Çmimet e karburanteve në pikat e furnizimit në vend kanë shënuar një ulje për naftën, benzinën dhe gazin.
Këtë të mërkurë nafta zbret në 199 lekë/litër
Nga fotografia e siguruar, në një pikë karburanti “Shell”, çmimet e afishuara janë: nafta FuelSave Diesel 199 lekë/litër, V-Power Diesel 222 lekë/litër, benzina FuelSave Unleaded 189 lekë/litër, V-Power Racing 215 lekë/litër, ndërsa gazi AutoGas LPG tregtohet me 69 lekë/litër./kb
Drejtori sportiv i Milanit, Igli Tare, ka përjetuar momente të pakëndshme gjatë një udhëtimi me tren në Itali, pasi u bë pre e një vjedhjeje.
Sipas mediave italiane, pasi mori pjesë në funeralin e ish-kapitenit historik të Milanit, të zhvilluar në Bazilikën e Sant’Ambrogio në Milano, Tare udhëtoi me tren drejt Romës.
Gjatë udhëtimit, çanta e ish-futbollistit shqiptar u vodh nga hapësira e dedikuar për bagazhet gjatë udhëtimit. Sapo mbërriti në stacionin “Roma Termini”, Tare iu drejtua Policisë Hekurudhore të Lazios për të denoncuar ngjarjen.
Sipas raportimeve policia identifikoi autorin e dyshuar vetëm pak minuta pas denoncimit. Ai u lokalizua dhe u vu në pranga, ndërsa çanta e vjedhur u sekuestrua dhe iu kthye Tares./kb
Në vijim të realizimit të punimeve për ndërtimin e objektit: “Zgjerimi i Superstradës Tiranë-Durrës (Faza III)”, është i nevojshëm zbatimi i Planit të Menaxhimit të Trafikut.
Më datë 6 dhe 7 gusht 2026, nga ora 00:00 deri në 04:30, do të kryhet montimi i trarëve metalikë të mbikalimit të ri të Kasharit, për zbatimin e këtyre punimeve, si dhe për sigurinë rrugore është i nevojshëm bllokimi i dy korsive të aksit kryesor në drejtimin Durrës-Tiranë.
Gjatë këtij intervali, trafiku që lëviz nga Durrësi në drejtim të Tiranës, Aeroportit “Nënë Tereza” dhe Kosovës do të devijohet në rampat e autostradës Thumanë-Kashar.
Mjetet me destinacion aeroportin dhe Kosovën do të vijojnë lëvizjen në autostradën Kashar-Thumanë, ndërsa automjetet me destinacion Tiranën do të orientohen me sinjalistikën e përkohshme në rrugën dytësore duke u rikthyer në autostradën Durrës–Tiranë pas mbikalimit të Kasharit./kb
Territori shqiptar përgjatë gjithë 24-orëshit do të jetë nën dominimin e kushteve të qëndrueshme atmosferike, ku në orët e para të mëngjesit dhe të mesditës parashikohet që kthjellimet të mbizotërojnë në të gjithë vendin tonë.
Sipas MeteoAlb, pjesa e dytë e ditës sjell kalime të lehta të vranësirave, të cilat më të dukshme do të jenë në skajin verilindor dhe juglindor të Shqipërisë. Pritet që vija bregdetare, edhe përgjatë pasdites, të dominohet kryesisht nga kthjellimet.
Temperaturat e ajrit do të vijojnë të rriten në vlerat minimale dhe maksimale, duke luhatur vlerat ditore nga 15°C, temperatura më e ulët e shënuar në zonën malore, deri në 40°C, vlera më e lartë në rang vendi.
Era do të fryjë mesatarisht me shpejtësi 35 km/h nga drejtimi kryesisht veriperëndimor. Kjo do të bëjë që në brigjet detare të krijohet dallgëzim 2 ballë./kb
Bashkimi Evropian tha të martën se nuk mund të ketë më lëvizje të mëtejshme nga enklava spanjolle e Afrikës Veriore, Ceuta, pasi migrantët që kanë kaluar në territor janë kthyer në Marok.
Duke folur pas një videokonference emergjente të ministrave të brendshëm të BE-së, Komisioneri Evropian për Punët e Brendshme dhe Migracionin, Magnus Brunner, tha se Spanja kishte konfirmuar se situata në Ceuta – një enklavë në bregdetin e Afrikës së Veriut, në kufi me Marokun – është nën kontroll dhe se zona Shengen nuk ishte prekur.
“Sapo kemi përfunduar takimin tonë të Ministrave të Brendshëm mbi ngjarjet e javës së kaluar në Seuta dhe, sigurisht, pati solidaritet të plotë me Spanjën. Takimi, mendoj, ishte gjithashtu një mundësi shumë e dobishme për të sqaruar faktet në terren. Ministri i Brendshëm spanjoll konfirmoi se situata është nën kontroll, se askush nuk është zhvendosur në Spanjën kontinentale dhe se zona Shengen nuk është prekur.”
Brunner tha se ministrat e brendshëm shprehën “solidaritet të plotë me Spanjën” gjatë takimit dhe mirëpritën reagimin e shpejtë të autoriteteve spanjolle për të kontrolluar situatën në kufirin e jashtëm të BE-së. Komisioneri tha se ngjarjet e fundit demonstruan rëndësinë e zbatimit të plotë të rregullave të reja të BE-së për migracionin dhe azilin, duke përfshirë kontrollin kufitar, procedurat e përshpejtuara të azilit dhe kthimet më të shpejta.
Ai gjithashtu përshkroi një plan me pesë pika të propozuar nga Presidentja e Komisionit të BE-së, Ursula von der Leyen, i cili përqendrohet në bashkëpunim më të fortë me vendet partnere, kthime më të shpejta, mbrojtje të përforcuar të kufijve të jashtëm, sisteme të përforcuara të paralajmërimit të hershëm për të luftuar dezinformimin dhe përpjekje të intensifikuara kundër rrjeteve të kontrabandës së migrantëve. Por ai foli edhe për qendrat e kthimit në vendet e treta.
“Po, le të përqendrohemi te qendrat e kthimit. Kjo është legjitime dhe është detyrë e shteteve anëtare ta bëjnë këtë, atyre që duan ta bëjnë. Por të përqendrohemi edhe te koncepti i vendit të tretë të sigurt, që do të thotë se procedura e azilit mund të bëhet jashtë Bashkimit Evropian, aty ku koncepti i vendit të tretë të sigurt e lejon këtë. Pra, po, të dyja qendrat e kthimit, por edhe procedurat e azilit jashtë Bashkimit Evropian u përmendën nga disa shtete anëtare, po.”
Brunner tha se BE po vazhdon negociatat me Marokun për një marrëveshje gjithëpërfshirëse partneriteti, duke theksuar se migracioni mbetet një element qendror i bisedimeve. Ai hodhi poshtë sugjerimet se negociatat ishin të lidhura me zhvillimet e fundit në Ceuta, duke thënë se autoritetet në vend të kësaj kishin identifikuar rrjetet kriminale të kontrabandës dhe dezinformimin online si nxitësit kryesorë pas kalimeve. /kb
FIFA në krizë, Infantino thërret mbledhje urgjente mes presionit
Kriza brenda FIFA-s po thellohet. Presidenti Gianni Infantino ka thirrur një mbledhje urgjente me stafin drejtues të organizatës në Rabat të mërkurën, ndërsa presioni ndaj tij është rritur ndjeshëm pas polemikave për projektin “FIFA Forward Enterprise”.
Mbledhja do të zhvillohet me pjesëmarrjen e sekretarit të përgjithshëm Mattias Grafstrom dhe drejtuesve kryesorë të FIFA-s, në një përpjekje për të menaxhuar situatën e krijuar pas tërheqjes së planit për përfshirjen e investitorëve privatë në një kompani që do të menaxhonte aspektet komerciale të turneve të FIFA-s.
Projekti, i cili parashikonte shitjen e rreth 20% të kompanisë së re ndaj investitorëve privatë, u kundërshtua fuqishëm nga UEFA, CONCACAF dhe Konfederata Aziatike e Futbollit. UEFA madje kërcënoi me bojkot të kompeticioneve të FIFA-s nëse plani nuk tërhiqej. Pas anulimit të projektit, UEFA deklaroi se ka “humbur besimin” te Gianni Infantino, ndërsa disa federata kanë tërhequr mbështetjen për presidentin e FIFA-s.
Ndërkohë, disa anëtarë të Këshillit të FIFA-s po kërkojnë mbështetjen e 19 votave për të thirrur një takim ku Infantino të japë shpjegime për këtë çështje dhe për menaxhimin e rasteve të fundit, përfshirë edhe çështjen e Folarin Balogun.
Ish-trajneri i Arsenalit dhe drejtuesi i zhvillimit global të futbollit në FIFA, Arsene Wenger, i cili ishte kritikuar për heshtjen e tij, reagoi duke sqaruar se nuk kishte qenë pjesë e këtij projekti. “Besoj fuqimisht në një FIFA të pavarur që i shërben futbollit me përkushtim, transparencë dhe integritet”, deklaroi Wenger, duke e cilësuar tërheqjen e planit si një vendim “të domosdoshëm”.
Situata komplikohet edhe më shumë pas dorëheqjes së këshilltarit të tij të lartë Carlos Cordeiro dhe deklaratave të shefit operativ të FIFA-s, Kevin Lamour, i cili tha se stafi ishte “mashtruar” gjatë procesit.
Ndërkohë, beteja politike brenda FIFA-s pritet të varet nga qëndrimi i federatave aziatike. Disa vende si Katari dhe Emiratet e Bashkuara kanë dalë në mbështetje të Infantinos, ndërsa presidenti i federatës së Jordanisë, Princi Ali Bin Al Hussein, e ka akuzuar FIFA-n për presion dhe “shantazh”. FIFA ndodhet përpara një prej krizave më të mëdha të viteve të fundit dhe e ardhmja politike e Gianni Infantinos duket më e pasigurt se kurrë./kb
Ministri gjerman i Mbrojtjes, Boris Pistorius, pa dashje zbuloi se obusët vetëlëvizës me rrota RCH-155, shumë të përparuar të Gjermanisë, tashmë janë dorëzuar në Ukrainë. Kwshtu raportoi Bild më 4 gusht.
Duke folur gjatë një vizite në uzinën e prodhimit të mbrojtjes në Kassel, Pistorius vuri në dukje se sistemi “po merr miratim të madh në Ukrainë”, duke shënuar treguesin e parë të nivelit të lartë se pjesët e artilerisë të premtuara prej kohësh janë tashmë brenda vendit.
Pistorius shtoi se vendi ku po qëndronin të pranishmit ishte vendi ku ishte vendosur obusi i parë i dërguar në Ukrainë afërsisht dy vjet më parë, duke konfirmuar në mënyrë efektive transferimin pavarësisht asnjë njoftimi zyrtar paraprak, shkroi Bild.
Mbërritja e RCH-155 përfaqëson një përparim të madh teknologjik për operacionet ukrainase në vijën e frontit. I konsideruar si një nga sistemet më të sofistikuara të artilerisë në botë, RCH-155 është obusi i parë i aftë të qëllojë ndërsa është në lëvizje dhe të lëvizë me shpejtësi që arrijnë mbi 100 km/orë.
I pajisur me një kullë plotësisht të automatizuar, një shpejtësi qitjeje deri në nëntë fishekë në minutë dhe një rreze veprimi që tejkalon 50 kilometra, sistemi kërkon një ekuipazh prej vetëm dy personash. Lëvizshmëria e tij gjatë kryerjes së misioneve të zjarrit siguron mbrojtje kritike kundër mbikëqyrjes armiqësore nga dronë dhe kundërzjarrit të baterive krahasuar me sistemet stacionare të artilerisë si Panzerhaubitze 2000.
Ndërsa kanalet zyrtare të mbrojtjes nuk e kanë konfirmuar zyrtarisht nëse obusët kanë marrë pjesë në luftime aktive, Ukraina është planifikuar të marrë një total prej 54 njësish RCH-155 nga Gjermania – një grup i mjaftueshëm për të pajisur tre batalione të plota artilerie, raportoi Bild.
Mbështetja gjermane për Ukrainën shtrihet edhe në infrastrukturën kritike mjekësore në vijën e parë, me Berlinin që kohët e fundit ka siguruar 149 stacione mjekësore të lëvizshme të modeluara sipas njësive të vendosura tashmë nga mjekët luftarakë ukrainas./kb
Një aksident i rëndë rrugor me pasojë vdekjen e një 27-vjeçari është regjistruar në aksin kombëtar Korçë–Maliq, pranë fshatit Vashtëmi.
Sipas informacioneve paraprake, një automjet tip “Audi”, që dyshohet se po lëvizte me shpejtësi të lartë, ka goditur nga pas një automjet tjetër. Si pasojë e përplasjes së fortë, automjeti i goditur ka dalë nga rruga.
Drejtuesi i automjetit të goditur, një 27-vjeçar që udhëtonte i vetëm, ka ndërruar jetë në vendngjarje për shkak të plagëve të marra.
Drejtuesi i automjetit “Audi” është shoqëruar në polici, ndërsa grupi hetimor po punon për të zbardhur shkaqet dhe rrethanat e aksidentit të rëndë.
Rreth orës 01:00, në aksin rrugor Korçë–Pogradec, në afërsi të fshatit Vloçisht, automjeti tip “Benz”, me drejtues shtetasin O. P., 26 vjeç, është përplasur me automjetin tip “Audi”, me drejtues shtetasin K. C., 27 vjeç.
Si pasojë e përplasjes, ka humbur jetën në vendngjarje drejtuesi i automjetit tip “Benz”, shtetasi O. P.
Gjithashtu, janë dëmtuar drejtuesi i automjetit tip “Audi”, shtetasi K. C., si dhe një pasagjer që udhëtonte në këtë automjet. Të dy po marrin mjekim në spital dhe janë jashtë rrezikut për jetën.
Grupi hetimor po punon për zbardhjen e plotë të rrethanave dhe përcaktimin e shkakut të aksidentit./kb
Biznesmeni Behgjet Pacolli ka reaguar pas lajmërimit të Ministrisë së Infrastrukturës për zgjidhjen e kontratës për Aeroportin e Vlorës.
Pacolli bën me dije se kompania MABCO nuk është lajmëruar për zgjidhjen e kontratës.
Biznesmeni thekson se është e papranueshme që investitori të informohet nga mediat dhe jo nga institucionet shtetërore.
Pacolli nënvizon se nëse lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar.
Biznesmeni deklaron se nuk është një kërcënim por pasojë juridike e veprimeve joligjore dhe mosveprimeve të papërgjegjshme të përfaqesuesve të institucioneve shtetërore.
Deklarata e Behgjet Pacollit
Aeroporti i Vlorës
Sot Ministria e Infrastrukturës dhe Energjisë ka nisur procedurën për zgjidhjen e Kontratës së Koncesionit të Aeroportit Ndërkombëtar të Vlorës. Deri në këtë moment, MABCO Constructions SA nuk ka marrë asnjë njoftim zyrtar nga Autoriteti Kontraktor. Për një investim strategjik me rëndësi kombëtare, është e papranueshme që investitori të informohet nga mediat dhe jo nga institucionet shtetërore.
Nëse ky lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar.
MABCO ka bërë çdo përpjekje për ta shmangur këtë skenar dhe për të gjetur një zgjidhje institucionale. Fatkeqësisht, përballë papërgjegjshmërisë, heshtjes dhe veprimeve të paligjshme të disa përfaqësuesve shtetërorë, çdo mundësi për zgjidhje është mbyllur.
Ky arbitrazh do të jetë pasojë e drejtpërdrejtë e neglizhencës, veprimeve të kundërligjshme dhe papërgjegjshmërisë së disa përfaqësuesve të institucioneve shtetërore, e veprimeve të elementëve që, nën mbulesën e institucioneve, kanë vepruar jashtë ligjit, si dhe e dështimit të një sistemi drejtësie të ndikuar për të garantuar zbatimin e ligjit dhe mbrojtjen e të drejtave të investitorit.
Nuk kam dëshiruar kurrë që taksapaguesit shqiptarë të paguajnë faturën e neglizhencës, papërgjegjshmërisë dhe vendimeve të paligjshme të zyrtarëve që sot vazhdojnë të sillen me indiferencë, sepse ata nuk mbajnë asnjë përgjegjësi personale. Dëmin nuk e paguajnë ata, por qytetarët shqiptarë dhe biznesi.
MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Kompania kishte përfunduar pothuajse të gjitha detyrimet kontraktore dhe ndodhej vetëm pak para fazës së certifikimit të aeroportit.
Megjithatë, pas vendimit të Gjykatës së Lartë, grupe që veprojnë në mënyrë arbitrare dhe jashtë ligjit, me mbështetje ose tolerim institucional, penguan MABCO-n të hynte në kantier dhe të përfundonte projektin. Për muaj të tërë, në prani të Policisë së Shtetit, investitori u mbajt jashtë pronës së tij, ndërsa pajisje me vlerë u dëmtuan, u shkatërruan dhe një pjesë edhe u vodhën.
Paradoksi është i qartë: nga njëra anë institucionet penguan përfundimin e projektit, ndërsa nga ana tjetër kërkojnë ta përdorin këtë pengesë si arsye për zgjidhjen e kontratës.
Kjo bie ndesh me vendimin e Gjykatës së Lartë, me Kontratën e Koncesionit, me Marrëveshjen Dypalëshe për Mbrojtjen e Investimeve ndërmjet Zvicrës dhe Shqipërisë dhe me parimin universal të së drejtës se askush nuk mund të përfitojë nga sjellja e vet e paligjshme.
Nëse procedura konfirmohet, MABCO do të mbrojë të drejtat e saj me të gjitha mjetet juridike, përfshirë provat dhe faktet qe posedon kunder seicilit qe ka shkaktuar këtë skandal të turpshëm e deri të ARBITRAZHI tregtar ndërkombëtar kundër Republikës së Shqipërisë.
Ky nuk është një kërcënim. Është pasoja juridike e veprimeve joligjore dhe mosveprimeve të papërgjegjshme të përfaqesuesve të institucioneve shtetërore./kb
Shërbimi sekret britanik MI6 është vlerësuar si agjencia më e fuqishme e inteligjencës së jashtme në Evropë, sipas një renditjeje të realizuar nga revista franceze “L’Express”, bazuar në opinionet e 60 profesionistëve të inteligjencës nga 25 vende.
Sipas këtij vlerësimi, MI6 kryeson për aftësinë në rekrutimin e spiunëve të nivelit të lartë dhe depërtimin në qarqet politike të vendeve si Rusia, Kina, Irani dhe Turqia.
“Mbretëria e Bashkuar ka shërbimet sekrete më të forta në Evropë. MI6 është e jashtëzakonshme”, deklaroi Robert Gorelick, ish-shef stacioni i CIA-s.
Sipas raportimit të “The Times”, në vendin e dytë u rendit Drejtoria e Përgjithshme për Sigurinë e Jashtme e Francës (DGSE), e cila u vlerësua për shtrirjen globale, operacionet klandestine dhe luftën kundër terrorizmit.
Një zyrtar polak i inteligjencës tha se shërbimi francez arrin të kombinojë inteligjencën njerëzore, mbledhjen e të dhënave teknike dhe aftësitë operacionale në terren.
Në vendin e tretë u rendit shërbimi holandez AIVD, ndërsa Ukraina u pozicionua e katërta, duke marrë vlerësime për inovacionin dhe operacionet e zhvilluara që prej nisjes së pushtimit rus në vitin 2022.
Shërbimi gjerman i inteligjencës BND u rendit i pesti. Ai u vlerësua për analizën strategjike, por mori më pak pikë për aftësitë operacionale jashtë vendit.
Në fund të renditjes u pozicionua shërbimi sekret i Sllovakisë, i cili u cilësua si më i dobëti në Evropë.
Sipas raportit, MI6 ka fituar vlerësim të veçantë edhe për rolin e tij në paralajmërimin e hershëm të Ukrainës për pushtimin rus, si dhe për aftësinë për të zhvilluar operacione afatgjata të inteligjencës./kb
Ata qe janë ne një lidhje do tregohen realiste dhe gjithçka do ju ece si duhet. Emocionet gjithashtu do jene te njëpasnjëshme. Beqaret me ne fund do e gjejnë personin qe do ju përshtatet me mire dhe do fillojnë lidhje shume te këndshme. Ekuilibri do mbizotërojë gjate gjithë ditës ne planin financiar. Nuk do keni asnjë problem për te kryer shpenzimet e dëshiruara.
Demi
Duhet t’i shtoni dozat e imagjinatës sot juve qe jeni ne një lidhje dhe te provoni eksperienca te reja ne çift. Vetëm ne këtë mënyrë rutina do marre fund. Beqaret do ndihen te lire te bëjnë atë qe duan dhe nuk do ndalen se pranuari ftesat qe do iu bëhen. Gjendja e financave do vije dalëngadalë duke u përmirësuar nëse ndiqni një strategji strikte.
Binjaket
Ata qe kane kohe qe janë ne një lidhje do kenë një dite te bukur sot. Çdo mosmarrëveshje e se kaluarës do kalohet sa hap e mbyll sytë. Beqaret do takohen me persona serioze dhe do mendojnë menjëherë te kenë diçka me tepër me ta. Ne planin financiar yjet do ndikojnë pozitivisht dhe gjendja do vije dalëngadalë duke u përmirësuar.
Gaforrja
Mos luani me ndjenjat e partnerit tuaj gjate kësaj dite sepse ne një moment situate mund t’iu dale tërësisht jashtë kontrollit. Beqaret do ja kalojnë mire me miqtë e tyre te ngushte ose me familjaret dhe as qe do iu shkoje mendja ta ndryshojnë statusin. Ne panin financiar do ju duhet te bëni edhe sakrifica here pas here ne mënyrë qe gjendja te mbetet e mire.
Luani
Dite pasionante do jete kjo e sotmja për te gjithë ata qe janë ne një lidhje. Çdo çast do ketë veçantinë e vet dhe emocionet do vijnë duke u shtuar. Beqaret ka rrezik te bëjnë çmenduri vetëm për ta bere për vete personin qe kane ëndërruar. Parashikimit janë qe ata do ja dalin mbanë. Financat do kërkojnë shume mund dhe pune qe te arrijnë te stabilizohen.
Virgjeresha
Duhet te ndryshoni disa zakone te këqija sot juve qe jeni ne një lidhje ne mënyrë qe gjerat te ecin si duhet me partnerin. Beqaret do realizojnë një takim shume te bukur me një person qe mbart plot vlera. Gjithçka do jete me ndryshe për ta. Buxheti do jete gjithë gjithë kohës i stabilizuar. Nuk do keni asnjë vështirësi për te kryer çdo shpenzim qe do ju duhet.
Peshorja
Do keni goxha probleme sot ne jetën tuaj ne çift dhe mosmarrëveshjet duket sikur nuk do kenë te ndalur. Asgjë nuk do jete ashtu si e kishit ëndërruar. Beqaret do realizojnë disa takime vendimtare te cilat do ua ndryshojnë te ardhmen me shume nga sa mund ta imagjinojnë. Plutoni do ju sjelle fat ne planin financiar. Do përmbyllni me sukses një çështje dhe do merrni fitime.
Akrepi
Mos ngrini dyshime sot mbi partnerin tuaj dhe mos thoni gjera te cilat mund ta lëndojnë, Pa qene te sigurte nuk duhet ndërmarrë asnjë veprim. Beqaret do jene shume te shpërqendruar dhe as vete nuk do e dine se çfarë do duan te bëjnë. Ne planin financiar duhet te tregoheni sa me te matur sepse situata mund t’iu dale shume shpejt jashtë kontrollit.
Shigjetari
Do jeni shume te hapur sot juve qe jeni ne një lidhje dhe do provoni eksperienca te reja. Rendësi ka qe çdo moment do jete i veçante. Beqaret do preferojnë aventura kalimtare dhe jo lidhje te qëndrueshme. Mundësitë për këtë janë te pafundme. Konfigurimi i yjeve do jete pozitiv për sektorin e financave. Nuk do keni me problemet qe keni pasur me herët dhe do jeni te qete.
Bricjapi
Do jeni ne humor shume te mire gjate gjithë kësaj dite dhe gjerat kane për t’iu ecur ashtu si keni ëndërruar. Yjet do jene ne çdo moment pranë jush. Beqaret do vrapojnë pa menduar drejt një rruge te panjohur dhe ka rrezik te bëjnë disa gabime. Ne planin financiar duhet te mos abuzoni me shpenzimet sepse situata do ju dale jashtë kontrollit ne momentin qe me pak e prisni.
Ujori
Ndikimi i Venusit do jete shume pozitiv gjate kësaj dite ne jetën tuaj ne çift. Do tregoheni tolerante dhe te kuptueshëm prandaj do i zgjidhni shpejt te gjitha pengesat qe do ju dalin. Beqaret do bien ne dashuri me një mik fëmijërie dhe do ndihen te lumtur për këtë. Për financat mos u shqetësoni aspak sepse çdo gjë do ece ashtu si ju e keni menduar.
Peshqit
Nuk do ndiheni te kënaqur sot juve qe jeni ne një lidhje dhe ka rrezik ta kërkoni lumturinë diku tjetër. Po bëtë hapa te gabuara do pendoheni për gjithë jetën dhe do vuani tej mase. Beqaret do kenë një dite shume te paqëndrueshme dhe nuk do kenë aspak kohe te dalin me persona te rinj. Ne planin financiar duhen marra masa te rrepta sepse përndryshe situata mund te dale tërësisht jashtë kontrollit./kb
Flasim gjithë ditën për humanizmin. Madje edhe natën nuk e kursejmë. Është bërë biseda jonë thelbësore, jetësore, dhe mbi të gjitha populiste.
Po çfarë do të thotë “human”?
Fjala vjen nga latinishtja humanus – që i përket njeriut, i civilizuar, i dhembshur, i mëshirshëm. Aha, tani na u mbush mendja.
Se për të nxjerrë citate nga enciklopeditë dhe për të rreshtuar thënie të shkëputura nga autorë botërorë, jemi kampionë. Ka mijëra faqe që në pikë të mëngjesit të ofrojnë një shprehje të koncentruar mbi humanizmin. Që edhe po e harrove, ta kujtojnë.
Por sa human është në të vërtetë qenia më inteligjente në tokë, kur në 3500 vitet e fundit të historisë së dokumentuar, raporti i luftës ndaj paqes është dërrmues? Thuhet se vetëm rreth 250 vite kanë qenë pa luftë. Pjesa tjetër është gjak, tym dhe rrënoja.
Atëherë, cila shprehje vlen më shumë? Ajo e enciklopedisë, apo ajo tjetra, e vjetra: Homo homini lupus – njeriu për njeriun ujk? Domethënë kafshë.
Ha debat, se ia vlen të sillesh pak vërdallë nëpër togfjalësha, qofshin të kuptueshëm apo të papërceptueshëm.
Në këtë fillim mijëvjeçari, ku përparimi teknologjik ka tejkaluar çdo imagjinatë, pyetja që mbetet pezull është e thjeshtë dhe brutale: a ka përparuar me të njëjtin ritëm edhe shpirti i njeriut?
Historia nuk jep shumë shpresa.
Nëse do ta shihnim historinë si një film të gjatë kronologjik, ngjyrat e errëta të luftës dhe shkatërrimit do të mbulonin pamëshirshëm dritën e zbehtë të paqes. Çfarë humanizmi është ai që zgjedh konfliktin mbi bashkëjetesën, shkatërrimin mbi ndërtimin, armën mbi fjalën?
Filozofia e ka ngritur me kohë këtë dilemë. Thomas Hobbes, duke parë egërsinë e kohës së tij, nuk e gjeti metaforën te njeriu, por te ujku. Dhe kishte të drejtë. Kafsha lufton për mbijetesë. Njeriu lufton për ide, për territore, për besime, për pushtet, madje edhe për krenari boshe. Në emër të tyre ka djegur qytete, ka skllavëruar kombe dhe e ka bërë tokën të qajë.
Edhe feja, që predikon dashurinë, është përdorur si pretekst për masakër. Kryqëzatat, luftërat fetare në Europë, inkuizicioni, terrorizmi modern – të gjitha në emër të një Zoti që predikon paqen.
Hajde qyfyre, hajde.
Ironia bëhet edhe më therëse kur sheh shkencën. Gjithçka që mund të shërbente për jetën, vihet menjëherë në shërbim të vdekjes. Fizika bërthamore, raketat balistike, inteligjenca artificiale – gjejnë zbatim të parë në industrinë e luftës. Vetë “Projekti Manhattan” është dëshmia më e hidhur. “Unë jam bërë Vdekja, shkatërruesja e botëve”, tha Oppenheimer, babai i bombës atomike, duke cituar Bhagavad Gita-n, sapo pa dritën e parë të apokalipsit që kishte krijuar.
Po atëherë, a duhet ta përkufizojmë njeriun vetëm përmes dhunës?
Jo plotësisht.
Brenda tij ka një dualitet të përhershëm: drita dhe errësira. E njëjta dorë që hodhi bombën në Hiroshima u ngrit për të ndihmuar të mbijetuarit. E njëjta mendje që shpiku armët biologjike, shpiku edhe vaksinat. Historia njeh edhe anën tjetër: njerëz që flijuan jetën për të tjerët, që sfiduan diktaturat për dinjitet, që ngritën qytete nga hiri.
Pra, a është njeriu human? Në shqipen e pastër pyetja shtrohet më drejt: A është njeriu njeri?
Humanizmi nuk është trashëgimi biologjike e garantuar. Është zgjedhje. Dhe këtu qëndron barra e rëndë e përgjegjësisë sonë kolektive. Nëse e lëmë instinktin të mposhtë arsyen, historia do të rrotullohet si një rreth vicioz. Nëse ushqejmë vetëdijen, edukimin dhe ndjeshmërinë ndaj tjetrit, atëherë mund ta këpusim këtë zinxhir gjaku që përshkon shekujt.
Sot nuk kemi më alibi për barbarinë. Në një botë ku informacioni qarkullon me shpejtësinë e dritës dhe ndërgjegjja globale është më e zgjuar se kurrë, paqja nuk është më utopi, por domosdoshmëri. Luftërat moderne nuk kanë fitimtarë. Të gjithë humbasin. Prandaj filozofia e re thotë: e vetmja mënyrë për të fituar betejën, është ta shmangësh atë.
Ndaj pyetja nuk është më nëse njeriu është human.
Pyetja është nëse njeriu do të jetë human.
Sepse historia ka provuar se ai di të jetë të dyja: ujk për tjetrin dhe dritë në errësirë. Dhe ndoshta, në fund të fundit, nuk ka aq rëndësi nëse dje ka qenë ujk. Rëndësi ka nëse nesër do të zgjedhë të jetë njeri.
Izraeli ka ashpërsuar rregullat për kryerjen e sulmeve ndaj anëtarëve të Hamasit në Rripin e Gazës, raportuan sot mediet izraelite.
Sipas gazetës “Haaretz”, shefi i Shtabit të Përgjithshëm të ushtrisë izraelite, Eyal Zamir, duhet të japë miratimin paraprak, për çdo sulm ndaj anëtarëve të Hamasit, përveç rasteve kur ushtarët përballen me një kërcënim të menjëhershëm.
Raporti thekson se udhëheqja politike e Izraelit ka ndryshuar udhëzimet përkatëse.
Më herët, miratimi i disa komandantëve ishte i mjaftueshëm për autorizimin e sulmeve.
Sipas “The Times of Israel”, si pasojë e këtyre rregullave të reja, numri i sulmeve në Rripin e Gazës ka rënë ditët e fundit.
Ndërkohë, një plan i hartuar nga Bordi i Paqes i udhëhequr nga Shtetet e Bashkuara të Amerikës, parashikon ndërprerjen e plotë të sulmeve izraelite në Rripin e Gazës, si edhe dorëzimin e armëve nga Hamasi dhe grupet e tjera të armatosura.
Ky bord u krijua nga presidenti amerikan Donald Trump dhe ka për detyrë të mbikëqyrë rindërtimin e Rripit të Gazës dhe vendosjen e rendit pas luftës në territorin palestinez.
Egjipti, Katari dhe Turqia, që ndërmjetësojnë në konflikt, kanë dënuar së fundmi sulmet izraelite në zonën e shkatërruar nga lufta.
Megjithëse armëpushimi në luftën e Gazës është zyrtarisht në fuqi që nga tetori i vitit 2025, përplasjet vdekjeprurëse dhe sulmet vazhdojnë.
Javët e fundit, ushtria izraelite ka vrarë vazhdimisht persona të dyshuar si anëtarë të Hamasit dhe të organizatës Xhihadi Islamik Palestinez/mxh
Një pjesë e një rakete Falcon 9 të kompanisë SpaceX pritet të përplaset me Hënën të mërkurën, në një ngjarje të rrallë që ka tërhequr vëmendjen e astronomëve në mbarë botën.
Sipas Qendrës së NASA-s për Studime të Objekteve Pranë Tokës (CNEOS), faza e sipërme e raketës do të godasë sipërfaqen hënore më 5 gusht, pasi ka udhëtuar me një shpejtësi prej rreth 2.43 kilometrash në sekondë, ose rreth 5.400 milje në orë.
NASA arriti në këtë përfundim pasi astronomë të pavarur analizuan të dhëna publike dhe zbuluan se një pjesë e raketës, e lëshuar në janar të vitit 2025, ndodhej në një trajektore të pakontrolluar drejt Hënës.
Agjencia amerikane e hapësirës ka bërë të ditur se përplasja nuk paraqet asnjë rrezik për Tokën. NASA do të vijojë monitorimin e objektit dhe më pas do të studiojë vendin e impaktit për qëllime shkencore.
Raketa Falcon 9 u përdor në një mision amerikan-japonez për të transportuar dy anije uljeje hënore dhe pajisje kërkimore në sipërfaqen e Hënës. Ndërsa një pjesë e raketës është projektuar për t’u rikthyer në Tokë dhe për t’u ripërdorur, pjesë të tjera mbeten në hapësirë dhe mund të përfundojnë duke u përplasur me trupa të tjerë qiellorë.
Përplasja, e parashikuar rreth orës 02:35 sipas kohës lindore të SHBA-së (06:35 GMT), pritet të krijojë një re të madhe pluhuri hënor, e cila mund të ngrihet dhjetëra kilometra mbi sipërfaqen e Hënës.
Astronomi i Universitetit të Kembrixhit, Matt Bothwell, deklaroi se mungesa e atmosferës dhe graviteti më i dobët i Hënës do ta bëjnë impaktin shumë më spektakolar krahasuar me një përplasje të ngjashme në Tokë.
Sipas shkencëtarëve, mbeturinat e krijuara nga përplasja mund të arrijnë rreth një milion kilogramë dhe një pjesë e tyre mund të shpërndahet në hapësirë për shkak të kushteve të veçanta të sipërfaqes hënore./mxh
Kryeministri në detyrë dhe kryetar i Lëvizjes Vetëvendosje, Albin Kurti, ka deklaruar se takimi me kryetarin e Lidhjes Demokratike të Kosovës (LDK), Lumir Abdixhiku, është zhvilluar në një frymë konstruktive, por pa arritur një marrëveshje politike.
Pas më shumë se tri orë diskutimesh në Kuvend, Kurti tha se me drejtuesit e LDK-së kanë biseduar për situatën politike dhe institucionale në vend, sfidat me të cilat përballet Kosova dhe mundësitë për bashkëpunim në të ardhmen.
“Diskutuam shumë çështje të aktualitetit politik, të situatës institucionale dhe të sfidave që na presin. Ndajmë shumë brenga, por njëkohësisht ka edhe shumë vullnet e zell për të punuar bashkë në të ardhmen”, u shpreh Kurti.
Ai theksoi se takimet mes partive politike duhet të jenë pjesë normale e komunikimit politik dhe të shërbejnë për gjetjen e zgjidhjeve, pavarësisht dallimeve që ekzistojnë mes tyre.
Megjithatë, Kurti konfirmoi se me LDK-në nuk është arritur një marrëveshje konkrete.
“Lajm do të ishte po të kishim marrëveshje. Marrëveshje politike nuk kemi. Kemi diskutuar për qasje të ndryshme dhe mundësitë që i kemi përpara. Kemi nevojë për një marrëveshje politike që respekton rezultatin zgjedhor dhe e shndërron atë në stabilitet institucional”, deklaroi ai.
Kryeministri në detyrë paralajmëroi se në mungesë të një marrëveshjeje politike, Kosova mund të përballet me zgjedhje të reja, edhe pse sipas tij ky skenar nuk është i dëshirueshëm.
Duke folur për zgjedhjen e presidentit të Kosovës, Kurti bëri të ditur se gjatë takimit me LDK-në nuk janë diskutuar emra konkretë. Ai tha se synimi është gjetja e një kandidati gjithëpërfshirës, jashtë polemikave partiake, i cili do të kishte mbështetje të gjerë në Kuvend.
Kurti foli edhe për komunikimet me partitë e tjera politike. Ai kritikoi kryetarin e AAK-së, Ardian Gjini, duke thënë se, pavarësisht gatishmërisë së shprehur për takim, një takim mes tyre nuk është zhvilluar.
Ndërkohë, kryetari i Vetëvendosjes shtoi se mbetet i gatshëm të takohet edhe me kryetarin e PDK-së, Bedri Hamza, për të diskutuar mënyrat e tejkalimit të situatës politike në vend./mxh
Pesë të rinj të ardhur nga Tirana dhe Kavaja janë arrestuar në fshatin Gjashtë të Sarandës, pasi u kapën me dy pistoleta, municion dhe një silenciator.
Operacioni policor u kodua “Silenciatori”, pasi sipas bluve, grupi dyshohet se po përgatitej për kryerjen e një atentati.
Dy personat kryesorë të arrestuar janë Sidorel Moriseni, 32 vjeç, banues në Tiranë, dhe Alfred Kaja, 26 vjeç, banues në Kavajë, të dy me precedentë penalë.
Sipas policisë, ata u kapën në flagrancë pranë një lokali, në momentin kur po nxirrnin nga automjeti dy armët e zjarrit, fishekët dhe silenciatorin.
Nga hetimet paraprake dyshohet se grupi kishte zënë pritë në një zonë pa ndriçim, duke pritur momentin e përshtatshëm për të kryer një vrasje.
Tre personat e tjerë, të dyshuar si shoqërues të tyre, u kapën në një automjet të dytë. Ata janë Vitrin Hoxha, 20 vjeç, banues në Kavajë, Vonis Poka, 31 vjeç, banues në Tiranë dhe Franko Bobja, 21 vjeç, banues në Kavajë.
Burime nga hetimi bëjnë me dije se të arrestuarit u kapën në një rrugicë pranë banesës së biznesmenit Rexhep Ismaili, i cili u vra më 7 maj në lokalin e tij në Qafë Gjashtë. Ngjarja tronditi Sarandën.
Ismaili, i cili ishte edhe kryetar i Shoqatës “Çamëria”, u ekzekutua me një plumb në kokë gjatë një përplasjeje me armë në lokalin e tij.
Nga hetimet rezultoi se ai nuk ishte objektivi i sulmit, por u vra pasi ndërhyri për të mbrojtur Viktor Rucin, një person me precedentë penalë.
Aktualisht, hetuesit po verifikojnë nëse prania e grupit në këtë zonë lidhet me ngjarjen e 7 majit apo nëse ka qenë një rastësi. Deri më tani, asnjë prej të arrestuarve nuk ka dhënë deklarime për objektivin e dyshuar./mxh
Katërmbëdhjetë vatra zjarri janë raportuar gjatë 12 orëve të fundit në territorin e vendit, ndërsa pesë prej tyre vijojnë të jenë aktive.
Për menaxhimin e situatës dhe ndërhyrjen në terren janë angazhuar 19 automjete zjarrfikëse, 182 forca operacionale, tre helikopterë dhe një avion i Forcës Ajrore.
Në Dajt të Tiranës vijon puna për shuarjen e zjarrit, ndërsa në fshatin Riban të Mallakastrës flakët vijojnë me intensitet të ulët në brendësi të masivit pyjor.
Ndërhyrja e koordinuar nga toka dhe ajri ka larguar rrezikun për zonat e banuara. Gjatë operacionit janë evakuuar përkohësisht 15 familje, ndërsa në mbështetje të aksionit janë angazhuar një helikopter dhe një avion i Forcës Ajrore.
Në fshatin Shqiponjë të Prrenjasit, vatra e zjarrit është vendosur nën kontroll dhe vijon puna për shuarjen përfundimtare.
Nën kontroll janë edhe vatrat në Vërzhezhë të Skraparit dhe Krekëz të Himarës, ndërsa strukturat operacionale vijojnë monitorimin e situatës.
Në zonën Stegopull–Selckë, në territorin e bashkive Libohovë dhe Dropull, vijon puna për izolimin e zjarrit. Terreni malor dhe shkëmbor po vështirëson ndërhyrjen e forcave të angazhuara.
Nga vatrat e zjarrit janë prekur rreth 1.5 hektarë sipërfaqe me barishte, shkurre dhe bimësi pyjore, ndërsa sipërfaqja e dëmtuar nga vatrat aktive vijon të jetë në proces vlerësimi./mxh
Qytetet pritëse të Kupës së Botës FIFA 2026 në Shtetet e Bashkuara kanë kërkuar sqarime nga institucioni qeverisës i futbollit botëror lidhur me fondet prej 1 milion dollarësh për secilin qytet, të cilat ishin premtuar përpara zhvillimit të turneut.
Financimi ishte bërë i ditur nga presidenti i FIFA-s, Gianni Infantino, për 11 qytetet pritëse amerikane dhe synonte ndërtimin e fushave të vogla të futbollit, si dhe mbështetjen e projekteve sociale në komunitete.
Megjithatë, deri më tani fondet nuk janë transferuar, duke bërë që autoritetet lokale të kërkojnë një përditësim mbi statusin e financimit të premtuar nga FIFA.
Institucioni ndërkombëtar i futbollit nuk ka publikuar ende një deklaratë zyrtare për vonesën e pagesave, ndërsa raportimet bëjnë të ditur se qytetet pritëse janë siguruar vazhdimisht se kontributi prej 1 milion dollarësh do të shpërndahet.
Qytetet amerikane që pritën ndeshjet e Kupës së Botës 2026 ishin Seattle, zona e Gjirit të San Franciskos, Los Angeles, Dallas, Hjuston, Kansas City, Atlanta, Filadelfia, New York/New Jersey, Miami dhe Boston.
Ndërkohë, FIFA përfiton pjesën kryesore të të ardhurave nga biletat, të drejtat televizive, sponsorët dhe aktivitetet tregtare, ndërsa qytetet pritëse përballojnë një pjesë të konsiderueshme të kostove organizative, përfshirë sigurinë, transportin, operacionet në stadiume dhe zonat e tifozëve./mxh
Një ngjarje tronditëse është zbuluar në Mystras të Greqisë, ku një 55-vjeçar dyshohet se ka mbajtur trupin e pajetë të babait të tij 90-vjeçar në një frigorifer për rreth dy vjet e gjysmë, me qëllim që të vazhdonte të përfitonte pensionin e tij dhe atë të nënës së ndjerë.
Sipas hetimeve paraprake, nëna e 55-vjeçarit kishte ndërruar jetë më herët, ndërsa pensioni i saj përfitohej nga bashkëshorti, babai 90-vjeçar i të arrestuarit.
Rasti doli në dritë pasi autoritetet në Laconia morën informacion se 90-vjeçari, i lindur në vitin 1936, nuk ishte parë prej një kohe të gjatë.
Gjatë hetimeve, policia kontaktoi djalin e tij 55-vjeçar, i cili deklaroi se babai ishte larguar nga zona dhe jetonte në Athinë.
Megjithatë, pas verifikimeve, hetuesit kontaktuan motrën e 55-vjeçarit, e cila jeton në Athinë. Ajo u tha autoriteteve se nuk e kishte parë babanë prej vitesh dhe se ai jetonte me vëllain e saj.
Dyshimet çuan në një kontroll policor, në prani të prokurorit, në një hotel në pronësi të 55-vjeçarit, i cili ishte i mbyllur dhe përdorej prej tij si banesë.
Gjatë kontrollit në bodrumin e godinës, policia zbuloi trupin e 90-vjeçarit brenda një frigoriferi. Në ambientet e hotelit u gjet dhe u sekuestrua gjithashtu një armë me ajër.
55-vjeçari u arrestua dhe, gjatë marrjes në pyetje, dyshohet se pranoi ngjarjen. Ai deklaroi se babai kishte ndërruar jetë rreth dy vjet e gjysmë më parë nga shkaqe natyrore dhe se kishte fshehur trupin në frigorifer për të vazhduar të merrte pensionin e tij.
Sipas deklarimeve të tij, ai përfitonte edhe pensionin e nënës së ndjerë, i cili i kalonte babait si përfitues.
Në vendngjarje mbërritën një mjek ligjor dhe specialistë të Zyrës së Hetimit Penal të Spartës. Për trupin është urdhëruar kryerja e autopsisë, e cila pritet të përcaktojë shkaqet e sakta të vdekjes.
Ndaj 55-vjeçarit janë ngritur akuza për dëshmi të rreme, mashtrim të përsëritur dhe shkelje të legjislacionit për armët. Ai pritet të dalë para prokurorit, ndërsa hetimet nga autoritetet kompetente vijojnë./mxh
Login
