Franca do të dëbojë dy diplomatë iranianë në ditët në vijim, tha sot Ministri i Jashtëm francez Jean-Noel Barrot në një postim në platformën X.

Njoftimi erdhi një ditë pasi Ministria e Jashtme iraniane njoftoi se nuk do të lejonte që dy punonjës të ambasadës franceze në Teheran, të cilët ishin përfshirë në një mosmarrëveshje diplomatike, të ktheheshin në Iran.

Muajin e kaluar, Ministria e Jashtme Franceze raportoi se punonjësit e ambasadës franceze në Teheran ishin ndaluar dhe kërcënuar nga anëtarë të shërbimeve iraniane të sigurisë.

Ministria e Mbrojtjes ka përditësuar të dhënat mbi situatën e zjarreve në vend.

Sipas Ministrisë deri në orën 20:00, situata e zjarreve paraqitet në përmirësim, me 7 vatra të regjistruara, nga të cilat 4 mbeten aktive dhe 3 nën monitorim.

Forcat operacionale vijojnë punën në terren, ndërsa mbështetja e Forcave të Armatosura ka qenë e konsiderueshme, me 140 efektivë, 3 helikopterë dhe 2 avionë Air Tractor.

Njoftimi:

Ministria e Mbrojtjes – përditësim mbi situatën e zjarreve

(18 Gusht 2026 – ora 20:00)

Ministria e Mbrojtjes informon se deri në orën 20:00, situata e zjarreve paraqitet në përmirësim, me 7 vatra të regjistruara, nga të cilat 4 mbeten aktive dhe 3 nën monitorim.

Forcat operacionale vijojnë punën në terren, ndërsa mbështetja e Forcave të Armatosura ka qenë e konsiderueshme, me 140 efektivë, 3 helikopterë dhe 2 avionë Air Tractor.

Vatrat aktive kryesore:

* Dajt, Tiranë – Vijon puna për izolimin e vatrës me 50 efektivë të FA dhe 1 helikopter. Nuk ka rrezik për zonat e banuara. Në Priskë, vatra është riaktivizuar, por po ndiqet nga forcat operacionale dhe gjithashtu nuk rrezikon banesat.

* Lufaj, Mirditë – Vatra mbetet aktive, por me intensitet të ulët dhe avancim të lehtë. Forcat janë pozicionuar pranë zonës dhe nuk ka rrezik për banesat.

* Mali i Tërbunit, Pukë – Vijon operacioni në terren të vështirë. Janë angazhuar 13 zjarrfikës, 8 punonjës të Shërbimit Pyjor, 45 forca bashkiake, 22 vullnetarë dhe 30 efektivë të FA, me mbështetjen e 2 helikopterëve. Nuk ka rrezik për zonat e banuara.

Zjarri në Gurë-Lurë është shuar plotësisht, pas një operacioni me rreth 150 forca vendore, 30 efektivë të FA dhe 2 avionë Air Tractor.

Gjithashtu është shuar plotësisht vatra në Bruç, Mat, ndërsa vatrat në Qafë Helmes, Tharri dhe Selenicë janë në monitorim dhe pa rrezik për zonat e banuara.

Në të gjitha vatrat vijon angazhimi dhe monitorimi i koordinuar i strukturave të Mbrojtjes Civile, me prioritet mbrojtjen e jetës, banesave dhe kufizimin e përhapjes së zjarreve.

Agjencia Kombëtare e Mbrojtjes Civile vijon të ndjekë në mënyrë të pandërprerë situatën në të gjithë territorin e vendit, në koordinim të ngushtë me prefekturat, bashkitë dhe të gjitha strukturat e sistemit të Mbrojtjes Civile.

Kapacitetet operacionale mbeten të angazhuara në terren dhe në gatishmëri për të ndërhyrë aty ku situata e kërkon, me prioritet mbrojtjen e jetës, banesave dhe pasurisë së qytetarëve.

Ish-kryeministri i Kosovës, Avdullah Hoti, thotë se aktualisht i gjithë procesi i themelimit të institucioneve është antikushtetues.

Ai thotë se kemi një presidente që e ka detyrën për shkak se ka qenë kryetare e Kuvendit, por aktualisht nuk është, pasi nuk është mbledhur Kuvendi.

Po ashtu, kemi një kryeministër në detyrë që ka dy vjet që bën zgjedhje e nuk bën dot institucione.

Më poshtë postimi i tij:

I gjithë procesi i themelimit të institucioneve që duhet të dalin nga zgjedhjet parlamentare është në terren jokushtetues.
1. Kuvendi nuk është themeluar brenda afatit kushtetues prej 30 ditësh nga certifikimi i zgjedhjeve. Kurdo që konstituohet, ai mund të kontestohet.
2. Funksionimi i Qeverisë në detyrë është jokushtetues pasi Kryeministri në detyrë dhe disa ministra janë betuar si deputetë, dhe sipas ligjit nuk kanë të drejtë të ushtrojnë funksione në qeveri. Vendimet e kësaj qeverie janë qartësisht të kontestueshme. Për këtë ka një aktgjykim të Gjykatës Supreme.
3. Nga betimi si deputete, ish Kryetarja e Kuvendit nuk mund të ushtrojë detyrën e Presidentes. Ajo nuk është më Kryetare e Kuvendit, pasi ajo legjislaturë është mbyllur me dhënien e betimit të 120 deputetëve të ri.
Shkaktari është Kurti dhe të gjithë ata që e pasojnë. Vetëm dikush që kundër vetë ekzistencës së shtetit të Kosovës e katandis rendin kushtetues në këtë gjendje kaosi dhe jokushtetutshmërie.

Ministria e Mbrojtjes e Emirateve të Bashkuara Arabe ka njoftuar se sistemet e mbrojtjes ajrore të vendit kanë zbuluar një kërcënim raketor.

Në një deklaratë të publikuar në rrjetet sociale, ministria u ka bërë thirrje qytetarëve dhe banorëve që të ndjekin vetëm njoftimet dhe udhëzimet e publikuara nga burimet zyrtare.

Autoritetet kanë paralajmëruar gjithashtu se tingujt e fortë që mund të dëgjohen në zona të ndryshme mund të lidhen me operacionet e përgjimit dhe reagimit të sistemeve të mbrojtjes ajrore ndaj kërcënimeve raketore.

Ministria e Mbrojtjes deklaron se strukturat e saj janë në “gatishmëri të plotë” dhe të përgatitura për t’iu përgjigjur çdo kërcënimi që mund të cenojë sovranitetin, sigurinë dhe stabilitetin e Emirateve të Bashkuara Arabe.

Deri në publikimin e këtij njoftimi, nuk janë dhënë detaje të tjera mbi origjinën e kërcënimit apo nëse janë shkaktuar dëme.

Komisioni Evropian (KE) tha të martën se pret “koordinim efektiv dhe konsultime kuptimplota ndërmjet komunave të prekura dhe institucioneve qendrore të Kosovës” për hapjen e urës kryesore mbi lumin Ibër – që lidh Mitrovicën e Jugut, të banuar me shumicë shqiptare, dhe atë të Veriut, të banuar me shumicë serbe.

Zëdhënësja e KE-së, Anita Hipper, tha në një konferencë për media më 18 gusht se qëndrimi i Bashkimit Evropian (BE) për urën është i qartë.

“Ajo që kërkojmë, gjithashtu, është që Policia e Kosovës të garantojë sigurinë e të gjitha komuniteteve, në përputhje me parimet demokratike, të drejtat e njeriut dhe sundimin e ligjit, në mënyrë që të gjithë të ndihen të sigurt”, deklaroi Hipper.

Duke folur për gjendjen aktuale, ajo rikujtoi se ura është e hapur për këmbësorë, por jo ende për qarkullimin e automjeteve.

“Ne e kemi bërë vlerësimin tonë, janë ndërmarrë hapa në këtë drejtim. dhe qëndrimi ynë mbetet se ende presim koordinim efektiv dhe konsultime kuptimplota, të cilat duhet të përmirësohen”, tha Hipper.

Shefi i Zyrës për Kosovën në Qeverinë serbe, Petar Petkoviq, ndërkaq, në një letër drejtuar emisarit të posaçëm evropian për dialogun Kosovë-Serbi, Peter Sorensen, tha se Beogradi ka pranuar me shqetësim deklaratën e zëdhënëses së BE-së.

Sipas tij, në këtë deklaratë, BE-ja shprehu vlerësimin e saj se kushtet për rihapjen e urës janë përmbushur, raporton Tanjug.

Në letër, Petkoviq tha se një vlerësim i tillë është veçmas shqetësues për Beogradin, pasi, siç tha, nuk paraqet as situatën aktuale në terren as faktin që parakushtet për të cilat palët ishin pajtuar në kuadër të kornizës së dialogut, nuk janë përmbushur.

Deklarata e BE-së vjen pasi misioni paqeruajtës i Organizatës së Traktatit të Atlantikut Verior (NATO) në Kosovë – KFOR, njoftoi më 10 gusht se ka nisur “tranzicionin gradual” të pranisë së tij të përhershme në urë.
KFOR-i tha se vendimi lidhet me përmirësimin e situatës së sigurisë, dhe se procesi do të jetë gradual dhe në varësi të kushteve. Ky mision, megjithatë, do të vazhdojë të mbajë prani të dukshme në Mitrovicën e Jugut dhe atë të Veriut, si dhe në veri të Kosovës, në përgjithësi.

Ura kryesore mbi Ibër ishte bllokuar pas luftës së vitit 1999 dhe, ndër vite, ka qenë vatër e tensioneve etnike.

Kosova dhe Serbia u pajtuan për hapjen e urës në kuadër të dialogut të ndërmjetësuar nga BE-ja. Sipas planit të zbatimit, të dakorduar më 2016, ura duhej të hapej për trafik në janar të vitit 2017.

Punimet për revitalizimin e saj, në të cilat u investuan rreth 1.5 milion euro, përfunduan më 2018. Megjithatë, ura nuk u hap asnjëherë për automjete.

Në vitin 2024, përpjekjet e Qeverisë së Kosovës për hapjen e saj nxitën kundërshtime nga serbët lokalë, dhe kërkesa nga bashkësia ndërkombëtare që çdo veprim të bëhej përmes koordinimit.

Indonezia po përballet me një aktivitet të fortë sizmik pas tërmetit me magnitudë 7,7, që goditi vendin të shtunën.

Sipas mediave lokale, deri tani janë regjistruar 2.119 pasgoditje, ndërsa autoritetet paralajmërojnë se lëkundjet mund të vazhdojnë edhe për tre deri në katër javë.

Agjencia indoneziane e Meteorologjisë, Klimatologjisë dhe Gjeofizikës bëri të ditur se pasgoditjet kanë pasur magnituda nga 1,3 deri në 6,2. Prej tyre, 24 kanë qenë mbi magnitudën 5, ndërsa 70 lëkundje janë ndier nga banorët.

Tërmeti kryesor goditi të shtunën provincën East Nusa Tenggara, ku ndodhet edhe qendra turistike e Labuan Bajo, duke shkaktuar dëme të konsiderueshme. Sipas agjencisë shtetërore të lajmeve Antara, bilanci deri tani është 68 viktima dhe 213 të plagosur.

Pas goditjeve të fuqishme, autoritetet kanë mbyllur përkohësisht disa prej atraksioneve turistike në ishullin Flores, me qëllim kryerjen e kontrolleve të sigurisë. Ndër vendet e mbyllura janë Shpella Rangko, Fshati Tradicional Wae Rebo dhe Parku Kombëtar Kelimutu.

Sipas Agjencisë Kombëtare të Menaxhimit të Fatkeqësive, më shumë se 12 mijë persona janë detyruar të largohen nga banesat e tyre për shkak të frikës nga pasgoditjet dhe janë strehuar në komplekse dhe fshatra të ndryshme.

Ekipet e emergjencave kanë evidentuar dëme të mëdha në infrastrukturë. Të paktën 914 banesa janë dëmtuar rëndë, 126 kanë pësuar dëme të moderuara dhe 317 dëme të lehta. Gjithashtu, janë dëmtuar 93 objekte arsimore, 36 objekte shëndetësore dhe 38 ndërtesa qeveritare.

Ndërkohë, aktiviteti sizmik vijoi edhe të martën me një tjetër tërmet të veçantë. Qendra Sizmologjike Euro-Mesdhetare raportoi një lëkundje me magnitudë 5,8 në zonën e Ishujve Batu, në Sumatrën Veriore. Shërbimi Gjeologjik i SHBA-së e vlerësoi tërmetin me magnitudë 5,6.

Autoritetet vijojnë monitorimin e situatës, ndërsa ekipet në terren po punojnë për vlerësimin e dëmeve dhe për garantimin e sigurisë së banorëve.

Dyshohet për lëndë plasëse në një fugon në rrugën “28 Nëntori” në Vlorë. Policia ka mbërritur në vendngjarje dhe po verifikon sinjalin e dyshuar.

Mjeti dyshohet se ka qenë i braktisur prej dy ditësh, ndërsa është tërhequr me karrotrec nga policia për verifikime të mëtejshme.

Një i ri ka mbërritur me urgjencë në spitalin e Durrësit, me plagë të shkaktuara nga mjete prerëse.

Burime bëjnë me dije se i riu është futur menjëherë në sallën e kirurgjisë, ndërsa ende nuk dihet gjendja e tij shëndetësore.

Policia konfirmon për ABC News se ngjarja është regjistruar pak minuta më parë në zonën e Plazhit, pas një konflikti dhe sherri mes të lënduarit dhe një personi tjetër. Menjëherë pas sinjalizimit, shërbimet e policisë kanë mbërritur në vendngjarje dhe kanë nisur mbledhjen e provave dhe marrjen në pyetje të personave që mund të kenë dijeni për ngjarjen.

Në vijim të hetimeve, policia po punon për identifikimin dhe kapjen e personit të përfshirë në konflikt, ndërsa po verifikohen rrethanat dhe dinamika e ngjarjes. Pritet që në vijim të ketë më shumë detaje mbi shkaqet e konfliktit dhe gjendjen shëndetësore të të riut.

Janë zbardhur emrat e personave të cilët kanë përfunduar në pranga në lidhje me vrasjen e turistit portugez, që u masakrua nga goditjet me thikë në Ksamil nga autori Sokrat Vata.

Bëhet fjalë për shtetasit :

Sokrat Lipan alias Sokrat Vata
Nuh Mahmutoglu, dhe Ezgi Perlak, të dy me shtetasi turke
Serxhi Selimi,
Ervis Bunci,
Ildi Cekani
Murat Zhabina
Miosid Matushaj
Luciano Seferi,
Romeo Shehu
Kristi Koshi

Si dhe u shpallën në kërkim shtetasit David Heurtevent dhe Bekim Bulica.

Sipas hetimeve të policisë, 20-vjeçari portugez u përfshi në një konflikt në orët e para të mëngjesit në Ksamil, ku më pas dyshohet se u godit disa herë me thikë nga Sokrat Vata. I riu humbi jetën si pasojë e plagëve të marra.

Hetimet kanë nxjerrë në pah edhe persona të tjerë që dyshohet se kanë qenë të përfshirë në konflikt, kanë ndihmuar autorin të largohej ose nuk kanë kallëzuar ngjarjen në polici.

Në lidhje me ngjarjen, policia ka ushtruar kontrolle dhe ka shoqëruar dhjetëra persona, ndërsa hetimet vijojnë për të dokumentuar rolin e secilit prej të arrestuarve dhe personave të shpallur në kërkim.

Një rrugë e re furnizimi ushtarak iranian nga Rusia nëpërmjet Detit Kaspik është zbuluar nga një dokument i qeverisë evropiane (BE), i cituar nga NBC News.

Sipas dokumentit, përmbajtja e të cilit u konfirmua nga një zyrtar perëndimor, Rusia po transporton eksplozivë, pjesë dronësh dhe municione në Iran, duke kontribuar në përpjekjet e Teheranit për të zëvendësuar disa nga pajisjet ushtarake që humbi gjatë luftës me Shtetet e Bashkuara dhe Izraelin.

Ngarkesa përfshin trinitrotoluen ( TNT ), një lëndë shpërthyese që mund të përdoret, ndër të tjera, për të prodhuar koka bërthamore.

Shkalla e transferimeve dhe sa larg ka përparuar arsenali i Iranit mbeten të panjohura, pasi agjencitë perëndimore të inteligjencës nuk i kanë bërë publike vlerësimet e tyre.

Pse Deti Kaspik është një “korridor i sigurt”

Me rëndësi të veçantë është rruga që Moska dhe Teherani dyshohet se kanë zgjedhur për të transportuar materialin në fjalë. Deti Kaspik është një det pa dalje në det, i kufizuar ekskluzivisht nga Rusia, Irani, Kazakistani, Turkmenistani dhe Azerbajxhani.

Statusi ligjor i Detit Kaspik nuk lejon praninë e forcave të armatosura nga vendet që nuk kanë qasje në të. Kjo praktikisht do të thotë që anijet luftarake amerikane ose të tjera perëndimore nuk mund të vendosen atje për të kapur ngarkesat që lëvizin midis porteve ruse dhe iraniane.

Në të njëjtën kohë, anijet mund të çaktivizojnë transponderët e sistemit të tyre të identifikimit automatik (AIS), duke e bërë më të vështirë monitorimin e lëvizjeve të tyre.

Kjo rrugë u lejon kështu të dy vendeve të anashkalojnë kalimet detare dhe pikat ku SHBA-të dhe aleatët e saj kanë aftësi shumë më të mëdha mbikëqyrjeje.

Qëllimi është rindërtimi i programit iranian të dronëve. Rëndësi e veçantë u kushtohet komponentëve të dronëve të përfshirë në ngarkesë.

Para luftës, Irani kishte zhvilluar një nga programet më të rëndësishme të dronëve në rajon, të përqendruar në Shahed, të cilin e kishte furnizuar edhe në numër të madh në Rusi për përdorim në luftën në Ukrainë.

Sulmet amerikane dhe izraelite kanë goditur një pjesë të konsiderueshme të aftësive ushtarake iraniane. Rivendosja e prodhimit të dronëve kërkon si komponentët e nevojshëm ashtu edhe eksplozivët për kokat e tyre luftarake – materiale që, sipas dokumentit evropian, përfshihen në dërgesat ruse.

Ndërrimi i roleve midis Moskës dhe Teheranit

Zhvillimi është gjithashtu i rëndësishëm për një arsye tjetër: ai përmbys në një farë mase rolet që Rusia dhe Irani kanë pasur deri vonë në bashkëpunimin e tyre ushtarak.

Për vite me radhë, rrjedha e pajisjeve ushtarake është zhvendosur kryesisht nga Teherani në Moskë. Irani i ka siguruar Rusisë dronë, si dhe asistencë teknike për zhvillimin e linjave të prodhimit përkatës në tokën ruse, për të forcuar Moskën në frontin ukrainas.

Tani, sipas informacioneve të reja, Rusia është ajo që furnizon ushtarakisht Iranin.

Për Moskën, forcimi i Teheranit shërben gjithashtu për qëllime më të gjera strategjike. Një Teheran më i fortë ushtarakisht mund ta detyrojë SHBA-në të mbajë më shumë forca dhe burime në Lindjen e Mesme, duke kufizuar potencialisht vëmendjen dhe mjetet që mund t’i ndajë Ukrainës.

Izraeli kishte nisur rrugën në mars

Kjo linjë furnizimi e veçantë ishte vënë tashmë në shënjestër nga Izraeli.

Sipas Times of Israel, sulmet ajrore izraelite në mars të vitit 2026 goditën portin e Bandar Anzali, në bregdetin verior të Kaspikut të Iranit.

Sulmet shkatërruan infrastrukturën portuale dhe anijet e Marinës Iraniane, me zyrtarët izraelitë që pretendojnë se qëllimi ishte ndërprerja e kësaj linje të veçantë furnizimi.

Megjithatë, provat në dokumentin evropian të cituar tani nga NBC News sugjerojnë se transferimet ose vazhduan ose rifilluan pas sulmeve izraelite. Prandaj,

sulmi ndaj Bandar Anzali duket se ka shkaktuar një ndërprerje të përkohshme ose ridrejtim në vend të një mbylljeje të përhershme të linjës.

Vështirë për të ndaluar rrjedhën

Gjeografia e Kaspikut e ndërlikon më tej çdo përpjekje për të kapur dërgesat.

Pesë vendet bregdetare kanë një sërë portesh, gjë që lejon një sërë rrugësh dhe e bën më të vështirë neutralizimin e rrjetit me sulme në një strukturë të vetme.

Moska dhe Teherani nuk kanë komentuar publikisht për dërgesat specifike.

Gjithashtu mbetet e paqartë nëse sasia e materialit rus është e mjaftueshme për të kompensuar humbjet e pësuara nga arsenali iranian nga sulmet e SHBA-së dhe Izraelit.

Ministri i Jashtëm rus Sergei Lavrov tha se Rusia ka të drejtë ta konsiderojë përfshirjen e drejtpërdrejtë të Britanisë në sulmet ndaj territorit rus si pjesëmarrje në luftën në Ukrainë, raportoi agjencia e lajmeve Interfax.

Komentet e tij erdhën pas publikimit të një artikulli të ‘Times’ të shtunën, se dronët e prodhuar në Britani ishin përdorur për herë të parë në sulme me rreze të gjatë veprimi ndaj Rusisë.

Pas publikimit, ambasada ruse në Londër paralajmëroi Britaninë për “pasoja” të paspecifikuara për furnizimin e Kievit me dronë.

Kryeministri britanik Andy Burnham tha sot se Britania do ta mbështesë Ukrainën “100%” në luftën e saj kundër Rusisë dhe do të qëndrojë pranë Kievit “në orën e saj të nevojës”.

Moska më parë ka akuzuar specialistët britanikë për pjesëmarrje në sulme në tokën ruse, duke thënë se roli i Britanisë do të “merret parasysh” në përgjigjen e saj.

Dy ditë pasi i ra të fikët në një ndeshje miqësore kundër Leipzig, futbollisti Jamal Musiala pësoi një tjetër goditje shëndetësore.

Këtë herë kundër Heidenheim, në një miqësore të Bayern Munich.

Lojtari ndërkombëtar gjerman papritmas ra në tokë pa ndjenja, por disa minuta më vonë ai rifitoi vetëdijen me ndihmën e mjekëve dhe përfundimisht u largua nga fusha (VIDEO këtu).

Rënia e re vjen në një kohë veçanërisht të ndjeshme për 23-vjeçarin, i cili sapo ishte rikthyer në aksion pas dëmtimit të rëndë që pësoi në vitin 2025 dhe po përpiqet të rikthehet plotësisht në ritmin garues.

(VIDEO këtu)

Ish-kryeministri i Kosovës, Avdullah Hoti, thotë se aktualisht i gjithë procesi i themelimit të institucioneve është antikushtetues.

Ai shprehet se kemi një presidente që e ka detyrën për shkak se ka qenë kryetare e Kuvendit, por aktualisht nuk është, pasi nuk është mbledhur Kuvendi.

Po ashtu, kemi një kryeministër në detyrë që ka dy vjet që bën zgjedhje e nuk bën dot institucione.

Më poshtë postimi i Abdullah Hotit:

“Të gjitha institucionet në Kosovë aktualisht janë antikushtetuese. I gjithë procesi i themelimit të institucioneve që duhet të dalin nga zgjedhjet parlamentare është në terren jokushtetues.

1. Kuvendi nuk është themeluar brenda afatit kushtetues prej 30 ditësh nga certifikimi i zgjedhjeve. Kurdo që konstituohet, ai mund të kontestohet.
2. Funksionimi i Qeverisë në detyrë është jokushtetues pasi Kryeministri në detyrë dhe disa ministra janë betuar si deputetë, dhe sipas ligjit nuk kanë të drejtë të ushtrojnë funksione në qeveri. Vendimet e kësaj qeverie janë qartësisht të kontestueshme. Për këtë ka një aktgjykim të Gjykatës Supreme.
3. Nga betimi si deputete, ish Kryetarja e Kuvendit nuk mund të ushtrojë detyrën e Presidentes. Ajo nuk është më Kryetare e Kuvendit, pasi ajo legjislaturë është mbyllur me dhënien e betimit të 120 deputetëve të ri.

Shkaktari është Kurti dhe të gjithë ata që e pasojnë. Vetëm dikush që kundër vetë ekzistencës së shtetit të Kosovës e katandis rendin kushtetues në këtë gjendje kaosi dhe jokushtetutshmërie.”

Kryeministri në detyrë i Kosovës, Albin Kurti, pas takimit me kryetarin e Lidhjes Demokratike të Kosovës, Lumir Abdixhiku, tha se palët kanë diskutuar për kriteret dhe figurën e presidentit apo presidentes së re të Kosovës, duke shprehur vullnet për arritjen e një marrëveshjeje.

Kurti tha se qëllimi është që, në bazë të vullnetit të qytetarëve, Kosovës t’i sjellin një president apo presidente të re, pa pasur nevojë për zgjedhje të reja.

“Ne në bazë të vullnetit të qytetarëve të Kosovës që vendit t’i sjellim një president apo presidente të re, që nuk ka nevojë për zgjedhje të reja, që duhet të sigurojmë funksionim demokratik të institucioneve të shtetit dhe se për këtë mund dhe duhet të ndërtojmë mirëbesim. Shqyrtuam e diskutuam kriteret për figurën e presidentit apo presidentes së re nga shumë kënde dhe në disa rrafshe, por në veçanti sa i përket vlerave, meritave dhe kontributit në shoqëri, për me sa vëzhgohet edhe në profesionet e caktuara. Është vendim tejet i rëndësishëm dhe është proces shumë i ndjeshëm”, është shprehur ai.

Një aksident rrugor ndodhi pasditen e sotme (18 gusht) në bulevardin “Ismail Qemali” në Vlorë, në zonën e njohur si ‘Aleksandria’.

Dy drejtues skuterash janë përplasur me njëri-tjetrin, ndërsa si pasojë e aksidentit kanë mbetur të lënduar të dy.

Të plagosurit janë transportuar drejt Spitalit Rajonal të Vlorës, ku po marrin ndihmën e nevojshme mjekësore.

Në vendngjarje kanë mbërritur shërbimet e Policisë, të cilat kanë nisur hetimet për të përcaktuar shkaqet dhe rrethanat e aksidentit.

Paraprakisht nuk raportohen detaje të tjera për gjendjen shëndetësore të të lënduarve.