Partia Demokratike ka hequr dorë nga bojkoti i pjesëmarrjes në Komisionin e Reformës Territoriale.

Vendimi për të marrë pjesë në këtë komision është marrë pas mbledhjes së grupit parlamentar demokrat, ku të gjithë deputetët që morën fjalën kërkuan që opozita të jetë pjesë e Reformës Territoriale.

Analisti Ergys Mërtiri, në lidhje të drejtpërdrejtë në edicionin qendror të lajmeve në televizionin kombëtar Vizion Plus, me moderator Aleksandër Furxhi, tha se ky vendim tregon paqartësinë dhe kontradiktat e brendshme me të cilat përballet opozita.

Sipas Mërtirit, Partia Demokratike ndodhet mes dy qëndrimeve të kundërta, nga njëra anë kërkon të jetë pjesë e institucioneve për të ndikuar në vendimmarrje, ndërsa nga ana tjetër ka ndërtuar një diskurs politik të bazuar në mosnjohjen e shtetit dhe armiqësinë ndaj institucioneve.

Sa i përket kërkesës së deputetëve që opozita të jetë pjesë e Reformës Territoriale, Mërtiri u shpreh se bashkëpunëtorët e kryedemokratit nuk kanë një objektiv të qartë politik dhe janë të lidhur ngushtë me fatin e tij politik.

INTERVITA E PLOTË:

Partia Demokratike vendosi, pas disa mëdyshjesh të marrë pjesë në këtë komision. Çfarë tregon ky qëndrim i Partisë Demokratike dhe çfarë ndikimi pritet të ketë në skenën politike të momentit, veçanërisht në sfondin e zgjedhjeve vendore që do të mbahen pas pak më shumë se një viti?

Ergys Mërtiri: Ky qëndrim tregon paqartësinë ku ndodhet opozita për shkak të komplekseve me të cilat është brumosur në aktivitetin e saj politik. Nga njëra anë, ajo kërkon të jetë në komisione për të qenë pjesë e vendimmarrjes dhe për të ndikuar sa të mundet në çështjet që kanë rëndësi për vendin, por edhe për pozicionin e saj në raport me pushtetin. Nga ana tjetër, ajo kompleksohet sepse ka hyrë në një hulli të mosnjohjes së shtetit dhe armiqësisë me institucionet. Përfshirja në institucione e vendos atë në kontradiktë me veten, sepse ndërsa deklaron se shteti ka falimentuar, se vendi është i kapur dhe se jemi në një “narkoshtet”, i duhet të marrë pjesë në institucionet e këtij shteti për të ushtruar funksionet e saj si opozitë. Kjo e bën veprimtarinë e saj politike komplekse, nëse merr pjesë në institucione, në sytë e anëtarëve duket sikur po bën pazare, ndërsa po nuk mori pjesë, humbet shumë nga favoret që vijnë prej asaj pjesëmarrjeje.

Sali Berisha duket se u kundërshtua nga disa bashkëpunëtorë të tij të ngushtë brenda Partisë Demokratike pikërisht lidhur me idenë e pjesëmarrjes ose jo në këtë komision. A tregon kjo se ka ndryshuar diçka brenda radhëve të kupolës së Partisë Demokratike?

Ergys Mërtiri: Nuk besoj, sepse nuk shoh te ndjekësit e z.Berisha ndonjë qartësi apo objektiv politik në lidhje me zhvillimet në vend. Ata janë aty për t’iu bindur Berishës, pasi e dinë që fatin e tyre e kanë të lidhur me të. Këto janë kundërshtime brenda normales. Përveç bindjes ndaj Berishës, ata kanë edhe nevojat e tyre politike, kanë nevojë të marrin pjesë në institucione për t’u shfaqur dhe për të bërë politikë. Brenda limitit që u lejon Berisha, ata mund të bëjnë propozime apo edhe të kundërshtojnë herë pas here, por nëse Berisha do të kishte një vendim të prerë dhe të sigurt, ata sigurisht që do të nënshtroheshin, siç kanë bërë gjithmonë.

Partia Demokratike ka njoftuar se në datën 10 do të mbajë protestën e radhës. Ndërkohë, Sali Berisha thotë se qytetarët po i dërgojnë mesazhe se duan të qëndrojnë në mënyrë të vazhdueshme dhe jo ta ndërpresin protestën pas dy orësh, siç ka ndodhur herë të tjera. Sa gjasa ka ky skenar?

Ergys Mërtiri: Ky skenar mund të ketë gjasa, por do të realizohej me shumë vështirësi dhe siklet, pasi Berishës do t’i duhej të shpenzonte të gjithë bateritë për t’i mbajtur njerëzit në shesh dhe protesta mund të reduktohej në një grup shumë të vogël njerëzish. Nuk e di nëse do ta realizojnë dot, sepse do të ishte një konsumim shumë i madh. Megjithatë, Berisha është nën presion sepse duhet t’i kënaqë militantët me aksione që i paraqiten publikut si përmbysëse, për të realizuar premtimin se “jemi në kilometrin e fundit”. Nga ana tjetër, ai detyrohet të ekspozohet përpara publikut me paaftësinë e tij për të përmbysur qeverinë dhe vetëm përpiqet të fitojë kohë me gënjeshtra të njëpasnjëshme. Kjo mënyrë e të bërit politikë po e vendos gjithmonë e më shumë në vështirësi për të bindur militantët se ai e ka seriozisht dhe se kjo është vërtet rruga e duhur për përmbysjen e qeverisë.

Dosjet e publikuara së fundmi mbi Jeffrey Epstein kanë hapur një kapitull të ri tronditës të njërit prej skandaleve më të mëdha seksuale të dekadave të fundit. Sipas një email-i të përfshirë në dokumentet zyrtare, aludohet se Epstein ka pasur një fëmijë sekret rreth 15 vite më parë.

Email-i në fjalë mban datën 21 shtator 2011 dhe pretendohet se është dërguar nga Sarah Ferguson, ish-bashkëshortja e Andrew Mountbatten-Windsor.

Gazeta The Independent ka kërkuar koment nga Sarah Ferguson lidhur me këto pretendime, por deri tani nuk ka pasur një reagim zyrtar.

Publikimi masiv i dokumenteve dhe lidhjet me figura të fuqishme

Departamenti Amerikan i Drejtësisë publikoi më 30 janar rreth 3 milionë faqe dokumente, përfshirë 2 mijë video dhe 18 mijë fotografi, nga dosjet e Epstein. Publikimi u bë më shumë se 1 muaj pas afatit ligjor të përcaktuar.

Materialet hedhin më shumë dritë mbi marrëdhëniet që Epstein kishte me burra të fuqishëm dhe figura të njohura ndërkombëtare, mes tyre Elon Musk, Bill Gates dhe Sekretari Amerikan i Tregtisë, Howard Lutnick.

Autoritetet theksojnë se përfshirja e emrave në dokumente nuk nënkupton automatikisht përfshirje në veprime të paligjshme.

Avokatët e viktimave kërkojnë ndërhyrje urgjente

Pas publikimit të dokumenteve të fundit, dy avokatë që përfaqësojnë të mbijetuarit e abuzimeve të lidhura me Epstein kanë kërkuar “ndërhyrje të menjëhershme gjyqësore”. Avokatët Brittany Henderson dhe Brad Edwards i janë drejtuar me letra dy gjyqtarëve federalë që kanë mbikëqyrur çështjet penale kundër Epstein dhe Ghislaine Maxwell.

Sipas tyre, Departamenti i Drejtësisë ka publikuar dhjetëra dokumente dhe fotografi duke ekspozuar identitetin e viktimave. “Vetëm në 48 orët e fundit janë raportuar mijëra imazhe, që prekin gati 100 të mbijetuar, jetët e të cilëve janë tronditur sërish”, thuhet në letrat e siguruara nga CNN.

Avokatët shtojnë se përmasat e gabimeve janë të pashpjegueshme, sidomos kur detyra kryesore e urdhëruar nga gjykata ishte e qartë: fshehja e emrave të viktimave para publikimit.

Foto nudo të publikuara gabimisht

Skandali u thellua edhe më tej pasi Departamenti i Drejtësisë publikoi gabimisht dhjetëra fotografi nudo, ku shfaqeshin trupa dhe fytyra të vajzave të reja, ose me shumë gjasë të mitura. Rreth 40 imazhe, të verifikuara nga New York Times, duket se janë shkrepur në plazhe, ndoshta në ishullin privat të Epstein dhe në dhoma gjumi.

Fotografitë u hoqën menjëherë pasi autoritetet u njoftuan për gabimin.

Një zëdhënëse e Departamentit të Drejtësisë deklaroi se po punohet “pa ndërprerje për të adresuar shqetësimet e viktimave dhe për të bërë redaktimet e nevojshme të informacionit personal dhe materialeve me natyrë seksuale”.

Sipas saj, dokumentet do të ripublikohen vetëm pasi të kryhen të gjitha redaktimet e duhura.

Publikimi i dosjeve Epstein, që synonte transparencë, ka hapur një debat të fortë mbi përgjegjësinë institucionale, mbrojtjen e viktimave dhe mënyrën se si po menaxhohet një nga çështjet më të ndjeshme në historinë e drejtësisë amerikane.

Kuvendi mblidhet këtë të martë, më 3 shkurt, në seancën e radhës plenare, ku në rendin e ditës janë parashikuar 14 pika, ndër të cilat njëra prej tyre pritet të shoqërohet me debate politike. Bëhet fjalë për propozimin e shumicës për ndryshime në përbërjen dhe drejtimin e Komisionit të Posaçëm për Reformën Administrativo-Territoriale.

Partia Socialiste kërkon rishikimin e formulës aktuale të komisionit, duke kaluar nga ndarja e barabartë mes mazhorancës dhe opozitës në një përbërje me 17 anëtarë, ku 9 do t’i përkasin PS-së, ndërsa 8 opozitës.

Po ashtu, propozohet që komisioni të mos ketë më dy bashkëkryetarë, por të drejtohet nga një kryetar i mazhorancës, ndërsa opozita të përfaqësohet me një nënkryetar.

Sipas socialistëve, këto ndryshime janë të domosdoshme për të garantuar vijimin e punës së komisionit, pas bojkotit të mbledhjeve nga opozita.

Pas mungesës së opozitës në mbledhjen e fundit të Komisionit të Reformës Territoriale, mazhoranca ka bërë të qartë se nuk do të tërhiqet nga kërkesa, e cila pritet të shqyrtohet dhe votohet sot në seancë.

Partia Demokratike nga ana tjetër pretendon se nuk ka marrë pjesë për shkak të agjendave paralele dhe jo për arsye bojkoti. Madje një ditë më parë në mbledhjen e zhvilluar nga Kryesia e PD-së, demokratët kanë vendosur që të mos i bojkotojnë komisionet e posaçme të reformës territoriale dhe zgjedhore.

Ndryshimi i qëndrimit të demokratëve erdhi vetëm pak orë pasi socialistët, deklaruan se do ta çonin përpara dhe do ta miratonin në seancën e së martës ndryshimin e përbërjes së komisionit, duke marrë edhe shumicën dhe drejtimin.

Kryetari i socialistëve, Arbjan Mazniku, shpjegoi se ngutja për të ecur përpara me reformën territoriale u diktohet nga zgjedhjet lokale të vitit të ardhshëm, por edhe nga procesi i negociatave.

Në rast se propozimi miratohet, drejtimi i Komisionit të Reformës Territoriale do t’i kalojë deputetit socialist Arbjan Mazniku, ndërsa Luçiano Boçi nga Partia Demokratike do të mbajë funksionin e nënkryetarit. Nga ana tjetër, PD ka paralajmëruar mundësinë e ngritjes së komisioneve paralele për të hartuar propozimet e saj për reformat.

Pavarësisht kundërshtive të opozitës, shumica parlamentare i ka votat e nevojshme për të miratuar ndryshimet e propozuara.

Diskutime të tjera

Në axhendën e Kuvendit përfshihen gjithashtu ndryshime në ligjin “Për barnat narkotike dhe lëndët psikotrope”, si edhe në ligjin “Për mbrojtjen nga diskriminimi”. Po ashtu, do të zhvillohet një interpelancë me ministrin e Drejtësisë, Besfort Lamallari, e kërkuar nga deputeti i Partisë së Lirisë, Tedi Blushi.

Deputetët do të diskutojnë edhe projektligjin “Për parandalimin e konfliktit të interesave në ushtrimin e funksioneve publike”, si dhe një projektvendim për ngritjen e Nënkomisionit për Zhvillim të Qëndrueshëm, në kuadër të Komisionit Parlamentar për Burimet Natyrore, Infrastrukturën dhe Zhvillimin e Qëndrueshëm.

Pjesë e axhendës së sotme të Kuvendit është edhe projektligji “Për ratifikimin e marrëveshjes së financimit ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, Francës dhe Komisionit Evropian, për programin e bashkëpunimit (Interreg VI-C) Interreg Europe 2021-2027”.

Zhvillimet e brendshme dhe të jashtme, kanë shtuar bipolarizimin politik dhe udhëtimin në Strasburg, ka ngritur sërish javën e shkuar PD e Berishës me 0.6% mbështetje. PS ka një rënie të lehtë me 0.6%.

Kurse partitë e reja, dhe shpresa për krijimin e një partie më të re, mbeten në vendnumëro.

Me veprimet e tij, bojkot, protesta e molotov, sërish fiton Sali Berisha. Jo vendin e parë, gjithmonë vendin e dytë, por këtë fillim shkurti i pacënuar si nga lart dhe nga poshtë.

Sekretari i Përgjithshëm i Partisë Socialiste, Blendi Klosi, ishte i ftuar në emisionin “Të Paekspozuarit” në MCN TV, ku ka folur për reformën territoriale.

Ai tha se opozita ka patur qasje bllokuese ndaj Komisionit që është ngritur në funksion të kësaj reforme, ndaj do të merren të gjithë masat për të zhbllokuar punën e komisionit.

Biseda: 

Ylli Rakipi: Zoti Klosi, ç’do të bëni? Do të vijoni me planin për zëvendësimin e bashkëkryetarit dhe heqjen e vetos për PD-në? Apo do të prisni se mos paraqitet Boçi?

Blendi Klosi: Kam qenë pjesë e Komisionit, jam pjesë, kam qenë në mbledhjen e kryesisë së Kuvendit ku u bë ky diskutim, a të vijojë nesër vendimi, apo ti jepet një mundësi. Është publike, nuk mund të thotë bashkëkryetari, që nuk dija gjë. Është publike, u ngritën atje thanë nuk pranojmë kërcënime, nuk pranojmë çfarë thoni ju. Nuk pyesim për deadline. Nuk erdhën sot. Problemi është këtu, është krijuar komisioni në nëntor. Komisioni si çdo komision parlamentar, është i vetmi që ia dhamë një benefit në shkelje të rregullore, të kemi bashkëkryetar dhe numër të barabartë anëtarësh, për tu ndjerë komodë, sepse ky komision i posaçëm, ka afat të kufizuar kohe dhe ka qëllim specifik.
Ka detyrë të diskutojë dhe propozojë një reformë të re territorial. Cfarë është kërkuar? Të ketë bashkëkryetar dhe numër të barabartë tetë anëtarësh. Kjo bën që kemi tre muaj që nuk kemi bërë një mbledhje pune. Vetëm një mbledhje inauguruese. Duhet të kemi paritet dhe të jenë ata në mbledhje, bashkëkryetari dhe kjo ka bërë që komisioni të mos fillojë punën. Nuk kërkojmë të mos kemi prezencën e opozitës, por nga pikëpamja funksionale, komisioni të funksionojë, të takohen ekspertët, të dëgjohen, të bëhen takime në terren. Këtu padyshim, është shumë e nevojshme të jenë përfaqësuesit e opozitës. Kërkojmë të kemi mundësi që komisioni të funksionojë. Nuk mund të ketë komisioni dakordësi 100%. Që komisioni mos funksionojë dhe mos firmosë dot një letër, nuk ndodh me asnjë komision tjetër. Që komisioni të ecë përpara, duhet të ecë përpara, pavarësisht qëndrimit. Është e vërtetë kjo. Nuk jemi mbledhur dot.  Ne mendojmë se duhet të kthehemi në normalitetin e komisioneve parlamentare. U kërkua nga mazhoranca nëse doni të punoni, mblidhuni të hënën. Nëse do të vinin sot, vendimi do të merrej nesër. Në rast se nuk shprehen vullnet… Prezenca në komision, si çdo komision tjetër, i jep të drejtën opozitën.

Andi Tela: Do e votoni nesër?

Blendi Klosi: Po do ta votojmë. Le të ketë paritet, por nga pikëpamja menaxheriale… Është në rendin e ditës nesër.  Nesër, deri në momentin që do të votohet jemi të gatshëm që komisioni të funksionojë.

Ditën e sotme (3 shkurt) vendi ynë do të ndikohet nga kushte atmosferike reletivisht të paqëndrueshme.

Moti parashikohet me alternime vranësirash mesatare deri të dendura si dhe intervale të herëpashershme me kthjellime kryesisht përgjatë ultësirës perëndimore e në jug të vendit.

Sipas SHMU-së, nga orët e para të 24 orëshit deri gjatë orëve të mëngjesit priten reshje të dobëta shiu të karakterit lokal. Gjatë ditës kryesisht në orët e mesditës e pasdites, reshjet parashikohen me intensitet kryesisht të ulët, ndërsa nuk do të mungojnë shtrëngata afatshkurtra në zonën qendrore. Në orët e mbrëmjes parashikohet ndërprerja e reshjeve.

Në lartësinë mbi 900-1000 metër në veri-verilindje-juglindje reshje bore me intensitet të ulët.

Era do të fryjë do të fryjë me drejtim nga verilindje – jugperëndim me shpejtësi mesatare 6 m/s, përgjatë zonave luginore dhe vijës bregdetare në jug në pjesën e parë të ditës era hera-herës me shpejtësi deri 10m/s.

Në vitin 2025 rezulton se ka pasur rritje të ndjeshme të numrit të shtetasve të huaj me leje qëndrimi që jetojnë e punojnë në Shqipëri.

Deri në fund të vitit 2025, numri i të huajve me leje qëndrimi në Shqipëri arriti në 27 mijë e 514 banorë sipas të dhënave të Regjistrit Elektronik për të Huajt (FER) dhënë për Monitor nga Policia e Shtetit, duke shënuar një nivel rekord. Pjesa më e madhe e tyre, rreth 65% janë për arsye pune dhe rreth 15% për bashkim familjar.

Në raport me 2024 numri i shtetasve të huaj të pajisur me leje qëndrimi u rrit rreth 4,800 banorë apo 22%.

Nga totali prej 27 mijë e 514 lejesh qëndrimi aktive deri në fund të vitit 2025, shumica e të huajve janë nga Kosova dhe Italia.

Numri i shtetasve nga Kosova të pajisur me leje qëndrimi arriti në 6 mijë e 76 banorë, që përbën rreth 22% të totalit. Krahasuar me 2024 numri i tyre u rrit 32%.

Ndryshe nga shtetasit e tjera, banorët nga Kosova pajisen me leje qëndrimi me afat 5- vjeçar.

Pas Kosovës numrit më të lartë të shtetasve të huaj të pajisur me leje qëndrimi është nga Italia me 3 mijë e 776 persona që përbëjnë 14% të totalit të të huajave. Krahasuar me 2024 numri i tyre u rrit 75%.

Krahas Italisë e Greqisë, që tradicionalisht kanë kryesuar për leje qëndrimi, një rritje e ndjeshme në 2025-n është shënuar nga shtetasit nga India dhe Filipinet e Egjipti, që janë ngjitur përkatësisht në vend të tretë, të katërt e të pestë.

Numri i shtetasve nga India në 2025 arriti në 2 mijë e 399 apo 47%. Shtetasit nga India përbënë 14% të totalit të huajve të pajisur me leje qëndrimi. Këta punojnë kryesisht në shërbime dhe teknologji informacioni.

Shtetasit nga Filipinet të pajisur me leje qëndrimi në 2025 janë 2 mijë e 213 persona apo 130% më tepër sesa 2024. Këta shtetas punojnë kryesisht në shërbimet shtëpiake dhe në hotele e restorante e më pak në fason.

Për 2025 numri i shtetasve të huaj nga Egjipti ishte 2 mijë e 7 persona apo rreth 2 herë më shumë sesa në 2024 dhe punojnë në sektorë të ndryshëm, deri në bujqësi. Ata përbënë 7% të totalit të të huajve në 2025.

Numri i shtetasve nga Turqia ishte 1 mijë e 862 persona apo përbënë 7% të totalit në 2025. Në raport me 2024 numri i tyre u rrit rreth 47%.

Nga i shtetasve të huaj nga SHBA arriti në 1 mijë e 128 banorë apo 164% më shumë sesa në 2024.

Nga ana tjetër Miamare ka 445 persona (2% të totalit) apo 77% më shumë sesa në 2024.

Numri i shtetasve nga Kina arriti 362 persona apo 42% më shumë sesa në 2024.

Numri i shtetasve të huaj nga Nigeria arriti 184 persona për vitin 2025.

Aplikime të reja për 2025, kryesohen nga shtetasit indianë dhe filipinas

Gjatë vitit 2025, sipas Regjistrit Elektronik për të Huajt (FER), janë përpunuar gjithsej 19 mijë e 321 aplikime për leje qëndrimi, që tregon një rritje të dukshme krahasuar me 13 mijë e 176 aplikime që u përpunuan gjatë vitit 2024. Krahasuar me vitin 2024 numri i tyre me 6,145 aplikime me apo 47% më shumë.

Gjatë vitit 2025, shtetësitë kryesore që kanë aplikuar për herë të parë për leje qëndrimi është India me 2 mijë e 691 aplikime, që përbën 14% të totalit, Filipinet me 2 mijë e 415 aplikime (13%), Italia me 2 mijë e 239 aplikime (12%), Egjipti me 2 mijë e 198 aplikime (11%), Kosova me 1 mijë e 813 aplikime (9%), Turqia me 1 mijë e 441 aplikime (7%), SHBA me 606 aplikime (3%), Mianmar me 506 aplikime (3%), Rusia me 442 aplikime (2%) dhe Ukraina me 312 aplikime (2%).

65% e aplikimeve të reja për punësim

Megjithatë motivi kryesor për pajisjen me leje qëndrimi në Shqipëri vijon të mbetet për çështje punësimi dhe bashkimi familjar.

Për vitin 2025, nga totali i aplikimeve të reja 65% e tyre ishin për leje unike punësimi, e ndjekur nga aplikimet për bashkim familjar që përbënë 13% apo rreth 5% e tyre ishin për qëllime studimi. Ndërsa numri i shtetasve të huaj që aplikuan për leje të përhershme qëndrimi ishte 40 apo duke përbërë 0.2% të totalit të numrit të aplikimeve për 2025.

Nga totali i aplikimeve për 2025, sipas të dhënave 7,049 apo 36.4% prej tyre janë aplikime nga femra dhe 12 mijë e 272 apo 63.6% nga meshkuj./ Marrë nga Monitor.al

Muaji Janar i vitit 2025 ishte më i ngrohti i regjistruar ndonjëherë, duke vijuar me një seri temperaturash ekstreme globale pavarësisht një ndryshimi drejt modelit të motit ftohës të La Nina-s. Alarmin për keto fakte e kanë thënë shkencëtarët e Bashkimit Evropian.

Janari zgjati me një seri të nxehtësisë së jashtëzakonshme, në të cilën 18 nga 19 muajt e fundit panë një temperaturë mesatare globale prej më shumë se 1.5 gradë Celsius mbi kohët para-industriale, tha Shërbimi i Ndryshimeve Klimatike Kopernikus i BE-së në një buletin mujor.

Kjo ndodhi pavarësisht se bota u zhvendos nga modeli i ngrohjes El Nino – i cili ndihmoi që viti 2024 të ishte viti më i ngrohtë në botë i regjistruar ndonjëherë – dhe u kthye drejt fenomenti të tij më të freskët të La Nina-s, i cili përfshin ftohjen e ujërave ekuatoriale të Paqësorit dhe mund të frenojë temperaturat globale, shkruan A2.

Temperatura mesatare globale në janar ishte 1.75C më e lartë se në kohët para-industriale.

Kopernicus vlerëson se La Nina ende nuk është zhvilluar plotësisht dhe bota aktualisht është në kushte neutrale midis dy fazave. Modele të tjera të të dhënave mund të ndryshojnë, me shkencëtarët amerikanë që treguan muajin e kaluar se kushtet e La Nina-s ishin formuar.

Shkencëtarët në Berkeley Earth dhe në Zyrën Meteorologjike të Mbretërisë së Bashkuar kanë thënë se presin që viti 2025 të jetë viti i tretë më i ngrohtë i regjistruar ndonjëherë – më i ftohtë se 2024 dhe 2023 për shkak të zhvendosjes drejt La Nina, megjithëse mbeten pasiguri se si do të zhvillohet fenomeni.

Globalisht, temperaturat mesatare të sipërfaqes së detit në janar ishin të dytat më të larta të regjistruara ndonjëherë për këtë muaj, të tejkaluara vetëm në janar 2024.

Një raport nga World Weather Attribution zbuloi se një “stuhi perfekte” e ndryshimeve klimatike dhe modeleve ciklike të motit La Niña nxitën përmbytje katastrofike në të gjithë Afrikën jugore gjatë muajit të kaluar, duke vrarë 200 njerëz dhe duke prekur qindra mijëra të tjerë.

Raporti tregoi se intensiteti i ngjarjeve të tilla ekstreme të reshjeve është rritur me 40% që nga kohërat para-industriale – një shenjë e qartë se temperaturat më të ngrohta të oqeanit të lidhura me emetimet e gazrave serrë janë pjesërisht fajtore – dhe se kushtet aktuale të La Niña i kishin përkeqësuar gjërat.

La Niña përfshin ftohjen e përkohshme të temperaturave në Oqeanin Paqësor qendror dhe lindor. Organizata Botërore Meteorologjike ka parashikuar një La Niña të dobët në këtë cikël, por paralajmëroi se temperaturat e detit më të ngrohta se normale të lidhura me ndryshimet klimatike po rrisin mundësinë e përmbytjeve dhe thatësirave.

Në Kinë, Administrata Meteorologjike zbuloi se temperatura mesatare vjetore arriti një rekord për të dytin vit me 10.9 gradë Celsius (51.6 gradë Fahrenheit), me ditët me temperaturë më të lartë të regjistruara ndonjëherë.

Analisti Baton Haxhiu, duke komentuar idenë e një forumi intelektualësh për të bashkuar partitë e opozitës, u shpreh në emisionin “Të Paekspozuarit” në MCN TV se e sheh të pamundur që partitë e reja që janë shkëputur nga PD-ja dikur të bashkohen sërish me PD që drejtohet ende nga Berisha që vijon ende me diskursin e viteve më parë.

Pjesë nga biseda  

Baton Haxhiu: Ka një papajtueshmëri me këto që kërkohen tani. Nëse këto parti kanë dalë nga PD për shkak të lidershipit është e vështirë të hyjnë brenda një ombrelle me lidershipi të pandryshuar.  Për faktin se dy partitë e mëdha e kanë ndërtuar sistemin vetëm mosbesimi është i madh, duhet të krijoni besimin pastaj pajtueshmërinë. Unë besoj se rruga e partive të vogla është të rriten dhe PS të zbresë nën 70. Ideja që të zbresësh nga monopoli të bën me pak autokrat, më pak arrogant dhe shumë më i ndjeshëm. Ne e kemi një lider opozitar ku ti përfaqëson rininë, diskursi nuk ka ndryshuar dhe si ta bindësh Qorin, Shehajn me diskurs të pandryshuar dhe ky e mban peshën e mossuksesit të shndërrohet në parim të ndryshimit. Nuk ka fjali që më bindin. Po të isha unë në krye të një partie opozitare do e shëroja veten nga bashkimet artificiale dhe të bëja çmos ta rrisja kuotën time në 5 deputetë. Kur synon rritjen dhe bashkimin e pranon me vështirësi se çdo përpjekje ka qenë pafuqi dhe njeriu provon vetë.

Besart Xhaferri: Argumenti juaj filloi me atë që parti të ndryshme opozitare janë shkëputur nga PD-ja. E palogjikshme.

Baton Haxhiu: Besueshmërinë më sqaro ti.

Besart Xhaferri: Kemi një rast ku LSI u shkëput nga PS dhe në 2013 bëri sërish koalicion që ndodhi ndryshimi. Pra ekziston shkëputja dhe grupimi.

Agron Shehaj: Nuk është për t’u marrë shembull.

Besart Xhaferri: Nuk e marr shumë nga ana morale. Batoni ka qenë pro atij bashkimi në 2013.

Baton Haxhiu: Arsyeja pse LSI është bashkuar është se e ka patur një moment krize morale që ka qenë e atakueshme nga PS-ja. Demonstrata e 21 janarit ishte pikërisht për shkak të Ilir Metës. E vetmja arsye për t’u larguar nga ajo ishte bashkimi me PS-në.

Besart Xhaferri: Për diskursin e z. Berisha që mund ta ketë tradicional e jep përgjigjen elektorati në zgjedhje të ndershme dhe të lira.

Ylli Rakipi: Kush i cakton nëse zgjedhjet janë të ndershme dhe të lira?

Besart Xhaferri: Raporti i OSBE/ODIHR-it. Pra siç po thoja për diskursin vendos elektorati. Mund të ketë një diskurs më modern z. Shehaj, por nuk qëndron këru problem, por te farsa elektorale. Bëji me kushtet e Maqedonisë së Veriut zgjedhjet. Unë kisha përballë në listën e mbyllur më 11 maj ministrin e Brendshëm që kishte vetëm 3 muaj përvojë dhe unë kisha 5 vite në media dhe do të përqafohesha nga ajo zonë, u përqafua Ervin Hoxha. Nëse do të shkoja si Besart Xhaferri qytetar dher Ervin Hoxha si qytetar dhe jo si ministër, do të jetë e kundërta. Unë nuk kisha diskurs të vjetër.

Miss Albania rikthen në vëmendje një nga momentet më domethënëse të pas viteve ’90 në Shqipëri. Valbona Selimllari ishte fituesja e parë e Miss Albania, e kurorëzuar në konkursin e parë të bukurisë të organizuar në vend pas rënies së komunizmit. Ajo u përzgjodh mes shumë konkurrenteve, duke shënuar një moment historik, edhe pse fillimisht nuk ishte regjistruar vetë për të marrë pjesë në konkurs. Të ftuar në studion e emisionit “Në Kohë Reale” personazhe të njohur si Rajmonda Bulku, Petri Bozo, Milto Kutali, Drita Ziri folën për konkursin e parë të bukurisë në Shqipëri.

Valbona Selimllari në një linjë direkte me studion e emisionit ka kujtuar emocionet e asaj kohe, duke e cilësuar konkursin si një simbol të ndryshimit dhe hapjes së shoqërisë shqiptare.

“Kur e shikoj veten emocionet janë ende aty, dhe ka qenë një moment shumë i veçantë. Unë kam hyr me vonesë në miss dhe e kam treguar shpesh dhe në momentin që hyra i thashë vetes: “Bona shijoje dhe mëri më të mirën”, dhe nuk kam pretenduar asgjë tjetër, çmimi nuk ishte në pritshmëritë e mia”, theksoi Selimllari.

Në një videomesazh për emisionin, gazetari Blendi Fevziu, bashkëorganizator i “Miss Albania 1991”, ka ndarë prapaskena nga organizimi i konkursit të parë, duke theksuar vështirësitë dhe entuziazmin e një kohe kur gjithçka po ndërtohej nga e para.

“Më kujtohet shumë mirë duke qenë se kam qenë një ndër 3 organizatorët në atë kohë të Miss Albania 1991 dhe unë sapo kisha fillor drejtor i Drejtorisë Rinisë dhe Sporteve në Ministrinë e Kulturës, Blendi Gonxhja ishte drejtues i Shoqatës Studentore Shqiptare dhe me ne u bashkua Vera Grabocka dhe Ylli Pepo për të krijuar një katërshe për të organizuar spektaklin e parë të bukurisë në Shqipëri. Më kujtohet aazeta “La Republica”, gazeta më e madhe në Itali kishte sjellë një të dërguar special për të bërë një reportazh dhe ai thoshte se fituesja e Miss Albania mbas gjithë brohoritjeve dhe suksesit u larguar për në shtëpi në këmbë në një apartament që nuk kishin drita prej 3 javësh. Imagjinoni në çfarë kushtesh është organizuar por gjithsesi është një kujtim shumë i bukur”, tha Fevziu.

Ndërsa aktorja Rajmonda Bulku, anëtare jurie në atë edicion historik, ka kujtuar përgjegjësinë dhe rëndësinë e vendimeve të tyre në një kontekst të ri social dhe kulturor.

“Ne ishim rini që kishim prekur në ato vite, ishim gra të reja dhe kam qenë shumë pranë në juri me Mariana Eskin ne në atë përzgjedhjen kishe vajza të reja dhe të bukura dhe i adhuronim sepse ishte një guxim për kohën.  Kishte konkurrencë dhe ishin vajza shumë të bukura që dolën në vendin e dytë dhe tretë por ishte një analizë e jashtëzakonshme se pse ne zgjiodhëm, Bonën. E kemio analizuae që nga flokët deri tek ecja, këmbët për të justifikuar fitoren dhe kjo tregon se ne nuk gabuam”, u shpreh Bulku.

Milto Kutali, Dekan i Universitetit të Arteve, u ndal te rëndësia e momentit historik kur u organizua konkursi i parë i bukurisë në Shqipëri. Sipas tij, ajo që i ka bërë më shumë përshtypje ishte vetë guximi i organizatorëve për të sjellë një event të tillë në atë periudhë.

“Ajo që më ka bërë përshtypje ishte momenti dhe ishte një mrekulli që organizatorët sollën një konkurs të tillë”, tha Kutali.

Nga ana tjetër, regjisori dhe producenti Petri Bozo kujtoi vështirësitë e mëdha të kohës, duke theksuar se organizimi i konkursit u zhvillua në kushte tejet të vështira.

“Në atë kohë i gjithë vendi ishte shumë rrëmujë dhe nuk arrinim dot , problemi i financimit ishte një problem më vete. Ka qenë një vit i vështirë”, theksoi Bozo.

Ndërsa Drita Ziri, Miss Shqipëria dhe Miss Earth 2023, solli perspektivën e brezit të ri mbi rëndësinë e këtij konkursi sot. Ajo e cilësoi Miss Shqipëria si një platformë të rëndësishme zhvillimi profesional.

“Miss Shqipëria është një platformë që të ekspozon drejtë kësaj fushe sic është modelingu apo TV. Miss Shqipëria është një shkollë dhe të ndihmon që nga mënyra se si qëndron para kameras, mënyra se si shprehesh je me një skuadër që punojnë për ty gjatë të gjithë kohës”, tha Ziri.

Skenaristi i “Miss Albania ’91”, Engjëlli Ndocaj, ka ndarë në një lidhje të drejtpërdrejtë detaje nga organizimi i konkursit të parë të bukurisë në Shqipëri. Ai u shpreh se vështirësia kryesore gjatë përzgjedhjes së vajzave ishte kundërshtimi i prindërve, më shumë se vetë gara.

Ndocaj kujton se Bona ishte e fundit mes 104 vajzave që aplikuan për të kandiduar, ndërsa theksoi se nisma u ndërmor prej tij, nën drejtimin e Yllo Pepos, atëherë drejtor i RTSH-së, në bashkëpunim me Vera Grabockën, ndërsa më pas ekipit iu bashkua edhe Petri.

“Në atë kur ne zgjidhnim vajzat kishim problem edhe prindërit më shumë se çdo gjë tjetër. Bonën e kujtoj të fundit midis 104 vajzave që kërkonin të kandidonin. Aventurën e nisa unë i udhëhequr nga Yllo Pepo që në atë kohë ishte drejtor i RTSH, Vera Grabocka dhe ekipit tonë iu bashkua dhe Petri. Ne të 4 e nisëm dhe vazhduam. Miss Albania ’91 është zhvilluar me 31 janar të vitit ’92. Unë sapo kisha parë Miss Italia, gjë që më frymëzoi edhe për skenarin dhe i përshtata me situatën e Shqipërisë”, u shpreh Ndocaj.

Miss Albania mbetet jo vetëm një konkurs bukurie, por edhe një dëshmi e ndryshimeve të mëdha shoqërore dhe kulturore në Shqipëri, që nisën pikërisht në fillim të viteve ’90.

Në emisionin “Të Paekspozuarit” në MCN TV, është diskutuar propozimi i Ermal Hasimes, për bashkëpunimin e opozitës, për të arritur disa qëllimet të përbashkëta.

Mirëpo edhe në studio, u duk qartë se bashkimi nuk duket i mundur edhe mes partive të reja, jo më mes tyre dhe Berishës.

Sekretari i Përgjithshëm i Shqipëria Bëhet, Elton Laska, debatoi me Agron Shehajn, për gjyqin me Lapajn, pavarasisht se kërkojnë bashkëpunim mes partive opozitare dhe janë e vetmja nga partitë e reja që duket se po i japin përgjigje pozitive nismës.

Debati:

Elton Laska: Dëgjova, bashkim, koalicion, nuk ka as bashkim me PD dhe as koalicion. Ka negociata, që flasin se si të ndryshojmë Kodin Zgjedhor. Negociata si të rrëzojmë këtë qeveri të korruptuar. Këto janë gjërat kryesore. Nëse më thoni të presin qytetarët që partia Shqipëria Bëhet, ose partitë e reja, të rriten dhe të bëhen të mëdha, për të ndryshuar ato që kanë sjellë Shqipëriënë, duhet të presim edhe 20 vjet të tjera. Nuk ka kohë për të pritur 20 vjet.

Agron Shehaj: Nëse do të fshihemi pas gishtit, e bëjmë. Por duhet të jemi të sinqërtë, këta presin që partitë e vogla të rriten, kushdo që nuk do të ndërtojë gjë nga fillimi, e ka zgjedhjen, kanë Partinë Demokratike. PD është e madhe por duhet të bëhet më e madhe për të fituar zgjedhje. Kush ka merakun, se thotë partitë e vogla duhet të rriten…

Elton Laska : Nuk është ky problemi, se ku e keni dëgjuar e dini ju. Unë thashë, nëse Shqipërisë i duhet ndryshimi i Kodit Zgjedhor…

Agron Shehaj: Unë citova atë që thatë ju. Një parti ose qëndron me parimet e veta, ose gjen rrugën e shkurtër.

Elton Laska: Ne do ti kërkojmë çdo partie që është për të ndryshuar Kodin Zgjedhor dhe për të rrëzuar Ramën, të bashkohet në shesh.

Baton Haxhiu: Mbi ç’bazë e kërkon?

Elton Laska: Jam përfaqësues i Shqipëria Bëhet.

Agron Shehaj: Është në siklet.

Elton Laska: Zoti Shehaj, nuk je i mbinatyrëshm të dish kush është në siklet. Je dënuar nga gjykata.

Baton Haxhiu: Ke një kontradiktë serioze. Po thua që si parti kërkojmë nga partitë dhe qytetarët të bashkohen. Pas një minute, thua çfarë na duhesh ti se të ka dënuar gjykata? Ti e shkatërron për një minutë idenë. Më vjen keq për kontradiktën tënde.

Agron Shehaj: Njerëzit kur janë në politikë duhet të jenë koherent me qëndrimet e tyre. Nuk e ke mësuar koherencën nga kryetari yt, që tha po morëm një mandat, nuk e marr, pastaj latë nam për atë mandat. Mos gënje haptaz, sepse ai gjykatësi ka vendosur, që çfarë kam thënë unë për kryetarin tënd, ka thënë që nuk ishte shpifje.

Elton Laska: A je gjobitur?

Agron Shehaj: Fol me Tikun të të sqarojë.

Baton Haxhiu: Brenda idesë së bashkimit si mund të flasim për këtë?

Ermal Hasimja: Ne kemi biseduar me PD-në dhe aleatët e vet tradicional, që kanë qenë të hapur dhe të gatshëm të ulen në tryezë. Edhe Shqipëria Bëhet ka rënë dakord në parim të marrë pjesë në tryezë. Ka paraqitur kërkesat e veta, por janë treguar seriozë në të gjithë diskutimet. Të njëjtin diskutim kemi patur me Dashamir Shehin e LZHK. Gjithashtu edhe me lëvizjen Diaspora për Shqipërinë e lirë. Nuk po fus aleatët e zakonshëm pastaj të PD. Kjo është vetëm pjesë politike, partiake. Është edhe pjesa e faktorëve të tjerët ë shoqërisë civile. Aty do të jetë 95% e opozitës, e mbledhur në të gjithë senset. Kjo nuk është se ka ndonjë qëndrim negativ, ndaj asaj që dëshiron të bëjë zoti Shehaj dhe zoti Qori. Nuk dëshirojnë të bashkëpunojnë, i respektoj plotësisht, nuk i akuzoj për diçka, asnjë lloj problemi nuk ka, nuk kam akuza por argumenta. Nuk janë por nuk është problem, kanë rrugën e tyre. Obkjetivat i kemi të përbashkëta.

Ashtu si edhe për reformën territoriale, ndonëse me një përqindje më të vogël, shqiptarët mendojnë se opozita duhet të marrë pjesë edhe në Komisionin e Posaçëm për Reformën Zgjedhore.

Në sondazhin e kësaj të hënë ‘Zëri i Shqiptarëve’ në ABC News, 70.3% e shqiptarëve shprehen se opozita duhet të marrë pjesë në këtë komision, pasi do t’i bënte zgjedhjet e ardhshme më të mira. 19.8% mendojnë të kundërtën, opozita nuk duhet të marrë pjesë në Komisionin e Posaçëm për Reformën Zgjedhore, pasi do të shërbente si fasadë e mazhorancës, ndërsa  9.9% e të tjerë janë të dyzuar.

Kampioni në këtë sondazh është 2488 banorë të rritur të vendit. Linku i pyetësorit u shpërnda me SMS të rastësishme në mënyrë proporcionale në qytetet dhe fshatrat e Shqipërisë dhe  u plotësua elektronikisht në mënyrë krejt anonime nga të anketuarit. Kampioni u ripeshua statistikisht për t’i përfaqësuar sa më mirë 1.9 milionë banorët e rritur të Shqipërisë nga pikëpamja gjeografike, demografike, arsimore, dhe politike, me një marzh gabimi statistikor për kampionin e plotë: +/- 2%.

Autoritetet italiane kanë nisur hetimet për një afresk në një bazilikë romake pasi punimet e fundit të restaurimit dukej se e paraqisnin kryeministren italiane Giorgia Meloni si një engjëll ose si një figurë e mitologjisë greke që përdoret shpesh nga monarkistët italianë.

Tiparet e realizuan nga i njëjti piktor që kishte krijuar dizajnet origjinale 20 vjet më parë për Bazilikën e San Lorenzo in Lucina, një kishë e lidhur historikisht me figurat e krahut të djathtë të politikës romake.

Anëtarë të opozitës kërkuan hapjen e një hetimi për të siguruar “qartësi mbi të gjitha përgjegjësitë”, ndërsa Ministria e Kulturës e inspektoi vendin gjatë fundjavës. Zyrtarë lokalë të Ministrisë së Kulturës thanë se “do të verifikojnë nëse është bërë një kërkesë për dekorimet origjinale të vitit 2000 dhe nëse ekzistojnë skica apo fotografi”, duke qenë se kisha është pronë e Ministrisë së Brendshme.

Në përpjekje për ta zbutur situatën, Meloni publikoi një foto të afreskut në Instagram, duke e trajtuar episodin me ironi, me mbishkrimin:

Jo, definitivisht nuk jam si një engjëll.

Dioqezat lokale u përpoqën të distancoheshin nga nënkuptimet politike të veprës të dielën, 1 shkurt, duke u bërë thirrje njerëzve të mos e përdorin artin fetar për qëllime politike.

Publikimi i dosjeve Epstein ka marrë një vëmendje të madhe në të gjithë botën.

Analisti Arjan Curri është shprehur se perversitet të këtij niveli ka edhe në Shqipëri dhe në çdo elitë të shoqërive të vogla.

Ai gjithashtu shton se perversiteti i njerëzve të pasur, është si një ideologji e tyre për të kaluar vdekjen.

“Gjërat tronditëse janë dhe sa herë që sheh diçka, tronditesh se i shikon live. Por kjo nuk është asgjë e re.

Këta tani janë zotat e modernitetit. Nëse pushtetin yt shkon në maksikmum, atëherë ti i ke të gjitha, e vetmja gjë ku ty të rri mendja është perversiteti, sepse nuk të japin kënaqësi këto gjërat e tjera.

Edhe në Shqipëri ka nivel pervesiteti të Epstein. Njerëz që i kanë të gjitha dhe e vetmja gjë që i mungon është perversiteti. Edhe shoqëritë e vogla krijojnë elita, këto mendojnë se nuk i kap ligji dhe mund të bëjnë çdo gjë.

Në përgjithësi njerëzit aty shkojnë. Në vitin 42 Para Krishtit, ishte një perandor në Romë, August. Ai ka një shtëpi në ishullin Kapri. Në atë ishull ishte një Vila Jupiter. Aty thuhet se vinte djem të mitur që kryenin marrëdhënie dashurore dhe të pasurit i shihnin.

Ose shkon deri në një nivel dhe thua boll, ose e ndalon veten dhe ata të heqin. Konservatorët më të mëdhenj, besimtarët më të mëdhenj, bashkohen me liberalët më të mëdhenj.

Edhe këta që bëjnë perversitetin mendojnë se me këtë do kalojnë vdekjen. Iluzion është ai, prapë do vdesin. Por vdesin me një ide tjetër nga ne të tjerët”, tha Curri.

Analisti Flogert Muça ka bërë një analizë mbi qëndrimin aktual të Partisë Demokratike, duke e cilësuar sjelljen e opozitës si një teatër politik.

I ftuar në emisionin “3D” në RTSH, Muça u shpreh se PD ndodhet në një dilemë të madhe midis retorikës së ashpër për “regjimin” dhe uljes në tryeza institucionale me po këtë regjim.

Sipas Muçës, kjo sjellje e dyfishtë e bën opozitën të pabesueshme para militantëve të saj.

“Militanti i PD-së sheh paradite që drejtuesit thonë se Rama mundet me shesh e ngujim, ndërsa pasdite udhëheqësit ulen prapa kuintave me Damianin dhe Maznikun. Kjo i bën të pabesueshëm,” deklaroi ai.

Analisti është i bindur se bojkoti apo përplasjet në komisione janë thjesht fasadë. Ai theksoi se marrëveshja mes palëve tashmë është bërë nën rrogoz.

“Kjo që shohim është teatër. Marrëveshjet bëhen poshtë, teatri bëhet në sipërfaqe,” tha Muça, duke shtuar se Berisha, i cili prej katër vitesh premton revolucion dhe qeveri teknike, nuk mund të presë që Rama t’i japë pushtet vullnetarisht.

Në fund, Muça bëri edhe një krahasim numerik mes dy drejtuesve të PD-së, duke evidentuar rënien e fuqisë së opozitës:

“Ishin 63 deputetë me Lulzim Bashën, tani me Berishën kanë mbetur 40 deputetë.”, tha ai.

Deputeti demokrat Luan Baçi ka deklaruar se grupi parlamentar i Partisë Demokratike ka rënë dakord që pjesëmarrja në komisionet e Reformës Zgjedhore dhe Territoriale është e domosdoshme, pavarësisht mungesës së garancive nga mazhoranca, sipas tij.

Në emisionin “3D” në RTSH, Baçi theksoi se opozita nuk duhet të lërë hapësirë për justifikime nga mazhoranca, e cila sipas tij, mund të përdorë mospjesëmarrjen e PD-së si arsye për të vijuar e vetme me reformat.

“Pjesëmarrja në Reformën Territoriale dhe atë Zgjedhore nuk ka asnjë garanci nga kjo mazhorancë se do të jetë korrekt, pasi e kanë treguar që dalin nga rruga. Por kanë theksuar të gjithë që pjesëmarrja është e domosdoshme për të mos i lënë hapësirë që këta të justifikohen me mospjesëmarrjen e opozitës në komision dhe të thonë që ne nuk kemi çfarë bëjmë dhe do vazhdojmë me reformën se u duhet qytetarëve,” tha Baçi.

Ai shtoi se edhe pse pjesëmarrja është formale, ajo mbetet e domosdoshme për t’i treguar qytetarëve se opozita nuk bojkoton procesin.

“Marrja pjesë në këto komisione është formale sepse kjo mazhorancë nuk do t’i qëndrojë dhe do të devijojë rrugës, dhe në fund fare mund të dalin me një variant të tyre për t’u votuar në Parlament. Por marrja pjesë është e domosdoshme për t’u thënë qytetarëve që ne nuk bojkotojmë, jemi atje dhe do paraqesim projektet tona dhe të shohim sa do e respektojë kjo mazhorancë,” u shpreh deputeti demokrat.

Publikimi i dosjeve të çështjes Epstein nga Departamenti i Drejtësisë së SHBA-së, ka krijuar një reagim të gjerë nga populli amerikan, por jo vetëm.

Gazetarja e VOA-s, Kejda Kostreci, në një lidhje direkte me Skype, u shpreh në Top Story se publikimi i këtyre materialeve ishte një nga kërkesat më të mëdha të popullit amerikan.

“Këto faqe dolën një muaj më vonë seç pritej. Departamenti i Drejtësisë tha që do i publikonte dokumentet në dhjetor. Më pas thanë që donin të kujdeseshin për emrat e viktimave. Mes këtyre dokumenteve e përmendet emri i Trump. Shumica që donin për publikimin e këtyre dokumenteve ishin për të parë nëse Trump ishte pjesë e këtyre aktiviteteve.

Edhe pse ai është përmendur në këto dokumente, vijnë nga disa të dhëna që FBI i kërkonte nga publiku, por ato nuk kanë prova që të provojnë se akuzat ndaj Trump se ai ka kryer abuzime janë të vërteta.

Ana tjetër është reagimi i publikut amerikan, si i djathtë dhe i majtë, kanë kërkuar transparencë. Ishte një nga ato pikat që mbështetësit e MAGA-së ishin në një mendje me pjesën tjetër të amerikanëve që këto informacione të dilnin.

Pushteti nuk paska as hije të majtë e as të djathtë. Këtu bëhet fjalë për njerëz të fuqishëm të djathtë e të majtë, brenda dhe jashtë SHBA-së. Këtu bëhet fjalë për perversitetin e elitave. Nuk bëhet fjalë për ndonjë prirje politike më shumë, sesa bëhet fjalë për një prirje të të pasurve nga persona që mendonin se këto gjëra nuk do i vinin nga pas”, u shpreh Kostreci.

Analisti Arben Meçe tha për Real Story se është e papranueshme që një gjyqtar apo një strukturë paralele me Gjykatën Kushtetuese të ngrejë dyshime mbi autonominë e vendimmarrjes së saj.

Ai theksoi se ky qëndrim pasqyron një realitet shqetësues në sistemin e drejtësisë, ku gjyqtarët kërkojnë benefite nga drejtësia por nuk e njohin atë. Meçe tha se trupa e gjyqtarëve kushtetues duhet ta rrëzojë çështjen.

“Që një gjyqtar, aq më tepër një sistem gjyqësor paralel me GJK-në, të arrijë në argumentimin e vet të ngrejë dyshimin e funksionimit të GJK-së, që vendimmarrjet nuk i ka autonome por që janë produkt i ndikimit të qeverisë, dhe ne si të zgjuar gjetëm atë moment dhe ne do bëjmë gol. Me kaq kjo seancë është e mbyllur, sepse ka goditur parimin e marrëdhënies, nuk lejohet ky qëndrim.

Nuk është e rastësishme, është pasqyrim i realitetit në sistemin e drejtësisë, që kërkojnë benefite nga sistemi por nuk e njohin. Atyre u bëhet presion me lekë dhe vendimmarrjet e tyre janë të ndikuara nga leku. Kur ai si gjyqtar gjen një moment për vendimmarrje, ku është trupa më e besueshme e shtetit, kur ajo e vë në këtë mekanizëm, këta që kanë relatuar atje duhet të futen nga ILD. Me kaq sa ka referuar, trupa e gjyqtarëve kushtetues duhet ta rrëzojë çështjen vetëm nga paragjykimi.”

Grupi parlamentar Multietnik ka rikonfirmuar mbështetjen për Lëvizjen Vetëvendosje dhe Qeverinë Kurti 3.

Në legjislaturën e dhjetë, ky grup do të jetë në përbërje të 8 deputetëve, dy nga komuniteti turk, dy nga ai boshnjak, dhe nga një nga komunitetet egjiptian, ashkali dhe serb. Ergul Mazrek dhe Fatma Taçi nga KDTP, Emilja Rexhepi dhe Rasim Demiri nga NDS e VAKAT, Elbert Krasniqi nga IRDK, Artan Asllani nga PSA, Nenad Rashiq nga SPO dhe Erxhan Galushi nga LPRK do të renditen krah partisë më të madhe.

Kryetari i IRDK, njëherazi ministër në detyrë, Elbert Krasniqi, konfirmoi për A2 CNN se votat e tyre do të jenë për Albin Kurtin. Tashmë përpos 57 deputetëve të saj, Lëvizja Vetëvendosje llogarit edhe në 8 deputetët e komuniteteve duke siguruar kështu të paktën 65 vota në mazhorancën e re pas zgjedhjeve të dhjetorit.

“Qeveria e ardhshme është e qartë që mund të themelohet shumë lehtë sapo të bëhet certifikimi i zgjedhjeve menjëherë mund të thirret seanca konstituitive, edhe përsa i përket procedurave të seancës konstituitive janë shumë vendime të Gjykatës Kushtetuese ndoshta me përjashtim të nënkryetarit serb të gjitha të tjerat janë të qartësuara që mund të kryhen shumë shpejtë”, tha analist Adrian Zeqiri.

Ndonëse nuk pritet të ketë vështirësi më formimin e Kuvendit dhe Qeverisë së re, me urgjencë pritet të miratohet edhe buxheti i këtij viti. Marrëveshjet ndërkombëtare do të kërkojnë 80 vota dhe ato pritet të sillen në seancë para çështjes së presidentit. ADRIAN ZEQIRIANALIST POLITIK

“Ka gatishmëri prej opozitës që të votojnë marrëveshjet ndërkombëtare të cilat e kanë dëmtuar shumë Kosovën. Buxheti mund të kalohet me 61 vota prej partisë më të madhe. Partia më e madhe nuk ka nevojë për partnerë koalicioni përveçse me komunitetet joserbe. Është shumë e qartë. Çështja vjen të presidenti që vjen në agjendë në fund të shkurtit”, vijoi analsit Zeqiri.

Në Kuvendin e Kosovës janë 20 ulëse të rezervuara për komunitetet. Përpos grupit që do të mbështesë Kurtin, 9 deputetë i përkasin Listës Serbe, ndërsa janë edhe deputetja boshnjake Duda Balje, deputeti tjetër egjiptian Veton Berisha dhe ai i komunitetit goran Adem Hoxha.

Bashkëkryetari i Komisionit për Reformën Territoriale, Arbjan Mazniku, në një intervistë për Top News, ka shpjeguar rrugën që do të ndiqet me reformën territoriale në 61 bashkitë e vendit.

Ai theksoi se komisioni, ku aktualisht janë vetëm anëtarët e Partia Socialiste, do të ndahet në tre grupe pune, të cilat do të zhvillojnë dëgjesa në nga katër qarqe secili. Sipas Maznikut, në këto dëgjesa do të përfshihen banorët, përfaqësues të bizneseve, stafe akademike dhe aktorë të tjerë lokalë. Më pas, të dhënat e mbledhura do të analizohen për të vlerësuar se çfarë funksionon dhe çfarë nuk funksionon në strukturën aktuale të bashkive.

“Janë dy shtyllat kryesore ku do të punohet: eficienca e bashkive dhe shërbimet që ato ofrojnë,” tha Mazniku. Sipas tij, parimi themelor është që shërbimet të jenë sa më pranë qytetarëve, bashkë me mundësinë reale për t’i ofruar ato në mënyrë funksionale.

“Duhet parë se ku është pika më e afërt e bashkimit në këtë proces dhe nëse një strukturë e caktuar është realisht e aftë ta ofrojë shërbimin,” u shpreh ai.

Sa i përket negociatave me Partia Demokratike për përfshirjen e opozitës në reformë, Mazniku deklaroi se PD nuk është paraqitur në tre mbledhje radhazi, ndërsa e njëjta situatë është konstatuar edhe në Konferencën e Kryetarëve.

“Nuk kemi kohë për të humbur. Ose reforma mbyllet në korrik, ose shtyhet pas vitit 2027, duke humbur një dekadë të tërë procesin,” tha ai.

Mazniku shtoi se reforma territoriale lidhet ngushtë me procesin e integrimit europian, pasi ekziston rreziku i humbjes së financimeve. “Në vende të tjera u janë dashur deri në 10 vite për të përfituar fondet për bashkitë. Ka financime për bashkitë, por ato nuk jepen automatikisht. Fillimisht projekti shkon në Bashkimi Europian, por nëse nuk ke kapacitetet, nuk mund të çosh projekte të zbatueshme. Nëse e bëjmë reformën sot, pas dy ose tre vitesh bëhemi gati për t’i përthithur këto fonde,” përfundoi Mazniku.