Kreu i Agjencisë së Mbikëqyrjes Policore, Florian Sulejmani ka dhënë dorëheqjen nga detyra e tij. Raportohet se Sulejmani i ka dorëzuar një ditë më parë dorëheqjen ministrit të Brendshëm, Ervin Hoxhës. Arsyet e dorëheqjes së kreut të AMP-së ende nuk dihen.

Ai u pezullua nga detyra më 16 prill me kërkesë të Prokurorisë së Beratit, por u rikthye sërish në detyrë 10 ditë më pas me vendim të Gjykatës së Tiranës.

Prokuroria kishte ngritur ndaj tij akuzën për veprën penale “Shpërdorimi i detyrës”, e cila është pranuar nga Gjykata e Shkallës së Parë te Beratit. Sipas Prokurorisë së Beratit, Sulejmani ka transferuar oficerët e policisë gjyqësore në kundërshtim me ligjin. Teksa në Berat ka qenë duke u zhvilluar një hetim për disa nga OPGJ-të, ka dyshime se Sulejmani ka ndërhyrë duke i lëvizur nga detyra që mbanin.

Florian Sulejmani është emëruar në detyrën e Drejtorit të Përgjithshëm të Agjencisë së Mbikëqyrjes Policore në nëntor të vitit 2023.

The post Nën akuzë për shpërdorim detyre, dorëhiqet kreu i AMP-së appeared first on Lapsi.al.

Kryeministri britanik Keir Starmer dhe Presidenti francez Emmanuel Macron ranë dakord sot mbi nevojën për të ndërmarrë veprime më vendimtare për të trajtuar migracionin e parregullt, veçanërisht nga anijet e vogla që kalojnë Kanalin Anglez.

“Udhëheqësit ranë dakord që trajtimi i kërcënimit të migracionit të parregullt dhe kalimeve me anije të vogla është një përparësi e përbashkët që kërkon zgjidhje të përbashkëta”, thuhej në një deklaratë informuese të qeverisë britanike mbi bisedimet midis dy udhëheqësve në Londër.

Macron dhe Starmer, raportohet se ranë dakord mbi nevojën për të ecur përpara dhe për të bërë përparim në zgjidhje të reja dhe inovative, duke përfshirë një pengesë të re për të prishur modelin e biznesit të këtyre bandave, të cilat trafikojnë migrantë të parregullt kundrejt një pagese të majme.

Macron po zhvillon një vizitë zyrtare tre-ditore në Mbretërinë e Bashkuar, ndërsa mikpritësit e tij bëjnë presion për masa të reja për të frenuar imigracionin pa dokumente.

Numri i refugjatëve dhe migrantëve që mbërrijnë në bregdetin jugor të Anglisë nëpërmjet anijeve të vogla nga Franca veriore është një çështje e madhe politike për qeverinë laburiste, e cila ka parë partinë e ekstremit të djathtë Reform UK të arrijë fitore të konsiderueshme politike me një platformë të ashpër anti-imigracion.

Bisedimet vijnë në ditën e dytë të vizitës së Macron në Mbretërinë e Bashkuar, e cila filloi me një pritje nga Mbreti Charles III dhe anëtarët e familjes mbretërore dhe një banket të shtruar në Kështjellën Windsor.

Kjo është vizita e parë shtetërore e një presidenti francez në Mbretërinë e Bashkuar që nga koha e Nicolas Sarkozy në vitin 2008 dhe e para nga një kryetar shteti i Bashkimit Evropian që nga zyrtarizimi i Brexit në vitin 2020. Udhëtimi i Macron erdhi me ftesë të Mbretit Charles III.

The post Kalimi i emigrantëve me varka, Franca dhe Britania bëhen bashkë për të ndalur flukset appeared first on Lapsi.al.

Një 38-vjeçar humbi jetën pas një aksidenti në punë në një gurore në zonën e Mamurrasit, në Kurbin. Sipas Policisë së Kurbinit, ngjarja ndodhi rreth orës 12:00, kur punëtori i identifikuar si P. P., banues në fshatin Sanxhak të Kurbinit, u dëmtua aksidentalisht ndërsa riparonte një prej makinerive të punës.
Policia bëri me dije se dëmtimi ka qenë fatal dhe punëtori ka ndërruar jetë në vendin e ngjarjes.
Nga të dhënat paraprake dyshohet se kemi të bëjmë me një incident pune, por hetimet po vijojnë për të përcaktuar nëse janë respektuar standardet e sigurisë në punë dhe për të identifikuar përgjegjësit.

38-vjeçari është viktima e 10-të e aksidenteve në punë në më pak se dy muaj. Sektori i ndërtimit dhe ai i minierave e karrierave kanë numrin më të madh të aksidenteve fatale.

The post Aksidenti në punë i merr jetën 38-vjeçarit appeared first on Lapsi.al.

Presidentit amerikan duket se i ka mbaruar durimi me homologun e tij rus – por mbetet për t’u parë se si kjo do të përkthehet në mbështetje praktike për Kievin.

“Nuk jam i kënaqur me Putinin. Mund t’ju ​​them kaq tani”, tha Trump, duke shprehur zhgënjimin e tij me udhëheqësin rus për shkak të luftës në Ukrainë.

“Putini na thotë shumë budallallëqe … Ai është shumë i sjellshëm gjatë gjithë kohës, por rezulton të jetë pa kuptim.”, tha Trump.

Nuk është se Donald Trump njihet për një stil oratorik të sofistikuar, dhe me të çdo gjë mund të ndryshojë brenda pak orësh. Por ndoshta, një ndarje e vërtetë mes Trumpit dhe Vladimir Putinit ka ndodhur. Nëse kjo është e vërtetë, do të ishte një moment transformues — një justifikim për presidentin ukrainas Volodymyr Zelenskyy, i cili ndodhet në Romë për konferencën vjetore të rindërtimit të Ukrainës, por edhe për aleatët evropianë si Mbretëria e Bashkuar dhe Franca, të cilët kanë punuar me durim për t’i hapur sytë Trumpit mbi qëllimet e vërteta të Putinit.

Për herë të parë, duket se Trump ka filluar ta kuptojë se Putini nuk është partner i besueshëm për t’i dhënë fund luftës. Megjithatë, me Trumpin, largimi nuk është kurrë i plotë apo përfundimtar. Ai mund të ketë zhgënjime ndaj Putinit, por kjo nuk do të thotë se do të japë mbështetjen praktike që Ukraina kërkon. Gjithsesi, është e qartë se “America First” nuk është më njësoj si “Russia First”.

Në fillim të këtij viti, marrëdhëniet transatlantike ishin në rrezik. Trump nisi bisedime të drejtpërdrejta me Putinin dhe kërkoi që Ukraina të bënte lëshime. Më 19 shkurt, ai postoi në rrjetin Truth Social duke quajtur Zelenskyy-n “një diktator” dhe duke paralajmëruar se koha e Ukrainës po mbaronte. Vetëm një javë më vonë, SHBA-të votuan kundër një rezolute në OKB që dënonte pushtimin rus të Ukrainës, duke u rreshtuar përkrah Rusisë, Koresë së Veriut dhe Bjellorusisë.

Kur SHBA hartuan një projekt-rezolutë të zbutur në Këshillin e Sigurimit, Britania dhe Franca abstenuan, të paqarta se si të reagonin ndaj një mesazhi kaq të dykuptimtë.

Më 28 shkurt, Trump dhe Zelenskyy u përballën në Zyrën Ovale në një përplasje televizive të ftohtë, dhe më pas Zelenskyy mori përqafim të ngrohtë në Londër nga Mbreti Charles dhe Keir Starmer. Ndërkohë, zëdhënësja e Ministrisë së Jashtme ruse, Maria Zakharova, ironizoi në Telegram: “Vetëpërmbajtja që treguan Trump dhe Vance ishte mrekulli më vete”.

Negociatori amerikan Steve Witkoff, në intervista publike, tregoi një injorancë të thellë për historinë ukrainase dhe simpati për pretendimet ruse. Ai krahasoi aneksimin e Ukrainës nga Rusia me pushtimin e Gazës, duke thënë: “Rusët tashmë kanë atë që donin – Krimenë dhe pesë rajone. Pse u duhet më shumë?”

Në mars, Trump filloi të zhgënjehej pasi Putini refuzoi një armëpushim 30-ditor të propozuar prej tij, ndërsa Ukraina ishte dakord. Presidenti i Finlandës, pas tetë orësh golfi me Trumpin, raportoi se ai po humbiste durimin me Putinin.

Megjithatë, fundi i majit e gjeti Trumpin ende të paqartë. Ai shprehu frustrimin në rrjetin e tij social, duke paralajmëruar se Putini po “luante me zjarrin”, duke mos pasur ende një strategji të qartë.

Më 25 qershor, në samitin e NATO-s, Trump u nderua nga evropianët për presionin që kishte ushtruar mbi shpenzimet e mbrojtjes. Sekretari i Përgjithshëm i NATO-s, Mark Rutte, e quajti atë “Baba”, një kompliment që pa dyshim ndikoi në gatishmërinë e Trump për të dëgjuar shqetësimet e Evropës për sigurinë.

Trump pranoi publikisht: “E konsideroj Putinin një person të gabuar. Mendoja se do ta kishim zgjidhur këtë luftë.”

Por telefonata mes tyre më 4 korrik tregoi të kundërtën. Putin ishte i palëkundur: “Rusia nuk do të tërhiqet nga qëllimet e saj”, deklaroi Kremlini. Ndërkohë, sulmet ruse ndaj Ukrainës vazhduan me intensitet. Për më tepër, Trump u zemërua kur mësoi se Pentagoni po mbante pajisje ushtarake të destinuara për Ukrainën pa e informuar Shtëpinë e Bardhë.

Çfarë vjen më pas?

Tani për tani, mbështetësit e Ukrainës presin të shohin nëse kjo ndryshim qëndrimi do të përkthehet në veprime konkrete. Një projektligj i propozuar nga senatori Lindsey Graham për sanksione të rënda kundër vendeve që blejnë energji nga Rusia mund të jetë testi i parë i vërtetë. Me mbështetjen e Trump, projektligji mund të shkojë përpara, me përjashtime për aleatët evropianë që kanë mbështetur Ukrainën.

“Po lëvizim”, tha Graham, duke cituar Trumpin që i kishte thënë se “është koha për të vepruar”.

Në vijën e frontit, ukrainasit nuk kanë luksin të jenë naivë — por mund të shpresojnë që më në fund, Trump po fillon të shohë Putinin ashtu siç është.

The post Zhgënjimi i Donald Trump me Putin, çfarë ndodh tani? appeared first on Lapsi.al.

Kryeministri Edi Rama zhvilloi ditën e sotme takime në bashkinë e Vlorës, ndërsa më pas doli për inspektime në terren. Pas daljes nga ambientet e bashkisë, në një moment një e moshuar ka kërkuar që të takojë vetë kryeministrin dhe u filmua teksa përpiqej të shkonte pas Ramës duke e thërritur këtë të fundit në emër me zë të lartë.

Pamjet e saj u bënë virale në rrjet, ndërsa 82-vjeçarja, Katina Thanasi ka treguar në një intervistë për Euronews Albania së përse këmbënguli të takonte kryeministrin. Thanasi ka treguar teksa provoi t’i afrohej Ramës, u shty nga një efektive dhe nga truprojat e kreut të qeverisë. Pasi Rama ndaloi dhe e pyeti se “çfarë kishte që bërtiste”, Katina tha se ajo i shpjegoi problemin e kanalit pranë banesës së saj, i cili duhej pastruar.

“Jam Katina Thanasi, jam 82 vjeçare. Doli Rama, unë isha atje, më rrethuan policët se s’donin të më linin të takoja Ramën. Unë i thashë do ta takoj. Shty ata policët, shty unë dhe ata duke më shtyrë mua. Përplasja me ta ishte e vështirë. Më thanë do të arrestojmë. I thashë: ‘S’më arrestoni dot, se s’kam bërë ndonjë gjë. Nuk kam vjedhur, s’kam bërë ndonjë gjë.’ Ishte një police vajzë dhe pesë të tjerë. Shty ata mua, shty unë ata. Rama ikte poshtë, i thashë: ‘Rama, mos ik se të dua! Mos ik se të dua për kokë të djalit’, kështu i thashë. Këta më shtynin mua, Rama qëndroi aty në anë. Policët më mbanin, ndërsa unë i shtyva. Rama më tha mua: ‘Pse bërtet?’ I thashë: ‘Po bërtas për këta’. I thashë Ramës, ky kryetari i bashkisë që rrin me ty… Kam dy vjet e gjysmë që i them për pastrimin e kanalit dhe të tokës dhe ky nuk vjen. Kam shqetësim që të më pastrohet kanali dhe toka.” – tregoi ajo.

Ndërkohë e pyetur nesë pas bisedës së shkëmbyer me kreun e qeverisë, ka shprësë që do t’i zgjidhet problemi, ajo u shpreh se pret që të shohë veprimë konkrete, ose do të vazhdojë të kërkojë zgjidhje.

“Të them të drejtën, për kokë të djalit të vetëm, nuk është se kam shpresë se do më zgjidhet problemi për kokë të djalit, sepse këta të gënjejnë, të keqen nëna. Megjithatë pasi kam biseduar me Ramën, erdhen dy djem, i thanë këtij që ka tokën: ‘A të futemi dot te toka jote të pastrojmë?’ Ai i tha: ‘Futuni’, por ata s’janë futur akoma me prentendimin që nuk lejohet të futesh te toka e dikujt tjetër,” – thotë 82-vjeçarja.

Katina thotë se këtë problem më parë ia kishte parashtruar kryetarit të bashkisë dhe për gati dy vjet e gjysmë nuk ishte marrë asnjë masë

“Unë kam vajtur te kryetari, e takova dhe më krehu dorën kështu. Problemi kanalit të madh… Hedhin qen të ngordhur, mushkonjat të hanë se vijnë prej kanalit. S’kanë vënë një kazan të hedhin mbeturinat, mileti. Atë i thashë: ‘Vini një kazan se njerëzit janë të papërgjegjshëm. Shqiptarët i hedhin në kanal, po s’po vënë dorë.’ Unë e takova Ramën, po merakun s’e kam hequr akoma sa të pastrohet kanali. Merakun do ta çoj deri në fund. Nëse nuk vijnë këtu, më kanë atje nesër. Për kokë të djalit, që në mëngjes, në orën 8–9 jam atje, nëse nuk do vijnë,” – u shpreh 82-vjeçarja./ Euronews Albania

The post “U rrethova nga policët dhe truprojat”, flet gruaja që nuk e lanë të takonte Ramën appeared first on Lapsi.al.

Presidenti iranian Masoud Pezeshkian ka deklaruar se Izraeli u përpoq ta vriste atë duke bombarduar një zonë ku ai po mbante një takim. Ai tha gjithashtu se Irani nuk ka zhvilluar kurrë një program për bombë bërthamore, as sot dhe as në të kaluarën dhe nuk ka ndërmend ta bëjë këtë në të ardhmen.

“Ata u përpoqën, po. Ata vepruan në përputhje me rrethanat, por dështuan”, i tha Masoud Pezeshkian.

Kjo, tha Pezeshkian, sepse programi i armëve bërthamore është i ndaluar nga feja jonë dhe bie ndesh me fetvanë e Ajatollah Khameneit në vitin 2003, e cila ndalon prodhimin e armëve bërthamore.

“Nuk ishin Shtetet e Bashkuara që qëndronin pas atentatit ndaj jetës sime. Ishte Izraeli. Isha në një takim… ata u përpoqën të bombardonin zonën ku po mbanim atë takim”, tha ai.

Donald Trump ka thënë tashmë se i bllokoi izraelitët nga përpjekja për të vrarë udhëheqësin suprem 86-vjeçar, Ajatollah Ali Khamenei, i cili qëndroi i fshehur për gati tre javë. Ai mori pjesë në një ceremoni fetare në Teheran në fundjavë, e cila u prit me entuziazëm dhe lehtësim nga besnikët e qeverisë. Ai më parë ishte shfaqur në tre video duke u dukur i zbehtë, nëse jo sfidues.

The post Presidenti i Iranit: Izraeli tentoi të më eliminonte appeared first on Lapsi.al.

Një banesë është perfshirë nga flakët, pak minuta më parë, ne fshatin Trebinjë të Mokrës. Sipas banorëve zjarri i favorizuar dhe nga temperaturat e larta, është përhapur në të gjithe banesën por fatmiresisht familjarët kanë arritur të dalin menjëherë nga banesa. Nga banorët e zonës është njoftuar zjarrëfiksja e cila ndodhet rrugës për në fshatin Trebinjë,fshat i largët.

Dyshohet paraprakisht se shkak i këtij zjarri ka qënë një shkëndijë elektrike, ndërsa dëmet materiale janë të shumta

The post Merr flakë një shtëpi në Pogradec appeared first on Lapsi.al.

Kreu i ekzekutivit Edi Rama ka reaguar sërish në lidhje me kabinat e vendosura në Theth, dhe pezullimin e çështjes nga Prokuroria e Shkodrës për heqjen e tyre.

Ndërsa kjo e fundit sqaroi se çështja për këto kapanone të cilët nuk kanë themele, nuk përmbushin kritere për ta konsideruar objekt ndërtimi, Rama shton se Ministria e Drejtësisë po përgatit denoncimin e çështjes në Këshillin e Lartë të Prokurorisë.

“Natyrisht që të gjitha kabinat e “fshatit turistik” të kriminelit që plagosi Thethin do i marrë shteti dhe skuadra e Bashkisë Shkodër nuk do të largohet nga Thethi pa e shëruar zemrën e qytezës magjike, ndërkohë që Ministria e Drejtësisë po përgatit denoncimin e çështjes “Gjeli” në Këshillin e Lartë të Prokurorisë”, shkruan Rama në rrjetet sociale.

The post Kabinat në Theth, Rama reagon sërish: Do t’i marrë shteti! appeared first on Lapsi.al.

KAS-i vendosi rrëzimin e kërkesës për shpalljen e pavlefshmërisë të zgjedhjeve në Fier, si të pambështetur në ligj dhe prova. Ndërkohë në këtë qark ka mbaruar dhe rinumërimi i votave, prej të cilave nuk pati ndryshim në mandatet e shpërndara mes opozitës dhe mazhorancës. Por ajo që u konstatua ishin trafikimi i madh i votave mes kandidatëve të PS-së, ku shquan mes tyre Ceno Klosi, i cili kishte rreth 1 mijë vota të shtuara padrejtësisht.

The post Pavlefshmëri të zgjedhjeve në Fier, KAS rrëzon kërkesën e PD appeared first on Lapsi.al.

Ish-ministri i Transportit i Rusisë, Roman Starovoit, është gjetur i vdekur me një plagë të shkaktuar nga arma e zjarrit në makinën e tij, vetëm disa orë pasi u zbulua se ishte shkarkuar nga detyra nga Presidenti Vladimir Putin.

Starovoit, ish-guvernatori i rajonit të Kurskut, raportohet se i ka marrë jetën vetes.

Njoftimi për vdekjen e tij vjen pasi ai u shkarkua nga roli i tij si ministër transporti nga presidenti Vladimir Putin.

Në një deklaratë të hënën, Komiteti Hetues i Rusisë tha: “Trupi i ish-ministrit të Transportit të Federatës Ruse, Roman Vladimirovich Starovoit, u zbulua në automjetin e tij personal me një plagë të shkaktuar nga arma e zjarrit sot në lagjen e qytetit Odintsovo.”

Rrethanat e vdekjes së Starovoit po hetohen, teksa në deklaratë shtohet më tej: Versioni kryesor është vetëvrasja.

Më herët të hënën, u zbulua se Putin e kishte shkarkuar Starovoit pas vetëm një viti në detyrë.

Pse Putin e largoi nga detyra?!

Starovoit u emërua ministër i transportit në maj 2024, pasi kaloi pothuajse pesë vjet si guvernator i rajonit Kursk në kufi me Ukrainën. Disa muaj pasi ai la rolin e tij si guvernator, trupat ukrainase kaluan kufirin në Kursk, ndërsa Kievi nisi inkursionin më të madh të huaj në territorin rus që nga Lufta e Dytë Botërore.

Forcat ukrainase u dëbuan nga Kursku në fillim të këtij viti.

Disa zyrtarë rajonalë në Kursk u arrestuan më pas me akuzat për shpërdorim detyre.

Në prill, pasardhësi i Starovoit si guvernator, Alexei Smirnov, u akuzua për përvetësim të parave të destinuara për qëllime mbrojtjeje. Andrei Nikitin, një ish-guvernator i rajonit të Novgorodit, është emëruar ministër i përkohshëm i transportit.

Kur u pyet më parë për largimin e papritur të Starovoit, zëdhënësi i Kremlinit, Dmitry Peskov, tha: Aktualisht, sipas mendimit të presidentit, cilësitë profesionale dhe përvoja e Andrei Nikitin do të kontribuojnë më së miri në sigurimin që kjo agjenci, të cilën presidenti e përshkroi si jashtëzakonisht të rëndësishme, të përmbushë detyrat dhe funksionet e saj.

The post Mister vetëvrasja e ministrit të shkarkuar nga Putin appeared first on Lapsi.al.

Prokuroria e Shkodrës i është përgjigjur deklaratave të kryeministrit Edi Rama lidhur me një ndërtim pa leje në zonën e Thethit.

Prokuroria në reagim shkruan se ndërtimi nuk ka qenë pa leje i referuar sipas policisë së shtetit dhe se nuk mund të nisej hetim penal, pasi shkelet Kushtetuta.

Nisur nga deklaratat publike të bëra nga Kryeministri i Republikës së Shqipërisë, ku është komentuar vendimi i një Prokurori të Prokurorisë pranë Gjykatës së Shkallës së Parë të Juridiksionit të Përgjithshëm Shkodër, sqarojmë opinionin publik, si më poshtë vijon:

Vendimi i datës 30.05.2025 i Prokurores zj.Elsa Gjeli është marrë në përputhje të plotë me nenin 290, pika ç të Kodit të Procedurës Penale, ku parashikohet se: “Procedimi penal nuk mund të fillojë kur fakti nuk parashikohet nga ligji si vepër penale ose kur del qartë që fakti nuk ekziston”.

Në rastin konkret, nga vlerësimi i plotë i fakteve dhe akteve procedurale, u konstatua se faktet e referuar nga policia e shtetit nuk përbëjnë ndërtim të paligjshëm në kuptim të nenit 199/a të Kodit Penal, për arsyen se:

Strukturat e konstatuara dhe që janë referuar nga policia kanë qënë kontenjerë të përkohshëm pa themele, të vendosura mbi pllaka guri, dhe si të tilla nuk përmbushin kriteret për të konsideruar objekt ndërtimi sipas standardeve të përcaktuara në ligjin nr. 107/2014 “Për planifikimin dhe zhvillimin e territorit”, i ndryshuar.

Vetë Policia, në procesverbalin e këqyrjes së vendit të ngjarjes është shprehur se, kontenjerët nuk janë vendosur mbi bazamente betoni, por kanë qënë të vendosura mbi rrasa guri të prera.

Sipas nenit 7, pika 3, gërma “i” e VKM nr. 408, datë 13.05.2015, e ndryshuar, strukturat që instalohen për nevoja të çastit dhe/ose të përkohshme, pa themele dhe me materiale të çmontueshme, nuk kërkojnë pajisje me leje ndërtimi, por vetëm deklaratë paraprake.

Vetë IMT, Bashkia Shkodër në shkresën e saj drejtuar Policisë Gjyqësore e ka klasifikuar faktin si kundërvajtje administrative, jo si vepër penale dhe në këto kushte duhet të kishin vepruar institucionet kanë në përgjegjësi menaxhimin e territorit.

Në këto kushte, mungesa e elementit objektiv dhe pasojës penale, sipas analizës së zbatuar të ligjit, e bën të pamundur ngritjen e ndjekjes penale dhe Prokurori, si organ kushtetues i pavarur, ka detyrimin ligjor që të vlerësojë faktet në përputhje me ligjin.

Në një shtet të së drejtës, pavarësia funksionale e prokurorit garantohet nga Kushtetuta dhe nga ligji nr. 97/2016 “Për organizimin dhe funksionimin e Prokurorisë në Republikën e Shqipërisë”. Prokuroria është një institucion kushtetues i pavarur që vepron në përputhje me ligjin, ku çdo vendimarrje procedurale merret mbi bazën e fakteve dhe provave të administruara, dhe jashtë çdo ndikimi të jashtëm politik. Çdo përpjekje për të ndikuar në mënyrë direkte ose indirekte në vendimmarrjen e një prokurori cënon parimin e ndarjes së pushteteve të sanksionuar në nenin 7 të Kushtetutës.

Respektimi i ndarjes së pushteteteve është themel i funksionimit të shtetit demokrati dhe se ndërhyrjet e pushtetit ekzekutiv në proceset vendimmarrëse të insitucioneve të drejtësisë, qofshin ato edhe përmes komenteve publike, mund të përceptohen si presion mbi institucionet e drejtësisë dhe dëmtojnë besimin e qytetarëve në këto institucione.

Vendimi për mosfillimin e procedimit penal nuk është një akt vullneti personal, por një akt ligjor, që mbështetet mbi rregullat themelore të të drejtës penale materiale dhe procedurale. Çdo shqetësim institucional duhet të adresohet përmes rrugëve të përcaktuara ligjore, dhe jo përmes mesazheve politike publike që synojnë t’i imponohen sistemit të drejtësisë. Shteti i së drejtës nuk mund të funksionojë nëse prokurori frikësohet për çdo vendimmarrje të ligjshme që mund të mos përkojë me interesat e pushteteve të tjera.

Prokuroria mbetet e angazhuar për të kryer funksionin e saj në mënyrë të drejtë, të paanshme dhe në përputhje me Kushtetutën dhe ligjin.

The post Prokuroria i përgjigjet Ramës:IMT Shkodër e klasifikoi si kundravajtje administrative appeared first on Lapsi.al.

Robert Muci, Skender Kallashi dhe Ledvis Hoxha janë tre shqiptarët e arrestuar në Greqi nga grupi i trafikut të kokainës. Gjithsej në grupin kriminal janë 14 pjesëtareve, mes tyre edhe Robert Muci, 41 vjeç nga Shushica e Vlorës, Skender Kallashi, 50 vjeç nga Novosela e Vlorës dhe Ledvis Hoxha, 27 vjeç nga Kutallia e Dimalit.

Gjithashtu bëhet e ditur se “Koka” që fshihej pas transportit të lëkurave me kokainë nga Amerika Latine në Greqi konsiderohet një shtetas 45-vjeçar shqiptar, i identifikuar si Luis Murataj (Karteri) i cili nuk u arrestua, por mësohet se jeton në Spanjë. Konkretish nga 14 anëtarët e grupit vetëm 11 persona janë arrestuar, 6 grekë, 3 shqiptarë, 1 kolumbian dhe 1 bolivian.

Laboratori i kokainës ishte në një depo dhe brenda një banesë. Në laborator kryhej ndarja e kokainës që ishte zhytur në lëkurë të papërpunuar me kimikate, ku disa nga të dyshuarit u kapën duke fjetur. Laboratori i paligjshëm u gjet se përmbante afërsisht 100 kilogramë kokainë të përzier me kripëra, të cilat ishin nxjerrë nga 200 lëkura.

Nga 1.500 lëkurat e mbetura të gjetura në paleta, sasia që grupi do të kishte prodhuar, pas ndarjes nga kripërat, vlerësohet të ketë qenë afërsisht 700 kilogramë.

“Lëkurat u importuan në vendin tonë nëpërmjet një kompanie me shumicë për mallra lëkure dhe mallra udhëtimi, të cilën e kishin krijuar vetë dhe u transportuan me automjete tregtare në një vend ku kishin instaluar një laborator të posaçëm kimik”, tha zëdhënësja e shtypit e policisë greke, Constantia Dimoglidou.

Kokaina u importua nga Amerika Latine në Shqipëri nëntorin e kaluar duke përdorur të njëjtën metodë.

The post Laboratori i kokainës në Greqi, 3 shqiptarë të arrestuar, “koka” në Spanjë (Emrat) appeared first on Lapsi.al.

Një ngjarje e rëndë ka ndodhur në Shën Parashki të Greqisë pasditen e së premtes, ku një 43-vjeçar ende i paidentifikuar është ekzekutuar me armë zjarri. Mediat greke shkruajnë se viktima është me nënshtetësi të huaj dhe se shkak i krimit janë mosmarrëveshjet personale.

Ai nuk rezulton me precedentë penalë në Greqi ndërkohë policia deklaroi se po kërkonin një “burrë të gjatë me rroba të zeza”. Sipas mediave në vendin fqinj, ky nuk është një krim i organizuar, por gjithçka tregon për një vrasje të motivuar nga mosmarrëveshje personale.

Viktima kishte çelësat e shtëpisë me vete kur u gjet, ndërsa në vendngjarje u gjetën shtatë gëzhoja. Autori nuk iku në këmbë, por arriti në një pikë dhe prej andej po hetohet nëse dikush tjetër e priste që e ndihmoi të arratisej. Viktima u gjet i vdekur dje pasdite në rrugën Irini në Agia Paraskevi dhe është qëlluar me të paktën tre plumba në qafë.

Sipas dëshmive, autori i krimit kishte veshur rroba të zeza e maskë dhe dyshohet se është larguar me vrap drejt rrugës Evergetou Giavasis.

The post Atentati/ Ekzekutohet me armë 43-vjeçari në Greqi appeared first on Lapsi.al.

POLICIA E SHTETIT

DVP Gjirokastër/Finalizohen brenda 24 orëve dy operacione policore, në fushën e kalimit të paligjshëm të kufirit. Goditen dy raste, të transportimit të emigrantëve, me qëllim kalim e paligjshëm të kufirit kundrejt fitimit.

Finalizohen operacionet policore të koduara “The bridge” dhe “Attempt”.

Vihen në pranga 7 shtetas si dhe shpallet në kërkim 1 shtetas tjetër.

Sekuestrohen 5 automjete të tipit “Toyota” dhe “Volkswagen”, të përdorura për këtë veprimtari të kundërligjshme, 4800 euro, 40 000 lekë, si dhe 8 celularë.

Në kuadër të operacionit të koduar “The bridge”‘, specialistët e strukturave për Hetimin e Trafiqeve të Paligjshme, në bashkëpunim me Policisë Rrugore dhe me Forcën e Posaçme “Shqiponja”, të DVP Gjirokastër, arrestuan në flagrancë shtetasit A. D., 43 vjeç, banues në Durrës, K. T., 22 vjeç, dhe një shtetas i mitur 17 vjeç, të dy banues në Lushnje.

Gjithashtu, u bë ndalimi i shtetasit H. R., 23 vjeç, si dhe u shpall në kërkim shtetasi K. Ç., 23 vjeç, të dy banues në Lushnjë.

2 automjeteve që drejtonin këta shtetas iu është bërë shenjë për të ndaluar, në vendin e quajtur “Ura e Kardhiqit”.
Drejtuesit nuk i janë bindur urdhrit por kanë vijuar me shpejtësi lëvizjen. Menjëherë, shërbimet e Policisë u vënë në ndjekje dhe si rezultat bënë të mundur kapja e 3 shtetasve. Nga kontrollet, në automjetin që drejtonte shtetasi A. D., u gjetën 6 emigrantë nga Filipinet, të cilët po i transportonin nga Tirana në drejtim të Sarandës, kundrejt fitimit. Nga hetimet dyshohet se shtetasi i arrestuar K. T., dhe 17-vjeçari, kontrollonin rrugën për të sinjalizuar prezencën e Policisë.

Gjithashtu nga hetimet rezultojnë që kanë qenë të përfshirë në këtë veprimtari kriminale dhe shtetasi i ndaluar H. R., dhe shtetasi i shpallur në kërkim K. Ç., për të cilin punohet për kapjen e tij.

Në cilësinë e provës materiale u sekuestruan 2 automjete, 2900 euro, 40 000 lekë, si dhe 4 celularë.

Në kuadër të operacionit “Attempt”, specialistët e strukturave për Hetimin e Trafiqeve të Paligjshme, në bashkëpunim me Stacionin e Policisë së Kufirit të Gjelbër Kakavije dhe me Forcën e Posaçme “Shqiponja”, lokalizuan dhe arrestuan në flagrancë shtetasit A. K., 29 vjeç, D. M., 22 vjeç, dhe E. F., 21 vjeç, të tre banues në Durrës.

Të 3 këta shtetas në bashkëpunim me njëri-tjetrin, në vendin e quajtur “Kthesa e Jorgucatit”, gjatë tentativës për të transportuar 12 emigrantë nga Pakistani, janë lokalizuar nga shërbimet e Policisë, të cilët iu kanë bërë shenjë për të ndaluar. Drejtuesit e automjeteve nuk i janë bindur urdhrit por kanë vijuar me shpejtësi lëvizjen. Menjëherë, shërbimet e Policisë, iu janë vënë në ndjekje dhe si rezultat është bërë e mundur kapja e 3 shtetasve.

Në cilësinë e provës materiale u sekuestruan 3 automjete, 1900 euro, si dhe 4 celularë.

Materialet procedurale kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme, për veprën penale “Ndihma për kalim të paligjshëm të kufijve”, kryer në bashkëpunim.

The post Trafiku i klandestinëve, 7 të arrestuar në Gjirokastër appeared first on Lapsi.al.

Edi Rama ka postuar disa foto nga zona e 21 Dhjetorit në kryeqytet ku hapësirat publike janë zaptuar në mënyra të ndryshme. Kryeministri paralajmëroi se nuk do të ketë asnjë tolerim për këdo që ka guxuar të zaptoje hapësirat e qytetarëve. Ironia qëndron në faktin se kjo është një tjetër shfaqje teatrale. Njeriu që betonizoi Tiranën, Edi Rama dhe pas tij Erion Veliaj, tani po preokuptohet për zënien e hapësirave publike. Lexojeni për zbavitje.

“Situatë klasike “toke të xanun” në Tiranë, tek 21 Dhjetori – kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, që nga tavolinat dhe frigoriferët në trotuarë e deri tek muret apo trarët e “doganave” rreth pallateve, do të ballafaqohet jo vetëm me gjobat përkatëse po edhe me ndjekjet përkatëse penale për shkatërrim të pronës publike, cënim të shëndetit e sigurisë fizike së qytetarëve dhe me radhë… Koha për t’u bërë bashkë që të gjithë në emër të bashkëjetesës në të njëjtën lagje; shumica duke marrë mbrapsht atë që i takon dhe pakica duke kthyer mbrapsht atë që nuk i takon!”-shkruan Rama.

The post Lexojeni për zbavitje/ Rama i shqetësuar për hapësirat e zëna publike në Tiranë appeared first on Lapsi.al.

Zegjine Çaushi reagoi sërish sot duke recituar tekstin e shkruar nga Rama e që ajo e lexonte përballë prompterit në studiot e dikurshme të ERTV. Ajo e cilësoi vendimin e kandidates që i liroi vendin në Parlament si një akt fisnik dhe guximtar, duke e falënderuar publikisht.

Zegjineja solli në vëmendje sfidat e saj personale dhe politike, duke theksuar përkatësinë e saj jashtë qendrave të mëdha urbane dhe duke hedhur kritika ndaj kundërshtarëve që – sipas saj – e kanë anatemuar në mënyrë të padrejtë.

“Jam një prej mijëra vajzave dhe djemve të rritur larg qendrave urbane, me të njëjtën dëshirë dhe vlerë si çdo i ri që ka lindur në qytet. Kam qenë objekt sulmesh në studio televizive dhe nga politikanë që ulërasin emrin tim për të mbuluar zullumet e tyre, por kjo nuk më tremb,” vijoi ajo. Në fund të deklaratës, Çaushi i drejtoi një koment ironik deputetit të Partisë Demokratike, Gazment Bardhi:

“Gazo, je politikani më i dështuar, iu ke ngelur në derë dhe s’po dinë si të të heqin qafe”,  thotë Zegjineja. Më poshtë reagimi i saj i plotë.

 

View this post on Instagram

 

A post shared by Zegjine Çaushi (@zegjine.caushi)

The post Shihni si reciton Zegjineja tekstin e shkruar nga Rama (VIDEO) appeared first on Lapsi.al.

Një tjetër rast prostitucioni me protagoniste shtetase të huaja është goditur nga policia, në Qerret të Kavajës.

Dy gra me kombësi kineze u arrestuan në flagrancë në një apartament në Qerret të Kavajës, ku dyshohet se ushtronin aktivitet të paligjshëm përmes shërbimeve seksuale me pagesë.

Operacioni policor i koduar “Baza”, i zhvilluar nga Sektori për Hetimin e Trafiqeve të Paligjshme dhe Komisariati i Policisë Kavajë, erdhi pas një hetimi dyjavor të ndjekur me metoda proaktive. Gjatë veprimeve hetimore, u dokumentua plotësisht mënyra se si dy shtetaset C. Y., 42 vjeçe, dhe Y. Sh., 41 vjeçe, kishin marrë me qira një apartament në zonën turistike të Qerretit dhe përmes rrjeteve sociale, siguronin klientë shqiptarë duke ofruar shërbime seksuale në këmbim të shumave që varionin nga 80 deri në 200 euro.

Kinezet kishin hyrë në Shqipëri si turiste, por qëllimi i tyre ishte fitimi përmes një aktiviteti të paligjshëm. Krahas arrestimit të tyre, u proceduan penalisht në gjendje të lirë edhe 6 shtetas shqiptarë që dyshohet se përfituan shërbime seksuale.

Në cilësinë e provës materiale u sekuestruan shuma parash në euro dhe dollarë, si dhe dy telefona celularë të përdorur për komunikime me klientët. Materialet hetimore i janë referuar Prokurorisë pranë Gjykatës së Juridiksionit të Përgjithshëm Durrës për veprime të mëtejshme procedurale.

The post Policia ndalon dy prostituta kineze në Kavajë, nën hetim 6 klientë shqiptarë appeared first on Lapsi.al.

Të martën policia greke shkatërroi një grup kriminal që trafikonte municion nga Shqipëria në Greqi.

Detaje të reja janë zbuluar nga dosja hetimore dhe nga roli i shqiptarit të arrestuar në këtë operacion.

Hetimi zbuloi se greku Georgios Giannoulis, formoi grupin kriminal, në funksionimin e të cilit luajti një rol qendror. Ai mblodhi porosi për municione të cilat ia përcolli shtetasit shqiptar Kostika Braho, 41 vjec, nga Mirasi i Devollit, i cili siguroi furnizimin e sasive të kërkuara nga një furnizues i panjohur brenda territorit shqiptar.

Siç zbuloi hetimi, më 26.6.2025, Georgios Giannoulis dhe Nikolaos Lagoudakis, duke drejtuar makinën “Renault” me targa ZNB-2662, si dhe Georgios Kartsonakis, hipën në një anije në linjën Hania – Pire dhe të nesërmen, më 27.6.2025, mbërritën me rrugë tokësore në zonat e Kosturit dhe Follorinës, ku qëndruan, duke pritur shqiptarin Kostika Braho, i cili kishte kaluar tashmë kufirin nga stacioni i Kapshticës, me qëllim sigurimin dhe transportimin në territorin grek të fishekëve që ishin porositur.

Takimi midis tyre ishte planifikuar për orën 06:00 të mëngjesit më 28.6.2025 në një kishë të vendosur në një zonë malore pranë kufirit greko-shqiptar, gjatë të cilit do të paguhej çmimi në para cash për furnizimin me fishekë të cilët do të vendoseshin në vendin e fshehtë të automjetit privat për transportin e tyre të sigurt në Kretë.

Më pas, dy automjetet e mësipërme, duke ndjekur rrugë të ndryshme në kohë të ndryshme, përfunduan në Portin e Pireut, ku për të mos ngjallur dyshime, dy prej te dyshuarve hipën në anijen e linjës Pire – Heraklion dhe i treti hypi në automjetin që transportonte ngarkesën e paligjshme në anijen e linjës Pire – Hania.

Të mbikëqyrur nga oficerët e Policisë T.A.O.E.K. dhe pas mbërritjes së tyre, më 29.06.2025 ndoqën një plan të paracaktuar, ku Kartsonakis e drejtoi automjetin privat me ngarkesën e paligjshme në një vend publik pranë Spitalit të Përgjithshëm të Hanias të cilin e parkoi, duke përfunduar misionin e tij. Më vonë, automjeti i lartpërmendur u prit nga Giannoulis, i cili e çoi atë në një zonë të mbyllur të një biznesi privat në qytetin e Haniasë. Pasi qëndroi në vendngjarje për një kohë të gjatë, ai u largua dhe e çoi automjetin me ngarkesën e paligjshme në të njëjtën pikë të paracaktuar, ku më pas u ndalua nga Policia.

Gjatë kontrollit të automjetit, u zbuluan 24.070 fishekë për armë luftarake “Kallashnikov” kalibri 7.62 X 39 mm, të cilat u numëruan dhe u konfiskuan.

Shqiptari Kostika Braho u kontrollua dhe u arrestua nga oficerët e Policisë të DAOE/YPOEVE/Zyrës për Ndjekjen Penale të Trafikimit të Paligjshëm dhe Trafikimit të Objekteve, në shtëpinë e tij në Poria, Mesopotami të Kosturit. Gjatë hetimit ligjor që pasoi, u gjet dhe u konfiskua shuma prej 900 eurosh, si e ardhur nga tregtia e paligjshme e fishekëve të armëve luftarake.

Greku Georgios Giannoulis rezulton i arrestua edhe më 12.09.2019 në Portin e Haniasë, për një rast të ngjashëm të importimit të paligjshëm nga Shqipëria të mbi 120.000 fishekëve Kallashnikov dhe të 4 armëve “Kallashnikov”, rast për të cilin atij i janë caktuar kushte kufizuese paraqitjeje në pesë ditët e para të çdo muaji në Stacionin e Policisë së vendbanimit të tij, ndërsa gjykimi i çështjes në shkallë të parë është në pritje.

The post Trafiku i municioneve nga Shqipëria në Greqi, detaje nga operacioni appeared first on Lapsi.al.

Një situatë e rrezikshme u shmang në kohë mbrëmjem e sotme në shetitoren e qytetit bregdetar të Sarandës, falë ndërhyrjes së forcave të rendit.

Një shtetas i huaj, i identifikuar si me origjinë italiane, u pa duke lëvizur me një thikë në dorë në mesin e qytetarëve të shumtë që ndodheshin në bulevard.

Pamja e papërshtatshme dhe prania e një arme të ftohtë në një zonë të mbipopulluar krijuan shqetësim dhe panik mes kalimtarëve.

Forcat e policisë ndërhynë, duke e neutralizuar të huajin pa lëndime dhe pa shkaktuar incidente të mëtejshme.

Personi është shoqëruar në Komisariatin e Policisë së Sarandës, ku po merret në pyetje dhe po punohet për zbardhjen e plotë të rrethanave të ngjarjes. Deri tani nuk raportohet për persona të lënduar.

I dyshuari është identifikuar si Th. M., 32 vjeç, nga Perugia e Italisë, i cili ndodhej me pushime në Sarandë. Burime zyrtare nga policia bëjnë me dije se ai ishte në gjendje të dehur dhe dyshohet se mund të ketë edhe probleme të shëndetit mendor.

The post Panik në Sarandë/ Turisti nxjerr thikën dhe terrorizon pushuesit appeared first on Lapsi.al.

Ditën e shtunë vendi ynë do të jetë në ndikimin e kushteve atmosferike të qëndrueshme.

Moti parashikohet i kthjellët në pjesën më të madhe të territorit, ndërsa përgjatë orëve të mesditës deri ato të pasdites alternime vranësirash të pakta deri mesatare kryesisht në relievet malore të vendit.

Era me drejtim jugperëndim – veriperëndim me shpejtësi mesatare 4 m/s, në lugina dhe bregdet hera-herës fiton shpejtësi 5-7 m/s. Deti – Valëzimi 1-2 ballë.

The post Fundjavë përvëluese, temperatura deri në 38 gradë celcius appeared first on Lapsi.al.