Bordi i Paqes i Trump, ku Shqipëria ka marrë ftesën si vend anëtar, është kthyer në një nga temat ‘e nxehta’ në politikën ndërkombëtare që përpiqet të zbërthejë lëvizjen e presidentit. Nën lupën e analistit Artan Hoxha, është një lëvizje për efikasitet dhe jo globalitet. Sipas analizës së tij në emisionin “Opinion” në Tv Klan, qëllimi i Trump është një organizatë që vepron shpejt, pa procedura të zgjatura.

Artan Hoxha: Nga të dhënat e këtyre tri ditëve, unë konkludoj në këtë gjë që qëllimi i presidentit Trump është efikasiteti, jo globaliteti i organizatës.

Blendi Fevziu: Ç’do të thotë efikasiteti?

Artan Hoxha: Ai do të ndërtojë një organizatë që merr vendime shpejt dhe i zbaton ato me efektivitet. Ky është qëllimi i tij parësor.

Përzgjedhja e shteteve është një tjetër nga pikat që ka tërhequr vëmendje. Në rastin e Shqipërisë, Hoxha rendit disa faktorë që e favorizojnë në marrjen e kësaj ftese. Nga ana tjetër, Trump ka luajtur disa karta për numrin e vendeve që i duhen në këtë bord dhe afatin e 22 janarit për të kthyer përgjigje.

Artan Hoxha: Nuk ka ftuar gjithë shtetet e botës, ka bërë një shortlist. 60, 70, 50 nuk janë gjithë anëtarët e OKB-së, është një pjesë, gjysma e tyre. Janë hequr një mori shtetesh anëtare të OKB-së që s’do t’i bënin kujt punë në çështjen e konfliktit të Gazës. E dyta, vendet që kanë marrë ftesën ka pasur një mendim, një arsye pse e kanë marrë. Ne mund të analizojmë Shqipërinë, pse e ka marrë Shqipëria ftesën mes 60-70 vendeve?

Blendi Fevziu: Pse, sipas teje?

Artan Hoxha: Vend multifetar, me shumicë myslimane, me harmoni, që shkojmë shumë mirë me Palestinën, që shkojmë shumë mirë me Izraelin, që kemi një histori të mbështetjes së çifutëve, përveç atyre që jemi në NATO etj. Ka shumë vende në NATO, por kaq multifetarë e me harmoni fetare si Shqipëria. Jo vetëm që nuk janë gjithë shtetet e botës, por statuti thotë kjo organizatë mund të formohet edhe me tre shtete anëtare. Pra u ka thënë të gjithëve atyre që u ka çuar letrën, hajdeni, erdhët, s’erdhët mua tre më duhen për ta formuar. Ky është faktor nxitës që të vijnë më tepër se tre. E treta, afati. Ai thotë nuk do ju pres ju për një organizatë efektive, të shpejtë, të zhdërvjellët që të nderni lëveret dhe të miratoni në procedura të stërzgjatura dhe ta çoni pas një viti firmosjen. Kush e ndan mendjen shpejt e shpejt, vjen më datë 22 në Davos dhe firmos.

Një tjetër nga lëvizjet e Trump është ruajtja e ekuilibrit me disa shtete, duke e dërguar ftesën pa qëllimin e drejtpërdrejtë për të marrë mbrapsht një “po”, thotë Hoxha.

Artan Hoxha: Disa shtete në listën e atyre që kanë marrë ftesën janë edhe për kortezi duke e paragjykuar që s’ka për të thënë po. Ka thënë unë ftesën ta çova, mundësinë ta dhashë, ti nuk erdhe, unë eci përpara.

Krijimi i Bordit të Paqes për të administruar Gazën është një nga çështjet kryesore që po diskutohet në politikën ndërkombëtare.

Ndërkohë Presidenti i SHBA, Donald Trump, u ka dërguar ftesë shteteve që do të marrin pjesë në këtë strukturë ndërkombëtare, përfshirë edhe Shqipërinë.

Por çfarë parashikon konkretisht Bordi i Paqes dhe si do të funksionojë? Më poshtë do të lexoni Kartën e Brodit të Paqes, e cila sqaron deri në detaje se çfarë është kjo strukturë dhe cili do të jetë roli i saj në politikën ndërkombëtare.

KARTA E BORDIT TË PAQES

PARATHËNIE

Duke shpallur se paqja e qëndrueshme kërkon gjykim pragmatik, zgjidhje të bazuara në arsyen e shëndoshë dhe guxim për t’u larguar nga qasje dhe institucione që shumë herë kanë dështuar

Duke pranuar se paqja afatgjatë merr rrënjë kur njerëzit fuqizohen për të marrë pronësi dhe përgjegjësi mbi të ardhmen e tyre

Duke pohuar se vetëm partneriteti i qëndrueshëm dhe i orientuar drejt rezultateve, i mbështetur në barrë dhe angazhime të përbashkëta, mund të sigurojë paqe në vende ku ajo për një kohë të gjatë ka qenë e paarritshme

Duke shprehur keqardhje që shumë qasje të ndërtimit të paqes krijojnë varësi të përhershme dhe institucionalizojnë krizën në vend se t’i udhëheqin shoqëritë përtej saj

Duke theksuar nevojën për një trup ndërkombëtar më fleksibël dhe më efektiv për ndërtimin e paqes

Dhe duke vendosur të mblidhet një koalicion shtetesh vullnetare të përkushtuara ndaj bashkëpunimit praktik dhe veprimit efektiv

Të udhëhequra nga gjykimi dhe duke nderuar drejtësinë, Palët miratojnë me këtë Kartë Kartën e Bordit të Paqes.

⸻

KAPITULLI I — QËLLIMET DHE FUNKSIONET

Neni 1: Misioni

Bordi i Paqes është një organizatë ndërkombëtare që synon të promovojë stabilitetin, të rikthejë qeverisjen e besueshme dhe ligjore dhe të sigurojë paqe të qëndrueshme në zona të prekura ose të kërcënuara nga konflikti.

Bordi i Paqes do të ndërmarrë funksione të ndërtimit të paqes në përputhje me të drejtën ndërkombëtare dhe sipas miratimit të dhënë në përputhje me këtë Kartë, përfshirë zhvillimin dhe shpërndarjen e praktikave më të mira që mund të zbatohen nga të gjitha shtetet dhe komunitetet që kërkojnë paqe.

⸻

KAPITULLI II — ANËTARËSIMI

Neni 2.1: Shtetet Anëtare

Anëtarësimi në Bordin e Paqes kufizohet vetëm për shtetet e ftuara për të marrë pjesë nga Kryetari dhe fillon me njoftimin se shteti ka dhënë pëlqimin për t’u detyruar nga kjo Kartë, në përputhje me Kapitullin XI.

Neni 2.2: Përgjegjësitë e Shteteve Anëtare

(a) Çdo Shtet Anëtar përfaqësohet në Bordin e Paqes nga Kreu i Shtetit ose i Qeverisë.

(b) Çdo Shtet Anëtar do të mbështesë dhe ndihmojë operacionet e Bordit të Paqes në përputhje me autoritetet e veta ligjore të brendshme. Asgjë në këtë Kartë nuk interpretohet si dhënie e juridiksionit Bordit të Paqes brenda territorit të Shteteve Anëtare, apo si detyrim për pjesëmarrje në një mision të caktuar ndërtimi të paqes pa pëlqimin e tyre.

(c) Çdo Shtet Anëtar shërben një mandat jo më të gjatë se tre vjet nga hyrja në fuqi e kësaj Karte, subjekt rinovimi nga Kryetari. Ky kufizim trevjeçar nuk zbatohet për Shtetet Anëtare që kontribuojnë më shumë se 1.000.000.000 dollarë amerikanë në fonde monetare për Bordin e Paqes brenda vitit të parë nga hyrja në fuqi e Kartës.

Neni 2.3: Përfundimi i Anëtarësimit

Anëtarësimi përfundon në njërën nga rastet e mëposhtme, cilado që ndodh më herët

(i) përfundimi i mandatit trevjeçar, subjekt Nenit 2.2(c) dhe rinovimit nga Kryetari

(ii) tërheqja, në përputhje me Nenin 2.4

(iii) vendim për largim nga Kryetari, subjekt vetoje nga një shumicë prej dy të tretash e Shteteve Anëtare

(iv) shpërbërja e Bordit të Paqes në përputhje me Kapitullin X

Një Shtet Anëtar, anëtarësimi i të cilit përfundon, pushon gjithashtu së qeni Palë e kësaj Karte, por mund të ftohet sërish për anëtarësim në përputhje me Nenin 2.1.

Neni 2.4: Tërheqja

Çdo Shtet Anëtar mund të tërhiqet nga Bordi i Paqes me efekt të menjëhershëm duke i paraqitur Kryetarit një njoftim me shkrim.

⸻

KAPITULLI III — QEVERISJA

Neni 3.1: Bordi i Paqes

(a) Bordi i Paqes përbëhet nga Shtetet Anëtare.

(b) Bordi i Paqes voton për të gjitha propozimet në axhendën e tij, përfshirë buxhetet vjetore, krijimin e entiteteve vartëse, emërimin e drejtuesve të lartë ekzekutivë dhe vendimet kryesore politike, përfshirë miratimin e marrëveshjeve ndërkombëtare dhe nisjen e nismave të reja të ndërtimit të paqes.

(c) Bordi i Paqes mblidhet për seanca me votim të paktën një herë në vit dhe në kohë e vende të tjera sipas përcaktimit të Kryetarit. Axhenda caktohet nga Bordi Ekzekutiv, pas njoftimit dhe konsultimit me Shtetet Anëtare dhe miratohet nga Kryetari.

(d) Çdo Shtet Anëtar ka një votë.

(e) Vendimet merren me shumicën e Shteteve Anëtare të pranishme dhe votuese, subjekt miratimi nga Kryetari, i cili mund të ushtrojë votën e tij si Kryetar në rast barazie.

(f) Bordi i Paqes mban gjithashtu mbledhje të rregullta jo-votuese me Bordin Ekzekutiv, të paktën çdo tre muaj.

(g) Shtetet Anëtare mund të përfaqësohen nga një zyrtar i lartë alternativ, me miratimin e Kryetarit.

(h) Kryetari mund të ftojë organizata rajonale të integrimit ekonomik për të marrë pjesë në punimet e Bordit të Paqes sipas kushteve që ai përcakton.

Neni 3.2: Kryetari

(a) Donald J. Trump shërben si Kryetari inaugurues i Bordit të Paqes dhe njëkohësisht si përfaqësues inaugurues i Shteteve të Bashkuara të Amerikës.

(b) Kryetari ka autoritet ekskluziv për të krijuar, ndryshuar ose shpërbërë entitete vartëse sipas nevojës për përmbushjen e misionit të Bordit të Paqes.

Neni 3.3: Pasardhësia dhe Zëvendësimi

Kryetari përcakton në çdo kohë një pasardhës për funksionin e Kryetarit. Zëvendësimi ndodh vetëm pas dorëheqjes vullnetare ose paaftësisë, të konstatuar me votë unanime të Bordit Ekzekutiv.

Neni 3.4: Nënkomitetet

Kryetari mund të krijojë nënkomitete sipas nevojës dhe përcakton mandatin, strukturën dhe rregullat e qeverisjes së tyre.

⸻

KAPITULLI IV — BORDI EKZEKUTIV

Neni 4.1: Përbërja dhe Përfaqësimi

(a) Bordi Ekzekutiv përzgjidhet nga Kryetari dhe përbëhet nga personalitete me reputacion global.

(b) Anëtarët e Bordit Ekzekutiv shërbejnë mandate dyvjeçare, të rinovueshme dhe subjekt largimi nga Kryetari.

(c) Bordi Ekzekutiv drejtohet nga një Drejtor Ekzekutiv i Përgjithshëm, i emëruar nga Kryetari dhe i konfirmuar me shumicë votash nga Bordi Ekzekutiv.

(d) Drejtori Ekzekutiv mbledh Bordin Ekzekutiv çdo dy javë gjatë tre muajve të parë dhe më pas çdo muaj.

(e) Vendimet e Bordit Ekzekutiv merren me shumicë të anëtarëve të pranishëm dhe hyjnë menjëherë në fuqi, subjekt vetoje nga Kryetari.

(f) Bordi Ekzekutiv miraton rregulloren e vet të procedurës.

Neni 4.2: Mandati

Bordi Ekzekutiv

(a) ushtron kompetencat e nevojshme për zbatimin e misionit

(b) raporton çdo tre muaj para Bordit të Paqes.

⸻

KAPITULLI V — DISPOZITA FINANCIARE

Neni 5.1: Shpenzimet

Financimi i Bordit të Paqes sigurohet përmes kontributeve vullnetare nga Shtetet Anëtare, shtete të tjera, organizata ose burime të tjera.

Neni 5.2: Llogaritë

 

Bordi i Paqes mund të hapë llogari financiare dhe të vendosë mekanizma kontrolli dhe mbikëqyrjeje për buxhetet dhe disbursimet.

⸻

KAPITULLI VI — STATUSI JURIDIK

Neni 6

(a) Bordi i Paqes dhe entitetet e tij kanë personalitet juridik ndërkombëtar.

(b) Bordi siguron privilegje dhe imunitete të nevojshme për ushtrimin e funksioneve të tij.

⸻

KAPITULLI VII — INTERPRETIMI DHE ZGJIDHJA E MOSMARRËVESHJEVE

Neni 7

Mosmarrëveshjet zgjidhen përmes bashkëpunimit miqësor. Kryetari është autoriteti përfundimtar për interpretimin e Kartës.

⸻

KAPITULLI VIII — NDRYSHIMET E KARTËS

Neni 8

Ndryshimet miratohen me dy të tretat e Bordit dhe konfirmim nga Kryetari. Disa kapituj kërkojnë miratim unanim.

⸻

KAPITULLI IX — REZOLUTA DHE URDHËRESA

Neni 9

Kryetari është i autorizuar të nxjerrë rezoluta për zbatimin e misionit.

⸻

KAPITULLI X — KOHËZGJATJA DHE SHPËRBËRJA

Neni 10

Bordi shpërbëhet sipas vlerësimit të Kryetarit ose në fund të çdo viti tek, nëse nuk rinovohet.

⸻

KAPITULLI XI — HYRJA NË FUQI

Neni 11

Karta hyn në fuqi pas pëlqimit të tre shteteve.

⸻

KAPITULLI XII — REZERVAT

Neni 12

Nuk lejohen rezerva ndaj Kartës.

⸻

KAPITULLI XIII — DISPOZITA TË PËRGJITHSHME

Neni 13

Gjuha zyrtare është anglishtja. Selia dhe vula miratohen nga Kryetari.

Qendra Spitalore Universitare “Nënë Tereza” ka reaguar pas ndërprerjes së energjisë elektrike në Urgjencë, duke lënë jashtë funksionit pajisjet mjekësore që përdore për pacientët.

Lidhur me këtë ngjarje, ka reaguar zyrtarisht vet spitali. Në këtë reagim Qendra Spitalore Universitare “Nënë Tereza” thotë se pavarësisht kësaj situate, jeta e pacientëve nuk u rrezikua.

Reagimi:

Qendra Spitalore Universitare “Nënë Tereza” informon se sot në mbrëmje, për shkak të një defekti në linjën e furnizimit me energji elektrike të tensionit të lartë që furnizon Godinën A2 të QSUT, ka pasur një ndërprerje të përkohshme të energjisë elektrike.

Falë aktivizimit të menjëhershëm të sistemeve rezervë (UPS, Gjeneratorë), aparaturat mjekësore jetike kanë vijuar të funksionojnë normalisht, duke garantuar vijimësinë e trajtimit dhe duke mos u cenuar në asnjë moment jeta e pacientëve.

Menjëherë, ekipet mjekësore, teknike dhe drejtuese janë vënë në gatishmëri të plotë, duke vepruar sipas protokolleve të sigurisë dhe duke ofruar çdo suport të nevojshëm, për garantimin e shërbimit shëndetësor si dhe duke marrë masat e nevojshme.

QSUT siguron qytetarët se situata është menaxhuar me përgjegjësi dhe profesionalizëm dhe se institucioni mbetet në gatishmëri të plotë, për të përballuar çdo situatë, në funksion të mbrojtjes së shëndetit dhe jetës së pacientëve.
QSUT ka ngritur menjehere grupin e punës për verifikimin e situatës.

Analisti Baton Haxhiu ka folur për Bordin e Paqes për administrimin e Gazës, i cili do të krijohet nga presidenti i SHBA Donald Trump,  duke thënë se ka lexuar edhe statutin e kësaj strukture ndërkombëtare.

Haxhiu theksoi se Bordi i Paqes duhet të analizohet në disa plane: politik, juridik dhe ekzekutiv, për të kuptuar realisht se si do të funksionojë.

“Bordi është themeluar me statut. Janë ftuar disa vende, të cilat, në një mënyrë ose tjetër, nuk mund t’i thonë jo Amerikës. Një prej tyre është Shqipëria”, u shpreh Haxhiu.

Ky koncept i ri ndërkombëtar, tha ai, ngjan me periudhën kur u shpërbë Liga e Kombeve, e cila dështoi për shkak të pafuqisë politike dhe që u zëvendësua më pas nga Organizata e Kombeve të Bashkuara.

I pyetur nëse krijimi i Bordit të Paqes nënkupton fundin e OKB-së, analisti u përgjigj duke treguar se statuti i Bordit dallon thelbësisht nga parimet mbi të cilat funksionon OKB-ja.

“Trump shpreh një mosbesim të thellë ndaj OKB-së. Në statut thuhet qartë se për Trump nuk vlejnë gjykatat ndërkombëtare. Ai heq totalisht moralizmin që ka ndërtuar OKB-ja ndër vite”, deklaroi ai.

Debatin e zhvilluar në Tiranë mbi këtë çështje, e quajti “provincial dhe të padobishëm”.

Kreu i ‘Shqipëria Bëhet’, Adriatik Lapaj ka reaguar pasi ndërprerja e energjisë elektrike në disa zona të Tiranës, ka prekur edhe një repart në QSUT.

Përmes një postimi në rrjetet sociale, Lapaj e cilëson shokues faktin që të mbetet pa energji elektrike një repart, ku janë pavione të tëra që kanë reaminacion.

Sipas Lapajt, janë dhënë miliona euro për konçensione, por nuk ka drita në spitalin kryesor të vendit.

“QSUT është spitali qendror i vendit. Aty kryhen ndërhyrjet mjekësore më të vështira në vend. Janë pavione të tëra që kanë reanimacion. Është thjesht shokuese se si mund të ikin dritat aty! Nuk ka fare rëndësi arsyeja përse nuk ka drita, dritat aty thjesht nuk mund të mungojnë. Spitali si ai kanë linja të dyfishta, gjenerator e me radhë. Thjesht nuk mund të fiken dritat aty! Është fatale!

8 milion euro në vit për konçesionin e Chek up-it;

100 milion euro për konçesionin e sterilizimit;

Si ka mundësi që ka miliona euro për konçesione, por nuk sigurojmë dot dritat në spitalin kryesor të vendit?”, shkruan Lapaj.

Urgjenca e QSUT ka mbetur pa energji elektrike për mbi 30 minuta. Kjo situatë ka shkaktuar tension tek pacientët, stafet mjekësore, por dhe familjaret, veçanërisht në shërbimin e reanimacionit.

Mësohet se gjeneratori nuk ka arritur të ndizet gjë që ka shkaktuar koas, tension dhe frikë për jetën e pacienteve.

Mësohet se energjia është rikthyer pas 30 minutash, ndërsa QSUT pritet të dale me një deklaratë zyrtare në lidhje me situatën e ndodhur.

Një pjesë e Tiranës ka mbetur pa energji elektrike, për shkak të një defekti në linjën e OST.

Sipas një njoftimi nga OSHEE, është shfaqur avari në linjën 110kV të OST që furnizon me energji disa nënstacione, kryesisht zona rreth Ali Demit, Fresku, ish-Uzina Autotraktorëve, Brryli, etj.

OSHEE sqaron se po bashkëvepron me stafet e Operatorit të Sistemit të Transmetimit, për zgjidhje të problemit.

Ndërkohë, furnizime po kryhen nga linja të dyta institucionet e rëndësishme dhe zona të caktuara, përmes skemës unazë.

“Është shfaqur avari në linjën 110kV të OST që furnizon me energji disa nënstacione, kryesisht zona rreth Ali Demit, Fresku, ish-Uzina Autotraktorëve, Brryli, etj.  Po bashkëveprojmë me stafet e OST (Operatori i Sistemit të Transmetimit), për zgjidhje të problemit.  Ndërkohë OSSH është duke furnizuar nga linja të dyta institucionet e rëndësishme dhe zona të caktuara, përmes skemës unazë.”, thuhet në njoftimin e OSHEE.

Ndërprerja e energjisë elektrike ‘preku’ edhe ndeshjen Dinamo-Vllaznia. Pjesa e dytë e ndeshjes nisi me 40 minuta vonesë në “Air Albania”.

Presidenti amerikan, Donald Trump thotë se Evropa duhet të përqendrohet te lufta në Ukrainë, jo te Grenlanda, dhe këmbënguli se do të ndjekë planin e tij për tarifa ndaj shteteve që dërgojnë trupa ushtarakë në ishullin arktik.

Në një intervistë të shkurtër telefonike me NBC News, Trump tha se do t’i godasë “100%” vendet evropiane me tarifa nëse nuk mund të arrihet një marrëveshje për Groenlandën.

“Evropa duhet të përqendrohet në luftën me Rusinë dhe Ukrainën, sepse, sinqerisht, e shihni se çfarë u ka sjellë kjo atyre. Kjo është ajo në të cilën duhet të përqendrohet Evropa – jo Groenlanda.”, theksoi Trump.

I pyetur nëse do të përdorte forcën për të pushtuar Groenlandën, presidenti tha: “Pa koment”.

Presidenti i Bullgarisë, Rumen Radev, ka dhënë dorëheqjen nga posti, ndërsa zëvendëspresidentja aktuale Iliana Jotova do të marrë postin e kreut të shtetit.

Radev theksoi se demokracia bullgare nuk do të mbijetojë nëse lihet në duart e, siç tha ai, “strukturave të korruptuara dhe ekstremistëve”, duke theksuar se besimi i qytetarëve e detyron të mbrojë institucionet.

“Nesër do të jap dorëheqjen nga posti i Presidentit të Republikës së Bullgarisë. Nëntë vjet më parë, ju votuat që unë të shërbeja në Bullgari si president. Së bashku përjetuam një sërë krizash, sulmesh nga oligarkia dhe protesta të mëdha në vitet 2020 dhe 2025. Sot, po ju drejtohem për herë të fundit si president i Bullgarisë. I pranoj gabimet e mia”, tha Radev.

Sipas mediave të huaja, ai kujtoi se u zgjodh për herë të parë president nëntë vjet më parë dhe se besimi iu rinovua në vitin 2021, duke vlerësuar se u përpoq ta justifikonte këtë nder dhe përgjegjësi në të gjitha veprimet e tij.

Le ta bëjmë natën ditë këtë javë, të trokasim në çdo votër, në çdo derë, në çdo zemër në Tiranë dhe kudo. Ky është ky apeli që ka bërë kreu i Partisë Demokratike, Sali Berisha gjatë fjalës së tij në foltoren e zhvilluar para kryeministrisë, duke paralajmëruar protestën kombëtare të 24 janarit. Ai akuzoi kryeministrin Edi Rama dhe qeverinë e tij për vjedhjen e shqiptarëve.

“Edi Rama është një narko-diktator i cili vjedh shqiptarët nga mëngjesi gjer në darkë. Qeveritarët e tij janë shushunja të vërteta që depozitojnë pasuri përrallore nga taksat e qytetarëve dhe pasuritë publike. Është jetike, është vendimtare t’i përmbysim këta kriminelë dhe t’i çojmë përpara ligjit. Shqipëria nuk do ketë kurrë Kushtetutë dhe ligj pa triumfin e opozitës, pa triumfin e qytetarëve, pa kryengritjen paqësore të shqiptarëve. Le ta bëjmë ne natën ditë këtë javë, të trokasim në çdo votër, në çdo derë, në çdo zemër në Tiranë dhe kudo. Sheshet dhe rrugët e kryeqytetit të shndërrohen në tmerrin e regjimit, në triumfin e lirisë, në triumfin e qytetarëve. Rroftë Tirana, rroftë Shqipëria!”, u shpreh Berisha.

Ai solli në vëmendje edhe një dokument që sipas tij është miratuar këtë javë në Kongresin Amerikan, i cili sipas Berishës denoncon qeverisjen e Ramës dhe AKSHI-n.

“Këtë javë, në tempullin e demokracisë, komisionin e jashtëm të kongresit të SHBA, u miratua një dokument themelor, në të cilin pasqyrohen të gjithë ato për të cilat ju protestuat, dhe për të cilat do të protestoni me 24 janar. Në këtë dokument nxin për faqen e zezë të tij Edi Rama dhe Lubi Balluku, që po bllokon ligjin dhe shtetin ligjor. Protesta dhe vetëm protesta është rruga e mbrojtjes së tyre. Por dokumenti, historik do ta quaja unë dhe është i tillë, e quan eksplozive, shpërthyese, AKSHI-n e Edi Ramës dhe të Lindave të tij. Dokumenti i miqve tanë shkruan se ajo çka flitet për AKSHI-n, dhe çka del, është kërcënim jo vetëm për Shqipërinë, por edhe për SHBA, edhe për NATO-n. Ky dokument denoncon me forcën më të madhe arrestimet politike të këtij regjimi dhe kërkon ndërhyrjen e Uashingtonit dhe të Brukselit kundër kësaj situate. Ky dokument frymëzohet nga guximi juaj për të mbrojtur të vërtetat e këtij vendi”.

Stilisti i njohur i modës së lartë ndërkombëtare Valentino Garavani ka ndërruar jetë në Romë në moshën 93-vjeçare. Lajmi u bë i ditur nga Fondacioni Valentino Garavani dhe Giancarlo Giammetti: “Stilisti ndërroi jetë në paqe në rezidencën e tij në Romë, i rrethuar nga dashuria e të dashurve të tij.”

Valentino Clemente Ludovico Garavani, i njohur nga të gjithë si Valentino, lindi më 11 maj 1932, në Voghera, në provincën e Pavias. Pasioni i tij për modën, i mbështetur nga prindërit e tij Mauro Garavani dhe Teresa de Biaggi, e shtyu atë të studionte modë dhe frëngjisht, përpara se të transferohej në Paris për të ndjekur mundësi të reja. Ky ishte vetëm fillimi i një karriere të gjatë dhe rekordthyese që e bëri atë të bëhej një nga emrat më legjendarë në modën italiane dhe ndërkombëtare. Ai ishte krijuesi i nuancës më ikonike të së kuqes.

Në Paris, Valentino punoi si praktikant te Jean Dessès dhe Guy Laroche, përpara se të kthehej në Itali për të thelluar përvojën e tij, fillimisht tek Emilio Schuberth dhe më pas te Vincenzo Ferdinandi. Shtëpia e modës Valentino u themelua në vitin 1957 dhe në vitin 1959 Valentino hapi atelienë e tij të parë në Via Condotti në Romë.

Fillimi nuk ishte i lehtë, pasi partnerët, pas një investimi fillestar, vendosën të tërhiqeshin. Pika e kthesës erdhi me hyrjen në shoqërinë e partnerit të tyre Giancarlo Giammetti, një student arkitekture të cilin Valentino e kishte takuar në një bar në kryeqytet në vitin 1960.

Ishte fillimi i një partneriteti që zgjati gjithë jetën. Gjatë karrierës së tij të gjatë, Valentino punoi me shumë gra të shoqërisë ndërkombëtar, nga marrëdhënia e tij e gjatë me Jacqueline Bouvier Kennedy Onassis, e cila filloi në vitin 1964, deri te Elizabeth Taylor, Sharon Stone dhe Linda Evangelista.

Pas një karriere të gjatë, Valentino Garavani dha dorëheqjen nga drejtimi i shtëpisë së tij të modës në vitin 2007. Në korrik 2012, shtëpia iu shit kompanisë katariane Mayhoola për Investime dhe në vitin 2023, grupi Kering bleu 30% të aksioneve të Grupit Valentino për 1.7 miliardë euro. Në vitin 2016, së bashku me Giammetti, ai krijoi Fondacionin Valentino me një qëllim thjesht filantropik.

Detaje të reja janë zbuluar nga vrasja e Jani Aliajt në burgun Koridhalos në Greqi. Sipas informacioneve, vrasja dyshohet të jetë porositur jashtë burgut.

Mësohet gjithashtu se autori i vrasjes së 49-vjeçarit Jani Aliaj rezulton të jetë një 28-vjeçar grek, vrasës me pagesë. Po 28-vjeçari në 18 gusht 2025 ekzekutoi 47-vjeçarin nga Gjirokastra, Artur Bashimi.

Artur Bashimi është vëllai i Marsel Bashimit, i përfshirë në ngjarje të rënda në Greqi, në një rast në bashkëpunimi me Bledar Jambellin dhe Kristaq Lecin, të kërkuar në Shqipëri për vrasjen e Komisar Artan Cukut.

Në ditën e 22-të të protestave në Iran, agjencia e lajmeve Hrana, e organizatës humanitare me të njëjtin emër me seli në Shtetet e Bashkuara, ka konfirmuar të paktën 3.919 të vdekur, ndërsa 8.949 raste të tjera janë ende nën hetim.

Sipas të njëjtës organizatë, numri i arrestimeve ka arritur në 24.669, “ndërsa vazhdon bllokimi i internetit dhe ashpërsohet represioni”.

Por, sipas The Sunday Times, duke cituar një raport iranian, numri i të vdekurve në Iran nga shtypja e protestave do të ishte rreth 16.500. “Dëshmitarët – thuhet – tregojnë për brutalitetin e ushtruar ndaj atyre që marrin pjesë në protestat kundër regjimit”.

Në raport përmendet edhe “errësira digjitale” lidhur me atë që po ndodh, e cila përkufizohet si “gjenocid”. Të paktën 330 mijë persona thuhet se kanë mbetur të plagosur, shumica prej tyre gjatë dy ditëve të një masakre të plotë, në shtypjen më brutale të regjimit klerikal në 47 vitet e ekzistencës së tij. Sipas Times, besohet se shumica e viktimave ishin nën moshën 30 vjeç.

Një vrasje ndodhi brenda burgut të Korydallos, kur një i burgosur me origjinë shqiptare, u sulmua me thikë dhe ndërroi jetë nga plagët e marra.

Mësohet se shqiptari i vrarë në burgun e Koridhalos është Jani Aliaj, një emër shumë i njohur për botën e krimit.

Jani Aliaj rezulton i dënuar me burgim të përjetshëm nga drejtësia shqiptare për vrasjen e Elton Çiços për hakmarrje, ngjarje kjo e ndodhur më 1 Maj të vitit 2016 në zonën e ish-Bllokut në Tiranë.

Mediat greke bëjnë të ditur se incidenti ndodhi në rrethana ende të paqarta, duke nxitur mobilizimin e menjëhershëm të autoriteteve të burgut.

Informacionet fillestare tregojnë se autori i krimit është një i burgosur grek, i cili e sulmoi viktimën duke përdorur një objekt të mprehtë të improvizuar.

Vërehet se të dy burrat ishin kriminelë të rrezikshëm që vuanin dënimin për vrasje.

Dënimi me vdekje në botë ka shënuar një rritje alarmante, paralajmëroi sot Komisioneri i Lartë i OKB-së për të Drejtat e Njeriut, duke shprehur shqetësim për situatën në Iran, Arabinë Saudite dhe Shtetet e Bashkuara të Amerikës.

”Ndërsa tendenca globale vazhdon të shkojë drejt shfuqizimit universal të dënimit me vdekje, numri i ekzekutimeve është rritur ndjeshëm në 2025, kryesisht për shkak të një rritjeje të dukshme në disa shtete që e ruajnë këtë dënim”, theksoi Volker Turk në një deklaratë të publikuar sot në Gjenevë.

”Zyra ime ka konstatuar një rritje alarmante të përdorimit të dënimit me vdekje në 2025, veçanërisht për shkelje që nuk përfshihen në kriterin e krimeve më të rënda të kërkuara nga ligji ndërkombëtar”, deklaroi zyrtari i OKB-së.

Në Iran, ku sipas Turk të paktën 1 500 persona janë ekzekutuar në 2025, shkalla dhe ritmi i ekzekutimeve tregojnë një përdorim sistematik të dënimit me vdekje si mjet intimidimi nga shteti.

Në Arabinë Saudite, të paktën 356 persona, përfshirë të paktën dy të mitur, janë ekzekutuar në 2025, duke tejkaluar rekordin e mëparshëm të vitit 2024.

Në Shtetet e Bashkuara të Amerikës, sipas Komisionerit të Lartë, kanë ndodhur 47 ekzekutime në 2025, që përbën numrin më të lartë në 16 vitet e fundit.

Ka nisur me tensione sesioni i ri parlamentar për vitin 2026, por është mbyllur në vetëm 30 minuta. 

Që në nisje të seancës ndërsa kreu i Kuvendit Niko Peleshi nisi fjalën, deputetët e PD kanë bllokuar foltoren dhe kanë kërkuar largimin e Belinda Ballukut nga salla.

“Si nuk u lodhe o burrë’, dëgjohet Peleshi duke iu drejtuar Gazment Bardhit i cili fliste mbi fjalën e tij duke kërkuar largimin e zv. kryeministres nga salla e Kuvendit.

Donald Trump nuk është presidenti i parë amerikan që do Groenlandën. Ky ishull gjigant, i shkretë dhe i ngrirë ka qenë një obsesion në Uashington për më shumë se 200 vjet, vazhdimisht subjekt negociatash, shpesh sekrete. Por a e dinit se kur ishulli ishte ende nën kontrollin e përbashkët të Danimarkës dhe Norvegjisë , Islanda ishte gjithashtu midis zotërimeve të saj ? Dhe se edhe ajo ishte objekt i vëmendjes amerikane?

Trump, të paktën për momentin, nuk duket i interesuar të pushtojë edhe Reykjavikun. Ne gjithashtu e dimë se Groenlanda kishte rënë nën kontrollin amerikan në rrethana aventureske gjatë Luftës së Dytë Botërore. Historia na tregon se motivimet e Trump janë të njëjta me ato të këtyre presidentëve të tjerë amerikanë: një çështje sigurie gjeopolitike dhe qasjeje të domosdoshme në burimet natyrore thelbësore për sigurinë ekonomike. Kështu, duke filluar me James Madison në 1814, përmes Andrew Johnson në 1876, pastaj, në 1910, William Taft, deri te Franklin Delano Roosevelt dhe në vitet 1970 Gerald Ford, i këshilluar nga zëvendëspresidenti i tij Nelson Rockefeller , Uashingtoni shprehu interes të vazhdueshëm për blerjen ose kontrollin e Groenlandës, ndaj të cilit Danimarka gjithmonë reagonte negativisht .

Gjithashtu, midis viteve 1953 dhe 1959, rreth ishullit pati një projekt sfidues, përsëri sekret dhe jo të vogël, i dobishëm për të kuptuar shkallën e marrëdhënieve Uashington-Kopenhagë rreth ishullit. Në këtë rast, me shpërthimin e Luftës së Ftohtë, Presidenti Dwight Eisenhower, ish-gjenerali që fitoi Luftën e Dytë Botërore, organizoi Operacionin Blue Jay , me një bazë ajrore në Thule, një rajon në veri të ishullit, me shtimin, vite më vonë, të një komande NORAD (Komanda Ajrore dhe Hapësinore Anti-Bërthamore).

Pati gjithashtu një projekt të quajtur “IceWorm”, që nuk u realizua kurrë, për të instaluar 600 raketa Minuteman, raketa ndërkontinentale me koka bërthamore, nën akullnajat e Groenlandës. Në Thule (emri iu dha atij rajoni nga eksploruesi Knud Rasmussen, i frymëzuar nga mitologjia klasike) punuan 1,000 groenlandezë dhe deri në 10,000 amerikanë. Pastaj baza u zvogëlua dhe u riemërua. Por këtu del në pah një pikë e rëndësishme: Amerika nuk kishte nevojë ta zotëronte formalisht ishullin për të bërë çfarë të donte me të. Ky aspekt i koncesionit, në një negociatë normale, mund të ishte tërhequr kur nënshkruhej një marrëveshje shumë afatgjatë, të paktën për të ruajtur pamjen e jashtme. Por jo me Donald Trump.

Prej kohësh dihet se personi i parë që aludoi për rëndësinë strategjike të Groenlandës ishte miku i tij i vjetër, Ronald Lauder, një republikan i vendosur, ish-ambasador në Vjenë gjatë viteve të Reaganit dhe trashëgimtar i pasurisë së kompanisë së bukurisë me të njëjtin emër. Megjithatë, Lauder nuk u përqendrua vetëm në çështjen strategjike; duke e njohur mikun e tij, ai e ngacmoi duke thënë se asnjë president para tij, nga Madison te Johnson, Taft, Roosevelt, Truman e Ford, nuk kishte arritur ta arrinte këtë objektiv strategjik për Shtetet e Bashkuara.

Nëse do të kishte pasur sukses, do të kishte bërë histori duke qëndruar mbi disa nga presidentët më të mëdhenj të Amerikës. Ky aspekt e bën rezultatin e negociatave të paparashikueshëm, pasi, përtej interesave aktuale strategjike të Amerikës, elementi i paqëndrueshëm i lidhur me egon e këtij presidenti, i vendosur të shkëlqejë me çdo kusht, hyn në lojë me forcë. Edhe me koston e një lufte, të një shpërbërjeje të Aleancës Atlantike (siç tha ai në një intervistë me New York Times ) ose të një lufte tregtare me Bashkimin Evropian .

Megjithatë, një gjë është e sigurt: Trump, me qëndrimin e tij kërcënues, arrogant dhe mbizotërues, duhet thënë jo. Bashkimi Evropian kishte të drejtë që kërcënoi me hakmarrje, që thirri “bazukën” ekonomike dhe që mori një qëndrim të ashpër: pas kësaj loje fshihet edhe rreziku i inkurajimit të Rusisë për të zgjeruar ambiciet e saj territoriale , dhe një Bashkim Evropian pasiv i nënshtruar ndaj Uashingtonit të Trump mund të forcojë ambiciet e Moskës. Megjithatë, vetë Trump mund të bëjë të njëjtin gabim si Putini kur u përpoq të pushtonte Ukrainën: duke nënvlerësuar reagimin e vendosur të një Evrope të zënë në një situatë të vështirë dhe koston për presidencën e tij. Por le të shohim disa aspekte të negociatave të mëparshme për të kuptuar se çfarë mund ose nuk mund të bëhet midis tani dhe qershorit, afati i ardhshëm i vendosur nga Trump përpara se të vazhdohet me rritjen e tarifave prej 25% për disa vende evropiane “bashkëpunëtore” të Danimarkës.

Le të fillojmë me Madison, një nga Etërit Themelues. Disa nga ndjekësit e tij e konsideruan shkurtimisht Groenlandën si një mundësi kur Uashingtoni negocioi Traktatin e Ghentit me Britaninë e Madhe në dhjetor 1814, një traktat që i dha fund armiqësive detare midis dy kombeve, kryesisht për shkak të provokimit britanik. Paralelisht me atë negociatë, fuqitë evropiane, gjithashtu në vitin 1814, negociuan Traktatin kompleks të Kielit, i cili i dha fund Luftërave Napoleonike, vendosi kufij të rinj dhe përfundoi, ndër të tjera, një ndarje midis Norvegjisë dhe Danimarkës dhe caktimin e Groenlandës, e cila deri atëherë ishte menaxhuar bashkërisht (komunitetet norvegjeze kishin qenë të pranishme në ishull që nga viti 1200, dhe madje edhe më herët, që nga viti 982, kur norvegjezi Eriku i Kuq u internua në Groenlandë).

Në këtë pikë, duhej të futeshin kufizime të caktuara në frontin evropian. Edhe pse kolonitë e fundit norvegjeze ishin shuar rreth vitit 1400, Norvegjia mbajti disa pretendime territoriale dhe që nga viti 1921 e tutje, kur Danimarka formalizoi kontrollin e plotë të të gjithë ishullit, Norvegjia gjithashtu iu drejtua Gjykatës Ndërkombëtare, një çështje që përfundoi vetëm në vitin 2008 me caktimin e plotë të territoreve të ishullit Danimarkës dhe jo Norvegjisë, e cila në atë pikë u tërhoq me dëshirë.

Megjithatë, ky episod është domethënës në ilustrimin se si 1) vendet që kontrollonin Groenlandën ishin seriozisht në konflikt me njëra-tjetrën, 2) Danimarka, dhe bashkë me të edhe Evropa, nuk kanë investuar kurrë vërtet shumë në ishull, dhe 3) konteksti strategjik po ndryshon. Duke thënë të gjitha këto, qëndrimi shantazhues dhe kërcënues i Trump shkon kundër një tradite amerikane që që nga koha e Johnson ka kërkuar gjithmonë një marrëveshje, duke ushtruar presion të fortë, por gjithmonë duke respektuar vendimin përfundimtar të Danimarkës.

Në vitin 1867, gjatë periudhës së rindërtimit pas Luftës Civile dhe pas vrasjes së Linkolnit, Sekretari i Shtetit William Seward përfundoi blerjen e Alaskës nga Rusia për 7.2 milionë dollarë në emër të Presidentit Johnson, i cili kishte pasuar presidentin e vrarë . Menjëherë pas kësaj, Seward u bind se SHBA-të duhet të blinin edhe Groenlandën dhe Islandën. Negociatat filluan me një ofertë: 5.5 milionë dollarë. Gjithçka vazhdoi pa probleme nga jashtë, por më pak nga brenda. Kongresi ishte kundër shpenzimit të më shumë parave, dhe ato ishin kohë të tjera: kërkohej miratimi parlamentar. Propozimi më pas u la në pritje.

Dinamika të ngjashme u përsëritën në vitin 1910 kur Presidenti Taft autorizoi një negociatë për një shkëmbim tipik pushteti kolonial. Negociatori ishte ambasadori i Shteteve të Bashkuara në Danimarkë, Maurice Francis Egan: ai propozoi që Shtetet e Bashkuara t’ia lëshonin ishullin filipinas Mindanao, atëherë një territor amerikan, Danimarkës në këmbim të Groenlandës dhe Indive Perëndimore Daneze. Danimarka ishte e interesuar, por marrëveshja përfundimisht përfundoi afër fundit të Luftës së Parë Botërore me shitjen e Indive Perëndimore Daneze Shteteve të Bashkuara më 31 mars 1917, për 25 milionë dollarë, të cilat më vonë u riemëruan Ishujt Virgjër Amerikanë . Por përsëri, asgjë nuk erdhi nga Groenlanda.

Pastaj ka episode dramatike . Kur Gjermania pushtoi Danimarkën, Groenlanda duhej të kalonte nën kontrollin gjerman, por Roosevelt ndërhyri personalisht, thirri ambasadorin danez në Uashington dhe e informoi se Shtetet e Bashkuara do të merrnin Groenlandën për arsye sigurie kombëtare. Në fakt, Gjermania kishte dashur të ndërtonte baza, por Uashingtoni e pengoi. Një precedent për përdorimin e forcës? Po, por përkohësisht gjatë një lufte dhe me premtimin e dëmshpërblimit, siç ndodhi më vonë.

Një nga negociatat më serioze, plotësisht sekrete (diçka u bë e ditur kohët e fundit kur dokumentet historike u deklasifikuan), u iniciua nga Presidenti Harry Truman në vitin 1946 me rekomandimin e një komiteti ad hoc të kryesuar nga zyrtari i Departamentit të Shtetit John Hickerson, i cili shkroi: “Komiteti tregoi se paratë tani janë të bollshme, se Groenlanda është plotësisht e pavlerë për Danimarkën dhe se kontrolli i Groenlandës është i domosdoshëm për sigurinë e Shteteve të Bashkuara”. Truman autorizoi ndarjen e 100 milionë dollarëve në ar dhe bëri një ofertë blerjeje më formale. Danimarka refuzoi, por pranoi se SHBA-të do të ruanin aksesin ushtarak në territor. Baza Thule ishte bërë Baza e Forcave Ajrore Pituffik, më veriore nga të gjitha 55 bazat ushtarake amerikane në të gjithë botën.

Ju tregova për idenë e Rockefeller-it nga vitet 1970 , por edhe ajo dështoi dhe SHBA-të respektuan përsëri të drejtën e Danimarkës për të vendosur në mënyrë autonome për destinacionin e territorit të saj.

Pastaj vijmë në vitin 2019, ofertën e parë të Trump , dhe deri në ditët e sotme me atë që na tregojnë lajmet rreth kërcënimeve ushtarake, vendosjes së ushtarëve evropianë në ishull, tensioneve të NATO-s dhe kërcënimeve për luftëra tregtare.

Përtej shkrimeve të tij në Truth dhe deklaratave të tij të vazhdueshme, mendimi i Trump kristalizohet në një intervistë që ai dha për New York Times më 6 janar, në të cilën ai tha se, duke pasur parasysh zgjedhjen, Groenlanda mund të jetë më e rëndësishme se NATO. Kur u pyet pse këmbënguli për një blerje kur presidentë të tjerë kanë zgjedhur rrugë të tjera, ai tha: “Ndoshta një president tjetër do të mendonte ndryshe, por deri më tani kam pasur të drejtë për gjithçka”. Ai më pas shtoi: “Ne do të bëjmë diçka në Groenlandë, pavarësisht nëse na pëlqen apo jo, sepse nëse nuk e bëjmë, Rusia ose Kina do ta bëjnë.”

Pastaj ai shpjegon më tej pse një traktat është më pak i fortë se një titull pronësie : “Prona është më e fortë se një kontratë qiraje ose një traktat.” Nuk ka shumë rëndësi që danezët mbajnë të njëjtën kontratë të nënshkruar me Amerikën. Ai është gati ta shkelë atë, duke mohuar në mënyrë efektive shenjtërinë e kontratave. Dhe pak më vonë, duke u sqaruar atyre që nuk e kishin kuptuar ende se ai nuk “ka nevojë për të drejtën ndërkombëtare”, ai përcaktoi moralin e vetëm të vlefshëm, moralin e tij, atë që ndjen brenda. Dhe duke u kthyer te ligji, ai sqaroi: “Nuk po përpiqem t’u dëmtoj njerëzve”. Pastaj, duke kundërshtuar veten, ai sqaroi se kishte ndërmend të respektonte të drejtën ndërkombëtare, duke specifikuar se “varet se cili është përkufizimi juaj i së drejtës ndërkombëtare”. I tiji është sigurisht i ndryshëm nga ai i të gjithë presidentëve amerikanë që e paraprinë./Corriere della Sera

Kremlini ka njoftuar se Presidenti rus Vladimir Putin ka marrë një ftesë për t’u bashkuar me një “Këshill Paqeje” të udhëhequr nga SHBA-të për Gazën.

Deklarata e Rusisë kuptohet se i referohet Bordit të Paqes që po ngrihet nga SHBA-të për të mbikëqyrur rindërtimin e Gazës.

Sipas mediave të huaja, zëdhënësi i Kremlinit, Dimitry Peskov, ka thënë se lideri rus po e shqyrton aktualisht këtë propozim.

Presidenti i SHBA-së, Donald Trump, do të kryesojë bordin ekzekutiv të organizatës, ndërsa mendohet se midis anëtarëve të tjerë do të jetë edhe ish-kryeministri britanik Tony Blair, por edhe kryeministri shqiptar Edi Rama.

Peskov tha po ashtu se Presidenti Putin kishte “marrë një ftesë përmes kanaleve diplomatike për t’u bashkuar me këtë Këshill Paqeje”.

“Për momentin, po studiojmë të gjitha detajet e këtij propozimi dhe shpresojmë të kemi kontakte me palën amerikane për të sqaruar të gjitha nuancat”, tha më tej Peskov.

Kujtojmë se më herët të hënën, udhëheqësi i Kazakistanit pranoi gjithashtu një ftesë për t’u bashkuar me të njëjtin bord, sipas zëdhënësit të tij.

Sali Berisha hodhi poshtë opsionin e bojkotit pak orë para se Parlamenti të hapej për sesionin e ri. Bojkoti i demokratëve vlen vetëm për reformat.

Por, socialistët nuk kanë në plan të presin gjatë. Nëse nuk ka reflektim, formula e dy komisioneve të posaçme, atij të zgjedhores dhe territoriales, do të ndryshojë. Por Sali Berisha nuk ndryshon qëndrim.

“Asnjë përgjigje përveç asaj që do i japin shqiptarët më 24 janar Taos së famshëm të krimit dhe Edi Ramës. Ne nuk kemi bojkotuar parlamentin. Do jemi aty për të qenë zëri i qytetarëve”, tha Berisha.

Lajmi për Sali Berishën është tjetër. Projekti Smart City, që parashikon instalimin e 5 mijë kamerave inteligjente në 20 qytetet më të mëdha të vendit për të survejuar shqiptarët.

“Me Smart City, Edi Rama kompleton survejimin më të paligjshëm. Ky përbën asgjësimin e plotë të privacisë së tyre, pasi ky sistem regjistron jo vetëm individin, por edhe fytyrën me të gjithë emotivitetin e saj. Lëvizjet e tij në çdo destinacion”, tha Berisha.

Jo vetëm survejim të jashtëligjshëm; pas projektit, Berisha sheh të fshehura edhe interesa korruptive.

“Kostot e projektit në tërësi rezultojnë, krahasuar me zbatimin e tyre në vendet e tjera, në proporcion të paktën 10-12 herë më të larta. I bie rreth 15 herë më shtrenjtë projekti në Shqipëri, po të kemi parasysh se këtu as 2 milionë banorë nuk janë dhe projekti kushton 157 milionë euro”, u shpreh Berisha.

Berisha paralajmëroi se do të ankohet tek ndërkombëtarët, pasi projekti, në bindjen e tij, përbën shkelje të të drejtave të njeriut.

Kryeministri Edi Rama inspektoi sot parkun e ri të ndërtuar në liqenin e Paskuqanit, pjesë e bashkisë së Kamzës. Kryebashkiaku Rakip Suli prezantoi të gjithë projektin e përfunduar, ku bëhet fjalë për një park prej 84 hektarësh, kënde lojërash, mol si dhe një amfiteatër.

Ndër të tjera, Rakip Suli tha se ka një interes të madh për ndërtime private, të cilët janë menduar jo më shumë se 3 katë në afërsi të parkut.

“Mbështetje e jashtëzakonshme nga ju kryeministër për bashkinë e Kamzës. Është viti i 3 sepse ke qenë disa herë dhe askush nuk e imagjinon që ky park është ndërtuar nga e para prej 84 hektarësh me ambiente sportive, mol, amfiteatër. E kemi mbushur me rreth 80 mijë pemë. Pedonalja rreth e përqark është 5.2 kilometër. Ndërtimin në pjesën private e kemi menduar 2 deri në 3 kat. Ka një kërkesë të jashtëzakonshme”, tha Rakip Suli.

Kryeministri Edi Rama u shpreh se bashkia e Kamzës duhet të merret si shembull dhe se ky park po i jep qytetit një aset të gjelbër të paçmueshëm, falë kësaj bashkie, shton Rama.

“Duhet të gjejmë mënyrën për të promovuar kanoet, është super sport. Këtu vazhdon puna intensive për një transformim që nuk ndalet. Ky park është duke nisur të marrë një formë që mjafton të imagjinosh sesi do të rritet kurora e pemëve në vitet që vijnë, për të kuptuar që falë qeverisë, një aset i gjelbër i paçmueshëm po i jepet kryeqytetit nga Kamza. Kur sheh këtë transformim, të vjen keq sesi u vlerësuan në të kaluarën asete po kaq të vlefshme si liqeni  i Farkës apo ai i Thatë përpara se ato trajektoret të futeshin në një administrim racional. Të mësojmë nga Kamza dhe të ecim në shembullin e Kamzës”, tha Rama.