TEL AVIV, 26 mars /ATSH-ANSA/ –  Ne do të vazhdojmë të godasim me forcë objektivat e regjimit terrorist iranian. Mbrëmë, ne eliminuam komandantin e Marinës së Gardës Revolucionare, deklaroi kryeministri izraelit Benjamin Netanyahu.

‘’Ky njeri ka shumë gjak në duar dhe, për më tepër, ai ishte personi që udhëhoqi mbylljen e Ngushticës së Hormuzit”, deklaroi Netanyahu në një video.

“Ky është një tjetër shembull i bashkëpunimit midis nesh dhe aleatëve tanë, Shteteve të Bashkuara, me qëllimin e përbashkët për të arritur objektivat e luftës”, shtoi ai.  /os/

The post TEL AVIV – Netanyahu: Eliminuam fizikisht personin që mbylli Ngushticën e Hormuzit appeared first on Agjencia Telegrafike Shqiptare.

TEL AVIV, 24 mars /ATSH-ANSA/ – Sot bisedova me presidenti Trump. Të dy besojmë se ekziston një mundësi për të arritur objektivat tona të luftës në një marrëveshje, një marrëveshje që do të mbrojë interesat tona jetësore”, tha kryeministri izraelit Benjamin Netanyahu.

“Në të njëjtën kohë ne vazhdojmë të godasim si Iranin ashtu edhe Libanin. Po i shkatërrojmë programet e tyre raketore dhe bërthamore dhe vazhdojmë të godasim fort Hezbollahun’’, shtoi ai.

Vetëm pak ditë më parë, eliminuam dy shkencëtarë të tjerë bërthamorë dhe do të ketë edhe të tjerë’’, nënvizoi ai.   /os/

The post TEL AVIV – Netanyahu: Sapo bisedova me Trump, do të vazhdojmë të sulmojmë si Iranin ashtu edhe Libanin appeared first on Agjencia Telegrafike Shqiptare.

UASHINGTON, 19 mars /ATSH-AA/ – Presidenti i SHBA-së, Donald Trump, tha se i ka kërkuar kryeministrit izraelit, Benjamin Netanyahu, të mos godasë infrastrukturën e naftës dhe gazit të Iranit.

“Po, e bëra, e bëra. I thashë, mos e bëj këtë dhe ai nuk do ta bëjë”, u tha Trump gazetarëve kur u pyet nëse ka biseduar me Netanyahun për shënjestrimin e objekteve iraniane të naftës dhe gazit.

“Nuk diskutuam, ne veprojmë në mënyrë të pavarur, por kemi marrëdhënie shumë të mira. Ka koordinim”, tha Trump. “Por ndonjëherë ai bën diçka. Dhe nëse mua nuk më pëlqen… atëherë nuk do ta bëjmë më”, shtoi ai.

Komentet e Trumpit vijnë pasi Izraeli goditi fushën e gazit natyror Parsi Jugor në Iran, rezervën më të madhe të gazit të vendit dhe një shtyllë kyç e ekonomisë së tij, duke shënuar një përshkallëzim të madh të luftës.

Sulmi shkaktoi një kundërpërgjigje të ashpër nga Irani, i cili paralajmëroi se do të tregojë “zero përmbajtje” nëse infrastruktura e tij goditet sërish dhe kreu sulme ndaj objekteve energjetike në gjithë rajonin, përfshirë në Katar dhe Kuvajt.

Përshkallëzimi ka tronditur tregjet globale të energjisë, me çmimet e naftës dhe gazit natyror që janë rritur ndjeshëm mes frikës për ndërprerje më të gjera. /os/

The post SHBA – Trump: I kam kërkuar Netanyahut të mos shënjestrojë fushat e naftës dhe gazit të Iranit appeared first on Agjencia Telegrafike Shqiptare.

TEL AVIV, 17 mars /ATSH-ANSA/ – Kemi eliminuar Ali Larijani-n, udhëheqësin e Gardës Revolucionare, grupit që ”de facto” sundon Iranin, dhe së bashku me të, kreun e Forcës Basij, i cili përhap terror midis popullsisë iraniane, deklaroi kryeministri izraelit Benjamin Netanyahu.

“Ne po i ndihmojmë miqtë tanë amerikanë në Gjirin Persik dhe po e dobësojmë këtë regjim me shpresën për t’i dhënë popullit iranian një shans për ta përmbysur atë”, shtoi ai.

”Nuk do të ndodhë menjëherë, nuk do të jetë e lehtë. Por nëse këmbëngulim, do t’u japim atyre një shans për të marrë fatin e tyre në duart e tyre”, theksoi ai. /os/

The post TEL AVIV – Netanyahu: Vdekja e Larijanit u ofron iranianëve një mundësi për të përmbysur regjimin appeared first on Agjencia Telegrafike Shqiptare.

TEL AVIV, Kryeministri Benjamin Netanyahu lëshoi një kërcënim të tërthortë për të vrarë udhëheqësin e ri suprem të Iranit, Mojtaba Khamenei, ndërsa pranoi se lufta ajrore e përbashkët e Izraelit me SHBA-në mund të mos çojë në rrëzimin e qeverisë klerikale në Teheran.

Në konferencën e tij për shtyp lideri izraelit tha se Irani “nuk është më i njëjti” pas pothuajse dy javësh bombardimesh dhe se Teherani ka pësuar goditje ndaj Gardës Revolucionare elitare dhe forcës paraushtarake Basij.

Ai u zotua gjithashtu se Izraeli do të vazhdojë të godasë Hezbollahun në Liban, pasi grupi i mbështetur nga Irani hapi zjarr më 2 mars për të hakmarrë vrasjen nga Izraeli të udhëheqësit suprem të Iranit, Ali Khamenei – babai i Mojtaba Khameneit – në fillim të luftës.

Duke qëndruar mes dy flamujve izraelitë dhe duke iu përgjigjur pyetjeve përmes lidhjes video, Netanyahu u pyet se çfarë veprimesh mund të ndërmarrë Izraeli kundër Ajatollah Mojtaba Khamenei dhe kreut të Hezbollahut Naim Qassem, ai u përgjigj se ”nuk do t’u jepja polica sigurimi për jetën asnjërit prej liderëve të organizatës terrorise dhe nuk mund të them planet që kemi”.   /os/

The post FOKUS – Netanyahu: Nuk përjashtojmë eliminimin e Mojtaba Khameneit dhe Qassemit në Liban appeared first on Agjencia Telegrafike Shqiptare.

UASHINGTON, 5 mars /ATSH-ANSA/ – Nuk po e trajtoj faljen për Benjamin Netanyahun ndërsa të gjithë jemi të mobilizuar në luftë, deklaroi presidenti izraelit Isaac Herzog duke mohuar deklaratën e presidentit Trump se ai i kishte premtuar të falte kryeministrin Benjamin Netanyahu.

“Në një kohë kur të gjithë jemi të mobilizuar, presidenti nuk po e trajton çështjen e faljes. Për hir të qartësisë, dhe siç është shpjeguar disa herë në të kaluarën, Izraeli është një shtet sovran i ligjit. Prandaj, kërkesa e kryeministrit, sipas procedurës, është me ministrinë e Drejtësisë për një mendim ligjor’’, shtoi ai.

‘’Në fund të procesit, presidenti do ta shqyrtojë kërkesën në përputhje me ligjin, në interes të shtetit dhe sipas ndërgjegjes së tij, pa asnjë ndikim nga presioni i jashtëm ose i brendshëm i çfarëdo lloji”, deklaroi zyra e presidentit.   /os/

The post TEL AVIV – Herzog: Nuk jam i interesuar të fal Netanyahun nga akuzat ndërsa jemi në luftë appeared first on Agjencia Telegrafike Shqiptare.

TEL AVIV, 23 shkurt /ATSH-AFP/ – Kryeministri izraelit, Benjamin Netanyahu i tha sot parlamentit se Izraeli po përjeton “ditë komplekse dhe të vështira”, mes tensioneve në rritje midis Uashingtonit dhe Teheranit pas kërcënimeve të Donald Trump për një sulm të kufizuar kundër Iranit.

“Po kalojmë ditë shumë komplekse dhe të vështira… Askush nuk e di se çfarë sjell e nesërmja, ne mbetemi vigjilentë, po përgatitemi për çdo skenar”, tha Netanyahu.

Ai përsëriti kërcënimet e tij ndaj Iranit, duke deklaruar se nëse “ajatollahët kryejnë ndoshta gabimin më serioz në historinë e tyre dhe sulmojnë shtetin e Izraelit, ne do të përgjigjemi me një forcë që ata as nuk mund ta imagjinojnë”.

Teherani paralajmëroi sot se çdo sulm i SHBA-së, madje edhe i kufizuar, do të provokonte një përgjigje “të ashpër”, pasi Donald Trump ngriti mundësinë e një sulmi të tillë në Iran, ku po zhvillohen protesta të reja studentore kundër qeverisë.

Presidenti amerikan, i cili po përpiqet të sigurojë një marrëveshje bërthamore me Iranin, urdhëroi një vendosje masive detare dhe ajrore në Lindjen e Mesme.

Në fjalimin e tij, zoti Netanyahu theksoi aleancën e vendit të tij me Shtetet e Bashkuara, të cilën ai tha se “nuk ka qenë kurrë më e afërt”.

“Midis ushtrisë izraelite dhe ushtrisë amerikane, midis shërbimeve tona të sigurisë dhe të tyre, nuk ka pasur kurrë diçka të krahasueshme”, deklaroi Netanyahu.

Në qershor 2025, Izraeli dhe Irani zhvilluan një luftë 12-ditore, të shkaktuar nga një sulm i paparë izraelit që synonte kryesisht komandën ushtarake iraniane, lëshuesit e raketave dhe objektet e programit bërthamor.

Shtetet e Bashkuara iu bashkuan ofensivës së aleatit të tyre duke goditur tre lokacione bërthamore iraniane./  a.jor.

The post TEL AVIV – Netanyahu: Izraeli po përjeton ditë të vështira, pas tensioneve SHBA-Iran appeared first on Agjencia Telegrafike Shqiptare.

TEL AVIV, 16 shkurt /ATSH-DPA/ – Stafi në zyrën e kryeministrit izraelit, Benjamin Netanyahu njoftoi sot se kishte zbuluar një zarf të dyshimtë, raportuan sot mediet izraelite.

”Nuk ka pasur rrezik për publikun”, raportoi ynet duke cituar një departament përkatës në zyrën e Netanyahut.

”Zarfi përmbante flakonë me një substancë të panjohur”, shkroi gazeta ”Maariv” duke iu referuar një personi në dijeni të detajeve të incidentit.

Zarfi u dërgua në laborator për analiza.

Një zëdhënëse e qeverisë refuzoi të konfirmojë incidentin kur u pyet dhe i referoi pyetjet policisë së Izraelit, e cila fillimisht nuk komentoi mbi raportimet.

Kjo nuk është hera e parë që në zyrën e kryeministrit mbërrin një dërgesë e dyshimtë.

Forcat e sigurisë së fundmi ekzaminuan përmbajtjen e një zarfi në nëntor, i cili në fund u konsiderua i padëmshëm./  /Ad.Ab./ a.jor.

The post TEL AVIV – Zarf i dyshimtë në zyrën e Netanyahut appeared first on Agjencia Telegrafike Shqiptare.

UASHINGTON, 12 shkurt /ATSH-AFP/ – Presidenti amerikan, Donald Trump po krijon kushtet që mund të mundësojnë arritjen e një marrëveshjeje të mirë me Iranin, deklaroi sot kryeministri izraelit Benjamin Netanyahu në Uashington duke shtuar megjithatë një dozë skepticizmi.

”Kushtet që ai po krijon, së bashku me faktin që iranianët e kuptojnë padyshim se gabuan herën e fundit duke mos arritur një marrëveshje, mund të mundësojnë krijimin e kushteve për një marrëveshje të mirë”,  tha Netanyahu para se të largohej nga kryeqyteti amerikan, Uashington, ku u takua me Trumpin.

Ai theksoi se nuk bëhet fjalë vetëm për çështjen bërthamore, por edhe për raketat balistike dhe grupet pro Iranit, si Hezbollahu libanez, Hamasi palestinez dhe Houthit e Jemenit./  /Ad.Ab./ a.jor.

The post SHBA – Netanyahu: Trump po krijon kushtet për të arritur një marrëveshje të mirë me Iranin appeared first on Agjencia Telegrafike Shqiptare.

UASHINGTON, 11 shkurt /ATSH/ – Negociatat me Iranin të vazhdojnë për të parë nëse mund të arrihet apo jo një marrëveshje, deklaroi sot presidenti amerikan, Donald Trump në llogarinë e tij në Truth Social.

”Sapo kam mbaruar takimin me kryeministrin Netanyahu të Izraelit dhe disa përfaqësues të tij. Ishte një takim shumë i mirë, marrëdhënia e shkëlqyer midis dy vendeve tona vazhdon”, fillon postimi i presidentit Trump.

”Nuk u arrit asgjë përfundimtare përveçse këmbëngula që negociatat me Iranin të vazhdojnë për të parë nëse mund të arrihet apo jo një marrëveshje”, shtoi ai.

”Herën e fundit, Irani vendosi se ishte më mirë të mos arrinte një marrëveshje dhe u godit me ‘Midnight Hammer’, por kjo nuk funksionoi mirë për ta”, theksoi ai.

”Shpresojmë që këtë herë të jenë më të arsyeshëm dhe të përgjegjshëm. Përveç kësaj, diskutuam për progresin e jashtëzakonshëm që po bëhet në Gaza dhe në rajon në përgjithësi. Vërtet ka PAQE në Lindjen e Mesme. Faleminderit për vëmendjen tuaj ndaj kësaj çështjeje!”, përfundon postimi i Trump në Truth Social.

Presidenti i SHBA-së Donald Trump priti sot për bisedime në Shtëpinë e Bardhë, kryeministrin izraelit Benjamin Netanyahu, sipas dpa.

Netanyahu tha se do t’i paraqesë presidentit Trump perspektivën izraelite mbi bisedimet me Republikën Islamike.

Gazeta izraelite “Yedioth Ahronoth” raportoi se Netanyahu synon të ndajë informacionin aktual të shërbimeve sekrete me Trump në lidhje me programin e raketave iraniane si dhe në lidhje me masakrën që regjimi ka kryer ndaj qytetarëve të vet./ a.jor.

The post SHBA – Trump: Netanyahu të vazhdojë diskutimet me Iranin appeared first on Agjencia Telegrafike Shqiptare.

UASHINGTON, 8 shkurt /ATSH-AA/ – Kryeministri izraelit, Benjamin Netanyahu, pritet të takohet të mërkurën në Washington me presidentin amerikan, Donald Trump, për të diskutuar negociatat me Iranin.

“Kryeministri beson se çdo negociatë duhet të përfshijë kufizime për raketat balistike dhe ndalimin e mbështetjes për boshtin iranian,” tha zyra e Netanyahut në rrjetin social amerikan X.

Irani dhe SHBA-ja rifilluan diplomacinë bërthamore indirekte të premten, pas javësh tensionesh të shtuara, të nxitura nga kërcënimi i presidentit Trump për veprime ushtarake kundër vendit.

Ministri iranian i Punëve të JAshtme, Abbas Araghchi, i përshkroi bisedimet si një “fillim të mirë”, duke deklaruar se ato mund të vazhdojnë nëse kapërcehet atmosfera e mosbesimit. Ai tha se është rënë dakord që procesi të vazhdojë dhe se palët mund të mblidhen sërish në Muskat të Omanit në një datë të mëvonshme.

Sipas Araghchit, programi raketor i Iranit nuk është subjekt i negociatave, as tani dhe as në të ardhmen, duke e përshkruar atë si një “çështje mbrojtëse”.   /os/

The post FOKUS – Netanyahu takohet me Trump për të diskutuar negociatat me Iranin appeared first on Agjencia Telegrafike Shqiptare.

TIRANË, 26 janar /ATSH/ Kryeministri i Izraelit, Benjamin Netanyahu vlerësoi rolin historik dhe unik të Shqipërisë gjatë Luftës së Dytë Botërore, duke theksuar se shpëtimi i hebrenjve nga shqiptarët përbën një shembull të rrallë humanizmi dhe guximi që nuk do të harrohet kurrë.

Në fjalën e mbajtur sot në një seancë plenare të veçantë të parlamentit të Izraelit, ku ishte i ftuar kryeministri Edi Rama, Netanyahu, tha se “ai kapitull i historisë sonë nuk do të harrohet kurrë ndër breza. Por ajo që nuk do të harrohet po kështu është edhe shembulli i atyre njerëzve që shpëtuan hebrenjtë dhe i ndihmuan të iknin nga persekutimi”.

Sipas tij, ajo që ndodhi në Shqipëri gjatë pushtimit italian dhe nazist ishte unike. “Dhjetëra e qindra shqiptarë myslimanë rrezikuan jetën për të shpëtuar hebrenjtë. Ata i fshehën, ndanë bukën me ta dhe vunë në rrezik jo vetëm veten, por edhe anëtarët e fundit të familjeve të tyre për t’i mbrojtur”, tha Kryeministri izraelit.

Netanyahu theksoi se Shqipëria përfaqësonte një shembull të rrallë në Evropën e asaj kohe. “Shqipëria ishte ishulli i paqes në oqeanin e së keqes dhe këto akte heroike tregojnë vlerat më të mëdha të një vendi që nderonte miqtë”, deklaroi ai.

Duke iu referuar marrëdhënieve dypalëshe pas Luftës së Dytë Botërore, Netanyahu kujtoi se Shqipëria kaloi dekada të vështira nën regjimin komunist, ndërsa Izraeli u njoh zyrtarisht nga Shqipëria në vitin 1969. “Pas ndryshimeve politike 35 vite më parë, Shqipëria dhe Izraeli forcuan marrëdhëniet diplomatike”, u shpreh ai.

Kryeministri izraelit vlerësoi gjithashtu reformat e ndërmarra nga Shqipëria vitet e fundit. “Nën drejtimin tuaj, Shqipëria është kthyer në një kopsht të gjallë të Evropës që ka sukses. Unë i vlerësoj reformat që keni ndërmarrë për të përmirësuar situatën e tregut në Shqipëri dhe këtë e vlerësojnë edhe investitorët izraelitë që po vijnë në Shqipëri. Ne jemi të gatshëm t’ju ndihmojmë me çdo gjë: mbështetje për siguri, në luftën kundër terrorit, novacion, teknologji, tregti e kulturë”, deklaroi Netanyahu.

/e.xh/r.e/a.f/

The post Netanyahu: Shqipëria ishte “ishull paqeje” gjatë Holokaustit, të gatshëm t’ju mbështesim me çdo gjë appeared first on Agjencia Telegrafike Shqiptare.

TIRANË, 26 janar /ATSH/ Në një seancë plenare speciale të mbajtur në Knesset, parlamentin e Izraelit, kryeministri Benjamin Netanyahu në fjalën e rastit vlerësoi si mjaft pozitive marrëdhëniet mes Shqipërisë dhe Izraelit, duke i cilësuar ato si më të fortat ndonjëherë si në aspektin qeveritar, ashtu edhe në atë personal.

“Sot marrëdhëniet midis Shqipërisë dhe shtetit të Izraelit janë më të mira se kurrë, si në aspektin qeveritar, ashtu edhe në atë personal”, u shpreh Netanyahu, duke theksuar simbolikën e flamurit shqiptar. “Kur shoh sot dy kokat e shqiponjës që shikojnë në drejtime të ndryshme, shoh një shembull të së shkuarës dhe të së ardhmes”.

Ai shtoi se kjo simbolikë përfaqëson një vizion të përbashkët drejt së ardhmes, të bazuar në forcimin e mirëqenies dhe sigurisë mes dy vendeve. “Shoh diçka që simbolizon një shikim drejt së ardhmes, që bëhet më i fortë, me më shumë mirëqenie dhe më shumë siguri midis dy vendeve tona”, tha ai.

Kryeministri izraelit vlerësoi gjithashtu rolin e Shqipërisë në arenën ndërkombëtare, duke theksuar mbështetjen e saj të hapur për Izraelin. “Qeveria juaj po hap krahët, ashtu si shqiponja në flamurin tuaj. Përpjekjet që po bëni për ta çuar Shqipërinë përpara dhe miqësia e thellë për Izraelin, e shfaqur hapur në forume ndërkombëtare, duke qëndruar në anën e së vërtetës dhe kundër gënjeshtrës, janë të çmuara për ne”, u shpreh Netanyahu.

Duke folur për situatën e sigurisë, Netanyahu iu referua sulmit të 7 tetorit 2023 nga Hamasi, duke e cilësuar atë si një akt terrorist çnjerëzor. “Ajo që pamë ishte çnjerëzore. Terroristët vranë, përdhunuan dhe dogjën njerëz të pafajshëm. Ky ishte akti hapës i një lufte që synonte të na fshinte nga faqja e dheut”, tha ai.

Netanyahu theksoi se Izraeli do të vijojë përpjekjet për të garantuar sigurinë e tij. “Ne do të luftojmë kundër kujtdo që na sulmon. Ushtarët tanë do të mbrojnë shtëpitë tona dhe vlerat tona”, u shpreh ai, duke shtuar se Izraeli ka arritur të kthejë të gjithë pengjet, si ata të gjallë, ashtu edhe ata që kanë humbur jetën.

Sipas tij, faza e radhës është çarmatimi dhe shpërbërja e Hamasit. “Faza tjetër është shpërbërja e Hamasit dhe çarmatimi i Gazës, dhe ne duam ta përshpejtojmë këtë proces”, deklaroi Netanyahu.

Në fjalën e tij, Kryeministri izraelit vlerësoi edhe rolin e Shqipërisë si një vend me shumicë myslimane që promovon bashkëjetesën dhe paqen. “Shqipëria është shembull i bashkëjetesës. Ky është islam i moderuar, krejtësisht kundër ekstremizmit dhe xhihadit”, tha ai.

“Ju, Edi, keni shumë vlera. Shkalla juaj morale është e lartë. Por, fatkeqësisht, disa shtete janë bërë pjesë e propagandës që mbështesin islamin në vend të liberalizmit. Shohim urrejtje në vendet europiane duke mbështetur terrorin. Heshtja e shumë vendeve europiane teksa shohin terrorin në Iran është standard i dyfishtë i politikës së tyre. Pra nëse do të sulmohej Izraeli atëherë nuk do flisnin për gjenocid, por nëse do të sulmojë Izraeli do të flitej për gjenocid”, tha kryeministri izraelit Netanyahu.

/r.e/a.f/

The post Netanyahu: Marrëdhëniet Shqipëri-Izrael më të mira se kurrë appeared first on Agjencia Telegrafike Shqiptare.

TIRANË, 26 janar/ATSH/ Kryeministri Rama, i cili ndodhet në Jeruzalem, Izrael me rastin e pjesëmarrjes në Konferencën Ndërkombëtare për Luftën kundër Antisemitizmit, u takua sot me Kryeministrin Benjamin Netanyahu, me të cilin zhvilloi një takim kokë më kokë, që u pasua nga takimi mes dy delegacioneve.

Kryeministri i Izraelit, Benjamin Netanyahu deklaroi se bota dhe njerëzimi duhet të dijë faktin që Shqipëria, ishte i vetmi vend evropian që gjatë Holokaustit strehoi një popullsi hebreje brenda shoqërisë së saj.

Gjatë deklaratës së përbashkët për shtyp me Kryeministrin Edi Rama, Netanyahu tha se “Kryeministri Rama është një mik i madh i popullit hebre,  mik i madh i shtetit hebre dhe mund të them një mik i madh i imi”.

“Ai përfaqëson shpirtin e vërtetë të Shqipërisë. Ndoshta, njerëzit nuk e dinë, bota duhet ta dijë që Shqipëria ishte i vetmi vend evropian që gjatë holokaustit pati një popullsi hebreje brenda Shqipërisë që u rrit dhe nuk u mpak. U rrit sepse myslimanët shqiptarë në frymën e moderimit, tolerancës, në frymën e dinjitetit njerëzor mbrojtën qindra hebrenj që jetonin në Shqipëri dhe po kështu mikpritën shumë të tjerë”, tha Netanyahu.

“Ky është shpirti që ju përfaqësoni, kjo është ajo histori, që bota duhet ta njohë. Kjo është histori që frymëzon filma. Njerëzit duhet të njohin rolin e jashtëzakonshëm, rolin moral që Shqipëria luajti gjatë orëve më të errëta të historisë njerëzore”, tha Kryeministri izraelit.

Sipas Netanyhut, kjo është fryma që Shqipëria vazhdon ta ushqejë edhe sot.

“Ju qëndroni me kurajë kundër atyre që duan t’ju zmbrapsin, ju qëndruat krah Izraelit kur u sulmuam nga barbarët. Busulla juaj morale nuk u lëkund dhe kjo është diçka që ne e vlerësojmë thellësisht dhe që ju shënjon si udhëheqës të jashtëzakonshëm të popullit tuaj dhe atyre segmenteve të njerëzimit që duan që e vërteta të mbrohet dhe të mbrohen vlerat morale që bashkëndajmë”, theksoi ai.

Kryeministri izraelit, deklaroi se mes dy vendeve po ndërtohen marrëdhënie të shkëlqyera.

“Numri i turistëve izraelitë që kanë shkuar në Shqipëri është rritur me 800%, ndoshta një mijë përqind dhe së shpejti do të bëhen shumë më tepër. Mund t’ju them gjithë izraelitëve që Shqipëria është një vend i mrekullueshëm me njerëz të mrekullueshëm kështu që shkoni atje. Kemi kompani me investues izraelit, të cilët dinë që ka një mundësi të madhe ekonomike në Shqipëri, ka një orientim drejt tregut të lirë dhe që ka gjëra që mund të zhvillohen së bashku me shqiptarët”, tha Netanyahu.

Kryeministri i Izraelit theksoi se ditën e nesërme, në prani edhe të Kryeministrit Edi Rama do të çelet Dhoma e Tregtisë në Jeruzalem, diçka që sipas Netanyhut do të çojë përpara lidhjet ekonomike mes dy vendeve.

Në fund të fjalës së tij, Kryeministri izraelit tha se ka një mirëkuptim të përbashkët që shkon përtej interesave, por në ndjesën më të thellë të simpatisë njerëzore.

“Njohim që ka një themel afërsie e vëllazërimi mes dy popujve tanë dhe një bazë vëllazërimi mes të dyve ne”, përfundoi Netanyahu.

/e.i/

The post Netanyahu: Shqipëria vend i mrekullueshëm për t’u vizituar, hapim Dhomën e Tregtisë në Jeruzalem appeared first on Agjencia Telegrafike Shqiptare.

TIRANË, 26 janar/ATSH/ Kryeministri Edi Rama u prit sot në një takim nga Kryeministri i Izraelit, Benjamin Netanyahu.

Kryeministri Rama po zhvillon një vizitë pune në Jeruzalem në Izrael, në kuadër të Konferencës Ndërkombëtare për Luftën kundër Antisemitizmit.

Në kuadër të kësaj vizite, kryeministri Rama do t’i drejtohet sot me një fjalë seancës plenare në Knesset.

Në këtë vizitë, kryeministri shoqërohet nga bashkëshortja e tij, Linda Rama dhe delegacioni zyrtar.

Gjatë ditës së djeshme kryeministri Rama dhe bashkëshortja e tij Linda Rama u ndalën në memorialin e viktimave të Festivalit Nova, një monument që përkujton viktimat e masakrës së festivalit muzikor Nova gjatë sulmeve të 7 tetorit 2023.

1 nga 5

/m.m/j.p/

The post Rama pritet nga kryeministri Netanyahu appeared first on Agjencia Telegrafike Shqiptare.

UASHINGTON, 30 dhjetor /ATSH-ANSA/ – Presidenti amerikan Donald Trump dhe këshilltarët e tij kryesorë i kërkuan Benjamin Netanyahut të ndryshonte politikat e Bregut Perëndimor gjatë takimit të tyre.

Axios raporton këtë, duke cituar një zyrtar amerikan dhe një burim tjetër, të dy me njohuri të drejtpërdrejtë të situatës.

Presidenti amerikan dhe ekipi i tij thuhet se shprehën shqetësim për situatën dhe i kërkuan kryeministrit izraelit të shmangte veprimet provokuese dhe të “qetësonte ujërat”.

Takimi i së hënës thuhet se ishte hera e parë në mandatin e tij të dytë që Trump dhe ekipi i tij patën diskutime të gjera me Netanyahun rreth politikës së Bregut Perëndimor.

Shtëpia e Bardhë beson se një përshkallëzim i dhunës në ato territore do të minonte përpjekjet për të zbatuar marrëveshjen e paqes në Gaza dhe për të parandaluar zgjerimin e Marrëveshjeve të Abrahamit para përfundimit të mandatit të Trump.

Burimet thanë se tema u ngrit si gjatë takimit përgatitor të Netanyahut të hënën në mëngjes me Sekretarin e Shtetit Marco Rubio, Steve Witkoff dhe Jared Kushner, ashtu edhe gjatë takimit të Trump me Netanyahun në pasdite. /os/

The post SHBA – Trump i kërkon Netanyahut të ndryshojë politikën e tij ndaj Bregut Perëndimor appeared first on Agjencia Telegrafike Shqiptare.

UASHINGTON, 29 dhjetor /ATSH-DPA/ – Presidenti amerikan, Donald Trump, deklaroi sot se do të mbështeste sulme të tjera izraelite ndaj Iranit, nëse Teherani refuzonte një marrëveshje të re bërthamore dhe vijon avancimin e programeve të raketave dhe armëve bërthamore.

“Tani dëgjoj se Irani po përpiqet të avancojë programet raketore, dhe nëse po, do të na duhet t’i godasim sërish”, tha Trump gjatë një takimi me kryeministrin izraelit Benjamin Netanyahu në rezidencën e tij Mar-a-Lago në Florida.

Trump sugjeroi se ndërhyrja do të ishte edhe më urgjente nëse përpjekjet diplomatike për të ndalur programin bërthamor të Iranit dështojnë.

“Do ta bëjmë menjëherë”, u shpreh ai, duke iu referuar sulmeve të mundshme.

Ali Shamkhani, këshilltar i lartë i udhëheqësit Suprem të Iranit, Ajatollah Ali Khamenei, reagoi në një postim në platformën X, duke thënë se aftësitë raketore dhe mbrojtëse të Iranit “nuk janë të kufizueshme dhe nuk varen nga lejet”.

“Çdo agresion do të përballet me një përgjigje të menjëhershme dhe të ashpër, përtej imagjinatës së planifikuesve të tij”,  shtoi ai.

Izraeli zhvilloi një lufte 12 ditore kundër Iranit në qershor, duke bombarduar objekte kyçe bërthamore në vend, në bashkëpunim me Shtetet e Bashkuara.

Pavarësisht  armëpushimit, një zgjidhje diplomatike e konfliktit mes dy armiqve të betuar nuk duket në horizont, ndërsa në të dy vendet kanë qarkulluar raportime për një rifillim të mundshëm të luftës.

Sipas burimeve izraelite, Irani po punon intensivisht për të rindërtuar arsenalin e tij të raketave, i cili, së bashku me programin bërthamor, shihet nga Izraeli si një kërcënim madhor./   /Ad.Ab./

The post SHBA – Trump mbështet sulme të tjera izraelite, nëse Irani zgjeron programin e raketave appeared first on Agjencia Telegrafike Shqiptare.

UASHINGTON, 29 dhjetor /ATSH/-Ndërsa presidenti i SHBA-së, Donald Trump është angazhuar për t’i dhënë fund luftës në Evropë, progresi në Lindjen e Mesme ka ngecur, sipas “NBC News”.

Presidenti amerikan pritet të takohet sot me kryeministrin izraelit Benjamin Netanyahu, në rezidencën e tij në Florida, me shpresën për të çuar perpara armëpushimin që ai ndërmjetësoi në Gaza.

Lideri izraelit ndërkohë pritet t’i paraqesë presidentit amerikan, Trump argumente për veprimet e reja kundër Iranit.

“Këto dy çështje pritet të jenë në qendër të diskutimeve në rezidencën Mar-a-Lago të Trump”, tha një zyrtar i Shtëpisë së Bardhë.

Sipas raportimeve të medieve amerikane, Netanyahu ka mbërritur në Florida me avionin e tij qeveritar.

Axhenda e takimeve parashikon një takim të Netanyahut me Marco Rubio, sekretarin amerikan të Shtetit në 16:00 dhe më pas me presidentin amerikan, Donald Trump rreth orës 19:00.

Armëpushimi mes Izraelit dhe Hamasit hyri në fuqi në tetor të këtij viti, duke i dhënë fund konfliktit 2-vjeçar në Gaza, por, ka pasur disa lëvizje në fazën e dytë, më komplekse, të procesit të paqes, duke ngritur shqetësime se të dyja palët po dështojnë në ndërmarrjen e veprimeve për zbatimin e fazës së ardhshme të marrëveshjes.

Më shumë se 400 persona janë vrarë në enklavën palestineze që nga nisja e armëpushimit sipas autoriteteve lokale, ndërsa Izraeli ka akuzuar Hamasin për shkeljen e tij, përfshirë dhe vonesat në kthimin e trupave të pengjeve, me një trup që ka mbetur ende për t’u dorëzuar. //a.i/

The post UASHINGTON – Netanyahu mbërrin në SHBA mes përshkallëzimit të tensioneve në Gaza appeared first on Agjencia Telegrafike Shqiptare.

UASHINGTON, 29 dhjetor /ATSH-DPA/- Presidenti i SHBA-së, Donald Trump do të presë sot kryeministrin izraelit Benjamin Netanyahu në Florida për të diskutuar fazën tjetër të planit të paqes të Trump në Gaza.

Një armëpushim i brishtë ka qenë në fuqi në Rripin e Gazës që nga 10 tetori, pasi Izraeli dhe Hamasi ranë dakord për një plan rrugor prej 20 pikësh, të mbështetur nga Uashingtoni, për t’i dhënë fund më shumë se dy viteve luftime.

Por, zbatimi i fazës së dytë të planit, sipas të cilit Hamasi duhet të dorëzojë armët dhe të vendoset një forcë ndërkombëtare stabilizimi, pritet të jetë shumë më i ndërlikuar. Hamasi deri më tani ka hedhur poshtë të gjitha thirrjet për çarmatim.

Trump dhe Netanyahu, të cilët do të takohen në Mar-a-Lago për herë të gjashtë këtë vit, pritet gjithashtu të diskutojnë për Iranin, i cili Izraeli thotë se ka qenë duke rimbushur rezervat e tij të raketave pas sulmeve tregtare me vendin në fillim të këtij viti.

Dy udhëheqësit do të flasin gjithashtu për Libanin dhe Sirinë, me SHBA-në si një ndërmjetës kyç në përpjekjet izraelite për të arritur marrëveshje sigurie me fqinjët e saj veriorë.

Netanyahu do të shoqërohet nga prindërit e pengut të fundit izraelit, trupi i të cilit mbahet ende në Gaza.

Si pjesë e marrëveshjes së armëpushimit, Hamasi pranoi të lirojë të gjithë pengjet e rrëmbyera gjatë sulmeve të 7 tetorit 2023 në këmbim të të burgosurve palestinezë.

Sipas marrëveshjes, faza e dytë e marrëveshjes së paqes do të hyjë në fuqi vetëm pasi të gjithë pengjet, si të gjallë ashtu edhe të vdekur, të jenë kthyer në Izrael.//a.i/

The post SHBA – Trump takohet sot me Netanyahun për të diskutuar planin e paqes në Gaza appeared first on Agjencia Telegrafike Shqiptare.

TEL AVIV, 16 dhjetor /ATSH-AFP/ – Kryeministri izraelit Benjamin Netanyahu deklaroi sot në mbrëmje se kërkon nga qeveritë perëndimore të luftojnë me vendosmëri antisemitizmin dhe të garantojnë sigurinë e komuniteteve hebraike në mbarë botën, dy ditë pas atentatit në Sidnej.

”Unë kërkoj nga qeveritë perëndimore të bëjnë atë që është e nevojshme për të luftuar antisemitizmin dhe të sigurojnë mbrojtjen dhe sigurinë e nevojshme për komunitetet hebraike në mbarë botën”, tha Netanyahu në një mesazh të shkurtër video në hebraisht.

”Ata do të bënin mirë t’u kushtonin vëmendje paralajmërimeve tona. Kërkoj që të veprojnë, tani”, shtoi ai.

Një baba dhe djali i tij hapën zjarr  të dielën ndaj një turme të mbledhur në plazhin Bondi në Sidnej për festën hebraike të Hanukkës, duke shkaktuar të paktën 15 të vdekur dhe 42 të plagosur.

Autoritetet australiane e cilësuan sulmin si antisemit dhe terrorist duke deklaruar se ai synonte të përhapte panik mes hebrenjve të vendit dhe se autorët ishin me gjasë të motivuar ideologjikisht nga grupi xhihadist Shteti Islamik.

Atentati shkaktoi një tronditje të madhe në Izrael, duke ringjallur traumën e sulmit të përgjakshëm të 7 tetorit 2023 të kryer nga lëvizja palestineze Hamas./  /Ad.Ab./

The post IZRAEL – Netanyahu: Perëndimi të luftojë antisemitizmin appeared first on Agjencia Telegrafike Shqiptare.