Teksa vendi ynë është përfshirë nga reshjet e dendura të shiut, prurjet në Kaskadën e Drinit kanë qenë të mëdha. Kjo ka bërë që të nisin shkarkimet e kontrolluara nga HEC Koman dhe HEC Vau i Dejës.

Ka qenë vetë Rama që ka postuar një video në rrjetin social ‘Facebook’, ndërsa shtoi se shkarkimet po monitorohen dhe menaxhohen nga specialistë të hidrocentraleve.

“Në kaskadën e Drinit si pasojë e rritjes së prurjeve, kanë nisur shkarkimet e kontrolluara, ku aktualisht po shkarkohet një sasi prej 700 m³/sekondë, përveç prodhimit, shkarkime këto të monitoruara dhe të menaxhuara nga specialistët e hidrocentraleve. Bashkia Shkodër është në koordinim të vazhdueshëm me KESH për menaxhimin e situatës dhe minimizimin e çdo rreziku të mundshëm për zonat e territorit të bashkisë, ndërsa deri në këto momente nuk është evidentuar asnjë problematikë.”, shkruan Rama./K.M

Papa Leone XIV ka mbyllur zyrtarisht Portën e Shenjtë të Bazilikës së Shën Pjetrit, duke shënuar përfundimin e Jubileut 2025, i dedikuar shpresës.

Porta e famshme ishte hapur nga Papa Françesku më 24 dhjetor 2024, duke nisur një vit ngjarjesh jubilarë dhe vizitash nga miliona pelegrinë nga e gjithë bota.

Sipas policisë së Romës, në sigurimin e ngjarjeve jubilarë janë angazhuar mbi 70,000 forca të rendit, duke përfshirë policinë, karabinierët, Gardën e Financës, policinë lokale, shërbimet e mbrojtjes civile dhe operatorët e transportit publik dhe urgjencës. Questori i Romës, Roberto Massucci, theksoi se përpjekja për sigurimin e ngjarjeve ishte rezultat i një koordinimi të gjerë institucional.

“Siguria e miliona pelegrinëve është rezultat i punës së bashkuar të të gjitha institucioneve – nga policia dhe karabinierët, deri tek shërbimet e emergjencës dhe transportit publik,” tha Massucci.

Gjatë Jubileut 2025, më shumë se 33 milionë pelegrinë kanë vizituar Romën, duke bërë të nevojshme një përkushtim të jashtëzakonshëm për menaxhimin e sigurisë dhe rendit.

Mbyllja e Portës së Shenjtë shënon një pikë kulmore të vitit jubilar dhe një moment simbolik për komunitetin katolik global, duke përmbyllur një cikël shprese dhe besimi./K.M

Reshjet e dendura të shiut që kanë rënë gjatë orëve të natës dhe orëve të para të mëngjesit të kësaj të marte kanë shkaktuar probleme të shumta në Durrës dhe Lezhë.

Po ashtu, si pasojë e situatës së krijuar nga reshjet, mësimi në disa shkolla në Durrës dhe Universitetin “Aleksandër Moisiu” është pezulluar.

Moti i keq i ditës së sotme ka përfshirë zona të shumta në këto dy qytete, duke krijuar vështirësi në qarkullim për banorët./Kb

Një bimë e zakonshme kacavjerrëse është shndërruar në burim të ardhurash për qindra gra dhe fermerë në Indi, ndërsa kërkesa globale për produkte natyrale po rritet.

Deri pak vite më parë, lulja “butterfly pea”, e njohur në Indi si “aparajita”, ishte thjesht një bimë zbukuruese në shumë fshatra të vendit. Sot, ajo po kthehet në një produkt me vlerë të lartë ekonomike, falë përdorimit të saj si çaj dhe si ngjyrues natyral ushqimor.

Nilam Brahma, nga një fshat në shtetin Assam, tregon se për herë të parë kuptoi potencialin ekonomik të lules rreth dy vjet më parë, kur pa gra të tjera që fitonin para nga shitja e saj. “Herën e parë fitova rreth 50 dollarë nga lulet e thara. Ajo përvojë më dha besim se mund të ndërtoja të ardhmen time,” thotë ajo.

Rritja e interesit për produkte natyrale dhe kufizimet ndaj ngjyruesve sintetikë në SHBA dhe Evropë kanë shtuar kërkesën globale për “butterfly pea”. Në vitin 2021, Administrata Amerikane e Ushqimit dhe Barnave (FDA) miratoi përdorimin e kësaj luleje si aditiv ushqimor, ndërsa në Evropë ajo ende klasifikohet si “ushqim i ri”, që kërkon autorizime shtesë.

Pavarësisht kufizimeve rregulluese, sipërmarrësit indianë po investojnë në zhvillimin e këtij sektori. Kompani si Blue Tea dhe THS Impex po punojnë drejtpërdrejt me fermerët për të përmirësuar cilësinë e prodhimit dhe për të krijuar zinxhirë të qëndrueshëm furnizimi, ku një rol kyç luajnë gratë rurale.

Sipas sipërmarrësve, sfidat kryesore mbeten mungesa e një tregu të strukturuar dhe standardeve të unifikuara të çmimeve. Megjithatë, numri i fermerëve të përfshirë është në rritje dhe të ardhurat po rriten ndjeshëm në zonat rurale.

Përveç vlerës ekonomike, studime të hershme sugjerojnë se çaji nga kjo lule mund të ketë përfitime shëndetësore, përfshirë përmirësimin e kontrollit të sheqerit në gjak, megjithëse ekspertët theksojnë se nevojiten kërkime të mëtejshme.

Shembulli i “butterfly pea” po shihet gjithnjë e më shumë si një model se si bujqësia tradicionale dhe sipërmarrja mund të ndërthuren për të krijuar mundësi të reja ekonomike në vendet në zhvillim./K.M

Gazeta prestigjioze Wall Street Journal ka zbuluar detaje të reja mbi ndërhyrjen e SHBA-ve në Venezuelë. Sipas burimeve, ka qenë pikërisht CIA ajo që i sugjeroi Presidentit Donald Trump të lejonte Delcy Rodriguez, zëvendëspresidenten, të merrte drejtimin e vendit pas kapjes së Nicolas Maduros.

Në një dokument konfidencial, CIA vlerësoi se për të ruajtur stabilitetin e menjëhershëm në Venezuelë, ishte e nevojshme që pushteti të mbetej në duart e njerëzve që ishin pjesë e sistemit aktual.

Arsyet kryesore të këtij sugjerimi ishin mbështetja e ushtrisë, rreziku i kaosit dhe rezistenca e armatosur.

Rodriguez dhe besnikët e tjerë të regjimit kanë kontroll mbi ushtrinë dhe elitat e vendit. Për këtë arsye, CIA paralajmëroi se udhëheqësit e opozitës, si Maria Machado dhe Edmundo Gonzalez, do ta kishin shumë të vështirë të kontrollonin vendin.

Sipas raportit, opozita do të përballej me rezistencë të fortë nga forcat e sigurisë dhe organizatat kriminale që mbështesin regjimin e vjetër.

Me pak fjalë, inteligjenca amerikane besonte se një kalim i menjëhershëm i pushtetit te opozita do të shkaktonte një luftë civile ose kaos të pakontrollueshëm, ndaj zgjodhi një “rrugë të mesme” me figura të njohura të regjimit./kb

Last Updated on 06/01/2026 by Klara

Në Ersekë u mbajt këtë të martë ceremonia e Ujit të Bekuar, një nga ritet më të rëndësishme të besimit të krishterë ortodoks.

Për shkak të kushteve të pafavorshme meteorologjike, ceremonia nuk u zhvillua në ambiente të hapura, por u mbajt brenda kishës së Shën Gjergjit në Ersekë.

Shërbesa u drejtua nga At Kristaq Tase, i cili bekoi ujin dhe besimtarët e pranishëm. Kryqi i bekuar këtë vit u mor nga 13-vjeçari Marko Dusho.

Pas përfundimit të ceremonisë, besimtarët morën ujë të bekuar për ta çuar në shtëpitë e tyre, si simbol i mbarësisë, paqes dhe bekimit për familjet gjatë vitit të ri./K.M

Për shkak të rreshjeve të dendura të shiut të mëngjesit të së martës, Policia e Shtetit njoftoi se është përmbytur një pjesë e aksit të rrugës interurbane Tiranë-Durrës, konkretisht në zonën pranë karburantit në hyrje të Durrësit.

Për shkak të pranisë së lartë të ujhit, në të dy anët e rrugës, është e pamundur të qarkullohet me makinë në këtë segment, shkruan A2 CNN.

Policia thotë se për të shmangur trafikun dhe aksidentet, Policia Rrugore njofton se do të devijohet lëvizja si më poshtë:

-Automjetet që vijnë nga jugu në drejtim të Tiranës, të qarkullojnë nga Rruga e Plepave për në Ndroq dhe nga rruga “Rrogozhinë–Elbasan–Tiranë”.

-Për në Durrës, kalimi do të bëhet nga rruga e universitetit, në drejtim të Spitallës dhe në rrugën “Tiranë–Elbasan–Rrogozhinë”.

“Policia apelon për drejtuesit e mjeteve që të shmangin lëvizjet e panevojshme, të tregojnë kujdes maksimal gjatë lëvizjes, të ndjekin udhëzimet e punonjësve të Policisë dhe të zbatojnë sinjalistikën rrugore. Shërbimet e Policisë Rrugore dhe Patrullat e Përgjithshme po marrin masa për lehtësimin e qarkullimit të mjeteve dhe për të ndihmuar drejtuesit e mjeteve”, tha policia./kb

Më 6 janar të vitit 1882, u lind Theofan Stilian Noli

Nga Leonard Veizi

Ai mbetet i rrallë dhe i pazëvendësueshëm. Një mendje brilante që i ushtroi dijet e mbledhura ngado në gjithfarë fushash. Dhe la mbi skrivaninë e tij një thesar të tërë, kryevepra botërore, që mbetën në përdorim mes shqiptarësh…

…Pakkush si ai mund të ishte njëherazi “hirësia e tij” dhe “shkëlqesi” po ashtu. Pakkush si ai mund të bënte meshtarin në Altarin e Kishës dhe polemikun në sallën e Parlamentit. Të ishte në krye të një partie politike si “shef opozite” dhe në krye të shtetit si ministër i jashtëm e kryeministër për së fundi. Vetëm ai mundi të vinte në pushtet me anë të një të ashtuquajturi “revolucion” dhe të largohej nga pallati qeveritar nën kërcënimin e armëve të një ushtrie të huaj, që kishte ardhur për të ngjitur në fron kundërshtarin e tij. Dhe po aq, vetëm një njeri si ai mund të firmoste gjithfarë udhëzimesh mbi jetën politike, ekonomike dhe ushtarake të vendit, dhe me po të njëjtën penë të vazhdonte të përkthente “Rubairat” e Omar Khajamit. Dhe ishte po ai që kur kërkonte të çlodhej sadopak nga punët e rënda të një shteti që kërkonte reformë thellësore, i binte flautit.

Ai ishte Fan Noli. Dhe emrin e babait e kishte Stilian. Kishte lindur në territorin turk, İbriktepe, por ishte shqiptar, nga Qyteza e Kolonjës. Të parët e tij e kishin ruajtur të pastër gjuhën dhe traditat shqiptare. I tillë ishte edhe ai. Pasardhës i Frashërllinjve, Qirjazëve dhe i vetë Petro Luarasit. Shqipja gurgullonte në gojën e tij. Nuk kish si shqiptohej më bukur.

Pra ishte një kolonjar i vërtetë.

Pakkush si ai mund të sillte në shqip monologun hamletjan të Shekspirit dhe bëmat e Don Kishotit me mullinjtë e erës shkruar nga Servantes. E pas kësaj të thurte vargje për Marathonomakun dhe një himn për flamurin kombëtar. Të shkruante “Historia e Skënderbeut”, dhe monografinë “Bet’hoveni dhe Revolucionin Francez”. Dhe së fundi të kompozonte një seri veprash simfonike, të pakonceptuara deri asokohe nga një shqiptar.

Po aq, pakkush si ai zotëronte 12 a 13 gjuhë të huaja, duke e pasuruar begraundin e tij studimor e akademik me pesë diploma të ndryshme.

Në luftën e tij të përhershme për të marrë sa më shumë njohuri, ai punoi në gjithfarë zanatesh pa u lodhur dhe u shkollua si një nxënës besnik pa u lodhur gjithashtu.

Pasi përfundoi me rezultate “ekselent” gjimnazin grek të Adrianopojës, në moshën 30-vjeçare do të merrte diplomën “Bachelor of Arts” në Harvard. Ishte 55-vjeç kur mbaroi studimet në Konservatorin e Nju Englandit të Bostonit, duke u diplomuar për kompozicion. Vetëm një vit më pas, diplomohet për Muzikologji në Konservatorin e Bostonit. Ndërsa në moshën 63-vjeçare, do të shpaloste me sukses në Universitetin e Bostonit studimin e tij monografik me temën “Gjergj Kastrioti – Skënderbeu”. Kjo do t’i jepte gradën shkencore të doktorit në filozofi.

Ishte i madh Noli, dhe i rëndë sigurisht. Aq sa një universitet e një diplomë nuk ia mbanin dot të gjithë peshën.

Dhe vetëm një njeri si ai mund t’i jepte pavarësinë Kishës Ortodokse Shqiptare duke e shkëputur nga çdo ndikim i huaj. Nuk ishte blasfemi, por dashuria për ta bërë kishën shqiptare, në një vend si Shqipëria, të fliste shqip.

Në të rinjtë e tij nuk i bëri naze asnjë lloj zanati, ndaj punoi si kopist, sufler e aktor me një trupë teatri shëtitës. Por energjia e tij do ta çonte drejt vendlindjes, në Shqipëri. Aty do t’i kushtohej revolucionarizimit të jetës, për më shumë përparim dhe pastrim nga e vjetra otomane. Por dhe këtu do të thyente dogmat e rregullat. Vetëm një njeri si ai mund të shugurohej si peshkop i Korçës dhe mitropolit i Durrësit në nëntor të vitit 1923, ndërsa vetëm një muaj më pas, në dhjetor 1923 do të zgjidhej deputet i Korçës.

Klerik dhe politikan në të njëjtën kohë.

Por me sa dukej për të nuk kish kurrfarë rëndësie, përderisa ishte në shërbim të Shqipërisë.

Natyrisht ai ishte një burrë shteti, që bëri që shumë për çështjen shqiptare, si brenda ashtu dhe jashtë vendit, me ndikimin e tij.

Padyshim Fan Noli mbetet një nga figurat më emblematike të intelektualizmit shqiptar. Publicist, intelektual, diplomat e orator, një personaliteti i spikatur që përbën një figurë komplekse, e cila vazhdon të analizohet në thellësi e të mos ketë shterim.

Me diplomë të Harvardit, poet, shqipërues, peshkop, deputet, ministër e kryeministër, emrin e të cilit në mos Akademia e Shkencave duhet ta mbante Universiteti i Tiranës. Por ky ka qenë një akord i paarritur. Ç’është e vërteta, në Korçë, Noli është i vlerësuar, ndaj emrin ia kanë vënë universitetit lokal. Por në Tiranë janë mjaftuar që emrin e tij ta mbajë një shkollë 9-vjeçare.

Dhe ky ishte një nga burrat më të ditur që ka pasur Shqipëria.

Me sa duket, regjimi i Hoxhës e kishte një inat me të. Ndërsa të tjerët pas tij as që u ra ndonjëherë ndërmend.

Në vitin 1924 Fan Noli u largua nga Shqipëria për në Amerikën e largët. Nuk u kthye dot më pas. Edhe pse u tha se me regjimin komunist i kishte marrëdhëniet të mira, ai nuk iu përgjigj ftesës së Enver Hoxhës për ta vizituar Shqipërinë. Dhe mbeti konsekuent: një demokrat në shpirt, larg diktaturës dhe pushtetit monarkik.

Mbeti një meshtar në tentativën e përhershme për të qenë më pranë Zotit.

Vdiq në marsin e vitit 1965. Ishte 83 vjeç. Sepse ishte lindur në janarin e vitit 1882. Banesa e tij e fundit ndodhet në “Forrest Hill Cemetery”, të Bostonit.

Last Updated on 06/01/2026 by Klara

Prej ditës së djeshme, si pasojë e rritjes së prurjeve në kaskadën e Drinit, kanë nisur shkarkimet e kontrolluara nga HEC Koman dhe HEC Vau i Dejës, me një sasi aktuale prej 700 m³/sekondë.

Komisioni i Emergjencave Civile i Qarkut është në koordinim të vazhdueshëm me KESH për monitorimin e situatës hidrike dhe, deri në këto momente, nuk është evidentuar asnjë problematikë shqetësuese.

Si pasojë e reshjeve të dendura, prurjet në përrenj dhe lumenj janë shtuar në sasi të konsiderueshme, por deri më tani nuk janë konstatuar probleme në kanalet e kullimit, argjinatura, KUL dhe digën e Rezervuarit të Shkodrës. Niveli i ujit në Urën e Vjetër të Bunës mbetet nën kuotën e rrezikut.

Lumenjtë Drin, Kir dhe Gjadër kanë shënuar rritje të prurjeve, por niveli i tyre është ende poshtë kuotave të rrezikut për përmbytje. Po ashtu, Rezervuari i Shkodrës ndodhet nën kuotat kritike.

Hidrovoret e Vilunit dhe Cas janë në funksion me nga pesë pompa secili dhe janë në gatishmëri për të punuar me kapacitet të plotë në rast nevoje./K.M

Last Updated on 06/01/2026 by Kesjana

Zyrtarë nga më shumë se 30 vende perëndimore të të ashtuquajturit “Koalicioni i të Gatshmëve”, që mbështesin Kievin në luftën e tij me Rusinë, do të takohen me presidentin ukrainas, Volodymyr Zelensky, ndërsa vazhdojnë të përsosin një propozim paqeje që synon t’i japë fund konfliktit më të madh dhe më vdekjeprurës në Evropë që nga Lufta e Dytë Botërore.

Në takimin e 6 janarit do të ketë gjithashtu një prani amerikane, me kryenegociatorët e presidentit Donald Trump, Steve Witkoff dhe Jared Kushner, të pranishëm në kryeqytetin francez, megjithëse sekretari i Shtetit, Marco Rubio, nuk ka gjasa të vijë, pavarësisht shpresave në disa kryeqytete evropiane se ai do të merrte pjesë gjithashtu.

Zyrtarë evropianë i thanë Radios Evropa e Lirë se ka “një ndjenjë të ripërtërirë urgjence” pas një takimi gjatë fundjavës të këshilltarëve për sigurinë kombëtare dhe një mbledhjeje të planifikuesve ushtarakë më 5 janar.

Ata shpresojnë se takimi në Paris do të sigurojë që Shtetet e Bashkuara, Ukraina dhe vendet e tjera evropiane “të jenë në të njëjtën linjë”.

Presidenti francez, Emmanuel Macron, tha se shpreson të paraqesë “angazhime konkrete” për sigurinë e Ukrainës pas bisedimeve. Ideja është që të ketë qartësi mbi përbërjen dhe dislokimin e një force paqeruajtëse në rast të një armëpushimi.

Disa zyrtarë thonë se shifra që qarkullon në disa kryeqytete evropiane është që forca të përbëhet nga 15 mijë deri në 20 mijë trupa, megjithëse disa shpresojnë që niveli të jetë më afër 30 mijë, duke vepruar nën moton “det, qiell dhe tokë të sigurta”.

Nuk janë zbuluar plane ushtarake, por pjesa më e madhe e trupave do të vinte nga Franca dhe Mbretëria e Bashkuar, të cilat do të udhëhiqnin komponentët tokësorë dhe ajrorë, ndërsa Turqia ka treguar se do të ishte përgjegjëse për sigurimin e korridoreve të transportit në Detin e Zi.

Megjithatë, ende nuk ka qartësi se sa afër vijës së kontaktit do të vendosej një forcë e mundshme e Koalicionit të të Gatshmëve. Shumica e zyrtarëve evropianë me të cilët ka qenë në kontakt REL-i besojnë se dislokimi i mundshëm do të bëhej në Ukrainën Perëndimore për të mbështetur dhe trajnuar trupat ukrainase.

Pyetje të pazgjidhura

Ndërsa kornizat e një pranie perëndimore në Ukrainë po marrin formë, ka ende disa pikëpyetje për t’u sqaruar, përfshirë rregullat e angazhimit dhe garancitë e sigurisë nga SHBA.

Një diplomat evropian pranoi se një çështje që ende nuk është zgjidhur është se si duhet reaguar ndaj një sulmi të mundshëm rus. “Në thelb ende po diskutojmë nëse do të kundërpërgjigjemi me zjarr apo do të largohemi”, tha ai.

Sa i përket garancive të sigurisë nga SHBA-ja, si Brukseli ashtu edhe Kievi po bëhen gjithnjë e më optimistë se Uashingtoni do të ofrojë “një mbështetje të fortë”, edhe pse ende nuk është e qartë saktësisht se çfarë forme do të marrë kjo.

Zyrtarë evropianë i thanë REL-it, në kushte anonimiteti, se mund të ketë trupa amerikane në terren në një rol jo-luftarak për të vëzhguar armëpushimin.

Por koalicioni gjithashtu shpreson që Uashingtoni të vazhdojë të ofrojë “mbështetje nga prapavija”, siç janë logjistika dhe inteligjenca.

Në nëntor 2025, Trump e shtyu Zelenskyn të pranonte një propozim paqeje me 28 pika, të cilin shumë e panë si dukshëm në favor të Rusisë.

Ukraina dhe aleatët e saj evropianë të udhëhequr nga Britania, Franca dhe Gjermania, u përpoqën me nguti të zhvillonin një kundërpropozim, duke paraqitur përfundimisht një plan me 20 pika që përfshinte më shumë interesat e Kievit, veçanërisht në lidhje me garancitë e sigurisë dhe integritetin territorial.

Në takimet e tij me evropianët, Zelensky ka të ngjarë të theksojë nevojën për garanci sigurie, nga Evropa, por edhe në bashkëpunim me sigurime të forta të dëshiruara nga Shtetet e Bashkuara.

Çështje të ndërlikuara

Kryenegociatori i Ukrainës, Ruslan Umerov, deklaroi së fundmi se “shumica e pozicioneve 90 për qind e planit të paqes, tashmë janë rënë dakord, dhe puna vazhdon mbi detajet”.

Këto detaje, që pritet të diskutohen në Paris, përfshijnë çështjen e ndërlikuar të lëshimeve territoriale, me Ukrainën që kërkon që vija e kontaktit të ngrihet ose që i gjithë rajoni i Donbasit të bëhet një zonë e çmilitarizuar.

Një çështje tjetër është pronësia e centralit bërthamor të Zaporizhias, me Kievin që hedh poshtë idenë e menaxhimit të përbashkët nga Ukraina dhe Rusia, duke preferuar që Shtetet e Bashkuara të ndërhyjnë për të shitur energjinë e tij në Moskë.

Megjithatë, pak njerëz në Bruksel mendojnë se Rusia do të pranonte ndonjë nga këto çështje, me vlerësimin se Kremlini ende mendon se po fiton në fushëbetejë.

Presidenti rus, Vladimir Putin, ka thënë disa herë javët e fundit se Moska do t’i arrijë qëllimet e asaj që e quan “operacion i posaçëm ushtarak”, qoftë përmes marrëveshjes apo forcës.

Me këtë në mendje, BE-ja po përgatit veçmas një rund të ri sanksionesh, të 20-in që nga pushtimi i plotë gati katër vjet më parë, i cili pritet t’u paraqitet shteteve anëtare për miratim më vonë gjatë janarit./REL/kb

Last Updated on 06/01/2026 by Kesjana

Një sulm nga Shtetet e Bashkuara ndaj një aleati të NATO-s do të nënkuptonte fundin si të aleancës ushtarake, si edhe të “sigurisë pas Luftës së Dytë Botërore”, ka paralajmëruar kryeministrja e Danimarkës, pasi Donald Trump kërcënoi sërish se do të merrte nën kontroll Groenlandën.

Pas operacionit ushtarak në Venezuelë, presidenti amerikan tha të dielën se SHBA-të kishin shumë nevojë për Groenlandën, duke ringjallur frikën për një pushtim amerikan të ishullit kryesisht autonom, i cili është një ish-koloni daneze dhe mbetet pjesë e mbretërisë së Danimarkës. Politika e jashtme dhe e sigurisë e Groenlandës vazhdon të kontrollohet nga Kopenhaga.

Mette Frederiksen, kryeministrja e Danimarkës, paralajmëroi të hënën se çdo sulm amerikan ndaj një aleati të NATO-s do të ishte fundi i “gjithçkaje”.

“Nëse Shtetet e Bashkuara vendosin të sulmojnë ushtarakisht një vend tjetër të NATO-s, atëherë gjithçka do të ndalet – përfshirë NATO-n dhe, rrjedhimisht, sigurinë pas Luftës së Dytë Botërore,” tha Frederiksen për rrjetin televiziv danez TV2.

Pozicioni strategjik i Groenlandës mes Europës dhe Amerikës së Veriut e bën atë një pikë kyçe për sistemin amerikan të mbrojtjes nga raketat balistike. Burimet e saj të rëndësishme minerare përputhen gjithashtu me ambicien e Uashingtonit për të reduktuar varësinë nga eksportet kineze.

Komentet e Frederiksen erdhën pasi kryeministri i Groenlandës, Jens-Frederik Nielsen, bëri një deklaratë jashtëzakonisht të drejtpërdrejtë, në të cilën i kërkoi Trumpit të hiqte dorë nga “fantazitë për aneksim” dhe akuzoi SHBA-të për retorikë “krejtësisht dhe plotësisht të papranueshme”, duke deklaruar: “Boll më”.

“Kërcënimet, presioni dhe fjalët për aneksim nuk kanë vend mes miqsh,” tha Nielsen në një postim në rrjetet sociale. “Kështu nuk i flitet një populli që ka treguar përgjegjësi, stabilitet dhe besnikëri herë pas here. Mjaft është mjaft. Asnjë presion më. Asnjë nënkuptim më. Asnjë fantazi më për aneksim.”

Duke folur më vonë në një konferencë për shtyp në kryeqytetin Nuuk, Nielsen u përpoq të qetësonte frikën për një marrje të menjëhershme të kontrollit nga SHBA-të.

“Nuk jemi në një situatë ku mendojmë se një marrje nën kontroll e vendit mund të ndodhë brenda natës,” tha Nielsen, duke folur përmes një përkthyesi. “Nuk mund ta krahasoni Groenlandën me Venezuelën. Ne jemi një vend demokratik”./kb

Udhëheqësja e opozitës venezueliane, Maria Corina Machado, duke folur për Fox News, tha se presidentja e përkohshme e Venezuelës, Delcy Rodriguez është një nga arkitektet kryesore të torturës, persekutimit, korrupsionit dhe trafikut të drogës në vend.

Rodriguez, e cila ka shprehur gatishmërinë e saj për të bashkëpunuar me Uashingtonin, ishte zëvendës presidente e Venezuelës kur Maduro ishte president, shkruan La Reppublica.

Machado pohoi se Rodriguez refuzohet nga populli venezuelian dhe se votuesit ishin në anën e opozitës.

“Në zgjedhje të lira dhe të ndershme, ne do të fitojmë me mbi 90% të votave, nuk kam asnjë dyshim për këtë”, theksoi Machado.

Machado është larguar nga vendi, pas persekutimit nga Nicolas Maduro. Në vitin 2025, ajo fitoi çmimin Nobel për paqe.

Machado përshkroi gjithashtu vizionin e saj për Venezuelën, duke u zotuar ta kthejë Venezuelën në qendrën energjetike të Amerikave dhe të çmontojë strukturat kriminale që kanë dëmtuar qytetarët. Ajo u zotua të kthejë në shtëpi miliona venezuelianë të detyruar të largohen nga vendi./K.M

Last Updated on 06/01/2026 by Kesjana

Përqendrimi vetëm te pesha mund të errësojë ndryshimet e tjera që përmirësojnë shëndetin në mënyra më të besueshme dhe të qëndrueshme. Disa prej tyre mund të çojnë në humbje peshe, disa jo, por përfitimet janë të qarta pavarësisht nëse pesha ndryshon apo jo.

1. Hani më shumë ushqime me bazë bimore

Përfshirja e më shumë ushqimeve me bazë bimore në dietën tuaj nuk do të thotë që duhet të bëheni vegjetarian. Nëse hani mish dhe doni të vazhdoni, kjo është në rregull. Mund të rrisni thjesht sasinë dhe shumëllojshmërinë e ushqimeve me bazë bimore në pjatën tuaj. Ka studime të shumta që tregojnë se një dietë e pasur me ushqime me bazë bimore shoqërohet me një rrezik të reduktuar të sëmundjeve të mëdha.

2. Ushtrime

Ushtrimet fizike janë një nga gjërat më efektive që mund të bëni për shëndetin tuaj. Edhe pse shpesh shoqërohen me humbjen e peshës, vlera e tyre e vërtetë nuk qëndron në humbjen e peshës, por në ruajtjen e një peshe të shëndetshme dhe në mbështetjen e shëndetit të përgjithshëm .

Një studim në Journal of Sport and Health Science tregon se ushtrimet fizike vetëm përmirësojnë tregues të rëndësishëm të shëndetit.

3. Menaxhimi i stresit

Stresi nuk është diçka që zakonisht e zgjedhim, por ka një efekt të gjerë në trupin tonë. Mund të dobësojë sistemin imunitar, të rrisë tensionin e gjakut dhe kolesterolin, si dhe të prishë gjumin. Gjithashtu ndryshon zakonet e të ngrënit. Sipas një studimi në revistën shkencore ‘Trends in Endocrinology & Metabolism’, rreth 40% e njerëzve hanë më shumë kur janë të stresuar, 40% hanë më pak dhe vetëm 20% nuk ??i ndryshojnë zakonet e tyre.

4. Gjumi

Gjumi ka një ndikim të rëndësishëm në shëndet. Mungesa e gjumit lidhet me tensionin e lartë të gjakut, sëmundjet e zemrës, demencën dhe depresionin. Mungesa e gjumit rrit oreksin, marrjen e ushqimit dhe preferencën për ushqime me shumë energji, siç janë ëmbëlsirat dhe ushqimi i shpejtë, sepse hormonet që rregullojnë urinë dhe dëshirat për ushqim çrregullohen. Krijimi i planeve realiste për një gjumë më të mirë mund të jetë një vendim që ia vlen për Vitin e Ri.

5. Alkooli

Alkooli është i lidhur me rreziqe afatgjata, duke përfshirë kancerin, sëmundjet e zemrës dhe sëmundjet e mëlçisë. Ai gjithashtu mund të shkaktojë çrregullime të gjumit, duke zvogëluar gjumin e thellë dhe restaurues. Ai gjithashtu ndikon në oreksin dhe zgjedhjet e ushqimit, duke i bërë ushqimet me kalori të larta më tërheqëse./Kb

Moti i keq që ka përshirë pjesën më të madhe të vendit ka shkaktuar përmbytje në disa segmente rrugore në vend.

Kështu në Durrës rrugët pranë stadiumit të qytetit janë nën ‘pushetin’ e ujit, duke i bërë të pakalueshme për këmbësorët dhe duke shkaktuar vështirësi për qarkullimin e makinave./K.M

Reshjet e dendura të shiut dhe prurjet e paparashikueshme nga lumenjtë anësorë kanë rritur nivelin e ujit në hidrocentralet e kaskadës së Drinit.

Edhe këtë të martë, vijojnë shkarkimet e uijt nga hidrocentralet e Komanit dhe të Vaut të Dejës.

Valbona dhe prurjet anësore të basenit të Komanit, dje kanë qenë jashtë parashikimeve.

Sipas burimeve, mësohet se shkarkimet në Koman janë në niveli 500 metër kub ujë. Ndërsa prodhimi me kapacitet maksimal nxjerr dhe 750 metra kub të tjera në sekondë , me totalin 1250 metër kub në sekondë që derdhen në Vaun e Dejës.

Situata nuk paraqet rrezik, derisa prurjet të mos kalojnë 1500 metër kub.

Favor tjetër është Fierza, e cila as nuk prodhon dhe as nuk shkarkon. Aktualisht, në Fierzë kuota është 280 metra nga 296 dhe prurjet janë 600 metër kub në sekondë./K.M

Perceptimi i shqiptarëve për situatën financiare rezulton dukshëm më negativ krahasuar me një vit më parë, duke sinjalizuar një rritje të fortë të pakënaqësisë, sipas të dhënave nga Barometri i Ballkanit.

Një vit më parë, në 2024 pakënaqësia ishte e kufizuar në 14%, ndërsa gati gjysma e shqiptarëve mendonin se situata financiare do të mbetej e njëjtë dhe 38% prisnin përmirësim.

Vihet re një kalim nga një klimë neutrale pritshmërie, në një gjykim masiv negativ brenda vetëm një viti, çka tregon se një pjesë e madhe e familjeve kanë përjetuar përkeqësim real të kushteve ekonomike, ose të paktën një zhgënjim të fortë nga pritshmëritë e mëparshme.

Ky ndryshim reflekton presionet e vazhdueshme mbi buxhetet familjare, veçanërisht rritjen e kostos së jetesës dhe pasigurinë ekonomike, të cilat duket se kanë gërryer besimin e qytetarëve.

Edhe pse inflacioni zyrtar është zbutur krahasuar me kulmin e viteve të mëparshme, çmimet e ushqimeve, energjisë dhe shërbimeve bazë kanë mbetur të larta, duke ulur fuqinë blerëse të pagave dhe pensioneve. Për shumë familje, normalizimi i inflacionit nuk është përkthyer në lehtësim real të shpenzimeve mujore.

Një arsye tjetër lidhet me mospërputhjen mes rritjes ekonomike dhe të ardhurave reale. Rritja e PBB-së dhe e pagës mesatare nuk është ndjerë njësoj në të gjitha shtresat, veçanërisht te punonjësit me të ardhura të ulëta dhe të mesme.

Pakënaqësia ushqehet edhe nga pasiguria në tregun e punës, sidomos për të rinjtë dhe punësimin cilësor. Edhe pse punësimi në terma sasiorë është rritur, shumë vende pune mbeten me paga të ulëta ose pa stabilitet afatgjatë, duke forcuar perceptimin e pasigurisë financiare dhe mungesës së perspektivës.

Rritja e emigrimit dhe krahasimi i vazhdueshëm me të ardhurat dhe standardin e jetesës në vendet e BE-së e thellojnë ndjesinë e pakënaqësisë, edhe kur treguesit makroekonomikë paraqiten relativisht të qëndrueshëm.

Ndryshe nga 2024, kur dominonte ideja e stabilitetit, 2025 shënoi një kthesë drejt pakënaqësisë, duke e vendosur Shqipërinë ndër vendet e rajonit me rritjen më të fortë të perceptimit negativ për ekonominë për muajt në vijim./ Monitor/kb

Satwant Singh dhe Kehar Singh dënohen me vdekje për komplot në vrasjen e kryeministres Indira Gandhi. Të dy burrat u ekzekutuan në të njëjtën ditë, më 6 janar 1989 

Përgatiti: Leonard Veizi

Në fund të viteve ’80, India ishte ende një vend që ecte mbi kujtime të përgjakura, me plagë që nuk ishin mbyllur dhe me heshtje që peshonin më rëndë se fjalët. Vrasja e kryeministres Indira Gandhi vazhdonte të qëndronte si një hije mbi jetën politike dhe shoqërore të vendit, një ngjarje që kishte tronditur themelet e shtetit dhe kishte copëtuar ndjenjën e sigurisë kolektive. Ajo ditë e errët nuk ishte harruar; përkundrazi, ishte shndërruar në një pikë referimi të dhimbshme, ku çdo debat mbi pushtetin, fenë dhe unitetin kombëtar kthehej sërish tek ajo orë fatale e mëngjesit…

…Ky nuk ishte thjesht një atentat ndaj një figure politike, por kulmi tragjik i një përplasjeje të gjatë dhe të tensionuar mes shtetit indian dhe një pjese të qytetarëve të tij. Konflikti kishte rrënjë të thella politike dhe fetare, të ushqyera nga mosbesimi, dhuna dhe vendime drastike shtetërore që lanë pasoja të parikthyeshme. Vrasja e Indira Gandhit u bë kështu simbol i një epoke ku pushteti dhe besimi u përplasën pa kompromis, duke e lënë Indinë të përballej me pasojat e një tragjedie që shënoi historinë e saj moderne.

Atentati

Më 31 tetor 1984, në orën 9:29 të mëngjesit, Indira Gandhi u qëllua për vdekje në rezidencën e saj zyrtare në Rrugën Safdarjung, në New Delhi. Ajo po kalonte oborrin drejt një interviste televizive, e shoqëruar nga stafi i saj, kur dy nga truprojat e saj personale, Satwant Singh dhe Beant Singh, hapën zjarr. Plumbat e tyre i dhanë fund jetës së gruas që kishte udhëhequr Indinë në një nga periudhat më të ndërlikuara të saj.

Motivi i vrasjes lidhej drejtpërdrejt me Operacionin Blue Star, një ndërhyrje ushtarake e urdhëruar nga vetë Indira Gandhi në qershor të vitit 1984. Ushtria indiane kishte sulmuar Tempullin e Artë në Amritsar, vendi më i shenjtë i fesë sikh, për të neutralizuar militantët e udhëhequr nga Jarnail Singh Bhindranwale, i cili ishte barrikaduar aty me ndjekësit e tij. Operacioni përfundoi me vrasjen e Bhindranwale dhe dhjetëra të tjerëve, por la pas një ndjenjë të thellë fyerjeje dhe zemërimi në komunitetin sikh.

Dy ekzekutorët

Satwant Singh dhe Beant Singh, të dy sikhë dhe pjesë e gardës së sigurisë së kryeministres, e konsideruan veprimin e tyre si hakmarrje për profanimin e Tempullit të Artë. Beant Singh u vra menjëherë pas atentatit nga forcat e sigurisë, ndërsa Satwant Singh u arrestua i plagosur rëndë.

Hetimet zbuluan një rrjet më të gjerë bashkëpunëtorësh. Ndër ta ishte edhe Kehar Singh, i akuzuar për organizimin dhe mbështetjen e komplotit. Pas një procesi gjyqësor që u ndoq me tension të madh nga opinioni publik indian dhe ndërkombëtar, Satwant Singh dhe Kehar Singh u shpallën fajtorë për vrasjen e kryeministres.

Vendimi i Gjykatës

Në vitin 1989, gjykata indiane i dënoi të dy me vdekje. Ekzekutimi i tyre u krye në të njëjtën ditë, duke mbyllur formalisht një kapitull gjyqësor, por jo plagët shoqërore që atentati kishte hapur. Pas vrasjes së Indira Gandhit, India u përfshi nga trazira të përgjakshme antisikhe, ku mijëra njerëz humbën jetën, duke e thelluar edhe më shumë ndarjen mes shtetit dhe një pjese të qytetarëve të tij.

Kështu, vrasja e Indira Gandhit mbeti jo vetëm një atentat politik, por një simbol tragjik i asaj çfarë ndodh kur pushteti, dhuna dhe identiteti fetar përplasen pa kthim. Një ngjarje që vazhdon të rëndojë në kujtesën kolektive të Indisë edhe sot.

Pas temperaturave të ulëta që kanë goditur Francën, kryeqyteti i saj Parisi, është zbardhur nga dëbora.

Vendet ikonë si Katedralja e Notre Dame dhe Kulla Eiffel u zbardhën krejtësisht, po ashtu si edhe kështjella e Disneyland.

Teksa vendasit dhe qindra turistë kanë shijuar peizazhin e mrekullueshëm, pasditen e djeshme reshjet e dendura të dëborës shkaktuan anulimin e një pjese të fluturimeve nga aeroportet Orly dhe Charles de Gaulle në Paris.

Last Updated on 06/01/2026 by Kesjana

Mandati i dytë i presidentit amerikan Donald Trump po formësohet nga ambiciet e tij në politikën e jashtme. Ai u ka shkuar deri në fund kërcënimeve ndaj Venezuelës duke kapur presidentin e saj dhe bashkëshorten nga kompleksi i fortifikuar në Karakas, në një bastisje dramatike gjatë natës.

Duke përshkruar operacionin, Trump riktheu në vëmendje Doktrinën Monroe të vitit 1823 dhe premtimin për supremacinë amerikane në hemisferën perëndimore, duke e riemërtuar si “Doktrina Donroe”.

Këtu janë disa nga paralajmërimet që ai ka bërë kundër vendeve të tjera në orbitën e Uashingtonit ditët e fundit:

Groenlanda

SHBA-të kanë tashmë një bazë ushtarake në Groenlandë (Pituffik Space Base) por Trump dëshiron të gjithë ishullin.

“Na duhet Groenlanda nga këndvështrimi i sigurisë kombëtare,” tha ai për gazetarët, duke shtuar se rajoni ishte “i mbuluar me anije ruse dhe kineze gjithandej.”

Ishulli i madh arktik, pjesë e Mbretërisë së Danimarkës, ndodhet rreth 3 mijë e 200 km në verilindje të SHBA-ve. Ai është i pasur me minerale të rralla, të domosdoshme për prodhimin e telefonave inteligjentë, automjeteve elektrike dhe pajisjeve ushtarake. Aktualisht, prodhimi i Kinës në këtë fushë tejkalon ndjeshëm atë të SHBA-ve.

Groenlanda ka gjithashtu një pozicion strategjik në Atlantikun e Veriut, duke ofruar akses në rrethin arktik që po bëhet gjithnjë e më i rëndësishëm. Me shkrirjen e akullnajave polare, pritet të hapen rrugë të reja detare.

Kryeministri i Groenlandës, Jens Frederik Nielsen, e quajti idenë e kontrollit amerikan mbi ishull si një “fantazi”. Ai tha: “Jo më presion. Jo më insinuata. Jo më fantazi aneksimi. Jemi të hapur për dialog, por kjo duhet të ndodhë përmes kanaleve të duhura dhe me respekt për të drejtën ndërkombëtare.”

Kolumbia

Vetëm disa orë pas operacionit në Venezuelë, Trump paralajmëroi presidentin kolumbian Gustavo Petro të “ketë kujdes”.

Kolumbia, fqinji perëndimor i Venezuelës, ka rezerva të mëdha nafte dhe është prodhues i rëndësishëm i arit, argjendit, smeraldeve, platinit dhe qymyrit. Ajo është gjithashtu një qendër kryesore e trafikut të drogës në rajon, veçanërisht të kokainës.

Që nga shtatori, SHBA-të kanë filluar të godasin anije në Karaibe dhe Paqësorin lindor, duke thënë, pa prova, se transportonin drogë. Kjo ka përshkallëzuar konfliktin me presidentin e majtë Petro.

Në tetor, SHBA-të vendosën sanksione ndaj tij, duke e akuzuar se po lejonte kartelet të “lulëzonin”.

Duke folur në bordin e avionit presidencial “Air Force One”, Trump tha se Kolumbia po drejtohej nga “një njeri i sëmurë që pëlqen të prodhojë kokainë dhe ta shesë në SHBA”. Ai shtoi: “Nuk do ta bëjë për shumë gjatë.” I pyetur nëse SHBA-të do të kryenin një operacion kundër Kolumbisë, ai u përgjigj: “Më duket ide e mirë.”

Historikisht, Kolumbia ka qenë aleat i ngushtë i Uashingtonit në luftën kundër drogës, duke marrë qindra miliona dollarë ndihmë ushtarake çdo vit.

Irani

Irani po përballet aktualisht me protesta masive kundër qeverisë, dhe Trump paralajmëroi se autoritetet do të “goditen shumë rëndë” nëse vriten më shumë protestues.

“Po e ndjekim nga afër. Nëse fillojnë të vrasin njerëz siç kanë bërë në të kaluarën, mendoj se do të goditen shumë rëndë nga SHBA,” tha ai për gazetarët.

Edhe pse Irani bie jashtë fushës së “Doktrinës Donroe”, Trump ka kërcënuar më parë regjimin iranian me veprime të tjera, pas goditjes së objekteve bërthamore vitin e kaluar.

Këto sulme pasuan një operacion të madh izraelit për të shkatërruar kapacitetin e Iranit për zhvillimin e armëve bërthamore, që kulmoi me konfliktin 12‑ditor Izrael‑Iran.

Në një takim në resortin e tij Mar‑a‑Lago javën e kaluar me kryeministrin izraelit Benjamin Netanyahu, Irani ishte në krye të agjendës. Mediat amerikane raportuan se Netanyahu ngriti mundësinë e sulmeve të reja kundër Iranit në vitin 2026.

Meksika

Ngjitja e Trump-it në pushtet në vitin 2016 u përcaktua nga thirrjet e tij për “Ndërtimin e Murit” përgjatë kufirit jugor me Meksikën.

Në ditën e parë të rikthimit në detyrë në vitin 2025, ai nënshkroi një urdhër ekzekutiv për ta riemërtuar Gjirin e Meksikës si “Gjiri i Amerikës”.

Ai shpesh ka akuzuar autoritetet meksikane se nuk bëjnë mjaftueshëm për të ndaluar rrjedhën e drogës dhe emigrantëve të paligjshëm drejt SHBA-ve.

Duke folur të dielën, Trump tha se droga po “derdhej” përmes Meksikës dhe se “do të duhet të bëjmë diçka”, duke shtuar se kartelet atje ishin “shumë të forta”.

Presidentja e Meksikës, Claudia Sheinbaum, ka refuzuar publikisht çdo veprim ushtarak amerikan në tokën meksikane.

Kuba

Ishulli, që ndodhet vetëm 145 km në jug të Floridës, ka qenë nën sanksione amerikane që nga fillimi i viteve 1960 dhe ka pasur lidhje të ngushta me Venezuelën e Nicolás Maduros.

Trump sugjeroi të dielën se ndërhyrja ushtarake amerikane nuk ishte e nevojshme, sepse Kuba ishte “gati të bjerë”.

“Nuk mendoj se na duhet ndonjë veprim,” tha ai. “Duket sikur po rrëzohet.”

Ai shtoi: “Nuk e di nëse do të rezistojnë, por Kuba tani nuk ka të ardhura. Të gjitha i merrnin nga Venezuela, nga nafta venezueliane.”

Raportohet se Venezuela furnizon rreth 30% të naftës së Kubës, duke e lënë Havanën të ekspozuar nëse furnizimi bie me largimin e Maduros.

Sekretari amerikan i Shtetit, Marco Rubio, djalë i dy emigrantëve kubanezë, ka kërkuar prej kohësh ndryshim regjimi në Kubë. Ai tha: “Nëse do të jetoja në Havana dhe do të isha në qeveri, do të isha i shqetësuar, të paktën pak.”

“Kur presidenti flet, duhet ta merrni seriozisht,”shtoi ai./kb

Sapo hyri në sallën e mbushur me gazetarë dhe publik, Maduro deklaroi se ishte “rrëmbyer” dhe se ndodhej në SHBA kundër vullnetit të tij. Ai e cilësoi veten si “një i burgosur lufte”.

Gjatë seancës, gjyqtari Alvin Hellerstein i kërkoi Madurros të konfirmonte identitetin për të nisur procedurat. Duke folur qetësisht në spanjisht, ai u shpreh: “Unë jam Nicolás Maduro, president i Republikës së Venezuelës dhe jam këtu i rrëmbyer që prej 3 janarit. U kapa në shtëpinë time në Karakas.”

Gjatë seancës, Maduro dhe bashkëshortja e tij, Cilia Flores, deklaruan se nuk ndihen fajtorë për akuzat që lidhen me drogën dhe armët. “Jam i pafajshëm. Jam një njeri i ndershëm”, tha Maduro, ndërsa Flores shtoi se ishte “plotësisht e pafajshme”.

Maduro, 63 vjeç, dhe bashkëshortja e tij u transferuan në një burg të Nju Jorkut pasi u arrestuan të shtunën nga forcat amerikane në kompleksin e tyre në Venezuelë, gjatë një operacioni të papritur gjatë natës, i cili u shoqërua edhe me goditje ndaj bazave ushtarake.

Të veshur me uniforma burgu blu dhe portokalli, si dhe pantallona ngjyrë kaki, të dy mbanin kufje për të ndjekur përkthimin në spanjisht gjatë seancës, me një avokat të ulur mes tyre. Maduro mbante shënime të hollësishme në një bllok shënimesh të verdhë dhe i kërkoi gjyqtarit leje që ta mbante me vete edhe pas përfundimit të seancës.

Kur hyri në sallë — e njëjta sallë gjyqi ku vetëm disa muaj më parë u gjykua dhe u dënua Sean “Diddy” Combs — Maduro u kthye për të përshëndetur disa persona në publik me një tundje koke. Ai ruajti një qëndrim të qetë dhe pa shprehje gjatë gjithë procedurës, edhe në momentin kur një person nga publiku bërtiti se Maduro do të “paguante për krimet e tij”.

“Jam president dhe i burgosur lufte”, bërtiti Maduro në spanjisht drejt tij, ndërsa ai u shoqërua jashtë sallës mes lotësh, shkruan BBC.

Seanca ishte emocionale edhe për të tjerë të pranishëm. Gazetarja venezueliane Maibort Petit deklaroi se goditjet raketore amerikane gjatë arrestimit të Maduros kishin dëmtuar shtëpinë e familjes së saj pranë Fuerte Tiuna në Karakas, duke e cilësuar surreal momentin kur pa ish-presidentin e saj të shoqëruar në gjykatë nga marshallët amerikanë.

Bashkëshortja e Maduros, Cilia Flores, u shfaq më e rezervuar, me fasha pranë syve dhe ballit për shkak të dëmtimeve që, sipas avokatëve, i ka pësuar gjatë arrestimit. Avokatët kërkuan që ajo të marrë trajtim mjekësor të plotë, përfshirë ekzaminime për dëmtime të brinjëve dhe fraktura të mundshme.

Maduro dhe Flores nuk kërkuan lirimin me kusht gjatë kësaj seance, por kanë të drejtë ta bëjnë këtë në një fazë të mëvonshme, çka do të thotë se do të qëndrojnë në paraburgim federal.

Autoritetet amerikane e akuzojnë Maduron për komplot për narkoterrorizëm, trafik kokaine, posedim armësh automatike dhe mjete shpërthyese, si dhe komplot për posedimin e tyre. Ai është akuzuar së bashku me bashkëshorten, djalin e tij dhe disa persona të tjerë.

Seanca e radhës gjyqësore është caktuar për datën 17 mars./K.M