Shtëpia e Bardhë po planifikon takimin e parë të liderëve për “Bordin e Paqes” të presidentit Donald Trump, në lidhje me Gazën. Sipas asaj që raporton Axios takimi do të zhvillohet më 19 shkurt në Uashington.

Sipas raportimit, planet për takimin janë ende në fazë të hershme dhe mund të ndryshojnë. Ai parashikohet të mbahet në Institutin Amerikan të Paqes në Uashington dhe pritet të shërbejë edhe si konferencë për mbledhje fondesh për rindërtimin e Gazës.

Axios thekson se kryeministri izraelit Benjamin Netanyahu pritet të takohet me presidentin Trump në Shtëpinë e Bardhë më 18 shkurt, një ditë para takimit të planifikuar për Bordin e Paqes.

Shtëpia e Bardhë dhe Departamenti Amerikan i Shtetit nuk iu përgjigjën kërkesave të mediave për koment.

Në fund të janarit, Trump njoftoi krijimin e këtij bordi, të cilin do ta drejtojë vetë, duke deklaruar se synimi i tij është zgjidhja e konflikteve globale. Iniciativa ka ngritur shqetësime te shumë ekspertë, të cilët paralajmërojnë se një strukturë e tillë mund të minojë rolin e Kombeve të Bashkuara.

Reagimet e qeverive në mbarë botën ndaj ftesës së Trump-it kanë qenë të kujdesshme. Disa aleatë të SHBA-ve në Lindjen e Mesme i janë bashkuar nismës, ndërsa shumë aleatë tradicionalë perëndimorë kanë zgjedhur të qëndrojnë jashtë saj.

Ndërkohë më 28 janar Shqipëria u bë zyrtarisht anëtare e Bordit të Paqes. Para kësaj, parlamenti miratoi me 110 vota pro nga mazhoranca dhe opozita që të autorizojnë kreun e qeverisë për të përfaqësuar Shqipërinë në këtë organizatë. Aktualisht Bordi i Paqes ka 26 vende, mes të cilave edhe Kosova. Ajo pritet të zgjerohet me shtete të tjera.

Një rezolutë e Këshillit të Sigurimit të OKB-së, e miratuar në mes të nëntorit, autorizoi bordin dhe vendet që bashkëpunojnë me të që të krijojnë një forcë ndërkombëtare stabilizimi në Gaza, ku një armëpushim i brishtë nisi në tetor, sipas një plani të Trump-it të pranuar nga Izraeli dhe grupi militant palestinez Hamas.

Sipas planit të Trump-it për Gazën, i zbuluar në fund të vitit të kaluar, bordi do të mbikëqyrte qeverisjen e përkohshme të Gazës. Më pas, Trump deklaroi se mandati i tij do të zgjerohej edhe për trajtimin e konflikteve globale.

Shqipëria po humbet gradualisht pozicionin e saj në tregtinë me vendet e rajonit (Kosovë, Maqedoni e Veriut, Serbi, Bosnjë dhe Hercegovinë dhe Mali i Zi), teksa të dhënat për vitin 2025 tregojnë përkeqësim të ndjeshëm të bilancit tregtar, të nxitur kryesisht nga rënia e eksporteve dhe rritja e importeve.

Produktet shqiptare po bëhen jokonkurruese me vendet e Ballkanit, por edhe më gjerë si rrjedhojë e rënies së vlerës së euros, rritjes së kostove të brendshme dhe mungesës së politikave fiskale që nxisin prodhimin me kosto të ulët.

Eksportet shqiptare drejt rajonit në vitin 2025 ranë në 62.7 miliardë lekë, nga 67.5 miliardë lekë në vitin 2024, duke shënuar tkurrje vjetore me rreth 7%. Në të njëjtën kohë, importet u rritën në 59.4 miliardë lekë, nga 54.7 miliardë lekë një vit më parë, ose gati 8% më shumë, sipas të dhënave zyrtare nga INSTAT.

Këto zhvillime kanë përkeqësuar ndjeshëm bilancin tregtar. Në vitin 2024, Shqipëria kishte një suficit prej 12.8 miliardë lekësh në tregtinë me rajonin, ndërsa në vitin 2025 ai u ngushtua në vetëm 3.3 miliardë lekë, një përkeqësim prej afro 9.5 miliardë lekësh brenda një viti, me tkurrje rreth 280%. Vendi ynë humbi avantazhin që kishte ndërtuar gjatë viteve të fundit në tregjet fqinje.

Të dhënat tregojnë se problemi nuk qëndron vetëm te rritja e importeve, por sidomos te dobësimi i eksporteve, të cilat kishin arritur kulmin në vitin 2023 me mbi 79 miliardë lekë, por prej atëherë janë në rënie të vazhdueshme. Brenda dy vitesh, eksportet drejt rajonit kanë humbur më shumë se 16 miliardë lekë në vlerë.

Kjo prirje sugjeron se prodhuesit shqiptarë po humbin terren në tregjet e rajonit, përballë konkurrencës më të fortë nga vendet fqinje, kostove më të larta të prodhimit dhe një strukture eksporti ende të varur nga produkte me vlerë të ulët të shtuar.

Nëse kjo tendencë vazhdon, tregtia me rajonin, e cila tradicionalisht ka qenë një nga pikat më të forta të eksporteve shqiptare, rrezikon të kthehet në një tjetër kanal presioni mbi bilancin tregtar të vendit. Në kushtet kur edhe tregjet e BE-së po shfaqin ngadalësim, humbja e terrenit në rajon e bën edhe më të brishtë pozicionin e jashtëm të ekonomisë shqiptare.

Ruzhdi Koni, eksportues i prodhimeve të freskëta bujqësore, tha se edhe këtë vit, përkeqësimi do të thellohet për shkak të dëmeve që krijuan përmbytjet e fundit në fusha dhe në serra, shumica e tyre për eksport.

Nga eksportet në rajon, grupet me rënien më të madhe ishin materialet e ndërtimit, energjia dhe lëndët djegëse, të diktuara nga cikli i tkurrjes që po kalon sektori i industrisë.

Volumi tregtar i Shqipërisë me rajonin ishte 122 miliardë lekë në vitin 2025, pothuajse në të njëjtin nivel me 2024-n, dhe zuri 9.9% të volumit të përgjithshëm tregtar të vendit me jashtë.

Kosova është partneri kryesor tregtar me gati 43% të tregtisë me të gjithë rajonin, e ndjekur nga Serbia me 26%, Maqedonia e Veriut me 19.5% dhe të tjerat më pak.

Serbia po thellon epërsinë ndaj Shqipërisë, deficiti tregtar rritet edhe në vitin 2025

Tregtia e Shqipërisë me Serbinë po lëviz gjithnjë e më shumë në disfavor të ekonomisë shqiptare, duke u shndërruar në një nga pikat më problematike të bilancit tregtar me rajonin. Të dhënat për vitin 2025 tregojnë se, pavarësisht rritjes të lehtë të eksporteve, deficiti tregtar me Serbinë është thelluar edhe më tej.

Eksportet shqiptare drejt Serbisë arritën në 8.55 miliardë lekë në vitin 2025, nga 8.27 miliardë lekë në vitin 2024, duke shënuar një rritje modeste prej 3.3%. Megjithatë, kjo rritje nuk ka qenë e mjaftueshme për të kompensuar zgjerimin e importeve nga Serbia, të cilat u rritën me 5.8%, duke arritur në 23.1 miliardë lekë.

Si rezultat, deficiti tregtar i Shqipërisë me Serbinë u thellua në 14.56 miliardë lekë në vitin 2025, nga 13.50 miliardë lekë një vit më parë, një përkeqësim prej mbi 1 miliard lekësh vetëm brenda një viti.

Kjo do të thotë se për çdo 1 lek që Shqipëria eksporton drejt Serbisë, ajo importon gati 2.7 lekë mallra serbe, duke e bërë marrëdhënien tregtare të pabalancuar. Nëse krahasohen me vitin 2022, kur eksportet drejt Serbisë kishin arritur një kulm prej 13.5 miliardë lekësh, rënia është edhe më e fortë. Brenda tre vitesh, eksportet shqiptare drejt tregut serb u tkurrën me rreth 5 miliardë lekë (rreth 50 milionë euro), ndërsa importet mbeten të larta dhe relativisht të qëndrueshme.

Goditja më e fortë është te materialet e ndërtimit dhe metalet, ku eksportet shqiptare ranë me rreth 805 milionë lekë ose 7% vetëm në vitin 2025. Grupi tjetër me rënien më të fortë, 24%, ishin mineralet, lëndët djegëse dhe energjia elektrike, me afro 382 milionë lekë ose -24% më pak eksporte, çka tregon se Shqipëria po humb edhe në segmentet ku kishte avantazh kostoje.

Nga ana tjetër, importet e ushqimeve dhe pijeve nga Serbia u rritën me mbi 617 milionë lekë në vitin 2025 ose 5.5%, duke reflektuar rritjen e varësisë së tregut shqiptar nga produktet ushqimore serbe. Edhe importet e produkteve kimike dhe plastike u rritën me rreth 249 milionë lekë ose 8.2%, ndërsa materialet e ndërtimit dhe metalet u shtuan me afro 290 milionë lekë, ose 7.5%.

Të dhënat tregojnë se Serbia po zgjeron praninë e saj në Shqipëri, si furnizues jo vetëm i ushqimeve, por edhe i produkteve industriale, duke e shtyrë prodhimin vendas drejt një konkurrence gjithnjë e më të vështirë.

Të dhënat sugjerojnë se prodhuesit shqiptarë po humbasin hapësirë në tregun serb, ndërkohë që mallrat serbe po forcojnë praninë e tyre në tregun shqiptar. Kjo tendencë reflekton dobësinë strukturore të eksporteve shqiptare, të përqendruara në produkte me vlerë të ulët të shtuar dhe me kapacitete të kufizuara për të depërtuar në tregje më të mëdha.

Në kontekstin rajonal, Serbia po shfaqet gjithnjë e më shumë si një “qendër eksportuese” e Ballkanit Perëndimor, ndërsa Shqipëria po rrezikon të mbetet treg konsumi.

Shqipëria po humb edhe tregun e Kosovës, suficiti bie me 20% brenda një viti

Kosova, tradicionalisht tregu më i rëndësishëm rajonal për eksportet shqiptare, po jep shenja ftohjeje për mallrat nga Shqipëria. Të dhënat për vitin 2025 tregojnë se eksportet shqiptare drejt Kosovës ranë në 33.65 miliardë lekë, nga 36.83 miliardë lekë në vitin 2024, me tkurrje vjetore prej 9.5%. Kjo është rënia më e fortë vjetore e eksporteve drejt Kosovës gjatë pesë viteve të fundit të marra në analizë.

Humbja më e madhe vjen nga materialet e ndërtimit dhe metalet, ku eksportet janë tkurrur me rreth 8.7 miliardë lekë brenda një viti, ose 73% më pak. Furnizuesit nga Serbia, Maqedonia e Veriut dhe Turqia po zëvendësojnë gjithnjë e më shumë produktet shqiptare në sektorë si çimentoja, hekuri, alumini dhe materialet e ndërtimit.

Edhe produktet kimike dhe plastike kanë pësuar rënie të fortë prej mbi 1 miliard lekësh ose 28%, duke konfirmuar se Kosova nuk po humbet vetëm si treg konsumi, por edhe si hapësirë për industrinë përpunuese shqiptare.

Në të njëjtën kohë, importet nga Kosova drejt Shqipërisë u rritën me 2.3%, duke arritur në 16.13 miliardë lekë.

Importet e mineraleve, lëndëve djegëse dhe energjisë elektrike u rritën me mbi 1.4 miliardë lekë, ose 35%, si pasojë e blerjeve të energjisë elektrike, pjesë e marrëveshjeve për shkëmbimin e energjisë.
Edhe importet e produkteve kimike dhe plastike u rritën me mbi 120 milionë lekë ose 9.5%, ndërsa tekstilet dhe këpucët u shtuan ndjeshëm me rreth 29.5%.

Si pasojë, suficiti tregtar i Shqipërisë me Kosovën ra në 17.52 miliardë lekë në vitin 2025, nga 21.07 miliardë lekë në vitin 2024, një përkeqësim prej 3.54 miliardë lekësh, ose mbi 20%, brenda vetëm një viti.

Rënia është edhe më e thellë nëse krahasohet me vitin 2023, kur suficiti kishte arritur mbi 29 miliardë lekë. Brenda dy vitesh, Shqipëria ka humbur rreth 12 miliardë lekë suficit në tregtinë me Kosovën.

Ky zhvillim ka një peshë të veçantë, sepse Kosova përbën destinacionin më të madh rajonal për eksportet shqiptare. Dobësimi i këtij tregu dëshmon probleme më të thella në prodhimin shqiptar, pasi me Kosovën barrierat doganore janë minimale dhe avantazhi i gjuhës duhet të favorizonte Shqipërinë.

Edhe Maqedonia e Veriut po largohet nga mallrat shqiptare

Shqipëria po humbet terren edhe në tregtinë me Maqedoninë e Veriut, një tjetër partner i rëndësishëm rajonal, duke e kthyer këtë marrëdhënie nga suficit në një burim të ri deficiti tregtar.

Në vitin 2025, eksportet shqiptare drejt Maqedonisë së Veriut ranë ndjeshëm në 8.99 miliardë lekë, nga 11.8 miliardë lekë në vitin 2024, rënie vjetore prej gati 24%. Kjo është rënia më e fortë e eksporteve drejt këtij tregu gjatë pesë viteve të fundit.

Rënia më e fortë e eksporteve drejt Maqedonisë së Veriut është për “materialet e ndërtimit dhe metalet”, me afro 3 miliardë lekë më pak ose -65% eksporte, duke e kthyer këtë treg nga një burim suficiti në deficit të pastër për Shqipërinë.

Grupi i dytë me ndikimin më të lartë ishin eksportet e mineraleve dhe energjisë, të cilat janë tkurrur ndjeshëm me 8%. Ndërkohë, importet nga Maqedonia e Veriut drejt Shqipërisë u rritën me 16.7%, duke arritur në 14 miliardë lekë në vitin 2025, nga 12.06 miliardë lekë një vit më parë.

Rritja e importeve është edhe më e fortë dhe më e gjerë me Maqedoninë e Veriut. Importet e mineraleve dhe energjisë u rritën me mbi 2.4 miliardë lekë, ose 128% vitin e kaluar, duke u bërë burimi kryesor i rritjes së tregtisë me këtë vend.

Edhe importet e ushqimeve u rritën me 7%, makineritë dhe pajisjet me 42%, ndërsa tekstilet dhe produktet e drurit shënuan rritje të ndjeshme. Vetëm materialet e ndërtimit pësuan rënie të fortë, me mbi 1.1 miliardë lekë më pak importe, por kjo nuk e kompenson rritjen e fortë të importeve në grupet e tjera të mallrave. Kjo do të thotë se Shqipëria po varet gjithnjë e më shumë nga Maqedonia e Veriut për furnizime energjetike dhe mallra industriale.

Në vitet 2022 dhe 2023, Shqipëria kishte epërsi në tregtinë me Maqedoninë e Veriut, por e humbi këtë avantazh në dy vitet në vijim. Bilanci tregtar u përkeqësua ndjeshëm. Nga një deficit relativisht i moderuar prej 261 milionë lekësh në vitin 2024, Shqipëria kaloi në një deficit të thellë prej 5.09 miliardë lekësh në vitin 2025, një përkeqësim prej mbi 4.8 miliardë lekësh brenda një viti.

Kjo përmbysje reflekton rënie të shpejtë të konkurrueshmërisë së eksporteve shqiptare në vendin fqinj, ndërkohë që mallrat nga Maqedonia e Veriut po fitojnë terren në tregun shqiptar.

Mali i Zi, i vetmi treg ku Shqipëria po reziston

Në vitin 2025, Mali i Zi mbeti i vetmi partner fqinj ku Shqipëria arriti të ruajë një pozicion relativisht të qëndrueshëm. Në vitin 2025, eksportet shqiptare drejt Malit të Zi arritën në 8.0 miliardë lekë, nga 7.47 miliardë lekë në vitin 2024, duke shënuar një rritje prej 7.3%.

Edhe me këtë vend, i cili në total mbetet treg pozitiv për Shqipërinë, struktura e eksporteve po dobësohet. Materialet e ndërtimit dhe metalet janë në rënie të ndjeshme, ndërsa tekstilet po humbin gjithashtu terren. Rritja e eksporteve vjen nga energjia dhe ushqimet, por këta janë sektorë më të paqëndrueshëm dhe me marzhe më të ulëta krahasuar me industrinë përpunuese.

Importet nga Mali i Zi u rritën me 20.2%, duke arritur në 3.06 miliardë lekë vitin e kaluar, por kjo rritje nuk ka qenë e mjaftueshme për të përmbysur bilancin pozitiv. Importet u rritën kryesisht për produktet ushqimore dhe energjinë dhe lëndët djegëse.

Shqipëria ruajti një suficit tregtar prej 4.95 miliardë lekësh me Malin e Zi në vitin 2025, pothuajse në të njëjtin nivel me vitin 2024. Krahasuar me vitin 2023, kur suficiti me Malin e Zi kishte arritur në 7.25 miliardë lekë, Shqipëria ka humbur mbi 2.3 miliardë lekë avantazh neto në këtë treg.

Kjo do të thotë se edhe tregu më i favorshëm për eksportet shqiptare po tregon shenja ngadalësimi, ndërkohë që rritja e importeve nga Mali i Zi po e ngushton gradualisht hapësirën për suficit.

Në një rajon ku Shqipëria po humbet terren pothuajse në çdo shtet, qëndrueshmëria me Malin e Zi nuk mjafton për të kompensuar rënien e fortë të pozicioneve në Serbi, Kosovë dhe Maqedoninë e Veriut.

Bosnja nga treg dytësor, në burim presioni për bilancin tregtar

Tregtia e Shqipërisë me Bosnjë-Hercegovinën po humbet gradualisht ekuilibrin, duke u shndërruar nga një marrëdhënie pothuajse e balancuar në një tjetër burim presioni për bilancin tregtar të vendit tonë.

Në vitin 2025, eksportet shqiptare drejt Bosnjës u rritën në 3.5 miliardë lekë, nga 3.1 miliardë lekë në vitin 2024, një rritje prej 13.1%. Por kjo rritje nuk mjaftoi për të kompensuar rritjen edhe më të shpejtë të importeve nga Bosnja drejt vendit tonë Importet nga Bosnja arritën në 2.9 miliardë lekë në vitin 2025, nga 2.5 miliardë lekë një vit më parë, duke u rritur me 19%.

Si rezultat, suficiti tregtar i Shqipërisë me Bosnjë-Hercegovinën ra në 512 milionë lekë në vitin 2025, nga 585 milionë lekë në vitin 2024, një përkeqësim prej rreth 72 milionë lekësh ose mbi 12%.

Në Bosnjë dhe Hercegovinë, eksportet shqiptare në total janë rritur, por struktura e rritjes është e dobët, sepse grupet industriale janë në rënie. Tekstilet dhe këpucët, makineritë dhe materialet e ndërtimit kanë shënuar rënie, ndërsa rritja vjen kryesisht nga ushqimet dhe mineralet. Shqipëria po humb terren në produktet me vlerë më të lartë të shtuar, ndërsa po mbetet furnizues i mallrave më elementare.

Ndërsa struktura e importeve nga Bosnja tregon një zhvendosje të fortë. Importet e materialeve të ndërtimit u rritën me 47%, prodhimet e drurit dhe letrës me 27%, tekstilet dhe këpucët me 23%. Bosnja po bëhet gjithnjë e më shumë një furnizues i lëndëve të para për tregun shqiptar.

Rrugë e vështirë për tregun e përbashkët rajonal

Nga nisja e Procesit të Berlinit në vitin 2014, tregtia në Ballkanin Perëndimor është bërë më e lehtë në procedura, por zbatimi i tyre ndeshet ende me vështirësi, duke penguar arritjen e shpejtë të objektivit të tregtisë pa kufij.

Procesi i Berlinit solli për herë të parë një përpjekje të bashkërenduar nga të gjashtë vendet e rajonit, së bashku me BE-në, për ta trajtuar tregtinë jo si çështje dypalëshe, por si një hapësirë të vetme ekonomike që duhet të funksionojë me rregulla të përbashkëta.

Kjo u përkthye në krijimin e Tregut të Përbashkët Rajonal, në marrëveshje për njohjen e ndërsjellë të certifikatave, në digjitalizimin e dokumenteve doganore dhe në krijimin e korridoreve të gjelbra, që synojnë të ulin kohën e pritjes së kamionëve në kufij dhe kostot e tranzitit.

Kjo do të thotë se sot, një kompani nga Shqipëria që eksporton në Serbi, Kosovë apo në Maqedoninë e Veriut përballet me më pak dokumente, më pak kontrolle të dyfishta dhe më shumë procedura të standardizuara sesa një dekadë më parë.
Përpara 2014-s, CEFTA ekzistonte, por ishte kryesisht një marrëveshje tarifore; Procesi i Berlinit e zhvendosi fokusin te barrierat jotarifore, pra te gjërat që realisht e bllokonin tregtinë, të tilla si certifikatat që nuk njiheshin, kontrollet veterinare të përsëritura, rregullat e ndryshme teknike etj.

Megjithatë, lehtësimi ka qenë i pjesshëm dhe i pabarabartë. Tregtia aktualisht është më e lirë dhe më e integruar, por kufijtë ende mbeten pengesa të forta në disa raste, sidomos për mallrat ushqimore, produktet bujqësore dhe dërgesat me vlerë të ulët.

Shpesh vendet i zbatojnë marrëveshjet vetëm kur u leverdis politikisht ose ekonomikisht, duke krijuar herë pas here tensione, vonesa, kontrolle shtesë apo ndalime të përkohshme. Edhe pse korniza e Procesit të Berlinit ka ulur kostot strukturore të tregtisë, potenciali i tregut rajonal ende nuk është shfrytëzuar plotësisht.

Ballkani Perëndimor është në një treg që nuk funksionon pa fërkime. Përfitimi për ekonominë e rajonit në tërësi mbetet ende nën potencialin që ishte synuar./Monitor

Një 55-vjeçar nga fshati Koblarë është shpallur i humbur prej tre ditësh. A2 CNN raporton se bëhet fjalë për Flamur Takon, i cili më 4 shkurt 2026, në orët e mbrëmjes, është nisur drejt fshatit Trebickë për të çuar bagëtinë, por në kthim nuk është kthyer më në banesë dhe që prej asaj dite nuk ka asnjë kontakt me familjen.

Sipas familjarëve, telefonatat kanë qenë të pamundura dhe çdo përpjekje për ta gjetur ka rezultuar e pasuksesshme.

I biri i 55-vjeçarit ka bërë denoncim zyrtar në polici, ndërsa strukturat përkatëse kanë nisur kërkimet për gjetjen e tij.

Familja apelon për ndihmë dhe kërkon që kushdo që ka informacion mbi vendndodhjen e Flamur Takos, të kontaktojë menjëherë policinë ose familjarët.

Policia e Shkodrës ka finalizuar me sukses operacionin policor të koduar “Reagimi”, duke identifikuar dhe arrestuar brenda pak orësh autorin e dyshuar të dy tentativave për grabitje me dhunë.

Autori 24 vjeçar, M. M.,  u gjet i fshehur në tavanin e banesës së tij, ku kishte tentuar t’i shmangej Policisë.

Sipas njoftimit zyrtar, mbrëmjen e djeshme, në lagjen “Vasil Shanto”, ai dyshohet se ka tentuar të vjedhë me dhunë filialin e Postës Shqiptare, duke kërcënuar punonjësit me thikë. Gjatë largimit, ka thyer xhamin e sportelit dhe është larguar me një biçikletë të vjedhur.

Pak minuta më vonë, në lagjen “Fahri Ramadani”, dyshohet se ka tentuar sërish të kryejë vjedhje me dhunë në një market, po nën kërcënimin e thikës.

 Ndërsa gjatë largimit, në lagjen “Skënderbeg”, ka vjedhur edhe një biçikletë tjetër.

NJOFTIMI I POLICISË:

Si rezultat i veprimeve të shpejta hetimore dhe ndjekjes pa ndërprerje, të kryera nga specialistët për Hetimin e Krimeve të Komisariatit të Policisë Shkodër, në bashkëpunim me Sektorin për Krimet e Rënda, me mbështetjen e forcës së posaçme “Shqiponja” dhe nën drejtimin e Prokurorisë Shkodër, në kuadër të operacionit policor të koduar “Reagimi”, u identifikua dhe u arrestua shtetasi:
M. M., 24 vjeç, banues në fshatin Guci e Re, i cili ishte fshehur në tavanin e banesës së tij për t’ju shmangur Policisë.

Ky shtetas dyshohet se mbrëmjen e djeshme, në lagjen “Vasil Shanto”, duke kërcënuar me një mjet prerës (thikë), ka tentuar të vjedhë me dhunë në filialin e Postës Shqiptare.

Gjatë largimit, ka thyer xhamin e sportelit dhe është larguar me një biçikletë të vjedhur.

Gjithashtu, pak minuta më pas, dyshohet se ka tentuar sërish, po me kërcënimin e mjetit prerës (thikë), të vjedhë me dhunë një subjekt market në lagjen “Fahri Ramadani”.

Gjatë largimit, në lagjen “Skënderbeg”, dyshohet se ka vjedhur një biçikletë tjetër.

Shërbimet e Policisë gjatë kontrollit të banesës së këtij shtetasi gjetën dhe sekuestruan, në cilësinë e provës materiale, rrobat që ka përdorur gjatë kryerjes së veprës penale, si dhe biçikletat e vjedhura.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprat penale, “Vjedhja e bankave dhe arkave të kursimit”, e mbetur në tentativë, “Vjedhja me dhunë”, “Vjedhja” dhe “Prodhimi, mbajtja, blerja apo shitja pa leje e armëve të ftohta”.

Dashi – Në dashuri do të keni mundësi që të zgjidhni problemet në çift, në sajë të kalimit tranzit të Venusit. Në punë do të keni dëshirë për ndryshim. Këshillohet që të mos krijoni polemika të kota.

Demi – Do të nisë gradualisht një fazë rikuperimi. Në dashuri gjërat ecin mirë, por sërish ju do të jeni nervoz. Në punë dhe me çështjet financiare, do të keni shumë gjëra për të menduar dhe sistemuar. Kjo për shkak se fitimet nuk janë ashtu siç i kishit menduar.

Binjakët – Dashuria do të jetë nën ritmin e duhur, pasi mund të ketë momente krize me njeriun e zemrës, të cilat duhen kaluar. Është momenti për të menduar për të ardhmen si dhe për të vlerësuar ofertat e punës.

Gaforrja – Ky është një moment rikuperimi sa i takon punës, ku gjërat do të nisin që të ecin më mirë. Dashuria do të jetë e mbushur me pasiguri, pasi mund të keni pengje nga e kaluara.

Luani – Duhet të mundoheni që të shmangni problemet dhe debatet, ndonëse do e keni mjaft të vështirë. Në dashuri, takimet janë mjaft të favorizuara. Në punë, duhet të rrini të përqendruar dhe të vëmendshëm.

Virgjëresha – Mundohuni që të jeni sa më pozitiv, pasi nervozizmi dhe stresi do të jenë në nivele shumë të larta. Në dashuri nëse ka pasur probleme, është momenti për ti zgjidhur. Hëna në shenjën tuaj, do ju ndihmojë që të bëni projekte me rëndësi.

Peshorja – Dita do të jetë mjaft pozitive për të lindurit e kësaj shenje. Në dashuri problemet mund të zgjidhen, madje janë mjaft të favorizuara ndryshimet pozitive. Në punë, do të keni mundësi që të merrni një rol të rëndësishëm.

Akrepi – Duhet të përqendroheni dhe të shmangni debatet. Në dashuri shqetësimet kryesore do të vijnë nga situata ekonomike që po jetoni. Puna do të përmirësohet gradualisht, por momentalisht bëni durim.

Shigjetari – E shtuna do të jetë nën ritmin e duhur, pasi Hëna dhe Venusi do të kenë ndikim të kundërt. Në dashuri, mund të ketë probleme, debate, por edhe dyshime. Në punë, gjërat nuk do të ecin siç dëshironi.

Bricjapi – Ky është momenti për të zgjidhur disa probleme dhe për të jetuar më mirë dashurinë. Mund të lindë një histori dashurie me dikë që nuk e prisni. Po ashtu mund të ndjeni bezdi nga njerëzit që iu rrethojnë.

Ujori – Duhet të mundoheni që të relaksoheni. Në dashuri gjërat do të ecin mirë dhe nëse keni përjetuar një ndarje, kjo periudhë premton takime interesante. Gjithashtu mund të përballeni me probleme në punë, të cilat kërkojnë zgjidhje. Kujdes duhet treguar me paratë.

Peshqit- Ju pret një ditë e mbushur me tension, ndaj bëni mirë që të mos krijoni polemika të kota. Në dashuri, situata do të jetë e komplikuar. Historitë e lindura prej pak kohësh, mund të mos rezultojnë të frytshme. Në punë, duhet të tregoni kujdes maksimal.

Policia e Korçës ka goditur një tjetër rast të emigrantëve që tentojnë të kalojnë ilegalisht kufirin.

Në pranga ka rënë një 24-vjeçar nga Sudani. Sipas njoftimit zyrtar, ai ndihmoi 6 emigrantë për të kaluar kufirin nga Greqia, në drejtim të vendit tonë me qëllim destinacionin një nga vendet e BE-së.

Ndërkohë në gjendje të lirë do të hetohet edhe një tjetër. 30-vjeçari dyshohet se ka kaluar ilegalisht në Greqi.

NJOFTIMI:

Vijojnë operacionet e Policisë për goditjen e veprimtarive të paligjshme që lidhen me dhënien e ndihmës emigrantëve për kalimin e kufijve në mënyrë të kundërligjshme.
Në këtë kuadër, strukturat e Drejtorisë Vendore për Kufirin dhe Migracionin Korçë kanë finalizuar me sukses operacionin policor të koduar “Itinerari 2”, si rezultat i hetimeve dhe punës intensive operacionale për parandalimin dhe goditjen e këtij aktiviteti kriminal.

Gjatë operacionit u arrestua në flagrancë shtetasi M. J., 24 vjeç, banues në Darfur, Sudan, i cili dyshohet se ka ndihmuar, kundrejt përfitimit financiar, 6 emigrantë për të kaluar ilegalisht kufirin nga Greqia në territorin e Shqipërisë, me destinacion përfundimtar një nga vendet e Bashkimit Evropian.
Ky shtetas u kap nga shërbimet e Policisë Kufitare në vendin e quajtur “Fusha e Parë”, mbi fshatin Drenovë, në qarkun e Korçës.

Ndërkohë, specialistët për Hetimin e Krimeve të DVKM Korçë referuan materialet në Prokurori dhe nisën procedimin penal për veprën penale “Kalimi i paligjshëm i kufirit shtetëror” ndaj shtetasit O. C., 30 vjeç, banues në Elbasan, i cili dyshohet se ka kaluar ilegalisht kufirin në drejtim të Greqisë.
Policia vijon punën për identifikimin dhe nxjerrjen përpara përgjegjësisë penale të shtetasve të tjerë të përfshirë në këtë veprimtari të paligjshme.

Materialet procedurale për këto raste i janë referuar Prokurorisë së Korçës, për veprime të mëtejshme ligjore.

Ish-Avokati i Popullit, Erinda Ballanca, e ftuar në studion e “ÇdoKënd” nga Merita Haklaj, në A2CNN, foli për ndalimin e Ilir Metës.

“Unë dua të them që Avokati i Popullit nuk jep komente në lidhje me besueshmërinë apo jo të vendimmarrjeve qoftë të gjykatave qoftë të prokurorisë, përsa i përket hetimit penal dhe ose vendimmarrjes së tyre për rastet individuale konkrete. Pra, ne nëse kemi një koment për të bërë, e bëjmë vetëm në lidhje me zbatimin e të drejtave të tyre si qytetarë. Në rastin e zotit Meta ne kemi pasur dy rekomandime. Rekomandimi i parë ka pasur të bëjë me mënyrën se si u zbatua masa e arrestit ndaj tij. Pra, nëse masa e arrestit ka qenë një masë e cila është marrë nga organet kompetente, është marrë në mbështetje të ligjit në fuqi, të paktën në pamje të parë”, tha Ballanca.

“Ne si Avokat i Popullit nisëm rastin me iniciativë nga ana jonë dhe pastaj ka pasur dhe ankesë nga avokatët e zotit Meta. Disa nga pretendimet e tij nuk u gjetën të bazuara, në mënyrë të veçantë ushtrimi i dhunës apo rrëmbimi i tij. Në vlerësimin e Avokatit të Popullit nuk gjetën mbështetje dokumentare, por mënyra e ndalimit të tij nuk plotësonte standardin e trajtimit dinjitoz”, shtoi Ballanca.

Kryeministri Edi Rama e ka nisur këtë të shtunë me pamje nga pista e skive në fshatin Dardhë të Korçës, duke uruar qytetarët për një fundjavë të mbarë.

“Mirëmëngjes, dhe me energjinë e bukur nga fshati Dardhë në Korçë, ju uroj një fundjavë të mbarë”, shkruan kryeministri Rama krahas fotove.

Fshati piktoresk i Dardhës në Korçë tërheq një numër të madh vizitorësh, të cilët shijojnë bukuritë natyrore dhe turizmin dimëror.

Ditën e shtunë vendi ynë do të vijojë të ndikohet nga kushte atmosferike të paqëndrueshme.

Moti parashikohet me vranësira mesatare e të dendura por nuk do të mungojnë dhe altarnime të herëpashershme kthjellimi.

Reshjet e shiut të herëpashershme me intensitet të ulët priten të jenë prezente që në orët e para të 24-orëshit deri në mëngjes në pjesën më të madhe të vendit, ndërsa në zonën qendrore reshje shiu me intensitet mesatar.

Gjatë ditës reshjet do të mbeten prezente të herëpashershëm me intensitet të ulët, ndërsa në veriperëndim dhe qendër reshje shiu me intensitet lokalisht deri mesatar në formën e shtrëngatave afatshkurtra. Në zonën e Alpeve dhe në majat e maleve reshje bore me intensitet të ulët.

Temperaturat maksimale pritet të rrijnë deri në 17 gradë celcius, ndërsa ato minimale deri në 6 gradë celcius.

Era do të fryjë me drejtim kryesor juglindje-jugperëndim me shpejtësi mesatare 6 m/s, përgjatë vijës bregdetare dhe në zonat luginore era me shpejtësi deri në 12 m/s.

Valëzimi në detet Jon dhe Adriatik do të jetë forcës 2-4 ballë.

Last Updated on 07/02/2026 by EL

Policia e Shkodrës ka arrestuar brenda pak orësh një 24-vjeçar, i cili dyshohet se tentoi të grabiste me thikë një filial të Postës Shqiptare dhe një subjekt tregtar. I riu nga fshati Guci e Re, u gjet i fshehur në tavanin e banesës së tij për t’iu shmangur Policisë.

Sipas uniformave blu, i riu tentoi të vidhte me dhunë në filialin e Postës Shqiptare në lagjen “Vasil Shanto”, ndërsa më pas edhe në një market në lagjen “Fahri Ramadani”, duke kërcënuar me thikë. Ndërsa gjatë largimit, ai dyshohet se vodhi dy biçikleta.

Gjatë kontrollit të banesës u sekuestruan dy biçikletat e vjedhura dhe rrobat e përdorura gjatë kryerjes së veprave penale.

Njoftimi i Policisë Shkodër / Finalizohet operacioni policor “Reagimi”

Tentoi të merrte me dhunë, nën kërcënimin e thikës, shuma parash në filialin e Postës Shqiptare dhe në një subjekt tregtar, Policia identifikon brenda pak orësh dhe vë në pranga autorin e dyshuar.

Sekuestrohen 2 biçikleta të vjedhura dhe disa nga rrobat që ka përdorur gjatë kryerjes së kësaj vepre penale.

Si rezultat i veprimeve të shpejta hetimore dhe ndjekjes pa ndërprerje, të kryera nga specialistët për Hetimin e Krimeve të Komisariatit të Policisë Shkodër, në bashkëpunim me Sektorin për Krimet e Rënda, me mbështetjen e forcës së posaçme “Shqiponja” dhe nën drejtimin e Prokurorisë Shkodër,  në kuadër të operacionit policor të koduar  “Reagimi”, u identifikua dhe u arrestua shtetasi:

M. M., 24 vjeç, banues në fshatin Guci e Re, i cili ishte fshehur në tavanin e banesës së tij  për t’ju shmangur Policisë.

Ky shtetas dyshohet se mbrëmjen e djeshme, në lagjen “Vasil Shanto”, duke kërcënuar me një mjet prerës (thikë), ka tentuar të vjedhë me dhunë në filialin e Postës Shqiptare.

Gjatë largimit, ka thyer xhamin e sportelit dhe është larguar me një biçikletë të vjedhur.

Gjithashtu, pak minuta më pas, dyshohet se ka tentuar sërish, po me kërcënimin e mjetit prerës (thikë), të vjedhë me dhunë një subjekt market në lagjen “Fahri Ramadani”.

Gjatë largimit, në lagjen “Skënderbeg”, dyshohet se ka vjedhur një biçikletë tjetër.

Shërbimet e Policisë gjatë kontrollit të banesës së këtij shtetasi gjetën dhe sekuestruan, në cilësinë e provës materiale, rrobat që ka përdorur gjatë kryerjes së veprës penale, si dhe biçikletat e vjedhura.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprat penale, “Vjedhja e bankave dhe arkave të kursimit”, e mbetur në tentativë, “Vjedhja me dhunë”, “Vjedhja” dhe “Prodhimi, mbajtja, blerja apo shitja pa leje e armëve të ftohta”. /ET

Last Updated on 07/02/2026 by EL

Reshjet e dëborës kanë zbardhur fshatin turistik të Dardhës, duke e shndërruar atë në një nga destinacionet më të frekuentuara dimërore në juglindje të vendit.

Pamja alpine dhe bora e bollshme kanë tërhequr qindra turistë vendas dhe të huaj, veçanërisht të apasionuarit pas sporteve dimërore.

Vetëm 18 kilometra larg Korçës, pista e skive në Dardhë po vizitohet masivisht nga të rinj dhe familje që shijojnë ski, snowboard dhe aktivitete të tjera rekreative në dëborë.

Kushtet klimatike dhe infrastruktura turistike e zonës e bëjnë Dardhën një zgjedhje ideale për pushime dimërore.

Kryeministri Edi Rama ndau sot pamje nga Dardha e mbuluar nga dëbora, ku fëmijë dhe të rritur shihen duke shijuar sportet dimërore dhe bukurinë natyrore të zonës, duke përcjellë edhe një mesazh pozitiv për fundjavën.

Dardha mbetet një nga atraksionet kryesore turistike të dimrit, duke ofruar jo vetëm sporte dimërore, por edhe mikpritje tradicionale, kuzhinë karakteristike dhe një atmosferë të veçantë alpine./et

Last Updated on 07/02/2026 by EL

Gjyqtarët që votuan kundër kërkesës së Ramës për heqjen e masës së pezullimit nga detyra të zv/kryeministres Belinda Balluku janë:
Marsida Xhaferllari, Elsa Toska, Sandër Beci dhe Asim Vokshi.

NJOFTIM VENDIMMARRJEJE

Gjykata Kushtetuese e mbledhur sot në datën 06.02.2026 mori në shqyrtim çështjen me kërkesë të Kryeministrit të Republikës së Shqipërisë me objekt: zgjidhja e mosmarrëveshjes së kompetencës së krijuar ndërmjet Kryeministrit dhe Këshillit të Ministrave nga njëra anë, dhe Gjykatës së Posaçme të Shkallës së Parë për Korrupsionin dhe Krimin e Organizuar, nga ana tjetër; shfuqizimi i vendimeve gjyqësore të Gjykatës së Posaçme të Shkallës së Parë për Korrupsionin dhe Krimin e Organizuar për pjesën që ka disponuar vendosjen dhe vazhdimin e masës ndaluese të pezullimit të ushtrimit të detyrës së zëvendëskryeministres dhe ministres së Infrastrukturës dhe Energjisë, si dhe interpretimin e pikës 3, të nenit 103, të Kushtetutës.

Paraprakisht Gjykata vlerëson njëzëri se imuniteti i ministrit rregullohet nga neni 103, pika 3 i Kushtetutës në lidhje me nenet 73, pika 1 dhe 2. Në regjimin kushtetues të imunitetit të ministrit, ashtu sikurse të deputetit, nuk përfshihet garancia e parashikuar në nenin 242, paragrafi 2 i Kodit të Procedurës Penale, sipas të cilit masa e pezullimit të ushtrimit të një detyre a shërbimi publik nuk zbatohet ndaj personave të zgjedhur sipas ligjit elektoral.

Gjykata thekson se sipas Kushtetutës sistemi qeverisës bazohet në parimin e shtetit të së drejtës sipas të cilit edhe ministrat i nënshtrohen ligjit dhe mund të mbahen ligjërisht përgjegjës nëse e shkelin atë. Ndër parimet e tjera themelore janë edhe ato të epërsisë së Kushtetutës si ligji më i lartë dhe zbatimi i drejtpërdrejtë i dispozitave të saj, detyrimi i shtetit për të vepruar brenda bazës dhe kufijve të së drejtës dhe ndarja dhe balancimi ndërmjet pushteteve legjislativ, ekzekutiv dhe gjyqësor.

Në lidhje me objektin e kërkesës, në përfundim të diskutimeve, vlerësimet e gjyqtarëve u ndanë në dy qëndrime dhe Gjykata nuk arriti numrin e kërkuar të votave për vendimmarrje, sipas parashikimeve të nenit 133, pika 2, të Kushtetutës dhe nenit 72, pika 2, të Ligjit Organik të saj.

Sipas njërit qëndrim, Gjykata në jurisprudencën e saj në lidhje me nenin 73, pika 3 të Kushtetutës është shprehur se imuniteti i deputetëve nuk është privilegj personal i tyre, por qëllimi kryesor i tij është mbrojtja e vetë Kuvendit dhe në veçanti funksionimi i duhur i tij.

Në këtë kuptim, marrja e autorizimit nga Kuvendi për zbatimin e masave që kufizojnë paraprakisht lirinë e deputetit synon të mbrojë veprimtarinë e vetë Kuvendit (shih vendimin nr. 81, datë 21.11.2024 të Gjykatës Kushtetuese). Kjo do të thotë se edhe neni 103, pika 3 i Kushtetutës, duke parashikuar se anëtarët e Këshillit të Ministrave gëzojnë imunitetin e deputetit, synon mbrojtjen dhe funksionimin e organit ekzekutiv, pjesë e të cilit është edhe ministri. Duke iu referuar masës së pezullimit të ushtrimit të detyrës apo shërbimit publik, vlerësohet se për nga shkalla dhe intensiteti i saj ajo prek funksionin kushtetues politik të ministrit. Prandaj në balancimin e parimit kushtetues të efektivitetit të ndjekjes penale dhe atij të funksionimit të pushtetit ekzekutiv në kuptim të parimit të ndarjes dhe balancimit të pushteteve sipas nenit 7 të Kushtetutës edhe për këtë masë kërkohet dhënia e autorizimit paraprak nga Kuvendi.

Sipas qëndrimit tjetër, ngjashëm me standardin e interpretimit të pranuar nga Gjykata në rastin e regjimit të imuniteteve, i cili duhet të jetë i ngushtë/i kufizuar, bazuar në vullnetin e kushtetutëbërësit në reformën e vitit 2012 për zvogëlimin e imunitetit, Kushtetuta në formën e saj aktuale ka parashikuar autorizimin paraprak të Kuvendit për masat procedurale penale të parashikuara shprehimisht në nenin 73, pika 2 të saj.

Në këtë dispozitë nuk parashikohet masa ndaluese e pezullimit të ushtrimit nga detyra sipas nenit 242 të Kodit të Procedurës Penale, ndonëse zbatimi i kësaj mase pamundëson ushtrimin e funksioneve të ministrit dhe për pasojë ndërhyn edhe në veprimtarinë e Këshillit të Ministrave. Në këndvështrimin e parimit të ndarjes dhe balancimit të pushteteve, çështja e shtimit ose ndryshimit të mekanizmave balancues, ku përfshihen edhe garanci të tilla, i përket vlerësimit të ligjvënësit kushtetues.

Për sa më lart, Gjykata Kushtetuese vendosi:

Rrëzimin e kërkesës.

Heqjen e masës së pezullimit të caktuar me vendimin e Mbledhjes së Gjyqtarëve të datës 12.12.2025.

Ky vendim është përfundimtar dhe hyn në fuqi me botimin e vendimit në Fletoren Zyrtare.

Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar dhe nga Rregullorja për Procedurat Gjyqësore të Gjykatës Kushtetuese./et

Last Updated on 07/02/2026 by EL

Dy anglezë janë dënuar me burgim të përjetshëm pas një grabitje të dhunshme që përfundoi me vrasjen e shqiptarit Indrit Mustafaj, 26 vjeç.

Michael Mulvana, 32 vjeç, dhe Jobie Tyers, 28 vjeç, nga Jorku, plagosën rëndë një grua në apartamentin e saj dhe shqiptarin që ndodhej me të.

Ai tentoi që të fshihej në një cep të dhomës, por autorët e goditën me hanxhar duke e lënë të vdekur, shkruan BBC.

Last Updated on 07/02/2026 by EL

Në Shkodër u zhvillua takimi i dytë mbi pasuritë e florës dhe faunës së zonës, pas atij mbi trashëgiminë kulturore përreth liqenit të Shkodrës.

Projekti “Projeksion mbi liqen”, një bashkëpunim mes DRTK Shkodër, COD, Bashkisë Shkodër, shkollave të mesme të qytetit dhe Universitetit “Luigj Gurakuqi”, bazohet në tre komponentë kryesorë:

– Mbrojtja e mjedisit përmes pastrimit të territorit dhe brigjeve të Liqenit të Shkodrës nga mbetjet plastike, veçanërisht shishet;

– Kreativiteti nëpërmjet krijimit të një figuracioni/instalacioni simbolik nga grupe studentësh, i cili përfaqëson trashëgiminë kulturore, florën dhe faunën e Liqenit të Shkodrës;

– Ndërgjegjësimi dhe përfshirja e të rinjve në realizimin e kësaj vepre artistike nga nxënës dhe studentë, në formën e një mozaiku, duke përdorur si elementë përbërës shishe plastike të pikturuara, të mbledhura gjatë pastrimit të brigjeve të liqenit.

Ky projekt synon të ndërthurë mbrojtjen e mjedisit me artin dhe edukimin qytetar, duke vënë në qendër liqenin e Shkodrës, një pasuri e jashtëzakonshme natyrore dhe kulturore, e cila pritet së shpejti të përfshihet nën mbrojtjen e UNESCO-s si Rezervë Ndërkufitare e Biosferës. A.K./et

Last Updated on 07/02/2026 by EL

Kryeministri i Izraelit, Benjamin Netanyahu, ka përdorur vëmendjen e ripërtërirë ndaj dosjeve Epstein për të sulmuar paraardhësin e tij Ehud Barak, duke deklaruar se Jeffrey Epstein “nuk ka punuar për Izraelin”.

E përditshmja The Jerusalem Post raportoi se lidhjet e ish-kryeministrit Barak me Epstein morën vëmendje të gjerë mediatike pasi të dy u takuan disa herë në vitet 2015 dhe 2016, vite pas dënimit të parë penal të Epsteinit.

Fotografi të qarkulluara në atë kohë tregonin Barakun duke hyrë në rezidencën e Epsteinit në Manhattan, New York.

Në komentin e tij të parë publik mbi dokumentet e Epsteinit, Netanyahu tha se “marrëdhënia e pazakontë dhe e ngushtë e Epsteinit me Ehud Barakun nuk sugjeron se Epsteini ka punuar për Izraelin, ajo provon të kundërtën”.

“I mbërthyer pas humbjes së tij zgjedhore nga më shumë se dy dekada më parë, Baraku prej vitesh ka tentuar në mënyrë obsesive të minojë demokracinë izraelite duke bashkëpunuar me të majtën radikale anti-sioniste në përpjekje të dështuara për të rrëzuar qeverinë izraelite të zgjedhur”, tha Netanyahu, duke iu referuar administratës së tij.

Netanyahu akuzoi Barakun se është angazhuar “në aktivitete publike dhe prapa skenave për të minuar qeverinë e Izraelit, përfshirë nxitjen e lëvizjeve masive të protestës, shkaktimin e trazirave dhe ushqimin e narrativave të rreme mediatike”. Ndryshe, Baraku prej vitesh ka qenë një kritik i zëshëm i Netanyahut dhe ka bërë thirrje të përsëritura për largimin e qeverisë./et

Last Updated on 07/02/2026 by EL

Importet e zarzavateve po rriten me shpejtësi nga viti në vit duke dominuar tezgat në shitjen me pakicë. Përveçse po zëvendësojnë prodhimin vendas, janë duke u bërë shkak për rritjen e çmimeve në këtë grup.

Këto ditë çmimet e prodhimeve të freskëta, kunguj, brokol, domate dhe speca janë rritur deri në 30 për qind për kilogram në krahasim me janarin e kaluar.

Prodhimet e importit po vijnë me çmime më të larta në treg dhe po ndikojnë dhe në rritjen e çmimeve të prodhimit vendas”, tha një shitës në tregun me pakicë në “Uzinën Dinamo” në kryeqytet.

Në tregun e pakicës, një kg kungull tregtohet më 380 lekë për kg, me rritje 27% nga janari 2024. Specat kushtojnë 330 lekë/kg, me rritje prej 10%. Limonat, nga 100 lekë tregtohen me 150-170 lekë. Shumica e zarzavateve kushtojnë në tregun e pakicës mes 250-300 lekë/kg.

Të dhënat e INSTAT tregojnë se vitin e kaluar importet e zarzavateve arritën në 69,428 tonë me rritje 13.4% në raport me vitin e kaluar dhe janë rritur me 101 për qind ndërmjet 2021-2025.

Nga viti 2022 filloi një fazë rritjeje shumë e fortë. Importet arritën në rreth 42 mijë ton në 2022, 47.4 mijë ton në 2023 dhe shënojnë një kërcim të ndjeshëm në 2024, në mbi 61 mijë ton. Në vitin 2025 arrijnë në rreth 69.4 mijë ton, niveli më i lartë i dekadës dhe gati dyfish krahasuar me mesataren e periudhës 2015–2017.

Kam 7 vjet që kam hapur njësinë dhe nuk kam parë asnjëherë çmime kaq të shtrenjta, thotë një tregtues që operon me një market te Komuna e Parisit. Ai shton se çmimet janë rritur nga tregtuesit me shumicë. “Mua nuk me intereson të kem çmime të shtrenjta, pasi kam firo të lartë”, pohon ai. Tregtuesit pohojnë se një nga arsyet e rritjes së çmimeve lidhet me mungesën e kohëve të fundit të importeve nga Turqia, me produktet që vijnë nga ky shtet që janë një amortizator i ndjeshëm i çmimeve të importit.

Më shumë se 80% e perimeve, frutave dhe zarzavateve në tregjet vendase të pakicës janë nga importi. Patatet dhe fasulet po vijnë nga Egjipti dhe Turqia, perimet dhe frutat nga Greqia, bulmetrat dhe drithërat nga Serbia, Ukraina, Maqedonia e Veriut etj.

Kanalet e importit të ushqimeve janë ri-zgjuar dhe po intensifikohen, duke dekurajuar edhe më tepër fermerët dhe blegtorët të ushtrojnë profesionin e tyre. Zbrazja e fshatrave nga popullsia po tkurr sipërfaqet e mbjella në fusha në disa kultura dhe, nga ana tjetër, turizmi po nxit rritjen e kërkesës për produkte ushqimore. Për të plotësuar nevojat ushqimore, vendi po i drejtohet importit, i cili po rritet me shpejtësi kohët e fundit.

Emigrimi dhe plakja e popullsisë rurale kanë ulur kapacitetin prodhues vendas. Mungesa e punëtorëve dhe rritja e kostove të prodhimit kanë kufizuar ofertën vendase. Pas 2021–2022, rritja e çmimeve të inputeve rriti kostot e prodhimit vendas, duke e bërë importin më ekonomik për tregtarët.

Nga ana tjetër, supermarketet dhe zinxhirët e mëdhenj kërkojnë furnizim të standardizuar, sasi të mëdha dhe të qëndrueshme, kushte që prodhimi vendas shpesh nuk i plotëson në mënyrë të vazhdueshme.

Gjithashtu dobësimi i euros e favorizoi edhe më shumë importin, i cili po depërton edhe në zonat rurale ku popullsia e plakur nuk është në gjendje të kultivojë. /Monitor.al

Last Updated on 07/02/2026 by EL

Të paktën 14 persona humbën jetën kur një autobus doli nga korsia në një rrugë në Bolivi dhe ra në një shkëmb 150 metra të lartë.

Aksidenti fatal ndodhi pranë komunitetit të Mocomokos, në pjesën perëndimore të vendit të Andeve. Autobusi po shkonte drejt kryeqytetit, La Paz, sipas raportimeve të mediave boliviane.

Numri fillestar i të vdekurve nga përplasja ishte të paktën shtatë, por ky numër u dyfishua disa orë më vonë. Një zëdhënës i policisë tha se banorët nxituan në vendngjarje përpara se të mbërrinin ekipet e shpëtimit dhe të lironin viktimat, të cilët u dërguan në La Paz dhe qytetin fqinj të El Altos.

Fati i shoferit është i panjohur, ndërsa shkaqet e aksidentit mbeten të paqarta për momentin./et

Last Updated on 07/02/2026 by EL

Gjykata Kushtetuese e zbuloi vendimmarrjen të premten vonë, duke mbajtur në ankth për orë të tëra qeverinë, Edi Ramën dhe Belinda Ballukun, të cilët një pjesë të ditës e kanë kaluar në Kryeministri.

Pas mbledhjes së qeverisë paraditen e së premtes, Edi Rama nuk është larguar nga zyra e tij, ndërkohë që zëvendëskryeministrja pas një lëvizje të shkurtër është kthyer sërish në godinën e qeverisë në orët e para të drekës.

Por ndërsa mendohej se të dy do të prisnin aty vendimin e Gjykatës Kushtetuese, zgjatja e mbledhjes përtej parashikimeve deri në mbrëmje vonë, duket se ka bërë që të dy të lënë zyrat respektive pasdite dhe lajmin ta presin në banesat e tyre. Ndryshe nga pjesa më e madhe e ditës, në momentin e shpalljes së vendimit rreth orës 22:00, godina qendrore e qeverisë ka qenë e boshatisur, dritat kanë qenë të fikura./et

Shtetet e Bashkuara do të kryejnë brenda pak javësh një pagesë fillestare për miliardat e dollarëve që i detyrohen Organizatës së Kombeve të Bashkuara, deklaroi për Reuters, ambasadori amerikan në OKB, Mike Waltz, duke theksuar njëkohësisht se organizata duhet të vazhdojë me reformat.

Komentet e Waltz vijnë dy javë pasi sekretari i përgjithshëm i OKB-së, Antonio Guterres, ngriti alarmin për financat e organizatës dhe paralajmëroi se OKB-ja, me 193 shtete anëtare, rrezikon një “kolaps financiar të afërt” për shkak të pagesave të papaguara, pjesa më e madhe e të cilave i detyrohen nga Uashingtoni.

“Do të shihni patjetër një këst fillestar shumë shpejt”, tha Waltz në një intervistë telefonike. “Do të jetë një parapagesë e rëndësishme për kuotat tona vjetore… Shuma përfundimtare ende nuk është vendosur, por bëhet fjalë për javë, jo muaj”.

Zyrtarë të OKB-së thonë se më shumë se 95% e detyrimeve të papaguara ndaj buxhetit të rregullt të OKB-së i përkasin SHBA-ve, që arrijnë në 2.19 miliardë dollarë deri në fillim të shkurtit. SHBA-të i detyrohen gjithashtu edhe 2.4 miliardë dollarë të tjera për misionet aktuale dhe të kaluara të paqeruajtjes, si dhe 43.6 milionë dollarë për gjykatat e OKB-së.

Më 30 dhjetor, Asambleja e Përgjithshme e OKB-së miratoi një buxhet prej 3.45 miliardë dollarësh për vitin 2026, pas javësh negociatash. Ky buxhet mbulon shpenzimet për funksionimin e zyrave të OKB-së në mbarë botën, përfshirë selinë në Nju Jork, pagat e stafit, takimet, si dhe punën për zhvillimin dhe të drejtat e njeriut.

Kriza e financimit të OKB-së vjen në një kohë kur SHBA-të, nën presidencën e Donald Trump-it, është tërhequr nga multilateralizmi në disa drejtime. Detyrimet e papaguara amerikane ndaj OKB-së janë rritur ndjeshëm gjatë presidencës së tij, megjithëse historia e vonesave në pagesa nga ana e SHBA-ve shtrihet prej dekadash.

Zyrtarët e OKB-së thonë se SHBA-të nuk kanë paguar buxhetin e rregullt vitin e kaluar, duke krijuar një detyrim prej 827 milionë dollarësh, si dhe 767 milionë dollarë të tjera për vitin 2026.

Projektligji i shpenzimeve në Kongres

Të martën, Trump nënshkroi në ligj një projektligj shpenzimesh që përfshin 3.1 miliardë dollarë për kuotat e SHBA-ve ndaj OKB-së dhe organizatave të tjera ndërkombëtare.

I pyetur nëse pagesa fillestare do të shkojë për detyrimet e vitit të kaluar, ato të vitit 2026 apo për të dyja, Waltz u përgjigj: “Në përgjithësi, për shlyerjen e borxheve të prapambetura dhe gjithashtu si njohje e disa reformave që kemi parë”.

Nën Trump-in, përveç refuzimit të pagesave të detyrueshme për buxhetin e rregullt dhe atë të paqeruajtjes, SHBA-të kanë shkurtuar ndjeshëm edhe financimin vullnetar për agjencitë e OKB-së me buxhete të veçanta dhe ka nisur procedura për t’u larguar nga disa organizata të OKB-së, përfshirë Organizatën Botërore të Shëndetësisë.

Waltz tha se SHBA-të e mbështesin fuqishëm nismën e reformave UN80 të Guterres-it dhe e cilësoi atë si një hap të rëndësishëm, por jo të mjaftueshëm.

“Nuk shkon mjaftueshëm larg, por është një hap i rëndësishëm. Do të doja që sekretari i përgjithshëm ta kishte ndërmarrë në vitin e parë ose të dytë të mandatit të tij, jo në vitin e nëntë,” tha ai.

“Ne jemi shumë të fokusuar në kthimin te bazat, te paqja dhe siguria. Dhe presidenti me të drejtë po pyet: Si mund ta kthejmë OKB-në që të realizojë potencialin e saj të plotë?” shtoi Waltz, duke theksuar se priten reforma të tjera.

“Dashuri e ashpër” ndaj OKB-së

“Kjo është një formë dashurie e ashpër. Modeli aktual është i paqëndrueshëm për shumë vende dhe ne po përpiqemi ta bëjmë OKB-në më funksionale, më të fokusuar dhe të mos përpiqet të bëjë gjithçka për të gjithë,” tha Waltz.

Ai theksoi se reduktimi i mbivendosjeve është një synim kyç, duke përmendur se ekzistojnë shtatë agjenci të OKB-së që kanë ndryshimet klimatike si mision kryesor.

“Pavarësisht debatit për klimën, nuk na duhen shtatë të tilla,” tha ai, duke shtuar se SHBA-të mbështet edhe konsolidimin e logjistikës dhe shërbimeve administrative në agjencitë humanitare.

Sipas Waltz, burokracia e OKB-së është rritur tepër dhe ka nevojë për më shumë efikasitet dhe efektivitet.

Guterres nisi reformat UN80 vitin e kaluar, me synimin për të ulur kostot dhe për të përmirësuar efikasitetin. Buxheti i miratuar për vitin 2026 është rreth 200 milionë dollarë më i lartë se propozimi i tij, por rreth 7% më i ulët se buxheti i miratuar për vitin 2025.

Muajin e kaluar, Guterres paralajmëroi se OKB-së mund t’i mbarojnë fondet deri në korrik dhe e cilësoi “kafkiane” kërkesën që organizata të kthejë çdo vit qindra miliona dollarë kuota të papërdorura shteteve anëtare, edhe kur paratë nuk janë paguar kurrë.

Waltz tha se shtetet anëtare duhet ta ndryshojnë këtë rregull. Ai shtoi se detyrimet e prapambetura të SHBA-ve për paqeruajtjen lidhen pjesërisht me një “mospërputhje ligjore” mes vlerësimeve të OKB-së dhe asaj që lejon ligji amerikan të paguhet, duke shtuar se kjo çështje do të trajtohet në negociatat e ardhshme për kuotat, që pritet të zhvillohen vitin e ardhshëm.

Sinjali – aty ku e vërteta flet para lajmit!

/GazetaSinjali/

The post Ambasadori amerikan: SHBA-të planifikojnë pagesën e parë për miliardat që i detyrohen OKB-së appeared first on Sinjali.

14 persona janë arrestuar e intervistuar në cilësinë e të dyshuarve lidhur me dallaveret me vota në Kllokot. 

Policia e Kosovës ka njoftuar se disa ishin kryesues e disa anëtarë të komisioneve numëruese në QKN. 

“Me vendim të prokurorit të dyshuarit pas intervistimit janë liruar”, bëri të ditur PK-ja.

Deri më tani, për shkak të dyshimeve për manipulim të votave janë ndaluar dhjetëra persona në disa rajone të Kosovës dhe janë intervistuar qindra të tjerë. Hetime po zhvillohen në Prizren, Malishevë, Podujevë, Ferizaj dhe Mitrovicë.

Sinjali – aty ku e vërteta flet para lajmit!

/GazetaSinjali/

The post 14 persona arrestohen për manipulim me vota në Kllokot appeared first on Sinjali.