Irani rihapi hapësirën e tij ajrore të mërkurën pas një mbylljeje që zgjati gati pesë orë, e cila u vendos mes shqetësimeve për një veprim të mundshëm ushtarak midis Shteteve të Bashkuara dhe Teheranit. Mbyllja e përkohshme detyroi linjat ajrore ndërkombëtare të anulonin, devijonin ose vononin disa fluturime.

Hapësira ajrore u mbyll për të gjitha fluturimet, përveç atyre ndërkombëtare të autorizuara, në orën 17:15 ET (22:15 GMT), ndërsa u rihap pak para orës 22:00 ET (03:00 GMT), sipas Flightradar24. Mbyllja vjen ndërsa Irani po përballet me protesta të mëdha antiqeveritare dhe Shtetet e Bashkuara po peshojnë mundësinë e një ndërhyrjeje ushtarake.

Zyrtarë perëndimorë dhe evropianë kanë paralajmëruar se një sulm amerikan mund të ndodhë brenda 24 orëve, ndërsa SHBA po tërheq pjesë të personelit nga bazat në Lindjen e Mesme. Teherani ka paralajmëruar se do të godasë bazat amerikane në rast të sulmit.

Breshëritë e raketave dhe dronëve në rajon rrisin rrezikun për trafikun civil. Kompani si IndiGo, Lufthansa, Turkish Airlines dhe Aeroflot kanë anuluar ose devijuar fluturimet drejt Iranit. Lufthansa ka vendosur të shmangë hapësirën ajrore iraniane dhe irakiane deri në njoftim të ri, duke operuar vetëm fluturime të kufizuara drejt Tel Avivit dhe Amanit. ITA Airways ka marrë vendime të ngjashme për fluturimet e natës.

Ekspertët e aviacionit paralajmërojnë se situata mund të sinjalizojë aktivitete të mëtejshme ushtarake dhe rrit rrezikun për trafikun civil, duke bërë që shumë operatorë të shmangin hapësirën ajrore iraniane për sigurinë e pasagjerëve dhe ekuipazheve.

The post Irani rihap hapësirën ajrore pas mbylljes së përkohshme për shkak të tensioneve me SHBA-në appeared first on Albeu.com.

Spanja nisi të martën tre ditë zie kombëtare pas përplasjes fatale të dy trenave me shpejtësi të lartë pranë Adamuz, në rajonin jugor të Andaluzisë, një aksident që la të vdekur 41 persona dhe plagosi mbi 120 të tjerë. Ky është aksidenti më vdekjeprurës hekurudhor në vend në më shumë se një dekadë.

Treni i kompanisë Iryo, duke udhëtuar nga Malaga drejt Madridit, doli nga shinat dhe u përplas me një tren tjetër që po vinte përballë, i cili gjithashtu doli nga binarët. Mes të plagosurve, 39 mbeten në spital, përfshirë katër fëmijë. Trupi i një pasagjeri u nxor të hënën në mbrëmje, duke rritur numrin e viktimave në 41.

Në shenjë respekti, flamujt u ulën në gjysmështizë, prezantuesit e televizioneve veshën të zeza, ndërsa ministrat kufizuan paraqitjet publike. Makineri të rënda u vunë në lëvizje për të hequr vagonët më të dëmtuar dhe për të mundësuar qasjen e ekipeve të shpëtimit.

Pamjet ajrore treguan dy trenat të shpërndarë dhe ekipet e shpëtimit duke punuar me jelekë neon për të nxjerrë viktimat. Mes të mbijetuarve është një vajzë gjashtëvjeçare që humbi tërë familjen. Shoferi 27-vjeçar i njërit prej trenave ishte gjithashtu midis viktimave.

Autoritetet theksuan se shpejtësia dhe gabimi njerëzor janë praktikisht përjashtuar si shkak i aksidentit, ndërsa pjesa e binarëve ishte rinovuar së fundmi. Kompania Iryo transportonte rreth 300 pasagjerë, ndërsa Renfe 184. Spanja ka rrjetin më të madh hekurudhor me shpejtësi të lartë në Evropë, duke lidhur qytete të mëdha si Madrid, Barcelona, Sevilla dhe Malaga.

Ngushëllime për viktimat dhe familjet kanë shprehur Papa Leo XIV dhe Presidenti francez Emmanuel Macron.

The post Spanja nis tre ditë zie kombëtare pas aksidentit tragjik hekurudhor në Adamuz! appeared first on Albeu.com.

Hailey Bieber ka ndarë me ndjekësit e saj një moment të veçantë familjar, duke publikuar në Instagram Stories një foto të bashkëshortit të saj, Justin Bieber, teksa mban në krahë djalin e tyre, Jack Blues. Fotoja u shpërnda të hënën, më 19 janar, dhe menjëherë tërhoqi vëmendjen e fansave.

Në imazh, Justin Bieber, 31 vjeç, shfaqet pa bluzë, duke treguar tatuazhet e tij karakteristike, ndërsa e mban me kujdes djalin e vogël me flokë biondë. Hailey, 29 vjeçe, e shoqëroi foton me mbishkrimin: “Njësoj si babai”, duke nënvizuar ngjashmërinë mes babait dhe të birit.

Ky nuk është rasti i parë që modelja ndan momente nga jeta e saj si nënë. Në fillim të vitit, Hailey publikoi një seri fotosh në Instagram, ku fansat patën mundësinë të shihnin disa detaje të vogla të Jack Blues, të lindur në gusht të vitit 2024. Mes imazheve spikaste një foto e flokëve të tij të çelët dhe një tjetër që tregonte byzylykun e këmbës së Hailey-t me emrin e djalit.

Familja Bieber festoi së bashku edhe Krishtlindjet, duke u shfaqur me pizhame të njëjta festive. “Gëzuar Krishtlindjet”, shkroi Hailey, ndërsa ndau një foto ku buzëqeshte duke parë të birin.

Hailey dhe Justin u fejuan në vitin 2018 dhe u martuan po atë vit në një ceremoni civile në Nju Jork, për të festuar më pas me një dasmë të madhe një vit më vonë. Sipas burimeve pranë çiftit, ardhja në jetë e Jack ka forcuar edhe më shumë lidhjen dhe martesën e tyre, duke e bërë djalin qendrën e gjithçkaje për ta.

The post “Njësoj si babai!”/ Fotoja e Justin Bieber me të birin bën xhiron e rrjetit appeared first on Albeu.com.

Alba Pollozhani ka kërkuar për herë të dytë largimin nga shtëpia e Big Brother VIP Kosova 4, duke shkaktuar reagime dhe diskutime gjatë spektaklit Prime të së hënës mbrëma.

Pas debateve të forta që përfshinë banorin Lim Hoti, Alba u shpreh hapur se dëshironte të ndërpriste garën. “Dua të dal nga Big Brother dhe e kam të vulosur”, deklaroi ajo para banorëve dhe publikut, duke lënë të kuptohet se vendimi i saj ishte i prerë në atë moment.

Menjëherë pas deklaratës, produksioni bëri të ditur se konkurrentja ndodhej në një gjendje të rënduar emocionale dhe se ndaj saj po merreshin mjekët përkatës, për të garantuar mirëqenien e saj shëndetësore.

Më vonë, Alba u shfaq në Dhomën e Rrëfimit, ku ndryshoi disi qëndrim, duke theksuar se kishte mbledhur forcat për të vazhduar edhe për një periudhë tjetër në lojë. Ajo bëri të ditur se do ta vlerësonte gjendjen e saj emocionale deri të premten, përpara se të merrte një vendim përfundimtar lidhur me qëndrimin ose largimin nga gara.

Situata e saj ka ngritur pikëpyetje mes banorëve dhe ndjekësve të formatit, ndërsa mbetet për t’u parë në ditët në vijim se si do të zhvillohet loja dhe nëse Alba do të vazhdojë rrugëtimin e saj në Big Brother VIP Kosova 4 apo do të vendosë përfundimisht të largohet nga shtëpia.

The post Mes emocioneve të forta, Alba tërhiqet nga vendimi për t’u larguar nga ‘BBVK’ appeared first on Albeu.com.

Sylvester Stallone u mburr me një video nga palestra, dhe ky 79-vjeçar, në prag të dekadës së nëntë, ende nuk heq dorë nga ushtrimet fizike, megjithëse pranon se po i bëhet gjithnjë e më e vështirë.

Stallone postoi nga palestra, duke treguar krahët e tij muskulozë dhe me tatuazhe dhe duke vënë në dukje se kishte kaluar ca kohë që kur kishte filmuar në një mjedis të tillë.

Ai gjithashtu theksoi se sa më e vështirë është për të të qëndrojë në formë ndërsa plaket.

“Çdo vit bëhet gjithnjë e më e vështirë, por kjo është arsyeja pse duhet të përpiqesh gjithnjë e më shumë. Gjak, djersë dhe lot”, shkroi aktori krahas videos.

Gjithashtu, duke folur në video, ai e krahasoi palestrën e tij në shtëpi me një vend të shenjtë ku stërvitet për t’u bërë më i mirë.

“Ndihesh më mirë fizikisht, kështu që ke forcën për të arritur qëllimet e tua, duke u ndjerë i sigurt dhe i gatshëm për t’u përballur me çdo sfidë”, shtoi ai.

Stallone ka folur shpesh për stërvitjen dhe ruajtjen e figurës së tij gjatë viteve, por qasja nuk ka qenë kurrë sipërfaqësisht e lidhur me pamjen.

Ai ka theksuar se për të, stërvitja është kryesisht një mënyrë për të ruajtur forcën mendore, disiplinën dhe një ndjenjë kontrolli mbi jetën.

I njëjti e ka thënë vazhdimisht se aktiviteti fizik ka një ndikim të thellë në psikikë, pasi ndihmon në luftimin e stresit, humorit të keq dhe ndjenjave të pafuqisë.

The post Sylvester Stallone krenohet me pamjet nga palestra: Edhe në moshën 79 vjeçare nuk heq dorë nga ushtrimet fizike appeared first on Albeu.com.

Mateo Borri ka sqaruar edhe një herë ndarjen nga banorja e Big Brother VIP Albania 5, Brikena Selmani.

Ndërsa flet me Selin Bollatin, banori tregon se pse u prek nga nominimi i modeles dhe se nuk e priste një gjë të tillë.

Ai thotë se është ndarë për të pasi dikush nga ana e saj ka ndërhyrë në këtë raport.

“Nuk kam thënë që nuk kam pëlqim. Madje nuk e shoh dot si të gjithë gocat e tjera. Unë kam pasur një kontakt. Një rob që ti ke folur je shprehr me ndjenja me ta fut këtu. Sidomos kur je ndarë për arsye të caktuara”, u shpreh ajo.

Tutje tha: “Ne jemi ndarë se kanë ndërhyrë njerëz tjerë nga ana e saj. Ia kam lënë asaj të shprehet vet se nuk po i ndërhyj unë”.

Brikena nga ana tjetër ka sqaruar situatën në një formë ndryshe nga Mateo.

Ajo thotë se është takuar vetëm një herë me Mateon dhe asgjë më shumë.

The post Mateo flet edhe një herë për ndarjen nga Brikena: Na kanë ndërhyrë njerëzit e saj appeared first on Albeu.com.

Alba Pollozhani po vazhdon lojën e saj me Lim Hotin në Big Brother VIP Kosova 4.

Ajo është parë e agravuar në një moment duke i hedhur fjalë e kunja ish-partnerit të saj.

I njëjti thotë se ka ngelur duke e bërë Big Brotherin vetëm duke u lëpirë, fërkuar e në xhakuzi.

“Ka ngel me bë Big Brotherin vetëm me mesazhe, ky ku e ku e ka kapacitetin ka ngel me tregu veten duke u fërkuar, lëpirë e duke bërë xhakuzi”, u shpreh ajo.

Në anën tjetër vazhdoi: “Boll fole ti për deformim realiteti, merru me ata që të mashtrojnë para syve. Merru me femrat që të bëjnë mashtrime të fusin pas shpine. Ke ngel ti me këtë lloj kapaciteti. Shko bëju me tjerat që ta bëjnë rrafsh me lëpirje, mashtrime, xhakuzi”.

Alba po i referohej raportit me Dolcen dhe pasi i bërë masazh Benita Zenës.

The post Alba për Limin: Ka mbetur duke e bërë Big Brother-in me masazhe dhe duke u lëpirë appeared first on Albeu.com.

Reshjet ekstreme të borës në gadishullin Kamçatka, në lindjen e largët të Rusisë, kanë shkaktuar një situatë emergjente, duke paralizuar qytete të tëra dhe duke vështirësuar ndjeshëm jetën e përditshme të banorëve.

Autoritetet lokale kanë shpallur gjendje të jashtëzakonshme pas stuhive të pandërprera që kanë sjellë grumbuj dëbore me lartësi nga 3 deri në 12 metra, nivele këto që tejkalojnë ndjeshëm mesataret historike të rajonit.

Në qytetin Petropavlovsk-Kamchatsky, qendra administrative e krahinës Kamçatka, rrugët janë bllokuar plotësisht, ndërsa shumë ndërtesa janë pjesërisht të mbuluara nga bora. Raportohet se në disa zona, bora ka arritur deri në katet e sipërme të pallateve, duke krijuar rrezik serioz për shembje çatiash dhe ortekë urbanë. Si pasojë, disa persona kanë humbur jetën dhe dhjetëra të tjerë janë plagosur.

Kryetari i bashkisë, Yevgeny Belyayev, ka kritikuar kompanitë e menaxhimit të pronave për mosreagim të shpejtë në pastrimin e çative, duke theksuar se neglizhenca ka përkeqësuar pasojat e stuhisë. Ndërkohë, ndërprerjet e energjisë elektrike, anulimet e fluturimeve dhe mbyllja e shkollave dhe bizneseve kanë thelluar krizën.

Sipas meteorologëve, reshjet e pazakonta të borës janë shkaktuar nga formimi i disa sistemeve me presion të ulët në Detin e Okhotsk, të cilat kanë sjellë erëra të forta dhe stuhi të vazhdueshme dëbore. Banorët lokalë e kanë quajtur situatën një “apokalips dëbore”.

Me rrugët e pakalueshme, furnizimet bazë si buka, qumështi dhe vezët po mungojnë në dyqane, ndërsa autoritetet po punojnë për rikthimin gradual të normalitetit. Ekspertët paralajmërojnë se kushtet ekstreme të motit mund të vazhdojnë edhe ditët në vijim.

The post “Apokalips dëbore” në Rusi: qytete të varrosura nën metra borë appeared first on Albeu.com.

Regjisori i Glambot-it, Cole Walliser, ka hedhur poshtë pretendimet se Jennifer Lopez ka qenë “e pasjellshme” me të gjatë xhirimeve të saj në Golden Globes 2026.

“Nuk e mora personale. Në atë moment nuk më është dukur aspak e pasjellshme”, tha regjisori kanadez në një video të publikuar në Instagram të dielën — megjithatë ai pranoi se “disa gjëra i shtuan benzinë kësaj ideje”.

“Së pari, ajo ishte thjesht e përqendruar në punë. Tapeti i kuq ishte mbyllur”, shpjegoi ai. “Ajo ishte gati të hynte brenda. E dinte saktësisht çfarë do të bënte. U pozicionua menjëherë.”

Walliser tha se ishte “thjesht fatkeqësi” që Lopez, 56 vjeçe, në videon që u bë virale ndodhej “me shpinë” nga ai.

“Unë po flisja me të, ajo po shikonte nga ana tjetër, por në fakt po përgatitej për lëvizjen”, kujtoi ai.

“Në atë moment, nuk mendova: ‘Hej, kthehu dhe më shiko’”, sqaroi krijuesi i përmbajtjes. “E dija çfarë po bënte.”

Walliser shtoi se aktorja e filmit “Selena” thjesht po përgatitej për momentin e saj në Glambot.

“E dija që po bëhej gati. E dija që ishte vonë. Thjesht po vazhdonim procesin. Ai moment nuk më dukej aspak i pasjellshëm”, këmbënguli ai.

Javën e kaluar, Walliser publikoi në Instagram videon Glambot të Lopez-it, ku këngëtarja e “I’m Real” shihet me shpinë nga regjisori, ndërsa ai i jep udhëzime se si të pozicionohej.

Kur Walliser e pyeti yllin e filmit “Hustlers” nëse kishte një ide për lëvizjen që donte të bënte, ajo nuk u përgjigj verbalisht, por thjesht u kthye për t’ia treguar se si do të pozonte.

The post A u soll Jennifer Lopez keq në tapetin e kuq? Regjisori sqaron pretendimet e bujshme appeared first on Albeu.com.

Komisioni Qendror i Zgjedhjeve (KQZ) ka marrë vendim që në 28 komuna të shkohet me rinumërim të plotë të të gjitha votave nga zgjedhjet e 28 dhjetorit 2025.

Kryetari i Komisionit Qendror të Zgjedhjeve (KQZ), Kreshnik Radoniqi, ka deklaruar se procesi i rinumërimit të votave ka nxjerrë në pah pasaktësi të theksuara në numërimin e votave të kandidatëve, ndërsa votat e subjekteve politike rezultojnë kryesisht të sakta.

Gjatë mbledhjes së KQZ-së, Radoniqi bëri të ditur se institucioni ka pranuar raportin nga procesi i rinumërimit që po zhvillohet në Qendrën e Numërimit dhe Rezultateve (QNR).

“Sot kemi pranuar raportin nga procesi i rinumërimit që po zhvillohet në QNR. Aktualisht, 914 vendvotime janë në proces rinumërimi, sipas vendimit të KQZ-së. Në 10 komuna po bëhet rinumërimi i plotë, ndërsa në 28 komuna të tjera po rinumërohen rreth 10 për qind e vendvotimeve”, ka deklaruar Radoniqi.

Ai shtoi se KQZ-ja ka pranuar raportin pas rinumërimit të më shumë se gjysmës së vendvotimeve, me të dhëna të datës 13 janar.

“Raporti tregon se ndryshimet në votat e subjekteve politike janë minimale dhe pothuajse të papërfillshme, çka dëshmon se numërimi i tyre është bërë në mënyrë të saktë. Ndërkohë, situata është ndryshe sa i përket votave të kandidatëve. Të dhënat pas rinumërimit tregojnë një shkallë të lartë të pasaktësisë në numërimin e votave të kandidatëve. Nga rinumërimi rezulton se 36 mijë e 7 vota u janë zbritur kandidatëve, të cilat ishin regjistruar gabimisht në QNR, ndërsa 20 mijë e 978 vota u janë shtuar kandidatëve, pasi nuk ishin regjistruar saktë gjatë numërimit fillestar”, tha ai.

Radoniqi theksoi se analiza numerike e veçon Komunën e Prizrenit si rastin më ekstrem sa i përket mospërputhjeve në numërim.

Ai bëri të ditur se para mbledhjes së KQZ-së, në mbledhjen e Këshillit për Operacione Zgjedhore janë dhënë dy rekomandime kryesore: rinumërimi i të gjitha vendvotimeve edhe në 28 komunat e tjera; ndërprerja e mandatit për përfaqësuesit e subjekteve politike në Komisionin Komunal të Zgjedhjeve në Komunën e Prizrenit.

Radoniqi po ashtu theksoi se gjetjet nga procesi i rinumërimit do t’i adresohen Prokurorisë së Shtetit, duke shtuar se KQZ-ja do të ofrojë bashkëpunim të plotë institucional gjatë procesit hetimor.

The post KQZ vendos: 28 komuna shkojnë në rinumërim të plotë të votave appeared first on Albeu.com.

Nuk është thjesht një ishull Arktik i çfarëdoshëm. Groenlanda, një territor gjysmëautonom i Danimarkës, është bërë epiqendra e një tensioni ndërkombëtar që tingëllon pothuajse si një serial i ri thriller gjeopolitik. Mes kërcënimeve, taksave dhe takimeve emergjente, Evropa po përpiqet të ruajë qetësinë, ndërsa Uashingtoni duket i vendosur të përcaktojë ritmin… në mënyrën e vet, në stilin e Trump.

Në llogarinë e tij në Truth Social , ai këmbënguli se “ka ardhur koha dhe do të bëhet” për të hequr atë që ai e quan kërcënim rus. Sipas republikanit, Danimarka, e cila është përgjegjëse për territorin, nuk ka arritur të përmbushë atë që NATO ka kërkuar prej dekadash: të mbrojë ishullin nga Moska.

Ministrat e jashtëm nga Danimarka dhe shtatë vende të tjera (Norvegjia, Suedia, Franca, Gjermania, Mbretëria e Bashkuar, Holanda dhe Finlanda) theksuan se ato nuk përbëjnë asnjë kërcënim dhe paralajmëruan se tarifat e reja të Shtëpisë së Bardhë mund të provokojnë një spirale që është më mirë të ndalet për hir të të gjithëve. Zyrtarët evropianë këmbëngulën se bashkëpunimi ushtarak në Groenlandë ka qenë gjithmonë për qëllime mbrojtëse dhe brenda marrëveshjeve të NATO-s , dhe se ishulli nuk është një vatër konflikti.

Nga 1 shkurti, Shtetet e Bashkuara do të vendosin një tarifë prej 10% për importet nga këto tetë vende derisa të përfundojë procesi i “blerjes” së Groenlandës. Sipas Shtëpisë së Bardhë, kjo masë synon të mbrojë ato që i konsideron “interesa strategjike” dhe të mbajë larg ndikimin e supozuar rus, megjithëse ekspertët e tregtisë ndërkombëtare paralajmërojnë se kjo mund t’i bëjë produktet më të shtrenjta dhe të gjenerojë tensione të panevojshme ekonomike në Evropë dhe Amerikën e Veriut.

Sipas burimeve evropiane, 27 vendet anëtare do të mbajnë një samit të jashtëzakonshëm të krerëve të shteteve në ditët në vijim për të adresuar krizën. Ndërkohë, Groenlanda nuk është më vetëm gjigandi i Arktikut dhe po bëhet një bord strategjik ku çdo veprim shqyrtohet me kujdes. Dhe Trump e bën të qartë se vendimet e tij nuk presin: kërcënimi rus… ose të paktën narrativa rreth tij, është tashmë në numërimin mbrapsht.

The post Donald Trump bën thirrje që “kërcënimi rus” të largohet nga Groenlanda: Koha ka ardhur dhe do të bëhet! appeared first on Albeu.com.

Debati publik mes një klinike private në Tiranë dhe Eliona Pitarkes, ka hyrë në një fazë të re, duke u zhvendosur zyrtarisht në rrugë ligjore. Përplasja nisi pas reagimeve të klinikës “Vera-Virhov”, e cila akuzoi Eliona Pitarkën se po shpërndante dieta për fëmijë në rrjetet sociale, duke përdorur emrin e pediatrit Edi Tushe. Pas këtyre paralajmërimeve, përplasja mes palëve vijoi edhe në Instagram, me postime dhe kundërpostime publike.

Sot, klinika “Vera-Virhov”, e drejtuar nga Genta Dedej, bëri të ditur përmes një deklarate zyrtare se ka depozituar padi ndaj blogeres. Sipas klinikës, padia përfshin akuza për shpifje, fyerje, dëmtim të imazhit dhe shkelje të ligjit.

DEKLARATA e Klinika Vera–VIRHOV

Klinika Vera–VIRHOV ushtron aktivitetin e saj prej mbi 20 vitesh, duke ndërtuar reputacionin mbi profesionalizëm, etikë mjekësore dhe respekt maksimal për shëndetin publik. Institucioni ynë përfaqësohet nga mjekë të nderuar si: Dr. Edi Tushe, Dr. Gentian Stroni, Dr. Moza Keta, Dr. Elton Qeli, Dr. Gentian Caco, Dr. Meri Papajani, Dr. Fatbardha Xhani, si dhe shumë profesionistë të tjerë që janë krenaria e këtij institucioni. Nga kjo klinikë kanë dalë dhjetëra infermierë dhe laborantë të specializuar, sot aktivë me dinjitet në tregun e punës.

Në lidhje me znj. @elionapitarka , sqaroj publikisht se:
❌ Nuk ka asnjë autorizim të flasë në emër të mjekëve tanë
✔ Është trajtuar vetëm si paciente, me korrektësi dhe respekt.

Në vitin 2023 e kam këshilluar personalisht të mos publikonte informacione dezinformuese mbi shëndetin e fëmijëve (temperaturat febrile, dietat pediatrike). Pavarësisht kësaj, ajo ka vijuar publikime që krijojnë konfuzion dhe dëmtojnë seriozitetin e profesionit tonë. Si person publik dhe influencer, ajo ka përdorur para disa ditesh Instagramin e saj, për të publikuar deklarata shpifëse dhe të pavërteta ndaj meje dhe stafit të Klinikës Vera–VIRHOV, duke dëmtuar rëndë imazhin profesional të institucionit.

Janë konstatuar gjithashtu:
– përdorim i materialeve filmike pa lejen tone, dhe keshillimet si paciente ne rrjetet e saj sociale, qe perben shkelje e pronës intelektuale te klinikes.
– mesazhe kërcënuese në telefonin tim personal (të dokumentuara)
Dhe te tjera.

Për këtë arsye, Klinika Vera–VIRHOV ka nisur procedurat ligjore për shpifje, fyerje, dëmtim imazhi dhe shkelje ligji. Ky proces bazohet në Kodin Penal dhe parashikon dënime që shkojnë deri në 3 vite burg, sipas rasteve konkrete.

Deklaroj publikisht se çdo gjobë apo dëmshpërblim që mund të përfitohet nga ky proces do të shkojë në ndihmë të fëmijëve të Jetimores së Tiranës, si nje akt human dhe simbolik per dinjitetin njerezor. Klinika Vera–VIRHOV do të vazhdojë të ushtrojë aktivitetin e saj me korrektësi, profesionalizëm dhe transparencë, në shërbim të pacientëve dhe shoqërisë shqiptare.

The post Klinika çon në Gjykatë Eliona Pitarkën: Shpërndau informacione dezinformuese, dëmshpërblimi do shkojë për jetimoren appeared first on Albeu.com.

Princi Harry ka mbërritur në Gjykatën e Lartë të Londrës, ku ka nisur zyrtarisht gjyqi kundër botuesit të Daily Mail, në një nga përballjet më të rëndësishme ligjore mes familjes mbretërore dhe shtypit tabloid britanik.

Duka i Sussex dhe gjashtë figura të tjera publike akuzojnë botuesin për mbledhje të paligjshme informacioni gjatë viteve 1993–2011, përfshirë përdorimin e hetuesve privatë, përgjime telefonike, mashtrime për të siguruar të dhëna mjekësore, bankare dhe personale, si dhe përfshirje të mundshme të zyrtarëve të korruptuar të policisë.

Associated Neëspapers i ka mohuar kategorikisht akuzat, duke i cilësuar si të pabazuara dhe absurde. Megjithatë, Gjykata e Lartë ka vendosur që çështja të vazhdojë, duke argumentuar se paditësit kanë një perspektivë reale për të provuar se faktet janë fshehur qëllimisht për vite me radhë.

Bashkë me Harry-n në padi janë edhe Elton John, bashkëshorti i tij David Furnish, aktorja Elizabeth Hurley dhe aktivistë të tjerë të njohur.

Gjatë nëntë javëve të ardhshme, disa prej tyre pritet të japin dëshmi, ndërsa Princi Harry do të dëshmojë të enjten kjo është hera e dytë që ai paraqitet në bankën e dëshmitarëve, një akt i rrallë për një anëtar të lartë të familjes mbretërore.

Cristiano Ronaldo, sërish sportisti më i paguar në botë! Pasuria e tij po ‘çmend’ rrjetin!
Harry e ka cilësuar prej vitesh shtypin tabloid britanik si “toksik” dhe ka fituar më herët padi të ngjashme ndaj grupeve të tjera mediatike. Ekspertët thonë se ky gjyq mund të shënojë një pikë kthese për standardet e medias në Britani, me rreth 40 milionë paund kosto ligjore dhe reputacion të madh në lojë për të dyja palët.

The post PAVARËSIA E PRINCIT NË GJYQ! Fillon gjyqi historik mes Harry dhe Daily Mail për shkelje të privatësisë appeared first on Albeu.com.

Qeveria e Irakut ka njoftuar tërheqjen e plotë të forcave amerikane nga të gjitha objektet ushtarake brenda territorit federal të vendit, duke shënuar fundin e një pranie që zgjati më shumë se dy dekada.

Sipas Ministrisë së Mbrojtjes, kontingjenti i fundit i këshilltarëve amerikanë është larguar nga Baza Ajrore Al-Asad në provincën Anbar, një nga pikat kryesore të pranisë ushtarake të SHBA-së që nga pushtimi i vitit 2003.

Autoritetet irakiane publikuan pamje që tregojnë bazën bosh, ndërsa Komanda Qendrore e SHBA-së konfirmoi dorëzimin e instalimeve.

Tërheqja është rezultat i një procesi disa-vjeçar, i nisur pas kërkesës zyrtare të Bagdadit në vitin 2023. Koalicioni ndërkombëtar kundër ISIS-it ka dorëzuar gjithashtu selinë e Komandës së Operacioneve të Përbashkëta, duke ia kaluar kontrollin e plotë forcave irakiane.

Megjithatë, trupat amerikane mbeten të dislokuara në Rajonin Autonom të Kurdistanit, në bazën ajrore Harir pranë Erbilit, e cila nuk është nën kontrollin e drejtpërdrejtë të qeverisë qendrore.

Tërheqja vjen në një moment tensionesh të larta rajonale dhe pritet të ndikojë edhe në debatin për çarmatimin e milicive pro-iraniane.

Bagdadi thekson se bashkëpunimi me SHBA-në do të vazhdojë vetëm në trajnim, pajisje ushtarake dhe koordinim kundër ISIS-it, ndërsa operacionet aktive të koalicionit do të përqendrohen tashmë jashtë Irakut.

The post SHBA LARGOHET NGA IRAKU! Bagdadi konfirmon fundin e pranisë ushtarake amerikane federale appeared first on Albeu.com.

Një histori suksesi që bën krenar jo vetëm qytetin e Cërrikut, por mbarë Shqipërinë. Loris Qosja, nxënës i klasës së 9-të nga Cërriku, ka arritur një fitore të jashtëzakonshme duke triumfuar në Olimpiadën Ndërkombëtare të Matematikës, e zhvilluar në Orlando, Shtetet e Bashkuara të Amerikës.

Vetëm 15 vjeç, Loris ngriti flamurin shqiptar në një nga kompeticionet më prestigjioze ndërkombëtare për moshën e tij, duke u renditur i pari në matematikë. Sukseset e tij nuk u ndalën me kaq, pasi ai arriti të fitojë edhe vendin e tretë në Olimpiadën Ndërkombëtare të Kimisë, duke dëshmuar talentin e tij të spikatur në shkencat ekzakte.

Pas këtij suksesi qëndron një punë e palodhur dhe përkushtim i jashtëzakonshëm. Loris studion matematikën rreth 6 deri në 8 orë çdo ditë, ndërsa si çdo adoleshent, gjen kohë edhe për veten, duke i kushtuar rreth dy orë në ditë telefonit.

Një rol të rëndësishëm në formimin e tij ka pasur mësuesja Flutura Hoxholli, e cila e ka mbështetur dhe përgatitur nxënësin jo vetëm gjatë orëve mësimore, por edhe jashtë orarit dhe gjatë pushimeve, duke arritur rezultate të shkëlqyera.

Edhe pse familja e tij nuk kishte mundësi financiare për të përballuar udhëtimin drejt SHBA-së, Loris nuk mbeti pa mbështetje. Bashkia Cërrik, me vendim të Këshillit Bashkiak, siguroi fondet për udhëtimin e Loris Qosjes dhe mësueses së tij, duke i dhënë mundësinë të përfaqësojë Shqipërinë në arenën ndërkombëtare.

The post 15-vjeçari nga Cërriku triumfon në Olimpiadën Ndërkombëtare të Matematikës në SHBA appeared first on Albeu.com.

Salma Hayek është një nga gratë më ikonike dhe simpatike në Hollywood. Herë pas here, ajo është shqetësuar, përtej zgjedhjeve të saj profesionale, edhe për jetën e saj personale. Martesa e saj me François-Henri Pinault, në vitin 2009, u diskutua shumë. Megjithatë, me praninë e saj mbresëlënëse dhe personalitetin e fortë, nuk është e vështirë të imagjinohet se ajo ka marrë shumë qasje romantike në jetën e saj. Ajo që mund të mos e keni ditur është se midis atyre që i janë afruar për një takim ishte edhe presidenti i Shteteve të Bashkuara, Donald Trump.

Vetë aktorja ka zbuluar më parë se i kishte refuzuar propozimet e tij romantike disa vite më parë dhe se ai iu përgjigj duke e nënçmuar publikisht. Sipas një raporti të BuzzFeed, Donald Trump dyshohet se i kishte ftuar për një takim, por aktorja kishte refuzuar, pasi në atë kohë ishte tashmë në një lidhje.

Pas refuzimit, presidenti aktual i SHBA-së dyshohet se u përpoq ta shpifte atë përmes artikujve në National Enquirer, të cilët nënkuptonin se Salma Hayek ishte “shumë e shkurtër” për shijet e tij. Ajo foli për incidentin në emisionin El Show del Mandril në Radio Centro, duke përshkruar se si filloi e gjithë historia.

“Kur e takova këtë burrë, unë tashmë kisha një partner dhe ai u përpoq të bëhej mik me të për të marrë numrin tim të telefonit fiks “, tha ajo. “Ai më në fund e mori numrin tim dhe filloi të më telefononte për të më ftuar të dilnim.”

Në fakt, kur u botua historia për gjatësinë e saj, Trump e kontaktoi përsëri. Siç kujton Hayek, ai i la një mesazh ku i thoshte: “A mund ta besosh këtë? Kush do ta thoshte këtë? Nuk dua që njerëzit të mendojnë kështu për ty.”

Ajo shpjegoi se besonte që ai po përpiqej ta manipulonte: “Ai mendonte se do të përpiqesha të dilja me të, në mënyrë që njerëzit të mos mendonin se kjo ishte arsyeja pse ai nuk donte të dilte me mua.”

Ajo shtoi me qartësi absolute: “Ai po përpiqej të më bënte të ndihesha e poshtëruar, në mënyrë që unë të pranoja të dilja me të. Por unë nuk turpërohem për gjatësinë time.”

The post Koha kur Donald Trump ftoi Salma Hayek të dilte, ja si reagoi ajo appeared first on Albeu.com.

Ina dhe Keijsi janë mes banorëve të Big Brother VIP Albania 5 që janë në televotim së bashku me Erikun dhe Mateon.

Presioni i këtij nominimi duket se ka afruar dyshen, të cilët kanë shkëmbyer puthje dhe përqafime.

Sapo u zgjuan nga gjumi këtë mëngjes, Ina dhe Keijsi u panë në momente të ëmbla pranë njëri-tjetrit.

Teksa ishte përpara pasqyrës e veshur me pizhame, Ina iu afrua Keijsit, i shtrirë në krevat, dhe i dha një puthje, të cilën ai ia ktheu menjëherë me përqafim.

Në videon e publikuar në rrjetet sociale, ata shfaqen të afërt, duke treguar se marrëdhënia mes tyre vazhdon të forcohet edhe brenda shtëpisë më të famshme në Shqipëri.

E nga ana tjetër, Keijsi kishte një lidhje dashurie edhe me Stelinën, e cila ndodhet po ashtu në BBVA.

Mbetet të shihet në vazhdim se si do të jetë kjo marrëdhënie e se si shkon ky nominim.

The post ‘Efekti i nominimit’ – Ina dhe Keijsi shfaqen të afërt e të përqafuar së bashku appeared first on Albeu.com.

Zyra e Kryeprokurorit të Shtetit ka njoftuar se Prokurori i Shtetit ka monitoruar në vazhdimësi procesin e rinumërimit të rezultateve zgjedhore dhe do të ndërmarrë veprime për çdo dyshim për keqpërdorim të votave.

Sipas njoftimit për media thuhet se koordinatorja nacionale për zgjedhje, prokuroja Laura Pula, pas evidentimit të mospërputhjeve të votave gjatë rinumërimit, ka kërkuar nga kryeprokurorët e të gjitha prokurorive themelore që në komunat ku ka përfunduar rinumërimi të fillojnë grumbullimin e informatave dhe provave relevante që mund të vërtetojnë kryerjen e ndonjë vepre penale lidhur me procesin zgjedhor.

“Prokurorja Pula ka kërkuar gjithashtu që edhe në komunat ku rinumërimi nuk ka përfunduar, menjëherë pas përfundimit të tij të fillohet me procesin e grumbullimit të provave të nevojshme”, thuhet në njoftim.

Zyra e Kryeprokurorit të Shtetit thekson se Prokurori i Shtetit do të mbetet i angazhuar për ta mbrojtur votën e lirë të qytetarëve, dhe do të hetoj çdo rast, për të cilin ka dyshime se është keqpërdorë – falsifikuar vota në çfarëdo mënyre dhe nga kushdo qoftë.

The post Dyshimet për manipulim të votave, Prokuroria nis grumbullimin e provave appeared first on Albeu.com.

Një situatë e tensionuar ka tronditur shtëpinë e Big Brother VIP Kosova gjatë ditës së sotme, ku protagonistë ishin banorët Lim Hoti dhe Alba Pollozhani. Përplasja mes tyre degradoi në akuza të rënda dhe reagime të forta emocionale, duke sjellë një nga momentet më të vështira të këtij edicioni.

Debati nisi pas disa diskutimeve të akumuluara, ku Limi u drejtua Albës me fjalë të ashpra, duke e akuzuar për sjellje të pandershme dhe duke vënë në dyshim karakterin e saj. Këto deklarata shkaktuan reagim të menjëhershëm nga ana e Albës, e cila shpërtheu emocionalisht dhe ngriti zërin duke kërkuar ndalimin e akuzave ndaj saj.

E prekur thellë, Alba deklaroi se dëshiron të largohet nga formati, duke theksuar se prej më shumë se një dite ka kërkuar largimin. Ajo kërkoi respekt dhe theksoi se çdo fjalë që thuhet brenda shtëpisë ndikon drejtpërdrejt tek familjarët e saj, të cilët po e ndjekin nga jashtë. Në disa momente, konkurrentja u shfaq e përlotur dhe në gjendje të rënduar emocionale.

Nga ana tjetër, Limi u shpreh se nuk ka ndërmend të vazhdojë asnjë komunikim me Albën dhe se preferon të distancohet plotësisht nga situata, duke lënë të kuptohet se nuk do të rikthehet më në këtë debat.

Pas përplasjes, atmosfera në shtëpi mbeti e rënduar, ndërsa banorët e tjerë u përpoqën të shmangin tensionet e mëtejshme. Ende nuk dihet nëse Alba do ta realizojë largimin e saj nga BBVK, por ngjarja ka ngjallur reagime të shumta nga publiku dhe pritet të ketë zhvillime të reja në ditët në vijim.

The post Në gjendje të rënduar emocionale, Alba kërkon sërish nga shtëpia! appeared first on Albeu.com.

Një aksident i rëndë hekurudhor ka ndodhur në Spanjë, në linjën e trenave të shpejtësisë së lartë që përshkon rajonin e Andaluzisë.

Disa vagonë të një treni kanë dalë nga shinat dhe kanë goditur ballë për ballë një tren që po vinte nga drejtimi kundërt, duke shkaktuar një tragjedi me pasoja të rënda njerëzore.

Sipas bilancit të parë zyrtar të autoriteteve, të paktën 39 persona kanë humbur jetën. Megjithatë, Ministria e Shëndetësisë e Qeverisë së Andaluzisë ka bërë me dije se numri i viktimave mbetet “i papërcaktueshëm”, për shkak të vështirësive në ndërhyrje në tre vagonë që kanë përfunduar në një argjinaturë. Shërbimet e emergjencës dhe dëshmitë e pasagjerëve, të cituara nga mediat, flasin për rreth 100 të plagosur, disa prej tyre në gjendje shumë të rëndë, si dhe për persona që ende rezultojnë të bllokuar mes rrënojave metalike.

Në aksident janë përfshirë një tren i kompanisë Iryo, i nisur nga Malaga dhe me destinacion Madrid Puerta de Atocha, si dhe një tren i kompanisë Alvia, i drejtuar për në Huelva, në Andaluzia.

Ministri spanjoll i Transportit, Oscar Puente, ka deklaruar në rrjetin social X se vagonët e fundit të trenit Iryo kanë dalë nga shinat duke pushtuar binarin e kundërt, ku në atë moment po qarkullonte treni i Renfe-s për në Huelva. “Përplasja ka qenë e tmerrshme dhe ka shkaktuar përmbysjen e dy vagonëve të parë të trenit të Renfe-s. Prioriteti kryesor tani është shpëtimi i viktimave”, ka shkruar ai. Aksidenti ka ndodhur mbrëmjen e sotme pranë lokalitetit Adamuz, në provincën e Kordobës.

Si pasojë e tragjedisë, shërbimi i trenave të shpejtësisë së lartë mes Andaluzisë jugore dhe Madridit do të mbetet i pezulluar të paktën gjatë gjithë ditës së hënë. Lajmin e ka konfirmuar operatori i infrastrukturës hekurudhore Adif, i cili njofton se linjat Madrid–Kordobë, Sevilje, Malaga dhe Huelva do të jenë jashtë funksionit. Sipas burimeve të Adif, rikthimi i plotë i infrastrukturës mund të zgjasë 48 deri në 72 orë.

Kompania Iryo ka bërë të ditur se ka aktivizuar të gjitha protokollet e emergjencës, ndërsa pasagjerët e dy trenave të përfshirë janë evakuuar. Ndërkohë, ekipet e shpëtimit vijojnë kërkimet për viktima apo të mbijetuar të mundshëm mes vagonëve të shkatërruar.

The post Tragjedi hekurudhore në Spanjë, 39 numri i viktimave pas përplasjes së dy trenave appeared first on Albeu.com.