Numri i pacientëve me grip dhe viruse të ndryshme është në rritje. Sipas të dhënave nga IShP-ja, që nga fillimi i sezonit të gripit, numri i përgjithshëm i personave të infektuar është 2.8 herë më shumë krahasuar me të njëjtën periudhë të vitit të kaluar, kur u regjistruan 1.335 raste.

Pritjet janë që kulmi i gripit mund të ndodhë nga fundi i janarit deri në mesin e shkurtit.

Mjeku Fadil Cana për TVM2 thekson se numri i kontrolleve të pacientëve në Klinikën Infektive arrin deri në 100 dhe shumica prej tyre vuajnë nga gripi sezonal influenca A.

“Në Klinikën Infektive numri i kontrolleve shëndetësore arrin deri në 100 persona në ditë që kërkojnë ndihmë mjekësore. Kryesisht janë pacientë që trajtohen në mënyrë ambulatore, por rastet që kanë përkeqësime, ato normal që edhe hospitalizohen. Këtë vit në pjesën dërmuese të pacientëve tek të cilët në mënyrë laboratorike është vërtetuar prezenca e influencës A, gjegjësisht gripit, si dhe tek pacientët që kanë ndërruar jetë ka qenë e përdëftuar gripi sezonal influenca A.”, - deklaroi drejtori në Klinikën Infektive, Fadil Cana.

Mjeku Fadil Cana njëherësh thekson që vaksinimi është mbrojtja më e mirë kundër gripit sezonal, sidomos për pacientët me sëmundje kronike.

“Klinika Infektive ka kapacitet dhe mundësi që tash për tash me këto përmasa, me këto numra, ta përballojë këtë fluks, që normal është i shtuar dhe i pritshëm për këtë sezon. Vaksinimi është mbrojtja e parë kundër gripit dhe normal në fillim të sezonit ai rekomandohet dhe aplikohet, por asnjëherë nuk është vonë, posaçërisht për grupmoshat e vjetra dhe personat me sëmundje kronike, qofshin ato pulmonare apo kardiake.”, - theksoi drejtori në Klinikën Infektive, Fadil Cana.

Ekspertët shëndetësorë u bëjnë thirrje qytetarëve që të ndjekin rekomandimet e higjienës dhe të shmangin mjediset e rrezikshme për të zvogëluar transmetimin e virusit. Parandalimi është thelbësor, pasi aktiviteti i gripit arrin kulmin këtë sezon. /tvm2

Kryeministri i vendit, Hristijan Mickoski, i cili është pjesëmarrës në Forumin Ekonomik Botëror në Davos, sonte përmes profilit të tij në Facebook njoftoi se ka pasur një takim dypalësh me kryetaren e Këshillit të Ministrave të Bosnja dhe Hercegovinës, Borjana Krishto, dhe më pas ka zhvilluar shumë takime dypalëshe me kompani shumëkombëshe.

“Duhet sërish t’i ristartojmë të gjitha ato projekte energjetike ndoshta të harruara në të kaluarën, si Çebren dhe Galishtë, ura e Boshkut dhe të tjerat, dhe ta ofrojmë potencialin për investime në burime të ripërtëritshme të energjisë për një numër të madh investitorësh, të cilët treguan interes të padiskutueshëm në diskutimet pas përfundimit të panelit”, deklaroi Mickoski.

Komisioni Parlamentar për Mbrojtje dhe Siguri sot dha dritën jeshile për ndryshimet në ligjet për punët e brendshme dhe policinë, të cilat u ndryshuan gjashtë muaj më parë. Me ndryshimet e reja, Sektori aktual për Punë të Brendshme – Shkup po “promovohet” në Departamentin e Punëve të Brendshme – Shkup.

Me këtë, kryeqyteti po merr një status më të lartë organizativ dhe një pozicion më të fortë në strukturën e policisë.

Sipas propozuesve, ndryshimet ligjore nuk janë kozmetikë, por një mjet për efikasitet më të madh në terren.

Ndryshimet u propozuan nga deputetët e OBRM-PDUKM-së, ndërsa u kritikuan nga opozita duke e vlerësuar si një mundësi për të rritur ndikimin politik mbi policinë.

Amendamentet gjithashtu prezantojnë një pozicion të ri drejtues – Shef i Departamentit të Punëve të Brendshme – Shkup, ndërsa parashihen edhe paga më të larta për shefat dhe oficerët e policisë së Shkupit krahasuar me oficerët e policisë nga qytete të tjera.

Të dy ligjet u ndryshuan plotësisht në korrik të vitit të kaluar, por gjatë zbatimit të tyre u përcaktua që policia e Shkupit duhet të ketë një status më të lartë sepse më shumë se 60 përqind e krimeve në Maqedoni ndodhin në kryeqytet.

Rasti “Talir 1”, që lidhet me financimin e paligjshëm të OBRM-PDUKM-së, tashmë prej gjashtë vitesh po zvarritet në labirintet gjyqësore, ndërsa javën e ardhshme do të nisë nga e para për herë të gjashtë.

Seanca e sotme u shty, ndërkohë që ka parashkruar vepra penale “Keqpërdorim i pozitës dhe autorizimit zyrtar”, për të cilën ndiqeshin penalisht ish-kryeministri Nikolla Gruevski dhe Kiril Bozhinovski, duke mbetur vetëm vepra penale për pastrim parash.

“Shtyrja e sotme do të thotë se herën tjetër gjykimi do të duhet të fillojë për herë të gjashtë. Do të thosha se në këtë rast strategjia e të akuzuarve, ndër të tjera, është e fokusuar në zvarritjen e procedurës, sepse vetëm përmes parashkrimit mund t’i shpëtojnë përgjegjësisë, duke qenë se bëhet fjalë për një lëndë për të cilën ata vetë janë të vetëdijshëm se Prokuroria posedon prova të forta. Ka ndodhur parashkrimi i veprës penale parësore, përkatësisht i keqpërdorimit të pozitës dhe autorizimit zyrtar, për shkak të kalimit të afateve ligjore dhe ndryshimeve në Kodin Penal të vitit 2023. Megjithatë, pavarësisht parashkrimit të veprës parësore, sipas ligjit dhe praktikës ekzistuese gjyqësore, nuk ka pengesa që në këtë rast të ndiqet penalisht vepra e pastrimit të parave, për të cilën parashkrimi ndodh në vitin 2035,” deklaroi prokurorja Lençe Ristoska.

Në këtë rast janë të akuzuar ish-kryeministri Gruevski, si dhe Ilija Dimovski, Kiril Bozhinovski, Leko Ristovski dhe Mile Janakieski. Lënda ka filluar në shkurt të vitit 2019 dhe, për shkak të kompleksitetit dhe numrit të madh të dëshmitarëve, procesi gjyqësor vazhdimisht është zvarritur.

Ambasada e SHBA-ve në Maqedoninë e Veriut, ka publikuar një mesazh nga ambasadorja Angela Ageler.

Në mesazhin e saj, ajo kujton se në Shkup ka mbërritur si ambasadorja e dhjetë e Shteteve të Bashkuara dhe që nga fillimi ka pasur një besim të fortë në “forcën dhe guximin e popullit të Maqedonisë së Veriut”, besim që me kalimin e kohës është konfirmuar shumë herë.

'Viti 2025 shënoi 30-vjetorin e marrëdhënieve dypalëshe SHBA-Maqedoni, megjithëse partneriteti ynë daton më tej. Për më shumë se tre dekada, i kemi treguar botës - së bashku - se çfarë mund të arrijë forca, kompromisi dhe vendosmëria e duruar. Dhe gjatë tre viteve të fundit, ne kemi treguar rezultatet shumë reale dhe të prekshme të asaj se si duken miqësia e vërtetë dhe partneriteti konstruktiv", thotë Ageler.

Ajo thekson se gjatë mandatit të saj janë ndërmarrë hapa konkretë në disa fusha, përfshirë rritjen ekonomike dhe pavarësinë energjetike, reformat në drejtësi dhe luftën kundër korrupsionit dhe krimit të organizuar, arsimin, kulturën dhe integrimin euroatlantik, si dhe modernizimin e kapaciteteve të sigurisë dhe projekte strategjike infrastrukturore që forcojnë sigurinë rajonale dhe tregtinë.

“Gjatë tre viteve të fundit, partneriteti ynë është shndërruar në një miqësi të vërtetë, takova qytetarët në mbarë vendin, bisedat e hapura dhe shpresat, vizionet dhe sfidat e përbashkëta", shkruan Ageler.

Ambasadorja porosit se Shtetet e Bashkuara të Amerikës “do të qëndrojnë gjithmonë pranë Maqedonisë së Veriut” në realizimin e vizionit për një shtet më të fortë, më të sigurt dhe plotësisht të integruar euroatlantik.

Kujtojmë se Ageler nuk do të jetë më ambasadore në RMV, pasi më 22 dhjetor, presidenti i SHBA-ve, Donald Trump, tërhoqi nga pozitat e tyre 29 ambasadorë, e në mesin e tyre dhe Angela Ageler.

Mbetemi të përkushtuar edhe me mbështetje të fuqishme për rritje të mëtejshme të pagave në sektorin shëndetësor në kuptim të vlerësimit adekuat të punës së punonjësve shëndetësorë si parakusht për punë cilësore, deklaroi drejtori i Fondit për Sigurim Shëndetësor, Sasho Klekovski, në konferencën e sotme për shtyp të Qeverisë.

“Dua të theksoj se perceptimi se në sektorin publik dhe në udhëheqjen e sektorit publik ka ndonjë kundërshtim të vlerësimit adekuat të punës. Të përsëris se në sektorin shëndetësi – në mënyrë kumulative pagat në nëntor të vitit 2024 dhe mars të vitit 2025 janë rritur 17 për qind, në mënyrë disproporcionale shumë më tepër për me arsim fillor, me arsim të mesëm, mjekët ishin më pak sepse ishin rritje lineare. Tek mjekët amë kapacitetet janë rritur 33 për qind. Rritje historike që është bërë që të rriten pagat për mjekët dhe për infermireret të punësuar aty, sepse ne besojmë fuqishëm se puna duhet të vlerësohet në mënyrë adekuate”, tha drejtori i FSSH-së në konferencën për shtyp.

Ai përkujtoi se konform marrëveshjes me sindikatat, në mars të këtij viti do të ketë edhe një rritje e pagave në shëndetësinë publike.

“Kështu që mendoj se të paktën pagat për stafin e mesëm mjekësor, për infermierët, janë konkurruese me sektorin privat. Mendoj se në disa sektorë të tjerë – arsim, janë arritur marrëveshje për rritje të pagave. Pra, të paktën në sektorin tim, mund të them me siguri se ka mbështetje të fortë për rritje të mëtejshme të pagave në aspektin e vlerësimit të duhur të punës së punonjësve të kujdesit shëndetësor si parakusht për punë cilësore. Ne mbetemi të përkushtuar ndaj kësaj. Tashmë mund të njoftoj se rritja në mars nuk do të jetë e barabartë për të gjithë, por do të jetë në bazë përqindjeje, sepse pagat midis stafit të ulët dhe mjekëve – koeficienti dhe diferenca midis tyre janë ulur, megjithatë edhe mjekët duhet të vlerësohen në mënyrë të përshtatshme”, shpjegoi Klekovski.

Lidhur gjetjet e konstatuara nga kontrollet e zbatuara vitin e kaluar në institucionet publike shëndetësore për drejtorë dhe doktorë, të cilët ilegalisht kanë marrë më shumë para nga ajo që duhet për të cilat është thënë se do të kërkohet që të kthehet, nëse i kanë kthyer dhe nëse ka edhe menaxherë tjerë, të cilëlt ilegalisht i kanë rritur pagat, tha se deri më tani nuk ka kthim të parave nga pagesat e mëdha.

“Lidhur me kontrollet e kryera, tejkalimet e konstatuara të kompensimeve të ndërlidhura me punë, përfundimisht me 31 dhjetorin, asnjë institucion publik nuk ka rimbursim të kompensimeve, pagave të tejkaluara të rritura. Ne nuk kemi bërë kontrollë të ditur, megjithatë e dimë që nuk është bërë asnjë rimbursim”, përgjigjet Klekovski

Kryetari i Partisë 'Lëvizja Populli", pjesë e Aleancës Kombëtare për Integrim, Skender Rexhepi-Zejdi, është shprehur kundër sistemit "Safe City".

Ky vendim i tij vjen pasi siç thotë ai, ky sistem i MPB-së është ndëshkues, diskriminues dhe antikushtetues.

"Jemi për sigurinë e qytetarëve, por projekti “Safe City” është i papërshtatshëm për realitetin e vendit tonë, ndëshkues, diskriminues dhe antikushtetues⁣.

Është i papërshtatshëm sepse rrugët dhe infrastruktura e qyteteve të përfshira janë nën çdo standard evropian dhe nuk krijojnë kushte reale për zbatim të drejtë të këtij sistemi.

Ndëshkrues sepse qëllimi real i qeverisë nuk është siguria e qytetarëve, por mbushja e boshllëqeve buxhetore përmes gjobave.⁣

Diskriminues sepse nuk përfshihet i gjithë shteti, por vetëm disa qytete të caktuara, duke krijuar trajtim të pabarabartë për qytetarët.⁣

Antikushtetues sepse në të tre qytetet e përfshira — Shkup, Kumanovë dhe Tetovë — gjuha shqipe është gjuhë zyrtare, ndërsa qeveria ka lejuar që softueri i projektit të përgatitet vetëm në gjuhën maqedonase", shkruan Zejdi.

Kujtojmë se për aktivizimin e sistemit Safe City, nevojitet ndryshimi i një pakoje prej 6 ligjeve, katër prej të cilave janë miratuar, ndërsa mbeten Kodi Penal dhe Ligji për kundërvajtje në komunikacion. Pa miratimin e ligjit sistematik me 2/3, sistemi Safe City nuk mund të hy në funksion nga data 1 shkurt.

Kryetari i Bashkimit Demokratik për Integrim, Ali Ahmeti sonte në emisionin Click Plus në TV21 foli për takimin e liderëve të mbajtur një javë më parë, të thirrur nga kryeministri Hristijan Mickoski.

Ahmeti tha se kanë bë mirë që kanë shkuar në takim te Mickoski sepse siç thotë ai, Europa formohet me disa parime siç janë dialogu dhe kompromisi.

“Është mirë sepse Europa formohet në disa parime. Parim i Europës dialogu, kompromisi, sepse pa dialog dhe kompromis nuk gjen dot zgjidhje mbi problemet. Nuk është zëvendësuar kjo filozofi me një filozofi të re, por janë parime që duhet të respektohen. Pjesëmarrja e BDI në takimin e liderëve ka qenë shumë e domosdoshme për të biseduar për të gjitha temat, edhe pse të gjitha temat që ne menduam dhe vlerësuam nuk u biseduan në takim me liderët mbeti që tema të caktuara të bisedohen si dy parti politike më të mëdha te komunitetet më të mëdha në vend”, deklaroi Ahmeti.

Ndër të tjera ai tha se që 22 vite po përfaqëson shqiptarët në politikë, ndaj edhe thuhet se ka përcjellë 8 ose 9 kryeministra.

“Unë nuk kam hyrë në këtë fushë veprimtarie për të përcjell kryeministra, por më ka rastisur që, shqiptarët në Maqedoni e kanë votuar BDI-në deh si forcë legjitime sigurisht se kemi qenë përfaqësues legjitim dhe kemi përfaqësuar shqiptarët për këto 22 vite dhe sigurisht të tjerët nuk kanë fituar zgjedhje dhe ato i kemi përcjell si kryeministra, 8 apo 9 nuk e di”, tha Ahmeti. /tv21

Para këtij aksioni ku u arrestua dhe u kap gjykatësi i Gjykatës së Apelit me 350.000 euro të fshehura në mur në shtëpinë familjare, gjithashtu u arrestua edge gjykatësi suprem me 10.000 euro ryshfet, që do të thotë se ajo metastazë në gjyqësorin e vendit ekziston, 35 vite qytetarët e kanë parë, ndërkaq ajo që tani inkurajon është që përfundimisht institucionet tregojnë shenja rezistence ndaj një sistemi të këtillë dhe dëshirojnë ta thajnë këtë kënetë politike gjyqësore e cila thjeshtë e hante sistemin tonë, theksoi Bojan Stojanoski, deputet nga radhët e OBRM-PDUKM-së, në televizionin Njusmaks Ballkans në emisionin “Qëndrimi i rajonit”.

Stojanoski, gjithashtu, theksoi se do të miratohen pesë ligje të cilat do t’i ashpërsojnë kriteret për zgjedhje të gjykatësve, prokurorëve dhe anëtarëve të Këshillit gjyqësor, me qëllim që të parandalohen dukuritë e këtilla, thuhet në kumtesën e OBRM-PDUKM-së.

Stojanoski më tej theksoi se me Kodin e ri penal janë paraparë dënime të ashpra me qëllim që të tregohet se secili në shtet duhet t’i respektojë ligjet, ndërkaq drejtësia vlen për të gjithë.

“Kjo është një porosi që gjykatësit e tjerë të cilët mund të mendojnë për veprime të tilla, se krimi është i pashpagueshëm, ne tani po krijojmë zgjidhje të cilat do të jenë sistematike, nga të cilat dikush nesër do të jetë në gjendje të ndjekë penalisht zyrtarët e kësaj qeverie, politikanët e përgjegjshëm mendojnë kështu. Në Kodin penal që do ta votojmë të premten, janë ashpërsuar të gjitha dënimet, ne vendosëm si deputetë në përputhje me kompetencat kushtetuese të propozojmë dënime më të larta ligjore, sepse njëherë e përgjithmonë duhet të tregojmë se të gjithë në këtë vend duhet ta dinë se duhet të punojnë sipas ligjit, dhe nuk ka të paprekshëm, drejtësia duhet të arrijë tek të gjithë", tha Stojanoski.

Ish-kryetari i Qytetit të Shkupit Petre Shilegov, kërkoi dorëheqjen e udhëheqjes aktuale të LSDM-së për shkak të rezultateve katastrofale të punës së saj.

Shilegov e akuzoi liderin e LSDM-së, Venko Filipçe, se po e çon partinë drejt zhdukjes.

“Të reduktosh mbështetjen e partisë në vetëm rreth njëqind mijë vota dhe vetëm 15 deputetë, të bëhesh partia e pestë në Shkup dhe e treta në Maqedoni – çfarë është kjo nëse jo katastrofë?”, tha Shilegov në Tv Telma.

“Do të ketë kërkesa të caktuara jo vetëm nga ana ime, por edhe nga një grupim serioz brenda partisë, mes të cilëve ka edhe deputetë aktualë, të cilët gjithashtu nuk kanë asnjë komunikim me udhëheqjen. Kur një pjesë e deputetëve të dalin nga partia, ndoshta gjysma e grupit parlamentar, kur një pjesë e udhëheqjeve komunale t’ju mbyllin dyert, atëherë do ta kuptoni se duhet të largoheni nga funksioni,” tha Shilegov.

“As unë personalisht dhe as njerëzit të cilëve u intereson LSDM-ja nuk duhet të punojnë kundër partisë,” tha Shilegov, duke theksuar se teza se ky kongres do të jetë i suksesshëm apo i pasuksesshëm është e rreme.

Sipas tij, nëse kongresi rezulton i suksesshëm, ai do të jetë vetëm një verifikim i asaj që ai e quan “politika të gabuara” që janë ndjekur në periudhën e kaluar.

Shilegov tha se ky do të jetë kongresi i tretë i pasuksesshëm radhazi, pas një kongresi që nuk u mbajt fare, duke theksuar se nuk ka pasur kongres llogaridhënës për arsyet e rezultateve pas zgjedhjeve të vitit 2021, as pas zgjedhjeve parlamentare të vitit 2024.
“Sipas informatave që kam, delegatëve dhe organizatave komunale ende nuk u kanë mbërritur materialet dhe konkluzionet e kongresit,” tha Shilegov.

Shilegov ndër të tjera i ka vlerësuar akuzat e LSDM-së se ai punon për OBRM,-PDUKM-në si përpjekje për diskreditim personal.

Ka filluar me ndërtimin e aksit rrugor Tetovë-Gostivar dhe Gostivar–Bukojçan, ndërsa paraprakisht e kemi zgjedhur shpronësimin e tokës dhe mënjamimin e objekteve nëpër këto trase, theksoi sot ministri i Transportit dhe Lidhjeve, Aleksandar Nikolloski.

“Nëse vazhdojmë përgjatë trasesë së njëjtë përgjatë Korridorit 8 në krahun perëndimor, e gjithë procedura për zgjedhjen e një kontraktori për seksionin Gostivar-Bukojçan tashmë është përfunduar, presim vetëm miratimin nga Banka Evropiane për Rindërtim dhe Zhvillim, sepse prej andej vjen kredia, në mënyrë që të zgjedhim një kontraktor. Shpresoj që pas përfundimit të dimrit dhe përmirësimit të kushteve të motit, do të fillojnë punimet në një autostradë të tretë, nga Bukojçani në Kërçovë. Autostrada Kërçovë-Ohër, e cila ishte harruar nga opinioni publik maqedonas dhe për të cilën nuk u bë asgjë, tashmë po punohet intensivisht. Tridhjetë e shtatë kilometra janë vënë në funksion, ka aktivitete shtesë çdo muaj, dhe tani është përfunduar edhe nyja për lidhje me Strugën”, theksoi Nikolloski.

Ministri i Transportit dhe Lidhjeve pret, dhe siç thotë ai, qeveria e ka dhënë fjalën, që autostrada nga Kërçova në Ohër të përfundojë brenda afatit të dhënë. Sa i përket autostradës Shkup-Bllacë, procedura ka përfunduar dhe tani pritet një përgjigje nga Banka Evropiane për Rindërtim dhe Zhvillim, e cila po siguron një kredi për ndërtimin e kësaj pjese.

“Po punojmë edhe në autostradën që shkon nga Prilepi në Manastir dhe e filluam me këtë Qeveri, pavarësisht faktit që marrëveshja u nënshkrua nga ajo e mëparshmja dhe nuk u kryen aktivitete. E kemi përfunduar rrugën ekspres nga Gradsko në Drenovë dhe nga Drenova në Farish dhe ajo tashmë është në funksion dhe qytetarët po e përdorin. Është një rrugë jashtëzakonisht moderne, mund t’i shihni të gjitha këto rrugë në faqen time në Facebook”, tha Nikolloski.

Ai theksoi se është lëshuar edhe krahu lindor i korridorit 8, e ajo është rruga eksprese nga Stracin deri në Kriva Pallankë dhe siç tha shpreson se fqinjët tanë, gjegjësisht Bullgaria do të fillojë të ndërtojë autostradë drejt Maqedonisë.

Kryetari i Komunës së Çairit, Izet Mexhiti, nga koalicioni VLEN, tha se brenda një muaji mund të ketë diçka konkrete për zyrtarizimin e VLEN-it në një parti të vetme.

Ai tha se janë afër një vendimi të këtillë, mirëpo procesi po vijon qetë pasi edhe në formë koalicioni kanë mirëkuptim ndërmjet partnerëve politikë.

“Mendoj që nuk jemi larg për të kaluar në këtë nivel, që VLEN-i të jetë një subjekt i vetëm. Ka disa opsione, pra ka konstruktive, kreative, është propozimi për rotacion, është propozimi me bashkëkryetarë, propozimi një anëtar një votë dhe propozime të tjera. Jemi duke i shqyrtuar, në këtë periudhë në mënyrë intenzive jam optimist që së shpeti do ta rrumbullakojmë këtë, pa prejudikuar se cili do të jetë lideri apo liderët. Për shkak se më e rëndësishme është ideja, subjekti se sa individi.. S’kemi vendos afat se edhe kështu si funksionon është i suksesshëm, mirëpo për shkak të kërkesave, analizave po punojmë drejt shkrirjes, jam optimist besoj se brenda një muaji edhe mund të kemi diçka më konkrete”, tha Mexhiti.

Kujtojmë se ideja për unifikimin e VLEN-it në një parti u përfol për disa muaj radhazi, mirpo nga VLEN thanë se pas zgjedhjeve lokale kjo çështje do të konkretizohet.

Kuvendi i Maqedonisë së Veriut, do të publikojë një konkurs të ri për anëtar të Këshillit Gjyqësor, ndërsa konkursi paraprak është tërhequr, informoi kryetari i Komisionit Parlamentar për Zgjedhje dhe Emërime, Gjorgjija Sajkoski.

“Dua ta informoj Komisionin se kam marrë një njoftim me shkrim nga kryetari i Kuvendit, në të cilin thuhet se në përputhje me Ligjin për Këshillin Gjyqësor të Republikës së Maqedonisë, do të shpallet një konkurs i ri për zgjedhjen e anëtarit të Këshillit Gjyqësor të Republikës së Maqedonisë. Propozimi që ishte në Komision është tërhequr dhe do të shkojë me një konkurs të ri”, theksoi Sajkoski.

Kryetari i Kuvendit, Afrim Gashi theksoi se duhet të përsëritet konkursi për zgjedhjen e anëtarit të ri të Këshillit Gjyqësor të propozuar nga Kuvendi sepse, siç theksoi, ka ligj të ri për Këshillin Gjyqësor.

“Do të duhet t’i pyesni kryetarin dhe anëtarët e Komisionit për Çështje të Zgjedhjeve dhe Emërimeve. Me shumë gjasa janë të mendimit se konkursi duhet të përsëritet sepse tashmë kemi një ligj të ri dhe të gjithë anëtarët do të duhet të zgjidhen sipas ligjit të ri. Por, kjo duhet të vendoset nga kryetari dhe anëtarët e Komisionit për Zgjedhjet dhe Emërimet. Ndërkaq, është punë e Komisionit për Zgjedhje dhe Emërime. Duhet t’i kontaktoni ata. Megjithatë, një moment i rëndësishëm që kemi diskutuar është pikërisht momenti që kemi një Ligj të ri për Këshillin Gjyqësor dhe ai tashmë po ndryshon rregullat e lojës”, tha Gashi më 15 janar.

Kryeprokurori për ndjekje të krimit të organizuar dhe korrupsionit, Islam Abazi dhe prokurorja Iskra Haxhi-Vasileva, deklaruan se hetimi për korrupsion të lartë në Gjykatën e Apelit filloi para 9 muajsh, pas denoncimeve për indice të forta për marrje ryshfeti deri në 100 mijë euro për të ndikuar në heqjen e masës së paraburgimit të Lupço Pecov nga lënda gjyqësore Zinxhiri, ku u kap në flagrancë ish-avokati i shtetit Fehmi Stafa.

Vasileva tha se përveç dëshmive tjera materiale dhe denoncimeve nga telefonatat e të burgosurve, lidhjet ndërmjet Stafës dhe Gjykatësit të Apelit Ristov kanë qenë të kahershme, që dyshohen për dy vepra të rënda penale.

"Bastisje janë bërë në tri lokacione që lidhen me hetimin e gjykatësit të apelit Gjoko Ristov, dhe tek për të dytën herë njësitet tona kanë shkuar në shtëpinë e prindërve të tij në Negotinë ku edhe kanë gjetur një ‘bunker’ në katin e parë, më saktësisht në kuzhinë, janë vërejtur rrethana të dyshimta për kryerjen e aktiviteteve ndërtimore (korrigjimi i pllakave të murit), pas së cilës, gjatë heqjes së një pllake qeramike të murit, është vërejtur një vrimë në të cilën ka pasur rrotulla alumini në formë cilindri, të paketuara në 13 pako individuale, në të cilat janë gjetur gjithsej 610 kartëmonedha në vlerë prej 500 eurosh dhe 225 kartëmonedha në vlerë prej 200 eurosh, ose gjithsej 350.000 euro. Duke qenë se ai ka një pushim mjekësor aktiv kemi vlerësuar se arresti me burg shtëpiak dhe sekuestrimi i dokumenteve të udhëtimit për momentin është adekuat për sigurimin e tij të mos lëshojë adresën e banimit dhe mos të rrezikojë arratisjen e tij, ndikimin në dëshmitarët apo përsëritjen e veprës. Madje përkohësisht i është ndaluar edhe ushtrimi i aktiviteteve gjyqësore. Për çështje sigurie nuk mund të tregohet adresa ku ai mbahet në arrest dhe se muret e asaj shtëpie janë kontrolluar", tha Vasileva.

Ajo shtoi se dje, Njësia për Korrupsion në Departamentin për ndjekje të krimit të organizuar dhe korrupsionit ngriti një kallëzim penal kundër Gjoko Ristov 53 vjeç nga Negotina, me banim në Shkup, për shkak të ekzistencës së dyshimit të arsyeshëm për kryerjen e veprave penale “fitim dhe fshehje e paligjshme e pasurisë” sipas nenit 359-a, paragrafi 3, përfshirë paragrafin 1 dhe “pastrim parash dhe të ardhurave të tjera nga një vepër penale” sipas nenit 273, paragrafi 1 i Kodit Penal.

Gjoko Ristov në cilësinë e zyrtarit – gjykatës në Gjykatën e Apelit në Shkup, në periudhën nga 10.02.2020 deri më sot, në kundërshtim me detyrimin ligjor për të raportuar gjendjen e tij pasurore ose ndryshimin e saj, ka dhënë informacion të rremë në lidhje me pasurinë e tij dhe pasurinë e familjes së tij, e cila pasuri tejkalon shumë të ardhurat e tij të ligjshme.

Kandidati për kryetar të komunës së Gostivarit, Nevzat Bejta nga koalicioni VLEN, pas përfundimit të procesit ka falënderuar qytetarët që kanë votuar për të.

Ai tha se rezultati i arritur është si pasojë e keqpërdorimeve që janë bërë në komunë nga ana e Arben Taravarit dhe Valbon Limanit.

“Ata e keqpërdorën financat e komunës të cilat i kanë plaçkitur dhe për një javë resht ata kanë larë shumë para të qytetarëve të Gostivarit dhe besoj se institucionet e shtetit do të hyjnë në komunë dhe do ta vërtetojnë krimin që e ka bërë Taravari dhe e ka vazhduar Limani. Na do të vazhdojmë me aktivitetet tona dhe besoj se cdo gjë do të dalë në sipërfaqe”, tha Bejta.

Kandidati për kryetar të Komunës së Vrapçishtit nga koalicioni Aleanca Kombëtare për Integrim, Isen Shabani ka shpallur fitoren.

Ai tha se ka diku tre mijë vota epërsi dhe se me këtë besim nga banorët, do të vazhdojë të realizojë premtimet e dhëna.

“Dallimi është diku 3 mijë vota jemi në epërsi. Punët të cilat i kemi në vazhdimësi do t’i vazhdojmë. Kuptohet që në programën tonë do të kemi higjienën komunale, ndërmarrje që nuk ka qenë më parë, dhe shumë projekte tjera. Faleminderit për besimin e dhënë në mandatin e tretë”, tha Shabani.

Kandidati për kryetar të komunës së Gostivarit nga koalicioni Aleanca Kombëtare për Integrim, Valbon Limani ka shpallur fitoren, informon Telegrafi Maqedoni.

Ai ka falenderuar të gjithë qytetarët për besimin, teksa shtoi se gostivarasit e dinë se kush duhet të udhëheqë me komunën.

"Shpallim fitoren e AKI-së, 64% të votave i fituam ne. Dallimi me kundërkandidatin është 2 me 1. Gostivarasit votuan me zemër, ndaj ne do ta bëjmë më të mirën për Gostivarin", tha Limani. /Telegrafi/

Ka përfunduar procesi i zgjedhjeve të ripërsëritura në katër komunat në Maqedoninë e Veriut, ku nuk u arrit cenzusi më 19 tetor.

Sot qytetarët votuan në Gostivar, Vrapçisht, Mavrovë-Rostushë dhe Qendër Zhupë.

Nga votimet sot, u vërejtë një dalje më e ulët e votuesve në orët e mëngjesit dhe një rritje e lehtë në orët e pasdites.

Dalja totale në katër komunat është 28.07%, teksa me ndarje janë si vijon:

28,22% në Gostivar

31,76% në Vrapçisht

28,04% në Mavrovë dhe Rostushë

13,18% në Qendër Zhupë

Teksa daljet në zgjedhjet e 19 tetorit ishin:

32.38% në Gostivar

24.41% në Vrapçisht

25.58% në Mavrovë dhe Rostushë

21.30% në Qendër Zhupë. /Telegrafi/

Një grua 52-vjeçare nga Shkupi sulmoi një oficer policie ndërsa ky i fundit po kryente detyrat zyrtare, njoftoi Ministria e Brendshme.

Incidenti ndodhi mbrëmë përpara stacionit të policisë në Gazi Babë, dhe gruaja e kërcënoi oficerin e policisë para sulmit.

“Më 10.01.2026 në orën 20:40 në Shkup, oficerë policie nga SPB Shkup e privuan nga liria E.D. (52) nga Shkupi sepse ajo sulmoi fizikisht një oficer policie i cili po kryente detyra zyrtare para Stacionit Policor Gazi Baba dhe e kërcënoi atë”, njoftoi Ministria e Brendshme.

Pasi çështja të dokumentohet plotësisht, do të bëhet një paraqitje përkatëse.

Deri në orën 17:00 dalja e votuesve në katër komunat ku mbahen zgjedhjet lokale është 25.55%.

Në Gostivar kanë votuar 25.25% ose 20.887 qytetarë, ndërsa në Vrapçisht 30% ose 8184 qytetarë, Mavrovë Rostushë 29.33% dhe Qendër Zhupë 12.35%.

Procesi ka vijuar i qetë dhe pa ndonjë problem.

Sipas Komisioneve Komunale Zgjedhore, dalja në orët e mëngjesit ka qenë më e ulët për shkak të kushteve klimatike, por gjatë pasdites është shënuar rritje e pjesëmarrjes.