Një gjyq i rëndësishëm ka nisur në Los Angelos ku kompania të mëdha të mediave sociale - Meta (Facebook/Instagram), Snap (prind i Snapchat), TikTok dhe YouTube - janë paditur nga më shumë se 1600 palë, përfshirë familje dhe rajone shkollore, që pretendojnë se këto platforma janë projektuar qëllimisht për t’i bërë të varur njerëzit dhe dëmtojnë shëndetin mendor të fëmijëve dhe rinisë.

Në qendër të kësaj çështjeje është një 19-vjeçare, e identifikuar vetëm me inicialet KGM, e cila pretendon se përdorimi i medias sociale e bëri të varur dhe çoi në probleme serioze psikologjike.

Palët paditëse kërkojnë dëme financiare dhe ndryshime në mënyrën se si dizajnohen këto platforma, për të krijuar standarde sigurie që mbron përdoruesit e rinj, raporton thegruadian.

Pretendohet se dokumente të brendshme mund të shpalosin se kompanitë e dinin rrezikun e këtyre krijimeve, megjithatë i përdorën ato për të maksimalizuar kohën e qëndrimit të përdoruesve dhe fitimet nga reklamat.

Nga ana e tyre, kompanitë e përfshira kanë mohuar qëllimin për të shkaktuar dëm dhe thonë se kanë shtuar mjete sigurie dhe kontrolli për përdoruesit, duke argumentuar se shëndeti mendor është kompleks dhe nuk mund të fajësohen vetëm platformat.

Gjyqi, i cili pritet të zgjasë disa javë, mund të ndikojë në mënyrë të madhe si rregullohen mediat sociale, dhe mund të sfidojë mbrojtjet ligjore që normalisht mbrojnë kompanitë teknologjike në SHBA, si për shembull Neni 230 i Communications Decency Act. /Telegrafi/

Presidenti i Nigerisë, Bola Ahmed Tinubu, gjatë një vizite zyrtare në Turqi me ftesë të homologut Recep Tayyip Erdogan, pësoi një incident të vogël pas përfundimit të ceremonisë zyrtare të mirëseardhjes.

Teksa po largohej nga zona e ceremonisë, ai u pengua në tapetin e shtruar për pritjen dhe ra për një çast, duke shkaktuar shqetësim mes të pranishmëve.

Stafi i sigurisë dhe bashkëpunëtorët e tij reaguan menjëherë për ta ndihmuar, ndërsa presidenti u ngrit shpejt dhe vazhdoi programin pa pasoja serioze.

— (@)

Incidenti ndodhi pas ceremonisë protokollare dhe nuk ndikoi në agjendën zyrtare të vizitës, e cila synonte forcimin e marrëdhënieve dypalëshe mes Nigerisë dhe Turqisë.

Ndryshe, vëllimi i tregtisë dypalëshe arriti në 688.4 milionë dollarë (29.88 miliardë lira turke) gjatë 11 muajve të parë të vitit 2025. Kur përfshihet edhe tregtia e energjisë, Nigeria u bë partneri më i madh tregtar i Turqisë në Afrikën Subsahariane gjatë atij viti.

Më shumë se 50 kompani turke operojnë në Nigeri, me investime të vlerësuara rreth 400 milionë dollarë.

Turqia eksporton në Nigeri hekur dhe çelik, makineri, tekstile, produkte ushqimore dhe mobilie, ndërsa importon naftë të papërpunuar dhe produkte bujqësore. /Telegrafi/

Diana Bahador, e njohur në rrjetet sociale me emrin Baby Rider, ishte vetëm 19 vjeçe.

Ajo ishte një motoçikliste e apasionuar dhe blogere e re, e cila u qëllua për vdekje në mënyrë brutale nga forcat e sigurisë së regjimit islamik gjatë protestave në qytetin e Gorganit.

Diana u shndërrua në një simbol të fuqishëm të rezistencës dhe guximit, pasi sfidoi hapur ndalimin që u mohon grave të drejtën për të ngarë motoçikletë.

— (@)

Përmes këtij akti, ajo sfidoi jo vetëm ligjet shtypëse, por edhe frikën që regjimi përpiqet t’i imponojë shoqërisë iraniane.

Me gati 100 mijë ndjekës në rrjetet sociale, Diana përdori zërin dhe ndikimin e saj për të ngritur vetëdijen dhe për të kërkuar liri, barazi dhe një Iran pa shtypje.

Vrasja e saj është një tjetër dëshmi e dhunës së pamëshirshme që regjimi ushtron ndaj qytetarëve të vet, veçanërisht ndaj të rinjve dhe grave që guxojnë të flasin.

Diana është vetëm një nga dhjetëra mijëra civilë të paarmatosur që janë vrarë në Iran, teksa kërkonin ndryshim regjimi, drejtësi dhe një të ardhme më të lirë për vendin e tyre. /Telegrafi/

Një programues kinez ka ndërruar jetë në spital pasi u rrëzua pa ndjenja ndërsa po punonte nga shtëpia në fund të vitit të kaluar.

Gao Guanghui (emër i transliteruar), 32 vjeç, dyshohet se ka vdekur si pasojë e një arresti kardiak, gjë që e ka shtyrë familjen të besojë se shkaku i vdekjes ishte puna e tepruar.

Sipas mediave kineze, ai ishte promovuar së fundmi në pozitën e menaxherit të departamentit dhe, para vdekjes, kishte punuar vazhdimisht me orar të zgjatur.

Përveç detyrave të programimit, ai ishte përgjegjës edhe për menaxhimin dhe shërbimin ndaj klientëve pas shitjes, çka bënte që të kthehej vonë në shtëpi, ka treguar bashkëshortja e tij për mediat kineze.

Raportohet se Gao kishte qenë duke punuar më 29 nëntor, ditë e shtunë, raportojnë mediat.

“Ai tha se nuk ndihej shumë mirë dhe donte të ulej pak në dhomën e ndenjjes për të përfunduar disa punë”, ka deklaruar një anëtar i familjes.

Ai humbi ndjenjat dhe u dërgua me urgjencë në spital, por ndërroi jetë pavarësisht përpjekjeve për ta reanimuar.

Gao u shpall i vdekur rreth orës 13:00 të asaj dite, por familja pretendon se ai vazhdonte të merrte mesazhe nga kolegët në një grup në WeChat edhe ndërsa po luftonte për jetën.

Sipas një anëtari të familjes, atij i ishte kërkuar të përpunonte porosi dhe të përfundonte detyra urgjente që duhej të dorëzoheshin të hënën në mëngjes.

Familja e Gaos ka aplikuar më pas për kompensim nga shteti për dëmtim të lidhur me punën, por ende nuk ka marrë asnjë përgjigje.

Bashkëshortja e tij ka kërkuar gjithashtu kthimin e sendeve personale nga vendi i punës, por ka pretenduar se disa prej tyre ishin hedhur tashmë, ndërsa ato që iu dorëzuan nuk ishin paketuar siç duhet. /Telegrafi/

Presidenti ukrainas, Volodymyr Zelenski, u shpreh para mediave vendase se ka arritur një marrëveshje me presidentin amerikan, Donald Trump, për furnizimin e Ukrainës me raketa për sistemet e mbrojtjes kundërajrore të tipit Patriot.

Duke iu përgjigjur pyetjeve të mediave ukrainase, Zelenski theksoi se është i kënaqur me marrëveshjen e arritur me liderin amerikan gjatë takimit në Davos.

“Kam biseduar me presidentin Trump dhe kam marrë, nuk do të them sa, raketa PAC-3 për sistemin Patriot”, deklaroi ai për Ukrinform.

Çfarë dihet për takimin e parë trepalësh Ukrainë, SHBA dhe Rusi?

Sipas Zelenskyt, në Davos u diskutua edhe për modele të zgjidhjes së çështjeve globale, duke përcaktuar detyra konkrete për secilin shtet që mund të japë një kontribut pozitiv.

“Folëm për tema globale, por zgjidhëm edhe një çështje që jep qartë përgjigje se pse shkova atje”, u shpreh ai.

Ndërkohë, dje kanë nisur për herë të parë që nga fillimi i agresionit rus ndaj Ukrainës bisedimet trepalëshe mes Shteteve të Bashkuara të Amerikës, Ukrainës dhe Rusisë. /Telegrafi/

Ministri i Jashtëm turk, Hakan Fidan, paralajmëroi të premten se ekzistojnë shenja që Izraeli po kërkon një mundësi për të sulmuar Iranin, dhe tha se gjatë vizitës së tij të fundit në Teheran i ka shprehur udhëheqësve iranianë shqetësimin e Ankarasë për një sulm të mundshëm dhe destabilizim të përgjithshëm të rajonit.

Fidan, në një intervistë për televizionin turk NTV, theksoi se ka tregues që Izraeli “veçanërisht po kërkon një mundësi për të goditur Iranin”.

Në pyetjen shtesë nëse kjo vlerësim i referohet edhe Shteteve të Bashkuara të Amerikës, ai nënvizoi se veçanërisht Izraeli shihet si aktor që kërkon një mundësi të tillë.

- YouTube www.youtube.com

Shefi i diplomacisë turke tha se shqetësimi për një sulm të mundshëm iu është shprehur drejtpërdrejt zyrtarëve iranianë gjatë vizitës së tij të fundit në Teheran.

“Kur shkova këto ditë në Teheran, si mik i tyre u thashë gjithçka për këtë proces. Dhe e dini, miku thotë të vërtetat e hidhura”, tha kryediplomati turk.

Trump: Një flotë e madhe amerikane po lëviz drejt Iranit, por do ta doja që të mos ndodhte asgjë

Paralajmërimet e Fidanit erdhën pas bisedës telefonike të presidentit turk, Recep Tayyip Erdogan, me homologun iranian, Masoud Pezeshkian, gjatë së cilës Erdogan theksoi se Turqia është kundër çdo ndërhyrjeje të huaj në Iran dhe se vlerëson paqen dhe stabilitetin e fqinjit të saj.

Nga ana tjetër, të premten një zyrtar i lartë iranian i tha agjencisë Reuters se Teherani çdo sulm nga armiqtë e tij do ta konsiderojë “si luftë totale kundër nesh”. Kjo ka ashpërsuar më tej retorikën në një luftë fjalësh gjithnjë e më të tensionuar mes Uashingtonit dhe udhëheqësve iranianë. /Telegrafi/

Në rrugët tona ky sinjal nuk gjendet, dhe nuk përdoret as në pjesën tjetër të Evropës.

Ai mund të gjendet vetëm në Amerikën e Jugut, më saktë në Argjentinë. Por cili është funksioni i tij?

Ky është një nga sinjalet paralajmëruese që përdoren për t’i informuar drejtuesit e automjeteve për një situatë të veçantë në rrugë që kërkon vëmendje të shtuar.

Forma e tij karakteristike, me dy shigjeta të kundërta dhe një trekëndësh (formë plumbi) midis tyre, ka një qëllim të qartë: të paralajmërojë shoferët për një pengesë që ndan dy korsitë e trafikut.

Kjo pengesë mund të jetë, për shembull, një ndarje fizike midis korsive, një barrierë ose një pjesë e rrugës ku dy korsitë nuk janë të njëjta.

Qëllimi kryesor i këtij sinjali është të stimulojë shoferët që të vozisin me kujdes të shtuar dhe të adaptojnë shpejtësinë sipas situatës në rrugë.

Ai u sugjeron drejtuesve të automjeteve të shmangin çdo manovër të rrezikshme, si kalimi i papritur në korsinë tjetër apo përpjekjet për të anashkaluar pengesën pa kontroll të duhur.

Në këtë mënyrë, sinjali ndihmon në parandalimin e aksidenteve dhe përmirëson sigurinë në rrugë, duke kujtuar se çdo ndryshim në rrugë duhet të trajtohet me shumë vëmendje.

Pra, edhe pse ky sinjal mund të duket i panjohur për shoferët në Evropë, funksioni i tij është i qartë: paralajmëron për një pengesë në rrugë, kërkon kujdes dhe sjell drejtim të sigurt të automjeteve në situata të rrezikshme. /Telegrafi/

Bisedimet Ukrainë-Rusi përfunduan sot, thanë burime për Reuters.

Përfaqësuesit e të dyja vendeve po takoheshin me ndërmjetësit amerikanë në Abu Dhabit.

Ashtu si dje, shumë pak detaje janë bërë publike për bisedimet që u zhvilluan sot mes SHBA-së, Ukrainës dhe Rusisë.

Ata u fokusuan tek “elementet e pazgjidhura” të kuadrit të paqes të propozuar nga SHBA-ja, tha një zëdhënës i qeverisë së Emirateve të Bashkuara Arabe, duke iu referuar planit të hartuar fillimisht nga SHBA dhe Rusia, dhe më pas i modifikuar nga SHBA-ja dhe Evropa.

Ndërsa bisedimet trepalëshe nisin në Abu Dhabi, sulmet ruse vazhdojnë në Ukrainë

Bisedimet përfshinin “angazhim të drejtpërdrejtë” mes zyrtarëve të të dy vendeve dhe u zhvilluan në një “atmosferë konstruktive dhe pozitive”, shkruan skynews.

Kjo mund të sugjerojë se përfaqësuesit rusë dhe ukrainas ishin në të njëjtën dhomë, në vend që SHBA-ja të bënte ndërmjetësimin mes tyre, por deklarata nuk është përfundimtare.

Ndryshe, nuk dihet nëse dihet nëse do të ketë bisedime të reja mes palëve në ditët në vazhdim. /Telegrafi/

Presidenti amerikan, Donald Trump ka intensifikuar shqetësimet globale për një ndryshim të mundshëm të rendit ndërkombëtar, pas deklaratave dhe veprimeve në Forumin Botëror Ekonomik në Davos, Zvicër.

Ai kritikoi disa udhëheqës botërorë, kërcënoi me tarifa Zvicrën dhe më vonë i hoqi ftesën kryeministrit kanadez, Mark Carney për t’u bashkuar me iniciativën e quajtur “Bordi i Paqes”.

SHBA me Strategji të re Kombëtare të Mbrojtjes - çfarë thotë për Evropën, Kinën dhe Rusinë

Strukturë kjo që fillimisht synonte të mbështeste armëpushimin në luftën Izrael–Hamas, por kritikët e shohin si rival të mundshëm të Kombeve të Bashkuara, shkruan ap.

Trump gjithashtu ushtroi presion ndaj Danimarkës lidhur me ambiciet e SHBA-së për Grenlandën, duke vënë në rrezik unitetin brenda NATO-s.

Qasja e tij jashtëzakonisht e personalizuar në politikën e jashtme - duke theksuar besnikërinë dhe adhurimin - ka ngritur shqetësime te aleatët e SHBA-së.

Senatorja republikane Lisa Murkowski theksoi se partnerët ndërkombëtarë ndihen të hutuar, ndërsa udhëheqës të tjerë, si Carney dhe kryeministri britanik Keir Starmer, kritikuan paplanifikueshmërinë dhe mungesën e respektit ndaj aleancave.

Veprimet njëanshme të Trumpit kanë nxitur frikë për dëm të besueshmërisë së SHBA-së dhe po nxisin vendet të forcojnë aleancat alternative, veçanërisht me Kinën.

Përkundër rezistencës së jashtme, Trump nuk tregon shenja tërheqjeje, duke ngritur alarme për të ardhmen e bashkëpunimit ndërkombëtar dhe stabilitetit të një rendi botëror të bazuar në rregulla. /Telegrafi/

Çdo vit, një grup i vogël prej rreth dhjetë vullnetarësh rekrutohen për një detyrë të veçantë dhe të jashtëzakonshme: numërimin e albatrosëve në koloninë më të madhe të kësaj specie në botë, e vendosur në Ishujt Midway të Shteteve të Bashkuara.

Për disa javë rresht, vullnetarët ecin nëpër ishujt larg bregut, duke mbajtur numërues mekanikë dhe duke regjistruar manualisht çdo folenë të zënë nga këta zogj të mëdhenj detarë.

Përveç që kërkon durim dhe saktësi, kjo punë është gjithashtu një përvojë e rrallë dhe e paharrueshme, duke i afruar pjesëmarrësit shumë pranë natyrës dhe jetës së egër.

— (@)

Sipas të dhënave të fundit, vullnetarët numëruan këtë vit 645 mijë fole, që përbën një rritje prej 25 për qind krahasuar me vitin e kaluar.

Ky rezultat tregon jo vetëm për popullsinë në rritje të albatrosëve, por edhe për suksesin e përpjekjeve të ruajtjes së specieve në këtë zonë të izoluar të Paqësorit.

Kjo punë, megjithëse e lodhshme dhe e kërkuar, konsiderohet një nga “punët e ëndrrave” për adhuruesit e natyrës dhe ornitologët amatorë, pasi u jep mundësinë të kontribuojnë drejtpërdrejt në mbrojtjen e një specie unike dhe të vizitojnë një nga kolonitë më spektakolare të zogjve në botë. /Telegrafi/

Në kohën kur televizorë 4K me ekran të madh mund të blihen për rreth 450 euro ose edhe më pak, shumë përdorues nuk e shfrytëzojnë plotësisht potencialin e pajisjes së tyre sepse e lënë atë me cilësimet origjinale nga fabrika.

Ekspertët e teknologjisë thonë se shumica e modeleve televizive nuk janë optimizuar si duhet sapo nxirren nga kutia, dhe disa rregullime të thjeshta mund të përmirësojnë ndjeshëm përvojën e shikimit.

Një nga ndryshimet më të rëndësishme është çaktivizimi i funksionit “motion smoothing”, i cili shpesh është aktiv nga prodhuesi.

Kjo teknologji shton në mënyrë artificiale frekuencën e imazhit dhe mund ta bëjë pamjen të duket e “çuditshme” ose si telenovelë, veçanërisht në filmat me ritëm më të ngadaltë.

Po ashtu ekspertët rekomandojnë uljen e nivelit të mprehtësisë (sharpness), sepse nivelet shumë të larta shpesh krijojnë një efekt të “filtruar” dhe mund të prishin detajet natyrale të imazhit.

Shumë përdorues instalojnë edhe regjimin e dritës (Vivid), duke menduar se shfaq imazhin më mirë, por ky profil shpesh tepron me ngjyrat dhe kontrastin, duke i bërë ato të dukshme jo natyrale, veçanërisht në ekranet OLED me mbështetje HDR.

Kontrasti është një tjetër pikë kyçe: në cilësimet e fabrikës ai shpesh vendoset shumë lart, gjë që mund ta bëjë imazhin të duket të zbehtë dhe pa detaje në zonat shumë të ndriçuara dhe të errëta.

Ndryshimet e sugjeruara — edhe pse duken të vogla — mund të transformojnë seriozisht cilësinë e imazhit në televizorin tuaj dhe ta bëjnë përvojën e shikimit më të këndshme dhe më natyrale, duke ju ndihmuar të shfrytëzoni plotësisht potencialin e pajisjes që keni blerë. /Telegrafi/

Kryeministrja italiane, Giorgia Meloni, deklaroi se shpreson të mund ta nominojë presidentin e SHBA-së, Donald Trump, për Çmimin Nobel për Paqe, për shkak të përpjekjeve të tij për të arritur paqen në Ukrainë.

“Shpresojmë që të mund ta ndajmë këtë çmim. Besoj se ai mund të bëjë ndryshimin për të arritur një paqe të drejtë dhe të qëndrueshme për Ukrainën, dhe atëherë edhe ne do të mund ta nominojmë përfundimisht Donald Trumpin për Çmimin Nobel për Paqe,” tha ajo gjatë një konference për shtyp me kancelarin gjerman, Friedrich Merz, në Romë.

Dyshja e re e fuqishme e Bashkimit Evropian - Merz dhe Meloni

Duke folur për marrëdhëniet me Shtetet e Bashkuara, Meloni theksoi se “dëshira për bashkëpunim mbetet e fortë”, duke shtuar se Italia dhe Gjermania janë “ndër vendet evropiane me marrëdhënie të privilegjuara me SHBA-në, pjesërisht edhe për shkak të bazave ushtarake amerikane që ndodhen në territorin e tyre.”

Ajo shtoi se është e rëndësishme të mbahet një “qasje pragmatike, jo instinktive, ndaj marrëdhënieve me Shtetet e Bashkuara”.

Ndërkohë, lideri amerikan ka shfaqur interes për të fituar Çmimin Nobel për Paqe për vite me radhë. Fituesja e vitit të kaluar, udhëheqësja opozitare venezueliane, María Corina Machado, së fundmi i dorëzoi atij në Shtëpinë e Bardhë medaljen e Çmimit Nobel për Paqe.

Edhe pse Machado ia dorëzoi Trumpit medaljen e artë që shoqëron çmimin, nderimi mbetet formalisht i saj. Instituti Norvegjez i Nobel-it bëri të ditur se çmimi nuk mund të transferohet, ndahet apo të tërhiqet. /Telegrafi/

— (@)

Një video e rrjedhur nga një takim i mbyllur tregon përpjekjet dëshpëruese të regjimit venezuelas për të kontrolluar narrativën pas kapjes së presidentit Nicolas Maduro nga forcat amerikane.

Në këtë video, ministri i Komunikimit, Freddy Nanez, vendos telefonin pranë mikrofonit për një grup njerëzish pro‑qeverisë, ndërsa në altoparlant flet presidentja në detyrë, Delcy Rodriguez.

Kjo e fundit pretendon se kur forcat amerikane kapën Maduron, atij, vëllait të saj, Jorge Rodríguez dhe Diosdado Cabello u dhanë vetëm 15 minuta kohë për t’u përgjigjur nëse do t’u përmbaheshin kërkesave të Uashingtonit – “përndryshe do t’i vrisnin”.

Ajo thotë se u detyruan të bashkëpunonin për shkak të “kërcënimeve dhe shantazhit të vazhdueshëm”, duke shtuar se prioriteti i tyre ishte të ruanin pushtetin politik, shkruan theguardian.

— (@)

Video u regjistrua rreth shtatë ditë pas sulmit të forcave amerikane dhe tregon shqetësimin e figurave të larta të regjimit se mund të akuzoheshin për tradhti dhe se lëvizja e brendshme politike mund të thyhej.

Në takim, ministri i Komunikimit pohoi se qeveria po negocionte për të shpëtuar pozicionin e saj dhe se ajo që po ndodhte ishte pjesë e një plani më të gjerë për të kontrolluar situatën, përfshirë edhe shitjen e naftës.

Rodriguez nuk ka përsëritur zyrtarisht kërcënimin për vdekje, por ka deklaruar se janë në proces dialogu me Shtetet e Bashkuara për të adresuar dallimet dhe sfidat përmes diplomacisë.

Analistët politikë thonë se është e vështirë të verifikohet nëse kërcënimet ishin reale apo një konstrukt për të mbajtur bashkë bazën politike. /Telegrafi/

Një furnizues i mjeteve të blinduara dhe municioneve për Ukrainën është bërë personi më i pasur në botë në fushën e industrisë së mbrojtjes.

Pasuria e magnatit Michal Strnad arrin vlerën e 37 miliardë dollarëve pas ofertës publike të aksioneve në bursën holandeze.

Michal Strnad, 33 vjeç, pronar i kompanisë së armatimit me qendër në Pragë, Czechoslovak Group AS, ka parë pasurinë e tij të rritet në rreth 37 miliardë dollarë, që përbën afërsisht 10 për qind të ekonomisë së Çekisë, pas debutimit të aksioneve të kompanisë në bursën e Amsterdamit.

Aksionet e kompanisë u rritën rreth 28 për qind në mëngjesin e ditës kur u tregtuan për herë të parë në bursë, duke pothuajse dyfishuar pasurinë e Strnad brenda një nate.

Përmes ofertës publike fillestare (IPO), kompania dhe Strnad ngritën rreth 3.3 miliardë euro, duke shitur aksione me çmim prej 25 eurosh secili.

See on Instagram

Strnad trashëgoi kompaninë nga babai i tij pas një transferimi pronësie në vitin 2018. Sot ai renditet ndër personat më të pasur nën moshën 40 vjeç sipas Bloomberg Billionaires Index, me një pasuri të vlerësuar prej 36.9 miliardë dollarësh.

Czechoslovak Group është një nga prodhuesit kryesorë të armatimeve dhe pajisjeve mbrojtëse në Evropë dhe ka fituar kontrata të shumta ndërkombëtare.

IPO-ja e fundit konsiderohet një sukses i madh, duke rritur interesin për aksionet e kompanisë dhe duke e vendosur Strnad ndër miliarderët që po rriten më shpejt në botë.

Analistët e tregut e shohin këtë lëvizje si një tregues të fortë të besimit të investitorëve në sektorin e mbrojtjes dhe në strategjinë e zgjerimit të Czechoslovak Group në tregjet globale. /Telegrafi/

Ndërsa në kryeqytetin e Emirateve të Bashkuara Arabe, Abu Dhabi, kanë nisur për herë të parë që nga fillimi i luftës bisedimet trepalëshe ndërmjet Shteteve të Bashkuara të Amerikës, Ukrainës dhe Rusisë, forcat ruse kanë vazhduar me sulmet e tyre vdekjeprurëse në territorin ukrainas.

Në kryeqytet, Kiev një person ka humbur jetën dhe katër të tjerë kanë mbetur të lënduar, tre prej të cilëve janë shtruar në spital, sipas raportimeve të kryetarit të qytetit, Vitali Klitschko.

Çfarë dihet për takimin e parë trepalësh Ukrainë, SHBA dhe Rusi

Mbeturinat e dronëve kanë rënë në disa qarqe, duke shkaktuar zjarre në një kooperativë garazhesh dhe një parking me një kamion karburanti, si dhe dëmtime në ndërtesa banimi, një zyrë dhe një shtëpi private. Dritaret e ndërtesave të apartamenteve dhe një objekti mjekësor janë thyer.

Klitschko bëri me dije se rreth 6000 shtëpi në Kiev janë pa ngrohje, shumica prej tyre pas rikyçjes të dyfishtë të sistemit të ngrohjes pas sulmeve të 9 dhe 20 janarit. Ai shtoi se ka edhe probleme me furnizimin me ujë në bregun e majtë dhe pjesërisht në bregun e djathtë të qytetit.

Në qytetin lindor, Khrakiv 19 persona janë të lënduar, përfshirë edhe një fëmijë. Dëmtime kanë pësuar ndërtesa banimi, një konvikt, një ndërmarrje, spitali i lindjes dhe një spital i përgjithshëm. Mbi 130 shpëtimtarë janë angazhuar në evakuimin e banorëve nga ndërtesat që kanë marrë flakë.

Në qarqet Brovari dhe Boryspil, katër persona janë të lënduar dhe janë dëmtuar disa shtëpi private dhe automjete.

Sulmet e vazhdueshme theksojnë tensionin e lartë ndërkohë që diplomacia përpiqet të gjejë rrugë për një zgjidhje paqësore, ndërsa bisedimet trepalëshe në Abu Dhabi janë parë si një hap i rëndësishëm drejt dialogut ndërkombëtar. /Telegrafi/

Në Volkswagen thonë se përdorimi i emrave të njohur të modeleve me prefiksin ID. synon të forcojë lidhjen emocionale me modelet elektrike.

VW ID.4 nga ridizajnimi do të quhet ID. Tiguan. Thashethemet kanë qarkulluar tashmë prej kohësh, dhe tani sindikata punëtorëve IG Metall Emden e ka konfirmuar publikisht ndërrimin e emrit.

Ridizajnimi i ID.4, pra ID. Tiguan, do të prezantohet më vonë këtë vit. Sipas sindikatës IG Metall, prodhimi i ID. Tiguan në fabrikën e Emdenit do të vazhdojë deri në fund të vitit 2031.

Fillimisht, ID.4 prodhohej vetëm në fabrikën e Volkswagen Group në Zwickau, e cila u përshtat krejtësisht për prodhimin e veturave elektrike mbi platformën MEB. Më vonë u hap një linjë prodhimi shtesë për ID.4 në Emden, ku fillimisht punonte bashkë me modelet me motor me djegie të brendshme si Passat dhe Arteon. Arteon është ndërkohë ndalur, ndërsa Passat është zhvendosur në Bratislavë.

Kjo krijoi hapësirë për prodhimin e ID.7 elektrik në Emden. Ekzistojnë edhe zëra për ndryshimin e emrit të këtij modeli në ID. Passat – por as VW dhe as IG Metall nuk e kanë konfirmuar këtë.

Në të ardhmen, ID. Tiguan do të prodhohet vetëm në Emden. Prodhimi i ID.4 në Zwickau po ndalet gradualisht, dhe ajo fabrikë do të mbajë prodhimin e Audi Q4 e‑tron, Cupra Born dhe VW ID.3.

Volkswagen thotë se përdorimi i emrave të njohur me prefiksin ID. ka për qëllim ta rrisë apelin emocional të modeleve elektrike dhe ta afrojë më tepër me linjën tradicionale të marka - diçka që modelet e deritanishme ID.3 dhe ID.4 nuk e kishin arritur plotësisht. Ideja e parë me këtë koncept ishte ID. Polo. /Telegrafi/

Zjarrfikësit në Novi Pazar që nga mesnata e djeshme po përballen me zjarrin më të madh, sipas tyre, në historinë e këtij qyteti.

Sipas raportimeve të mediave lokale, zjarri dje rreth orës 2 të mëngjesit përfshiu fabrikën EMA-TEX, guroren Musiq, si dhe disa magazina dhe depo materiale, duke shkaktuar një dramë të vërtetë në zonën industriale të qytetit.

Tymi i dendur dhe flakët e larta ishin të dukshme nga pothuajse çdo pjesë e Novit Pazarit, shkruan klix.ba.

Sipas informacionit të fundit, zjarrfikësit pas një beteje disa-orëshe kanë arritur ta vendosin zjarrin nën kontroll, por situata mbetet serioze.

Sipas komandantit të Njësisë së Zjarrfikësve dhe Shpëtimit në Novi Pazar, bëhet fjalë për zjarrin më të madh që ka përfshirë ndonjëherë qytetin.

See on Instagram

“Kjo është, pa dyshim, ndërhyrja më e vështirë në Novi Pazar deri më tani. Situata mbetet serioze, por zjarri nuk ka më fuqinë e përhapjes së pakontrolluar”, tha komandanti i zjarrfikësve, duke theksuar përpjekjen dhe përkushtimin e jashtëzakonshëm të të gjitha ekipeve në terren.

Në shuarjen e zjarrit, përveç forcave vendase, po marrin pjesë edhe ekipe zjarrfikëse nga disa qytete të tjera, të cilat iu përgjigjën thirrjes për ndihmë dhe mbërritën në Novi Pazar gjatë natës dhe mëngjesit.

Sipas informacionit në dispozicion, nuk ka viktima, çka konsiderohet sukses i madh i operacionit në këtë moment. Megjithatë, dëmet materiale janë të mëdha dhe, sipas vlerësimeve të para jozyrtare, shkojnë në miliona, ndërsa shtrirja e saktë do të përcaktohet pas përfundimit të ndërhyrjes dhe inspektimit.

Banorëve u këshillohet kujdes, shmangia e zonës së përfshirë nga zjarri dhe ndjekja e informacionit zyrtar. Shërbimet përgjegjëse do të qëndrojnë në terren deri sa zjarri të fiket plotësisht dhe situata të shpallet e sigurt. /Telegrafi/

See on Instagram

Një shofer është në paraburgim pasi përplasi një automjet në një terminal në Aeroportin e Detroit.

Aksidenti ndodhi në Terminalin McNamara pranë sporteleve të “check” të Delta Air Lines.

Autoriteti i Aeroporteve të Qarkut Wayne raportoi se automjeti hyri përmes një hyrjeje dhe goditi një sportel bilete.

Shoferi u mor në paraburgim, ndërsa gjashtë persona u trajtuan në vend nga zjarrfikësit, tha autoriteti i aeroportit.

— (@)

Shkaku i aksidentit nuk dihet. Emri i shoferit nuk u bë publik menjëherë. Nuk ishte e qartë nëse kishte pasagjerë në automjet.

Delta Air Lines tha në një deklaratë për CBS News se nuk kishte raportime për të lënduar dhe nuk pati ndikim në operacionet e aeroportit.

Tre punonjës u kontrolluan nga personeli i emergjencës pas kontaktit me rrënojat, tha kompania ajrore.

Një ekuipazh i CBS News Detroit kapën pamje të automjetit të aksidentuar brenda ndërtesës. Rrethanat e incidentit nuk ishin të qarta. /Telegrafi/

Kryetari i Lëvizjes Vetëvendosje, Albin Kurti, ka dënuar çdo tentativë manipulimi të votave brenda subjekteve politike, duke theksuar se individët që përfshihen në manipulime nuk do të përfitojnë amnisti.

“Komisionerë e individë që në mënyrë klandestine janë përfshirë në manipulime votash duke dëmtuar kolegë dhe subjekte politike nuk kanë amnisti. I inkurajojmë institucionet përgjegjëse që hetimet të shkojnë deri në fund”, tha Kurti.

Ai tutje tha se Vetëvendosje ka qenë gjithmonë mbrojtëse e vullnetit politik të qytetarëve dhe se integriteti i procesit zgjedhor do të ruhet përherë.

Dyshime për manipulime të votave, ndalohen 109 të dyshuar

Kryeministri në detyrë theksoi se Republika e Kosovës është shembull i demokracisë në rajon dhe se çdo dyshim për manipulime duhet të trajtohet përmes ligjit.

“Vullneti i qytetarëve është i shenjtë, vota është e lirë dhe kjo do të garantohet deri në fund. Dyshimet duhet të hetohen, manipuluesit duhet të ndëshkohen, dhe këto raste nuk duhet të përsëriten kurrë më”, përfundoi ai.

Ndryshe, kryeprokurori i Prokurorisë Themelorë në Prizren, Petrit Kryeziu gjatë ditës së djeshme ka thënë se janë ndaluar 109 të dyshuar nën dyshimin për manipulim të votave nga zgjedhjet e parakohshme të 28 dhjetorit 2025.

Sipas tij, gjithsej 121 persona janë ftuar për intervistim, prej të cilëve disa nuk janë paraqitur, ndërsa një pjesë janë konstatuar si të pafajshëm.

Ai shtoi se veprimet janë ndërmarrë ndaj personave të identifikuar, ku shumica prej tyre janë komisionerë. /Telegrafi/

Disa pronarë të qenve vërejnë se kafshët e tyre shtëpiake nuk reagojnë gjithmonë mirë ndaj fjalës “jo”, dhe reagimet e tyre shpesh mund të jenë qesharake.

Pikërisht një situatë e tillë ka argëtuar shumë përdorues të rrjeteve sociale.

Në një video të publikuar në profilin e Instagramit @blackjaxthegsd, shihet qeni gjerman Black Jax, katër muajsh, duke “gërryer” pronarët e tij ndërsa ata janë ulur në divan.

See on Instagram

Kur pronari i thotë “jo”, Black, në vend që të ndalojë, fillon të qajë, të rrasë dhe të lehtë, duke treguar qartë pakënaqësinë e tij.

Pavarësisht paralajmërimeve të përsëritura, qeni gjerman vazhdoi të gërryente.

Reagimi i kafshës argëtoi pronarët, të cilët me shaka përfunduan se kafsha e tyre shtëpiake nuk e pëlqen fjalën “jo”.

Në komente u shprehën edhe përdorues që ndanë përvoja të ngjashme me qenët e tyre, ndërsa të tjerë thjesht vlerësuan sa i ëmbël dhe i këndshëm ishte sjellja e Blackut. /Telegrafi/