Ministri i Punëve të Jashtme të Turqisë, Hakan Fidan, deklaroi se ngjarjet e fundit në Iran nuk do të jenë dështimi i fundit me të cilin përballet Izraeli, duke sugjeruar se përpjekjet e Tel Avivit për të shfrytëzuar tensionet e brendshme në Iran janë të destinuara të dështojnë.

Në një intervistë për transmetuesin kombëtar TRT, Fidan analizoi situatën aktuale gjeopolitike, me fokus të veçantë në marrëdhëniet mes Izraelit dhe Iranit, situatën në Venezuelë, si dhe të ardhmen e marrëdhënieve turko-amerikane.

Ai theksoi se demonstratat në Iran, megjithëse burojnë nga ankesa reale të qytetarëve dhe probleme strukturore brenda vendit, janë objekt manipulimi nga rivalët e Iranit. Sipas tij, Izraeli po përpiqet të përfitojë nga kjo situatë.

“Ajo që ndodhi në Iran nuk do të jetë e fundit që Izraeli e pret. Izraeli po përpiqet ta shfrytëzojë këtë”, tha kryediplomati turk, pa hyrë në detaje mbi incidente specifike.

Kreu i diplomacisë turke theksoi se shërbimi izraelit i inteligjencës po i nxit hapur iranianët drejt rebelimit. Megjithatë, ai paralajmëroi se shoqëria iraniane, pavarësisht dallimeve të brendshme, tradicionalisht bashkohet kur përballet me kërcënime të jashtme.

Fidan theksoi qëndrimin e Turqisë se populli iranian nuk duhet të dëmtohet dhe se problemet mes Iranit, Shteteve të Bashkuara dhe Perëndimit duhet të zgjidhen ekskluzivisht përmes negociatave.

Shtoi se “Izraeli duhet të ndalet” dhe se Turqia është e gatshme të ndihmojë.

Duke komentuar dinamikën më të gjerë rajonale, Fidan hodhi poshtë retorikën gjithnjë e më agresive të zyrtarëve izraelitë. Ai e përshkroi atë si “përpjekje të dëshpëruara për të tërhequr vëmendje” nga ministra më të vegjël të koalicionit, të cilët në këtë mënyrë përpiqen të rrisin profilin e tyre politik.

Duke folur për marrëdhëniet mes Turqisë dhe SHBA-së, Fidan shprehu optimizëm për vitin e ardhshëm.

Ai theksoi se parashikon rezultate konkrete në vitin 2025 në fushat ku të dy vendet po punojnë aktivisht.

Pikat kyçe të përparimit përfshijnë: sanksionet CAATSA, ligji amerikan që synon Iranin, Rusinë dhe Korenë e Veriut, i cili ka ndikuar edhe Turqinë; si dhe çështjen Halkbank, pra akuzat se banka turke ka ndihmuar Iranin të shmangë sanksionet amerikane. /Telegrafi/

Papritmas, presidenti amerikan, Donald Trump ndërpreu një takim me drejtues të kompanive naftë.

Të pranishmit u shtrënguan në heshtje, kur ai ngriti dorën dhe tha me seriozitet të përzier me entuziazëm “prisni një moment, duhet të shoh sallën time të bukur”.

Pa humbur kohë, u ngrit nga karrigia dhe u drejtua drejt derës, duke ecur me vetëbesim dhe me një shikim që duket se kërkonte të kapte çdo detaj.

— (@)

Të pranishmit e ndoqën me habi, të papërgatitur për këtë ndërprerje të papritur.

Ai u ndal tek dera, e hapi dhe përjetoi çastin duke deklaruar “wow. Çfarë pamjeje! Kjo është dera e sallës!”

Momenti ishte jo vetëm një ndërprerje e papritur e takimit, por edhe një demonstrim i stilit të tij dramatik dhe të përqendruar te detajet madhështore të ambientit. /Telegrafi/

— (@)

Ekspertët e sigurisë kibernetike kanë zbuluar dy shtesa të rrezikshme për Google Chrome që kanë marrë informacionet private të përdoruesve nga bisedat me “chatbot” e inteligjencës artificiale, përfshirë ChatGPT dhe DeepSeek.

Shtesat e quajtura “Chat GPT for Chrome with GPT‑5, Claude Sonnet & DeepSeek AI” dhe “AI Sidebar with Deepseek, ChatGPT, Claude, and more” ishin instaluar nga mbi 900 mijë përdorues para se të hiqeshin nga dyqani zyrtar i Chrome.

Ato dërgonin në fshehtësi bisedat dhe faqet që vizitonin përdoruesit tek serverë të jashtëm, çdo 30 minuta.

Ekspertët paralajmërojnë se kjo praktikë, e njohur si “prompt poaching”, mund të rrezikojë informacionin personal, ide biznesi dhe të dhëna konfidenciale, duke i bërë ato të qasshme nga sulmues të jashtëm.

Përdoruesit këshillohen të kontrollojnë shtesat e tyre, të heqin ato me origjinë të paqartë dhe të mos japin leje për qasje në përmbajtjen e faqeve pa qenë të sigurt. /Telegrafi/

Sekretari amerikan i Energjisë, Chris Wright, doli nga një takim i gjatë në Shtëpinë e Bardhë me drejtues të kompanive të naftës, pa pasur në dukje ndonjë marrëveshje të madhe nga ana e kompanive për të investuar miliarda dollarë në infrastrukturë të re nafte në vend.

I pyetur nëse kompanitë e naftës kishin bërë ndonjë angazhim konkret, Wright i tha CNN-it se kishte “interesim të jashtëzakonshëm”, por nuk konfirmoi se ishte arritur ndonjë marrëveshje.

Wright tha se Chevron, kompania e fundit amerikane që operon në Venezuelë, u ka thënë zyrtarëve federalë se sheh një “rrugë për të rritur prodhimin e saj me 50 për qind në 18 deri në 24 muajt e ardhshëm”, por pa u angazhuar financiarisht për këtë.

Më herët gjatë takimit, presidenti amerikan, Donald Trump deklaroi se kompanitë e naftës do të investonin “të paktën 100 miliardë dollarë nga paratë e tyre” për të ndërtuar dhe zhvilluar infrastrukturën e naftës në Venezuelë.

Wright tha se kjo shumë parash do të ishte ajo që nevojitet për të rritur industrinë e naftës së vendit gjatë dekadës së ardhshme, nëse Venezuela “është paqësore dhe bëhet një shtet më funksional ligjërisht, me një mjedis më të mirë operimi”.

Ndryshe, Venezuela ka rezerva të provuara të naftës prej rreth 300 – 303 miliardë fuçi, që e vendosin si rezervat më të mëdha të naftës në botë - rreth 17 për qind të rezervave globale.

Në vlerë monetare, nëse llogaritet vetëm në bazë të çmimeve aktuale të naftës (rreth 57 – 60 dollarë për fuçi), këto rezervë mund të arrijnë rreth 17 – 18 trilionë dollarë ose edhe më shumë, në varësi të çmimeve në treg. /Telegrafi/

Turqia po shqyrton mundësinë e bashkimit me Arabinë Saudite dhe Pakistanin në një aleancë të re mbrojtëse, të modeluar sipas NATO-s, bëjnë të ditur mediat turke. Ky zhvillim pritet të sjellë një “arkitekturë të re sigurie” dhe të ketë ndikim të konsiderueshëm në ekuilibrat rajonalë.

Raportimet tregojnë se bisedimet për përfshirjen e Ankarasë kanë hyrë në një fazë të avancuar dhe se arritja e një marrëveshjeje është shumë e mundshme. Nisma vjen pas nënshkrimit, në muajin shtator, të një pakti mbrojtës mes Arabisë Saudite dhe Pakistanit, i cili parashikon se çdo sulm ndaj njërës palë do të konsiderohet si agresion ndaj të gjithëve – një parim që pasqyron drejtpërdrejt Neninin 5 të NATO-s.

Sipas burimeve të afërta me negociatat, Turqia e sheh këtë aleancë si një mjet për të rritur sigurinë kombëtare dhe për të penguar kërcënimet potenciale. Ky orientim lidhet edhe me dyshimet në rritje mbi besueshmërinë e Shteteve të Bashkuara dhe paqartësitë rreth angazhimit të presidentit Donald Trump ndaj NATO-s, organizatë ku Turqia ka qenë anëtare për dekada.

Eksperti i sigurisë Nihat Ali Ozcan nga instituti TEPAV në Ankara vlerëson se të tre shtetet do të përfitonin ndjeshëm nga një bashkëpunim i tillë, duke marrë parasysh asetet strategjike që secili sjell.

Arabia Saudite kontribuon me kapacitete të mëdha financiare falë pasurisë së saj energjetike; Pakistani është i vetmi shtet mysliman i pajisur me armë bërthamore, raketa balistike dhe një ushtri të konsiderueshme; ndërsa Turqia ofron përvojë të gjerë luftarake dhe një industri ushtarake të avancuar, veçanërisht në fushën e dronëve, si Bayraktarët. “Ndryshimet në dinamikat rajonale po i detyrojnë shtetet të kërkojnë forma të reja të partneriteteve të sigurisë,” thekson Ozcan, shkruan bloomberg.

Përfshirja e mundshme e Turqisë në këtë pakt sinjalizon gjithashtu një fazë të re në marrëdhëniet mes Ankarasë dhe Riadit. Pas shpërthimit të Pranverës Arabe në vitin 2011, Turqia u rreshtua me Katarin dhe mbështeti Vëllazërinë Myslimane, çka solli përplasje me Arabinë Saudite, e cila e shpalli këtë lëvizje organizatë terroriste në vitin 2014.

Tensionet kulmuan gjatë bllokadës së Katarit në vitin 2017, të udhëhequr nga Riadi. Megjithatë, vitet e fundit janë shënuar hapa të dukshëm afrimi. Si tregues i këtij normalizimi, Ministria turke e Mbrojtjes konfirmoi se forcat detare të Turqisë dhe Arabisë Saudite zhvilluan këtë javë takimin e tyre të parë në Ankara.

Nga ana tjetër, për Pakistanin kjo aleancë vjen në një moment delikat. Pas përplasjes së shkurtër me Indinë në muajin maj dhe rritjes së tensioneve me qeverinë talebane në Afganistan në tetor, Islamabadi po kërkon mbështetje më të fortë strategjike. Autoritetet pakistaneze akuzojnë Indinë dhe Afganistanin se po mbështesin degën pakistaneze të Talibanëve (TTP), e cila ka shtuar sulmet brenda vendit, përfshirë edhe sulmet e fundit vetëvrasëse kundër një gjykate në Islamabad. /Telegrafi/

Protestat në Iran morën një kthesë të rëndë gjatë natës të së premtes, kur demonstrues të dhunshëm në lagjen Saadat Abad të Teheranit i vunë zjarrin xhamisë Al‑Rasool dhe dogjën disa vetura civile, raportojnë mediat lokale.

Sipas burimeve zyrtare, ngjarjet kaluan nga protesta paqësore në shkatërrim të pronës publike dhe private.

Xhamia u dogj pranë sheshit Shahid Tehrani Moghaddam, ndërsa dëshmitarët thanë se veprimi nuk ishte vetëm simbolik, por një sulm i drejtpërdrejtë ndaj objektit fetar dhe sigurisë publike.

Autoritetet iraniane, ndërkohë, mohojnë raporte për trazira në qendër të kryeqytetit dhe thonë se situata atje është nën kontroll, por në periferi ka vijuar përleshje dhe incidente të shpërndara në lagje të ndryshme si Tehranpars, Jannat Abad, Pasdaran dhe Nizam Abad.

Në reagimet e tyre, forcat e sigurisë iraniane i kanë cilësuar grupet që djegin xhaminë dhe shkaktojnë trazira si “terroristë” dhe kanë paralajmëruar se nuk do të ketë tolerancë ndaj atyre që identifikohen si të tillë, duke theksuar se do të mbrojnë jetën dhe pronën e qytetarëve.

Ndryshe, protestat në shtetin iranian kanë shpërthyer si pasojë e gjendjes ekonomike dhe sociale. /Telegrafi/

— (@)

Ndërsa forcat kubane pësuan humbje të rënda duke mbrojtur presidentin e Venezuelës, Nicolas Maduro, raportet tregojnë se njësitë elitare ruse, të dërguara për të njëjtin mision, janë tërhequr pa ofruar rezistencë, duke ngritur pikëpyetje serioze mbi rolin real të Moskës në Venezuelë.

Sipas burimeve të cituara nga media ndërkombëtare, kontingjenti rus në Karakas ishte më i madh dhe më me ndikim sesa ishte bërë e ditur publikisht. Ai përbëhej nga mbi 120 operativë të lidhur me shërbimet ushtarake ruse, përfshirë specialistë të luftës elektronike, dronëve dhe mbikëqyrjes teknologjike, shumë prej të cilëve kishin përvojë luftarake në Ukrainë.

Ndryshe nga forcat kubane, të cilat u përfshinë drejtpërdrejt në mbrojtjen e presidentit venezuelas dhe pësuan humbje, njësitë ruse nuk ndërmorën asnjë veprim ushtarak kur nisi operacioni amerikan. Raportohet se ato u tërhoqën nga pozicionet kyçe, ndërprenë komunikimet dhe shmangën çdo përplasje të drejtpërdrejtë.

Kontingjenti rus drejtohej nga gjenerali Oleg Makarevich, oficer që më herët ishte përfshirë në operacione të pasuksesshme në Ukrainë dhe që, sipas analistëve, ishte dërguar në Venezuelë jo si promovim, por si formë margjinalizimi brenda strukturave ushtarake ruse.

Një tjetër element domethënës është fakti se Rusia kishte nisur evakuimin e familjeve të diplomatëve të saj nga Karakasi disa javë përpara zhvillimeve ushtarake, çka sugjeron se Moska parashikonte përshkallëzimin e situatës dhe kishte zgjedhur të minimizonte përfshirjen e drejtpërdrejt.

Këto zhvillime kanë nxitur akuza për “tradhti strategjike”, duke theksuar kontrastin e fortë mes sakrificës së forcave kubane dhe tërheqjes së qetë të njësive ruse. Analistët vlerësojnë se rasti i Venezuelës tregon kufijtë e gatishmërisë së Rusisë për t’u përballur drejtpërdrejt me Shtetet e Bashkuara jashtë zonave të saj prioritare. /Telegrafi/

Kur temperaturat bien shumë, është normale që xhamat e veturës të ngrijnë, por ndonjëherë akulli formohet edhe nga brenda, gjë që mund t’ju habisë.

Megjithatë, kjo zakonisht nuk është problem i madh dhe mund të zgjidhet me pak kujdes. Shkaku kryesor është lagështia brenda veturës.

Për shembull, tapetët e lagur nga dëbora që hyn nga këpucët shkaktojnë lagështi që avullohet në ajër.

Kur temperatura bie nën zero gjatë natës, kjo lagështirë kondensohet mbi xham dhe më pas ngrin.

Si ta parandaloni ose trajtoni problemin:

Nëse tapetët janë të lagur, nxirrini jashtë dhe lërini të thahen në ambient të brendshëm.

Hiqni çdo rrobë apo send tjetër të lagur që mund të shkaktojë lagështi brenda veturës.

Tek veturat me izolim të dobët, xhamat mund të ngrijnë brenda edhe pasi të keni tharë sendet. Në këtë rast, hapni dyert dhe ndizni ventilimin, duke drejtuar ajrin drejt xhamit të përparmë. Pastaj pastroni xhamin me një leckë të thatë.

Mos përdorni sprej për shkrirje brenda kabinës, sepse nuk është i shëndetshëm për mjedisin e brendshëm të veturës.

Në thelb, ky problem shkaktohet nga lagështia e tepërt brenda veturës, e cila kondensohet mbi xhamat e ftohtë dhe ngrin gjatë natës. Zgjidhja është e thjeshtë: hiqni burimet e lagështisë dhe ventiloni kabinën përpara se temperaturat të bien shumë. /Telegrafi/

Udhëheqja shtetërore e Serbisë ishte e ftuar në një program të televizionit Informer, ku u argëtuan me këngë që i interpretoi një person i dënuar për vrasje.

Në vend që të ishte një program në frymën e festës së Krishtlindjeve ortodokse, ngjarja më shumë dukej si një tubim partiak me këngë me përmbajtje ofenduese dhe elemente që lidhen me ideologjinë serbomadhe.

Në program ishin prezentë zyrtarë të lartë, përfshirë presidentin e Serbisë, Aleksandar Vuçiq, kryetaren e parlamentit, Ana Brnabiq, ministrin e Brendshëm, Ivica Daçiq dhe disa ministra të tjerë.

I ftuari që këndoi për liderët e shtetit serb dhe zyrtarët e tjerë ishte Dragan Ashanin, këngëtar i cilësuar si “vrasës i dënuar”.

Ashanin ishte dënuar në vitin 1992 me 12 vjet burg për vrasjen e të dashurës së tij, Jasmina Gjorgjeviq - të cilën e qëlloi me tre plumba para syve të vëllait të saj 12‑vjeçar.

Ndryshe, televizioni Informer, që e transmetoi programin, shpesh publikon përmbajtje propagandistike dhe jo të saktë, dhe fakti që një kriminel i dënuar u ftua për të argëtuar elitën shtetërore u konsiderua si një shembull i papërgjegjshmërisë ndaj publikut, sidomos duke pasur parasysh debatet rreth patriarkalizmit dhe dhunës ndaj grave në rajon. /Telegrafi/

— (@)

Presidenti amerikan, Donald Trump të premten tha se SHBA po ndjek nga afër situatën në Iran.

Ai paralajmëroi udhëheqësit iranianë që të mos përdorin dhunë ndaj demonstruesve.

“Dhe përsëri, u them liderëve iranianë, më mirë mos filloni të qëlloni, sepse edhe ne do të fillojmë të qëllojmë”, tha lideri amerikan gjatë një takimi me drejtues të industrisë së naftës në Shtëpinë e Bardhë.

Por ai shtoi se kjo nuk do të thotë “trupa amerikane në terren”, raporton cnn.

“Nëse ata fillojnë të vrasin njerëz siç kanë bërë në të kaluarën, ne do të përfshihemi. Kjo nuk do të thotë trupa në terren, por do të thotë goditje shumë, shumë të forta aty ku i dhemb”, tha 79-vjeçari.

Duke komentuar protestat, ai tha se “Irani ka probleme të mëdha”.

“Më duket se njerëzit po marrin kontrollin e disa qyteteve që askush nuk mendonte se ishin të mundshme vetëm disa javë më parë”, tha presidenti.

Trump nuk specifikoi për cilat qytete po fliste. Nuk është e qartë nëse protestuesit kanë marrë kontrollin e ndonjë qyteti iranian. /Telegrafi/

Banorët në mbarë Midlandsin Perëndimor të Britanisë së Madhe u përballën me një pamje të pazakontë të enjten mbrëma, kur qielli u ngjyros me një rozë të ndritshme.

Fenomeni ngjalli kureshtje dhe konfuzion, duke bërë që shumë njerëz të ndanin fotografi në rrjetet sociale dhe të pyesnin veten për shkakun e kësaj pamjeje të rrallë. Disa e lidhën atë me një perëndim të bukur dielli, ndërsa të tjerë hamendësuan se mund të ishin Dritat Veriore, raportoi BBC.

Megjithatë, shpjegimi rezultoi të ishte shumë më i thjeshtë. Klubi i Futbollit Birmingham City bëri të ditur se drita rozë ishte shkaktuar nga ndriçimi LED i stadiumit të tyre, St Andrew’s.

— (@)

Klubi ndau një fotografi të qiellit rozë në llogarinë e tij në rrjetin social X, të shoqëruar me mbishkrimin “Qielli rozë natën, kënaqësi për Blues”. Pamje të ngjashme u raportuan jo vetëm mbi Birmingham, por edhe në qytete përreth, përfshirë Hednesford në Staffordshire.

Meteorologu i BBC-së, Simon King, shpjegoi se retë e dendura dhe reshjet e borës ndihmuan që qielli të merrte këtë ngjyrë të veçantë.

“Bora dhe retë reflektojnë dritat nga rrugët, ndërtesat dhe stadiumet”, tha ai.

Ndërkohë, Graham Madge nga Zyra Meteorologjike sqaroi se bora shpërndan më shumë dritën blu, duke bërë që ngjyrat e kuqe dhe rozë të duken më të theksuara në qiell.

Në fund, qielli rozë nuk ishte një mrekulli natyrore, por një kombinim i ndriçimit të stadiumit dhe kushteve atmosferike me dëborë. Megjithatë, për shumë banorë, pamja mbeti mbresëlënëse dhe e pazakontë. /Telegrafi/

“Nuk mund të shpjegohet me fjalë kamioni që u shfaq në Budapest, këtë duhet ta shihni!”, kështu komentojnë qytetarët kur panë këtë automjet unik.

Por ajo që e bën ngjarjen edhe më të çuditshme është mikseri interesant për beton, i vendosur në pjesën e pasme të automjetit, duke e bërë pamjen edhe më të papritur dhe të paharrueshme.

Shumë prej tyre kanë ndaluar për të bërë foto dhe video, të cilat më pas janë shpërndarë në rrjetet sociale.

“Na vërtet intereson se cila është historia pas kësaj”, thanë disa nga dëshmitarët, duke shtuar kureshtjen për funksionin dhe origjinën e këtij automjeti të pazakontë.

Ngjarje të tilla bëjnë që qyteti të duket më i gjallë dhe tregojnë se herë pas here, inovacionet dhe ide të çuditshme mund të shfaqen në vendet më të papritura. /Telegrafi/

Nintendo ka prezantuar variantet e para të ngjyrave për kontrolluesit Joy‑Con 2 të Nintendo Switch 2 — një lëvizje që do t’u japë lojtarëve mundësi të personalizojnë më shumë pamjen e sistemit të tyre.

Kontrolluesit do të jenë në ngjyrë të gjelbër të çelët (light green) dhe vjollcë të çelët (light purple), dhe pritet të dalin më 12 shkurt, njëkohësisht me prezantimin e video-lojës Mario Tennis Fever.

Të dy setet janë tani të disponueshme për para‑porosi me çmim rreth 100 dollarë dhe vijnë me kordonët për dore që përputhen me ngjyrat e kontrolluesve.

Përveç ngjyrës, këta janë kontrollues standardë Joy‑Con 2 me kontroll lëvizjesh, HD vibrim dhe butonin “C” për GameChat, si dhe funksione të tjera të përparuara që përfshihen me sistemin Switch 2.

Një veçanti e re e këtyre variantëve është se ngjyrat janë vendosur kryesisht në shinat e brendshme dhe rreth levave analogë, prandaj ato mund të jenë më pak të dukshme kur kontrolluesit janë të lidhur me konsolën, në krahasim me variantet e mëparshme të Joy‑Con që kishin gjithë sipërfaqen e jashtme me ngjyra.

Përveç prezantimit të kontrolluesve të rinj, Nintendo ka publikuar edhe një video të gjatë “gameplay” për Mario Tennis Fever, e cila gjithashtu do të dalë më 12 shkurt. /Telegrafi/

Partitë politike të Grenlandës shfaqën një qëndrim të përbashkët në përgjigje të pretendimeve të presidentit të SHBA‑s, Donald Trump, për ishullin e madh arktik.

Në një deklaratë të nënshkruar nga pesë parti në parlamentin grenlandez, u theksua se të ardhmen e vendit duhet ta vendosë vetë populli i Grenlandës, jo Shtetet e Bashkuara, raporton france24.

Partitë i kërkuan SHBA‑ve që të ndalojnë qasjen e tyre të “mungesës së respektit” ndaj tokës grenlandeze, duke insistuar se Grenlanda nuk është për “blerje” apo sundim të huaj.

Presidenti amerikan, Donald Trump ka ripërsëritur pretendimet rreth Grenlandës, duke thënë se SHBA-ja duhet të veprojë për të parandaluar që Kina apo Rusia të marrin kontrollin e këtij territori strategjik.

Ai deklaroi se synon të arrijë këtë qëllim “në një mënyrë më të lehtë”, por shtoi se nëse nuk arrijnë kështu, do ta bëjnë “në një mënyrë më të vështirë”.

Fjala e tij ka shkaktuar shqetësim ndërkombëtar, pasi ai nuk ka përjashtuar mundësinë e përdorimit të forcës ushtarake apo presionit ekonomik për të arritur objektivin e tij.

Grenlanda është një territor me rreth 57 mijë banorë dhe është nën sovranitetin e Danimarkës, një aleat i NATO‑s, e cila ka hedhur poshtë këto pretendime. /Telegrafi/

Protestues iranianë i vunë flakën ndërtesës së Bashkisë së rajonit Karaj.

E gjithë ndërtesa e qeverisjes vendore në qytetin verior iranian të Karajt është aktualisht e përfshirë nga flakët, duke shkaktuar dëme të mëdha materiale.

Ngjarja ndodhi në kuadër të protestave të vazhdueshme kundër qeverisë, të cilat po përshkallëzohen gjithnjë e më shumë në disa qytete të vendit.

Sipas raportimeve, protestuesit shprehën zemërimin e tyre ndaj autoriteteve përmes akteve të dhunshme dhe përplasjeve me forcat e sigurisë.

Situata në Karaj mbetet e tensionuar, ndërsa protestat antiqeveritare duket se janë në prag të përhapjes në shkallë të gjerë në mbarë Iranin, duke rritur frikën për destabilizim të mëtejshëm dhe ndërhyrje të ashpra nga autoritetet shtetërore.

Ndryshe, protestat në shtetin iranian kanë shpërthyer shkaku i pakënaqësive me gjendjen ekonomike dhe sociale në vend. /Telegrafi/

— (@)

Presidenti amerikan Donald Trump u pyet së fundmi nëse do të mund të urdhëronte kapjen e presidentit rus, Vladimir Putin - një skenar i ngjashëm me liderin e Venezuelës, Nicolas Maduro.

Trump u përgjigj se nuk e konsideronte të nevojshme një veprim të tillë.

“Kam pasur gjithmonë një marrëdhënie relativisht të mirë me Putinin, por gjithashtu shprehu zhgënjimin tim mbi situatën aktuale të luftës në Ukrainë”, tha ai.

Lideri amerikan sërish deklaroi se ka ndalur tetë lufta në botë, por kësaj radhe nuk tregoi se cilat konflikte.

Deklarata e 79-vjeçarit vjen ndërsa tensionet mes SHBA-së dhe Rusisë mbeten të larta, duke ngritur pyetje mbi strategjinë dhe qëndrimin e administratës amerikane ndaj konfliktit Ukrainë-Rusi.

Ndryshe, Maduro tashmë gjendet në qelitë e paraburgimit në New York, ku pritet të nis gjykimi për narko-terrorizëm. /Telegrafi/

— (@)

Sekretari amerikan i Shtetit, Marco Rubio, ka zbuluar tre fazat kryesore të planit të SHBA-së për Venezuelën.

Ai ka deklaruar se këto hapa do ta çojnë vendin e Amerikës së Jugut drejt stabilitetit dhe normalitetit ekonomik.

Sipas Rubios, faza e parë është ajo e stabilizimit, ku Shtëpia e Bardhë po bashkëpunon me autoritetet për të siguruar një “treg për shitjen” e naftës venezuelase, që do të përfitojnë si SHBA ashtu edhe vetë Venezuela, raporton skynews.

Faza e dytë, sipas tij, është rimëkëmbja ekonomike, ku paratë do të shkojnë në dobi të qytetarëve dhe do të nisë një proces pajtimi brenda vendit. Rubio nuk dha detaje të hollësishme për mënyrën se si do të zhvillohet ky proces.

Faza e tretë parashikon kalimin në operacione normale, duke kthyer Venezuelën në një “vend normal” dhe duke krijuar marrëdhënie të forta ekonomike dhe diplomatike midis dy vendeve. Sekretari i Shtetit shtoi se kjo do të parandalojë që armiqtë e Uashingtonit të kenë ndonjë “themeli” në vend, ndërsa Venezuela do të mbështesë interesat e SHBA-së.

Ndryshe, presidenti i venezuelas, Nicolas Maduro, u kap më 3 janar 2026 gjatë një operacioni të forcuar ushtarak të Shteteve të Bashkuara në Venezuelë.

Në kuadër të kësaj ndërhyrjeje, Maduro dhe gruaja e tij u arrestuan dhe u dërguan më pas në New York për t’u përballur me akuza për trafik droge dhe “narko‑terrorizëm”. /Telegrafi/

- YouTube www.youtube.com

Fenomeni La Niña po humbet fuqinë, sinjal për ndryshime të mëdha klimatike në 2026.

Fenomeni La Niña, që ka ndikuar dukshëm në kushtet klimatike globale gjatë muajve të fundit, po dobësohet shpejt mbi pjesën tropikale të Oqeanit Paqësor.

Të dhënat më të fundit nga oqeani dhe atmosfera tregojnë se anomalitë e ftohta në Paqësor po zbehen, sidomos në pjesën perëndimore, çka tregon se gjatë vitit 2026 mund të ndodhin ndryshime të rëndësishme në sistemin global të motit, shkruan Severe Weather.

Edhe pse ndikimi i La Niñës mbi atmosferën do të vazhdojë gjatë pjesës së parë të dimrit dhe në fillim të pranverës, modelet afatgjata tregojnë gjithnjë e më qartë një kalim drejt fenomenit El Niño, i cili mund të fillojë që gjatë verës dhe të konsolidohet plotësisht deri në vjeshtë.

Ky ndryshim ka pasoja të rëndësishme për Evropën, përfshirë edhe Kroacinë, veçanërisht në kontekstin e dimrit 2026/2027.

Çfarë janë La Nina dhe El Nino?

La Niña dhe El Niño janë pjesë e sistemit klimatik të njohur si ENSO, i cili përshkruan alternimin e fazave të ftohta dhe të ngrohta në Paqësorin ekuatorial.

Edhe pse këto procese ndodhin larg Evropës, ato ndikojnë fuqishëm në shpërndarjen e zonave me presion të lartë dhe të ulët në atmosferë, si dhe në drejtimet e rrjedhave të mëdha ajrore që formojnë motin në hemisferën veriore.

Gjatë La Niñës, forcohen erërat e përhershme lindore pranë ekuatorit, të cilat shtyjnë ujin e ngrohtë sipërfaqësor drejt perëndimit të Paqësorit, ndërsa uji më i ftohtë nga thellësia del në sipërfaqe. Por javët e fundit, ky model ka filluar të ndryshojë.

Në pjesën perëndimore dhe qendrore të Paqësorit po zhvillohet një erë e fortë perëndimore, që nxit ngrohjen e sipërfaqes së oqeanit dhe shkatërron shtresën e ftohtë të ujit tipike për La Niñan.

Shenjat e ndryshimit

Analizat e temperaturës së detit tregojnë se anomalitë e ftohta po zhvendosen nga perëndimi drejt lindjes, dhe kjo po ndodh më herët se zakonisht për ngjarje të tilla.

Në të njëjtën kohë, nën sipërfaqen e oqeanit, në thellësi rreth 100–250 metra, po përhapet një “pishinë” e madhe uji të ngrohtë. Ky ngrohje nëntokësore është një nga shenjat e para dhe më të besueshme të ardhjes së fenomenit El Niño.

Megjithatë, efektet atmosferike të La Niñës nuk zhduken menjëherë.

Atmosfera reagon më ngadalë se oqeani, prandaj ndikimi i saj mund të ndihet edhe disa muaj pas ngrohjes së sipërfaqes së detit. Për këtë arsye, pritet që La Niña të ndikojë të paktën gjatë pjesës së hershme të pranverës 2026.

Ndikimi mbi Evropën dhe Ballkanin

Gjatë kësaj periudhe, sipas mesatareve afatgjata, në Evropë vërehet një trend më i ngrohtë në pjesët perëndimore dhe perëndim-qendrore të kontinentit.

Ky fenomen lidhet me presionin më të ulët mbi Atlantikun e Veriut, i cili forcon rrjedhjen perëndimore drejt Evropës.

Një qarkullim i tillë zakonisht sjell ajër më të butë, temperatura të moderuara dhe më pak depërtim të ajrit të ftohtë kontinentale nga lindja, duke ndikuar kështu edhe në dimrin e ardhshëm në Ballkan.

Çfarë sjell gjysma e dytë e vitit 2026?

Ndryshimi kryesor pritet në gjysmën e dytë të vitit. Të gjitha modelet sezonale relevante bien dakord se La Niña do të përfundojë relativisht shpejt, dhe se fenomeni El Niño mund të fillojë që gjatë verës 2026.

Deri në fillim të vjeshtës, pritet që të formohet plotësisht faza e ngrohtë e ENSO-s, e cila mund të arrijë kulmin gjatë dimrit 2026/2027, me mundësi që ndikimi i saj të zgjasë edhe më gjatë.

Për Evropën, El Niño zakonisht sjell ndryshime më të theksuara në qarkullimin mbi Atlantikun e Veriut. Të dhënat historike tregojnë se dimrat e tillë shpesh karakterizohen nga kushte të paqëndrueshme të motit, ciklone më të forta dhe kontraste më të mëdha temperaturash.

Një element veçanërisht i rëndësishëm është se gjatë dimrit me El Niño shpesh formohet një “korridor i ajrit të ftohtë”, që mund të shtrihet nga pjesa jugore e Mbretërisë së Bashkuar, përmes Evropës Qendrore, deri në juglindje të kontinentit.

Përgjatë këtij korridori të ajrit të ftohtë, rritet potenciali për reshje bore, duke përfshirë edhe pjesët qendrore të Evropës. Ky model mund të prekë herë pas here edhe Evropën Juglindore, duke rritur mundësinë për borë dhe depërtime të theksuara të ajrit të ftohtë drejt Ballkanit.

Dimër dinamik 2026/2027

Për Ballkanin, një zhvillim i tillë do të nënkuptonte një dimër më dinamik, me mundësi më të mëdha për borë në brendësi të vendit, ndryshime më të shpeshta midis periudhave më të ngrohta dhe më të ftohta, si dhe situata ciklonale më të shprehura mbi detin Adriatik. Në vend të stabilitetit të gjatë, ka më shumë gjasa për ndryshime të papritura të motit.

Edhe pse është ende herët për parashikime të detajuara, drejtimi i zhvillimit është i qartë: La Niña po dobësohet më shpejt se pritej, oqeani po ngrohet, dhe atmosfera do të ndjekë gradualisht këtë sinjal gjatë vitit 2026.

Pranvera do të ruajë ende shenjat e La Niñës, por vera dhe vjeshta hapin rrugën për El Ninon, i cili mund të ndikojë fort në dimrin 2026/2027 në Evropë, përfshirë edhe Ballkanin. /Telegrafi/

Shumë protestues në Iran kanë bërë thirrje për rikthimin e Reza Pahlavit, djalit në mërgim të shahut (mbretit) të fundit të Iranit.

Vetë Pahlavi ka inkurajuar njerëzit që të dalin në rrugë. Por kush është ish-princi i kurorës dhe sa mbështetje ka ai?

I përgatitur që nga fëmijëria për të trashëguar fronin e Pallatit të Iranit, Reza Pahlavi po ndiqte trajnimin si pilot luftarak në Shtetet e Bashkuara kur revolucioni i vitit 1979 rrëzoi monarkinë e babait të tij.

Ai e ndoqi nga larg derisa i ati, Mohammad Reza Shah Pahlavi — dikur i mbështetur nga aleatët perëndimorë — kërkonte strehë në vende të tjera dhe më pas vdiq nga kanceri në Egjipt, raporton bbc.

Humbja e papritur e pushtetit la princin e ri të kurorës dhe familjen e tij pa shtetësi, të varur nga një rreth gjithnjë e më i vogël monarkistësh dhe dashamirësish në mërgim.

Në dekadat që pasuan, tragjedia goditi familjen më shumë se një herë: motra dhe vëllai i tij më i vogël i dhanë fund jetës, duke e lënë Reza Pahlavin si kreun simbolik të një dinastie që shumëkush e mendonte tashmë se i përket historisë.

Tani, në moshën 65-vjeçare, ai po kërkon sërish një rol në formësimin e së ardhmes së vendit të tij.

Nga shtëpia e tij në një periferi të qetë pranë Uashingtonit, mbështetësit e përshkruajnë atë si një figurë me profil të ulët dhe të afrueshme - një vizitor i shpeshtë i kafeneve lokale, shpesh i shoqëruar nga bashkëshortja e tij, Yasmine, pa masa të dukshme sigurie.

Në vitin 2022, kur një kalimtar e pyeti nëse e shihte veten si udhëheqës të lëvizjes protestuese të Iranit, ai dhe Yasmine thuhet se u përgjigjën njëzëri “ndryshimi duhet të vijë nga brenda”.

Megjithatë, vitet e fundit toni i tij është bërë më vendimtar. Pas sulmeve ajrore izraelite në vitin 2025, që vranë disa gjeneralë të lartë iranianë, Pahlavi deklaroi në një konferencë për shtyp në Paris se ishte i gatshëm të ndihmonte në drejtimin e një qeverie kalimtare në rast se Republika Islamike do të shembej.

Që atëherë, ai ka prezantuar një plan 100-ditor për një administratë të përkohshme, sipas raportimeve të Telegrafit.

Pahlavi këmbëngul se ky vetëbesim i ri buron nga mësimet e nxjerra gjatë mërgimit dhe nga ajo që ai e quan “misioni i papërfunduar” që i la pas babai i tij.

“Kjo nuk ka të bëjë me rikthimin e së kaluarës. Ka të bëjë me sigurimin e një të ardhmeje demokratike për të gjithë iranianët”, u shpreh ai para gazetarëve në Paris.

Pahlavi ka tërhequr vëmendje të re në vitet e fundit. Thirrjet “Reza Shah, qoftë shpirti yt i bekuar” - një referencë për gjyshin e tij - u dëgjuan sërish gjatë protestave kundër qeverisë në vitin 2017.

Vrasja e Mahsa Aminit gjatë paraburgimit policor në vitin 2022 ndezi demonstrata kombëtare, duke e rikthyer Pahlavin në qendër të medias.

Përpjekjet e tij për të bashkuar opozitën e fragmentuar të Iranit tërhoqën interes të kujdesshëm ndërkombëtar, por në fund nuk arritën të ruanin momentumin. Kundërshtarët argumentojnë se ai ende nuk ka krijuar një organizatë të qëndrueshme ose një medium të pavarur, pas katër dekadash në mërgim.

Një vizitë e kontestuar në Izrael në vitin 2023, gjatë së cilës Pahlavi mori pjesë në një ngjarje përkujtimore për Holokaustin dhe takoi kryeministrin Benjamin Netanyahu, polarizoi opinionin.

Disa iranianë e panë këtë si një qasje pragmatike, ndërsa të tjerë e konsideruan si një veprim që mund të largonte aleatët arabë dhe myslimanë të Iranit.

Pas sulmeve ajrore izraelite brenda Iranit, ai u përball me pyetje të vështira. Në një intervistë me Laura Kuenssberg të BBC-së, u pyet nëse mbështeste sulmet që rrezikonin jetët e civilëve.

Pahlavi theksoi se iranianët e zakonshëm nuk ishin objektivi dhe shtoi se “çdo gjë që dobëson regjimin” do të mirëpritej nga shumë brenda Iranit — një deklaratë që nxiti debat të ashpër.

Mbështetës dhe kritikë

- YouTubeyoutu.be

Sot, Pahlavi nuk e prezanton veten si një mbret në pritje, por si një figurë simbolike për pajtimin kombëtar.

Ai thotë se dëshiron të ndihmojë Iranin drejt zgjedhjeve të lira, sundimit të ligjit dhe të drejtave të barabarta për gratë — ndërkohë që vendimi përfundimtar mbi rikthimin e monarkisë ose krijimin e një republike i lihet një votimi kombëtar.

Mbështetësit e tij e shohin atë si të vetmin figurë opozitare me njohje ndërkombëtare dhe me një angazhim të gjatë për ndryshim paqësor.

Kritikët, nga ana tjetër, argumentojnë se ai mbetet tepër i varur nga mbështetja e huaj dhe vënë në dyshim nëse iranianët brenda vendit, të lodhur pas dekadash trazirash politike, janë gati t’i besojnë ndonjë udhëheqësi në mërgim.

Ndërkohë që qeveria e Iranit e paraqet atë si kërcënim, është e pamundur të matet mbështetja e tij e vërtetë pa një hapësirë të hapur politike dhe sondazhe të besueshme.

Disa iranianë ende respektojnë emrin e familjes së tij, ndërsa të tjerë frikësohen se të zëvendësosh një sundimtar të pazgjedhur me një tjetër, edhe nën maskën e demokracisë, mund të mos sjellë shumë ndryshim.

Trupi i babait të Pahlavit mbetet i varrosur në Kajro, duke pritur atë që monarkistët shpresojnë të jetë një rikthim simbolik në Iran një ditë.

Nëse princi i kurorës në mërgim do të shohë ndonjëherë atë ditë - ose një Iran të lirë - mbetet një nga shumë pyetjet pa përgjigje për një vend që ende përballet me të kaluarën e tij. /Telegrafi/

- YouTubewww.youtube.com

Presidenti amerikan, Donald Trump e hapi takimin me drejtues të kompanive të naftës duke folur, edhe një herë, për kapjen e Nicolas Maduro-s, udhëheqësit venezuelas, më 3 janar.

Më pas ai kalon te fokusi i takimit, industria e naftës e vendit të Amerikës së Jugut, raporton skynews.

“Do të diskutojmë se si këto kompani të mëdha amerikane mund të ndihmojnë në rindërtimin e shpejtë të industrisë së rrënuar të naftës së Venezuelës dhe të sjellin miliona fuçi prodhim nafte në dobi të Shteteve të Bashkuara, të popullit të Venezuelës dhe të mbarë botës”, deklaroi 79-vjeçar.

Lideri amerikan gjithashtu pretendon se SHBA-ja dje mori 4 miliardë dollarë naftë nga Venezuela – 30 milionë fuçi. Këto para, thotë ai, do të shkojnë kryesisht në SHBA dhe një pjesë në Venezuelë.

- YouTube www.youtube.com

Në vazhdimin e deklaratave të tij, Trump përshkroi se si po e vendos SHBA-në në radhë të parë në përpjekjet e tij lidhur me naftën venezuelase.

Ai pretendon se SHBA-ja “e ndërtoi të gjithë atë industri”, duke iu referuar industrisë së naftës të vendit të Amerikës së Jugut, dhe se tani i detyrohet, duke shtuar se “nëse e shikon, ne po marrim mbrapsht atë që na u mor. Ata na morën industrinë e naftës”.

Trump gjithashtu pretendon se Venezuela, nga e cila së fundmi u hoq udhëheqësi, ka rënë dakord që SHBA-ja të mund të fillojë “menjëherë” rafinimin dhe shitjen e deri në 50 milionë fuçi naftë të papërpunuar venezuelase, “gjë që do të vazhdojë pa afat”.

Nuk është e qartë se për çfarë periudhe kohore është rënë dakord kjo marrëveshje. /Telegrafi/