Vendimi i vendeve anëtare të Bashkimit Evropian për ta shpallur Korpusin e Gardës së Revolucionit Islamik, ushtrinë ideologjike të Republikës Islamike të Iranit, si “organizatë terroriste”, përbën një “gabim të madh strategjik”, deklaroi sot ministri i Jashtëm iranian, Abbas Araghchi.

“Disa vende po përpiqen aktualisht të shmangin shpërthimin e një lufte të përgjithshme në rajonin tonë. Asnjë prej tyre nuk është evropiane. Evropa është ajo që po ndez zjarrin”, shkroi ai në një postim në platformën X.

Në të njëjtën kohë, forcat e armatosura iraniane e cilësuan “të papërgjegjshëm” dhe “dashakeq” vendimin e 27 vendeve të Bashkimit Evropian për përfshirjen e Gardës së Revolucionit në listën e organizatave terroriste.

“Vendimi absurd, i papërgjegjshëm dhe dashakeq i BE-së është marrë, pa asnjë dyshim, si pasojë e nënshtrimit të verbër ndaj politikave të Shteteve të Bashkuara dhe regjimit sionist” (Izraeli), thuhet në një deklaratë të transmetuar nga agjencia zyrtare iraniane e lajmeve IRNA.

Më herët gjatë ditës, Këshilli i Ministrave të Jashtëm të BE-së arriti një marrëveshje politike për përfshirjen e Korpusit të Gardës së Revolucionit Islamik (IRGC) të Iranit në listën e organizatave terroriste të Bashkimit Evropian, duke shënuar një ndryshim të fortë – edhe pse simbolik – në qasjen evropiane ndaj udhëheqjes iraniane.

“Me këtë vendim, Garda e Revolucionit vendoset në të njëjtën kategori me Shtetin Islamik (Daesh), Hamasin, Hezbollah-un dhe Al-Kaedën”, deklaroi Përfaqësuesja e Lartë e BE-së, Kaja Kallas. Ajo theksoi se shtypja e dhunshme e protestave në Iran ka sjellë një kosto të rëndë njerëzore, duke nënvizuar se “ata që veprojnë përmes terrorit duhet të trajtohen si terroristë”.

E pyetur nëse BE do të mbështeste SHBA-në në një sulm të mundshëm kundër Iranit, Kallas u përgjigj se “rajoni nuk ka nevojë për një luftë tjetër”.

Në të njëjtën linjë, presidentja e Komisionit Evropian, Ursula von der Leyen, deklaroi se “termi ‘terrorist’ është vërtet i përshtatshëm për të përshkruar një regjim që shtyp me gjakderdhje protestat e vetë popullit të tij”.

Me këtë vendim unanim të “27”-ës, Bashkimi Evropian harmonizohet me vende të tjera si Shtetet e Bashkuara, Kanadaja dhe Australia.

The post BE përcaktoi Gardën Revolucionare Islamike si organizatë terroriste, reagon Irani: Gabim i madh strategjik! Evropa po ndez zjarrin appeared first on Albeu.com.

Deputeti i Partisë Demokratike, Ervin Salianji, ka reaguar përmes një postimi pas një takimi të zhvilluar në Himarë, duke kritikuar ashpër drejtimin aktual të Partisë Demokratike dhe mënyrën e funksionimit të strukturave të saj.

Salianji thekson se Partia Demokratike duhet të jetë modeli i epërsisë morale përballë qeverisë, por sipas tij, kjo po cenohet nga shkatërrimi i garave të brendshme, emërimi i drejtuesve pa u konsultuar me anëtarësinë dhe përjashtimi i anëtarëve e drejtuesve lokalë nga vendimmarrja.

Deputeti bën të ditur se në Himarë ka zhvilluar një takim me sekretarin e degës së PD-së, dy ish-kryetarë të degës, ish-kandidaten për kryetare bashkie dhe përfaqësues të ish-të përndjekurve politikë, për të dëgjuar shqetësimet e demokratëve lidhur me proceset e fundit në këtë degë, të cilat ai i cilëson si farsë.

Postimi i Salianjit në Facebook:

Partia Demokratike duhet të jetë modeli i epërsisë morale përballë qeverisë.
Nëse Edi Rama dhe qeveria e tij kanë shkretuar Shqipërinë përmes keqqeverisjes, është e papranueshme që lidershipi që sot drejton demokratët të shkatërrojë garat, të pilotojë kryetarë pa pyetur anëtarësinë dhe, aq më keq, ta përjashtojë anëtarët dhe drejtuesit e strukturave nga vendimmarrja.
Sot isha në Himarë, së bashku me sekretarin e degës, dy ish-kryetarët e degës, ish-kandidaten për Bashkinë dhe drejtuesin e ish-të përndjekurve politikë, për të dëgjuar shqetësimet reale të demokratëve lidhur me farsën që është zhvilluar në këtë degë. Ajo që po ndodh në Himarë është e papranueshme për çdo demokrat që beson te parimet dhe te vota e lirë.
Demokratët vendosin. Demokratët duhet të dëgjohen.
Ata janë pronarët e Partisë Demokratike dhe sakrifikuesit më të mëdhenj përballë regjimit. Pa respekt për anëtarësinë, nuk ka opozitë morale; pa demokraci të brendshme, nuk ka besueshmëri përballë qytetarëve.

The post Salianji takim me demokratët në Himarë: Pa demokraci të brendshme, Partia Demokratike humbet epërsinë morale! Pa respekt për anëtarësinë nuk ka opozitë morale appeared first on Albeu.com.

Duket se thuajse të gjthë banorët e shtëpisë më të famshme në Shqipëri, “Big Brother VIP 5”, janë kthyer kundër Rogertit. Ky i fundit i ngacmon ato për çdo gjë, madje nuk ka kursyer familjarët apo dhe miqtë e tyre.

Rogerti ka patur sot debate me shumë prej banorëve, një ndër to edhe me Mateon, të cilit iu drejtua duke i thënë që ‘është lëpirës i dashurisë’. Më pas shtoi dhe tha se nuk ka asnjë vajzë që e do, dhe ndjek gjithë kohës vajzat.

E jo vetëm kaq, pas Rogerti i tha atij se jeton me lekët e familjes pasi vetë nuk ka arritur asgjë në jetë.

Pjesë nga debati:

Mateo: Je këlysh i vogël që nuk përballesh dot me mua

Rogerti: Ti je lëpirës i dashurisë, ti nuk ke asnjë femër që të do, po ndjek femrat gjithë kohës, jeton me lekët e familjes, nuk ke lekë të tua

Mateo: I falenderoj, shyqyr i kam, falenderoj Zotin çdo ditë

Rogerti: Po mos kujto se ke arritur gjë në jetë, se nuk ke arritur asgjë, i thua vetes trajner personal me lekët e familjes.

The post “Lëpirës i dashurisë, ti nuk ke asnjë femër…”/ Rogerti nuk kursehet ndaj Mateos: Jeton me lekët e familjes appeared first on Albeu.com.

Rusia goditi sërish Ukrainën me anë të një sulmi me dron. Në këtë sulm u vranë tre persona dhe u plagosën tre të tjerë. Sipas mediave të huaja viktimat janë dy gra të moshës 26 dhe 50 vjeç dhe një burrë 62-vjeçar. Shërbimet ukrainase të urgjencës thanë se një ndërtesë u shkatërrua dhe disa të tjera u dëmtuan. Ata postuan në Telegram foto të zjarrfikësve që përpiqeshin të shuanin një zjarr si dhe imazhe të një ndërtese të rrafshuar.

Në total, në 24 orët e fundit, Rusia nisi 841 sulme kundër 34 komuniteteve në rajon, tha guvernatori Ivan Fedorov. Forcat ruse po pushtojnë pjesë të mëdha të territorit në Zaporizhzhia dhe kohët e fundit kanë bërë përsëri përfitime territoriale atje. Ajo është një nga katër rajonet ukrainase, që Rusia pretendon se ka aneksuar që nga pushtimi i Ukrainës në vitin 2022.

Forcat Ajrore të Ukrainës thanë se Rusia lëshoi 105 dronë gjatë natës, nga të cilët 84 u rrëzuan. Dronët e Moskës goditën gjithashtu qytetin e Odesës, në jug të vendit, duke shkaktuar një zjarr të madh në një objekt industrial, tha guvernatori Oleh Kiper në Telegram.

Kiper tha se magazinat, ndërtesat e prodhimit dhe kamionët u shkatërruan në sulm, duke shtuar se nuk u shkaktua asnjë lëndim. Ndërsa zyrtarët rusë nuk komentuan sulmet. Moska dhe Kievi mohojnë të kenë shënjestruar civilët në luftën e tyre gati katërvjeçare.

The post Rusia sulmon me dronë Ukrainën, humbin jeten tre persona dhe plagosen disa të tjerë appeared first on Albeu.com.

Emrat e dy prezantuesve të Eurovision 2026 janë njoftuar zyrtarisht nga transmetuesi publik i Austrisë. Konkursi i madh muzikor do të prezantohet këtë vit nga Viktoria Swarovski dhe Michael Ostrovsky , me interesin që tashmë është kthyer fuqishëm drejt Swarovskit, një nga fytyrat më të njohura të televizionit austriak dhe anëtare e familjes së famshme botërore Swarovski.

Viktoria Swarovski ka lindur në Innsbruck, Tirol, dhe ka ndërtuar një karrierë të larmishme si prezantuese, biznesmene, modele, stiliste dhe këngëtare. Edhe pse vjen nga familja Swarovski, e cila e ka identifikuar emrin e saj me botën e bizhuterive dhe dizajnit në nivel ndërkombëtar, ajo zgjodhi të ndiqte një rrugë profesionale të pavarur nga biznesi familjar shumë herët.

Në moshën vetëm 16 vjeç, ajo nënshkroi kontratën e saj të parë diskografike me Sony Music, duke publikuar disa këngë të vogla, dhe në moshën 18 vjeç, u zhvendos në Los Angeles. Atje, ajo bashkëpunoi me krijues kryesorë në skenën ndërkombëtare muzikore, përfshirë kompozitoren fituese të çmimit Grammy, Diane Warren, duke fituar përvojë të vlefshme në një mjedis shumë konkurrues.

Menjëherë pas kësaj, Swarovski bëri histori si gjyqtarja më e re që ka marrë pjesë ndonjëherë në Das Supertalent, ndërsa që nga viti 2018 ajo është anëtare e përhershme e ekipit prezantues të Let’s Dance, një nga programet televizive më të suksesshme në botën gjermanofolëse.

Rezymeja e saj televizive përfshin gjithashtu prezantime të rëndësishme, të tilla si 100 Years Disney Show dhe Bambi Awards, një nga institucionet më prestigjioze të argëtimit në Evropë. Në të njëjtën kohë, ajo ka zhvilluar një aktivitet të dendur biznesi, duke themeluar markën e bukurisë ORIMEI në vitin 2020.

Si modele, Victoria Swarovski ka zbukuruar kopertinat e revistave kryesore ndërkombëtare si Glamour, ELLE, L’Officiel, Gala Style dhe Forbes, ndërsa si stiliste ka nënshkruar koleksione kostumesh dhe aksesorësh tradicionalë. Në fillim të vitit 2026, ajo përmbushi edhe një ëndërr personale të jetës duke marrë pjesë në Dakar Rally, një nga garat më të kërkuara të sporteve motorike në botë.

Lidhur me Eurovisionin, drejtoresha e programit Stephanie Grois-Horowitz tha për dy prezantuesit: “Victoria dhe Michael janë një dyshe e freskët, siç nuk e kemi parë kurrë më parë .” Siç shpjegoi ajo, të dy kanë një pasion të madh për Konkursin e Këngës dhe janë “ambasadorë të shkëlqyer të kauzës, prezantimi i të cilëve do të jetë i paharrueshëm për një kohë të gjatë”.

The post Kush është trashëgimtarja e familjes së famshme Swarovski që do të prezantojë Eurovisionin e këtij viti? appeared first on Albeu.com.

Këngëtarja e njohur, Lore, ka qenë e ftuar në emisionin “Wake Up”, ku ka komentuar rrugëtimin e saj brenda shtëpisë së “Big Brother VIP 5”. Por jo vetëm kaq, pasi ajo foli edhe në lidhje me projektet e saj më të reja muzikore.

Në një moment gjatë intervistës, Lore është pyetur për banorët që ajo mendon se janë më shumë në avantazh deri në këtë pikë të lojës për të qenë në finale.

Sipas ish-banores së shtëpisë më të famshme në Shqipëri, një nga lojtarët më të fortë dhe më inteligjent është Kristi. Lore shtoi se sheh në finale edhe Mirin me Selin.

“Kam shumë konsideratë për lojën e Kristit. Është një nga lojtarët më inteligjentë dhe të ftohtë. Miri dhe Selin janë një dyshe që i shoh në finale. Këta janë ata që mendoj unë më të avantzhuar. Mendoj se fitorja do ndahet mes këtyre të treve. Unë do doja shumë Brikenën në finale, por pse jo dhe Mateon. Kam vënë re që Mateo po pëlqehet shumë në rrjet”, tha këngëtarja e njohur.

The post Lore zbulon banorët që sheh në finalen e “Big Brother VIP 5” appeared first on Albeu.com.

Kardashianët janë një nga familjet më të njohura në botë. Viraliteti i tyre tejkalon mediat sociale dhe gjithmonë kanë zënë një vend në emisionet më të mira televizive, dy prej të cilave spikasin teksa flasin për jetën e tyre: ‘Keeping Up with the Kardashians’, i njohur si ‘The Kardashians’, i cili më vonë do të bëhej një emision që transmetohet në internet.

Kohët e fundit u zbulua, për shkak të një interviste në podkastin ‘Khloe In Wonderland’, një nga episodet që nëna e Kardashian, Kris Jenner, u përpoq ta censuronte në mënyrë që të mos shfaqej në shfaqje. Kjo u zbulua nga vetë Kim.

Ishte një sherr mes dy motrave, Kourtney dhe Kim, gjatë premierës së sezonit të 18-të të reality show-t. E gjitha ndodhi ndërsa episodi po xhirohej, në një moment që ata e quajtën “sherrja me shuplaka” dhe ku kamerat kapën se si Kim i sulmon Kourtney-t. Më pas, fillon një sherr mes të dyjave, duke i kapur duart dhe duke lëshuar disa goditje drejt trupit të tjetrës që u përplas.

Përveç asaj sherri, Kim kujtoi një tjetër debat të nxehtë midis dy motrave për shkak të dasmave të tyre në Itali. Kim u martua me Kanye West atje në vitin 2014 dhe Kourtney e përsëriti destinacionin me Travis Barker në vitin 2022, gjë që shkaktoi gjithashtu tensione dhe komente që kamerat i kapën.

Kim Kardashian zbuloi në podcast se cili ishte reagimi i nënës së saj: “Mamaja tha, ‘Kjo nuk do ta shohë kurrë dritën e diellit’”. Në intervistë, personazhi i famshëm reflektoi se sa nga këto momente janë censuruar dhe nuk janë ndarë kurrë me publikun përmes serialit të saj.

The post Kim Kardashian zbulon momentin në ‘Kardashians’ që Kris Jenner donte ta censuronte që të mos bëhej publik appeared first on Albeu.com.

Komisioni i Verifikimit, organi përgjegjës për garantimin e integritetit dhe ligjshmërisë së procesit zgjedhor, në zbatim të Rregullores së Asamblesë së Përgjithshme të FSHF, zhvilloi këtë të enjte mbledhjen e radhës për verifikimin e propozimeve dhe kritereve ligjore për kandidatët për postin e Presidentit, për anëtarë të Komitetit Ekzekutiv të Federatës Shqiptare të Futbollit, si dhe verifikimin e delegatëve të propozuar nga anëtarët e federatës.

Gjatë shqyrtimit, Komisioni analizoi me kujdes çdo propozim të paraqitur nga anëtarët e Asamblesë, duke vlerësuar përmbushjen e kritereve statutore, integritetin personal dhe përputhshmërinë me kërkesat ligjore të procesit zgjedhor. Në përfundim të procesit të verifikimit, Komisioni konstatoi se 13 kandidatë për anëtar të Komitetit Ekzekutiv të FSHF-së kanë marrë dy propozimet e nevojshme nga anëtarët e Asamblesë dhe plotësojnë kriteret për të qenë zyrtarisht pjesë e garës.

Kandidatët sipas renditjes alfabetike janë:

Abdyl Kuriu

Anila Basha

Arben Dervishaj

Armando Cungu

Blendi Fevziu

Edmond Hasanbelli

Envi Hicka

Erind Resuli

Ervin Canollari

Geri Çipi

Gjergji Petro

Lutfi Nuriu

Pano Xhixho

Për postin e Presidentit të FSHF, është regjistruar kandidatura e z. Armand Duka, i propozuar nga 33 anëtarë të federatës. Gjithashtu, Komisioni zyrtarizoi listën e delegatëve të anëtarëve të FSHF-së për Asamblenë e datës 16.02.2026, në përputhje me numrin e delegatëve të përcaktuar në Vendimin Nr. 1, datë 03.12.2025. Asambleja e Përgjithshme Zgjedhore e FSHF do të zhvillohet më 16 shkurt në ambientet e “Shtëpisë së Futbollit” ku do të zgjidhen Presidenti dhe anëtarët e Komitetit Ekzekutiv të FSHF për mandatin e ri katërvjeçar.

The post Asambleja Zgjedhore në FSHF, zyrtarizohen kandidaturat për president dhe Komitetin Ekzekutiv appeared first on Albeu.com.

Ka përfunduar këtë pasdite seanca gjyqësore në Gjykatën e Posaçme kundër Korrupsionit dhe Krimit të Organizuar për çështjen që lidhet me Ilir Metën dhe Monika Kryemadhin.

Gjatë seancës, avokati mbrojtës i Ilir Metës, Kujtim Cakrani, ka lexuar rreth gjysmën e mbrojtjes, nga një total prej 270 faqesh.

Procesi është shoqëruar edhe me debate mes palëve gjatë zhvillimit të seancës, duke reflektuar tensionet që shoqërojnë çështjen.

Leximi i plotë i mbrojtjes pritet të vijojë në seancat e ardhshme, ndërsa GJKKO do të vendosë për ecurinë e mëtejshme të procesit gjyqësor.

Çështja Meta–Kryemadhi lidhet me hetimet SPAK ndaj ish-Presidentit të Republikës, Ilir Meta, dhe ish-kryetares së Partisë së Lirisë, Monika Kryemadhi, për akuza që përfshijnë korrupsion, pastrim parash dhe mosdeklarim të pasurisë.

Hetimet kanë si bazë disa episode të dyshuara, përfshirë çështjen CEZ-DIA dhe lobimin në Shtetet e Bashkuara. Të dy të pandehurit i kanë mohuar akuzat, duke i cilësuar ato si politike, ndërsa procesi po shqyrtohet nga GJKKO.

The post Përfundon me debate seanca në GJKKO për çështjen Meta-Kryemadhi, avokati lexon gjysmën e mbrojtjes appeared first on Albeu.com.

Ambasada amerikane në Tiranë iu ka bërë thirrje qytetarëve të repektojnë kushtet e vizës amerikane. Përmes një postimi në rrjetet sociale, ambasada njofton se qëndrimi në Shtetet e Bashkuara përtej datës së lejuar, mund të çojë në pasoja të rënda.

Kjo duke nisur që nga heqja e vizës dhe deportimi, deri te pamundësia për të marrë viza në të ardhmen. Ambasada thotë se qëndrimi i tejzgjatur mund të ndikojë në mënyrë të përhershme në mundësinë për të udhëtuar, studiuar ose punuar në Shtetet e Bashkuara.

“Respektoni kushtet e vizës suaj amerikane dhe periudhën e lejuar të qëndrimit në Shtetet e Bashkuara. Qëndrimi në Shtetet e Bashkuara përtej “Datës së pranimit deri më…” të I-94 mund të çojë në pasoja të rënda si heqja e vizës, deportimi i mundshëm dhe pamundësia për të marrë viza në të ardhmen. Qëndrimi i tejzgjatur mund të ndikojë në mënyrë të përhershme në mundësinë tuaj për të udhëtuar, studiuar ose punuar në Shtetet e Bashkuara.”, thuhet në njoftim.

The post “Respektoni kushtet e vizës suaj”/ Ambasada amerikane në Tiranë: Qëndrimi i tejzgjatur mund të ndikojë në mundësinë për të udhëtuar, studiuar ose punuar appeared first on Albeu.com.

Një përplasje e ashpër ka shpërthyer mes DJ Gimbo-s dhe banorit të “Big Brother VIP Albania” VIP Albania, Rogert, pas një pyetjeje publike që ky i fundit i drejtoi për ndarjen tragjike nga jeta të vëllait të mitur të Gjestit.

Gjithçka nisi kur Rogerti, gjatë një bisede, ngriti pikëpyetje mbi rrethanat e ngjarjes, duke shkaktuar reagim të fortë në rrjet. DJ Gimbo reagoi publikisht me tone të ashpra, duke e quajtur pyetjen të papranueshme dhe të pashpirt, sidomos kur bëhet fjalë për një fëmijë 15-vjeçar dhe për dhimbjen e një familjeje që ka humbur njeriun e saj.

“Nuk mund të luash me fatkeqësinë e dikujt dhe ta kthesh në temë diskutimi para kamerave,” – shprehet ai, duke theksuar se ka kufij që nuk duhen kaluar, pavarësisht lojës mediatike apo kërkimit për vëmendje.

Rogert: Si ndodhi situata, fatkeqësia e Gjestit? Du me e ditë, se nuk e kam lexu

Dj Gimbo: Mendon që unë për atë histori foli para kamerave? O i pafytyrë, s’je në vete! Ti prek te një familje, te një fëmijë 15 vjeç, o qen! O i pafytyrë! O psikopat, o maniak! Ti luan me fatkeqësi të dikujt. Si s’të vjen marre me pyt për një fëmijë që ka vdek tragjikisht?

Reagimi i DJ Gimbo-s ka gjetur mbështetje të gjerë në rrjete sociale, ku shumë ndjekës kanë theksuar se tema të tilla kërkojnë ndjeshmëri, respekt dhe heshtje, jo spekulim publik.

The post “Je i pashpirt!”/ DJ Gimbo shpërthen ndaj Rogertit pas pyetjes për vdekjen e vëllait të Gjestit appeared first on Albeu.com.

Banorja e Big Brother VIP Kosova 4, Elijona Binakaj, ka bërë një rrëfim shumë prekës në dhomën e rrëfimit, duke prekur zemrat e publikut me historinë e saj personale.

Teksa po festonte ditëlindjen e saj të 19-të brenda shtëpisë më të madhe në vend, Elijona u shfaq e vetmuar dhe e emocionuar, duke shpërthyer në lot gjatë rrëfimit të saj.

“Zakonisht për çdo ditëlindje mërzitem, por kur mërzitem e kam të paktën babin ose familjen që ma heqin pak mërzinë. Tani jam krejt vet dhe mosha që do ta mbush po më mundon, sepse motra ime kur i ka pasur 19 vjet ka ndërruar jetë dhe tani unë arrita në moshën e saj. Nuk po më duket fer të jetoj në të… nuk e di”, u shpreh ajo mes lotësh.

The post “Po i mbush 19 vjeç, aq sa ishte motra ime kur vdiq – nuk më duket fer që unë jetoj”, Elijona mes të qarash rrëfehet për ditëlindje në BBVK 4 appeared first on Albeu.com.

Presidenti i Serbisë, Aleksandar Vuçiç, njoftoi të enjten se shërbimi i detyrueshëm ushtarak në vend do të hyjë në fuqi në dhjetor të këtij viti ose në mars të vitit 2027.

Vendimi për fillimin e shërbimit ushtarak, tha ai, varet nga gatishmëria e kapaciteteve dhe objekteve ushtarake.

“Ne do ta marrim këtë vendim së shpejti, brenda një ose dy muajve të ardhshëm, dhe do ta çojmë në Parlament dhe do të fillojmë regjistrimin e rekrutëve ushtarakë”, tha Vuçiç, pas një takimi me udhëheqësit ushtarakë mbi gjendjen dhe analizën e aftësive të Forcave të Armatosura Serbe për vitin 2025.

Shërbimi ushtarak do të zgjasë 75 ditë, sipas tij.

“Duhet t’i bëjmë gati të gjitha pajisjet. Kemi mjaftueshëm armë dhe çizme, por ka disa gjëra që nuk janë ende plotësisht gati”, tha ai.

Ai shtoi se nevojitet rinovimi i qendrave të rekrutimit, përmirësimi dhe rinovimi i klinikave dhe gjëra të tjera.

“Këto janë pyetje të rëndësishme sepse duam të jemi të përgatitur për këtë dhe që këta të rinj ta kalojnë shërbimin e tyre ushtarak në kushtet më të mira. Të fitojnë përgjegjësinë dhe seriozitetin e nevojshëm, si dhe një qëndrim ndaj patriotizmit”, tha Vuçiq.

Futja e shërbimit të detyrueshëm ushtarak duhet ta marrë pëlqimin e Kuvendit të Serbisë.

Përfaqësuesit e Qeverisë kanë njoftuar vazhdimisht kthimin e shërbimit ushtarak vitet e fundit.

Ideja u konkretizua në janar 2024. Pastaj Shtabi i Përgjithshëm i Ushtrisë Serbe nisi një iniciativë dhe i propozoi presidentit kthimin e shërbimit ushtarak.

Vuçiç më pas, në shtator të të njëjtit vit, nënshkroi një marrëveshje për ta kthyer shërbimin e detyrueshëm ushtarak në Serbi.

Që nga heqja e tij më 1 janar 2011, shërbimi ushtarak ka qenë vullnetar.

Kroacia fqinje votoi gjithashtu për ta kthyer shërbimin e detyrueshëm ushtarak në tetor 2025.

Ndër vendet që nuk e kanë hequr shërbimin e detyrueshëm ushtarak janë Zvicra, Norvegjia, Danimarka, Finlanda, Austria, Turqia, Estonia, Greqia, Qiproja, Ukraina, Rusia dhe Bjellorusia./ REL

The post Serbia rikthen shërbimin e detyrueshëm ushtarak, Vuçiç: Do të hyjë në fuqi në dhjetor 2026 ose mars 2027 appeared first on Albeu.com.

Baza materiale dhe dosjet në Kadastrën e Vlorës janë ngarkuar ditën e sotme, rreth orës 14:00 për t’u transportuar drejt Tiranës. Ato do të dërgohen në kryeqytet për veprime të mëtejshme. Kadastra e Vlorës, do të transferohet në selinë qendrore në Tiranë pranë rrugës “Jordan Misja”.

Ky vendim është firmosur nga drejtoresha e përgjithshme e Kadastrës, Lorena Goxhobelli më 23 janar. Zhvendosja e plotë e saj duhet të përfundojë deri në fund të këtij muaji. Vendimi për të larguar drejt Tiranë vjen në më pak se një vit. Kjo pasi Kadastrën e Vlorës ishte zhvendosur më parë në një godinë të re, pranë ish-Shtëpisë së Oficerëve në Vlorë.

Në lidhje me këtë vendim, ka reaguar edhe Agjencia Shtetërore e Kadastrës (ASHK). ASHK sqaroi se riorganizimi i institucioneve në Tiranë ka nisur që prej vitit 2021. Kjo duke nisur me transferimin e Durrësit dhe Krujës, për të vazhduar me pas me Shkodrën, Kavajën, Kamëz-Vorë dhe Vlorën.

The post Zhvendosja e Kadastrës së Vlorës/ Dosjet dhe baza materiale transportohen drejt Tiranës appeared first on Albeu.com.

Në një kohë kur Prokuroria e Posaçme kërkon arrestimin e Belinda Ballukut, numri dy i qeverisë ka depozituar rekurs në Gjykatën e Lartë ku kundërshton ndalimin e udhëtimeve jashtë vendit, pasi me vendim GJKKO pasaporta e saj është e bllokuar.

Ndërkohë lidhur me masën e pezullimit nga ushtrimi i detyrës, Balluku nuk ka ngritur pretendime duke qenë se Apeli e ka pezulluar deri në vendimin e Gjykatës Kushtetuese.

Masat ndaj Ballukut janë vendosur nga Prokuroria e Posaçme për shkak të akuzave të ngritura ndaj saj për dyshime mbi abuzime me vlerë miliona euro me tenderat publikë.

The post SPAK kërkon ta arrestojë për tendera abuzive, Belinda Balluku rekurs në Gjykatën e Lartë për bllokimin e pasaportës appeared first on Albeu.com.

Justin Bieber ka konfirmuar zyrtarisht rikthimin e tij në skenën e Çmimeve Grammy, të cilat do të zhvillohen të dielën, më 1 shkurt, me Trevor Noah në rolin e prezantuesit. Ky rikthim shënon një moment të rëndësishëm në karrierën e këngëtarit, i cili pritet të performojë pas publikimit të albumit të tij më të ri, të titulluar “Swag”.

Kjo do të jetë paraqitja e parë e Bieber në Grammy që nga viti 2022, kur ai interpretoi hitin “Peaches” së bashku me Giveon dhe Daniel Caesar, një performancë që u prit mjaft pozitivisht nga publiku dhe kritika. Rikthimi i tij në këtë event prestigjioz vjen në një periudhë shumë të suksesshme artistike, pasi albumi “Swag” ka marrë vlerësime të larta dhe e ka rikthyer këngëtarin në qendër të vëmendjes muzikore globale.

Përveç performancës, Justin Bieber pritet të jetë një nga protagonistët kryesorë të mbrëmjes, pasi do të marrë katër çmime Grammy këtë vit. Ai është shpallur fitues në kategoritë Albumi i Vitit dhe Albumi më i Mirë Vokal Pop për “Swag”, si dhe Performanca më e Mirë Solo Pop për këngën “Daisies” dhe Performanca më e Mirë R&B për “Yukon”.

Në total, Bieber numëron 23 nominime për çmimet Grammy gjatë karrierës së tij dhe deri më tani ka fituar dy çmime. I pari erdhi në vitin 2016 për Regjistrimin më të Mirë Dance me këngën “Where Are Ü Now”, ndërsa i dyti në vitin 2021 për Performancën më të Mirë Country nga një Duo ose Grup me hitin “10,000 Hours”.

Rikthimi i tij në Grammy konsiderohet nga fansat si një tjetër dëshmi e ndikimit të vazhdueshëm të Justin Bieber në industrinë muzikore dhe e pozicionon atë sërish në majën e skenës ndërkombëtare.

The post Pas katër vitesh mungesë, Justin Bieber do rikthehet në këtë skenë muzikore appeared first on Albeu.com.

Eria Ago e cila dyshohet se ka ndihmuar Safet Bajrin në vrasjen e Fatbardh Licit, ka kërkuar lirinë në Gjykatën e Lartë. Në nëntor të vitit të kaluar Gjykata e Apelit të Posaçëm i zbuti masën nga “arrest në burg” në “arrest në shtëpi”. Ago ësgtë arrestuar më 26 shkurt të vitit 2025.

Ajo akuzohet se ka drejtuar një prej makinave të përdorura gjatë kësaj ngjarje. Ajo ka mohuar çdo akuzë lidhur me përfshirjen e saj në vrasjen e Licit. Kjo duke deklaruar se është e pafajshme dhe nuk ka asnjë lidhje me krimin e ndodhur.

Arrestimi i Safet Bajrit

Safet Bajri u arrestua më 21 shkurt 2025. Bashkë me masën “arrest me burg” GJKKO ka miratuar me kërkesë të SPAK edhe kërkesën për kryerjen e një analize të ADN-së së Safet Bajrit. Sipas raportimeve, ditën që u soll nga Shkodra në policinë e Tiranës e pranishme ka qenë edhe ekspertja që do të merrte kampionet për ADN, por nuk është lejuar në atë moment nga i arrestuari, i cili ka kërkuar të bëhet në një ditë tjetër.

Në njoftimin e Prokurorisë së Posaçme, pas ekzekutimit të masave të arrestit ndaj tyre thuhej se ndaj Bajrave dhe Bilalit rëndojnë akuzat për “Vrasje me paramendim”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Dyshohet se të tre personat e mësipërm në bashkëpunim me njëri-tjetrin akuzohen se kanë organizuar dhe kryer vrasjen e Fatbardh Licit. SPAK ka bërë me dije se ka mbledhur prova të mjaftueshme për të zbardhur ekzekutimin e Licit. Në njoftimin e prokurorisë thuhej gjithashtu se motivi i vrasjes së tij dyshohet se lidhet me faktin që Behar Bajri ka bërë fajtor Ibrahim Licin për vrasjen e ish-efektivit të Policisë së Shtetit, Boran Bërçana. Kështu për të marrë hak, Bajrajt dhe Bilali kanë vrarë Fatbardh Licin më 8 gusht të vitit 2018.

The post U arrestua nën dyshimet se mori pjesë në vrasjen e Fatbardh Licit, Eria Ago kërkon lirinë në Gjykatën e Lartë appeared first on Albeu.com.

Ditën e sotme, vendimi i Apelit të GJKKO-së për dosjen “5D” që shpalli të fajshëm të akuzuarit e Bashkisë së Tiranës, por pezulloi ekzekutimin e dënimeve duke i kthyer në shërbim prove, ka nxjerrë në konferencë për mediat deputetin demokrat Belind Këlliçi, denoncuesin e kësaj afere.

Ligjvënësi demokrat deklaroi se drejtësia i vuri kapakun dosjes dhe jo krimit, duke nxjerrë të larë zyrtarët dhe të akuzuarit e çështjes, përveç njërit, teksa u zbut dënimi i shkallës së parë të GJKKO-së..

“Për 44 javë me radhë protestuam para bashkisë për vjedhjen e parave publike. Sot gjykata e Apelit vendosi kapakun, jo mbi krimin, por mbi drejtësinë. Drejtuesit e Bashkisë përveç njërit dolën nga salla të larë, një dosje e varrosur me një ceremoni që sot prodhoi një Alqi Bllako të dytë që i varën të gjithë peshën e një grabitjeje kolektive”, tha Këlliçi mes të tjerash.

Gjykata e Posaçme e Apelit për Korrupsionin dhe Krimin e Organizuar, shpalli sot vendimin për ish- drejtoreshën e Tirana Parking,  Eglantina Zere dhe 4 zyrtarëve të tjerë, konkretisht Enkeljda Qyta, Bruno Koçi, Rivjola Baxha, si dhe Kristo Zhulati duke zbutur dënimet e tyre.

Sipas vendimit të Apelit, të pandehurit u shpallën fajtorë për kryerjen e veprës penale “Shkelja e barazisë së pjesëmarrësve në tendera apo ankande publike”, por ndaj tyre u pezulluan masat e dënimit,  duke i vënë ata nën shërbim porove për një periudhë 12-mujore.

Deklarata e Belind Këlliçit:

“Më 26 prill 2023 bëra publike për herë të parë skemën 5D të Bashkisë së Tiranës. Ishte si të ngrije kapakun e një arkivoli institucional dhe të kuptoje jo vetëm korrupsionin, por edhe kalbëzimin shtetëror të organizuar.

Një linjë e padëgjuar vjedhjeje, ku drejtorët e Bashkisë funksiononin si elemente të një grupi të strukturuar kriminal, me detyra të ndara, me firma të sinkronizuara për një qëllim të vetëm: zhvatjen 100% të parave publike.

Para publike të marra me tendera, me leje ndërtimi dhe me vulë shteti. 29 tendera, 30 milionë euro, 3 leje ndërtimi, të gjitha të futura në një ‘gojë’ të vetme, të hapur nga firma personale e kryetarit të Bashkisë, Erion Veliaj.

Menjëherë pas publikimit, depozitova kallëzimin penal në SPAK. Hetimi i Prokurorisë, nën drejtimin e prokurorit Klodian Braho, faktoi plotësisht denoncimin dhe çoi për gjykim të gjithë zinxhirin drejtues të Bashkisë  së Tiranës.

Për 44 javë me radhë protestuam përpara Bashkisë për një parim themelor e universal: vjedhja e parave publike nuk mund të amnistohet dhe dëmi duhet t’u kthehet qytetarëve.

Sot, Gjykata e Apelit për Krimin e Organizuar dhe Korrupsionin vendosi kapakun. Jo mbi krimin, jo! Por mbi drejtësinë. Mbi shpinën e dërrmuar të qytetarëve.

Drejtuesit e Bashkisë, përveç njërit, dolën nga salla jo si të penduar, por të larë, posi u rrëzuan edhe dënimet simbolike të shkallës së parë. As burg. As kthim parash. As përgjegjësi.

Një dosje e varrosur me ceremoni nga një Drejtësi që sot prodhoi një kukull fajësie, një Alqi Bllako të dytë, që i varën të gjithë peshën e një grabitjeje kolektive.

Të gjithë drejtorët e Bashkisë Tiranë, me përjashtim të Mariglen Qatos, u shpëtuan nga përgjegjësia penale.

Si tek inceneratorët, ku janë zhvatur 200 milionë euro dhe fajin e mban një emër i vetëm, ndërsa sistemi u shpall i pafajshëm.

Ky vendim nuk mbylli vetëm një çështje, por zyrtarizoi një doktrinë ku krimi firmoset në qetësi me një stilolaps dhe firma për shefin është jelek antiplumb penal.

Nga sot, çdo nëpunës e di se mund të vjedhë, mund të firmosë, mund të zhvasë, sepse mbi të ka një çati të sigurt pandëshkueshmërie. Bindja shpërblehet.

Edhe për më naivin, vendimi i sotëm gjyqësor i dha dërrmën drejtësisë së re. Sot u dërgua mesazhi më i rrezikshëm që mund të prodhojë një shtet, kapitullimi karshi krimit të veshur me kostum institucional.

Gjyqtarët hoqën mantelin, morën çelësat e kasafortës, i dorëzuan tek dera e pushtetit, dhe sapo u thanë shqiptarëve:

‘Mos kërkoni më mbrojtje tek ne. Këtu ruhet vetëm krimi.’ Në mënyrë të veçantë krimi i organizuar dhe grupet e strukturuara kriminale”.

The post Belind Këlliçi: Dosja “5D” u varros, drejtuesit e Bashkisë dolën të larë, sot Gjykata e Apelit i vendosi kapakun appeared first on Albeu.com.

Milionat e ndara prej vitesh nga Qeveria e Kosovës për Luginën e Preshevës – të menduara si mbështetje për mbijetesën kombëtare të shqiptarëve në jug të Serbisë – kanë hapur një front të brendshëm politik.

Partitë shqiptare atje akuzojnë njëra-tjetrën për keqpërdorim të fondeve, favorizim selektiv dhe mungesë transparence.

Në qendër të debatit është roli i Këshillit Kombëtar Shqiptar (KKSH) – institucioni përmes të cilit menaxhohen mjetet, si dhe raportet e tij me partitë politike lokale.

Ky këshill dhe Qeveria e Kosovës nënshkruan në vitin 2022 Memorandumin për Bashkëpunim, me qëllim “mbrojtjen dhe promovimin e të drejtave të shqiptarëve, si dhe ruajtjen dhe kultivimin e gjuhës, artit, kulturës dhe identitetit shqiptar në Luginën e Preshevës”.

Në dy vjetët e parë të zbatimit të memorandumit, fondi i ndarë nga Qeveria e Kosovës ishte nga 2 milionë euro për secilin vit. Më 2024, kjo shumë u rrit në 3 milionë euro, ndërsa më 2025 në 4 milionë euro – ndonëse realizimi i mjeteve të fundit nuk ka nisur ende.

Ku shkojnë këto para?

Kryetari i Komunës së Bujanocit, Arbër Pajaziti, nga koalicioni Fronti për Ndryshim, thotë se fondet e ndara nga Qeveria e Kosovës, nuk kanë prodhuar rezultate të dukshme në terren.

“Nuk mund të shihni një shenjë konkrete që ka mbetur nga të gjitha këto mjete që i jep Qeveria e Kosovës”, thotë ai për Radion Evropa e Lirë.

Ai thekson se kritikat e tij nuk kanë për qëllim ta vënë në pikëpyetje mbështetjen e Qeverisë së Kosovës për Luginën e Preshevës, të cilën e konsideron të domosdoshme, por mënyrën se si, sipas tij, ajo menaxhohet.

Sipas Pajazitit, veçanërisht fondi i vitit 2022 – i ekzekutuar një vit më pas – është keqpërdorur nga KKSH-ja dhe persona të lidhur me Partinë për Veprim Demokratik (PVD).

Ai pretendon se një pjesë e mjeteve u janë shpërndarë organizatave joqeveritare, prapa të cilave, sipas tij, qëndrojnë persona të afërt me këtë parti që udhëheq KKSH-në.

“Një pjesë e mirë e fondeve ka përfunduar në xhepa të funksionarëve partiakë”, thotë Pajaziti, duke shtuar se, për këtë arsye, shumë mjete të ndara në vitin 2023 nuk janë realizuar për projekte të shoqërisë civile, por vetëm për furnizimin e nxënësve me libra shkollorë dhe për bursat e studentëve.

Pa sjellë ndonjë provë më konkrete, Pajaziti ka bërë pretendime të ngjashme edhe në komentet për disa media në Serbi.

Kundërpërgjigjja e KKSH-së dhe komunat tjera

Kryetari i Këshillit Kombëtar Shqiptar, Enkel Rexhepi, i hedh poshtë këto pretendime.

Ai thotë se fondet janë shfrytëzuar për projekte konkrete dhe se përfituesit nuk janë përzgjedhur mbi baza partiake.

“Efektet nuk maten nga deklaratat politike, por në terren – në media, në institucione, në projekte kulturore dhe në jetën reale të qytetarëve”, thotë ai për Radion Evropa e Lirë.

Sipas Rexhepit, fondi prej dy milionë eurosh i vitit 2022 u ekzekutua 100 për qind gjatë vitit pasues, ndërsa më 2023 u realizua vetëm 14.5 për qind, për shkak të vonesave nga zgjedhjet brenda KKSH-së.

Për vitin 2024, nga tre milionë euro janë ekzekutuar 60.96 për qind, ndërsa shpërndarja e 4 milionë eurove të vitit 2025 parashikohet të arrijë në 78.39 për qind, përmes konkurseve publike të shpallura nga KKSH-ja.

Rexhepi përmend si shembull funksionimin e televizioneve lokale, mbështetjen e klubeve sportive, si dhe shpërndarjen falas të librave shkollorë për mbi 30 mijë nxënës të shkollave fillore në Luginë.

Sipas tij, qindra studentë kanë përfituar gjithashtu bursa për studime.

“Duhet ta kuptojmë se jetojmë në një komunitet të vogël dhe, si kudo tjetër, organizatat dhe individët janë shpesh të ndërlidhur përmes angazhimeve profesionale, shoqërore apo edhe politike. Kjo nuk nënkupton keqpërdorim, por është realitet i shoqërive të vogla”, thotë Rexhepi.

Ai shton se në projekte kanë qenë të angazhuar edhe profesionistë të afërt me koalicionin Fronti për Ndryshim, prej nga vjen Pajaziti.

Ky koalicion – në përbërje të të cilit janë Alternativa për Ndryshim, Lëvizja për Reforma dhe Lëvizja për Bujanocin – aktualisht nuk ka përfaqësim në KKSH.

Aty janë të përfaqësuara Partia për Veprim Demokratik, Lëvizja e Progresit Demokratik, Partia Demokratike e Bujanocit dhe Partia Demokratike Shqiptare.

Kryetarja e Komunës së Preshevës, Ardita Sinani, nga Partia për Veprim Demokratik, vlerëson se mbështetja financiare e Qeverisë së Kosovës ka pasur ndikim të drejtpërdrejtë në përmirësimin e jetës së qytetarëve.

“Përfitimet janë të prekshme dhe shumëdimensionale, si në Preshevë ashtu edhe në mbarë Luginën e Preshevës”, thotë ajo për Radion Evropa e Lirë.

Sipas Sinanit, ndihma ka përfshirë disa sektorë kyç, veçanërisht arsimin, ku nxënësit kanë përfituar libra falas, ndërsa studentët bursa.

Ajo shton se janë mbështetur edhe klubet sportive për të rinj dhe fëmijë, është zbatuar një program i posaçëm për përkrahjen e fëmijëve me aftësi të kufizuara, si dhe është financuar renovimi i një objekti që po shndërrohet në Shkollë Muzike dhe Muze në komunën e Preshevës.

Në kuadër të kësaj mbështetjeje, Sinani përmend edhe financimin e aktiviteteve lobuese për ndërkombëtarizimin e çështjes së shkeljes së të drejtave të shqiptarëve në Luginën e Preshevës.

Si rrjedhojë, një grup ligjvënësish amerikanë i kërkuan Departamentit amerikan të Shtetit javën e kaluar që t’i shqyrtojë pretendimet për diskriminim ndaj shqiptarëve në Serbi.

Afrim Ferati, një nga tre asamblistët shqiptarë në Kuvendin Komunal të Medvegjës dhe drejtues i degës së KKSH-së në këtë komunë, e konsideron mbështetjen financiare nga Qeveria e Kosovës si të domosdoshme dhe pozitive për komunitetin shqiptar.

Ai shmang përplasjet politike ndërmjet partive lokale dhe thekson mirënjohjen e komunitetit për ndihmën që vjen nga Kosova.

Ferati pranon se fondet mund të menaxhohen më mirë dhe me më pak procedura, por nuk beson në keqpërdorim masiv.

“Unë nuk besoj tek ajo që flitet se ka pasur keqpërdorim masiv. Ndoshta mund të flasim për cilësinë e menaxhimit të mjeteve, por presim që të ketë përmirësim në procesin e ndarjes së tyre”, thotë ai për Radion Evropa e Lirë.

Qëndrimi i Qeverisë së Kosovës

Pretendimet për mungesë efektesh në terren i hedh poshtë edhe Qeveria në detyrë e Kosovës.

“Nëse dikush pretendon se ‘nuk ka efekte të dukshme’, kjo është më së paku e pasaktë dhe nuk përkon apo reflekton me realitetin dhe ndikimin që ka pasur në jetën e shqiptarëve të Luginës mbështetja e dhënë nga institucionet tona”, thotë për Radion Evropa e Lirë Klisman Kadiu, këshilltar për media i zëvendëskryeministrit në detyrë, Besnik Bislimi.

Sipas tij, procesi përfshin mekanizma kontrolli, raportimi dhe monitorimi në çdo fazë të realizimit.

“…dhe mjetet janë shfrytëzuar ekskluzivisht për financimin e projekteve, në përputhje me Memorandumin për Bashkëpunim dhe shtojcat përkatëse”, shton ai.

Ndihmë apo instrument politik?

Megjithatë, kryetari i Bujanocit shpreh dyshimin se bashkëpunimi i Prishtinës është fokusuar kryesisht me PVD-në dhe jo me institucionet e zgjedhura lokale.

Ai kujton se dy zyrtarë nga PVD-ja – Ardita Sinani, aktualisht kryetare e Komunës së Preshevës, dhe Ragmi Mustafi, kryetar i degës së PVD-së në Bujanoc – kanë qenë këshilltarë në kabinetin qeveritar të Kosovës, të drejtuar nga Albin Kurti.

“Qeveria e Kosovës e ka ndihmuar dhe po e ndihmon vetëm Partinë për Veprim Demokratik”, të cilën, siç thotë ai, “dëshiron ta fuqizojë përmes fondit”.

Zyrtarët e Qeverisë së Kosovës nuk deshën ta komentonin këtë pretendim.

Sinani, ndërkaq, i sheh akuzat në kontekstin e zhvillimeve politike lokale, duke përmendur rezultatet e zgjedhjeve komunale të vitit 2024 dhe krijimin e shumicës komunale në Bujanoc me votat e partive serbe.

Në këto rrethana, thotë ajo, retorika politike kushtëzohet shpesh nga nevoja për të ruajtur shumicën – gjë që reflektohet edhe në diskursin publik ndaj Kosovës.

Sipas saj, politizimi i mbështetjes nga Kosova nuk i shërben interesit publik të qytetarëve të Luginës së Preshevës.

Mbështetja e bllokuar për bujqit

Në krejt këtë diskutim, një nga pikat më problematike mbetet mbështetja për bujqit shqiptarë të Luginës së Preshevës.

Rexhepi, nga KKSH-ja, pranon se rreth një milion euro të ndara për këtë qëllim, nuk janë realizuar, pasi janë bllokuar nga Ministria e të Drejtave të Njeriut dhe Pakicave në Serbi.

Sipas tij, kjo ministri anuloi subvencionet për fermerët shqiptarë në janar të vitit 2025, me arsyetimin se KKSH-ja nuk ka kompetenca në fushën e bujqësisë, duke u mbështetur kështu edhe në një vendim të Gjykatës administrative në Nish.

Ai thotë se shkak për këtë vendim u bë edhe një shkresë e dërguar më herët nga Alternativa për Ndryshim – pjesë e Frontit për Ndryshim – e cila kishte njoftuar institucionet serbe për konkursin e shpallur nga KKSH-ja.

“Pasojat i kanë pësuar drejtpërdrejt bujqit, të cilët nuk kanë asnjë faj në këtë përplasje politike”, thotë Rexhepi.

Pajaziti, në anën tjetër, thotë se ka ofruar zgjidhje, duke propozuar që fondet të barten në Komunën e Bujanocit për t’u shpërndarë përmes saj.

Por, Rexhepi e hedh poshtë këtë mundësi, duke argumentuar se një gjë e tillë është e pamundur ligjërisht dhe do të rezultonte në shpërndarje të pabarabartë, pasi komuna është multietnike.

Sipas tij, mbështetja financiare e Qeverisë së Kosovës është e dedikuar vetëm për komunitetin shqiptar në Luginën e Preshevës, dhe KKSH-ja e ka përgjegjësinë për avancimin e shqiptarëve në këto troje.

Rexhepi thekson se këshilli po ndërmerr të gjitha hapat ligjorë dhe institucionalë për të sfiduar vendimin e autoriteteve serbe dhe për të rikthyer mbështetjen për bujqit, duke komunikuar në mënyrë të rregullt me institucionet përkatëse, partnerët ndërkombëtarë dhe Qeverinë e Kosovës.

Ai insiston se pengesë kryesore për veprimtarinë e institucioneve të Kosovës në Luginën e Preshevës mbetet pushteti në Beograd dhe strukturat e tij lokale.

Në Luginë jetojnë më shumë se 60.000 shqiptarë, të cilët përbëjnë pakicën e katërt më të madh në Serbi, sipas regjistrimit të fundit të popullsisë më 2022.

Përfaqësues i vetëm i tyre në Kuvendin e Serbisë është deputeti Shaip Kamberi nga Partia për Veprim Demokratik.

Përpjekjet për ta shndërruar ndihmën nga Kosova në temë përplasjesh politike “janë të dëmshme për interesin shqiptar”, përfundon Rexhepi.

The post Fondet e Kosovës për Luginën e Preshevës ndezin përplasje politike appeared first on Albeu.com.

Këtë të enjte, Endrit Karaj, vëllai i 30-vjeçarit Jurgen Karaj, trupi i të cilit vijon i zhdukur prej 20 ditësh pas aksidentit, ka folur në “Shqipëria Live”, duke u shprehur se kërkimet vijojnë, por ende nuk ka asnjë shenjë.

Ai tregoi se i vëllai kishte dalë me shokët, por u aksidentua me njërin prej tyre dhe që nga ai moment nuk dihet se ku ka përfunduar trupi.

“Këto kanë qenë ditë të vështira, shumë të vështira. U bënë plot 20 ditë që kërkojmë, unë, policia, njerëzit e mi të afërt por ende asgjë. Natën e ngjarjes ai ka qenë me shokët dhe ka ndodhur aksidenti. Unë nuk kam qenë në Shqipëri dhe nuk e di saktësisht si ka ndodhur. Deri tani po na ndihmon ushtria, bashkia, FNSH e Shkodrës dhe banorë të zonës, të gjithë pa përjashtim. Dua ta gjej që ta di ku ta qaj, ta di se ku prehet që t’i çoj një lule. E kemi kërkuar ngado por nuk ka asnjë shenjë deri më tani. Unë dua t’i falenderoj të gjithë për ndihmën, ish-deputetin Kreshnik Çollaku, ushtrinë e Kosovës dhe të gjitha autoritetet shqiptare”,- tha ai.

Aksidenti i rëndë ka ndodhur në orët e para të 9 janarit, ku një makinë u aksidentua dhe përfundoi në përroin në fshatin Darsë të Klosit.

I riu ka qenë duke udhëtuar me makinë, ku drejtues ishte Andi Losha, i cili u largua nga vendi i ngjarjes pa lajmëruar policinë dhe pa i dhënë ndihmë pasagjerit.

The post Kishte dalë me shokët dhe u aksidentua/ Prej 20 ditësh 30-vjeçari Jurgen Karaj i zhdukur, vëllai i tij prek me fjalët: Dua ta gjej që ta di ku ta qaj… appeared first on Albeu.com.