtarë amerikanë i thanë se operacioni përfshinte një fushatë të gjerë ajrore që synonte neutralizimin e mbrojtjes ajrore të Venezuelës përpara vendosjes së forcave tokësore. 

Më shumë se 150 avionë amerikanë morën pjesë në operacione, duke goditur infrastrukturën ushtarake për të lejuar trupat të transportoheshin me helikopter në zonën ku ndodhej Maduro. 

 

Për shkak të protestës së lajmëruar nga Adriatik Lapaj që pritet të zhvillohet sot në orën 12:00 përpara kryeministrisë, policia e Tiranës ka hartuar një plan masash lidhur me mbarëvajtjen e qarkullimit rrugor. 

Nga ora 11:00 deri në përfundim të tubimit, do të ketë kufizim të qarkullimit në Bulevardin “Dëshmorët e Kombit”, në segmentin nga Ura e Dajtit deri te kryqëzimi me rrugën “Ismail Qemali”. 

Në varësi të zhvillimit të tubimit, mund të ketë kufizime të qarkullimit të automjeteve edhe në akse të tjera rrugore. 

“Tiranë 

Në bazë dhe në zbatim të ligjit “Për tubimet”, Policia e Tiranës ka ndërmarrë të gjitha masat e nevojshme për garantimin e rendit publik dhe mbarëvajtjen e tubimit që do të zhvillohet ditën e sotme, në orën 12:00. 

Në këtë kuadër, do të ketë kufizime të lëvizjes. Konkretisht: 

-nga ora 11:00 deri në përfundim të tubimit, do të ketë bllokime të pjesshme të qarkullimit në Bulevardin “Dëshmorët e Kombit”, në segmentin nga Ura e Dajtit deri te kryqëzimi me rrugën “Ismail Qemali”. 

Në varësi të zhvillimit të tubimit, mund të ketë kufizime të qarkullimit të automjeteve edhe në akse të tjera rrugore. 

Policia e Tiranës apelon qytetarët të shmangin lëvizjen me automjete në akset që do të bllokohen dhe të përdorin rrugë alternative, me qëllim shmangien e pengesave në qarkullim dhe garantimin e lëvizjes së lirë të pjesëmarrësve në tubim”, njofton policia. 

Adriatik Lapaj vijon qëndresën e tij pa ndërprerje poshtë zyrës së kryeministrit Edi Rama që prej datës 8 dhjetor. Lapaj i janë bashkuar pjesëtarë të partisë së tij si dhe aktivistë, ndërsa qëndrimi i tyre ditë e natë në bulevard është i motivuar nga qëllimi për të rrëzuar qeverinë aktuale. Adriatik Lapaj është shprehur se nuk proteston si politikan apo përfaqësues i një partie, por si një qytetar i thjeshtë. Gjithashtu ai u ka bërë thirrje për bashkim dhe partive të tjera opozitare, me kushtin që të protestojnë pa logo. 

Kryeministri Edi Rama ka ndarë mëngjesin e sotëm pamje nga Mali i Tomorit, ku reshjet e borës dhe temperaturat e ulëta kanë skalitur forma spektakolare në këtë vend të shenjtë. 

Siç shihet edhe nga pamjet e shpërndara nga kreu i qeverisë, tyrbja e Abaz Aliut në majën e malit, në lartësinë 2417 metra mbi nivelin e detit, në Çukën e Tomorit është e mbuluar nga bora duke ofruar këtë fillim viti një pamje magjepsëse. 

“Mirëmëngjes dhe me këtë pamje fantastike nga Mali i Tomorrit, ju uroj një të diel të mbarë”, shkruan Rama në rrjetet sociale. 

Mali i Tomorrit përveçse një kult besimi, konsiderohet edhe një destinacion turistik për adhuruesit e aventurës. Besimtarë nga i gjithë Ballkani kryejnë pelegrinazh në tyrben e Abaz Aliut, e cila tërheq çdo vit qindra vizitorë. 

 

Nga DASHNOR KALOÇI

Vetëm pak ditë pas themelimit të Partisë Demokratike të Shqipërisë (12 dhjetor 1990), e cila ishte forca e parë opozitare që u krijua pas afro 45 vitesh të diktaturës së egër komuniste të Enver Hoxhës dhe pasardhësit të tij Ramiz Alia, krahas mitingjeve të zhvilluara në Qytetin “Studenti” në Tiranë, krerët kryesorë të saj me në krye Azem Hajdarin, Sali Berishën, Gramoz Pashkon, Aleksandër Meksin, Neritan Cekën, Arben Imamin, Eduart Selamin, Preç Zogajn, Genc Rrulin, Tritan Shehun, Genc Pollon, Rexhep Ukën,  etj., filluan të dalin dhe të zhvillonin mitingje proteste edhe nëpër rrethe të ndryshme të vendit, ku sapo ishin formuar degët e Partisë Demokratike.

Por, paradoksalishit, edhe pse ishte lejuar pluralizmi, në mitingjet e zhvilluara, krahas lejes së marrë në Degët e Punëve të Brendshme, Partia Demokratike duhet që të deklaronte aty edhe emrat e organizatorëve të atyre mitingjeve, numrin e pjesëmarrësve, parullat që do hidheshin aty, kohën që do të zgjaste mitingu, etj., etj. Dhe moszbatimi i këtyre rregullave ngarkonte me përgjegjësi penale jo vetëm organizatorët e saj, por edhe pjesëmarrësit e ndryshëm në mitingje, të cilët nuk i zbatonin ato, apo dhe kryenin “eksese”, të ndryshme!

Siç ishin hedhja e parullave që nuk ishin parashikuar në lejet e dhëna, apo goditja me gurë e sende të tjera të forta ndaj godinave të Komiteteve të Partisë, Komiteteve Ekzekutive dhe Degëve të Punëve të Brendshme, etj., çka bënte që forcat e rendit të Ministrisë së Punëve të Brendshme (të kryesuara nga Hekuran Isai) dhe ato ushtarake të Ministrisë së Mbrojtjes Popullore (të kryesuara nga Kiço Mustaqi), që ishin në mbështetje dhe bashkëpunim të ngushtë me forcat e rendit, të arrestonin të gjithë “kundërvajtësit”.

Veç të tjerash kjo gjë bëhet e ditur edhe nga ky dokument arkivor që po publikojmë në këtë shkrim, ku ndodhet komunikata operative sekrete e Ministrisë së Punëve të Brendshme (e nxjerrë nga Arkivi i Ministrisë së Brendshme), ku janë pasqyruar të gjitha ngjarjet e jashtëzakonshme të ndodhura në rrethe të ndryshme të vendit në datën 4 janar 1991. Siç ishte dhe mitingu i Partisë Demokratike i zhvilluar në qytetin e Lushnjes atë ditë, ku përveç Azem Hajdarit, përmenden edhe emrat e disa prej të arrestuarëve, pjesëmarrës në atë miting proteste.

Krahas komunikatës operative, në këtë shkrim po publikojmë edhe raport-informacionin e Degës së Punëve të Brendshme të Lushnjes, dërguar Ministrisë së Punëve të Brendshme, ku pasqyrohet me detaje e gjithë ngjarja e ndodhur atë ditë në mitingun e Partisë Demokratike në atë qytet, dokument i cili është publikuar për herë të parë nga ish-kreu i Arkivit të Ministrisë së Brendshme studiuesi dhe historian i njohur, Kastriot Dervishi. Për më shumë rreth këtyre etj., na njohin dokumentet në fjalë, të cilat publikohet për herë të parë (dhe me faksimilen përkatëse) nga Memorie.al.

DOKUMENTI ARKIVOR ME KOMUNIKATËN OPERATIVE SEKRETE TË MINISTRISË SË BRENDSHME MË 4 JANAR 1990, PËR MITINGUN E PARTISË DEMOKRATIKE TË ZHVILLUAR NË QYTETIN E LUSHNJES, QË DREJTOHEJ NGA AZEM HAJDARI DHE PERSONAT E ARRESTUAR

REPUBLIKA POPULLORE SOCIALISTE E SHQIPËRISË                                            S E K R E T

MINISTRIA E PUNËVE TË BRENDSHME                                                            Ekzemplar Nr. 1

DEGA E PËRGJITHSHME                                                                              Tiranë, më 5.1.1991

                                                KOMUNIKATË OPERATIVE NR. 3

                       LUSHNJA

Më datën 4.1.1991, ora 15.30, u bë manifestimi i Partisë Demokratike. U hodhën parulla jashtë programit. Me ndërhyrjen e forcave të rendit, ato u ndërprenë. Azem Hajdari tha; “Poshtë PPSH-ja, diktatura e proletariatit, dinastia dhe diktatori Enver Hoxha”.

Njerëzit filluan të këndonin këngën: “Djem rrëmbeni pushkën, ja vdekje ka liri” dhe shkuan në drejtim të Komitetit të Partisë. Me ndërhyrjen e forcave të rendit u shpërndanë. Ata qëlluan me gurë dhe thyen xhamat e Komitetit të Partisë, të Komitetit Ekzekutiv të Degës së Brendshme, etj. Në manifestim morën pjesë rreth 5000-6000 veta. Për qetësimin e gjendjes, morën pjesë dhe forcat e Divizionit.

Për këto veprime u ndaluan Marko Kaso Liçaj, vjeç 50, inxhinier, i dënuar njëherë, Albert Koli Liko, vjeç 29, punëtor, Ilir Hyqmet Bilimashi, vjeç 19, i dënuar dy herë, Petrit Novruz Topi, vjeç 23, punëtor, Nazmi Rexhep Naku, vjeç 42, shofer, i dënuar një herë, Shpëtim Liman Prodeni, vjeç 17, punëtor, Shuaip Fejzi Alija, vjeç 26, punëtor, etj.

PËRGJEGJËSI I GRUPIT TË DREJTIMIT

                                  XHELAL LANI

DOKUMENTI ARKIVOR ME RAPORT-INFORMACIONIN E DEGËS SË PUNËVE TË BRENDSHME TË RRETHIT TË LUSHNJES, PËR MITINGUN E PARTISË DEMOKRATIKE TË ZHVILLUAR ME DATËN 4 JANAR 1991

MINISTRIA E PUNËVE TË BRENDSHME                                                           SEKRET

DEGA E P. TË BRENDSHME LUSHNJE                                                          Ekzemplar Nr. 1

Nr. Prot….                                                                                                   Lushnjë më 4.1.1991  

                                             MINISTRISË SË PUNËVE TË BRENDSHME

                                          T I R A N Ë 

                 RAPORT-INFORMACION

Lënda: Për disa shkelje të rregullave në mitingun e zhvilluar nga Partia Demokratike dhe e pasuar me një incident.

Siç është njoftuar më 4.1.1991, në ora 15.30 filloi mitingu popullor i organizuar nga Partia Demokratike në qytetin e Lushnjes. Paraprakisht përfaqësuesit e kësaj partie nga Tirana, dërguan kërkesën me numër protokolli 12, datë 3.1.1991, pranë sektorit të Policisë të Degës së Punëve të Brendshme Lushnje, kërkesa me shkrim e cila u dorëzua më datë 4.1.1991, ora 7.00. Në kërkesë, konform ligjesh ishin parashikuar parullat që do të hidheshin dhe aktiviteti që do të zhvillohej. Sqarojmë se nismëtarë të Degës së Partisë Demokratike për Lushnjën, ishin ngarkuar:

– Kujtim Gina – ekonomist në Divizionin e Lushnjës.

– Bujar Xhaferri – libretist i teatrit të estradës.

– Shpendi Sollaku – mësues në gjimnaz (gruaja e tij është ndihmës prokurore).

– Gëzim Hajdari – mësues në gjimnaz.

– Visar Zhiti – punëtor në fabrikën e tullave (ka qenë arsimtar dhe është dënuar me 10 vjet për agjitacion e propagandë armiqësore).

– Arben Sulo – student.

Në këtë miting morën pjesë përfaqësues të Partisë Demokratike: Sali Berisha, Azem Hajdari, Arben Imami, Aleksandër Meksi dhe Zenel Hoxha. Folën Sali Berisha dhe Azem Hajdari.

Për zhvillimin në bazë të ligjit të mitingut, nga sektori i Policisë dhe gjithë organi, u hartua plani i masave dhe u morën masat përkatëse. Në miting morën pjesë rreth 6.000 veta, ndërsa më tepër aktivë u treguan mbi 300 veta, të cilët erdhën të organizuar dhe me parulla. Kryesisht këta elementë punojnë në fabrikën e Tullave, SMT, Uzinën e Plasmasit, në Savër, Plug, etj.

Në përfundim të mitingut, Azem Hajdari foli pa letër, duke i bërë thirrje pjesëmarrësve në miting kundër Partisë së Punës së Shqipërisë si: “Poshtë Partia e Punës së Shqipërisë dhe diktatura e proletariatit që na kanë shtypur për 45 vjet me radhë”, “Poshtë Stalini dhe pasuesit e tij në Partinë e Punës së Shqipërisë”, “Poshtë dinastia e miqësive në Komitetin Qendror të Partisë së Punës”, “Poshtë diktatori Enver Hoxha që na rrëmbeu lirinë e demokracinë dhe ata që i bënë atij muzeun me paratë e popullit, kur populli nuk kishte bukë të hante”, “Partia e Punës së Shqipërisë ka 45 vjet që është në fuqi dhe gënjen për demokracinë”: “Partia e Punës së Shqipërisë ka mbrojtur serbët e jo kosovarët”, “Partia e Punës së Shqipërisë ka qenë e lidhur me Titon dhe Mao Ce Dunin dhe ka mbrojtur interesat e Serbisë dhe jo të kosovarëve” etj.

Këto thirrje i nxitën shumë pjesëmarrësit në miting të cilët të entuziazmuar brohoritnin: “Sali, Sali, ne do të fitojmë”, “Ushtria është me ne” (në këtë rast, disa pjesëmarrës ngrinin lart mbi njerëz një ushtar i cili mbante një parullë në dorë) si dhe pati brohoritje si: “Poshtë Dhimitër Çili, poshtë dinastia” etj. Po ashtu disa pjesëmarrës në miting erdhën me një parullë në dorë në të cilën shkruhej: “Të shtyhen zgjedhjet”. Gjithashtu midis pjesëmarrësve në miting, krahas thirrjeve që bëheshin ngrinin gishtat lart dhe brohorisnin për Partinë Demokratike, dëgjoheshin edhe zëra të ndryshëm si; “ruhuni nga spiunët’: “të largohet policia” etj.

Megjithëse u bënë thirrje të tilla dhe u hodhën parulla në kundërshtim me programin e ligjin, deri në përfundim të mitingut nuk u krijua asnjë shqetësim, shërbimet u kryen me korrektësi dhe në bazë të rregullores. Në vazhdim, pjesëmarrësit në miting, të përzierë me masën e madhe të popullit filluan të vijnë në qendër të qytetit duke brohoritur e hedhur parullat e theksuara më lart, ku mbasi u bë thirrje të kalonin në drejtime të ndryshme e të mos grumbulloheshin në qendër të qytetit ata kundërshtuan dhe filluan të qëllojnë me gurë forcat e rendit. Autorët që qëllonin, gurët i kishin depozituar në xhepa. Pikërisht në këtë moment u thyen dy xhama të stendës së emulacionit si dhe u gris portreti i shokut Enver Hoxha.

Në këtë moment u gjykua që krahas përpjekjeve për të kapur autorin, manifestuesit të kalonin përmes qytetit. Në këtë moment pa u urdhëruar nga askush, toga e Ndërhyrjes së Shpejtë të Repartit 326, e pajisur me mjete mbrojtëse ndërhyri forcërisht. Momentalisht manifestuesit u sprapsën, por më pas u shumëfishuan nga të gjitha drejtimet duke kaluar rreth 1.000 veta të cilët qëllonin me gurë. Negativisht për shërbimet tona ndikoi edhe terreni, sidomos kodra në verilindje të qytetit, e cila është e mbushur me gurë, si dhe ndërtesa shtesë e Komitetit të Partisë, rreth së cilës ka tulla, gurë, e mbeturina në largësi të caktuar.

Veç veprimeve aktive ndaj forcave të rendit dhe ndërtesave të Komitetit të Partisë dhe Komitetit Ekzekutiv, manifestuesit hidhnin parulla: “Poshtë Enver Hoxha”, “Enver Hitler”, “Lironi të burgosurit politikë”, “Poshtë kryetari i Komitetit Ekzekutiv”, si dhe filluan të këndojnë; “Eja mblidhuni këtu-këtu”, “Rrëmbeni armët, ja vdekje ja liri” etj. Është për t’u theksuar qëndrimi indiferent i popullit i cili jo vetëm nuk ndërhyri për t’i ndihmuar forcat e rendit dhe stabilizuar gjendjen, por i pengoi këto shërbime sepse duke qëndruar para demonstruesve këta të fundit qëllonin me gurë e tulla nga prapa dhe maskoheshin.

Megjithëse manifestuesit nuk bindeshin edhe pse ju bë thirrje me megafon dhe ju fol që të hiqnin dorë nga këto veprime, si dhe sulmi nuk përballohej me 30-40 policisë, togës së Repartit 326, ju dha komanda të largohej nga shërbimi. Ndërkohë manifestuesve u bëhej thirrje nga shefi i policisë të largoheshin në shtëpitë e tyre. Krahas kësaj, disa nga pjesëmarrësit shoqëruan nga prapa automjetin e policëve të Reparti 326, e cila hyri në territorin e DPB Lushnje dhe manifestuesit vazhduan të qëllojnë me gurë edhe në drejtim të Degës së Punëve të Brendshme, ku thyen xhamat e tre dritareve dhe sportelin e oficerit të rojës. Në këtë moment u ndërhy me forcë dhe sulmi u spraps.

Në qendër të qytetit, manifestuesit vazhdonin të hidhnin parulla sidomos të grumbulluar para Komitetit Ekzekutiv të Rrethit, ku bënin thirrje e përdornin fjalë fyese ndaj kryetarit të Komitetit Ekzekutiv të KP të Rrethit. Kjo veprimtari e kundërligjshme vazhdoi rreth 2 orë dhe pastaj të gjithë manifestuesit grupe-grupe për në shtëpitë e tyre. Nga vlerësimi paraprak që ju bë dëmeve të shkaktuara, ai arrin rreth 500-600 lekë. Gjatë kësaj kohe, veç forcave të rendit, gjatë manifestimit dhe më pas në krye të detyrës, ishin gjithë punonjësit e aparatit të Partisë, ndërsa fare pak nga aparati i Komitetit Ekzekutiv të KP të Rrethit.

Bile vetë kryetari i Komitetit Ekzekutiv të KP të Rrethit, nuk ndodhej as në zyrë dhe as në shtëpi dhe vartësit e tij nuk dinin adresën edhe pse u kërkua disa herë nga sekretarja e parë e Komitetit të Partisë, për të rivendosur situatën dhe eliminuar dëmtimet. Efektivi i Degës së Punëve të Brendshme vazhdoi shërbimet, i forcoi atë në vendet ku intensiteti ishte më i madh si dhe me shpejtësi grumbulloi informacionin mbi bazë të të cilit u ndaluan 9 veta dhe po kërkohen 4 të tjerë. Në vazhdim, të nesërmen, mbasi u kryen edhe disa veprime të tjera operative, u arrit që të ndalohen edhe 4 të tjerë si dhe janë në kërkim për t’u ndaluar edhe disa të tjerë.

Në bashkëpunim me hetuesinë dhe prokurorinë, po vazhdon puna për të gjetur organizatorët dhe për të dokumentuar fajësinë e tyre. Sqarojmë se pothuajse i gjithë mitingu është filmuar si dhe disa pjesë nga fjala e Azem Hajdarit janë incizuar. Tërheq vëmendjen fakti se përgjithësisht elementët më aktivë, si në miting dhe në manifestim dhe veprimet e kundërligjshme, janë kontingjente të ndjekjes së krimeve, ish-të dënuar, por midis tyre pati elementë të mashtruar. Disa nga këto të fundit janë penduar dhe në hetuesi shprehen ; “neve na thanë se do t’ju japin lekë, prandaj ejani në miting, se po ta dinim kështu, nuk do të vinim”. Krahas kësaj, me vështirësi dhe janë fare të paktë personat që janë dëshmitarë, bile në raste të veçanta hezitohet edhe nga ndonjë punonjës i aparatit të Partisë, apo kuadro të tjerë.

Në të njëjtën kohë, ndalimi i 13 personave dhe kërkimi për të ndaluar të tjerë, në mjediset e huliganëve ka krijuar opinionin që të sulmojnë Degën e Punëve të Brendshme, për të liruar të arrestuarit. Për të dominuar më mirë situatën, i gjithë organi është në krye të detyrës, janë shpeshtuar takimet me agjenturën nga të gjithë sektorët, janë aktivizuar ish-punonjësit e organeve tona, elementë pozitivë, ish-bashkëpunëtorë, etj., të cilët edhe gjatë mitingut e manifestimit kanë qenë së bashku me forcat destruktive. Po ashtu tërheq vëmendjen fakti se nga ngjarjet e 2 korrikut, por sidomos gjatë muajit dhjetor e në vazhdim, ka shumë ngacmime e presion nga elementët huliganë kavajas, tiranas, etj.

Kjo ka gjallëruar shumë elementin rrugaç e vagabond në Lushnje, si në qytet edhe në disa sektorë të fermave apo fshatra të tjerë. Për të përballuar këtë situatë veçanërisht tani, në fushatën e zgjedhjeve për deputetë në Kuvendin Popullor, nuk po punohet sa duhet me njerëzit nga organizatat shoqërore të masave edhe nga organet e pushtetit dhe ato të ekonomike. Ka në indiferentizëm të theksuar, çdo gjë kërkohet të zgjidhet nga policia, deri për të ruajtur lopët të mos ua marrin nga stallat. Nuk pengohen këto forca destruktive që kryejnë veprime të kundërligjshme, por në ndonjë rast u krijohen kushte siç ndodhi ditën e mitingut, ku disa drejtues të fermave u kishin dhënë mjetet e transportit huliganëve dhe ish të internuarve për të ardhur në mitin e Partisë Demokratike.

Sa më sipër, në zbatim edhe të urdhrit tuaj nr.114, datë 30.12.1990 e shohim të nevojshme që të disiplinohet organikisht një kompani për ndërhyrjen e shpejtë ndaj veprimeve huliganiste. Kjo edhe për faktin se Divizioni i Lushnjës nuk disponon aktualisht as në perspektivë forca për të përballuar veprimet e grupeve keqbërëse dhe armiqësore. Në vijim të kësaj, kërkojmë të pajisemi edhe me mjete shërbimi si radio “Stomi’: armë speciale, etj.

Kryetari i Degës së Punëve të Brendshme

Azem Hajdari deklaronte:

Vëllezër ju lutem dëgjoni, sepse televizionin nuk po i transmeton fjalimet tona nëpër rrethe. Prandaj ju lutem shumë dëgjoni. Rroftë ky popull liridashës dhe demokrat i Rrethit të Lushnjës. Vëllezër e motra! Politika 45-vjeçare që ka ndjekur Partia e Punës, duhet të shikohet me syrin kritik. Na kanë pushtuar policiakët dhe na kërkojnë me nxitim! Partia e Punës së Shqipërisë ka qenë e lidhur me Titon dhe Mao Ce Dunin dhe ka mbrojtur interesat e Serbisë dhe jo të kosovarëve. Vëllezër e motra! Partia e Punës thotë se i solli popullit shqiptar lirinë. Kurse Skënderbeu tha tash 500 vjet; lirinë e gjeta midis jush. Prandaj ne dhe demokracinë nuk e sollëm ne po e gjetëm midis jush (brohoritje) …

Të shkojmë se është rasti i duhur drejt Europës. Nuk ka nevojë për llafe të saja, nuk ka nevojë populli shqiptar për të mirat komuniste. Populli shqiptar ka nevojë për demokraci, për liri. Ne nuk jemi mbështetësja e nipërve dhe e mbesave. Ne partinë tonë po hyjnë demokratët, kush të ketë dëshirë. Partia e Punës flet për forcimin e shtetit juridik. Proceset juridike nuk i mbështet më. Partia e Punës është shteti i diktaturës së proletariatit. Duhet ta rrëzojmë diktaturën! Të vendosim Shqipërinë e re. Në Shqipërinë e re demokratike që do të ndërtojmë, do të mbrojmë gjithnjë një vijë për gjendjet e vështira e aspiratat e popullit kosovar. E jo ashtu siç bëri Partia e Punës, që ishte një mbështetje e serbit e jo e kosovarëve”. Memorie.al

(Pjesë nga fjala e Azem Hajdarit, zbardhur pjesërisht me teknikë operative)

Rrëzimi i Presidentit të Venezulës, Nikolas Maduro, ka ngjallur një shpresë të re tek demokratë, e veçanërisht te Sali Berisha, në betejën e tyre kundër Edi Ramës.

Avokati Idajet Beiqir, i ftuar në “Ora e Fundit” në ABC News, vuri në dukje një paralelizëm mes Maduros dhe Sali Berishës, duke theksuar se veprimet e Berishës në vitin 1997 dhe më pas, përfshirë krimet dhe korrupsionin masiv, kishin rrezikuar stabilitetin e Shqipërisë dhe kishin bërë të domosdoshme ndërhyrjen e Shteteve të Bashkuara për të ruajtur rendin dhe demokracinë.

Beiqir tha se ndërhyrja ndërkombëtare, si në Venezuelë ashtu edhe në Shqipëri, është një sinjal i qartë se krimi dhe korrupsioni nuk mund të pranohen dhe se aktorët politikë përgjegjës për dhunë dhe keqadministrim nuk mund të lirohen nga përgjegjësia.

“Është vërtet lajm shumë i mirë rrëzimi i Maduros, që është pritur me entuziazëm në të gjithë botës, tjetër kush merret me politikë. Ndodhemi përpara një rendi të ri botëror. SHBA kanë marrë rolin parësor në këtë drejtim. Kur shikojnë që ai vend është problematik dhe nuk lulëzojnë dot zgjedhjet e lira dhe demokracia. SHBA me këtë ndërhyrje tregojnë që nuk mund të pajtohen dot, me krimin dhe korrupsionin.

Ky lajm i mirë, në rast se do të ishte zbatuar në Shqipëri në vitin 1997 kur Berisha u vodhi shqiptarëve me skemat piramidalëve mijëra lekë, kur i bëri atentat Ambasadës Amerikane, ku i mori të gjitha masat për ta hedhur në herë dhe që deshi t’i bënte antenat ambasadores amerikane, nuk do të kishte të gjitha ngjarjet që pasuan më pas, për shkak të Berishës. Në vitin 1997 po të mos ndërhynte SHBA, nuk do të kishim Shqipëri sot. Ndërhyrja më e fortë e SHBA në Shqipëri, ishte koha kur Sali Berisha bëri grusht shteti.

Ka pasur dhe raste të tjera, kur PS ka fituar zgjedhjet kanë dalë në protesta të dhunshme dhe ka marrë në duar armët për të shkaktuar tensione. Ne amerikanët i kemi pasur gjithmonë këtu, për sigurinë e vendit. Berisha barazon Maduron me Ramën, sepse është vetë si Maduro. Krimet e Berishës nuk mund të barazohen me të gjitha krimet e të gjithë të burgosurve të marra së bashku. Ka vrarë afro 10 mijë vetë. Është gjakatari më i madh dhe ka bërë korrupsionin më të madh në këtë vend”, tha Idajet Beqiri.

Dashi

Të lindur më: 21 Mars – 19 Prill

Në marrëdhënie, sot do të ndiheni më të lidhur me partnerin tuaj dhe mund të mendoni për të hapur zemrën për ndjenja të fshehura. Për beqarët, një takim i papritur mund të sjellë energji të reja në jetën tuaj sentimentale. Në punë, do të keni mundësi të përfundoni detyra të vështira dhe të fitoni vlerësimin e eprorëve. Kujdesuni për shëndetin, sidomos për sistemin tretës, pasi stresi mund të ndikojë negativisht. Financat janë të qëndrueshme, por shmangni shpenzimet e panevojshme. Një lajm i mirë mund të vijë nga një mik i largët që do t’ju japë shpresë të re. Mos lejoni që lodhja të ndikojë në vendimmarrje, merrni kohën e duhur për pushim.

Demi

Të lindur më: 20 Prill – 20 Maj

Sot është një ditë ideale për të forcuar lidhjet romantike dhe për të shprehur ndjenjat me më shumë sinqeritet. Ata që janë në çift do të ndjejnë një afërsi të veçantë, ndërsa beqarët mund të tërheqin vëmendjen e dikujt interesant. Në punë, mund të përballeni me sfida të vogla, por do t’i kapërceni me kreativitet. Merrni kujdes për shëndetin mendor, pasi mund të jeni të prirur ndaj ankthit. Financiarisht, shfaqen mundësi për të rritur të ardhurat përmes një projekti të ri. Mos harroni të ndani mendimet tuaja me miqtë për të marrë këshilla të vlefshme. Organizimi i mirë do t’ju ndihmojë të arrini qëllimet e ditës.

Binjakët

Të lindur më: 21 Maj – 20 Qershor

Në dashuri, komunikimi është çelësi i kësaj dite; një bisedë e hapur me partnerin do të zgjidhë keqkuptimet. Beqarët duhet të jenë të hapur ndaj njohjeve të reja, pasi një njohje e rastësishme mund të kthehet në diçka më shumë. Në aspektin profesional, do të merrni një përgjegjësi të re që fillimisht mund të duket sfiduese. Kujdesuni për shëndetin fizik, veçanërisht për muskujt dhe kockat. Financat kërkojnë vëmendje, pasi mund të ketë disa shpenzime të papritura. Konsultohuni me një ekspert para se të merrni vendime të rëndësishme financiare. Mos neglizhoni nevojën për pushim dhe relaks.

Gaforrja

Të lindur më: 21 Qershor – 22 Korrik

Sot do të ndjeni nevojën për më shumë dashuri dhe përqafime, ndaj mos hezitoni të kërkoni afërsi nga personi i zemrës. Për ata që janë vetëm, një takim i papritur mund të ndezë shkëndija të reja. Në punë do të vlerësoheni për përkushtimin dhe do të merrni një lajm të mirë në lidhje me një projekt afatgjatë. Shëndeti është i mirë, por ushqehuni në mënyrë të balancuar për të shmangur problemet me energjinë. Financat janë në rritje, por duhet të keni kujdes me investimet impulsive. Mund të merrni një ofertë të re që kërkon analizë të thellë. Dita premton stabilitet dhe kënaqësi personale.

Luani

Të lindur më: 23 Korrik – 22 Gusht

Në marrëdhënie, dialogu i sinqertë do të zgjidhë çdo tension të mbetur nga ditët e fundit. Për beqarët, është dita për të bërë hapin e parë ndaj dikujt që ju tërheq. Në punë, mundësitë për të avancuar janë të dukshme, por kërkohet përqendrim dhe disiplinë. Shëndeti mund të jetë i ndikuar nga lodhja, ndaj mos neglizhoni pushimet. Financat janë të mira, por duhet të bëni plane për të ardhmen. Një mik mund t’ju ofrojë një këshillë të vyer për një investim të mundshëm. Mos u nxitoni në vendime të rëndësishme, analizoni çdo detaj.

Virgjëresha

Të lindur më: 23 Gusht – 22 Shtator

Sot do të ndjeni dëshirën për të përmirësuar jetën tuaj romantike dhe për të bërë surpriza të këndshme për partnerin. Beqarët kanë mundësi të takojnë dikë që ndan të njëjtat vlera dhe interesa. Në aspektin profesional, një bashkëpunim i ri mund të sjellë rezultate të kënaqshme. Kujdesuni për shëndetin emocional, pasi mund të jeni më të ndjeshëm se zakonisht. Financiarisht, priten disa shpenzime të paplanifikuara, por nuk do të ndikojnë rëndë në buxhetin tuaj. Familja do të jetë mbështetje kryesore në këtë ditë. Mos harroni të shprehni mirënjohje për gjithçka që keni arritur.

Peshorja

Të lindur më: 23 Shtator – 22 Tetor

Dashuria është në qendër të vëmendjes sot, ndaj mos hezitoni të shprehni ndjenjat tuaja pa frikë. Për ata që janë vetëm, një bisedë me një mik të vjetër mund të sjellë një mundësi të re romantike. Në punë, do të keni energji për të përfunduar projekte të vjetra dhe për të nisur ide të reja. Kujdesuni për shëndetin, sidomos për sistemin nervor dhe pushoni sa më shumë të jetë e nevojshme. Financat janë të qëndrueshme, por një pagesë e vonuar mund të shkaktojë pak stres. Bëni kujdes me premtimet që jepni, për të shmangur keqkuptime. Dita është e përshtatshme për të riorganizuar prioritetet tuaja.

Akrepi

Të lindur më: 23 Tetor – 21 Nëntor

Në marrëdhënie, do të ndjeni nevojën për më shumë stabilitet dhe siguri, ndaj diskutoni hapur me partnerin për të ardhmen. Për beqarët, mund të lindë një ndjenjë e re nga një miqësi e vjetër. Në punë, do të hasni disa sfida, por aftësia juaj për të gjetur zgjidhje do të vlerësohet. Shëndeti është i mirë, por mos e teproni me ushqimet kalorike. Financat përmirësohen gradualisht, por është mirë të shmangni huazimet. Një udhëtim i shkurtër mund t’ju sjellë freski mendore. Respektoni kufijtë tuaj dhe mos merrni përsipër më shumë se ç’duhet.

Shigjetari

Të lindur më: 22 Nëntor – 21 Dhjetor

Sot është një ditë e mirë për të rigjallëruar pasionin në çift, ndërsa beqarët mund të ndjejnë një tërheqje të fortë ndaj dikujt të ri. Në punë, do të shfaqen mundësi për të mësuar aftësi të reja dhe për të përmirësuar pozitën tuaj. Kujdesuni për shëndetin, veçanërisht për sistemin respirator dhe shmangni ambientet me shumë pluhur. Financat janë nën kontroll, por mos u tërhiqni nga ofertat e rreme. Një i afërm mund t’ju kërkojë ndihmë, tregoni ndjeshmëri. Planifikoni mirë ditën për të shmangur lodhjen e tepërt. Gjeni kohë për të reflektuar mbi qëllimet tuaja afatgjata.

Bricjapi

Të lindur më: 22 Dhjetor – 19 Janar

Në dashuri, një bisedë e sinqertë do të sjellë qartësi dhe mirëkuptim në marrëdhënien tuaj. Për beqarët, një takim i rastësishëm mund të kthehet në diçka më serioze. Në punë, do të ndjeni motivimin për të përfunduar detyra të rëndësishme dhe për të fituar respektin e kolegëve. Shëndeti kërkon vëmendje, sidomos në raport me pushimin dhe aktivitetin fizik. Financat janë të stabilizuara, por shmangni investimet e rrezikshme. Një projekt i ri mund të sjellë fitime në të ardhmen. Dita është e përshtatshme për të bërë plane të qarta dhe të qëndrueshme.

Ujori

Të lindur më: 20 Janar – 18 Shkurt

Dashuria do t’ju japë energji pozitive sot, ndaj shijoni momentet intime me partnerin ose flirtoni me dikë të ri. Nëse jeni vetëm, mundësitë për njohje të reja janë të shumta, sidomos në ambiente sociale. Në punë, do të përballeni me disa sfida, por këmbëngulja juaj do të shpërblehet. Shëndeti është i mirë, por mos e teproni me aktivitetet fizike. Financat janë të qëndrueshme, por mos merrni vendime të nxituara për shpenzime të mëdha. Një mik mund t’ju ofrojë një zgjidhje për një çështje të vjetër financiare. Dita është e mirë për të filluar projekte të reja personale.

Peshqit

Të lindur më: 19 Shkurt – 20 Mars

Në marrëdhënie, një surprizë e këndshme mund të forcojë lidhjen tuaj, ndërsa beqarët do të tërheqin vëmendjen me sharmin e tyre. Në punë, do të ndiheni të motivuar dhe do të merrni rezultate të mira nga përpjekjet tuaja. Kujdesuni për shëndetin, veçanërisht për hidratimin dhe aktivitetin fizik të moderuar. Financat janë në një fazë të mirë, por është e rëndësishme të planifikoni shpenzimet për muajt në vazhdim. Një ide e re për të ardhura shtesë mund të lindë nga një bisedë me një koleg. Mos lejoni që presioni i ditës t’ju dekurajojë. Kërkoni ndihmë nëse ndiheni të mbingarkuar.

Një ngjarje e rëndë është shënuar mbrëmjen e djeshme në Klos të Matit. 66-vjeçari Xhemal Zhuku, teksa ka tentuar të kalojë lumin Mat, është marrë nga rrjedha e fortë e ujit.

Trupi i pajetë i tij është gjetur disa kilometra më larg, pa shenja jete, në orët e para të mëngjesit të sotëm. Në kërkime morën pjesë shërbimet e Policisë, familjarët dhe banorë të zonës.

Grupi hetimor ndodhet në vendngjarje dhe po punon për zbardhjen e plotë të rrethanave të kësaj ngjarjeje tragjike.

Gazetari i Fox News Trey Yingst ka publikuar pamje nga arrestimi i Nocolas Maduro në zyrat e Deas në New York. 

Në videon e publikuar në facebook Maduro shfaqet me shapka dhe me një shishe uji në dorë, shoqëruar nga dy oficerë policie. Kujtojmë se Maduro u arrestua së bashku me gruan e tij nga Delta Force amerikane diten e djeshme. Ai u mor me avion ushtarak nga Karakas ne drejtim të New York. 

Maduro gets perp-walked at the DEA by agents pic.twitter.com/bVsTySjCWn

— diaspora_sv (@EdwinPo72820707) January 4, 2026

 

 

Gjykata Supreme e Venezuelës ka urdhëruar që zëvendëspresidentja Delcy Rodriguez të marrë përsipër kompetencat dhe detyrat e presidentes së përkohshme, pasi Shtetet e Bashkuara rrëzuan presidentin Nicolás Maduro. 

Urdhri u njoftua të shtunën në mbrëmje, sipas orës lokale, duke arritur në përfundimin se Maduro ndodhet në një “pamundësi materiale dhe të përkohshme për të ushtruar funksionet e tij”. 

Sipas vendimit, Rodriguez do të “marrë dhe ushtrojë, si presidente në detyrë, të gjitha pushtetet, detyrat dhe aftësitë e natyrshme të detyrës së presidentit të Republikës Bolivariane të Venezuelës, me qëllim garantimin e vazhdimësisë administrative dhe mbrojtjen gjithëpërfshirëse të kombit”. 

Urdhri u lexua nga gjyqtarja Tania D’Amelio gjatë një seance të transmetuar nga kanali televiziv shtetëror VTV. 

Kushtetuta e Venezuelës parashikon se, në rast të një mungese të përkohshme ose absolute të presidentit, detyrën e tij e merr automatikisht zëvendëspresidenti i vendit. 

 

Ministrja për Europën dhe Punët e Jashtme, Elisa Spiropali, në një reagim në rrjetin social X, ka deklaruar mbështetjen e Shqipërisë “përkrah Shteteve të Bashkuara dhe Presidentit të SHBA-së në veprimet e tyre vendimtare kundër regjimit narko-terrorist të Venezuelës.” 

“Ne mbështesim lidershipin e fortë të Sekretarit të Shtetit Rubio në përballjen me autoritarizmin, korrupsionin dhe rrjetet kriminale transnacionale”, thekson Spiropali. 

Ministrja shton se “si një aleat i palëkundur i SHBA-së dhe anëtar i NATO-s, Shqipëria qëndron krah për krah me lidershipin amerikan në mbrojtje të parimeve demokratike dhe sigurisë globale.” 

Postimi i Spiropalit në X: Shqipëria qëndron pa mëdyshje përkrah Shteteve të Bashkuara dhe Presidentit të SHBA-së në veprimet e tyre vendimtare kundër regjimit narko-terrorist të Venezuelë 

Është zbardhur dëshmia e fëmijëve të Sose Xhebroj, 40-vjeçares e cila u vra nga bashkëshorti ditën e djeshme në Orikum të Vlorës, e më pas ky i fundit vrau edhe veten. 

Sipas dëshmisë nga një i afërm i tyre, dy fëmijët të moshës 16 dhe 19 vjeç, pasi janë përpjekur disa herë të kontaktojnë nënën e tyre ditën e djeshme në telefon dhe nuk kanë marrë përgjigje, janë nisur drejt banesës së bashku me dy shokë. 

Fillimisht, djali i madh ka hyrë në banesë dhe në katin e tretë të banesës ka gjetur nënën e tij, 48  Sose vjeçe, pa shenja jete, dhe në qafë kishte një fashetë dhe e gjakosur. 

Menjëherë vëllai i madh ka njoftuar vëllanë tjetër që ishte në makinë me dy shokët dhe më pas ata kanë njoftuar ambulancën e Orikumit, e cila ka mbërritur në vendngjarje dhe ka transportuar trupin e pajetë të gruas drejt Spitalit të Vlorës, ku mjekët kanë konfirmuar se ajo kishte ndërruar jetë. 

Ndërkohë që fëmijët kanë qenë në banesë, babai i tyre kishte kryer vetëvrasjen në garazh me armë zjarri.  Autoritetet kanë nisur hetimet për të zbardhur plotësisht rrethanat e kësaj tragjedie familjare. 

Operacioni amerikan që përfshinte operativë të elitës Delta Force për të udhëtuar në Karakas dhe për të larguar  Presidentin në detyrë Nicolas Maduro dhe gruan e tij nga vendi është i pashembullt në historinë moderne. 

Por ajo që është vënë re është analogjia më e afërt historike që gjendet edhe në kapjen e udhëheqësit panamez Manuel Noriega, gjithashtu nga forcat speciale amerikane, në vitin 1989. 

Rrëzimi i Manuel Noriegës ndodhi në fund të vitit 1989. 

20 dhjetor 1989: Shtetet e Bashkuara nisën ndërhyrjen ushtarake në Panama, të quajtur “Operation Just Cause”, me synim rrëzimin e Noriegës. 

3 janar 1990: Manuel Noriega u arrestua, pasi ishte strehuar për disa ditë në ambasadën e Vatikanit në Panama. 

Më pas ai u ekstradua në SHBA, ku u gjykua dhe u dënua për trafik droge dhe pastrim parash. 

Pra, politikisht dhe ushtarakisht, regjimi i Noriegës u rrëzua në dhjetor 1989, ndërsa kapja e tij ndodhi në janar 1990.