Gjatë muajit janar, “Monitor” zhvilloi një vrojtim me analistë të tregut financiar lidhur, me faktorët që kanë ndikuar ecurinë e kursit të këmbimit mes Euros dhe Lekut.

Ekspertët u pyetën për të vlerësuar ndikimin e një liste faktorësh, në një shkallë që fillonte nga një deri në pesë.

Mbështetur në përgjigjet e tyre, faktori me peshën mesatare më të lartë në vijimësinë e rënies së kursit të këmbimit Euro-Lek ka qenë turizmi dhe në përgjithësi rritja e eksporteve të shërbimeve në ekonominë shqiptare. Paneli i ekspertëve e ka vlerësuar këtë faktor me një ndikim 4.5 (nga një shkallë maksimale 5).

Sipas të dhënave më të fundit të Bankës së Shqipërisë, për të gjithë 9-mujorin 2025, të ardhurat neto nga turizmi arritën në 2.1 miliardë euro, në rritje vjetore me 19.6%.

Turizmi vazhdon të jetë kontribuesi kryesor në zërin e të ardhurave në bilancin e pagesave të vendit.

Përveç turizmit, në përgjithësi sektori i shërbimeve vazhdon të japë një kontribut të lartë në rritjen e eksporteve të vendit. Për të gjithë 9-mujorin 2025, shërbimet sollën të ardhura neto në ekonomi në vlerën e pothuajse 3.5 miliardë eurove, në rritje me 16.4% krahasuar me një vit më parë.

Faktori i dytë më i zgjedhur nga ekspertët e anketuar janë remitancat. Mesatarisht, ndikimi i këtij faktori në kursin e këmbimit vlerësohet në nivelin 3.91.

Për 9-mujorin, dërgesat e emigrantëve arritën vlerën e 817 milionë eurove, në rritje me 5.8% krahasuar me një vit më parë. Valët e reja të emigrimit të shqiptarëve në vitet e fundit kanë ringritur remitancat, duke ndikuar pozitivisht bilancin e llogarisë korrente të vendit.

Faktori i tretë për nga ndikimi, sipas ekspertëve, janë prurjet informale të valutës, me një vlerësim mesatar në nivelin 3.83. Me një ndikim lehtësisht më të ulët vlerësohen prurjet e paligjshme të valutës, me një vlerësim mesatar 3.58.

Në perceptimin e përgjithshëm, flukset informale dhe të paligjshme kanë pasur gjithmonë një ndikim të konsiderueshëm në tendencat e kursit të këmbimit. Një perceptim të tillë duket se e ndajnë edhe ekspertët, që i rendisin ndër faktorët me ndikim në kursin e këmbimit.

Investimet e huaja në pasuri të paluajtshme vlerësohen gjithashtu ndër faktorët me ndikim, me një nivel mesatar 3.66.

Sektori i pasurive të paluajtshme dominoi investimet e huaja për të katërtin vit radhazi në 2025, me një peshë gjithnjë e më të lartë. Për 9-mujorin 2025, investimet e huaja në pasuri të paluajtshme arritën vlerën e 403 milionë eurove. Vlera e investimeve të huaja në prona është rritur me 50% krahasuar me të njëjtën periudhë të vitit të kaluar. Investimet në këtë sektor përbëjnë më shumë 33% të investimeve të huaja për këtë vit, nga 23% që zinin një vit më parë.

Në renditjen e vlerësimit mesatar të ekspertëve për faktorët që kanë ndikuar kursin e këmbimit, vijon bilanci tregtar, me një mesatare vlerësimi 3.25 dhe ulja e deficitit buxhetor dhe borxhit publik, në nivelin 2.83.

Publiku mendon se euro ra nga flukset informale

Për të ballafaquar mendimin e ekspertëve me mendimin e një publiku më të gjerë, “Monitor” realizoi mes fundit të muajit janar dhe fillimit të muajit shkurt një sondazh në faqen e saj të internetit. Pjesëmarrësit u pyetën për faktorët kryesorë që, sipas tyre, kanë përcaktuar rënien e kursit të Euros ndaj Lekut, me të njëjtat alternativa që iu parashtruan edhe ekspertëve.

Sipas përgjigjeve të sondazhit, në pjesën më të madhe pjesëmarrësit mendojnë se faktorët kryesorë që kanë sjellë rënien e kursit të Euros janë prurjet e paligjshme të valutës, me 36% të përgjigjeve dhe prurjet informale, me 30% të tyre.

Faktorët e tjerë vijojnë me diferencë të konsiderueshme, duke filluar nga turizmi, me 13% të përgjigjeve, investimet e huaja në prona, me 9% dhe remitancat, me 5%.

Rezultatet e sondazhi tregojnë se, në perceptimin e opinionit publik, ekonomia informale dhe e paligjshme është faktori me ndikimin kryesor në rënien e kursit të këmbimit mes Euros dhe Lekut.

Sipas statistikave të Bankës së Shqipërisë, Euro u këmbye mesatarisht vitin e kaluar me 97.85 lekë, niveli më i ulët i regjistruar ndonjëherë. Megjithatë, shkalla e rënies së kursit në 2025 ishte ndjeshëm më e ulët krahasuar me dy vitet e mëparshme. Për vitin 2025, kursi mesatar zyrtar i këmbimit Euro-Lek pësoi një rënie me 2.8%, nga 7.4% që kishte qenë rënia gjatë vitit 2024 dhe 8.6% që kishte qenë rënia gjatë vitit 2023.

Por, ngadalësimi i rënies së kursit mund të shpjegohet në një masë të konsiderueshme me ndërhyrjet e Bankës Qendrore. Sipas të dhënave zyrtare të publikuara deri tani, për nëntë muajt e parë të vitit 2025 Banka e Shqipërisë ka blerë gjithsej 825.6 milionë euro në tregun e brendshëm valutor.

Kjo është vlera më e lartë historike e blerjeve të Bankës së Shqipërisë në tregun valutor për këtë periudhë të vitit. Në mungesë të këtyre blerjeve, kursi i këmbimit do të kishte pësuar një rënie edhe më të madhe. / Ersuin Shehu

Burimi: Anketimi i “Monitor” me ekspertët

Burimi: Sondazhi i “Monitor” me publikun

The post Rënia e Euros: Ekspertët mendojnë se ka ardhur sidomos nga turizmi, publiku nga paratë e pista appeared first on Revista Monitor.

Sistemi fiskal dhe tarifat administrative po kthehen në barrë për qytetarët e Ballkanit Perëndimor, por në Shqipëri ky presion duket se ka prekur masën më të gjerë të popullsisë, sipas anketës “Securimetri 2025” të realizuar nga Këshilli i Bashkëpunimit Rajonal.

Të dhënat tregojnë se në Shqipëri, rreth 75% e qytetarëve vlerësojnë se taksat dhe tarifat rrisin koston e tyre të jetesës me 10% deri në 50% te të ardhurave mujore. Specifikisht, grupi që deklaron se detyrimet publike marrin 21-30% të të ardhurave të tyre mujore është më i larti në rajon, me 30% të të anketuarve, duke lënë pas mesataren e Ballkanit Perëndimor prej 25%.

Kjo shifër tregon se, ndryshe nga fqinjët, shqiptarët e ndjejnë barrën e detyrimeve publike si një shpenzim që dikton mirëqenien e tyre mujore. Vetëm 13% e shqiptarëve mendojnë se shteti u merr më pak se 10% të kostove të jetesës, niveli ky më i ulët në rajon pas Serbisë.

Kjo do të thotë se për gati një të tretën e popullsisë në Shqipëri, pagesat ndaj institucioneve publike marrin një pjesë mjaft të konsiderueshme të buxhetit familjar, duke tejkaluar mesataren e rajonit.

Kosova shfaqet si një ekonomi më barrën më të lehtë për qytetarët e saj. Rreth 17% e qytetarëve të saj e ndjejnë barrën e pagesave publike nën nivelin 10%, një tregues ky më pozitiv se në Shqipëri.

Serbia ka përqindjen më të lartë të qytetarëve që deklarojnë kosto ekstreme ku 11 % e qytetarëve pohojnë se çojnë 50% të të ardhurave mujore në shtet, ndërsa në Shqipëri kjo kategori është pothuajse e papërfillshme me 3%. Kjo tregon se sistemi serb mund të jetë më agresiv ndaj grupeve më të ardhura të larta, ndërsa sistemi shqiptar shënjestron më gjerësisht shtresën e mesme.

Maqedonia e Veriut udhëheq rajonin me 36% te të anketuarve që paguajnë10-20% te të ardhurave mujore, duke u renditur shumë afër Shqipërisë për nga perceptimi i barrës së moderuar.

Për Shqipërinë, shifrat tregojnë një ndjeshmëri të lartë ndaj detyrimeve financiare publike, ku përfshihet faturat e ujit, energjisë dhe të tjera që kanë bëjnë me taksat e tarifat. Një pjesë e konsiderueshme e popullsisë pohoi se këto kosto gërryejnë ndjeshëm të ardhurat e tyre mujore./ B.Hoxha

The post 75% e shqiptarëve çojnë për faturat publike deri në 10-50% të buxhetit mujor appeared first on Revista Monitor.

Ofruesit e shërbimit të internetit duhet të përcaktojnë në kontratën e shërbimit edhe shpejtësinë minimale për shkarkimin dhe ngarkimin e të dhënave.

Një detyrim i tillë parashikohet në ligjin e ri “Për komunikimet elektronike”, i miratuar në fund të vitit 2024 dhe Autoriteti i Komunikimeve Elektronike dhe Postare (AKEP) e ka përfshirë në rregulloren e re për “Përcaktimin e modelit të përmbledhjes së kontratës për t’u përdorur nga ofruesit e shërbimeve të komunikimeve elektronike publike”.

Sipas anekseve të rregullores, për shërbimin e aksesit në internet në rrjet fiks në kontratë duhet të përfshihet shpejtësia minimale, normalisht e disponueshme dhe maksimale e shkarkimit dhe ngarkimit, ndërsa në rastin e rrjeteve celulare do përfshihet shpejtësia maksimale e vlerësuar e shkarkimit dhe ngarkimit të shërbimit të aksesit në internet.

Deri më sot, shpejtësia e përcaktuar në kontratat e shërbimit të internetit me linja fikse i referohet shpejtësisë maksimale, përkatësisht për shkarkimin dhe ngarkimin e të dhënave.

Por, në praktikë, shpejtësia reale e internetit është e ndryshueshme dhe shpeshherë larg asaj maksimale të parashikuar në kontratë. Tashmë, kuadri i ri ligjor përcakton edhe detyrimin për të specifikuar një shpejtësi minimale të lidhjes.

Gjithashtu, ligji parashikon se, çdo mospërputhje e rëndësishme, e vazhdueshme ose e përsëritur rregullisht, midis cilësisë aktuale të shërbimit të aksesit në internet dhe asaj të parashikuar në kushtet e kontratës do të konsiderohet se përbën mospërputhje të performancës për qëllime të nxitjes së mjeteve juridike të disponueshme për konsumatorin, në përputhje me legjislacionin kombëtar. Një parashikim i tillë synon të mbrojë konsumatorin, në rastet kur operatori nuk ofron atë cilësi shërbimi të parashikuar në kontratë.

Sipas të dhënave më të fundit nga AKEP, numri i abonentëve të internetit me linja fikse në fund të muajit shtator 2025 arriti në rreth 710 mijë, në rritje me 2.4% krahasuar me tremujorin e mëparshëm dhe 7.1% krahasuar me të njëjtën periudhë të një viti më parë.

Tregu i internetit nga linjat fikse vazhdon të ndjekë një tendencë të qëndrueshme në rritje, duke ngushtuar pjesërisht prapambetjen në depërtimin e linjave fikse të komunikimit.

Tregu në përgjithësi po shfaq rritje dhe konkurrencë të lartë, veçanërisht në qendrat e mëdha urbane, ku përqendrimi i popullsisë është më i madh. Operatorët e kanë rinovuar gradualisht infrastrukturën drejt teknologjive më të reja, të fibrës optike, që ka ndikuar në rritjen e shpejtësisë mesatare të lidhjes për përdoruesit.

Sipas të dhënave më të fundit për shpejtësinë e internetit, në fund të vitit 2024, rreth 84% e pajtimtarëve kishin linja me shpejtësi më të madhe se 30 Mbps (megabit për sekondë), nga 69% që kishte qenë ky tregues në fund të vitit 2023. Ndërkohë, 42% e pajtimtarëve zotërojnë lidhje me shpejtësi mbi 100 Mbps, nga 28% që kishte qenë ky tregues për vitin 2023.

Gjithmonë duke iu referuar shifrave të 2024, rreth 69% e lidhjeve të internetit nga rrjetet fikse mbështeten në teknologjinë e fibrës optike./ E.Shehu

The post Interneti fiks, kontratat e shërbimit duhet të përcaktojnë edhe shpejtësinë minimale appeared first on Revista Monitor.

Suedia do të shtrëngojë rregullat e shtetësisë. Aplikantët që do të përballen me një pritje më të gjatë, prej tetë vitesh, para se të mund të aplikojnë, një prag minimal page dhe një test mbi njohuritë e tyre për shoqërinë suedeze, tha të hënën qeveria e qendrës së djathtë.

Qeveritë e njëpasnjëshme kanë shtrënguar politikat e emigracionit që nga viti 2015, kur rreth 160,000 azilkërkues kërkuan strehim në Suedi. Por qeveria e koalicionit minoritar po parashikon se një qëndrim edhe më kufizues ndaj emigracionit do të rezultojë popullor mes votuesve në zgjedhjet parlamentare të shtatorit.

“Këto kërkesa janë shumë më të ashpra sesa situata aktuale sepse aktualisht në thelb nuk ka kërkesa për t’u bërë shtetas,” u tha gazetarëve ministri i Emigracionit, Johan Forssell.

Qeveria tha se aplikantët për shtetësi suedeze do të duhet të jetojnë në vend për tetë vite, nga pesë që janë aktualisht, të kenë të ardhura mujore mbi 20,000 korona suedeze (2,225 dollarë), dhe të jenë në gjendje të kalojnë një test gjuhe dhe kulture.

“Duket e arsyeshme që duhet të dini nëse Suedia është monarki apo republikë, nëse doni të jeni shtetas,” tha Forssell.

Kushdo me precedent penal, qoftë në Suedi apo jashtë saj, do të duhet të presë më gjatë përpara se të aplikojë. Dikush që ka vuajtur, për shembull, një dënim me katër vite burg, do të duhet të presë 15 vite para se të mund të aplikojë për shtetësi.

Demokratët e Suedisë, kundër emigracionit, të cilët mbështesin qeverinë e koalicionit minoritar, kanë fajësuar dekada të tëra politikat e emigracionit, që sipas tyre kanë shkaktuar një valë krimi bandash që ka përfshirë vendin.

Rregullat e reja pritet të hyjnë në fuqi më 6 Qershor.

Javën e kaluar qeveria tha se do të shtrëngonte rregullat për azilkërkuesit. / Reuters

The post Suedia do të shtrëngojë rregullat e shtetësisë mes përpjekjeve për të ulur emigracionin appeared first on Revista Monitor.

Paratë e diasporës vazhdojnë ta mbajnë gjallë ekonominë e Kosovës. Vetëm gjatë vitit të kaluar, remitancat kaluan 1.42 miliard euro.

Ekonomia e Kosovës gjatë vitit 2025 është mbështetur nga rritja e parave të dërguara nga  diaspora.

Të dhënat e fundit të Bankës Qendrore të publikuara në kuadër të bilancit të pagesave tregojnë se remitancat në Kosovë gjatë vitit 2025 kanë arritur vlerën prej 1.42 miliard eurosh, duke shënuar një rritje prej 4.4% ose rreth 60 milionë euro më shumë krahasuar me vitin 2024.

“…vlera e të cilave deri në nëntor 2025 shënoi 1.28 miliard euro, që paraqet rritje prej 50.43 milionë euro ose 8.87% krahasuar me periudhën e njëjtë të vitit 2025. Ndërsa, sipas vlerësimeve preliminare remitancat për muajin dhjetor 2025 ishin rreth 140.04 milionë euro, duke arritur kështu vlerën 1.42 miliard euro”.

Sipas Bankës Qendrore të Kosovës pjesa më e madhe e remitancave ka ardhur nga Gjermania me rreth 39% të totalit.

Pas saj renditen Zvicra me 17.5%, Shtetet e Bashkuara të Amerikës me 7.2%, Austria me 4.2%, Italia me 3.9%, ndërsa Belgjika dhe Franca me nga 3.4%.

Sa i përket mënyrës së dërgimit të parave, rreth 55% e remitancave janë transferuar përmes agjencive për transfere të mjeteve, 17% përmes bankave dhe 28% përmes kanaleve të tjera.

Kjo strukturë ka mbetur pothuajse e njëjtë si në vitin paraprak.

“Prurjet më të mëdha janë realizuar përmes institucioneve financiare jobankare (62.51%), bankave komerciale (15.51%), ndërsa pjesa tjetër – 21.98% – është dërguar përmes kanaleve të tjera alternative. Kjo rritje e qëndrueshme e remitancave tregon jo vetëm mbështetjen e diasporës për familjet në Kosovë, por edhe ndikimin e drejtpërdrejtë në fuqizimin e konsumit dhe të investimeve të brendshme”, ka treguar BQK.

Mesatarja mujore e remitancave ishte rreth 117.9 milionë euro, ndërsa prurjet më të mëdha u regjistruan në muajt korrik, gusht dhe dhjetor, kryesisht për shkak të ardhjes së mërgimtarëve në Kosovë gjatë sezonit të verës dhe festave të fundvitit.

Sipas disa të dhënave, janë mbi 700 mijë qytetarë të Kosovës që jetojnë në vende të ndryshme të botës, shumica prej tyre në Evropën Perëndimore dhe në Shtetet e Bashkuara të Amerikës.

The post Brenda një viti, emigrantët dërguan 1.42 miliard euro në Kosovë appeared first on Revista Monitor.

Ekonomia e Rumanisë do të hyjë në një trajektore rimëkëmbjeje në muajt në vijim, deklaroi kryeministri Ilie Bolojan në një postim në rrjetet sociale.

Ai shtoi se ekzistojnë baza të forta për rimëkëmbje ekonomike këtë vit, pa pasur nevojë për rritje të mëtejshme taksash. Kursimet e realizuara në gjysmën e dytë të vitit të kaluar, sipas tij, kanë çuar në uljen e deficitit buxhetor me mbi 1% të PBB-së, nën objektivin prej 8.4%, pa ulur investimet.

Sipas kryeministrit, të ardhurat buxhetore janë rritur, edhe si rezultat i rritjes së disa taksave, masa që ai pranoi se vazhdojnë të kenë efekte negative në jetën e qytetarëve të zakonshëm.

Megjithatë, edhe viti 2026 do të sjellë disa zhvillime pozitive, beson kryeministri, me qeverinë që synon të hartojë një buxhet të bazuar në rimëkëmbjen ekonomike dhe investimet. Ilie Bolojan pret gjithashtu që norma e inflacionit të ulet në 4%, nga gati 10% aktualisht.

Mbi 15 miliardë euro do të vijnë nga fondet europiane, përmes Planit Kombëtar të Rimëkëmbjes dhe Rezistencës dhe politikës së kohezionit. Këto fonde do të kanalizohen drejt infrastrukturës, ekonomisë dhe përmirësimit të shërbimeve publike, tha Bolojan.

Ai kujtoi gjithashtu se në fillim të muajit të ardhshëm, qeveria do të marrë përgjegjësi në Parlament për legjislacionin që synon të kufizojë shpenzimet publike në administratën qendrore dhe vendore.

Më pas do të miratohet buxheti i shtetit për vitin 2026, i cili do të ndërtohet mbi baza realiste, me një objektiv deficiti pak mbi 6%, deklaroi kryeministri. Ndërkohë, përfaqësuesit e qeverisë kanë vijuar bisedimet për buxhetin.

The post Ekonomia rumune pritet të nisë rimëkëmbjen appeared first on Revista Monitor.

OTP Bank Albania ka ndërmarrë një hap të rëndësishëm drejt transformimit digjital, duke prezantuar Baxter – OTP Trader, platformën moderne dhe inovative për kryerjen e këmbimeve valutore, dedikuar klientëve të biznesit dhe korporatave.

Këmbimi valutor, si një nga fushat më dinamike të aktivitetit bankar, është prioritet i qartë në strategjinë digjitale të bankës.

Në lidhje me këtë risi të bankës, z. Erjon Taçe, Drejtor i Departamentit të Tregjeve Globale, thekson për Monitor:

“Kjo është platforma e parë dhe e vetme e këtij lloji në tregun shqiptar. Klientët tanë të biznesit kanë akses në kohë reale në kurset e këmbimit, ekzekutim të menjëhershëm dhe falas. Ajo që e veçon Baxter-OTP Trader është transparenca dhe siguria që u ofrohet klientëve. Synimi ynë është të ndërtojmë marrëdhënie afatgjata, përmes zgjidhjeve inovative dhe të besueshme.”

Mbështetje për klientët korporatë

Përtej avantazhit teknologjik, platforma krijon një mjedis më të strukturuar dhe efikas për kompanitë kliente, duke u mundësuar CFO-ve dhe ekipeve të tyre financiare mjetet e duhura në aktivitetin e përditshëm.

Z.Taçe shton: “Kjo platformë sjell pavarësi dhe komoditet në përdorim, monitorim dhe mbikëqyrje. Edhe klientët që kanë qenë skeptikë ndaj platformave digjitale kanë gjetur lehtësim dhe vlerë të shtuar në këtë shërbim.”

Rezultate të prekshme

Platforma jo vetëm që ndërthur operacionet me teknologjinë më të avancuar, por edhe fuqizon marrëdhëniet me ekspertët e këmbimit valutor të OTP Bank Albania, duke u dhënë kështu klientëve hapësira për zgjidhje strategjike të thelluara.

E ndërsa rezultatet pozitive janë të dukshme me një bazë të përdoruesve që po zgjerohet, ekspertët e tregjeve globale të bankës mbeten të angazhuar për të asistuar klientët gjatë implementimit dhe përdorimit të përditshëm të platformës.

Hapat e ardhshëm në online banking

Baxter-OTP Trader është pjesë e një strategjie më të gjerë të OTP Bank Albania, për integrimin e shërbimeve digjitale.

“Integrimi me online banking është një hap thelbësor dhe i pashmangshëm. Klientët presin të aksesojnë shërbimet bankare në maksimum përmes kanaleve online dhe ne po punojmë për t’iu përgjigjur kësaj pritshmërie,” – përfundon z. Taçe.

Strategjia e OTP Bank Albania mbetet e qartë: nevojat dhe pritshmëritë e klientëve, janë forca lëvizëse pas çdo inovacioni. Banka përfiton gjithashtu nga mbështetja dhe ekspertiza e Grupit OTP, i cili luan një rol kyç në zhvillimin e zgjidhjeve të avancuara në nivel rajonal e ku tashmë është pozicionuar si një nga grupet lider në Evropën Qendrore dhe Lindore, për likuiditetin dhe stabilitetin financiar.

Grupi OTP, pjesë integrale e të cilit është Banka OTP Albania vijon në rrugëtimin e inovacionit duke kurorëzuar suksesin më të fundit, sikurse renditja “Global Finance’s 2026 World’s Best Foreign Exchange Banks” nga Revista prestigjioze Global Finance – duke u cilësuar: “Banka më e mirë e këmbimit valutor, në Evropën Qendrore dhe Lindore (CEE).

Për më shumë informacion lidhur me platformën Baxter-OTP Trader, mund të kontaktoni me stafin e Bankës OTP Albania.

The post OTP Bank Albania prezanton në treg Baxter OTP Trader, një platformë inovative për këmbimin valutor appeared first on Revista Monitor.

Në vitin 2026, drejtësia shqiptare nuk do të gjykohet vetëm nga sallat e gjyqit, por edhe nga një kriter shumë më i prekshëm për ekonominë që është koha. Me miratimin e kalendarit vjetor të inspektimeve, Inspektori i Lartë i Drejtësisë po sinjalizon një zhvendosje të qartë të fokusit nga kontrolli formal drejt matjes së performancës reale të sistemit gjyqësor dhe zbatimit konkret të rekomandimeve të dhëna më herët.

Kalendarit të inspektimeve për 2026 i paraprin një analizë e të dhënave të mbledhura nga ankesat, gjetjet e mëparshme dhe problematikat e përsëritura në gjykata dhe prokurori. Por ndryshe nga vitet e kaluara, theksi nuk është vetëm te identifikimi i shkeljeve, por te verifikimi a ka prodhuar ndonjë efekt real cikli i rekomandimeve dhe ndërhyrjeve institucionale apo sistemi ka mbetur në të njëjtin nivel efikasiteti.

Jo vetëm për qytetarët që presin me vite për zgjidhjen e çështjeve, por edhe për biznesin, investimet dhe funksionimin normal të tregut. Çdo proces i zvarritur përkthehet në kapital të bllokuar, kontrata të pezulluara, kredi të pasigurta dhe rritje të kostove operative për ndërmarrjet.

Një element kyç i planit është monitorimi i efikasitetit procedural. Nuk bëhet fjalë vetëm për respektimin formal të afateve ligjore, por për aftësinë e institucioneve për të menaxhuar fluksin e çështjeve dhe për të shmangur grumbullimin e dosjeve të prapambetura. Në terma ekonomikë, dosjet e grumbulluara në gjykata janë një barrë që e mban peng gjithë sistemin.

ILD synon që në 2026 inspektimi të mos jetë më një ushtrim retrospektiv, por një instrument presioni për ndryshim operacional. Zbatimi i rekomandimeve do të ndiqet në mënyrë aktive, duke e kthyer procesin nga një raport formal në një mekanizëm llogaridhënieje.

Kalendarit të inspektimeve i paraprin një analizë e gjerë e ankesave të qytetarëve, gjetjeve të mëparshme dhe problematikave që përsëriten në mënyrë ciklike në funksionimin e gjykatave dhe prokurorive. Pikërisht këto sinjale nga terreni kanë orientuar prioritetet për 2026, duke e kthyer inspektimin nga një ushtrim formal në një mjet presioni institucional.

The post ILD ‘shtrëngon’ kontrollin në 2026, nga inspektimi formal te matja e rezultateve appeared first on Revista Monitor.

Kredia afatgjatë e dhënë nga sektori bankar ndoqi përsëri një tendencë në rritje gjatë vitit të kaluar. Të dhënat e Bankës së Shqipërisë tregojnë se në fund të muajit nëntor 2025, pesha e kredisë afatgjatë (me maturim mbi pesë vjet), kundrejt totalit të kredisë arriti në 64.3%, nga 62% që kishte qenë në të njëjtën periudhë të një viti më parë.

Pesha e kredisë afatgjatë ndodhet pranë niveleve më të larta historike. Ky nivel u regjistrua në tetor 2025, kur kredia afatgjatë përbënte më shumë se 65% të totalit të portofolit.

Gjatë viteve të fundit, ka një tendencë të qartë të rritjes së peshës së kësaj kredie në strukturën e kredisë bankare. Rritja është e lidhur kryesisht me orientimin më të madh të sektorit bankar drejt kredisë për pasuri të paluajtshme dhe në përgjithësi drejt financimeve që mbështesin investimet.

Në vlerë, portofoli i kredive afatgjata arriti shumën e 586.4 miliardë lekëve, me një rritje prej 16.5% krahasuar me të njëjtën periudhë të vitit të kaluar.

Kreditë më tipike afatgjata janë ato që shkojnë për financimin e blerjes apo ndërtimit të pasurive të paluajtshme, qoftë nga ndërmarrjet apo nga individët. Kredia për këto qëllime në vitet e fundit është rritur me ritme të shpejta, e nxitur nga cikli i ri i të tregut të pasurive të paluajtshme, por edhe nga një ofertë e lartë e bankave në këtë segment.

Të dhënat e Bankës së Shqipërisë tregojnë se kredia për blerje banesash nga individët ka arritur vlerën totale të 240.3 miliardë lekëve ose gati 2.5 miliardë eurove, me një rritje vjetore prej 18%.

Ky produkt tashmë ka peshën kryesore në portofolin total të kredisë bankare dhe përbën më shumë se 27% të portofolit të kredisë për ekonominë.

Me ritme dyshifrore po rritet edhe kredia për pasuri të paluajtshme dhënë bizneseve, që ka arritur në 205.3 miliardë lekë, në rritje me 10.3% krahasuar me të njëjtën periudhë të një viti më parë.

Zgjerimi në tregun e kredive hipotekare, sidomos tek individët, është një mekanizëm që mundëson një shpërndarje të mirë të riskut kreditor, por edhe një rritje afatgjatë dhe të qëndrueshme të portofolit. Kreditë hipotekare dhe ato afatgjata në përgjithësi kanë një amortizim më të ngadaltë në kohë dhe ofrojnë një qëndrueshmëri më të madhe të rritjes së kredisë.

Megjithatë, rritja e shpejtë e kredisë për pasuri të paluajtshme, sidomos në dy vitet e fundit, ka shqetësuar Bankën e Shqipërisë, që ka nisur aplikimin e masave që tentojnë ta ngadalësojnë ritmin e rritjes së huadhënies. Nga muaji korrik i vitit 2025, kanë hyrë në fuqi edhe disa nivele tavan për treguesit “Raporti i kredisë ndaj vlerës” dhe “Raporti i shërbimit të borxhit ndaj të ardhurave”, për kreditë që japin bankat për pasuri të paluajtshme rezidenciale./ E.Shehu

The post Kredia afatgjatë e dhënë nga sektori bankar ndodhet në nivelet më të larta historike appeared first on Revista Monitor.

The post Importet e ushqimeve, viti 2025 appeared first on Revista Monitor.

The post IA kineze është një rrezik për Europën, por edhe shmangia e saj është po aq e rrezikshme appeared first on Revista Monitor.

The post Gjeopolitika po shtrembëron vendimet tregtare të shumëkombësheve appeared first on Revista Monitor.

Kopenhagën, i shpallur një nga qytetet më të lumtura dhe më të jetueshme në botë, ka nisur një fushatë të re për të tërhequr njerëz që janë të pakënaqur me punën ose stilin e jetesës së tyre.

Fushata synon t’u tregojë profesionistëve ndërkombëtarë se si mund të duket jeta dhe karriera në rajonin e Kopenhagës, duke theksuar ekuilibrin punë-jetë dhe mundësitë profesionale.

Programi, i quajtur Friend Recruiter Program, i fton njerëzit të regjistrohen së bashku me një mik. Nëse një person rekomandon një mik për të eksploruar mundësitë e punës në rajonin e Kopenhagës, të dy futen në short për të fituar një udhëtim në qytet dhe për të parë nga afër jetën dhe tregun e punës atje.

Ideja pas fushatës është që njerëzit të marrin një “shije” të jetës në Danimarkë, edhe nëse nuk aplikojnë menjëherë për punë.

Rajoni e promovon veten si një zonë me ekuilibër të fortë punë-jetë, ku pushimet e paguara mund të arrijnë 5-6 javë dhe kultura e punës bazohet në besim dhe autonomi profesionale.

Nisma vjen në një moment kur Kopenhaga vazhdon të dominojë renditjet globale të cilësisë së jetës.

Në vitin 2025 ai u rendit qyteti më i jetueshëm në botë sipas indeksit Global Liveability, me rezultate maksimale në stabilitet, arsim dhe infrastrukturë. Po ashtu, qyteti kryeson edhe renditjet për lumturinë urbane, falë faktorëve si shëndeti, mobiliteti, mjedisi dhe cilësia e jetesës.

Në nivel më të gjerë, lumturia në Danimarkë lidhet me barazinë sociale, besimin në institucione dhe sistemin e fortë të mirëqenies sociale, ku qytetarët ndihen të sigurt dhe kanë mundësi reale për të zgjedhur stilin e jetës që duan.

Autoritetet lokale shpresojnë që fushata të tërheqë profesionistë ndërkombëtarë në një rajon që synon të mbetet qendër inovacioni dhe zhvillimi të qëndrueshëm.

Për shumë ekspertë, kjo tregon edhe një ndryshim në mënyrën si qytetet konkurruese po kërkojnë talent, jo vetëm përmes pagave, por përmes cilësisë së jetës.

Në një treg global pune gjithnjë e më konkurrues, Kopenhageni po shitet jo thjesht si një vend pune, por si një model jetese. / EIU, Business Insider

The post Qyteti më i lumtur në botë mirëpret njerëzit e pakënaqur me punën appeared first on Revista Monitor.

The post Udhëheqësit perëndimorë lundrojnë në një botë të vetmuar appeared first on Revista Monitor.

The post Është stina e zjarreve për financat, shkruan Ken Miller appeared first on Revista Monitor.

The post Ekonomia e Gjermanisë është aq keq sa po mbyllen edhe fabrikat e salsiçeve appeared first on Revista Monitor.

The post A po i vjen fundi epokës së “lopës së shenjtë”? appeared first on Revista Monitor.

Funksioni i programit SelfCare, që menaxhohet përmes E-Albania është kthyer në një makth që nuk po mbaron për bizneset.

Edhe gjatë ditës së sotme, bizneset kanë raportuar se ai është jashtë funksionit, pasi punoi për disa ditë. Shumë ekonomistë u detyruan që të punojnë gjatë fundjavës kur mund ta aksesonin programin, ndonëse më vështirësi, por e hëna duket se ka rritur ngarkesën dhe ekonomistët tashmë shohin në ekran shënimin: “Ju duhet të aksesoni: https:/-/e-albania.al/”

Të paktën që nga 20 janari, ekonomistët po përballen me një situatë absurde, që nuk i mundëson të bëjnë shumë veprime, në platformën e SelfCare, që është një mjet thelbësor për funksionimin e sistemit fiskal dhe administrativ.

“U bë e lodhshme vërtet dhe as nuk merret në konsideratë elementi stres. Ky është një artikull që duhet ta shkruajnë dhe publikojnë mediat. Ja psh. vetëm duke lexuar sms e grupit sot edhe pse nuk kam provuar platformën më është krijuar një mungesë dëshire të punoj llogarit ju qe e keni përjetuar. E vetmja e mire është që flasim në grup dhe është si një terapi e përbashkët për të mbajtur lart moralin dhe humorin. Ne madje kryem edhe një sondazh për këtë gjë.

Ajo që pala përballë e konsideron si kapriço dhe prishje rehati këtë ankesë tonën për ne është vetë “jeta”. Nuk është si mungesa e telefonit kur s’ke vale, por është vetë puna jone edhe koha jonë. Kemi dyfishim të kohës në procesim dhe përgjysmim të kohës së lirë. Me vjen shumë keq që po e përjetojmë gjithë këtë a thua se jemi pjese e ndonjë eksperimenti”, thotë Arbërore, ekonomiste.

Mosfunksionimi i sistemit SelfCare bllokon punën për shumë biznese, përfshirë personat fizikë që mund të lëshojnë fatura të fiskalizuara, mosfiskalizim të deklaratave doganore në afat për importuesit, në certifikatën elektronike nuk mund të bëhen ndryshime të adresës, nëse është dhënë gabim.

“Jemi bërë si roje, që rrimë e gjurmojmë se kur sistemi punon, që të hyjmë e të bëjmë ndonjë veprim, ose hyjmë natën kur sistemi është më pak i ngarkuar”, thotë një ekonomist.

Mosfunksionimi i SelfCare pengoi dhe punën e bizneseve që duhet të dorëzonin deklaratat në 31 janar, duke detyruar Tatimet që të shtyjnë afatin në 20 shkurt.

Tatimet shtyjnë deri më 20 Shkurt afatin për deklarimin e inventarit

Kjo është periudhë e zënë për kontabilistët, të cilët duhet të mbyllin dhe bilancet vjetore dhe SelfCare është baza kryesore për rakordimet.

“Mosfunksioni i SelfCare po na pengon dhe për të deklaruar TVSH-më e muajit janar”, shton një ekonomist.

Sipas Aleancës së profesionistëve të Lirë, (APL), bllokimet sjellin pasoja të drejtpërdrejta në Ndërprerje të punës dhe vonesa në faturim dhe arkëtime; Rritje të riskut të gabimeve dhe mospërputhje në dokumentacion; Kosto shtesë operative (kohë, staf, suport teknik, humbje klientësh); Ekspozim ndaj gjobave dhe penaliteteve për afate që bizneset nuk i kontrollojnë; Dëmtim të besimit te procesi dhe te formalizimi i tregut me fiskalizimin.

“Perëndimi” i Diellës

The post E-Albania, makthi pa fund, bizneset sërish nuk aksesojnë SelfCare appeared first on Revista Monitor.

Vetëm gjatë dhjetorit të vitit 2025, në hotelet e Kosovës janë regjistruar 68 293 vizitorë, çka paraqet një rritje prej 6,1 për qind krahasuar me të njëjtin muaj të vitit paraprak, kur numri i tyre ishte 64 380.

Kosova po bëhet gjithnjë e më shumë destinacion i preferuar për vizitorë vendas dhe të huaj. Vetëm në muajin dhjetor të vitit 2025, në hotelet e vendit qëndruan gjithsej 68 293 vizitorë, duke shënuar një rritje prej 6,1 për qind krahasuar me të njëjtin muaj të vitit paraprak, kur numri i tyre ishte 64 380.

Sipas të dhënave zyrtare të Agjencisë së Statistikave të Kosovës, 27 776 prej tyre ishin vizitorë vendorë, ndërsa 40 517 erdhën nga jashtë vendit — një dëshmi se turizmi i huaj po merr gjithnjë e më shumë hov.

Numri i net-qëndrimeve gjatë dhjetorit arriti në 132 148, nga të cilat 71 624 (ose 54,2%) u realizuan nga vizitorët e jashtëm, ndërsa 60 524 (45,8%) nga vendorët. Kjo tregon se vizitorët e huaj, përveç se janë më të shumtë, qëndrojnë edhe më gjatë në vend.

Në mesin e rajoneve të Kosovës, Peja vazhdon të mbetet destinacioni më i frekuentuar për vizitorët vendorë. Gjatë dhjetorit 2025, në këtë rajon janë regjistruar 9 655 vizitorë të brendshëm dhe 26 550 net-qëndrime, duke reflektuar potencialin turistik të zonave malore dhe resorteve dimërore në Rugovë.

Ndërsa për vizitorët e huaj, viti i kaluar shënoi një rritje prej 2,5 për qind krahasuar me dhjetorin e vitit 2024. Nga gjithsej 40 517 vizitorë të jashtëm, shumica erdhën nga Shqipëria, Gjermania, Zvicra dhe Turqia, ndërsa janë shënuar vizita edhe nga shtete të tjera evropiane dhe më gjerë.

Dhjetori 2025 e mbylli vitin me bilanc pozitiv për sektorin e turizmit dhe hotelerisë në Kosovë. Kombinimi i vizitorëve vendorë dhe atyre të huaj dëshmon një interes të shtuar për vendin, ndërsa trendi i rritjes pritet të vazhdojë edhe gjatë vitit 2026.

Gjatë ditës edhe e përditshmja britanike The Guardian i ka kushtuar një artikull vendeve që duhet vizituar gjatë vendit.

Në këtë artikull kanë arritur të renditen edhe Kosova e Shqipëria të cilat sipas medias britanike patjetër që duhet të vizitohen.

Librat e historisë ofrojnë kontekst thelbësor për ecje në këmbë në Kosovë, por nuk ju përgatisin për bukurinë e maleve, thuhet në artikull.

“Gjatë verës kalova një javë në Via Dinarica të Kosovës, e cila u ripërcaktua së fundmi. Ne ecëm pranë luleve të edelëeiss në kreshtën kufitare me Malin e Zi; e thepisur dhe e pjerrët nga njëra anë dhe e gjelbër e gjallë nga ana tjetër, duke zbritur drejt livadheve me lule të egra rozë dhe të verdha”, u tha ndër tjera..

Bletët fluturonin rreth shkëmbinjve të lartë, ndërsa bletëngrënësit me ngjyra të ndezura uleshin në degë më poshtë.

Kafshët e egra të humbura në pjesën më të madhe të Evropës ende lulëzojnë këtu (arinj, ujqër, rrëqebull) në një mozaik me pemë lisi dhe ahu, boronica dhe shkurre, lugina të thella dhe pllaja të larta.

Liqenet malore krijojnë vende ëndrrash për not nën majat e larta pranë Shqipërisë.

The post Shqipëria, Gjermania e Zvicra kryesojnë, brenda një muaji afro 70 mijë vizitorë në hotelet e Kosovës appeared first on Revista Monitor.

The post Pse po bie konsumi i pijeve alkoolike në botë appeared first on Revista Monitor.