Komisioni Qendror i Zgjedhjeve ka bërë të ditur se deri në ora 19:00 ka përfunduar procesi i votimit në 25 përfaqësi diplomatike të Kosovës, ndërkohë në orën 01:00 pas mesnatës, sipas kohës lokale në Kosovë, do të përfundojë votimi në 4 përfaqësitë tjera, në Shtetet e Bashkuara të Amerikës dhe Kanada.

“Ju njoftojmë se deri në këtë kohë ka përfunduar votimi në 25 përfaqësitë diplomatike në shtetet, si: Turqi, Gjermani, Zvicër, Francë, Belgjikë, Norvegji, Austri, Suedi, Slloveni, Danimarkë, Itali, Kroaci, Holandë, Republikë Çeke, Hungari dhe në Mbretërinë e Bashkuar. Sipas kohës lokale në Kosovë, në orën 01:00 pas mesnatës, do të përfundojë votimi në 4 përfaqësitë tjera, në Shtetet e Bashkuara të Amerikës dhe Kanada”, ka thënë Radoniqi, kryetar i KQZ-së.

Ai tregoi se gjatë gjithë ditës së sotme, KQZ ka qenë në kontakt të vazhdueshëm me përfaqësitë diplomatike dhe nga zyrtarët e shërbimit votues u janë ofruar udhëzimet e nevojshme për zhvillimin e votimit sipas ligjit dhe procedurave.

“Në përgjithësi, nga komunikimi i vazhdueshëm, procesi i votimit është zhvilluar pa ndonjë pengesë. Në emër të KQZ-së, falënderojmë shefat dhe stafin e misioneve diplomatike dhe anëtarët e Këshillave të Vendvotimit për angazhimin e tyre gjatë ditës së sotme”, theksoi ai.

Sipas të dhënave nga 25 përfaqësi diplomatike ku është mbyllur votimi, por edhe nga të dhënat e orës 13:00 nga votimi në ShBA dhe Kanada, KQZ-ja thotë se nga 19,187 votues të regjistruar, kanë votuar 81.29% apo 15,597 votues.

Radoniqi tha se, sipas procedurave, këto fletëvotime nuk do të numërohen në përfaqësi diplomatike, por gjatë ditëve në vazhdim do të sillen në Kosovë dhe numërimi i tyre do të bëhet në vendin tonë.

Kryesuesi i KQZ-së e mbylli konferencën e sotme me një apel lidhur me procesin votues të së dielës në Kosovë.

“Apel për të gjithë Këshillat e Vendvotimeve, Komisioneve Komunale që të jenë në nivel detyre, të respektojnë ligjin rregullat zgjedhore të KQZ. Na pret një ditë e gjatë nesër, ku duhet të iu ofrojmë qytetarëve të drejtën e votës, andaj shpresojmë që të gjithë jemi në nivel detyre e të respektojmë rregullat e ligjin. U urojmë të gjithëve një ditë të mbarë”, tha Radoniqi.

Lideri i PDK-së, Bedri Hamza, njëherësh Kandidat i PDK-së për Kryeministër, ka thënë se Kosova ka nevojë për unitet, stabilitet dhe një qeveri që punon për qytetarët e saj.

“Kosova ka nevojë për unitet. Ka nevojë për stabilitet. Ka nevojë për një qeveri që punon për qytetarët e saj. Një qeveri që angazhohet për ish-udhëheqësit e UÇK-së, presidentin Thaçi, kryetarin Veseli, bacin Jakup, Rexhën dhe të gjithë luftëtarët e lirisë, që padrejtësisht po na i mbajnë në Hagë”, ka thënë ai.

Hamza ka thënë se të bashkuar kanë fituar në të kaluarën dhe të bashkuar do të fitojnë edhe këtë herë.

“Do të fitojmë për të tashmen dhe të ardhmen. Për paga më të larta. Për pensione dinjitoze. Për çmime më të ulëta. Për një shtet që punon për qytetarët e vet. Dhe të gjitha këto fillojnë me një veprim. Në një ditë. Me një votë. Të dielën, dilni dhe votoni për Partinë Demokratike të Kosovës. Për familjen tuaj. Për të ardhmen tuaj. Për Kosovën. Bashkë. Përpara. Faleminderit.”, ka përfunduar fjalimin e tij kreu i PDK-së, Bedri Hamza.

Inxhinieri, ndërmarrësi dhe opinionisti Ermal Sadiku garon për deputet nga radhët e Lidhjes Demokratike të Kosovës (LDK) dhe mban numrin 19 në këtë listë zgjedhore.

Ai e ka cilësuar këtë hap si një rrugëtim të ri politik, të nisur me bindje personale dhe pa “pozita të dhuruara”.

Në një deklaratë, Sadiku tha se vendimi për t’u përfshirë në politikë ka ardhur pas shumë dilemash, veçanërisht për shkak të kohës së shkurtër për prezantim në garë.

Megjithatë, ai theksoi se ka zgjedhur të hyjë në proces zgjedhor si kandidat, e jo përmes një pozite ekzekutive të negociuar paraprakisht.

“Kam pasur mundësi të negocioj një pozitë në ekzekutiv pas zgjedhjeve, por kam vendosur të hyj në garë vetë. Pozitat e dhuruara nuk të japin peshë politike dhe as autoritet për të sjellë ndryshim,” u shpreh Sadiku, duke shtuar se beson se pozitat duhet të merren me meritë dhe përmes garës demokratike.

Sipas tij, angazhimi politik ka një fokus të qartë: zhvillimin e industrisë së teknologjisë dhe shtyrjen përpara të proceseve të digjitalizimit në Kosovë.

Sadiku bëri të ditur se LDK i ka besuar atij rolin për të avancuar këto procese, të cilat, siç tha, prekin drejtpërdrejt jetën e çdo qytetari, biznesi dhe brezi të ri.

Sadiku theksoi rëndësinë e bashkëpunimit, inovacionit dhe përkushtimit ndaj sektorit të teknologjisë si shtylla kryesore të zhvillimit ekonomik dhe shoqëror.

Ai tha se Kosova ndodhet në një periudhë polarizimi të thellë, por ai beson se shumica e qytetarëve kërkojnë një politikë më të qetë, pa ofendime dhe pa linçime, të bazuar në punë konkrete dhe jo në zhurmë.

“Qytetarët duan përgjigje për të ardhmen: ku do të punojnë, çfarë do të zhvillohet dhe çfarë mundësish do të kenë fëmijët e tyre. Për shumë prej këtyre pyetjeve, përgjigjja gjendet në inovacion dhe teknologji,” tha ai.

Struktura e të hyrave tatimore në Kosovë vazhdon të dominohet nga tatimet mbi konsumin, duke reflektuar karakterin aktual të ekonomisë dhe nivelin e formalizimit të bizneseve. Drejtori i Administratës Tatimore të Kosovës, Mentor Hyseni, vlerëson se analiza e të hyrave duhet parë më shumë përmes llojit të tatimeve sesa ndarjes sipas sektorëve, ndërsa thekson se proceset e fiskalizimit dhe analiza e riskut kanë ndikuar drejtpërdrejt në rritjen e të hyrave dhe uljen e informalitetit.

Sipas Hysenit, identifikimi i sektorëve që kontribuojnë më së shumti në të hyrat tatimore nuk është gjithmonë i drejtpërdrejtë, pasi ATK fokusin kryesor e ka te llojet e tatimeve.

Hyseni në emisionin ekonomik “Shtylla”, shpjegon se pjesa më e madhe e të hyrave buxhetore vjen nga Tatimi mbi Vlerën e Shtuar, i cili përbën afërsisht gjysmën e të hyrave totale, ndërsa tatimet në të ardhura personale dhe ato në fitimin e korporatave përbëjnë pjesën tjetër.

Ndiqni emisionin e radhës “Shtylla”, këtu: https://www.youtube.com/watch?v=orxa7xi0G8Y

Kjo strukturë, sipas tij, tregon qartë se Kosova ka një ekonomi të orientuar më shumë drejt konsumit sesa prodhimit, pasi TVSH-ja lidhet drejtpërdrejt me shpenzimet dhe jo me investimet apo fitimin. Në të njëjtën kohë, kjo dëshmon se fiskalizimi i bizneseve që merren me shitje dhe prodhim është në një nivel relativisht të mirë.

“Po tash me sektorët është pak problematike me ditë, sektorët më problematikë i dijmë, ndërsa ne te tatimet më shumë e masim me llojin e tatimeve. Për shembull, TVSH-ja bën pjesë diku me 45.5%, 49.5% të të hyrave të përgjithshme. Diku me 29 janë tatimet në të ardhura personale dhe 21 janë tatimet në të ardhura në korporata. Më e rëndësishme është me treguar çfarë tregon kjo përqindje e të hyrave sipas ndarjes tatimore, sesa me shikua cila, cili sektor prodhon më shumë. Në këtë aspekt tregon që Kosova është më shumë shoqëri konsumuese, që i bie se pse tatimi mbi vlerën e shtuar është tatim në konsum. Nuk është tatim në investime ose në fitim që bëhet. Kështu që në njërën anë tregon që shoqëria kosovare është shumë konsumuese, pra prodhimin e kemi të ulët. Edhe në anën tjetër tregon që ka fiskalizim goxha të mirë të pjesës së bizneseve të cilat merren me shitje ose prodhim në Kosovë”, thekson Hyseni.

Duke folur për komunat veriore, Hyseni vlerëson se situata atje është më komplekse jo vetëm për ATK-në, por edhe për institucionet e tjera publike. Megjithatë, ai thekson se ka nisur një proces konkret i fiskalizimit përmes një projekti identifikues me stikersa, që synon evidentimin e bizneseve të regjistruara dhe atyre që operojnë pa u regjistruar.

Ky proces tashmë është shtrirë në të gjitha komunat e vendit dhe pritet të përfundojë brenda rreth gjashtë muajve, i mbështetur edhe nga angazhimi i praktikantëve në terren.

Pjesa e katër komunave është pak më komplekse, jo vetëm për Administratën Tatimore, por edhe për krejt shërbimet që ofrohen atje. Megjithatë, ne e kemi filluar një proces të fiskalizimit atje përmes procesit të stikersave. Është një projekt i stikersave ku një stikers me formatin A3 vendoset në secilin biznes që është i regjistruar. Kjo ka për qëllim me pa që cilat janë biznese të tjera që operojnë e cilat janë të paregjistruara. Domethënë aktivitetin kryesor e kemi filluar në komunat e veriut, mandej i kemi përfshirë edhe të gjitha komunat e Kosovës kështu, që qëllimi është me mbërri me i regjistruar të gjitha ato biznese dhe me i fiskalizuar. Procesi është duke ec mirë, kemi filluar edhe me rekrutimin diku të 60 praktikantëve të cilët do të shpërndahen nëpër regjione, vetëm e vetëm për këtë qëllim të implementimit të këtij projekti që po mendojmë që na i merr diku gjashtë muaj. Edhe besoj që ka me qenë hapi i parë që ka me ndihmuar në luftimin e mirëfilltë të ekonomisë joformale”, theksoi Hyseni.

Sa i përket kontrolleve tatimore, Hyseni sqaron se shumica dërrmuese e bizneseve përzgjidhen për kontroll bazuar në analizën e riskut, e cila merr parasysh dhjetëra indikatorë për të vlerësuar nivelin e rrezikut të secilit biznes. Për të shmangur çdo dyshim për qasje selektive, edhe rastet që propozohen nga strukturat rajonale tashmë i nënshtrohen të njëjtës analizë, duke u kontrolluar vetëm nëse rezultojnë me risk të lartë.

“Tash të them të drejtën, kur kam ardhur unë prej gushtit të këtij viti, në ATK ka qenë një procedurë që 90% të bizneseve që kontrollohen, kontrollohen në bazë të analizës së riskut, që është një departament që e bën analizën e riskut, si platformë ajo i analizon diku nja 72 faktorë për me vlerësuar se cili biznes, në cilën kategori të riskut është. Normalisht kur ke staf pak është e rrugës që ti me u orientu te bizneset që kanë risk më të lartë. 10% të bizneseve të tjera ju dha liria drejtorëve rajonalë me i përzgjedhur ata në bazë të dyshimeve që i kanë në terren, në bazë të inspektorëve që i sjellin. Tash ishte vendimi i parë, po më duket është vendimi i pestë i parëve që e kam marrë, që edhe kjo pjesa e 10%-shit nuk duhet me qenë subjektive. Kjo mandej e zvogëlon këtë qasjen selektive për kontrollim të bizneseve, meqenëse, të them të drejtën, ajo 90% prapë është bërë me analizë të riskut. Po ne kemi dashur me heq edhe këtë 10%-shin që mos me lënë as më të voglin dyshim që bizneset me dyshu që ATK-ja i kontrollon ata në mënyrë selective”, theksoi ai.

Qeveria në detyrë, javë më pare ka marrë vendim për rritjen e pagës minimale, që fillimisht do të jetë 425 euro nga janarim e në korrik në 500 euro. Njoëhës të ekonomisë patën thënë se ky vendim për rritjen e pagës minimale do të ndikojë në informalitet, pasi që bizneset dhe odat e bizneseve thonë se nuk janë konsultuar për një vendim të tillë.

Megjithatë, Hyseni po ashtu vlerëson se rritja e pagës minimale nuk ka lidhje të drejtpërdrejtë me rritjen e informalitetit. Ai thekson se të hyrat nga tatimi në paga janë dukshëm më të ulëta krahasuar me TVSH-në, prandaj rritja e pagave pritet të ketë efekt pozitiv në rritjen e të hyrave tatimore.

Sipas Hysenit lidhja e rritjes së pagës minimale me informalitet nuk është ë e qëndrueshme

Video

“Lidhja e rritjes së pagës minimale me informalitet nuk është ë e qëndrueshme. Ë, ne i kemi diku 457 mijë punëtorë mesatarë që lajmërohen në baza mujore në ATK, edhe ku thashë përpara që 49.5% janë të hyrat nga TVSH-ja, vetëm 29% nga të hyrat në të ardhura personale. Kjo tregon që të hyrat në paga tatohen mjaft pak. I bie që me rritjen e pagës minimale ose me rritjen e pagave në përgjithësi, që rritja e pagës minimale i ngre ato në të gjitha kategorinë e pagave, për ATK-në dhe për shtetin ka me shënuar rritje të të hyrave tatimore. Domethënë nuk e, nuk e shoh ndonjëfarë ndërlidhje me informalitetin çështjen e ngritjes së pagës minimale.

Sa i përket diasporës, ai sqaron se Kosova ka nënshkruar dhjetëra marrëveshje ndërkombëtare për shmangien e tatimit të dyfishtë, duke u mundësuar investitorëve që të mos tatohen dy herë për të njëjtin fitim. Megjithatë, nuk ekzistojnë politika fiskale të veçanta që favorizojnë mërgatën, përtej lehtësimeve administrative për regjistrimin dhe hapjen e bizneseve përmes modelit “one-stop-shop”.

Megjithatë, pika më fragjile e ATK-së, siç e përshkroi vetë drejtori, mbetet borxhi i grumbulluar prej 600 milionë eurosh. Për të adresuar këtë problem, Hyseni njoftoi një plan për ristrukturimin e procesit të mbledhjes së borxheve. Plani parasheh decentralizimin e kësaj përgjegjësie, duke fuqizuar drejtoritë rajonale për të ndjekur borxhlinjtë./KosovaPress

Ish-drejtuesit e Ushtrisë Çlirimtare të Kosovës që po gjykohen në Hagë, kanë ushtruar të drejtën e tyre të votës për zgjedhjet e parakohshme parlamentare që do të mbahen në Kosovë, të dielën më 28.12.2025.

Kështu ka konfirmuar për Telegrafin zëdhënësi i Komisionit Qendror të Zgjedhjeve, Valmir Elezi.

“Mund t’iu konfirmoj se gjatë javës, shtetasit e Kosovës që ndodhen në Dhomat e Specializuara, në Hagë, kanë realizuar të drejtën kushtetuese dhe kanë votuar në zgjedhjet e parakohshme për Kuvendin e Kosovës”, ka deklaruar Elezi më 27.12.2025.

Bedri Hamza ka thënë se fushatën nuk e ka bërë nga zyra.

Ai ka thënë se atë e ka bërë në rrugë, në shtëpi, në fabrika, në tregje, në fshatra e qytete.

“Kam dëgjuar shpresë. Por kam dëgjuar edhe zhgënjime. Mbi të gjitha, kam dëgjuar një kërkesë të qartë: “Mos na lini vetëm. Fitoni dhe bëjeni ndryshimin”. Sonte dua t’ua tregoj këtë rrugëtim. Jo për mua. Por, për qytetarët e Kosovës. Ju ftoj ta ndiqni një rekapitulim të këtij rrugëtimi që e kemi bërë bashkë këtë muaj”, ka thënë Hamza, ku më pas është transmetuar edhe një video e fushatës së tij.

“Kjo që patë nuk është vetëm një fushatë. Është Kosova reale. Janë qytetarët që presin përgjegjësi. Janë familje që presin drejtësi. Janë të rinj që duan ta ndërtojnë jetën këtu, jo të largohen. Tani jemi në momentin vendimtar. Mos e lini dikë tjetër të vendosë për ju. Mos e lini votën tuaj në shtëpi. Flisni me familjen. Me miqtë. Me fqinjët. Dhe të dielën në mëngjes dilni dhe votoni. Sigurohuni që të gjithë të dalin dhe ta votojnë numrin 130. Merreni me vete familjen. Ndihmoni prindërit, gjyshërit, fqinjët. Telefononi një mik dhe kujtojani. Sepse, çdo votë është përgjegjësi”, ka thënë Hamza.

Periudha e festave të fundvitit gjen shumë turistë të huaj në Shqipëri për të festuar.

“Kemi disa tregje tradicionale, besnike, tregu i Kosovës, bullgar, maqedonas dhe kohët e fundit dhe ai Italian. Këto janë tregje që ka kërkesa dhe rezervime për Krishtlindje dhe Vitin e Ri, por sidomos për Vitin e Ri. Kjo është periudhë dimri dhe nuk krahasohet me verën. Në këtë periudhë vijnë për 3-4 ditë, deri në 5 netë, kryesisht për Vitin e Ri. Ka Tirana që tashmë është bërë destinacion gjithëvjetor, Durrësi që zgjidhet për hotelet e mëdha, ka Vlora, Saranda, Shkodra, por edhe destinacionet malore si Thethi dhe Valbona”, tha Rrahman Kasa, nga Unioni Turistik Shqiptar.

“Më së shumti janë turistë, por edhe shqiptarë të disaporës që vijnë për të kaluar pushimet me familjen e tyre. Çmimi është thuajse i njëjtë me nivelin e vjetshëm. Kush vjen nga vendet e Lindjes i duket disi shtrenjtë dhe kërkon të negociojnë. Ndërsa ata nga vendet e Perëndimit ju duket lirë, me 200 euro kalon 3 ditë shumë të mira një person në Tiranë”, deklaroi Erti Memoxhi, pronar bujtine.

Arsyet që i shtyjnë të huajt të vijnë në vendin tonë për festa janë çmimet që ofrohen por edhe shijet e kuzhinës shqiptare.

“Vijnë për disa arsye, për klimën e butë, për shijen e kulinarisë shqiptare, e cila është e preferuar, vijnë edhe për çmimet sepse nëse do të shkosh në Itali në një hotel të mirë me 3-4 yje do të paguash një çmim vetëm për natën e Vitit të Ri 300-350 euro, ndërsa këtu një kuotë e tillë shkon për të gjithë pjesën e akomodimit, përfshirë edhe natën e Vitit të Ri”, shtoi Kasa.

Në krahun tjetër qëndrojnë edhe shqiptarët që zgjedhin të festojnë jashtë vendit, duke udhëtuar kryesisht drejt vendeve të Evropës Perëndimore, por nuk mungojnë as destinacionet e largëta azikatike e ekzotike. /vizionplus

Xhavit Haliti, kandidat për deputet të Kuvendit të Kosovës, në listën e PDK-së, ka thënë se Albin Kurti e ka dëmtuar Kosovës, me ftohjen e raporteve me miqtë ndërkombëtarë, me të cilët UÇK-ja e bëri luftën çlirimtare.

"UÇK-ja e bëri luftën bashkë me amerikanët dhe evropianët. Bashkë e ndërtuam edhe shtetin e Kosovës. Albin Kurti i dëmtoi raportet me miqtë ndërkombëtarë. E dëmtoi rëndë Kosovën", ka shkruar Haliti në rrjetet sociale.

Haliti ka vlerësuar se Kosovës i duhen miq të fortë ndërkombëtarë dhe qeverisje e përgjegjshme në krye me Bedri Hamzën kryeministër.

Fondacioni Frutex & Golden Eagle ka njoftuar se ditëve të fundit janë raportuar disa raste shqetësuese, ku persona të panjohur janë paraqitur në mënyrë të rreme në emër të fondacionit dhe në emër të pronarit të kompanisë Frutex LLC, z. Shaqir Palushi.

Sipas informatave të deritanishme, këta persona kanë kontaktuar organizata dhe individë të ndryshëm, duke ofruar kinse ndihma humanitare, të cilat janë kushtëzuar me pagesë paraprake.

Fondacioni thekson se këto veprime nuk kanë asnjë lidhje me Frutex & Golden Eagle dhe se bëhet fjalë për tentativa mashtrimi.

Raportohet se kontaktimet janë bërë përmes këtyre numrave të telefonit:

• +381 62 9247041
• +381 61 1553871

Fondacioni Frutex & Golden Eagle distancohet plotësisht nga këto veprime dhe u bën thirrje qytetarëve, organizatave dhe institucioneve që të tregojnë kujdes, të mos kryejnë asnjë pagesë dhe të raportojnë rastet e tilla tek organet kompetente.

Po ashtu, fondacioni kërkon nga mediat që ky paralajmërim të publikohet dhe të shpërndahet edhe në rrjetet sociale, me qëllim të informimit sa më të gjerë të publikut dhe parandalimit të rasteve të ngjashme në të ardhmen.

“Serbofob”, “persekutim i serbëve”, “kriminelët shqiptarë” e të tjera, janë disa nga shprehjet që paraqiten në shkrime ku përmendet Kosova në disa nga mediat dhe kanalet në rrjete sociale që shpërndajnë narrativët rusë online, në prag të zgjedhjeve në Kosovë.

Pak ditë para zgjedhjeve të parakohshme parlamentare të 28 dhjetorit në Kosovë, disa media dhe kanale në rrjete sociale me përmbajtje proruse janë mbushur me mesazhe që e përshkruajnë Kosovën si vend të korruptuar, të dirigjuar nga Perëndimi dhe armiqësor ndaj serbëve.

Thuajse në të gjitha postimet ku përmendet Kosova, shtetësia e saj mohohet: emrit të saj i vihen thonjëzat, apo quhet “kuazi-shtet” e “shtet i ashtuquajtur”.

Në artikuj e shkrime të publikuara nga fillimi i dhjetorit, u jepet zë thirrjeve ndaj serbëve të Kosovës që si alternativë të vetme politike ta shohin Listën Serbe, partinë më të madhe të serbëve në vend, me lidhje të dëshmuara me Beogradin.

Përveç mediave shtetërore ruse, si Sputnik dhe RT, tituj e postime në lidhje me Kosovën, dhe në veçanti me zgjedhjet e fundvitit, janë shpërndarë edhe në kanalet proruse në platformën sociale Telegram.

Sipas ekspertëve, shumë prej këtyre kanaleve shpërndajnë dhe zmadhojnë narrativët, duke ”ndikuar sidomos te elektorati serb në veri të Kosovës”.

Dezinformimi apo përmbajtja manipuluese, sipas tyre, bëhet edhe më e rrezikshme me përfshirjen e inteligjencës artificiale.

Çfarë u tha për Kosovën?

Radio Evropa e Lirë ka përcjellë dhe ka analizuar përmbajtjet në lidhje me Kosovën dhe me zgjedhjet në disa media ruse, si Sputnik e RT, por edhe në kanale pro-Kremlinit në Telegram, si “Balkanar” dhe “Për Serbinë në rusisht”.

Më 21 dhjetor 2025, kanali “Balkanar” publikoi një shkrim, ku thuhej se “nëse demokracia matet me numrin e kriminelëve në fletëvotime, atëherë sistemi politik i Kosovës shfaqet si lider evropian”.

Shkrimi i referohej një raporti të Institutit të Kosovës për Drejtësi (IKD), sipas të cilit 28 kandidatë për deputetë në zgjedhjet e 28 dhjetorit janë të përfshirë në vepra penale.

Megjithatë, shkrimi nuk paraqiti ndonjë analizë krahasuese me shtetet e Evropës, por tha se raporti ka treguar “fytyrën e vërtetë të demokracisë më të re në Evropë”.Një ditë më herët, më 20 dhjetor, i njëjti kanal shkroi se “Dialogu me serbët ka përfunduar - Çështja e Kosovës tani zgjidhet me buxhetin amerikan për mbrojtje”.

Shkrimi kritikoi administratën amerikane që ka kërkuar, në Aktin për Autorizimin e Mbrojtjes Kombëtare, të miratuar në dhjetor, zbatimin e marrëveshjes së arritur mes Kosovës dhe Serbisë në Ohër, në shkurt të vitit 2023.

Autoritetet amerikane po e transformojnë çështjen e sovranitetit të Serbisë nga një çështje negociatash, në një ligj të detyrueshëm për të gjithë politikën e jashtme amerikane”, u tha në postim.

Postimi në kanalin “Balkanar” më 20.12.2025

Ndërkaq, më 19 dhjetor, një postim tjetër tha se “Në ‘Kosovë’, autoritetet treguan se marrëdhëniet me publikun janë më të rëndësishme për to sesa veprimi, veçanërisht kur bëhet fjalë për luftimin e shkeljes së të drejtave të serbëve”, pa paraqitur ndonjë provë lidhur me këto pretendime.

Postimi iu referua hapjes së një ure të re për këmbësorë që lidh Mitrovicën e Jugut, me shumicë shqiptare dhe atë të Veriut, të banuar me shumicë serbe.

Kanali “Balkanar” është i lidhur me rrjetin e njohur propagandistik rus “Pravda”, i cili, veç tjerash, poston përmbajtje edhe në gjuhën shqipe.

Postimi në portalin Pravda në shqip më 26.12.2026

Sipas një raporti të publikuar në qershor nga platforma e verifikimit të fakteve Hibrid.info, ky rrjet ka shpërndarë narrativë propagandistikë rusë edhe për audiencën shqipfolëse, përmes faqeve të ndryshme në internet, “të maskuara si portale informative”.

Në një postim të datës 26 dhjetor, portali Pravda në gjuhën shqipe e quajti kryeministrin në detyrë të Kosovës, Albin Kurti, “serbofob” i cili “bën mashtrime antiserbe”.

“Të gjitha 10 mandatet”: Fushata politike e Listës Serbe e shtyrë nga RT e Sputnik

Ndërkohë, në vijën editoriale të mediave ruse në gjuhën serbe dhe të mediave serbe pro-Kremlinit, Lista Serbe shfaqet si instrument i “unitetit” dhe si opsion i vetëm “i sigurt” për votën serbe.

Më 23 dhjetor 2025, RT publikoi shkrimin me titullin: “Gjuriq: Serbët duhet të votojnë… është e rëndësishme që Lista Serbe t’i fitojë të gjitha 10 mandatet”.

Postimi në Russia Today, më 23 dhjetor 2025.

E njëjta thirrje u pasqyrua edhe nga Sputnik, ndërsa në të njëjtin cikël raportimesh, kjo media shtetërore ruse publikoi edhe lajme për fushatën në terren të Listës Serbe.

Në asnjërin nga lajmet e publikuara nga këto media ruse nuk përmenden parti të tjera garuese në zgjedhje, shqiptare apo serbe.

Përveç Listës Serbe, subjektet tjera politike serbe që do të garojnë në zgjedhjet e 28 dhjetorit janë partia Për Liri, Drejtësi dhe Mbijetesë, si dhe Aleanca Kosovare, parti e formuar në qershor të këtij viti me mbështetjen e deputetit në Kuvendin e Serbisë, Zharko Ristiq.Kuvendi i Kosovës ka 120 vende, prej të cilave 10 janë të rezervuara për përfaqësuesit e komunitetit serb.

Të 10 mandatet tradicionalisht janë fituar nga Lista Serbe, përveç në zgjedhjet e fundit, në shkurt të këtij viti, kur një vend e fitoi politikani Nenad Rashiq.

Zyrtarë të Listës Serbe, në deklarime publike, e kanë quajtur Rashiqin “një serb të përshtatshëm për Prishtinën” dhe që “nuk përfaqëson serbët”.

Këto deklarata u postuan edhe në kanalet ruse, në javën e fundit para zgjedhjeve.

Kanalet që shërbejnë si “shumëzues narrativësh”

Jeta Loshaj nga Qendra Kosovare për Studime të Sigurisë (QKSS) thotë për Radion Evropa e Lirë se mediat si RT Balkan dhe Sputnik Srbija, në rastin e Kosovës “nuk janë aq burim primar informacioni, sa janë ‘shumëzues narrativësh’”, sepse përmbajtjet e tyre riprodhohen nga tabloidët apo portalet në Serbi, dhe pastaj “depërtojnë e qarkullojnë në veri të Kosovës dhe në mediat lokale”.

Sipas saj, në momente të ndjeshme si zgjedhjet, këto media e kornizojnë situatën përmes dy boshtesh: “viktimizimi i komunitetit serb në Kosovë” dhe “armiqësimi i Perëndimit (BE/NATO)”, narrativë që, thotë ajo, më pas “përvetësohen nga aktorë lokalë… ‘influencerë’” e të tjerë.

Loshaj paralajmëron se ndikimi nga shpërndarja e narrativit rus “nuk është linear… por potencialisht kumulativ”, sepse narrativët synojnë të mbivendosen mbi “pakënaqësitë ekzistuese, ndjenjën e diskriminimit, frikës dhe mosbesimit”.

Ajo shton se, gjatë periudhave zgjedhore, këto rrëfime shndërrohen në instrument politik, duke synuar “të delegjitimojnë proceset demokratike, dhe të ulin besimin në institucionet zgjedhore e në partnerët ndërkombëtarë”.

“Propaganda si ushqim për inteligjencën artificiale”

Abit Hoxha, profesor asistent në Universitetin e Agderit dhe në Universitetin e Stavangerit në Norvegji, thotë për Radion Evropa e Lirë se shumë nga rrjetet që shpërndajnë dezinformata apo përmbajtje manipuluese nuk kanë patjetër shënjestër lexuesin njeri.

“Karakteristikë e Pravda-s është që nuk është rrjet, nuk është lëvizje. Është njëfarë organizimi, sipas të gjitha gjasave prej disa personave të mençur, që e kanë gjetur një 'loop hole' (një vrimë) në sistem, dhe nuk janë direkt të përfshirë në dezinformata, sikur, për shembull, Sputnik-u”, shprehet Hoxha.

Sipas profesorit që merret me studimin e medias, demokracisë dhe së fundmi ndikimin e inteligjencës artificiale në shoqëri, rrjete të tilla “po japin materiale për ushqimin e inteligjencës artificiale”.

Në anën tjetër, studiuesja Loshaj thotë se teknologjitë e reja, veçanërisht inteligjenca artificiale, e rrisin ritmin dhe shtrirjen e dezinformimit.

“[Ato mundësojnë] prodhimin masiv dhe të shpejtë të përmbajtjeve të sinkronizuara në gjuhë lokale, imitimin e stilit vendor për rritje të besueshmërisë, krijimin e ‘deepfake’-ve audio e video, dhe automatizimin e rrjeteve të llogarive false, që simulojnë mbështetje artificiale publike, sidomos në periudha zgjedhore”, thotë ajo.Mediat ruse, si RT dhe Sputnik, janë të sanksionuara në Kosovë, në bazë të sanksioneve amerikane dhe evropiane që iu vunë Rusisë pas fillimit të luftës në Ukrainë, më 2022.

Megjithatë, qasja e tyre online nuk ka mundur të bllokohet tërësisht.

Autoriteti Rregullativ i Komunikimeve Elektronike dhe Postare (ARKEP) kishte thënë për Radion Evropa e Lirë se të gjithë ofruesit e internetit dhe operatorët mobilë janë të detyruar t’i bllokojnë faqet e internetit të mediave ruse, në përputhje me sanksionet, por se “për shkak të natyrës dinamike të internetit, disponueshmëria e këtyre ueb-faqeve mund të ndryshojë”./Radio Evropa e Lirë/

Kandidati i PDK-së për Kryeministër, Bedri Hamza, ka vazhduar me fjalimin e tij në tubimin përmbyllës të fushatës.

“Gjatë kësaj fushate kam takuar mijëra qytetarë. Kam pasur biseda të këndshme, por edhe të rënda. Megjithatë, një takim nuk do ta harroj kurrë. Një pensionist më tha: “Unë nuk kërkoj luks. Dua vetëm të mos detyrohem që të zgjedh mes ilaçeve dhe ushqimit”. Ky nuk është rasti i vetëm që e kam dëgjuar në këto takime. Sepse, kjo është përditshmëria e shumë familjeve në Kosovë. Frikë nga e tashmja dhe nga e ardhmja. Unë e di çfarë do të thotë ta presësh fundin e muajit. E di çfarë do të thotë t’i numërosh shpenzimet. Të mendosh për faturat, për ushqimin, për shkollën e fëmijëve. Dhe pikërisht për këtë arsye unë dhe Partia Demokratike e Kosovës po e kërkojmë besimin tuaj, votën tuaj. Sepse, ju kuptojmë dhe kemi përgjigje për ju, kemi zgjidhje për ju. Ne nuk premtojmë mrekulli. Por premtojmë vendime të drejta dhe të ndjeshme në xhepin e qytetarit”, ka thënë Hamza.

Ai ka premtuar rritje 50% të pagave, që puna të shpërblehet me dinjitet. Rritje 50% e pensioneve dhe ndihmave sociale, sepse, siç ka thënë Hamza, askush nuk duhet të jetojë në pasiguri.

Hamza ka thënë se pensioni më i ulët do të jetë 250 euro.

“0% TVSH për produktet esenciale, që shporta e familjes të jetë më e përballueshme. 0% TVSH për energjinë elektrike, që fatura të mos jetë barrë. Ulje të tatimit në të ardhura, që më shumë para të mbeten tek ju. Këto janë vendime që ua ndryshojnë jetën. Por, këto ndodhin vetëm nëse ju dilni dhe votoni për Partinë Demokratike të Kosovës”, ka thënë Hamza.

Në prag të përmbylljes së fushatës zyrtare zgjedhore, Demokracia në Veprim (DnV) ka prezantuar një vlerësim analitik me gjetjet kryesore nga vëzhgimi i fushatës, me qëllim ofrimin e një pasqyre reale mbi zhvillimet në terren, mesazhet e komunikuara dhe nivelin e gjithëpërfshirjes së procesit për qytetarët.

Drejtuesi i DnV-së, Ismet Kryeziu, ka deklaruar se fushata zgjedhore, në përgjithësi, është zhvilluar në një ambient të qetë dhe pa incidente serioze të sigurisë. Sipas tij, ka pasur konkurrencë aktive politike, aktivitete të rregullta dhe pjesëmarrje qytetare në të gjithë vendin, por vëzhgimi ka evidentuar edhe disa prirje dhe sfida që kanë ndikuar drejtpërdrejt në cilësinë e fushatës.

Sipas DnV-së, gjatë fushatës është shënuar nivel i zbehtë i entuziazmit qytetar. Pjesëmarrja ka luhatur ndjeshëm mes subjekteve politike dhe formave të organizimit, nga qindra deri në mbi një mijë pjesëmarrës. Aktivitetet kanë qenë kryesisht të kombinuara, me pjesëmarrje të mesme dhe të gjerë në prezantimet e listave, të zhvilluara kryesisht në ambiente të mbyllura. Vëzhgimi ka treguar përqendrim të aktiviteteve në qendrat urbane dhe komunat me peshë më të madhe elektorale, ndërsa komunat më të vogla kanë qenë më pak të ekspozuara.

Kryeziu ka theksuar se fushata ka qenë e përqendruar tek liderët partiakë dhe kandidatët për kryeministër, ndërsa kandidatët për deputetë kanë pasur rol dytësor. Sipas tij, personalizimi dhe centralizimi i fushatës ka kufizuar paraqitjen programore të kandidatëve, me takime pa praninë e liderëve që kanë qenë kryesisht të vogla.

Sa i përket përfaqësimit dhe gjithëpërfshirjes, Kryeziu ka vlerësuar se këto mbeten sfida serioze. Gratë kanë qenë të nënpërfaqësuara si folëse, mesatarisht vetëm një në pesë, ndërsa në shumë aktivitete nuk ka pasur asnjë grua folëse. Në listat zgjedhore, përfaqësimi i grave ka mbetur kryesisht në nivelin minimal ligjor prej 30%, duke reflektuar përmbushje formale të kërkesave ligjore, por jo domosdoshmërisht angazhim politik për fuqizimin e tyre. Të rinjtë, ndonëse aktivë në mobilizim dhe logjistikë, kanë pasur hapësirë të kufizuar në role vendimmarrëse, ndërsa personat me aftësi të kufizuara kanë qenë pothuajse të padukshëm si në audiencë ashtu edhe në përfaqësim.

Sipas Kryeziut, diskursi politik gjatë fushatës është përqendruar kryesisht në çështje ekonomike, sociale dhe të sigurisë, me theks në punësim, paga, mirëqenie sociale, arsim, shëndetësi, infrastrukturë dhe anëtarësim në NATO. Çështja e rritjes së pagave dhe fuqizimi i skemave sociale ka dominuar mesazhet e pothuajse të gjitha subjekteve politike, pavarësisht profileve ideologjike.

Sa i përket tonit dhe gjuhës së fushatës, Kryeziu ka bërë të ditur se ajo ka variuar nga pozitive dhe motivuese deri te kritikuese dhe polarizuese, ndërsa përdorimi i gjuhës fyese dhe diskriminuese ka qenë dukshëm më i ulët, me përjashtim të disa rasteve të izoluara, kryesisht nga akterë jashtë garës direkte zgjedhore.

DnV ka vlerësuar se përdorimi i gjerë i rrjeteve sociale ka rritur edhe rrezikun për dezinformim. Sipas Kryeziut, komunikimi politik është zhvilluar kryesisht përmes takimeve direkte, rrjeteve sociale dhe mediave tradicionale, duke rritur shtrirjen dhe ndërveprimin me qytetarët, por njëkohësisht duke sjellë sfida si thjeshtimi i diskursit politik dhe reduktimi i debatit substancial.

Një shqetësim i veçantë, sipas DnV-së, mbetet pabarazia e garës. Kryeziu ka thënë se edhe gjatë kësaj fushate ka pasur ndërhyrje dhe cenim të integritetit zgjedhor përmes shfrytëzimit të resurseve publike për përfitime elektorale, duke përmendur si shembull vendimin e Qeverisë për ndarjen e nga 100 eurove për pensionistët dhe fëmijët disa ditë para zgjedhjeve, të cilin e ka cilësuar si rast klasik të shfrytëzimit të resurseve publike për qëllime elektorale.

Sa i përket administrimit zgjedhor, Kryeziu ka vlerësuar se puna e trupave menaxhuese ka qenë përgjithësisht e rregullt dhe më transparente, ndonëse me raste tensionimi në mbledhjet e Komisioni Qendror i Zgjedhjeve (KQZ), veçanërisht lidhur me votimin jashtë vendit dhe akreditimin e vëzhguesve. Ndërkohë, Paneli Zgjedhor për Ankesa dhe Parashtresa (PZAP) ka pasur rol kyç në ruajtjen e integritetit të procesit, duke trajtuar ankesat me paanshmëri dhe profesionalizëm. Deri më tani janë dorëzuar 20 ankesa, prej të cilave janë marrë 7 vendime: 4 dënuese dhe 3 refuzuese.

Pas paralajmërimeve për ndërprerje të mundshme të energjisë elektrike gjatë ditës së zgjedhjeve, DnV ka bërë thirrje që autoritetet përgjegjëse të ndërmarrin të gjitha masat për të mos cenuar integritetin e procesit. Në Ditën e Zgjedhjeve, DnV do të angazhojë rreth 600 vëzhgues dhe do të informojë publikun për gjetjet nga terreni përmes katër konferencave për media. Zgjedhjet do të vëzhgohen sipas metodës PVT, e bazuar në parime statistikore, që mundëson vlerësimin e procesit të votimit dhe numërimit në një mostër përfaqësuese në nivel vendi.

Bedri Hamza në tubimin përmbyllës ka thënë se Kosova ka kaluar shumë. Por, sipas tij, gjithmonë kemi ditur të bëhemi bashkë kur ka qenë më së vështiri.

“Sot, sfida jonë nuk është më mbijetesa, por drejtimi. Drejtimi kah do të shkojmë si shtet, si shoqëri. E para që duhet të bëjmë është ta themi edhe një herë se pa unitet nuk ka stabilitet. E pa stabilitet nuk ka qeverisje të mirë. Ndërsa, pa qeverisje të mirë, nuk ka paga më të larta, as çmime më të ulëta, as siguri për familjet tona. Prandaj këto zgjedhje duhet t’i shërbejnë bashkimit tonë rreth një qëllimi të përbashkët: një jetë më të mirë për të gjithë qytetarët e vendit tonë”, ka thënë Hamza, duke shtuar se ky bashkim fillon me një hap të thjeshtë: të dielën, dilni dhe votoni për Partinë Demokratike të Kosovës.

Hamza ka thënë se në këto zgjedhje, secila votë ka peshë.

“Çdo dalje në votim është një vendim për të ardhmen e familjes suaj. Për fëmijët tuaj. Për prindërit tuaj. Për Kosovën që duam”, ka thënë ai.

Në një kohë kur politika shpesh prodhon figura të shkëputura nga realiteti i përditshëm, profili i Jeta Dida Bujarit theksohet për një arsye thelbësore: ajo vjen nga arsimi.

Jo vetëm si profesion, por si trashëgimi familjare, si kulturë pune dhe si përgjegjësi e trashëguar brez pas brezi.

Jeta Dida Bujari është brezi i tretë i mësimdhënësve në familjen e saj.

Ky fakt nuk është thjesht fakt biografik e trivial, por nënvizon bazën mbi të cilën është ndërtuar formimi i saj profesional, etik dhe publik. Në familjen Dida, arsimi nuk ka qenë kurrë vetëm punë, por mision.

Gjyshi i saj, Sedat Dida, dhe gjyshja Nadire Dida ishin pedagogë që kontribuuan në edukimin e brezave të parë pas Luftës së Dytë Botërore. Në një periudhë të vështirë historike, arsimi ishte mjet mbijetese dhe ndërtimi shoqëror.

Babai i saj, profesor Agron S. Dida, është një nga emrat më të respektuar të Fakultetit Elektroteknik, i njohur për përkushtimin akademik dhe ndikimin në formimin e shumë inxhinierëve në Kosovë.

Nëna e saj, Kimete Dida, me më shumë se 45 vjet përvojë si mësimdhënëse dhe drejtoreshë në shkollat e Prishtinës, ka edukuar gjenerata nxënësish dhe ka kontribuar edhe përmes teksteve mësimore që janë përdorur gjerësisht në sistemin arsimor.

Në këtë ambient u formua edhe Jeta Dida Bujari. Arsimi për të nuk ishte zgjedhje rastësore, por vazhdimësi e natyrshme.

Si pianiste dhe pedagoge, ajo ka punuar drejtpërdrejt me të rinjtë, duke i formuar jo vetëm profesionalisht, por edhe si individë me disiplinë, përgjegjësi dhe ndjeshmëri kulturore.

Pika kulmore e angazhimit të saj profesional është drejtimi i shkollës së muzikës “Prenk Jakova” në Prishtinë.

Gjatë kohës si drejtoreshë, Jeta Dida Bujari ka dëshmuar aftësi të larta menaxheriale dhe organizative.

Ajo ka punuar për përmirësimin e kushteve të punës, ngritjen e standardeve pedagogjike, zgjerimin e bashkëpunimeve institucionale dhe afirmimin e shkollës në nivel kombëtar dhe ndërkombëtar.

Nën udhëheqjen e saj, shkolla është shndërruar në një institucion model, me aktivitete të shumta kulturore, pjesëmarrje në festivale ndërkombëtare dhe suksese të vazhdueshme të nxënësve.

Ky angazhim nuk ka qenë vetëm administrativ, por thellësisht pedagogjik, i bazuar në njohjen nga brenda të sfidave që përballin nxënësit dhe mësimdhënësit.

Pikërisht kjo përvojë e gjatë dhe e drejtpërdrejtë në arsim e bën Jeta Dida Bujarin një zë të besueshëm në debatin publik për politikat arsimore.

Ajo nuk flet për arsimin nga teoria apo nga distanca institucionale, por nga përvoja e përditshme në klasë, në drejtim dhe në menaxhim.

E renditur sot si kandidatja femër me më së shumti vota në Kosovë dhe ndër 10 kandidatët me numrin më të lartë të votave në nivel qendror, mbështetja që ajo gëzon shihet si reflektim i këtij formimi të qëndrueshëm dhe i një përfaqësimi për të cilin, qytetarët kanë bindje dhe mirënjohje të plotë.

Kandidatura e Jeta Dida Bujarit për Kuvendin e Kosovës nuk është shkëputje nga arsimi, por vazhdimësi e tij në një nivel tjetër.

Ajo synon ta çojë përvojën, dijen dhe etikën e punës nga shkolla në politikë, duke e parë përfaqësimin publik si shërbim, jo si privilegj.

Në një shoqëri që kërkon cilësi, përgjegjësi dhe qëndrueshmëri, trashëgimia arsimore e Jeta Dida Bujarit nuk është vetëm e kaluar.

Ajo është këmbëngulje për mënyrën se si mund të ndërtohet e ardhmja e shtetit tonë.

Kandidati i Lidhja Demokratike e Kosovës për kryeministër, Lumir Abdixhiku, ka deklaruar se e ardhmja e Kosovës është digjitale, duke theksuar rolin kyç të teknologjisë dhe inteligjencës artificiale në zhvillimin e vendit.

Gjatë një diskutimi të mbajtur sot në DeepSpace Prishtinë, Abdixhiku tha se teknologjia përfaqëson një mundësi reale për Kosovën që të bëjë një kapërcim të madh zhvillimor dhe të zërë hapin me vendet evropiane.

Ai theksoi se në botën digjitale koha përshpejtohet dhe se një brez i ri, i vendosur dhe i pajisur me dije moderne, mund të sjellë ndryshim të madh për vendin. Sipas tij, rinia dhe njohuritë e reja përbëjnë përparësinë më të madhe të Kosovës.

Abdixhiku prezantoi gjithashtu planin e LDK-së për krijimin e Ministrisë së Digjitalizimit, si dhe trajnimin e 40 mijë të rinjve në fushën e teknologjisë informative dhe komunikimit (ICT), me synim krijimin e vendeve të reja të punës, ndërtimin e një ekonomie moderne dhe funksionalizimin e shtetit në epokën digjitale.

Kandidati i PDK-së për Kryeministër, Bedri Hamza, ka nisur fjalimin e tij në tubimin përmbyllës të fushatës zgjedhore të PDK-së.

“Është kënaqësi që sonte po takohemi edhe një herë. Që po bëhemi bashkë edhe një herë, në fund të kësaj fushate të mrekullueshme. Të kësaj fushate plot entuziazëm dhe energji. Të kësaj fushate plot ide për zhvillim, për punë e angazhim, për të bërë Kosovën vend më të mirë. Një Kosovë çfare e meritojmë të gjithë ne. Sonte nuk jemi mbledhur vetëm për ta përmbyllur fushatën tonë, por edhe për ta hapur një kapitull të ri për Kosovën. Një kapitull të unitetit. Një kapitull të zhvillimit dhe të dinjitetit. Një kapitull ku secili qytetar ndihet i respektuar, i përfaqësuar dhe i sigurt për të ardhmen”, ka thënë Hamza.

Ai ka thënë se janë bashkë për tu pajtuar me një vendim të përbashkët për të ardhmen e Kosovës.

“Për një vendim që nuk merret në këtë skenë. Por, merret të dielën. Një vendim që merret nga ju, kur të dilni dhe të votoni për numrin 130. Një vendim për një qeveri që i dëgjon qytetarët dhe punon për ta”, ka thënë ai.

Një delegacion gjashtëanëtarësh i Asamblesë Parlamentare të Këshillit të Evropës (PACE), i udhëhequr nga Yunus Emre (Turqi, SOC), do të qëndrojë në Kosovë nga 27 deri më 29 dhjetor, për të vëzhguar zgjedhjet e parakohshme për Kuvendin e Kosovës.

Gjatë vizitës, delegacioni do të zhvillojë takime me liderë dhe përfaqësues të partive kryesore politike, përfshirë edhe partitë që përfaqësojnë komunitetet jo-shumicë, si dhe me kryetaren e Komisionit Qendror të Zgjedhjeve dhe kryetarin e Panelit Zgjedhor për Ankesa dhe Parashtresa, njofton Dukagjini.

Po ashtu, janë planifikuar takime me përfaqësues të bashkësisë ndërkombëtare, organizata joqeveritare dhe media. Delegacioni do të vëzhgojë procesin e votimit më 28 dhjetor.

Gjatë misionit, delegacioni do të ketë mbështetje ligjore nga një ekspert i Komisionit të Venecias, organi i Këshillit të Evropës që përbëhet nga ekspertë të pavarur juridikë.

Kongresi i Shteteve të Bashkuara ka prezantuar projektligjin e ri, të quajtur “Akti për Demokracinë dhe Prosperitetin e Ballkanit Perëndimor”, me qëllim mbështetjen e demokracisë, zhvillimit ekonomik dhe sundimit të ligjit.

Dokumenti, i depozituar në Dhomën e Përfaqësuesve, përfshin Shqipërinë, Kosovën, Bosnjë-Hercegovinën, Malin e Zi, Maqedoninë e Veriut, Serbinë dhe Kroacinë.

Sipas raportit të Kongresit, korrupsioni, sidomos në nivelet e larta politike, mbetet pengesa kryesore për zhvillimin demokratik dhe ekonomik të rajonit.

Në seksionin 5, projektligji parashikon sanksione ndaj individëve dhe subjekteve që kërcënojnë stabilitetin dhe sundimin e ligjit, si dhe raporte të detyrueshme mbi ndikimet malinje të Rusisë dhe Kinës, përfshirë fushata dezinformimi dhe kërcënime kibernetike.

Shqipëria përmendet si një nga vendet që përballet me sfida në prokurimet publike, institucionet e pavarura dhe proceset zgjedhore.

Në seksionin 6, kërkohet krijimi i programeve kombëtare anti-korrupsion në secilin vend të Ballkanit Perëndimor dhe forcimi i strategjive ekzistuese për të luftuar korrupsionin politik dhe administrativ, duke përfshirë mbikëqyrjen e prokurimeve publike, mbrojtjen e informacionit dhe infrastrukturën kibernetike. Media e pavarur konsiderohet një partner i rëndësishëm në zbardhjen e korrupsionit, dhe për këtë arsye Kongresi nxit trajnimin e gazetarëve investigativë.

Një pjesë e rëndësishme është edhe “Iniciativa e Liderëve të Rinj të Ballkanit” në seksionin 9, e cila synon zhvillimin e liderëve të rinj në biznes, teknologji, qeverisje dhe gazetari. Po ashtu, projektligji promovon programe arsimore dhe shkëmbime me SHBA-në, përfshirë universitetet./Euronews Albania

Sot është duke u zhvilluar procesi i votimit për shtetasit e Kosovës në përfaqësitë diplomatike jashtë vendit.

Gjatë ditës së sotme, 19,187 shtetas të Kosovës, të cilët janë regjistruar paraprakisht për të votuar fizikisht, kanë të drejtë vote në 16 ambasada dhe 13 konsullata të Republikës së Kosovës.

Sipas të dhënave të prezantuara në konferencë për media nga KQZ, nga 24 përfaqësi diplomatike, deri në orën 13:00, nga gjithsej 19,187 votues të regjistruar, kanë votuar 36.89 për qind, apo 7,079 votues.

Nga këto të dhëna më së shumti votues kanë votuar në Konsullatën e Kosovës në Dyseldorf të Gjermanisë (2,231 votues) e pasur nga Ambasada e Kosovës në Cyrih të Zvicrës (2,114 votues). E treat është Konsullata e Kosovës në Shtutgart ku kanë votuar 1,631 votues.

Sipas njoftimit zyrtar, në orën 17:00, sipas kohës lokale në Kosovë, do të përfundojë votimi në konsullatën e Kosovës në Stamboll. Ndërkaq, në orën 19:00, qendrat e votimit do të mbyllen në disa shtete evropiane, përfshirë: Gjermaninë, Zvicrën, Francën, Belgjikën, Norvegjinë, Austrinë, Suedinë, Slloveninë, Danimarkën, Italinë, Kroacinë, Holandën, Republikën Çeke dhe Hungarinë.

Votimi në ambasadën e Kosovës në Londër do të përfundojë në orën 20:00, ndërsa në orën 01:00 të ditës pasuese, gjithnjë sipas kohës lokale në Kosovë, procesi i votimit do të përmbyllet në katër përfaqësi diplomatike në Shtetet e Bashkuara të Amerikës dhe Kanada./Telegrafi/

Rriten me 25% çmimet e referencës që përdoren nga doganat për zhdoganimin e automjeteve të përdorura për kategorinë e autoveturave, kamionët, kamionçinat dhe furgonët.

Çmimet e referencës përdoren për zhdoganimin e automjeteve të përdorura me vit prodhimi më të hershëm se viti i fundit i publikuar në buletinet zyrtare të çmimeve që përdorin Doganat si: “Quattroroute”, “Tuttotrasporti”, “Schwackeliste” etj., të cilat pasqyrojnë çmimet e shitjes në tregjet evropiane.

Rritja parashikohet në udhëzimin e ri të Ministrisë së Financave, “Për disa shtesa dhe ndryshime në udhëzimin nr. 3, datë 23.1.2018, ‘Për vlerësimin e mallrave për qëllime doganore’”, i cili ka hyrë në fuqi pas botimit në Fletoren Zyrtare.

Sipas udhëzimit, për automjetet me cilindratë nga 1400 deri në 1900 cc, pragu minimal i zhdoganimit rritet nga 200 mijë lekë (2,000 euro) në 250 mijë lekë (2,500 euro), duke shënuar një rritje prej 25%.

Për automjetet me cilindratë nga 1900 deri në 2500 cc, vlera e referencës rritet nga 325 mijë lekë (3,250 euro) në 406 mijë lekë (4,060 euro), ose rreth 25% më shumë.

Për automjetet me cilindratë nga 2500 deri në 3000 cc, çmimi minimal i zhdoganimit rritet nga 400 mijë lekë (4,000 euro) në 500 mijë lekë (5,000 euro), me një rritje prej 25%.

Për automjetet me cilindratë nga 3000 deri në 4500 cc, pragu minimal rritet nga 500 mijë lekë (5,000 euro) në 625 mijë lekë (6,250 euro), që përfaqëson një rritje prej 25%.

Ndërsa për automjetet me cilindratë mbi 4500 cc, vlera minimale e referencës mbetet e pandryshuar, në nivelin 1 milion lekë (10,000 euro).

Rritja prej 25% është miratuar edhe për çmimet e referencës për kategorinë e mjeteve si kamionçina, furgonë dhe kamionë.

Për kamionçinat dhe furgonët me kapacitet deri në 1.5 tonë, vlera minimale e referencës për zhdoganim rritet nga 400 mijë lekë (4,000 euro) në 500 mijë lekë (5,000 euro), ose 25% më shumë.

Për mjetet me kapacitet nga 1.5 deri në 3.5 tonë, pragu minimal i zhdoganimit rritet nga 600 mijë lekë (6,000 euro) në 750 mijë lekë (7,500 euro), duke shënuar një rritje prej 25%.

Për kamionët me kapacitet nga 3.5 deri në 10 tonë, vlera minimale e referencës rritet nga 850 mijë lekë (8,500 euro) në 1,062,500 lekë (10,625 euro), ose rreth 25% më shumë.

Për kamionët me kapacitet nga 10 deri në 15 tonë, çmimi minimal i zhdoganimit rritet nga 1 milion lekë (10,000 euro) në 1,250,000 lekë (12,500 euro), me një rritje prej 25%.

Për kamionët me kapacitet mbi 15 tonë, pragu minimal rritet nga 1.2 milion lekë (12,000 euro) në 1.5 milion lekë (15,000 euro), duke reflektuar gjithashtu një rritje prej 25%.

Ishte

UDHËZIM Nr. 3, datë 23.1.2018
PËR VLERËSIMIN E MALLRAVE PËR QËLLIME DOGANORE

Për autoveturat:

• Deri 1400 cc: jo më pak se 130,000 lekë (1,300 euro)
• Mbi 1400–1900 cc: jo më pak se 200,000 lekë (2,000 euro)
• Mbi 1900–2500 cc: jo më pak se 325,000 lekë (3,250 euro)
• Mbi 2500–3000 cc: jo më pak se 400,000 lekë (4,000 euro)
• Mbi 3000–4500 cc: jo më pak se 500,000 lekë (5,000 euro)
• Mbi 4500 cc: jo më pak se 1,000,000 lekë (10,000 euro)

Kamionçina, furgona dhe kamionë:

• Deri në 1.5 tonë: 400,000 lekë (4,000 euro)
• 1.5–3.5 tonë: 600,000 lekë (6,000 euro)
• 3.5–10 tonë: 850,000 lekë (8,500 euro)
• 10–15 tonë: 1,000,000 lekë (10,000 euro)
• Mbi 15 tonë: 1,200,000 lekë (12,000 euro)

Bëhet

UDHËZIMI Nr. 26, datë 17.12.2025
PËR DISA SHTESA DHE NDRYSHIME NË UDHËZIMIN NR. 3, DATË 23.1.2018,
“PËR VLERËSIMIN E MALLRAVE PËR QËLLIME DOGANORE”

Për autoveturat:

• deri në 1400 cc: 162,500 lekë (1,625 euro)
• mbi 1400–1900 cc: 250,000 lekë (2,500 euro)
• mbi 1900–2500 cc: 406,000 lekë (4,060 euro)
• mbi 2500–3000 cc: 500,000 lekë (5,000 euro)
• mbi 3000–4500 cc: 625,000 lekë (6,250 euro)
• mbi 4500 cc: 1,000,000 lekë (10,000 euro)

Për kamionçina, furgona dhe kamionë:

• deri në 1.5 tonë: 500,000 lekë (5,000 euro)
• 1.5–3.5 tonë: 750,000 lekë (7,500 euro)
• 3.5–10 tonë: 1,062,500 lekë (10,625 euro)
• 10–15 tonë: 1,250,000 lekë (12,500 euro)
• mbi 15 tonë: 1,500,000 lekë (15,000 euro)

Ky udhëzim hyn në fuqi pas botimit në Fletoren Zyrtare.