Apple njihet për prezantimin e modeleve të reja të iPhone gjatë vjeshtës, kryesisht në fillim të shtatorit por kjo do të ndryshojë.

Sipas disa burimeve për mediat e huaja, Apple po shqyrton mundësinë e ndarjes së prezantimit të serisë iPhone 18 në dy faza të ndryshme, çka mund të çojë në shtyrjen e lansimit të iPhone 18 standard deri në vitin 2027. Analisti i njohur i industrisë, Ming-Chi Kuo, ka bërë të ditur se kompania planifikon t’i shpërndajë lansimet mes vjeshtës dhe pranverës.

Sipas kësaj strategjie, Apple do të prezantojë modelet iPhone 18 Pro dhe iPhone 18 Pro Max në vjeshtën e vitit 2026, duke respektuar traditën e deritanishme. Ndërkohë, modeli bazë i iPhone 18 nuk pritet të publikohet në të njëjtën kohë, por do të dalë në treg gjatë pranverës së vitit 2027.

Si pasojë, iPhone 17 do të mbetet modeli standard më i ri i Apple për rreth një vit e gjysmë. Edhe raportime të tjera kanë përforcuar këtë pretendim, duke theksuar se ndryshimi lidhet ngushtë me zgjerimin e vazhdueshëm të linjës së produkteve të Apple.

The post Apple thyen traditën, iPhone 18 nuk do prezantohet në vjeshtë appeared first on Gazeta Si.

Nga Gazeta Si- Zjarri që përfshiu mbrëmjen e 8 janarit tregun e rrobave të përdorura në zonën “5 maji” në Tiranë, ka lënë pas dëme të konsiderueshme materiale, trishtim dhe tensione mes tregtarëve të cilët janë përplasur me menaxherin e magazinave.

Flakët masive përfshinë kapanonet 1 dhe 2 ku vlerësohet se janë rreth 100 magazina të djegura.

Shkak i zjarrit dyshohet të ketë qenë një shkëndijë elektrike por pritet vlerësimi përfundimtar ndërkohë që një tregtar ka bërë fajtor përgjegjësin e tregut. Debatet mes tyre kanë agravuar aq sa është dashur ndërhyrja e policisë, e cila i ka shoqëruar në komisariat për sqarimet.

Dëmet materiale që ka lënë pas zjarri masiv janë kolosale. Një tregtar i cili thotë se tregtonte çorape, geta dhe streçe, ka dëme mbi 200 milionë lekë, ndërkohë që shton se ai kishte më pak hapësirë se të gjithë, duke shtuar se dëmi për të tjerët është akoma më i madh.

“Jemi në qiell të hapur. Asnjëherë nuk na kanë kërkuar të iknim. Nuk i kemi pasur të siguruara bizneset. Ka plas zjarri tek panelet, nuk është për fajin tonë. E gjithë jeta jonë ishte këtu. Nuk kam ku të shkoj”, thotë një nga tregtarët.

Për ngjarjen ka reaguar edhe dhoma e Tregtisë dhe Industrisë, duke thënë kjo ngjarje është një goditje për familjet dhe sipërmarrjen e vogël.

Institucioni thotë në një deklaratë të postuar në rrjetet sociale se ngjarja duhet të shërbejë si kambanë alarmi për sigurimin e bizneseve në raste fatkeqësish natyrore e aksidentale, siç është standardi i Bashkimit Europian ku Shqipëria synon të anëtarësohet.

“Kjo ngjarje përbën një goditje të fortë për dhjetëra familje që siguronin jetesën përmes këtyre aktiviteteve, si dhe për sipërmarrjen e vogël, e cila është një shtyllë e rëndësishme e ekonomisë lokale. Njëkohësisht, kjo situatë duhet të shërbejë si një kambanë alarmi për të gjitha bizneset, mbi domosdoshmërinë e sigurimit të aktiviteteve të tyre, në mënyrë që të kenë mundësi reale për t’u rikuperuar pas fatkeqësive natyrore apo aksidentale, si zjarret dhe përmbytjet, me të cilat po përballet Shqipëria ditëve të fundit”, shkruan dhoma e tregtisë.

The post Zjarri te ‘5 maji’, tregtarët të tensionuar: E gjithë jeta jonë ishte këtu appeared first on Gazeta Si.

Hulumtimet e reja sugjerojnë se personat që humbin peshë dhe që heqin dorë nga injeksionet për humbje peshe, mund të rifitojnë kilogramët e humbur katër herë më shpejt se ata që ndalojnë dietat dhe ushtrimet.

Të dhënat e publikuara në British Medical Journal sugjerojnë se njerëzit mbipeshë humbasin sasi të mëdha peshe kur përdorin injeksione, rreth një të pestën e peshës së trupit të tyre, por sapo i lënë, ata rifitojnë mesatarisht 0.8 kg çdo muaj.

Kjo do të thotë se ata kthehen në peshën e tyre para trajtimit brenda një viti e gjysmë.

“Njerëzit që i blejnë këto duhet të jenë të vetëdijshëm për rrezikun e rifitimit të shpejtë të peshës kur mbaron trajtimi”, paralajmëron studiuesja Dr. Susan Jebb, nga Universiteti i Oksfordit.

Ajo theksoi se gjetjet vijnë nga provat mjekësore dhe jo nga jeta reale dhe më shumë studime mbi efektet afatgjata të injeksioneve të reja për dobësim do të ishin të dobishme.

Studiuesit shqyrtuan 37 studime me mbi 9,000 pacientë për të krahasuar injeksionet e suksesshme për humbje peshe me dieta ose pilula të tjera.

Rreziku i rikthimit

NHS rekomandon injeksionet për njerëzit që janë mbipeshë me rreziqe shëndetësore të lidhura me obezitetin, jo për njerëzit që duan vetëm të dobësohen pak.

Dhe mjekët duhet gjithashtu të përshkruajnë ndryshime në stilin e jetës që përfshijnë të ngrënit shëndetshëm dhe të bërit të ushtrimeve të mjaftueshme për të ndihmuar njerëzit të mbajnë peshën.

Shumë thonë se trajtimi duhet të konsiderohet gjatë gjithë jetës, duke pasur parasysh rrezikun e rikthimit.

Dr. Adam Collins, ekspert i të ushqyerit, thotë se mënyra se si funksionojnë injeksionet në tru dhe trup mund të shpjegojë pse rifitimi i peshës amplifikohet pasi të ndalosh së marri ato.

Ato imitojnë një hormon natyror të quajtur GLP-1, i cili rregullon urinë.

“Ofrimi artificial i niveleve të GLP-1 disa herë më të larta se normalja gjatë një periudhe të gjatë mund të bëjë që ju të prodhoni më pak nga GLP-1 tuaj natyral, dhe gjithashtu mund t’ju bëjë më pak të ndjeshëm ndaj efekteve të tij.

“Ky nuk është problem kur merrni ilaçet, por sapo të ndërprisni këtë ‘dozë’ të GLP-1, oreksi nuk mbahet më nën kontroll dhe ka shumë më tepër gjasa të hani më shumë.”

Të ndalosh së ngrëni është një sfidë e vërtetë, thotë ai.

The post Njerëzit që ndalojnë injeksionet për dobësim rifitojnë peshë katër herë më shpejt se ata që mbajnë dietë appeared first on Gazeta Si.

Nga Gazeta Si- Për shkak të situatës së krijuar nga përmbytjet, mësimi është ndërprerë përkohësisht në 54 shkolla të vendit, kryesisht në zonat malore.

Në Durrës ka një ndërprerje të përkohshme këto tre ditë në 12 shkolla ndërsa në Vlorë dhe Gjirokastër ka ndërprerje të mësimit në shkollat në zona të thella.

Në Korçë, Berat dhe Elbasan janë rreth 32 zona malore ku për shkak të ngricës është pezulluar mësimi.

Sipas ministres së arsimit Mirela Kumbaro, të hënën nis mësimi normalisht në universitetin e Durrësit.

The post Moti i keq, ndërpritet mësimi në 54 shkolla appeared first on Gazeta Si.

Administrata Trump po shqyrton dërgimin e pagesave të njëpasnjëshme për banorët e Groenlandës për t’i bindur ata të shkëputen nga Danimarka dhe të bashkohen me Shtetet e Bashkuara, sipas zyrtarëve amerikanë, të cituar nga Reuters në një raport ekskluziv.

Pagesat mund të jenë deri në 100,000 dollarë për person, me administratën Trump që gjithmonë po shqyrton një qasje ushtarake ose diplomatike për blerjen e ishullit.

Sipas raportit të Reuters, propozimi për të dërguar pagesa të njëpasnjëshme për banorët e Groenlandës në një përpjekje për t’i bindur ata të shkëputen nga Danimarka dhe të bashkohen me Shtetet e Bashkuara është duke u diskutuar midis zyrtarëve amerikanë. Pavarësisht pasigurisë mbi shumën e saktë dhe detajet e procesit, zyrtarët e Shtëpisë së Bardhë, përfshirë ndihmësit e Presidentit të SHBA-së Donald Trump , kanë thënë se pagesat mund të variojnë nga 10,000 deri në 100,000 dollarë për person.

Ideja e dhënies së parave direkt për banorët e Groenlandës ofron një shpjegim të mundshëm se si Shtetet e Bashkuara mund të përpiqen të “blejnë” ishullin me 57,000 banorë, pavarësisht deklaratave kategorike nga autoritetet në Kopenhagen se Groenlanda nuk është në shitje.

Propozimi për t’u paguar grenlandezëve vjen pas deklaratave të Presidentit të SHBA-së, Donald Trump, i cili përsëriti dëshirën e tij për të blerë ishullin. Pavarësisht reagimit nga udhëheqësit evropianë, diskutimi mbi këtë çështje vazhdon.

The post Reuters zbulon planin: SHBA mendon pagesa deri në 100 mijë dollarë për çdo banor të Groenlandës për t’i shkëputur nga Danimarka appeared first on Gazeta Si.

Ambasadori i Bashkimit Evropian në Shqipëri, Silvio Gonzato, në një takim me kryetaren e re të Gjykatës Kushtetuese, Fiona Papajorgji, tha se Gjykata Kushtetuese ka arritur tashmë nivelin e nevojshëm të stabilitetit institucional, duke ruajtur cilësinë, transparencën dhe pavarësinë si institucioni më i lartë i drejtësisë në vend.

“Rikonfirmoj angazhimin tonë për të mbështetur sundimin e ligjit në Shqipëri, duke theksuar rolin kyç të Gjykatës në mbrojtjen e të drejtave të qytetarëve shqiptarë”, tha Gonzato.

Ambasadori shtoi se BE-ja do ta përfshijë Gjykatën Kushtetuese si përfituese në projektet e ardhshme të Bllokut.

“Planifikojmë ta përfshijmë Gjykatën si përfituese në projektet tona të ardhshme dhe të mbështesim përpjekjet e saj për të harmonizuar më tej praktikën gjyqësore me të drejtën e BE-së. Bashkëpunimi me të gjithë sistemin gjyqësor shqiptar është thelbësor për integrimin europian, dhe Gjykata Kushtetuese mbetet një partner qendror në këtë proces,” tha Gonzato.

The post Gonzato: Gjykata Kushtetuese partner qendror për integrimin appeared first on Gazeta Si.

Presidenti i Kongresit venezuelian, Jorge Rodriguez, tha sot se qeveria ka vendosur të lirojë një “numër të konsiderueshëm” të burgosurish politikë në orët në vijim, si venezuelianë ashtu edhe të huaj, me qëllim që të “kontribuojë në përpjekjet për unitet kombëtar”.

Lirimet, një kërkesë e përsëritur nga opozita e vendit, përbëjnë një gjest paqeje, tha Rodriguez, duke shtuar se veprimi është i njëanshëm dhe nuk është rënë dakord me asnjë palë tjetër.

“Qeveri, së bashku me institucionet shtetërore, ka vendosur të lirojë një numër të konsiderueshëm venezuelianësh dhe të huajsh, dhe këto procese lirimi po ndodhin tani”, tha Rodriguez në një video të transmetuar në kanalin publik lokal TeleSur. Ai tha se lirimi ishte një “gjest i qeverisë, me një qëllim për të ndjekur paqen”.

Anëtarët e administratës Trump u kanë thënë ligjvënësve amerikanë se ia kanë bërë të qartë Venezuelës se duhet të lirojë të burgosurit politikë.

The post Qeveria venezueliane gati të lirojë të burgosurit politik, presidenti i Kongresit të vendit: Duam unitet kombëtar appeared first on Gazeta Si.

Presidenti francez Emmanuel Macron tha të enjten se Franca do të votojë kundër marrëveshjes tregtare të Bashkimit Europian me bllokun Mercosur, një ditë para një votimi përfundimtar nga shtetet anëtare.

Ai tha se qëndrimi bazohej në refuzimin unanim të marrëveshjes nga parlamenti francez pas më shumë se 25 vjet negociatash.

Njoftimi erdhi ndërsa fermerët dolën në rrugët e Parisit në numër të madh për të protestuar si kundër marrëveshjes BE-Mercosur ashtu edhe kundër politikës bujqësore të qeverisë. Ata mbushën pjesët qendrore të qytetit me traktorë, duke shprehur kundërshtimin e tyre të fortë.

Rreth 20 traktorë arritën në Kullën Eiffel dhe Harkun e Triumfit, ndërsa grupe të tjera bllokuan rrugët kryesore. Policia mbajti një qëndrim të qetë për të shmangur incidentet, ndërsa presidentja e Parlamentit Francez, Yael Brown-Pivet, pritet të takohet me përfaqësues të sindikatave bujqësore.

The post Macron dorëzohet përballë protestave të fermerëve: Do votojmë kundër marrëveshjes tregtare BE-Mercosur appeared first on Gazeta Si.

Nga Gazeta Si- Është përfshirë nga flakë masive tregu i rrobave të përdorura që ndodhet pranë rrugës 5 maji në Tiranë. Zjarri, i cili ka nisur rreth orës 19:00, ka shkaktuar dëme të mëdha materiale në dy kapanone të tregut.

Fillimisht ka marrë flakë një kapanon dhe më pas zjarri është përhapur. Gjithë zona është e mbuluar me kabuj elektrikë, duke e bërë situatën tepër të rrezikshme. Për këtë arsye, autoritetet kanë ndërprerë energjinë elektrike në zonë si dhe kanë zgjeruar perimetrin e sigurisë.

Si shkak i flakëve masive, të cilat tashmë janë drejt fikjes, dyshohet të ketë qenë një defekt në rrjetin e energjisë elektrike, ndërsa kreu i Shërbimit Zjarrfikës në Tiranë, Shkëlqim Goxhaj, shprehet i bindur se nuk ka indicie që zjarri të ketë qenë i qëllimshëm.

60 forca policore dhe 11 mjete të shërbimit zjarrfikës janë dërguar në vendngjarje për shuarjen e zjarrit. Pjesë për shuarjen e flakëve është bërë edhe ushtria. Për shkak të situatës së vështirë janë kërkuar përforcime nga shërbimet zjarrfikëse të bashkive Vorë, Kamëz dhe Elbasan.

Ndërsa dhjetëra forca zjarrfikëse luftonin për të vënë nën kontroll flakët, pronarët e bizneseve që ndodhen brenda tregut por nuk janë përfshirë nga flakët kanë nxjerrë mallrat nga dyqanet për t’i shpëtuar.

The post Tiranë/ Zjarr masiv në tregun e rrobave të përdorura të ‘5 majit’ (foto, video) appeared first on Gazeta Si.

Nga Gazeta Si- Senati Amerikan miratoi të enjten një rezolutë dypartiake për të parandaluar Donald Trump nga ndërmarrja e veprimeve të mëtejshme ushtarake kundër Venezuelës, pasi ai urdhëroi një bastisje në fundjavë për të kapur presidentin e atij vendi, Nicolas Maduro, pa i dhënë Kongresit njoftim paraprak.

Masa u miratua me 52 senatorë pro dhe 47 kundër. Të gjithë demokratët votuan për rezolutën, ashtu si edhe republikanët Rand Paul, Todd Young, Lisa Murkowski, Josh Hawley dhe Susan Collins.

Nëse Senati e miraton masën, ajo do të duhet të miratohet nga Dhoma e Përfaqësuesve dhe të nënshkruhet nga Trump.

Rezoluta për fuqitë e luftës, e paraqitur nga senatori demokrat Tim Kaine, kërkon që Trump të kërkojë leje para se të sulmojë ose të përdorë ushtrinë kundër Venezuelës. Pas bastisjes së së shtunës që pa forcat speciale amerikane të sulmonin kryeqytetin e Venezuelës, Karakas, dhe të dërgonin Maduron në New York City për t’u përballur me gjyqin për akuzat që lidhen me “narkoterrorizëm”, presidenti tha se nuk i kishte njoftuar ligjvënësit paraprakisht sepse “Kongresi ka tendencë të rrjedhë informacione”.

Kjo shkaktoi zemërim midis demokratëve dhe disa republikanëve, të cilët argumentuan se bastisja ishte e paligjshme dhe rrezikonte të zhyste Shtetet e Bashkuara në një konflikt të zgjatur.

Ndërsa republikanët në përgjithësi e kishin mbështetur ofensivën për të rrëzuar Maduron, disa kanë shprehur shqetësime se një prani e zgjatur ushtarake në Venezuelë do të kërkonte miratimin e Kongresit, pjesërisht në konkurrencë me kërcënimin e Trump për një angazhim ushtarak të pacaktuar.

Senatori republikan Todd Young tha se një fushatë e zgjatur ushtarake në Venezuelë, edhe nëse e paqëllimshme, do të binte ndesh me qëllimin e Trump për t’i dhënë fund ndërhyrjeve të huaja.

Donald Trump ka thënë se nuk ka sulme të mëtejshme ndaj Venezuelës, por ato mund të bëhen të nevojshme nëse Presidentja e përkohshme e vendit, Delcy Rodriguez, nuk pranon kërkesat e SHBA-së për qasje në rezervat e mëdha të naftës së Venezuelës.

The post Senati amerikan miraton rezolutën që bllokon veprime ushtarake të SHBA në Venezuelë appeared first on Gazeta Si.

Delegacioni i Bashkimit Europian në Tiranë tha sot se po ndjek me shqetësim situatën e përmbytjeve në vendin tonë.

Në një postim në rrjetet sociale, Delegacioni shkruan se Drejtoria e Përgjithshme e BE-së për Mbrojtjen Civile dhe Ndihmën Humanitare (DG ECHO) është në kontakt me autoritetet shqiptare dhe po ndan informacionin dhe pamjet përkatëse nga sateliti Copernicus.

Gjithashtu, në postim thuhet se së bashku me Shtetet Anëtare, Bashkimi Europian është i gatshëm të mbështesë popullin shqiptar për përballimin e kushteve ekstreme atmosferike, përfshirë edhe përmes Mekanizmit të Mbrojtjes Civile të BE-së.

The post Delegacioni i BE-së reagon për përmbytjet në Shqipëri: Mbështesim popullin shqiptar appeared first on Gazeta Si.

Nga Gazeta Si- Me thirrjet “Durrësi, skenë e krimit” “shpallni gjendjen e emergjencës” qindra banorë kanë protestuar në rrugët e Durrësit kundër situatës që po kalon Durrësi.

Ata e kanë nisur protestën e tyre nga rrethrrotullimi pranë burgut për të vijuar marshimin drejt bashkisë së Durrësit ku dhe ka pasur përplasje pasi disa prej protestuesve kanë tentuar të futen në bashki, duke u ndaluar nga policia.

Sipas protestuesve, përmbytjet janë pasojë e keqmenaxhimit dhe abuzimeve me fondet dhe jo fatkeqësi natyrore dhe sot janë mbledhur për ti kërkuar llogari kryebashkiakes Emiriana Sako për situatën aktuale.

“I bashkohemi popullit tonë durrsak. Njerëzit po vuajnë, janë në mes të ujit. Këta janë në mes të kolltuqeve. Po i vjedh Emirjana Sako, Emirjana Sakon ka për ta dënuar Zoti. Kam ardhur këtu nga halli, për moshën që kam. Kam dalë nga shtëpia për ju. Rinia të vijë këtu, mos të rrijë në kafe, të na bashkohet”, tha një grua e moshuar e cila iu bashkua protestës edhe pse deklaroi se nuk rrezikon nga përmbytjet.

The post Përmbytjet në Durrës, banorët në protestë, i kërkojnë llogari kryebashkiakes (video) appeared first on Gazeta Si.

Nga Gazeta Si- Prej tre ditësh, Durrësi vijon të jetë i përmbytur për shkak të reshjeve të dendura të shiut, duke shkaktuar dëme të konsiderueshme.

Këtë të enjte është regjistruar edhe viktima e parë nga moti i keq. Një 54-vjeçar u gjet pa shenja jete në një kanal kullues në afërsi të Ish-repartit Ushtarak. Paraprakisht dyshohet se A. H. është marrë nga rrjedha e ujit pasi kishte dalë për verifikime.

Për përmbytjet në Durrës, Prokuroria e Durrësit ka nisur hetimet.

Hetimet kanë nisur për 3 vepra penale, “Shpërdorimi i detyrës”, “Shkatërrimi i pronës me përmbytje” dhe “Shkatërrimi i pronës nga pakujdesia”.

“Regjistrimi i këtij procedimi penal erdhi pas situatës së krijuar përgjatë dy ditëve ku për shkak të rreshjeve të vazhdueshme u krijuan problematika reale, të dukshme për personat fizikë, për mirëqënien e tyre por edhe dëme të konsiderueshme”, informoi Prokuroria e Durrësit.

Prokuroria thotë se gjendja e krijuar 2 ditë më parë nga përmbytjet, pengoi “zhvillimin normal i aktiviteteve arsimore, shtetërore, shëndetësore, ka krijuar bllokimin e rrugëve urbane dhe interurbane, përmbytjen e banesave dhe vendosjen në rrezik real të jetës së qytetarëve, përmbytjen e institucionit penitenciar duke vendosur në gjendje emergjente të gjithë qarkun” dhe se në këto kushte ka të dhëna të mjaftueshme dhe të arsyeshme se jemi përpara një fakti penal.

Gjithashtu, hetimet kanë nisur edhe pas vdekjes së punonjësit të komunales.

“Nga të dhënat paraprake ka dyshime që ai ka humbur jetën për shkak se është marrë nga rrjedhja e ujit e shkaktuar në vend”, njofton Prokuroria e Durrësit.

Prokuroria e Durrësit thekson se do të jetë hetimi ai që do të përcaktojë nëse shkaqet e përmbytjes kanë qenë natyrore apo kanë ardhur si pasojë e pakujdesisë apo mospërmbushjes së detyrës nga ana e organeve kompetente shtetërore apo të vetëqeverisjes vendore.

Situata në qarkun e Durrësit mbetet kritike nga përmbytjet, sidomos në Njësitë Administrative Sukth dhe Katund i Ri, ku përmbytja erdhi edhe nga rritja e prurjeve të lumit Erzen, duke rënduar më tej situatën. Emergjencat civile urdhëruan evakuimin e detyrueshëm të banorëve.

The post Shiu përmbyt Durrësin! Prokuroria nis hetim për 3 vepra penale appeared first on Gazeta Si.

Kanë nisur evakuimet në fshatrat e Vlorës dhe Fierit pas përmbytjeve masive të shtëpive dhe tokave bujqësore.

Dalja nga shtrati i Lumit Vjosë ka bërë që Emergjencat Civile të urdhërojnë një evakuim të menjëhershëm të banorëve të Novoselës.

Gjithashtu, si pasojë e situatës së krijuar nga përmbytjet, po kryhet evakuimi edhe i banorëve të fshatit Ferras në Fier.

The post Nisin evakuimet në Vlorë dhe Fier (foto) appeared first on Gazeta Si.

Nga Gazeta Si- Një person është gjetur pa shenja jete, i dyshuar i mbytur, në zonën e Plepave, në qytetin e Durrësit.

Në një njoftim paraprak, policia thotë se viktima Astrit Hysenaj, 54 vjeç ishte shpallur i larguar nga shtëpia ditën e martë dhe pas kërkimeve, trupi i tij i pajetë u gjet në një kanal kullues në afërsi të Ish-repartit Ushtarak. Paraprakisht dyshohet se Hysenaj është marrë nga rrjedha e ujit.

Hysenaj dyshohet se është marrë nga rrjedha e ujit të martën, ditën e përmbytjeve masive në Durrës. Ai punonte pranë ndërmarrjes komunale në plazh dhe dyshohet se ka humbur jetën në krye të detyrës. Lidhur me ngjarjen ka reaguar edhe bashkia e Durrësit.

“Bashkia Durrës informon se Astrit Hysenaj, më datë 6 është paraqitur normalisht në vendin e punës në orën 06:00 dhe ka punuar deri rreth orës 10:30, kohë në të cilën është larguar nga ambientet e punës.

Rreth orës 16:00 të së njëjtës datë, familjarët e Hysenajt kanë kontaktuar përgjegjësin e Ndërmarrjes Komunale për të marrë informacion, pasi ai nuk ishte kthyer në banesë. Pasi janë njoftuar se ai është larguar nga puna, familjarët kanë njoftuar policinë.

Prej 3 ditësh, vendi ynë është pushtuar nga reshjet intensive të shiut, duke përmbytur shtëpi, rrugë dhe toka bujqësore.

The post Regjistrohet viktima e parë nga moti i keq, gjendet i mbytur 54-vjeçari appeared first on Gazeta Si.

Për shkak të protestës që zhvillojnë fermerët në Greqi, aksi rrugor Kakavijë-Janinë nuk do të jetë funksional për qarkullimin e automjeteve për 48 orë duke filluar nga ora 12:00 (me orën greke) ditën e sotme.

Policia e kufitare e Kakavijës njofton se do të lejohet vetëm qarkullimi i mjeteve për emergjenca shëndetësore.

“Aksi rrugor Kakavijë-Janinë, në kryqëzimin e fshatit Kallpaq, do të jetë i bllokuar për shkak të protestës që do të zhvillojnë fermerët. Do të lejohen të qarkullojnë vetëm automjetet që do të kenë emergjenca shëndetësore”, thuhet në njoftimin e policisë.

Protestat e fermerëve nisën në fund të nëntorit për vonesat me dhënien e subvencioneve të BE-së pas një skandali korrupsioni. Ata janë të vendosur të vazhdojnë dhe të intensifikojnë protestat e tyre nëse kërkesat nuk u plotësohen nga qeveria.

The post Greqia e ‘paralizuar’ nga protestat, aksi Kakavijë-Janinë i pakalueshëm për 48 orë appeared first on Gazeta Si.

Një mjet borëpastrues në rrugën e Arbrit ka shkaktuar një aksident të trefishtë.

Teksa po pastronte dëborën në afërsi të tunelit të Murrizit në anën e Klosit, mjeti borëpastrues goditi një automjet tip Volkswagen që lëvizte në drejtim të Tiranës, i cili më pas u përplas edhe me dy automjete të tjera.

Si pasojë e përplasjes janë lënduar disa persona, ndërsa drejtuesi i mjetit Volkswagen u dërgua në spital për ndihmë të specializuar.

The post Borëpastruesja përplas 3 makina në Rrugën e Arbrit, një person përfundon në spital appeared first on Gazeta Si.

Pas reshjeve të dendura të shiut dhe përmbytjeve, vendi është përfshirë edhe nga reshje bore.

Reshje dëbore ka pasur në Bajram Curri-Valbonë, Qafë Morinë, Bulqizë, Peshkopi, Kukës, Pukë dhe Theth.

Probleme të shumta janë shënuar në Rrugën e Arbrit ku që prej orës 07:30, si pasojë e reshjeve të dendura të borës në zonën e Tunelit të Murrizit, disa automjete kanë rrëshqitur duke dalë nga rruga.

Situata ka qenë problematike si në krahun e Tiranës, ashtu edhe në krahun e Klosit, ku rruga ka qenë e bllokuar për më shumë se një orë.

Reshje bore ka edhe në Llogara, Korçë-Voskopojë, Boboshticë-Dardhë.

The post Pas reshjeve të shiut dhe përmbytjeve, në disa qarqe nis dëbora appeared first on Gazeta Si.

Nga Gazeta Si- Rajonet e njohura si zona blu janë zona të vërteta ku njerëzit jetojnë më gjatë dhe kanë shumë më tepër gjasa të arrijnë moshën 100 vjeç, sipas një studimi të ri.

Të ashtuquajturat “zona blu” janë rajone ku njerëzit kanë jetëgjatësi jashtëzakonisht të gjatë dhe ku ka një përqendrim disproporcionalisht të lartë të 90 dhe 100 vjeçarëve.

Termi u shpik pothuajse 20 vjet më parë, por vitet e fundit vlefshmëria e këtyre pretendimeve është sfiduar, me kritikët që vënë në dyshim se sa të sakta janë në të vërtetë moshat e vetë-raportuara. Moshat jashtëzakonisht të vjetra të banorëve të “zonës blu”, argumentojnë ata, janë rezultat i mbajtjes së dobët të të dhënave ose gabimeve administrative.

Tani, një hulumtim i ri ka rishqyrtuar të dhënat dhe ka konfirmuar se disa nga rajonet e njohura si “zona blu” janë të vërteta.

Studimi, i botuar në ‘The Gerontologist’, vuri në dukje se këto zona nuk karakterizoheshin vetëm nga një numër jashtëzakonisht i madh i të moshuarve, por edhe nga shëndeti dhe energjia e jashtëzakonshme që shumë prej tyre e ruajnë në moshë të shtyrë.

“Pretendimet e jashtëzakonshme në lidhje me jetëgjatësinë kërkojnë prova të besueshme”, tha Steven N. Austad, bashkautor i studimit dhe drejtor shkencor në Federatën Amerikane për Kërkime mbi Plakjen.

Sipas autorëve të studimit, për t’u përcaktuar si një zonë blu, një vend duhet të jetë i përcaktuar gjeografikisht, me një përqendrim të lartë të njerëzve që jetojnë të paktën 90 vjeç gjatë 150 viteve të fundit, dhe të dhëna që mund të vërtetojnë certifikatat e lindjes dhe të vdekjes.

Shëndeti i mirë i zgjatur është gjithashtu një vëzhgim i rëndësishëm, shtuan ata, veçanërisht në një kohë kur morbiditeti në jetën e mëvonshme duket se po zgjerohet në shumë pjesë të botës.

Ndërsa gjenetika mund të luajë një rol, hulumtimi gjithnjë e më shumë drejton stilin e jetës, dietën, aktivitetin fizik dhe lidhjen sociale si kontribues qendrorë në jetëgjatësinë me shkallë të ulët të sëmundjeve kronike.

“Validimi i zonave blu, ne besojmë, është i rëndësishëm sepse ka mësime të vlefshme për t’u mësuar dhe frymëzim për t’u mbledhur nga stilet e jetesës që lehtësojnë jetë të gjata dhe të shëndetshme”, shkruan studiuesit.

“Dokumentimi i zhdukjes së zonave blu mund të jetë po aq informues në lidhje me faktorët e stilit të jetës që lidhen me shëndetin më të keq në jetën e mëvonshme.”

Kjo analizë e re konfirmon dy zona gjeografike ku verifikimi i moshës mbështet emërtimin e tyre si zona blu. Ajo gjithashtu rishikon dy vende të tjera që dikur plotësonin kriteret, por nuk mund të klasifikohen më si të tilla.

Cilat ‘zona blu’ janë konfirmuar nga shkenca?

Sardenja, Itali

Zona blu e Sardenjës ndodhet në gjashtë fshatra në pjesën qendrore-lindore të ishullit, një rajon i quajtur Ogliastra.

Këtu, përqindja e 100 vjeçarëve midis njerëzve të lindur midis viteve 1880 dhe 1900 ishte afërsisht pesë herë më e lartë se në pjesën tjetër të Europës dhe tre herë më e lartë se në Sardenjë në tërësi. Ky përqindje është rritur vetëm që nga analiza origjinale.

Ndërsa globalisht më shumë gra se burra arrijnë moshën 100 vjeçare, në këtë pjesë të ishullit, përqindja është afërsisht e barabartë.

Në zonën blu të ishullit, studiuesit vërtetuan moshën e cdo personi mbi 90 vjeç duke kontrolluar arkivat civile dhe kishtare, si dhe duke rindërtuar pemën familjare për të përjashtuar gabimet ose ndërrimet e identitetit.

Ikaria, Greqi

Ikaria është një ishull i vogël grek në detin Egje, me një popullsi prej rreth 8,000 banorësh.

Kur u identifikua për herë të parë si një zonë blu në vitin 2009, përqindja e banorëve të moshës 90 vjec e lart ishte rreth tre herë më e lartë se mesatarja kombëtare dhe anketat konfirmuan një numër të lartë 90-vjeçarësh dhe 100-vjeçarësh në ishull.

Zonat blu që nuk janë më të tilla

Okinawa, Japoni

Në vitin 1976, u raportua për herë të parë se ishulli japonez kishte një përqindje të 100-vjeçarëve shtatë herë më të lartë se pjesa tjetër e vendit.

Por popullsia e Okinaëa-s, e cila në vitin 1999 u konfirmua se përfshinte njerëzit me jetëgjatësinë më të madhe në botë, nuk i plotëson më kërkesat e zonës blu, zbuluan studiuesit.

Vetëm grupmoshat e lindura para vitit 1940 i plotësonin kriteret; deri në vitin 2006, shkalla e 100-vjeçarëve kishte rënë vetëm në rreth dyfishin e asaj të pjesës tjetër të Japonisë.

Që kur u caktua për herë të parë si një zonë blu, luftërat dhe rritja masive e lëvizjeve brenda vendit, pjesa më e madhe e të cilave lidhet me praninë e gjatë ushtarake të Shteteve të Bashkuara në ishull, duket se kanë dëmtuar shëndetin e banorëve të ishullit, raportoi studimi.

Nicoya, Kosta Rika

Nicoya është një tjetër zonë blu që duket se po zvogëlohet. Ajo u përcaktua nga burra të lindur para vitit 1930, shumë prej të cilëve jetuan deri në moshën 100 vjeç. Por ata që lindin më pas kanë më pak gjasa të bëhen 100-vjeçarë, për arsye që janë ende të paqarta, sipas studimit.

Deri në vitin 2010, analizat e reja zbuluan se zona origjinale blu e Nicoya-s ishte zvogëluar në rreth një të katërtën e madhësisë së saj origjinale, ndërsa një zonë e re me jetëgjatësi të jashtëzakonshme ishte shfaqur në tre provinca në Kosta Rikën veriore, pranë kufirit nikaraguaian.

Karakteristikat e përbashkëta dhe zonat e reja blu

Një temë e përbashkët e katër zonave klasike blu është izolimi, tregoi studimi. Sardenja, Ikaria dhe Okinaëa zënë ishuj të tërë, ose pjesë të mëdha ishujsh, ndërsa Nicoya shtrihet në një gadishull që deri vonë ishte i vështirë për t’u arritur.

Sipas studiuesve, ky izolim relativ ka lejuar në secilin rast që zona të zhvillojë gjuhën ose dialektin e vet, si dhe veçantinë e mundshme kulturore dhe gjenetike.

Studiuesit jo vetëm që zbuluan se si disa nga këto zona tkurren, por ata gjithashtu nxorën në pah zona të reja blu që po shfaqen.

Rajonet kandidate në Holandë, Kinë dhe ishullin e Karaibeve Martinikë aktualisht po kalojnë validimin përpara se të pranohen gjerësisht si zona të reja blu moderne.

The post Studimi i ri tregon ‘zonat blu’, vendet ku njerëzit jetojnë më gjatë appeared first on Gazeta Si.

Gjashtë persona kanë vdekur ndërsa bora, akulli dhe temperaturat e ulëta vazhdojnë të shkaktojnë kaos në pjesë të Europës.

Autoritetet në rajonin Landes të Francës jugperëndimore thanë se tre persona vdiqën dhe 15 u plagosën në aksidente rrugore të martën, ndërsa dy të tjerë u vranë në aksidente në zonën e Parisit. Një shofer vdiq në spital të hënën në mbrëmje pasi u përplas në lumin Marne dhe një tjetër ndërroi jetë pas një përplasjeje me një automjet të rëndë mallrash në lindje të kryeqytetit francez.

Në kryeqytetin boshnjak të Sarajevës, një grua vdiq të hënën pasi një degë peme e mbuluar nga bora i ra mbi kokë.

Shumë fluturime janë anuluar nga dy aeroportet kryesore të Parisit, Roissy-Charles de Gaulle dhe Orly, herët të mërkurën për të lejuar ekipet tokësore të pastrojnë borën nga pistat dhe aeroplanët që shkrijnë akullin.

Në Holandë, qindra fluturime u anuluan në aeroportin Schiphol të Amsterdamit, ndërsa stafi punoi për të pastruar pistat dhe për të shkrirë akullin e aeroplanëve. Udhëtarët e trenave në vend u përballën me kaos pasi shërbimet e brendshme u pezulluan herët të martën për shkak të një ndërprerjeje të IT-së, duke përkeqësuar ndërprerjen e shkaktuar nga moti.

Temperaturat e ngrirjes kanë përfshirë pjesën më të madhe të Europës, me termometrin që ra nën -10C në Gjermaninë jugore dhe lindore të martën. Meteorologët gjermanë kanë parashikuar një stuhi në vend të premten, me reshje të dendura dëbore të pritshme në veri dhe lindje.

Në Britani, temperaturat ranë në -12.5C gjatë natës, me dëborën që prishi udhëtimin hekurudhor, rrugor dhe ajror dhe duke detyruar mbylljen e qindra shkollave në rajonet veriore.

Temperaturat në zonat e ulëta të Italisë veriore kanë rënë nën zero, me dëborë në zonat me lartësi mesatare deri të ulët të Emilia-Romagna, Marche dhe Toscana.

Rajonet qendrore dhe jugore në Itali përjetuan erëra të lehta që sollën shira të rrëmbyeshëm. Shirat e pandërprera në Romë kanë fryrë brigjet e lumit Tiber, duke e zbehur bekimin e Epifanisë nga Papa Leo në Sheshin e Shën Pjetrit, i cili ishte vetëm pjesërisht i mbushur pasi mijëra njerëz u mblodhën nën çadra.

Roberto Gualtieri, kryetari i bashkisë së Romës, lëshoi ​​një urdhëresë për të martën duke kufizuar aksesin publik në parqe dhe zona të tjera në rrezik nga rënia e pemëve dhe përmbytjet. Dy pisha të mëdha kanë rënë ditët e fundit për shkak të motit të keq në kryeqytetin italian, njëra në Via dei Fori Imperiali, afër Koloseut, tjetra në Via Appia Nuova.

Reshje të dendura dëbore dhe shiu kanë përfshirë vendet e Ballkanit, duke fryrë lumenjtë dhe duke shkaktuar probleme në trafik dhe duke ndërprerë furnizimin me energji elektrike dhe ujë.

The post Gjashtë persona humbin jetën ndërsa bora, akulli dhe temperaturat e ulëta shkaktojnë kaos në Europë appeared first on Gazeta Si.